دعواتكم لزميلنا المفكر د.الباقر العفيف بالشفاء العاجل
|
|
 ما بين القرقوش والكورواسون
|
الحبيبين كيفنكم...
مرقت من شغلي يا الحبان جعان ومشتهيلي ((حَرِف))
اها قلت اضرب لي وليداتي فشان النشوف ان بقوا ما طلعوا معاهم العيش وباقي الملاهط
- الو بابا
- الو... اها طلعتوا العيش ولا اجيبو معاي
- بابا اسمه الخبز
- يا بت خبزك جن كلكي انا جعان طلعتوا شنو معاكم
- باب ما جبنا اي حاجة كنا مستعجلين
- كدي اسألي امك دايري شنو من غير العيش
- قالت ليك الخبز وشوية ديسير(فواكه)
- ايي ديسير شنو مو ياهو الموز والبطيخ
- يا بابا جيب معاك كيوي وشوية ديال الرمان وشوية كمثرة وعافاك آبابا دوز للباتسري(بتاع الحلويات) وجيب معاك ميلفي وكرواسون عشان نشرب بيهم (الكافي اوليه)
- واكنها شنو هي الكرواسون والميلفي ديل يا بتي
- بابا غير امشي حدا المخبزة وحداها الباتسري
مشيت يا الحبيبين اخدتة العيش وغشيت بتاع الفواكه وشلتة الموز والبطيخ وحاجة كدي يقولولا الكيوي لامن تفقشها نصين عاملي زي كلوة الخروف
وشيلنا الكمثرة والرمان... فواكه كدي من اسمها ماها راكبي راسي
من دربي داك مشيت علي النصيبة اليقولولوا الباتسري دة ان كان القالك حلويات اشكال وألوان
شي بني وشي ابيض وشي اخضر
- لا باس آلللا
- وي ميسيو
- ياخي دايرلي نصيبة يقولولا الملفي والكرواسون
- كوا مسيو (قلت شنو بالفرنسي )
الخرابة نسيت انها مغربية قايلها من بنوت شبا
- سوري بغيت شي حاجة كيسموها ميلفي وشي حاجة اخرى كيسموها كرواسون
- شحال بغيتي (عايز كم)
- شي عشرة في عشرة
- وخا مسيو
الخرابة جات شايلالي عشرة نصايب ضهرن ابيض ومشختات بالبني علي سيخ ((البيم))
شويتين تاني جابتلها نصايب تاني معوجات علي قرون التور
يا ربي دة وكرة شنو دي
وحات ربي التمن الدفعتو فيهن كان يدققلي شوالين ألات مريق
وانا في الطريق اتذكرت حبوبتي نفيسي وكتين نجي من الخرطوم لي شبا
بالله من تسمعبنا جايين يومين تعوس في القرقوش وتتندلو في التُكل في جردل أليل طلس ابيض
واصلو اول يوم دة من نجي بس تمغرب كدي تمشي تحلب النعاج وتجي تقننلنا اللبن
وتجيبلنا القرقوش ونحن نغتس في القرقوش في كباية الشُب ديك لامن يتنفخ
ووكتين تدخل القرقوشايي في خشمك وتحرك فيها بي لسانك
وحاتكم الواحد يبقى زي راس ابو القدح وكتين يقول كدي يدخل راسو لا جوة
والعجب ان بقيت لقيتلي باقي بركاوي في كوريي
ترقدلك في عنقريب في نص الحوش وتقعد تفسخ في البركاوي دة
وتشوف في سماء الله
هناك نشرب المقنن بالقرقوش
وهني ((الميلفي)) و((الكرواسون)) مع ((الكافي اوليه))
هناك تقعد تكد في عضم المنقة لامن تعدمو نفاخ النار وهني ياكلو في الكمثرة والكيوي
الشافع وكتين يمشي معاك الدكان تلقاهو يتشعلق في (تويكس)) ولا ((سنكرز)) ولا ((كيت كات))
ونحن يعلم الله غير حلاوة عكاز ألت الفلاتة ديك تقعد تقرمش فيها زي كسير الطلح بالفاس
وان بالغتة تاكلك قراصة نبق ((تابوتة))
هسي الشافع هني ترسله للمدرسة بي تيرمس أليل أكل يشتريلك ركشة عديييييييل ومليان نصايب
انا وحات الله يوم جيت للفطور من المدرسة لقيت امي ماها في شلتلي فطيرايي ضرضرت فيها سكر وكبيت فيها روب من الكوريي
ورجعت لي مدرستي وانا آكل فيها لامن وصلت الفصل لقيت قميصي ((الظهري داك)) كله مخطط بالروب علي البشمل فوق الماكرونة
هني يقولوا لي امهن سوي لينا فطيرة بالمكسرات
ونحن وكتين يخلولك الفطيري الاخيري في الصاج فشان تبقى قنقروشة
يمين تقرب تزغرد كله كله
اقولكم شي... انا الجابني البلد دي شنو
الرسول واحدا فيكم يختلي صورة الميلفي والكرواسون هني فشان الغبش يشوفوهن
|
|
 
|
|
|
|
|
|
|
|
Re: ما بين القرقوش والكورواسون (Re: طارق جبريل)
|
ود جبريل
واصلو اول يوم دة من نجي بس تمغرب كدي تمشي تحلب النعاج وتجي تقننلنا اللبن
وتجيبلنا القرقوش ونحن نغتس في القرقوش في كباية الشُب ديك لامن يتنفخ
ووكتين تدخل القرقوشايي في خشمك وتحرك فيها بي لسانك
وحاتكم الواحد يبقى زي راس ابو القدح وكتين يقول كدي يدخل راسو لا جوة
والعجب ان بقيت لقيتلي باقي بركاوي في كوريي
ترقدلك في عنقريب في نص الحوش وتقعد تفسخ في البركاوي دة
وتشوف في سماء الله
صدقني شهيتني الرجعة للبلد
سلام يا زول يا زين
| |
|
|
|
|
|
|
|
|
|
Re: ما بين القرقوش والكورواسون (Re: ابو جهينة)
|
Quote: صدقني شهيتني الرجعة للبلد
|
حبيبنا واستاذنا ابو جهينة
ياخي كيفنك
وحات ربي ماني مشتهيلي شي
علي نومة في حوش جدي في البركل
وتحتي كوريي ألت بركاوي
وبستلة ألت ترمس
شفتة النفيسي دي كيفنها
| |
|
|
|
|
|
|
|
|
|
Re: ما بين القرقوش والكورواسون (Re: طارق جبريل)
|
ياطارق
اتذكرت بحكايتك دى طلب استاذ الطيب صالح حين يفد الى ديار المغرب أن يتناول من الحاجة والدتكم قراصة حاااارة..
اتذكرت الاستاذ طلحه ومحاضرته قبل شهور فى مركز عبدالكريم ميرغنى حول شيخ الطيب وطريقته واسلوبه وسودانيته القحه ...
تعرف ياطارق لهجة الشوايقه دى بى شوية اماله كده قريبة من حديث المغاربه..
تحياتى للوليدات والبنيات..
رسلت ليك ماسنجر بخصوص ناجى وناصر ...عيييييييييييك ماجانى رد
المهم ألكز لى طلحة فى ذكرى الطيب زول اصيلة..وقول ليهو كنت مدهش فى حوار قناة الحرة كعهدى به دوما
مودتى
| |
|
|
|
|
|
|
|
|
|
Re: ما بين القرقوش والكورواسون (Re: محمد عكاشة)
|
Quote: ياطارق
اتذكرت بحكايتك دى طلب استاذ الطيب صالح حين يفد الى ديار المغرب أن يتناول من الحاجة والدتكم قراصة حاااارة..
اتذكرت الاستاذ طلحه ومحاضرته قبل شهور فى مركز عبدالكريم ميرغنى حول شيخ الطيب وطريقته واسلوبه وسودانيته القحه ...
تعرف ياطارق لهجة الشوايقه دى بى شوية اماله كده قريبة من حديث المغاربه..
تحياتى للوليدات والبنيات..
رسلت ليك ماسنجر بخصوص ناجى وناصر ...عيييييييييييك ماجانى رد
المهم ألكز لى طلحة فى ذكرى الطيب زول اصيلة..وقول ليهو كنت مدهش فى حوار قناة الحرة كعهدى به دوما
مودتى |
اووووووووووو محمد عكاشة يا حبيب
والله هسي شفت رسالتك
ياخي اخوك بيجي شايت في المنبر دة طوالي من غير احم ولا دستور
ياخي المغاربة ديل لهجتهم ذاتها حنيني خلاص
وحات الله ناقصاهم الشلوخ ألاتنا وبس
يا حبيب باكر من الصباح ماشي علي طلحة وبنلكزه ليك ان شاء الله
| |
|
|
|
|
|
|
|
|
|
Re: ما بين القرقوش والكورواسون (Re: طارق جبريل)
|
بورداب المغـــرب ...ان شـــاء الله مـاينفـعـكم..ياخـــونـه !!!!!
قبل سنوات لقينى الشاعر تجانى حاج موسى مساء فى نمرة اتنين أقوم بواجب عزاء وقد كنت صباحا فى واجب آخر وطريقى الى نادى الضباط لحفل زفاف احد الاصدقاء..
ثم هو يندهش ويسألنى ,,ومتى تتفرغ الى عملك ..الصحافة ,,وفى الاجابة ياهو ده السودان ولامناص ...
قبل اسبوعين وزحمة شديدة استعدادا للسفر الى طنجه يلتقينى مرة اخرى فى ذات الدوشة ثم تمخر بنا الطائرة تلقاء الدار البيضاء ومن فرط كل ذلك يغيب عنى موضوع فارق الوقت وتقلبات الطقس ومقامات السادة التجانية فى مدينة فاس حتى تستقبلنا فتاة منها فى طنجة ..وضيئة..يفتر ثغرها عن ابتسامات جميلة وتتقدم نحوناوتقول..
ـ أنا فريده بوكرم..يسرنى أن أكون مرافقتكم أيام المهرجان وتحت أمركم..
ثم تجدنى فى حال من الذكر ..ياألله..ياألله ..والاستاذ موسى الامير يقول لى ..أها أمسك فى الاسم الاعظم ده والذكر والدرب طويل,,,
...
مضيت الى أيام المهرجان وعرض( لير السودانى) يلفت اهتمام الحاضرين وذات فريدة احاورها حول سحر المغربيات لتستفيض فى الحديث واستاذ موسى يهيج هذه المرة..
مايسحروك..والايجنزروك ويربطوك فى كدباس ذاتو..
.....
الاستاذ طلحة جبريل الكاتب الكبير يحكى عن غيابه عن الوطن وعن تجربته..أنا لم أغب عن الوطن وهو لم يغب عنى طوال السنوات..خروجى منه هو بسبب عمق انتمائى اليه..
الوطن فى تصوره هو فى رحابته وتنوعه وحقه فى الحرية والعيش الكريم ورعاية الحقوق..
الاستاذ طلحه الذى توفر فى مهجره على الكتابة الرصينة اقبالا على المعرفة وفائدة الناس والاوطان..
طلحة جبريل وهو فى مكتبه بوسط الرباط يستغرق فى رفد المكتبة السودانية بوثائق وحقائق واضاءات ماكان ليستنجز السدس منهالو شغل نفسه بسفساف الامور فى سدانة الأنظمة ورغائب النفس الحرون فى بلد هى أرض مجنة ..
فى الرباط..المدينة الساحرة..
يجلس طلحة..طارق وناصر جبريل للكتابة والقراءة والأفعال النافعه..
ثم,,
فى مرسمه ..يعكف صديقنا قاسم عثمان ببطن المدينة يخلط ألوانه ويمزجها ويكتب فى حوارات خلاقة منذ مجلة حروف وحتى خروجه الى المغرب ليوقع بخط واضح تجربة تشكيلية تزاوج بين اللون والموسيقا والسودان حاضر طوال السنوات..يشده اليه ونحوه لوحة لم تكتمل,,لوحة لأنثى خصيبة..مهيبة..ذات حضور...
سوى أن زيارة مهمة الى أسرة المرحوم الصحافى ابوبكر الشريف ذات وقع خاص..الراحل الذى كان بيته قبلة لأهل السودان العابر منهم ومن أقام ..تسقبلنا حرمه السيدة حجيبة المغربية بترحاب السودانيين الذين هم نصف بيتها من الابناء ..سعيدوسامى والشابة الطموحة..الناجحه فى عملها سناء..
اغادر بلاد المغرب ..سادتى ..وفى الفؤاد كل هولاء..
ناجى عزالدين بحيويته وعاطفته المشبوبه ..مسحورا..مسرورا بأهله وناسه ..
محمد نور وهو يذرع المغرب من أقصاها الى أقصاها فى خفة وحبور,,
المغرب بلاد السحر والجمال الناضر..والنسيم الماااش..
ناجى ..محمدنور..قاسم..ناصر..طارق والبورداب ..مابنفعكم ياخونه !!!!!
| |
|
|
|
|
|
|
|
|
|
Re: ما بين القرقوش والكورواسون (Re: محمد عكاشة)
|
الى السني دفع الله وأشباهـه..بخصوص مـوسى الأمـير ؟؟!!!
حالة مهيبة من الفن والاحساس والتجاوز وثراء التجربة الانسانية...
أباموسى مثلما يحلو للمخرج ربيع يوسف الشايقى أب تلاليش..
ربيع الذى يفصله عن موسى نحوا من أجيال اربع..ومع ذا يرغب موسى بفنه وحضوره المدهش أن يصل ذلك بأداء تمثيلى عبر (لير السودانى ) بتكوينات مختلفة,,تمثيل بديع..حضور خلاب والاستاذ عبدالحق الزروالى المغاربى الفنان الذى اشار فى مشهد افتتاح مهرجان طنجه الى أن سعادته بالغه والسودان حضور فى مهرجان هو رئيس لجنته للتحكيم..
ذلك لانه يعرف السودان ومسرحه وفنانينه ولكم كانت حفاوتهم به بالغة وبديعة...
محمدالسنى دفع الله..
موسى اللمير اسمه والانفاس مقطوعه يرد اول الاعلان عن الفائزين بنبرة مغاربية محببه...
موسى الامير جائزة أحسن تشخيص وهوفى جلبابه السودانى يقدل ويرجحن...
الليبيون يصفقون والجزائريون والمغاربة وجميلة الجميلات سكينة ذات التسعة عشرة سنة
منتظرنك ..شن قولك
| |
|
|
|
|
|
|
|
|
|
Re: ما بين القرقوش والكورواسون (Re: عفاف الصادق بابكر)
|
Quote: اولاً :
حفظكم الله اولاد جبريل ورعاكم ..
يا طارق يا اخوي البلاوي دي ما خلاااس ما عندنا مفر منها ..
العيال مطششين بينا .. في الكلام وفي الفعل ... منعول ابو الغربه .. |
بت الصادق كيفنك ياخي
باقيلك الولاد ديل تاني بيرجعلونا للبركل
| |
|
|
|
|
|
|
|
|
|
Re: ما بين القرقوش والكورواسون (Re: هواري نمر)
|
Quote: يا ود جبرين .انشاء الله طيب
ياخ اهلك ديل يمين ما نصيحين ياخي,أكان المغاربة ان كان الشايقية
هسي (عبد الرحيم البركل) البعمل فيه ده شنو؟؟
بمين يخلي الدمعة..تصل لي عند الحنك..
قادر الله ياخي...ويعلم الله تعبنا شديييييييد...
|
ود نمر حبابك آآآلزين
يا زول هوي انا غلبني
بعد دة بالهاك وكوف لازم اندلى السودان
انت وبت الشيخ اجزتكم بعيدي ياخي
| |
|
|
|
|
|
|
|
|
|
Re: ما بين القرقوش والكورواسون (Re: HAIDER ALZAIN)
|
Quote: قادر الله .. غنت الاسامي دي حفظتها كيف لمن تمشي تسال منها
يآخ انا قراية ساي ما عرفت انطقها ..
ـــــــ
كافيه اوليه دا وصفو شن خبرو ؟! |
ود الزين كيفنك ابوي
انت قالولك انا قاعد افرزو
يمين يلكزوا فيني وكتين اصل الفرن
| |
|
|
|
|
|
|
|
|
|
Re: ما بين القرقوش والكورواسون (Re: طارق جبريل)
|
طارق جبريل
دي نوع الكتابات القلتا ليك بعمل منها برنت عشان الاولاد ياخدو كورس في العربي ههههه
تسلم
صديقي المحترم يعمل في شركة محترمه جدا في السودان (سنمسك عن اسمها)
يصرح لي بان المشروع الذي يعمل عليه يستهدف تعليم نساء الريف في السودان
طريقة عمل الكرواسو وعلى سبيل المثال ذكر لي اسم قرية من قرى الجزيرة،
فسالته عن ان كانت الشركة ايضا مهتمه بتعليم نساء الريف من تفادي الملاريا والبلهارسيا
والغارديا و و و و كل تلك الاوبئة في الريف
فبهت الذي كفر
ناس البلهارسيا قارشاهم قرش، واصحاب رؤوس الاموال يريدون ان يملئوا افواهم بالكرواسو
معليش لو خرمت ليك البوست
نرجع للترفيه
الشيء بروليه دا بتمسحوبو ولا بياكلوهو؟؟
| |
|
|
|
|
|
|
|
|
|
Re: ما بين القرقوش والكورواسون (Re: أحمد ابن عوف)
|
Quote: طارق جبريل
دي نوع الكتابات القلتا ليك بعمل منها برنت عشان الاولاد ياخدو كورس في العربي ههههه
تسلم
صديقي المحترم يعمل في شركة محترمه جدا في السودان (سنمسك عن اسمها)
يصرح لي بان المشروع الذي يعمل عليه يستهدف تعليم نساء الريف في السودان
طريقة عمل الكرواسو وعلى سبيل المثال ذكر لي اسم قرية من قرى الجزيرة،
فسالته عن ان كانت الشركة ايضا مهتمه بتعليم نساء الريف من تفادي الملاريا والبلهارسيا
والغارديا و و و و كل تلك الاوبئة في الريف
فبهت الذي كفر
ناس البلهارسيا قارشاهم قرش، واصحاب رؤوس الاموال يريدون ان يملئوا افواهم بالكرواسو
معليش لو خرمت ليك البوست
نرجع للترفيه
الشيء بروليه دا بتمسحوبو ولا بياكلوهو؟؟
|
قريبي ود ابنعوف كيفنك
يا زول هي الناس الملاريا باقالا في روحها
ويأكلوهم كرواسون
غايتو يا قريبي هني في جنس لغاويس في البلد دي
الله بس العالمبها
| |
|
|
|
|
|
|
|
|
|
Re: ما بين القرقوش والكورواسون (Re: طارق جبريل)
|
الزول السمح ود جبريل أنت واحد من الأسباب التي تجعل الإستمرارية في المنبر واقعاً وممكنة شكراً لكل هذا الجمال والكلام الجميل يا طارق.
ولي عودة للقرقوش أما Le Croissant البشبه قرون التور المرسومة في فنايل فريق شيكاغو بولز لكرة السلة (وأنا بصراحة أى عبارة تبدأ بـ Le بتعمل لي خمة نفس وشحتافة روح وبكون أوف سايد عديل كده وفي النهاية هذه حاجه قد نكون شاهدناها Somewhere لكين الحق والحق يقال لم نتذوقها أو نأكلها بزعتر أو cheese أو غير ذلك من الحشوات وبذلك يتحقق فينا المثل القائل "كان ما متنا ما شقينا الترب" ويلي ذلك بيج كوسشن أو إكسيكلاميشن مارك.
ود جبريل اللغة الفرنسية دي أبوي الله يرحمه دقاني فيها عديل عشان أتعلمها وبرضو ما نفع أنا جني وجن الكلام البي النخرين دا الواحد تقول عنده زكمه. وبعجبني نضم اللبنانين في الفرنسي الواحد يقول لي المذيعه بنسوار تقوم ترد عليهو وتقول بنسوارين ، أها شويه كان عصرت عليها شوية ما كانت قالت ورحمة الله وبركاته.
| |
|
|
|
|
|
|
|
|
|
Re: ما بين القرقوش والكورواسون (Re: almulaomar)
|
العزيز ود جبريل ...
القصة جميله لكن عاوزين مترجم عدييييييييييييل
Quote: وحاجة كدي يقولولا الكيوي لامن تفقشها نصين عاملي زي كلوة الخروف
|
زكرتنى خالتى عشة بت الخليل بتقول للكوي راس الككو ( راس القرد ) .
| |
|
|
|
|
|
|
|
|
|
Re: ما بين القرقوش والكورواسون (Re: مشاعر بدوي)
|
مشاعر ما تراعي لي مشاعرنا يعني عشان خالتك فيرست كلاس ونحن ناس إيكونومي ومخفض كمان ، والله لكين خالتك دي مثقفة لمن غلط تصوري نحن في حتة الخالات دي حدودنا الدوم واللالوب يعني اليوسف أفندي زاتو مبالغه عديل كده في أمصارنا.
الموضوع بالجد محتاج لي ترجمة لأن ود جبريل بنسي نفسه وبفتكر كل الناس هنا ناطقين بغيرها يقوم يفكها في الناس ويكون باقي ليهو بدل ما يكتب حرف السين بي سنون لي فوق يعمل سنونها أفقي عشان تمشي مع الكلام. لكين لو ركزتي شوية ممكن تظبط الحكاية زي ما ظبطت معاي.
الكيوي دا دحين مو نوع من أنواع الطيور ، غايتو زمااااان زمن البوليس أب ردا كان الطير البشبه البطريق دا مرسوم في علب الورنيش وأنا عاد كل ما يقولو كيوي كنت بفتكره نوع من أنواع الـ Polish لكين الحكاية طلعت فاكهة وبالرغم من شكلها القبيح قال ليك دي فاكهة مفيدة وذات قيمة غذائية وموطنها إيطاليا ونيوزيلاندا وتركيا وهلم. وأنا بصراجة بفكر عندنا أرض زراعية خمسه حبال في كجبي أها قلت السنة دي أخلي زراعة البطاطس وأزرع كيوي يمكن تظبط ولي شهرين بوصي في صفوت الحلبي المقيم بمدينة تورينو يكتر من فاكهة الكيوي والحبوب الصغار البشبهن الحبة السوداء يصبنن لي مشروع تقاوي وكده وليهو في الحالة دي 5ر2% من المحصول دا إذا قام أصلاً.
دي الفاكهة والكلام على ذمة عمكم قوقل فنحن ناس نبق ساااكت ، ودي كان جابوها لي خالتن لينا إلا يدوها ياها والكهربه قاطعه ووحاتكم ووحات خوة منبركم دا في الضو ما تاكلها
أها دا الطير عاينو شناتو بلا عربية الداندرمه أو الدرداقه شن بشبه إنتو تعالو الركشة دي مستوحاه من هذا الطار
| |
|
|
|
|
|
|
|
|
|
Re: ما بين القرقوش والكورواسون (Re: almulaomar)
|
| Quote: ود جبريل اللغة الفرنسية دي أبوي الله يرحمه دقاني فيها عديل عشان أتعلمها وبرضو ما نفع أنا جني وجن الكلام البي النخرين دا الواحد تقول عنده زكمه. وبعجبني نضم اللبنانين في الفرنسي الواحد يقول لي المذيعه بنسوار تقوم ترد عليهو وتقول بنسوارين ، أها شويه كان عصرت عليها شوية ما كانت قالت ورحمة الله وبركاته |
اووووووه البهجة عمر
يا حبيبنا والله انا لي عشرين سنة في البلد دي
لليلي ماها دايري تدخلي في راسي
ياخي لغة كلها نخنيخ
| |
|
|
|
|
|
|
|
|
|
Re: ما بين القرقوش والكورواسون (Re: خالد احمد محمد)
|
| Quote: فى طارى اشتهاك ده يا طارق يبقالى نسيت ( الجرم ) والله داك فيهو جنس مقرشة ...لكن المسيكين يبقالى الايام جارن عليهو زول قاعد يسوى الايام دى مافى |
يا اللله يا خالد ياخي
حليل الجرم وحليل ايامه
| |
|
|
|
|
|
|
|
|
|
Re: ما بين القرقوش والكورواسون (Re: طارق جبريل)
|
دكتور طارق
يا ود حلة نسابتي
ياخي نضمك حلو شديد
وأصلو أحلى من نضم
الشوايقة مافي
بالجد والله أنا محسي
(يعني خال وليداتك)
لكن يعلم الله نضم الشوايقة
لذيذ وكلو حنية
خاصة كلام أماتنا وحبوباتنا
والله تسمعوا ساااااي
أكان تتنخج
ياخي والله كلام عجيب
إيديك العافية يا دكتور
شقيش ما تقبل
| |
|
|
|
|
|
|
|
|
|
Re: ما بين القرقوش والكورواسون (Re: ابراهيم قناوي)
|
| Quote: حليل الجرم وحليل ايامه |
الجرم دا من جريمة يعني ولا إجرام ، يا طارق رسينا على بر
محاولة فاشلة من جنابنا لممارسة الحنكشة
يا زول الجرم دا دحين مو التسالي البشبه القرنفل ومسامير النقلتي داك ويتقرش بس ساكت يعني طريقة قزقزة ما في لأنه أبداً ما بتفقش النص زي التسالي العادي ولو جبت أحرف صعلوك من سينما أو ميدان ليق ما يقدر يفقش ليهو جرمايه واحده.
| |
|
|
|
|
|
|
|
|
|
Re: ما بين القرقوش والكورواسون (Re: almulaomar)
|
نسيبنا طارق
والله عظيم الشرف
نسيبنا دي ما ساي ...لانوالمواطنه من البركل تحت
ومن هذه ال"شبا" اعز اصدقائي ....المرحوم ابراهيم ابو ديه
يا اخوي حكاية القراقيش والكروازان دي
زي مقارنتك ما بين بحر المالح ونهر التيمس
وحديث اولادك ومتطلباتهم لو سمعوها شفع البركل
الا يقولوا ديل شيوعيين....!!!
| |
|
|
|
|
|
|
|
|
|
Re: ما بين القرقوش والكورواسون (Re: طارق ميرغني)
|
Quote: نسيبنا طارق
والله عظيم الشرف
نسيبنا دي ما ساي ...لانوالمواطنه من البركل تحت
ومن هذه ال"شبا" اعز اصدقائي ....المرحوم ابراهيم ابو ديه
يا اخوي حكاية القراقيش والكروازان دي
زي مقارنتك ما بين بحر المالح ونهر التيمس
وحديث اولادك ومتطلباتهم لو سمعوها شفع البركل
الا يقولوا ديل شيوعيين....!!!
|
اووووه استاذنا العظيم طارق
ياخي كيفنك
يا زول نحن الناسبنا والله
المرحوم ابراهيم ابو دية هو خالي تماما
والدتي رحمها الله عائشة ابو دية (البروفايل)
يا زول الاولاد ديل بي جنهم دة وديتم شبا
| |
|
|
|
|
|
|
|
|
|
Re: ما بين القرقوش والكورواسون (Re: almulaomar)
|
Quote: يا زول الجرم دا دحين مو التسالي البشبه القرنفل ومسامير النقلتي داك ويتقرش بس ساكت يعني طريقة قزقزة ما في لأنه أبداً ما بتفقش النص زي التسالي العادي ولو جبت أحرف صعلوك من سينما أو ميدان ليق ما يقدر يفقش ليهو جرمايه واحده.
|
الله يقلعك
يمين فقعتني بالضحك
| |
|
|
|
|
|
|
|
|
|
Re: ما بين القرقوش والكورواسون (Re: ابراهيم قناوي)
|
Quote: دكتور طارق
يا ود حلة نسابتي
ياخي نضمك حلو شديد
وأصلو أحلى من نضم
الشوايقة مافي
بالجد والله أنا محسي
(يعني خال وليداتك)
لكن يعلم الله نضم الشوايقة
لذيذ وكلو حنية
خاصة كلام أماتنا وحبوباتنا
والله تسمعوا ساااااي
أكان تتنخج
ياخي والله كلام عجيب
إيديك العافية يا دكتور
شقيش ما تقبل
|
خال الوليدات كيفنك
باقيلي الشوايقة مقدنك خل ضُمة ضُمة
| |
|
|
|
|
|
|
|
|
|
Re: ما بين القرقوش والكورواسون (Re: طارق جبريل)
|
Quote: خال الوليدات كيفنك
باقيلي الشوايقة مقدنك خل ضُمة ضُمة |
والله يا دكتور طارق
الشوايقة أعز أصحابي
وناساً حوناااان بالحيل
و أهم ميزة فيهم ما بعرفوا
اللولوة يعني ناس دغريين وواضحين
ولو قعدت أحسب ليك أصحابي العوزاز شدييييد
حتلقى في مقدمتهم الشوايقة
يديك العافية يا أبو النسب ياخ
| |
|
|
|
|
|
|
|
|
|
Re: ما بين القرقوش والكورواسون (Re: ابراهيم قناوي)
|
Quote: والله يا دكتور طارق
الشوايقة أعز أصحابي
وناساً حوناااان بالحيل
و أهم ميزة فيهم ما بعرفوا
اللولوة يعني ناس دغريين وواضحين
ولو قعدت أحسب ليك أصحابي العوزاز شدييييد
حتلقى في مقدمتهم الشوايقة
يديك العافية يا أبو النسب ياخ
|
حبيبنا ود قناوي
ياخي الله يجبر بي خاطرك ياخي
تسلم يا ملك
| |
|
|
|
|
|
|
| |
طارق جبريل
نادر النور آدم
ابو جهينة
د.محمد حسن
محمد عكاشة
كمال عباس
HAIDER ALZAIN
هواري نمر
أميرة فاروق عبد العال
محمد عبد الماجد الصايم
عفاف الصادق بابكر
أحمد ابن عوف
معاذ حسن
عبد الدائم سيد أحمد
مشاعر بدوي
خالد احمد محمد
الطيب شيقوق
ابراهيم قناوي
فيس بوك
تويتر
انستقرام
يوتيوب
بنتيريست