دعواتكم لزميلنا المفكر د.الباقر العفيف بالشفاء العاجل
|
|
 اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العجايب
|
بلدنا دى كان فيها لجنة نصوص من كبار الشعراء
بدون ما يكون فيها اغانى هابطة بالمستوى ده
والان الاغانى ماشة فى هبوط اسرع من اى طيارة صنعت باعلى التقنيات
الضجة اثيرت حول ندى القلعة والعربية الهداها ليها رئيس نيجريا
ودى اخر اغانيها تتغنى بها فى عين الجعيص وعلى اعلى مستويات فى الحدائق والمركبات العامة الاعراس الحفلات الخاصة بكتب ليكم البقدر عليهو واى عبارات غير كدة نخليكم
تسمعوها بمرور الزمن اها رايكم شنو ؟؟؟؟ فى المستوى الفنى الوصل ليهو السودان .
وين ناس امن المجتمع ؟؟؟؟؟؟
الشريف مبسوط منى
عشان انا بريد فنى
مشيت لو باحساسى
بى طبعى الاساسى
محتشمة ملتزمة
خاته توبى فوق راسى
والله بريد فنى
الليله والليله
اعصابكم يا حليله
الليله والليله
نيجريا يا حليله
المرسيدس جايه
الفين سبعة موديله
والله بريد فنى
وراجعة
ام وضاح
|
|
 
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
لا يا أم وضاح ...
أنا بفتكر انها بترد على الاشاعات الاتقالت عنها ...مستخدمة فنها ...
والله بفتكر انها طريقة جميلة منها للدفاع عن نفسها ...
يعنى وردى يغنى فى أثيوبيا وسيد خليفة يمشى الصومال وعبد القادر سالم يغنى فى لندن ..ومين يمشى وين يغنوا ويدوهم قروش ويرجعوا محملين بالهدايا
والذكريات الطيبة ..لمن ندى القاعة "الحلوة دى" تمشى نيجيريا وتغنى ...تطلع فيها أشاعة ليه؟؟
يابت غنى وفرحى خلق الله وأفرحى ودافعى عن نفسك وفضفضى ...والمجتمع السودانى ده بس الزول يمشى قدامو رافع راسو
بعد كم سنة كل الناس بيلحقوه ...
ما تشنفى البنية ...يا أم وضاح ...البنية فنانة والسودان صعب 
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: Tumadir)
|
Quote: يعنى وردى يغنى فى أثيوبيا وسيد خليفة يمشى الصومال وعبد القادر سالم يغنى فى لندن ..ومين يمشى وين يغنوا ويدوهم قروش ويرجعوا محملين بالهدايا
والذكريات الطيبة ..لمن ندى القاعة "الحلوة دى" تمشى نيجيريا وتغنى ...تطلع فيها أشاعة ليه؟؟
|
يا اخت العريس يا الخنساء
انا ما شنفتها ابدا لكن انت ما تبالغى وتقارنيها بالفنانين ديل يا تماضر
ومنو الرجع من رحلة فنية بلكزس ومرسيدس وهمر .
كلهم ديل عرباتهم يا لطيف
ده ما دفاع ده نظام بتغيظ فى الناس الكانوا معاها فى الرحلة باسلوب ركيك يا ريت اتوفق واسمعكم الاغنية .
كان جانا تمبس
تحياتىليك
وان شاء الله جايه الخرطوم للعرس لنلتقى باذن الله
ومبرووووووك وعقبال اولادك يا ظريفة
ام وضاح
| |
|
|
|
|
|
|
|
|
دى حقيقة يا تماضر
ام وضاح
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
الامين العام للمجلس الاتحادى للمصنفات الادبية والفنية هو
الدكتور الصادق سيد احمد
وللذين لا يعرفون الدكتور الصادق سيد احمد هو اول من تعين فى الخدمة الالزامية مع بدايتها يعنى ما عنده علاقة اطلاقا بالفن والادب هو اساسا مستشار قانونى وده بديل للاستاذ الشاعر التجانى حاج موسى يعنى دكتور الصادق تخصص خدمة اللزامية ايام الضرب المبرح والموت الجد فى المعسكرات يعنى ده يقولوا عليهو شنو ؟؟؟؟؟
ونتابع
يا هناى ويا هنايا
امسكوا القنايا
المرسيدس ولكزس
وبكرة الهمر جايه
والله بريد فنى
الحيين والماتو
عرفوا فنى وغلاتو
والغالى البى غلاتوا
نيجريا تضوق حلاتو
والله بريد فنى
| |
|
|
|
|
|
|
|
|
 Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: Tragie Mustafa)
|
Quote: يعيش الدولار الخلا بت العرب تغني للعبيد!!
Quote: نيجريا تضوق حلاتو
والله بريد فنى |
مش برضو ندى القلعه دي بت عرب وجدها العباس و الا انا ناطه غلط, يا ناس علاء الدين (العنصري) مش علاء الدين حيموره؟؟
ومش النيجرين ديل ياهم المحمولين على ظهور امهاتهم ام المحمولين جوا
عافيه منك يا ندى القلعه
وبركه المشيتي يختي نيجريا ولقيتي لقزس او مرسيدس..لو مشيتي بلاد العربان
كان كل الطعغتي بيه كراكتيرين ثلاثه ويوتيوب يضحك على اغنينا .
يعيش السودان الجديد المتجه لافريقيا
طبعا افضل دعايه هي هدايا النيجريني لندى القلعه
وبعدها بنلقى كله فنانه شايله دلوكتها وتبدأ جوله افريقيه.
ويلا ماحدش احسن من حد.
زكان حنان بلوبلو مشت تشاد وانبسكت من تقدير الناس لفنها
خلوى الفن يشوف شغله مادام
السياسه ما عارفه تعمل شيئ من اجل الوحده الافريقيه.
وعجبني لكم يا السودانين
عشان ثاني تنزلوا اغاني الاحباش وتقعدوا تتغزلوا في بنات الناس
اها بناتكم مرقوا لسوق اليوتيوب,وثاني النشوف طولة اللسان في شنو؟؟ |
ليه كده !!
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
العزيزه ام وضاح
بكاوي في ناس وحيدين بس وحياتك ما اكثر
Quote: تراجى سلام
مالك زعلانه كده انت سودانية زينا واحد البزعلنا مفروض يزعلك وما تقبلى اى حاجة
تمس اسم السودان ولا شنو رايك ؟؟؟
وحقوا يا تراجى قصة ود عرب دى ما تقوليها تانى نحن سودانيين واخوان فى الحوبة
تحياتى ليك
ام وضاح |
ام قصة ود عرب دي ما بخليها يا ام وضاح لحد ما يبطل البعض عنصريتهم الواضحه
قال عرب قال!!
يازوله الناس دي كلها في عيون العرب عبيد.
اما اغاني ندى ياها بتعكس واقع الشارع السوداني وانت عارفه بنفسك الشارع اتغير قدر شنو
فما تفقعي مرارتك ساكت
خلينا في موضوع الحموات اياهم
العايزين يقتلونا وياخذوا اولادنا التعبنا فيهم وربيناهم.
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
سلامات ام وضاح
وبدوري احي روح الهجيج العالية عند فيصل نوبي
وممكن اتبرع ليهو بأغنية تانية اسمها:
يسلم لي عوض الله .. ومن الله العوض الليلة
وأهديها مع أحلى الأمنيات لصديق معجب
معجب بالأغنية بالمناسبة .. وبتهّيج شجونة وتثير كوامنه  :
خلاني ياناس مبسوطة ست الهيجة ست الجوطة
تعليماتو جات مظبوطة بس جرة قلم في نوتة
هيلو الشكرة هيلو الفوتة من زمنا بعيد مختوتة
جرا النوتة والتلفون قال القاسي كلو يهون
صاين عرضو صافي مصون رافع راسو ما مهيون
يومي الزرتو جوا مكانوا شفت هيبتو وسلطانو
شوف حراسو واقفة امامو دا الشيخ الوسط حيرانو
عهد اجدادو يوم ماخانوا قدم كل غالي عشانو
النبي في زول عارف عوض دا منو
يسلم الجنا ياليلة المرق مو قنا ياليلة
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: ملكة سبأ)
|
Quote: يسلم لي عوض الله .. ومن الله العوض الليلة
وأهديها مع أحلى الأمنيات لصديق معجب
معجب بالأغنية بالمناسبة .. وبتهّيج شجونة وتثير كوامنه :
خلاني ياناس مبسوطة ست الهيجة ست الجوطة
تعليماتو جات مظبوطة بس جرة قلم في نوتة
هيلو الشكرة هيلو الفوتة من زمنا بعيد مختوتة
جرا النوتة والتلفون قال القاسي كلو يهون
صاين عرضو صافي مصون رافع راسو ما مهيون
يومي الزرتو جوا مكانوا شفت هيبتو وسلطانو
شوف حراسو واقفة امامو دا الشيخ الوسط حيرانو
عهد اجدادو يوم ماخانوا قدم كل غالي عشانو
النبي في زول عارف عوض دا منو |
ما ده المجننا يا ملكة سبأ
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: ombadda)
|
الاخت العزيزة ام وضاح
يا ريت اول تناقشو معايير هابط و صاعد و معانى الكلمات و ارتباطها بالمجتمع ، غنية زى ( اب شرا ) ناقشت قضية غاية فى الاهمية بينما قممنا (ابواللمين ووردى وكابلى ) يمتعونا بكلام وقف عند حدو لانفصاله عن الواقع. بمعنى انهم مبدعين و نص ولكن خانتهم المواكبة .
ندى القلعة بت حلوة و فنانة و موهوبة غض النظر عن حياتها الشخصية و بتغنى غنى البنات اللى هم اماتنا و اخواتنا و حاجاتنا الباقية و لم تطرح نفسها مربية اجيال ، فلماذا نتصدى لها و هى تعبر ببساطة عن احلامها و افكارا و حاجاتا ؟ مادخل المصنفات بصبحية فى اركويت و لمة نسوان فى العاشرة مثلا ؟ و هل من اساسو ندى تدعو ا لاى ممارسة خاطئة ؟. و مشت نيجيريا و الرئيس النيجيرى اداها لكزس و جات هنا قامو فيها كلاب لهب بتاعين الدار الماعندهم شغلة ديل .اقوليك معلومة كمان .. الرئيس ما اداها العربية .. ادتها ليها مرتو ، تشادية زى الصاقعة تقول لى ندى بتعرفى شنو ... فى داعى رجال طوال عراض فاتحين ليهم ميتين جريدة يقعدوا يباروا فى الكلام الفارغ دة؟
ممكن تكون ندى فى نظر البعض دايرا ليها بسطونتــــين لكن قبلها فى ناس دايرا ليها خمسمية بسطونة ,
مع احترامى يا اخت ام وضاح .
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: برهان تاج الدين)
|
كتب الاخ برهان
Quote: غنية زى ( اب شرا ) ناقشت قضية غاية فى الاهمية بينما قممنا (ابواللمين ووردى وكابلى ) يمتعونا بكلام وقف عند حدو لانفصاله عن الواقع.
الواقع هو زى اغنية اب شرا دى اقرا معاى
بختى ان شاء الله راجل اختى يا اب شرا
لا حول ولا قوة الا بالله
ده الواقع بتاعنا يا اخ برهان
Quote: مادخل المصنفات بصبحية فى اركويت و لمة نسوان فى العاشرة مثلا ؟ و هل من اساسو ندى تدعو ا لاى ممارسة خاطئة ؟. و مشت نيجيريا و الرئيس النيجيرى اداها لكزس و جات هنا .اقوليك معلومة كمان .. الرئيس ما اداها العربية .. ادتها ليها مرتو ، تشادية زى الصاقعة تقول لى ندى بتعرفى شنو ...
. |
دخل المصنفات يا برهان تحدد مستوى الاغانى المفروض تتغنى فى الصبحية لانها فيها اطفال وشابات صغار بكرة برددوا الاغانى دى بنفس المستوى انا ترفعت ان اذكر الكلمات البتقولها ندى فى اغانيها فى الصبحيات .
اذا كان انا سمعت طفلة لا تتعدى الخمسة سنوات بتردد فى كلمات عجيبة تستحى انك تسمعها من امراة عمرها فات الاربعينات ناهيك عن طفلة مستوى الاغانى الهابطة والبذيئة من وين اتعلموهو البنات من صبحيات ندى القلعة وامثالها .
اما العربية سلمها ليها الرئيس الاهبل ده بنفسه .
مع احترامى ليك ولرايك اخى برهان
ام وضاح
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: Siham Elmugammar)
|
| Quote: اغانى ندى القلعه وتشكيكك و بعض المتداخلين فى الكيفية التى جعلت النيجرى يهدى لها العربيه |
اعملى لى كوت يا استاذة سهام المجمر على اى عبارة شككت فيها فى الكيفية التى جعلت هذا النيجرى يهدى العربية اللكزس لو سمحت .
انا لا اعلم الغيب ولا اعرف نوايا الناس شنو ؟؟؟
انا كتبت كلمات اغنية ركيكة تغنى فى المناسبات ورفضت هذا النوع من الاغانى وانا حرة فى ارائى .
اذا ما فهمت ما ارمى له ما تتهمينى بشىء ليس من طبعى وانا لا اتهم ولا اتشكك فى شىء مثل هذا .
انا فى انتظارك عشان اعرف اين شككت ؟؟
| Quote: "!!!!!!!!!!!!!!!!!!!!!!!!!!ياخ فرمتى قلبناو كبدنا... لك العافية |
دى بدون تعليق طبعا لانى ما فهمت القصد من وراء هذه العبارة العجيبة ,
ام وضاح
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: برهان تاج الدين)
|
أها جيتك يا أم وضاح وقبال ما أدخل لاجوه واتوهط في حوشك المفروش بالرملة الحمراء والمرشوش بالموية وفيه العناقريب هبابي وراكوبة الحصير الحاضنة عدة الجبنة وزير الفخار التحتو كورة للنقاع ,,, حوش الكرم والاصالة .. قبال ما اتوهط فيه بقول ليك حبابك وحباب الناس الجو قدامي ...
لقيت مناداتك لي ولامن دخلت لقيت الزحمة بكل الوان الطيف السوداني الاصيل وحتى اخوانا ناس الجنوب بدورو يعلقو على كلام ( الموندوكورو ) وحتى تراجي بدور تنفس في قضايا الوطن من خلال زاوية تناولك للموضوع ..
حبابك وانتي بتلمي الناس وهم متصافين زينين وسمحين ...
معليش للمسخنين اهلنا قالوا ( البندورو نبلع ليه الظلط والبناباه نفتش ليه الغلط )
أم وضاح : الحاجة علوية بت حيموره عميدة الجنس الناعم لآل حيموره الله يديها العافية ويمد في اياما لما ما يعجبها كلام او تصرف طوالي تتمحن وتقول استغغغغغغفر الله يا بات امي ....
يلا عشان نقول قلت اقرأ بروية وبجيك لموضوعنا الاساسي يا قول حاجة حنانة حيموره ..
مودتي
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: علاء الدين حيموره)
|
Quote: أها جيتك يا أم وضاح وقبال ما أدخل لاجوه واتوهط في حوشك المفروش بالرملة الحمراء والمرشوش بالموية وفيه العناقريب هبابي وراكوبة الحصير الحاضنة عدة الجبنة وزير الفخار التحتو كورة للنقاع ,,, حوش الكرم والاصالة .. قبال ما اتوهط فيه بقول ليك حبابك وحباب الناس الجو قدامي ...
|
ودحيمورة حبابك الف وبى كل الحبايب الهنا ,,
لكن وصفك للحوش والاشياء ما شاء الله خلانى قربت الساعة تلاتة اعمل لى قهوة عشان اعيش الدور ,
ولازم تكون كاتب قصة يا زول ما تضيع الفرصة ,
من امبارح ما قادرة ادخل معاكم لحدى الساعة تلاتة صباحا لكن الحمد لله قدرت الان اعمل اضافة رد .
انا يا اخوى ما بشاكل لى زول فى بيتى ده ابدا كل زول يقول رايو والباب مفتوح نحن بصدد الحد من حادات كتيرة فى مجتمعنا ده دايره وصول لحل جذرى فيها ان شاء الله ,
حبابك عشرة بلا كشرة
ام وضاح
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: برهان تاج الدين)
|
Quote: لا لاستدعاء ما يسمى بأمن المجتمع لتقييم عمل فني
2- الإعمال الفنية تقيم وفق اسس النقد الفني فقط
3- غناء البنات من أصدق أنواع فنون الثقافة الأخرى
الباقر موسى |
اها يا جماعة:
أنا رجعت تانى ....
أردد فى الاغانى ..
ندى القلعة عاجبانى
بت وغناها حانى
الليل ما جانا
هههههههههه
طبعا فى ناس بقولو ياحليل ناس عشة الفلاتية ومنى الخير زمن الفن الاصيل ...
الضمان شنو أنه منى الخير وعشة الفلاتية ما نبشوهم وشالوا حالهم لما كانن شابات وصغيرات ...
أنا بتذكر زمن البلابل والناس كانوا بطلعوا فيهم اشاعات زى الطلق كل يوم اشاعة ..وهم احتملوا من المجتمع السودانى ده مراير كتيرة
لحدى ما اتزوجوا وغابوا من المشهد شوية كده بدوا الناس يشكروهم ويرددوا أغانيهم ...
حتقولو لى لا ...غنا عشة الفلاتية ومنى الخير رصين ..وفن أصيل ...
وأنا بقول ..انه بحترموا الناس لانه "كلمات فلان الفلانى وألحان فلان الفلانى" يعنى "كلام رجال وألحان رجال" نادرا ما تلقى الاغنية كاتباها
بنت أو سيدة أو امرأة ...
حسة النقاد والموسيقيين بعد (المجتمع) نبذ غنا البنات سمممممح ...وسموه هابط وسموه شنو ما بعرف ...قاموا يشكروا فيه ويعملوا فيه دراسات ...
طيب أهو ده غنا بنات ...قطع أخدر ...
المحيرنى أنه (المجتمع) بجض كده مالو كل ما تقوم "سنبلة"؟ ياعملات محمد درويش ...؟؟
المجتمع يايمة شكيناه عند الله ...
غايتو يا ندى القلعة ما بعرف عنك الا الشفتو فى يوتيوب ، وما بهمنى كتير الجارى فى حياتك الشخصية ، والمجتمع ما خليتى ليه شى احترمتى ليه ثيمو (حسب ما تقول الاغنية) ...بعد ده شنو الموت؟؟؟ أها عافية منك لله والرسول
..دمك حار وصوتك نار ..
غنى غناك وخلى الهم يختاك..
ولو عدتم ...انا ياهو دى ...
وشكرا باقر موسى ..على الاتفاق الضمنى
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: Tumadir)
|
بت شيخ الدين الخنساء
حبابك عشرة وحباب رجعتك وكتر منها
كتبت
Quote: أنا بتذكر زمن البلابل والناس كانوا بطلعوا فيهم اشاعات زى الطلق كل يوم اشاعة ..وهم احتملوا من المجتمع السودانى ده مراير كتيرة
لحدى ما اتزوجوا وغابوا من المشهد شوية كده بدوا الناس يشكروهم ويرددوا أغانيهم ...
|
مع احترامى لى رايك انا شخصيا ما سمعت ولا قريت اى اساءة للبلابل ابدا لكن امكن لو حصلت يكون عشان الزمن داك الغنا للبنات صعب شوية .
لكنة لم اسمع اطلاقا اى اغنية للبلابل كلماتها هابطة او غير معبرة ولو رجعنا لبوست الاخ عبد الدائم البلابل وسيمفونية الزمن الجميل نشوف العجب ونشوف الطرب ونشوف الفن الاصيل وبرضوا غنا البنت فيه تتمنى وتشحد الله ود الحلال وووولكن ؟؟؟؟؟؟ شتان بين الكلمات التى تتغنى بها البلابل وندى القلعة .
وبرضوا انا كلامى ده عن مستوى الاغانى فقط لا لا يهمنى اشياءهن الخاصة كما ذكرتى .
اى انسان حر فى تصرفاته الخاصة ناهيك عن انه هو فنان ولا غيرو حياة الانسان الخاصة ملك حر له وعمرى لا اتكلم ولا اتشكك فى حياة الفنان الخاصة كما ذكرت احداهن سابقا ظلما ولكننا نطلب الفن الجميل
لك الود يا الخنساء
ام وضاح
| |
|
|
|
|
|
|
|
|
|
سلام وشوق (Re: برهان تاج الدين)
|
Quote: فيصل نوبى
ازيك
بعدين اجدع معاك اخوك انشاالله بى ام بى ثرى
راوية عباسى شخصيا ...
و الله حمدالله على السلامة .
نحن طولنا ولا شنو ياخوانا . ..
كدى النطلع لى برة نشوف الرجعوا منو تانى |
تصدق
ياخ والله مشتاقين
وتاني مشتاقين
بالله عليك ترسل لينا كونتاكت ليك عشان نتكلم
| |
|
|
|
|
|
|
|
|
 Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: برهان تاج الدين)
|
حبيبنا برهان
شايفكـ متجدع مع خالتكـ في بوست تاني ما حبيت اشاغلكـ هناكـ
الاخبار و الامور !!!
موفق إن شاء الله ..
تعرف وحشونا حبايبنا طرفكم 
للناس اللي بيقولو ده الرئيس النيجيري
ده ليس الرئيس النيجيري بل حاكم إقليم نيجيري
سيارة لـكزس لي نــدى القلعة و 100 ألف دولار هديــة حـاكــم إقــليم نيجيــــري
دبي: كمال طه
* باتت الفنانة ندى القلعة مطربة السودان الاولى بلا منازع بانتشارها السريع افريقياً حيث سبقت البوماتها الغنائية زيارتها الاخيرة الى نيجيريا رغم ان شعب ذلك البلد الصديق البعيد لا يتحدث العربية ولكنه يتذوق الغناء السوداني ويعجب باصوات فنانيه وفناناته، فكان ذلك السبق سبباً في دعوتها وفرقتها ووفد من مجموعة فنانين وموسيقيين لاحياء حفلات هناك بمناسبة اعياد الديمقراطية·
وبانتشارها عربياً ايضاً بحلولها ضيفة على مهرجان مفاجآت صيف دبي لهذا العام 2006 بعد انتهاء حفلاتها الاربع التي احيتها في اقليم مايدوقلي بنيجيريا تحت رعاية حاكمه علي الشريف وحرمه السيدة فاطمة التي قامت بتوجيه الدعوة لمطربتنا نيابة عنه اثر سماعها بحادث الحركة التي تعرضت له وتم شفاؤها من آثاره وخروجها سالمة·
وهنا في دبي بدأت اطلالتها الاولى في حفل النادي الثقافي الاجتماعي بدبي على شرف حملة >صحة من اجل الجميع< والذي احيته متبرعة مساهمة منها من اجل انجاح ختام هذا المشروع ومن اجل الوطن في المقام الاول·
وهي تستعد لتنفيذ باقي حفلاتها في باقي الامارات بعد حفل ناجح اقامته بدبي الاسبوع الماضي فوجئت صباح امس بمحادثة هاتفية من مدير مكتب حاكم اقليم مايدوقلي علي الشريف يخطرها بحضوره الى دبي موفداً منه خصيصاً لتكريمها بهدية قيمة رداً على تشريفها له وتلبية دعوة زوجته ولمبادرتها بتقديمها لهما هدايا سودانية خلال الحفل الختامي وامام ضيوفه من الوزراء ورجال السلك الدبلوماسي مما كان لها وقع طيب في نفسيهما رغم انها ضيفة عليهم، وطلب منها مدير المكتب الحضور الى شركة العظيم بدبي لتسليمها الهدية·
المفاجأة سيارة لكزس
* وكشفت ندى القلعة النقاب لـ قوون عن الهدية المفاجأة قائلة: كأنني في حلم لم افق منه الا بعد قيام مندوب الشركة الذي رحب بي بمكتبه بتسليمي كل الاوراق الخاصة بملكية سيارة لكزس صالون على الزيرو موديل 2006م وهنا لاحظت مدير مكتب الحاكم علي الشريف يجري اتصالاً هاتفياً معه يخطره بقيامه بالمهمة·· وما هي الا لحظة حتى ناولني >الموبايل< ليحدثني شاكراً ومقدراً وكذلك زوجته، فشكرتهما ايضاً على هديتهما القيمة التي اعتقد انها هدية لوطني الذي مثلته خير تمثيل·· مع زملائي الفنانين الآخرين·· واستطردت قائلة مازلت في دهشة من هذه المفاجأة التي لم اتوقعها على الاطلاق·
100 الف دولار عائد الحفلات
*وبسؤالها عن عائدها من الحفلات التي اقامتها في ذلك الاقليم النيجيري·· اجابت ندى القلعة بانها لم تفكر قط في المال خلال احيائها الحفلة وراء الحفلة والتي كانت جميعها على مستوى راق حيث احييتها بمفردي وغنيت فيها كما لم اغن من قبل خاصة ان الحضور كانوا من رجال الدولة والدبلوماسيين وزوجاتهم·· ولكني فوجئت في اليوم الاخير قبل اقلاع الطائرة بنا حيث كانت برفقتي هناك والدتي وكل افراد العائلة بتسليمي مبلغ مائة الف دولار بالتمام والكمال مقابل ما قدمته من اغان رائعة·
شعوري لا يوصف
*معنى هذا انك خرجت من هذه الزيارة بهذا المبلغ وبالسيارة اللكزس الجديدة وقيمتها 190 الف درهم اي ما تعادل 59 الف دولار ماهو شعورك وانت تكسبين كل هذا في رحلة افريقية لنيجيريا وفي زيارة لدبي لا زالت في بدايتها؟
اجابت ندى القلعة قائلة شعوري لا يوصف حيث ادركت الآن قيمتي الحقيقية كفنانة معتبرة·· فنانة سودانية ذاع صيتها لهذه الدرجة من الاعجاب بصوتها وبما تقدمه من فن اصيل وحديث·
* وللحديث مع >ندى العنبر< كما اطلق عليها شاعرها وملحن اغنياتها الدكتور علي الكوباني بقية·· لا يخلو من مفاجآت موعدكم معها ومع تفاصيل دقيقة لرحلة الالف دولار والسيارة اللكزس قريباً باذن الله في لقاء مطول تكشف خلاله الكثير من الاسرار والحقائق في مشوار حياتها الفنية· وامسكوا الخشب···
دقيقة اجيب ليكم الحفلة زاتها و اجيكم راجع 
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
أم وضاح.
هسع الجوطة دي كلها فوق شنوا أصلا؟
الجديد شنوا في غنى ندى القلعة؟
أغاني البنات مشهورة جدا بمثل هذا الكلمات وأسواء منها بكثير. نحن في السودان كلنا بنستمع الى هذا الاغاني وبنهجج في حفلاتها وتاني يوم الصباح
يجوا بعض المثقفين والمتزمتين ينتقدون أغاني البنات. وهم كانوا معانا في الحفلة أخر كشف ورقص. لمتين نحن ح نكون بنخدع في نفسنا بالطريقة دي.
يا أم وضاح وبقية المشاركين بهذا البوست.
أنا أزكر في الثمانينات عندما كانت حنان بلوبلو في قمة فنها وكانت طبعا ممنوعة تغني في الاذاعة والتلفزيون كانت تسافر وتحي حفلات ناجحة جدا وسط
المغتربين في الخليج. ولقد تمت دعوتها بواسطة السيدة الاولى في تشاد أنذاك(زوجة الرئيس حسين حبري على ما أعتقد) وأحيت لها حفلة بمناسبة مولودة
جديدة وتم تسمية المولودة حنان. وأيضا أحيت الفنانة حنان بلوبلو حفلة كبيرة في أستاد أنجمينا للجمهور التشادي الذي يعشق فن حنان بلوبلو.
وطبعا رجعت حنان بلوبلو السودان وهي محملة بالهدايا القيمة من القصر الرئاسي التشادي. والاهم من ذلك رجعت حنان وهي تحمل حب وأعجاب الشعب
التشادي الشقيق.
نحن مشكلتنا الكبيرة في السودان نريد أن نعرض فن بأئر وعفا عنه الزمن ولا يعجب سوى السودانين الكوامر. لا يمكن لناان نفرض على الشعوب الاخري
محمد وردي أو محمد الامين أو الكابلي.
دينق.
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: Deng)
|
كتب الاخ دينق
Quote: نحن مشكلتنا الكبيرة في السودان نريد أن نعرض فن بأئر وعفا عنه الزمن ولا يعجب سوى السودانين الكوامر. لا يمكن لناان نفرض على الشعوب الاخري
محمد وردي أو محمد الامين أو الكابلي.
|
لا يا دينق دى ما مشكلتنا ولا قلنا نفرض فنانيننا الكبار ديل على شعوب اخرى نحن قلنا حاجة عن البلابل سميرة دنيا اسرار بابكر امال النور هذا على سبيل المثال لا الحصر منو فينا اتكلم عنهن ولا قلل من قدرهن بقدموا فن جميل وكلمات منتغاه جميلة .
نحن نتكلم عن مستوى الكلمات البتقدمها ندى القلعة ليه ما بتختار غير الكلمات الهابطة دى ؟؟
تحياتى دينج
ام وضاح
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: معتصم الطاهر)
|
اها نرجع لموضوعنا الاساسي يا ام وضاح ...
سمعت كلام جميل من الاستاذة آمال النور في لقاء تلفزيوني قديم جدا ايام ظاهرة الفنانة حنان بلوبلو :
قالت انو نجاح اي اعمال فنية مهما كان مستواها برجع الى الكم من الناس الذين يلتفون حولها فاذا كانت حنان بلو بلو وسط طبقة مثقفة مستهجنة للنمط ولكن اقلية لا تكون فاشلة وسط طبقة من الشعب وتعد الاكثرية متذوقين لفنها ... انتهي الكلام
ببقى نحاول مناقشة الظاهرة من مجموعة زوايا ...
هل لانو نحن فعلا سمعنا الكلام الرصين زمان وما قادرين نستوعب النقلة دي ؟؟
هل نترك لهذا الجيل ان يتحرر من طريقة تذوقنا للاغاني ؟؟؟
هل هي فعلا هابطة وبأي مستوى ؟؟؟
هل الشارع متقبل بأكثرية ؟؟؟
لكن بمكن القول بأنها في الاساس ظاهرة فنية لا يكتب لها عمرا طويلا طالما عالجت قضية في زمن محدد لشيء محدد ولاشخاص محددين .. فهي لم تخاطب وجدان كل الناس بدليل استهجاننا لتركيبة الكلمات التي تمجد فيها نفسها وربما يكون الامر افظع للذين يعرفون تاريخها الذي ليس مكانه النقاش هنا ...
الشعب السوداني بخيره فأشعار اسماء الجنيد وهند محمد وتماضر الخنساء وسمية طلحة وغيرهن من شاعرات السودان الفاضلات يظل باقيا في الوجدان ابد الدهر فنحس بانهن يخاطبن عقولنا بجميل الكلام ...
لماذا لا نوجه لهن الرأي في المساهمة في تحويل اغاني البنات الى الكلمات الرصينة ...
مؤكد فراغ الساحة الفنية من الجميل يكون مرتعا لما لا نحبه ..
وتاني راجع ليك
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: علاء الدين حيموره)
|
Quote: هل لانو نحن فعلا سمعنا الكلام الرصين زمان وما قادرين نستوعب النقلة دي ؟؟
هل نترك لهذا الجيل ان يتحرر من طريقة تذوقنا للاغاني ؟؟؟
هل هي فعلا هابطة وبأي مستوى ؟؟؟
هل الشارع متقبل بأكثرية ؟؟؟
|
حبابك يا علاء الدين
بالنسبة للسؤال الاول نحن كيف نستوعب الكلام الفارغ ده ونحن عاصرنا الشعر الرصين الهادف الجميل .
بالنسبة للسؤال التانى نحن لما نخلى الجيل يتحرر من طريقتنا نخليهوا يمشى للافضل يسمع الاجمل ليه نخليهو يرجع لوراء الف وخمسمائة ميل ؟؟
بالنسبة للسؤال التالت هابطة باسوا مستوى يخطر على بالك لانها فى حاجات ذاتها الواحد ما بكتبها مش فى الاغنية دى فى اغنيات كتيرة جدا .
بالنسبة للسؤال الرابع انا طبعا ما بقدر احدد اجابتى على السؤال ده الا ابدا استفتاء وسوف ابدا بالجامعات ان شاء الله بعد موسم الامتحانات وحاتب موضوع كبير واتمنى ان نعمله مع بعض .
| Quote: لكن بمكن القول بأنها في الاساس ظاهرة فنية لا يكتب لها عمرا طويلا طالما عالجت قضية في زمن محدد لشيء محدد ولاشخاص محددين .. |
بالظبط كده لا الظاهرة ولا الفنان ما بكتب ليهوا عمر جديد ,
العمر الجديد بنكتب للاشياء الاصيلة البتخاطب الوجدان والمشاعر نحن شعب ذواق يا علاء الدين .
تحياتى
راجعة ليك
ام وضاح
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
الاخت امال
تحية طيبة
استمعت للاستاذة ندى القلعة لاول مرة فى اليوتيوب قبل حوالى الشهرين و هى تشدو ب"عزاز علينا". و حقيقة صوتهاجيد و ملامح وجههاجميلة تعكس الطيبة و البساطة.
اتفق مع الباقر موسى و تماضر،
Quote: 1-لا لاستدعاء ما يسمى بأمن المجتمع لتقييم عمل فني
2- الإعمال الفنية تقيم وفق اسس النقد الفني فقط
3- غناء البنات من أصدق أنواع فنون الثقافة الأخرى |
و ليس لاى كان ان يفرض عليها ماذا تغنى ولا اين تغنى ولا كم تتلقى كأجر ما دامت لا تتعدى على الاخرين بكلماتها.
و يا تماضر دى ما اغنية جاهزة الالّفتيها دى.
اما الرئيس النيجيرى - اذا كان فعلا قدّم هذه الهدايا للاستاذة ندى القلعة، و اذا كان هذا ديدنه مع الفنانين/ات فعليه ان يخجل من نفسه و يستخدم هذه الموارد - حتى و ان كانت ضئيلة - لمواجهة احتياجات شعبه.
كنت فى لاغوس العام الماضى و ساءنى ما شاهدته من مظاهر الفقر المدقع وسط الكثيرين رغم ان نيجيريا دولة منتجة و مصدرة للبترول.
ندى
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: nada ali)
|
Quote: و ليس لاى كان ان يفرض عليها ماذا تغنى ولا اين تغنى ولا كم تتلقى كأجر ما دامت لا تتعدى على الاخرين بكلماتها.
|
الحبيبة ندى على
فى كلامك الفوق ده اسمحى لى اقول ليك انت غلطانة نحن كمجتمع نطالب بكلمات جميلة واصيلة تكون تراث من بعدنا اجيال واجيال نحن نفرض على الفنان يسمعنا ماهو جيد وجميل .
Quote: اما الرئيس النيجيرى - اذا كان فعلا قدّم هذه الهدايا للاستاذة ندى القلعة، و اذا كان هذا ديدنه مع الفنانين/ات فعليه ان يخجل من نفسه و يستخدم هذه الموارد - حتى و ان كانت ضئيلة - لمواجهة احتياجات شعبه.
|
اداها اللكزس يا ندى والصور مالية البلد عند التسليم والشعب عارف كل حاجة واتشحنت بى وين واتسلمت متين وزى ما سمعت المرسيدس والهملا وعلى ما اعتقد الروزرويس كمان كل ذكرتو فى الاغنية ويا ريت تعرفى اى مستوى من الفقر يعانى شعب نيجريا كما ذكرت .
تحياتى
ام وضاح
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
[ font size=4 font color= black]
الأخت / أم وضاح
لك تحياتي
أرجو ان تسمحي لي بالتداخل في هذا البوست الشيق من جانب المداخلات المتنوعة والغمز واللمز من زوايا مختلفة كل حسب هواه.
ما أريد أن أعترف به هو أنني لست من المعجبين ولا من المتابعين لأغنيات الفنانة ندى القلعة, ولكنني لست من الناقدين لفنها وأغنياتها بحكم عدم التخصص في النقد الفني بالإضافة إلى حكمة الله التي حرمتني من حلاوة الصوت وبالتالي الابتعاد عن مجال الفن.
بخصوص أغنية ندى القلعة أظن قبل أن ننتقدها ونسهب في الكلام علينا اجراء استطلاع لفئات مختلفة من المجتمع السوداني لنرى درجة قبول المواطنين لتلك الأغنيات ومدى التفاعل معها كما يمكن الرجوع لمبيعات أشرطة وأسطوانات الفنانة المذكورة وبعدها نحكم عليها. أظن ماأرفضه أنا لا يعني بأي حال رفضه من عامة المجتمع وبالتالي الحكم عليه بالركاكة.
أما بخصوص نشر الأخبار والصور الشخصية والعائلية للفنانة المذكورة أعتقد أن الفنانة ندى القلعة لها نصيب الأسد في ذلك وقد تكون مبسوطة له إذ كيف تسمح بتصويرها ونشرها على الانترنت دون أن تحتج على ذلك.
لك الشكر مجددا
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: جعفر سومي)
|
Quote: كما يمكن الرجوع لمبيعات أشرطة وأسطوانات الفنانة المذكورة وبعدها نحكم عليها. أظن ماأرفضه أنا لا يعني بأي حال رفضه من عامة المجتمع وبالتالي الحكم عليه بالركاكة.
|
الاخ الغالى جعفر موسى
طبعا هى اصلا ماحتكون مطلعة ليها اسطوانة ولا حتكون سمعت بيها لكن امكن تكون مطلعة شريط ماستر والله اعلم لكن شرايط الاعراس والقعدات على قفا من يشيل فى اى ركشة ولا امجاد والسوق العربى وسعد قشرة ممكن تشترى الشريط بالف جنيه فقط بس ينسخوا ويبيعو ورحم الله المصنفات الادبية .
تحياتى
ام وضاح
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
الأخت أم وضاح
أراك مصرة على استدعاء "أمن المجتمع" لتأديب البنات
معلوماتي محدودة عن هذا الأمن
لكن سمعت حكايات مفصلة عن قوات تهاجم الحفلات والفنانين
والبنات ليفرضوا عليهم لبس معين
أنا ضد ذلك تماما
ثانيا تقييم الأعمال الفنية يقبل على أساس فني وليس أخلاقي أو غيره
أتعاطف مع الفنانة عندما تقول أنها ذهبت وثوبها فوق رأسها
أشعر بقهر وقع عليها وعلى معظم البنات
من حقها تمشي وثوبها فوق رأسها
أو فوق كتفها
أو بدون ثوب تماما
هذه حريتها الشخصية
يعجبني مقطع أريد فني
تعبير جديد وطريف
أنا كنت ممن يتعالون على فن حنان بلوبلو
أدركت مؤخرا أنني ظلمت نفسي بعدم مشاهدة أي حفل لها
فهي توليفة من فنون الأداء والحركة
أعجبني وصف صديقي الشاعر سيد أحمد بلال لها في مقال
بأن حركتها كالقلم
مرحبا بكل إبداع
الباقر موسى
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: Elbagir Osman)
|
نقاط مشاركه
1- البلابل كانو موضوع مختلف عن ندي القلعه زمنهم مختلف ومحتوي فنهم مختلف برضو .
2- غنا البنات عمرو ماكان بشرح حالات فرديه و مشاكل شخصيه غنا البنات كان جوهرو فيهو موضوع
(مشكله اجتماعيه) بورة / زواج / مغترب / حب / .. الخ
3- الغنوة دي عندها اجندتها المامهمة للشعب السوداني من قريب او بعيد .. دي غنوة رد علي
افراد او جماعات مختلفه مع ندي القلعه .. إلا اذا كانت ندي القلعه بأهميه مشروع الجزيره
4- امن المجتمع علاقتو شنو بي (فنان) ؟ الفنان ده يا يقبلوهو الناس او يرفضوهو .. امن المجتمع
ده معيارو شنو كدي ورونا؟
5- الاشاعات عن الفنان دائما ما يرد عليها الفنان بالمذيد من الابداع دون الالتفات لي الاشاعات ..
لكن كونو يصبح محور (فن) المطرب الرد علي الاشعات في شكل اغنيات .. ده امر مضحكـ
6- اتمني ان تواصل ندي القلعه ما بداته من معالجات لاغاني الحماسه التراثيه
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: Elbagir Osman)
|
Quote: أراك مصرة على استدعاء "أمن المجتمع" لتأديب البنات
معلوماتي محدودة عن هذا الأمن
لكن سمعت حكايات مفصلة عن قوات تهاجم الحفلات والفنانين
والبنات ليفرضوا عليهم لبس معين
أنا ضد ذلك تماما
|
والله يا الباقر يا اخوى العبارة الفوق دى حيرتنى انا مصرة على امن المجتمع ؟؟؟
انا عدت للسودان منذ ثلاثة سنوات الى هذه اللحظة لم ارى امن مجتمع ولا حتى فى الشارع ولا عارفة شكلهم كيف ولا راكبين عربات شنو لهذه اللحظة يا استاذ حضرت الف مناسبة وشفت اشكال وانواع من اللبس لم ارى احد دخل فى اى مناسبة وفرض عليهم لبس او اى شىء والله على ما اقول شهيد ؟
ما نسمع كلام ونتناقله من غير ما نتاكد منو مثل ما يجرى فى المنبر ده ’
بعدين بالنسبة لندى باين عليها محتشمة وخاته توبها فوق راسها من شريط الحفلة دى النزلوا النوبى آخر حشمة ما شاء الله ,
تسلم يا اخوى
ام وضاح
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
Quote: لا يا دينق دى ما مشكلتنا ولا قلنا نفرض فنانيننا الكبار ديل على شعوب اخرى نحن قلنا حاجة عن البلابل سميرة دنيا اسرار بابكر امال النور هذا على سبيل المثال لا الحصر منو فينا اتكلم عنهن ولا قلل من قدرهن بقدموا فن جميل وكلمات منتغاه جميلة .
نحن نتكلم عن مستوى الكلمات البتقدمها ندى القلعة ليه ما بتختار غير الكلمات الهابطة دى ؟؟ |
أم وضاح.
الاغاني الانتي بتسميها "هابطة" دي موجودة قبل ميلاد الفنانة ندى القلعة. الجديد فيها شنوا؟
مش هي نفس الاغاني التي تحكي عن حال المجتمع بطريقة غنائية صريحة؟
أما حديثك عن أمن الجتمع فهذا حديث غريب ولا يشبه أي شخص يكتب في سودانيز أونلاين.
دينق.
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: Deng)
|
أم وضاح
الموضوع أن هناك فئة من المجتمع هي التى تحدد (الهابط والراقى) من كلمات الأغنيات وهى الفئة المتعلمة وبعض الفئات الُدجنة بإحتكارية لون محدد للغناء فُرِض على أنه الغناء الرسمى من خلال الاجهزة القومية.
الخطاب هنا موجه للفئات المجتمعية (الطبقية) والتى لها معايير معينة بحكم ما إستحوذته من تعليم وثقافة.
السؤال هل هناك مجموعات مجتمعية خارجة من خطابك أم أن الخطاب يشمل كل فئات المجتمع (الهابطة والراقية)؟
سأعود لمزيد من المناقشة
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: الصادق اسماعيل)
|
Quote: 1- البلابل كانو موضوع مختلف عن ندي القلعه زمنهم مختلف ومحتوي فنهم مختلف برضو .
2- غنا البنات عمرو ماكان بشرح حالات فرديه و مشاكل شخصيه غنا البنات كان جوهرو فيهو موضوع
(مشكله اجتماعيه) بورة / زواج / مغترب / حب / .. الخ
3- الغنوة دي عندها اجندتها المامهمة للشعب السوداني من قريب او بعيد .. دي غنوة رد علي
افراد او جماعات مختلفه مع ندي القلعه .. إلا اذا كانت ندي القلعه بأهميه مشروع الجزيره
4- امن المجتمع علاقتو شنو بي (فنان) ؟ الفنان ده يا يقبلوهو الناس او يرفضوهو .. امن المجتمع
ده معيارو شنو كدي ورونا؟
5- الاشاعات عن الفنان دائما ما يرد عليها الفنان بالمذيد من الابداع دون الالتفات لي الاشاعات ..
لكن كونو يصبح محور (فن) المطرب الرد علي الاشعات في شكل اغنيات .. ده امر مضحكـ |
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
| Quote: غالبا ايقاع الاغنيه حايكون تم تم و هجيج شديد امعانا في المكاواه |
والله مُؤلم يا أمّك
هو تُمتُم ذو نفسي وطني
( توبي لابساه )
( شرفي خافظاه)
لاحظ معاي ياخدر رمزية التوب وإلتصاق شرف الوطن بشرف المواطن (مشيمة بس)
الغُنوة دي من غناء البنات قسم الصناعات (اللكزس) مع رشة دبلوماسية مع نيجيريا
الفوق ده الجد
الهزار
ياأخوانا والله غاظني في الكلام ده كُلوا النُقطة المُجدّعه في الارض ديك
علم الدولة , أختامها , عُملتها إلخ تُعد من عناصر السيادة فكيف الجماعة ديل يجدعوا النُقطة في الأرض ؟!!!!
ده الغايظني
اما تغني غناء هابط , عناء صاعد ده حقها والمُستمع هو البسمع أو يرفض
موش أي جهة تانية
لكن مافي مُقارنة بالجد مع مني الخير ولا عائشة الفلاتية ولا البلابل
مني الخير أنا حضرتها (طفل) هوهوهوهوهوهولكن واعي
كانت بتغني ومحضورة الحفلات ومصونة الشرف دون إثباتات غنائية
ما إنتهيت جاي راجع أشوف موضوع القروش المُجدّعة في الأرض دي رأيكم فيها شنوا؟!!
| |
|
|
|
|
|
|
|
|
|
Re: اللكزس هدية ما علاقة شخصية انا شرفى حافظاهو ما بدور لى وصية / علاء حيمورة تعال هنا شوف العج (Re: essam&amal)
|
| Quote: غالبا ايقاع الاغنيه حايكون تم تم و هجيج شديد امعانا في المكاواه |
والله مُؤلم يا أمّك
هو تُمتُم ذو نفسي وطني
( توبي لابساه )
( شرفي خافظاه)
لاحظ معاي ياخدر رمزية التوب وإلتصاق شرف الوطن بشرف المواطن (مشيمة بس)
الغُنوة دي من غناء البنات قسم الصناعات (اللكزس) مع رشة دبلوماسية مع نيجيريا
الفوق ده الجد
الهزار
ياأخوانا والله غاظني في الكلام ده كُلوا النُقطة المُجدّعه في الارض ديك
علم الدولة , أختامها , عُملتها إلخ تُعد من عناصر السيادة فكيف الجماعة ديل يجدعوا النُقطة في الأرض ؟!!!!
ده الغايظني
اما تغني غناء هابط , عناء صاعد ده حقها والمُستمع هو البسمع أو يرفض
موش أي جهة تانية
لكن مافي مُقارنة بالجد مع مني الخير ولا عائشة الفلاتية ولا البلابل
مني الخير أنا حضرتها (طفل) هوهوهوهوهوهولكن واعي
كانت بتغني ومحضورة الحفلات ومصونة الشرف دون إثباتات غنائية
ما إنتهيت جاي راجع أشوف موضوع القروش المُجدّعة في الأرض دي رأيكم فيها شنوا؟!!
| |
|
|
|
|
|
|
|
|
essam&amal
فيصل نوبي
Tumadir
نوسة
Tragie Mustafa
ملكة سبأ
Elawad Eltayeb
قرشـــو
شول اشوانق دينق
برهان تاج الدين
Rawia
omar altom
ombadda
Alsa7afa_30
Elbagir Osman
Siham Elmugammar
علاء الدين حيموره
Deng
معتصم الطاهر
محمود ريحان
nada ali
جعفر سومي
خدر
محمد البشرى الخضر
الصادق اسماعيل
Ahmed musa
فيس بوك
تويتر
انستقرام
يوتيوب
بنتيريست