دعواتكم لزميلنا المفكر د.الباقر العفيف بالشفاء العاجل
|
|
 نفسي ياااخ (2)
|
نفسي امي (الله يرحمها) ترسلني لي دكان بشارة عشان اجيب ليها السمن حق الكعك
نفسي تمد راسها بالحيطة وتسأل أم النصر (رحمها الله) وتقولها: ام النصر بديتي الكحكي ولا لليلي
ونفسي اسمع ام النصر: رسلت اسامة يجيبلي السمن من دكان بشارة
نفسي القى امي بتعجن في الكعك مع اعتماد اختي الكبيرة
نفسي اشوف امي تقطع في الكعك الفي الصينية بي كباية الشاي واخواتي ينقشن في الكعك بالمناقيش
نفسي امي تولع الصاج بالحطب الكسرتو ليها انا وتقولي جيب الطشت وتختو فوق الصاج
وتولع فوق الصاج الحطب وتدخل صينية الكعك تحت الطشت
وتقولي تعال سوقلي المفرمة ألت البسكويت فشان اقطعو في الصواني
نفسي لمن تطلع الكعك من تحت الطشت ويكون سخن واقوم اشيلي وحيدي فشان اضوقها
تقوم تكورك فيني وتقولي: يا شقي الشي سخن بيوجع بطونك خلو لامن يبرد واضرضرلو السكر
نفسي ام النصر تتاوق بالحيطة وتناديني فشان امسك صواني الكعك ألاتها فشان امي تنجضو معاها
نفسي تجي بت ابنعوف (الله يديها طولة العمر) وتخت سفتها وتجي شايلي صوانيها فشان ينجضن
واسمع فيها تقول لي امي: الشي دة لا يبقى كترتيلو النشادر
وامي تقولها: بري يا يمة وحاتك يطلع زي العجب
نفسي بت الجريف (رحمها الله) تمد راسها من حيطتها التالانا وتقول لي امي: بت ابو دية انت لليلي تنجضي في كعك الجن دة
امي: نان اسوي شنو أليلي نجض دة أليل بت ابنعوف وام النصر
نفسي اشيلي صحن من الكعك والبسكويت وامشي علي عوض صحبي في النيمة
وهو يجيب الشاي من بيتهم ونقعد تتونس
ويجن مارات بنات الفريق القدامنا دااااك ونعزمن علي الكعك
ويتبسمن لا قعر اضنيهن ويخجلن يمشي وانا اسمع في عوض شغال: بتكتلني يا طارق البت دي
وانا اقوله نان انا قايلني داير اعيش بعدام وجنات دي شافت فيني
 
|
|
 
|
|
|
|
|
|
|
|
Re: نفسي ياااخ (2) (Re: طارق جبريل)
|
نفسي افرش الباطنية في الطربيزة الكبيرة الفي الصالون واجيبلي ملايي افرشها فيها
وامشي اجيب المكوة واخت فوقها الجمر الفضل من نجيض الكعك واجيب الجك الكبير
وعوض ينبطح في السرير الجنبي وانا اشيل الموية من الجك وارشبا الجلابي قبال اكويها
نفسي وانا بكوي عوض يقولي شغلنا محمد ميرغني خلينا نسمح (الجاني منك ومن تباريح الهوا)
واقوله انت لليلي مكسراك بت الفريق داك
يقولي فريق شنو انا العوجي جاياني من تالا ((العمارات))
اقوم ارتاح شويي وانا بسمع في الجابري يغني: لم آخر مرة شفتك قبل ما اودع واغادر.. كنت حاسس اني خايف اني متردد وحاير
ويقوم عوض يبخ الجلابيي ألتو ويقطع علي حبل أفكاري
واقوم اقولو: اسرع يا جنى فشان نمشي نشتريلنا طواقي من السوق الشعبي
| |
|
|
|
|
|
|
|
|
|
Re: نفسي ياااخ (2) (Re: طارق جبريل)
|
نفسي يوم الوقفة بلنهار ابوي يقولي امشي جيبلك بهية من مغلق عباس فشان تضرب
الابواب دي صدن وبقن شينات
نفسي اركب عجلة عم عبد الله وامشي للمغلق اليل عباس واجيب البوهية
واجي اشوفلي شوية جاز فشان اخففها شوي واقعد اضرب في البيبان وعوض يونس فيني
| |
|
|
|
|
|
|
|
|
|
Re: نفسي ياااخ (2) (Re: طارق جبريل)
|
نفسي امي تصحيني الصباح فشان اغرف البلاعة عشان ابوي يستحمى
وانا ادخل بعديهو استحمى والبس جلابيتي والطاقية الجديدي واخت الشال في كتفي
واطلع الشبط الاشتراه لي ابوي أليل العيد
وامشي علي دولاب ابوي اشوفلي ريحي اترحبها
وارفع راسي علي عوض بالحيطة واقوله التكبير بدا فسراع تعال مارق وما تنسى مصلايتك
| |
|
|
|
|
|
|
|
|
|
Re: نفسي ياااخ (2) (Re: طارق جبريل)
|
نفسي ونحن ماشين علي الجامع ننتظر قدورة وعبد الوهاب هجو وزهير الجيلي ويحيى حمد سعيد
ونمشي كلنا علي ((ضياء الدين العباسي)) إمام الجامع الكبير
ونقعد نكبر في الجميع ونشوف في لجنة الجامع فارشلا شال أليل جمع الفطرة (الزكاة)
| |
|
|
|
|
|
|
|
|
|
Re: نفسي ياااخ (2) (Re: طارق جبريل)
|
نفسي بعد صلاة العيد أقالد ابوي واقوله (تعود الأيام)
وامشي علي عم عبد الله وعم هجو أقالدهم وعم محمد صالح وعم محمد احمد عبد الكريم
وتاني نتجمع مع اولاد الحلي فشان نمشي نعيد علي الحلي بيت بيت
نفسي اقولهم خلونا نبدأ من المربع داك فشان امني نفسي بي شوفة بناتو
واااااااااااااااااضيقي انا
| |
|
|
|
|
|
|
|
|
|
Re: نفسي ياااخ (2) (Re: طارق جبريل)
|
نفسي ندخل علي خالتي خادم الله وتدينا الحلاوة وندخلها في جيوبنا
ونعقبها علي بت الجريف وتغمتلنا كل واحد طرادة في جيبو
ونمشي علي بيتنا ونشرب الشاي باللبن والكعك
ونطلع نغشى ام النصر ونلقى فطورهم جاهز ونخدلنا لقمة لقمتين معاهم
ومن هناك نمشي علي بيت ناس عيسى وتحلف علينا خالتي حرم (رحمها الله)
لو ما فطرنا ما بنطلع من بيتها...
نفطر ونقلب الشارع الوراء علي ناس الخوض واحمد الجنا وناس شكور محمد زين
وكمال تاج الدين وناس المليجي (رحمه الله)
نفسي ياخ
| |
|
|
|
|
|
|
|
|
|
Re: نفسي ياااخ (2) (Re: منال)
|
يا سلام عليك يا ود جبريل ..
كل سنة وإنت و الأسرة بخير و عافية ..
ياأخي وين صاحبي عوض أبنعوف بتاع الجمارك ,,
و نفسي أعيد مع أمي في السودان يا ود جبريل
| |
|
|
|
|
|
|
|
|
|
Re: نفسي ياااخ (2) (Re: عادل نجيلة)
|
Quote: يا سلام عليك يا ود جبريل ..
كل سنة وإنت و الأسرة بخير و عافية ..
ياأخي وين صاحبي عوض أبنعوف بتاع الجمارك ,,
و نفسي أعيد مع أمي في السودان يا ود جبريل
|
ود نجيلة كيفنك ياخي
عوض لليلي في الجمارك واتملى بُطان واعتقد انه سكن جبرة
لكن لليلي من الامتداد ما بيطلع
نفسي اصل في العيد لحدي بيت عمنا نجيلة
واغشي ناس بابكر يوسف وناس النعيم
نفسي ياخ
| |
|
|
|
|
|
|
|
|
|
Re: نفسي ياااخ (2) (Re: منال)
|
Quote: وانا نفسى فى صحن الكعك حقك الفوق ده (وش جعان )
باقى للفطور ساعة |
وانا نفسي يا منال امشي علي اخواتي وابركلهن العيد في بيوتن
ويقومن كل واحدي تغمتلي في جيبي جنيه
واقول لي عوض: كان كدي النيل الازرق ((السينما)) جاها بلا
| |
|
|
|
|
|
|
|
|
|
Re: نفسي ياااخ (2) (Re: طارق جبريل)
|
و نفسي اتقاسم مع اخواتي نضافة البيت و نشغل المسجل بي اعلي صوت
و نولع كل الانوار الفي البيت كلها، و يجي ابوي داخل من بره رافع طرف جلابيته
من المويه و يقول لينا البيت ده ما نضيف، جني و جن نضافة يوم الوقفة دي،
و نقول ليهو بي صوت واحد و شقاوة يا ابوي زح رجلك من خرطوش الموية
عشان ما يقع, و يقوم بي زعلة مفتعله يقول لينا، امكم وينها؟
نفسي في الليل قبل انوم، ارص جلاليب اخواني لصلاة العيد و اخت جنب كل
واحده طاقية و شال مريحات و في الارض جنبهم مراكيبهم الجديده البتصر امي
تشتريهم كل سنه
نفسي اسمع ابوي و هو بيقول لاخوي، تعال نحلق ليك السنه دي، و اديك انا
قروش، اخير من الحلاق البتمشي ليهو كل عيد ده و يزعمطك و تدفع ليهو قروش كمان
نفسي اصحي الصباح بدري اول زول و ا اطرد الناس من سرايرهم و افرش ملايات
العيد مع اخواتي و اجري استعد للصلاة في الميدان مع ناس البيت
نفسي اجري راجعه مع اخواتي البيت قبل ما رجال الحله يصلونا في لفتهم، و
نولع البخور و ننتظر اخواني ونقول ليهم العيدية وينها؟
نفسي اكون في العربية مع ناس البيت و احنا ماشين لي ناس حبوبة و ابوي
بيردد بصوت قوي و رخيم وسعيد، الله اكبر، الله اكبر، لا اله الا الله، الله اكبر الله
اكبر و لله الحمد و احنا بنقول معاهو
نفسي اول يوم في العيد الاقي حبوبة و تقلدني لمن ما اقدر اتنفس و ...
كفاية يا طارق، براهو مسيخ و ما عنده طعم من غيرهم :)
كل سنة و انت و حبانك طيبين
| |
|
|
|
|
|
|
|
|
|
Re: نفسي ياااخ (2) (Re: محمد عثمان)
|
نفسي يا محمد عثمان لمن افتر من المعايدة ارجع البيت مع المغربيي
واشوفلي لبنا مقنن اشربه واشغل عثمان اليمني: طريت امي البتبكي دوام تقول في الغربة عندي ولد
يا ناس العيد
| |
|
|
|
|
|
|
|
|
|
Re: نفسي ياااخ (2) (Re: Rihab Khalifa)
|
نفسي يا رحاب اجي من لاااابرة القي اخواتي منزلات الفضية
وعدة المطبخ كلها ووحدات شغالات ينضفن في الزجاج
ونفسي عفاف اختي تكورك لي: يا طارق تعال انت طويل ركب لينا الستارة
ونفسي اسمع صوت امي تقولهن: كويتوا ملايات الصالون
ونفسي اسمع في ابوي يا اخوانا سولونا الشاي النضافي دي طايري
نفسي ياخ
| |
|
|
|
|
|
|
|
|
|
Re: نفسي ياااخ (2) (Re: طارق جبريل)
|
طارق...نفسي أجي ماشي قدام بيتكم تجيني ريحة البهية مختلطة بريحة الكعك النجض
يا دوب...أرفع جلابيتي لا فوق وأنطط من الطين القدام بيتكم بعد ما غسلتو الحوش
بالخرتوش...
نفسي أمشي حلتنا و ألقى بنات الحلة بقشن في الشارع قدام بيوتم وأول ما يشوفوني
يوقفو القش ويرسمو على وجوههم أحلى ابتسامة...تمشي علي الحاجه و تقول ليها ناقصكم
شي...تقول ليك بري مافي شي ناقص تتبارك يا ولدي...
نفسي نرفع التمام بعد صلاة العيد قدام جامع ود البحر...تسلم على الجميع بالأحضان
لامن جلابيتي تتكرفس والريحة الجابه لي خالي محمد من الكويت تختلط بروائح الآخرين
و تقول يا جماعة الفطور عند عمنا حسن علي نمشي نسلم على الحاجة و نجيكم راجعين
تجري البيت جري...تدفر الباب تفتش على الحاجه جوا البيت...تحضن الحاجه حتى تشعر
بطعم حضنها و أنا طفل صغير...تدعو ليك الحاجه بطولة العمر و الوساع في الرزق
و أن يجنبك الله بنات الحرام و أولاد الحرام...ماشي وين أقعد أفطر...ماشين فاطرين
عند ناس حسن علي يا حاجة...عليك الله أقعد أكل ليك شوية سكسكانية انت بتريد السكسكانية
خلاص أديني حبة كده في صحن صغير...و لا أقول ليك بشيل براي...
تمشي تلقى الناس نلها ملمومة عند ناس حسن علي....و نقعد في المسطبة الفي الشارع
قدام بيتهم...
طارق جبريل يخرب مطنك...ما عوقتنا...
| |
|
|
|
|
|
|
|
|
|
Re: نفسي ياااخ (2) (Re: الرشيد بابكر)
|
يا طارق جبريل ما قدرت أقاوم أنا نفسي فييييي
نفسي ....في جلابية العيد البيضا ومعاها طاقية ...و يقول لي خالد أخوي الكبير ...
أمشي شيل من أبوي ريال عشان نمشي نعيد لعم بله (عليه الرحمة)
العم بله: تعال يا محمد ولدي...
كيفك و العيد مبروك عليك إنشاء الله تبقى كبير تبقى دكتور و تعالج أهلك الكتار ديل
أنا: بس يا أبوي أنا عايز أبقى مهندس عشان أبني العمارات
العم بله: كلو كويس.... مهندس و لا دكتور ما مشكلة ...أبوك خليتو كيف في البيت؟؟
أنا: و الله شديد و قال جاي ورانا يعيد عليك
العم بله: خلاص هاك الريال دا أمشي اشتري ليك حاجات كتيرة
الحاجة آمنة زوجة عمي (رحمة الله عليها)...انت يا محمد ما سلمت علي ...تعال الله يديك العافية
أنا: آي جاييك يمه ...قلت أخلص من أبوي بله في الأول
الحاجة آمنه: و الله كتر خيرك...وانشاء الله يخلي ليك أمك و أبوك ...هاك شيل الكعك دا...تعال جيب جيبك
أنا: يمه أنا شايل لي كيس
الحاجة آمنه: خلاص خت الكعك في الكيس و بعدين ختو في جيبك....وينو أخوك خالد؟؟؟
قاعدين برا....مع عبد الحليم وصلاح وقالو ماشين جبل الختمية...و أنا ماشي معاهم الجبل
الحاجة آمنه تنادي يا صلاح يا صلاح تعال جاي...
ختو بالكم لي أخوكم محمد دا...و مافي زول يشيل قروشو الأداها ليهو أبوهو
نفسي في عبد الحليم يغشني ويشيل مني 8 قروش
و يقول لي دا حق المواصلات لأنو نحن القاعدين ندفع ليك
برغم وصية الحاجة إلا أنني مهمبت من خالد أخوي و إبن عمي عبدالحليم
| |
|
|
|
|
|
|
|
|
|
Re: نفسي ياااخ (2) (Re: Adil Osman)
|
والله والله ياطارق ...
اقراء فى البوست وشايف الامتداد امامى ...
فى وقفة العيد وأول يوم العيد لحدى الساعة 12 ونومة الظهر العجيبة ....
بعد فطور العيد فى الشارع بنفس بروش أفطار رمضان واشم رائحة السكسكانية ...
وطعم اللقمة بملاح الروب والشرموط وقفشات حسن على ربنا يرد لية بصرة وعباس على ...
واللمة الغربية والجلاليب البضاء مكوية ودخول كل المنازل بالصف ودون ترتيب ومعاودتها بقصد ،،،
وبدون قصد زكريات ..
كل سنة وانت طيب
| |
|
|
|
|
|
|
|
|
|
Re: نفسي ياااخ (2) (Re: Alsa7afa_30)
|
ياخي إنت زول توّاك وعوّاق والله العظيم يا ود بت أبو ديه..
شيلتنا همّ غايتو لاحولااااااااااااااااااااا
ياخي رحماك بينا..
نفسي أكون هناك بالجد
| |
|
|
|
|
|
|
|
|
|
Re: نفسي ياااخ (2) (Re: بابكر التوم)
|
ود التوم
نفسي اقعد في النيمة القدام البيت ونرص البروش
وكل زول يجيب صينيتو ونقعد ناكل في الشعيرية والسكسكانية واللقمة
وبعدها نقلبها كشاتين وتقعد تنتظر دورك في الحريق
نفسي يااااخ
| |
|
|
|
|
|
|
|
|
|
Re: نفسي ياااخ (2) (Re: أميرة فاروق عبد العال)
|
بت فاروق
نفسي اركب البوكسي مع ابوي ونمشي نعيد علي أعمامي
ولامن نصل عمي حسن في مربع 11 يحلف علي ابوي يخلنيا نقعد ونفطر معاهو
وابوي يشيل ويحلف مافي ولد مننا يقعد..
وعمي حسن يقولنا: دة جبتوهو من وين
يقوم لطفي اخوي يقولو: عاد يا عمي جبناهو نحن ولا انتو
نفسي يااااااااخ
| |
|
|
|
|
|
|
|
|
|
Re: نفسي ياااخ (2) (Re: Fadl Karrar)
|
ونفسي يا طارق تجينا هنا ونعمل ليك لمة كبيرة وفي قندهار
وتاني يوم يجيك طه القرشي ونقعد نقول ليك دي فاتحة ود الموج
نفسي ياخ
كل سنة وانت طيب ياغالي
خالص الود
| |
|
|
|
|
|
|
|
|
|
Re: نفسي ياااخ (2) (Re: معاوية المدير)
|
Quote: نفسي يا ود جبرين، تقفل البوست ده، وتخلي الطرطشة
البتسوي فيها دي. منعمني بوست المرّة الفاتت طقاني
فيهو فايروس قضفني العافية... |
الله لا تاجرك يا مقطوع الطاري
| |
|
|
|
|
|
|
|
|
|
Re: نفسي ياااخ (2) (Re: Fadl Karrar)
|
فضل كرار
نفسي ياخي امشي علي خيلاني في الشعبية ناس ود ابودية
واملأ جيوبي بالقروش وامي تقولي لحقت كم جنيه
واحلف ما اوريها ليهن
نفسي ياااخ
| |
|
|
|
|
|
|
|
|
|
Re: نفسي ياااخ (2) (Re: مدثر قرجاج)
|
نفسي في داخلك اعاين
واروي روحي و اشوف منابعك...!
الدايم الله و الحي الله..
مالك علينا..
اصلو الايام دي,الروح مشحتفة و الحال مبشتن...و الوجع زائد!!
علا بيني و بينك..
نفسي في كباية شاي لبن من الصباح و يكون الخبيز كمل
بس باقي (الحترب) الدقة, في قعر الجردل...
والله احساس مجنون!!
تكب الدقة كلها في الكباية..وتقعد تجازف في قعر الكباية..
في الباقي الما نزل دااااااااااك..
فتناك بي عافية
وكل سنة و انت و المدام و العيال بكل خير
| |
|
|
|
|
|
|
|
|
|
Re: نفسي ياااخ (2) (Re: عفاف الصادق بابكر)
|
Quote: يا الله .. ياخ يا طارق انت رائع كده لييييه ..
والله نفسي بقت ذي نفسك في لمليم العيديه ..
|
نفسي يا بت الصادق امشي عند حبوباتي في البركل
واباركلهن العيد.. واقعد اسوسق من الحلي التحت للفووووق
ووكتين اتعب امشي علي خالتي زينب ابو دية رحمها الله
والقاها مصاقري الفرن والعيش جنبها مردم واقعد اقرض فيه
واتونس معاها وطير الجنة يجي داخل من الطاقة واقعد اهش فيه
نفسي ياخ
| |
|
|
|
|
|
|
|
|
|
Re: نفسي ياااخ (2) (Re: إسماعيل التاج)
|
Quote: نفسي أدخل البوست دا وأعرف أتخارج كيف!
كل عام وانت وضيوفك بخير.
|
ود التاج كيفنك
نفسي ياخ اشيل عيديتي وامشي محل الطوطحانيات
والعجب لو لقيت بنيات الفريق هناك
انا وووووووووووووووووووووااااااااااااكتلتي يا ناس
| |
|
|
|
|
|
|
|
|
|
Re: نفسي ياااخ (2) (Re: هواري نمر)
|
Quote: علا بيني و بينك..
نفسي في كباية شاي لبن من الصباح و يكون الخبيز كمل
بس باقي (الحترب) الدقة, في قعر الجردل...
والله احساس مجنون!!
تكب الدقة كلها في الكباية..وتقعد تجازف في قعر الكباية..
في الباقي الما نزل دااااااااااك..
|
والعجب لمن يكونوا داسين منك بُكان جردل الخبيز
عشان عارفنك بتاع لعميط ورمرمة
وتقوم كدي تلقاهو
وتقعد تتواتاهو
| |
|
|
|
|
|
|
|
|
|
Re: نفسي ياااخ (2) (Re: مدثر قرجاج)
|
Quote: طارق
والله بقينا مابنقدر نستحمل ياخ
والدمعه بتفر سريع يعنى بقينا
على الهبشه ...زكرتنا ايام كانت
كل الحاجات ليها طعم حلو
الرحمه والمغفره للوالده
كل سنه طيب
|
الحالة انت جوة البلد يا حبيبنا
امال نحن نسوي شنو
| |
|
|
|
|
|
|
| |
طارق جبريل
Rihab Khalifa
جلال عثمان
الرشيد بابكر
محمد آدم النور
Adil Osman
بابكر التوم
Alsa7afa_30
فاروق أبوحوه
مزمل خيرى
أميرة فاروق عبد العال
Fadl Karrar
ياسر بيناوي
معاوية المدير
محمد عبد الماجد الصايم
مدثر قرجاج
هواري نمر
إسماعيل التاج
عفاف الصادق بابكر
نجوان
فيس بوك
تويتر
انستقرام
يوتيوب
بنتيريست