دعواتكم لزميلنا المفكر د.الباقر العفيف بالشفاء العاجل
|
|
 انا كرهت السنى دفع الله جنس كره....خطاب برسم المحبة اليه واليها؟؟؟؟؟؟
|
السنى اللطيف احكى ليك حكاية..وعشان تقع ليك.(الجاية دى معلومة خليها فى الهامش
بتنفعك فى مستقبل السرد)..انا ومحمد نعيم سعد دفعة فى مدرسة المشاه
الابتدائية..يعنى كده عرفت العمر..ومرة ونحن فى بيت الامانة الوسطى
وعاملين بنحب والوكت داك انتو طالعين فى الكفر ...وفى بنية نص المدرسة
كل زول مفتكر هى بتحبو ولا اخفيك سرا(انا احد هولاء الداقسين) والبنية
تلاقى اى واحد من الطلبة توزع ليه نضم بكميات تجارية..وكمان
اجوادة تعطى بسمتها من يشتهيا والجماعة يجو يحكو وكان ذلك يورقنى. ولاننى كنت افتكر
نفسى مجنون ليلى تلك لانها تزيدنى منهم بان كانت تنفحنى بعض خطابات ووحاتك
مرات بكون محضر الرد قبل ان يصل الخطاب(الله يخلى مؤلف كتاب كيف تكتب
خطابا.فكم الف به قلوبا)....والى الان انا ممتن للبنانيين الكانوا بكتبوا مثل تلك
الكتب ،حتى فى محنتهم الاخيرة انا متعاطف معاهم عشان كتابهم داك.
المهم نحن جنب مدرسة بيت الامانة وجيتو مارين انت ومصطفى وعميرى وعبد الحكيم الطاهر
وكنت انا محضر بسمتى وشعورى وخطاب للبنية سهرت فيه الليالى وكتبته بى( 3)الوان
ويشهد الله كم عانيت فى الحصول على ذلك القلم الذى كلما ضغطت على زر يعطيك
لونا مختلفا ونقلت الخطاب اكثر من اربعة مرات وحشدت فيه جنس ورد وجنس قلوب
والله جزار ما يكون عندو قلوب قدر ديك..وتجى البنية واخوك قلبوا يضرب وبتخيل
كيف حا يكون وقع الخطاب عليها..وعندما ظهرتم انتم ..اسمع ليك البنية تكلم
احد صويحباتها(الله يجازى صويحبات يوسف) وتقول ليها داك السنى كان يوم الخميس
فى عرس بت خالتنا وسلمنا عليه والله ظريف خلاص واتونس معاناوضحكنا ضحك ..قامت صاحبتها
قالت ليها ياتو فيهم؟..قالت ليها الوسيم اللابس قميص بلو كاروهات ..قالت وسيم
قالت!!رددتها بين نفسى زى خمسمائة مرة وانا حانق..وحاتك يا السنى ساعتها كنت شايف
ود ام بعلو جنبك فيه الهوادة قالت الوسيم داك!..وقاموا اسرعو الخطى نحوكم ولما لم تعيروهم قليل اهتمام قاموا قالوا ليكم ازيكم..ورد احدكم بتواضع اهلا مرحب احسسته مصطنع وزايف وكان الامر لايعنيكم(والله ماعارف الرد فيكم منو ..هو انا الساعة ديك بشوف ماالحمد لله السمعت)..ورجعت بخيبتى وخطابى داك وقطعتوا فى حنانى وانا اردد مع نفسى حا اوريك ليها بت اللزينة وسامة الزول السمين ابو شلاضيم ده..قالت الوسيم ابوكاروهات بلو
قالت!! والله دى وسامة ودى كاروهات..واخوك قافل منها كم يوم كده قامت يوم تعمدت
او (تخيلتها هكذا) انتظارى وقالت لى مالك انت فى شنو؟ وقمت قلت ليها انت ماعارفة
يعنى؟ قالت لى ماعارفة؟..قلت ليها تذكرى يوم ناس محطة التلفزيون الاهلية؟ قالت
لى فيها شنو كان سلمنا عليهم؟قلت ليها السلام هين انت ما متذكرة قلتى لى صاحبتك
شنو عن الزول المتختخ الاسمو القشرى ده؟..قالت لى ديل ما ممثلين ساكت ..وحاالاقيهم وين تانى وهسع لوانا قلت ليك معجبة بمحمود يسن او نور الشريف انت تقوم تزعل؟ ..قمت قلت ليها وينو نور الشريف ووينو محمود يسن ؟السمين الزى الدب ده زى نور الشريف؟(بينى وبينك لماقالت لى ديل ما ممثلين ساكت وزى اختصرتكم كده الحكاية دى زى ريحتنى شوية)ولكنها لم تشفى غليلى..قامت قالت لى والله لو تانى جابوه فى التلفزيون انا مااعاين ليه
الاسمو السنى ده (كضب السواد)..اها دى زودت الراحة عندى حبتين..وبعد داك سالتنى
عن الخطاب..قمت قلت ليها شرطتو..خلى السنى يكتب ليك..وهى تحنس فينى وانا مصر على ان الخطاب كان قريب الان فى كوشة الجبل والبنية تتوسل وانا ازيد عناد (والحكاية
دى كانت مرضية غرورى تماما) قالت لى ياخى ما تفكنا من حكاية الزفت الاسمو القشرى
ده..لانى انا مستعجلة وماشة جيب الخطاب او ما حا تشوفنى تانى قمت خفت لما احسست فى حديثها الاخير من اصرار بالغ. قلت ياولدالسنى يطير فى السماء ماهى قبيل قالت ليك حا اشوفو وين تانى يعنى بت خالتها حا يعرسوها تانى؟..قام اخوك زى الضب جرجرالخطاب من جيبو ودساهوفى يد البنية مع ضغطة حارة فى يدها..(لا اخفيك سر كانت من نوع الضغطات التى توشك ان توجب الغسل)..ومن يومها يا السنى السمح داير الاقيك واقول ليك..وما لاقى فيك كده... البركة فى النت الذى جعل ذلك ممكنا.
السنى تلك وايم الحق كنا ايام سمحات خلاص وكان ذلك منسجما مع منطق الاشياء يومذاك..وكان ده سبب الزعل وسبب الرضا بين الناس قبل ما نجرب الزعل من الحيكومات
والكفلاء وما اليهم..وبتناالشتات فى الارض نشكو من ظلم الغربة وذوى القربى..
وياحليل كان والتى صارت مما يوجع القلب كلما اتينا على ذكرعهودالسودان النواضر...
لك الود اضعاف ما كرهت وسامتك وقمصانك الكاروهات ايام زمان،،
|
|
 
|
|
|
|
|
|
|
|
Re: انا كرهت السنى دفع الله جنس كره....خطاب برسم المحبة اليه واليها؟؟؟؟؟؟ (Re: صديق الموج)
|
| Quote: قلت ياولدالسنى يطير فى السماء ماهى قبيل قالت ليك حا اشوفو وين تانى يعنى بت خالتها حا يعرسوها تانى؟..قام اخوك زى الضب جرجرالخطاب من جيبو ودساهوفى يد البنية مع ضغطة حارة فى يدها..(لا اخفيك سر كانت من نوع الضغطات التى توشك ان توجب الغسل)..ومن يومها يا السنى السمح داير الاقيك واقول ليك..وما لاقى فيك كده... البركة فى النت الذى جعل ذلك ممكنا |
والله يا صديق انت رجل جميل جدا برغم الفليق الكتير الفي راسك يا خال
لحدي الاقتباس اعلاه نحن كويسين والسني بعد كلمتين حنان جابت كثافتك بقي جميل وما اصلو هو جميل وطبعوا الخجل ...
والكلام ده كلو حصل بعد عرس بت خالتها وقبل الشاكوش
تم الحكايةوكملها كلها وخلي الجرسة يا صديق ياخي وكلنا اتشوكشنا في الدنيا دي
| |
|
|
|
|
|
|
|
|
|
Re: انا كرهت السنى دفع الله جنس كره....خطاب برسم المحبة اليه واليها؟؟؟؟؟؟ (Re: munswor almophtah)
|
منصور مفتاح ليك حق
كل الجمال والبهاء والشعر
عرفت جايبو من وين !!
السروراب الأرض لونه زي لونكم
وكريمة اتعلمت الكرم منكم
نرجع لي موضوعنا..انت الموج دفعتك لايكون ولايستوي !!
نحن حسبنا لي محمد نعيم الأماكن الدرس فيها ليقنا عمرو زي 44سنة الكلام ده في السبعينات ،،
جاي هسه ناكت ليه حكايو من الثمانييات عامل فيها بحب وبجكس من هو صغير والحقيقهالوقت داك نحن كنا مراهقين عباقرةوهو عجوز فالبت الحلوة شافت وقارنت وفي النهاية اختارت الشباب ال هو انا واعوذبالله من شر انا المهم الحكاية دي حتطول ونحن ما نسبق حكاية عمنا ود الموج الأزرق اصلوا الأيام دي اي حاجة فيها موج قايمة وهايجة يلا طلع المخبى وانت يا مفتاح اطمن حتعرف العمر الحقيقي للديناصورات الموجودة هنا كلها ...
ونواصل الكراهية...
| |
|
|
|
|
|
|
|
|
|
Re: انا كرهت السنى دفع الله جنس كره....خطاب برسم المحبة اليه واليها؟؟؟؟؟؟ (Re: حيدر حسن ميرغني)
|
Quote: (الله يخلى مؤلف كتاب كيف تكتب
خطابا.فكم الف به قلوبا)....والى الان انا ممتن للبنانيين الكانوا بكتبوا مثل تلك
الكتب ،حتى فى محنتهم الاخيرة انا متعاطف معاهم عشان كتابهم داك. |
أقبض يا حمزاوي .. أتاريهو زولك بشف .. وأقرأ البوست ده .. تلقى منصور
المفتاح يثبت ليك بالدليل القاطع أنو صديق الموج أكبر من الكسرة ..
يعني لو قبلنابيهو جد متقاعد لبورداب الرياض نكون ما قصرنا.
| |
|
|
|
|
|
|
|
|
|
Re: انا كرهت السنى دفع الله جنس كره....خطاب برسم المحبة اليه واليها؟؟؟؟؟؟ (Re: صديق الموج)
|
الموج والله أنا عاوز أعرف حاجه إنت قبل ما تجى محمد حسين وبعد ما خلصت بيت الأمانه كنت شغال وين لأن كلامك جد محير نحن كنا أطفال محمد نعيم سعد وبدر الدين شنا ياتوننا بالسروراب لمحمد عوض سيد أحمد كيف الزمن يمر بسرعه وأكون خلفك بثلاثه سنوات فقط فى محمد حسين بعدين القلم الكتبت به ذلك لم أستخدمه إلإ فى الجامعه إنت يا صديق مولود بسنونك...................................
منصور
انا كنت بشتل بطاطس فى الشهيناب..طبعا يا جماعة منصور كان ورانا بى سنة
لكن اولاد السروراب ديل كانو بودو الخضار الملجة ويستلموا الحساب من الخضرجية
والحساب كان بالمئات ونحن الوكت داك كان دايرين يدوك جنيه تفكو برسلوا معاك
الخدام..غايتو قراية مجانى سوتا فينا..اها لمتنا مع اولاد الاقاليم..يعنى
نحن لما كنا فى الروضة الواحد عندو شنطة جلد وشنطة بلاستيك للساندوتش وزمزمية
للموية،وناس منصور بشربوا حلوقك وكراع ابوك فى الجنة من المزيرة..ده الفرق
بينا وبينهم،،،
| |
|
|
|
|
|
|
|
|
 Re: انا كرهت السنى دفع الله جنس كره....خطاب برسم المحبة اليه واليها؟؟؟؟؟؟ (Re: صديق الموج)
|
بشربوا حلوقك وكراع ابوك فى الجنة من المزيرة..ده الفرق
بينا وبينهم،،،
صديق الموج أى أقاليم تتحدث عنها يا من جاء من حجر الطير ضهارى الجعليين ويصنف أبناء السروراب أقاليم...نحن العاصمه أمها وأبوها يالموج ولمن كانت تأتى بكم اللوارى من السافل وتقف بالسروراب لتملأوا القربه وتجدعوا مامات من الدجاج وترشوا ما تبقى بمياه زمزمنا أو على رحل الحرجل والجردقه عندما تصلوا السروراب تقولو دا ودنوباوى....صديق إنت مصيبه ولا يمكن يكسب معاك حد........................................
لك وللاسره التحايا ولاتدعهم يفتنوننا
منصور
| |
|
|
|
|
|
|
|
|
|
Re: انا كرهت السنى دفع الله جنس كره....خطاب برسم المحبة اليه واليها؟؟؟؟؟؟ (Re: صديق الموج)
|
Quote: جاي هسه ناكت ليه حكايو من الثمانييات عامل فيها بحب وبجكس من هو صغير والحقيقهالوقت داك نحن كنا مراهقين عباقرةوهو عجوز فالبت الحلوة شافت وقارنت وفي النهاية اختارت الشباب ال هو انا واعوذبالله من شر انا المهم الحكاية دي حتطول ونحن ما نسبق حكاية عمنا ود الموج الأزرق اصلوا الأيام دي اي حاجة فيها موج قايمة وهايجة يلا طلع المخبى وانت يا مفتاح اطمن حتعرف العمر الحقيقي للديناصورات الموجودة هنا كلها ...
ونواصل الكراهية... |
السنى انت زعلت والا شنو..القصة دى مافى التمانينات دى فى الستينات
لاحولا...قال اختارت الشباب وحاتك يا الستى انا ماما ما كانت بتخلينى
احضر سهرة محطة التلفزيون الاهلية الا بعد ازاكر دروسى واطلع هدوم الكورة
واستحمى والبس البجامة واشرب الحليب..وانتو رجال كبار تمثلوا مع البنات
قال اختارت الشباب..يا يمه اضان الشباب طرشة،،
| |
|
|
|
|
|
|
|
|
|
Re: انا كرهت السنى دفع الله جنس كره....خطاب برسم المحبة اليه واليها؟؟؟؟؟؟ (Re: صديق الموج)
|
صديق الموج
صديق العمر الجميل
الله لاجاب الزعل وشنو البزعل ؟
الحقيقةعمره ما تزعل
النصيحة ليك ، انا من صغير كنت برمي في الشوك ن حتى مره في بت جات البيت وملانه شوك
أمي ربنا اطول في عمره قالت لي البنات طلعوا الشوك من جسمة وما تحرجوها بألأسئله
بكون لاقت السنى بره !!!
وحياتك القميص هو السبب كان عاجبني وكنت بلبس معاه بنطلون يا لبني يازرق غامق
انا بعتقد القميص هو السبب ؟؟؟وبعدين اتو رجعتو لي بعض ولاالحكاية اتفركشت بعد داك ؟؟؟
| |
|
|
|
|
|
|
|
|
|
Re: انا كرهت السنى دفع الله جنس كره....خطاب برسم المحبة اليه واليها؟؟؟؟؟؟ (Re: صديق الموج)
|
Quote: صديق الموج
صديق العمر الجميل
الله لاجاب الزعل وشنو البزعل ؟
الحقيقةعمره ما تزعل
النصيحة ليك ، انا من صغير كنت برمي في الشوك ن حتى مره في بت جات البيت وملانه شوك
أمي ربنا اطول في عمره قالت لي البنات طلعوا الشوك من جسمة وما تحرجوها بألأسئله
بكون لاقت السنى بره !!!
وحياتك القميص هو السبب كان عاجبني وكنت بلبس معاه بنطلون يا لبني يازرق غامق
انا بعتقد القميص هو السبب ؟؟؟وبعدين اتو رجعتو لي
بعض ولاالحكاية اتفركشت بعد داك |
السنى الحبوب...
هو قميصك داك بخلى الزول يرجع تانى...اى والله كان ماتشنغ مع بنطلون ازرق غامق
هو فى الحقيقةكان(بنطون)ما بنطلون... ماانت كنت ماكن ورايق وانا بالى مشغول.
الله يديك الصحةاضعاف ما ادخلت البسمة على قلوب الناس. وبرجع ليك لحكاية البنية بعد شوية،،،
| |
|
|
|
|
|
|
| |
صديق الموج
تولوس
محمد سنى دفع الله
munswor almophtah
بدرالدين شنا
Hussein Mallasi
خدر
حيدر حسن ميرغني
Mohamed Abdelgaleel
فيس بوك
تويتر
انستقرام
يوتيوب
بنتيريست