دعواتكم لزميلنا المفكر د.الباقر العفيف بالشفاء العاجل
|
|
 وووووب علي انا يا القرقريبي!
|
حوار في مخزن بت ابو دية رحمها الله
(1)
البستِلة: يا حليلو زماني يا القرقريبي... اماني ما كنت اهز وارز.... انا المغسي كاتلاني
القرقريبي: البستلي.. جنيتي بقيتي تناضمي نفسك براكي.. قولي بسم الله
البستِلة: نان عاجبك شعليقتي كدي في مسمار الجن دة في المخزن.. حليلي أيامي وسط علب النيدو في التُكل أليل بت أبو دية
وحاتك كنت اتقدل من هني لا هني... يوما جايبي سمنة العيد من دكان بشارة للكعكي.. ويوما يمدوني لي ام النصر بالحيطة ملياني تمُر من البركل..
ويوما أصل لا عند اعتماد شايلالي كمونيي ولا لحيمات وكتين جبيرين يكون ضابح.. وأصلي الليل كله أغرف في قدرة فول دكان النعيم
وهسي مشعلقالي في مسمار علي الشِعبي ألت الكرقي...
القرقريبي: الرسول آآلبستِلي لا توجعي قلبي... دحين عاجبك حالتي دي سنين وانا مرميي في برميل الجن دة لامن صُوفَنتَ
حليل أيام بت أبو دية يمين من الكوريي الملياني موية وباقي عجين ديك ما كنت بطلع.. منَديي وأحمد ربي..
ومن دغشا بدري بت أبو دية تكُر عجينها وتمسكني وتعوسبي طرقي وراء طرقي..
وترش الملحات وتأكل وليداتها والضيوف الجايين من هني وهني..
البستِلة: الله ينعل حيكومة البشير إن كان جباتلنا المذليي
القرقريبي: كيفن؟؟
البستِلة: موش هي الدخلت الصينيين لاااعندنا.. وجوا بي جُكُكتهم ألات البلاستيك والباغات ألاتم لامن الناس رمونا في المخازن..
القرقريبي: وااامغستي أنا يا البستِلي.. أنا وكتين أشوف في «كروت الاسكراتش» يعوسن في الكسري.. أصلي مصاريني يوجعني
وكمان الكُنش قالي الصينيين دخلولم قرقريبي معاهم... شكيتهم علي الله.. وأصلن بنات الزمن دة بنات التاباني..
لا يعوسن كسري لا يسون قراصي.. بقن يشترن كل شي وهن راجعات من شغلن.. بس مقابلات المنكير وقميع اصابعينن
يا حليل حنة بت ابو دية وكتين تلتخها فوق رجلها علي القراصي المتمرة.. حِني ليها قيمي
وتلقاها تحاحي فيها بي عود كبريت ومحلبيي .. والعصريي تقول كدي تقشط رجلها بي نشادر والمغربيي تلقاهي تراري بالسواد..
ييديك كورية الحني ألتها لامن صدت في البرميل أليل المريق..
الكُونش: البستلي والقرقريبي.. مالكن علينا من الصباح كدي تفتحن في المحن الحاصلاتلنا..
انا باقي من زمنا بدري خنقوني في رقبتي وختوني في مسمار في مخزن الجن دة
من حياة بت ابو ديي وانا معلق هني.. لا كوجين حلو مر ولا عصيدي ألت بكاء
وأصلها مفراكة الجن دي من ظهرت في حياتي وانا بقيت راجع لاااوراء
لكن عجبني ليها زمان تجيني ورويسها فيهو باقي سلج ولا باميي ملايقي ولا ملاحا أليل شرموط
ولا ملاحا أخدر.. وتجي وتتطمطق جنبي أكنها تغيظ فيني... الليلي بقت مرميي بي كدوبها
من ماتت بت ابو دية وجن بنوت الزمن دة.. بقى لا في لاييق مولاح لا شي..
هههههههههه والمسكيني جات مسكتلها بُكان في المخزن معانا من يوم ظهرت
البنييي الفنجريي اليقولولا «المولينكس».... هههههههههههههه
المُفراكة: تضحك يا مقصوفة الرقبة.. أكنك فرحان.. انا تراني لليلي مرة مرة ينزلوني
يلايقوبي ملاحا أليل باميي ولا ملاحا أخدر.. إنت عاد كبرت آآآبتقدر علي الملايقة دي
والناس خلت كوجين الحلو مر عاد... فشان حسادتك دي.. حا تقعد كدي لامن أجلك يتم
الكُونش: هههههههههههه الله يرضى عليك لا تزعلي مني... الشي كله ضحك في ضحك
تراني انا وانت مصنقرين في مخزن الجن دة لامن الله يشيل أمانتو... هههههههه
المُفراكة: تضحك يا أبقلبا ميت.. يا دِلِق... وانا شاحدي الله «المولينكس» دي تضربها كهربتا زايدي
تطلع مصارينا وتهريهن وترقدها كداد..
الكُونش: ههههههههههههه... باقيلي جنيتي هي شغلها كله بالكهربا كيفن تضربها هههههههه
والله جنس حسادتا عليكي دايري تعيشي زمنك وزمن البُطان الجداد ديل...
المُفراكة: الله البُطان بي التفقع مصارينهم
الكُونش: الله لا كسبك ههههههه ... (يقشقش في دموعه)
برميل المريق: ههههههههه الله يقلعك يا الكُونش يمين زمن ما ضحكتلي زي الليلي
آآآلرسول آآآلمفراكي لا تزعلي شي... دحين كلنا زيك... شوفيني انا صديت وحاتي بقت كيفنها
كلي ملتخ صدا على الشافع الموَسِخ فوق لباسو ومشى يلعب في الطين..
امبارح القريبي دي جاني الجِقِر مع وليداتو يودع فيني... قالي مخزنا لا فيهو مريق لا قمح
القاعدلها شنو فيهو تاني...
|
|
 
|
|
|
|
|
|
|
|
Re: وووووب علي انا يا القرقريبي! (Re: منال)
|
الف رحمة للوالده
يازول ناس ابودية ديل معطونين بموية الفن
اما الشوايقة عامة
متعتي في غناهم وكت يهبش اللحم الحي
-----------------------
تحياتي لكل ناس ابودية حبايبنا ببحري
| |
|
|
|
|
|
|
|
|
|
Re: وووووب علي انا يا القرقريبي! (Re: طارق جبريل)
|
الف رحمة ونرو تتغشاها آمين
تحياتي وتلك محنة وطيبة كلمات تجعل من الشجن يحلق بجانبي وانا أقرأءك .
محبتي ياقريبي ويااااااااااااااحليل القرقريبي ...
...........................................................حجر.
| |
|
|
|
|
|
|
|
|
|
Re: وووووب علي انا يا القرقريبي! (Re: ايمن مستور)
|
Quote: الاستاذ طارق سلامات
والله جنس كلام
أها يا خوي نحنا مصنقرين دايرين الباقي
تم
|
حبابك يا الزين
Quote:
........................... ملحوظة
انت يا خوي لحقت سجيمان ولا شنو بقيت تكتب بالاحمر |
نان يا الحبيب نحن الاتنين بياطرة
| |
|
|
|
|
|
|
|
|
|
Re: وووووب علي انا يا القرقريبي! (Re: Yasier Elsayed)
|
ومالك يا طارق نسيت عمود الاكل
ومشياتو للمستشفى ؟
ولا نسيت الدوكة مسكينة بقت تحنن و محلها زاتو انمحى
والصحانة اللات الطلس والالمونيوم بقن فى خبر كان
ياحليل العمود زمان نودى بيهو الغدا لى جدى فى الجزيرة فى بربر
نقطع بالمركب وشايلين عمودنا
ولا نمشى بيهو الاستبالية العصر
كلو شى زايل يا الحبيب
زمن البستلة حقت اللبن
والصغيرونةالبنشيل فيها الفطور حق المدرسة
كلو زمانا يخدموه رجالو
| |
|
|
|
|
|
|
|
|
|
Re: وووووب علي انا يا القرقريبي! (Re: سلمى الشيخ سلامة)
|
جبريلا يا لذيذ
و الله يا أخوي خليتني مرة اتخيل نفسي كنش و مرة بستلة و مرة قرقريبي...
و مالك يا يابا نسيت القدح و الطبق...
عرفنا القدح ده طنشتو من يوم ما مشيت تغتي في قداحة الناس...وسبت قداحكم...
الطبق ده سوى ليك شنو...حتى ان كان طبق الليل بلاستيك ما طبق سعف...
الطبق عاد بيتنسي يا جبريلا...
اتلومت و الله...
| |
|
|
|
|
|
|
|
|
|
Re: وووووب علي انا يا القرقريبي! (Re: الرشيد بابكر)
|
تعرف يا طارق
لو في إمكانية كان الكلام دة يتعمل فيلم Animation للأجيال ال ما شافت البستلة و القرقريبة ( رحمهما الله في بياتهما الدائم )
وهسي مشعلقالي في مسمار علي الشِعبي ألت الكرقي...
طبعا الكرقي دي عاوزة ترجمة ( و هي الراكوبة ) و طبعا أصل الكلمة نوبية Kerri
ثم تشَوْقَنَت ( أي دخلت مطبخ المعجم الشايقي و حدث لها ما حدث من شوْقَنة )
يديك العافية
كتر من الحكي دة ... لأنها تدخل في باب الموسوعية
لك الود
| |
|
|
|
|
|
|
|
|
|
Re: وووووب علي انا يا القرقريبي! (Re: ابو جهينة)
|
Quote: طبعا الكرقي دي عاوزة ترجمة ( و هي الراكوبة ) و طبعا أصل الكلمة نوبية Kerri
ثم تشَوْقَنَت ( أي دخلت مطبخ المعجم الشايقي و حدث لها ما حدث من شوْقَنة )
يديك العافية
كتر من الحكي دة ... لأنها تدخل في باب الموسوعية
لك الود |
الريس ابوجهينة
كيفنك ابوي
انت يا الحبيب باقيلي داير تطلعنا من النضمي دة ملوص
شايفك تشيل وتقلب في الكلام لي رطانتكم
يديك العافية يا حبيب
| |
|
|
|
|
|
|
|
|
|
Re: وووووب علي انا يا القرقريبي! (Re: الرشيد بابكر)
|
Quote: جبريلا يا لذيذ
و الله يا أخوي خليتني مرة اتخيل نفسي كنش و مرة بستلة و مرة قرقريبي...
و مالك يا يابا نسيت القدح و الطبق...
عرفنا القدح ده طنشتو من يوم ما مشيت تغتي في قداحة الناس...وسبت قداحكم...
الطبق ده سوى ليك شنو...حتى ان كان طبق الليل بلاستيك ما طبق سعف...
الطبق عاد بيتنسي يا جبريلا...
اتلومت و الله... |
ابن عمي الزين الرشيد هول ناس بابكر
ماني ناسيهن يا الحبيب
جاييهن في اللفي الجايي
بس خلك قريب
عقابك المعاك ان شاء الله طيبين
| |
|
|
|
|
|
|
|
|
|
Re: وووووب علي انا يا القرقريبي! (Re: سلمى الشيخ سلامة)
|
Quote: ومالك يا طارق نسيت عمود الاكل
ومشياتو للمستشفى ؟
ولا نسيت الدوكة مسكينة بقت تحنن و محلها زاتو انمحى
والصحانة اللات الطلس والالمونيوم بقن فى خبر كان
ياحليل العمود زمان نودى بيهو الغدا لى جدى فى الجزيرة فى بربر
نقطع بالمركب وشايلين عمودنا
ولا نمشى بيهو الاستبالية العصر
كلو شى زايل يا الحبيب
زمن البستلة حقت اللبن
والصغيرونةالبنشيل فيها الفطور حق المدرسة
كلو زمانا يخدموه رجالو |
بت الشيخ كيفنك
نان انت صبرا يبل الآبري ماهو في
وحاتك جاييهن كلهن بس اصبريلي
| |
|
|
|
|
|
|
|
|
|
Re: وووووب علي انا يا القرقريبي! (Re: Safia Mohamed)
|
Quote: ناس الليل
سلام
مشاتقين يا دكتور
وبركة الرجعت لينا بلغة سلسة وكتيييييييير مهضومي
هههههه |
عيييييييييييييييييك
دكتورة صفية بت ناس مساعد
ياخي انت كنت غاتسي وين
الله يعلم اشتهينا ونستك
الوليدات وابوهم ان شاء الله طيبين
| |
|
|
|
|
|
|
|
|
|
Re: وووووب علي انا يا القرقريبي! (Re: سيف الدولة كامل)
|
Quote: الحبوب طارق.. كيفينك وكيف حال الاولاد,,, مشتاقين كتييييير وحاتك.
واصل يا طارق ,,ان شاء الله تجمع كلامك الجميل ده وتطلع لينا كتاب
ذكريات بت أبودية. ولا بت كنيش. |
اووووووووووووه استا\نا الجميل سيف
ياخي كيفنك والوليدات وامهم
ان شاء الله مليانين في العافي
يا الحبيب بت ابو دية امي رحمها الله اخت ابراهيم ابو دية رحمه الله (ثنائي العاصم)
وبت كنيش عمتي بت خال ابوي الله يديها طولة العمر
باقيلك يا استاذ سيف النضمي الكله هضريب دة بينفع يطلع في كتاب
ما اظن
| |
|
|
|
|
|
|
|
|
|
Re: وووووب علي انا يا القرقريبي! (Re: نوفل عبد الرحيم حسن)
|
يا حليلك يا طارق الحنين
يعلم الله نقلتنى نقلة
حنينة جنس محنة
من مسقط للجنيد بالدميرة
قعدت واتحكرت وسط الراكوبة
وبقيت اتفرج فى جنس محنك دى
شفت كل شخوصك واقع عجيــب وحنين
تسلم يا ود ملوك النيل
وشكرا لكل الجمال الجانا من تالاك
شكرا مارقة من الجوف
| |
|
|
|
|
|
|
|
|
|
Re: وووووب علي انا يا القرقريبي! (Re: soma)
|
ليست البستلة فقط من تشعلق على حافة مسمار صدىء فى مخزن مهجور
ولا صاحبتنا القرقريبة
وجدت مكانا منعزلا داخل جردل قديم فى ذات المخزن
ان الدلالات والمعانى , هى ايضا شاخت وانهرت
وفقدت الكثير من ماء (حياتها ) يا طارق
اين لى من طرقات كسرة ممدوات ومجيهات تحيط صحن الملاح الوحيد
احاطة السوار بالمعصم
صحن ملاح وحيد , اى نعم
وطرقات الكسرة ملفوفات كما ورق السجائر
اى نعم
ويتابق الصغار على ثلاث او اربع من قطع الخبز التوست
التى ترمى رميا غير منتظم , على واجهات طرقات الكسرة
كنا نتعامل معها (واعنى قطع الخبز التوست )
معاملة التحلية والبقلاوة
ولكن الميزة فى اننا كنا نتحلق حولها ثلاث مرات يوميا
كلنا , آباء وامهات , اخوان واخوات , جيران وجارات , الغادين منهم والرائحات
الجارين سلك الباب
والجارات
نحن الآن فى زمن لا فيه سلك باب , ولا فيه اصلا ناس بتتحلق حوالين صفرة
نحن فى زمن الساندوتشات التيك اوى
والأكل الفردانى
وتلفزيون لكل (كائن حى )
طارق جبريل
انت مدهش ياخ
| |
|
|
|
|
|
|
|
|
|
Re: وووووب علي انا يا القرقريبي! (Re: منصور عبد الرازق)
|
مبدع ياطارق
وأهديك بعض من حتى
مكرر
أشوفا من بعيدقاصهو دربي
تجيب لي الشاي تختو السمحة جنبي
تقولي أكب
أقولها أي كبي
تقولي طبق
أقولها لاتحسبي
أنا بريد شايا تسوي انتي وتهبي
وسمح شايا تغسلي لي الكبابي
نقر حس الدليب للحلة شقه
وهاج نور الرتاين
ماج وبقه
وزغاريد الفرح من جوه طقن
كتار الهاجوا من شافوها
كتار السألو منها ومن أبوها
حد من تدور تمرق تاني يرجعوها
زعلت أمها وقالت أزوها
كفاها رقيص خلاص ما فتروها
هي تاري معرسه ومضيوق حلوها
وجاي إجازة بس لي عرس أبوها
وسلامي ليكم كلكموخاصة الأخت سلمى الشيخ سلامة
| |
|
|
|
|
|
|
|
|
|
Re: وووووب علي انا يا القرقريبي! (Re: عبد الحفيظ عباس)
|
Quote: وأصلن بنات الزمن دة بنات التاباني..
لا يعوسن كسري لا يسون قراصي.. |
جبريلا هاي 000
انا وصديقتي زرنا جيرانا حناكيش 00
لقينا شغالتهم الاندونيسية تعوس في الكسرة 000
صديقتي زعلانة انو ديل نساء كسلانات 000
وانا فرحت انو ثقافتنا اتنقلت لدول شرق اسيا 000
فتك بعافية 000
| |
|
|
|
|
|
|
|
|
|
Re: وووووب علي انا يا القرقريبي! (Re: عبد الدائم سيد أحمد)
|
| Quote: وجاي إجازة بس لي عرس أبوها |
سلام العزيز عبد الحفيظ عباس
سمـــــــــــــــحة القصيدة
لكن جد بالغت فى عرس ابوها دى
لووووووووووووووول ضحكتنى الله يضحكك ديمة
معقول ترقص وتتجدع كدى يا يمة فى عرس ابوها !!!!
وامها تباريها خايفة عليها
وده كلووووو فى عرس الابو وبشهادة الام؟
العرس عرس الاخو يا يابا مو الابو
تسلم وفتك بى عافية
| |
|
|
|
|
|
|
|
|
|
Re: وووووب علي انا يا القرقريبي! (Re: soma)
|
سلام يا تاريخ ود جبرين.. وضيوفو
شكراً لك على هذه السياحة التي تسيّح الوجدان.
أكاد أعرف هذا المخزن. بمكوناته المتنافرة المتعايشة في آن.
سأضيف بعض التفاصيل وبعض قطع "الديكور" الأخرى، تلك التي تؤثث المكان.
والمكان هو كل أُوَضْ بيوتنا المتهالكة، تلك التي تصارع الزمن، فتصرعه أحيانا ... ويصرعها آخر الأمر:
الإضاءة خفيفة، خفيّة وغير مباشرة. تأتي من شباك حائل اللون من جهة وتقابلة من الجهة الأخرى طاقة ذات شكل دائري غير منتظم، يسدونها عند اللزوم بكومة من الدلاقين، أشبه بكرة شرّاب ضخمة.
جو المخزن يبدو بارداً لأول وهلة ـ بالنسبة للداخل، لكنه سرعانما يتحول إلى حر شديد ... وعرق.
في الجو رائحة جمكسين وتمُر عاوِل وآبري وتقاوي برسيم وورق (جوابات وجرايد قديمة وكراريس) ولوبا وطَيب خَدَم وخُمره وخيش.
على الأرض حصى تمُر وحبات لوبا وبقايا خُيوت دُبارة. في ركن قصيّ قزازة فاضية، بلونها الأخضر المميز، فيها آثار زيت منذ سنين، وفيها كُتندارة ميتة.
على الجدران كتابات بأداة حادّة وأخرى بالظهَر. وعلى الجدران عناكب (شَبش) ..
وفي السقف بيوت للدنانين.
............
وفي العين دمعة.
____________________
| Quote: والصحانة اللات الطلس والالمونيوم بقن فى خبر كان |
إسمو الألَمون .. يا سلمى
وفي رواية: اللّلمون
-------------
Quote: نحن الآن فى زمن لا فيه سلك باب
|
.. تحول إلى سلَك تلفون .. وبعدها إلى ... أسلاك شائكة
| |
|
|
|
|
|
|
|
|
|
Re: وووووب علي انا يا القرقريبي! (Re: محجوب البيلي)
|
والله يا طارق أخوي كلامك ده يسوي كتب ما كتاب واحد بس.
عندي صاحبي شديد كل ما تكتب ليك حاجة جميلة برسلها ليهو
الراجل بقي مدمن علي كتاباتك, يعني في معجبين من خارج المنبر.
الله يرحم الوالده ويكرم مثواها ,, وبت كنيش الله يديها العافية وطول
العمر,,, المرة الجاية شوفلنا حاجة من جوة التكل ان شاء الله الدوكي.
| |
|
|
|
|
|
|
|
|
|
Re: وووووب علي انا يا القرقريبي! (Re: سيف الدولة كامل)
|
Quote: والله يا طارق أخوي كلامك ده يسوي كتب ما كتاب واحد بس.
عندي صاحبي شديد كل ما تكتب ليك حاجة جميلة برسلها ليهو
الراجل بقي مدمن علي كتاباتك, يعني في معجبين من خارج المنبر.
الله يرحم الوالده ويكرم مثواها ,, وبت كنيش الله يديها العافية وطول
العمر,,, المرة الجاية شوفلنا حاجة من جوة التكل ان شاء الله الدوكي.
|
حبيبنا استاذ سيف الله يجبر بي خاطرك ياخي
انت بس عشان لسة شايفني الطالب المجنون الكان بيدرس عندك داك
يا الحبيب دة كله هضريب ساكت
تحياتي لصديقك من على البعد
| |
|
|
|
|
|
|
|
|
|
Re: وووووب علي انا يا القرقريبي! (Re: منصور عبد الرازق)
|
Quote: اين لى من طرقات كسرة ممدوات ومجيهات تحيط صحن الملاح الوحيد
احاطة السوار بالمعصم
صحن ملاح وحيد , اى نعم
وطرقات الكسرة ملفوفات كما ورق السجائر
اى نعم
ويتابق الصغار على ثلاث او اربع من قطع الخبز التوست |
يا منص كتلتني ضُمة ضُمة
الله الله ياخي
علي الصينيي وفيها الصحن أليل الملاح والطرقات محاوطاهو علي دينمو العربية
الله يا منص ياخي
يمين ماك نصيح
| |
|
|
|
|
|
|
|
|
|
Re: وووووب علي انا يا القرقريبي! (Re: soma)
|
Quote: يا حليلك يا طارق الحنين
يعلم الله نقلتنى نقلة
حنينة جنس محنة
من مسقط للجنيد بالدميرة
قعدت واتحكرت وسط الراكوبة
وبقيت اتفرج فى جنس محنك دى
شفت كل شخوصك واقع عجيــب وحنين
تسلم يا ود ملوك النيل
وشكرا لكل الجمال الجانا من تالاك
شكرا مارقة من الجوف
|
اووووووووووه اختي الزيني بت امي سوما
ياخي كيفنك
باقي طولت من ونستك
الله يعلم في الخاطر علي مدروشلي جنس درشي
ياخي الزمن كان سمح وماهو ممحوق متل هسي
الرسول تسلميلي علي المعاك
| |
|
|
|
|
|
|
|
|
|
Re: وووووب علي انا يا القرقريبي! (Re: الطيب شيقوق)
|
يا شيقا كدي شوف المسادير دي يا المسنوح يا بتاع العونكوليب
في ايدا الغويشه دهب فنت في الركن حجلا
بقت تشرب لبن بدره باعت بقرته وعجلا
كمان الحنه ليل يا ليل تلمع في بطن رجلا
رمت في الحوش صباح الخير وقامت قلعت فجلا
| |
|
|
|
|
|
|
|
|
|
Re: وووووب علي انا يا القرقريبي! (Re: طارق جبريل)
|
(2)
البرميل: هههههههه انت في المفراكي ولا في جزمة زيزي القاعدي في بطني دي... يمين نشفت واتشققت بقت متل حوض البرسيم وكت ما يتسقي سبوعين
هههههههههه ورويحتها (من ريحة) من صماح الرجلين علي الفطيسي
الكُونش: (يمسح في دموعه من الضحك) الله يقعك آآآلبرميل الخرابة قرضتها
جزمة زيزي: انا هيني تراني ماسكي خشمي علي ومنتظري ألت الله.. دحين شوفو خُلال طارق ود جبيرين بقى مرمد كيفن
الكُونش: دة مالو كمان الصايدو شنو
جزمة زيزي: وحاتك يا الكُونش حالو يحنن المسكين سلوكه اتعوجن علي شناط العنقريب المرخرخ وبقن مصديات علي سنون الشافع المسوسي
الكُونش: هههههههههههه الله لا تكسبكم الليلي فقعتوني من الضحك... نان انت يا جزمة الجن طارق ود جبرين عدم الصوفايي
خُلال شنو اليفكر فيهو هسي... انا باقيلي رفعوا منه مسح الراس في الوضو
الخُلال: هههههههههه انا هين تراني بقيت مكعوج ومكسح.. لكن من قبيل أعاين في الكُومشة الكابسها الشبش دي ههههه
تشيل وتنفض فيهو وسوتلها كرش ههههههههه.. استغفر الله العظيم
الكُومشة: انا تراني شايلي الشبش في حجري.. هههههههه وحامدي ربي... دحين ايد الفندك ما بانتلكم...
الكُونش: هههههههه تراها يديك ملياني كدوب في ركن المخزن
الخُلال: باقيلي خلو دق التوم ....هههههههههههههههه
| |
|
|
|
|
|
|
|
|
|
Re: وووووب علي انا يا القرقريبي! (Re: طارق جبريل)
|
Quote: جزمة زيزي: انا هيني تراني ماسكي خشمي علي ومنتظري ألت الله.. دحين شوفو خُلال طارق ود جبيرين بقى مرمد كيفن
الكُونش: دة مالو كمان الصايدو شنو
جزمة زيزي: وحاتك يا الكُونش حالو يحنن المسكين سلوكه اتعوجن علي شناط العنقريب المرخرخ وبقن مصديات علي سنون الشافع المسوسي
الكُونش: هههههههههههه الله لا تكسبكم الليلي فقعتوني من الضحك... نان انت يا جزمة الجن طارق ود جبرين عدم الصوفايي
خُلال شنو اليفكر فيهو هسي... انا باقيلي رفعوا منه مسح الراس في الوضو |
عدمته الصوفايي..يا المبرووووووك
حليلنا منها الزائلة....
بقي رويسك زي رويس لعبة التبخ لما الشفع يزعمطو ليها شعراتها..
المسنوح خبارك و علومك...
ياخي نفيستنا في شيتا من (ناس الليل)..خلنا النتخج و ننقز في الليل ده
| |
|
|
|
|
|
|
|
|
|
Re: وووووب علي انا يا القرقريبي! (Re: هواري نمر)
|
Quote: عدمته الصوفايي..يا المبرووووووك
حليلنا منها الزائلة....
بقي رويسك زي رويس لعبة التبخ لما الشفع يزعمطو ليها شعراتها..
|
Quote: المسنوح خبارك و علومك...
ياخي نفيستنا في شيتا من (ناس الليل)..خلنا النتخج و ننقز في الليل ده
|
وين يا الحبيب مع الهكر الصاط الكودات دة
| |
|
|
|
|
|
|
|
|
|
Re: وووووب علي انا يا القرقريبي! (Re: طارق جبريل)
|
Quote: في ايدا الغويشه دهب فنت في الركن حجلا
بقت تشرب لبن بدره باعت بقرته وعجلا
كمان الحنه ليل يا ليل تلمع في بطن رجلا
رمت في الحوش صباح الخير وقامت قلعت فجلا |
دي تكون تسنيم بت الحاج اللابسة العاج و الخلّت القطاطي وسكنت الابراج
اخوك مو نقّار؟
| |
|
|
|
|
|
|
|
|
|
Re: وووووب علي انا يا القرقريبي! (Re: هاشم محمد الحسن عبدالله)
|
| Quote: الحبيب الدكتور طارق ود جبرين ، تحياتى ياسلام عليك ، كلامك ينقط عسل وله فى النفس راحة وانشراح، رحم الله بت أبودية وجعل الجنة مثواها، وأترحم على خالكم المبدع الفنان العظيم أبراهيم أبوودية ، والذى شكل مع الموسيقار السنى الضوى ثنائى أبدع وأمتع ومازال ، ووالله كلما شاهدت مشهد للسنى الضوى وهو يمسح الدموع التى غلبته وهو يسمع لتيمان خيرى وهن يرددن أغانيهما مع المرحوم ابراهيم أنفعلت مع الموقف الجميل والغنى عن الوصف ، عاطر تحياتى ومودتى . |
هاشم هول ناس محمد الحسن
كيفنك آآآيابا
نصيح في عضمك
يا الحبيب الزينين فاتوا
الله يرحم الجميع
والله يقدرنا ندعيلم بالرحمي
| |
|
|
|
|
|
|
|
|
|
Re: وووووب علي انا يا القرقريبي! (Re: طارق جبريل)
|
ود خالتى
كيف حالك
رحم الله الخالة عاشة وأسكنها فسيح جناته مع الصديقين والشهداء
وبالمناسبة دى حقو تجى مارى على مخزن خالتك طيبة
عشان تشوف البدع بتاعت بنات أبديه..
الفضيى أم ضلف ومكتبة المرحوم لاهسى قاعدى !
وحاجات كده مخيشة ومكتوب عليها ممنوع اللمس
الله يديها العافية ..
خالتك الأيام كريعاتا خازلاتنها !
| |
|
|
|
|
|
|
|
|
|
Re: وووووب علي انا يا القرقريبي! (Re: صلاح أبودية)
|
Quote:
ود خالتى
كيف حالك
رحم الله الخالة عاشة وأسكنها فسيح جناته مع الصديقين والشهداء
وبالمناسبة دى حقو تجى مارى على مخزن خالتك طيبة
عشان تشوف البدع بتاعت بنات أبديه..
الفضيى أم ضلف ومكتبة المرحوم لاهسى قاعدى !
وحاجات كده مخيشة ومكتوب عليها ممنوع اللمس
الله يديها العافية ..
خالتك الأيام كريعاتا خازلاتنها ! |
ياخي الله يديها العافية خالتي طيبة دي
باقيلي للي عندها كبابي بيرة الجمل
| |
|
|
|
|
|
|
| |
طارق جبريل
وليد عبد اللطيف
الرفاعي عبدالعاطي حجر
الطيب شيقوق
ايمن مستور
Yasier Elsayed
سلمى الشيخ سلامة
الرشيد بابكر
ابو جهينة
Safia Mohamed
سيف الدولة كامل
نوفل عبد الرحيم حسن
منصور عبد الرازق
عبد الحفيظ عباس
عفاف علي ميرغني
عبد الدائم سيد أحمد
محجوب البيلي
هواري نمر
Fadl Karrar
هاشم محمد الحسن عبدالله
صلاح أبودية
ABUHUSSEIN
فيس بوك
تويتر
انستقرام
يوتيوب
بنتيريست