|
|
 الوافر شيخ الدين و كمبلا في الخرطوم ...
|
قبل أيام ، وصل الخرطوم مجموعة من المبدعين تعود جذورهم إلى بلاد مختلفة
في جغرافيا العالم ، إلتأم شملهم تحت إسم " كمبلا " وهو إسم الفرقة الموسيقية
التي يقودها الفنان الأريب الوافر شيخ الدين .
غادرت هذه المجموعة تباينات اللغة والثقافة إلى محطة فسيحة من التلاقي ،
فكونوا فرقتهم التي يعبرون بها الأنحاء ويجوبون بها البلاد حاملين رسالة
بسيطة تنم عن الموائمة والسلام .. مبشرين بإمكانية التعايش والإبداع على
خلفيات متباينة ومختلفة .
تتكون الفرقة من أخينا ناردي الكوبي ، وعثمان المغربي ، وإلهام السودانية
وعازف الدوناب السينيغالي ، ومعهم الشاب العبقري الوافر شيخ الدين .
الفرقة قدمت عرضاً موسيقياً طريفاً ومنوعاً بين أغاني الصوفية والحماسة وجبال
النوبة والوسط بشكل غني برز فيه عنصر التوزيع والأداء السولو الفريد لكل
عازف .
شكراً لهم إذ أضفوا على ليل الخرطوم شوية أغاني وثياباً مزركشة وأحلام .
|
|
 
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
كانت ليلة لطيفة (إستعنا بها على وعثاء السفر)، رعتها السفارة
الأسبانية، وإستضافها مسرح مركز راشد دياب بمدينة الجريف .
السفير الأسباني في تقديمه للفرقة للفرقة .
الراهب
الوافر شيخ الدين ، طفل الموسيقى الجميل .
ناردي
ولدنا، الكوبي عاشق الترومبيتات والصفافير
أطال الله عمره .
عثمان
إلتقيته في القاهرة أول أمري ، وبعدين في الخرطوم ،
وكل مره بحس إنو المزيكا حاجه تمام !
زولنا السينغالي
وأهم درس في الدنيا : ما تنسى إسم زول !
إشتغل على الحفلة إشتغال العارف
يا سلام عليها :
إلهام عبد الخالق ...
صوت ووعي صادقين ، بيفتقدهم السودان
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
الوافر شيخ الدين ليس مجرد موسيقي حسب ما عرفت من معاشرته ،
هو إنسان بيبحث عن التكامل بين الإبداع الفني والسلوك ، ويمكن
ده هو الذي جعله موسيقي أخاذ .
بيتحرك على الآلات الموسيقية من ناي وعود وأكورديون وطبلة ورق
بمنتهى الحنان ، وكأنو يمسك بين يديه وليد إبن يومين .
تجربة الوافر في التوزيع والتلحين والغناء تجربة فريدة لأنها
بتعتمد كثيراً على الأداء الذاتي وعلى الإحساس الداخلي .
تشعر ، وأنت تستمع إليه ، أنه ينصت .
فتسأل الله أن يفتح عليه.
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
ناردي كاستليني !
لم يختلف إحساسي به حين إلتقيته في القاهرة ومدريد
والخرطوم ...
كان في المدن الثلاث عالياً وعظيماً بصوته المبحوح ..
دافئاً كإبن العم ، وموسيقياً بإمتياز كأستاذ .
هذه ثاني زيارة له للخرطوم التي أعتقد أنه أحبها
كما أحبته بعد أن بعثر فيها من هواء رئتيه ذلك
الصفير الشجي ..
يعمل ناردي هذه الأيام - ومنذ زمن - عل تجميع
التراث الموسيقي النوبي وتسجيله : رحلة سعيدة .
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
وأنت ؟
يا عزيزي المنسي في زحمة الأسماء ؟
جئت للخرطوم وأنت تشبه الناس ، فنسوا إسمك !
فتأمل أي خيانة يا صاحبي ، واغفر .
كان أداؤك على المسرح - ليلتها - رهيباً، فحركت
الناس ، وهم من مدينة لا تعرف الحركة كثيراً .
تعال مرة أخرى ،
لنحبك أكثر .
| |
|
|
|
|
|
|
|
|
 Re: الوافر شيخ الدين و كمبلا في الخرطوم ... (Re: Hussein Mallasi)
|
سلامات يا طلال,,,
ياخ الخرطوم تحدث فيها اشياء عجيبة!!
يوم مصطفى السنى ويوم وافر شيخ الدين!!
إلى أن آتيك بالموسيقى الحية!!
هذا كان غلاف أحد ألبومات مجموعة
الوافر وكان عنوانه Nilo Azoul
وعلى ما اعتقد أنهاتعنى بالعربية
النيل الأزرق او ما شابه وكم أدهشتنى
وأمتعتنى موسيقاهم,,شباب فنان
وتجرى الموسيقى فى دمائهم !!!
سلامى وإحترامى الوافر للوافر شيخ الدين وعصابته,,
*أين صور العصافير يا طلال,,(بيت ناس عمك عاطف)!!منتظر
وإستأذن لينا من الأستاذ الوافر فى إنزال بعض أعماله هنا إذا
مافى مشكلة.
ايمن,,,
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: أيمن الطيب)
|
في الحقيقة يا ايمن موضوع العصافير "طار" من راسي ،
يا ريت لو ذكرتني 
زي ما قلت "نيلو أزول" معناها النيل الأزرق في الأسباني
وهي مجموعة تسجيلات موسيقية بديعة بتقدر تحس فيها شغل
الوافر الماهل على الآلات المختلفة بالإضافة لصوتو الرائع .
شكراً يا أيمن .
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: mamkouna)
|
يا طلال
خساره يا اخي
اتصلوا بي ناس اثق بهم واعلنوا لي
ان الوافر شيخ الدين يقود حوارت مطوله
بغرف البالتوك يدافع فيها عن هذه الحكومه
ويتعلل باسلامه!!
يا الوافر لما ترجع اعلن عن غرفة حوار وبنجيك وبنشوف
الاسلام البيبح لك قتل المسليمن واغتصاب جرائرهم ده ياتو
اسلام غير اسلام الجلابه!!
هو الاسلام الذي تخلى معتنقيه عن جوهره وتفرغوا لعرقيتهم.
اسبانيا التي احتضنتك وحمتك لم تحميك لاسلامك
وانما حمتك لانسانيتك.
يبقى حق الحياة يجب ان يكون مكفولا لكل البشر
وسقوط اخلاقي لفنك ان تقول بغير هذا.
كنا نعتقد تفلتات ( تبارك) هي الهفوة ولكن يبدو ان المصيبة اكبر
ويبدو ان( مواقف تماضر المشرفه ) فقط هي الطفرة لكم يا آل شيخ الدين
ننتظر بيقية طبظات العقد الفريد! ليفتوا لنا عن مدى شرعية المذابح في بلادنا.
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: Tragie Mustafa)
|
تراجي العزيزة ...
الوافر صديق عزيز وإنسان محترم وقد عاشرته وتعرفت عليه بعمق ،
هو إنسان متصوف ومتدين ولديه إرتباط روحي بالحياة ، وهو إلى
جانب ذلك إنسان منفتح ويحترم خيارات الناس ويعتقد بشكل عملي
في أهمية التواصل الثقافي وإحترام الآخر ، ولم يرد إلي أبداً
خلال نقاشاتنا المطولة أنه يدافع عن الإنقاذ ، بل وليس فيما
توسمته فيه أي نزوع لمحاباة أي شمولية أو قهر .
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: mamkouna)
|
يا حليلك يا ممكونه ، والله انا زول عجيب ..
لكن لسه عندي فضول لموضوع الرجله البايته .
مشتاقين كتير والله ليكي وللممكون الفاضل .
ناردي ده لمن بفكر فيهو بتخيل إنو عندو
رئتين قايمه فيهم نباتات متسلقة وطالعه
من أنسجتا ورود.
ربك يزرع فيهو البركه.
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
يا سلام يا طلال .. كان يوم ...
والله انا لي هسى اليوم دا مؤثر فيني ...
وكل ما اتذكر حركة الوافر (ببل اصبعوا ويطلع صوت من الرق) حاجة عجيبة !!
وادهشني بي كمية استعماله للالآت !!
وحركة عثمان بدور بي طاقيته ..
والسنغالي بجنن ليك الدرمس جن عجيب
اما رقصة (الجالوا) بتاعت ناردي عجبتني شديد ولما كلمتو عن الجالوا ما عرفا ..
اما الهام دي بخليها براها .. حميمية لقاءها كان طغى على صوتها ...
والفراشة بت شيخ الدين (اميمة)مش ؟؟!! لما مسكت الطبلة بقينا دراويش ..
وكاااان نفسي القى رشا شيخ الدين عشان بحب صوتها من زمن اغنيتهاالاشتهرت بيها (عزارى الحي) !!
الله يخليهم كلهم للابداع ياخ ..
شكرا طلال .. انا فرحت انك هناك عشان نشوف الابداع دا
| |
|
|
|
|
|
|
|
|
 Re: الوافر شيخ الدين و كمبلا في الخرطوم ... (Re: انعام حيمورة)
|
الأستاذ طلال عفيفى والسادة الحضور
شكرا جزيلا لهذا الجمال المنثور عبر الفن والإبداع ، فالوافر وصحبه الكرام لا شك يتحدثون بلغة الموسيقى ويخاطبون كل القلوب السليمة
أختى تراجى
لماذا تتهمينا (بالطبيز)؟ ، نعم نحن إخوة أشقاء منتشرون فى كل بقاع الأرض ، ربانا الوالد رحمة الله عليه بطريقة ديمقراطية عالية الجودة فنشأ بيننا اليسارى واليمينى والإسلاموى والجمهورى وخلافة وكل ألوان الطيف السياسى ، وحتى عندما نتحاور سويا نقوم بإحترام آراء وتوجهات بعضنا البعض بإعتبار أن ذلك تم بقناعات شخصية (عالية الجودة) أيضاً وتستحق الإحترام ،
ما يقوله الوافر أو تبارك أو تماضر تمثل وجهات نظرهم الشخصية وهى بلا شك تجد كل إحترام من جميع أفراد الأسرة ، فإذا ما قال الوافر أن النظام الإسلامى الموجود الآن فى السودان نظام جيد ومقنع بالنسبة له ، فما الذى يزعجك فى ذلك؟ لماذا ترغبين فى تسييس الفن؟ ولماذا تحجرى عليهم العمل برايك فقط ومحاربة نظام الإنقاذ بإعتباره قتل وشرد الناس فى دارفور؟ ، لماذا لا تنظرى للناحية الإيجابية المتمثلة فى مبادرة السودان الحالية وسعى السودان الجاد والحثيث عبر أبنائه والوطنيين الحادبين على السودان وأرضه من الضياع والشتات والتناحر؟ لماذا لا تشاركى أنتى أيضا فى هذه المبادرة المتاحة للجميع وتنادى بوضع السلاح وتدويل المسألة؟ لماذا يا تراجى لا يكون السودان ووحدته ونشر السلام هو هدفك الأسمى؟
أعلمى يا تراجى أنك بمثابة صديقة عزيزة لى وأعلم كذلك صداقتك الحميمة بتماضر ونحن أبناء وبنات شيخ الدين نعتبرك صديقة الأسرة ، ما فى ذلك شك ، فلا تعكرى صفو صداقتنا بوجهة نظرك السياسية تجاه حكومة السودان
عايزة ليك طبيز أحسن من كدة؟
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: يازولyazoalيازول)
|
هشام شيخ الدين يا غالي انت يا ابو نبراس
اولا انت رغم انصاريتك الا انك لم تطرح نفسك يسياسي بهذا البورد.
وبتعرف تان بخش بوستاتك وبكوس لك وبعتبر ورحي صديقتك منبريا غصب عنك.
تجربتك يا هشام كمغترب تختلف من اي لاجئ
لكن اي لاجئ لا نقبل منه هذا.
وصدقني الامر لا علاقة له بدارفور
الامر له علاقة بالاخلاق....وبعدين الموسيقي و الآداب وتعاطي النساء لها كلها تدل
على ان لكم قيم اسريه مختلفه هي محل احترامي فما الذي حدث لبعضكم؟؟؟؟
وبعدين يا حبيب كتابات زي كتابات تبارك وزي ندوات الوافر شيخ الدين
بغرف البالتوك هذه تنقلهم من مجرد مواطنين لمنطقة الفعل النشط سياسيا
اي هم يرغبون في تغيير انماط تفكير محدده لمصالح طوائف سياسه محدده.
اها انت يا هشام بجلالة قدرك يوم طبظت لك طبظة هنا عجيبه فيها دلالات عنصريه
وقبلنا اعتذراك حولها......انك معدنك يقول رجل طيب وربما ضحيه لكل التنميطات الثقافيه
القام بيها ثلاث ارباع شعبنا.
لكن زي الوافر
وزي تبارك اتيح لهم الاقامه ببلاد مختلفه
عرفوا ثقافات وامم متحضره
وعرفوا معنى حياة البني آدم
بغض النظر عن لونه ودينه
وجدوا حمايه بقوانين البلاد التي طورها اهلها العلمانين
فشملتنا بخيرها....لم يكسروا القوانين لاجلنا ويطردونا بعد ان طبظ بن لادن طبظته
بل لازلنا نقيم بينهم ونتمتع بكل حقوقنا.....فكيف ينتكس اخوتك هؤلاء باقوالهم
لمفاهيم جدا عظيمه وكيف يدعمون انظمة هم هربوا منها.
لماذا يعود الواثق محمي بجوز السفر الاسباني
ما كان يرجع بالسوداني ويشوف الرعب البيعيشوه يوما ابناء شعبنا ان خالفوا الحكومه
معقوله بس يا هشام
كل زول طابق له جوز سفر مختلف ومحمي بسفارة بلاده
ويجي ينظر للسودانين؟؟؟
طيب ما يقعدوا في السودان ده بيرجعوا يسافروا ليه؟؟؟؟
وما تنسى يقعدوا فيه وبعملته المحليه
وكدي النشوف الفاصحه دي آخرتها وين.
النظام الاسلامي البيدافع عنه الوافر ده
ماكان يقعد ليه يمكن كان اقاموا فيه الحد باي تهمة ولا اقاموا في رشا حد الجلد ايام بجلدوا في بنات الناس لانهم ما محجبات.
العالميه الوصل لها دي
بفضل الغرب الاقام فيه
الغرب الطور قوانين عادله غير عنصريه وغير جندريه
مش يبرطعوا بهناك وبعدها ينظروا للناس يقول لهم البقاء في عصور الانحطاط الثقافي محمدة.
يازول مبروك عليكم الديمقراطيه الاسريه
لكن تماضر هي الوحيدة المتسقه مواقفها
مع حياتها و التحيه لكل القيم الخيره التي هي تقف لها.
على الاقل محال نقدر نقول عليها انتهازيه.
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
الاخ طلال
ياريت تفيدني هل الاخت الهام مازالت موجودة ولا رجعت مسقط ولو امكن طريقة اتصال بيها؟؟
حقيقي اتاسفت انه ما سمعت بالعرض ده الا في هذه اللحظة من البوست
التحية لهؤلاء المبدعين
وحقيقي الفنان ناردي والوافر شيخ الدين مبدعين جدا حضرت ليهم عرض في مدرسة kics
مع الفنانة رشا شيخ الدين وما زال جمال ذلك الابداع في ذاكرتي حتى الان
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: maia)
|
مايا ، سلامات وتحية ...
أما إلهام فقد عادت أدراجها ولم تمكث بيننا كثيراً ،
خسارة مش كده ؟
أكيد بيكون في طريقة إتصال بيها لو سألنا عن تلفون
ليها ، وبالمناسبة ... أعتقد إنها عضوة معانا في
هذا البورد العجيب ، أعاده الله علينا وعليكم بالخير .
نشوفك قريب .
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
| Quote: والله يا إنعام عجبتني الـShots العملتيها بجملك السريعه دي . |
والله يا طلال دا كان احساسي بالحفلة...
وبس كان فضل لي اعمل حاجة واحدة اقوم اشارك اميمة كمية البشير البشرتو !!
لكن خجلت !!
لانو يوم الفرقة الاثيوبية في العائلي انعام ع حفيظ حمرت لي ..
اها قلت تاني ما بعيدها خاصة هي قاااعدة معاي !!
والله كتر خير منال خوجلي دائما ناجدانا بالسمح ومملح ... (دي على وزن الميدالية) !!
وانا فرحت هسى جدا بصورتينك ديل وحا اعتبرهم حقاتي بعد ازنك ..
مودة واحساس جميل ..
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
Quote: من ناحية أخرى ، فحقك ما تسمعي كلام إنعام عبد الحفيظ ،
العمر قصير ، فأعملي لدنياكي كأنك تعيشي أبدأً ، أبشري
وهججي وإنبسطي ، أسمعي كلامي ده كويس
|
غايتو يا طلال انت وإنعام الفيكم إنعرفت
هسه القال ليها ما تهجّج منو أسألها امس القريييييبة دي
كانت مهججة في زول قال ليها حاجة
الوافر شيخ الدين وبقية أعضاء الفرقة
كلهم من غير إستثناء أدهشونا وأمتعونا
وشكراً يا طلال لتغطية الحدث فهو يستحق
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
Quote: الحفلة كانت حلوه بالجد ،
ويمكن أحلى حاجه فيها إنها
كانت حفلة " حية " بمعنى
الكلمة من حيث التفاعل
والأداء وما إليه ...
|
يا طلال الحفلة جميلة مافي شك
والأجمل هو تفاعل الناس مع الفرقة
مما يدل على إعجابهم الشديد بما قدِم
Quote: أفتكر حفلتين تلاته في الشهر
ممكن يخلونا ناس طبيعيين .
ولا رأيك شنو ؟
|
تفتكر كفاية ؟؟!! 
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
بختكم
Quote: هو إنسان متصوف ومتدين ولديه إرتباط روحي بالحياة ، وهو إلى
جانب ذلك إنسان منفتح ويحترم خيارات الناس ويعتقد بشكل عملي
في أهمية التواصل الثقافي وإحترام الآخر ، |
أضيف انو فيه كمية تسامح تكفي بلاد بحالها
أحلامه بعالم فاضل تجعلني أبتسم
شكراً طلال،
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: Tragie Mustafa)
|
وردي على هشام شيخ الدين على رده هنا لشخصي....
Quote: الاخ الحبيب هشام
شرفتنا اخي
وصدقني يا هشام اعزك مثل اخي الاكبر تماما
واعرف نقاء قلبك....
الوافر مثل اخي ايضا وتبارك
فقط امثالهم ننتظر منهم ان يكونوا دعاة للتنوير ببلادنا.
لذلك احزن عندما تآتيني الطبظة ممن لم اتوقعها منهم.
شكرا لتفهمك واتمنى ان يفعل الوافر مثلك
هو فنان مبدع رفع راسنا
وما حققه من نجحات نحلم بها لاي فنان شاب
مثله او فنانه مغمور في بلادنا يترك فنه ليتفرغ للقمة العيش
بينما اتيح له ان يذهب لبلاد تحترم الفنان وتوفر لها ما يسمح
بالتفرغ لفنه فيبدع اكثر.لذا تأكد ساحرص على حواره متى ما
عاد من خلال غرف البالتوك ايضا
لافهم وجهة نظره.
كن بخير
وقول للغاليه د.نبراس تعالي نورينا بهناك. |
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: يازولyazoalيازول)
|
يا طلال ياعفيفي ...ربما الان وفقط في هذه المساحة قد يتسني لقائك بهدؤ فلطالما التقينا وكنا علي عجل او ربما الزمان هو الذي كان علي عجل ....
نعم انا عضوة في هذا البورد لكن ولسؤ الحظ الممتد في علاقاتي بهذا المكان الذي احب فقدت كلمة سري (تخيل ) ولم استطيع ان اكتب لزمن طويل ....سعيدة بان يكون اول تداخل لي هو هنا في مساحات طلال عفيفي التي تنشر حمي التداعيات الجميلة ....
اولا ولازيل بعض الحرج ...السنغالي الرائع هو (ابراهيم ) ونسميه ايبو ....
كمبالا هي حلم كل الموسيقيين بالتواصل الممكن يتم بين فنانين ينتمون لثقافات مختلفة وتجمعهم الموسيقي (التي لاتتواني عن ردم الهاوية ) دون حواجز اللغة والثقافات ..يعني ياصديقي لمن روحك تحرقك وانت تستمع لجاز كوبي ما عليك وعلينا الا ان نصنع جسرنا مع فتح بوابات الروح الح تقوم بالباقي ...
كمبالا هي اميمة شيخ الدين ..في مشروعها لخلق الجسور بين مجموع المهاجرين والمهاجرات الذين تفرقت بهم السبل عن اوطانهم ..وبعد يمكن ان يلتقوا في وطن اي منهم ليغنو بكل لغاتهم ...
انا التقي مع كمبلا بين كل فترة واخري ..قدمت معهم حفلة في (غرناطة) .... تعرف اكتر الاغاني التي يحبها ناري هي ..الليمون _عاشة الفلاتية ) ..شوف الروعة دي ...هل تخيلت عاشة الفلاتية ان شباب من كوبا السنغال المغرب سيتغنون باعمالها... تخيل كمية الروعة
اعتقد ان العالم فعلا في سكته لان يكون قرية في اطراف الخرطوم ...
شكرا طلال وساعود
شكرا للاصدقاء المتداخلين
شيء اخير ياخي صورة لاميمة شيخ الدين وهي مهججة
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: Elham abdelkhalig)
|
يا سلام عليكي يا إلهام ...
شكراً على الإشارات السريعه حول فرقة كمبلا ،
وفي الحقيقة أميمة شيخ الدين من الشخصيات
البتستحق الإنتباه كتير للدور البتقوم بيهو
دايماً في تنسيق وترتيب الفعاليات والأنشطة
الثقافية .
أمبارح كنت قاعد في بروفة فرقة الفلامنكو
الأسبانيه ، وفي شابه ظريفه كده سألتني :
أميمة دي فنانه ؟
في الحقيقة إحترت في الرد ، وقلت ليها:
هي فنانه في نفسها ، وما بتعرض فنونا ؛
يمكن فرادة أميمة شيخ الدين إنو فنها
كامن في طاقتها على مساعدة الآخرين لإبراز
مواهبهم وإبداعاتهم .
إنسانة مشجعه جداً ومليانه بالحياة .
صور أميمة في الهجيج ما حلوة زي لما هذا
الهجيج يتشاف على الهواء مباشرة ...
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: Elham abdelkhalig)
|
يا الله .. يا الله ..
ياخ انا بحب الطرب دا بي شكل ما عادي ..
| Quote: كمبالا هي اميمة شيخ الدين ..في مشروعها لخلق الجسور بين مجموع المهاجرين والمهاجرات الذين تفرقت بهم السبل عن اوطانهم ..وبعد يمكن ان يلتقوا في وطن اي منهم ليغنو بكل لغاتهم ... |
شفت احساسي بالزولة دي طلع في محلو ..
ابداع يا اميمة !!
_________
ياخ نعوم دي تاني ما بباريها لمن يكون في طرب زي دا ...
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: طلال عفيفي)
|
الهام عبدالخالق
تحياتي يا زولة
ما تتخيلي زعلت قدر شنو انه اصلا ما سمعت بالحفل ده الا هنا من خلال هذا البوست
حاولت الاتصال بيكي قلت الحقك قبل السفر
كنت حاجتهد جدا اجي واحضر
الهام صديقتي في مساحات الزمن المستعجل
ياربي الزمن حيسمح لينايوم نقعد برواقة مع بعض ؟
المهم في الامر من الصور يبدو انه كان عرض اكتر من رائع وتاني بالله اعملوا اعلان كافي قبل فترة
لكم مودتي
| |
|
|
|
|
|
|
|
|
|
Re: الوافر شيخ الدين و كمبلا في الخرطوم ... (Re: maia)
|
الحبيبة مايا مسافات من الود اكبر من تلك الجغرافية الممتدة بيننا ... حضرت الخرطوم لاول مرة في حياتي اجي لارجع بعد اقل من اسبوع وتعرفين مجرد ان تتطا اقدامك ارض الخرطوم تاخذك الدروب ركضا ...
لم يتسني لي حتي رؤية امي الا لماما ..ولكي ان تتخيلي الباقي ...كنت اتمني ان تكوني قد سمعتي بخبر الحفل ..لكن يبدو ولا ن السفارة الاسبانية هي التي تولت امر توزيع الدعوات ...
كانت جية غريبة للسودان حزنت لانه ما كان ممكن اقعد اكتر من اسبوع ..الشغل... وخليت جعفر ووووووو...ورجعت وانا ما فاهمة شيء .
طلال عفيفي
لك الود مرة اخري بحجم الوطن ...
| |
|
|
|
|
|
|
| |
طلال عفيفي
Tragie Mustafa
Rawia
محمد سنى دفع الله
Hussein Mallasi
أيمن الطيب
mamkouna
انعام حيمورة
يازولyazoalيازول
Giwey
HAMZA SULIMAN
انعام عبد الحفيظ
ibrahim kojan
الجندرية
المسافر
فيس بوك
تويتر
انستقرام
يوتيوب
بنتيريست