دعواتكم لزميلنا المفكر د.الباقر العفيف بالشفاء العاجل
|
|
 يا نسمة كيف.. سلمى الشيخ سلامة وآخرون
|
يا نسمة كيف
يا نسمة كيف اخبار اهلنا وحينا
احكيلي عاد ما باقي طولوا مننا
زي ما دوام طارنهم طارننا
زي ما بنشيلم في القلوب شايلننا
حتى البعاد فتق جروحن زينا
يا نسمة ما تدسي المكتم عننا
تمرتنا كيف يا نسمة عرجونا انتنى
شيلا تقيل فوقو الدباس رسل غنا
لملم عويشو مع الصباح للعشا بنا
حضن الجنا
|
|
 
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: طارق جبريل)
|
عبد الرحمن بلاص
الله ليلى والله ليل
يا جنا مالك على ؟
كنت قبل فترة استمع اليه
رغم ان صوته ليس بطلاوة صوت ذاك المغنى الشجى النعام ادم
لكنه من ديار اعشق غناءها ومغنييها للابد
عبد الحمن بلاص
بلال يا بلا يا اب ذوق عشا امه المنفل خاله بين الناس وعمه
وهو
الله يا عيون الصيد وانارى
موقده فى قلبى حارة شديد وانارى
منذ الازل والى الابد يظل ذاك الصوت المحبب
رغم انه ليس "شحمانا" كما محمد كرم الله
لكن فيه شئ ما
عبق ما ، عذوبة ما تجذبك اليه
كلما تستمع اليه يدفعك نحوه دفعا
تود ان تنفك من اسره لكنه يجذبك ناحيته
امر عجزت عن سبر غوره
لكنه بلاص فى النهاية
شكرا لك واتمنى ان استمع الى صوته هاهنا
قلت كنت استمع اليه مؤخرا فى الاذاعة ومن خلال بيت للفنون انشاه
ولعمرى ما يزال مشروعا يدعونا الى تفكيك خطابه الغنائى
فله التجلةوالاحترام
ولك ياصديقى الشكر اجزله وانت تدخلنا الى مغارة من مغارات الغناء الجميل
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: طارق جبريل)
|
حليل البي جناح أشواقه
في لبلد البعيد حاضن عذابه
مسافر زادو في الدنيا
أحبابه وصحابو
حليل الفي البعيد فارق عقابه
بتسمع لهفة الشوق في ربابه
حليل الفي الغرام أيامه شابو
نجيمات سعدو من دنياه غابو
علي شوفت السراب دفق شرابو
يا حليلو... يا حليلو
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: معاوية المدير)
|
مزج عبد الرحمن بلاص بين الربابة والالات الحديثة
"استخدم الساكسفون "فى بعض اغنياته
لكن ذلك لم يجعل غناءه نشازا
رغم ما واجهه من تعنت الحرس القديم
لكنه كان فى حالة نشوى من عرف كيف ينفذ الى ما يريد
تجده حالا "من حلول " كما الصوفى يتعقب الشوارد من الاحاديث
ويلهمها فنه ويمنحها القه
شكرا لك اخى طارق فهذا الرجل احبه
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: سلمى الشيخ سلامة)
|
يا سلام ياطارق !!
سلام علي أعظم ثنائي مر علي الاغنية السودانية: القيثارة محمد جبارة
و المبدع السر عثمان الطيب و 40 عامامن التوهج والعطاء ..
(يمة/بت البلد/نسمة/تراب بلدي/ الحنين وداني/ وجلابة / الي أخر عناقيد الابداعوالألق والحنين والحب والجمال
التحية لهم ولك يا ود جبرين
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: محمد الجزولي)
|
| Quote: سلمى الشيخ سلامة وآخرون |
غايتو يا طارق (آخرون) دي بتدينا فرصة نتصلبط في بوستات الناس ..
Quote: الله يا عيون الصيد وانارى
موقده فى قلبى حارة شديد وانارى |
الله الله الله ... الكلام ده مرقتيهو من وين يا سلمى .. لو الكلام السمح بتنسي .. كان نسينا كلام زي ده كان ملئ الإذاعة في يوم من الأيام .. أو جايز لسة موجود، وبعدنا نحن من الإذاعة. غايتو مجرد ذكر البيت ده رجعني لأيام لا تعوّض.
يديكم العافية إنتي والمسنوح طارق.
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: محمد أبوالعزائم أبوالريش)
|
يا طارق المسنوح
اول حاجة الاغنية ابت تشتغل
وما كنت قايلاها "هيل محمد جبارة "
وحات امى اول ما شفت "يا نسمة كيف "
طارت فى راسى صورة بلاص
"اللى انا ما بريدو يا عشاى "
والاغنية دى بالتحديد بقى عندى ليها "خاترا خسوسى ، نعمنو بيتى بتغنيها "
اها قمت "عفصت اللنك "
يجينى ودجبارة بعد ما استعدلت الكومبيتر الله لا شكرو
احرجنى "معاى "
عامن اول يا طارق كتبت بوست عن الوليد الحنين "محمد جبارة "
وجاتنى الخلق تبكى وفرحانة
وحات سيدى محمد جبارة دا متلو مافى فى الحنية
الله يعلم صوتو يخلى القلب الكافر ياااااااااامن
دحين يعنى اعفى لينا
"اللى كلامى فوق بلاص ما ناكراهو تب "
ولايوم باكر بريدو بالتلاته
شفت الريدة ام تلاتة شعب ؟
ظليلة وتغنى عن لهب الغربة
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: سلمى الشيخ سلامة)
|
Quote: يا طارق المسنوح
اول حاجة الاغنية ابت تشتغل
وما كنت قايلاها "هيل محمد جبارة "
وحات امى اول ما شفت "يا نسمة كيف "
طارت فى راسى صورة بلاص
"اللى انا ما بريدو يا عشاى "
والاغنية دى بالتحديد بقى عندى ليها "خاترا خسوسى ، نعمنو بيتى بتغنيها |
بنجيب ليك بلاص يا سلمى
عندنا ليهو شغل كتير...بس بكرى يفك لينا الكودات حتى لو مره...
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: محمد أبوالعزائم أبوالريش)
|
ابو الريش
ازيك يا العشا
عارف زمان كان فى برنامج اسمه من ربوع السودان
ما بتفوتنى منه حلقة
من صغيرة
اقعد "احقص" مع الرادى
واحفظ الغنا من كل لون وشكل
وعرفت الفنانين من الجنوب لغاية اقصى حته فى الشمال وكذا من الغرب والشرق
ادم شاش ، ويوسف فرتاك ، ود السافل ، زكى عبد الكريم ، بلاص ، صديق عباس
احمد عمر الرباطابى ،وناس نسيت اسماؤهم عامل الزمن
بعد اشتغلت فى الاذاعة الصلة بقت حميمة اكتر ، لانه فيها يومى لازم تسمع
مرات ما بكون عندى شغل بمشى المكتبة او التنسسيق
افرفر فى الورق واكتب اسماء الفنانين والاشرطة
حفظت الكتير
ساعدنى صديقى عوض بابكر على اكتشافات خيالية فى المكتبة
بث دى كل القصة
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: munswor almophtah)
|
Quote: خدره ومفزره ولينه ولابسه فى الرموش عينه
ود السافل |
المنصور حباب يوما جابك
عل يا ود ماجننتنى جن
امانه مابريد ود السافل دا
من فريع البان البسوح نديان الله يا سلام
العصير يوم جات شوفو طاعونا
واى الجنيت باقى مجنونا
شفت "واى "دى براها حكاية
والعجب سبعين كان تفك الحد
يعنى هى حادة سمحة
شفت الناس دى سمحة كيف ؟
شفتو كان فى توب حدادو
وكل حواسى عليهو نادو
الله واحد ريادين لمن غلط
غايتو يا منصور دا جيل ما بجى زيو تانى
محال
والعجب لمن اول مرة شفتو هادى ود السافل
كنا صغار فى بربر
اليوم داك العمباسة قالو الا ينجلدو
وطبعا نحنا ناس بندر ساكت
اها قول الجلد بدا
اختك ما جاتا حمى راسا عديل وهضاريب
لكين كنت بسمع من بعيد لود السافل
والغنا بالدلوكة والشتامة دى تتخابت
عليك امان الله فى حمتى ديك وانكع فى سريرى
زمن سمح بلحيل
الله يديك الفى مرادك يا المنصور
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: طارق جبريل)
|
رسلت السلام يغريك يا الزين
السلام ليك وللمعاك في الغربة قاعدين
السلام يغري الطرابيش والقلاشين
السلام من عين شمس لاحد فلسطين
عاد أنا ما بوصفك آصباحي بخاف من العين
وإنت من عين الخلوق مودعاك جبرين
إنت بالعافي التختك في المصارين
تبقالك هدوم وسروال ونعلين
دايري أشكيلو العذر صمد النمرتين
وإنت اسيد الجزيري تكاكي وزين
يا سيد الشال تقيل فدع العراجين
إنت في تالت سنين ما بيدوك سبوعين
وما بترسل لي جواباًفيهو سطرين؟
وما بتقولي نعيم صباح أُمو أشتغل وين؟
إنت ماك عارف جواب الخير يجيني وازيد لي شبرين
وإنبسط لِي إنبِساطي زايدي علي القوانين...
دي يا ود جبرين, حبوبتك فاطنة بت ود خير...
أنا عارفك بتدور تفتح فوقنا بربخ الغربة البقالنا زي القريقة ده
تشفط في الموية وما معروفة ماشة وين؟. القريقة عندكم بتقولوا عليها
(الكركي) أنا ماني شايقي, لكن إنت وكت فتحت اللبقة دي بنوصلها حدها
معاك. ووالله أناسلمى بت الشيخ دي من أشوفها في بكان أجي جاريلو جري
فما بالك يا ود جبرين لامن تجي في ســامكـ؟؟؟
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: معاوية المدير)
|
Quote: إنت بالعافي التختك في المصارين
تبقالك هدوم وسروال ونعلين
دايري أشكيلو العذر صمد النمرتين
وإنت اسيد الجزيري تكاكي وزين
يا سيد الشال تقيل فدع العراجين
إنت في تالت سنين ما بيدوك سبوعين
وما بترسل لي جواباًفيهو سطرين؟
وما بتقولي نعيم صباح أُمو أشتغل وين؟
إنت ماك عارف جواب الخير يجيني وازيد لي شبرين
وإنبسط لِي إنبِساطي زايدي علي القوانين |
معاوية المدير
تراها جنس كلاماتكم دى البتسوى فينا جنس "ام هلا هلا "
زمان اول مرة سمعت الحكاية دى طبعا هى حكاية يا المبروك
يتباركن ايامك
سمعتها من اليمنى
وكنت حافظاها "عل ياخيرى الزول بقى مشغول "
وامى كل الرحمة عليها وكتين يجيبوالغنيوة فى الرادى جنس بكا
الوليدات ماهن مسافرين
والغربة زمان ما كانت متل "تطمشنا بالبلاد البعيدة
" كانت ياها زولا نقلوه من الابيض ودوه اتبرا
ولا زولا نقلوه من الدامر للخرتوم
وتعرف "شنو البحصلى وكت الليل يفلل"
او كما قال شيخى الجميل محمد كرم الله
دحين يعنى بشيشكن علينا
ما تكتلونا بالوحيح يا المبروكين
تتباختو وتتساعدو بركة تسرى فى عضيماتكن
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: سلمى الشيخ سلامة)
|
Quote: أنا عارفك بتدور تفتح فوقنا بربخ الغربة البقالنا زي القريقة ده
تشفط في الموية وما معروفة ماشة وين؟. القريقة عندكم بتقولوا عليها
(الكركي) أنا ماني شايقي, لكن إنت وكت فتحت اللبقة دي بنوصلها حدها
معاك. ووالله أناسلمى بت الشيخ دي من أشوفها في بكان أجي جاريلو جري
فما بالك يا ود جبرين لامن تجي في ســامكـ؟؟؟
|
عاد يا ود المدير نص المنبر دة شهادة عربية
باقيلك دايرين يفهمولك الكركي والقريقة
انا خايف تسأل واحد اللبقة يعني شنو يقولك نوع من الهامبرغر
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: طارق جبريل)
|
Quote: عاد يا ود المدير نص المنبر دة شهادة عربية
باقيلك دايرين يفهمولك الكركي والقريقة
انا خايف تسأل واحد اللبقة يعني شنو يقولك نوع من الهامبرغر |
يا ود جبرين سلمى بت الشيخ دي, وحات ربي ما بدور
أغلّت عليها تب, عشان كدي ما تخليها تجي تقرا الكلام
الداير ارصو ليك تحت ده بعد مداخلتا الفوق.
الزمن جار ما رحمنا, نعمل أيه عاد في قسمنا؟
كُنا سُعداء وسط أهلنا, بحنان بانين أملنا
كُنا نزرع في جروفنا,وا لطواري على كتوفنا
أرض طيبة بلاد رحيمة, والصلات واسعي وحميمة
السماء أنسوالوا غيمة يا حلات زيفَ ونسيمه
التمر شال فوق جريدو كل زولاً يدوهو سيدو
الدباس رتل نشيدو حلات غناهو وكت يعيدو...
عارف يا ود جبرين زمان لمان جيت الخرتوم, وإشتغلت فيها.
كنت بقول لي ولاد الخرتوم, وبناتها الشغالين معاي: والله
الما عاش في القرية عايش بنص عمرو, وفاقد النص الأخر.
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: معاوية المدير)
|
Quote: الزمن جار ما رحمنا, نعمل أيه عاد في قسمنا؟
كُنا سُعداء وسط أهلنا, بحنان بانين أملنا
كُنا نزرع في جروفنا,وا لطواري على كتوفنا
أرض طيبة بلاد رحيمة, والصلات واسعي وحميمة
السماء أنسوالوا غيمة يا حلات زيفَ ونسيمه
التمر شال فوق جريدو كل زولاً يدوهو سيدو
الدباس رتل نشيدو حلات غناهو وكت يعيدو... |
يا معاوية ود امى مالك على القليب؟
بقى وحاتك يودى ويجيب
وبالوجيب زايد ضرب
لاحولا
عارف الغنا السمح حق الشايقية الحنان
امانة ماهن حنان
اتعلمنا من غناهن سر المحنة اتعلمنا كيف نرحم اهلنا
واتعلمنا انه الوطن ياهو الربيت فوق قيزان هواهو
وياهو نسمة صيف حميمة
وياهو زولا جاك عصير
رايح يفتش لكليمة حنينة تبل عضام نشفت تهاتى
وياهو مدت ايد تسالم
زول مسافر وجاى يريح ضهرو من شيل العواتى
ياهو لقمة وجغمة صافية
وياهو نومة فى ضل حميم كان شجرة كان ضهر البيوت
وكان يا الحنين وطنا نحبه
نشتاق لونسة فى تحت شجرات بتحبو
ونخلة قامت تفتخر بسبيطا زانت
وسيرة فى العصرية قامت
بالعريس طافت وحامت
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: سلمى الشيخ سلامة)
|
Quote: ياخي الارياف دي متعة ما بعدها متعة
العجب النشل من الأبيار ومباراة الطير وقفيز التمر |
عشان كدي يا وِليد البندر, شوف إخيّك حميد ده إتمكن كيفن
حالتو ما مشى بعيد. يعني أكان جدعلو حجر من فصلو القاعد
فيهو ده كان وقع في ساقيتن, لكن تلقاهو هيمان, سارح ولسان
حالو يردد:
شن طعم الدروس ما دام مكانها مشي وسفر؟
كيف زاتا ترتاح النفوس تقبل قرايتاً في سفر!
زينوبة كلما أفتح كتاب القاكي في اوّل سطر
القى الحبايب والصحاب القى الجناين والتمر
باقي الإمتحان من وكتو بس فاضل شهر
ما أظني من جور الزمان أنجح وأجيب ليكِ النِمر
في الحصة عقلي أنا قام سدر
يمّة المدرس لو فكر
كان يلقى قاعد فوق ككر
في الدونكا لسّع ما فطر
الغربة أصلو طِعيما مُر
لكني قاعد بالجبر
قاعد لي فوق كيمان جمُر
عذبني قبل أصل القبر
الليلة عاد كيفن أبوي فاتح كتابو مع الفجر
يقرا ويرتل في كلام ما بيفهمو الناس الكُتُر
كيف زاتي يا نبع الحنان أنجح من الآم السهر
عمرك سمعتيلك جبان خاض المعارك وإنتصر؟
تسمع كِليمة وا عشاي
أغلى الحكم عند الضجر
أنا قلبي كلو على جناي
وقلب جنايا على حجر
ووحاتك يا ود جبرين: الشوق مِتِل شوك الكتر طعن الجسم لآمن خِدِر...
| |
|
|
|
|
|
|
|
|
|
Re: يا نسمة كيف.. سلمى الشيخ سلامة وآخرون (Re: معاوية المدير)
|
Quote: اتعلمنا من غناهن سر المحنة اتعلمنا كيف نرحم اهلنا
واتعلمنا انه الوطن ياهو الربيت فوق قيزان هواهو
وياهو نسمة صيف حميمة
وياهو زولا جاك عصير |
وبرضو كمان يا بت الشيخ, ربي يديكِ الصحة والعافية.
غناهم يعتبر سحارةحفضولنا فيها موروث, وعادات, وتقاليد
سمحة زي سماحة أهلنا. عليك الله شوفي الكلام ده, محفوض في
السحارة مع الربع, وعقد الجلاد, والجورسي, والزمام اب رشمة,
والحريرة, والضريرة, ريحتو زاتها ريحة السحارة, ريح الصندل,
والمحلبية, والسرتية, والشاف, والكليت, ريحة الحبوبات
والأجداد:
الرسول يا ود عمتي
العراقي خنق رقبتي
الزمام شبالاتو سِتِ
وأم برك تمسح لى الوشي
والمطارق لا صُرتي
والحِجل والعاج كمان في
وجاب لى جلابي جورسي
قال لى سمي وشيلي البسي
وقال لى حق الناس أملصي
وجاب لى توباًإسمو بنقال
وجاب لى كركب في البيت غيار
وجاب لى فركة دموع التجار...
الكلام فيهو ريحة وطن جميل بالحيل وحات ربي...
| |
|
|
|
|
|
|
| |
طارق جبريل
سلمى الشيخ سلامة
خالد العبيد
معاوية المدير
كمال عباس
محمد الجزولي
محمد أبوالعزائم أبوالريش
هاشم محمد الحسن عبدالله
عبد الدائم سيد أحمد
munswor almophtah
فيس بوك
تويتر
انستقرام
يوتيوب
بنتيريست