لدى مليون مثال لفعالية وقوة تاثير تويتر اخرهم فوز المرشح الاسماعيلى المغمور بمنصب عمدة مدينة كالقرى كاول مسلم يتولى رئاسة مدينة كبيرة فى امريكا الشمالية...
هذا الشخص استطاع تكوين جيش من المتطوعين لخدمة حملته الانتخابية.. كانت تويتر هى القناة الرئيسية لتبادل المعلومات ...
سلامات يا النصري امين عندى سؤال صغير....ما هو تويتر? اللى انا عارفه عن الموقع (مع انى ما حصل فتحتو). انه بيكون عندك اشتراك. و بيكون عندك ناس انت تابعهم و ناس هم تابعنك. صح? ممكن تكتب ابديت عن الحاصل او عنك او عن اى شئ و كل الناس التابعنك ح يشوفوك كتبت شنو. فى التو و اللحظة. و انت برضوا بتشوف الناس اللى انت تابعهم بيقولوا شنو !!أ و اظن ان فلى حد معين لعدد الحروف الى ممكن تكتبها فى الابديت الواحد. و اظن برضوا ان الناس مكن تعلق على اللى انت كتبته!!!!صح? شكرا مقدما
التويتر هى مثل رسائل الجوال ولكنها مرسلة للجميع ... وهى صغيرة الحجم يجب ان لا تتجاوز ال 140 حرف ...
مثلا .. اذا لديت خبر صغير تريدين نشره للجميع ..يمكنك كتابته فى التويتر وسيطلع عليه الكل (الذين يتابعونك) فى نفس اللحظة ..... طبعا الايميل يؤدى نفس الغرض لكن مشكلة الايميل بكون مرسل لناس معينين ....
انا معجب ب Howie Mande بتاع deal or no deal و AGT وبشوف انه من اظرف مقدمى البرنامج (وكندى) كنت بقرا ليهو تويتاتوه فى الموقع ,,,,
ونفس الشى ممكن يحصل مع اى فنان او سياسى او شخصية عامة ..
اعملى حساب هناك و تابعينى
10-26-2010, 06:57 PM
Elawad Eltayeb Elawad Eltayeb
تاريخ التسجيل: 09-01-2004
مجموع المشاركات: 5319
سلامات يا النصري... كل ما أقرأ بوست للأخ الشامي أتذكر تويتر...هذا الشخص سيكون له كمية من المتابعين اذا كانت كتاباته عبر تويتر...طبيعتها تناسب تويتر تماماً.
أتفق معك في توقعاتك إلى حد ما... فالمستقبل لصالح الفيديو على الإنترنت.
سلام يا انور ساقوم بمتابعة الاخ الشامى (كظله) اذا عمل حساب فى تويتر....
رسائل الجوال اليوم اصبحت مثل الماء والهواء .. تويتر ستحل محل رسائل الجوال كناقلة للاخبار... اما الايميل فقد قرات انه فى طريقه للزوال وسيكون لاغراض العمل فقط .....
الزمن ماشى شديد يا انور....عشان كده انا عندى رغبة فى معرفة ودراسة ظاهرة القبول والرفض عند مجتمع السودانيين نحو الجديد فى عالم التكنلوجيا ..
مقارنة ما سبق من ظواهر وتحليلها وفكها وتحديد ال trend والاتجاه فى المستقبل..
حسب اجتهاداتى البسيطة اظن ان تويتر سيكون لها شان كبير فى عالم السياسة والاخبار عند السودانيين
هى عملية زمن ليس الا ....
10-26-2010, 08:14 PM
AnwarKing AnwarKing
تاريخ التسجيل: 02-04-2003
مجموع المشاركات: 11481
Quote: مقارنة ما سبق من ظواهر وتحليلها وفكها وتحديد ال trend والاتجاه فى المستقبل..
ياخي مالك عاوز تجيب لروحك وجع القلب؟ نحن أمة نعشق أن نعيش بدون أرقام وحسابات وتوقعات... متذكر أول تصريح لوزير ماليتنا عقب الأزمة المالية العالمية عام 2008؟
Quote: قلل الدكتور عوض أحمد الجاز، وزير المالية والاقتصاد الوطني، من آثار الازمة المالية العالمية وانعكاساتها على السودان، وقال ان الاقتصاد السوداني قام بتكييف نفسه في ظل الحصار والمقاطعة الغربية ، والبحث عن عمله اجنبية غير الدولار. قائلاً أن السودان خرج عن التأثير المباشر بتلك الازمة ، ولكن هذا لا يعني أن السودان معزول عن العالم... ،
بعدين ياخي سوق الكمبيوتر عندنا كلو على بعضو كدة (باللفخ والسرقة والعطاءات التحت الطربيزة) بيساوي كم؟
هناك عدة محاور في الحديث ، منها المحتوى والوسائط والصناعة والكوادر المدربة والخ... داير تتوقع إتجاهات شنو فيهم بالضبط؟ نحنا برة الشبكة بامتياز يا النصري يا أخوي...وبكل أسف حتى الناس الفي الدول الأكثر تقدماً...بيرجعوا السودان يستثمروا في الركشة والأمجاد (نقّاطة) عشان كدة بناخد أخبارنا من الجزيرة ورويترز والبي بي سي...وعلى العلينا...الحكومة تمنع تجديد ترخيص البي بي سي... ظلام وعصور وسطى ومظلمة والخ...
معليش تقلتا عليك يا أخوي، لكن ضريبة الخوة...أستحملني وأنا حالتي كدة!
مودتي ومحبتي يا النصري أنور
10-26-2010, 08:53 PM
ombadda ombadda
تاريخ التسجيل: 10-10-2002
مجموع المشاركات: 6736
يا انور يا مرتاح (ومرتاح هذه لا اقولها الا لمن اكن له بعض المعزة)
انا متفق معاك فى كل كلامك وان كان غير الذى اقصده انا ...
Quote: هناك عدة محاور في الحديث ، منها المحتوى والوسائط والصناعة والكوادر المدربة والخ... داير تتوقع إتجاهات شنو فيهم بالضبط؟
الحقيقة انا لا اقصد ايا منها ...فشخصى قنعان تماما من اى تطور فى حياة الناس او تجارتهم او صناعتهم او زراعتهم... انا قنعان تماما من الحال بمجله فى السودان وشايف انو مافى اى امل لاى نوع من النهوض والتقدم ....
الشئ البقصده هو اهتمام الناس (السودانييين) كمستهلكين بما يجود عليهم عالم التكنلوجيا ....
الشئ البقصده هو محاولة قراءة المستقبل وتحديد اى السلع او الخدمات فى مجالات تقنية المعلومات سيتشعبط بها السودانين .....
اليوم Twitter لم يسمع بها 80% من قراء البورد وحسب تقديراتى ان 2% فقط لديهم حسابات نشطة يتابعونها بصورة يومية...
بعد فترة وجيزة ستكون Twitter هى الاولى ويتراجع الفيس بووك للمرتبة الثانية
10-26-2010, 09:37 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
Quote: بعد فترة وجيزة ستكون Twitter هى الاولى ويتراجع الفيس بووك للمرتبة الثانية
شكرا يا النصري ما اظن توتر يحل محل الفيس بوك.... الفيس بوك مرن جدا ....و متطور...يعنى كل يوم فى جديد. احتمال الناس تكتشف توتر و تدخلوا فى حياتها ...لكن لاستخدامات اخرى غير الحجات اللى بنستعملها للفيس بوك. مثلا انا عايشه خارج السودان.....زمان كنت برسل صور اطفالى لاهلى فى السودان بالايميل. اتاشمنت شحمان مليان صور. الان برفعها ليهم فى الفيس بوك. كلهم بيشوفوها و بيعلقوا و خلاص .
فى السودان كل اخبار السياسة اشاعات....عرمان اترشح...عرمان اتسحب. سلفا كير مع الوحده....سلفا كير مع الانفصال. ده كلو مناسب جدا لتوتر. و اظن انه ـكما قلتـ ـ ح يكون مستقبل السياسة السودانية فى توتر. من غير ما يتغير محل الفيس بوك فى قلوبنا و كومبيوتراتنا (على الاقل ) فى المستقبل القريب. و ده فى عالمنا ده حوالى سنة ....بالكتير انين
يا اسمارت نحن لسنا بنزازى مع البلاك بيرى Pearl وبدون اى خاصية سوى المكالمات والرسائل القصيرة مرحلة ال iPhone دى لسه ما وصلناها ......
المشكلة الكبرى فى الفيس بووك انو امكانياته محدودة داخله .... يعنى البرة برة و الجوة جوة .... مداركك كلها محصورة فى قائمة اصدقائك واصدقائهم.. ولاشئ جديد .... ومن المستحيل ان تتابعى كل فرد منهم ماذا يدور فى خاطره فى لحظة معينة ......
انا مرات كتيرة بهرب من الفيس بووك وبجى طاير لسودانيزانلاين لسبب واحد هو live feed من الاعضاء فى صورة بوستاتهم ....
اتخيلى معاى ان كل بوستات سودانيزانلاين تاتى مضغوطه فى صورة كبسولات لاتتعدى ال 140 حرف مصحوبة بالوصلة بها تفاصيل البوست ..
فى تقديرى ان الفيس بووك وبمرور الزمن حيكون مكان hang out لل teenagers وسنبحث نحن عن مكان more satisfying لاحتياجاتنا وفى مقدمتها الاخبار..
10-26-2010, 10:42 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
سودانيز اولاين دى بقت كلامى كتير. معليش يا النصري على احتلال بوستك. بس على ذكر الناس الظراف فى توتر. فى شاب امريكى تقفلت به السبل لدرجة انه رجع عاش مع ابوه فى بيته. و ابوه زول غلباوى جدا و من العصر الجليدى *. المهم ...الزول ده عمل حساب فى توتر بس عن الكلام اللى بيقوله ليه ابوه. الناس عرفت بالحساب و بقى عندوا عشرات الالف من التابعين. بعد النجاح ده كلو الشاب كتب كتاب عن الموضوع ده. الان اتعمل مسلسل تلفزيونى كوميدى برضوا عن الموضوع. المسلسل اسمه (اسفه مقدما): **Bleep My Dad Says
قبل فترة شفت دعاية للمسلسل الجديد ده وقد شد انتباهى الاسم بتاعه... لكن لم احظ بمشاهدته بعد... مع انو William Shatner بطله واحد من الفنانين البتكيف ليهم (وهو كندى بالمناسبة)
انا اكتر مسلسل متابعه ولا افط حلقاته ابدا هو رجلين ونصف الرجل .... بضحك فيهو زى البيبى ..... ياخى شارلى والان ديل اظرف اخوين فى الدنيا ... اما نصف الرجل فلم يعد ظريف بعد ان كبر ...
10-27-2010, 01:04 AM
Gamal Abayazid Gamal Abayazid
تاريخ التسجيل: 02-15-2006
مجموع المشاركات: 273
دائمآ تأتينا بالمفيد .. و twitter أي زقزقة العصافير هو برنامجي المفضل منذ أن تم نشره قبل ثلاث أعوام تقريبآ وهو المرحلة المتقدمة عن أل email لأن تويتر يصلك مباشرة حيث أنت عن طريق موبايلك وتجد القروب يرسلون لك المعلومات أولآ بأول .. أخبار .. رياضة .. الإستوك ماركت الموقف المالي .. إيضآ الأهل والأصدقاء .. في تويتر لا تحتاج تصفح الإنترنت لتطالع خبر ما أو تصفح الإيميل لأن الحدث يصلك على موبايلك مباشرة.. إيضا عن طريق تويتر تستطيع متابعة أخبار أسرتك و أصدقائك دون عناء الإتصال twitter هي الثورة المعلوماتية الثانية ..وكما ذكرت أنت يمكنك متابعة الأحداث الخاصة ببلدك وأنت توقع على تويتر وتكون القروب اللازم لكيما تتبادلون الأحداث .. مثال تجربة أحداث إيران الأخيرة.. والمتابعة عن طريق تويتر .. دعنا نكون قروب حول إستفتاء الجنوب ونتابع ..
سلام مرة تانية يا عادل والله ما قصرت تب فى توضيح مزايا وحسنات تويتر.. الايميل بصورته الحالية دى وزى ما زكرت فى مداخلة سابقة انو فى طريقه للزوال وان رسائل الجوال ستحل محله
مشكلة التويتر انو البداية فيها صعبة وغريبة .. فبعد ينتهى الفرد من تسجيل الحساب يجد نفسه يتلفت يمين شمال ولا يعرف ماذا يفعل فالمكان صانى ولا حياة فيه.. وليست هناك وصلات كتيرة فى الصفحة الاولى للعب بيها مثل الفيس بووك...
نصيحتى للجميع بعد فتح الحساب عليهم بمتابعة follow الناس العندهم فيهم رغبة .. مثلا اذا كنت تهتم بالرياضة اكتب كرة قدم مثلا فى خانة البحث وابدا فى متابعة follow من تظن انه مفيد للقراءة له.. نفس الشئ فى السياسة اكتب الجزيرة فى خانه البحث واضف القناة الى قائمة الذين تتابعهم وستصلك اخبار الجزيرة فى نفس لحظة وصول الخبر
هذه الحشرة الصغيرة من اغرب واخطر انواع الوبائيات... هى تعيش على مص دم الانسان عندما يرقد على سريره بالليل.. يمكنها ان تعيش بدون غذاء لشهور طويلة.. يمكنها الالتصاق بملابس الانسان والانتقال والتوالد فى اماكن جديدة
محاربتها صعبة جدا جدا ..
انا شخصيا سعيت يوما ما للحصول على رخصة فنى مبيد افات لان تلك الحشرة انتشرت فى كل مكان فى المدينة التى كنت اسكن فيها ...
سلامات تاني يا النصري. عندي مشكلة ، و هي أني لما اكون في الخرطوم بيكون في حجات عاوزه اعملها. مثلا ، بكون عاوزه امشي حفل عقد الجلاد. و لما اسأل يقولوا لي امس كان في المحل الفلاني. او بكون عاوزه امشي مع معرض اوندوة او اي حاجه ممكن الزول يعملها بالمساء. و عشان احل الموضوع ده فكرت اعمل موقع او حتي بوست دائم في البورد. اسميه الخرطوم بالليل او حاجه ذي كده. اطن ان حساب في توتر لزول حايم في الخرطوم و عارف كل النشاطات الثقافية ممكن يكون حاجه مفيده للجميع. ممكن اكتر من زول يديروا الحساب. و العليهم يكتبوا عن الحاصل في الخرطوم. حفلات ندوات معارض اي حاجه.
يا أسمارت يعني لو أي شخص حايم في الشارع ووقع حدث أمامه وسجل ذلك الحدث في موبايلو أما عن طريق الصور أو الفديو عليه إرسال الرسالةعلى الرقم 40404 تويتر تقوم بإلتقاط الرسالة و بثها في الموقع وللأعضاء .. مثال أحداث إيران الأخيرة عقب الإنتخابات تمت تغطيتها بالكامل عن طريق موبايلات الأعضاء داخل إيران والذين يرسلونها بدورهم ألى موقع تويتر ومن تويتر ألتقطتها وكالات الأنباء و الفضائيات .. ولعل النصري قصد ذلك حينما كتب عنوان هذا البوست فعلا إذا وقعت الواقعة فتويتر هو الحل الأنسب و الأسرع من أي موقع آخر.
10-29-2010, 06:23 AM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
سلامات عادل نجيلة... كلامك صحيح 100%. لكن الحاجه اللى انا قاصدها هنا ما حاجه "عاجلة". و ما حاجه برضو مهمة ذى احداث الانتخابات الايرانية او اى حاجه متوقعة فى السودان فى الايام القادمة. لكن توتر برضو مناسب للحاجه اللى انا بفكر فيها دى. انا بفكر فى حاجه ذى الصفحة الثقافية فى جريده. بس ح تكون الاخبار بفريكونسى اكبر من يوميا. انا فى بالى ناس ذى ملاسى او طلال عفيفى . ناس انا عارفه انهم مهتمين بالنشاطات الثقافية فى الخرطوم. كلو واحد فيهم يكلمنا لو سمح باى حاجه.
__________________________________ انا حقيقى عملت اشتراك توتر بس عشان احفظ اسمى و ما فى زول يشيله...لكن حتى الاخبار انا بشوفها مرة الصباح بدرى جدا . مرة تانية فى مواعيد الغداء (الظهر) و مرة تانية فى المساء. و( الان) ما عندى حوجه حقيقية لتوتر.
10-29-2010, 06:37 AM
د.محمد بابكر د.محمد بابكر
تاريخ التسجيل: 07-16-2009
مجموع المشاركات: 6614
النصري ..تحياتي واحترامي .. تويتر من المواقع الجميلة فعلا ..وقد اشتركت فيه قبل عام تقريبا ..صحيح هو معقد شوية عن الفيس بوك.. لكن واضح أنه امكانياته ستصبح أكبر فيما بعد .. ولحاجة الناس أيضا تعمل تويتر.. https://twitter.com/#!/salahelfaki أعجبنى قول الأخ أنور دفع الله ..
Quote: داير تتوقع إتجاهات شنو فيهم بالضبط؟ نحنا برة الشبكة بامتياز يا النصري يا أخوي...وبكل أسف حتى الناس الفي الدول الأكثر تقدماً...بيرجعوا السودان يستثمروا في الركشة والأمجاد (نقّاطة) عشان كدة بناخد أخبارنا من الجزيرة ورويترز والبي بي سي...وعلى العلينا...الحكومة تمنع تجديد ترخيص البي بي سي... ظلام وعصور وسطى ومظلمة والخ...
هذا مستوى عام لكل سوداني يخرج من السودان ..بدلا من تطوير نفسه ..يعود لما هو أسهل عليه وبدون تكلفة تذكر .. ومن أجل ذلك ..نحن نتحدث ولا نعمل .. وكثيرا ما نشتكي ..مع ملاحظة كمية المتعلمين الهائلة الموجودة خارج وداخل السودان .. مودتي بلا حدود..
تعرفى يا اسمارت ... زمان ايام شبابنا ....كنا نمشى للدافورى فى الميدان المجاور.. نكون يادوب الواحد اتغدى ومشى على الدافورى ... لمن نصل هناك يكون فى نفر او نفرين بس .. طبعا ما ممكن نبدا دافورى بنفر او نفرين.. نقعد ننتظر الباقين .. وشوية شوية يبدو يظهرو.. والعدد يزيد ... حتى نتضطر نعمل نظام توالى وناس تقعد بره ... وقبل غروب الشمس بدقائق بكون الدافورى فى اسخن لحظاته..
حسى انا وانت وبقية الشباب وصلنا الميدان وشايلين كورتنا لكن للاسف الدافورى ما يحلى قبلما الجماعة يصلو .. ما علينا الا الانتظار it's about time ومصيرهم يجو ويزاحمونا لمن الواحد يزهج من كترتهم ....
فكرتك بتاعت تبادل المعلومات حول النشاطات المتوفرة لسكان الخرطوم وزائريها فكرة رهيبة ...لكن للاسف لازم ننتظر الجماعة يصلو ...
Quote: نبقى مارقين على التويتر يا النصرى و لا شنو؟؟
خليك قاعد يا دكتور فى سودانيزانلاين واعمل حساب فى تويتر..
الموقعين بيخدمو غرضين مختلفين وما بتنافسو مع بعض .... سودانيزانلاين حيظل الملاذ والدار لينا لسنوات طويلة جاية...
زمان يا دكتور(احكى ليك شوية عن تاريخ سودانيزانلاين) اتهم بعض اعضاء المنبر عضو اخر يكتب باسم موناليزا اتهموه باساءة الذات الالهية ... المنبر ده وقف على كراع واحدة ... والنيران ولعت .....حريقة عديل قامت فى المنبر .... ووصل التصعيد ان تم اتهام عضو اخر بانه يقدم حماية ""للمتهم"""
عضو ثالث اخدته الغيرة ووعد بالسفر عبر البحار للانتقام من العضو مقدم الحماية... حكاية كانت مبالغة عديل....
الذ شئ انو الشئ المكتوب مسبب الاذمة اصبح اليوم عادى جدا بنكتب بصورة شبه يومية هنا ...
Quote: هل الاخبار دي بتصلنا في السودان في الموبايلات برضو
اصلا الفكرة بتاعت تويتر الهدف منها الموبايلات .. لانو المستقبل كلو حيكون داير فى الموبايلات دى .....
كل المطلوب هو تنزل البرنامج بتاع تويتر فى الموبايل بتاعك وتعمل اسم دخول وباسورد ...
الخطوة التانية بعد التسجيل "تتابع" الجهات الانت عندك رغبه تسمع منهم... مثلا ..لو انت follow me اى رسالة انا بكتبها بتصلك وبتصل لكل الناس ال following me
لو انا وانت وكل اعضاء المنبر follow بكرى ابوبكر ..كل رسالة او tweet بكتبها بكرى بتصل لكل followers
الفكرة بسيطة لكنها عملية بصورة مبالغ فيها وده السبب العالم كلو مجنون بالتويتر ....
بالنسبة لى شخصيا فموبايلى لا يقدم اى خدمات سوى المكالمات والرسائل القصيرة العادية لاننى غير مشترك فى خدمات اضافية مثل الانترنت .... لذلك تويتر بالنسبة لى فى الكمبيوتر ..
10-29-2010, 05:48 PM
محمد الامين احمد محمد الامين احمد
تاريخ التسجيل: 08-28-2004
مجموع المشاركات: 5124
التويتر كما قلت ، هو اداه قوية و فعالة جدا افضلة كثيرا، و لا احبذ الفيس بوك ابدا
بالتأكيد ح نرجع للبوست بتاعك ده تانى و تانى
بس مبدائيا بخصوص ال رسائل فاحب ابشرك و انت فى كندا ح تستلم تويتات من تحب دون الحاجة الى استعمال النت
كيف ؟
اقول ليك
امشى لصحفة setting و بعدين امشى الى mobile و بعدين اختار الدولة ( كندا) فى حالتك ، و خت رقم التلفون و اللغة
و كده يا عزيزى ح تصلك التويتات دون الحاجة الى اشتراك الانترنت
و على اليمين ح تلقى كيف تتعامل ببساطة مع توتير من تلفونك مباشرة
بعد كده كل direct message ح تصلك على شكل مسج عادى فى موبايلك
و كمان اذا حبيبت شخص معين ، و لنقل بارك اوباما مثلا تضغط على اسمو فى تويتر و ح تلقى تحتو علامة موبايل صغير باللون الرمادى اضغط عليها ليتحول لونها الى الاخضر ، و كده اى حاجة يكتبها اوباما فى تويتر ح تجيك برضو على شكل مسج فى موابيلك دون الحاجة الى النت
(( الايام دى اوباما شغال تش فى التويتر ... و مساجتو بتجينى بالليل ... اخوى قال لى ده منو المزعج البرسل ليك فى الوقت ده ؟ ... قلت ليهو ده اوباما ))
ناس السودان للاسف ما عندهم الخدمة دى لسه ، و ما عندهم طريقة الا عن طريق تلفون ذكى و فيه اشتراك نت
و فى دول فيها حسب مقدم الخدمة
يعنى الكويت مثلا متوفرة لناس شركة زين فقط ناس الامارات لشركة دو فقط و هكذا
** اذا كنت عارف المعلومة دى سلفا فالسماح منك ، و ان شاء الله يستفيد بيها زول تانى
10-29-2010, 06:20 PM
د.محمد بابكر د.محمد بابكر
تاريخ التسجيل: 07-16-2009
مجموع المشاركات: 6614
شكرا استاذ النصري: التويتر ثورة معلوماتية رهيبة تقدم وتوفر ليك المعلومة وانت في اي مكان في العالم (اذا كان لديك اشتراك) شخصيا لدي اشتراك قديم لكن ما اشتغلت بيهو كتير ربما ارجع واعمل ليهو ريفريش.
بخصوص المكالمات الفديفونية اعتقد ان skipe.com اقوي بكثير وعملي وفعال خصوصا للناس العايشة برة السودان وعايزة تتواصل مع اهلها بالداخل . النصري شكرا كتير يا اخوي على البوست الابهة.
10-29-2010, 07:01 PM
ombadda ombadda
تاريخ التسجيل: 10-10-2002
مجموع المشاركات: 6736
ناس كندا وامريكا والسعودية والامارات يمكنهم استخدام ال Text messaging عن طريق الموبايل بسعر الرسائل العادية وذلك لارسال Tweet او الاستقبال ..للاسف الخدمة غير متوفرة لناس السودان وباقى الدول.
Quote: (( الايام دى اوباما شغال تش فى التويتر ... و مساجتو بتجينى بالليل ... اخوى قال لى ده منو المزعج البرسل ليك فى الوقت ده ؟ ... قلت ليهو ده اوباما ))
زمان كان عندنا مصطلحات ونحن فى الثانوى العام فمثلا الضيف الثقيل كنا نقول عليه كوكب .... حسى اوباما الكوكب ده كرهك حياتك بصحبته ليك ...الظاهر عليه صديق مذعج...
تعرف المشكلة وين .. شرفة منى وهلعة قمت عملت follow لزى 60 جهة اعلامية وخبرية .. شى سى ان ان وشى بى بى سى وشى الجزيرة وكلهم من النوع البرسل 15 رساله فى الثانية ... لو شبكو فى الموبايل تبقى مشكلة ... انا منتظر احبابنا السودانيين يصلو ويتلمو وبعدها حابدا الغى فى متابعة الجهات الاخبارية والاكتفاء بالجهات التى تهتم بالشان السودانى ...
Quote: اذا كنت عارف المعلومة دى سلفا فالسماح منك ، و ان شاء الله يستفيد بيها زول تانى
ابدا والله معلوماتك دى كلها جديدة على واكيد برضو جديدة على كثير من القراء
بالله خليك قريب وارفع لينا البوست ده كلما تلقى طريقة
يا دكتور قوانين سبتمبر ليست لها اى علاقة بقوانين الشريعة الاسلامية ايام نميرى .. قوانين سبتمبر هى قوانين ولوائح للبورد تم الاتفاق عليها للاحتكام فى حالة نشوب اى خلافات بين اعضاء المنبر...
اجيزت هذه القوانين فى سبتمبر 2004
وقد تم الغائها بعد فترة وجيزة ليبدا الحكم الاحادى الشمولى البكورى ليستمر حتى يومنا هذا
10-30-2010, 09:31 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: كل المطلوب هو تنزل البرنامج بتاع تويتر فى الموبايل بتاعك وتعمل اسم دخول وباسورد ...
الخطوة التانية بعد التسجيل "تتابع" الجهات الانت عندك رغبه تسمع منهم... مثلا ..لو انت follow me اى رسالة انا بكتبها بتصلك وبتصل لكل الناس ال following me
لو انا وانت وكل اعضاء المنبر follow بكرى ابوبكر ..كل رسالة او tweet بكتبها بكرى بتصل لكل followers
الفكرة بسيطة لكنها عملية بصورة مبالغ فيها وده السبب العالم كلو مجنون بالتويتر ....
شكرا يا شاب يا رائع ..
10-30-2010, 10:36 AM
محمد الامين احمد محمد الامين احمد
تاريخ التسجيل: 08-28-2004
مجموع المشاركات: 5124
Quote: هل ظهرت متحدثة في "الهاتف المحمول" في فيلم لشارلي شابلن؟
المقطع يظهر إمرأة وكأنها تتحدث بهاتف محمول عام 1928
دفع مقطع مرئي على موقع يوتيوب، نشره منتج أفلام إيرلندي إلى الاعتقاد بأنه قد يكون دليلاً على إمكانية السفر عبر الزمن.
فقد بقي جورج كلارك من بلفاست حائراً لأكثر من عام بسبب مقطع يظهر إمرأة وكأنها تتحدث عبر الهاتف المحمول.
الغريب في الأمر أن المقطع هو لفيلم من أفلام شارلي شابلن والذي انتج عام 1928، أي منذ فترة طويلة جداًَ من اختراع الهواتف المحمولة.
وقد شاهد المقطع على شاهد موقع يوتيوب منذ نشره من ثمانية أيام نحو مليون ونصف مشاهد، وسجل ما يزيد على المائة ألف تعليق.
وقد كان كلارك اكتشف المقطع وهو يشاهد أفلام دي في دي لتشارلي تشابلن، وقال: "عندما شاهدت المقطع انتبهت أن حركة يد السيدة شبيهة بحركة معتادة في مجتمعاتنا اليوم...الكل يقول الشيء ذاته: يبدو أنها تتحدث عبر الهاتف المحمول".
وقد عرض كلارك المقطع، قبل نشره على يوتيوب لمجموعة من الأشخاص، بل وعرضه في مهرجان بلفاست للأفلام.
وقال كلارك لا يوجد اليوم أي شخص ليفسر لنا هذا، ولذا فإن التفسير الوحيد، "وأنا شخص منفتح الذهن جداً، أن شخصاً ما قد سافر عبر الزمن". source
الغريب فى الامر ان الموابيل اكتشف فى الثمانينات !!!
و الاغرب عند مشاهدة الفيديو سوف تجد ان المرأة قد اعطت نظرة سريعة نحو الكاميرا!!!
10-30-2010, 11:19 AM
محمد الامين احمد محمد الامين احمد
تاريخ التسجيل: 08-28-2004
مجموع المشاركات: 5124
الموقع ده ح يعرفك ، منو الانت عامل ليهو فلو ، و هو ما عامل ليك فلو و ده بيكون تحت خانة following منو الهو عامل ليك فلو ، و انت ما عامل ليهو فلو و ده بيكون تحت خانة fans منو الانت عامل ليهو فلو ، و هو برضو عامل ليك فلو و ده بيكون تحت خانة friends
طبعا ده بيكون مفيد للناس العندم اصدقاء كثر ، و صراحة ما انصح انو يكون عندك ناس كتار عشان تعرف تركز
Quote: نحنا برة الشبكة بامتياز يا النصري يا أخوي...وبكل أسف حتى الناس الفي الدول الأكثر تقدماً...بيرجعوا السودان يستثمروا في الركشة والأمجاد (نقّاطة)
بالرغم من انو كلام انور لا يخلو من مرارة لكن دى الخيارات المتاحة للناس ...والانسان بطبعه بخاف على راس ماله ....
انا شخصيا لو رغبت فى استثمار صغير حافكر فى ركشة او امجاد لسبب بسيط ..انها قاعدة معاى فى البيت فى امان وان الحكومة بكل مستوياتها ما عندها تاثير كبير فيها ... بالنسبة لى ... راس مالى محفوظ و بعيد من سياسات الحكومة المتخبطة الغير مدروسة... عندنا واحد اخونا استثمر كل امواله واموال اهله فى بناء مصنع فى احدى ولايات السودان ....وقبلما يبدا الانتاج بقليل ....الوالى العبقرى قرر حظر السلعة البنتجها المصنع .... ومنع المصنع من الانتاج... زولنا جن و قرب يطقع بالحجار ..... سعادة الوالى اصدر تصريح ببناء المصنع وبعد كم شهر وكم مليار انصرفت غير رايه ومنع المصنع من التشغيل ...
عليك الله لو صاحبنا ده اشترى لو 10 امجاد وركشات مش كان احسن ليه واضمن
ا
10-30-2010, 06:39 PM
ombadda ombadda
تاريخ التسجيل: 10-10-2002
مجموع المشاركات: 6736
اذا اردتم الاستفادة القصوى من موقع تويتر انصحكم بالابتعاد عن متابعة المواقع الاخبارية كالجزيرة والسى ان ان.. زخم وضجيج..الافضل متابعة اخبارهم من التلفاز او مباشرة من مواقعهم على الانترنت. يستثنى طبعا المتعاملين بالبورصة وكبار رجال الاعمال الذين تتأثر اعمالهم واسهمهم بالتقلبات السياسية والاقتصادية المختلفة ويلزمهم ان يكونوا متابعين لحظة بلحظة لاخر مستجدات الاخبار..اما ناس امبدة فلا يلزمنا متابعة تلك الاخبار فى تويتر. تجربتى فى تويتر..كطبيب مثلا تابعت 4 مواقع طبية هامة وبواسطة هذه المواقع تصلنى اخر المستجدات والتوصيات بلا تعب او جهد (فى السابق كان يلزمنى ان اقوم بالبحث فى موقع غووغل الذى يأتينى بملايين الصفحات، او اقوم بمراجعة عشرات المواقع )..الممتع فى الامر ان موقع تويتر تعرف بشكل جيد اهتماماتى وتوجهى فبدأ فى تزويدى بتوصياته Suggestiond والتى وجدتها فى ملائمة جدا وبدلا من تتبع اربع مواقع صرت الان اتابع 51 (اشخاص ومواقع) وما على سوى الدخول للموقع وارى ماذا ينتظرنى..رسائل قصيرة والتفاصيل فى روابط..نفس الشىء للمهتمين بالجديد فى البرمجيات، يمكنهم متابعة موقع ميكروسوفت وباقى المواقع..ومهما كان اهتمامك ستجد من يشاركك ذلك الاهتمام ويفيدك فائدة كبيرة..
10-30-2010, 06:44 PM
ombadda ombadda
تاريخ التسجيل: 10-10-2002
مجموع المشاركات: 6736
لغاية ما يرجع النصرى نرفع البوست الهام دة كل مرة ..وطبعا ما ح نطمع فى رفعه فى واجهة المنبر ..المستحيل بعينه.
--- باختصار ال Follow يجب ان تكون more specific تحدد بالضبط ماذا تريد..عندها ستجد المفيد جدا ويوفر لك ساعات بحث مضنى على الانترنت. امثلة: شخص يود التقدم لوظيفة ما فى شركة مرموقة ويود ان يتحصل على بعض النصائح على فنون المقابلة interview skills..هذا الشخص عليه فقط كتابة interview skills فى مربع البحث فى تويتر وسيتحصل على عشرات الاشخاص والمواقع ليتابعهم فى التويتر..وكل مرة يدخل التويتر سيجد المختصر المفيد بلا عناء بحث يذكر.
مثال اخر: طالب يود الجلوس لاختبار اللغة الانجليزية ال IELTS او ال TOEFL او GRE (هذه الايام الشباب فى السودان مقبل على هذه الامتحانات بصورة كبيرة بعد فتح باب السفارة الامريكية للمنح والدراسة** معلومة غير موثوقة ههههه* هذا الطالب ما عليه سوى كتابة واحدة من الكلمات اعلاه ليجد نصائح من ذهب مجانا هناك:
والذين لديهم شغف بال iPhone يمكنهم متابعة الجديد بمتابعة:
اتابع (Follow) ويندوز لايف Windows Live فى موقع تويتر.. قبل لحظات دخلت التويتر وبنظرة سريعة وجدتهم ارسلوا الاتى:
(مشاركة الملفات عن طريق المسنجر)
وبالضغط على الرابط ذهبت الى موقع فيه:
باختصار هذه المعلومة البسيطة والجديدة ايضا لو اردت البحث عنها لكلفنى ذلك دقائق ثمينة..وها هى تاتى مبسطة وبوضوح.. الطريقة الجديدة لتشاطر الملفات عن طريق المسنجر : darg and drop الملف فى مربع الحوار..
11-01-2010, 07:57 PM
ombadda ombadda
تاريخ التسجيل: 10-10-2002
مجموع المشاركات: 6736
سلام محمود الدقم انا شخصيا عمرى ما كنت من عشاق الskipe.com احتمال لانها ما بتتناسب مع احتياجاتى.... فناس السودان احسن نظام معاهم هو امسك لى واقطع ليك.. الكلام الكتير بجيب الهوا ..والهوا بجيب التحاويل lol
التويتر مستقبلها كبير والناس لازم تستعد من دلوقت وتاقلم نفسها
سلام يا جاد ياريت الواحد بيقدر يطلع بافكار زى دى ....
قبل فترة قرات ان مجموعة من الشماب قامو بتصميم برنامج يتحسس الجانب النفسى والعاطفى فى الرسايل ويقوم بتعديلها حتى تتناسب مع الغرض من ارسالها ....
عندنا هنا فى البورد قامت عشرات المشاكل بسبب ان اللغة المستعملة لم توافى غرض كاتبها ولم تعبر عن الحالة النفسية التى كان يكتب اثناءها .... احيانا نكون فى حالة مزاج عالى ونكتب ظنا منا ان القراء يعيشون نفس الحالة الرومانسية الحالمة ..لتخرج الكلمات دراب دراب وتودى لاحتكاكات لم يتوقعها كاتب المداخلة ......
الناس لازم تكون خطوة او خطوتين ahead وليس behind
تعال بهناك وما حتندم
11-02-2010, 11:12 PM
smart_ana2001 smart_ana2001
تاريخ التسجيل: 04-17-2002
مجموع المشاركات: 5695
سلامات يا النصري بما انك من المتابعين للتكنولوجيا الجديده....دى اخر التقليعات. موقع اسمه : http://hunch.com/
Quote: Hunch is a website, designed as a collective intelligence decision-making system that uses decision trees to make decisions based on users' interest. Hunch is building the 'taste graph' for the internet, mapping every person to every entity — and their affinity for that entity. The system asks users a series of questions about a topic to help weigh the options. Upon completion of the questions, the user is presented with results, where he or she can agree or disagree with the results to help "train" the system. Users can also add pros and cons about results. Hunch was launched publicly on June 15, 2009, and since then has been fully open and available to the public.[1] The website reached a total worldwide site traffic of 1.2 million unique visitors in February 2010
Quote: انصحكم بالابتعاد عن متابعة المواقع الاخبارية كالجزيرة والسى ان ان.. زخم وضجيج..الافضل متابعة اخبارهم من التلفاز او مباشرة من مواقعهم على الانترنت
غايتو سمعت كلامك و شطبت كل المواقع الاخبارية واكتفيت بالحبان السودانيين.. (اوع بس يخزلونى و يلبتو ويقطعو الحركة...انا فعلا داير اسمع كل واحد بعمل فى شنو او بفكر كيف) شطبت المواقع الاخبارية على افتراض انو مافى شئ going on هذه الايام ومعظم رسائلهم اذعاج وضجيج زى ما قلت ....
رسالة مفيدة جدا من الاخ مهند الزاكى وينصحنا فيها باستخدام مواقع معينة لتقصير عنوانين الصفحات ... بما ان عدد الحروف المسموح استخدامها فى كل رسالة يجب ان لا تزيد عن 140 حرف,,, تاخد عنوانين الصفحات عدد مهولا من الحروف ...هناك مواقع متخصصة فى تقصير العناوين منها http://bit.ly
حكاية اختصار عناوين الويب ازالت علامة الاستفهام التى كانت تساورنى لغرابة العناوين التى تظهر هناك. هنا تأتى فائدة مشاركة الاخرين بالمعلومة..مهما كانت بسيطة فانها ذات معنى.
والله يا محمد ..تويتر دى بالرغم من البساطة الشديدة التى تبدو عليها الا انها دايرة درس عصر...
اظن بمرور الزمن الواحد بيملا ايدو منها ...بس المهم الزول يستعملها ويتقلم عليها دلوقت قبلما يكون فى احداث مهمة تتطلب متابعة لصيقة ..
الاسبوع الجاى حيلعب الهلال مباراة مهمة جدا ..وفى كل مرة اعانى الامرين(ماهم الامرين) فى متابعة سير المباراة حيث ان ظروف العمل تمعنى من مشاهدتها مذاعة او متلفزة... لحل هذه المعضلة ..ساقوم بعمل بوست مخصوص للتواتا بعمل تويتات قصيرة عن مجريات المباراة.. وبكل تكون تويتر قدمت لى خدمة فى غاية الاهمية لمتابعة حدث لحظة لحظة...
سمعت نصيحتك وبديت ازيد فى عدد الناس الانا متابعها وبالصدفة لميت فى موقع اسمه OMG اختصار ل oh my good ياخى والله ده برسل معلومات !! مبالغة قبل شوية قريت ليهو التويت دى
Go to Google Maps and click “Get Directions Get directions leading from China to Taiwan and look at instruction #55
omg
11-23-2010, 09:32 PM
ombadda ombadda
تاريخ التسجيل: 10-10-2002
مجموع المشاركات: 6736
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
smart_ana2001
Elawad Eltayeb
AnwarKing
ombadda
Ashraf el-Halabi
Gamal Abayazid
د.محمد بابكر
ناذر محمد الخليفة
محمد الامين احمد
JAD
عبدالرحمن الحلاوي
فيس بوك
تويتر
انستقرام
يوتيوب
بنتيريست