|
|
 ايها الشعب (الأعزل) .... سلام
|
بسم الله الرحمن الرحيم
ايها الشعب (الأعزل) .... سلام
(-) الأسم : الشرطي .
(-) المهنة : (مع ضحكة قصيرة) ... المهمات كثيرة أولها طبعاً حماية (النظام الحاكم) من المواطنين(العزل) بكافة الوسائل (الشرعية) ....(والمشرعة) .
(-) ماذا تعني (بالعزل)..؟.
(-) يعني بالنسبة (للغير عزل) .. طبعاً في (أتفاقيات) ..وكدا..مع عباقرة الحكم المتوفرين حالياً ...!!
(-) مهمات نجحت فيها...؟.
(-)طبعاً نحن نجيد (الكشات) وأزلال (الفرَاشة) .. وستات الشاى..والباعة المتجولين وتسهيل مهمة موظفي الجبايات وأظهار هيبة الدولة في الشارع العام ... وأيضاً العمل علي (دعم ) خزينة الدولة بما امكن من جبايات ورسوم استخراج الأوراق الرسمية ومخالفات المرور (المشرعة) والجمارك ... وخلافه, ولنا أمتياز مطلق في اقتحام مناطق السكن العشوائي والبؤر (الاستيطانية) المخالفة لطبيعة الوا... اقصد (الدولة) الاستثمارية ..و
(-) مقاطعاً .. طيب ... مهام فشلت فيها ..؟؟
(-) أنت قاصد الاحداث التي تلت وفاة (د. جون قرنق) ... وكدا..واحداث سوبا .. ومحاكم السلاطين .. وحماية منسوبي جهاز الأمن في عمليات اقتحام الجامعات (سابقاً) ... (وشوية) مخالفات وسط الطلاب ...(مش كدا) ... رغم أنك أنت عارف انو أنا كسلطة تنفيذية محكوم بالقرار التشريعي والسياسي ..ومرهون بمن يوفر لي الغطاء المالي لتنفيذ هذا الدور (الوطني) .
(-) طيب ..قوات فض الشغب دي ما (تودوها) دارفور ...!!؟؟
(-) يا زول دارفور دي (بحلوها) بالبمبان والهراوات والرصاص المطاطي ...!!؟ بعدين في جهات بتتولى موضوع دارفور ده وقادره تفرز بين المواطنين (العزل) ... و(عزل) المواطنين عن ممارسة حياتهم الطبيعية بوسائل نتمنى من الله أن يوفقنا في تطبيقها (هنا) مع كل المعارضين وصناع الفوضى .. والطابور الخامس ...!!!
(-) طيب أدواركم شنو في حماية المجتمع ..؟
(-) يااخ ..نحن عندنا شرطة أمن المجتمع ...(تجيب الشارده من أضانا).. وهناك تنسيق مع صحيفة الدار..وايضاً عممنا التظليل على كل سيارات الشرطة وخصوصاً (قادتها) لاداء الادوار الاجتماعية المنوطة بهم ..وايضاً (بيت الفتيان) أي زول مار بكبري كوبر بشوفوا كويس ...ومكافحة المخدرات .. واستطعنا تخدير كل الشعب السوداني بواسطة ادخال مواد أضافية في (البمبان) .. ومافي تهريب ولا دعارة منظمة .. ومراقبين كل كافتريات السوق العربي .. وباعة الموبايلات و(اللابتوبات) ... والعربات التي نمتلكها نرصها من هنا لمدني ... (والمجتمع دا ما انحنا زاتو أنت قائل شنو ).
(-) طيب ..الفيضانات دي عملتو فيها شنو ..!؟
(-) والله انحنا وفرنا خيش البلد كلو (والله يستر على الموسم الزراعي ..هاها..هاها) ...وصفارات انذار عرباتنا حاميه الناس النوم...وكبار قادتنا (مرابطين) في مكان الحدث ... (وما مخلين دعاء) ..المشكله أنو البحر (زودا حبتين الدور دا).
(-) وبالنسبة لعمارة الرباط والمباني المهددة بالانهيار...!!؟؟.
(-) نحن (سوينا) العماره بالارض ... و(ساوينا) الموضوع ... وكل المحاربين القدامى والجدد في مواقعهم ... والدولة (ردمت) الميزانية للدفاع وحيكون في (بنا) جد ... ودي دعوه لكل المقاولين يفتحوا عينهم كويس..وانحنا حنعمل على التاثير المباشر في تكوين (عمران شرطي) ليس له مثيل في كل دول العالم .
(-) طيب ... والمباني الأخليت ..؟
يرن الهاتف المحمول (الأنيق) ...
(-) ايوه يا جنابك ...شنو ... مظاهرة سلمية ...حاضر جنابك ... انشاء الله ولا (رأس) يسلم ... ايوه يا جنابك (حنسلمهم) لجهات الأختصاص ... طبعاً ... ولا (نيجاتف) ما بنخلي ... ايوه جنابك جاهزين لمسيرة (الغضب) حنشيلهم في (عيونا) ... أنت تأمر ... ربع ساعة وتسمع أخبار (حلوه) ... الله يسلمك ويسلم البلد منهم ... طيب ..مع السلامة....!!!!
ملتفتاً علي وكأن لم يشعر بوجودي من قبل ...
(-) عن أذنك يا أستاذ عندنا مظاهرات وشوية فوضى بتاعة (صعاليك) المعارضة (نفرتقا ونجي نواصل) ... قال سلمية قال .... (قلة ادب ... عطاله) ..
(-) يا وكيل عريف ... حرك ستة عربات مجهزه ... في شارع (الجامعة) ... وجيب للأستاذ ده قهوة (لغايت) ما نجي ...
لم يكن بعيداً من أعيني تلكم العبارة التي تقبع خلف القائد (الشرطي) وهو يلقي بتعليماته تلك ...
(الشرطة في خدمة الشعب) .........!!!!!!؟؟؟؟؟؟؟
ايها الشعب (الأعزل) .......سلام
6سبتمبر 2006
|
|
 
|
|
|
|
فيس بوك
تويتر
انستقرام
يوتيوب
بنتيريست