دعواتكم لزميلنا المفكر د.الباقر العفيف بالشفاء العاجل
|
|
 سري للغاية ..........سوميتا
|
العزيزة سوميتا (بمناسبة عيد ميلادك بكرة),,,,,,,,,,,,,,
سلامات وكل سنة وانتى طيبة بس بصراحة دى كم سنة يا.........
انا ما انتهيت من كتابة الموضوع لانو ظهرت مواضيع جديدة لنج المهم انا حبيت انزل تعب الشهور ده عشان يتحفظ على الاقل فى المحلة دى عشان ما اجيهو كل مرة مع الجهاز حقى ده التقول حيديهو جائزة لم الفايروسات وكمان الايميل اتملا تب رايك شنو تنفع هدية ميلاد القصايد المسموعة ابت وحلفت ما تنزل,,,,,عشان كده اقبلى دى لما تنتهى كتابة الموضوع ؟؟؟؟؟؟؟؟؟؟؟؟؟
سلام
كرور
(عدل بواسطة ناجى الزبير الملك on 04-22-2004, 02:15 AM)
(عدل بواسطة ناجى الزبير الملك on 04-22-2004, 02:18 AM)
|
|
 
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
أملي قلبك
أملي قلبك بالوطن … بالصغار
قومة العمال دغش … بالنضار
المزارعية الغبش ..
بالجنود الوين تخش ؟؟
في سبيلك كالنهار
بالمداد الما بيغش ..
بي وتر جاء من الجحيم
أملي قلبك بالنسيم
أملي بالطير الرطن
طالما العالم قديم …
ينكسر ريح … المحن
خلي بالك مستقيم
دغري وإن مال الزمن
راحل الليل البهيم
والبصيرات ما عمن
الظروف الليلي أبن …
روقي لا خوف لا حزن
باكر التقيات تنورق …
وتنملي الضرعات لبن
طيبة يا صمت الحنين …
كلما طقاهو هم
لافي آهة ولا أنين …
لا بيروع ليح ودم
من مرارات السنين …
من عصارات الألم
بيمرق الشوق الدفين …
بي كعنكيل العشم
أحكي ليك يا طيبة حكوة
ذات زمان من ضيق وقسوة
وكل يوم من بارحو أسوأ !!!
والمراحات قاطي قط
فجأة في قلب السما …
غيمة غيمتين ..
غيم ربط
كتمة حتي الطين عِرق
والشجر قرب يبق
إلا يا طيبة الخلق …
من بدل تفرح تنق
الشكايات … و السخط ..
لا السحاب داير يصب
لا الهبوب دارت تهب
نسمة نسمة آ رب نقط
من شمالك من جنوبك
الهبوب يا رب هبوبك
من شروقك من غروبك
من تحت من فوق هبوبك
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خشع .. حول في حول …
ظاهر الحال ماهو مخفي …….
وفالنا فيك ما فيهو قول
يا المبرد والمدفي ..
نسمة يا رب الفصول
نسمة كل راس ساعة تكفي ……
نسيمة واحدة لألف زول
ينطلي الجو بالحمار
فجأة من حر لي غبار؟
الطشاشات الدوار
السبابات النقار
نقة الضيق تنطلق
قلنا فاقت باتت أزحم …
الغبار من كتمة أرحم …
أرحم الحر البيلحم …
لا ده لا ده ولا فرق
طيبة تمي الحكوة قولي
الصبر خلوقو هولي
ده الزمن يقسي ويرق
وتم نشيدك في الحلق
عد فات الريح شرق
من بعد جاب السحاب
من بعد قش التراب …
مشط القش والشجر
رجع للطير للوكر
ها البرق شال البرق ..
الرعد ريحة الدعاش
ابشروا بالخير نقطت
أي والله المطر !!!
| |
|
|
|
|
|
|
|
|
|
Re: سري للغاية ..........سوميتا....كل سنة وانتى طيبة (Re: ناجى الزبير الملك)
|
آه يا غبش
آه يا غبش
آه يا غبش
ما عندي ليكم غير نغيم ..
برجاه ينفض
لي غبار زمن القسا ..الكتاحة
يهز عرجون نخل
صبر الغلابة الطال ..
يحت يخرت ..
تباريح الأسى
الممدودة فوق نور الدغش
يا نورا آهـ..يحرد كنائسنا المسيح
يعرش مدارسنا الصدى
ييبس .. يباس
حلق العصافير الوديعة من البكا
إندردر الصوت البعيد ..
أسيان تصر من دون صدى
يتكفرن الفجر الصبوح ..
يحمي الزهيرات الندى
تختا الدراويش الضريح ..
يسكن خلاوينا الجنون
يهجر جوامعنا الإله
يا نورا آه ..
تطرح غيوم الشوق تئن ..
تشرق
تموت
خيل .. كلمة الحق التناهد في الشفاه
يعقر بسيمة الصح
مع لوبي الجروف
تغرز ضريعات الحروف
ينشف مراح الأمسيات ..
تتمطق الأرضة المروق والأغنيات
اللّي الشروق ..
والأرض
والحب والمطر
تتضهب تتوه ..
وكت يضيع عرق الجباه الشم ..
شمار في مرقة
آهـيا نورا آهـ…
من دربك التوَّر نفس خيل الصبر ..
فتر خطاوي الشوق وراه
يا نورا آهـ …
ساعة الشموس الغر .. تهضلم
تلحق الصح في المغارب
تدفر الضو الكهارب
وفي وشيك
تدفر المدن
الضباية السرابية .. الكآبة
وحائط التيه والطشاشات
فوق قفيك
يا أم عوارض .. مو دعاشة ..
ماها شبورة وتقيف
جايى ليك يا نورا غايمة ..
تملا ماعونك خريف
يملأ عينيك ويفضل ..
يروي جواك … العطاشة
مو دعاشة
***
يا مطر عز الحريق
يا مصابيح الطريق
يا المراكبية البتجبد
من فك الموج الغريق
يا الجزاير النتحوبيا ..
لما انشعوز بحرنا
يا المراسي النتحوبيا ..
لما إنشعوز بحرنا
يا نشوغ روحنا ودمرنا
يا المحطات الحنينة …
القصرت مشوار سفرنا
يا شايلك بيني حايم
أيوة شايلك .. بيني حايم
في الأرض تكون قضية .. !!!
في السماء الأحمر .. غمايم
بي برد نغم السلامي ..
رطبت حلق الحمائم
طنبر النخل التبلدي ..
راقص الأبنوس وصفق
سوت الصقرية موجة
خلت النيل هاجلو هوجة
بشرت بالخير بلدنا ..
شالت الشبال نسائم
جددت زلفي القديم ..
أمشي بي الماشيبو أقاوم
لا بتكبر راسي فورة ..
لا بتصغرني الهزائم
جنس يا نورا ابن آدم
حلمو في عالم مسالم
لا الليالي الماها ليا ..
لا الشماتات العلي
لا البنوك المخملية
لا تفاهات الحضارة ..
لا عفاريت المدينة ..
لا العمارات السوامق ..
فوق ضهر ناساً فقاري
لا الهتاف الفاوة ضاريي
غطي بالي من الفوارق ..
لا الألوف الطمطمية
لا البرندات الوسيمة ..
ولا الأسامي الأجنبية
بتمحي من عيني ملامحك ..
وإنتي جاية المغربية
جايي دايخي المغربية ..
وشك المقبول مكندك ..
ساموسونايتك زمزمية
كونشبر ..
مرزبة
مقطع
ريشة فانوساً مدردح
قلت بيهن لي زمانك ..
يا زمان الحاجة عندك
يا زمان الآفة حدك ..
لا تطأ الوردة الصبية
يا نفس فجر القصائد .. يا بلادي
القطع قلب الروادي
ياللواج الجاي وغادي
ده ما هو صوتك .. لاها صورتك
دي البترقش
ناديي فوق صدر الجرائد ..
ماها صورتك !!!!
لا هو صوتك ..
لاها صورتك !!!
إنتي يا الفي إطن الصحاري
شفع العرب الفتاري
البفنو الشايلا إيدن ..
ويجري كابسين القطارة
يجروا بارين القطارة
لا سراب الصحراء موية ..
لا حجار سلوم موائد
إنتي في الغابة البصارع ..
جوفو للآهات تلكي
ياما دفق غيم رجاهو ..
لكن الأيام كركي
في خلا حالنا اليمحن ..
ويملأ بالسهد الوسائد
إنتي غيمة ..
شديرة .. خيمة ..
إنتي جاهنا ..
والتقا الطلفت وشينا ..
فرقت عمة جباهنا
فرجت في الحارة ضيقنا
فرحت شفع فريقنا
والمواعيد الحزينة .. وإتجاهنا
يا النغيم البق فينا ..
وشد لي وتر إنتباهنا
يا تباشير يا بشارة
إنتي يا ضرعاً تكرمش ..
شان يرضعني الجسارة
إنتي في منفاي رفيقة ..
وفي حشا الأشواق حرارة
يا هدي الناس الحياري
يا ندي الفجر اليبلل
صور عوينات الفقاري
جاي ليك .
آهـجاي ليك ..
يا نورا آفة
آفة للسوس الجاك ينقر ..
عود عشيماً داخرو فيك
وأصلي لمن أدور أجيك ..
لا بتعجزني المسافة
لا يقيف بيناتنا عارض ..
لا الظروف تمسك في إيدي
ولا من الأيام مخافة
يا نفس فجر القصائد ..
لا ضهب في بعدي عنك
وأصلي متغرب عشانك ..
راضي بالبيجيني منك
ما بكيت شح الليالي
لا شكيت نح .. شلتو حالي
رغم إنو الحال بيفسخ ..
إلا كت في الحارة بنده
يا وطن عز الشدائد
يا وطن عز الشدائد
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
الجابرية
كان ضحوية ...وكنا نسند في المحروت
وفجأة يدوي مكبر صوت
قال الريس مار بي فوقنا
إن شغلتنا قلعنا عروقنا
فكينالو حبل واسوقنا
وإنماسكنا نطمن روقنا
قمنا جميع الحلة مرقنا ...
البيشوفنا يقول واشوقنا
كان ضحوية ... وكان عين شمس الله قوية
وكان الريس في عربية ...
واقف طولو تحت شمسية
هللنالو ... هلجنالو ...لوحنالو بالطورية
فرَّ عبايتو وهزَّ عصايتو ...
وهزو بنادقن الضابطية
صفقنالن صفقة قوية
زغردنالن ... يويا أيويا
هدن عندنا خمسة دقائق
قدمنالو كتاب الله ...درقة وسيف ...
تبروقة هدية قفة تمودة وفاس دهبية
وكنا قبيل بيتنا النية ...
بين بيتين علينا اليافطة ...
اليافطة أم زيقا دمورية
وانعبينا هتافا واحد :
(الجابرية تحيي الثورة ...
دايرين بوسطة ومدرسة وسطى
الشفخانة وسوق منضبطة)
قام الريس روح باسم
وقام خاطبنا بنهج الثورة الصارم وحازم
أما اللازم من شفخانة ...
التعمير بالعون الذاتي
أما اللازم من شفخانة ومدرسة وسطي
التعمير بالعون الذاتي....
إلا البوسطة دي ينظر فيها
أما السوق ... السوق منضبطة
وبالتأكيد ... للتجار الأسعار واضحة
للمستهلك باينة وواضحة ...
جاملتوهن تبقى الغلطة
وإنكفينا رفعنا إيدينا ...هزيناهم بالتأييد:
(لا تفريط في قوت الشعب ...
سحقا سحقا للرجعية
الجابرية ضراع الثورة ...
بالانتاج حا نبني بلدنا)
كانوا في جيهة وإحنا في جيهة
هن ينهببو بالكابات ...
وما همانا الصيف وعرقنا
فات الريس وإنفرتقنا
إنفرتقنا على الجابرية
كنا ببنضم وما صدقنا
الجابرية تجيها البوسطة
الشفخانة ومدرسة وسطى
قلنا يا ريت لو وصلوا فطور
وإنحزمنا ضبحنا التور
كنا أقلا ضمنا النور
أو يا ريت لو زدنا الصفقة ..
وعاش ويسقط ويويا اليويا
كنا أقلا ضمنا الموية
كنا بننضم بي إيدينا ...
(دا أحسن ريس مر علينا)
من الله خلقنا وشفنا خلقنا ...
دا أول ريس زاتو يجينا
وكونو يجينا يقنب بينا...
يشوف البينا .... كفاية علينا
آ الجابرية يجوكي الحكماء
آ الجابرية تواصلي البرة
آ الجابرية ولادك تقرا
نمشي الليلة نصاقر الرادي
نمشي الليلة نحضر النشرة
كنا نرجع في كلماتو
إلا في ستة من الجابرية ...
قالوا تعبكم خارم بارم
يذهب حاكم خلف الحاكم
والجابرية تظل في حالها ...
حلة حياتها تسر الظالم
صدفة تموت وتحيي اطفالها
لا جلكوز لا تقرا رسالة
ولا راح يطلع منها عالم
ما بينصفكم إلا ضراعكم
عبوا ضراعكم يا رجالة
خلو بصركم دغري وسالم
حكم العسكر ما بينشكر
كلو درادر ... كلو مظالم
ما هو قدركن تحيو همالة
مقصودين والقاصد فاهم
قاطعناهن ... حاربناهن تميناها البينا شتائم
حالتن أحسن ناس في الحلة
إيدا نزيهة ... عقولا نبيهة
قلنا بيعرفوا ... قلنا فواهم
يطلعوا فالصو وقطاع رحمة
عينة شماتة وخارم بارم
وإحنا القصر واثقين فيها
وقاطعناها معاهم جملة وقاطعناهم
صاروا في جيهة ... ونحن في جيهة
ومر اليوم ... الشهر ... الحول
والجابرية بلد في حالا
قواسي شيوخا ... مآسي أطفالا
عذابات ناسا ... حلة تعافر ومقطوع راسا
من القراصة ولي قراصا ...
حلة تعافر ومقطوع راسا
عشرين كيلو من الجابرية ...
صبية تساسق بي كراسا
آ الجابرية عذابك فينا ...
لاك القرية ولاك مدينة
وفد في وفد يقوم ويجينا
بوسطة ... دايرة دراسة وإجراءات
عون أمريكي وقرض ألماني وحاحاءات
وحد ما نشوفلنا مسعولين ...
مسعولين أو خواجات
نجري نلم قدحاتنا عليها ....
ترطن ترجع زي ما جات
الشفخانة وعايزة دراسة ...
مدرسة وسطى وإجراءات
لما المطوحة طالت بينا
إنذكرنا العون الذاتي
إنحزمنا وقلنا برانا ... نبني نقوم للشفخانة
طوبة في طوبة في طوبة وقومناها
ويوما التمت جات السلطة ...
عربي وعجمي ومرة رطانة
الشفخانة دا ماهو بكانا
عاك يا تلتلة هاك يا ورطة
وغصبا عنك يا الجابرية ...
وغصبا عنك يا أحوالا
حمياتا وموت أطفالا
وحمرة عينكن يا رجالة
قوة انشكت بين النقطة
وفي الجابرية تحوم الشرطة
هووا كلاب الحلة وصنو
ومن يوم داك ما شفنا الستة
وفد الحلة السافر جانا ...
قال إنأكد شاف الخرطة
ونحن بدل نبني الشفخانة ...
إنسرعنا بنينا النقطة
الشفخانة دا ماهو بكانا ...
وكانت غلطة انقلبت ورطة
إنفاهمتو مع المسعول ؟؟
إنفاهمنا مع المسعول
وقال حا يبني يقوم للشفخانة
أو يدفعلنا حق الطين
مع إنو النقطة وكت بنيانا ...
قومتوها بلا زنزانة
وفي تقديرنا كلام معقول
كونو يقوم لي الشفخانة حاجة تضحك
محرقة ... هانة إنتو تقيفوا مع المسعول
وألا الكنتو تقيفوا معانا؟
قلنا خفنا نصد الجاي ...
خفنا نفشل باقي الخطة
هو فضل جاي ؟ ... هي فضلت خطة؟
وانفرتقنا على الجابرية ....
وانعلقنا تجينا البوسطة
ومدرسة وسطى والشفخانة قصاد النقطة
تجينا ... تجينا ... وما أنيقنا
ناس إنولدو ... وواحدين ماتوا
لما الريس ودوشتو فاتو ...
فات العسكر وجو الأحزاب ...
بعد خراج أرواح وعذاب جو الأحزاب
ونفس الوجع اتجدد تاني
ونفس الحلم الراح تحتاني
حتلناهو ... جمعنا رفاتو
نفس اليافطة في نفس الحتة :
(الجابرية تحيي الشعب
دايرين بوسطة ومدرسة وسطى
والشفخانة بديل النقطة)
فينا انكلم شيخ الحلة
صنقع ...دنقر ... صلي وسلم
وكانوا كلاب الحلة يهووا
وقال كلمتنا تكون فد واحدي ...
شان ننقوى وما ننزلا
شان مشهادنا وعدل الحلة
نحن نفوز شيخ البلة
وزاد هوهيو ... كلوب الحلة
وبعضنا عارض ... رد وفاوض
شيخ الحلة قام حمسنا ...
بلة الحمش الزول ما دلة
أول فاهم وقبله ولدنا ...
وراح يحكمنا بشرع الله
هو .. هو ... هووا كلابنا
لما أستغرب شيخ الحلة
وإنفرقنا على الجابرية
إنفرقنا ويوم الليلة جمعنا عموم الحلة
شيخ الحلة قرأ القرآن ...
صنو كلاب الحلة وهووا
وبلة إنقدم سمَّ وصلَّى ...
صنو شوية ... وهو هو هووا
قام وإنكلم ... عن ينكلم كان ينقسم
النسوان الجاي تتهامز
الصبيان الجاي تنغامز
وكان ينبسم ... وكانو كلاب الحلة يهووا
شكَّر وشتَّم ... هو هو هووا
حلَّل وحرَّم ... هو هو هووا
هوَّد وسابنا ... وفات ودانا الآخرة وجابنا
قاطعناهو وصوتو إنوطَّا
أصلاً واطي وتاني إنوطَّا
دايرن بوسطة ومدرسة وسطى ...
والشفخانة بديل النقطة
التموين وزيادة الحصة ....
كهربة موية وسوق منضبطة
بلة انبرع وقال ببنيهن ...
هو هو هووا كلابنا واستغربنا قبل بالمرة
لامن نهتف ترسى كلابنا
لامن ينضم بلة يهووا
بلة انحمس وقال بسقينا ...
وبي إذن الله يضوى الحلة
هتف الشيخ وهتفنا وراهو :
لا تبديل لشرع الله .... هو هو هو
لا ولاء لغير الله ...... طاء طاء طاء
عاش الفارس أمل الحلة
بلة الطاهر علي حسب الله
بلة الطاهر علي حسب الله
كبَّر فينا وقام إندلي ...
ولسة كلاب الحلة يهووا ...وزاد هوهيون
كبشا ضاع من مرحاتو وصاقع باع
بلة الطاهر علي (بلاع)
كانت أول مرة نشوفو ...
يومنا الشفنا اللاندكروزر اللونا مخطط
والبنوت الراسا مربط .... التنبوبر
لوري مكوَّش أقمشة ..سكر ...
حتى الفوفو ... عتل تؤجر
وأمحي المنكر بي معروفو
بلة الطاهر علي بلاع ...
أكرمناهو .... أكرمن ضيوفو
يشبه مرت الشيخ في وشيهو ...
لولا الدقن الدشدش صوفو
بلة خبارك ما بتشبهنا وعامل زولنا
تاني نقول الزول (...) برانا نغيير قولنا
إلا كبار الحلة بقولوا ... بلة دا هولنا
لة دا أصلا من ها الحلة
إلا أنربى وقرأ في الخارج
ورافق جدو الفتح التركي
وسيرتو انقطعت في المهدية
ومرة سمعنا أستوطن برة ...
وقام إنزوج من مصرية
جابت علي ... علي جاب الطاهر
حتى الطاهر خلَّف بلة
جدو انشيطن أخير ما لانا
بلة أنسركن جاء وبرانا
أقرب واحد لي حاج بلة ....
أقرب واحد شيخ الحلة
بلة الطاهر علي حسب الله
أول مرة يصلي معانا ...قدمناهو وقم أمَّانا
صوتو مرخرخ لامن يقرأ
يقرأ ويقطع .. زي البطرا
لامن يركع جسمو متختخ
عند السجدة سجودو ممخمخ
شيخ الحلة بقول في امرو
زول غرقان في الدين من عمرو
ستة سنين قابض في جمرو
وما فكاه طريق الله ...
صوتو وِدِر من كترة ذكرو
وجسمو التختخو شدة صبرو
قلنا حقيقة الزول بي عذرو
وفتنا قناعة ومانا قناعة
إلا الستة الصارو جماعة
قالوا دا زول تربايته مياعة
ما يشبهنا رفعة وضاعة
زول زول دنيا ودنيا صياعة
قصة دينو ودقنو بضاعة
وإحنا أصواتنا ... يا غما مضاعة
يا غما جهالة وناس متباعة
وفي الحالتين آمالنا مضاعة
وخارم بارم كونها بوسطة ...
ومدرسة وسطى والشفخانة وموية ونور
كونو يجينا دا ما منظور
وزيادة الحصة ... الزول زول سوق
زول من جدو يلف ويدور
ويا الجابرية دا مطلب عادل ...
كونو تطيبي ... تكتبي تقري
ضوك يشلع ... دشك يرشع
ونحن دفعنا ضرئب بدري
ولسه بندفع ... لسع ... لسع
بس يا جماعة ... إن قضينا حياتنا تباعة
صنيت رادي ... وقول في الفضي
خوفنا نقوم ما نلقى أراضي
ونحن أساسنا وراسنا زراعة
والجابرية إن دايرة شفاعا
ما بيشفعلها إلا ضُراعا
عبو ضراعكن آ رجالا ...
وخلو بصركم دغري وسالم
عبو ضراعكن آ رجالا ...
شيخ الحلة أضلَّ وضلَّ
وأسألوا بُرَّة وحاجة السُرَّة
عن التيبان وحكاية الصُّرة
اللمت بلة وشيخ الحلة مع شرع الله
والناس ديل العارضين برة
جربناهن كمين مرة
تاني نجرب شان ننضرَّ؟!
ويا الجابرية معاكي سلامة ...
كان الفوقك ما فات مرة
كان كلماتن ناشف ريقا ... وكانت مرة
إلا حقيقة ... غلبنا نطيقا ...
وين في الصرمة ... وقل القدرة
سكتناهن بس ما صنو
وقاطعناهن تاني المرة
وبلة طريق الناس وخيارا
فوزناهو وجانا زيارة
كرمنالو التور وعرضنا ...
وخليناهم برة الدارة
دايرن بوسطة ومدرسة وسطى ...
موية وكهربا والشفخانة ...
زيادة الحصة وسوق منضبطة
وصدو كلاب الحلة يهووا ...
ينضم بلة يهووا معاهو
نهتف نحن يزيد هوهيوا
مافي شهر جاتنا الخرسانة ...
جانا السيخ ... الطوب ... الرملة ...
جا الأسمنت شكارة شكارة
عديناهن ألف شكارة كرمنالن خيرا جانا
وكل كلاب الحلة الهوَّن ...
طفشناهن بالجبخانة
وفي صنانا تدودي الزانة
إنغالطنا كتير في بعضنا ...
أولى المدرسة واللا البوسطة ؟
أولى المدرسة والشفخانة
الشفخانة محل النقطة
ونان النقطة؟...نحن أهالي ... ودنا صافي
بينا معزَّّة جرائم مافي ...
وما بنحتاج لي شرطة ونقطة
تحصل علة في شيخ الحلة
نحن الإيدنا بنت للنقطة ...
والجيرنا زبالة أطيانا
ناس السلطة إن دارو النقطة ...
تمشي بكان أرض الشفخانة
وما طالبانا خلاف زنزانة
مدرسة بوسطة ... مدرسة بوسطة
ستين طلبة وعشرين أوسطى
شغالين ما ملو سخانة
مدرسة بوسطة ... وقلنا غُنانا
يا الجابرية الله أدانا...
حاج البلة المبروك جانا
جاب المدرسة جاب البوسطة
وبكرة يرجع للشفخانة
نصحى نصابح موية الدُّش
نمسي نلاقي الضو عمانا
مدرسة بوسطة ... مدرسة بوسطة
وتاوق ... وتاوق ... وتاوق ...تخ
وفجأة تبين في السطح الخرطة
وكب تنتصب الميضنة ...أخ
أخ من حظك يا الجابرية
سابع جامع في الجابرية
وصدو كلاب الحلة يهووا ...
أخ يا الناس الحالن قُطي
في البلد الحظها فاجع
بق يا الصاح الماك متراجع
حرِّق دبش الدنيا الغلطة
بق وانفرتق في الجابرية
بق في أرحامنا في شافع نافع
ترفعو أمو في حيطة الجامع
يكتب يسقط دجل السلطة
ويسقط بلة وشيخنا التابع
وكشفناك وكشفنا الخطة
تحيا كلابك يا الجابرية
ويحيا ضراع الزيتن طالع
غُلب يصارع مر الواقع
يحيا ترابك والطورية
الجابرية تحيي الشارع
دايرين كهرباء دايرين موية ,...
دايرين سلطة وسوق منضبطة
دايرن هسة زيادة الحصة ..
الشفخانة بديل النقطة
ودايرين بوسطة ومدرسة وسطى
آ الجابرية تصارع الواقع
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
السرة بت عوض الكريم
جات داخلة زي مرقة غضب
من جوف حليم في زمناً صعبْ
رمت السلام ... "رررب"
زي شنطة من كتف المسافر
بي تعب
زي ردخة "رررب" الله يا رب
قعدت علي طرف العنقريب
المحازي الواطة ضايرت التراب
كسر العويش الفوقو شالت باصبعا
وشختت شخيت الله يا ربْ
عاينا فيها نكوس سبب
للكفرنة وفورة الزهج
من دورة البال الوهيط
ما عودتنا تدس عوج
تكتم فرح زي حالة الزول البسيط
صنقعنا في قعدتنا ...
راجعت الوشوش
دنقرنا عن رفعة وشيها
المتعب الجاد الرحيم
الطيب السمح المعافى رهاب رهاب
ينشاف وسيم
اتوهطت فوق العنقريب القديم
من تاني ضايرت التراب
كسر العويش الفوقو
شالت باصبعا وشختت شخيت
قالت : تصدقوا آولاد ...
بقيت أبيت الليل أفكر ...
في التميرات القدر ....
فوق راسا ما شالت سبيط
عليها الجرورة الفوق ضهرنا تنزلا
تطلق ضهرنا مع الجماعة
شن دهانا ؟ دي كم سنة ؟
والحال وقف جف وحلف
ما فيهو من نقاط بسيط
كان بي وشنا في حش التمور
الليلة دوشنا مع اللقيط
أي لا حكت دي ولا بقت
ما كان قايلين ...
في حياتنا بيجينا أقسى من المضى
ساعة مروق الإنجليز...
قلنا الظلم راح وانقضى
تاريهو كمتر قام دقون
حلفا وعُشر ... معيوقا نال
دمسييس ... ضريسا حسكنيت
شوك جمال
الله يا رب العالمين ...
الما جحدنا نعمتو في الشوف والسمع
راحة الولادة لا قلوبنا عمن
ولا غيرنا دين
في الجابو ما قصر حمد
في الشالو ما قلنالو وين ؟
وين ماشيبو وين ؟
عدلت نعال مقلوبة في الجيهة اليمين
حدرت شمال
زمنا مو دا
الحيكومة كانت بت حلال
بي حالا بي حرب الجنوب
بي قلة المال في الجيوب
كانت رخية العيشة
إلا العوين الكبرو كبرو مليسين
عِلمن يطير فهمن يطير
إن هو ما صلح عوج
ما فادنا شيء
محق القبيل لمينا هين في هين
يا حليل رجال سكتن قدر
غشاهن بالقفا
ولي الليلة سيفن في الجراب ...
يهرج سَنين
دا زمن قواسي زمن ضلالة
أوانطجية زمن مهين
لاقين هواكن ضروا عيشكم..
ضر يا عسكريا ما اتعظ
كتل الرقاب بيودي وين ؟
ضر يا جلاليب الرهاف
ذمما خفاف
ضر يا ضرر ضر يادقين
منصلبطين عرق النبي ؟
وبالنار بتلعبوا يا عوين ؟
لي الحول قريب درب السلامة ...
تخوجوا بي درب الحرب ؟
غي قلب ولا الحرب بقرة حلب
والأرض صين ؟
ما كان عمل ... ما كان دا دين
يا أرزقية تخمجو دم
والدم مو موية ومانا طين
منصلبطين في الناس دحين ؟
لامن يجيء اليوم الفصل والحق يبين
وين تمشو وين ؟ تنسلو وين ؟
كان طال وكان قصر الزمن ...
الحين بحين
كب يا رجالا سكتن قدر
غشاهن بالقفا
ولي الليلة سيفن في الجراب...
يهرج سنين
وإتاوهت ...
حسيت بأعماق الشوارع
والتواريخ المجيدة اتاوهت
وادتني عين
صنت شويتين كوركت ...
يا بت شمسنا ادهدهت
شوفيلي شافع ود فطين
جا من الطحين ؟
الله ... فترنا من الطحين
وكان الوكت زالف عصر
عين الشمس مشدوهة
بي دوشة سحاب
عرق المراكبية البعاد
راحل مع ريحة التساب
ما تدري من البيوت الحلة ...
ولة من التراب
الناس تقول مدقوقة
طالعة على الحقاب
مفلوقة بي حجر الصعاب
المرة نازلة على البحر
مشروقة بي موية السراب
الفرة مشروقة عقاب
يا الحرة كيف بقت الرقاب
مسيوقة بي قيد السلاب ؟
منشرة من نشر الحجاب
في عروقا واشتد الخراب
من بعد ما انبلج الفرج من ضيقا ...
خدعوها بي حيلة كتاب
رفعوهو فوق سن الحراب
ودهت الهزائم فرقتا
فالناس بدل عن نقتا
التنلقى فكة ريقتا
وبدل القصور الفي الخيال التبقى
ماهلة كريقتا
وما جاتا راحة طلقتا إلا التعمر طلقتا
بي بناديقاً حقتا بي ها الشوارع وبقتا
تنسد منك دقتا ودم خلقتا ومر شرقتا
ونار شنقتا يا دقن ... دينك سِرقتا؟
قطعت وضوها انشرقت ...
مسحت وشيها اتشهقت
قالت نست ما تاكت الاوضة التحت
عن مرقتا
دارت تقوم
جبد العنيقريب الحنين طرقتا
رجعت بشيش عن نتقتا
رجعت بشيش من الغضب
ولة التعب فتر السنين
ولة الكبر دا الما قدر يمسح
سماحة خلقتا
زي نيتا البيضا الشعر ...
زي موج بحر كان الجبين
مديت يميني اساعدا
ردت يسارا تباعدا
قالت لي : آبوي وفِّر ضراعك للبلد
وادخر مروتك آولد لي يوم بحين
أحفض كرامتك تحفضك
الموت ولا العيش المهين
الموت نفاد الما نفد
الموت حياة الميتين
أختاها جنة مع الفِقَر
وأدخل جحيم المتعبين
وإن ما قدرت على دا آبوي...
ربيلك دقين
وصنت ... ربيلك دقين
وضحكت ... حمدنا الله الحنون
جِيدن خلقنا بلا دقون وضحكنا زييين
ساقت حديثا على الخراب
الشوفتو ما دايرالا عين
رفعت قرن راس السنط ...
ساسوية جاية من المراح
يا خيري ودي المستراح
والشوكة تحت الدوكة يا داك الركين
الشوك بمرق الشوك ...
شوكاً فينا شين
مراقو رب العِزة شعبا ما بيلين
الجاية حيكومتنا
لكن الزمن دبوية داير النهمة
وينكم يالخزين ؟؟
ما كلَّ حاشا صبرنا ... لكن لامتين
دعكت عيونا وصنقعت ...
كل العيون اتجمعت
تقلت على الريح النصيحة ...
كان المطور شووو ترَّعت
زي باكي فوق دم الحسين
لكن دا وين؟ والتاني وين؟
واتلوعت ...
معقول في ناساً ما وعت ؟
لي الليلة بالم بين بين ؟
وكيف انتو نوحنا من الدعت
...مؤمنا من جُحر الدقون
الكاكي يلدغ مرتين ؟
والتالتة قرصة أبو الحصين
حسيت بأنها دمعت ..
شهقت عيونا الدمعتين
حسيت إني زي حجر
جدعوهو في نص بحر
قام البحر بنى فوقو طين
حسيت بأعماق الشوارع
والتواريخ البعيدة
اتوهت وادتني عين
ومرقت زي
دخلة غضب صدر المسامح والحليم
في أيام عجاف
مرقت ... دي السرة بت عوض الكريم
مرة ما بتلاوز ...لا بتخاف
.... زي الضفاف
الما بتخاف ضنب التماسيح والكلاب
قومة البحر ... ولة الجفاف
مرة من قديم ... مرة بت قبائل
قالولا "لا"
واختاروا في الحق الجحيم
من رفقة الفسل الخلا
كانت نعم تدي النعيم
مرة من صميم ضهر الغلابة
الما بتنكس راسها
غير ساعة الصلاة...
أو ترمي تيراب في التراب
أو تستشف وجه الأديم
السرة بت عوض الكريم
ما فيها من عادة الحريم غير...
السماحة القدمت
قدم الدهب
حافضنو في حُق قديم في أقصى كيم
ما فيها من طبع الرجال
غير الأيادي الخشنة
زي قولة النصيحة
وكتين يكرب في الصميم
ساعة يكون الحكم ضيم
تسعين سنة ...
ويا السرة بت عوض الكريم
بصرك بصير ...
سمعك سميع نضمك نضيم
بالك محلو صبي وسليم
تسعين سنة ... عودك أمد مانحنى
شامخ بلا البان القديم
تسعين سنة
ومن فتنك ....أستغفر الله العظيم
جوك الرجال
يا السرة بت عوض الكريم
من وين ووين
لا الكلو طين أغراك ...
لا السمح الوسيم
السرة صديت المشايخ والعمد
مرسالا ليك
ضيعت بي ألف البشارة عليهو ..
كيف قلبك صمد
يا بت قصاد المغريات ؟ ...
الجان يجب والهام يهيم
والبشروك بالجنة من فقر البلد ...
أسقوك بالغفلة المحايات ... مانفع
رتباً كبار قلتيلا "لا"
شعراء ومغنين ختا فيك ...
دوداي غناهو وما شفع ..
الجان يجن والهم يهيم
والإنجليزي أسلم في شان هواك...
ساعة طلعتي تجيبي عود السيسبان
اتصيدك آلسرة بت عوض الكريم
مرقنو كرعين الحصان
والجاك ناط كتفتي باليل في اللمين
مع الصبح طلب عفو وسترة
وعفيتي وسترتي يا السرة القوية
بقتلو توبة سوية من هتك العرض
يا بت ها كيف بعد الحسن ما تاورك
قلبك على زول في الأرض
ستين سنة ؟ ويا بت بلا النيل وحدك
واقفاها هو النيل انحنى
ستين سنة ؟ ما جهجهك فقد الحسن
لا يفقهك فجع الجنا ؟
فجع الجنا الويحيد
تحت خيل ميجر السجم الرماد
الإنجليزي وكت مرورو على العباد
وجناكي ناش عين الحصان
بالنبلة ... ناش طربوشو
قيح العسكري إنحم
وحمَّ بالسوط جناكي
في إطن المسيمح ما أتلفت
والهاشم الواقف وقع ... والدم هدر
وكان زي محمِّر في الكجر
في إيدو قابض نبلتو
وفي التانية غامت الحجر
صرخت صليحة وشكعت
فوق قيحو كلبينو الزرق
ومن يوم داك ما شافتن
ساعة البطان قيح البقل
نهمت غنا غضب البنات عن زفتن
فس يا كديس الإنجليز
كلب الترك يطفر من الفارة وينيص
يا مكري صبرك يا رخيص ...
الفافنوس البوص لحاية الهردبيس
كوس لك بلد
بلدك وأباك رفسك رفيس
نفضك نفض ...
بلدك تضادي ولا مغيث
قَلَبْ عليك بطن الرجال
شقيش تقبل يا خسيس
حظك في الحياة وفي الميتة
مافي وموت تعيس
عفنت كرشك دون تُرب
منفوخة للغربان فطيس
فوق سكة الماظ الصعب ..
هاشم .. حلالي قدل عريس
هيلة آرجال عسكرن
شمش المشارق ليها ميس
هية آرجال هتفت نفيسة
وحرَّقت توبا الوحيد
عقدت شديد ... قرقابا
حافي ودون قميص
جرت الكرارق زي برق
ختفت من السحارة...
لي هاشم حريرة وقرمصيص
وكان الفريق إنخمَّ ما فضل بشر
ما هزا زلزال الفجيعة المُرة
والدماع طفر
دايرات يولولن الحريم ...
صنن وكت صوتك نهر
وكيف زفتي وشي
ونعلتي قفاهو شيخ الحلة عن قالك
"قدر"
ولميتي هاشمك ونبلتو
وفي إيدو الحجر
صبغ الحريرة ... القرمصيص ...
الدم ملاك .. لميتي زي لمة ملاك
آخر عمل خير في البشر
جاك الصبر من وين؟ لا قلبك رجف
...لا آهة لا دمعا طفر ؟
رشرشتي بي إبريق أبو
وبي دمو نبلتو والحجر
خيط الحرية القرمصيص ...
كفنتي بي رفت القماش
الساكبويس الخاتا لي يوم الطهورة
ومرقت لاقوك الرجال
بين الغلب يتقلبو
ومتحزمين زي يوم أبو
دمع الرجال هزاكي
آه خارت قواكي
طفرت دموعك
والحريم كسرن عليك
قلدوك رجالات الفريق
فوقك ضو الشمس إتكا
وبعض المراضى المقرفين
قلدوكي لي شيء بلا البُكا
وكانت دي أول مرة تبكي في الفريق
وبي حرقة زي كل الرجال الخيرين
درفون ضرب
بالنبلة طربوش إنجليز
عوَّر حصان الإنجليز
لا إنزح لا زاح لا جرى
وكانت دي أول مرة
شافع في الفريق بي حرقة...
الناس تشق الودلحد في مقبرة
سبلتي .. ما انقطع الدرب
دفقتي بي قرعو الطشت
فنيتي في الليد النحاس
جا طشت جديد
وقدح جديد ونحاس جديد
وما انتروا ناس ...
ناسا تقلب الواطة من فوق لي تحت
لو لاقية راس
دور والمعاك ما اتفرقو
وين وشك الصعب الصلب
إن صرَّ في الريح فرقو
وإن صرَّ في الموج غرقو
يا بت كضب ...
معروفة ما من قوة تحمي الفرح ...
...حين إندلاقو على القلب
لي دور حديث المنغلين...
أندلَّ من فورتو وهبد
دماً صعد من ها التراب ...
لابدَّ من ينزل مطر ... رحمة وسعد
ما بروح سراب ...
هاشم نجمة الفنجرة ... نشهد علي إنك ولد
طمنت بي فعلك بلد ... من أولها ولي آخرها
رجعت أبوك من القبر
قصرت لسنات الكتر
سكت خشم المسخرة
نزيت رجال جوقة غريق ...
بس كيف نضيق ضيقاً عميق
يبقى الحجر فلخة جبل
والنبلة تصبح منجنيق
أو بندقية معمرة
ساق نخلة في الطين الطري
نازف يفج المقبرة
قصب التواريخ ينبري
ودمك عمار المحبرة
نشهد على إنك ولد
بركان جسارة وفنجرة
زي ما شهدنا على أبوك
فرسان قبيلتك من ورا
ويا السرة بت عوض الكريم ... إنك مرة
ولدك جدع ما بندبوا
حتى في وليداتنا ... الدشر لعبن ... طعيم النوم أبو
ولدك بخيت ... ما دام رقد في صدر أبو
ولدك شفيعنا مع النبي
ولدك يمين يكفينا كلنا مغفرة
وهنا الدرب ... حِرة قلب
صرة وشي
ولدك وعدنا بكل شيء
وما في إيدنا حاجة بنخسرا
يا السرة بت عوض الكريم
مع إنو كم سنوات لا بحراً طمح
لا سمانا كانت ممطرة
كان كل ما نحفر ... يلاقينا الترا
عن جينا لي دفن الترب ...
حسينا كم ملك إندفن
جات غيمة من دون الوقت ...
جات نسمة هبهبت الكفن
بي دمو نبلتو والحجر ...
خيت الحرير ... القرمصيص
دخرينا نام آ السرة في صدر الحسن
فاتونا بي قدم الصلاح ...
سبقوك لي جنة عدن
سابوكي نخلة وسط رياح ... بين الزمن
لكن ضراعك هو الضراع
على رغم أقداراً قسن
ماسكي الشباطين في الصراع
لا بودة لا سوس لا وهن
تعبر قليبك زي شعاع
ما غيرن لونو المحن
ضلك متل بالك وهيط ...
عبرت مراكبك بي شراع
صبر احتمالك كم محيط
السرة بت عوض الكريم
الله أيا مرة من قديم
سلطان وعن ساعة الفزع مملوك نشيط
عادية زي قولة سلام
حلوة لسان ... لكن إذا تغضب سليط
مرة ما بتفرط في الزمن
وفيها الزمن لحظاتو أبن
ساعة مروق الإنجليز
ضبحت غنيماية اللبن
طلعت علي ناس القبور
كشحت ورا طرف القبب...
عيشا المجودا للطيور
ومن زمزميتا والدموع ...
رشت قبر هاشم .. عقب قبر الحسن
والباقي لي كل القبور
في توبا صرت هين من القبرين ...
بعدما انبركت
بركة عشق ... بركة شكر ...بركة وفا
غيبة الشمش جبرت خطاها على الرجوع
والقلب من شوق ما أكتفى
لسع في غيمة من الدموع تبراها لي طرف الفريق
شيلة نفس تطلع مطر ...
ختة نفس تطفي الحريق
آ السرة يا دوب بين الضلوع جرحاً غريق
فاتو إنجليز فوق دمها ... وعمت إنجليز
مبروك وحمديل السلامة يذكرك ...
ليلة الحسن سارلك عريس
أم من ضراوتو يذكرك ...
كتل المنيحيس التعيس
ناس تملأ في الأزيار ...
وناس في كل كيم واقدالا نار
ناس نازلة في الحيشان تقش
ناساً ترجع في المضى ...
والجايي سودانية مش ؟
السرة ليلة قلب نهار ..
الواطة غبشة الناس غبش
والروح خدار في حلتها ... النوم فر طار
باكر دغش شدت على ضنب الحمار
حموها للميجر تخش
عقبت على ضيفاً عصر ...
قصرت مع بتو الحديث
دهت المشايخ والعمد ...
سفهت عمايل الإنجليز
ظلم الحُكم ياهو الظلم...
كان من جوامع كان كنيس
يبرا السما ...يبرا محمد سيدي
يبرا المسيح
ورجعت بلا الموية الروت ... حيضانها لي جدول فسيح
لي دور معلقة للبخور
في بيتها عامر بالمديح
لي دور تزغرد ما انقرش يا السرة ...
حسها ...كيف نصيح
لي دور مع والشاي والزلابية مع الضبيحة
الجوكي بالخرفان سمان ... والجارلو تور
لي دور طبيقاتك تدور
ما قصر الطمبارى ... جاك ملك الدليب
رحلت بروش الزاوية عندك في الفريق
آ السرة ما فضي عنقريب
آ السرة بينات الخلوق ...
مراتاً الليل آبحوق
لي دور على كتف الفرح ...
تتعب عيونك وتستريح
لي دور وتكلك فاتح تكية ...
آ السرة دارك ماج ضريح
ويومين بعد سقت الخدار
بي إيدا ... جيهت العقاب
قامت معاها تسع رجال ...
بي نوبة فوق ضهر البخار
قالت عليها نذر قديم ...
واقع عليها نذر عزيز
إن حية في الدنيا ونصيحي ...
إن كان تشوف بي عينا فوت الإنجليز
إن كان كان تطق زغرودة في ضل العلم
خلوها تدخل للختم ...
حرموها يكفيها الضريح
شوف عين تشوف الأزهري وزي ما يكون
صح النذر ... النذر ما راح وهم
دمَّاعا رقرق في العيون ...
عن ساعة المحجوب نضم
وإنشر في زروق بزم
ما كان تكون آ قيحي حي ...
وأنا أفش مغستي وأصفي دم
من تاني يا رخم الوهم
ما دام حرتناها الأرض ... سنَّدنا ..
تيربنا ...بوغنا ومسحنا قمحنا ...
هسع الوحم
هاشم ولا أسفاً عليك ...
وعلى رفاقتك لا ندم
ما دام بقينا أسياد بلد ...
ما فات يوم أبداً قسم
والفوتك يا الإنجليز ...
يعقب على باقي السجم
آفاتن أولاد الحرام ...
أكبر من آفات العجم
دي السرة بت عوض الكريم ... سرة عقاب
سرة تواصل بينا بين رحم التراب
والجاية في الزمن الرحيم
مرة من قديم
ما فيها من علقنة الرجال ...
ما فيها من دلقنة الحريم
مرة بت قبائل قالولا لا
ما أختاروا في الحق الجحيم
ومن رفقة الفسل الخلا ...
كانت نعم تدي النعيم
مرة من صميم ضهر الغلابة
الما بتنكس راسا غير ساعة الصلاة
أو ترمي تيراب في التراب
أو تستشف وجه الأديم
جات داخلة زي مرقة غضب
من جوف حليم ... في زمناً صعب
ومرقت متل دخلة غضب ..
يا السرة ليم
آ السرة ليم
آ السرة ليم
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
البحث عن ذاكرة لوطن مفقود
عبيت زاودني الريقة من بايت القوى
بايت القوى الوطن الدشر …
غيمو الربط
ساعة بقينا من الروى ……
فرسخ مطر
سافرت لك بأشواقي لي آخر المنافي
بحت في كل المخافي ..
وكست عنك في الخرط
في التواريخ القديمة ..
التواريخ الرؤومة ..
بين نقوش نبتة ورسوما
في الطنابير العظيمة
وبين لغة مروي القديمة
وخط .. في خط
راجعت بك كل الأسامي .. البعرفا
كل الجمل ..
حتي الضمائر .. وأحرفا
صححت بك زمني الغلط
باختبك قلبي الشقي ..
وبشرتو بي لقياك عبط
يا طيبة زي شارع وسط ..
يمشيبو كادح وأرزقي
وممتنعة زي قبض المياه
والمافي
والما بتلقي
غالبني جيتك أصادفا
لا في المعابر والموانيء المترفة
لا في المطارات الوسيمة كما الفراغ
لا الأرصفة
كل الدروب التعرفيها وبعرفا
التألفيها وبألفا
خشيت دغيش سِعن الدني
المرفوع علي سيبات وفا
روابي كان قطاع غني ..
وشوقاً مفورن وانكفي
قدام خطي الوجد الِحفي
غابن صباحات القرب …
وبقت ضلامات الجفا
وضي المصابيح الجريح ..
كترت علي الريح …. وانطفا ؟؟؟
هوي يا بنية من الغبش ..
من حر أباطهم مترفة !!!
وين إنتي شان نرقد قفا
وين إنتي وين .. في يات دغش
ما بيننا بين غيبتك كفي
لو بق حسك في...
هشيم دبش الضياعات والسأم
زي أغنية شوق ..
زي نشيد ..
اندبي همسك زي نغم
او خب خطوك زي شهيد ..
رفت مسيرتك زي علم
ما كان مهابات الصقور
(نخت) تحت رخة رخم
وين إنتي وين ..
ما كان هجم ديش العجم ….
والدنيا ضو
وامسن سبايا الأغنيات
العزل … ألاه … شن تسو ؟؟؟؟
ولا في الكفوف الخاوية سيف …
لا في الكتوف الزاوية ضو !!!
دلَّجت درب الأربعين ..
براً
وبحراً
حتي جو
أشريك قلت من الزمن
واعتق معاك رقة مشاعري
أزوجك كل الوطن
كل الرجال الحملو أرضك بالحلال
وأفتق سحاب العشق شو
ولا بنتي في الزنج البجم …
لا كنتي في العرب الأشو
لا في شلوخا …
ولا الوشم ..
لا في شيوخا ولا في عو
بل فيك غشاني الزمن …
أداني صرصر وبعتو نو
كوترني .. بي حبل الوخم
كل ما انقطع تو .. بان لي .. تو
ناقز وراك ..
ناقز وراك ..
ناقز وراك ..
انترتعت رؤياى ..
هكع ..
ما بين أريت … يا ام زين … ولو
وبين تبقي وين ..
لاك في الوجود
لا في العدم
لا في الحقيقة … ولا الوهم
لا زين
لا شين
لا البين بين ..
يا راحة الباقالو هم
لا عنك أفتاني الزمان ..
لا منك انقطع العشم
يا ريتو أغناني الكمان
آ طيبة عنك صوتك نغم
من أعلي ميضنة فيي
كان أعلنت موتك للأمم
أو .. صح بجيتك لي الرمم
لكنو صمتك طال …
وحان ميعاد زفافي علي الألم
قلت أرفع أيديني وأقول …
خاني الصبر ..
خان وانهزم ؟؟؟
زي ما أتهزم كمين نبي …
وخانت علاي التاريخ ذمم
آ طيبة أخافك ؟؟؟ واللا اخاف
السبة واللعنة الوبيلة ؟؟
تحل ورايا كما الجفاف ؟؟
أو ….. تار علي أكتاف قبيلة ؟؟
معلمي الله من عتاد ..
يبرد حشاها .. ولا في حيلة
بلا تأمل في البعاد .. سنين ..
سنين .. ودنين .. طويلة
وكيف ؟؟ وكم ؟؟
والإنأخذ بالدم غصب …
مافي البرجعو إلا دم !!!!
آ طيبة هيلة ..
سلام
عوافي يا أصيلة .. كما المعانا
أو .. بديلة علي اللي مافي
يمه أدخلي علي غنانا ..
يا أمرقي من القوافي
يا أحذرينا وما تخافي
وما بنخيب حاشا ظنك …
ينفخوها وما بتموت
حية نارك … حية يوت
ختي قدرك في الأثافي ..
يوسف الفي الجب يمرق
ضاربا ريقة اليلقي قوت
روقي أكنك ..
واللا كنك ..
تاوقي في البحر الخرافي ..
يونسك في ياتو حوت
سمَّ ينده جوفو حافي ..
وهطينا علي الأثافي ….
وهبي نارك لا تموت
يا حمامة غار محمد ..
يا خيوط العنكبوت
يمة كسناك ضمة مافي ..
الدروب وين غيبنك ؟؟؟
في سؤالنا الضاري عنك ..
سدن أبوبن بيوت !!!!
والبيوت البشبهنك ..
انكرننا وانكرنك !!!
ننكشف لا لوم عليهن ..
بس ها كيفن يسترنك ؟؟
وفي سكاتنا الجاري منك
رحبن بينا السجون
الدرادر والمنافي
فينا من روَّح فدايتك ..
وفينا من لا زال …
وفينا
ما في من بدل لرايتك
وانتي في ذات السكوت !!!
التراب يتشهي حنك ..
السحاب عابر يفوت
واللا يكمد للعيون
بالغبار غمة وسوافي
وانتي يا آخر المرافيء
يا أم وجوداً صار خرافي
في صحاريك داخ غفاريك ..
من برد زمنو الرعافي
دون كواريك ..
مات واتاريك
غبتي بي كل المرافيء
يا لساريك .. لاك موافي
لا كمان قادرين نسيبك
نمشي في الزمن المجافي
ما عهدناك عاد تخافي
كانفعالات المراهق ...
شابكة كالشجر الضفافي
خيلك - الريح - حين تناهد
لوحة التاريخ بيشهد
لونا والدم الإضافي
إلا يا وتري وغناهو ..
راحة أنغامو .. وهناهو
يا نبي الثورة الغشاهو
برداً أكتر من غتاهو
إلا يا بت جاك زمن دارع الأيام قلب
الدفاتر والكتب
إستحمت بالغلب
التلاميذ النجب ..
طيشا الفقر ….
الغبينة
صنت الأجراس وجينا
إلا يا .. آخ … ما لقينا
الجوامع مستباحة ..
والمصلين صر جنب
الكنائس جالبا دينا !!
والمدينة تبيع عوينا !!!
لي النخاسية الغرب
لي اللحاسية وعقب
تشتري آفات الرعب
والهتافات الجرب
عربدت باسم السما ...
توكت ريح السحب
ومن ضروعاً .. كان تكب
كل أطفال الفقاري ..
وكلهن في فد شخب !!!!
في اللغة الجرسية .. سب
في التقي النجسية .. سب
في الوقار الفاوة .. سب
في شعار ما ساوي .. سب
واللا أريت ما كنا منك ..
لا في بيناتنا القرب
كنا أقلا نشوفو عادي
التردي الجاي وغادي
دسادي في النعم الزيادي
وابن آدم بالأيادي
لي سترة الحال يكافت ..
غابة غابة ..
ووادي وادي
ينبح المسكين يا طيبة ..
طيبة يا راحة الفتارى
وواحة الفي الصي حيارى
عورة الشرفاء الفقاري
سترها ولب المباديء
يا بنية الأجر أم خير ..
أو نبية الشجر الطير ..
يا رسول البسمة للأطفال …
حبيبة نيل بلادي
يا طليقة الغيم …
عروس طين البوادي
المناديل بانتظارك … والأيادي
معبأ شوق ..
يا طيبة ..
طيبة ..
طيــــــــــــ ..
ولا حياة لمن تنادي
بكَّاك بكيتي .. سكت برايا
كنت حافي علي إبر ..
بتَّ حابي علي شظايا
من انكسار رماش عيونك
فوق مسام سام المرايا
من كتر تعباً تعبتو ..
قلت ألقاك ما كفاية
يا تكملي في صمتك
يا أخلص بيك غنايا
دي الحنايا وراك يبست
ولامست عشميق الخلايا
وبت أمسد من حروفك
وأقتل الأيام .. قراية
بتق الغيم .. برضو أرضك
ما استجابت لي سقايا
وقلت أخطك بي دمايا
يا أصابعيني أبقي ريشة
ويا شراييني الدواية
وقنعي الريح الورايا
النكع بالخيل .. محالاً ..
يدي بي بقر الدرايا
انتهت كل الخفايا
وقلت أكوسلك في الخطايا
لما في ذات لقيا حر ..
وزاد هواكي علي هوايا
وقمت خنتيني معايا ؟؟؟
اشتكيتك لي القمر
لما أنسام السحر
الرياحين والزهر
شهدوا لي عليك يا اخية
جاء القمر سواك برية
وباعتزاز في إبرة حية
صاح في جمعنا يا برية
من يكن من غير خطية
.........
وقم رميتك بالتحية من اللي في
فيا ….وفية
يا معاكي تغيبينا ..
يا تعالي وابقي جية
للبعيشو غصب عشانك …
والبموتو بحسن نية
حار علينا بعد طراوة …
وبين عيون أحباب تقية
نبقي في كتمة وشقاوة
وبين أراذل
وارزقيـ……ـة
كفاك شكية !!
يا التشرك لي غمامك …
وتحتك الأنهار قوية
ما انسرق ذات ليل سنامك …
لو قبيل كست الحوية
كفاك شكية !!
وما بيضيع حق لا قضية
لو في طلاب من وراهو
ونية بيضاء وبندقيـ……ـة
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
الضو وجهجهة التساب
وداها فوق قوز الرماد
كان ظنو يوم ... يومين ... تلاتة
الموية تنزل والبحر يشرد شراد
يفضل ترا
يبراهو بالسلوكة من ورا
والعيوش ... والخير يعم يرقد رقاد
والناس تخم خم السرور وما هو البرا
ناسا كتار فاكرين كدي
يومين تلاتة الحالة ترجع حالتا
يبنو البيوت هو وشفعو وأم الولاد
وينجمعو ويسترجعو الذكرى وشتاتات السواد في صالتا
شيتا ضحك ... شيتا بكي
ويبقى الخراب دا رهاب رهاب
عبرة وحكاوي بتنحكي
بلدك متل كمين بلاد ...
بدت الدقون فيها الختا
نجس ثراها المسرفين ...
كترت مواعين الفساد
وكان كلمة الإسلام غتا
جات أللت الله وشالتا
كان ظنو يوم ...يومين ... تلاتة
مشى السبوع والتاني جا
والموية كل ما ليل تزيد ويقل رجا
وقوز الرماد الكان قريب ...
فات بعيد بقى ما بتخوج
قوز الرماد يا الضو فضل ...
جزيري ضارب فيه موج
حصار ... حصار ... كيف النجا ؟
عاين البلد دي دمار دمار فيها إيش فضل؟
لعبة قصب في إيدين طفل ؟
الحيطة وكتين التقع ...
تقع ألف وجعة على الضلع
دخانها يمرق في السما ...
آهاتو تنزف في الأرض
بحر الصبر والاحتمال بيناتن اتقطع ترع
لا يلقى يربط لا يحل
لا حولة يا الكتب ...
الكراريس المكرن في الشتل
التختة أقلام الرصاص ...
كتب المدارس كور يلوج
باب الفصل كاسحبو موج
لا حولة يا ورق الجرايد يا المصاحف
والصحيحات المطفحي في الزبل
ورافعيين دواليبن بعييد ...
طابلين خوازيقن طبل
لا حولة حال ما بتنقبل
يا مسلمين ...
وين لي تساب عشرة وتساب كم وأربعين؟
دة يمين خراب كمين سنة
يا الضو منو الفي الكون بصدق كان هنا ؟
ليلة ذكر ... حلقة مديح ... دارة غنا ؟
هيصة ورقيص ... القرمصيص؟
سيرة عريس ... وحلاوة عروسو محننة ؟
يا الضو منو الفي الكون بصدق كان هنا
شفع بيلعبو جم بعض ...
ديك لفتن في الكشى غبشي مكشنة؟
واللا الشتل خايفلها ...
فارد جاريدو وحضانا ؟
فيق لا تضيق
بات الفريق بهجي ومتمسحة بالمي
وين يا الضو نقاقير الهنا ؟
وينن مشاوير الفرح ؟... غزل البنات؟
... الهودنة؟
حش البراسيم العصر الليل ونستو الشيطنة
وعند الفجر كم ميضنة
وهذر التلاميذ الصباح
بي جم رواكيب الحلب
يا الضو بيوت الناس حياتا مبشتنة ؟
الحلة كلها في البحر ؟
كسر البحر ...
واللا أنتحر قلب المياه وإنكبَّ قبلك وحَّدك
ضاداك في بلدك شرتك
نفدت قوافل الأغنياء
جملك على الحصحاص برك
مرتاح حمامن في البروج
وإت يا أب حماماً طاش يلوج
لا سوى عش لا ركَّ رك
يا الدنيي كيف متقلبنة
تصحى العصافير الوديعة...
مع الصباح متخلقنة
شر الكلاب متمسكنة
وين جنرتا وهوهيوا ... وين؟ الليلي غاب
كلب الجناين زيو زي كل الكلاب
كلب الغلابة المستغلين العبيد ...
الليلي سيد ريس مهاب
كلب أبزهانة تهينو هانة ...
ومن المهانة تقولو (تك)
حكم انقلابات التساب ...
دوارة دنيا فرندقس
ننجارى فيها سبق سبق ...
نخسر بعض في هين تراب
نتلاوى عن فتح اللبق
فاكرين برانا أهل العقاب
تاري البحر عوافي عندو معانا حق
يا الدنيا زي سكرة وتفك من راسو فك
بعض المسافات اتلغت
الفارغة طمبجا والملانة اتفرغت
الدندهوبات زي بعض ...
شكل العديدي ورصها
نفس العناقريب نفسها
عفشك دا حق غيرك تشك ...
يدخل في بالك ألف شك
ما الحالة أصلا من بعض
قبل انقلابات التساب
الدنيا كلها حلتك
تنضم مع الفي آخر البلد ...
من غير تفوتها محلتك
تحكيلو قصة تقصها
إن نفسو فيها تحسها
إن ما ها فيها تحسها
حتى الأحاسيس نفسها
ما الحالة كلها من بعض
إلا المساخيت الدقون ...
ختوها بين أهلك قرض
بالدين وبالطين بالنسب ...
بالميكرفونات بالخطب
بالبنطلونات بالرتب ... فرق تسد
تاخد قناديلك تفوت ...
وإنكتلو في حزمة قصب
ويوما التصد تلقى البيوت ...
في ازيارها باني العنكبوت
والحزمة شاهد في الترب
حرسك يظمبر منها
فرسك يكد ... لا أسيادها تسأل منها ...
لا زول يرد
أرخيلي أضانك يا بلد
مرة أسمعيني من البعيد
وإنطارشيني وللأبد
في حبلي ماتت شتلتي ...
مات بيتي ماتت حلتي
لكني يوم مات إتولد ...
جواي ألف إنسان جديد
وأنا ذاتي من ذاتي إتولد
ورتني مَلَتي مِلّْتي
والموية بدلت الوجوه
يا بادي من بيتك تتوه
تضهب ضهب
لو بابو مافي أو العتب
تحسبلو من قوز الرماد
أو بيت أمير المؤمنين اللسة حيطو...
تسوي رب... رب ...در...درب
والدندهوب إندك دك
هرس القزاز .. الموية جاز .. الجاز ودك
بينو الدقيق إتلكَّ لك
ضلف الدواليب الكبار عايمات خشب
المكحل الكتشينة ... ميزان الدهب
ضوق الغضب
ضوق المذلة الدستبا الناس العزاز
سيد دخرنالو المطر .. أما أنت ...
يكفيك الرزاز
ويجي الجراد ... ويجي الجراد
خدرت تاني يجي الجراد...
أقوى الحقيقة من المجاز
وهنا المحك ....
يا أرزقي ... يا نسل حمالة الحطب
يا مستفيد من بزة أطفال السواد ...
الما نزل فوقن ملك
بالسكر ... العيش .... السماد
الموية أولى من العباد
في يات كتاب دين ... يات حديث
يا فاجر الله بيسألك
يا حسرة الإنغش فيك ...
كبر وراك جاهد جهاد لامن هلك
يا حسرة الصدق صلاتك ...
وموعظاتك في الفساد ... بان الشرك
أيوات ليك ...
أيوة أيوة يا بحر التساب ما أعدلك
شكراً جزيلاً يا بحر .... رغم الكساد
بحت لنا العفن المكرن في الزمن...
من عهد عاد
والضو وليداً ... ما قرأ
خرجتو منك باقتصاد .. قانون ... فلك
جفَّ المداد ما أعدلك
ما أعدلك.... ما أعدلك
بالسكر ...العيش ...السماد
الموية أولى من العباد؟
وقبل على القبلة ونده
قبال يمد إيدو أنتبه
حس المطر بين الشدر...
والضو مع الفيها إنشده
برة المطر في الدندهوب برضو المطر
خت البرش فوق راسو ...
لكن المطر أووو والهوا
وراس تمرة فوق عفش المسيكيني
الجريد رمى دندهوبا ...
العدي فاتت بالبحر
برش الصلاة اللافحو الهوا
وإبريق يثرثر بين كرر
يا الله ستها في السفر
والضو ينط من دندهوبو ...
يجيبو صاد صوت المطر
في إيدو كوز .... سبحي وككر
حلة ملاح ... كراس غنا ...
إعلان قضية ... علم طلب
برواز قديم حاضن عروس وعريس وسيم
بين كم نفر
السبحي والكوز موألتا
تشبه أمير المؤمنين ...
باكر يقولوا سرقتها
فنننن يفنها في البحر
أقوى البحر واللا المطر أم الرياح
بتصحي في الجو الجراح ...
بتحت من الجوف الفكر
يشفى الوعر
عش قمري بي فرخينو كان من حظ ورل
يا رازق الحيوان أخو
الينجا من كيد البحر ...
ما ينجى من ايد المطر
والينجا من ايد المطر ...
ما ينجى من كيد الرياح ...
والينجا من كيد الرياح ...
ما ينجى من كيد الفقر
ييي دا القدر ... يي دا القدر
ما أعتى حربك بالبشر
أنت الغريب والموج يشيل غادي ويجيب
وإنكربش النيمة الدبيب ...
والضو مو جايب خبر
طق دندهوب ناس ست نور ...
عودو إنكسر وفات بالبحر
تحت السماوات ماف أرض
في الموية في الريح في المطر
في الدابي في التمر الختر
إنسان يطق قبل السماء ...
عراقي والوشي والشعر
غير وقفتو ... الدندهوب زالف هبر
يا غيمة هووووي ... دا وكت مطر؟؟
وأرتج جوف الجو رعد
يا الضو كفر ... يا الضو كفر
من بعدما نفد الصبر ...
والاحتمال في الجوف دشر
صن المطر .... والجو صفا
بنقر حجر بت الرسول ...
لكن بعد ما الضو كفر
ضربت شعاعات الشمس
في دوشة فوق قوز الرماد ...
كلبة مديني نعيجتا
ديكا العجوز وكديس عماد
وطيرة بقر ودحيش غريب
شوف الظروف
دحشك حمارتك والضيوف
قلعن ... يحفتن في الرماد
بالسكر .... العيش .... السماد
الموية أولى من العباد؟
وبالفيتريتي العيش حكم
الموية أولى من البكم
وملص العريريقي ولباسو ومصرن ...
ما غيرن
خمخم عقاب الكسرة والآبري القديم
من دندهوبو المنتكل
في النيمة شال باقي الأكل
خم الدبيب في القفة مو جايب خبر
خم الرياح ... خم المطر ... خم الجراح
لفالو فرعين منقة بالمنجل هبر
حشحش صبايتاً هُن صفر
لكن غلاد البدري لسة على الحصاد
في الراح على قوز الرماد ...
يا الضو بقالن أعز زاد
ونجاضو زاد
وإنكابسن فوق التمر
كلبة مديني ... كديس عماد ...
يا الضو دبيب
طيرة البقر في الجو تغيب
دلت من الكازوم دبيب
والضو يصنقع والورر
يا رازق الحيوان أخو ...
نختا وتصيب نتحدى كيدك يا بحر
نتحدى إيدك يا مطر يا آفة يا ريح يا فقر
نتحدى بالصبر الجميل
بي أعمالنا ... بي طير البقر
وطيرة البقر في الجو تغيب
دلت من الكازوم دبيب
وإنكاتلن في آخر التمر
كلبة مديني نعيجتا
ديك العجوز وكديس عماد
وحمارتو والدحش الغريب
ودحيشو فوق قوز الرماد
عكمنا فينا من الغلا ...
عيشة الجلاجل والشتات
السكر ... العيش ... السماد
الموية أولى من العباد ؟
وبالفيتريتي العيش حكم ؟
الموية أولى من البكم ؟
ولمس دحيشو ... الضو بكى
بكى ما بكى
بكاهو حس الطائرات
بكاهو قدرتو تنتهي
بكاهو يرجى المعجزات
بكاهو قولة الموية أخف ...
واقلَّ من كم وأربعين
بكاهو كضب حاستو وصدق أمير المؤمنين
بكاهو ما رمى للكريق ...
زاغ في أوائل النازحين
مع إنو أدنى الناس شتول ...
وأخف سكنة ....واقل طين
وإنضر أكتر منهم ,...
لكنو ما ندمان يمين
بيتو اليروح
عفشو اليروح
غنمو التروح
ما طال عايش وفيهو روح
وأمونة نفدت بالعوين
في اللجة يفضل كالسفين
أفضل له من جرح النزوح
ولمس دحيشو ... الضو بكى
بكى ما بكى
بكاهو يرجع لا ورا
بكاهو رادي الدندهوب الغادي
وأم درمان تغني :
"حبيبي آه ... وودادي وين ...
وحبيبي أوب "
والباقي كله مقابلات ...
ضد القوانين البديلة
مع القوانين البديلة
اليسوى ما يسوى الرزيلة
جهنم الجنة الفضيلة
ولا ختر في بالن الحال الكدر
ولا علمن سيل الجبال
الشات مواريث القبيلة مع الحجر
لا حكمة البحر الكسر
ما ليهو مسلم لا الكفر
هبد الجوامع من طرف ...
غمر الزوايا مع الغمر
ما علمن .... ما علمن ...ما علمن
والألمك ما ألمن ... ما ألمن ... ما ألمن
ضد القوانين الهزيلة ...
مع القوانين العديلة
الما بتمرمط للبلاد ...
اللا بتنصف للبشر والضو زفر
أستغفر أتشهد تلا
في سرو سورة الزلزلة ... دون بسملة
قاوم عنا ... نفض عريريقي ...
دفر طاقيتو لا ورا وانحنى
شد الحبل بالطوف دنا
جم تمرة من دون التمر ما بتنطلع ...
طالت كدر يقن عفاها وسبلا
ساب الحديات تسكنا
بمبونة من كم وأربعين ...
وحيِّدا ما شالت جنا
من جابا جدو من المحس ...
من هي الصغيرة محاننا
يسقيها بالجوز ما فتر قدر البرجيها المطر
والليلي حظها طوفنا
شرق بحر ... غرب بحر
قبل شمال قبل جنوب ...
دنقر بحر ...صنقع بكى
بكى ما بكى
بكاهو حس الطائرات
بكاهو قدرتو تنتهي
بكاهو يرجى المعجزات
وبآخر نفس والحيل كمل
بي طوفو صد الدندهوب ...
وبين الضبابين والنمل
نام نومة الديك في الحبل
صحاهو أذان العصر ...
يا الضو مفوت كم وكت ؟
نقنق براهو تِحِتْ تِحِت
رقرق دموعو بقت تَحِت
صلاية من قرآن ... غنا
صل يا حمام قدامي أنا
غرقان لي في أنجاس لا هنا
ما شال مراحيضنا البحر ...
طفح زفارات كم سنة
مرحاتنا والكوش القدام
ماصن وكت ماص الهنا
بي إيه أغتسل وأتوضأ بي إيه ...
غير الصبر يا ربنا
بكاهو خلى البال نبل
قولة عقابك في الجبل
من زي دا بشرب يا جنا ؟
هونق دحيشو الضو بكى
بكى ما بكى
بكاهو رادي الدندهوب الغادي
وأم درمان تنوني :
"حبيبي آه ... وودادي وين وحبيبي أوب"
والباقي كلو مقابلات ...
والنشرة مافي ولا خبر
عن بلدو عن شدة عناهو عن البحر
عن سر نفي
ودلوقتي لندن ما بتبين ...
حالاً دحين زي حالو في؟
يا الضو قبل غيبة الشمس
قبل القعو ...قبل البعوض ...
قبل الدعت
والموية كل ما ليك تزيد ... والزاد نفد
قبل الحصار ... يا زول أخير تختا البلد
يا زول قعادك شن بفيد
شن حارسو شن خايف علي ...
اكتر من الطين الوقع في الطين شهيد
صرر التمر ... يا الضو أمش
عين الشمس ... يا الضو أمش
البرتكان والمنقة والنيم تنطقش ...
يا الضو أمش
الدندهوب ... يا الضو أمش
حدرنلو من قوز الرماد ... رمن الرمش قالنلو أمش
قبل الحصار ... يا الضو أمش
نبي الله نوح قالك تمش
من ضو تروح ... يا الضو أمش
يا زول قعادك شن بفيد ؟
شن حارسو؟ شن خايف علي؟
دكانك الغاية العرش ؟
دولابك؟ العفش الجديد ؟
توليتك البايركس ؟... إيه خايف علي ...
اكتر من الطين الوقع في الطين شهيد ؟
داك الفرش؟
والعدة في السحارة خت فوقا البرش
ومن ضو أمش
عارفين قليبك طبعو حار
وبيهمك الروح مو القرش ... لكن أمش
في الفيها ما عندك خيار غير ما تمش
إنسان معمر بالحياة
ما ترمي نفسك يا حمش ...
للتهلكة خلينا وأمش
شن حارسو ؟ شن خايف علي ...
اكتر من الطين الوقع في الطين شهيد؟
وملس دحيشو
الضو بكى
بكى ما بكى
بكاهو حس الطائرات
بكاهو قدرتو تنتهي
بكاهو يرجى المعجزات
بكاهو يقنع بالرحيل
بكاهو ما كان الشدر ...
ما الطير وما كان النخيل
بكاهو كيفن سد شبر...
من موية يصبح مستحيل
بكاهو يلغط في البحر ...
والغيرو يشرب سلسبيل
بكاهو البينضم في الغلط ...
يا قالو ملحد يا عميل
بكاهو آه .... ما هو الإله
يا دكة السلطة ودخانا وشملتا
في شرعك الإنسان يموت ...
كان زادت الموية ويموت من قلتا
كان سامحك في حقو سيدي العمدة هوي
تب ما بتسامحك بت أبوي في شملتا
يا مسمي محنتنا امتحان ...
مرات قدر ... حيناً غضب
ناكر جبيهتنا وصلاةً صلتا
يوم يمحق الصاح الختا
وين تمشي من غضب الغلابة
اللابكتلك نازلتها ولا شكتلك علتا ؟
لملم خرافاتك عليك
ما حرقت نظريتي ليك
بس روحنلا حقرتك سلتا
وبنجيبها ضربتنا وتصيب في حزتا
وفي حزتك يا بيتنا كب
ويا بيت أمير المؤمنين إت إتنكب ...
إت إتنكب
والضو شطب جيهة اليمين ...
حجاً إلى أن آمنين
وبين بي دمو البسملة
وبي خط خلاويهو المكعوج
والحرف واضح تخين
بي دم وطين
الضو كتب فوق باب أمير المؤمنين:
ما ضُر بيت أبي لهب
لو ظل بين المسلمين
لو جاء فينا ما ذهب
يا مؤمنين بغير دين
ومضى اسمو بين قوسين (غضب)
والمية أووووو... كاللظى
رمت الدهاليز والأوض ...
بس فضل الباب العظة
والضو ضحك ...
هوزز ضراعو طرح وشي
ساعة وداعو بقت طرب
غنى وضرب بي صوتو عِن ساعة العشي
بانت نويرات العرب ...
حزنانة غبشي مدعمشي
حس الصبار في الموية ...
والقعو والمعوز طراهو للديك العجوز
يا الضو يجوز ينجى ويجوز
الصبرة كمير كو كو
تنعشا عشاها من ضو
الصبرة حرامية وآشو
في حبال خازوقا إتلولو
لا ترمي دموعك شو شو
قاوم والمرة بتحلو
ترف استخبارتن أوو
صاج الدبابة الكررو
ضنب الطيارة الفي الجو
كم يبني بلادك يا الضو
كم يبني بلادك يا الضو
والضو بكى ... فورن وشي
من شوقا واللا من العذاب الفوقا
واللا من التعب غالبو المشي
وكل فردة جارها من بلد
يا الضو سلامتك جيت متين؟
سبتوها وحَّدا للدعت
سبتوها وحَّدا يا الخزين؟
سبتوها وحَّدا للبعوض؟ ...
للطير ودباي البحر ؟
لون الضبابين ؟الكلاب؟
الجندب ؟ الفار ؟ السعر؟
يا الضو بلدنا وودعت ؟
راحت شتول دوب فدعت ؟
فاتت بيوت ما ضاقت الزين والعديل...
ما اتمتعت؟
باعت سعايات إنسعت ؟
يا الضو تليسو بالقصاد ؟
وآخر المطاف شملة كنيشي إتوسعت ؟
حلتنا غرقت من طرف؟
حلتنا غرقت في شبر؟
غرقنا يا الضو صح سرف؟
العلمتنا العوم تقوم تغرق ...
هي ما تقدر تعوم ؟
يا للأسف عزَّ المصاب ...
البركة يا الضو في الرقاب
إلا الرقاب إنجهجهت
ما جاتا راحة من كُتُر ما إنجيهت
ما دام معلقة في التراب
صنت شويتين نهنهت
خايفاك يهقلك السراب ...
يا الضو يهقلنا السراب
يا الضو يهقلنا السراب
والضو صنم ما جاب جواب ...
لي ذاتو مستني الجواب
أمونة وين ؟؟؟ مع العوين في المدرسة
أُمك منصحي حالا زين؟؟ في المدرسة
خالتي الزلال ؟؟ في المدرسة
جدك حسين ؟؟ في المدرسة
السُكنة كيف ؟؟؟ في المدرسة
العيشي كيف ؟؟
تسعل سُعال ... يا الضو تقول تام لك سني
تسعل تقول ماك من هني
شن السعالات ينفعو
ما حال غلابة علي غلابة أتفرزعو
فتحولن الغبش القلوب قبل البيوت
قسمو القليلي مع بعض ...
كم طمنونا وشدعوا
لكن دوام الحال محال
وعلى العموم ...
ما مر يوم ما جاب هموم
هملي ونقاراً تسمعو
واحدين يقولولك خلاص ...
واحدين مصرين يرجعو
إنجيت بلدنا مطمنة ...
بس كيف يا خيي نأمنا
قبل البحر من ها الفِقر ...
فِقراً ضعفنا مسمنا
الفي العروق دا مو دمهم ...
دمك يا خيي ودمنا
النار تقيد في الكان سبب
يا الضو بيوتنا يوقعو؟
ونهجر بلدنا نزح هنا؟
الله يجازي الكان سبب ...
يا الضو بيتنا يوقعو؟
ونهجر بلدنا نزح هنا؟
كان سلطة تنسلط عليها ... كان لجانا تلجنا
وبي توب وكت نزحت حِرق
قشت وشيها من الأسى ...
ومسحت وشي الضو العرق
عصرت على طرف الطريق ...
عقدت سفنجتها بي دلق
وكل فردة كانت من بلد
وإنشافن الاتنين خضر
والليل ستر ... الليل سُتر
سرحت مع الخاطر بعيد عكس العرق
شيمة التهاويم شالتا
إحنا وقدرنا قدر قدر
نصبر صبر
نصبر على البوخ الغريب ...
نستحمل أصوات القعو
لامن نلاقي الهمبريب ..
والليل غناوى نولعو
يا يمة تفرحي من طرف ...
عاد والمسافرين يرجعوا
دا كأنو لا دمع إنزرف ...
لا خيوط قلوب إنقطعوا
لا شتلة لا محصول تلف ...
لا ناس بيوتن وقعَّو
بحراً بلا الخازوق زحف
نبنيلو قيف ما يطلعو
صدفتنا تبقى آخر الصدف ...
نمسك زمنا نطوعو
يختونا يمشو يودعو ...
فِقراً علينا اتربعو
ديل لا بيخافو من الحساب ..
لا بيختشو لا بيشبعو
حقاً تحرسو ولا بيجي ...
حقك تقاوي وتقلعو
أمسك شباطين الصراع ...
الما بتحصلو فلعو
ثبت لي بالك لا يلين ...
أنقح ترابك وأزرعو
عقبان أبو الإنسان حنين ...
ما شق حنكاً ضيعو
سرحت مع الخاطر بعيد ...
عكس العرق شيمة التهاويم شالتا
دقشت طرف قوز الرماد إنترتعت ...
كادن عيونا يوقعو
رجفت ... صحت بي حالتا
صدبا تيار البحر ...
كان أقوى من بالها النزف
وكان فرحة الناس الأسف
الهمبريب ... البوغ ... غنيوات القعو
صنت بنيتاً جنفي هيل بت السرف
جم كوم ولاداً يقطعو
فوق الفرج والبشتنة
الحالة ما دارت بحت ...
الحالة ظاهرة وبينة
السلطة عن غرق البلاد مسؤولة هي ...
وفوق عينها حقنا تدفعو
وبلدك حمايتها ممكنة ...
أصلو إحنا لازمنا إمتداد قبال بيوتنا يوقعو
كنا بنقولها وتلكنا ... حيكومة دايري تلجنا
تدينا مشروع نزرعو ...
كان وقفوا الحرب الحرام...
الـ الله ذاتو هو لاعنا
كان البلاد إنطامنت ...
كان ألف خزان إنبنى
يكفينا زلة ومسكنة
كانت زمان السرقة دس ...
الليلة عينك معلنة
وفرجاً قبيل بنشوفا عيب ...
عينك عيان ومقننة
وباسم الرصيف والما رصيف ...
كم بيت وصالون إنبنى
كانت شعاراتن وعود ...
صارت مجرد علقنة
وبين الدقون والدلقنة
كل التقول موساك تقوم تلقاهو رب الفرعنة
والجاي أعتى من اللي فات ...
الجاي أعتى من اللي فات
والضو تنى عض أصبعو ...
عضابو حس الطائرات
عضابو قدرتو تنتهي ...
عضابو يرجى المعجزات
عضابو صبرو وطول رجا
وي أبونا جا
وي يا القمرة أبونا جا
وجرو كالفراشات شفعو
جرو منو غادي وفلعو
أدو البحر ... أدو الحجار ...
ساعة الحضانقول يجدعوا
براق عيونن يشلعو ...
تالا القميرة يصنقعوا
يا طالع الشجرة ... جيب لي معاك خيمة
تستر من المطرة ... إن كبت الغيمة
جيبلك معاك قمحات ... قمحاتنا في الشيمة
وغنم الحلب رايحات ... ضلمنا ضليمة
يا طالع الشجرة جيبلك معاك خيمة
خيمة السعودية ... دفو ما بتدفيكا
لبن اليهودية ... بلدك ينسيكا
قمحاً من أمريكا ... خازوق ركب فيكا
غير خير بواديكا ... مافي اليكفيكا
يا طالع الشجرة ... من خيمتك التوبة
جيبلك فروع خضرا ... أو جافة يا دوبا
في الحرة في المطرة ...
في عز برد طوبة
نمرق من الوكرة ... وتبقالنا راكوبة
يا طالع الشجرة ... قبِّل على الحلة
قول ليها يوم بكرة ... كربتنا تنحلا
ننزل نضويكي ... ضرعاتنا مادِلة
قادرين نسويكي ... وعقابن على الله
يا طالع الشجرة ... طولنا يا والله ...
أنزل هيا ويلَّا
إندلا نندلا ... نندلا حلتنا ... حلتنا مادِلة
ما دام الأسف والجهجهات ما بينفعو
ثبت يقينك يا ولد... الناس مصيرن يرجعو
ما شال عزيمتنا الهوا ...
والبندق المربوط سوا
ما في أي ريح بتفرزعو
إنت وأنا ... نار السعف...
كان ولعت بيناتنا ما تستهونا
الجو شرارة تولعو
الزول بحن ... حن يا ولد ...
حناً يقدمك أتبعو
وتش عينو دجال الضلال ...
قبال يمدلك أصبعو
حن يا ولد ... حن يا ولد ...
حن يا ولد والضو يقالد من طرف ...
ناس البلد قبال يقالدو ويدمعو
دمع السواد الإنزرف ...
لو الدموع بيرجعو
في عمة ... في بت ... في ولد
شمَّ البلد
ناضم قبيلتو ووانسا
هبهب دموعو ويبسا
نقناق حبيبين القسا
طراهو حس الطائرات ... والضو نسى
قوز الرماد والفيهو فوق قوز الأسى
الفي المدرسة
شفنا أي شيء وما شفنا شيء
معزاتنا كدن للحصى ... شفعنا بيتو للقوى
وجع البطون ... درن العيون ... الهلوسة
موية الغنم والدود ... وموية الناس سوا
الأدبخانات الخلا ...
الله يجازي الكان سبب ...
ما نلقى عافيي ولا دوا ؟
ما نلقى غير النسنسة ؟
وكاويق كلام شالو الهوا ؟
حال ... ماها حال
حال ... ماها حال
وقعتنا تبقى على الجبال
غلو البضاعة ... العندو سلعي عرفلها
غلو القمح .... غلو اللحم ...
غلو الخدار ... غلو الملح ...
دسو اللبن ... دسو العدس ... والصلصة
دسو الأسبرين ... دسو المعايش كلها
حاكومة وين ؟ واللجنة وين ؟
في.. عديلة راكبة محلها
اللجنة حليتها ...
المصيبة الجامدة شن بيحلها
حال ... ماها حال
وقعتنا تبقى على العدو ...
حالتنا تبقى على الجبال
قدر الله يا بت الحلال وغلا البضائع قلها
لا يا العشى
قدر الرجال اللا بتخاف الله وتتوب...
لا بتختشي
وأنا لجنة غرقت البلد...
أرجع وأجيك بي يات وشي
غلا البضاعة ... الفي إيدو مفتاح البضاعة
الأرزقي المايص عرقنا ومنحشي
وما ضرَّانا غير أبان دقون...
فيها الضلالة معشيشي
وفِقراً في تغش الله ...
وتخش بيتو وتسرقو ورا العشي
كر من ضمير ناس هان قدر ...
تجلب بلادها وترتشي
وكر من عوارض يا بلد ...
الناس تشوف ومدعمشي
تسمع سماع ومطنشي
حاكمانا في شنو ؟ وشان شنو؟
حيكومة ما خابرالنا شيء
حس أمها المهرية هم ... يجيء من بعيد
يا أمونة بتي شن الشكي ؟
جاييك ملكلك من تحت ...
يا أمونة تاني تلكلكي؟
ما حاشو بالطين الرخس ...
إنحاش في أرض مكركي
حرمان عليك تقولي "لا" ...
مجبورة يا خادم الفكي ...
مجبورة إنتي على الصلاة
لا تأذي جرحو تحكحكي
وجاييك ملكلك من تحت ...
يا أمونة تاني تلكلكي؟
شيلي الحرف داك رشرشي
قوم يا عشاي ... قوم للعشي
قوم وإنتكي ... قام وإنتكى
ويلقا الحسن في صفحتو وقدام وشي
إنجيت بلدنا انكسرت ؟؟ أي آلحسن
كسرا البحر ؟؟ أي آلحسن
يابا البحر دا بحر بلدنا؟؟ أي آلحسن
الزول بيكسر بلدو كيف ؟؟ والضو سكت
طقطق أصابع ولدو ..
فس إنقلس .. فس إنقلس
يابا الجوامع إندمرت ؟ صاح
والجوامع إنكسرن ؟ أي آلحسن
يابا الجوامع هيل منو ؟ هيل الله نوم
حتى المدارس حقتو ؟
لالا... المدارس حقت الحيكومة ... نوم
هو الزول يكسر حقو كيف ؟؟
والضو يطلوحبو إندهاش ...
ما يلقى قيف لا بانلو بر
وأمونة صوتها من البعيد ...
نوم يا قشر
صح يابا في الجامع في تمساح إنبطح؟
أي آلحسن
يابا التماسيح مسلمين ؟؟ لا مجرمين ...
لابسين دقون شايلين سبح
ما تضربوه بالسلاح وتكتلوهم تاح ترح
والضو سرح ... والضو سرح
وأمونة من البعييد حلقا إنجرح
نوم يا قشر ...
نوم قبال أجيك
يابا البحر دا ولد منو ؟؟؟ ود المطر
ويابا المطر ؟؟ بت السحاب
ويابا السحاب ؟؟ خير للبشر
ويابا البشر ؟؟ هول ربنا
وأمونة تجري من البعيد ...
يقطع كلامو وتنحسو
تجبد أضانو وتقرصو
لا تقلدو...
جيب القشر دا علي رفاقتو نرقدو
أمونة هزتا تمغسو
أنا داير أنوم في صدر أبوي ...
شان البحر
قام وإنحشر في صدر أبوهو وحدثو
في مرة جونا رجال كبار ... كبار
غمتولي في إيدي قروش كتار ... كتار
أمون شالتا فنتا
الراجل أب دقناً كبير ... سبالها دنقر لقطا
وأنا قم بكيت
أمونة فكت صرتا ...
وأدتني صندوق بسكويت
وأنا قم سكت أمونة قامت شوووو ... بكت
وتلفح نعلا وتفلعو ... نوم يا قشر
نوم قبال أجيك
أنا داير أنوم في صدر أبوي ...
شان البحر
وقام إنحشر في صدر أبو
ونام الحسن في آخر المسا
وصنت عيون النوم يجيها بعد تعب
سرسار وداخل المدرسة
والضو غمد ... والضو غمد
صحى بي صياح الأمهات ...
وأطفالها منطلقين بكى
كل فردة تبكي على بلد
بكاها حس الطائرات
والضو ضحك لما البنات ...
قالنلو فنها بي حجر
يا الضو تطقها بي حجر ...
في الجو ترميلنا الخيام
يا قطرة التراكوما ...
يا سكر دقيق ومعلبات
ومنام منام جاتو البلد ...
تعتب جراحها مسببات
لون القمح ... طعم التمر ...
ريحة الطلح ... ضل الرواكيب القدام
البرتكان والمنقة والليمون ...
يجوهو منام منام
طوريتو في إطن الكونشبر ...
مركوزة تالا السام... تجيهو منام منام
المشرع البنطون معدي ...
ودوشة العمال ... تجيهو منام منام
الروضة والأطفال بنات الإبتدائي العام ...
يجيهو منام منام
الشارع الوسطاني والزاوية
السلام والناس ... يجيهو منام منام
الصفقة والطنبور وفرخا عام ....
يجيهو منام منام
الناس تقاوم في البحر
مريوقة متماسكين تمام
في القيف يجوهو منام منام
الأرزقي ... أرباب البنوك ...
شلة حرامية الضلام
الملس السادة الكرام ...
لافين عليهم زي غفر ...قاشرين
يجوهو طمام طمام
السوق غلاها ... الشفع الأيتام
يجوهو ديوش ديوش ... وبلا قروش
اللجنة تجار الرصيف ... المسخرة الهدام
يجوهو كروش كروش ... والضو يدوش
أصبح صباحك يا بلد
واللا العفاريت أصبحت
يصبح صباحك يا البلد
تبرد جراحك يا بلد
والضو يعافر في الجبل
مروبو سابع يوم ولاد ...
يا الضو حمارتك طفحت
أمس الكلاب بعجنها
كلبة مديني وديكا عيك ...
ودحشك معاهو دحيش غريب
خلينا فوق قوز الرماد
أدينا عيش وصبيط تمر ... يبقالو زاد
أسبوع يعيش ... كان الله أراد
أنا بكرة صاد ... كان الله أراد
والضو خنس ... قنب حكا
حكى للولاد قصة تساب كم وأربعين
حكى بي مغس ....
كيف جدو فات الدنيا فاكر الإنجليز ...
ضربو البحر بالطائرات ...
شان يشرق المشروع يموت
والأمة تنشتت شتات
قال وإنتكى
الإنجليز أزنابها في ...
وكم وأربعين موياتو جات
والضو بكى
بكى ما بكى
بكاهو حس الطائرات
بكاهو قدرتو تنتهي
بكاهو يرجى المعجزات
بكاهو يرجى المعجزات
بكاهو يرجى المعجزات
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
النخلة
النخلة في الليل المهول ...
وحيدا في عز الرياح
فارس يدارق في الرماح ...
الجايا من كل إتجاه
رغم الجراح ...شح المي ...
الزاد والسلاح
راكز يصول ...لا أنَّ لا حنى للجباه
لا خان بصيرتو الإنتباه
لا حتى قال ديل المغول ... لا خت آه
على عز قديم ... روح عجول
طول مداميك الصبر ...سدابا طاقات النباح
كل ما نزف من جوفو دم ...
كل ما عزف لحنو الصباح
نجم الميامين الحمش
ينضارى شان تشرق شمس
تدي الحياة... الناس ... الحقول
الدابة ... والطير ... والبمش
لكنو ما بخبر أفول ...
والأرض مخلاية التعب
مصلاية العشق الصعب ...ما بتستباح
زي نخلة ... في الليل المهول
كانت بتختبر الفصول
كانت بتمتحن الرياح ... كل ما تطول
والدنيا خوف ... عابر سبيل
يشوف عنف الرياح في النخلة ...
واللا النخلة في عنف الرياح ...
في ليل مهول
طوالي راح يحلف يقول
النخلة ما بترجى الصباح
والطيب الصابر سنين
راجيها باكر ... حقو راح
لا فك دين ... لا سد جوف
رزقو المعلق في الصبيط ...
مشهادو أصبح بين بين
النخلة ما بترجى الصباح
لكن ضراعا في البلد ....
عارف عروق النخلة وين
خابر صمودا المن متين
وسامع مناتقة الرياح ... ساكت صياح
لكن ضراعا في البلد ....
عارف عروق النخلة وين
ضامن ثبات ساقا الهطيط
وسامع مناتقة الرياح ... ساكت صياح
النخلة ما بتقدر تخون الأرض ...
ما بتقدر تكون غير المراح
لي همبريب يغشى البيوت ... عند الصباح
نص النهار ... عند المغيب ... عز الرياح
النخلة تتجاسر تصون عش الطيور
البينا ...تفرد للجناح ...
ما ليها غير تطرح تمور
تملأ الشواويل ... القفاف
ينتم زين ... ينحل دين
يطلق ضهر زولا بسيط
واقف على حد الكفاف
ومن ركة الرزق المتاح
رزقو المعلق في الصبيط
ينزل كما الطير الخفاف ...يقدل نشيط
يخضر زي شتل الضفاف ...
كل ما النشاف بدأ في الصبيط
والنخلة لو عنف الرياح ... الصاقعة
أهوال الفصول ... آفة الذبول ...
قدرت على ساقا الهطيط ... تقع
آ بتموت .......
تلقاها خشت في الببيوت ... بي كل صراح
تبروقة ...سجاجة طهورة ..
طبق من العرجون ... ضنيب هبابة ..
قفة وكسكسيكة ... حبل متين
فتلوهو في ضل الدليب
نشلوبو من بير للشراب
نسجوبو بنبر وعنقريب
تلقاها خشت في الببيوت ... بي كل صراح
حويبل جريد ... يعرش سقف بيتا جديد
أول دخلتو عريس سعيد
مبسوط يقرقر بإنشراح
أو حتى واقودا تقيدو السمحة ...
في نار بارتياح
لي يوم عزيز... يطلع خبيز
نبيذ الليل صفاح
يطلع ملاح ... بروبو ناساتا ضيوف
ولي زول وراهو شغل بعيد ...
جابرا الظروف
يطلع قهيوتو وشاي صباح ...
وآخر المطاف
الموت بيلفح بسمة من توب الزفاف
الموت بشرق نسمة في كل الصبا
النخلة ترباية العباد ...
بي جلالا تنحول رماد
ورمادا ينحول سماد
وسمادا يدخل كم بلاد
وديانا تخضر والبطاح
شوف كيف كفاح النخلة ...
شوف كيفن بتتحدى الرياح
تصبر على مر الحياة ....
وتنمطق الموت بي جلد
من بعد ما ملت البلد ..شتلا معمر بالألوف
وشايل مخلف بارتياح
طول المصير ... النخلة حوتة الصحرا..
نوارة الجروف
تلقاها في أجمل وشاح
بي جراحا رجتنا الصباح ...
يا القلتو ما بترجى الصباح
النخلة تحت الأرض سر ...
والنخلة فوق نخلة نصاح
والدنيا أوسع ما تكون ... والجو براح
وكل الرياح فوقا بتمر ...
يكفيها دا ... ويكفيها صاح
ما استسلمت لي ريح غريب
وكل الرياح فوق بتمر ...
والنخلة ما بتعرف خلاف ريح اللقاح
والهمبريب ريح الصلاح
يا معوض الليل بالصباح
يا معود النار اللهب ...
روض نخلنا على الرياح
وفي لجة البحر الغريب ...
أدي الرواويس الصلاح
يكفيها دا ... يكفيها صاح
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
تفاصيل ما حدث
سكتَّ
نَضَمْ غُناي .. ورَّاكْ ..
بَدابِكْ باتّكالي عليك
خَتَمْ بِكْ .. بي هروبي إليكْ
وكيف طفَّرتَ صقر الآفة ..
ما يلفحْ .. جناياً ليكْ
ولا يدخل مجال عُشّاً ..
نسجتي حنانو فوق إيديك
وكيف كُوترتَ ريح الآهة ..
ما يَقْرَب فرح عينيكْ
وراء جبل الصبُر .. فضّيتو
والمطر الحِرِد .. رضّيتو
سُقتو علي البلد ورّيتو ..
ما لّمابا ..
لّما بياّ ..
لّما بيكْ
...
...
هادي الحُفرة .. كانت بير ..
وكان منكابي فوقا حَرازْ
وتحتو الصخرة كانت حوض ..
وكانت للقبيلي ملاذْ
كانت مُلتقي العِربانْ ..
وكانت مُتكا الحِبّانْ
مركز دورة الإنسانْ
مِنّها هبّة الفرسانْ ..
وعندها ربَّة العرسانْ
وكم شِهدت غَرام وغَرامْ
وحِفْضَتْ كم كلام وكلامْ
تعكّر حين خصام وملامْ
تروِّق حين وئام وسلامْ
ترِاشقْ أعين الأطفالْ ..
تراهِقْ للعصافير يوتْ
ترشرِشْ لي تياب بنّوتْ
جِنّها من أعزّ بيوت
لا رَفعتْ عليهن سوط ..
ولا رَفعن عليها الصّوتْ
حين تملا القِرَبْ ..
تِنْمَنّي ..
تدّها صَنّة …
حتي تفوتْ
تسوِّي الصّجْ ..
تَلِمْ الطّورْ
مديح الحجْ ..
غُنا الطّنبورْ
تضيق / تحتجْ / .. تقيف طابورْ
هنا الشُّفع .. يمينَك دورْ
هنا المارشات .. هنا الدّستورْ
هنا اللِّبيشْ
(قريش يا قريش...
حبابو قريش....
نزل ملك الحبش والدّيش)
تدور ….. وتدورْ
قواها …. تخورْ
تلم أنفاسا زي عصفور
وتِنَفّضْ … تمش بالدور
بشيش وبشيش ..
تشاقِقْ بين تقانتْ العيشْ
وبرسيماً .. سمِح مفروضْ
وما تهبش دوابا قِشيشْ
بِنّيات الغُبُش شقّيشْ ؟
تودّي .. تجيب .. مع الدُوبيتْ
تِنْذَكّرْ خِدِمْة البيت ..
مشي الواقود .. في كل عِصيرْ
لُقا المريود .. بدور بِدّيرْ
من اللخّير .. تخاف وتخاف ..
تُخب السّير
عشان في كلام وراهو كتير
عشان باكر، تعود وبخير
(عويش في عويش ..
بنالو عشيش ..
حِديْ وجناهو ربّى الرِّيشْ
جناحو هبيش ..
تمِّلي ينيشْ ..
طفش قُمرِينا طار شقّيشْ)
***
مطر
يا
خير .....
وراء طرف الُحقاب كان روض ..
وكان بيناتو خاوي غديرْ
وكل الصحرا كانت غابة ….
بي شِدرا الكتير وغزيرْ
صباح وهجير ..
يهبهب … ناز
حلاته !!! وفرفرات الطير ….
وكت يغشاها – مرة – رذاذْ
قطيع غزلان ..
نعام وأسود ..
سعية الله تخوجل في مراعي السود
بلود وبلود،، دليبن رازْ
مَتَرْ، مد البصر جنّات خُدر،
ربَّاها تور الساقي ...
حِرقتْ
حين جاء بابور جازْ
(دغيش في دغيش حصدنا العيش..
طلعنا مطالبين الخيش)
والبتشوفو من أطلال ..
دي كانت ذات وطن حَلاّلْ
بيوت ناساً كُرام وعُزاز ..
سوا سوا في رخا وأملاق
منطقوا لوعة الإخفاق ..
قدر ما ظنّوا في الجايين –
.. تمطّقو روعة الإنجازْ
(حويش في حويش ..
سكنّا الدّيشْ ..
أوضنا بقت نقاط تفتيشْ)!!!
هادي المملكة المحروقة ..
كانت جيهة
وكنا نجيها
مستشفانا .. كم كفانا ..
منو نطيب
ويتوفانا
كانت نادي …
كانت ورشة ....
بوسطة ألّتنا ...
كانت مدرسة وقبلتنا
لي حِلّتنا كانت سُوقا
لا وقعت صواقع فوقا
لا غضب الله شلّ عروقا
ما من حرب قامت فيها ..
لا سقطن قنابل وغازْ
(كريش في كريش ..
سعِرْ درويش،
دوانا، علمنا باتْ مافيش)!!!
كُنا وكُنّا .. ياما عُزازْ
ولحظات التّلاقي لذاذْ
هِلِكْنا وكِتْ وِكِرْ تورنا ..
ودهتنا بصيرة الانقاذْ
هوّيتنا إتلغتْ فينا .. بقينا اعجازْ
زمن خاوي
وحقيقتو مجازْ
(بشيش، بشيش
غلبنا نعيش،
قبض والي البلد بقشيش)!!!
في الزّول الخَرَبْ لي بيتو
غالطني المطر …. هَدّيتو
لاواني الفراغ …. لاويتو
وكان أقوي الفراغ ما لاي
شَهّدتَ البرق .. مَضّيتو
نشّن قوز قُزحْ .. تالاي
اندرقتّ باللاّشئ ..
وبالمافي اتحويت في قفاي
وقعتَ وراي .. رفعني يقين ..
وقَفَ فوق راي
بأنو الحال مغّير زين ..
مغيرّ كان قِصِرْ كان طالْ
وإنو الأرضِ للكادحين …
ومفتاح الحياة العُمّالْ
رَكَزْتَ علي غناوي الفالْ ..
لساني سَنين .. وحاضر بالْ
فنّا لي التعب .. موّالْ
شهرت علي المناحة غُناي
فزع صبر الغلابة معاي
وكِتْ ناديتو
كيد الكايدين ردّيتو
خاواني المطر .. خاويتو
وفوق ضهر الهوا .. الشدّيتو
سُقتو من الخراب .. ودّيتو
لي تالا العَمار وانصاب
فما كان العَمار قدامو..
غير قَلَبَاتْ حلمنا الخابْ
وصنّ يباب .. رهاب ورهاب
شال نفسو المطر ..
ختّاهو زي ممكونْ
خَنَسْ ..
لحظة خنس قُتْ مات ..
رفس ..
تَوّر بخاراً باظْ
رطن بي كل لُغات الكون ..
وبوّخ ..
دوّخ الألفاظْ
كيفن كان .. وكيف حا يكون ..
تافقني الغُلُب حين قالْ :
(هرطتو ونمتو .. قمتو أعجاز
إنورطتو
يوم فرطتو في ماريل بنية ألماظْ
ترباة عِزّها التاريخ ..
ضُراع الكُدّح الأفذاذ
حبيبة جملة الشهداء ..
الصّح الإعجاز)
قال قولو المطر ..
وانعدي فوقي بخار
ركضـ……ـت وراهو حتي النّارْ
وانـ ترتعـ ت بين التّار ..
و .. بين الشارع الما ثَارْ
وسدّ قصاد عيوني شِعارْ
رافعاتنو في إصرارْ ..
نقابات الهوى الأشجارْ
بنات الواطة والأنهار
خيوط العنكبوت ..
وحمامة خَبّو الصاحبين في الغار ..
رافعاتنو حتي الشوق
وقع من فوق …
وجاهِن تار
صرخت فركت للأشجار
في الأنهار نفخت النار
بالهواء .. يا جماعة الغار ..
أعصروا علي بعض
ساريتنا لا تنهار
نشد الحيل ..
نعد الخيل ..
نسن الصارم البَتّارْ
وكلها كمّها الربّاطة ..
بي لُقاطا
وإحنا كتارْ ؟؟
صفاً واحداً كالنيل .. وقلباً حارْ
نضاري الواطة بالضرعات ..
من الزمن الكركي الضّارْ
وهاكُن شتِّتُونِي بِذارْ
صرخت .. صرخت .. حتي النار
كشحت علي الطناش مسدار
أجابني الصّي ..
وأبو التي تي ..
كلاب رمل الهجير الحارْ
وبديت أحتارْ
أنا نمل المهل قد ضاق ؟؟..
أم أرضة وجرّبت حُجّارْ
بديت أحتار..
وقام فيني الجرح تاوارْ
رجـ فـ ـت
نزفـ… ـت ..
صادني .. دوار
قضفتَ ….. حشاي ..
جرت بطني .. وقعت جنازْ
تحت صوت الصّنين الرّازْ
بقيت بين الأرض والغيم ..
والدّم الجمد والغازْ
مطفِّح زي هُتاف مهزوم ..
مطلوح طوف نجاتو الضيم
جبِدت جنازتي للحجرة .. وقدتها نارْ
لمحت وراء دخانا غُبَارْ
خيول كاكية تنخابت ..
يكون من تاني دفتر دارْ ؟؟!!
طريت تاريخي في لحظة ..
ونسيت ما طريت ..
وفي طيف بيت دُمي وأصنامْ
تكلت جبيني تالا السّامْ
جَعَرْتَ شديد، وبين أخرامْ
حشرتَ الفاتو والقدام
لويت آهاتي عِمّة عيد،
شتمني حجر وطيتو قصيدْ
رجمني فتر، تواري بعيدْ
ظهر لي كجر، لقاني شهيدْ
تياب الواقع المسروق،،
يطلبج لا غِرِق لا عامْ
الليل يا تباب الشوق،،
علي تقروقة الأنغامْ
نهار العاشق المحروق
علي دلجة شتا الأيامْ
هرست مراية الأحلامْ
وبي ساسويي …
فكيت راسي من قدامْ
لقيتو ضلامْ
لقيت ذاكرتي معضوبة
ومعضّي كلامْ
مفوِّتةِ في انفلاتة سلامْ
خواخي الكتمة غاماها
صدي الأيام معمَاها
خطوط النسمة مشطوبة
ومدارا …. حُطامْ
خُفْتَ من الفصام .. قوّامْ
قفلت دماغي واستلقيت علي طوبة
ورجالة غفيتْ
نجيت من سُهْدِ كمّين عامْ
بي أعجوبة ..؟؟
غشاني منامْ
في أول دفرة في الأحلام
حلمت .. جمعت في راس خيتْ
حلمت .. حلمت إني صحيتْ
حلمت صحيتْ
(وطن منضوم
بلا حظر وطواريء أحوم)
أتَكْرِنْ بالخير لفّيت ..
شوارع المدهشة الخرطوم
نطحت من الفرح للطابية .. طِرْتَ
دمــ ……ـوم
وَفِتْ .. فتّحتَ وانشلوحتَ ..
عِن جفلة حمار النوم
.. علي الحصحاصْ
شهق بي احساسْ
حماس من كل جيهة حماس
وما من راس ….. فجيعة الناس
بكيت وبكيت
نخجت براي ..
بكاي قَلَب الغضب تبكيت
إتلفت غادي … وجيت
تبنت أساي
في الوضع الحطب لا فاس ….
معاي لا قشة من كبريت !!!
ولا من يرفع الأنقاض
يثبت بي لمينة القدرة
مرق البيت …
تفاديت الصنين الفاض
ِوِكر في دوشة الديناميت
نتقت خطاي .. تجاهي جريت
جريت .. وجريت
جريت قدام
رجعت أمام
لقيت ساقيني دون أقدام
بـ
ر
كـ
ت
حبيت
وفي حجرة غناي الغاض
وِحِلتَ في أريت
جبدت إيديني في إصرار
تجيني كُدر بلا كفين
اتحسست للمافي …
شكيِّت إني حي ؟.. ما حي ؟؟
شكيت إني جيت ما جيت ؟؟؟
وكيف ؟؟ ومتين ؟؟
وداقس وين ؟؟
رقص وسواسي واللاواز
علي النيل التمطي جناز
رقص في سخف … باستفزاز
رقص
بالسونكي
والسكين
وسوط الدين !!!
صرخت .. معاذ
ندهت .. معاذ
معاذك يا وطن ..
يا فاز ..
جناك منك .. عليك وملاذ
خطاوي الكفت إيدا جواز
مكثت صراع ترابلة وطين
أقاوم في الغبينة سنين
ولا قدميني
لا الكفين
ومقطوع راس
لا نوبة
وزنوج
وحجاز
لا بجة
لا كتر طيبين
ولا عكازي
لا حجاز
ولا زال المطر في سماهو
في طور الدعاش ورذاذ ؟؟؟؟؟
قرطت عمر غنايا
لقيتو …
باقي فِرِد وتر مشدود
ضحكت حزين
أنا الفاتح سد الجايين ؟
أم المسدود بفتح مبين ؟؟
شفقت علي الشدر في حين
عرق فالوا اطمئن .. تحين
تباشير الصباح ويبين
بعد ما نموت ؟؟
بعد ما يشيخ ؟؟
أبيت
حتمية التاريخ
أبيت حتمية التاريخ
بلا عرقاً يخضر ودم
وأنا الباغتني ريح الغم ..
وأبيت انغم
وصادني الجراح والجم ..
وأبيت إنجم
ما بضعت ..
لا ساومت فيك مين كان
تعبت
من المطر
خليتو
ما بين البيوت والطين ..
وما بين التضوي قزاز
يرابي ويربي ينجاز ؟؟
ولي يات جيهة يبقي حبيب ؟؟
وضد يات جيهة يطغي حزاز
غرست أنفاسي في الزيفة ..
الخريفا يجيك
مطعم بي لهج شفتيك
خمشت من الدعاش لونو
وهرعت إليك
لقيت كبد البلد مكشور ..
وقافلة عينيك
دخلتك بي مسام الرعشة ..
من فرقات أصابع إيديك
مرق بك .. وفت بك .. تالاك ..
مضبلن
والمطر ….. جا ……. عليك
أتيرب في أوج العينة ..
تربال التوحدو فيك
إرادة وقدرة الإنسان
وقت يبقي إنبعاثو وشيك
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
بين الموجة والخزان حلم إنسان
هردت لهاتي بالغنوات …
وقت يبرد حشاك يا أمي
ومن التعب البلا صالح ..
تفيقي .. تروقي …تنجمي
تسوي مكانسك المطرة ..
تضوي البيت وتنحمي
تمرقي صبوحة للجيران ..
قدح فوق إيد وفي إيدي المي
يلاقوك شفع الكتاب
نضاف وظراف بلا النسمي
ويغنولك …
يغنولك غناوي الساب
وفي بيوضة ما في سراب
جبال كجبي وفيافي الكاب …
تميد بالخضرة منقسمي
ولاها غبار .. ولا هو سحاب ..
وتنهجمي .. من الدهشة
وتحاحيهن …
غناكن نيي ..
غنا الوهمي
ويهتفوا زي كلاب الحي ..
علي الأغراب
حوافي الصي وبيوضة
البراسيم فيها مفروضة
خدارا يراري شوف عيني
علي الأبواب
قماريها
وحواريها
وطواريها
بقت روضة ..
بقت تشرب من الحاماداب
تشربي عافي من إيدي …
تدوي اليوية بي حشمي
تسوي السي .. وتبتسمي
تشوفي رهاب بعد نجمي
وأشوفو قريب قرب نضمي
أشوف العالم التحتاني ..
هيلا هوب وقف ناهض
ودك عمايد الفوقاني …
جوه الجب رمي العارض
وفي السابو الدمار أفراق
عريق الحب نبض قابض
متل قبض الحروف في اسمي
غناوينا القبيل رقراق
علينا تصب برد قارض
ألُك طيناتا من دمي ..
وأرمِّلا من عصب عشاق ..
أنط تلب وأجيك عارض
وأجر نمي
أدودي لهاتي بالغنوات …
عقب يبرد حشاك يا امي
تسوي السي وتبتسمي
تسمي الشعب وتعتصمي
بحبل الشعب تتفرق
ظلمة فيها تتحرق ..
صرمة قالوا ليك قسمي
أدودي لهاتي بالغنوات
عقب يبرد حشاك يا أمي
تقلبي الكلمة بالكلمي
ضراعك يرمي ما بدمي
تقيفي بعيد عن الشمات
تكوني أقرب لي من اسمي
وأضمك بارتياح يا امي
أحبك صاح
وصاح حلمي
ولاكي سعية للضباح
ولا شمس الصباح حزمي
ولا كتف السلاح سواح
ولا نزف الجرح ألمي
هيا اتحزمي ..
هيا اتخلفي ..
هيا انعتقي ..
متين مو دايرة ري تسقي
ولا في إيد النزيف نبقي …
ولا في ايد الخريف نبقي …
ولا الفيضان يبضع بك …
ولا في القيفة تنهدمي
ولا ان جات حارة تنزمي
ولا يغشي الغلب قلبك ولا تشقي
ولا إنت تخافي ولا تدمي
ضراعك يرمي ما يدمي
فيا حزن البلد عوك كر
ويا سعد الولد
ضر ضر …
مع النسمي
ولي .. وقيمة العمل عمي ..
وافتحي ظلمتك للضي
سني علي النضال ايدي
سوكي بالهتاف فمي
شوارعك لي ..
دويها علي ..
إذا ما أخر العلاج الكي ..
مراويدك حمر صمي
مراويدك حمر يا أمي
بليلتي … ولا ضبايح طي ؟؟؟
قليلتي … ولا كُتر سمي ؟؟؟
وطني … ولا ملي بطني !!!
سكاتي … ولا الكلام الني !!!
سلام يا أمي …
سلام يا أمي …
سلام لا هكمي ولا دكمي
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
حق الغنا
من حقي أغني لشعبي ...
من حق الشعب عليا
لا بإيدك تمنع قلبي ...
لا قلبي كمان بإيديا
علمني أغني الطين ...
المخرطة ... والطورية
الناس الصابرة سنين ...
بالحال الما دغرية
القابضة الجمرة في إيدا ...
والجمرة تلهلب حية
لا قادرة الجمرة تقيد ...
لا قادرة تولـع هي
يا قلبي بلاش تستعجل ...
يا قلبي شوية ... شوية
علمني الشوق نترجل ...
نستحمل وجع الجية
واصلين الما بتأجل ...
اليوم الشمسو قوية
لا القش بيهاب المنجل ...
لا الطية ... النار ... الكية
يا صقر الآه يا ريح ...
لا تنفض عش قمرية
من حقو يغني صريح ...
ذرية ورا ذرية
من حقي أغني العالم ...
إبداع وعلم حرية
إنساني شعوب تنسالم ...
تنسالم بي حنية
على نخب الود نتنادم
لا جنس ولا لونية
لا عرق لا آه نتقادم ...
سكتنا بياض النية
مش كلنا جينا من آدم ...
مش آدم أبو البشرية
السجن إذا يترايم ....
نبنيها قلاع ثورية
عقبال الخير يترايم ...
والدنيا تمش دغرية
مد كفك يا بني آدم ...
حرية .. سلام .. حرية
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
ست الدار
بسم الحاضر والمستقبل
ست الدار بت أحمد تكتب :
ليك يا الزين ود حامد شوقنا
أما بعد
المبعوت المنك وصلت
ورح فكيت الطلب الفوقنا
باقي الدين يا الزين خلصتو
وقدر الفاضل مصروف راشد والتومات
والجايات من جاي لا جاي
وزي ما قتلك قبال دا ...
شهر اتنين حا نطهر راشد
شهر اتنين المدرسة تأجز
وراشد حالف ما يطهر ...
إلا أبوه وعمتو تحضر
وقنا نجيب المداحين طنطن راشد:
يا اخي أنا جاي من الحج ؟
قلنا يجيبوا الغنايين ...
شان الشول بت سرنا ترقص
وعارف راشد لما يطنطن ..
كل الدنيا الفيني تطنطن
جنس بشر بس ربو يهون ربو يهون
ما كلمتك بالتومات ...
أول البارح جني يرطنن
قالن : أنحنا الخواجات ...بسم الله مرق
حصلت لقيتلك جعفر زارد البيت بالخواجات
يبقو حداشر وخواجية
ستة خرفن وتيس إنصفن
ستة خرفن وتيس ما كفن
ستة خرفن في فد يوم ؟!
المعدوم أشكال وألون
أي خدار في اليوم داك في
كملن رف كمين دكان
أول كفوا الخواجات ...بعدو العمدة
صمد الساقية ناس المجلس والمشروع
بعدو الطلبة وباقي الناس
حتى الشفع والحروم
ست خرفن وتيس غنصفن
ستة خرفن في فد يوم
جات من صالح بت كلتوم
تطبخ تخبز طول اليوم
لامن حرقت الدولاب
وقنبت المسكيني تدعي :
الله يصرف الخواجات
غاية الليلة السقا يشولق
واطة الله دي ست رشاها
ما في غنوة ما غناها ...
ما في مدحة ما سواها
حمارو صبح لحق أمات طه
سب الدين والأمريكان ...جنس بدع
زولك دا يحير ...
عند الجد كان أدى ينقنق
عند الفارغة يشيل ويبعزق
وإتذكرت كلامك لي
إنو في ناس لاعبين بالدين
وناس لاعبابا الأمريكان
الله يصرف الصرفيكان
ما خلوني نشدتك منك
كيف حالك والخرطوم
كيف المصنع والعمال
حالم لسع نفس الحال ؟
وما رقوك سووك باشكاتب
يورينا الله زيادة الراتب
كيف الناس والحالة عموم
والعذابة الكحيانيين
سيد البيت عل ما زكاكم
لسع تقعوا تقوموا براكم
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شجير الجوف محروق
راجي مطيرة الزين ود حامد
إحنا نصاحا زي واطاتنا
إحنا نصاح إلا القراص
والحاصل البحصل كل صباح
شتلاتك قبضن ....
الحملان كبرن بالحيل
العضمين الروكة انزرعن
أوعك تشفق من تالانا
ولا نبقالك مشغولية
زيك واحد ... واحد زيك
مضغوطين وما ناسيين المسئولية
هي يا الزين زغرد ...
ما قتلك ... بت أم زين جابتلها بت
ستة ولاد حتان البت
المحجوب ينشد من خبرك
شافعو محصب من يومين
التومات طيبات ونصاح
إلا غباش بالحيل آ الزين
راشد كرر شهر اتنين..
لو ما جيت ...أنا ما بطهر
الله يبعد العارضي تعال
كان يدوك فد دور إن شاء الله تعال
كان بالخصم إن شاء الله تعال
وما تتوصى وداعة الله ... وداعة الله
أوعة البشغل ... والعربات
والحيكومة الدمها فاير
أم أولادك بت أحمد جابر
ست الدار بت أحمد كيفك
جاني جوابك مفتوح شارع
جاني جوابك وأنا بتصور
في ناس راشد والتومات
في الشتلات والحالة عموم
ناس حلتنا التحت الفوق
الليهم الله وعيشة السوق
جاني جوابك وانا بتذكر ...
في المشروع وعمايل جعفر
لما بكيت يا ست الدار
أيوة بكيت يا سكت الدار
لما قريت علماء آثار
علماء إيه يا بت الناس
سواح إيه ما عندك راس
ست الدار تتوهدبي ليه
وديل جماعة السي أي أيه
تعرفي إيه الـC.I.A.
أمريكان في كل مكان
ديل مالين الحتي ملي
ديل قالين الخلق قلي
وبسم الدين والأمريكان ...
أي عوج مبدي ومختوم
صوتنا هناك وهنا مكتوم
وما في فرق في الوكت الراهن ..
بين واشنطن والخرطوم
أنا مأزوم مأزوم مأزوووووم
يا خرطوم وينك وينك
يا خرطوم شن شب وقلبك ..وسلبك
بجتك ..نوبتك .. عربك .. زنجك .. حلبك
أنا مأزوم مأزوم مأزوووووم
يا خرطوم أزمني الصلبك فوق الطلحة الأمريكية
يا خرطوم خرطوم خرطوم
أوه خرطوم واشنطوم طم طم
لفتك ... فجرا يطلع يقطع رحطك
ست الدار سامعاني يا خيتي ...
ومرتي وأمي وأم الكل
أنا بنده لك من شارع الله
فوقي هجير والتحتي بقل
سبي معاي الشردو راجلك
والحرمونا شوية الضل
سبي الحالة العالة علينا
حتى أحكيلك بالتفصيل :
حاصل الحاصل يا بت أحمد
جانا وفد في المصنع زائر
كان الوفد دا أمريكاني
لفة وفات اليوم التاني
جانا مدير المصنع فاير
وشو حمار العمدة العاير
يبقى المصنع فيهو خسائر
وإنو يخفضوا متين عامل
متين عامل في فد مرة؟!
متين عامل يبقوا هوامل ؟!
متين عامل متين عامل
ما يهموش الهم المصنع
تف قرارو وفات في حالو
مسئوليين ونقابيين
ما في العارض ولة أحتج
ما في الناقش ولة أترجى
العمال من سمعوا أحتجو
سيروا موكب صامت وصامد
إضامنا معاهم سرنا
أب عرام دور عربيتو
العربية الأمريكية
زنقع خلى الموكب ثابت
احتجينا مع الاحتجا
اتكلمنا كلام موضوعي
قلنا المصنع حق الدولة
والعمال أصحاب الحق
هي البتقرر هي التتولى
هي البتحدد سير المصنع
إيد العامل هي العاد تنتج
مو المكنات الأمريكية
وزيت العامل ياهو البطلع
ما المكنات الأمريكية
ودرن الأيدي العمالية ...
أنضف من لسنات الفجرة
ودين الدقن الشيطانية
ومن كرفت البنك الدولي
وكل وجوه الراسمالية
وأشرف من (...........)
داك الحين المصنع هاج
وجات عربات ألات بوليس
صفو العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمننا بالتخريب والتحريض ..
والـ.. والـ.. (شيوعية)
البوليس صاقع شيوعية شيوعية
وفاكر نفسو بنبذ فينا
أيا بوليس أمك مسكينة
البوليس عمدني شيوعي
والتحقيق طلعني مدان
التحقيق طبعا تحقيقهم
أو ... تحقيق الأمريكان
أسبوعين عشناهم جوة
أسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس؟!
كل الهم ما يغشى الغم
بيتنا ... وراشد ... والتومات
وكل الناس الحالهم شاهد...
ست الدار الشوق الواحد
لي حلتنا وليكم
للإشراق الفي عينيكم
وكل الناس الزولم صامد
شوق وسلام الزين ود حامد
ردي سريع باليد باليد
في دورين موعود بي شغلة ...
لمت لمت كان ما لمت
أنا جاييكم وما ندمان
بعد الحاصل والاتحصل
ست الدار بت أحمد تكتب :
زيني الزين ... أب حالا زين
جاني جوابك يا المبروك
وسابني أشوف الدنيا كويس
وأعرف غلط الصاح مظبوط
سابني أميز ... أقدر أفرز
أرجع أفرز ...
فرحانابك يا أحزان
فرح النار بي لوح الزان
ومبسوطابك يا المبسوط
ما هزاني مصيرك ..
قدر ما هزاني المتين عامل
متين عامل في فد مرة ؟!
متين أسرة تروح وين ..
في الأيام النجسة المرة؟!
متين عامل ؟ ولة مهازل
والله عمايل ...
يا أوغاد وينا نقابة السجم الشوم
وين عمال السكة رماد
ووين الطلبة ووين الوين
بعتو شفيعكم يا عمال ؟؟!
بعتو وجيعكم للراسمال
وشن راجين يا تعسا الحال ؟
وهااااكم دي ..
والله مهازل ميتين عامل ؟!
وعامل ساكن فـ آخر الدنيا
بيصل المصنع بكف البُنية ينتج كيف ؟
شغال بي فونُية !!
عامل ينتج عشرين حتة
تلحقو منها قيمة اتنين
ستة يغطو المنصرفات
سبعة؟ ..تمانية؟ ..تسعة؟
أدها تسعة المنصرفات
قولو البفضل بدخل وين ؟
قولو الفايض بمشي لمين؟
وبرضو خساير!
والله مهازل يا مضغوط ..
خفض ميزك حبة تين
وتنك القعدة تلاتة خطوط
خفض مرتك توب مضغوط
من التمسحبو كبابي الصين
خفض عمرك يا بن الفانية
بي نظارتك واجه ثانية ثانية
عيون الشغاليين ثانية وبس
والله مهازل ميتين عامل ..
ميتين بيت ميتين
اسرة بلا راس خيط
متين اسرة ملوها جراح .....
مليون اسرة ح تولد صاح
ليكم يوم ياولاد الهرمة
ليش يالزين بتوصي عليا !!
ليش ليش ليش بتوصي عليا
وانا بت احمد ست الدار ام ولادك
وهم صغار ثم ولادك وهم كبار
وياكا الزين ود حامد داك
كان متوظف ياكا الزين ..
وكان متوقف ياك الزين
وليش يا الدخري توصي عليا
اسبوعين قضيتن جوة يبقى
غصّب زادنك قوة
وليش يا الزين بتوصي عليا
ليش يا الدخري توصي عليا
ليش ليش ليش بتوصي عليا
وعارف ام راشد والتومات
مرة ً دغري وغلباوية
آآآآآآآهـ يا الزين لو كنت معاكم ..
كنت بقيت النوباوية
ما تهتم يا الزين بالحاصل
واصلك سعيك واصل واصل
واصل سيرك ..
كان ما كنت الزين ود حامد
كان حيكونك واحد غيرك في صدفالك
يا انسان نسمة تقولك
في الامكان ابدع واحسن مما كان
وياتو مطرتًا سوّت شو ..
فرقوا غيما الامريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الاحساس
لما يكون في الساس والراس
ياتو وطن يا الزين ودحامد
ياتو زمن دام للانجاس
ياتو زمن يا الزين ود حامد
طه ترابلتو راحو الديش
غزّا مكانا اتنين رطانة
صاقع كلو من اسماعين
هو الفسرلهم الشغلانة
ويااسماعين ما كان الجيش
شقا مسيمعك بالجبخانة
لو المجلس قبل اوراقك
او في الثانوي لقيتلك خانة
لكن قدرك يا انسان بلدًا قاصية
في يد جبّانة وطالو الناس التريانيين ..
ضـّلو الله الما ضلانا
اخّدو نورا الحاج بالدق
وباكر دور ما خش عليها
خاتي اللوم قطع التمرات
الفوق راس بيتو الخلفا شكوهو
وما لقو حق
المحجوب إتلقَّ اخبارك
وقال جاييك في اول بص
البرسيم طهرنا امبارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب وانا طيبين
كل الناس يا الزين طيبين
ينشدو منك في الافراح
وفي الاتراح الزين الزين
ما تشغل بالك ما تشغل بالك
بس يا الزين لو درت مشورتي:
اصلو قتالك ياهو قتالك
تجي منّدلي ما الواطة تراها قبالك
وبي جاي جاي بيندبر حالك
ما الحكومة الضاقت دمك عينا
محل قبلت قُبالك شورتك عند ..
عندك شورتك والـ ببقالك
الببقالك الببقالك الببقالك الببقالك
التمرات بعناهن
اا الزين خفنا السوق ونزالة السوق
مبعوتالك عشرة جنيه
والاشواق من هنا لااااااااااا عندك
ست الدار بت احمد جابر
تلغرافات .. تلغرافين في وكت واحد
نوري السوق: ست الدار بت احمد جابر
المحجوب في قطر اليوم ... عفش الزين
... النوباوية
الخرطوم – الخرطوم بحري –
كشك الشعلة - الزين ود حامد - راشد
راقد والواطة جعفر طالق فيها بهايمو
ست الدار بت احمد جابر نوري السوق –
المحجوب ود احمد جابر
كتب الزين ، كل الاوراق . راشد كيف ؟
النوباوية الخرطوم – الخرطوم بحري-
كشك الشعلة النوباوية
انا في السكة وست الدار
راشد ود الزين ود حامد
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
جية الشليل
شوك الشوق .. لي الشوق آخي
ضارب في إطن النسج الحي
يا منقاش أحزان وإنشرت ..
وادي الفرح أتتمدد صي
يا راحلين عن دغش الليل ..
ما لاقيتو جناياً زي
تكية نخل الفجر الجاسر ..
فوق لي المترة عراجين ضي
يا رعاوة العرب الرحل ..
ما لاقاكم في المطراني
في كاويق الجرف الأمحل
بين أسراب الرهو الراحل ..
ساند أكتاف الليل الميَّل
عن ساساق الغيمة عليكم
بين رقراق الخيمة معاكم ..
ما أديتوهو شوي بي حرجل
آ رطانة الليلهم ليل
ما لاقاكم في ونساتكم
بين الشادي وبين كاساتكم
في صلواتكم ..عن دعواتكم
أو دقساتكم عز خلواتكم
زول الزول الله إن محن آ بسأل
الهباد لي غلب أخواتو
الفرَّاح عَوَّان الحلي
الفدار لليل ظلماتو
آنجمات شقيش قولنلي
ما لاقاك طالع مندلي
المطعوم من طيبة أماتو
كالفجاج النَّد نباتو
موج البحر الأحمر هوجتو
وعرق العرق اللاوي ثباتو
جانا الشدر الأخضر منو
ونار الشدر الأخضر جاتو
راح شقيش أب قولاً واحد
ليش ما يرجع من غرباتو
طوّل .. طول ما طل علينا
وقاطع مننا جواباتو
الغابات جات تنشد منو
العربان راجين جياتو
أديناهم علقو وعرقو
وصورتو يقلب في كتاباتو
ضل رشاشو .. ركيزة زولو
ساعات سلمو ويوم حوباتو
سن طوريتو ..ولون أبرولو
وحس طمبورو البي نغماتو
لهلب عشق الناس الفقرا
وبَّرد جوفن ..
يا غنواتو .. الدخلت فينا ..
تمرق جينا علي جلاتو
وجيداً جينا .. طلقنا وشينا ..
ووش أطفالنا الليلة حلاتو
غني معانا غنانا هويتو
غني العالم غني حياتو
لا ساومنا عليها قضيتو
ولا فكينا من أيدنا وصاتو
ألف شليل يا نورا يفوتو
شان ما يجيكي شليلك ذاتو
ولما يجيكي .. شليلك ذاتو
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
صياعة مع الغفاري وأهل الله في زمن غلط
تستغرب يا رسول الله
يا أول وتاني الخلفاء
تستغرب يا أبذر لو جيت
في هذا الزمن الجهجاه
لو فيكم حد يا حنفاء
إتجاسر وقال ما معناه:
(في الدين الطيب لا إكراه)
وبني آدم أدرى بدنياه
أو أن العالم شركاء
في الكلاء ..النار ... وفي الماء
أو حاول ينصح وينطاول
لي حاكم ظالم وقال لا
يا لاقى جهنم مأواه
فتحولو ترابيس شالا
يا راجع نفسه أقلاه
السيف فوق رأسو مخاواة
بالذات الزيك يا أب ذر
بالذات الزيك لو جاء
راكب دغريتو العرجاء
دايماً غلباوي وغالاط
لخباط للعيشة الخمجاء
بالذات الزيك لو جاء
في زمن الزيف المنشر
والتشريعات العوجاء
يا إنباع يا راجي الراجا
يا واقف فوق عمق الدين
يا شايف لي آخر دنياه
يا طيب ... يا إبن الغبراء
الشركة يسارك يا أب ذر
من إسمك واللا من الذر
الكسحت ديكا كريسيدا
داك سيدا أب دقنا شمطاء
وجيب إيدك يلا النيلين
لو درت تشوف العنقاء
يا صاحب النفس الأمارة
بالوعي الديني المحتارة
دا الدين ... المقلعة ده الدين
والمزرعة من فضل الله
سال سيفك داقش شقيش
قدامك عاين كم ديش
الزمن إندقش دقيش
الأمن .. محاكم التفتيش
في كل المدن العربية
حا تلاقي شدرتك مسبية
يا إنتحرت بي بترودين
وعصفورك منزوع الريش
أجلاف كنزوها بلايين
والناس بي الله ويا آمين
بتحلحل دين الكنتين
تنلفت كايس لي مين
الأمن ... محاكم التفتيش
وأصحابك جوة زنازين
وأسيافن صقروا ما فيش
ما إنبعنا وباعتنا قريش
ولأمريكا وبي حبة عيش
والحاكم قبض البقشيش
سال سيفك داقش شقيش
الأمن ... محاكم التفتيش
جنسيتك...بظبورتك...الفيش
في كل المدن العربية
حا تلاقي النفس العربية
في مصحة أمراض عصبية
بين الحجبات والأرتيل
تنململ شاحبة وصفراء
وقافلاها متاريس الديش
والكضبة عمايل الأمراء
سال سيفك داقش شقيش
إتراجع يا أبن الغبراء
يا صاحب النفس الأمارة
بالثورة القادرة الجبارة
إتراجع وأنسى الفقرا
أمثال العسكر غدارة
زراعك تنفد تتنفض
عمالك منك تتجارى
وكل الكادحين الشرفاء
وراح تفضل وحدك في الدارة
راح تفضل وحدك في البر
لا زوجة لا قطة ولا غطاء
لا تكتل نفس يا أب ذر
سيب خونة مكة وتجارا
إتراجع يا إبن الغبراء
في لجة انكسرت بي السارة
زلقتني عجالة الشعراء
فلقتني من الربذة حجارة
سرقتني بدمي الصحراء
أب ذر لا سمعني ولا تبعني
طبطب على همي بيسراه
وكان دمي إنماذج بدماه
بي دم الغبش الشهداء
من اول وتاني الخلفاء
إتجمع في رسول الله
زي نهر بيحفر مجراه
مصلوب فوق عتب الفيحاء
مجلوب في السوق السوداء
وما صرخت بنت أبي بكر
وا إسلاماه ... وا إسلاماه
كانت هي الأخرى وراء القصر
تنململ بين الدهماء
تجار الدين الساقطين
الجنرالات الجبناء
مكتوفة الأرجل والأيدي
مكفوفة الأعين عمياء
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
عروس الطين
بيني وبين النهر ضحايا
وكم من قتلة ونصابين
وقدر الغيم اللما سمايا …
شالوا الريح وبي حمرة عين
حبل البئر ودلوها منتف …
وحارستنها دابيين
ريقي دقيق .. والخطو مكتف
ما بين كهنة ورباطين
وأنا ناذرلك، كان اسقيك
وترجعي طيبة عروس الطين
ويرجع عصب العشم الفيك …
وزي ما كان من قبل سنين
يا ترقوة الحلم الزامك ..
ما أقواك علي السكين !!!
لما عشاك الصيف الحارق …
حتحتيهو الصفق الأصفر
والنوار اليا دوب مارق …
علمتيهو تمام ينضرضر !!!
فرعك عز الزمن الزانق …
عاهد ليفك وابي من يكبر
شان ما يبقي حِراب ومشانق ..
واللا مطارق في إيد العسكر !!!
وشان الساق الناجرو الخالق ..
ساترو لحاهو … يفضل أخضر
روضتيها جذورك ترحل
تالا الموية التحت الأرض
وفوق الزمن الريحي الأمحل ..
كيف تنماسك وتسند بعض
ما كان عرضك إلا الأطول ..
لا كان طولك غير العرض
وين بالساهلة يفرط زولك
واللا يفوت المال والعرض ؟؟؟؟
قال طيراً نفد بي حنو …
لي جملة عقابو يغنوا :
يا أكباد الرفاق لا تئنوا !!
طرقوا لي المناقير سنوا !!
شن طعم العرق والدم
وإحنا عوجنا ما عدلنو ؟؟
هبن يا طيور من جم …
رخمتين فوق صقر كتلنو
حلماً زاتو ليك كابوس
… وراجنبو الليالي يصنو
والوعد المشتت روس …..
وكاويق شن بترجن منو ؟؟
وما بتنغشن … حاشا وحاشا
وما بتنكسرن .. أي والله !!
وما بتندلن لي حباية
ودود معقود في شبك الباشا
وكم هبرتن شركو وطرتن
لي قندولكن في الحواشة
وقلتن شارق فجراً حارق
وكل الوخم الزيف يتلاشي
وتنفض طيبة غبارا العالق
وتقبض نسمة خير ودعاشة
وبيني وبين النهر ضحايا
وكمين قتلة ونصابين
وقدر الغيم اللما سمايا ..
شالو الريح بي حمرة عين
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
عم عبد الرحيم
فتاح يا عليم رزاق يا كريم
صلى على عجل همهم همهمة
حصن للعباد وهوزز سبحتو
دنقر للتراب
هم فوق هم هما
صنقع للسما
وكان في الجو في غيم
وكم نجمات بعاد وكان الدنيا صيف
لا قالتلو كيف ؟
كيف أصبحت كيف؟
لا بسمة حنان
لا لمسة وداد
لا رمشة طريف
من قلباً وفي
زي أيام زمان أيام الدفي
كانت ماها في
كانت في المراح
شدتلو الحمار تحلب في الغنم
لي شاي الصباح
والطير ما نضم ما رسل نغم
عم عبد الرحيم أتوكل نزل
في المشرع لقا زملان الشقا
الجا من الجريف الجا من الجبل
كل الناس بخير
صبح هاظرم نقنق ناقرم
غاظوه ونعل
وعم عبد الرحيم ما بخبر زعل
تزعل من منو
وتزعل في شنو
كل الناس صحاب
كل الناس أهل
والماهم قراب قربم العمل
الطاق اليطق عشت أبو الزمل
بالحال العليك بالفال بالأمل
***
عم عبد الرحيم
كت فلاح في يوم
في إيدك تنوم
على كيفك تقوم
لا دفتر حضور
لا حصة فطور
تقرع بالقمر
تزرع بالنجوم
لكن الزمن دوار آبيدوم
***
عم عبد الرحيم ماشي على الشغل
في البال القديم اتعارض تكل
اتشايح جراح يا كيف الغسل
الدنيا أم صلاح تبدأ من التكل
من حجة صباح ، في حق الملاح
في اللبس الجديد في القسط القديم
بيناتم عشم ، في الفرج البعيد
***
أمونة الصباح
قالتلو النعال والطرق إنهرن
ما قالتلو جيب
شيلن يا الحبيب غشهن النقلتي
والترزي القريب
بس يا أم الحسن طقهن آبيزيد
طقهن آبيفيد
إنطقن زمن وإن طق الزمن
لازمك توب جديد
وبي أيت تمن
غصباً للظروف والحال الحرن
شان يا أم الرحوم
ما تنكسفي يوم لو جاراتنا جن
مارقات لي صفاح أو بيريك نجاح
دا الواجب إذن
وأيه الدنيا غير
لمة ناس في خير
أو ساعة حزن
عم عبد الرحيم يا حر ، ماك حر
يا ريت التمر ، ياريت
لو يشيل كل تلات اشر
ولَّة أيام زمان ، ما كانت تمر
كان ما جاك هوان
ما لاقاك ضر
كان لا ضقت ضيق
لا اتغرغر صبر
لا شابيت غريق
لا طلوح فقر
وكان ما كان وكان
كان أكسيك در
***
حيكومات تجي وحيكومات تغور
تحكم بالحجي والدجل الكجور
ومرة العسكر كسار الجبور
ويوم باسم النبي تحكمك القبور
تعرف يا صبي مرة تلف تدور
ولَّة تقول بري أو تحرق بخور
هم يا الفنجري يا الجرف الصبور
كل السقتو مات باقي على التمور
وأرضك راقدي بور
لا تيراب وصل لا بابور يدور
والماهية أف عيشة كع وكف
في هذا الزمن تُف يا دنيا تُف
يا العبد الشقي ما أتعود شكي
لكن الكفاف فوقك منتكي
والسوق فيك يسوق
حالك ما بتسر
علا كمان في ناس فايتاك بالصبر
ساكنين بالإيجار لا طين لا تمر
وواحدين بالإيجار ما لاقين جحر
سلعتم الضراع والعرق اليخر
عمال المدن كلات الموانئ
الغبش التعاني
بحارة السفن حشاشة القصوب
لقاطة القطن الجالب الحبال
القطن الفرن
الشغلانتو نار والجو كيف سخن
فرقاً شتى بين ناساً عيشا دين
مجرورة وتجر
تكدح بالأجر ومرة بلا أجر
عيشن كمهو وديشن هان قدر
وناساً حالة زين مصنع مصنعين
طين في طين ووين
ما مرابا مر
بارد همها
لا يعرق جبين لا وشاً يصر
عين والله عين كلها كمها
وعزها هان قدر
في الجنة أم نعيم
في الجنة أم قصر
يا عبد الرحيم إلا وراء القبر
ويلكد في الحمار
لا تسرح كتر
وفتاح يا عليم
وإن كان الفقر
يا عبد الرحيم أشبه بالكفر
ونقرط للحمار
نقريطة الحمار
لا تنسى النعال الطرق الخدار
اللبس الجديد تصريح السفر
للماشي الصعيد للماشي الديش نفر
البال أشتعل بالأبا ما يعيد
الحول ما أشتغل
الغبن الشديد السابا ورحل
الضيق المحل
الفرج القريب الجا وما وصل
زي الحال دا يوم لا كان لا حصل
والبال إشتغل
السكة الحديد يا عمو القطر
يا عبد الرحيم 00 قدامك قطر
00 وسال الدم مطر 00
وطارت دمعتين وانشايح وتر
ياطاحن الخبر
ما بين القضا ومرحاكة القدر
الشهد والدموم والدمع الهدر
ايدم في التراب والعين في القطر
عارفين الحصل عارفين في حذر
الخبر اليقين بوَّخ وانتشر
أطفال القرى وعمال الحضر
ادوهو الطيور وادنو البحر
اتصاعد سحاب واتدافق مطر
عم عبد الرحيم في الشارع عصر
لي تالا اليسار متفادي الكجر
دورية الكجر عربية الكجر
جفَّلت الحمار وطوح ذي حجر
وعم عبد الرحيم إتلافا القطر
فتاح يا عليم سال الدم مطر
جرتق للتراب منشور ذي كتاب
روشتة وجواب
وماهية شهر
مفتاح أب ضراع
أورنيقين سهر
جمب لبدة حمار مقطوعين ضهر
عم عبد الرحيم يا كمين بشر
صحي الموت سلام ما يغشاك شر
صحي الموت سلام ما يغشاك شر
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
كرويات الصبر البيضاء
كرويات الصبر البيضاء انهزمت
ووجمت
وخر جوادك … قبل يقرب
حميات القلب السوداء
إنلمت
وضمت
وبرت أجسادك .. وبت تهضرب
من هضريبك ومر تعذيبك ..
بين النخلة ومجري النسمة
انساقط طاير …
حتحت
ريشو قصادك …
وكان ده حبيبك … وقمت تجقلب
بين القيفة وباب النهر ..
دبيب الريح من دبش القهر ..
اتلوي اتلبد ولدغ الشيمة
الشيمة انكفت ..
البحر انخج ..
الزبد انعج ..
الطين انحترب ..
ومرقت عقرب
ورفعت شارة ..
اندفعت فارة
تجاه المركب
ووقعت سارة
علي صنقور رواسي قريبك
وقام منوهدب
وكابسو جندب ..
وكان دي أمجادك
بين الميضنة والارصاد
انجرحت غيمة ..
الغيمة الطيبة وحاملة حلال
من ألق البسمة الفي الأطفال
من عرق النسمة الفي العمال
والناس الفال
انسرحت فيها ...
شظايا آذان الوقت الواقع
بين تقريبك .. وسرقة زادك
مدت ايدك تالا القبلة …
رشاشها يصيبك ..
تسبي نديهتك ..
تفقد جيهتك
تنزف تنسف
دانات دعت الهوس الديني
الطيني
تجيني
قوافل أورادك
تقضف ..
تركض تالا جنازك ونعش أولادك
باري نحيبك ..
ترجف تتعب ..
تغضب تهتف ..
تلقي قصادك سد ومرابي
أرزقي ..
رباطة
وكور همباتة ..
لحي ونخاسة ..
وكل الساسة...
الباعو نصيبك باستشهادك
عاد ان شاء الله
تكون الجنة الماهلة ميعادك
إلا الحاصل ديل حسادك
بعض يقول الله لا عادك
وبعض إن لاقي طريقة يعيدك
تاني عشان الموت يصطادك
يا مجلوب في سوق الآخرة ..
ويا متمقلب تحت جهادك
خرّ جوادك ..
مات الطاير ..
لدغت شيمة
كرش الغيمة انبعجت
دمّت ..
عينيك طمت ..
وغمّ قليبك .. وكان دي بلادك
وين مستغرب ..؟
تقدر تكسر حمرة عينك ..؟
تنكر سيفك ؟؟
تابي جفيرك ..؟
دابك تقوى
يا بني آدم .. تفقد مرة .. مريرة ..
ضميرك تكسب ثروة ..
وتلقي العالم تحت سريرك
تشبع
تروى ..
وترضع ذاتك ..
من لذاتك ..
وحلو الحلوى
من ما تبلع يوت تتبرع ..
وكلك نخوة ..
صدقة لعمرك
وباقي حياتك … نصر الدعوة
حبة جوامع ..
وقبة صوامع ..
وكوتة
وكوتة
تفوت الفوتة
بأسرع صهوة
عمرة وحجة … وتسأل ربك
يقبل توبتك يغفر ذنبك
يمسح سفك ..
خيرات شعبك ..
أصلها كانت عترة في دربك
لما تعبت … وفاتك حزبك
لما ضهبت … وخانك قلبك
كانت هفوة في لحظة سهوة
عن الإنسان والحال الأسوأ
ودابك فقت ..
وجاتك صحوة
جيت وتكفِّر ..
يا رب تغفر ..
أغفر ..
أغفر
عبدك خاسر شيء ما بيسوى
إنت القادر .. إنت الأقوى
يا البتخادع حتي الله .. !!!
وين الشهرة .. المال … والجاه؟
وين السطوة ..؟؟
الجشع ..؟؟
القسوة ..؟؟
أركز ..
أركز
لا تجيب رخوة
يا متلبك في الأدران ..
الحجر الأسود ما هو البروة
وما ها مكاوى الكعبة تجيها ..
حين ينكرفس توب التقوى
وما في خرط للجنة تودي ..
لا في خطط ممهورة برشوة
والمشروع الديني الخالص …
ما محتاج لدراسة جدوى
ويات قال يا رب من قلبو ..
رد الخالق دائماً أيوة
اركز ..
اركز ..
لا تجيب رخوة
اركض ..
اركض ..
تالا أشجار العملة
واقصف ..
اقصف من أوراقها ..
يمكن تستر عورة شينك …
وما سواهو زمانك جملة
اركز ..
اقوى ..
ولف بشكيرك
فوق الراس … النشَّف غيرك !!
لا تستهوى ..
قضي منافعك وتم العمرة
وفوِّر موية زمزم قهوة
اركز .. اركز .. لا تجيب رخوة
ماك غلطان .. !!!
غلطان الشعب
الجزّ جراد الغفلة كفاحو
الجني ارباحو .. ضياع أرواحو
وجيد للحاصل …
وبخت الحاصد
ماك غلطان !!!
غلطانين الشهداء الراحو ..
الواحد ..
واحد
ماك غلطان !!!
غلطان الحزب الجمّ سلاحو
وخيلو تناهد
ماك غلطان !!!
غلطان زمنك
وأصلاً وطنك
ياها جراحو ...عندك شاهد
رفضك .. سجنك ..
شان الكادح
والمتكادح
يلقي صراحو …. ويبرأ الساعد
تهتف لامن تقضف دم ..
وشارعك هازيء ..
يهز أصفاحو .. وبرضو تجاهد ؟؟؟
لامن صقر سن منقارك ….
لامن طايرك قصو جناحو ….
وخرّ يكابد
ما حسابك … إلا عذابك ..
وليلاً دائماً كاتمو صباحو ..
ونجمك ساهد
لما بديت تفرز لي عيشتك ..
لاكو عويشتك ..
واجمعوا جملة بأنك تالف
وانو سقطت .. مع انك واقف
فوق أسمنت وتحتك عملة
هم الساقطين في البرد الناشف ..
وجاهم زاحف قوز الرملة
الإملاق العيش الشاظف ..
وفي ظلمات الزمن العاصف …
قاسي عبور أليم … يا نملة !!
وهسة غلابا الدنيا الكنت...
بتتعب غنية عشان برتاحو ..
المنك راحو ..
الكجنو حنك … وعنك أشاحو
ضراغم غادي
عليك يتجاوز .. بدون ما تنادي ..
وصاروا نفيرك وقت حصادك ..
ورابي نصيبك هرِّب ..
هرِّب ..خير بلادك برة وسيبك
يا أوعية البلد القطت ..
ما بيسقيك الدم الفاسد
ويا أودية الولد الشطت ..
ما بيشفيك اليم الراكد
إلا الدم البدأ يلقط ..
واحد ..
واحد
إلا اليم أب غيماً نقط ..
وجاييك قاصد
يا محبوبة في وضع خريف ..
شالع دجلو ..
وكضباً راعد
بيت راكوبة ..
وحوشو صريف ..
سوَّس مرقو ..
وسقفو يناهد
أحسن تحت المطرة نقيف ..
بي كفيك ..
كفي ..
والساعد
وراسنا …
نضاري الطفل الواعد
لامن يبقي سمانا نضيف ..
من تخويف ..
تسويف .. من زيف
ونلقي الوطن الحن ..
مو الطارد
واللا الموت
الدغري الواحد
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
مناقيش العدالة
مني متعشم طلوعك ..
كلي مستنيك تعودي ..
ويغسل الساحات رجوعك
في حشي أحراش الليالي
منتظر بقة شموعك
تشتلي الضو في الضهابة ..
ترخي للجايعين ضروعك
يرجع الطير المهاجر ..
يملأ في الفجاج ربوعك
***
في كلام الناس بفتش ..
بين عوينات المدارس
في صدي آذان المساجد ..
ورنة أجراس الكنائس
في اندهاشات العذاري ..
في ارتعاشات الموامس
في بحر فرحان يبشر ..
موجو لي جيه النوارس
الرواويس طمبروك ..
وهزّ بيك في الدارة فارس
***
بين سكات القرية أفتش
بين هضاريب المدائن
يا نسيماتا تكربت ..
شايلة أشواق الجناين
لي جديول الحلقو ناشف ..
أو عرق تربال يكادن
في وش الأفراح بفتش ..
بين قفا اللحظات أعاين
بين سواقير الفقاري ..
الجاية من تالا المدافن
مرة طال الليل علي ..
ووصلت الآهات مداها
وقلت لي النجمات موجايي ؟؟؟ ..
قالت الأيام تراها
يا ضيا القمرا القبالي ..
شوكة الظلم الخيالي
عسمت فوقنا الليالي
خبي في سراعك تعالي
يا مناقيش العدالة
بتنا فوق الصبر عالة
يا تعاويزنا وعزانا ..
خلي نور الفرحة يطفر
من عوينات الحزاني
صخرة الأحزان تقيلة ..
وإحنا ما بنملك سوانا
قولي هيلا هوب معانا ..
من علي الشارع نشيلا
سكة العمر الطويلة ..
ترتي في الجايين ورانا
صرنا ذي رحالة عنك ..
فتش الكون تبني لبني
وراح سأل طيانة تبني ..
وقالوا جاية
بالعوينات البقو من بدري
شايلات القراية
في تلوت الليل تبوغ ..
سارقة للدنيا السقاية
ولما تورد ..بنسلينا
الجردقة .. القرض .. المحاية
جاية من ضهر المسافة ..
البين بناء الطين والسرايا
طالما في الدنيا ناساً ..
فاتو للجايين فداية
وناس علي جلانا تكتب بالثبات ..
والنيل دواية
جاية .. جاية
دفة التاريخ في ايدا ..
دم عروق اما بتنده
راجية نص الليل وحيدا
بيتت في القلة مويتو ….
وزادو في المعلاق عصيدة
جاها في جواب يسلِّم …
للبلد دانى وبعيدا
يمة يا نفس الوصية …
الكل ما شرقت نعيدا
يانا يا شخب القضية …
الصافي في قدح القصيدة
مانا قنعانين تملى ….
مانا قنعانين تملي ..
من دواية الصبر نكتب
فينا والإصرار يملي
تنعدم موية وضونا ..
بيها نتيمم نصلي
الزمن ينقض وضونا ..
تاني نتوضأ ونصلي
ونمشي فوق دربك نباصر ..
في الزمان والشوك نحاصر
بي شعاع بكرة المسافة ..
وسطوة الليل والعساكر ؟؟
تنهزم ريح العوارض ..
والمواريث التعوقك
ومن شقايا الحال تبقي ..
وتقدح التاريخ بروقك
وكلما مرقت غبينة ..
تمشي لي داخل عروقك
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
نوراي
الشوق من حاصف ..
لا قاصف
يتلم .. يهز ليك يا نوراي
يا درقة وسيف
يا حضناً كيف
من شر الصيف
والشتاء ضاراي .. ضاراي
يا شتلة عز بقت جواي
عدت بي ضلام بحراً عاصف
يا نور قاعد بك .. قايم بك
شايلك مورودة ومتوكل
يا نورا علينا .. علي الله
والفرج القرب .. وحايم بك
يا بت العرب النوبية
يا بت النوبة العربية
يا فردة نخوة بجاوية
أو شدر الصحوة الزنجية
دسيني من الزمن الفارغ ..
من روح المتعة الوكتية
من شر الساحق والماحق ..
بين دبش المدن المدعية
والليل اتحكر بيناته
يا شمس الناس المسقية
روحّت أتنسم أخبارك ..
لا تشفق ..
قالوا لي نصيحي !!!
وأنا عارفك ممكونة وصابرة ..
لكن لي ناس إلا تصيحي
جواي مأساتك مغروسة ..
يا طفلة تفتش في باكر
ما بينات نخلة وأبنوسة
الجوع العطش الفد واحد ..
الفقر الضارب زي سوسة
الخوف والحالة المنحوسة
يا بحر الحاصل ..
لاك ناشف ..
لا قلمي الفي ايدي عصا موسى
يا أم غلباً حار ينبر فينا ..
ما عدا صباح من ها .. الميناء
كد الكداح شايلا سفينة
الناس عوجات .. تحرس .. ترجا
ترجعبو سلاح وأنوار زينة
بمبان ..
شوفونير ..
آفات ..
وسكي ..
للناس الدمنا بنزين
فِقراً تسترق من دينا
بايركس أبريقن ..
والموية ..
تتحدي بيض الوزينة !!!
خرزات السبحة أمريكية ..
خصل الموكيت إيطالية
دفتر شيكاتاً ربوية ..
في الجيب
والسيرة النبوية
جمب مصحف جوه البترينة
تقروقتك .. ديمة علي القبلة ..
ميهيجة إبريقك بي طينا
السبحة أصابعك يا صالحة ..
يا بت الناس الصالحين
الذمم المشرية الطالحة …
شتان بين دينك وبين دينا
شتان بين أحمد
وحاج أحمد ..
وقداس ناس ياي وسلاطينا
شناك مع الخلق النايحة
علي أرض فلسطين الفاتحة
البركة في لونك يا سيناء
يا نورا
شليلك ما فات
بي بعدلو شليلك جاييكي ..
ما جايي ألم التمرات
لا أبكي وأقابل بالفاتحة
في زولاً ليّ مرض .. مات
جاييك أتزود من غلبك ..
وأكفر خطأ غيمة ما جات
نبحث لها كل المعمورة
والناس يوم تمرق مدخورة
يا نورا نسيلك غنوات
وأمالي بي باكر مضفورة ..
طلابك وأقلامنا هويتك ..
قدامنا قضيتك سبورة
رتبنا الخرطة البتوصل
أدينا الخاطر يا نورا
بالمد الثوري المدافع ..
فوق دربك تب ما متراجع
رغماً عن عنت الأيام ..
والزمن الجهجاه الفاجع
ما رمل الدرب الوسطاني ..
وكتيني الراحل وصاني
لا ترجع ساكت يا شافع
لا ترجع شافع يا ساكت
خد بالك وعينك في الشارع
لا ترجع .. لا .. لا
الشارع فاتح في الشارع
الشارع صان ..
صان الشارع
جاييك كايسلك يا نورا..
لا كت ليها أغني معاناتا
الفجر الكاذب يرشحني
ترشع بي الواطة سماواتا
شدرات السافل تنتحنى
بى الحاصل أعبئ مساماتا
الناس القصر تنصحنى
اتكاجر أتور نجماتا
القمر الطيب يفضحنى
تنبحنى سجونك وآهاتا
كجنا سجونك لولاك
كم عشقا يتيرب واطاتا
منعول الزمن الخلاكا
سلمت الوطن الهمبانة
على كيفك سيفك يتحكم
يا سوسة تكنك ما بتعلم
بي شتلة تقرِّب تتكلم
يا حال البتألم وساكت
ويا حال الساكت وبتألم
يتفتق جرحك يوم نبرا
ونتملي .. وقيدك ينحطم
وين عاتب هارب من بكرة
وخطو التاريخ البتقدم
للزمن الإنسان السدرة
حيوقف قولو ما بيرغم
المنفي في شرعو كما الهجرة
والسجن متل دار الأرقم
والشارع قارن في الشارع
رغماً عن عنت الأيام
والزمن الجهجاه الفاجع
بالنفس النازل والطالع
وأنا واحد من شعب مضارع
سميت ومشيت ما متراجع
غنيتك يا عشقي وتيهي
يا بلاداً كم سمحة وجيهي
لو لقت الناس البتدورا
الأيدي التنفض كانديكا
تنقفذ تلحقا في الكانديكا
ترتالا
تكوس لها في الجيهي
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
نوراي
الشوق من حاصف ..
لا قاصف
يتلم .. يهز ليك يا نوراي
يا درقة وسيف
يا حضناً كيف
من شر الصيف
والشتاء ضاراي .. ضاراي
يا شتلة عز بقت جواي
عدت بي ضلام بحراً عاصف
يا نور قاعد بك .. قايم بك
شايلك مورودة ومتوكل
يا نورا علينا .. علي الله
والفرج القرب .. وحايم بك
يا بت العرب النوبية
يا بت النوبة العربية
يا فردة نخوة بجاوية
أو شدر الصحوة الزنجية
دسيني من الزمن الفارغ ..
من روح المتعة الوكتية
من شر الساحق والماحق ..
بين دبش المدن المدعية
والليل اتحكر بيناته
يا شمس الناس المسقية
روحّت أتنسم أخبارك ..
لا تشفق ..
قالوا لي نصيحي !!!
وأنا عارفك ممكونة وصابرة ..
لكن لي ناس إلا تصيحي
جواي مأساتك مغروسة ..
يا طفلة تفتش في باكر
ما بينات نخلة وأبنوسة
الجوع العطش الفد واحد ..
الفقر الضارب زي سوسة
الخوف والحالة المنحوسة
يا بحر الحاصل ..
لاك ناشف ..
لا قلمي الفي ايدي عصا موسى
يا أم غلباً حار ينبر فينا ..
ما عدا صباح من ها .. الميناء
كد الكداح شايلا سفينة
الناس عوجات .. تحرس .. ترجا
ترجعبو سلاح وأنوار زينة
بمبان ..
شوفونير ..
آفات ..
وسكي ..
للناس الدمنا بنزين
فِقراً تسترق من دينا
بايركس أبريقن ..
والموية ..
تتحدي بيض الوزينة !!!
خرزات السبحة أمريكية ..
خصل الموكيت إيطالية
دفتر شيكاتاً ربوية ..
في الجيب
والسيرة النبوية
جمب مصحف جوه البترينة
تقروقتك .. ديمة علي القبلة ..
ميهيجة إبريقك بي طينا
السبحة أصابعك يا صالحة ..
يا بت الناس الصالحين
الذمم المشرية الطالحة …
شتان بين دينك وبين دينا
شتان بين أحمد
وحاج أحمد ..
وقداس ناس ياي وسلاطينا
شناك مع الخلق النايحة
علي أرض فلسطين الفاتحة
البركة في لونك يا سيناء
يا نورا
شليلك ما فات
بي بعدلو شليلك جاييكي ..
ما جايي ألم التمرات
لا أبكي وأقابل بالفاتحة
في زولاً ليّ مرض .. مات
جاييك أتزود من غلبك ..
وأكفر خطأ غيمة ما جات
نبحث لها كل المعمورة
والناس يوم تمرق مدخورة
يا نورا نسيلك غنوات
وأمالي بي باكر مضفورة ..
طلابك وأقلامنا هويتك ..
قدامنا قضيتك سبورة
رتبنا الخرطة البتوصل
أدينا الخاطر يا نورا
بالمد الثوري المدافع ..
فوق دربك تب ما متراجع
رغماً عن عنت الأيام ..
والزمن الجهجاه الفاجع
ما رمل الدرب الوسطاني ..
وكتيني الراحل وصاني
لا ترجع ساكت يا شافع
لا ترجع شافع يا ساكت
خد بالك وعينك في الشارع
لا ترجع .. لا .. لا
الشارع فاتح في الشارع
الشارع صان ..
صان الشارع
جاييك كايسلك يا نورا..
لا كت ليها أغني معاناتا
الفجر الكاذب يرشحني
ترشع بي الواطة سماواتا
شدرات السافل تنتحنى
بى الحاصل أعبئ مساماتا
الناس القصر تنصحنى
اتكاجر أتور نجماتا
القمر الطيب يفضحنى
تنبحنى سجونك وآهاتا
كجنا سجونك لولاك
كم عشقا يتيرب واطاتا
منعول الزمن الخلاكا
سلمت الوطن الهمبانة
على كيفك سيفك يتحكم
يا سوسة تكنك ما بتعلم
بي شتلة تقرِّب تتكلم
يا حال البتألم وساكت
ويا حال الساكت وبتألم
يتفتق جرحك يوم نبرا
ونتملي .. وقيدك ينحطم
وين عاتب هارب من بكرة
وخطو التاريخ البتقدم
للزمن الإنسان السدرة
حيوقف قولو ما بيرغم
المنفي في شرعو كما الهجرة
والسجن متل دار الأرقم
والشارع قارن في الشارع
رغماً عن عنت الأيام
والزمن الجهجاه الفاجع
بالنفس النازل والطالع
وأنا واحد من شعب مضارع
سميت ومشيت ما متراجع
غنيتك يا عشقي وتيهي
يا بلاداً كم سمحة وجيهي
لو لقت الناس البتدورا
الأيدي التنفض كانديكا
تنقفذ تلحقا في الكانديكا
ترتالا
تكوس لها في الجيهي
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
عمال البلد
قوم حيي نضال........
عمال البلد أم خير يا خال
عمال كداح ..الوين ترتاح .. والحال بطال
كدح التربال ...
والأرض الطيبة الكم خاواها وضادا النال
اليوت شغال في نهارو وليل ...
منهوك الحيل ... تحت الرأسمال
آه الرأسمال الياما قسى وعوق رجال
ما خلى نساء ... وعرك الأطفال
لا مسلم قال ... دا خيي بلال
نصراني يحن في قبريال
لا يمين في يمين ... لا شمال في شمال
دولار وريال ... دوار يا خيال
تجويع وإذلال
خرب واغتال ... كل الآمال
ما تخلى مجال ... دون استغلال
السلب حلال النهب حلال والصلب حلال
هدم لذات المسهوكين ....
من أجل الذات مكينيزم انتاج
أبراج العاج
هيصة المكياج
ديباج التاج ... السيخي الصاج
زي أعتى سياج
يتلقى أفواج المسحوقين في الليل الداج
المسيوقين تحت الكرباج
أخوان إصرارك يا حلاج
على إنو الليل بلد الفجاج
وضربة محتاج في نهارا ساج
أبتر من سن سيف الحجاج
الله يا الزول الساقو عزال
أطري الإذلال يا دغري عديل
بيصارع الويل ... حيا ما زال
بالصبر يشيل في الما بنشال
ما إنيقن وقال ...
يا دنيا محال ينصلح الحال
بل عبأ وشال ... جواهو الفال
نازل وديان طالعبو جبال
أشواك ورمال غابات ووعر
بين ريح ومطر ... عرق الشلال
ومطامن بال ... ما لاوز قال
يا ربي أصد من دربي الطال
ما طال لابد يشرق بكراهو الما بنطال
يشرق بالخير ... بالحب ... بالود ...
يشرق لابد يضوي الحلال
إزي يا خال ... كيفنو الحال
زين .... عال العال
مع إنو الحال ما راجي سؤال ...
إيجار البيت ... جيهة الأطفال
مشهاد اليوم ... عيشة الدوبال
أفراح العيد على رحو وبال
عكر للفوق اداهو إذلال
والخوف أم زين إن صابا زلال
الله يازول مشغول البال
في الدنيا يكون مافي استغلال
والشوق رايات ...
الله يا زول الشوق رايات
والله على ناس كلها إحساس
إنو الجايات أجمل
والفات ما فات والفاس
والأرض البكر الفكرة ... الرأس
الخت أساس الليلة وبكرة ...أعظم ميراث
أجمل من دا وأعظم بكثير ...
عالمنا يصير ...ما فيهو أجير
لا ناس فوق لا طيطي رأس
يبقى المقياس الشغل التام بوفا وإخلاص
الخاص للعام والعام للخاص ...
والشوق قدام ... والشوق قدام
والخوف ينداس تحت الأقدام
كابوس البؤس نلقاهو خلاص
أصلا يا خال ... شفقة رأسمال
أما العمال ... أنفاسا طوال
إن طابو نفوس ... إن طال البال
ضيء الفانوس بيكفي جبال
حدك يا رصاص ... ما دارلو دواس
ولا حتى كباس ...
عالم كالشوق وحق كل الناس
إلا الكداس ...عاكاس ..عاكاس
شان دفتر شيك .,.. بسرق كراس
نحنا الوراث ... كلنا حراس
والجاي يدوس عزنا بنداس
أصلوا السواى تب مو حداث
يا حب إنداح ... على كل قليب
إنزاح يا نواح ... دندن يا دليب
بأغلى أنغام ...
يا خطو أرتاح على أحلى دريب
قدام ... قدام في أمان وسلام
يا عالم كون ... بالود مسكون
قوام .... قوام
قوماك يا خال ... حلال ... حلال
بأشواقنا نطوف
الدنيا نشوف ...
اشجار الفال ... الدانية قطوف
شان يربى طفل ... لا غم لا خوف
وإن قال بغم لا يلقى دبيس لا هملي وهم
خاطر مكسوف ...
إنعشا يبيت على صوت الأم
شان باشي تعم ...
من بيت لي بيت ....
يا بكرة يا ريت ... غنواتنا طعم
والعالم خيط ...
والقابض كان ذات مرة حلم
والرامي إنسان ما إنيقن
شان الدنيا زمان
قالتلو ابيت
يا عالم كون ... بالود مسكون
كون حرمة بيت
رتاي وحنون ... ويبقى الدناميت
من أجل طريق ... يمشيبو دقيق
أو قاطرة زيت
للصابر فوق ... ما فك الريق
يا سابق الصوت من تنزل موت
يا ريت خبيت فوق كتف الشوق
لي حال مفتوق ... بي إبرة وخيت
وعلشان دا يكون ... قوم حيي نضال
عمال البلد أم خير يا خال
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
مساورة
يا جمة حشا المغبون ...
في الزمن الهلاك منجا
تكون حانت مواعيدك....
يكون وكت المطر قد جا
شرق ضو البلد عيدك
وطابت نسمتو العرجا
تكون يا طيبة تمينا ..
وبدينا ولفنا ... غنينا الغنا الراجا
وبدت كأس المودة تلف ...
عشق من حلفا لي راجا
ألف في ألف .... حبابك ألف ....
إيه يا عنزنا القرجا
يا لبانة في الزمن المراحو نشف
يا جبانة للخوانة ... للعوج البدور ويلف
دميرتنا البتروي جرف
ضفيرتنا وعرش بيتنا
تميراتنا اللي كانوا وقف
أصابعين الرجال رصاص ...
ضمغ رأس البنية سقف
تكون دارة الزمن عمرت
تكون لينا وتكون فاقت ملامحنا ....
وتضاريسنا القبيل غمرت
دغش ساقت بوابيرنا .....
ونجت شتلات بعد ضمرت
ضراعك يا الولد كبرت ...
مراعيك يا البلد كترت
خدار ... خدرت
غزار ... غزرت
نضارا زين
برغم الصيف وصناتو ...
وسموم البين وأناتو
عصافير الجلد قدرت تباصر غيمة منتحرة
تضاير نسمة مندحرة
تضاير الغابة والصحرا
من الغمة وضلاما شين
ومنك يا دقين ننفك ...
تكون فكت عقدة الدين
عقب سيرة البلد سارت ...
على الدرب العديل والزين
بعدها الحال بلا مرسال ...
يجو العمال ...يجو الزراع ...يجو الكداح
يجو الناس البخبرو شليل ... وشقيش راح
قمريتين جناحن دلي فوق الصاح
من الغفلة وعساكر الليل ...
ولي الدنيا الجديدة جناح
صباح نندلى شدة حيل ....
بلدنا وما بنقيف بين بين
فيا خيالة عدو الخيل ...
ولي الطيبة البتملى العين
مدى وتياه ... في حزة القلب غنوة وآه
حنان بلدو ... وحنين منفاه
يا بت العز ... يا بت الجاه
يا هسع ديه يا بكرانا ,....
يا ماضينا ...... يا بعدين
نكون كنا ..... وبقينا متين
وكيف تكدح مواعيدك... مواعيدنا ونساورك وين
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
مصابيح السماء التامن طشيش
يا جاي مارق من دخول الغيث
شرايين التراب السايقة أوردة الوطن
قشرا اليباب ... نشرا العطش
كل ما سرت قطرات درب الرحمة...
في جوفو أرتعش حال الشجر
بال العصافير الخيالها مع الدغش
مشدوه متل خاطر طفل
من ضل برش راكوبة فوق حافة حجر
واقع سجر ...واقف بعد نقط المطر
ويستنشق إحساس السحاب
بين لهفة الطين والشمس
لمت وراء ضهر الجبال
في عبها المهتوك شفق
آخر رمش في الدنيا من جفن النهار
والليل ملقيلا الطرف
سعف النخيل مال منتعش
بال الطفل يرقد على ضهر الرعد
يجمع مصابيح السماء التامنة ويطش
لو يلقى راس رسن الزمن
ديك لحظة ما كانت تمش
شان يندهش
يتمطق الحلم البعد قرب يوافينا ابتعد
لو مدت إيد كان أنجبد
يا الدنيا بي ريحة الدعاش لو تنعرش
أو تنفرش تحت الفراشات بالبرد
فوقها الوعد صادق يمش
يا غادي منك فوت كلام الشوق
من القلب الخشم بابو البلد
شقيش مستف وحدتك
سايب بنات الحلة يا كمين ولد
تسترسل الأيام بحر
قبال يقالد القيف شرد
مالك رحيلك دون وداع زي الحرد ؟
رواسي راح والجو صلاح
كارب شراع
لا أنفر للريح لا أنفرد
لليلة شان نار الصراع
لهليبا بعدك ما برد
بدلت كيف سعة الوجود
بي ضيق لحد ؟
باغتنا ريح الفجعة ليل
فرنب في جوفنا
مرابنا الصبر شال سعن الجلد
صابنا الذهول
زي التكنو قبل دا ما فارقنا زول
قبل الرسول
ولة التقول
أول قلوب في الدنيا يغشاها القدر
بعدن تضيع منو الدروب
تطمبج الساحات حريق
يضوي الفريق المشتعل
كل الفريق شوقر وراك
يا جرحنا المابندمل
لا بان وراك شهد الغنا
ولحن الحناجر ما همل
صاقر خلايا أبو الدبر
يدبن حنايا نمل ... نمل
وين ماشي يا نبض الرحيق
سايب المشاعر ريق دقيق
تحت المغنين التفل
غنياتن الورطانة أو لوطانة
في الريق المقق
حتحت ورق في طين زبل
أوصاف على جسد الحبيبة بهق ... بهق
تحت احتمالها مرضرضة
زي لعبة ما استهوت طفل
يا نهنهات متكبرتة ودنانا يترنح دغل
أوطان بتتشايح عرق وإنسانا مجبور يشتغل
ما ضر من بعد الغرق
جوف الضحية إذا أنشرق
يا سيفي هوبي على الكتل
وين ماشي يا قمر الهناء
الكرمنا عن ساعة مرق
سايب لياليك لي نجوم
واقفات وجوم .. على فد رجل
فرع الغنا الميل هنا
على مين وراك حا يتكل
والشيل تقل
شعبا يشيلوا الشيلة في ..
لكن ظروفن هل تفي ؟
تحتاج جماعة من الرجال
الكنت فيها براك تقل
دارت فليتة من الحبال
الكان بقيلا فرد حبل
الخوف قلوبنا التشتهيك
تنشق من ذاتا وتنقفل
من بعد ما أتوحدنا فيك
ننفك قبائل وننكتل
من بعد ما أتوحدنا فيك
ننفك قبائل وننكتل
وين يا زمن ؟!
يا الدنيا بالطيبين تقل
وين الطبيبو أو المتل
قول يا خيالي وماك فسل
أطهر وزيزينا يعوم
في النيل مع الصير منشغل
ولة اليقوم يوم بعد يوم
يغسل دميمو عديل غسل
ولة الوطن قال ما بنوم
إلا الفجر يا ليل يهل
ماسك وضوهو من الغيوم
السالو سيل ساعة محل
كيف الدبارة ما العمل
لما القبيلة تشيل سيوفا السوق
تبيعا على عجل
تغشى المغارات الحشيش
تاخد بخور ودخان
ولفافات سطل
ورق المواثيق إنبهل
كاويق جريح
طارتبو ريح
كيمان مقنبرة للمديح
من غير ضريح
دارت من العهر الصريح
حلقات قمار تحت النخل
والخيل مجهزة للسباق
آخر النهار فوق السهل
لما الجدل يبقى الدجل
والأيدلوجيا هي البوليس كتال كتل
ليش البلاد ما تستباح
يوماتي كل ما الليل دخل
إشمعنا يا شوقنا الرحل
إشمعنا يا شوقنا الرحل
لو صدقت زرقة غناك
والبت نصيرة سنة محل
بنت الدهب بنيانا ما فات الركب
حزنت على الكيل الكرب
بعد الرجال سكنوا الترب
والدنيا غابة وسط حريق
تصبح كرب تنمسى ضيق
قامت نصيرة تحت تعب .. برت الفريق
يا أخواتي ستات البيوت
ناولني قوت قبال أموت
دور والمعاي ما فكو ريق
طبق الدهب بي مد دقيق
دهب الجبال صافي البريق
بي مد دقيق لو كان مريق
مطفية نيران التكل ... رغم الدخان
والحلة زي المافي زول ... رغم البطان
عين الشمس زي التقول
مدشوشة أو محمرة من حرقة غضب
والليل دخل كبت الفريق
قنعت نصيرة من البلد
قنعت نصيرة من الدقيق
كشحت على كوشة الدهب
وجات راجعة بي نفس الطريق
لا رحمة غير الموت قبل
لمت عيالا على عجل
أنشهدت واستغفروا
وقفلت على روحا الجبل
كانت نصيرة بتفتكر
جوف الجبال أولابا من عيشة الوبال
أولابا من جرس الرجال
ساعة يصيب الحال خلل
والبال مو يا
كم من نصيرة اتريحت وأصبح براك
رغم الفشل والاستياء
من مسخرة هادي الحياة
بي إيد تدهده في الأجل
بي إيد تجهجه للجراح
بي إيدين تفتح للدروب
والسايقة لابد يوم تصل
يسلم حشاك تبرد غبينتك ولوعتك
طول الأزل
ويا روعتك لمن تجادل دمعتك
دايما تكون .. فوق العيون
مرحيبه بالداخل عليك
من دنيتك
عبيت مواعين الصباح
ببياض ضميرك ونيتك
بعرق جبينك وبنيتك
بالشمس ماروق الرجال
وادي الجناين غنيتك
ما كان رحيلك غير دليل
للجاي ماسك سكتك
يا المصطفى الراجح حباب
كل المدائن بكتك
يا شدو عصفورنا البسيط
كل الخلوق إتوكتك
إن ما بتبيت فوق السبيط
طول مسافة ركتك
ما خوفك صياد غتيت
لا الريح قدر يوم سكتك
عذرا ... إذا حال الوطن
بالجاتو ذات ليل بكتك
بإيدينا سايقين الزمان
ماسكين خيوطو الفكتك
يا زول يا صاح زمن الغلط
تنزف في دمك يوم في يوم
لا انصر وشك لا عبس
أيش يعنى لو سالن نقط
من كل عابر نقطة بس
يصبح شرايين الزمن
تبقى الشوارع أوردة
وجسد البلد عافية عريس
زينة عروس ... والنيل رحط
هزة صحابة بي غناك
خلي الزمن طربان يميس
نوم في كتفو القرمصيص
والكون صاحبن وانبسط
شهي المدائن تنتفض
ما تمتعض
لحدي ما آخر فصيلة من المرابين تنقرض
موكب زفافك للأرض
شهداء الوجود تنقلي ليك
محتفية بيك شوقا ربط
مركب عبر عاتي البحار
شايل خبار الهاربين
كان البشارة لكل شط
علت ابتسامتك حين هبط
مامن جواز بينات يديك
لامن ربط عملة وشنط
نية رسول إنسان فقط
ما بينا بيناتن ربط
بأسمى مبدأ وأقوى خط
ظل مطمئن
نحن الوراك ما جانا عشقك من فراغ
لا نحن غنيناك عبط
الدم رطن في يومنا داك
ماك البقصر يا وطن
وما فينا قطعا
نحن ليك ما خنا قط
قدامنا زول خطالنا خط
ختالنا قول ما منو نط
يا بلد فوق اللميليس لا تهم
لا بتميد الأرض تحتك
لا مغنيك ينهزم
مد ليك نغمو المخالف نغمة الخانو النظم
يشطب الباعو المشاعر
ويرسم الإحساس رسم
في زمن كاتم كتم
ولة تدخل زي نسيمة
زي شعاع قمرة ونجيمة
أي بيت من غير تدق
لا في إمضاء رقيب غريب
لا تراويس لا ختم
غنوة من بق المغني
في القلوب بالفال تبق
تحرق السقط التدني
وبي تأني
تمشي تفتح للدروب
المارقة منك وداخلة مني
المارقة منك وداخلة في
الداخلة فيك ومارقة مني
من بعد دا ولا يهم
المغني مع قضيتو
يقضوا أيام في القسم
كلما تنبح كلاب كلما انكشح العذاب
كلما طفح السباب كلما عانى الجسم
كلما غروه سم
كلما كان المغني كالمعاني يبتسم
على التجني ... كانوا جني
شديد بصيرة وملتزم
سديد بصيرة وملتزم
ويا المغني الماندم
يوجد غنوتو وينعدم
خاتم المغنين يا ختم
يا مصطفى الصلاة والسلام
الحب عليك يبراك وسم
يكسيك هدم ... يكفيك اسم
النخلة طالت ..
والسبيقة بعد دا لي شنو؟ التنهدم
قول للبلاد
الطلوحت عينيها في دمع السواد
قول ليها ما غنى الأسف تتأسفي
لا حض نمو على الحداد تتكتفي
عاد عودو ما ودع شهيد
البال دوام في شهيد جديد
لأيام جداد لما العوالم تكتفي
وينهض جوادها المنكفي
ذات مرة ما عرف السأم
لما البلاد صادها الوخم
صارا المبغض دغما النغم
في سجنو يتطرطق ألم
ينسف مطاميس الوهم
بي سن قلم
كل القواميس الوهم
جافا المداد
لما الأماسي بقن رماد
خرم الزمن بي غادي قاد
وإندق في الخازوق سهم
دودر نويرات الفريق
قربن بعد كانن بعاد
كورك لنا وما كنا في :
- وين السيوف ؟!
في السوق أخدنابا السطل
هايصين كتر والخيل حفي
كورك لنا :
قبل المصابيح تنطفي وينزل سواد
اتفقدوا الخيل والعتاد
اتمنعوا الدرب العديل
أتصحو بالصبر الجميل
زمن الخساسات الخفي
ينزالف الشوق في الرقاد
قدح المواعيد ينكفي
في الضلمة برد الليل مخيف
قاسي احتمالوا على الضعيف
قاسي احتمالوا مع التعب والجوع شديد
فطن النويرات الرغيف
فطن الرغيفات الدفي
فطن الدفي إحساس الصباح
فطن الصباح كل العصافير تحتفي
وبي روعة الكون والعباد
كورك صداهو أعاد وأعاد
في أي درويش إترسم
عن نقرة النوبة العرق
في كتفو اكبر من شتم
أو قوقي حمامة مخرفي
فوق البيوت الجايطة دم
كورك براهو وكنا في
صانين وراهو كما الغيوم
بس كل غيمة مطرفي
على قدر ما اتحزم يلم
بالدنيا تصحى مخرفي
يجي ريح يسوق غيمو الململم ويختفي
غلبو التعب ... كوع على جرحو اليسار
سكت ... سكت كل الكمنجات اتكت
فوقو وبكت
أنشودة النزف الوفي
أغرودة أو زغرودة الموت الخفي
فيا من تحير في سرو الفنا
إذا الهاربين الجدد خيروك
يا تفوت يا تخون البيوت
تكون من أنا؟!
إذا الغالبين في أحد أجبروك
يا تموت يا تعضي السكوت
فكيف الغنا ؟!
وكت ما الشفوت بصوتك تصوط
تعلق بكارتو على الميضنة
تحرم عليك ملاقاة طيوفك
مناجاة ولوفك ... وراء المشجنة
تغمض تشوفك
تفتش حروفك
تعبر كلامك
تعد احتلامك بباكر زنا
فنم لا تهم
لأن السلطنة
ترصد الألسنة
نم لا تهم
لآن السلطنة
تقشر الألسنة
يسري قول الشعوب في المسام دندنة
مش بسد المطر والهبوب
الدروب الخبوب والخنا
وما بتعوز البشر من طرق ممكنة
يبقى يا حاكمين
كلمة العالمين مافي من يلكنا
و(لا) ما بتنكتم
فنم لا تهم
زمن ماهو هو
قوانين شذوذ حتى في الأزمنة
وطن يا جنا
وطن قول وطن
وطن من تبن
ولا قمحة هنا
وطن ... ثم من ؟!
وطن ... ثم من ؟!
وطن ... ثم من ؟!
وطن لا تمن باعك الزنزنة
وطن واحتمل
وطن وأحتلم
بي رجع الحبيب من متاه الضنا
في ناسا عزاز مشتهنك رزاز
في ناسا رزاز مشتهينك هنا
يحيض الحراز حين يفيض البحر
عشان يزدهر طول فصول السنة
هو الضد يكون
سكون في الغضب
غضب في السكون
هو المستقيم ... هو المستدير
هو اللولبي ... هو المنحنى
هي الكائنات في الطيور مسكنة
وتستخف بالصقور حين تفقع جنا
فهم وأدلهم عليك الصدام
عليك الكلام الجديد الحديد
عليك السلام يا شهيد الغنا
تموت ما بتفوت ...تفوت ما بتموت
تموت أو تفوت الشفوت العنا
ويظل الوطن سيد الأمكنة
ويظل نبع المياه والضو
قمحنا ...كسانا...عافية ...سكن
وين ما نسكتك نسمع ....
عصيفير الحكاوي رطن
متين ما نفقدك نلقاك تحانن بالغناوي وطن
مع إنو حباك ميتة الغربة ...
واستكتر عليك كفن
قدر وطنك مع الأوطان
إذا ما كان سحايبو أبن
يمرقن قش من الوديان
عشان تلقى الغلابة لبن
قدر وطنك إذا ما كان
قبل يقسى ويخيب ظن
حبيبو الطيب الإنسان
يطفر روحو روح الفن
وطن لكنو مو هولك
ولا الزول القبيل بي خيرو بات زولك
وطن محتل بشوق مختل
رؤى ووجدان
ينوم والجنة في خاطرو
يقوم مبتل
بنات الحور وما أدراك ما الغلمان
فما قولك في شافع ضال ومايل ميل
قيام ... والشيخ ورع باللحيل
بعد هانة ...نصايص الليل في زنزانة
على أمشاطك كما الزانة
أقيف حتى الفجر طولك
فما قولك في مولانا
بعد وردية الشافع
دخلبو في خانة وسخانة
وكجن .... غنالو مكتولك
وما معنى الأرض بالضبط أو بالربط
حين تكدح تكد حولك
تجيب الموية بالسرقة
غرامة ودردرة وعلقة
ويصادر الوالي محصولك
وطن ... لكنو مو هولك
وطن ما ليك فيهو وطن
مجرد واطة لمت ناس
لا علم لا غيرة لا إحساس
دلق منتوف من أي كفن
مصبغ ظن
وطن ... لكنو مو هولك
عموم الحلة والأحباب
غريب أصبح عليها زمن
عليهو أغراب قلوب وسخن
يسوطو هوس عذاب ومحن
ولكنك تغني وطن
بعد ده وطن؟!
عشان ما تفتح الأبواب
فيا دخلة هبيب الرحمة
يا رجع الحبيب إذن
تغني ... تغني ما أتيقن
يكون بعد المناحة الضيق
زغاريد الفرح طقن
فيا من يوت تغني وطن
تطمن في المرق وحيدو
لا خوفا عليك لا حزن
هل يعني النهاية الموت
ويتبعزق غناك سدى ؟!
أملنا الغيم حا يتسابق
على الأرض العزيزة فدى
وطنا حبيبنا رغم البيك هي الأشواق
حنينا إليك يظل دفاق
خيالنا عليك دوام ساساق
يخلي البينا بين عينيك
مساحة غزيرة ماها فراق
فما هانت علاقة حب
وفاء وتاريخ على الإطلاق
وما طال المطر بيصب
طبيعي إنو البحر ما راق
كما إنو العكار من طين
كمان من طين بيجي الرواق
صحيح إنو المطر ضايق
لكن التراب مشتاق
إذا ما العشق مندافع
كذلك حضرة العشاق
وطن علام ... وطن ساكت
وطن ما فيهو أي كلام
وطن آخر ... وطن قدام
وطن ماهل ... وطن قوام
مدد للفي البعيد لحاق
وطن نضام ... وطن ساكت
وطن ما فيهو أي كلام
وطن آخر ... وطن قدام
وطن ماهل ... وطن قوام
مدد للفي البعيد لحاق
نظل في حبلك الواحد
حبيبين ما في بينا فراق
مع إنك ما في بس لابد توافي
وتصدق الأشواق ...لا زنزانة تتلقانا
لا جبخانة لا أطواق ...بلد وأحضانا تتلقانا
جنة جدولها الرقراق
بنطلق همبريب الشوق
على لفح النوى الحراق
بنتعود لهيب الشمس
ما كوش من الرقراق
يا وطن الأراضي البكرة
يا وطن السماء البراق
من كناك وما خناك
وما فينا الضلالي العاق
وأنت المالي عيونا معزة
وين متراوح سايب عزة
ودابا أشتغلت فينا الغنية
دابو ضمير الدنيا أهتز
وبدا لي الكدح الكونو يتبن
شوقا يضوق للعالم لذة
وين متراوح وين
يا طالي باب النيل بحنين الوزة
وعمرك كلو تغني عليها
وتترجاها تعالي ... تعالي
أول ما هي بدت عينيها
استعجلت مشيت طوالي
كوركنالك ... يا الله
سبعة أيام في سبعة ليالي
رجع الصوت النازف آه
سرسار جدول داخرو العالي
كنا غلابة وليل وربابة
متلمين فوق قوز ونغني
قلنا : الصحراء تبتق غابة
حلم قريب ما هو تمني
تنسف فجأة القوز دبابة
وفينا غنانا يصن فد صني
اتجمعت سحابة سحابة
وبدا يتلقط طير الجنة
نفس الريح الحرق الغابة
قطم فرحك ليل الحني
رغم بهاظك وعظمة فقدك
إلا إنو الحياة ما وقفت
إلا أنو في ناس بيغنو
عشان تخضر الأرض النشفت
وناس لا عرفت ليك لا سمعت بيك
وتكنو غناك الليهم ماشي عليهم
تتلاقاهو الريح وتفنو
ورا الأحلام الرهفت وجفت
جفت وخفت خفت وطارت
طارت ورفت
روحك فوق الغنية أتلفت
بي قرقاب الصبر اندفت
وانشتت كواني كواني
قلنا الله يخون الخاين
لملمناك والعين بتعاين
مد النيل الوافي ضراعو
سويناك باجور وجناين
شيدنابك دور وجناين
حندقنابك حز الريح
حرقنابك شوقنا الكامن
أو قلنا بك ظل مطامن
ظل مطامن
إنو حا يشرق فجر العالم
بي بني آدم طيب وآمن
ونفضل نطلق نار الغنية
تالا الذمم الخاتي نظالم
تنسف تجرف دبش الدنيا
وتضوي سماك يا يومن التامن
ما في القدرك حتى الموت
حير قدرك هادي الصوت
حير صوتك هادي الروح
حير روحك عشق الناس
الوين ما تروحك تابى تفوت
من يتأمل فيك يتأكد
إنو الحق مبسوط ... مبسوط
يا الخليت الزمن الأطرق
زمن الموت مظبوط ...مظبوط
يا زول يا حبيب
يا الأجمل ما في الدنيا أتوزع فيك
اتفرع بيك
ومرقت شوارع فوق الأرض
تودي تجيب
تلاقي قلوب الناس بي بعض
تنتاوق فينا
تلاقي الحب في عيون كداح للشغل تخب
بنفس مفتوحة إرادة تهب
حامل بالحب تتوحم بيك
علشان الدنيا بلاهو الروح
تنغرغر حب تنقرقر جب
قدام عينيك مرت قافلة ... وكانت غافلة
يا يوسف في الدنيا الغافلة
ما في البترجل شان ينزل
أو ينشل ليك
عود عينك في الظلمة تشوف
وأحفر بيديك عتبات تطلع
يا أنسف بيك صنات الجب
يا ألزم فيك درابة الصبر
أنا جاي إليك فسراع فسراع
قلعت اشميق الشوق ملتاع
وفتلت الحبل مفضل باع
والحبل يتم
اشميقي كمل والتحتي نكت
تنقت ... تنقت والأرض حجر
لفيت ... لفيت .. باجاو وسجر
يا أما طوال وأنا رجلي عضير
وأنا نفسي قصير
من شرب الشيشة ...القمشة ...البنقو
ومضغ القات ..سف التمباك
لف الشاي الحب بورق القصدير
واحترت كتير
شرطت هدومي وانتم الباع
برطع ... برطع جيت جاري البير
- امسك يا يوسف هاك أمسك
يوسف سامعني وما بمسك
- طمني عليك امرق حسك
يا يوسف هاك أربط نصك
وأمسك في الحبل وما تنتق
يا انقطع الحبل يا أوقع في الجب دا معاك
لاحظ يا يوسف ، إني ضعيف
والحبل أضعف
من حيل موقف حكام الأمة العربية
قدام اللقمة الغربية خليك حريف
خليك أحرف من عرق النار الشعبية
الثورة النار المطرية كل إيد في جدار
شمشم واتحسس باقدامك
ما عدم الجب قبل اعدامك من ركن أحجار
الحفر الجب زول قدامك مو قبيلة نار
ولابد أكيد ساعة تما
لابد طلع من دربا ما
تبن بي إيدك كل الأحجار
تلقى الأحجار لابد
يوسف سامعني وما بيرد
يا يوسف حر الشمس شديد
وأنا بين حجرين واقف ويحيد
نازف حفيان ... خايف عريان
سايف عطشان
وآبار الأرض العربية آبارا جميعا قد قطن
والنهر بعيد وبعيدا جدا
دا طريق مقطوع بي فوقو قوافل ما عدن
من عهد صلاح الدين وجمال
كل الينابيع طينن قطن
والمطر العربي مشى أمريكا
وبأمريكا أتجنس واستوطن
والقال أتمدين جاء مكبرت
والقال إدين جاء مكفلت
أطلع عينيك توريكا
وين وصل الحال الاتقطع
مع إنك يكفيك الفيكا
دا كلام ملحوق خليهو أسع
يا يوسف أخوي يلاك أطلع
الله يرضيك ... يرضاك أطلع
يا يوسف هو ما عاد تسمع
فوق زيفة الأرض العربية
أنا حافي وساحت كرعي
عسمت كلماتي مع الرقبة
وداخت – يا ساتر – عيني
وشاخت أيامي الشمسية
وساخت أحلامي القمرية
أطلع يا أخي أطلع
لا أتعلق يوسف في حبلي
ولا أتفك الصبر من إيديا
يا يوسف ...يوسف .. يا يوسف
يؤسفني ... ما رد علي
أومت لي نسيمة العصرية
عن نخلة علقتها متكية
قيستها صنت وإتكربش
كدرومي الحال بعيني
وإنكرفس في ضل النخلة
وإنكفت اللحظة المبكية
قمرية تراحم قمرية
تحكيلا بحرقة مرثية
قمرية من القمري الشاهد
على خطو الموت الدغرية
تحكيلا وعينيها تناهد
عن كيف إنصدمت أغنية
وأنترمت أحرف من كلمة
وإنسهكت روحها المقرية
حين سابها مغنيها براها
لي رحلة بعيدة وأبدية
كيف قلد الوتر الموال
وانفلت النم من صقرية
وانشعبط في نجيمة الآهة
في غم الفجعة الكونية
والمرق الساند والشال
طقطقبو الدمع الهطال
وانشقق حائط كان ساتر
واترايم سقف الآمال
الكان بيبشر بالفال
والبسمة عيون الأطفال
الكان بيوزع في العتمة
في الضو على كل الحلال
الكان بيباصر في الزحمة
على كيف يتحدوا العمال
في الكتمة يرطب من نسمة
عرق المسكين الشغال
طوالي يصبر في العالم
والصبر الفاو الهقال
الصبر المنو البني آدم
بي عقل الزالف في الحال
الليلة خدودو بتنلاطم
ما كان دميعي وهوال
لا شق جيوبا في مأتم
صامد فوق عنف الأحوال
كيف خف قليبا تقال
لي زولو بأقسى الأهوال
ظل صابر قالت أمية
دفنتلها كمين تربال
كم بت شيالة ودغرية
الريح جزاها كما النال
أستغفر يا وتر الباكر
الدنيا قديمة بأموال
قمرية تقاطع في المرثية
خليهن يرتاحوا شوية
الفجع الواقع غلاب
والدمع بريح يا خية
أنفتق المرتق من صفحة
والموية الجات دافرة قوية
ناسا ممنوعة من الفرحة
من حقها تبكي بحرية
البينا وبينو من الألفة
ما بين الأرض وطورية
إحساس الراكز بالضفة
عازف في الجنة وحورية
ما حيلة العمر إن ما كفى
نفسا مطامنة ومرضية
ترجع لي ربها والمنفى
لي شعبا ما بنسى قضية
مرثية تشرق القمرية
وتنعشرق في قلوب الخلة
وين غايب سايب ليلاتك
يا قمر أيامنا بلا هلة
ولسع في مطاليق بي غادي
بيعاكسو بنيات الحلة
في ربابيط تقطع في الوادي
للبطلع فوقا ويندلى
لسه في مكبرت في قصرو
مع إنو لا صام لا صلى
والجنبو يركع طول عمرو
بي شمس يبوخ وينقلى
لسع في فوارق في طوابق
تنعلى ولازم تنعلى
ما طال الرزق البجي مارق
تتلاقا قبل ما يندلى
وين غايب سايب العالم
يا شمس ايامو بلا طلة
لسع في جزاير مخجوجة
وفي خلايق لايجة ومختلة
لسع في فلسطين محتلة
وفي فلسطينات راح تحتل
لسع في أفريقيا العريانة
وإنسانا يفرفر وينزلة
آسيا الكحيانة وصبيانة
تتفرج في رمي الجلة
لسع في أوربا الغبيانة
بارالا دليلا قد ضل
لسع في أمريكا تضاديكا
بي مالا ...رجالا ... وبالغلة
لسع في عمايل في بلدي
باسمي ... واسمك ...واسم الله
ولسع في حاكية عزة زاد
عن خيل بعيد متشرفة
راجي السحابة أبت تصب
لي نخلة روحها مشحتفة
مرق المغني يجيب مطر
هبت عليهو العاصفة
فنت من إيديهو الوتر
والغنية خرت نازفة
في حلقو أتعارض حجر
وهج النجيمة الشايفة
آخر نجيمة من النجوم
الخف ضوضاء أنطفى
قدر ما يتطاير شرر
فوق راس نخلتو الناشفة
النار عديل النار قبل
حلق العطش ما كان كفى
قدر المغني على دموعو يوقفا
قضف الحجر والعاصفة
حين لم في عضم المطر
بعد الصراعات والحفا
النخلة كانت في الكبت
جمراية ماتت واقفة
خالفالا شتلة عمر شهر
محنة مغنى وعاصفة
غلبت عليهو العاطفة
ضرع على الشتلة أم شهر
ولجنة النار اختفى
الباقي من ساق نخلتو
بجمرو فوق كتفو انكفى
يا أمة فرسانك تموت
مغدورة دايما من قفا
يا أمة تقابة وفا
وخانة مشاعر مرهفة
يا مدن شوارعا تستعيض
ياغنياتو عن النضال ضد الظروف المجحفة
بعضا على بعض الدروب
قاشرابا موضة وقندفة
يا كمبوهات بالطيبة والرحمة ...
المحاننة مترفة يا الفارشين الأرصفة
يا الحلمهم حلم الطيور عيشة حنان وموالفة
ويا البين بين أصابعين الوطن
حتى القيامة ولا الزمن لا أمة لا ريح تنتفة
يا الكلكم في العاصفة ودون عاطفة
من كان يسمع مصطفى
صن ... ووهج صوتو انطفى
ومن كان يسمع ما أصطفى
حي بي قضيتو وبس ... كفى
| |
|
|
|
|
|
|
|
|
 Re: سري للغاية ..........سوميتا (Re: ناجى الزبير الملك)
|
نورا والحلم المدردح
هي أقيفن ..
نورا فيكن ؟
نورا.. نقَّاحة الجروفْ..
نورا .. حلَّابة اللِّبيني
للصغيرين والضيوفْ
نورا ساعة الحَرْ يولِّع ..
تنقلب نسمة وتطوف
تَدِّي للجيعان لقيمة
تَدِّي للعطشان جغيمة
والمخلي الحال مصنقر
في تَقَاة الليل تدنقر
تَدِّي لي باكر بسيمة
تكسي للماشين عَرَايا
وفوقا إنقطع هديمه
***
ما عرفتن … نورا انتن .. ؟؟؟
قولن إنتن شن عرفتن ؟؟؟
نورا بت الواطة أخيتي ..
نورا أخت كل الغلابة
نورا حاحاية الشقاوة ..
نورا هداية الضهابة
الأراضي الياما أدت ..
نورا … بقت من ترابه
وماشي في الأعماق سحابه
مشتهنها .. والله جابه
الله جابه … الله جابه
للجنوب طبلاً يهدهد ..
ليل مشاعر ناس تعابه
وللشمال طنبور يسكت ..
دمعة للميتين كآبة
***
ما عرفتن نورا إنتن .. ؟؟؟
قولن إنتن شن عرفتن ؟؟؟
***
نورا …عايز تقرأ …. قالت
فوقا حيطة الدنيا مالت
ختت الكراس وشالت
منجلاً … صالتبو جالت
لامن إنجرتبو شالت
لي التراب لي أيدها كالت
***
ومرة يوم في الدونكي لدغت
جاء الفقير بالليل حواها
ويوم ملاها الهم قطايع ..
جاء البصير بالنار كواها
ونورا … ما قدرت تمانع ..
تقنع الناس المعاها
مرة شافت في رؤاها …
طيرة … تآكل في جناها
حيطة تتمطي وتفلع ..
في قفا الزول البناها
في جنينة سيدي سمعت ..
شتلة تصقع لي الوراها
الأرض ..لا بد ترجع …
للتعب فوقا ورعاها …
غيمة … والنيل موجو لاها
والعطش شقق شفاها
الشمس طبقت ضحاها
الخليقة لقت إلاها
نار …عقاب إنسان مكسر ..
فوق تلكيات متاهة
وضوء من الله .. رهاب مكتف
في وتيد الليل معاها
بين ربوع خضرة وخلاها
فسرت للناس رؤاها
وقالوا … جنت … ومو براها
ونورا وادت فوق شقاها
وصدت الأيام … تحش
تبني لي عصفورة عش
في السواقي تشوف عزاها
لما شوقه يسوي .. أُشْ !!!
تملا … تزرعْ ترعي … تقرع
للنهار في الليل تُخشْ
عرفت الشقا والشقاوة
إلاّ …ما عرفت تغش !!!
***
شايلة طولة البال من الله ..
ومن أراضينا الإثارة
وماشي تكدح طول نهاره
وترجي لما الليل يفلل ..
تسرق المي عشان خداره
عشان صغاره ..
ولما ترجع لي دياره
تنزف أحلام الفقارى
من عيونات الحيارى
***
لي غيار الحال تقش
فوقو لي الآمال ترش
نورا …تقعد صاحي تحلم ..
بي بيوت بي نور ودش
وبالمحبة تشق دروبه ..
ولي قلوب الكل تخش
نورا …تحلم بي وجود
ما مشت بينو القيود
أفضل أفضل بي كتير ..
من وطن من غير حدود
***
نورا تحلم بي عوالم
زي رؤى الأطفال حوالم
لا درادر ..لا عساكر ..
لا مظاليم لا مظالم
***
نورا تحلم ..
ولما تحلم ….. نورا ترجف
ولما ترجف …. نورا تحلم ..
ولما ريح الواقع المر ..
لي عشيش أحلاما ينسف
نورا ….. تنزف
وفي الوجود .. وجدانه يهتف
حالة .. تقرف ..حالة تكسف ..
حالة تقرف .. وتبدأ تقضف ..
ولما تقضف ..بالا يهتف ..
وتملا باله أحلام بتلصف
يوم حا تنصف يوم حا تنصف
نورا ..لسه بعيد ..هناك ..
وتبدأ تحلم ..ولما تحلم نورا ترجف
ولما ترجف نورا تحلم
صاحي تحلم ..
وصاح بتحلم
صاح بتحلم
بتحلم صاح ..
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
نادوس
(تعالي فإن الأيدي التي في كتفها صقر...
قتلننا ثم لم يحيين قتلانا)
الحال وراك كيفن تسر ؟
با قيلك أنتي بلاك في زين ؟
ما تهشم إبريق الرضا ...
خنست نسيمات السمح
والبسمة زي حبة قمح
لفحها وطفر طيرا كتر
أورث عصافيري الضنى
يبس غناها مع الفجر
هطل على الشدر الهموم ...
وشاشات نهارات العنا
عانيت وراكي جنس عنا
بوغ سهادي كرو النجوم
خطو المواويل إرتعش
حرس عصاتي بنات نعش
ومست فوق حجر البتول
هلوست بي صلب المسيح
درويش ... شردت من الضريح
شويمت بي ظلم الحسين
أومت على كم ميضنة
وما بين عيونك والمغول
ساهد بي قافلة الحروف
وإيقاع طنابير الزمن
إنصربع إيقاع الفصول
هبطت غمامة وراء الجبل
طرحت من الليل الجروف
شهقت شهاب إنساني خوف منك عليك
علي أي زول ... توك نياق شوق الضني
سرح عصا التسيار قبل
درب الحياة المرمول فنا
يا وقعة الواقفين هناك ...
يا وقفة الواقعين هنا
يا آفة الوطن الجريح ...
إشمعني لا وصلك دنا
لا آفة الزمن المشيح ...
قدرت رويحتي تيقنا
من جيتك المرقت بسيم ...
الدهدهك روحت وين؟
يا زين مرقتي مشيتي وين؟
غربل عليك ليل المدائن ...
الكان زمانك حالا زين
ناشدتها وفتش نهارات القرى ...
المتكية فوق شعب الصبر
ساندتها .... علم بطانا الشيطنة
غنيت معاهم ..... سودنا ...يا سودنا
لملمتهم والدنيا ليل والقمرة بت فاتا القطر
وصف لهم حتة شليل ردد حروفهم ردتها
وقف سحابي مع الدغش ... شهدتها
شهدت معاي على العذاب
الهد أضلاع الغبش ... راعفتها
تكلت خدودا على بكاي ...
لاقيت سجون ... جاهد بها
بي جية الجذب القديم ...
دخلت مكندك بالشباب ...
خنت التراب ... راودتها
فوق ها التراب ... واعدتها
لا إنتي جيتي ولا هي آه ...روحت وين
يا زين مرقت مشيتي وين
كل البنات جو من الملي
هشت بكت ... شدت حكت
وأزيارا والمرحات خلي
يا أنتي يا مرت العدل ...
ماك في صعيدا تترجي
روحت وين ...قوليلنا بس من الغلبان تجي
لو فينا أطلعي مننا ...أو برة أدخلي أدخلي
غنيتك البارح براي ..إنصلبتو التانين غناي
والليل بتواتاك شعر دونو إنعتاقك أو فناي
هيا مغنين الشعر ضد ها الزمان وطبنجتو
شعر الشعر ... شعر... أيوة علينا جاي
ونكر المغني كمنجو
نادوس يا فجر القصائد إندلق
ما حك جلدك مثل ظفرك فانطالق
إنا شرحنا لك صدرك ....
أو شرخنا فأنعتق
يا أنت يا كل الذين لأجل خاطرهم ...
طهوت غداة عقم زهور كلم لتنفتق
غضباً يؤرق موقديه ... كورته
رجما لكل من تنازل أو تخازل
أو تشاعر أو تداعر ...
أو تهاون أو تخاون أو تعاون
ضد فتحك أو أتاني ليسترق
تربت يداك ... تبت يدا كل الذين تغامزوا
وتهامزوا ..وتلامزوا ..وتقززوا .. وتلذذوا
من فيه جرحك يا وطن
نادوس آه ... نادوس يا ...
أمسينا يا نادوس وأصبحنا بيك يا أم
سا سوسة ضد السوس ... قلبا بلاكي يضم
ليل الضياع مهوس ... يحلم هواك يؤم
بعض الحصاد الروس... عالم نداهو يعم
ختيت هواك فانوس... بقالي شلتو وحم
جيت المدن باخوس...لاقيتو جالب السم
راشح هجير البوس ... وكل الوجود دم دم
كوركت يا نادوس ... أم الغبش يا أم
يا نخلة يا أبنوس ... يا سامبا يا تم تم
يا البيك غناي محروس دخري الغلابة هلم
دهمني كم مجروس ... وعكمت تاني وقم
حمرت في السحب المكبرتة ...
يا دخان يا ريحة يا قوادة للبحر المخنس
والعساكر والملس .... ما تختشي
بيوضة يا ماخدة الخريف ..
ما طمبرت عربانا شي
مستني في الزمن النزيف ...
القال بجي وفات بي وشي
رشت النهار بالصبر أبت المغارب تترشي
دقست سواقي المتعبين ...
كايسالا فيها عقاب عشي
بيوضة آه ...آواه لو الكلمات حصي
قالت لي الله أقرب فرج
أواه لو الكلمات لهب ...
نرجمبو وش الزمن القسا
قالت في إطن الليل وهج ...
هدام أمان الناس نسى
دنقرت للأرض المسربلة بالسراب
فرغت بي غلبي العوج
فقدت أيادي العصا ...
شديت حزامات الجلد تالا ضرا الواطة
كوركت صد ... أرجع يا ولد
طورية أبوك تراها دي ...
عاند كواريكك مشيت ...
طورية أبويا تراها ديك
لفحوها لمن قام يصلي
خطاب بكارات الغمام ...
مغرب صباح ليلة دخلتو على البلد
حرق عرق ... الفي الكلام عطشان
سقيت عرق الشديرة من المطيرة
الفي كان حس العساكر لا ورل
قالت لي أجر ..شدرة غنايا جريك ضرايا
جريك ضرا قبل العساكر ما تصل
قبل الدرادر ما تبين
وكانو العساكر في وشي
قت أقول وقع طينة الجداول ماها زي ...
طينة جسارتك يا بلد والكل طين
يا نبوت... دقة تفوت ... ولا حلم يموت
النندق ... نندق ويفضل باقي لهيب الحق
حق الناس ينزل في الحلق
أو ينعارض شوكة حوت
يا كهنوت اليجي كبروت
يا جبروت اليجي كبروت
كابروت عشم وطن الغلابا ...
الحال بلاك تب ما بتسر
ما بان صباح أو عسعست ...
قدامنا ليلة تزيدنا ضر
أوتارنايا آخر الغنا ...
حردان عشياتا النغم
فرغت مجالسنا البلاك ...
عنكب على أبوابنا السأم
أنزح ...كفانا كضب رياح
وبكاء رعود وضحك برق
العشب مالي حشا الأراضي ...
حواهو لما العش حرق
الشعب حي ... بس كيفن تصد ...
يملابك المليون عرق
كدابنا في الثرى في رجاك ...
ما فينا زولا ما عرق
ساوين عصا الأشواق مرق
عربان ونوبة نهاتي بيك ...
والزنج تتمناك عتق
ورا يا وجع ... هيا يا طلق
صد لي ملامحك يا حراز
ريح العوارض غربت
فرتق ضفايرك في الرزاز
جية العصافير قربت
لاقيتا في غابة مديني وسط شتيلة حبحبت
على عرش صغارا الدوب حبت
ما وقف الليل لا الهجير ...
كم جف ريقا وورتبت
لاقت من العنت الكتير ...
ملت الفيافي ... أحد أحد
فيدة جناحي بلا أطير ...
الموت ولا العيشة النكد
يا نيل مدد ... يا غيث مدد
ندي دمر نادوس ونشوغا ...
وخلي الناس الصبحت يوم ...
من حيات الخور ملدوغة
خلي الصوت الكبتو الجوع
يلقى براحو ... يضوع ويضوع
الصوت العالي .. يا صوت الناس
التحت الواطي الما مسموع
| |
|
|
|
|
|
|
|
|
|
Re: كل سنة وانتى طيبة (Re: ناجى الزبير الملك)
|
كرور
انشاء السنة الجاية فى السودان
وانشاء الله البوست ده ما يختفى عشان الواحد وكت ما يحب يقرا لحميد يجيهو راجع على العموم حاولت انزل قصائد بالصوت او بالصورة حلفت طلاق ما تنزل احتمال ماعك تنزل حاولى انتى.........
اها الهدية وصلت والله لسه............
دى 23 قصيدة لحميد محفوظة الطبع كدى القى واحد لعب فيها ...(كان ربنا هون)
مع تحياتى
نــــــــجو
| |
|
|
|
|
|
|
|
|
|
Re: سري للغاية ..........سوميتا (Re: ناجى الزبير الملك)
|
أنادي القوة الوحيدة فيّ، و التي تتدلي من الأسلاك الشائكه المضروبه حول بعدي الفضائي و الزمني أشلاء،،كأنها أشواق الخفيف إلي ما سيمثل به إلي قصر المواء الأشيب،،
عيد ميلادي جاكم قبليني؟
شفت المسافات دي بتسوي في الناس شنو؟
ناجي عزيزي و صديقي جداً،، من أجمل الهدايا الكلام السمح،، و حميد كان أساس لكل جميل منظوم في ورق عندنا،، ما أسعدني بك صديقي،، و ما فرحتي بعيد ميلاد لم أحسها من قبل،،
فالنكن أصدقاء في كل السنين و بكل العمق،، فهذا رجاء و دعوه ،،
تمنيت لو أقدر أقول شكراً لكن دي أبسط الكلمات مقارنةً بالجمايل الأهديتني ليها من كل كلمه جميله،، من كل كل ريحه تذكر بتفاصيل وطن إقترب من أن يضيع في الذاكره،،
ناجي الشكر ألااف ملففه تسد ديون السودان و الدول المجاورة،،
سوميتا
| |
|
|
|
|
|
|
| |
Raja
Soumeta
فيس بوك
تويتر
انستقرام
يوتيوب
بنتيريست