تلفون مـن السودان ...إلى القلب

مرحبا Guest
اخر زيارك لك: 03-29-2024, 02:15 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف الربع الثالث للعام 2007م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
07-04-2007, 11:00 PM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2605

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
sssss
تلفون مـن السودان ...إلى القلب

    يرن الصوت المبرمج كنغمة في الجوال [ صوت أسرار في رائعة العطبراوي] أيها الناس .. نحن من نفر عمرو الأرض ... ألو .. مرحب ..
    المتصل : الووو [ صوت عذب جداً .. يوحي بأن صاحبته أنثى رقيقة ] ..
    مرحب .. منو معاي .. ألو ألو .. الخط قطع .
    والقلب أنقطع أيضاً .. ياربي دي منو ... ياربي دي منو .. أحاول إتصل عليها مرة أخرى .. لاكين الرقم ماظهر في الجوال .. تكون متصلة من مركز إتصالات .. والله حاجة عجيبة .. الصوت ده ماغريب علي .. ياربي دي تكون مــرام ؟!
    مــــرام .. ياجميلة الجميلات .. أين أنتي .. هل مازلتي مرام التي تزرع الفرح .. مرام .. ياروعة قادمة من زمن الإبداع .. زمن طلاب جامعة القاهرة فرع الخرطوم .. عندما كان للفرع عنوان وكان للطلاب إتحاد يزرع العلم ويفرح القلوب.
    كان ذلك في الزمن الجميل ... عطبرة .. حبيبتي .. جائني صديقي إيهاب وأبلغني أن طلاب جامعة القاهرة فرع الخرطوم إفتتحوا فصول تقوية لطلاب الثانوي العالي كان ذلك سنة 1987م، واخبرني أن التسجيل قد بدء وسوف يكون مقر هذه الكورسات في مدرسة الخدمات المتوسطة بنين عطبرة.. فقلت ليهو فرصة يلا نمشى نسجل .. وحقيقة أول سؤال كنا نود أن نسأله ولكن يمنعنا الخوف والحياء .. هل الكورسات مختلطة ولا عذابة .. ولكن للطف الله بنا عندما دخلنا إلى المدرسة وجدنا عدد البنات أكبر من الأولاد .. ففرحنا فرح شديد وذهبنا إلى الإدارة وطلبنا التسجيل وقد كان . وأخبرونا أن الدراسة تبدأ يوم السبت القادم .

    عندما حضرنا يوم السبت كنا ستة طلاب فقط حيث أننا كنا في الصف الثاني الثانوي .. وكان لايوجد عدد كافي فكان هذا من حسن حظنا وأخبرونا بأننا سوف ندرس مع زميلاتنا الطالبات الذين كان عددهم 36 طالبة وأخبرونا أنهم مثل أخواتنا وأننا في المرحلة الجامعية سوف ندرس مع زميلاتنا ويجب أن يتم التعامل بإحترام معهم وأن نعتبرهم أخواتنا ونلتزم في الفصل وأن نراعي أننا في فترة ملاحظة .. وإذا بدر منا أي شغب أو عدم إلتزام سوف يتم إستبعادنا من الكورس ويكتفوا بالطالبات فقط .. علماً بأن طلبة الصف الثالث الثانوي كانوا يفوقوا المائة 50 طالب و 50 طالبة مما دعى القائمين على الكورس أن يفصلوهم إلى فصلين فصل للأولاد وفصل للبنات .. وهذا ماجعلنا نتفاخر أمامهم بأننا أكثر حظاً منهم .

    دخلنا إلى الفصل وكان كل الطالبات ينظروا إلينا .. وبدأ علينا الإرتباك خصوصاً أنا فقد كنت خجول جداً ... أدّعى الشفتنة .. أنسج إلى أصدقائي قصص كثيرة ولكنها من محض خيالي وكانوا يستمتعون بها بل يظنون أنني محظوظ أن أعراف كل تلك المغامرات وأنا في مثل هذا السن .. وكانوا يستشيروني في كثير من الأشياء .. بل زاد من قدرتي في إقناعهم أنني كنت أحب الموسيقى وأعزف على الناي وأحفظ كثيراً من الأغاني .. فكنت أكلمهم عن الأغاني وأن هذه الأغنية أرسلتها لي فلانة .. وهذه قلتها لي فلانه .. فكان كثيراً ما يأتي أحد أصدقائي ويطلب مني أن نكتب جواب .. وكان الجواب في تلك الفترة عبارة عن مشروع مشترك .. ولانجد حرج في ذلك .. نكتبه جميعاً ونذهب جميعاً لتسليمه ونقرأ الرد جميعاً .. شفتوا الحب ده كيف .. حب جماعي .. عشان كده الجماعة أسع جابوا لينا الزواج الجماعي ..
    المهم حاولت ما أهز صورتي وسط الشلة وأنا زعيمهم .. توجهنا مباشرة إلى أماكننا وكان قد خصص لنا 6 أدراج في آخر الفصل خلف الطالبات .. جلسنا بإحترام وعدت الحصة الأولى بسلام ..
    وفي الفسحة تحدثنا نحن الـ (6) أنوا نحنا لازم نثبت أننا محترمين ونحاول نحافظ على الفصل الجميل المليان جكس ده .. وأنوا مافي واحد فينا يطبز أي طبزة .. عشان ما يطردونا ويفرتكوا المولد ده ... فوافق الجميع .... ربك رب الخير اليوم عده بسلام وإلتزمنا بكل الضوابط ...

    تاني يوم جينا بدري عشان نلقى لينا فرصة قبل ما الجرس يدق وتبدى الحصص .. وكنا على موعد مع القمر .. أي والله القمر ... جميلة .. أنيقة .. إذا تحدثت صمت الكون .. وإذا صمتت تحدثت كل آلهة الأغريق .. الجمال .. الحب .. المطر .. الرياح .. الليل .. الشمس .. كل يدلي بدلوه .. كل يضيف إلى هذه الآية .. إنها مــــــرام .. سمعنا إحدى صديقاتها تحادثها بإسمها ..
    مرام .. إنها أرض نزاع ..قال إيهاب .. دي مامعقولة .. دي قنبلة .. وكان من عُرفنا في الشلة إذا مالفتت نظرنا إحدى الجميلات مثل مرام .. نعتبرها أرض نزاع .. وكل من يستطيع منا أن يكسب ودها فليبادر ..ولكن إذا مافاز بقلبها واحد منا .. على البقية إحترام ذلك ومساعدته في كتابت الجوابات .. وتشكيل الحماية له .. لأن في زمنا كان أصعب شئ أن تقابل فتاة .. وتتحدث معها .. فإنك لاتضمن العواقب .. قد يلمحك أخوها أو قريبها أو إبن جيرانها حتى [ والله نحنا أخوانه وقرايبهم ماعندنا معاهم مشكلة لكين أولاد الجيران ديل شليقين شلاقة .. اكتر حاجة كنا بندور معاهم الشكلة ] .. فكان من واجب الشلة أن تشكل لك حماية ..
    أستمرينا في الكورس بجد وإجتهاد لسببين .. الأول لأنوا ماديرين نظهر قدام البنات بأننا ماشاطرين .. عشان كده كنة بنقرى قراية جد .. ونحاول نتفوق عليهم .. والثاني فرحانين بالتجربة بتاعت الدارسة المختلطة .. ولكنني كان لدي سبب ثالث حيث بدأت أفتح قنوات بسيطة للتوصل إلى مــــرام .. بدأتها عندما تجرأت وطلبت منها مسطرة .. فأعطتني إياها دون أن تنطق بكلمة .. وأبقيتها معي حتى الفسحة .. وفي الفسحة أعطيتها لها وقلت : شكــراً ... قالت: عفـــــواً ...
    تصدقوا كلمة عفــواً هذه لم تجعلني أنوم الليل ولا الشلة .. جلسنا عند ركن المنزل حتى الساعة 11 مساءً نحلل في الكلمة .. وكان هذا يعتبر إنتصاراً لي .. وإثبات لأنوا أنا زول شفت قدرته إتكلم مع القمـــر .. لذا فقد قررت الشلة أن يكتبوا جواب بإسمى إلى هذا القمر .. وأن نسلموا ليها بكره في الفسحة ..
    بدأنا في الجواب :
    بسم الحب .. فإن الحب من الإيمان .. وبسم الإيمان فإن الإيمان من الله .. وبسم الله الرحمن الرحيم ..
    قلبي هديتوا ليك الدايروا أعملوا .. حافظ لي عليهوا وأوعى تجرحوا ...
    يالعالي تعليمك أنا من مظاليمك .....
    أنا من شفتك بقيت مابنوم .. وماباكل .. أنا مشتاق ليك ...
    وأنا بحبك ،
    والسلام عليكم ورحمة الله وبركاته،
    هذا الجواب هو خلاصة تجارب (6) من الشباب كانوا يعتبروا نفسهم من أشفت الشفوت في ذلك الزمان .
    طبقنا الجواب وختيناهو في ظرف .. وحاولنا نجيب ريحة عشان نريحوا ولكن للأسف مافي زول فينا عندوا ريحة ولا حتى في البيت مافي زول بتريح بي ريحة .. اللهم إلا الخمرة .. ودي كنا بنتحرج من إسمــه وإذا واحد قال لينا عندكم في البيت خمرة .. فإن هذه الكلمة كفيلة بإشعار حرب تستخدم بها كل الأسلحة الفتاكة من كف وبنية وشلوت .
    فتشنا لي وردة عشان نختها في الجواب .. وبعد مجهود جبار لقينا لينا وردة بتاعت صباح الخير ..
    إنتهينا من الجزء السهل .. وجينا للجزء الصعب .. منوا البديها الجواب ... دي المشكلة .. الجماعة قالوا لي تديهوا ليها إنته .. قلته ليهم أنا مابقدر .. قالوا لي تخاف ياجبان وكل يوم تحكي لينا قصص وأنا عملته وأنا سويت .. قلته ليهم أنا ماخايف لكين لو شافني الأستاذ ولا لو إشتكتني بيعملوا لي مشكلة ويفصلوني ..
    المهم وصلنا لي حل أنوا نخته في وسط كتاب ونخليهوا ليها في الدرج .. وبرضوا إتفقوا أنا أقوم بالمهمة دي ...
    في اليوم التالي وفي الصباح الباكر .. أنتهيت من تلك العملية الفدائية بصعوبة وأنا أتصبب عرق وكان البقية يراقبون المداخل والمخارج .. وبدت الحصة .. وإنتهى اليوم الدراسي وأنا أتصبب عرق والشلة خايفين يترغبوا ... فأذا بها تحمل الكتاب وتنظر إلينا .. ولم نفهم هل هي نظرة الرضى .. ولا نظرة الوعيد .. [ أرجو الراجيكم .. بكرة شيل الحال ] ..

    في اليوم التالي لم نأتي بنفس الحماس .. بل كان الخوف سيد الموقف .. ولكن عندما دخلنا الفصل بادرنا الأستاذ [ ليــه متأخرين ] .. إعتذرنا وقلنا ليهوا تاني ما حنتأخر .. وذهبنا إلى أماكننا .. وكانت المفاجأة عندما فتحت الدرج وجدت نفس الكتاب بتاع الأمس وقلبته على عجل خشيت أن ينتبه الأستاذ فلاحظت أن به ورقة .. قفلته بسرعة .. في الفسحة لم نطلع من الفصل ولم نفتح الكتاب .. بل سمح لكل أعضاء الشلة أن ينظروا إلى الظرف المغلق نظرة خاطفة ثم أغلاقنا الكتاب .
    بعد اليوم الدراسي ذهبنا إلى البيت وأغلقنا الصالون وفتحنا الظرف .. وقرأناه في أقل من ثلاثة ثواني ... وكان به الآتي :

    نفــــــس الشعـــــــــــــور ..

    أرهقتني هذه الكلمتين .. حيث تبدل حالي بعد هذا الخطاب .. فاصبحت أقرأ كثيراً حتى أظهر بأنني اشطر زول في الدنيا .. ولأول مرة أشترى ريحة وكان إسمها [ جامبدج ] وإشتريت [ بريل كريم أخضر ] وكملته زيت السمسم بتاع الوالده الله يطراها بالخير .. بقيت كل يوم إستحمى وأمسح شعري بي زيت السمسم وبريل كريم أخليه يلمع وإتريح وأخر اليوم الحصيلة .. بسمة من مـــرام .. ومثلها منـــــي .

    إستمر الحال ثلاثة أشهر بالتمام والكمال .. ولم نتكلم مع بعض ولا كلمة واحدة .. وإنما موجات كهربائية غير مرئية .. من القلب إلى القلب .. كفيلة بأن تهبني السعادة .. وتجعلني أتحمل شمس عطبرة الساخنة التي تجعل زيت السمسم الفي شعري كأنه زيت أعد لتحمير السمك .. ولكن كله يهون عشـــان مرام ..
    وفي ذات يوم أخبرنا الأستاذ بأنه تم إختيارنا للمشاركة في فقرة غنائية يجب أن نتمرن عليها للمشاركة في الحفل الختامي الذي سوف يقام في ختام الكورس الذي شارف النهايات .. وكان من ضمن المجموعة مرام .. ويبدوا أن الأغريق لهم دور في هذا الإختيار حيث علمت أن لهم إله يسمى أفروديت .. يسمى إله الجمال وأظن من ضمن مهامه توفير الجو للفرد عشان يجكسو .. فيبدوا أنه حس بمعاناتي من زيت السمسم .. فتدخل ليكافأني .. فقد طلب منا الأستاذ أن نبقى بعد الحصص لعمل البروفات .. وكان العمل هو [ رائعة عقد الجلاد ] :
    يادياري الوين أني .. تور عفين الشين أني ..
    فبدأنا التمرين على العمل الغنائي .. وعندما إنتهينا وجدت فرصة ..
    فسألتها : كيف الحال
    فأجابت : كويسة
    قلته ليها : الجو جميل [ علماً بأن السخانة كانت 550 درجة مئوية وكتاحة عطبرة عاملة مظاهرات .. وخلت ليك شعري الممسح داك بقى ذي كورت الشراب الواقعة في الطين ] ..
    قالت لي : مش كده ..
    بعداك مشت بيتهم .. وأنا مشيت بيتنا ..
    مرت الأيام وإنتهى الكورس .. وذهب كل منا إلى حال سبيله .. تفرقنا أيدى سبا.. حيث رمتني أقداري في غربة .. هجيرها لايرحم .. ليلها ليس كليل عطبره .. وصبحها كذلك ..
    وذات يوم سنة 2000م بعد أكثر من 13 عام .. كنت أقف في محطة حاج الريح في عطبرة [ وهو موقف عام للمواصلات ] فإذا بي أجد نفسي وجهً لوجه مع القمر .. فلم أصدق نفسي .. مــرام ... وهي كذلك .. خــــالد ... ضحكنـــــا ضحكة من الأعمال ..
    قلته ليها : قلبي هديتوا ليك الدايروا أعملوا ....
    قالت لي : نفس الشعــــور ...
    يرن هاتفي مرة أخرى .. أيها الناس نحن من نفر عمروا الأرض .. ألــوا ..
    أنــا : كيفيك يامـــــرام ..
    المتصل : مــرام منـــــوا ..؟
    أنــا : إنتي مش إتصلتي قبل شويــة .
    المتصل : أيـــوه .. أنا دايرة أكلم زوجي عبد الله .
    أنــا : عبد الله منـوا [ عبد الله ده من عطبرة ] ..
    المتصل : لا ما من عطبرة من الخرطوم ..
    أنــا : لا ماعندنا زول إسمــه عبد الله ...
    المتصل : معلــيش يظهــرا أنا ضاربه غلط ...
    أنــا : نفـــــس الشعـــــور .

    خالد الأرباب
                  

07-04-2007, 11:53 PM

Muna Khugali
<aMuna Khugali
تاريخ التسجيل: 11-27-2004
مجموع المشاركات: 22503

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Khalid Saeed)

    حلو ...حلو شديد..

    ذكريات زي دي ما بتروح خالص لأنه أملها اتزرع في تربه شابه غنيه..
    يا حليل زمان ويا حليل مرام!

    لكن اتخيلت شعرك بزيت السمسم وضحكت ضحك!

    شكرا خالد علي كتاباتك العسل..
                  

07-05-2007, 10:37 AM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2605

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Muna Khugali)

    المبدعـــة الغالية / منـى خوجلي
    حضورك .. يســــعدني جــداً ..
    Quote: ذكريات زي دي ما بتروح خالص لأنه أملها اتزرع في تربه شابه غنيه..
    يا حليل زمان ويا حليل مرام!

    نعم إنها محفورة في الوجدان .. إنها ذكريات نحنُّ إليها في كل حين .. نتمنى أن يعود بها الزمان .. هجيرنا يزداد غيظاً علينا كل يوم .. كأنه يطلبنا ثأر .. وغربتنا خالية المعالم .. مشوهة الملامح .. ونفوسنا تحن إلى الزمن الجميل .. تبحث عن ناقوس يدق في عالم الذكريات .
    Quote: لكن اتخيلت شعرك بزيت السمسم وضحكت ضحك!
    والله كان شفتي العبد لله لمن يقشر ويمسح شعره بزيت السمسم .. إبـــــداع .. بس الله يسامح التراب بتاع عطبرة .. كان يخليني أتمسح كويس وبعد داك يقول لي جيتك .. الغريبة نحن بعد التراب ده كله كنا بنشوف بعض قاشرين .. بالذات مــــرام.. التقول الكتاحــة بتفطها .
    لك التحيات الطيبات الصافيات،

    أخوك/ خالد الأرباب
                  

07-05-2007, 00:38 AM

haider osman

تاريخ التسجيل: 07-27-2005
مجموع المشاركات: 2359

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Khalid Saeed)

    نفــــــس الشعـــــــــــــور ..
                  

07-05-2007, 11:03 AM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2605

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: haider osman)

    Quote: نفــــــس الشعـــــــــــــور ..


    الأخ العزيز / حيدر عثمان

    حضورك .. يسعدني .. يطربني .. يخليني أقرب أقوم إتمسح وإتريح .. وأشوف أقرب كورس أشترك فيهو ..

    شكرًاً جزيلاً أخي ..

    أخوك/ خالد الأرباب
                  

07-05-2007, 09:44 AM

شتات
<aشتات
تاريخ التسجيل: 05-03-2003
مجموع المشاركات: 1166

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Khalid Saeed)


    (نفس الشعــور ..)
    الزعيم الأرباب خالد ..
    صباح اليوم وجدت رقمك على تلفوني ومواعيده ساعة متأخرة من ليلة البارحة ..
    دارت العديد من الأسئلة في خاطري ..
    أي خبر جميل يحمله الأرباب ليبشرني به؟
    ماذا يا تري؟
    هل أورق وعد قديم في بدايات هذا الخريف ؟
    هل عاد السنونو الغائب في رحلة الصيف ؟
    هل سألت عني ريحانة البحر؟
    نفس الشعور ..
    سرحت بخيالاتي وغازلت أحلامي ..
    إنها اللهفة للدهشة يا خالد ..
    إنه الشوق المتعطِّش للقاء ..
    واللحظة المفقودة في ميناء الغياب ..
    وكما تعلم ..
    أجمل الأشياء هي ما يأتي بلا توقيت ..
    أحلى هدية ما يأتي من الغرباء ..
    وأروع حب نجده عندما نكون في بحث عن شيء آخر ..

    لك الود يا صديقي والنيل ضفتين من حب .. والشوق مشدود الشراع ..
    وإلى لقاء ..

    صلاح / شتات
                  

07-05-2007, 11:21 AM

هيثم سعيد
<aهيثم سعيد
تاريخ التسجيل: 06-04-2007
مجموع المشاركات: 134

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: شتات)

    الاخ العزيز ابو الخلد

    ايه الابداعات دى


    واقول من كل قلبى ربنا يكتر من تلفوناتك

    ولكن اعمل حسابك القطر فيه مفتش

                  

07-05-2007, 11:24 AM

هيثم سعيد
<aهيثم سعيد
تاريخ التسجيل: 06-04-2007
مجموع المشاركات: 134

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: هيثم سعيد)

    وانا اقوا ياربى مرام دى منو
                  

07-05-2007, 11:37 AM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2605

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: شتات)

    Quote: إنها اللهفة للدهشة يا خالد ..
    إنه الشوق المتعطِّش للقاء ..
    واللحظة المفقودة في ميناء الغياب ..
    شتات ..
    ياقيثارة الزمن الجميل ...
    إنها اللهفة .. إلى الروح .. إنه الشوق إلى الحواس .. وإنها اللحظة المفقودة .. بل قل الحياة المفقودة في هذه الغربة المعلبة المشاعر ..

    Quote: أجمل الأشياء هي ما يأتي بلا توقيت ..
    أحلى هدية ما يأتي من الغرباء ..
    وأروع حب نجده عندما نكون في بحث عن شيء آخر ..

    أجمل الأشياء .. أصبحت في حياتنا .. محض ذكريات .. نبحث عنها دون جدوى في هذه الحياة السريعة الغربية المزعجة .. هل تصدق أنني أمس عندما حاولت أن أهاتفك .. أحببت أن أخبرك أنني وجدت قصاصات في درج خفي في قلبي .. حاولت تجميعها وتلصيقها .. حتى أتعرف على إسم من تركها هنا في هذا المكان القصي من القلب .. ولكن دون جدوى .. فقد كُتبت بإسم مستعار .. فصاحبها إستطاع أن يبحوح بكل شئ .. ولكنه عجز أن يبوح بإسمه ..
    نعم إنهم الغرباء من يأتونا بأجمل مانتمناه من الهدايا .. هل تعلم أن مشكلتى دوماً في إحساسي بالترحال .. فلذا تجدني لا أتفائل بلقاء الوجوه الحسان .. لأني دوماً في سفر .. وهم دوماً في حالة تحول فيبدون في ليلة التمام ومايلبثوا حتى يتحولوا إلى عرجون قديم .. إنها الأقمار ياصديقي وقانونها الذي لايعرف الكمال .. فكم من قمر 14 تحول إلى بدر ثم هلال ثم إختفى ..
    ذات يوم كنت أجلس بالقرب من حسناء في طريقي من عطبرة إلى الخرطوم .. فسألتها أين تسكنين فقالت بورتسودان .. فقلت لها تلك البعيدة .. قالت نعم .. قلت لماذا لم تبنوا منازلكم بعد عطبرة بعدت كيلومترات في تلك الأرض الخلاء وتسموها بوتسودان .. حتى يمكننا أن نصبحكم بكرةً وعشية ..
    صديقي شتات ما إغرب الحب وروعته التي تتمنع عنا عندما نتوجه صوبها مباشرة .. عاملين بمقولة الدخول بالباب .. ولكنه كما قلت صديقي .. عجبنا لأمره يتركنا حينما نتقرب منه ويلفت نظرنا متى ما وجدنا قد تشاغلنا بشئ آخر ... صدق من قال:
    مازمان ياريت .. لما قلنا ليك تعال .. إنت حالف ما بتجينا .. ولاسائل حتى فينا .. لما سبناك ورحن بالألم العلينا .. ليه تفتش تاني فيـنا ..
    أمني نفسي .. بعودة إلى الزمن الجميل .. تغسل مابي .. فأنا شليق .. قد إخترت أن أكبر قبل يومي .. فأتيت إلى غربتي وأنا في سن 19 عاماً فرحاً بها .. ظاناً أنني قد فقت أقراني .. وتزوجت .. وأنجبت .. ولكنني فجأة إكتشفت أنني قفزت على الحواجز متخطياً مرحلة مهمة .. بدأت تطالبني بها حياتي الآن .. وكأنها قد إستفزها مايدور في السودان من مطالبات بالحقوق .. وإقتسام للسلطة والمال .. فهاهي نفسي .. تتطالب بإقتسام النفس والمال .. وإسترجاح الزمن الجميل ..

    شتات .. ياصاحب الإبداع الأزرق الدفاق ..
    لك منى ود لاينضب .. فبوجودك أحس أنني أسمع وأرى وأتكلم .. فأنتم القوم لايشقى جليسكم .. دم بخير .. وجودك يجعلني أحس أننى .. أمتلك حيزاً كبيراً في هذا الكون ..
    لك أطيب التحيات ياعزيزي ..

    أخوك / خالد الأرباب
                  

07-05-2007, 01:20 PM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2605

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Khalid Saeed)

    Quote: ولكن اعمل حسابك القطر فيه مفتش


    الأرباب/ هيثم سعيد
    مفتش عديل .. ياراجل إنته بتصديق كلام الليل .. البيوصل الصفحة التالتة في النهار ..
    مرام دي منو .. مرام دي منو .. مرام دي منو .. ياراجل دي واحدة ضاربة غلط .. ماتاخد بالك ...
    بعدين جيب معاك الفول والعيش في العشاء وأوع تكلم أم سعيد .

    لك التحيات الطيبات يا أرباب .

    خالد الأرباب
                  

07-05-2007, 01:43 PM

خالد المحرب
<aخالد المحرب
تاريخ التسجيل: 01-14-2007
مجموع المشاركات: 5705

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Khalid Saeed)

    الارباب خالد لما تكتب تكتب كلام حلو صراحه الزكريات جميله ومحفوره بالذات ايامنا كانت حلوه
    لك منى التحيه ...
    تخريمه
    تلفونك الموبايل الليله بقول غلط ارجو الاتصال الان للاهميه
                  

07-05-2007, 02:42 PM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2605

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: خالد المحرب)

    [QUOTE] صراحه الزكريات جميله ومحفوره بالذات ايامنا كانت حلوه


ياحليل زمان
ريدة زمان
ياحليلا عاد
كان زمان..الناس مودة
وكان كلام الريد حنان
وكان حديث الحب مناجاة
وكان لقا المحبوب أمان
كان حلم ..غنوة وحكاية وكان أمل أخضر وكان
كان زمان!
ريدة زمان..
كان أهلنا بقولوا كان
الحب حلال ماكان حرام
وكان نضيييييف وعفييييييف وطاهر وكان نزيه فوق الكلام
وكان غناهو ( أدب مصفّى ) ومجلس الحب في إنتظام
وكان شعر أهل المحبة ..إذا طروا المحبوب : ســــلام!

والله .. يا أرباب .. صدقوا في هذا الوصف .. تعرف لحدى زمنا .. كان رضى المحبوب .. ســــلام .. بل نقنع من المحبوب بنظرة .. كفيلة أن تجعلنا لاننام .. بل تصيبنا بالملاريــــــــا .. لأننا لانقوى عليها ولا على السهر ...
كانت أقصى غايتنا أن نشعر أن هناك من يحس بنا .. وكنا نتحين الفرصة للمحبوب لنراهُ فقط .. وياويلنا إذا خدمتنا الظروف ووقفنا أمامه وجهاً لوجه .. تصدق .. كانت تصيبنا الربكة .. ويجف الحلق .. وتزيق القلوب .. ونصمت عن الكلام .. ولانخرج من هذا اللقاء بغير كلمة كلمتين .. بعد عسر.. هم كيف الحال والسلام عليكم ...

دم بخير يا أرباب
ياشيخ العرب .. يا من يهيئ لنا رئـةً .. نتنفس بها كل ماتركه لنا أبائنا وأجدادنا .. من قيم ومثل .. وكرم ونخوه ...

لك التحية وللأسرة جميعها ،

أخوك/ خالد الأرباب

Quote: تخريمه
تلفونك الموبايل الليله بقول غلط ارجو الاتصال الان للاهميه


يظهر التلفون إتعود على تلفونات السودان .. الضالة الطريق ...
                  

07-05-2007, 02:44 PM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2605

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Khalid Saeed)

    Quote: صراحه الزكريات جميله ومحفوره بالذات ايامنا كانت حلوه


    ياحليل زمان
    ريدة زمان
    ياحليلا عاد
    كان زمان..الناس مودة
    وكان كلام الريد حنان
    وكان حديث الحب مناجاة
    وكان لقا المحبوب أمان
    كان حلم ..غنوة وحكاية وكان أمل أخضر وكان
    كان زمان!
    ريدة زمان..
    كان أهلنا بقولوا كان
    الحب حلال ماكان حرام
    وكان نضيييييف وعفييييييف وطاهر وكان نزيه فوق الكلام
    وكان غناهو ( أدب مصفّى ) ومجلس الحب في إنتظام
    وكان شعر أهل المحبة ..إذا طروا المحبوب : ســــلام!

    والله .. يا أرباب .. صدقوا في هذا الوصف .. تعرف لحدى زمنا .. كان رضى المحبوب .. ســــلام .. بل نقنع من المحبوب بنظرة .. كفيلة أن تجعلنا لاننام .. بل تصيبنا بالملاريــــــــا .. لأننا لانقوى عليها ولا على السهر ...
    كانت أقصى غايتنا أن نشعر أن هناك من يحس بنا .. وكنا نتحين الفرصة للمحبوب لنراهُ فقط .. وياويلنا إذا خدمتنا الظروف ووقفنا أمامه وجهاً لوجه .. تصدق .. كانت تصيبنا الربكة .. ويجف الحلق .. وتزيق القلوب .. ونصمت عن الكلام .. ولانخرج من هذا اللقاء بغير كلمة كلمتين .. بعد عسر.. هم كيف الحال والسلام عليكم ...

    دم بخير يا أرباب
    ياشيخ العرب .. يا من يهيئ لنا رئـةً .. نتنفس بها كل ماتركه لنا أبائنا وأجدادنا .. من قيم ومثل .. وكرم ونخوه ...

    لك التحية وللأسرة جميعها ،

    أخوك/ خالد الأرباب

    Quote: تخريمه
    تلفونك الموبايل الليله بقول غلط ارجو الاتصال الان للاهميه


    يظهر التلفون إتعود على تلفونات السودان .. الضالة الطريق ...
                  

07-05-2007, 03:59 PM

احمد العمار

تاريخ التسجيل: 11-05-2006
مجموع المشاركات: 2035

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Khalid Saeed)

    يالذيذ يا رايق انت






    أحمد العمار
                  

07-07-2007, 09:54 AM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2605

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: احمد العمار)

    Quote: يالذيذ يا رايق انت


    حبيبنا أحمد العمــار


    شفته التلفون ده كيف .. رجف القلب .. وقالوا المتحيل تبكيهو الريشة ..
    ونحنا نقول المغترب يبكيهـــو التلفون ..

    تعرف واحد ضحكني ... قال ليه مرة ضرب التلفون بتاعــه .. وقبل مايتم كلمة ألوا سمع صوت جميل برضوا يقول ألوا لاكين الخط إنقطع .. صاحبنا بقى يودي ويجيب ..
    المهم التلفون ررن مرة تانية ..
    صاحبنا .. رده بكل إنشراح .. لقى المتصل واحد من جماعته وبيطلب منه يحول ليهوا مليون جنيه
    قال لي شفته الورطــــه دي كيف ..

    تحياتي لك وللأسرة الكريمة ،
    أخوك/ خالد الأرباب
                  

07-05-2007, 03:38 PM

معتصم دفع الله
<aمعتصم دفع الله
تاريخ التسجيل: 12-18-2003
مجموع المشاركات: 12684

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Khalid Saeed)


    مالك يا أرباب بتجيب في الكلام البوجع ..
    كلام الذكريات دا صعب شديد وبوديك لحتات بعيييده صعب الرجوع منها ..
    ذكرتني بالأيام الحلوة والناس الحنان ورسائل الغرام والمنديل الهدية ..
    أحكي يا خالد كلامك طاعم وحلو ..
    أحكي عن الباب الطاقة وشكلة أولاد الحلة لمن الواحد يجي حائم ومضهب ..
    أحكي عن سهر الليل ومناجات النجمات ..
    أحكي عن الشلة وقعدات المغربية الجميلة ..

    ننتظر منك الكثير ونعرف أن لديك الكثير ..

    محبتي ..
                  

07-07-2007, 10:00 AM

Khalid Saeed
<aKhalid Saeed
تاريخ التسجيل: 12-12-2005
مجموع المشاركات: 2605

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: معتصم دفع الله)

    Quote: كلام الذكريات دا صعب شديد وبوديك لحتات بعيييده صعب الرجوع منها ..
    ذكرتني بالأيام الحلوة والناس الحنان ورسائل الغرام والمنديل الهدية ..


    حبيبنا / مــــــو

    كيفيك ياشـــفيف .. شفته الذكريات دي كيف .. زمن المنديل .. والحنان .. والكلام ماتعرف تجيبه من وين ..
    والله أسع تقعد مع الواحدة ماتعرف البسكته شــــــنو ..
    تصدق مرة أنا كنته مسافر بالباص .. وقاعدين وراي إتنين .. شغالين نق نق نق نق نق نق .. وصلنا شندي .. نق نق نق نق نق نق .. وصلنا الجيلي .. نق نق نق نق نق نق لمن وصلنا الخرطوم ..
    وأنا نازل من الباص .. قلت ليهم والله كليمييييييييين ... ومقطعين الحبكانة قطيع .

    بإنتظارك ياحبيبنا وذكريات الزمن الجميل ،

    دم بخير ،
    أخوك / خالد الأرباب
                  

07-08-2007, 11:16 PM

مصدق مصطفى حسين


للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: تلفون مـن السودان ...إلى القلب (Re: Khalid Saeed)

    الحبيب الأرباب ( الجد جد و ما خمج )

    و الله لولا إجترار الزكريات ..
    و الهروب إليها كلما سنحت سانحه ..
    لما إحتملنا هجير هذا الزمن المولع ناااار ،
    لك هدير الأشواق .. و جميل الأمنيات و.....
    طنين الزكريات .
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de