2006 : كانت بوابات العام تنغلق بصوت كئيب . وكانت السنة تحل ضفايرها وهي تبكي .. أحزان كتيره تملأ الفؤاد .. والعمر زهرة دبلانه ومفطورة ..
في وسط الإنشغال الشديد بالحزن بتجي حاجات زي الأغاني تكحل عيون القلب .. وينتابك من جديد أمل وتكتشف إن الطفل الفيك لسه صاحي ولسه مليان بالرغبات والأحلام ..
الحاجات دي التي تشدك من وسط ذهولك ممكن تكون صورة فوتوغرافيا عرفت تلتقطها لبنت حلوة ، او جواب قديم وجدته فأضاء في عتمة الذاكرة مليونين شمعة ونيف ، أو ضحكة شاردة من إبن أختك الصغير غطت على كل العتمة الجواك .. أو إحتمال إنك تتعرف على ناس حلوين حاملين معاهم أحلى ما فيهم : مشاعرهم .. ناس مليانين باللطافة والحسن والطيابة والنظر السديد ، تسلم على الواحد منهم فتشعر إنك عايز تلحس أصابعك .. ناس مدموغين بآدميتهم وخلاص ، ربنا نحتهم نحت من جبل أحلامه بحياة زاهية وملونة ..
من الحاجات الحلوة كان إني شفت البنت الإسمها ننسي عجاج تاني ، وسمعت صوتها على الهواء مباشرة فساحت مغاليق الحال عندي وإنبسطت ! كما إني فرحت لرؤية منير في الخرطوم بعيون لسه فيها اللمعة إياها ..
12-21-2006, 04:10 PM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
شكرا يا عمر على المعايدة والصور . من فواكه هذا العام إندماجي أكثر في محبة التصوير .. وعنايتي بتوفير وقت اكبر له .. وبعدين وجدت في التصوير ده حلاوة ربما لا تدانيها حلاوة(ولله في خلقه طبعاً شؤون).
كل سنة وإنت طيب ..
12-21-2006, 11:20 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 10986
أتذكر كل محاولات التعارف كانت بتبدا بتحب منير !! ياصاحبي المشرووق احساســو،بأهات الشتاء مالك علينا مصحي فينا شجن الذكريات كنا بنسمع حليم وتينا تشارلزوالموسيقى الكلاسيكية في معالجتها من خلال الألآت الإلكترونية لم نكن ندري ان ضربات القدر عند بتهوفن والتي تحولت الى مقطوعة صغيرة مبهرة سوف تحول انتباهنا الى مغني يغنى من قلبه أغاني طفولته وبلده المنسي بين اثار اجداده ملوك النيل ..اعطيتها السيمفونية ( القدر ) كعادتي عندما اقابلها اهديها جزء من احساسي جزء من نفسي ، وحينما استرد عطيتي ، تهديني جزء من احساسها وبصدق دون ان نقول كلمة واحدة عن الحب ، كنت احسها في نبضي وحينما أغفو وحدي ،بعيدة عني ، وريح الشتاء تسكن اطرافي ،أبحث عن دفئيها احس تنفسهايداعب جفوني اصحو واصرخ ليها في جواي وبستغرب بتسمع كيف ؟؟ رجعت لي الشريط ومعاه البوم تاني !وقالت لي : سمعت منير ؟ وبدت حكاية .... معليش ما قادر اوصل
12-22-2006, 09:26 PM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
يعلم الله يا محمد السني أنا سعيد كيف بمعرفتك ، كانت دي برضو من الأحداث الجميلة في هذا العام .
كنت يا صديقي العزيز عايز أكتب ليك عن الطفولة السعيدة التي عشتها بين بلدين ، لكن بس الأرشفة وما أدراك ما الأرشفة !!
تعرف ، منير ده بشدني لصوته نبرة الحنين العالية المرشوقة فيه . لمن أسمعو بأشعر طوالي إني في حالة حب شجي وصاحي .. كمان بحب شديد حالة الحرية والإنطلاق البيتعامل بيها مع نفسه ، وده عشمي في الفنانين عموماً .
كل سنه وإنت أجمل يا السني .
12-22-2006, 06:50 AM
abubakr abubakr
تاريخ التسجيل: 04-22-2002
مجموع المشاركات: 16044
تعرف يا طلال الولد دة لما عرفناهو كنا اطفال بنسافر لام الدنيا وهو كان طفل والرطانة كانو بيتقابلو بسهولة في ذّاك الزمن البعيد وكبر وكبرنا واختلف واختلفنا وزعلنا مرات منو وبعدين غلبنا .. اليوم وانا اقراء في جريدة الصباح ارقام اجور الفنانيين المصريين واللبنانيين وشمال افريقيا في حفلات راس السنة ا التي وصلت في اقلها الي 7 الف دولار لواحد غير مشهور واليسا 40 الف جاء في الخبر "اما محمد منير فهو المطرب الوحيد الّّذي ينصف الشباب الفقير وكعادته سيحي حفل راس السنة في دار الاوبرا المصرية حيث يتراوح سعر تّكرة حفله بين 25 و30 جنيها مصريا ويشهد حفله اكثر من 30 الف من جمهوره الذي ينتظره دائما في البرد القارص حتي مطلع الفجر ويتواصل معهم في سيمفونية حب وطرب جميل للشباب المطحون الّذي لا يستطيع دفع 2000 جنيه ثمن تذكرة الفندق ويكون منير هو المتنفس الوحيد لهم " ولد ولدنا صحيح لا شق ولا طق ...
(عدل بواسطة abubakr on 12-22-2006, 06:52 AM) (عدل بواسطة abubakr on 12-22-2006, 06:54 AM)
12-23-2006, 09:49 AM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
أجمل ما في الأمر يا أبوبكر أن منير في العادة بيأتي إلى حفلاته متأخراً ( عشان الإستعدادات ) وينشغل الشباب والحضور الغفير عن تأخره بغناء مشترك لأغانيه ، وتكون هذه الهيصة حفلة لوحدها .
منير الآن هو الصلة التي تربطنا بالعم صلاح جاهين والحاج أحمد منيب وبعبد الرحمن الأبنودي وعبد الرحيم منصور ؛ هو االرابط بين النزق الطفولي والمزاج اليساري والتفاصيل الشخصية الخاصة الصغيرة ..
كان من المفترض أن يحضر معنا الكريسماس في الخرطوم لكن ظروف إجرائية منعت الحكاية دي ؛ خسارة مش كده ؟
12-21-2006, 11:07 PM
عبد المنعم سليمان عبد المنعم سليمان
تاريخ التسجيل: 09-02-2006
مجموع المشاركات: 12158
شكراٍ يا سعد على التحية .. وكل عام والبشرية كلها بخير وعافية ..
لو تسمح بس قبل ما أمشي أحكي ليك : في صوت نانسي سر عجيب ، إنت بتكون عارف إنو ما صوتك ، لكن حالة أشبه باليقين بتخليك بتعتقد إنها بتغني ليك .. صوت هذه البنت زي الفراشة بيشيل ويحط من شجنك على ألمك ، ومن ألمك على ذكرياتك ومن ذكرياتك على عشمك في الحاضر السعيد ..
في حضرتها تشعر يا سعد بحالة نادرة من الصفاء والإنسجام ..
ولو ممكن كمان من هنا أبعث ليها بكل التحايا محل ما هي في الدنيا وإنو ربنا يفتح عليها أينما حلت ..
12-21-2006, 11:33 PM
Adil Osman Adil Osman
تاريخ التسجيل: 07-27-2002
مجموع المشاركات: 10208
مساء الخير يا طلال .. كلماتك في ليل الشتا , طعمها دافيْ .. و صديقة .
Quote: عينك ، قلمك ، عذوبة نثرك ، وعشقك للحياة رغم الظروف
صدق عادل .. من وين بتجيب كل الكنز يا زول يا أجمل .. ؟ كل عام و إنت بخير .. و على خير . كل سنة يا طلال و إنت .. مجنون و عاقل و متماسك .. و ( غريق ) . ...... ملحوظة ( على طريقة عمنا الأبنودي و الأسطى حراجي القط ) : نهارنا زي بعضه يا واد يا طلال , البنت نانسي - و الله أعلم - فيها شي من سعاد حسني .
في عشق البنات يا عادل ! وفي عشق هذه الحياة تورط قلبي الصغير الذي هو بحجم قبضة يد .. ليس لي في الأمر حيلة ، وسامح الله أسيادنا الشعراء والمغنين على تأجيج نار الهوى فينا .
منير ، يغني دائماً لبنت اعرفها جيداً ، لحبيبتي التي أشتاق لها .. سندني غناؤه أياماً وليالي وفتح علي شبابيك الأمل . سيظل صديقاً لي ولقلبي ( لغاية ما أكبر ) ..
12-24-2006, 02:47 PM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
سلامات يا عماد .. التعرف إليك وإلى كتابتك من الحاجات المريحة التي عبرت بي هذا العام .. أحببت ذلك الشيء المتوهج الدسم في حكاياتك . أنا بعتز بيك جداً يا عماد ..
ولغاية ما نشوفك خلينا على كده
12-24-2006, 02:52 PM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
كل عام والجميع بخير ومحبه .. أعاد الله علينا بلادنا وعمرنا المفقود ورفع عنا حزننا ..
أتمنى أن يتوالى علينا ما تبقى من زمن ، وروح حبيبنا المسيح قوية فينا ومتمكنه من مسارات العالم .. ليكن يومها عالما للخير والسلام .. يسكنه أطفال آمنون وبنات رافلات في العشق ورجال محترمون .
طلال ذو الاحساس اكان كلمة او لقطة حكاية.. او لوحة تكثفها حد الوصول تملاها باختصار حد النضج
كم اختصارك ومض وهيج.....
اقرؤك كثيرا ولكن تصعب المداخلةمن الجمال والكثافة... كل سنة وانت تنسكب القا وتحمل روحك هذا الشجر المورق ذو الفاكهة والازاهر....
.... في الحياة انت وفي الأغاني وفي كراسة الحنين برتقال للعشق وخطوتين على جسر الأماني ليل تهيؤه السماء للانوار الغانيات...للغيم المثقل بالبشرى لرقص الأرض كم هناك مازال من عرس خرافي في الحياة مازال حلم يقين ان تطهر الأرض...ان ترجع عن غيها ان تعود لرشدها ان تبرأ من هذا المرض اللعين ثم نبتل مطرا يعود للهواء رئتيه وللضفائر براءتها وللتاريخ حكمته وللشوارع والأزقة احاديثها الحنون
كل عام ونحن طيبين نغتسل بالشمس حين مخاض النهر في اسرابنا آمنين
.... محمد منير في صوته شلالات من الحنين والشجن نايات تعرف كيف تغني الحزن كيف تخطف من القلب آهه وتهديه موج جريء
وفي وجه نانسي كل ذلك الضجيج المتحفز شديد الدفيء والفوضى..انوثة ناعمة ناهيك عن صوتها المدن....
شكرا طلال....
12-25-2006, 04:00 PM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
سلامات يا ريل .. توصلك وإنتي بخير وتمام التمام . تختفين وتأتين كل مره بكلامك الجميل ؛ كلام بيخلي الواحد منبسط وشاعر بالتواصل مع الناس وبأن الحلم على عمومه حلم مشترك ..
أمس كانت إحتفالات الكريسماس في الخرطوم ، قابلت أصدقاء شربنا شاي عند ست شاي ، زرنا بعض الأصدقاء وعايدناهم ، إقتربنا من كنيسة سان ماثيو المطلة على النيل ، ثم قبل إنتصاف الليل كنا قد تبعثرنا عائدين إلى بيوتنا .. مش حاجه غريبه ؟؟
كل عام وإنتي بخير ...
12-22-2006, 05:06 AM
Soumeta Soumeta
تاريخ التسجيل: 10-17-2002
مجموع المشاركات: 1733
إنشرحت روحي و إنزوت نوافذ القلب الحزينة و بمتعة الله و العالمين قرأت،، و حمدته انك هنا،، فأنت تكتب بريش الارواح وحبر البهجة،، فتتطاير المحبة حولنا ،، لكل شيء،،
شكراً طلو،،
12-25-2006, 04:41 PM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
البنت ...اول مرة سمعتها في الانترنيت في حفلة في باريس لمجموعة من السودانيين ..الزحمة وصوت الاطفال واسلوب بعض السودانيين في الونسة بينما المغني يغني لم تسمح لي بالاستمتاع او السماع كما يجب ... في العيد الماضي استمعت اليها في التلفزيون .. ّتبدو واثقة وذكية وذات طلة -وجه هادئ صبوح- تجبر علي الاحترام ..تختار ما يناسب وجدانهامن القديم لتغنيه ..تغني لنفسها اولا وللمستمعيين .. تطرب ّّّذاتها باقتناع ينعكس ايجابيا علي تطريب المستمع ... تحتاج الي جمهور يسمع اولا ( يعني مش الببشرو والمتحركيين من طاولة الي طاولة ) ...وتحتاج كثيرا كثيرا الي من يكتب شعرا لها هي خاص بصوتها واسلوبها وملحن موسوعي متجدد يستوعب جدا تراكمات الابداع الغنائي السوداني مر العقود وقادر علي ترويض صوتها وامكاناتها حتي لا يتعرض هدا الصوت الي ما تعرضت له اصوات تصنف ضمن درجة صوتها في بلاد اخري تغني بالعربية كمصر الي الانزواء او بقاء اكاديميا ...ويبقي وجداننا الذي قبلها من اول استماع هو جمهورها في كل الحالات
(عدل بواسطة abubakr on 12-22-2006, 07:45 AM) (عدل بواسطة abubakr on 12-22-2006, 07:46 AM)
12-25-2006, 11:54 PM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
الفرقة بين كل مبنى وتاني من المباني الاربعة التي تشكل العمارة الكويتية للناظر اليها من الكبري بتعمل شكل صليب ..(واضح تماما في صورتك اعلاه في المبنيين الاخيرين)
ومن زاوية اخرى في نهاية كبري الحديد وانتا متجه الى بحري بيكون الصليب في اعلى البرج بتاع الكاتدرائية الخلف العمارة الكويتية منطبق تماما على الفرقة التي تشكلت في شكل صليب بين مباني العمارة الكويتية.. ..
تلك من اساطير محمد الفاضلابي ..ونحن على كبري الحديد..
بالنسبة لي صورة عجاج
ياخ البت دي اضافة الى انها غناية.. فهي سمحة شديد.. شديد عديل كده..
انا في اخر اغنيات ليها اكتفيت فقط بالنظر.. وفي صورتك هذه حمدت الله كثيرا على نعمة النظر..
12-22-2006, 12:17 PM
Kamel mohamad Kamel mohamad
تاريخ التسجيل: 01-27-2005
مجموع المشاركات: 3181
المبدع طلال عفيفي لك التحية والتقدير نتابع بإهتمام هذا الجمال وهذا الألق ودائما ما تأتينا بالجمال وتذكرني بإبداع إيزابيلا (د.شذي بلة محمد) وبينكما قاسم مشترك ربما يكون الروعةوالإبداع و إلي المزيد من الألق والجمال
12-22-2006, 04:34 PM
Aymen Tabir Aymen Tabir
تاريخ التسجيل: 12-02-2003
مجموع المشاركات: 2612
البت الحديقه نانسي اجمل حاجه تسمعها من غير ايقاع مصاحب عشان تحلق بيك لمدن ساكنه وبعيده والاكتر من كده خليه بحكيهو ليك قدام -- لكن لو لقيتها فييوم واقفه في مطبخ بتسوي في ملاح تقليه... حلفها بالله تدندن بشجن وبعدها ولي المسـاء ولو بكيت انا ما مسئوله!
لك الود طلال
01-01-2007, 10:34 PM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
من معالم الخرطوم المحببة إلى قلبي وروحي .. فيه نسيم أيام كانت القطارات تأتي فيها مدمدمة ببخار أقوى نقابات الشرق ، وعلى الجسر ممشى جميل ينفع للعبور والحب وقيادة الدراجات . جسر طيب وإبن ناس ، جاء من الهند أيام كانت جوهرة التاج البريطاني ؛ فربط بين ضفتي النيل الأزرق ، لتملأ البلاد الحركة والتنقلات .
أما الكاتدرائية ، فإرتباطي بها يا دكين ، عظيم ؛ إذ تجاورها واحدة من أعظم مدارس البنات في بلادي .. مدرسة كان فيها مسقط قلبي ومهوى فؤادي . كنا نلتقي تحت اشجار نيمها بحبيباتنا الصغيرات بشعورهن المضفرة بالشرايط الحمراء والبيضاء ، واجسادهن رافلة في المرايل اللبنية المسبعة عند الصدر الجميل .. كنا يا دكين نحمل إليهن الخطابات المشحونة بالعاطفة والهوى الجياش ، وبالسهر وقِل النوم .
كبرنا .. لكن قلبي مازال يدق كلما رأيت الصليب ..
ونانسي ؟
اما نانسي ، فأكثر ما يشدني إلى هذه البنت وصوتها ووجها هو ذلك الإستغراق العجيب الذي تغوص فيه حين تغمرها الاغاني . تشعر نفسك ملفوف في دوامة من العشق والذكريات ن وتسري فيك تلك الرعشة الخفيفة التي لا تعرف سرها ..
12-26-2006, 12:11 PM
طلال عفيفي طلال عفيفي
تاريخ التسجيل: 06-20-2004
مجموع المشاركات: 4380
الود منير وعمايله في الروح عارفنها الكلام البت ، البت السواد يا طلال اشهد ان لا اله الا الله محمداً رسول الله
لي زمن بشوفها ، وشفت ليها صورة في سودانيات
لكن اسمها الفيهو ( طباق تام ) مع نانسي عجرم دا عقدني منها وما قدرت اسمعها الليلة لما فتحت بوستك وشفت الصورة سحرتني كميرتك ، ودخلني صوتها وهي تصدح بعازة خليل مشيت سودانيات تاني ونزلت كل اغانيها واتسلطنت مع شجن ياسلااااااااااااااام ياخ ممنونة لك على هذا الفتح العظيم
12-24-2006, 02:58 PM
خضر حسين خليل خضر حسين خليل
تاريخ التسجيل: 12-18-2003
مجموع المشاركات: 15087
محمد منير يا السني ، أحلى عمايلو إنو ما بيكبر على القلوب ، دايماً قدرها وعند حسن ظنها .. الولد النوبي صديق حكايات الناس ، الشاهد على اللوعة والحب والفراق ولمسة اليد الأولى الصابر على التحولات القادر يغني كأنو لسه مولود يادوب .. يا سلام يا سني على منير ورفقته الأمينه لنا ؛
طلال ياولد دايما بتجرح وقار شجنا!!لأنك بتنظم في خيط واحد زول زي حسين شريف ونانسي عجاج ومنير وللثلاثة وجع خاص في عصب ذاكرتي..استمعت لمحمد منير بسينما النيل الازرق بالخرطوم ايام زمان واحسست بغربة خاصه ماتزال تصاحبني..جلست في حضرة الوان حسين شريف بالقاهرة ولذت بالصمت..داهمنى صوت نانسي عجاج في (الوسط الغربي الامريكي بمدينة ممفيس)وكنت متسكعا بين الزنوج الـمرميون من امثالي نلتاك (لبانة)التاريخ الاسيف وكنت اغني معها(ولي الـمساء)..لقد بهرجت عصبي ياطلال
12-26-2006, 12:32 PM
Hussein Mallasi Hussein Mallasi
تاريخ التسجيل: 09-28-2003
مجموع المشاركات: 26230
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
طلال عفيفي
رشا سالم
mamkouna
omer almahi
محمد سنى دفع الله
abubakr
)
عبد المنعم سليمان
saadeldin abdelrahman
Adil Osman
Emad Abdulla
Soumeta
Kamel mohamad
Aymen Tabir
لؤى
الجندرية
خضر حسين خليل
عصام عبد الحفيظ
abdalla elshaikh
Hussein Mallasi
تيسير عووضة
فيس بوك
تويتر
انستقرام
يوتيوب
بنتيريست