دعواتكم لزميلنا المفكر د.الباقر العفيف بالشفاء العاجل
|
|
 من كلام شعراء الحقيبة....اهداء لمعز وشعراء البورد
|
--------------------------------------------------------------------------------
عمنا الخليفة يوسف الحسن (والد حسن وحسين ابو العائلة) كان يجلس فى دكان
التيمان فى امدرمان وكانت له عصاة جميلة فنساها فى الدكا ن ولما رجع لم يجدها
كتب عمنا الخليفة يوسف ابيات فى فقد عصاته وشاطره معظم شعراء الحقيبة
فى فقده ذلك حتى نالت العصاة شهرة لم تسبقها اليها الا عصاة سيدنا موسى
فماذا قال اولئك العظماء:
اولا قال عمنا الخليفة يوسف:
فقدك يا الرفيقة زادنى هم ووبال
ختيتها فى دكان مقدد تقول غربال
اوصيك احترس اوعك تخت ليك فيه حبال
كان قايل سيدو واعى وليهو خاتى البال
الشاعر على محمود التنقارى:
عصاية خيزران جات من بلاد الريف
وصاحبها من نشأ قدال عفيف وظريف
امير الشعراء ما بقول الشعر تخريف
لو ما القدر عصاة يوسف بتسرق كيف؟
الشاعر عمر البنا :
سراق عصاية يوسف الرزيلة طباعو
ان شاء الله يعيش ناقص مقصر باعو
عينو تنقد وينشل يمينو ضراعو
ورقبتو تنحنى وتنزل تحت لى كراعو
الشاعر محمد بشير عتيق :
مولاى رجولتو يخنثه...... ودايما يحيض زى النسا
لاشك هو للرحمن عصا بل يستحق رجم الحصا
سارق العصا وفارسه من بدرى حارس قانصة
هو للجرائم مدرسة والسرقة من اهله وارثه
صبرا اخى رب وعسى تأتيك مصانة مقدسة
مولاى ينجيك من اسى ويجزيك من الخيرات كسا
انت الخزين ضو المسا وانت الحنين ساعة القسا
شعرك طرايفو مجنسه زى درر عقود امات رسا
الشاعر سيد عبد العزيز :
يوسف ليهو حق على العصا ينحسر
زى عصاة موسى الكلامه مفسر
ان ضربت حديد الصلب لان اتأئر
وان ضربت جبل انهد جانبو اتكسر
قول للسارق الاثم سرقت النار
عصاتنا بنظبطه فى ليلنا ولا نهار
اوعك لاتنوم خليك دوام مسهار
يوم نلقاها فى ايدك داك يوما حار
الشاعر عبيد عبد الرحمن :
وافانى الخبر يا صاحبى يوم الجمعة
والناس فى المساجد للصلاة مجتمعة
قالوا ابو الحسن فقد العصاية ام لمعة
ذات الاعتدال رمز المتانة ومنعة
نعوها الشعراء قبالى وانا جيت معاهم انعى
اواسى صديقى فيها بالشعر المجافى الصنعة
الشالها يشيلو الموت بطىء السرعة
الحرامى الجبان اب قلبا مطفطف مرعه
يحفى... يعمى ..يشحد يمد القرعه
خاتمة حياتو الموت المعاهو الصرعه
سوف اعود لمثل ذلك مرة اخرى وهو فى شعرهم كثير و لكم ودى
|
|
 
|
|
|
|
|
|
|
|
Re: من كلام شعراء الحقيبة....اهداء لمعز وشعراء البورد (Re: صديق الموج)
|
صديق الموج الرجل الرائع روعة تراثنا الثر
الرجل الموسوعة فى الفن الشعبى
لك منى التقدير والعرفان وشكرا على هذه المساجلات الجميلة ولا شك انها تعكس صداقة الشعراء فى تلكم الفترة ووقوفهم مع بعض ومواساتهم لبعضهم البعض فى أصغر الأشياء بعكس ما عرفناه من شعراء الجاهلية الذين كانوا يهجون بعضهم كثيرا فى معظم القصائد
شكرى الخاص لمساهماتك الجليلة فى البوست خاصتى الذى طلبت فيه بعض الاغانى الشعبية لبادى وعوض الكريم عبدالله وعبدالله محمد وأرجو أن تراجع ردى لك فى البوست المعنى.
| |
|
|
|
|
|
|
|
|
|
Re: من كلام شعراء الحقيبة....اهداء لمعز وشعراء البورد (Re: فتحي الصديق)
|
Quote: أستاذي العزيز صديق
لك الود والتقدير وأنت تنقب وتبحث في تلك الدرر الرائعات التي خلفها المبدعون00
أقرأك كثيرا يا عزيزي ومعي الكثيرون0
شكراااااااا |
فتحى الصديق شكرا ونحن المحتاجين ليكم تقرونا عشان
قاعدين نشوف فى عيونكم نحن كتبنا شنو ..تسلم انت والكثيرون
ولك صادق ودى،،،
| |
|
|
|
|
|
|
|
|
|
Re: من كلام شعراء الحقيبة....اهداء لمعز وشعراء البورد (Re: حمزاوي)
|
يا صديق الموج....تلاقيهم قالو كلامهم دا في قهوة وخالفين كرعيهم
بلاي الناس ديل مش العظماء المثلو اعظم جيل ...رحمة الله تغشاهم جميعا
اها نعوس نحن عوسنا في عصاية عمك يوسف
خيزرانة وسمحة...ولونها زي القمحة
الخفاك في لمحة...يفقد يكتب ويمحي
العصي المتبوره..ولينه كالفي قصوره
يا الحسن قوم سوره بي اواخر السورة
بسمل بالخبير الجامع المحيط سر الكون وقدرو
السراق تعيقو تقوم تنشل ايدو والعصاية تغدرو
تدخل بي كراعو وتمشي لا عند صدرو
والاسعاف يكوس لي النفس ما يخبرو
بواصل ليك فيها لامن ارجعها ليك من البوليس بعد ما يودو السراق دا
المشرحة ويقيف فوقو عقيل ود ناس سوار الدهب ويلقي العصاية مكتوب
عليها اسم عمك يوسف ويرجعها ليه....قصرت معاك يا صديق والله قصرت
مع العصاية؟
| |
|
|
|
|
|
|
|
|
|
Re: من كلام شعراء الحقيبة....اهداء لمعز وشعراء البورد (Re: luai)
|
يا سلام يا صديق ياخي
تشكر على هذه الواحة الظليلة ولحظات الأنس الحافلة بمقدرات هؤلاء العباقرة
والحقيقة ذلك العصر تميز فيه الشعراء بسرعة البديهة وجمال الصور الشعرية برغم بساطتها
وكذلك بما تحتويه من معاني سامية جميلة «حتى لو في العصاية»..
شكراً ليك حبيبنا الغالي انت وإهداءك لينا بالدنيا والله العظيم
يا الما بتشبه ناس هناي داك.. 
| |
|
|
|
|
|
|
|
|
|
Re: من كلام شعراء الحقيبة....اهداء لمعز وشعراء البورد (Re: صديق الموج)
|
شقيقى الاعز ابو حيدر كل يوم يصبح يزداد فخرنا بيك انت اصلك رائع اصالة عمى الطيب وذى ما قال فيك الطيب صالح انت خترى مرة واحده وذى ما قال سيدى الصادق الامام انت مخزن فكاهة والتى هى ليست لعبا .انت رائع كده لانك احمر لون الشفق واصفر لون المنقا ورائع لانك من الغبش اهل الصالحية الله يديك العافية ويمد فى ايامك نفاخر بك
مهدى ابو شفق
| |
|
|
|
|
|
|
|
|
 Re: من كلام شعراء الحقيبة....اهداء لمعز وشعراء البورد (Re: صديق الموج)
|
والله يا الموج بحرك دميره وتمساحك عشاري.... الشئ إنت مولود فى الهوبجى وتقول من المدينه خبارك....من الله خلقك شفت لك زول مدينه بلحسلو مكوه حاره....والله بقيف لبه لى صوت عنسيت.... هناك بلحسو الايسكريم وبشربوا المليان وبجدعوا الفاضى....بعدين الشرف الماسكك شنو بتسال من قبايل الصره وابوصره.... المهم بنستمتع بكل ماتكتب قاعدين نبراك وين ما ركيت بى قفاك توش.... بعدين العصايه عديلك ما حضرها ياخوى إنت رضعتك حبوبتك والله حكايتك شنو
منصور
| |
|
|
|
|
|
|
|
|
|
Re: من كلام شعراء الحقيبة....اهداء لمعز وشعراء البورد (Re: صديق الموج)
|
Quote: يا صديق الموج....تلاقيهم قالو كلامهم دا في قهوة وخالفين كرعيهم
بلاي الناس ديل مش العظماء المثلو اعظم جيل
...رحمة الله تغشاهم جميعا |
نزار حسين......... اب كلاما زين.........الما بسوى الشين
ياخى دى طولة كعبة...
وبعدين شغلك قطع اخدر ده سمح بلحيل وماك اقل منهم تسلم،،،
| |
|
|
|
|
|
|
|
|
|
Re: من كلام شعراء الحقيبة....اهداء لمعز وشعراء البورد (Re: صديق الموج)
|
Quote: الشال العصايا انشاالله ربى يشيلو
الزول كيف بشيل الحاجه ماها الليلو؟
عصاة يوسف يمين ما بتتوزن بالكيلو
فيها مآرب أخرى والخل بعود لخليلو |
هشام تسلم وشغلك نضيف ..لكن يا اولاد الخرطوم امانة ما حناكيش
طبعا قلبك توزن البيت الثانى ..اها عاد النوريك بوزنو كيف
الصحيح:
الزول كيف يشيل الحاجه الماها هيلو
مش ماها الليلو ...انا متاكد وقفت فيها مية مرة
وغلبتك ..يا حنكوش ..لقيتنى كيف ماياها البدور ليها
كان تسال النخيل بالتلفون يا جبان
| |
|
|
|
|
|
|
| |
صديق الموج
Mamoun Zain
فتحي الصديق
يازولyazoalيازول
THE RAIN
Elawad Eltayeb
طه حسن عبدالله
luai
Dr. Moiz Bakhiet
عبد المنعم سيد احمد
munswor almophtah
waleedi399
محمد عبدالرحمن
فيس بوك
تويتر
انستقرام
يوتيوب
بنتيريست