تشظت الألوان من ثياب العروس وتناثرت على البرش الفرِحِ برقصتها واهتزت أطرافه طرباً من ترترتها على المساحة المزخرفة بزغاريد النسوة المغنيات .. هيلا هيلا دي الرايقا
تمشي الأقدام في حركة بطيئة ( رايقا ) رحلتها في منتصف البرش .. والعروس في زيها الأحمر البراق " معنكشة " بالذهب .. الخواتم .. الجنيه الإنجليزي .. و...والبوبار .. و...و واللازوردي والفرج الله .. وكرسي جابر والسوميته وخرزة العين الزرقاء والرشمة ممتدة من الأنف إلى خلف الأذن مستكينة " للفِــدَو " . نصف القمر عاملات هلال .. تماذج بين لوني الحياة ،الأحمر والذهبي ،.. الأحمر لون أساسي ملئ بالحيوية وكذلك الذهبي لون شعاع ضياء الشمس وبريق الذهب مصدر الثراء .. للألوان قوتها في ساقية شوفنا اليومي ، فلا مجال للصدفة ، فمن اختار هذا الزي يعرف معنى اللون وصدقه وقوته وونسته مع العيون ..
ويا الدهب ويا الدهب ميزان الصعب يا عينيا يا حرير يا حرير ميزان التقيل يا عينيا
العريس يتقدم هاشاً باشاً لعروسته التي لا يرى منها سوى فستانها الأحمر ، لأن فركة القرمصيص تغطي المنطقة الأعلى لجسدها ، يداري ما يختلج في نفسه بحركات تفتقد السيطرة على إيقاعها ، فمرة يقفز ومرة يمشي ومرة يهز يديه للأصحاب ،، أبشِر بالخير ،،، عقبالك ،، مبروك يا عريس ،،، يعدِّل من وضع الهلال الذهبي على رأسه ويمسح بصورة عفوية على ثوبه الأبيض وجدلته الحريرية الحمراء ترقص مع الريح ...
هيلا هيلا دي الرايقا جات تعوم بي صديرا دي الرايقا
الوزيرة تطلق زغرودة طويلة المدى تعبر الحي وتتلاشى تردداتها في المساحات البعيدة .. تعقبها زغاريد البنات والصبيات الصغيرات الحالمات حادة ومتنافرة .. ( يجي يجي يجي يجي ........ ) ( يجي يجي يجي يجي ........ ) ، كل من يسمع نداءها يحمل عصاه ويتوجه بسرعة نحو بيت اللعبة ...
وليد نادو ليَّ كان نايم صحّــو ليّ كان مافي شوفو ليّ
العريس يلف في دائرة كبيرة حول عروسته ،،، أصل الرقص أن يدور الراقص حول ذاته ، وفي رقص العرس يدور العريس حول العروس في دائرة كاملة البهاء ،،، يدور ويدور ليتحول الخط الدائري اإلى هالة تحيط بالعروسين ليتحولا إلى جسد واحد يثير الحلقة ،، والزغاريد تلهب الحماس في أكف المغنيات ،، والإثارة تصل إلى قمتها ...
يا حبيب يلاك عليك الله نشوفا العروس عليك الله
العروس تقف في ثبات خارجي ، معتدلة ، ودواخلها كمهرة السباق يمنعها السياج من الإنطلاق ،، حمامة ، يقيدها قفص الجماعة المبتهجة من التحليق إلى قمة نشوى الرقص واللحاق بالزغاريد عند السحاب ،،، تهز قدميها في حركة لا تلاحظ بالعين المجردة ،، حركة تحسها الحناء السوداء في أخمص قدميها وهي تتناغم مع ألوان البرش الغامقة .. البرش الذي يتمنى انزلاق قدميها عليه لتزيد من لمعانه جرّاء امتصاصه للزيت الذي يجعل من الحناء أكثر توهجاً . الوزيرة تهمس للعروس وهي تشير للعريس بيده ليتقدم ليمسك بطرف ( فِرْكة القرمصيص ) ، يبتسم العريس ويختلج وجهه بتعبيرات مختلفة ، يرفع القرمصيص ببطء وبتناغم مدهش تغني البنات :
العريس قمرا يا الرايقا فتّحي وشوفي يا الرايقا
..عند إزاحة فركة القرمصيص ، وبعد أربعين صباحاً رآها .. الحِفلة الذهبية على رأس العروس ، تاج العفة ، زخرفة الحناء السوداء المدهشة تضفي على يديها بهاءاً ورونقاً ، أزهار الوينكا وصفق الورد الإنجليزي وخطوط ورموز الجداريات الكوشية مختصرة كلها في شفرة على حوافها عطور المحلب والسرتية والصندلية .. مع رعشة أنامل العروسة يلمع ويتلاصف الذهب ، بما يجعل الخواتم في حيرة من أمرها :
العريس قمرا عليك الله فتّحي وشوفي عليك الله
وبرقة يمسك بيديها وينزلهما بلطف عن وجهها إلى جانبي جسدها ، الوجه يضيء براءة ، تهتز الرشمة هزة خفيفة ومعها الزمام ، الجسد يريد أن يحلق بجناحين من النغم والإيقاع .
من قال إن الأرواح ترقص على أطراف الرياح وتخترق اللهب ؟ من ؟
Quote: العريس يتقدم هاشاً باشاً لعروسته التي لا يرى منها سوى فستانها الأحمر ، لأن فركة القرمصيص تغطي المنطقة الأعلى لجسدها
ده قطع الرحط ولا شنو ؟؟
Quote: وفي رقص العرس يدور العريس حول العروس في دائرة كاملة البهاء ،،، يدور ويدور ليتحول الخط الدائري اإلى هالة تحيط بالعروسين ليتحولا إلى جسد واحد يثير الحلقة
انا جاتنى الدوووووشة
Quote: وبعد أربعين صباحاً رآها .. الحِفلة الذهبية على رأس العروس ، تاج العفة ، زخرفة الحناء السوداء المدهشة تضفي على يديها بهاءاً ورونقاً ، أزهار الوينكا وصفق الورد الإنجليزي وخطوط ورموز الجداريات الكوشية مختصرة كلها في شفرة على حوافها عطور المحلب والسرتية والصندلية .. مع رعشة أنامل العروسة يلمع ويتلاصف الذهب ، بما يجعل الخواتم في حيرة من أمرها :
يا جماعة انا جاتنى الحالة 21 عدييييييل كدا
Quote: وبرقة يمسك بيديها وينزلهما بلطف عن وجهها إلى جانبي جسدها ، الوجه يضيء براءة ، تهتز الرشمة هزة خفيفة ومعها الزمام ، الجسد يريد أن يحلق بجناحين من النغم والإيقاع
اوعدنا ياااااا رب ,,, الله يكون فى عونا نحن العزّابة!!
لك التحية ايها الفنان المرهف و تشكر على هذا السرد الجميل
أبشر بالخير تعال بي جاي اتوسط الدايرة ده قطع رحط بالتقطيع المريح الحالة 21 دي اخت الحارة22 وتسلم من الدوشة لكن حاسي زي الضربت الأرض لأنك مارجعت لينا تاني طمنا عليك
طيفور الظريف تر لي هنا انا بشرب في شاي نعناعو طازج ولوعايز شاي بي قرفة عندنا انا بحب الشاي الزاكي اب ريحة تسلطنك نحن في انتظارك لي قطع الرحط قصرنا معاك ؟؟
06-14-2006, 06:28 AM
صديق الموج صديق الموج
تاريخ التسجيل: 03-17-2004
مجموع المشاركات: 19433
مالك علينا ده منو الهداك علشان تقلب المواجع وترجعنا للزمن الجميل؟
ماتخلينا فى جوطتنا دى عليك الله.. طريتنا زمن المرح والفرح والبساطه والنفوس النقيه
وبيوت الا فراح والاعراس واللمه والحنه والقيدومه والصبحيه وفطور ام العروس ......
هل تعلم يالسنى ده كلو اخوك طلع منو (ملوص) طبعا نحنا عرسنا نظام( طرد) الله يسلمك لذلك اتحرمنا من كل الحاجات الجميله ..لكن الواحد لو لقى فرصه تانى مافى مانع... مودتى..
06-14-2006, 02:25 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
تشظت الألوان من ثياب العروس وتناثرت على البرش الفرِحِ برقصتها واهتزت أطرافه طرباً من ترترتها على المساحة المزخرفة بزغاريد النسوة المغنيات .. هيلا هيلا دي الرايقا
وزوووووووم في الأنوار المعلقه في الحيطة لحدي ما كل الالوان تتداخل .. ومدخل علي الوان الثباتا
Quote:
تمشي الأقدام في حركة بطيئة ( رايقا ) رحلتها في منتصف البرش .. والعروس في زيها الأحمر البراق " معنكشة " بالذهب .. الخواتم .. الجنيه الإنجليزي .. و...والبوبار .. و...و واللازوردي والفرج الله .. وكرسي جابر والسوميته وخرزة العين الزرقاء والرشمة ممتدة من الأنف إلى خلف الأذن مستكينة " للفِــدَو " . نصف القمر عاملات هلال .. تماذج بين لوني الحياة ،الأحمر والذهبي ،.. الأحمر لون أساسي ملئ بالحيوية وكذلك الذهبي لون شعاع ضياء الشمس وبريق الذهب مصدر الثراء .. للألوان قوتها في ساقية شوفنا اليومي ، فلا مجال للصدفة ، فمن اختار هذا الزي يعرف معنى اللون وصدقه وقوته وونسته مع العيون ..
ويا الدهب ويا الدهب ميزان الصعب يا عينيا يا حرير يا حرير ميزان التقيل يا عينيا
ومن الوان الثباتا نطلع بالكاميرا مع حركة اقدام العروس .. والخلفيه بتاعه صوت حركة الارجل بتداعب في صوت الدلوكة ... . في عمق الفستان الاحمر وستوب نركز علي الحلقات الدهبية في افستان وانعكاسات الترترة
++++ ما داير اخرب الشغل لكن سيناريو ......... ابن جن
ياسلام يا السني,,,ليه تفوتني البوح الراقي والصهيل الشفيف... ياخ ده تخصصي عديل كده لكن عزائي ان مثل البوست ده ببكون مرفوع لسنين وبجيك بقصص التعلمجيات وطقوس الرقيص والشبال ونمط العرس في مناطق متفرقة وزفة وكرنفال زفة العريس عند مختلف بوادي ووديان السودان... شكرا يا سني يا (بلد) يا مسكون بحب اشياء الوطن الفريدة الرائعة.. ولنا لقا ولقاء
06-14-2006, 02:32 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
الخواض الواحد فرحان انوفي ناس بتهتم بالتفاصيل وخليك معانا نحتاج لي الكاميرا الخاصة بك والسيناريو الفنان وأسرح زي ما عايز الفن مفتوح لي ابداعكم وتابع معنا الرقصة البديعة رقصة العروس وتفاصيلها ومعانيها مودتي
06-14-2006, 02:32 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
الخواض الواحد فرحان انوفي ناس بتهتم بالتفاصيل وخليك معانا نحتاج لي الكاميرا الخاصة بك والسيناريو الفنان وأسرح زي ما عايز الفن مفتوح لي ابداعكم وتابع معنا الرقصة البديعة رقصة العروس وتفاصيلها ومعانيها مودتي
06-14-2006, 02:42 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
كيكي كده الواحد ضمن تنوع العمل واختلاف الطقوس وده بثري الموضوع ياخوي العرس له اشكال عديدةومبهرة اتمنى ان تكون مشاركتك من الوطن ورافقتك الســـــــلامة حبي
06-14-2006, 02:42 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
كيكي كده الواحد ضمن تنوع العمل واختلاف الطقوس وده بثري الموضوع ياخوي العرس له اشكال عديدةومبهرة اتمنى ان تكون مشاركتك من الوطن ورافقتك الســـــــلامة حبي
بندق الروح كل يوم يابهنس يارائع أجمل حاجة حصلت اني عرفت ناس بحملوا كل هذا الجمال بالله يابهنس في اجمل من الطقوس البقت منسبة والأسباب تافهة ومرات بتكون سخيفة لكن لازم نوثق للجمال ده دورنا باخي بهنس لك المحبة والمودة النقية
06-14-2006, 03:26 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
بندق الروح كل يوم يابهنس يارائع أجمل حاجة حصلت اني عرفت ناس بحملوا كل هذا الجمال بالله يابهنس في اجمل من الطقوس البقت منسبة والأسباب تافهة ومرات بتكون سخيفة لكن لازم نوثق للجمال ده دورنا باخي بهنس لك المحبة والمودة النقية
06-14-2006, 03:26 PM
Muna Khugali Muna Khugali
تاريخ التسجيل: 11-27-2004
مجموع المشاركات: 22503
( و ضريرتو تسيل .. النار جواهو و .. بره القرمصيص في الكتف .. و جوه القلب الجمره ياحلو البت المهره . يا حلم الضو البهره يا الناس الحلقها يبّس يا الخمرة الريح تتنفس و ضريرتو تسيل شبالو يشيل و ..... )
السني .. كويس .. النشوف آخرتها معاك شنو !!!!
السيرة مرقت عصر يا عديله فوق الشيخ ود بدر الليله جينا عريسنا سار قدمنو يا عديلة شايل بيت بت عمو الليله زينة عريسنا مرق البحر يا عديلة قطع جرايد النخل يا عديلة
يا مسخوووووت أنا نفسي قام مالي ؟؟؟
06-14-2006, 11:36 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
أنا البقيت مسخووووووووت المهم كتر خيرك على النقدة لكن انت بتكون وين لمن الناس في الدايرةحاضرة بتكون وين ؟؟؟ العرس في الديم بكون دايما قطع الرحط في الحوش القدامي انت بتكون وين ؟؟ في السهلة ولا في الساحة مع الشفوت البشربوا الشربوت ولا معالشفوت البشربوا الشديدة ولضيضة تلقاك كنت طيرة ساكت وعاملينا فيها تفتيحة ما بتعرف قطع الرحط من قطع البحر ووووووييييييييييييييييييي النقدة النقدة
10-08-2006, 03:41 PM
محمد المختار الزيادى محمد المختار الزيادى
تاريخ التسجيل: 08-11-2006
مجموع المشاركات: 4050
رمضان كريم بهنس كيف الحال واحد صحبك اسمو بكرى سعدابى بسأل منك وبسلم عليك اخر مره اتقابلنا فيهابعد حفلة كابلى واتعشينا فى العرضة يا ربى لقيت مواصلات اليوم داك ولا لا والجتار عامل معاك كيف بتاع على مدنى والتلاجه ما زالت تعزف مقطوعة الثلج انت وين فى السودان ولا وين تحياتى محمد المختار مخو
06-14-2006, 03:32 PM
عشة بت فاطنة عشة بت فاطنة
تاريخ التسجيل: 01-06-2003
مجموع المشاركات: 4572
النسر المحلق نحو الشمس مثل كل النسور الأفريقية لك التحية واللول لول جاية بس انت اركز واثبت وخلي البتعمل فيهو ده قايلني ماشايفك عايز تحت الرقيص حت بدايتك واضحة عايز تقلبو لينا زار واها ديل لمن انزلوا البمسكن منو ؟؟؟؟؟
06-14-2006, 11:44 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
عشه عروسك دي دابة قايمة تتجيه ماشه على الحنة من فستانه العادي اها بعد ما تكمل زينتها جيبها لينا وبعد داك نشوف منو الغلبوا لكن صور جميلة وبتدعم الموضوع دعم صاح شكرا لك ايتها الصديقة النادرة
06-14-2006, 11:46 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22761
Quote: أصل الرقص أن يدور الراقص حول ذاته ، وفي رقص العرس يدور العريس حول العروس في دائرة كاملة البهاء ،،، يدور ويدور ليتحول الخط الدائري اإلى هالة تحيط بالعروسين ليتحولا إلى جسد واحد يثير الحلقة ،، والزغاريد تلهب الحماس في أكف المغنيات ،، والإثارة تصل إلى قمتها ...
فسيسرح البعض بعيدا .. بعيداً .. و أصوات زغاريد و طبول تدق في رأسه و سيشم رائحة تلكم الليلة و يعيش لحظتها .. و بالطبع سيرتد إلى شاشته و إبتسامة رضا ترقد على جانب فمه ..
واصل بقية الترترة .. أرقد بألف عافية
06-15-2006, 00:03 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
أبو ساندرا منو الكان بفرتق الحفلات في الحي وكيف كان العرس البشيل الليل فرح ويلا معانا لي بخة اللبن والضريرة والسيرة المرقت عصر والفرح البستمر اربعين صباح وليل وكل التفاصيل الحلوة والاغنيات البهيجة ونترتر اي فدام سوا لي قدام سوا لي قدام سوا ابو ساندرا اللطيف
الفنان المرهف محمد سني دفع الله هذا عمل مسرحي رائع ليس بمستغرب أن يصدر عن مبدع مشغول بالفن ومهموم بقضايا الدراما والكوميديا ودور المسرح في توعية وتثقيف المجتمع. ==== الستار مرفوع منذ البداية، غير أن فضاء المنصة عظم تماما. موسيقى صاخبة تنبعث، أقرب ما تكون الى مارشات عسكرية أو موقف حافلات الجو العام معبق حد التشبع بروائح عطور فواحه إضاءة خفيفة حيث الخشبة ممتلئة تماما. على الجدار الخلفي للمسرح تنتشر تشكيلات ضوئية تشبه سحبا مبعثرة.. حركة هلامية للتشكيلات الظلية التي تشبه السحب. تصل الموسيقى وضربات الطبول والأصوات اللاهثة حدا لا يطاق من الضجيج. التماعة إضاءة شديدة خاطفة فتدور العروس حول نفسها دورة كاملة بسرعة بالغة على أنغام "المهيرة وعقد الجلاد يا عروسنا عريسك غلبو الثبات". تظهر على الجدار الخلفي في نفس اللحظة ظلال شباب يبدو أنهم منحلون أو منحلين بل قل نحل جابهم الدرب وحضروا على صوت المايكرفون يرقصون ويتمايلون ويمشطون المكان بنظراتهم العروس تنئني إلى الخلف قليلا قليلا - مع ثبات قدميها – وصوت المغنية يعلو متبوعاً بالكورس "من فريع البان البسوح نديان الله يا سلام" قوة جبارة تشد جسدها كالقوس نحو الخلف. - في ذات اللحظات يوزع العريس البسمات على الحضور وهو يتلقي التبريكات أبشر بالخير يا عريس أبشر صاحبات العروس يدخلن مع العريس في حوار والفركة على كتفه وفجأة العروس بب تنزل الأرض على ركبتيها ويديها على وجهها والنسوان يزغردن ويصفقن قوووون لقد أنهزم العريس بعد أن دقسته النسوة "إن كيدهن عظيم" -. ود أم حق واقف لمبه سكران لط وفي رواية أخرى طينه وفي واحدة واقفة قدام النور فإنعكست صورة ظلية ليدها الممدودة في الحيطة بحجم متضخم جدا وأصابع مفتوحة متباعدة. أها صاحبنا ود ام حق يعاين لظل اليد المزروعة أمامه ويتخيل اليه من السكرة الفي راسو أنها حا تهجم عليه وتخنقو ، يناور ليداهم اليد التي أمامه. - الموسيقى تستمر في التصاعد متبوعة بالزغاريد وبشدة مثلما هو ظهر العروس يتقوس إلى الخلف أكثر ليأخذ جسمها شكل شبه دائري مبعدة يدها اليمنى وكذلك اليسري عن جسمها بطول يديها تاركة العنان لشعرها المنسدل خلف ظهرها يلامس الأرض والسكران واقف يعاين لي ظل اليد الممود في الحيطة يتخذ وضعية الهجوم كمن ينوي مداهمة اليد التي أمامه فجأة بضربة قاضية. الموسيقى وصوت الدلوكة تتصاعد بالشكل الذي لابد فيه من ان تنتهي بما يشبه "القفلة " التي يصمت بعدها كل شيء. والعروس عبر الاضاءة "السلويت " تبدو كالدائرة تماما. تتداخل مع الموسيقى صوت عربية مكنتها جاز وقفل أبواب بعنف فيظهر العسس ويتجهوا نحو الناس وهم يرددون "أسمعنا مرة مرة أسمعنا مرة ، فيقف كبير عساكر السلطان وسط سرادق الفرح ويقول مخاطباً أهل العرس وين تصريح الحفله دي. - يسود صمت تام. - إظلام -
الأفلام الهندية فيها : عوير الفيلم و حصان ضعيييييف كده و عربية جيب و بطل تطلع حبيبتو بت أم خال أبو حبوبة جد عمتو داك النط من الجبل . وخاين في النهاية يقوم يدوهو طلقة .. يقوم يموت في الفيلم الجايي ..
المهم .. ده ما موضوعنا .
صبحيتنا فيها سكران الحفلة .. واقف لطططط .. المكرفون قلعو قلع و وقف ملولح :
و الآآآآن .. سيتاتي ساتتي .. الآآآآن ..( و العريس جضمو ورمن من الحمبكة و الزعل .. لكن مقطعها في حشاهو لأنه السكران قريب طه أبو أخت مرة خالة ناس سمية البيتهم بيفتح على بيت توحيدة صاحبة بت خالة العروس ) .. الآآآن .. أيها الـ .. هيق . الفنان الكبير - و اللوليحة قرررربت ترميهو من المسرح الخاتينو فوق كراسي حديد - الآآآآآآآآآآآآآآن .. الفنان .. هيق .. بالله ممكن يا شباب ورا شوية كده ؟؟ لو زمحتو يعني . أوففف .. أووووف .. واحد نين .. واحد , واحد .. - الشباب ورا يقومو يكوركو : ياخ شغال ياخ .. المكرفون شغال يا .. شغال .. شغال - الآن .. مع الفنان .. - وراح إسم الفنان - .. قت ليكم .. الآآآن مع الفنان .. الفنان .. الفنان .. هيق الفنان .. الفنان .. بتاع قبيل .. وشقرن جزيرن .
06-16-2006, 02:50 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
عليك الله منوالحبوبة شنوشيقرن جزيرة لكن السكران ما عندك الحفلة التي لاتتعرض لي الفرتيق ولا السكارى لذاذة شنو؟؟؟ ما لازم من السكران والحيران والشوكش البكاي وأهم حاجة البكاي لو كان معروف معروف الرصافي ،،، طوالي الناس يكونوا جارين فيه نور طويل ولمن تدخل العروس بكونوا مركزين عليه ومع اول دمعة ،، اقولوا عليه مسكين !!عجبي !! وطبعا العروس اول ولد بتسميه باسمو.. شوفت الوفاء الصبحية دي حكايتها طويلة سكران الصبحية ولهاط بيت العرس وخاطب ديمة الزين المعاصر وده كلو فــــــــــــــــــــــي تــــــــــرتـــــــــــرة
06-15-2006, 07:29 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
عادل الفنان شكر ا ما ليه حدود الجسد الإنسانيفي الفنون الأدائيةينقسم الى ثلاثة أقسام الرأس ـ الفكر والعقل الصدرـالوجدان ،وبها الفؤاد الحوض ـالنوع ـ العفة ، ملاذ السر الأزلي هذه الأقسام الرئسة وماعداها أطرافيؤشر بها ويعمل ويحدد بها الأتجاه...[/PURPLE]
06-15-2006, 08:30 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
[] ترترة إيقاع الدلوكه يعلو في خط متصاعد ( كروشيندوو) نبراتها ترزم وتئن أنينا خفيفا ، والأيدي تصفق وفق الإيقاع ، ينتظم النغم وأخذ يعدو مرنا شجيا ، مما جعل العريس تهدا انفاسه، ويستجمع شجاعته ليمسك حجبات العروس ، تخيلوا الشاجاعة بتودي وين؟؟ مسك حجباتا!! (( حجابان من الجلد المصقول ، يقال أحدهما به سورة يسين، والثاني به آية الكرسي)).. عفتوا ليه زمان بقول لينا خلي عندك شجاعة أدبية .. لي جنس اليوم ده..شجاعة تحتاج اليها عندما ترى كل تلك العيون تنظر اليك ، وتحسب كل خطوة تخطوها،ويعدون انفاسك ويحصون حركاتك ، العفوية ، والخجلة،وانت في دنيا وردية،بعد مانزلت الأيادي وبان الوجه الصبوح ،نظر اليها ،بعد اربعين صباح ، ماذا يرى العريس في تلك اللحظة ، يرى وجهها؟؟؟لالالا!!يرى عقلها.. نعم يرى عقلها وده المعنى الفني والمقصود...يحدد وجهته عريسنا وينظر في الوجه الجميل ومن العيون يدخل عقلها ويشوف أيامو الجاية وهي بتربي الشفع ..سبحان المصور.. قول : ماشاءالله ،تعيده الوزيرة بصوتها القوى الى السباته ن يسمع صوت المغنيات، كأنه ملك سمعا جديدا ،، ماشاءالله ماشاءالله ماشاءالله يتشجع اكثر يمسك العروس من الحجاب ، ليقودها اليه ،طائعة تاتي اليه ، مع الإيقاع عيونها الوساع الحدده بالكحل السود تخترق فؤاده لحظة وأغمضت شموسها من جديد،، ولكن ماحدث قد حدث .. انفصل عن الكون ،واللوحة من حوله عبارة عن صورة متحركة، دون صوت ، صمت الرجال خلف الجميع يشاهدون من بعيد ، والعمات والخالات يتابعن بمحبة ولهفه ، ويتذكرن !! دائما في مثل هذه الملمات يتذكرن كل الأموات فترى الفرح في العيون ، وعلى الخدود الدموع.... اه من الألم اه من الألم يرى العريس حركة الأيدي التقليدية وهي تحاور الشفاه، ولكنه لايسمع الزغاريد،عروسه تتجه نحوه تهبه وجدانها المفتوح على قلبه ،يرقصان رقصة الوجد والعشق الأبدي ..الحركة تزداد سرعة ،تهمس الوزيرةاليه ،،تنزل يده تحت الرحط، يقطع سبعة خصل جلدية،،يرمي بها في البعيد،، تحمل معها الشرور السبعة ،الحسد،العقم،الكبسة، الفقر ،المشاكل،والجار النقار،والبيت الضيق، والخصل طائرة في الهواءيلحقهاالهياج والصراخ والغناء والزغاريد وابشر ياعريس نواصل ترترة[PURPLE
عجبنى ليك أتاريك بترقص عرايس... وطبعا بهذه ألـمناسبه حأحكي ليك قصه حقيقية وبطلها عريس[أخومسلم]عرس في[حلتنا]وطبعا ألناس ساهرا ورقصوا..وإنتظروا إختتام ألحفل بترقيص ألعروس علي حسب عاداتهم...ولكن بدلا من ذلك شبكهم ليك ألعريس بـ(قال أبوهريرة وماإدرك أبوهريرة]..فإنتهت ألحفلة علي ذلك... تانى يوم ألحلة كلها تكورك(والله ألعريس شيوعي...من ألله خلق ألدنيا ألعروس بيرقصوها..لكن جنس أبوهريرة دا ما سـمعنا بيه..هو في زمتكم ألرسول بتكلم مع زول شايل ليهو كديسه...لا والله العريس شيوعي...)
06-16-2006, 03:04 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
ود الشيخ ياكارلوس العصر الجديد الشووق والريد ياخوي بقيت سيد التعليمة وسيد الدللاليك ده جمع دلوكة دي محاولة للتوثيق بصورة مختلفة وحاولة مني لي دعم الفنون الموسيقية والأدائية من رقص وتعبير جسدي وده أضعف الإيمان يلا معانا من اجل الموسيقة التي سوف نملكها للأجيال القادمة لنرقص على موسيقانا السودانية مودتي
06-16-2006, 02:56 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
شادية وفي رواية أخرى شدووو الدلع البنلقى كبار أشتر زي حبوبة لينابترقص على موسيقى نشرة الأخبار ماعلينا انا ماشي السودان عن طريق مصر لكن حالف اجيب معاي دلــــــــــــــوكـــــــــــــــــــــة وفي المطار اقولوا لي ياجماعة حاسبو دي دلوكة الأستاذ وخبر مهم بجيب معاي الشتامة عشان خلفة الإيقاع عدة ايقاعية كاملة يعني عرس ساندرا اتظبط لكن ما كلمونا ؟؟؟؟
فى مقال هنا اسمو "رقصة العروس ..رفاهية العرض ومنبر التحول" كتبته طول واتنشر فى "رؤى" المهم جندرية فتحت عليه نقاش جميل..وفى اراء متباينة ..بوست ظريف ..ينفعك فى ترترتك..
06-16-2006, 07:23 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
تماضر شكرا لك ايتها الجميلة روعة التداعي العفوي والأنسيال الحرفي بينك وطلال عفيفي شكرا للمقال وانا في بالي عمل كتيب عن فنوننا البصرية التراثية أما الجندرية سيبها فهي مشغوله بالأنقلاب الخاص بها ضد الرجال سوف استفيد كثيرا من مفالك بعدين شوفي مريم وين مشت ومارجعت لحدي الأن تحياتي لكم جميعا مودتي
06-16-2006, 07:31 AM
محمد عكاشة محمد عكاشة
تاريخ التسجيل: 01-27-2005
مجموع المشاركات: 8273
السني هوي بوستك ده جنن العجايز ومحن الشباب رندوك! هاك دي كمان عيني ترتري لي ورة عيني عمال عطبرة
تحياتي يا محمد عكاشة وقول للسر السيد أمانة ما لابد للترترة خلف الكواليس وبالفن المرهف والنقد الشفيف لك التحية والتحية للعروس السودانية وعقبال البنيات غايتة اسة في الوش ساندرا حلك لما ناس ليم يبقوا على الترترة
صفقوا يا بنات... إن شاء الله الما بتصفق ما يعرسوها!!! ..................................................... "أعلاه مشهد مقتبس من صبحيات أواخر التسعينات"
أستاذنا محمد سني.. أي واحد من المتداخلين مولود بعد 1974 كضــــــــاب لو قال حضر ليهو رقيص عروس!! إلا يحكوا ليهم بيهو حكا!!
بوست لذيذ مثير للهجيج و شايفاه طلع إبداعات من كثيرين...
محبتي
سلمى
06-17-2006, 11:53 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
سلمى داود لك الشكر لفتي انتباهي لي حاجة مهمة خالص صحي مو الشاف رقيص العروس دي مشكلة كبيرة جدا !!طبعا ناس كتيرة بقت تعرس بالزفة المصرية اكثر حشمة واستايل!! شفتي المغصة النحن فبها .انا عايز اسالكم منو الكان بشوف العروس ما حشمة ؟؟؟ ومنو الكان بقيم العرس انو فيهو حاجة ما تمام ؟؟ الحكاية دي بدت بعد المغتربين والناس البتجي من برة لكن مافي واحد قال العروس دي ماله الا بعد أواخر الستينات العروس بترقص ليها 7 الف سنة ضوئية المهم المقال ليس مقال سرد تاريخي ولكن الرقص عموما ماشي للأنقراض نحن بنقول الرقص جميل وفن نبيل ولازم نحافظ عليه وطلعوا ابداعكم ومودتي
دخلت البوست وشايفة قدامي لوحة حقيقية لبرنامج صبيحة البرش الاحمر الذي تحول لسجادة بالالوان حسب التطورات العالمية الجديدة وعليه تقف ست الحسان في عرض شامل لكل صنوف العروض
رغم انه معظم الاراء بتكون حول الرقيص انه (عوارة) لكن يظل شيء جميل ، جميعنا يعجب برؤيته ، ويتكيف جدا ليهو جلوسا امام مسرح الرقيص
الاستاذ السني حقيقي رؤية اخراجية اكتر من جميلة لتراث سوداني اصيل
واصل فانا معك متابعون
06-17-2006, 05:52 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
الناس في الدنيا كلها عندهم رقيص العروس في الهند وليه طقوس عديدة في العالم النايم والصاحي عندهم رقيص واحتفالات الانحن البنقول لي تراثنا عوارة بعدين العوارة جاي من وين عدم ايمانا بالرقص ولا عدم المشاركة ولا عوارة ساكت كده يامايا شوفي لينا الرايهم عن رقيص العروس انو عوارة واكتبي عنهم والله بتثري لينا الموضوع بتاعنا ده خالص شكرا للمرور مودتي
حقيقي الفهم ده موجود عند جزء كبير من الناس والبنات ، يعني بيروا انه فكرة الرقص نفسها واللي بتعتمد على وصف الحركات باليدين والجسم باكمله هي نوع من العبط واستخفاف بالواحدة قدام الناس وجمهور المتفرجين وعادي جدا تلقا الناس بعد ما تتفرج ويتنتهي الرقيص ، اول تعليق بيكون ( ياخ بالله الرقيص ده حاجة هبلة جدا) المنظور لفكرة انه عبط ، ليس من خلال تراث وثقافة سودانية مع ملاحظة انه ما كل القبايل السودانية لها هذا الموروث الثقافي ، بل من انه اصلا المغزى شنو انه الواحدة تقيف قدام الناس وتؤدي رقصات توصيفية! مع انه هي نفسها فكرة الرقص الشرقي الفهم بيجي من انه ، بعد ما الرقيص ينتهي ويخلص ، الواحدة احساسها بيكون شنو وده راي سمعته من صديقاتي وقريباتي اللي رقصوا ، انهم بيتمنوا لو ما رقصوا!! ومعظمهم بيقولوا ممكن نتفرج لكن نرقص لأ!!
حاحكي ليك قصة بسيطة عندي خالي كان بيعمل في دبلوماسي في سفارة السودان في السويد في فترة التمانينات تم عمل معرض لثقافات الشعوب ، فتم عرض لشريط فيديو لرقيص عروس سودانية كتراث ، فكان ان التفت اليه واحد زميله من موظفي الخارجية السويدية قائلا ( اكثر الافلام اباحية افضل من الرقيص ده)!! ده مثلا فهم ممكن يكون سائد حتى وسط بعض السودانيين
تخريمة راي ده من خلال ما شاهدته واشاهده في الصبحيات ونحنا شعب السكوت وحلفا ما عندنا ثقافة رقيص العروس ، انما هي مسالة دخيلة علينا وتتم حسب مزاج العروس والعريس اولا
ومع ذلك بستمتع جدا ببرنامج العروس وهي بترقص
(عدل بواسطة maia on 06-17-2006, 06:18 AM) (عدل بواسطة maia on 06-17-2006, 06:20 AM)
06-17-2006, 05:38 AM
انعام عبد الحفيظ انعام عبد الحفيظ
تاريخ التسجيل: 12-07-2005
مجموع المشاركات: 8738
بالرغم من إختلاف الآراء حول رقيص العروس إلا أنه اجمل الطقوس الموجودة في الدنيا كلها والواجب علينا تطوره ومعالجته فنيا ليكون ابهى وأجمل لكل من يراه انعام الناشطة لك المودة والسعادة بمرورك من هنا والمنى لك بالنجاح في كل خطوة احترامي
06-17-2006, 06:09 AM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 23222
طــــــلال عـــــــــــــفـــــــــــــيــفــي وانا كمان لازم اول ما نصل السودان نلقى عريس نحنسو اعمل لينا رقيص عروس جد جد ولا اعرس ليكم تاني واصر عليهم على ادق التفاصيل مش شايف الفكرة التانية احلى ؟؟؟؟؟؟ واصل معانا الترترة مودتي ياصاحب اللون الأزرق الملكي ..
06-18-2006, 06:39 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
طــــــلال عـــــــــــــفـــــــــــــيــفــي وانا كمان لازم اول ما نصل السودان نلقى عريس نحنسو اعمل لينا رقيص عروس جد جد ولا اعرس ليكم تاني واصر عليهم على ادق التفاصيل مش شايف الفكرة التانية احلى ؟؟؟؟؟؟ واصل معانا الترترة مودتي ياصاحب اللون الأزرق الملكي ..
06-18-2006, 05:52 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 11025
الغناء لابد ان سصاحبه الرقص هذه حقيقة ولكن هناك ايض الغناء الذي نستمع اليه فقط العروس سمحة ورقاصة جملة للمبالغة للجمع بين موهبتين لأن العروس لابد لها من اتقان الرقص لأنها تتعلمه فترة من الزمن وعليها ان تجيده اجادة تامة التزين اساسا كان الرجل على مدى التاريخ هو من يتزين والمرأة تعتمد على جمالها الطبيعي والتحول في المسألة الجمالية في الزينة حدثت مع الدولةوتكوينها ومع تكون المدن المرأة دائما هي المنفعلة بالجمال وتتفرغ له وتكتشف ابعاده واصبح هذا دورها الحقيقي كثير من القبائل المرأة هي الواضع للقيمة الجمالية من الكل الى الأزياء وتقوم بتفصيلها للزوج والحبيب ـ في الشمال تم اختصارها في مناديل الحبيب الجنس له علاقة بالرقص لالالالالا الفرق بين النشاط الإنساني والسلوك الغريزى شنو ؟؟ ارقص وفرفش وغني
06-17-2006, 07:13 AM
Ahmed Mohammed Osman Ahmed Mohammed Osman
تاريخ التسجيل: 10-10-2005
مجموع المشاركات: 1381
Quote: وبرقة يمسك بيديها وينزلهما بلطف عن وجهها إلى جانبي جسدها ، الوجه يضيء براءة ، تهتز الرشمة هزة خفيفة ومعها الزمام ، الجسد يريد أن يحلق بجناحين من النغم والإيقاع
محمد السني اعجبني هذا المقطع من جملة المشهد الذي صورته بكل تفاصيلة اعجبني شرحك وتمثيلك لمقطع : حاجة زي ما تكون محلقة في العواصف فجاة تهبط في السكون نقلتنا من الترترة والزغاريد والجبجة الي لحطة تلاقي عينا العريس والعروسي لحظة صمت المحيط وتلاطم امواجه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد سنى دفع الله
saif massad ali
عوض الله الفولانى
طيفور
صديق الموج
لؤى
عشة بت فاطنة
Adil Osman
علوبه
ضحيه ابراهيم
عبدالكريم الامين احمد
Muna Khugali
Emad Abdulla
محمد المختار الزيادى
مريم الطيب
ابو جهينة
أبو ساندرا
almulaomar
أيزابيلا
Tumadir
abdalla elshaikh
محمد عكاشة
انعام عبد الحفيظ
بدر الدين الأمير
طلال عفيفي
Ahmed Mohammed Osman
Deng
فيس بوك
تويتر
انستقرام
يوتيوب
بنتيريست