الأخ ترهاقا، تحية طيبة، لا أعتقد أن نقدك الفنانين محمد سلام ونجم الدين الفاضل واسماعيل حسب الدائم كان في محله، هؤلاء المطربين أشجونا بحق في سبعينيات القرن الماضي بعدد من الأغنيات الجميلة قبل أن ندخل زمن الكوليرا، تمنيت لو أنك وجهت نقدا موضوعيا لأدائهم من الناحية الفنية. شكرا يا نصري لإيرادك الأغنية الجميلة التي لم أستمع إليها بصوت محمد سلام منذ عقود.
سلام يا محمد المرتضى كيفك؟ كل مرة عندما ابحث فى اليوتوب اكتب اغانى سودانية او sudanese music واختار فى ماكينة البحث عن الجديد فى خلال اسبوع .. فوجئت باسم الاغنية الما بيغبانى ابدا وشغلتها وغمضت عيونى .. وجهزت شعورى وكيانى لدقائق مع السباحة فى الخيال والشجن .. ..
وعندما بدات الموسيقى ..بديت اشك امكن الاسم غلط "الشاغلين فؤادى" واحتمال اغنية جديدة بنفس الاسم .. اها بعدها الفنان قام شال الاغنية واللابتوب وانا ووضعنا فى راسه زى القفة وجرى بينا ... بقينا فى البنزلنا.....
ما عارف ليه الفنان محمد سلام عمل كده ليه!! امكن كان مستعجل شوية يوم التسجيل ....
لو زول خت ليها "قام اتعزز الليمونى" هنا نكون شاكرين ومقدرين ..
05-14-2010, 03:34 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
النصري سلام لاينتهي، محمد سلام فنان سطع نجمه في سماء الغناء منتصف السبعينيات واشتُهِر بأغانيه المتفردة شكلا ومضمونا ، الزول دا قفز إلى الواجهة ( بي حقّو) وكانت أغنية قام إتعزز الليمون في تلك الفترة أغنية على كل لسان غض النظر عن الفئة العمرية بل كانت رقما ثابتا في إذاعتنا المدرسية ، تزامنت معها أغنية داير اقول ليك إلا خايف ، ونالت شهرة أقل وهكذا ، كانت حفلات محمد سلام كرنفالا حقيقيا بصحبة آلات صينية شارك بها بعض من درسها في الصين ومن صاحب فرقة الأكروبات إن سلمت ذاكرتي الخؤون. هاجر الرجل إلى ليبيا وبقي فيها زمنا طويلا ثم عاد مؤخرا فلم يعرفه من ترعرع في زمن قيقم وشنان ولا نلوم أحدا في هذا، عتبت على أخي ترهاقا عنفه اللفظي في وصف فنان يمثل في أخيلتنا حقبة جميلة من العمر ، أما جزئية إنو ركَّب الشاغلين فؤادي حصان فقد فعلها الكثيرون قبله وعلى سبيل المثال لا الحصر أغنية أحرموني والتي كان عزيزنا بدرالدين شنا يتندر بمراحل تطورها إيقاعيا منذ أهل الحقيبة وحتى سيف الجامعة الذي ( ركَّبا) كونكورد عديل. منذ ما يزيد على العام ابتدرت بوست بعنوان ( قام إتعزز الليمون) وقام الأخ سيف مساعد بإيراد كامل النص مع نبذة عن الشاعر وقام أحد وزراء الطرب بالمنبر بإنزال الأغنية إلا أن البوست سحق تحت سنابك خيل الهكر في حربهم الضروس مع بكري وبقيت في الحلق غصة. صادق إحترامي.
05-14-2010, 03:50 PM
ترهاقا ترهاقا
تاريخ التسجيل: 07-04-2003
مجموع المشاركات: 8861
Quote: ما عارف ليه الفنان محمد سلام عمل كده ليه!! امكن كان مستعجل شوية يوم التسجيل
الاخ النصري سلام تاني
حقيقة اناما عرفت المغني منو زاته لانو ده ما محمد سلام البعرفه حيث كانت بداياتنا سوى هم كمغنين ونحن كموسيقين في بداية الثمانينات ، حقيقة أداء يحير من محمد سلام ـ الكورس ما عنده ذنب بس لقوا نفسهم بيرددوا
المصيبة الاكبر ،لمتين الناس حتقعد تردد أغاني الغير وبالطريقة السمعتوها دي الراجل ده إلا يكون دخل سوق المواسير (وش مضبلن ومستغرب)
سلام تهراقا طالما طلعت موسيقار ..انا عندى مشكلة ليها زى 20 سنة كده ومالاقى ليها حل ... واحدة من اجمل الاغانى لدى عندى مشكلة مع الفنان بتاعها لانه برضو بجرى بيها وكلما حاولت القى ليهو تسجيل فى قعدة او بالعود ..هو هو هو جارى بالاغنية و قائم بيها سدا رى و مقلل من قيمتها ...
الفنان هو محمد ميرغنى (احد فنانييى المفضلين) والاغنية لا بتفاصلى لا بتواصلى لا بتلومى ... الزول ده لو قال بسم الله الاغنية دى من اجمل اغانيه.. طلبت مرة من خدر او مصطفى السنى انه يعيدو توزيعها وغنائها بطريقة هادئة ..ما اشتغلو بى ...
ممكن انت وابراهيم عبدالحليم تعملو فينى المعروف ده ونسمعها بدون جكة ....
ممكن تسمعها هنا من محمد ميرغنى وهو جاكى ونفسو قائم
05-14-2010, 06:12 PM
ترهاقا ترهاقا
تاريخ التسجيل: 07-04-2003
مجموع المشاركات: 8861
Quote: عتبت على أخي ترهاقا عنفه اللفظي في وصف فنان يمثل في أخيلتنا حقبة جميلة من العمر
الاخ محمد المرتضى سلام
ما في شك كلامي كان فيهو عنف لفظي ، بس لانو الواحد اتخلع ، يعني محمد سلام من اوائل الفنانين اللي عزفت معاهم بعد المرحوم حسن خليفة حين كنت طالبا بعطبرة الحكومية ، وضربنا معاهو حفلات لمن كملنا ليمون الخرطوم كله مهي كانت من اجمل الفترات لكن اللى الشفته حسع ده يكون محمد سلام مزور - ولك العتبى حتى ترضى
Quote: الفنان هو محمد ميرغنى (احد فنانييى المفضلين) والاغنية لا بتفاصلى لا بتواصلى لا بتلومى ... الزول ده لو قال بسم الله الاغنية دى من اجمل اغانيه.. طلبت مرة من خدر او مصطفى السنى انه يعيدو توزيعها وغنائها بطريقة هادئة ..ما اشتغلو بى ...
الاخ النصري ، حبيبنا محمد ميرعني يعني ما كل المرات بيكون سريع في الاداء إلا لمن الهلال يكون مغلوب
لكن شكلك بتحب الموسيقى بطيئة الايقاع ، ما عندي مانع اخت ليك الموسيقى دي والاخ ابراهيم او أي من الزملاء طبقات صوته قريبة ممكن يأديها
Quote: وضربنا معاهو حفلات لمن كملنا ليمون الخرطوم كله
مبالغة زكرتنى حكاية زيدان مع ابراهيم حسين لكن خايف محمد المرتضى يزعل ..
قالو الفنانين كلهم عندهم حفلة فى المسرح القومى ..اها زيدان داير يغنى ويتخارج عشان يحصل العداد.. قبله فى الصف ابراهيم حسين الذى رفض تماما لزيدان يغنى قبله.. زيدان لمن زهج قال ليهو "خلاص اطلع غنى اول انت ..مش ياها قشرة قشرة بتاعتك دى " يقصد نجمة نجمة
لا بتواصلي لا بتفاصلي لا بتلومي إنتي تعيشي يالكاتلاني قبال يومي لا بتودي لا بتجيبي لا بتردي خدك ده الخجل كاسيه ولا مندي؟ لا بتوالفي لا بتحالفي لا بتحني خلقوك زينة عشان تشقينا يلا أتهني تشيلي الخطوة فوق خطوة وأشيل أنفاسي ماهماك نحن وراك كيف بنقاسي تمشي هوينا يالماك هينه قدرك عالي بس تكفينا نظرة حنينة ما تتعالي شعرك سبسبو التسريح بعد متدلي تجيبو النسمة فوق جبينك وإنتي تعلي بدر إتدلى لي خلق الله وجهك ناير والخد صورة زي بلورة خاتي مساير لا بتسالمي لا بتكالمي بس تتهادي لا سامعانا لاك معانا تيهي اتمادي أرح وأردح وراك أرتاح ولو بي كلمة إما أعيش وإما أموت وإما وإما
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ترهاقا
إبراهيم عبد الحليم
محمد المرتضى حامد
فيس بوك
تويتر
انستقرام
يوتيوب
بنتيريست