اخونا " مام " من البورد الآخر كان قد استخدم هذا العنوان فى احدى بوستاته عن الاطفال منذ زمان بعيد ، و لدلالة العنوان نستعيره و نستعير معناه العام
و لحيوية الموضوع ، و مفاراقات الاطفال الجميلة و البريئة و لتعدد مدارس تربيتهم و تنشئتهم و لان الاطفال مظلومين كثيرآ فى مجتمعنا السودانى الصارم التربية نرجو ان نخصص هذا البوست لعالم الاطفال ... طرائفهم نفسانياتهم الطفل الشقى و الطفل الهادى و الطفل الانطوائى اطفال الغربة و تأثيراتها عليهم التربية التنشئة أثر المجتمع على الطفل الدراسة الأبوة و الامومة و مفارقاتهما ........ الخ
و فى مستهل هذا الموضوع اتضرع للمولى عز و جل ان يحفظ اطفالنا و يجعلهم من الذرية الصالحة و ان يرزق كل من لم ينجب من المتزوجين بنين و بنات يا رب
دي تعالو انتو الاتنين بيجاي ربي ما تحرم بيت من الاطفال غنية سمعناها زمان ياريت واحد ينزلها في البوست دا وبعدين مضمون العنوان والغنية ما بتفق مع موضوع البوست فرق كبير ما بين حلم وحف ورعبة وغريزة حب الانجاب وما بين المدون هنا اتا يا سجيمان : متاكد دي صورتك؟؟؟
05-11-2003, 07:55 PM
KOSTA KOSTA
تاريخ التسجيل: 02-04-2002
مجموع المشاركات: 3138
الاطفال حلويين مافى شك و لو كانوا هاديين او شقيانين لكن و حياتك يا سفير لما شقاوتم تفوت الحد رأسك بيفوت و انت بتفوت و المرأة ذاتها بتفوت ده اذا ما جعرت و قالت يا حليل امى و انا الجابنى من بيت ابوى شنو ؟؟؟
05-11-2003, 08:01 PM
KOSTA KOSTA
تاريخ التسجيل: 02-04-2002
مجموع المشاركات: 3138
يا حبيب ما بيناتنا زى ما بقولوا الجماعة و جيبك و جيبى واحد بس باقى لى يا سيجو انت عيالك من النوع الفصيح زيك كده و نضميهم كتر و شقاوتهم عينة كان الله فى عون ام العيال اولآ و فى عونك ثانيآ و مبروك الانضمام لنادى اللووووووووووووووووولوية
05-12-2003, 11:04 AM
KOSTA KOSTA
تاريخ التسجيل: 02-04-2002
مجموع المشاركات: 3138
فعلآ هى اغنية من كلمات الشاعر المرحوم مصطفى ركابى و قد كان المرحوم لا ينجب و لذلك كتب هذه القصيدة بصدق ... و انا اعرفه عن قرب لانه كان جارى
اما عنوان البوست فهو مقصود به تمامآ ان لا يحرم الله بيتآ من الاطفال هذا على وجه الاطلاق .. كذلك المقصود ايضآ ان الاطفال بتواجدهمفى اى بيت كان تكون لهم نوادرهم .. تكون لهم شقاوتهم المحببة تكون لهم مشاكلهم الخاصة بالتربية ... بالبيئة التى يعايشونها و بالسلوكيات النمطية لهم ... و ما يرتبط بذلك من المفارقات المختلفة و ذلك ما نود ان نتطرق اليه فى هذا البوست
مرة بت عمى و هى صغيرة قدمت مع والدها فى اجازة للسودان و كانت شديدة الفصاحة فزارت مع والدها بعض الاهل و قدموا لهم عصيرآ باردآ به ثلج ... و بعد قليل ساح الثلج فسألت الطفلة والدها : يا بابا التلج راح وين ؟ اجابنى عمى : بالله دى يشرحوا ليها كيف ؟ الا اديها حصة فى الفيزياء و الحرارة المكتسبة و الذى منه
و هذه واحدة من اشكالياتنا فى التعامل مع الطفل : اى كيف نختار له لغة تخاطب تقنعه و تشبع رغبته المتزايدة فى التعرف على المجتمع من حوله ؟؟؟؟
تحياتى مرة اخرى اخى البحيرى
05-12-2003, 04:27 PM
ولياب ولياب
تاريخ التسجيل: 02-14-2002
مجموع المشاركات: 3785
شكرا لتذكيرنا بأيام البورد الأخر ، أيام مـــــــــام وأيام بناديها ، وسلسلة من الأسماء والألقاب لا حد لها ،،، أما اليوم !!!!! لا تعليق
نعم ، كان مام صاحب البوست
وأذكر صديقي دغيم حينما أهدى تحياته لإبن قريته بحلفا الجديدة القرية 23 - الشاعر الفنان محمد سيد أحمد صاحب أغنية ياربي ما تحرم بيت من الأطفال _ والذي أخذ من مدينة وادي مدني مقرا له منذ أمد بعيد .
شكرا يا كوستا وسلام
05-12-2003, 05:07 PM
garjah garjah
تاريخ التسجيل: 05-04-2002
مجموع المشاركات: 4702
يبدو ان ما اعانيه من المصران والمعدة هو تاريخي الطفولي المجيد في اكل الطين والدتي كانت تحكي لي باني ما ان انزل الارض الا وشرعت في سف التراب وجخمصة الطين واكله بشراهه تفوق شراهتي في اكل ما تصنعه الست الوالدة من اطايب ولذلك كان يتم وضعي في الحوش الواسع حيث التراب نظيف وغير ملوث بالارجل وكنت بعد الانتهاء من وجبتي يتم غسلي بكميات كبيرة من الماء والصابون وكنت عادة ما اخلع ملابسي لنيل تلك الوجبة وظللت امارس عادة خلع الملابس عند اكلي للبطيخ والمنقة حيث كان يصعب علي السيطرة على ما يسيل منها ويرسم خريطة كبيرة على كرشي الصغيرة حينها وفي عدة مرات وبعد انتهائي من وجبة الطين كانت تقودني حبوتي في جولة في الحوش الوسيع وفي اكثر من مرة انتهت حبوتي الى البلاعة الكبيرة لامارس هواية الغطس حتى انقطاع النفس وكان يتم اخراجي وانا في حالة تصعب على الكافر من اتى بعدي من اخوتي لم يستمتع بما استمتعت به فلقد زحف البلاط على مرتع ىصباي وتحولت البلاعة الى سايفون لا نرى له ماء هي ايام نزكرها طشاش ولكن يظل السؤال هل ما يعانيه مصراني ومعدتي هو جراء تلك الوجبات الشهية ولكل منكم اكيد في ذلك قصة
مشكور الحبيب كوستا
على طرح هذا الموضوع الشيق
ودمت جميلا
05-13-2003, 06:44 PM
KOSTA KOSTA
تاريخ التسجيل: 02-04-2002
مجموع المشاركات: 3138
وين عهد الملك الهمام مام ؟؟؟ و ين عهد الاديب الاريب بناديها ؟؟؟ وين العهد الذهبى لبورد سوادنت ؟؟؟ الآن ..... حدث و لا حرج كما تفضلت
تحياتى للاخ دغيم و لكل الاخوة الذين كانوا يشاركوننا ذلك البورد
و بالله تنقل سلامى الشديد للاخوين العزيزين مام و بناديها و لا تنسى التبلدى الاصيل و نتمنى يا ولياب ان نعيد فى هذا البوست بعض من ذكرياتنا و ذكرياتهم معنا
و دمت
05-13-2003, 07:08 PM
KOSTA KOSTA
تاريخ التسجيل: 02-04-2002
مجموع المشاركات: 3138
عليك الله يا قرجة ما خليت " حصحاصة " حايمة و عايز بطنك تكون كويسة ؟؟؟ بس عايز اعرف عملت عملية زايدة ؟؟؟؟
ذكرتنى بحكايتك دى ود عمى كان و هو صغير زيك بيأكل الورق بكميات تجارية و خرافية ... فى المدرسة زمان و فى الابتدائى كان فى " سبت الورق " بيرموا فيهو الورق ، بس وحياتك ود عمى ده و شوف عينى اول ما يدق الجرس للفسحة او الفطور اول حاجة يعملها انو يفتش السبت بتاع الورق و يختار الاوراق الدسمة و يبدأ فى مضغها بتلذذ باين للعين و يظل يلوكها لفترة طويلة كأنه من المجترات .... و كنا نسميه " الأرضة " اى النمل الابيض الذى يعيش تحت الارض و يتغذى على الورق و الاخشاب و كل المواد السيلولوزية
و هو الآن موجود معانا بالدمام و يعانى من التهاب المصران اها عاجبك كده ؟؟؟
قابلتنى ابنتى الصغيرة و انا داخل لتوى من العمل و قافلة معاى قفلة كونكان ( دو يفتح لىّ ) ... اها البت و بدون مقدمات قالت لى : يا بابا انا عاوزه ام جديده قلت ليها و انا اضحك و قد فتحت قفلتى تلك : ليه يا امورة ؟؟؟ قالت : عشان ماما بتضربنى انا ما عايزاها ، و لازم تجيب لى ام جديدة و هسع دى قلت بقلبى ( يا ريت يا بتى على الاقل الواحد يغيّر شوية ... بس مافى طريقة يعملها ) ... قلت لها : خلاص و لا يهمك بكرة امشى السوق و اجيب ليك ديك ياالام الجديدة و الحلوة
05-13-2003, 08:09 PM
KOSTA KOSTA
تاريخ التسجيل: 02-04-2002
مجموع المشاركات: 3138
واحد من اطفال البلد القاعد فيها عملنا معاهو مقابله صحفيه خفيفه فى صحيفة الجاليه .. سألناه عن الموقف الطريف الذى مر به عند زيارته الاولى للسودان , رد قائلا : - مره مشيت بيت جدى وعندو بقره وغنم ونعجه وجداد , وكان يصحى كل يوم الصباح يحلب البقره والنعجه والغنم .. مره انا قلت ليهو : - ليه ماحلبت الجداده
05-14-2003, 06:05 PM
KOSTA KOSTA
تاريخ التسجيل: 02-04-2002
مجموع المشاركات: 3138
انها دعوة مسببة ... من بنتى العزيزة و لكل الحادبين على حقوق الطفل و حقوق الانسان اشهدوا انه صك غفران لنا للارتباط بالثانية من اجل ابنائى ................... فقط
05-14-2003, 06:18 PM
KOSTA KOSTA
تاريخ التسجيل: 02-04-2002
مجموع المشاركات: 3138
.. . مره ولد وقاعد مع خالتو واظن الخاله قاعده تتامل فيهو وفجاه كده اظنو شبهتو كده بقرد قامت قالت ليهو:انت يا خالد القرد ببقي ليك شنو سكت مده طويله و بعاين ليها قال ليها القر ببقي لي:خالتي
عايز ابين انهم اذكي ناس الواحد بفتكر انهم ما بفهمو او ما عارفين الحاصل شنو لكن هم دارين بي اي شي ولينا عوده ان شاءالله ... .. . بالنسبه لموضوع الغاز ده نحن نتعامل تاني معاك بالكمامات و لا شنو
05-14-2003, 10:28 PM
AbuAla AbuAla
تاريخ التسجيل: 08-31-2002
مجموع المشاركات: 444
الأخ كوستا أسعد الله أيامك بكل ما هو جميل... أغنية ربي لا تحرم بيت ن الأطفال تربطنى بمن يوءديها صداقة حميمة وهو الصديق الفنان الأصيل محمد سيدأحمد أبن القرية 23 حلفا الجديدة وقريب الشاعر المرهف محمد الحسن دكتور شاعر اغنية وردي الجميلة؛ يا أماسي الغربة فد يوم فرحينا، شيلي دمعات الأسي وما توجعينا... محمد سيداحمد صوته قريب لصوت العملاق وردي وله أغنيات كثيرة مسجلة باذاعة ركن السودان وأمدرمان؛ الا أن أشهرها أغنية الأطفال... لا أود الأطالة سوى القول بأن محمد سيداحمد الذى افنى زهرة شبابه بالسكة حديد، مثال صارخ لظلمنا وعدم تقديرنا للفن والفنانين.... ويكفيه ظلما انه بعد 4 عقود من الخدمة، يقبع فى بيت للأيجار بحى من أحياء مدنى العريقة... تحية لهذا الفنان الشامخ الجميل... عبدالأله زمراوي
05-14-2003, 10:56 PM
Tumadir Tumadir
تاريخ التسجيل: 05-23-2002
مجموع المشاركات: 14699
اتفق معاك فى ان الاطفال اكثر من اذكياء و نحن عندما نضيق باسئلتهم ذرعآ .. انما نضيق ذرعآ بذكائهم فى واقع الامر نحتاج - نحن كسودانين - الى الكثير من طولة البال مع اطفالنا كما نحتاج الى قدر عالى من الحنكة و الكياسة و السياسة و الصبر للاجابة على تساؤلاتهم الاجابات التى تنمى لديهم حب المعرفةو تنمية قدراتهم الذهنية الفطرية
لو كنتى فى محل عام .. و كانت هنالك اسر من جنسيات مختلفة ستتعرف بدون ان تنظر - بالسماع فقط - الى ان هنالك اسرة سودانية و ذلك من خلال زجرهم لاطفالهم : ياولد تعال هنا .. يا ولد ما تهبش الحاجات بينما الجنسيات الاخرى : تعال يابنى خلاص حاشترى ليك واحدة لما نرجع البيت بلاش كده يا ابنى
الخردل غاز خطير ... لا يعرفه الا من هدد بالزيت الحار صبآ على انفه و هو نايم .... اقترح حظر دخول الزيت للمنزل
05-15-2003, 01:54 PM
KOSTA KOSTA
تاريخ التسجيل: 02-04-2002
مجموع المشاركات: 3138
الفنان محمد سيد احمد لو لم يغنى الا هذه الاغنية لكفته فقد اداها بروعة و صدق عاليين صوته غاية فى الروعة .. و كما تكرمت فصوته شبيه الى حد كبير بصوت وردى آلمنى ان يكون مصير المبدعين فى بلادى هو الاهمال المريع فكم من مبدع توفاه الله و هو معدمآ شاعر الاغنية نفسها ارتحل و لا يملك فى هذه الفانية الا بيت جالوص عتيق .. و كان يعانى فى المواصلات معاناة كبيرة
هكذا نحن لا ننتبه للشمعات التى تحترق لنا و من حولنا الا بعد ان تنطفئ
لك التحيات ابو آلاء
05-15-2003, 01:59 PM
KOSTA KOSTA
تاريخ التسجيل: 02-04-2002
مجموع المشاركات: 3138
ياسلام ياكوستا والله الف مرحب بيهم وانت معاهم .. واهو بالمره تالتو تماضر تحدثنا بمناسبة بوستك الظريف ده عن مسرح الاطفال السودانى ربنا يطراهو بالخير.. هل ياتماضر مازال نفس ذلك المسرح طالعا .. ام انها حضارات بعد ان سادت .. عيك
05-15-2003, 09:28 PM
KOSTA KOSTA
تاريخ التسجيل: 02-04-2002
مجموع المشاركات: 3138
شكرآ ليك على الدعوة الكريمة لتناول المرطبات بمنزلكم الكائن بالـ.... بجوار طلمبة البنزين و غرب الظلط
فعلآ مسرح الاطفال جزء من اهتمامنا بهم لكن و كما تساءلت انت هل هو موجود ام تنعق على ذكراه البوم ؟؟؟ اين مسرح العرائس السودانى و الذى كان له نشاط طيب فى فترة من الفترات .. ثم اختفى باختفاء و هجرة من اسسوه
و هذا يقودنا بعد سؤالك للاخت تماضر عن مسرح الاطفال ، ان نسأل بنفس القدر الاخوة الفنانين بالبورد موصلى و حمزة سليمان و سيف الجامعة و مبيوع عن اغنيات الاطفال اين هى فى خارطة الغناء السودانى ؟؟؟
اهنيك علي روعه هذا البوست بروعه من نتحدث عنهم الا وهم احباب الله اطفالنا .. ومستقبلنا
اذكر عندما كنت طفلا كان هناك راديو لاحد اقربائنا في البلد الانا منها .. وكنا انا وابن عمتي نجهل كيفيه عمل الراديو ولا من اين يتحدث المتحدث.. وفي احد الايام حدث غلاط بيني وبين ابن عمتي عن شكل المذيعين والوانهم واشكالهم ولم يكن قريبنا صاحب الرادي موجود بالمنزل وقتها .. زرق .. حمر .. زرق .. حمر طخ كسرنا نشوف الجماعه شكلون كيف طبعا لقينا شكل الرادي غريب علينا واصرينا ان هذه المربعات هي الغرف .. طخ مافي شئ اتأكدنا بانهم زاغو ولكن الي اين الله اعلم والي هذا اليوم لا اعلم اين ذهب المذيعون هل لديكم علم بمكان اقامتهم..؟
05-15-2003, 10:17 PM
KOSTA KOSTA
تاريخ التسجيل: 02-04-2002
مجموع المشاركات: 3138
لقد اتفقت انت و ابن عمتك مع تخيلاتى و انا طفل عن الراديو و ذلك البث الذى يأتينا منه
انا مثلكم كنت اتخيل ان هنالك اناس بداخل ذلك الراديو الصغير و انهم يعيشون بالداخل .. بل و اتخيل ان عندهم " مزيرة " معينة يشربون منها و هى بداخل ذلك الراديو كمان كنت بتخيل انو الناس البيغنوا موجودين فى الركن الايمن من الراديو ، بينما من يذيع نشرة الاخبار يكون موجودآ فى منتصف الراديو و كذلك كنت اتخيل المرحوم سيد خليفة بهيئة معينة بسروال و عراقى و هو يغنى من اعلى سقف الراديو
الفرق بينى و بينكم انى لم اكسر الراديو لكى ارى ما بداخله .. و انما كسرت رأسى من كثرة الخيالات
شكرآ على المداخلة الطيبة
05-15-2003, 10:32 PM
zola123 zola123
تاريخ التسجيل: 08-22-2002
مجموع المشاركات: 7
يآآآآآآآآآآآآآآآآآآآآآه .. لا اتذكر آخر مرة سمعت فيها كلمة : فللت كانت تعنى عندنا - و نحنا صغار - ان " الدودو " بيجئ بعد الواطه تفلل و تمغرب دى نكتّيها من وين يا بت شيخ الدين ؟؟؟
05-19-2003, 08:40 PM
KOSTA KOSTA
تاريخ التسجيل: 02-04-2002
مجموع المشاركات: 3138
نحن السودانين عندنا قصور " مريع " فى تطبيقنا لمفهوم التربية لاولادنا و اطفالنا
فأما : قسوة و ضرب و " تنهير " للاطفال و أما : تدليل و دلع مبالغ فيهو
فالقسوة و الضرب و التنهير للاطفال يدخل الرعب فى نفسية الطفل و يجعل منه انسان خنوع ..وجل .. مرعوب .. لا يثق بنفسه ، و يخاف المجتمع من حوله و قد ينحرف و يصبح مجرمآ او سارقآ ام منحرفآ اخلاقيآ كتنفيس عن مكبوتاته التى عانى منها ايام طفولته
و التدليل المبالغ فيه للاطفال ايضآ يخرج لنا اجيال خانعة ، لا تتحمل مسؤلية سلبية تأخذ و لا تعطى عديمة الثقة فى نفسها و ايضآ قد تتعرض للانحراف باوسع معانيه
هل توجد لدينا وسطية بين البين ؟؟؟؟
05-20-2003, 04:43 AM
KOSTA KOSTA
تاريخ التسجيل: 02-04-2002
مجموع المشاركات: 3138
امثلة حية على ان سياسة القسوة و الضرب لا تنتج اجيال معافاة احدهم كان يضرب اطفاله بقسوة و اما اذا لعبوا مع الاطفال الآخرين و ضربهم هؤلاء الاطفال الآخرين فى اللعب او ما شابه ، و جاءوا الى البيت يبكون و يشكون فان والدهم يزيدهم ضربآ مبرحآ و يقول : و الله تانى يا اولاد الكلب تجوا تشكوا لى من ولد ضربكم الا اقتلكم و النتيجة اصبح اطفاله فى غاية الشراسة مع الاطفال الآخرين خوفآ من قسوة ابيهم .. و شيئآ فشيئآ اصبحوا جبارين فى الارض و فى مدارسهم حتى اصبح الجميع يخشاهم ... و طبعآ و كما هو متوقع لم يفلحوا فى الدراسة ، و يا دوبك المتوسطة او الثانوى على الاكثر
مثال آخر : اب على درجة كبيرة من التعليم ( كلية غردون التذكارية ) و لكنه قاسى فى تربية اطفاله و ادخال الرعب الى نفوسهم و تسمع صوته العالى و هو يصرخ فيهم و يؤنبهم من آخر الدنيا و النتيجة : خمسة ابناء طلعوا فاشلين جدآ احدهم ذهب الى ليبيا و لم يعد الى الآن و الآخر هاجر الى الامارات و عمل عمايل مخزيه و تم ادخاله السجن ( خمر + مخدرات ) و ترحيله من هناك للسودان و الثالث و الرابع و الخامس عاطلين عن العمل و المواهب و البنات تزوجن و لكن اذقن ازواجهن الليل من المشاكل و المناكفات
05-20-2003, 08:21 PM
KOSTA KOSTA
تاريخ التسجيل: 02-04-2002
مجموع المشاركات: 3138
هنا فى الخليج حدث و لا حرج عن " بدائية " التربية لدى العديد من الاسر . اذكر احدى الاسر و هى من العاصمة و يفترض انها اسرة واعية و متحضرة .. لكن للاسف الشديد لديهم مفهوم غاية فى " التخلف و الجلافة " ذلك بانهم يتركون الحبل على القارب " حتى آخره " لاولادهم .. و لا يسألوهم ابدآ .. و هم اطفال فى و اكبرهم فى المتوسطة . عند زيارة هذه الاسرة لاحد الاسر السودانية الاخرى يصحبوا معهم اطفالهم عدا ذاك الذى بالمتوسطة و عددهم اربعة .. و عند دخولهم لمنزل من يزورونه يبدأ اطفالهم فى ممارسة طقوس و فنون فى اتلاف اثاثات المنزل و صب العصير على الموكيت او الارضية السيراميك .. و الطفل منهم يطلع على الكراسى المنجدة بحذائه المتسخ ...و الاغرب من هذا انهم يتلاعبون بالتلفزيون و يقال انهم فى مرة من المرات قد كسروا تلفزيون احد الاسر التى زاروها . هذا الامر قد يبدو عاديآ لبعض الناس ، و لكن الغريب فيه ان والدهم او والدتهم لا يسألونهم و لا ينهرونهم حتى .. فقط ينظرون الى مايحدث من اطفالهم و كأنه امر عادى و لا يعنيهم من قريب او بعيد .
هذه " قلة تربية " فى كل المذاهب .. و " جهل مدقع " من الابوين
...
ياترى هل يوجد الكثير من هذه النوعية فى المهاجر الاخرى ؟؟؟
شكرا كوستا على البوست الجميل ده ، وربنا يخلي أطفالكم وما يحرم بيت من الأطفال .
من يومين بس كان معانا بنات ود خالتي في زيارة للأمارات من السودان طفلتين زي العسل في سن 5 و3 سنوات . من لحظة ما دخلو لغاية ما سابونا وأنا بضحك من الكلام الكبار الكبار البستخدموه ، كر علي ، وبوب علي ، سجمي ، و يا هنايه ،....وغيره ، والسبب في ذلك لأنهم اتربوا مع حبواباتهم في البيت ، رغم ظرافتهم لكن حسيت انو الطفولة مفقوده بعض الشيء في كلامهم. انا عندي حبوه الله يرحمها مرتبط بالحنية و الطيبه و بقصة فاطنة السمحة ، و كمان لما كنت اتشيطن احتمي بها لتفادي العقاب. يا ترى رأيكم شنو في تربية الحبوبات ؟ طبعا مع ملاحظة الفرق بين حبوبات زمان وحبوبات العصر الحالي .
05-21-2003, 09:51 AM
garjah garjah
تاريخ التسجيل: 05-04-2002
مجموع المشاركات: 4702
الاطفال فى السودان عليهم فصاحة رهيبة لا تجديها لدى اطفال المغتربين و هذه ضريبة للوطن يدفعها المغتربون خصمآ على نشأة اطفالهم خارج السودان و البيئة لها دور عظيم فى التنشئة للاطفال و تربيتهم تربية الحبوبات لها محاسنها و مضارها ايضآ ، فالحبوبات بهن " الحنية " الزائدة لاحفادهن و هذه بلا شك مطلوبة و لكن اذا فاتت الحد فعواقبها وخيمة ... كذلك فالحبوبات و على قدر فهمهن و تفكيرهن قد تفوت عليهن اشياء غاية فى الاهمية بالنسبة للتربية عمومآ الالفاظ التى يتلفظ بها الاطفال هى نتاج ما يسمعونه فى محيطهم اليومى و يتأثرون به و يصبح من مفرداتهم العادية ... و هنا مكمن الخطورة فى اهمية ان نختار الوسط الملائم لتنشئة الاطفال
قرجة
ما عاش من يزعل طفل طبعآ هنالك فرق كبير بين ان تزعل طفل و بين ان تعاقبه على حسب ما فعل بلضو يا قلجة الراء حليناها بله و دينا
يا زول انت خليتنا مشرورين فى مدرستك الابتدائية ديك و عملت نايم اها .. من ديك ما قابلناك تانى
الا مسعول من الخير : البت بدور بيها شنو ؟؟؟ انا شخصيآ بأسلفك ليها سنة كاملة ، بس اعرف السبب ؟؟؟ اصلو الايام دى ياعمو حسبو قالوا فى عروض زواج رهيبة : شئ تعرس واحدة و تأخد معاها تلاتة و شئ تعرس مجانآ
اغتنم الفرصة فقد لا تتكرر
بالمناسبة انا ما كلمتك و لا قلت ليك حاجة اتفقنا ؟؟؟ اها .. ادينى عنوانك عشان ابعت ليك الشافعة الفصيحة بتاعتى دى ، يا امورك مشت تمام معاها .. يا جابتها ليك دقلها يكركب
الحبيب جدا كوستا عايز بتك لانو بيتى مافيهو راجل بقدر بقول عاوز يدبل فعاوزها تطلع القرار دا بعدين انت عارف نحنكان نتظر عرس الزمن دا واحدة ويدوك معاها ثلاثة بالنسبة لمدرستى جابت ليها رجال كبار من زمن حفرو البحر.....وطلعونى اوف صايد
لك الشكر على المرور من هنا و الاطراء اطفالنا يعانون الامرين من تربيتنا لهم ... و مثلما هم مظلومين فى الكثير من نواحى الحياة ... فالتربية جزء اصيل فى تنشئتهم ان لم نحسنها فنكون قد خسرنا اجيال قادمة
على ذكر الاطفال و المسرح ، الاخت تماضر وعدتنا بالكتابة عن مسرح الطفل ( و لا زلنا ننتظرها زى هلال العيد - مع انى مريخابى ) ... لا ادرى هل لوالدكم محمد شريف على اى مسرحيات او اهتمامات بمسرح الاطفال .. او العرائس ؟؟؟؟
05-24-2003, 08:27 PM
KOSTA KOSTA
تاريخ التسجيل: 02-04-2002
مجموع المشاركات: 3138
اطفال يستأنسون مع بعض فى براءة محببة الاول : وييييييييييي عربيتنا اسمح من عربيتكم التانى : القال ليك منو ؟؟؟ نحنا عربيتنا جديدة و لونها ابيض كمان مازى عربيتكم الشينة ديك الاول : نحنا عربيتنا بتسوق بسرعة 220 التانى : و نحنا عربيتنا بتسوق بسرعة شديدة اكتر من عربيتكم .. عربيتنا بتسوق بسرعة 18
05-26-2003, 07:54 PM
KOSTA KOSTA
تاريخ التسجيل: 02-04-2002
مجموع المشاركات: 3138
اعتقد ان من الامثل فى تربيتنا لاطفالنا ان نعطيهم الثقة بانفسهم و بافكارهم ... ثم نراقبهم بحذر ، فان ظهرت هنّات هنا و هناك قمنا بتنبيههم اليها و تنويرهم الى الصحيح من الافعال و الاقوال .. ، و ان جاءوا بافعال و اقوال ممتازة شجعناهم على ذلك و لا بأس من سياسة الهدايا و المثوبة اذ انها تشجعهم على الاتيان بكل ما هو رائع و الامر من قبل و من بعد يتطلب منا ان نتعامل مع كل حدث بعقلانية و حكمة تجاه افعال اطفالنا
05-27-2003, 07:52 PM
KOSTA KOSTA
تاريخ التسجيل: 02-04-2002
مجموع المشاركات: 3138
يا زول ده كلام شنو ده ؟؟؟ كيف البيت ما فيهو راجل بيقدر يقول عايز يدبل ؟؟ و مال انت قاعد تعمل شنو ؟؟ و بعدين لسع ما فات شئ ما زال فرصة الواحدة و معاها تلاتة موجودة و متاحة ... بس اقول ليك خلى بتى التقول الكلام ده و انت ابعد بعيد عشان خاطر العيال
مدرستك فعلآ جابت ليها فطاحلة يا زول ناس جدو قرجة .. و عم عبدالله جعفر و حبوبة دومه و اسكت ساى الناس تجيب ليك حكاوى من وين ما تعرف و نحنا ذاتنا طلعنا اوف بوينت مش سايد
تجئ نفتح المتوسطة ؟؟؟ بس ما تقول لى درستوها وسطى ؟؟؟
انت عارف ياكوستا عندى بت عمتى صغيرون وشليقة... على التعترنى يوم سقتها معاى حفلة شاى ...وان كنت قايل الشافعة جاهلة ساى هى تراها كانت تصور ساى...بعد ما رجعنا البيت ....امها سألتها ...اها الحفلة كانت كيف....قامت قالت ليها كان شفتى يمى حسبو اتلصق جنب البت شديد وقال ليها بحبك.......اها ياكوستا من اليوم داك حلفت مافى شافع يبرانى
بعدين ياخى وينو الراجل البقدر يقول عاوز يدبل مع الزيت الحار البكبوه فى النخرة وانت نائم الخوفتنا بيه دا...شكيت محن مرتك....جابت النظرية دى من وين
05-27-2003, 08:42 PM
alfatih alfatih
تاريخ التسجيل: 02-04-2003
مجموع المشاركات: 1150
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
KOSTA
سجيمان
فتحي البحيري
ولياب
garjah
zola123
حسن الجزولي
AbuAla
Tumadir
alfatih
فيس بوك
تويتر
انستقرام
يوتيوب
بنتيريست