دعواتكم لزميلنا المفكر د.الباقر العفيف بالشفاء العاجل
|
|
 مطلوب:حكايات واغاني للاطفال ومواد ومساهمات اخري
|
الاخوات والاخوان
احتاج الي دعمكم بارسال اي مواد بها حكاوي واغاني سودانية للاطفال؛ كما اي مواد تربية الطفل - وخصوصا الطفل السوداني - ؛ وكذلك اي برامج مجانية - شيروير او فري وير - تعليمية للاطفال؛ وكذلك اي لعبات الكترونية للاطفال.
مطلوب ايضا مساهمات الاطفال وخصوصا فيما يتعلق بالرسم؛ الكتابة الادبية؛ الاراء والتعليقات الطريفة؛ الصور المبتكرة؛ الخ الخ ..
الموادمطلوبة في اللغتين العربية والانجليزية؛ واي لفات سودانية اخري؛ وكذلك في اللغات الحية الاخري ..
مع شكري مقدما ..
عادل
|
|
 
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
واحد اتنين تلاته
البنريدو تاتا
البرنده فاتا
فيهو شبه ابوهو
امو بس حياتها
****
دق دق
عندي مدق
سمح للدق
يكبر يا ناس
حلو كالاناناس
وكمان وناس وبقول الحق
دق دق
****
اشتقت ليكي اجضمك
واشتقت ليكي اقدمك
واشتقت ليكي ارسلك
قدامي تجري احصلك
للروضه امشي اوصلك
مرات افكر ريده بس
لمن تقومي اكسلك
كبرتي سافرتي وبقت
بيناتنا لاسلكي وسلك
****
دي من كتابات محجوب شريف تبتبات اغنيات امنيات للاولاد والبنات
ارشح ليك الشريط بشده جميل ومعبر وبسيط شديد وقريب للاطفال
تاني في شريط كان طلعوه جمعيه حمايه البيئه وفيهو اغاني جميله
اتمني تقدر تتحصل عليهم وان شاء الله اتمكن انزل منهم مقاطع
امنيه في الخاطر ويب سايت للطفل السوداني اتمني اقدر عليهو يوما ما
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
ارجو تصحيح هذه:
يا طالع الشجرة
جيب لي معاك بقرة
البقرة حلابة
تحلب تعشيني
بالمعلقة الصيني
المعلقة اتكسرت
والبقرة اتوفت ..
مشيت لي بيت الله
لقيت حبيب الله
قاعد لو في بنبر
ماسك حمام اخضر
يسقيهو في السكر
قال لي اتفضل
قلت ليهوما بقدر
يا ريتني كان ضقتو
حتي النبي زرتو
حتي النبي زرتو
هذا نص سريالي غريب؛ لم افهم منه الكثير؛ وتحبه اماليا جدا وتردده - النصف الاول فقط من النص لا سباب لا اعلمها -
احتاج لتدقيق النص ومعلومات اكثر عنه ..
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
دوها يا دوها
بير زمزم قدوها
والحجاج شربوها
بابا سافر مكه
جاب لى حتة كعكه
والكعكه جوه الصندوق
والصندوق عاوز مفتاح
والمفتاح عند النجار
والنجار عاوز فلوس
والفلوس عند السلطان
والسلطان عاوز عروس
والعروس عاوزه المنديل
والمنديل عند الجهال
والجهال عاوز اللبن
واللبن عند البقر
والبقر عاوز حشيش
والحشيش تحت الجبل
والجبل عاوز المطر
والمطر عند ربنا
ربنا يا ربنا
ربنا جيب المطر
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: وانجا)
|
من احجية دار العشير؛ والتي ينقلب فيها محمد الس نسر لانه تنفس اثناء شرابه من القلة في بيت الساحرة؛ ثم كان ياتي لزيارة اخته دار العشير التي اجبرها زوج اختهم الكبري علي العمل كخادمة؛ وهددها الا تخطر اختها بشخصيتها الحقيقية مخافة القتل
محمد :
حباب حباب يا دار العشير اختي
حالك كيفنو يا دار العشير اختي
دار العشير:
حال حال السواد يا محمد اخوي
شرابي من قحف جداد يا محمد اخوي
واكلي مع الكلاب يا محمد اخوي
ونومي فوق كوم رماد يا محمد اخوي
حالك كيفنويا محمد اخوي ..
محمد:
حالي حال السرور يا دار العشير اختي
بشرب من سبعة بحور يا دار العشير اختي
وباكل من عجوة كردفان يا دار العشير اختي
ونومي فوق قوز رمال يا دار العشير اختي
حالك كيفنو يا دار العشير اختي ..
ثم يرمي لها بالعجوة ..
تنتهي القصة كالعادة نهاية سعيدة..
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
برلة برلة برلليلة
المرسال جاكم
برلة برلة برلليلة
عايزين ايه
برلة برلة برلليلة
عايزين عروسنا
برلة برلة برلليلة
عروسكم مين؟
برلة برلة برلليلة
عروسنا (فلانة)
برلة برلة برلليلة
بتجيبو ليها ايه
برلة برلة برلليلة
بنجيب ليها دبلة
برلة برلة برلليلة
ما بكفيها
برلة برلة برلليلة
بنجيب ليها ساعة
برلة برلة برلليلة
ما بكفيها
برلة برلة برلليلة
بنجيب ليها سلسل
برلة برلة برلليلة
ما بكفيها
برلة برلة برلليلة
بنجيب ليها ربع الدنيا
برلة برلة برلليلة
ما بكفيها
برلة برلة برليلة
بنجيب ليها نص الدنيا
برلة برلة برليلة
ما بكفيها
برلة برلة برليلة
بنجيب ليها كل الدنيا
برلة برلة برليلة
هاكم ليها
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: محمد صالح علي)
|
الأخ عادل،
كلامك عن العنف فى الكلمـات وضـرورة إعادة الكتابـة مهـم جـدا.. فطبعـا ما مفروض تكون أى فرصــة لذكـر دم وسيـف وكتل لأطفال يفـع.
ليس هـذا فحسب، وإنما أقتـرح إعادة توطين هـذا القصص والأحاجى، localization حتى يفهمـا أطفال المغتـربين الذين ولدوا وينشـأون فى المهجـر.. أقتـرح تكوين لجنـة لحصـر ومراجعـة وتقويـم هـذا الكم الهائل من أدب الأطفال، والذى فى الطـريق، ثم تصل هـذه اللجنـة إلى إعادة صياغـة ما يحتاج إلى المراجعـة من هـذه المادة.
كما أقتـرح أن يضم المشــروع كل الثقافـات واللغات فى الســودان، وإلا فسيكـون من الصعب علينـا أن نسميـه بثقافـة الطفل (الســودانى)
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: أبوالريش)
|
الاخ ابو ريش
تحياتي ..
كنت قد بدات عمل التغييرات في الحكاوي عندما كنت احكيها لاولاد اخواتي في عطبرة؛ حيث كنت اشذبها من الالفاظ العنيفة والمعاني السلبية؛وكان هذا كله يتم "اد هوك" هكذا؛ الامر الذي كان يعرضني لمساءلات شديدة اذا ما حكيت القصة بطريقة اخري اواستخدمت كلمات ا اخري من قبل الاطفال؛ اصحاب الذاكرة الخرافية..
كا ن ذلك في زمن غبر؛وقد حاولت في التسعينات ان اسجل ما اذكره من حكاوي ؛ ولكن ضاع الكراس الذي كنت سجلت فيه عددا من الحاكوي؛ ولذلك اسال اليوم عن مؤلفات عبدالله الطيب وجمال محمد احمد علي اساس ان نبني عليها ونعيد صياغتها ..
اذكر في الثمانينات اني قرات مقالا رائعا - ربما كان رسالة - للراحل محمد المهدي المجذوب عن ادب الاطفال؛ اعتقدانه نشر فى جريدة الايام .. يهمني جدا لوكان بحوزة احدالاعضاء او العضوات ان يرسله/ ترسله الي ..
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
يا ام احمد
دقي المحلب
في بيت احمد
احمد غائب
في الركايب
جانا كلب
سنونو صفر
عيونو حمر
حلب الناقه في الشنقاقه
بتريدي امك ولا ابوك
طبعا لحدي اسا انا ما عارفه الشنقاقه يعني شنو خلي عيال الزمن ده
لكن غالبا اتخيلها القرعه البتحلب فيها اللبن
اؤيد اعاده صياغه بعض الاغانيات وتغيير بعض المفردات
لتخدم الغرض الاساسي وتوصل الحكمه المقصوده
مع الاحتفاظ بالطابع الاصيل ليها
ولاختلاف الروايات ايضا يمكن دمجها وصياغتها
في افضل شكل من الابيات المنتقاه
مثلا دي طريقه مختلفه ل النوم النوم
النوم النوم بكريك بالدوم
النوم النوم ولدي الغالي
النوم النوم بستر حالي
النوم النوم عزيز علي
النوم النوم متل عيني
النوم النوم وبكري لي
النوم النوم عمرو سني
النوم تعال سكت الجهال
محمد صالح سبقتني في بريلا بريلا برييليلا
بعدين كان في لعبه سلوي يا سلوي
مالك بتبكي عاوزه ايه
ولا اذكر الباقي لكن اخرها ولا الجنه ولا النار
واعتقد الاجتهادات الفرديه في الكتابه برضو ستكون مفيده جدا جدا
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: توما)
|
_ واحدنين تلاتة إبراتي الخياطة
_ أم برمة ( لها يقاع جميل وقوي )
_ سانة البانة البرتكانة السندلة بف
_ توما ... أعتقد ... سلوي ياسلوي
مالك بتبكي عايزه ايه
عايزه صديقتي
صديقتك مين
صديقتي (فلانة ، فلان )
* وعندما كانت جارتنا ايمان تقول
صديقتي محمد
كانت الدنيا لا تسعني ... وأكتفي بها نهاية .
عادل
لك الود
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
واحد اتنين سرجي مرجي
انت حكيم ولا تمرجي
انا حكيم بداوي الناس
من الحمي ووجع الراس
العيان اديو حقنه
والمسكين اديو لقمه
جيت ازورك يا نبي
لكن بلدك بعيده
فيها حمد وحميده
حميده ولدت ولد
سمتو عبد الصمد
مشتو علي المشايه
وغنت ليو يا جنايا
طبعا بعد تعديل المقطع الاخير لانو بقول ختفت راسو الحدايه
معقوله بس دي والله انا ما انوم خلي شافع لوول
محمد صالح تحياتي لك ونوسه ..وسلوي دي عندها باقي بلقاهو ان شاء الله لانها عاجباني
احرضك بشده شديده علي ان تحاول تكتب نقلا عن اصدقائك الصغار اغانيهم بلغتهم الاصليه
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: توما)
|
لما كنت صغيرة... بلعب في التراب
ماما لبستني... الجزمة و الشراب
مشيت للافندي... اداني كتاب
قال لي أكتبي عربي... كتبت ليه حساب
و المزيكة تضرب... تن تن تن
و الكشافة تكشف... كش كش كش
آكل إيه... آكل عجوة
أشرب إيه... أشرب قهوة
أضحك كيف... ها ها هااا
أبكي كيف.... إييييييي
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
الاخ عادل
انا من المهمومين بثقافه الطفل انا افيدك بانى املك كتاب الاحاجىالسودانيه او بالاصح انا ويحى فضل الله مناصفه ساحاول انزال بعض نصوصهه هنا وادلك على شريط فيديو قمنا بعمله فى ورشه خاصه
بثقافه الطفل فىالمنظمه السودانيه لحقوق الانسان فى القاهره موجده فى منزل الدكتورحموده فتح الرحمن فى ميتشجان نسخه منه واخرى بمنزل دكتور صلاح الذين بفرجينيا
وهناك ثلاث كتب اطفال من تاليف الناقد المسرحى عبد الله الشهير بكارلوس فى ارزونا يمكن ان نمدك بمعلومه
منه قريبا فى هذا البوست واعرف انه من قرائه
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Hadia Mohamed)
|
شكرا هادية علي المرور وعلي هذه المعلومات الثرة
كتاب الاحاجي السودانية اذا امكن ان تقومي بطبع ما تيسر ؛ وتصوير الباقي وارساله الي عنوانيب البريدي الملحق بالبروفايل؛ او تصويره بالاسكانر وارساله عبر البريد الالكتروني ..
ساحاول ان اتصل بالاستاذ صلاح الزين في فرجينيا للحصول علي نسخة من الشريط؛ رغم انو ممكن يكون زعلان مني؛ لاني مقصر معاهو
سابقي في انتظار المعلومة من استاذ كارلوس ..
لك الود ..
عادل
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: ياسر مكاوي)
|
سلام ياسر
النسخة دي طبعا من الواقع ..
لا ازال اذكر في المتوسطة في اول ايامي بها؛ ان اصبت بكف درقدني بين الادراج؛وليس ذلك لاني كتبت حساب بدل عربي؛ بل فقط لاني دندنت بلحن وانا افتح الدرج لاستخراج كتاب؛ الامر الذي عده استاذ نصر الدين - هكذا كان اسمو - جحرما عظيما؛ يستحق كف من النوع ابو كديس ..
طبعا حنبكت لكن ما عملت حاجة؛ لكين قومت الدنيا وما قعدتها بعد داك لمن كنت في الثانوي؛ لمن استاذ جاهل ادا ياسر ود اختي كف؛ وحلفت الا اديهو كف وربطت ليهو جنب المدرسة؛ وهاك يا تحانيس وتدخلات من الاساتذة الكبار الكانوا درسوني انا ايضا ؛ لحدي ما خليت الحماقة لكن بعد وعد منهم انوعمرو ما ينضرب كف تاني ..
قال كف قال ..
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
تحياتي عادل عبد العاطي
بالنسبة لكتاب الأحاجي السودانية للدكتور عبد الله الطيب
عندي نسخة منه ممكن اصورها وارسلها ليك على صندوق بريد
اذا ما عندك مانع تدلني على صندوق بريدك
وكمان في نسخة من رسالة ماجستير بعنوان ( أغاني المهد في السودان )
للأستاذة لبني عبد المنعم المبارك
هي أذنت بنشرها وانا بديت طباعتها
ممكن ارسل ليك نسخ عبر ديسك
بس دي حتأخد زمن لغاية ما اتم طباعتها
وربنا يوفقك 
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
كاف نون زين
كنز كنز كنز
دخلي ايدك جوه يا فيفي تر را را
وانتي استني وراها اقيفي ترا ريرا را
ده الكنز مليان بعرائس
يمسحو هم البائس
فيهو اسود ونمور وافيال ترا را را
فيهو حكاوي عن الاطفال ترا را را را
فيهو زرافه و فيهو لطافه
وفيهو الارنب ذوق و قيافه
شعر حسن امين
وهي مقدمه لمسلسل اطفال تلفزيوني
ولها لحن جميل ساحاول ايجاداها كامله
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
الاسد والضبع والارنب
======================
يحكى ان اسدا كان يملك رؤوس من الماشيه كثيرة, كما كان للضبع قطيع من الماشيه * ولكن
الاسد لم يحافظ على ثروته فبدا ياكل منها واحدة بعد الاخرى حتى لم يتبقى الا ثور واحد وعلى العكس من الاسد كان الضبع يحافظ على ماشيته ويرعاها*
وفى يوم من الايام ولد للضبع عجلا جميلا فاغتاظ الاسد من ذلك وتملكته الرغبه فى الاستيلاء على العجل الوليد من بقرة الضبع فدبر مكيدة حاول ان يجعلها بشكل قانونى حيث دعىجميع حيوانات الغابه لاجتماع هام وعاجل .
حضرت كل الحيوانات ملبيه الدعوة حيث خاطبها قائلا ( يا ايها الحضور اسمحوا لى ان اتقدم اليكم بالشكوى ضد الضبع الذى اغتصب منى العجل الوليد الذى ولده ثورى )
اندهش الحضور وانعقد لسانهم ! وكان الكل فى حيرة , كيف لثور ان يلد? ولكن لا اد يجرؤ
لى سؤال الاسد او الحديث عن الامر فاكتفى الجميع بالصمت خوفا من المصير المحتوم الذى سيلقاه
وبينما همفى هذه الحالة المحيرة , مر الارنب من على البعد مهرولا وحاملا جرة ما الارنب كان على علم بما يحدث فرفض الانتظار بحـجه ان الامر لايعنيه وليس لديه وقت لانه مشغول بجلب الماء من النهر فسأله الاسد
(ماذ ستفعل بالماء?)
فرد الارنب بان ابيه قد انجب له اخا بالامس ويحتاج ان يستحم فسأله الاسد متعجب
(كيف لابيك ان يلد وهو ذكرا?)
فاجابه الارنب (مثلما ولد ثورك) , فحجل الاسد وقام بطب القضية ورفع الجلسة
---------------------------------------------------------------
مــن حكايات الشلك
من كتاب حكايات واساطير سودانيه
اعداد\ يحيى فضل الله
اع
| |
|
|
|
|
|
|
|
|
 Re: مطلوب:حكايات واغاني للاطفال ومواد ومساهمات اخري (Re: عامر الأمير)
|
العزيز عادل عبدالعاطي
جميل جداً أن تتطرق لهذا الموضوع الهام والشيق ..
فأولادنا يحتاجون لمثل هذه الحكاوى والألعاب ..
وكنا نظن أنها قد إندثرت ..
هناك تجربة ثرة للأخ معتصم الجعيلي في إنتاج أعمال ومسلسلات للأطفال ..
كان أخرها فوزه بالجائزة الأولى لمهرجان سينما الأطفال بتونس ..
ولكن إعلامنا لا يسلط الضوء على مثل هذه الأعمال المقدرة والرائعة ..
ووعدت الأخ معتصم بأن أنزل له بعض الأعمال التي قام بإنتاجها هنا ..
لك خالص تحياتي وتقديري ..
| |
|
|
|
|
|
|
|
|
|
Re: مطلوب:حكايات واغاني للاطفال ومواد ومساهمات اخري (Re: Abdel Aati)
|
يقال؛ والعهدة علي الراوي؛ ان الكديس مشي الحج؛ وعندما عاد ذهب الي الفئران وقال لهم انه حج وتاب واقلع عن اكل الفئران؛ فتلقوا تصريحه بحبور.
حينها طلب منهم الكديس ان يقتربوا منه حتي يستطيعوا سويا ان يبكوا علي روح النبي الكريم؛ وكان مما قال لهم:
تعالوا قريب
نبكي الحبيب
فاجابته الفئران من مكانها ان يبكي مكانه وتبكي هي مكانها؛وسجعوا كلامهم بالقول:
هنا وهناك
كلو الكوراك.
| |
|
|
|
|
|
|
| |
Abdel Aati
smart_ana2001
توما
Adil Osman
lana mahdi
المسافر
عبدالماجد فرح يوسف
abazar ali khalifa
ياسر مكاوي
مصطفى عجب
Kostawi
OmDur
بلدى يا حبوب
الجندرية
مريم بنت الحسين
mohammed alfadla
tmbis
معتصم دفع الله
حبيب نورة
AnwarKing
فيس بوك
تويتر
انستقرام
يوتيوب
بنتيريست