دعواتكم لزميلنا المفكر د.الباقر العفيف بالشفاء العاجل
|
|
 حكاوي حبوبات وجلاكيم
|
(1) عرس نفيسي
- طارق آآآولدي قوماك دلني لا تحت جنب جدودك في شجرة ناس ود جبارة
- سمح قوماكي
- أدني عكازي
واندلينا لاااا تحت عند بير ود جبارة
- عوض السيد: اهلا بالمرة القاهري
- مافي زولا قاهر قدركم الله لا تكسبكم
- طارق امشي املالي حقتي دي صعوط من دكان العوضابي وجيبلي معاك سيجاري ألت برنجي
- ود جبارة: انت لليلي تسفي وتسجري دحين مو حجيتي
- أيي حجيت واسجر واسف التمباك عندك مانع
- ود جبار (يضحك): اصلك من يومك قاهري وماك نصيحي
.....
مشيت علي دكان العوضابي وخليتم
خمسة رجال وامرأة... شيوخ على حافة القبر
يقضون جل وقتهم في اجترار ذكريات صباهم
يحكون عن أيام مضت منذ زمن بعيد
لا يتحرجون في الكلام ولا ينتبه لحديثهم أحد
يلقون الكلام على عواهنه لا يعنيهم من محيطهم
غير طفل يرسلونه حيث يريدون او امرأة تأتيهم بالطعام
.....
جبت الغرد أليل نفيسي كان اسمعلك:
- عوض السيد (ميت من الضحك): الرسول آآنفيسي عرستي ود عمنا دة كيفن
- كدي خلني اللسف واسجر
- رابح: أصلك من يومك علي الرجال
- جيت يا عوض السيد مندلي لااا تحت شايلالي حرف أليل قراصي لي ابوي
وجنب البير أكان القالك ود الطيب طالع وفي ايدو برسيم
سلم علي وقلتلو: انت يا ود الطيب بقيت تحد زي النسوان كمان
مرتك ماتت ليها سنين وانت لليلي مابي العرس
- عوض السيد: الله يقلعك آآآبتتقدري
- ود ناس الطيب: عندك لي عروس آآآنفيسي
- انا مالي آآآبتعرس
- تعرسيني آنفيسي
- ان بقيت دايرني بكلم ابوي الكلام لا يبقى فسو ساكت
- خلاص ان بقيتي قابلابي عوجة تب مافي
- عوض السيد: الله لا تكسبك يا مقطوعة الطاري
- نفيسي: اندليت علي ابوي تحت يا عوض السيد ولقيتو يحفرلو تحت تمرة
وقلتلو: ابوي ود ناس الطيب دة قال دايرني دحين نجض معاهو الكلام في صلاة العشاء
- جدنا بغداد: انت نان بقيتي للعرس
- نفيسي: كدي يابا شوف فهموا شنو انا هيني
- رابح: آآآبتستحي من يومك
- نفيسي: وحاتك آآآرابح العشي بقالي طويل خلاص وبقيت اتاوق علي جية ابوي من الجامع... ووكتين جاء ما قالي شي اتعشى ورقد نام... وانا الوردي مسكتني
- وراسي بقى يودي ويجيب يا ربي ابوي اباهو ولا السجمان ما فتح الكلام معاهو
- صبحت الدني وانا اوجوج من هني لا هني علي الجدادي الدايري ترمي البيض
- اندليت لا عند ابوي ما شفتو... شويتين اشوفه شايل طوريتو وجايي من لااافووووق
- حدرتلو زين وطلعت لي اهلي...
- الواطة مغربت وانا اتاوق لي طلعة ود الطيب لامن شفتو طالع علي بيتم
- لفحتة طرحتي ومشيت عليه قبل لا يمسك كُشر الباب:
- انت آآآود الطيب تكذب علي وتخليني أكلم ابوي وما تكلموا
- ود الطيب: والله آآنفيسي غلبني اقوله خجل منو... يقول شنو انا بقابلك من وراهو عاد
- الخجل اليقطع مصارينك وحات النبي ما تمشي قدامي هسي ليهو علي اكورك ألم عليك خلق الله هني واقولهم ود الطيب يجرجر فيني من طرحتي
- عوض السيد (ضاحكا بشدة): نجيضي الله يقلعك... أهاااا
- نفيسي: وحاتك ود الطيب قلع عيونه وبقى يرجف وشبكني: آآآنفيسي بمشي معاكي بس لا تضيعيني... وقلتلو ان بقيت راجل ما تجي انا سابقاك للبيت
- ود جبارة: الخرابة آآآبتعرفي الخوف
- نفيسي: جملة الايمان يا ود جبارة جاء وراي ودقة الباب وطلعتلو وقالي ابوك في... وانا اكورك بي طول حسي: أييي يا ود الطيب ابوي لا جوة... فشان ابوي يسمعني
- دخلتو علي ابوي ومشيت علي الطاقة اتصنت في كلامو
- عوض السيد: أها شن قال؟؟؟؟
- نفيسي: اسمع فيهو يقول لي ابوي يا عم بغداد انا جاييك في غرد خير
- رابح: أها يا خرابي
- نفيسي: المهم يا رابح كلم ابوي وانا بقيت اوجوج من هني لاهني
- وازازي بين الطاقي والتكل تقول بطني ماشي (عندي اسهال) لامن مشى لي اهلو..
- وابوي ناداني وقالي رأيك شنو
- عوض السيد: أها شن قلتي يا خرابة
- وحاتك يا عوض السيد بقيت ازغرد لامن ابوي نهرني...وعرسته
- الجميع يضحكون: الله لا تكسبك
|
|
 
|
|
|
|
|
|
|
|
Re: حكاوي حبوبات وجلاكيم (Re: طارق جبريل)
|
حلوة!!
واتذكرت قعدتنا لمن قلت داير افتحي بوست وحكيت لينا القصة دي ..
حلوووة شديد ضحكت واتذكرت طريقة كلامك وحكااك .. انت ذاتك دحين ما ود نفيسة !!
كل سنة وانت طيب وعيد سعيد
واصل .. معاك لي آخر السكة !!
| |
|
|
|
|
|
|
|
|
|
Re: حكاوي حبوبات وجلاكيم (Re: حيدر حسن ميرغني)
|
| Quote: دي لمة ناقصة بت مجذوب وود الريس |
حيدر كل سنة وانت طيب ياخي
تعرف..
مرة حكيت للطيب صالح حكاوي نفيسة دي
قال لي جملة الايمان انت وحبوبتك ماكم نصيحين
يمين حبوبتك دي فاتت ود الريس وبت مجذوب
عندها حكاوي صعب تحكيها هني يا حيدر حنين
| |
|
|
|
|
|
|
|
|
|
Re: حكاوي حبوبات وجلاكيم (Re: طارق جبريل)
|
| Quote: - وحاتك يا عوض السيد بقيت ازغرد لامن ابوي نهرني...وعرسته |
ههههههها
عفيييييت منها تب!
تليشه الليلتك
مشتاقين و كل سنه و انتو طيبين مع عيدكم المتاخر ده 
| |
|
|
|
|
|
|
|
|
|
Re: حكاوي حبوبات وجلاكيم (Re: Rihab Khalifa)
|
Quote: تليشه الليلتك
مشتاقين و كل سنه و انتو طيبين مع عيدكم المتاخر ده |
ووووووووووووووب ناس الليل ظهروا
رحاب كيفنك ياخ
وكل سنة وانت طيبي ونصيحي
وياسين مليان في العافي يا رب
وحاتك الله سترنا مع الفلاتة حقننا ديل
وعيدنا بكرة الاربعاء
قربنا نبك عدييييييييييييييييل
| |
|
|
|
|
|
|
|
|
|
Re: حكاوي حبوبات وجلاكيم (Re: طارق جبريل)
|
مشتاقين وكل ما الشوق يزيد يكبر
بتجري دموعنا تتقطر
ونذكر زمان ولي
ونحنا صغار مع الحبوبة في بمبر
تحجينا وتحكيلنا
عن فاطمة السمحة وقصص عنتر
واهيم في الذكري واتخيل
كيف حالكم طفولة برئه في المهجر
لا حبوبة تحكيلكم وتهدهدكم قبل النوم
وفي الصبحية تطعمكم لقيمات حلوة بالسكر
ويملاء صياحكم الأفاق وكت كباية تتكسر
وتنهركم وترجع تاني بتحنان تراضيكم
تخاصمكم ؟؟ محال تقدر
ومشتاقين بالأكتر ومشتاقين كمان اكتر
| |
|
|
|
|
|
|
|
|
|
Re: حكاوي حبوبات وجلاكيم (Re: عامر تيتاوى)
|
امانه ماك حكاى
اتذكرت حبوباتنا فى بربر
لكن حبوبتك
الله عليها
كنت قد كتبت دراسة عن المراة فى رواية الطيب صالح
تحديدا شخصيات (فاطمة بت جبر الدار ، حسنى بت محمود، بت مجذوب)
ولكم اجد تشابها كبيرا بين نساء الطيب صالح وحبوبتك ان صحت العبارة
لكن
يبدولى ان نساء السودان يلتقين فى هذه (الكاريزما )
لانهن حفيدات الكنداكات
ونساء السودان معروفات بالاعتداد بالذات
وهذا سر لا يدركه الا من خبر نفسيتهن
عذرا لهذه الاطالة
لكن حديثك اشجانى
شكرا لك صديقى الاسفيرى وكل عام وانت بالف خير
| |
|
|
|
|
|
|
|
|
|
Re: حكاوي حبوبات وجلاكيم (Re: سلمى الشيخ سلامة)
|
سلمى بت ناس سلامة
كل سنة وانت طيبي ياخي
وعقب زي ماك عايزي
تعرفي انا حبوبتي دي ان بقيت حكيت الشي الشفتو معاها
والله علي اطلعلكم 20 رواية
بس للاسف لا املك ملكة السرد والحكي
غايتو البقدر عليهو بنزلو ليكم هني
واقبلوهوا علي علاتو
تسلمي يا زيني
| |
|
|
|
|
|
|
|
|
|
Re: حكاوي حبوبات وجلاكيم (Re: محمد صالح علي)
|
رائع يا طارق ...
كلما أقرأ ليك أحس
بطعم البئية السودانية,
فأزداد فخرا بسودانيتي.
واصل مساردك اللطيفة,
فبالأمس عوض والليلة نفيسي
ويا بختنا ... متعة مجانا.
... وكل سنة وإنت طيب
| |
|
|
|
|
|
|
|
|
|
Re: حكاوي حبوبات وجلاكيم (Re: HAYDER GASIM)
|
حبيبنا حيدر وليد قاسم
كيفنك يا دوخرينا
وكل سنة وانت طيب
وينعاد عليك بالعافي التخصك في المصارين
حكاوي نفيسي لا تنتهي
مشكلتي انه عندها شي فاضح آآآبيتحكي هني
تراني بحاول معاها والله يرحمها ويسترنا
| |
|
|
|
|
|
|
|
|
|
Re: حكاوي حبوبات وجلاكيم (Re: طارق جبريل)
|
أخييييرن ... يا تاريخ جبرين
ظللت أنتظر هذه السلسلة حتى كدت أيأس.
سمعت كثيراً من قصص آل "القرونة" هذه التي تحاكي الأساطير، من طلحة أخيك قبلُ... ومنك شخصياً.
ولا أملّ.
ربما كان في كل قرية في شمالنا نسخة من بت مجذوب. نسخة معدّلة : تطرّفاً أو اعتدالاً.
هناك ... حيث "عند العيايز ... كل شي يايز".
| Quote: عندها حكاوي صعب تحكيها هني |
ولهذا أتحرق شوقاً لأرى كيف ستلتفّ على هذه الصعوبات، وكيف ستتحايل على مقص الرقيب في حكايات بت بُغداد.
أجمل ما في حكايات هؤلاء النسوة هو عدم التحرُّج هذا، والعبارات التي يطلقنها بدون سابق إنذار، فيربكنَ مخاطبهنَّ ويشللن حركته.
أحكِ يا صديقي، إنا هاهنا قاعدون
وعواشر مبارِكة
| |
|
|
|
|
|
|
|
|
|
Re: حكاوي حبوبات وجلاكيم (Re: محجوب البيلي)
|
محجوب ود منصوركوتي
تعرف وكتين تضيق بي الدنيي
اقعدلي في ركن من البيت واتذكر نوادر ((القرونة)) و((البغاديد))
شي عايشتو براي وكنت شاهد عليهو وشي حكوهو شهود تانين
الشي المحيرني الناس هسي هرونا عن الحداثة وحقوق المرأة
والشي دة وكتين تسمع حكاوي نفيسي يمين تقول الزولة دي ونديداتها سبقن زمنن
الله يرحمن كانن نسوان ماهن ساهلات
والله يقدرني علي الشي الما بيتحكي هني
| |
|
|
|
|
|
|
|
|
|
Re: حكاوي حبوبات وجلاكيم (Re: showgi idriss)
|
مقطوع الطاري ابو الشوش
يا حبيبنا كل سنة وانت بالف خير
وعيدك مبارك عليك
انا بس داير اعرف انت قاعد تغتس وين؟؟؟؟
المنين آآآآيابا عند المغاربة ديل وين القاهو ليك
غايتو الكعك راقد ان بقيت دايرو
| |
|
|
|
|
|
|
|
|
|
Re: حكاوي حبوبات وجلاكيم (Re: طارق جبريل)
|
بس للاسف لا املك ملكة السرد والحكي
علي هامانك آاا فرعون؟ نان منو البملكها؟؟
يا زول أحكي وخلينا نحن النقول بتعرف والا لأ
_____
كل سنة وإنت طيب ياخ .... ويتبارك عليك العيد
| |
|
|
|
|
|
|
|
|
|
Re: حكاوي حبوبات وجلاكيم (Re: طارق جبريل)
|
دكتور طارق
كل عام وانت والاهل بخير
نضممك ..حلو
حُكاك .. شخوصك ..قُراب
اهلك وأهلي..
والله اكاد اشُم عبق البادية في حُكاك
بالله عليك كتر وأفض...
وطلب خاص ..(حتي احكيها) قصة فاطنة القصب اللحمر
معتصم العربي
| |
|
|
|
|
|
|
|
|
|
Re: حكاوي حبوبات وجلاكيم (Re: طارق جبريل)
|
(2) بت جعفر في (((الغاغة)))
- ابراهيم: عمتي لا تخفسيلك خفسي بعدين بجي اوديكم عرس الزين في القاعة
- سمح آآآولدي الله يعدل ختوتك
- انت ان جيت آآآطارق ولدي.. الزين دة هوول منو واكنها الغاغة دي شًنها
- ايي الشي ماهو عرسا بالجد الشي في السينما
- ايي اخوك قالي عرس الزين تقولي سينما
- عمتي بعدين بتفهمي لامن نمشي هسي عندي تمرين اللحلو قبل ما يجي ابراهيم
- سمح انا زاتي بقيت ازوزي اللاخدلي غمدي
..................
- يلا عمتي قومي البسي توبك النمشي نحضر عرس الزين
- سمح كدي النصلي المغرب وآخدلي سفي ونمشي
- طيب يكون الباقين جهزوا
وصلنا القاعة ونحن داخلين عمتي شافتلها واحدا لابسلوا بدلة بنية
- عمتي: انت آآآطارق الخرابة اللابس بني علي الكُرجي (طائر بني) ياهو العريس الزين...
- عمتي قلتلك قبيل الشي سينما
- نان العريس الغبيان دة مالو مدردر الناس في الحتي البعيدي دي اصلو جنب بيتهم مافي فسحي يسولون فيها صيوان ويعلقولم فيها السعون فشان ألمي البارد (الموية)
- والله يا عمتي انت حجتك كتيري خلاص لامن ندخل وبتفهمي
- أي كدي انت مالك حديثك بقى مسيخ كدي
دخلنا القاعة والانوار منورة والسجاد والموكيت احمر والدنيي هايصي نسوان ورجال وشباب وهيلمانة....
- عمتي وااااااااسجمي انت ناس العرس ديل جابوا الرتاين السمحات ديل من وين.. الله يعلم من ولدوني ما شفتلي رتاين متل ديل في بلدنا
- عمتي الشي ماهن رتاين الشي انوار بالكهرباء
- دة الكلام باقيلي العريس اهلو منغنغين وشامين عافتم.. واكنو شنو الشي الناعم الاحمر العلي القرمصيص والناس ماشيت فوقه بي نعالهم دة..
- دة موكيت وسجاد آآآعمتي ماهو قرمصيص
- يعلم الله يا ولدي انا بي حموريتو دي قايلاهو قرمصيص... والناس ديل مالو عرسهم كُتور كدي النسوان منجعصات في وسط الرجال كدي...
- انت لليلي ماك دايري تقتنعي الشي ماهو عرسا بالجد
شويتين قعدنا في الكراسي قامت عمتي لكزتني:
- ان جيت مالم ما قدمولن شي الناس ديل لا مويتا باردي لا كعكايات نتصبربهن لامن يختوا عشاهن..
- سمح يا عمتي اصبري بعد شويي بتفهمي الحاصل شنو وفي الاستراحي بنجيبلك الاكل
شويتين طفوا الا نوار والفليم بدا وعمتي تنقنق من الرتاين الانطفن ديل..
لكزتها: فهمتي
- شيتكم دة لا بيتفهم لاني فارزاهو... نسوان منجعصات وسط الرجال ورتاين يبقن وتاني ينطفن وتلفزيون كبير قدر الديوان
- انا قبيل ما قلتلك الشي سينمي انا قعدتي تقوليلي كلامك مسيخ
شويتين الفيلم بدا وجات لقطة فيها ممثلة بتدخن...
- هي سووووووووووووود علي.. ودي مِني دي يا دا المنطلقي دي وتدخن قدام خلق الله كدي
- عمتي الشي تمثيل قلنالك
- حتى ان بقى تمثيل دا منو الراجل الدِلِق دة المخلي مرتو تدخن قدام خلق الله كدي... شوفلي سفي انا اتكهربت خلاص... شفت الراجل اب فقهي القدامنا دة شفتو قبيل مرقلو حُقة ألت صعوط..
اديناها سفي وتاني رجعت تربرب:
- انت دة منو البوم الفي التلفزيون عامل سيقانو علي السنبريي كدي (تقصد علي مهدي في شخصية الزين)
- دة الزين بطل الفيلم الدايرين يعرسولوا
- تدفني يا طارق... الولد العوير دة ديارين يعرسولوا البت السمحي دي (تحية زروق)
- أييي يا عمتي
- الله بيسألني ناس الخرطوم ديل ماهن نصاح... كيفن ولدا عوير متل دة يعرسولي بنيتا سمحي زي دي
- الله اداهو نسويلوا شنو
انتهي الفيلم وطلعنا ولليلي هي تنقنق:
والله سوات التاباني والياباني.. هسي اخوك جايبنا من البيت للحتي البعيدي فشان نشوف الولد البهيمي دة... باقيلي دفعلو قروشا كتار
- اي قروش قدر الفني
- والله ماهو نصيح.. ان كان سوالنا بيهن كرِقي في حوش ابوك دة ما كان اخير
| |
|
|
|
|
|
|
|
|
|
Re: حكاوي حبوبات وجلاكيم (Re: طارق جبريل)
|
قبل يومين السر قدور حكي قصة عائشة الفلاتية مع المذيعة المصرية أماني ناشد التي قدمت الفلاتية في البرنامج بأنها أم كلثوم السودان.. فردت الفلاتية: " إنتي با دي قاعدين تقولوا لأم كلثوم فلاتية مصر؟؟"
| |
|
|
|
|
|
|
|
|
|
Re: حكاوي حبوبات وجلاكيم (Re: السمؤال بدرالدين)
|
حبيبنا السمؤل
يا يااابا عيدك مبارك وسعيد عليك
وان شاء الله الحاجة طيبي ونصيحي في عضمها دة
الله يعلم مشتهنك
واصلو ان كان للسودان دة يوم العيد ابى يجمع معاي كله كله
دحين سامحنا يا الزين
| |
|
|
|
|
|
|
|
|
 Re: حكاوي حبوبات وجلاكيم (Re: طارق جبريل)
|
ازيك يا طارق
والعيد مَبارك عليك انت وزوار / ات بوستك
بوستك دا اخو بوستي الليل الحدسة اطول من العمر
حتى شوف الشبهة
تقول تيمان
لكن كلام الحبوبات والجدود والجلاكيم
ما منو شبع
وياريت لو كان في تؤام ابو سبعة داك للبوست دا
| |
|
|
|
|
|
|
|
|
|
Re: حكاوي حبوبات وجلاكيم (Re: طارق جبريل)
|
(3) الطيب ود موسى وود مدلهم
- تعرف يا طارق ولدي عمك ود مدلهم دة كان مصيبة الله يرحمه
- كيفن يا عمي
- انا وهو كنا شغالين في الصنادل البتمشي بين كريمة ودنقلا
- اها
- ويا ولدي حياتنا كلها عديناها مع التمُر
- كيفن يا عمي
- النهار كله نحفر تحته ووكتين تليل نصلي عشان ونطلع علي حريم العرقي
- هههههههههههه اصلو تربكم دة يا عمي جنو جغمي
- ايي يا ولدي ان بيقنا ما جغمنا آآآبنرتاح
- دحين عمي وداعة الطلع فيكم زي جدي
- أيي عمك وداعة رحمة الله عليه كان جنو قرآن زي جدك
- هي لكن يا عمي انت جدي دة موش كان بيأم الناس في الخلوة
- ايييي
- نان كيفن كنتوا بتجغموا وانتو اولاده
- يا زول الجغمي دة ماهو دايرلو سبب كدي خلني اللحكيلك قصة ود مدلهم
- اها
- يوم سافرنا في الصندل لي ضنقلة والدنيي كانت برد شديد خلاص
- ايي برد الشماليي كعب
- يمين يا ولدي برد ان طلعت اصبعك ينقطع... المهم ود مدلهم جاني في الصندل كان عندنا فيهو اوضة ننوم فيها
قالي قوماك نشوفلنا عرقي في البلد الفقر دي...
اها قمنا لقيلانا اندايي كدي وكنا شايلننا قريب فروت... وحاتك يا ولدي ود مدلهم دة كبا العرقي في كوريي وبقى يعصري
فيها القريب دة... والخرابة قوي يمين قشر القريب بي منجل ما تطلع منه نقطايي..
سكرنا زين وشلنالنا نص في قزازي وجينا راجعين نغني في الطريق
- اها
- قام يا ولدي علي التعترنا قابلنا ليك بوليس اصلي زي لياقتو (من لايووق) ما شفتها
- وداكم الحراصة
- قعدنا يا ولدي نحنس فيهو... ابى كله كله... اديناهو جنيه.. حرن كله كله... قلنالو خلاص شيل النص دة عليه العوض ومنه العوض
اصلو ابى يتفاهم كله كله... اها قام عمك ود مدلهم قالي تكفتو ولا اكفتو انا
- لا حولاااااا يا عمي دايرين تكتلو الزول
- نان يا ولدي ما جننا جن.. قلت لي ود مدلهم ان بقيت كفتو انت بيموت خلني النكفتو انا
- اها وكفتو
- لا جينا جنبب بيت كدي ونسمع ليك الناس يتونسوا بالحيطة... قام عمك ود مدلهم شالو ورماهو ليهم بي فوق الحيطة
- ههههههههههه يا عمي دة شغل مجانين دة
- نان منو القالك نحن نصاح... النصيبة يا ولدي قام لاقانا واحدا تاتي ليهو تفي كدي
- بوليس تاني
- ايي ليهو تفي كدي علي الاشميق... برضو يا ولدي محنا محاين
- اها وساقكم للنقطة
- لا ما شهدناهو
- كيفن؟؟؟؟؟
- ود مدلهم قالي المرة بكفتو... مسك القزازي الفيها النص وقشطو في كتفو
وكان اسمعلك يا ولدي كررررررررر في ترقوة الراجل وبدا يكورك
- هههههههههه غمتو يعني
- ايي يا ولدي لامن حنيت عليهو
- اها وشن سويتو تاني
- قمنا جارين علي صندلنا وفي الصباح قالولنا لقولم بوليس غمران وعضامو راقدات خل
- اها شن حصل
- يا زول الصندل قام في نفس اليوم وتاني ما جبنالو خبر
رحمة الله عليهم الاتنين
| |
|
|
|
|
|
|
| |
طارق جبريل
انعام حيمورة
حيدر حسن ميرغني
Rihab Khalifa
omar arbab
عامر تيتاوى
سلمى الشيخ سلامة
HAYDER GASIM
محجوب البيلي
showgi idriss
Hassan Makkawi
محمد احمد سنهورى
محمد أبوالعزائم أبوالريش
معتصم عبدالرحيم
طارق أحمد خالد
السمؤال بدرالدين
الجندرية
Khalid Osman Jaafar
Ibrahim Mohamed
هاشم أحمد خلف الله
انعام عبد الحفيظ
فيس بوك
تويتر
انستقرام
يوتيوب
بنتيريست