وحقيقة عريان العرض الهدوم ما بسترو ومعبر عن اشياء وواقعيات كثيرة نراها ونقرائها هنا وهناك ومن الامثال الشائعة وطبعا بلاشك تعرفون من هو صاحب هذا المثل ويتخذه كشعار .. والله طولتو الغيبة والله دى ما كانت غيبة الله ينجحوا( سمسموتى) دا وبالله يا (امنا) لو عايز مساندة فى اللهجة العامية والتراثيات انحنا فى الخدمة بس اهم حاجة ما يتكلم معانا بالجرمنية لانى ما بعرف فيها غير ميد ان جيرمان .. ويا ريت النداء دا يجيبك لينا تاني .. لو عشان خاطرى انا دا وكل البحبوك .. يا ريت وخليك من الناس البقولو ليك تانى ما تجى ديل ما عندهم موضوع
الحوت ما بهددوه بالغرق
وهل هناك حوت يستطيع من يغرقه يا ماما دومه؟؟ وهو من الامثال التى اطلقها اخونا المبدع الصادق وقد كان هناك فى يوم ما من خارطة الزمن بوست بهذا العنوان وشمل عدد كبير من الامثال الشعبية وضم الفطاحلة من الملمين بتلك الامثال كالحليلة و ابوريشه ودومه ايضا ورغم غياب الصادق لظروفه لعملية لكن نسال الله ان يعود لنا ايضا بعد انقطاع وحرمه المصون تغريد .. وعلى الاقل لو ما قدرو يدو الباص ورد( لصفصف ) وبدل ما يقابض فى الدركسون احسن يمسك الكى بورد دا ويشارك بدلهم
اللكيع بقع من البرش
اها الزول الشليق بنبرش من اى مكان وما اكثر اللكيعين هذه الايام يعنى بالله طه زولنا دا ما لكيع .. اها بالله ايدكم معانا عشان الناس ديل يجوا يشاركونا ورغم مشغولياتهم ورغم الظروف التى ادت لانسحاب البعض منهم ..
ولنا عودة لامثال اخرى وشخصيات نفتقدها...
06-08-2004, 10:53 AM
Ahlalawad Ahlalawad
تاريخ التسجيل: 02-05-2002
مجموع المشاركات: 2832
تبلدينا يا أصيل أولا بركة الشفناك إنت زااااتك والجابك .. أكيد حا يجيب الإبنة دومة تحياتنا ليها وين ما كانت - لو وقعت في عينك تشكر وفي انتظار دومة .. عايزين دومة .. عايزين دومة
06-08-2004, 11:03 AM
degna degna
تاريخ التسجيل: 06-04-2002
مجموع المشاركات: 2981
اشكرك علي فتح موضوع حيوي , كما اشكرك علي شعورك النبيل نحو اسرتنا ولم تغب زكراكم عن احاديثنا و التطرق لمشاركات حفرت في صلب زاكرتنا, نحن لكم وانتم منا .... عودة للموضوع الأمثال هى خلاصة تجارب انسانيّه يتم صياغتها فى صورة عبارات موجزة تعبّر عن مضامين هذه التجارب والحكم والمواعظ المستقاة منها
وتختلف المرادفات والألفاظ المستخدمه فى صياغة الأمثال ودلالات هذه الأمثال من شعب الى آخر بفعل تباين الظروف الاجتماعيّه والعادات والتقاليد والعوامل الطبيعيّه والخلفيّات التاريخيّه والثقافيّه...الخ
وقد يختلف تقبّل الفئات الاجتماعيّه المختلفه لأحد الأمثال تبعا لاختلاف هذه الشرائح من المجتمع فى الخواص والمستويات الاجتماعيّه والفكريّه كما يلاحظ وجود أمثال تحمل حكمة أو مغزى معيّن فى ظل وجود امثال أخرى تحمل حكمة أو مغزى مخالف ومضاد... وهو مايدل على تباين الجكمة والاستدلال تبعا لتباين ظروف التجربه البشريّه التى أفرزت الحكمة والاستدلال المصاغة فى صورة المثال
وتعتبر الأمثال الشعبيّه أحد الفروع الهامّة التى يبحث فيها علم الاجتماع وعلم نشوء الشعوب والأجناس وعلم الأنثروبولوجى , وذلك لأنّها تعتبر بمثابة فهرسة لعادات وطباع وتجارب وتراث وثقافة ومفاهيم الشعوب ويوجد كتاب لأبو الفضل ( أحمد النيسابورى) يحمل عنوان "الميدانى" وهو الكتاب الذى أعتبر أول كتاب جامع للأمثال العربيّه القديمة ( ظهر الكتاب فى القرن السادس الهجرى)
وسوف اشارك ببعض الامثال لاحقا اريد ان اضعها في مجموعات واتمني ان نناقش سلبية الامثال الشعبيّه في تغير نمط الشعوب ايضا
مع خالص تحياتي
06-11-2004, 00:22 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
.. . السيد/ ابوالنسب ابوريشة كان دوما مبدعاً فى صياغةالامثال وما زال يحتفظ بهذه التى التى وصلتنىمنه قريباً Aburisha Monday Sept 03 2001 02:08:05 GMT Tabaldina وينك يا ضي الرتينة عمك شويةمارود ولض امى وااى ابوي هاكا القصة دى بكلام اهلنا ناس دار صباح قمت أنا ابوريشة دا جكست لى واحدة فى الخرتوم ويا ناس الخرتوم معليش الدين ممنوع والزعل مرفوع اوصفها ليك الاول شى الشعر تحية الظابط وخاتفه لونين وسماح النبق فى الطبق لا يعجبها العجب ولا الصيام فى رجب وتصدق يا تبلدينا طولها طول النخلة وعقلها عقل السخلة وغايتو الجاتك تختاك ياابوريشة فيها هبالة التابانى وكلامها مسيخ زى كلام خشمى دا؟؟؟ وشنافه ؟؟ شنافه ؟ غايتو الفيك بدر بيه دمها قراد بس وروحها مشعتفاها وغايتو ما اكتر ليك لكن لو شفتها تدقها بلا غبينة؟؟ وبعد دا كلو ضفرتنى ضفر سوت فينى حاجات ما بسويها النجار فى الخشب جكساية ما بتعرف الا اللت والعجن وكانه يا دنيا ما فيك الا اناوقاعد اوديها الكافتيريات وبكانات المرطبات بالله بس اكل السوسه والعافيةمدسوسة وانا مفتكرها مره بس واحدة تدفع بالله تعمل ليك حميل مات ، مره كدا اخوك كان مكنب قال ليها ادفعي بالله سوت ليك اضان جلد وكان كان اتكلمت زيادة تسوى من الحبة قبة وتعمل فيها زيطة وزمبليطة وهى ما عارفه كوعه من بوعها غايتو يا ود اخوى هى مسيخه وممصمصصة وانطبق على المثل البقول الشقي عمرو ما يسعد زولاية وان شاء الله تزاول من ضلها عينها قوية وسنها ملوية لا بترحم لا بتخلى رحمه الله تنزل ومشكلتى بعد دا كلو ميت فيها موت وكاسره فينى ضلع وانت عارف الغرقان بتعلق بالقشة اى حاجة دايراها بسويها ليها مستعد اجيب ليها لبن الطير ، بشكرها وبغنى ليها بقول الرقيبة قزازة عصير والعيون متل الفناجين والسنون براقن يشيل وما بقدر اتم قالو سمح القول فى خشم سيدو وما باقى لى الا اسوى ليها من الفسيخ شربات وبعد دا كلو عاملة داقسة بس تلقاها لافا عند الجيران زى كلب الحر تغربل ليك الشارع وتحوس وتكوس زى العاضيها كلب جحمان وكان اتكلمت معاها بس كلامها دراب دراب ، يلف قطرك ويقصقص مصارينك ويسل روح والسم الهارى وانا قاعد اعاين ليها ببس شنلقّ عينو بلينق بالله شوف يا ود اخوى اخر الجزا اذا؟؟ انا لمن لقيتها اول مره كانت زى الجدادة الدقتها المطره ؟؟ ما تساوى نكله وما تشتريها بتعريفه؟؟؟ عاملة زى بت ام ليون كدا وبعد دا قال بتتراشق ؟؟ وهسع سمنت ومخمخت تقول بتاكل مع عميانيين شوف من عباطتها لابسه ليها بنطلون ساترها وبعد داك من فلسفتها لابسه فوق البنطلون قميص جكسا فى خت سته ؟؟ من شدة ما زعلت منها قربت اجر شفاط جكساية شوم؟؟ شوم ؟؟ شوم ؟؟ كن مشت للبحر تلقها مويته كملت غايتو يا تبلدينا لقيت نفسي فى خيص بيص ؟؟ وقلت اسوى شنو ؟؟ قلت يا ابوريشة براك شلتا اصبعك طبزت بيهو عينك ؟؟ المهم مشيت المطعم مليت امدرمان وقطعت لى كوز موية وقلت يا ولد اتمسكن لمن تتمكن ؟؟ وبعد داك وريها العين الحمرا هى ما عارفانى ؟؟ انا واقع من السما سبع مرات انا الشافو خلو ؟؟ ِAbrushia الكدب حبلو قصير
وان شاء الله برسل ليك مشاركة MAAM وِAlhilayla زمان
...............
الشكر لابوريشة للحاجات السمحة الزمان وحليل زمان ..
06-22-2004, 09:34 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
يا حليييييييييييييل حبيبنا الفكى ابو ريشة يلحقنا وينجدنا
الاخت دومة حزينة لان الهتاويل تقع فيها من حيث لا تدرى هى المرأة الصميمة الما بتقول العوج يعبروها على السيف لكن كعبة ام بنايا قش البتخلى الزينة تبقى جعرانة و بالعكس سلامى لابوريشة
06-22-2004, 12:18 PM
Raja Raja
تاريخ التسجيل: 05-19-2002
مجموع المشاركات: 16054
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Ahlalawad
degna
Elsadiq
طيفور
bayan
Raja
فيس بوك
تويتر
انستقرام
يوتيوب
بنتيريست