دعواتكم لزميلنا المفكر د.الباقر العفيف بالشفاء العاجل
|
|
 كـــلام اللــيل ( العدد لأول ) حســـين محى الدين
|
--------------------------------------------------------------------------------
مشاهدات .. مفارقات .. مواقف
(أربعة بي ألف) ،، (برّد.. برّد) .. تصحبها طرقعة (الكوز) ومنظر الجركانة (المُندي) بضم الميم يستفز العطش،، الباعة المتجولين وماسحي الأحذية (الأورنيش) ورنش ورنش .. سرعان ما ينتبه بأنك لابس (سنفجة) أو (تموت تخلي) .. صيحات أخري هناك وهناك.
وهذه معجزة أخرى .. "صباع أمير ياباني خمسمية .. مفك بيان خمسمية" بإيقاع منتظم جداً
"ربنا يساعدكم يا جماعة" أمراة مسنة تستجدي لقمة العيش، وتشك من جور الزمن.
درجة حرارة الجو 45 درجة والشمس في نص السما كما يقولون.
برغم ذلك تجد زحام المارة وأصحاب (الدرداقات) مفردها درداقة بعجل واحد وحد لكنها أصبحت وسيلة (أكل عيش) مرموقة.. (أسأل ناس المحلية)..
عربي.. عربي.. عربي، إيقاع شبيه بالدليب (الحافلات الصغيرة بموقف البوستة) التي سرعان ما تختفي عند ظهور (بتاع الحركة).
إذا فكرت يوما أن تعد دراسة عن الموسيقي والإيقاعات الشعبية فما عليك إلا أن تجلب (هيدفون) من (عمارة البرير) وحجر بطارية مغشوش (تجاري) وتبدأ بالتسجيل من هنا..
(السفارة في العمارة) (صعيدي في الجامعة الأمريكية) (الغواصة) ... وحتى (التايتانك) تجدها هنا بجوار الجامع الكبير حيث حلت مجموعة من الطبالي الأنيقة محل (المتسولين) هناك.. على غرار تلك (الطبالي) في حواري امدرمان القديمة التي كنّا نبيع فيها الحلوى والبالونات في اجازات المدارس.. مشروع تاجر المستقبل الذي لم يكن يعلم ولم يسمع (بالقيمة المضافة) و(بدمغة الجريح) (هسة الجاب السياسة شنو).
المهم أنشئت محال تجارية (حلوة دي) كبيرة (بوتيكات) بشارع الدكاترة بالقرب من (نادي الخريجين -سابقا) لغاية صينية مستشفى امدرمان (التعليمي)، تباع فيها آخر الموضات من (كاشف الرقم) إلى الأحذية (الإيطالية) .. والثياب (السويسرية) البلبسنها (النسوان) جمع مرة بالعامية (السودانيات).. ولا ضرر من تشغيل أشرطة الكاسيت والـ CDs بصوت مرتفع قليلا فالشارع ما حق زول والما عاجبو في (ستين)..
***
أدعية منقولة:
اللهم بعّد عنّا ناس المحلية وناس الخدمة الوطنية .. ويسر لنا اللهم حق الفول والطعمية.. وتفصيل الجلابية (ما ضروري تكون بيضا ولا مكوية)..
اللهم ارحم الموظفين والموظفات المعذبين والمعذبات المنكوبين منهم والمنكوبات أحياء وأموات، اللهم شغل الخريجين والخريجات و .. (في اللحظة دي تحديدا الكهرباء قطعت).
***
تفتيحة:
• المفتّح هو: سائق الحافلة الذي يشحن من السوق العربي ويقول الشهداء – ثم يشحن من الشهداء ويقول الاستاد!!
• الداقس: البيدفع ليهو!!
• والمفتح ايضا: البضرب عصفورين بي حجر.
• المُغمض هنا: البياخد شاكوشين في شهر.
***
أمثال:
العين بي حسين "عرفت سموني كده لشنو!!"
الزاوج قسمة ونصيب "قصدك شنو يعني!!"
***
شاكوش سرييع:
قبل الحفلة: كشَف ليها!
أثناء الحفلة : ابتسمت ليهو
بعد الحفلة: معليش أنا مرتبطة..!!
***
زوار نص الليل:
- يا راجل قوم في حرامي في الحوش!!
- يا وليه نومي نومك، حيسرق شنو يعني الـ(3310) قاطع استقبال ليه شهر وبنطلوني (عبد الواحد) ما فيه حتة ما اتخيطت وتوبك (أبو عشرة) ده ليه سنتين بقى مصفى من كترة الغسيل و المكوة على الأقل نكون وفرنا صابون،، عليك الله نومي نومك ما ترفعي لي (الضغط) لأنه (الحبوب) ذاتها خلصانة!!
***
سعال وجاوب:
- لو سمحت الساعة كم؟؟
- معليش يا أخت الساعة ما شغالة!!
- طيب لابسها ليه (قشرة ساااكت يعني) عالم عجيب!!
***
سؤال العدد:
شاعر ومُلحن ،، سياسي ،، صاحب مجموعة شركات استثمارية ،، رئيس نادي عريق لكرة القدم... عرفتوه؟؟
(....................) بس ياهو ذاتو!!
|
|
 
|
|
|
|
|
|
|
|
Re: كـــلام اللــيل ( العدد لأول ) حســـين محى الدين (Re: هاشم أحمد خلف الله)
|
Quote:
داش خـلاص والـلـه عـرفـتـا
بـس مـن كـلامـك دا
إنـك صـائـم ومـهـضـرب كـمـان .
|
والله يا هاشم ضحكتنى ضحك مليان
بس المهضرب دا ما أنا
دا حسين محى الدين
الزول دا بكتب شعر عجيب جداً
وبهضرب بمزاج راقى فعلاً
وبجيب ليك بعض أشعارو تشوق
مقطع أول
سقط سهواً
صباح منك،
سكن جواي .. لكنك،
بتعملي في بدل فاقد!!
شوف بالله الزول دا كيف
شكراً يا هاشم
سلمت
| |
|
|
|
|
|
|
|
|
|
Re: كـــلام اللــيل ( العدد لأول ) حســـين محى الدين (Re: mohmed khalail)
|
كلام الليل العدد التانى )
للكاتب الشاب حسين محى الدين
--------------------------------------------------------------------------------
برية وكده:
(محمد الامين) غنى نور العين لـ(وردي الوطن) في يوبيله بطريقة ادهشت الجميع، فقال وردي مشاكسا ربنا يحضرنا (خمسينك)، والمعروف ان (اليوبيل الذهبي) هو الاحتفال بمرور (خمسين) عاما على الحدث، يعني بالحسابات (خمسة سنين) معناها باقي لود الامين (خمسة واربعين سنة).. في (الكتشينة) كان جروك (خمسين) معناها قيامتك قامت واتجرست جرسة شديدة، حكي لي صديق أدي جزء من الخدمة الوطنية (بغرب) السودان ان الطبيب هناك وتقني المعمل بلعبوا (14) بي اربعة فرد.. هنا يمكنكم تخيل الملل وعدم الموضوع لي ياتو درجة.. و(الخمسين) جنيه الجديدة لها عدة فوائد فهي تصلح كـ(برش) للصلاة و(غطا) بالليل (بركاتك) يابنك يا مركزي .. والشاي في (الخمسينة) معناها شاي مضبوط ومافيه اي كلام.
***
مانشيتات:
اتفاق إطاري بين (حركة) تحرير (جبره) والبعوض
أخيرا نجحت محاولات المواطنين بمدينة جبره لاتفاق وقف(إطلاق النار) اعتبارا من الساعة السابعة مساء اليوم، على أن تستكمل المباحثات للوصول لحل نهائي.
إزالة أسوار حدائق الهيلتون
أيمانا منها بمبداء (الحرية)، وتأكيدا لانفاذ (حقوق الإنسان)، ومن اجل إدخال الفرحة في نفوس الشباب قررت ولاية الخرطوم مجانية الدخول لحدائق (الهيلتون)... ويلا (حبوا) اهو بقى مجان.
***
أغاني:
"خليت عشانك كسلا"
مسطول بكلم في القاش
"قالوا لي انساه وامسح من خيالك ذكرياته"
كيف دي!!؟؟
" أنا حبي ليك بدري انتهي .. وزي الما كان بيناتنا شي"
مشوكش بطمن في نفسو
"حبيبي اكتب وأنا بكتب ليك"
موظف بالبوستة.
***
خريفيات:
نكتة: واحد مشي الدكان يجيب (صلصة) جاء لقي (البيت) مافي.
مستثمر يعرض (لانشات) لناس توتي (صالحة ) للسكن.
تخفيضات هائلة في أسعار (غرف النوم)، خبر بصحيفة (ناموس دايلي)
***
جداد:
المطار (الجديد)، الكبري (الجديد)، التوقيت (الجديد)، الجنيه (الجديد)، الـ ... (الجديد)!!!
الجداد ده كلو لو (ببيض) كان هسة (غنينا) عديييل كده.
***
كليب:
- (طه سُليمان) .. بضم السين كما قال (ناجي حسن) المذيع بـ(تلفزيون السودان).. أصدر كليب جديد بعنوان (عايز أعيش)
- كلام جميل
- طيب المشكلة وين ؟؟؟
- ما قال عايز يعيش وين!!!
***
أمثال:
"السترة والفضيحة متباريات" يا ربي ماشات وين!!
" ليك (اللحم) ولينا العضم" مثل بقوله كل ولي أمر للمعلم وهو متأكد انه مافي لحم أساسا.
" الحجاز ليه عكاز" عشان كده أنا في حالي.
"الشمار كتل الحمار" عرفت يا غبي!!
***
كلام في الحب:
حبيتو بيني وبين نفسي
وما قلتوش ع اللي في نفسي!
________________
*آخر كلام:
الريد ما ببقى خوٌة!!
| |
|
|
|
|
|
|
|
|
|
Re: كـــلام اللــيل ( العدد لأول ) حســـين محى الدين (Re: mustafa egaimi)
|
حســين محى الدين
هو القائل
والراسم بالشعر
مسافة السكة وارجع ليك
وكان ما جيتي عذري معاك!!
وذنبي عليك !!
خطاي تعبت
بلاك تكمل المشوار
وراك جنيت
واستينت
وعودك لي
مسافة السكة جاية عليك
ما تتأخري....
أمرقي من نبض القصيدة حروف
أمرقي من نيلنا وارضنا جروف
أمرقي حنية وفرح
نقابل بيه زول ملهوف
بنادي عليك
متيم بيك
مسافة السكة أرجع ليك
والون فرحي من عينيك
مصطفى
لك الود
| |
|
|
|
|
|
|
|
|
|
Re: كـــلام اللــيل ( العدد لأول ) حســـين محى الدين (Re: mohmed khalail)
|
بوحــميد
هاك شوف حسين دا قال شــنو
بيــــــــــوت ....
حـلـم الـبـذرة الـحـب الأزلـي
تـنـبت تــدي الـفـقرا بـيوت
بـيوت فـي الـزمن الـواقف عندك
ديـمـة مـوشـح بـيـك سـكوت
سـكوت مـن شـدة طـعم الـفرحة
بـيوت الـفرحة سـكون وخـفوت
خـفوت الـصوت لـو يـطلع منك
كــل مـعـاني الـوحشة تـفوت
وأنـا راجـيك فـي نـفس الـشرفة
شـايـل وعــدك وأبـني بـيوت
بـيـوت الـعشق الـفيها مـلامحك
أحــــلـــى بـــيـــوت
و أفـضـل أحـلـم بـيك واغـني
أغـنـي وأغـنـي عـشانك اكـتر
واحـضـن طـيفك سـاعة يـظهر
و أبـقي أمـنى الـروح بـالصوت
قـولـي بـحـبك أيــوه بـحـبك
يـرسم صـوتك وعـد اللقيا الممدود
زي حـــبــل الـــصــوت
تـنـبت تـبـقى الـبذرة غـناوي
وأحـلى حـكاوي واجـمل صـوت
ووعد اللقيا وساعة وصلك تبقى تقرب
وتـــبـــدى تـــفـــوت
كـل الـمدن الزايفة وعايشة سكوت
***
حـلـم الـبـذرة الـقمره تـضوي
وشـمـسا تـطلع ومـويه بـتروي
وجــــــدول يـــفـــوت
وحـلـمي أقـابـلك و نـبدا نـعلم
كـل الـناس كـيف تـرعى البذرة
ولـمّـا تـقـوم الـبـذرة تـضلل
كــل الـكـون بـالحب وتـفضل
يـــزيـــد إحــســاسـنـا
وحـلـم الـبـذرة يـكون نـبراسنا
وأحــــلـــم بــــيـــك
وأجـمـل صـورة تـكون عـينيك
ويـفـضل حـلـم الـعاشق "بـيت"
بــيــت مــــن طــيــن
أو حـــتـــى رســـالــة
وقــــلـــب حــنــيــن
حـلم الـبذرة تنبت تدي الفقرا بيوت
وحـلمي أجـمل كـل غناوي الكون
وألـون طـعم الـفرحة عشان عينيك
***
وأنــا زي طـيـفك يـحلم يـرسم
جــوه بـحـور الـدهـشة غـناك
ويـدوزن طعم الرعشة بنفس الصوت
وطـيـفك أنـتـي كـان الأجـمل
كــل مــا نـفكر فـيه يـتجمل
أو يـتـجـسد هــمـس الـوعـد
صــوت الـبـحر الـشايلو الـمد
يـغـمر يــدي الـخـير لـلناس
عـشـان الـعشقو مـلامحك أنـتي
ولــــــون عــيــنـيـك
وكــل الـبـحلمو يـبـنو بـيوت
حـلـم الـبـذرة تـقابل الـصوت
قولي بحبك تنبت تبقى البذرة بيوت
| |
|
|
|
|
|
|
|
|
|
Re: كـــلام اللــيل ( العدد لأول ) حســـين محى الدين (Re: تماضر الخنساء حمزه)
|
Quote: حـلـم الـبـذرة الـقمره تـضوي
وشـمـسا تـطلع ومـويه بـتروي
وجــــــدول يـــفـــوت
وحـلـمي أقـابـلك و نـبدا نـعلم
كـل الـناس كـيف تـرعى البذرة
ولـمّـا تـقـوم الـبـذرة تـضلل
كــل الـكـون بـالحب وتـفضل
يـــزيـــد إحــســاسـنـا
وحـلـم الـبـذرة يـكون نـبراسنا
وأحــــلـــم بــــيـــك
وأجـمـل صـورة تـكون عـينيك
ويـفـضل حـلـم الـعاشق "بـيت"
بــيــت مــــن طــيــن
أو حـــتـــى رســـالــة
وقــــلـــب حــنــيــن
حـلم الـبذرة تنبت تدي الفقرا بيوت
وحـلمي أجـمل كـل غناوي الكون
وألـون طـعم الـفرحة عشان عينيك
***
وأنــا زي طـيـفك يـحلم يـرسم
جــوه بـحـور الـدهـشة غـناك
ويـدوزن طعم الرعشة بنفس الصوت
وطـيـفك أنـتـي كـان الأجـمل
كــل مــا نـفكر فـيه يـتجمل
أو يـتـجـسد هــمـس الـوعـد
صــوت الـبـحر الـشايلو الـمد
يـغـمر يــدي الـخـير لـلناس
عـشـان الـعشقو مـلامحك أنـتي
ولــــــون عــيــنـيـك
وكــل الـبـحلمو يـبـنو بـيوت
حـلـم الـبـذرة تـقابل الـصوت
قولي بحبك تنبت تبقى البذرة بيوت |
يــا داش عـلـيـك الـلـه الـهـضـربـه كــيـف !!!!
Quote: كـلـمـنـي حـاول حـس بـي كـلـمـنـي ارمـي الـلـؤم عـلـي
واحـد صـائـم بـيـكـلـم فـي الـجـمـرة الـخـبـيـثـة |
| |
|
|
|
|
|
|
| |
هاشم أحمد خلف الله
mohmed khalail
معتز تروتسكى
ismeil abbas
فيس بوك
تويتر
انستقرام
يوتيوب
بنتيريست