|
دعواتكم لزميلنا المفكر د.الباقر العفيف بالشفاء العاجل
|
|
 Re: كيف نجح المهاجرين الجدد من سوريين واتراك فى جمع الاموال فى السودان؟(يوجد مثال) (Re: النصرى أمين)
|
تعرف يا النصري
موضوع المهاجرين الجدد في فترة (الاستثمار) موضوع يؤرقني شخصياً وأحاول أن اروج لاستثمارات المغتربين السودانيين على أمل إمكانية رفع استفادة المواطن من بيئة اقتصاد مفتوح في بلاده بدلاً من استفادة المهاجرين منها,
ناقشت الموضوع مع كثير من المسئولين, لكنهم لا يكترثون للأمر على اعتبار أن المهاجرين مكسب وناس (حمر) مع العلم بأن الغالبية العظمى من هؤلاء وفدوا بدون أية رساميل تضعهم في تصنيف المستثمرين,
واصل وسنناقش
أحمـد
| |
 
|
|
|
|
|
|
|
|
Re: كيف نجح المهاجرين الجدد من سوريين واتراك فى جمع الاموال فى السودان؟(يوجد مثال) (Re: أحمد الشايقي)
|
سلام يا احمد
الموضوع معقد ومشربك وملولو
الواحد ما عارف يمسكو من وين ....
ابدا ليك من زاوية معينة ::::
قبل سنوات ...اثنين من اولاد اهلنا قامو بمشروع جريئ جدا ..
التعدين فى مادة مطلوبة ومرغوبة عالميا ..
هل تصدق كل الذى تحتاجه
كواريك
وشوالات ..
هذا المعدن يوجد على سطح الارض وليس فى باطنها ...
مرة تانية ...
تحتاج لكوريك وشوال للتعبيئة.. ولا شئ اخر ...
وقد رائت بام عينى شوالات المعدن الجاهزة للتصدير ...
ولاننا سودانيين (واسباب اخر)
فشل المشروع
حتى هذه اللحظة
ترقد هذه المعادن بسلام .. فى انتظار الشوالات والكواريك
والسوق العالمى ينتظرها بفارق الصبر ..
| |
|
|
|
|
|
|
|
|
|
Re: كيف نجح المهاجرين الجدد من سوريين واتراك فى جمع الاموال فى السودان؟(يوجد مثال) (Re: النصرى أمين)
|
أخي النصري
تحياتي
حكومتنا اللا رشيدة فتحت باب الاستثمار على مصراعية لهؤلاء بالتحديد سوري تركي مصري ، ومنحتهم كافة امتيازات قانون الاستثمار وبدون حق لكونهم أفراد لا شركات .. وحتى لو كانوا شركات أو جهات اعتبارية فهل نحن بحاجة لهذا الكم من المطاعم والكافتريات والاستوديهات التي تزين واجهاتها بالالمنيوم والزجاج والخطوط المزركشة ؟ هل يعقل أن يعفي هذا الأجنبي من الضرائب والجمارك والزكاة ورسوم المحليات والأسواق ورشى الموظفين ووجباتهم وهلم جرا ؟ قبل فترة على هذا المنبر أحد الزملاء كتب عن واقعة حدثت أمامه في الخرطوم (2) على ما اذكر .. كافتريا سياحي (تركي) يبيع ساندوش السمك بثلاث مرات ضعف جاره السوداني لأنه مستثمر ... ولا يدفع فيها مليما واحدا لأي (شحاد) ناهيك من الحكومة ؟؟؟ شفت الظلم بالقانون كيف؟؟؟ يعني لو اشتغل سنة يجمع عشرة مرات ضعف السوداني في عشر سنوات .... يالله خليكم في غربتكم... ومع ذلك ملاحقين بالسفارات وجهاز المغتربين يعني لا جوه عايشين ولا برة عايشين .. بس صابرين
تحياتي
الشفيع إبراهيم
| |
|
|
|
|
|
|
|
|
|
مستثمرى الشاورمة و الكباب (Re: Alshafea Ibrahim)
|
العزيز الشفيع
كنت بصدد كتابة مداخلة بعنوان
"مستثمرى الشاورمة و الكباب" على وزن علماء الهناى و الهناى
لا ادرى باى منطق تم اعتماد هؤلاء كمستثمرين ؟
وانا حقيقة اشك انهم رجال اعمال من اساسو
هم ""صنايعية""" لم يجدو فرص التشغيل فى بلادهم فهاجرو لبلادنا
لان حكومتنا دايشة وشعبنا "يموت" فى الشاورمة والكباب ولا يستطيع
العيش بدونهما ...
بعدين
اى استثمار هذا والعمالة ليست محلية ؟
شرط اولى واساسى ومنطقى للحصول على امتيازات الاستثمار فى البلد
المضيف هو تشغيل عدد معين من العمالة المحلية ...
مرة دخلت محل جنب المطار لقيت الشغالين كلهم مستثمرين..
البقطع اللحمة ..مستثمر
البغسل العدة ..مستثمر
البرمى الفلافل ..مستثمر
والبشيل الزبالة برضو مستثمر
المحل كله مستثمرين فى مستثمرين فى مستثمرين
| |
|
|
|
|
|
|
|
|
|
Re: مستثمرى الشاورمة و الكباب (Re: النصرى أمين)
|
قانون تشجيع الاستثمار لسنة 1999م تعديل لسنة 2003م
ويعمل به من تاريخ التوقيع عليه.
مجالات الاستثمار
7- يشجع هذا القانون الاستثمار، في مجالات النشاط الزراعي والحيواني و
الصناعي والطاقة والتعدين والنقل والاتصال والسياحة والبيئة والتخزين والإسكان
والمقاولات والبنيات الأساسية والخدمات الاقتصادية والخدمات الإدارية والاستشارية
وتقنية المعلومات وخدمات التعليم والصحة والمياه والثقافة والإعلام
وأي مجال آخر يحدده مجلس الوزراء
انتهى
اكثر من 23 مجال من مجالات الاستثمار لم اجد بينهم الشاورمة والكباب
| |
|
|
|
|
|
|
|
|
|
Re: مستثمرى الشاورمة و الكباب (Re: النصرى أمين)
|
ونحاول نجاوب على السؤال فى عنوان البوست
كيف نجح المهاجرين الجدد من سوريين واتراك فى جمع الاموال فى السودان؟
والاجابات المحتملة:
السودان بلد مليان بالخيرات ..بكل انواعها
وهى فى متناول اى مواطن طموح مسلح بالخبرة والاصرار ..
ولكن لحكمة لا يعلمها الا رب العاملين ..ان الشعب السودانى
يمشى كل يوم على هذه الثروات ولا يتحسسها ..
ينظر اليها ولكنه لا يراها ..
يفكر فيها ولكنه لا يجدها ..
وهى اقرب اليه من صحن الستالايت ..
هذه الثروات فى كل مكان ..
فى صورها الطبيعية العذراء
او اشكالها الرسايكيلية (من Recycle)
واحدة من هذه الثروات الغير مرئيه ...
هذا السوق الجامح ...
و هذه الملايين النهمة لكل ما هو جديد مبتكر ..
وكل سلعة تجعل الحياة اقل صعوبة واكثر احتمالا ..
| |
|
|
|
|
|
|
|
|
|
Re: مستثمرى الشاورمة و الكباب (Re: النصرى أمين)
|
استاذ النصري سلام الله عليك ...
أوصيك خيراً بهذا البوست , امسك فيهو قوي ..
ممكن يكون فاتحة خير لزول راجع للبلد , ولا قاعد في البلد ومـُتمحــــن ...
خليهو يكون مرجع للمشاريع الصغيرة الزي الذكرتها فوق دي ...
وزي كلامك عن ( المصارين أم 16 دولار كندي ) دي فكرة اي زول ممكن يجربها , والإنترنت فيهو اي حاجة عن أي حاجة , فبقليل من البحث الواحد ممكن يعرف تجهيزها , وتغليفها , وشهاداتها الصحية ومن ثمّ تصديرها .. وقس على ذلك مصارين اي حاجة من النخل لغاية الرمال ...
هل تصدق يا النصري أن الشاحنات الآن تـُصدر من السودان لبعض دول الخليج ؟ وبتجيب ارباح خيالية ؟؟؟؟
| |
|
|
|
|
|
|
|
|
|
Re: مستثمرى الشاورمة و الكباب (Re: النصرى أمين)
|
الشعب السوداني تعود على (الأفندية) ويعشق عمل المكاتب وأكوام الورق..
(الإبداع) مفقود بشدة في السودان (إلا استثناءات بسيطة) والسوداني إنشان تقليدي وحذر لا يحب المغامرة ولا يجيدها..
والدليل (تحويشات عمر) المغتربين بالعشرة والعشرين سنة واللي (اتكبت) معظمها في حافلات وركشات وكافتيريات..
إلى فنرة قريبة كنا نفتقد القدرة على التخطيط ودراسة المشاريع وإدارتها بصورة صحيحة وما إلى ذلك.. وينتج عن ذلك القصص المؤسفة لفشل استثمارات السودانيين..
استثمارات معظمها تمت دراسته ودراسة حساباته على ورقة A4 واحدة..
السودان يحتاج بصورة عاجلة إلى مراكز تدريب إدارة المشاريع Project Management ومراكز دراسات السوق Market Research ونشر وزارة التجارة لتقاريرها ونتائج دراساتها على الإنترنت سيساعد كثيراً..
حتى الاستثمارات التي نجحت في السودان كان بالإمكان تحقيق نسب نجاح أكبر بكثير إن تمت دراستها بصورة أمثل..
كل ما ذكرت أعلاه يسبب (فجوة استثمارية) في بلد غني بمكونات الاستثمار الناجح..
هذه الفجوة يملؤها الآن وبسرعة المستثمرون الأجانب..
| |
|
|
|
|
|
|
|
|
|
والله السبب < نِحنا > (Re: أيمن جبارة الله الخضر)
|
لما صَعِب علي العَيش في الخُرطوم رحلت إلى < البُطانة > وعِشت (8) سنوات
فيها إشتريت أرض على نهر الدِندِر وكام راس بقر وناقة وحِمار تبَين لي فيما بعد
إنو أعَور ... زرعت بِكُل ما أملُك ... كُنت بزرع < هَبَتَلي > يعني بِمُشاورة مَن لا
يملُك المعلومة ... مشيت الخُرطوم لأصحابي الزِراعِيين والبَيطرِيين وحاولت إقناعُم
بِالعمل بِمزرعتي التي قُمت بِتسجيلُها كمشروع وعرضت علَيهُم عقد (6) شهور فقط +
(3) وجبات مُكَونة مِن الدِجاج والحمام والسمك والألبان ومُشتقاتِهِ والبيض + رِحلات
الصيد بِبنادِق مُرخصة + شِهادة مِن المشروع تُفيد بِعملِهِ (شِهادة خِبرة) ... رفضو
أن يأتو معي لِكثرة < النِمته > و< الباعوض > و< الضُبان > ... فعُدت أزرع بِفِلوسي ...
يعني بتعلم بِفُلوسي ... ولما تعلمت كان رأس المال المُخصص لِلمشروع إنتهى ...
فضلت أن أوقِف النزيف بِأن لا أُمَوِل المشروع بِبَيع أي مِن مَوجوداتي التي أملُك ...
مشروع < القرِية النموذجِية > زِراعة الخُضروات + الذُرة + الحبوب الزيتِية + تصنيع
مُشتقات الألبان + زِراعة أعلاف حَيوان المزرعة + تربِية وتسمين وتهجين حَيوان المزرعة
+ تصنيع جُلود + الأسماك (فسيخ/مُلوحة/طازِج /مُجمد) + تربِية الطِيور الداجِنة + الأرانِب
كُل ذلِك يُدار بِالطاقة الشمسِية لِسقي الأرض وتشغيل الآلِيات ... قدمت هذِهِ الدِراسة
لِلزِراعِيين والبياطرة ... لم يقبِلو ... فضلو الجُلوس في ضُل البِيوت ولِعب < الليدو >
زول قرا < زِراعة > أو < بَيطرة > وين حيِشتغِل يعني ... طبعاً في مزرعة ... في
حقل ... غيط ...
السبب < نِحنا > يا خوي ...
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
وعليكم السلام يا فلان
فى زيارتى الاخيرة للسودان جمعت كل اولاد اهلنا دون
ال 18 فى ندوة ..المتحدث الوحيد انا..واشترطت عليهم
انو الما بجى الندوة ..ما يجى يودعنى .. والله بينى بينه
المهم ..
الشباب كلهم حضرو ..
تحدثت لهم عن "شرارة" او "شمعة" الامل لازم تكون مولعة طوالى
ويجب ان لا تنطفى من اجل مستقبل افضل..
بعد سفرى ..
راسلونى ..
انهم لا يجدون الشمعة نفسها ليوقدوها ....
شفت الاحباط ده كيف ؟
لو اقترحت لرجل اعمال سودانى يشتغل فى المصران
تفتكر حيقول ليك شنو؟
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الأخ عزام أنا سوف أكمل الفراغ : نحن شعب كسوووووول
المصيبه أنو أصحابنا ديل جماعة الليدو لا يعملون ويسوؤهم
أن يعمل الأخرون , وهم مهمشون مع أنهم في مركز البلد وعاصمته
( محل الريس بنوم , والطياره بتقوم) , أقربائي من أم درمان
ولدوا ونشأوا في بيوت من الجالوص ويبدون تعاليا تجاه الريف
وأهله , فضلا عن العمل فيه , ( هل نحن بحاجه لأشتراكية ماو تسي تونغ ؟؟ )
أما دراستهم للزراعه والبيطره فلم تكن قناعة ولكن أهوو فرصه للجكس .
دعك منهم أهلنا قالوا الممعوط ما بطير. دونك الأنترنت إذا احتجت لأي معلومه
لا رجاء في ( عاصمي ) عطشان وهو على ضفاف الأنهر , يسكن في جحور كالنمل ,
ويلعب الليدو في عصر مابعد الصناعه .
| |
|
|
|
|
|
|
|
|
|
Re: والله السبب < نِحنا > (Re: معاوية الأرباب)
|
الاخ ايمن
قد اتفق معاك فى كل القلتو ولكن استوقفتنى الجملة دى
Quote: السودان يحتاج بصورة عاجلة إلى مراكز تدريب إدارة المشاريع Project Management
ومراكز دراسات السوق Market Research ونشر وزارة التجارة لتقاريرها ونتائج
دراساتها على الإنترنت سيساعد كثيراً.. |
فى رائئ المتواضع انو دى واحدة من الحلول ..لكن للاسف تتعامل مع المشكلة من فوق لتحت
وليس من جزورها ..
جزور المشكلة هى الشخصية السودانية نفسها ..وطرائق التربية فى البيت والمدرسة والشارع ..
و لانو ليس هناك امل اطلاقا فى تحسن حالة هذه المؤسسات التلات (ده اذا ما اتدهروا اكتر)
يصبح الامل الوحيد ان يتعلم الشعب الابداع والمسئولية والالتزام عن طريق غريزة البقاء
والاستمرارية....
واحدة من حسنات الانقاذ انو ضغطت الشعب لدرجة جعلت الكثيرين معرضين للفناء والعدم مما
تحتم عليهم ان يصارعو من اجل بقاءهم مستخدمين كل ما يملكون من امكانيات ذهنية وفكرية ..وهنا
نرى ولاول مرة ...لمحات ابداع وعبقرية والتزام ومسئولية وعمل شاق ..
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الاخ عزام
بالتاكيد السبب ""نحن""
و ""نحن"" هذه تشمل الجميع بما فيهم ""انت" و "انا""
اظنك تعلمت الان من تجربتك المريرة هذه ونتمنى ان يتعلم الاخرون ايضا منها ...
واضح من سردك ان سبب فشل المشروع هو العمالة الملتزمة الطموحة ..وقلة خبرتك فى المجال ..
لو قدر لى الان ان اقوم بمشروع مشابه لمشروعك لسعيت بكل امكانياتى ان اتفادى كل العوامل
التى قادت لفشل مشروعك ..
اولا ..
مشكلة "الجمتى" وا"الباعوض" و"الضبان" ساوليها اهتمام خاص واعتبرها
من اساسيات نجاح المشروع ..مثلها مثل الدجانات والحاضنات واحواض السمك وماكينات
الرى وغيرها من الاولويات ..
ثانيا
لن اعتمد اطلاقا على الاصدقاء والمعارف من الزراعيين والبيطريين..
ساقوم بتخصيص مرتبات مجزية جدا للوظائف التى احتاجها واقوم بالاعلان عنها فى الجرائد ..
وعند حضور المتقدمين للمعاينات(ده اذا خلو الكسل وما ناموا)
ساقوم باختيار من يصلح جيدا للوظيفة ..من لديه قوة تحمل وصبر
ساقوم باختيار الطموح منهم ..ال Desperate للنجاح والتفوق
ساقوم باختيار من يؤمن ب "من ادى عملا فليتقنه"
ساقوم باختيار من يؤمن انه جزء من المشروع ..وليس عاملا فيه
ساقوم باختيار من لديه قناعات بمواجهة الصعاب وتحديها والتغلب عليها..
ساقوم باختيار من اتاكد انه ليس "سِنّة ناعمة" يخاف البعوض والضلام والجندب
و ودامبعلو ..
ساقوم باختيار من تسلح فعلا بالعلم وليس واحدا من هؤلاء القوم الذين
يحملون شهادات ورقية لا تغنى من جوع ..
ساقوم باختيار من يجتاز ال Behavioural Interview
وساعرض عليه نسبة من الارباح حسب الجهد والعطاء الذى يبذله
فى المشروع ..
وبعد ان يفشل مشروعى ..سياتى بعدى من يتعلم من اخطائى واخطاءك..
حكى لى احد الاصدقاء من البياطرة(الذين لا يخافون الجندب) ان الهولندين
احتاجو لقرابة المائة عام "ليولفو" تلك البقرة السمينة ذات الخطوط البيضاء
والسوداء ...
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الاخ معاوية
,
Quote: لا رجاء في ( عاصمي ) عطشان وهو على ضفاف الأنهر ,
يسكن في جحور كالنمل |
لا اظن ان البياطرة والزراعيين الذين حكى عنهم الاخ عزام
كلهم عاصميين...
ايضا ...
تشبيه بيوت امدرمان القديمة(مثلا) ببيوت النمل تشبيه غير لائق
| |
|
|
|
|
|
|
|
|
|
Re: والله السبب < نِحنا > (Re: آدم صيام)
|
النصرى بوستك جميل خالص,,,وربما يرشد ناس ضهبانين كتار
عموما انا من الناس العشمانين فى الستثمار,,على قدر المستطاع
وعربى جزيرة ومن منطقة تسويق ريفية معروفة,,,
ربما ساتفيد من بوستك وافكاره المطروحة,,,
تعرف امس فى سوق البطحاء شاهدت بنقالى مالى ليه اربعة كراتين علب بارد
من تحت اقدام جمهرة الهنود الجمعية,,,فعلق عليه قريبى ان هذا الرجل فايق
علبة البارد مليانة بريال يعنى حيبيعها بكم وهى معدن,,,,
اها زولى دا لو شاف بتاع المصارين يقول عليه شنو,,
قلت لاخوى الصغير عندنا قروش فى سوق ليبيا امشى جيبها وشيل منها حق مشوارك
قال الليلة انا ما فايق,,عندنا عرس فلان,,ما ممكن تمشى وتحصل العرس,,
ياصديقى لا تدافعون عن السودانين كثيرا,,فصدقت مقولة نحن قوم كسالى
لعهد قريب كان البشتغل فى البيت واحد,,والبقية نائمون
عندى بلدياتى معترب 20 سنة,,عندو 5 اخوان و3 نسائب,,
عندهم حواشتين ,,ممسكنهن فلاتة بالنص,,يعنى لو الحواشة جابت 20 شوال قمح عندهم 10
صدقنى القمح مو محتاج تعب كتير ,,
ديل كلهم بنتظرو المغترب دا لما يجى ,,اسى اولاده فى الثانوى لسع ما فصلهم من الاسرة الكبيرة
وياريت لو الاخوان طلبة او النسائب رحلو نسوانهم,,ديل كلهم عواطلية,,,كيف يشتغلون هم اولاد فلان
وعلى هذا النمط قس,,,
سورى عندو مصنع مناديل فى السودان,,المصنع دا بورد الى ام صفقا عراض,,
عندى ابنى خالتى موزع معاه قال لى تعال شوف المصنع حق السورى دا,,,
لقيت المصنع ماكينه واحدة فقط,,داخل غرفه,,وعنده غرفة صغيرة زى مكتب ,,ودفار
وعربة اكسنت,,هذا الرجل مستثمر,,
عموما متابعين
تسلم
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
سلام يا ابوقوتة
الامثلة كتيرة ومعظمها يقود الى خلاصة واحدة هى فى مرارة الحنظل و هى
اننا شعب كسلان ..
ونوع قصصك دى عندى منها الالاف المؤلفة ..
انا شخصيا كنت واحدا من هذه الجموع لا اختلف عنهم فى شئ ..
لم اعمل طيلة حياتى حتى تخرجت ..
لم افكر لحظة واحدة ان اعمل ك "غسال عربات" او "جزار" او "عامل بناء"
حتى وصلت لهذه البلاد ..
فتعلمت المسئولية "الجد جد"
والشغل الحار ..
لن انسى ابدا يوم اشتغلت مع احد الشركات التى تقوم بتحليل الفضلات البشرية
وفصل السوائل منها واستخدام المادة المتبقية كسماد ..
كنت اعمل فى احد هذه الماكينات ..
وفجاة وبدون مقدمات امتلا التانك وفاض ..ومن ربكتنى قمت بسحب الخرطوش ..
وتووووووش
رجعت البيت وصابونة كاملة اتلحست
تانى يوم من تلك الحادثة اخبرنى مدير المشروع عن عدم
احتياجهم لى وطلب منى ان اعود الى وكالة التشغيل التى
ارسلتنى لهم ....
شفت كيف ؟
راضين بالهم والهم عامل تقيل
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الاخ حامد
شكرا على المرور الكريم
بحكم وجودى فى كندا ومعرفتى بالكمبيوتر و التجارة الالكترونية
وشوية انجليزى ..يطلب منى بعض اقاربى عن تجميع معلومات عن بعض
اشياء يظنون ان السودان يحتاجها ...
الشئ المحيرنى..
انهم يقولون ان الماكينة اوالبضاعة الفلانية نجحت وانها تباع بالشئ
الفلانى ..وانهم يودون ان يتاجرو فيها ..
طيب ..
براحة كده ....(احاول امنطقهم)
الماكينة او البضاعة دى فى زول قبلكم اجتهد وفكر وغامر واشتراها
وجابها السودان ..
وكثمرة من ثمار المغامرة نجح ....
لماذا تقلدونه ؟
لماذا تضايقونه فى عمله بمحاكاته؟
ولانه انسان زكى وناجح اكيد عمل احتياطاته من "كارثة" التقليد والمحاكاة
التى تنتشر وسط السودانيين ....
كنت اقول لهم ..
فكرو
واجتهدو
وابدعوا
وغامرو
واذا لم يكتب لكم رب العالمين نجاحا
فقد قمتم بواجبكم واكتر
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
Quote: لو اقترحت لرجل اعمال سودانى يشتغل فى المصران
تفتكر حيقول ليك شنو؟ |
انت وهم وله شنو . ده لو ماقال ليك......
Quote: أقربائي من أم درمان
ولدوا ونشأوا في بيوت من الجالوص ويبدون تعاليا تجاه الريف
|
ما دى المصيبه زاته ثم ثانى الشى ده عام فى اغلب البيوت
شكرا اخى النصرى
| |
|
|
|
|
|
|
|
|
|
Re: والله السبب < نِحنا > (Re: Abdelmuhsin Said)
|
عزيزي النصري لك التحايا
هؤلاء الاجانب يجودون صناعتهم اكثر منا
خد مثلا المطاعم : اكل نضيف وجميل وسعر مناسب ويدوك ليهو بكل كلمات الترحيب والابتسامات
تعال شوف مطاعمنا اغلبها متسخه والطبيخ بأهمال والجرسون صاري ليك وشو تقول بينك وبينو تار
طبعا في مطاعم مستثمرين سعرها يفوق الخيال عشان كده روادها من فئات معينه
بقي ان اقول : نحن نغترب في بلاد الله الواسعه .. فلماذا نمنع الاخرين من الاغتراب الينا ؟
لا شي يمنع . فقط علي الجهات المختصه تقنين وجودهم وحصر انشطتهم ومراقبة اعمالهم
من احسن فله ان يسترزوق ويكون بيننا .. ومن اساء يعاقب ويبعد
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
موضوع ممتاز متابع باهتمام
ارجو من المتداخلين اضافه معلومات عن الاتي:
1-صلاحيات الاعفاء الضريبي للمستثمرين
or
Tax Break
2-صلاحيات الاعفاء الجمركي للمعدات
اتمني اعطاء جزء من هذه الصلاحيات لهم اذا لم تكن موجودة بالفعل !
| |
|
|
|
|
|
|
|
|
|
Re: والله السبب < نِحنا > (Re: Sayed Bekab)
|
الاخ عبدالمحسن
حكاية التعالى(والعنصرية) موجودة فى كل المجتمعات البشرية..
انا ك ود من اولاد امدرمان كنت ولسنوات طويلة جدا ابدى
تعاليا مش فقط على اولاد الاقاليم بل حتى على كل اولاد
باقى امدرمان الغير قديمة زى الثورات,امبدات الخ)
وبصراحة كده المتعالى والمتعالى عليه ..سجم فى رماد لمن
تقارنهم ب شعوب العالم الاخرى ..
هى فقط ثقافات ومفاهيم بالية لم نجد من يصححها لنا وقتئذن
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الاخ الكريم نوفل
Quote: خد مثلا المطاعم : اكل نضيف وجميل وسعر مناسب ويدوك ليهو بكل كلمات
الترحيب والابتسامات
تعال شوف مطاعمنا اغلبها متسخه والطبيخ بأهمال والجرسون
صاري ليك وشو تقول بينك وبينو تار
|
انت هنا قدمت دليل قاطع بان المشكلة فى الجمهور وليس رجل الاعمال ...
لو الجمهور اشتكى من سوء الخدمات والاهمال وتوقف عن ارتياد هذه المحلات الوسخانة
لاضطر صاحب العمل لمعالجة المشكلة...
والا تعرض للافلاس واغلاق محله
المشكلة فى الجمهور..
اغلبهم لا يرى ان المحل وسخان
ولا يظن ان الجرسون لئيم
ولا يمانع فى منظر اسراب الضبان..
عند زيارتى الاولى للسودان بعد غياب طويل
عزمنى احد الاصدقاء الاغنياء لمحل سمك فى الثورة...
قال انه احسن محل يبيع سمك فى السودان ..
مشيناوقعدنا فى بنابر فى شارع رئيسى غير مسفلت
والعجاجه للسماء..
والتراب..
والضبان ..
وبرميل الموية عليه تحذير بعدم النظر داخله
لم يلتفت اى واحد منهم ان هناك شئ خطا
فالامر عادى للزبون
ولصاحب السمك
ولناس البلدية
كنت انا الوحيد المجنون وسط هؤلاء العاقلين
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الاخ سيد بيكاب
بصراحة كده ليست لدى معلومات حول تفاصيل الامتيازات
الضريبية التى تمنح للمستثمرين
اتمنى من احد المتخصصين القاء بعض الضوء عليها..
شكر على مرورك الكريم..
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
نعم يا النصري
مصارين البهائم تعتبر عملة صعبة في ايطاليا و سويسرا
فهي تدخل في صناعة الخيوط الطبية
المشكلة هي انها تحتاج الى مواصفات تعبئة خاصة بمواد كيميائية
موجودة بكثرة في السودان
طرحت هذا الموضوع من قبل لاحد الاقارب ووفرت له السوق و المشتري
فكان رده ياي قول يالطيف معقولة الواحد يبدا يومه بالجزارات و المسالخ
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
Quote: لو الجمهور اشتكى من سوء الخدمات والاهمال وتوقف عن ارتياد هذه المحلات الوسخانة
لاضطر صاحب العمل لمعالجة المشكلة... |
بالظبط كده يا النصري
الجمهور المرتاد للمطاعم يري هذه الاشياء عاديه ولا يلتفت اليها
وبالمقابل تجد المستثمر الاجنبي يسعي جاهدا لارضاء الزبائن ولا يدع اي ملاحظه فيما يقدمه للجمهور
المكان نظيف 24 ساعه .. ابتسامه تعلو الجبين .. الاكل لذيذ وشهي .. يسعد بخدمة الزبون ... الخ
في احد المطاعم المصريه بالخرطوم ... دخلت ( جراده ) الي الصاله الرئيسيه للمطعم رغم حرصهم علي عدم
حدوث مثل هذه الاشياء ... قام مدير المطعم بأغلاق المطعم فورا لمدة 24 ساعه .. واستدعي شركة النظافه
التي اتت علي الفور بعتادها وعمالها ومشرفيهاومبيداتها وشروعوا في نظافة المكان وتعطيره
ثم فتح المطعم بعد ذلك ابوابه للجمهور الكريم
| |
|
|
|
|
|
|
|
|
|
Re: والله السبب < نِحنا > (Re: نوفل عبد الرحيم حسن)
|
الاخ الكريم احمد
Quote: فكان رده ياي قول يالطيف معقولة الواحد
يبدا يومه بالجزارات و المسالخ |
المصارين دى واحدة من الاف الخيرات التى تمتلى
بها البلد ..
هى خيرات موجوده ..
وزى ما قلت ..ينظرون اليها ولا يرونها ..
اى شئ فى السودان يمكن ان تجد له مشترى عالمى ..
فى زمننا ده ما فى حاجة ليست ليها قيمة..
| |
|
|
|
|
|
|
|
|
|
Re: والله السبب < نِحنا > (Re: نوفل عبد الرحيم حسن)
|
أخي النصري
صحيح عندنا حاجات (خاصة) جدا نتفرد بها عن بقية أجناس البشر .. الكسل ، اللامبالاة مثلا ... لكن عندنا غرائب وعجائب لم يجدها الأجنبي في بلده أو أي بلد أخر غير السودان ... لم أجد تشريعا أو أمتيازا هنا بالسعودية مثلا يعطي الأجنبي حقا يتمناه السعودي المواطن المنع والقيود بالكوم تحد من نشاط وحركة الوافد كما يحلو لهم تسميته ... نرجع لموضوعنا المؤسف كثرة القيود والعراقيل التي تواجه المواطن السوداني الحادب على العمل ... يعني من الصباح فتاح ياعليم تشتري كهرباء ، يفطر معاك بتاع الضرائب أو الزكاة أو المحلية المستعجل منهم يأخذ حقه نقدا ... اليوم كله ما تبيع حق الكهرباء والفطور والشاي والجنبة والرشى والإكراميات ... جاري في مدني بعد 28 سنة غربة وبنات وأولاد في سن الزواج ناهيك من الجامعات قرر الاستثمار في تجارة مواد البناء ... دخل السوق ب 600 مليون (سيخ كمر اسمنت جبس بوهية ألخ) (5) سنوات طلع (فالصو) وباع شوية أبقار وفاءا لبعض الديون .. يازول عندنا طاحونة في البيت للوالد رحمة الله عليه ما بتدخل ليهو 5 ألف صافي بنات المحلية تفوت واحدة وتجي التانية وكمان معاهم بوليس ؟؟؟ تقول بنسوي عرقي ...
لك شكري
الشفيع
| |
|
|
|
|
|
|
|
|
|
Re: والله السبب < نِحنا > (Re: Alshafea Ibrahim)
|
الاخ نوفل
انا شخصيا على قناعة خاصة انو الدمار لا يمكن
اصلاحه بقوانين ولوائح..
ولا يمكن تفاديه بالالتزام بقوانين السوق وحسابات
الربح والخسارة ...
ولا بجامعات
ومراكز تدريب وتاهيل
ولا بعثات خارجية
الحل الوحيد والامل المتبقى هو الاهتمام بالتعليم الابتدائئ
وتنشيئه اجيال جديده لنج ...
اجيال تعرف معنى المسئولية والالتزام ..
والنظافة
واحترام "القرش"
والعمل الدوؤب وقوة التحمل
والصبر..
نحتاج ان تفهم الاجيال القادمة ان الحرفيين هم اساس نهضة البلاد
ومجدها ...
وان ..
النجار
والحداد
والسمكرى
والسباك
والجزار
هم الكل فى الكل
وليس الافندية...
الامل مافى يا عزيزى فى جيلى وجيلك والاجيال خلفنا..
كلنا زى بعض ..
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الأخ النصري
بوست مهم و يلفت النظر لمجالات استثمار لأصحاب راس المال البسيط..تعرف في ناس زهجت من البلد زاتها..لأنو النجاح يحارب..صغار المستثمرين من الأجانب سوف يفتحوا فرص للسودانيين حتى و لو استفادوا هم على المستوى الشخصي..مزيد من تسليط الضوء على المشاريع الصغيرة و مزيد من الانفتاح على العالم الخارجي و اتاحة الفرصة لمستثمرين أجانب..بالطبع التركيز على الاستثمار الصناعي و الزراعي هو الأفضل للسودان..
| |
|
|
|
|
|
|
|
|
|
Re: والله السبب < نِحنا > (Re: الحاج حمد الحاج)
|
الاخ الشفيع
ونحن شفع صغار سمعنا انو ماوتسى تونغ الزعيم الصينى
قام بحملة ضارية ضد الطيور لانها تضايق الانسان فى طعامه..
وتزيد الاساطير وتقول ان الحملة نجحت ولم يتبق طائر واحد
فى الصين ...
الانقاذ انتهجت نفس السياسة تقريبا بافتراض ان الانسان السودانى يضايق
الانقاذيين فى الرزق ..فقامت بابادتهم وتضييق الحياة عليهم..
ونجحت ..
فهاجرت الملايين
وابيد وقتل الالاف ..
واتفركت الروابط الاسرية..
وتخاصم الاخوان الاشقاء حول جنيهات قليلة اختلفو حولها..
وما تبقى ..
يكفى الانقاذيين ويزيد ..
وكله باسم الله رب العالمين ودينه الحنيف
هى لله هى لله ..
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
والقائمة ليست لها نهاية
فكل شئ على وجه هذه البسيطة هناك من يحتاجه
قبل اسابيع كنت اتحدث مع الاصدقاء وزكرت انى مشتهى
امشى السودان عشان الكسرة ..
قال لى طيب ما تعملها ..
قلت ليه اعملها كيف ! وين القى الدقيق بتاع الفتريته
او مايو ..
كيف اعمل الموص واخمره؟
وكيف القى لى ضبانة ضبانتين ارميهم فى الموص(قلت ذلك فى سرى)
فاجانى قال لى كل شئ موجود فى محلات الهنود
وذهبنا ..
فعلا ..
دقيق الفتريتة ذاتو ..
فى شوال صغبنوتى لزيز كده
عليه طباعة انيقه باللغات الانجليزية والهندية
ورسومات جميلة
هذا الشويويل(تصغير لشوال) يباع بحوالى 15 دولار
اظن ان وزنه لا يتعدى 3-5 كيلو ...
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
Quote: جزور المشكلة هى الشخصية السودانية نفسها ..وطرائق التربية فى البيت والمدرسة والشارع ..
و لانو ليس هناك امل اطلاقا فى تحسن حالة هذه المؤسسات التلات (ده اذا ما اتدهروا اكتر)
يصبح الامل الوحيد ان يتعلم الشعب الابداع والمسئولية والالتزام عن طريق غريزة البقاء
والاستمرارية.... |
ينصر دينك يا لبسي
وقريبا سوف اسرد معاركي مع الاستثمار في السودان
ولازالت مستمرة
والخير كثير
بس وصيتي علشان تنجح لازم لازم عمال اجانب
سودانيين لللللللللللللللللللللللللللللللللللللللللللللللل والف لا
| |
|
|
|
|
|
|
|
|
|
Re: والله السبب < نِحنا > (Re: فخرالدين عوض حسن)
|
والله يا فخرالدين ..وبالرغم من اتنجنب
التداخل مع الاصحاب والاقارب والجيران
الا اننى دايرك تشتغل لى ثيردباك للبوست ده
وتحرسه لى ...
ده لاننى اعرف انك واحد من المجازفين
فى السودان واظنك الان استطعت ان تفك
بعض شفراته..
اخر مرة اتكلمت معاك فى التلفون قبل8 سنوات
قلت انك سوف تستورد عمالة من المغرب العربى
عمالة ملتزمة
جادة
مؤهلة
صبورة
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
وحتى عودة الصديق فخرالدين
ساسرد مقتطفات من تجارب مرت بى ...
قبل حوالى عشرة سنوات خطرت لى فكرة جهنمية..
اتصلت ببعض الشركات فى جنوب شرق اسيا ونيوزيلاند
مستفسرا حول صناعة حفاضات الاطفال او Diapers
وجدت شركة فى نيوزيلاند تقوم تصنيعها ...
عرضو على شراء حفاضات غير مكتملة بسعر 2-5 سنت للواحده..
هذه الحفاضات تفتقد الجزء اللاصق وهو عبارة عن "لستك" به مادة
لاصقة يلتف حول وسط الرضيع ..
قالو انو سيوفرو لى هذه الاكياس
وعلى فقط شراء ماكينات خياطة لتثبت
الشريط اللاصق على الحفاضات ..
تكلفة حاوية مليانة حفاضات (زى مليون كده)
حوالى 7-8 الف دولار تسليم بورتسودان
كلمت ناس السودان
وكالعادة تشجعو للفكرة ..
وطلبو عينات ..
اتصلت بمكاتب الشركة فى كوريا..
وبعد ملاواة ومعافرة فى اللغة
وافقو على ارسال عينات الى احدى مدن
الشرق الاوسط ..بشرط استلام قروش تكلفة الشحن اولا..
رسلنا القروش ..
و استلمنا العينات
فاجانى ناس السودان انهم اصبحوا غير متشجعين
للشغلانة..
سالتهم ..مالكم بعد العذاب ده كلو مغيرين رائكم ؟
قالو خايفين من ناس الحكومه وناس المواصفات ..
قلت ليهم قولو ليهم انو ده منتج غير مكتمل (زيو زى عرباتهم ودباباتهم البجمعوا فيها دى)
بالاضافة انو سيقوم
بتشغيل عمالة محلية
قالو لى يازول انسى..
ونسيت ..
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
سؤال للمختصين
هل فى السودان فى ? Organic food
وال Organic food هو المنتجات الزراعية التى لا تستعمل اسمدة
وكيماويات فى زراعتها ولم يحدث لها تغيير فى طبيعتها...
يعنى الطماطماية القدر الشمام اكيد اكيد ما organic
الطعام العضوى ده يعتبر سوق كاسح جدا جدا ومعجبيه
فى تزايد رهيب ..
مثال
رطل الموز العادى عندنا فى السوبر ماركت بحوالى 75
سنت (تلاته ارباع الدولار) ..الموزه الواحده
طولها قدم كامل
فى نفس المحل وفى الجزء الخاص بالاطعمة العضوية ال organic
الموز صغار فى حجم الاصابع والسعر ضعف سعر النوع العادى وربما
اكثر (ما متاكد لانى ما قاعد اشتريه)
لو فى السودان فى لسه اطعمة عضوية ..يكون مكسب كبير
لكن غالبا يكون كلها انضربت بالكيماوى
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
عندنا عينات مختلفة لمشاريع طرشقت لان البلد
ونحن ناس البلد ما مساعدين
اليكم المشروع
المدارس والمكتبات والجامعات تحتاج كمبيوترات
صاح؟
وجدنا شركة تقوم بتشغيل عشرة كمبيوترات بكمبيوتر
واحد
كيف ؟
تحتاج لكمبيوتر واحد
وعشرة شاشات
وعشرة كيبورد
وعشرة ماوس
الميزات
لاتحتاج الا لكمبيوتر واحد
لا تحتاج لصيانة
لاتحتاج لمهندس شبكات وفنيى كمبيوتر
لاتحتاج ان تشترى عشر رخص لوندوس مثلا
وعشرة رخص لمايكروسوفت اووفيس
وغيرها من البرامج الضرورية
لا تحتاج ان تشيل هم ان الشبكة باظت او ماشغالة
لا تحتاج ان تخاف من الفيروسات والهاكر ..
..
كل الذى تحتاجه دفع رسوم سنوية تدفعها للشركه
التى ستقوم بكل مهام تشغيل الشبكة ..
تدفع الرسوم السنوية وتانى ماعندك اى هم ..
اتخيلو معى ان مدرسة بيت المال الابتدائية بها فصل به
عشرين كمبيوتر لاتحتاج لفريق من الفنيين والمهندسين
لتشغيل وصيانة هذه الكمبيوترات ..
كم يستفيد هؤلاء الاطفال من وجود هذه الكمبيوترات
وتجعل المدارش شئ محبب ..
الفكرة ناجحه وتم تطبيقها فى بعض الدول الافريقية
وحتى هنا فى كندا
وقد جلسنا مع ادارة هذه الشركة وابدو تشجيعا لدخول
السوق السودانى ..
ناس السودان قالو انسى
ونسينا
قلنا سبب النسيان شنو!
قالو لازم يكون عندك كيزان تقال يرعو المشروع
يستفيدو وتستفيد
..
وغيرها من المشاريع
حتى فى مجال الترفيه الذى اظن ان واحدة
من مصائب الشعب السودانى انه لا يجد حصته
الكافيه من الترويح على النفس
اليكم مثال لمشروع فى مجال الترفيه البريئ
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
مفروض كلنا نكون (حافظين) القانون دا (صم)..
قانون الاستثمار بالسودان
نسخة PDF
مقتبسات من القانون
Quote: يعد الاستثمار في المجالات الآتية استثماراً استراتيجياً ، وهى:
(أ) المتعلقة بالبنية التحتية، الطرق، الموانئ، الكهرباء، السدود ، الاتصالات ، الطاقة ، النقل، أعمال المقاولات، وخدمات التعليم والصحة والسياحة وخدمات تقنية المعلومات ومشروعات المياه.
(ب) المتعلقة باستخراج ثروات باطن الأرض والبحار.
(ج) الإنتاج الزراعى والحيواني والصناعى
(د) العابرة لأكثر من ولاية.
(هـ) أي مجالات أخرى حسبما يقرره مجلس الوزراء. |
الإعفاء الضريبي
Quote: (أ) يتمتع المشروع الإستراتيجي المحدد في اللوائح بعد تسجيله وفقاً لأحكام القوانين المنظمة بالإعفاء من ضريبة أرباح الأعمال لمدة عشر سنوات يبدأ نفاذها من تاريخ الإنتاج التجاري أو مزاولة النشاط.
(ب) يجوز للوزير منح المشروع غير الإستراتيجي إعفاء من ضريبة أرباح الأعمال لمدة لا تزيد عن خمس سنوات يبدأ نفاذها من تاريخ مزاولة النشاط التجاري أو بدء الإنتاج. |
الإعفاء من الرسوم الجمركية
Quote:
11- (1) مع مراعاة أحكام المادة 19 يتمتع كل من المشروع الاستراتيجي وغير الاستراتيجي المحدد في اللوائح، بعد تسجيله وفق أحكام القوانين المنظمة لذلك، بالميزات الجمركية التى يقررها مجلس الوزراء.
(2) على الرغم من أحكام البند (1) تمنح الميزات الجمركية بالنسبة للعربات والصوالين والبكاسي والعربات الاستيشن وفقاً لما تحدده اللوائح.
(3) يجوز لمجلس الوزراء بناءً على توصية من الوزير تعديل الميزات الجمركية المقررة حسبما يراه مناسباً. |
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الاستثمار في الأدبخانات في الآونة الأخيرة يبدو لي انه من أنجح الاستثمارات
ياخي واحد في الحصاحيصا عامل ليهو اربع حمامات { دورات مياه }
الحمام بمبلغ الف جنيه
والأشياء الأخرى 500 جنيه
والغريبة مافي زمن محدد
تقعد وتاخذ راحتك بالكامل
ولديهم دعاية غريبة جداً
يعني مثلاً لو عندك { اسهال }
أكيد حاتزور هؤلاء القوم أكثر من خمسة الى ستة مرات في اليوم
عشان كده قالوا { اثنين عليك وواحدة علينا }
أعجبني هذا التسويق الغريب في اخراج فضلات الناس
والرجل الذي يعمل مررت عليه ووجدته يلبس عمة كبيرة
ومعه موبايل ان 95 وهو من أحدث الصيحات
وبجواره جهاز مسجل به سماعات ضخمة
وكلنا سمعنا الفنان ونحن داخل الحمامات
تتصور متعة مابعدها متعة
وعندما فتح درجه ليعطيني الباقي اصبت بالذهول
والله حتى الأوراق ابو خمسين الف تقبع بداخل الدرج
هل ياترى الناس اصبحوا ياكلون أكثر من اللازم ؟؟
وسألته إن كان المشروع مكلف
فقال لي لايحتاج الى اي تكلفة وعائده سريع وكبير
فقط كل شيء يتوقف على أمانة العامل الكاشير كما يسميه
افكر جدياً في هذا الموضوع
وسيكون بطريقة حضارية جدا
ربما سنمنح المشروبات الباردة أو الساخنة لزوارنا
وسنمحنهم أكياس جميلة عليها عبارة { زورونا مرة أخرى }
ارجو من السادة القراء عدم سرقة هذه الفكرة
امنحونا الفرصة لتنفيذ المشروع
وبعدها سأحدثكم عن ثماره
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
السلام عليكم ورحمة الله
النصري أمين
لقد كنت أميناً ومحقاً في عكس هذه الصورة التي تعكس تخلفنا كثيراً ...
في هذ البلد المليئة بالموارد والتي يجب أن يكون كل من ينتمي إليها صاحب مهنة
حينما كنت صغيراً كان والدي تاجراً .. نقضي معه طيلة الأيام الإجازة في السوق لنعود للبيت في المساء ... وهذه الآلية من العمل مع الوالد حرمتنا كثيرا من إشباع أنفسنا باللعب ... الجوانب الجيدة أننا كنا نمارس عمل وهذه ناحية إيجابية جيدة ...
كبرت قليلاً ودخلت الإعدادي ... وكنت أمل العمل التجاري في السوق ... كنت حريصاً على تعلم أي صنعة .. لا يسمح لك الأهل بالعمل مع جهة غريبة أي كانت ... وكان لدى قريبنا مصنع لصابون الغسيل "مكعبات" - وأنا على أعتاب الثانوي - أذكر طلبت من قريبي العمل في المصنع - ومن والدي كذلك - فما كان إلا أن قوبلت بالرفض التام وبطريقة عنيفة أحبطت الفكرة أمامي -
أنتقلنا للجامعة - وكنا في بلد تقدم لك كل سبل المعيشة اللازمة ولو بقيت في سكنك دون أن تسافر للسودان فكل سبل العيش متاحة من سكن مجاني إلى ترحيل وأكل وعلاج - في ليبيا - تخيل الطلاب الفلسطينيون والسوريون وغيرهم يجلسون في الإجازات وتراه عائدا في المساء يرتدي زي الميكانيكي أو الكهربائي والسمكري إلى أعمال النقاشة وبعض السوريون مهرة جداً في مجال صياغة الذهب وكذلك في عمل المطاعم - بل البعض يمارس عمله وهو طالب - ليعد بيته وهو طالب ويتزوج كذلك وهو طالب أو بعد التخرج مباشرة ليظل السوداني لسنوات عجاف بعد التخرج قد لا تمكنه من تخقيق أدنى حلم وهو الزواج - كحالتي التي أعيشها أنا - وعلمت من بعض الزملاء السوريين أن المهنة أساساً تكون مهنة كل العائلة ولا بد ان تتعلم منذ صغرك مهنة العائلة - ولمقارنة ذلك بالطالب السوداني - لعب كشتينة للصباح - ثم ماذا - تقابله في الصفرة لتناول وجبة الغداء ووجهه متورم من كثرة النوم - القليل من فئات الطلاب السودانيين أرتضت العمل - فكانت تذهب لمكان يدعى الساحة وتجلس مع فئة من العمال ثم يأتي أفراد لأخذهم لأعمال العتالة والتي كان دخلها جيد ولكنها تخضع لعوامل عديدة وفعلا حينما فتحت البلد وأمتلأت عمالة صارت هذه المهنة ذات دخل ضعيف وبالتالي عادت حليمة لعادتها القديمة لتطارد "دامة الأسود" وتسهر حتى الصباح - لتأتي لتناول وجبة غدائها بوجه مدفون من شدة النوم والسهر - فلم يكن هنالك بديل لعدم إحتراف المهن من قبل السودانيين.
نعم نحن نهمل هذا الجانب كثيرا ويقضي شبابنا وقته على الضللة .... لتنقضي الإجازة دون أن يكون تعلم أي مهنة "أمان من الفقر" -
محتاجون لإعادة صياغة في جوانب كثيرة ...
كان الله في العون:
ع
| |
|
|
|
|
|
|
|
|
|
Re: والله السبب < نِحنا > (Re: othman mohmmadien)
|
الاخ ابوحراز
صاحب الادبخانات ده زول عملى ومفيد للمجتمع
وللبيئة ..ولو كان هناك استثناءات استثمارية
فهذا الرجل احق بها ..
وازيد ..
يجب على السلطات ان تقدم له يد العون بتوصيل المياه
ونظافة المكان وغير من المساعدات..
اما
Quote: ارجو من السادة القراء عدم سرقة هذه الفكرة
امنحونا الفرصة لتنفيذ المشروع
وبعدها سأحدثكم عن ثماره |
غايتو انا بديك 6 ستة شهور بس ..اذا ما سمعنا منك...
انا المجهز اباريقى و يافطاتى ..
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
وعليكم السلام اخ عثمان محمدين
| Quote: محتاجون لإعادة صياغة في جوانب كثيرة |
نعم ..
هنا جوهر المشكلة وطريقة حلها ..
مفاهيم وعادات وسلوكيات كتيرة تقف دون تقدم الانسان
السودانى والدولة السودانية ..
قد يرى بعض القراء اننى سلبى او negative اركز على
النواقص و السلبيات ..
وفى الحقيقة انا زول ايجابى ومتفائل جدا جدا..
فى الثانوى العالى كنا نلعب الكرة الطائرة فى ملعب
مدرسة المؤتمر ..كنت اصيح بصوت عالى """فى امل ..فى امل""
لكل الكرات البعيدة التى التى يحاول زملائئ اللحاق بها ..
ولا مش كده يا اسماعيل حامد""
لكن الامل ده لا يتولد من العدم ..لازم تكون فى ارضية ومسببات
ليهو ..
نحن نامل ان يقف سوداننا على رجليه ..
ويلحق بباقى الامم التى كانت خلفه واصبحت امامه بمئات
السنين الضوئيه ...
ولتحقيق ذلك يجب التركيز على الانسان
صحته وعافيته ..بقاءه وعدمه
تعليمه وتاهيله..
الرفق و الرعاية به
وليس دوسه بالجزمة كما تفعل ثورة الانقاذ المجيدة
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
وهذه واقعة طريفة يشهد عليها اثنين من اعضاء المنبر..
قبل اكثر من اكثر من عام اتصل بى احد المعارف من السودان وابدى
اهتماما بالطيران والنقل الجوى وحكى لى عن احتياجات السودان
لخدمات الطيران ..
قال لى ان الطائرات فى السودان تحتاج لصيانة دورية واسبيرات..
وان جزء كبير من هذه الاسبيرات ياتى من كندا بسبب المقاطعة الامريكية ..
واعطانى قائمة باسبيرات مستجعلة لبعض الطائرات ..
اها ..
قمت بالاتصال بالشركة المصنعة لهذه الاسبيرات
شى ايميلات
شى بالتلفون ..
فاجانى زولى بانهم يبحثون ايضا عن طائرات معينة تناسب وضع السودان
وبدلا ان اكون سمسار اسبيرات فقط
بقيت برضو سمسار طيارات ..
المهم
المهم اتصلت بالشركة وتحدثت مع المسئول وعندما اخبرته باننا
نريد تاجير هذه الطائرة للسودان فاجانى بقوله انو كان عندهم
طيارة مؤجريها لسودانيين وانهم لم يستيطيعوا ارجاعها منهم
لشهور طويلة .. انهم اتعذبو لغاية ما قدرو فى النهاية يطلعوها
واعترف انهم واستفادو كويس من الشغلانه فى النهاية..
قال لى انهم مستعدين للعودة لكن بشروط جديده(قلت ليهو فى سرى هو
انا عارف القديمة عشان اعرف الشروط الجديدة) وانهم يطلبون 100 الف دولار فى الشهر
ختاما طلب منى ان اتصل به بعد بضع اسابيع لمناقشة التفاصيل ..
فى الجانب الاخر ..
تلفوناتى تتطاقش مع ناس الاسبيرات ..
المشكلة زولى فى السودان لبت وقطع الحركة
لا حس لا خبر ..
ولم يتصل بى من حينها
ولم اسمع صوته..
ولانى عميان مسكوه عصاية لم استطع مواصلة الموضوع
واتدمر زى الادمرو قبلو
فخرالدين يا وهم وين انت ؟
| |
|
|
|
|
|
|
|
|
|
Re: والله السبب < نِحنا > (Re: دبس)
|
وهل نلومهم على ذلك؟ علينا أن نواجه أنفسنا بالنقد الذاتي .. لماذا نستمرأ نحن عيشة المهاجر والمنافي ولا نرجع لبلادنا لنفعل مثلهم؟!! وهم أيضاً هاجروا من بلادهم ولكن ليس بغرض الإساءة لأوطانهم وإنما من أجل جمع المال والعودة لبلادهم لبناء مشاريعهم الخاصة والإسهام في تنمية أوطانهم .. علينا أن نلوم أنفسنا!!
| |
|
|
|
|
|
|
|
|
|
Re: والله السبب < نِحنا > (Re: ابوبكر يوسف إبراهيم)
|
العزيز هاشم
عليك الله لو شفت شارلى عضيهو لى فى راسو..
شهرين وانا بزازى فى مواضيع معدات زراعية
فى الاخر فكانى عكس الهواء
الصورة فى معهد الكليات التكنلوجية
محمد اخوى كان قريب من الازاحفة وصاحبهم
انا كنت كاسر ركبة فى دكاكين الطاهر..
كان عندنا منطقة بنقعد فيها بنسميها كتلة ليكود لاننا
كنا نجلس على كتلة خشبية كبيرة احضرها احد
زعماء العطالة وقتها ..
تحياتى
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الاخ ابوبكر
يبدو انك لم تقرا البوست واكتفيت بالعنوان ..
نحن شغالين نلوم فى انفسنا فى البوست ده لمن الواحد بدا يشعر
بتانيب الضمير ..
ولم يزكر اى متداخل كلمة سوء بحق هؤلاء المهاجرين
الجدد سوى انهم صناعية وليسو مستثمرين (ما اظن دى اساءة)
بعدين
| Quote: لماذا نستمرأ نحن عيشة المهاجر والمنافي ولا نرجع لبلادنا لنفعل مثلهم |
نفهم من كده انك من انصار عودة المغتربين والمهاجرين ..
هل السودان مستعد لاستيعاب الملايين دى ؟
من خدمات مساكن وتعليم وصحة وغيرها ..
حظنا اننا لم نجد فى غربتنا المعاملة التى وجدها الاتراك والسوريين فى السودان ..
لم نجد استثناءات وامتيازات ..
لن يتسنى لنا ابدا ان نجمع ثروات طائلة كما فعل السوريين فى السودان فى فترات وجيزة
نحن هنا بالكاد (اتحدث عن الاغلبية) نكفى حاجات اسرنا الصغيرة..
من اين لنا بهذه الثروات التى تتحدث عنها لكى نعود للسودان لنفعل كما يفعل السوريين
عائدين لبلادهم محملين بمئات الالاف من الدولارات من خير السودان ..
المقارنة غير صحيحه
ومبدا العودة غير ممكن فى الوقت الراهن
شكرا على الحضور الكريم
| |
|
|
|
|
|
|
|
|
|
Re: والله السبب < نِحنا > (Re: النصرى أمين)
|
الأخ النصري
تحية طيبة
البون شاسع بين جلد الذات والنقد الذاتي .. بين لوم الآخرين وإلقاء المسئولية عليهم وتبرئة ساحاتنا .. جيد أن ننتقد ذواتنا ولكن الذي نجتاجه هو طرح الحلول .. قرأت جيداً ولم أقرأ العنوان فقط .. مع التقدير والإحترام لكل الآراء والمداخلات لم أجد أي مقترحات وحلول هذا هو الفرق بين جلد الذات وبين النقد الذاتي الإيجابي.. ربما طريقة قراءتي تختلف!! مع تقديري واحترامي لرأيك
| |
|
|
|
|
|
|
|
|
|
Re: والله السبب < نِحنا > (Re: ابوبكر يوسف إبراهيم)
|
الاخ ابوبكر يوسف
شكرا على الرد الهادئ
الشئ الحاصل فى السودان ده ما اظن لا جلد ذات بنفعو ..
ولا نقد ذاتى ينفعو..
ولا حتى ضرب رصاص ذاتى يلحقو ..
شفتو كيف الياس ده!!!
والاصلاح (ان اتى) لن ياتى فى حياتنا ..انا وانت ..وابنائنا ..
الاصلاح يحتاج لسنوات طويلة جدا ..
واجيال نبدا فى تربيتها من الان ....
الخطوات التى يمكن ان نساهم فينا نحن ان نعترف جميعنا
ان هناك ظلما واقع على كثير من افراد المجتمع ..
وان نقول للظالم فى عينو ..انت ظالم ..
وان ننادى بمناهج تعليمية جديدة تعلم الاطفال قبل القراية والكتابة
المسئولية والالتزام والنظام و النظافة ..
ننادى بوقف سرطان المدارس الخاصة..
وتخصيص ربع ميزانية الدولة للتعليم والصحة ..
طبعا ده بافتراض انو البلد مستقرة سياسيا
مافى حروب فى الاطراف
ولا حساسيات عرقية بين المواطنين
ولا رئيس جمهورية لديه مشاكل وقضايا مع مؤسسات دولية
ولا شريكين فى الحكم مكجنيين بعض
ومعظم الشعب مكجنهم الاتنين
ولا انتخابات كتب لها الفشل قبل ان تبدا
ولا كساد اقتصادى هز عمالقة العالم (خلى السودان)
ولا
ولا
ولا
ولا
الخ
الاخ ابوبكر
فى المدينة الكندية التى اعيش بها الان يوجد عشرات الالاف
من السودانيين ...
هل تصدق لا يوجد دكان سودانى واحد
نشترى كل احتياجاتنا من محلات العرب والصوماليين
والاحباش ..
جميع السودانيين فى المدينة يقومو بارسال مصاريف
لاهاليهم فى السودان ونذهب جميعنا الى محلات الصوماليين
للتحويلات المالية..
السودانيين الذين لديهم اعمال تجارية يعدون على اصابع اليد..
دائما اسال نفسى ..ليه نحن ما زى باقى الشعوب .
ليه ما عندنا المقدرة على المنافسة والابتكار والنجاح
ليه ما عندنا المقدرة على الشراكة والعمل مع بعض ..
انا نفسى حاولت مليون مشروع وفشلت
حاولت وحدى
وشاركت اخرين..
واعرف المئات مثلى حاولو وفشلو ..
اخادع نفسى واقول ان السبب هو ان السودانيين عاطفيين جدا
لا يستطيعو توفير المال الذى يجمعونه بشق الانفس ..لا يستيطيعو
توفير المال لانهم يرسلونه لاخت تود الزواج او شقيق ليكمل تعليمه
الجامعى او عم او خال يحتاج لعملية مكلفة فى الاردن او مصر
او سيفون يريرون اكماله
او مطبخ يريدون تعريشه
او قطعة ارض يحفظونها لابنائهم ..
| |
|
|
|
|
|
|
|
|
|
Re: خاتمة: (Re: النصرى أمين)
|
يا اخوانا عليكم الله الخبر ده قبلما نشطب
صحيفة الوسط الإقتصادي
صاحب مزرعة أسماك يتعرض لخسائر مالية تجاوزت الـ(150) ألف جنيه
الخميس, 23 أبريل 2009 05:13
الخرطوم: أمل حسن ...انتقد مالك مزرعة اسماك بمنطقة العسيلات بمحلية شرق النيل ،
ازدواجية القرارات بوزارة الزراعة والثروة الحيوانية والري بولاية الخرطوم، واشتكى
من قطع المياه عن مزرعته وتعرضه لخسائر مالية تجاوزت الـ(150) ألف جنيه.وقال مالك
المزرعة سيف الدولة محمد لـ(الوسط الاقتصادي)، ان وزارة الزارعة قطعت الامداد المائي
عن المزرعة مما ادى الى تجفيف المزرعة وخسارته لاكثر من (3.6) ملايين من امهات الاسماك،
وعزا قطع الماء الى عدم التزام مزارعي مشروع العسيلات الزراعي بسداد الإيجار، في اشارة
الى ان الطلمبات التي تضخ المياه مشتركة مع المشروع. ونوه الى ان وزير الزراعة بولاية
الخرطوم المهندس جود الله عثمان، اصدر قرارا بفصل طلمبات المياه عن مشروع العسيلات ، الا
ان مدير عام الوزارة رفض تنفيذ القرار دون اسباب واضحة.وابان سيف الدولة، ان الوزارة ضاعفت
ايجار المزرعة من (6) آلاف جنيه في العام الى (15) ألف جنيه دون تقديم أي خدمات، وطالب
باستثناء مشاريع الاستزراع السمكي من قرار التمويل بالرهن العقاري من البنوك، وشدد على
توفير التمويل من النهضة الزراعية.
من جهته، أكد ممثل البنك الزراعي عنتر التلب، في ورشة (تطوير الأسماك بالسودان) ، ان
التمويل البنكي متاح لمشاريع انتاج الأسماك، غير ان ضعف التسويق وغياب المعلومات عن
القطاع يعوق عملية انسياب التمويل.واعلن خبير الأسماك العالمي جيم ميلر، ان السودان
يملك امكانيات انتاج (700) ألف طن من الأسماك سنوياً ، ودعا الى تطوير صناعة اعلاف الأسماك،
وتشجيع الاستثمار، وتجميع كل المؤسسات المهتمة بالأحياء المائية في جهة واحدة.
انتهى الخبر العجيب
قال ايه !!
اكتر من 3 مليون من امهات السمك اتلحسو
لا حولا ولا قوة الا بالله
الزول ده حسى خشمو ملح ملح
| |
|
|
|
|
|
|
|
|
|
Re: خاتمة: (Re: النصرى أمين)
|
يا اخوانا عليكم الله
فى الدنيا دى كلها سمعتو بمزرعة اسماك
بتقفل او بتخسر عشان نشفت من الموية
المويه
المويه يا عالم
فى السودان بلد المليون نهر وخور وترعة
الجماعة كتلو السمك بالعطش
السمك مات ناشف
كتلو ليهو سمكو...
حسى لو صاحب المزرعة ده كان سورى او تركى كان حصل
الحصل ده
| |
|
|
|
|
|
|
| |
أحمد الشايقي
filan
عزام حسن فرح
معاوية الأرباب
آدم صيام
abuguta
حامد محمد حامد
Abdelmuhsin Said
نوفل عبد الرحيم حسن
Sayed Bekab
Ahmed Abdallah
الحاج حمد الحاج
فخرالدين عوض حسن
othman mohmmadien
دبس
فيس بوك
تويتر
انستقرام
يوتيوب
بنتيريست