|
|
 الشينة تمتنع
|
كل فتيات القصص جميلات،،رشيقات،،هامسات،،هفهاف شعرهن،،رقيقات،،ناعمات،،حياءات،، اعني كلهن حياء
تحسب أن مسكت يد إحداهن سلاما،، لكشششششش،، وقعت اتكسرت،، فتكسر معها آخر ضلع أدمي بقي سليماً لسند القلب من الحفل الأفريقي الصاخب الذي تواً أقام
ثم أنهن كحيلات ،،،مرمشات،، اعني طويلات الرمش،،هلاليات الحاجب،،لبنيات الشفاه،، بضم اللام،،بطيئات المشية غير متلكعات
تثير تساؤلك أن يا ربي الأرض هي الماشية واللا البت دي واقفة أو ربما انا القاعد؟؟
ثم أنهن طويلات،،خاصرات،،،ناهدات،،راقيات،،طويلات الرقبة،،منكسرات النظرات
تحسب أن الواحدة منهن تواً خرجت من قالب زبدة لا هو جامد لا هو داير يتدفق
ثم أنهن لامعات،،طويلات الأصابع،، غالباً صاحبات غمازات،،لديهن فلجات،،وابتسامات قاتلات
فلو رأيت تراص الأسنان،، لاختلط عليك الامر وقلت،، يا ربي انا الابتسمت أو هي خيالات شيطان
معليش يا الشينة
لم تمري يوماً ببطلة رواية شينة
تطالعي الصحف والمجلات ،، فتمري مرور الكرام على صور عارضات الأزياء وعارضات المكياجات،، فأنت في غنى عن وجع القلب،، ثم تنتقلي للمقالات الصحفية النسائية،، فتحسبي أنه يكاد ينمو لك جناحان ،، فتطيري من الخفة،، هاهي العصافير،، والوردو،، والألوانات الزاهيات،، والبلونات،،، وحتى التي أخذت شاكوش على راسها،، لا تنيص ولا تنتحب ولا تبدو كشبح فوجئ تواً بأن لديه من الشفاه ما هو كفيل بمنافسة محترفي جمباز ،، تمتط وتمتط وتمتط ، وتنتشر وتنتشر وتنتشر ،، حتى تلامس أطراف أذنيك فتحيل حزنك ودموعك لشئ مزعج مثير للتقزز فتنهرك والدتك وتقول (يا بت ما تخلي البكا ده يبكوا فيك إنشاء الله ) إلى ما ذلك من الكلامات الجميلات أمثال (يا نحس يا فقر يا وش النقر) والذي يبدو وشه (النقر) ده فعلا وجها حزينا إذ يشبه وجهه مثل هذه الشلاضيم الباكية.
أنت فتاة عادية الجمال، وأخشى أن اقول (شينة رسمي)،،،لكني امتنع احتساباً لأجر الله،، ثم أنك كثيراً ما قرأت جمل مثل (الجمال جمال النفس والخلق) وبالطبع أن الجمال جمال النفس والخلق،،، لكن في حفلات الأعراس والليالي الملاح،، والصفوف الأمامية وتركيز الكاميرات على وجوه الجميلات، حاولي التركيز في كتب الروح،، وتذكري مواساة الأدباء،، والشعرا الفقهاء،، وارفعي عينيك من الطريق الوهمي الذي اتبعته عيناك في يداك،، فلو ناظرتي الجميلة ام عجن،،تدير زوايا وجهها يمنة ويسرة في محاولة لخداع الشينات أمثالك بأنها (ما منتبهة للكاميرا) او (عادي طوالي بيحصل كده) كأنها نجمة أوسكار اعتادت على تناحة المصورين في رسوم تفاصيلها،،،ناظريها وابتسمي إذ اكتشفت خدعتها التي قصدت بها اثبات الجمال،،،نكاية بك،، كأنها زهرة دوار الشمس حيث يسطع ضوء فلاش حيث تدير وجهها جمالاً وحياء وخجلاً مرسوم الزوايا
في تلك الساعات المباركات،، حاولي ان تفهمي أنك جميلة الدواخل ،، وانك تحملين جينات برتقالة ،، إذ تنتظرين التقشيرليظهر الجمال،،، أو في أسوأ الأحوال كبد خروف ينسلخ جلده فيظهر عن جانب غذائي مفيد،، أوووه انت لست مجرد فتاة شينة.
وإذا ما صادفك الحظ يوما في ذاك الحفل الكريم وشاهدتي المصور وهو يحول عدساته نحوك ويدير مرافقه حامل المشعل لوجهك فاعتدلت وانتصبت وحاولتي تذكر كيف بدت (ساليمار) بطلة مسلسل دش الجيران،، عندما فاجئها الحبيب في شاطئ البلقان،، فرسمتي ابتسامة بريئة عصماء في وجهك،، ودق قلبك غبطة لصحوة ضمير صاحب الكاميرا الذي لمح جمال دواخلك بغض النظر عن انبراشة أنفك،، فوسعتي الابتسامة وكسرتي النظرات ففوجئت بخشونة صوت حامل المشعل حامل الفلاش وهو يقول بقساوة زهجانة،، (بالله يا اخت سكة ) فتردي البصر صفين للوراء لتشاهدي تلك الجميلة التي قررت أن تزيد في إثبات نظرية قشر البرتقال نظرية تقشير الجمال،، فحولت جلستها من الصف الأمامي للصف الخلفي تأكيدا للمهندس ابن الجيران انها هي المعينة زاتها وان المصور سليم النظرات بعيدا عن الحولان
أنت فتاة بسيطة شينة لست من النعومة في شئ.
تستيقظي على سيمفونية الذباب إذ ينوني،،، ني ني ني ني ني،، فتقلبي رأسك شمالاً لتقابلي الشمس يميناً،، بصرة ساخنة لاسعة فتفيقي لتبحثي عن (سفنجاتك) لتجدي أن بوبي الجيران قد دخل الدار دون حياء، ومارس حياته وانبطاحته في حوشكم العامر،، فتسيقظي كرهانة قرفانة تبحثي عن (براطيش) بديلة،،وتتذكري صورة غلاف مجلة،،وكاتباتها وعصافيرهن وقهوتهن وخيارهن الذي يضعنه في وجهوهن صباحاً وحمام البخار،، فإذ تشكرين أن بخار حوشك الطبيعي ولعاب كلبك قد اغنوك عن وجع القلب هذا.
تحملي فرشاتك وتضعي معجونك بعد معالجة سفنجاتك (بدرب) موجع يزيد خرائط كعبيك وضوحا،، وتذهبي ( للحوض) فتجدي أن عدوك الكلب اللدود قد تطنبج في البلاعة وانتفش وتهزهز في (صاج) والدتك ، وشد نفساً عميقاً قوياً إذ شمشم ريحة الموية التي كسلت امس من (غرفها) فتنهرك والدتك وتفتح موالها العربي الشهير (ما لو غرفتيها من امبارح ما كان كلب السجم ده طنبجها ليك) فتضعين فرشاتك في ناحية،، وتحملين جردل الموية المقدود وتكشحين يميناً يساراً فتتشلطش الموية في ساقيك فتتذكرين نعومة نيفيا فتنتشر رائحة العفونة فتزيد انفك انبراشاً فتسعدين بخاصية البلاستيك التي اكتسبها انفك الفاضل، خبرة وسماحة منه وطولة بال.
فتحملين (خلالاً) وتبدأين نكشك وتتعبين يقوم نفسك ، وانت تشدين في هذا العنيد فتزيدي عناداً ويزيد إصراراً فيصمد بقوة تجاه الحي الذي لا يموت.
آنفاً شامخاً لا يلين لا يهين، لا ينتني لا ينثني لا عاصفة تزعزع مواقفه القوية، فتتذكرين حفل الأمس وأنك مجرد فتاة شينة جميلة الدواخل تحتاجي فقط شوية تقشير
وفي الليل ،، تستعيدين أحداث اليوم،،، يساعدك البعوض على خلق جو أليف تذكرين فيه صباح الذباب،، تخرجين سراير الحوش،،،تشاهدين الحلقة الأخيرة من المسلسل،،، تتعشين البوش،، تشدين غطاء السرير،، وتحلمين بأديب مستيقظ الضمير، يقدر انبراشة أنفك،، وخشونة ملمسك،، ورجولة شعرك،، يقدس الحياة الزوجية ودشانة أطرافك،،، يتسامح مع شقوق البلاعة،،، يتغزل فيك جمال روح،،، ويتناسى تفاصيل وجهك المنفرة
|
|
 
|
|
|
|
|
|
|
|
Re: الشينة تمتنع (Re: الجندرية)
|
العزيزة بت قضيم
ثانية تأتينا بروائعك الجميلة وتحدثينا عن الانبهار الذى تخلفه برامج التلفاز فتجعل ست النفر ترى زوجها بعد المسلسل وكأنه قرد وتتعجب كيف رضيت به زوجا وكيف تعيش فى كنفه وتخدمه كذلك بينما هنالك رجال فى المسلسلات وجوههم كالقمر ليلة اكتماله ومع ذلك لا يضيعون فرصة الا ويمطرون زوجاتهم بحلو الكلام والدلع ولا تزول كلمة "حبيبتى" عن لسانهم ابدا بينما هذا الكريه القبيح تستحيل الكلمة من فاهه الا ان كانت احتجاجا وتذمرا وتبرما من اوضاع البيت..
اووووووه يا بت قضيم
الحكاية طويل قبل وبعد وهذه المهرجانات بصراحة افسدت الذوق العام وجعلت الناس تتنكر لواقعها ولحياتها الحلوة بالبوش والونسة الظريفة بعيد عن البروتوكولات المعقدة والحياة المخملية التى تغرق كل الافلام والمسلسلات وحتى اللقاءات ..
والكلام كثير برضو
ولك تحياتى
| |
|
|
|
|
|
|
|
|
|
Re: الشينة تمتنع (Re: قرشـــو)
|
من الجدير بالسيد بكري أن يدفع لي يومية ذي حقت يومية الغسيل،، إذ اني سبت الوراي والقدامي وقعدت ليه في حوشه ذي الوتد
الليلة بالغ معاي البورد
تسلم يا قرشو
وكلامك سليم مية في المية
وقصدت ايضاً،، إحساس الفتاة الشينة كأنثى بعيداً عن نظريات جمال الروح والنفس
وطبعاً الجميلة بدون روح كجسد بلا حياة،، لكنه في جواها لا بد أنها تألم لذلك بعض الشئ
واوعى تسألني عرفتي كيف لأنه ممكن نتخابط فيها
واقول ليك نكتة قديمة جدا لكني سئيلة فحاقولها برضو
قالوا واحد شين شديد،، شديد،، شناة مرة
كل ما يتقدم لي واحدة تطلع تشوفوا تقوم تكح كده وتقول
والله ما تتعيب ما فيك عيب،، لكن انا دايرة اكمل تعليمي
المهم زولنا جاتوا نفسيات يوم في الجامع بعد الجمعة قاعد زهجان وزعلان بفكر إمام الجامع شافوا كده سألوا مالك حكى ليه القصة
المهم الإمام راضاه كده وأداه ليك شوية كثافة يا قول واحد صاحبنا وقال ليه انا كمان عندي سبعة بنات
إلا كان أديك واحدة،، تعال لي بكرة بعد العشاء والفيه الخير يقدموا ربنا
زولنا اتكيف شديد،، والفرحة ما خلتوا ينوم
في الموعد مشى للراجل المهم قال ليه الشوفة الشرعية،، البت جات تتكجول كمان شناة القردة هو النور فيه مجرور
صاحبنا كحكح كده وقال ليه،، والله يا عمي بتك ما تتعيب،، لكن انا داير اكمل تعليمي
لوووووول
حقوا تتضحك شان ما نتخابط برضو
| |
|
|
|
|
|
|
|
|
|
Re: الشينة تمتنع (Re: اساسي)
|
غايتو دي جبتها يا اساسي
الشينة فيها حبة لئامة وثقة
وهسة لو تقمصت شخصية الشينة (وكدي علق في الحتة دي) اقوم اعاين ليك كده بي حدرة وانخنخ واقول ليك
بس يا كريه
والله ما خاتية بت الناس كان قالت عليك بتاع شكل ودفار
دفار دي من عندي بس عشان تظبط الحس الموسيقي
غايتو انا عندي مشكلة مع الطفل الشين
لأنه الزول الكبير ده بقدر يعمل حاجات كتيرة يتجنب بها شناته كما جاء في حديث شيري تحت،، تحت البوست لاني عنقلت ردي ده فوق
المهم أنه اللذيذة أن السودانية الام لما تجي تدلع ولدها الشين تقوم تقول ليه
الشناة من الحلاة
الحلاة من الصلاة
الصلاة من الشناة
الشناة من الصلاة
ويسمونها بالعربي السوداني (الدقلشة) يدقلشوا البيبي بي شناته لما شلاضيمه يطلع ليها شلاضيم تانية
ورحم الله جميع شيناواتنا على وزن حسناواتنا
وتسلم وتسلم ندى بي شناتها
| |
|
|
|
|
|
|
|
|
|
Re: الشينة تمتنع (Re: بت قضيم)
|
تماضر
وجندرية
انا زاتي حقو ادخل ولو انو لو دخلت ولو طلعت الكلام تحته خط
على فكرة لما القاكم في بوست انتوا الاتنين مع بعض اصاب بانتعاش
غايتو قلبتوا الهوبة في إنسراب العشق
اعتقد من الجميل أنكم تفتحوا بوست مع بعض تسموه بوست تماضر وجندرية،، والله تسوى العجب،، وكميات من الإنشراح تصيبنا
قرجة
اكيد انت ما دخلت كاسوري قريب طارت فيها سنك والراء؟؟؟
انا زاتي منتظرة
| |
|
|
|
|
|
|
|
|
|
Re: الشينة تمتنع (Re: بت قضيم)
|
سلام مربع
حبيبة البي بت قضيم
جابتني هذه الدعوات الحلوات الماحقات الساحقات التي صحتني من عز حلمي الجميل بانه ربما ياتي يوم ويصلح هذه الكريمات التي احملها معي يد بيد وشنطه بشنطه
ليلي ونهاري
وفي ادبار الشموش
عسى ان تفلح يوما وتصلح ما ابطشته الطبيعه فيني
واكون يعني ليس بذاك القدر من الانكشاحه او انفراجه بزاوية كبيرة اوي لجمالي الطيني اللاذب
لكنه الامل وذاك الكريم وذاك الكريم
وهذا الكريم
وهذا الشامبو وحده من ينفخ فيني
هذه الكميات الكبيرات والكيمان من الامل
اهو مايكل جاكسون يتراءي لي زي الطير الخداري
مع اني ما شفت الطير الخداري
لكن اهو كان زي الطير الخداري وبقى كروان او طاوووس عديل كده
ولما لا .. انا طينيه التكاوين صاااح
لكن جاكسون ومافعلته به الكريمات والتصليحات والترميمات اعطاني هذا الامل
تركت هذه الكريمات في (ضرى) المزيره اصلي الكهرباء من مامقت من النوم قاطعة ويقول صيدلاني ان الكريمات يجب ان لا تغيب عنها البرودة
وبما ان صرااااخ _(الماما) كان اكبر من اتجاهله عنوة واقتدارا
فكان لابد ان اجي متدحرجة حتى اغرف البلاعة غرفت غرفت سرعة
ربما تحن الادارة علينا وتجيب الكهرباء قبل ان تفوتنا
المسلسلة المكسيكيه كذبة بيضاء
واتفن وافرشن في نص السرير لانسي انني شينه
يعني لازم نغرف البلاعة
اهو انا جيت رغم اني شينه
بس امك دي اعمل ليها شنو
التقول البلاعة دي قاعدة ليها في راسها
مما تقع فيها نقطه تكورك
البلاعة يابت اغرفيها
يغرف دمك
البلاعة يابنات اتملت
انشاء الله الموت اليبلعكن
اهو جينا نشوف ازمريلدا
عشان نعرف كيف نغرف البلاعة
| |
|
|
|
|
|
|
|
|
|
Re: الشينة تمتنع (Re: shiry)
|
شيري السلامها مربع
مرحب بك ونفي التهمة
ونصيحة مني ، توقفي عن مشاهدة المسلسلات المكسيكية لأجل الصحة العامة
والذي يثير الدهشة،،،أن يا كافي البلا وحايد المحن،، البنات ديل لا يوم وقعن اتشلخن،، لا يوم قامت فيها حبة وطاب لها المقام فجابت معاها العيلة الكريمة ، سكنوا الوش وبوضع اليد استغنوا عن الوش،، فاصبحت الحبة وعيلتها وكريماتها هي الوش والوش ضاع في حق الشيطان الرجيم
ولما تشاهدي وحده بهذا المنظر تقولي ليها طوالي،،، ويييييين يا وجع الوش،،، وزمان كانوا في السودان الصعاليك يعاكسوا صاحبة الوجة المحبب فيقولون،،،وييييييين يا ترابيزة النجار،،،
ثم أني لا اظن أن مثل هؤلاء الجميلات توحمت أمهاتهن عليهن ببصل ودكوة وشطة وتبش وطين بحر وأم فتفت وتلكم الأشياءات اللذيذات
يعني المفترض يطلع لينا وش بشبه شنو مثلاً برا المرارة أم اتي ومساختها؟؟؟
وسبحان الله أني لما فكرت في الطبيعة الإنسانية أو طبيعة الحياة،، وجدت أن الله ربما خلق لكل بني آدم شكلاً ولوناً وشعراً يتكيف مع المكان الذي يعيش فيه
الأفريقي أسود ربما ليتحمل حرارة الشمس،، والعكس بالنسبة للألوان الأخرى
وربما لو كان لنا شعر طوووووووويل ناعم لكرهناه مع الحر وكهربتنا القاطعة دي
وهكذا
إذ لا بد من وجود سبب منطقي يقنعنا بالشناة والبشتنة
وفي كل الأحوال،، وبما اني لي غرض دفين ،، ونقول انتي حتطنشي وما تفهمي ما هو الغرض ده،، سأطالب بحفظ حقوق الشينة في الروايات
فيها شنو يعني غلط تكون شينة وبطلة؟؟؟
مشكلة والله
وربما بالمثابرة والعمل الجاد الفعال،،ربما يجئ اليوم الذي تنقلب فيه مقاييس الجمال العالمية،،، فتذهب إحداهن لطبيب التجميل وتقول،،، ارجوك يا دكتور،، عايز ابرش نخرتي ذي ووبي قلدبيرج واللا اسمها منو ما بخبره،،، فتدفع في هذه الإنبراشة الثمن الغالي،، وتصبح الإنبراشة والتلوشة هي رمز الجمال العالمي،، بدلاً من الأنف الكيوباتري والشفاه الفراولية،، زاتنا ما بنحب الفراولة ياخي
| |
|
|
|
|
|
|
|
|
 Re: الشينة تمتنع (Re: بت قضيم)
|
غايتوا ما جاي شمتان
لكن اديكم هدية جميلة ومفيدة جدا
يوجد الان بالاسواق كريم منتج من جوز الهند اسمو بارشوت وكان زمان زيت شعر
وهذا الكريم بعد التجربة علي البنات والاولاد وشخصي الضعيف
افادنا واوقف الزحف الصحراوي عندنا وافاد ابنة اختي جيدا وانصلح حال شعرها
ويمكن يقلل الشنا شوية
جربوه
| |
|
|
|
|
|
|
|
|
|
Re: الشينة تمتنع (Re: garjah)
|
والله يا قرجة جههتنا عديل كدا
نحن نبحث عن الفائدة لبناتنا وانت تحاسبني عندي دكان ياقرجة ولا امكن دخلتوا المملكة والخليج انا
اهسي يمكن يكون في تاجر ياخدوا السودان ويستفيد منو ويكون عضو معانا
لكن امانة عليهوا كان عملها يدي بكري حقو
ويديني كومشن
ويمكن تعملها انت يا قرجة تقلب وتجي خلال اسبوع
| |
|
|
|
|
|
|
|
|
|
Re: الشينة تمتنع (Re: مهاجر)
|
مهاجر
قالوا واحدة شينة شناة مرة
وقفت قدام المراية قالت ليها
يخسسسسسسي عليك،،، حتى انت غشوك؟؟
لوووووووول
شكرا للإعلان المجاني،، والذي اظن يا قرجة أن بكري لن يقاضينا عليه ربما دعى لنا،،إلا إذا كان يا مهاجر هذا الكريم له علاقة بالبارشوت والطيران فعلاً
فمن الناحية دي،،اطمن،،،الزول ده،، اقصد الشعر ده،، طاير من الله خلقه،، وفي نفاثة كمان ما البارشوت الهين ده
وشكراً للنصيحة ويا صيدليات النهدي جاك البلا
وليحفظ الله السودانية إذ ترعى شركات الكريم المختلفة وتكون سبباً في رزقهن واستفادتهن من الشناة والشعر القرقد
حقوا يدونا شهادات تقدير والله
| |
|
|
|
|
|
|
|
|
|
Re: الشينة تمتنع (Re: بت قضيم)
|
استاذي حمزة
وما شفتني بس في بيت بكا
اعجبك واطير ليك البكا في راسك،، سجع وجناس وطباق ولاااااا المتنبي
بعدين قالوا الفتاة الشينة تتقن الوصف لتسحر الفتاة السمحة
فترديها قتيلة في شان سماحتها دي
واتذكرت بت قضيم الأصلية (الفاضل سعيد) في واحدة من المسرحيات ،، لما شاف ليه بت سمحة شديد،، وبدا يوصف
واي انا جاتني الرجفة
واي انا ريقي جفا
واي انا بلعت السفة
بالله ده ما بقرضها اكتر مني؟؟
| |
|
|
|
|
|
|
|
|
|
Re: الشينة تمتنع (Re: almohndis)
|
المهندس
الكرت لطيف
ولا ادري لماذا ذكرني بمقولة سودانية ترددها عادة الحبوبة فتقول
سعد الشينة سمح
ربما لظنهن أن البت الشينة يحبها الرجل السمح لخلق نوع من التوازن البيلوجي الطبيعي
ثم تجئ لتنفي ذلك وتقول
شبهينا واتلاقينا
فتظن أن الشينة تقابل الشين للراحة النفسية التي يطرحا كلا في نفس الآخر،،، يعني لا داعي لمحاولة انكار الشناة طالما الجميع مشترك فيها
وعموماً
نرجع نقول من تاني،،، الجمال جمال النفس والخلق،،، مؤازرة حقيقية لبعض الشينين
وتسلم للمشاركة
| |
|
|
|
|
|
|
|
|
|
Re: الشينة تمتنع (Re: بدرالدين شنا)
|
بدر الدين سماحة
انا ما عارفة السماك شين مالو معاك
بالجد انت ما شين
ولاحظ اني حوصة
وبعدين موضوع (انتي زولة رااايعة ودواخلك جميلة) ده،، بنرفزني ما عارفة ليه
دواخلي جميلة دي يعني اجيب معاي كزلك واللا شنو؟؟
ومع ذلك
أهلاً وسهلاً بك ودواخلك الجميلة
نورت المكان يا جميل الروح
| |
|
|
|
|
|
|
|
|
 Re: الشينة تمتنع (Re: بت قضيم)
|
قالوا في مجلسنا العامر هذا أن الشينة منكوره حتى لو أدت القسم شأن كل الوزراء والولاة والرعاة والحواة والحفاة العراة وأزيد بأن السمح سمح كان قام من النوم والشين شين كان إستحم كل يوم وده برضو برجعنا لى حكاية اليقين والقناعة وكلام العمدة الحبيب قرشو كل ما أصابته فلسة أو ضربته ديون تحت الحجاب الحاجز أو حان موعد تجديد جواز سفره الأمر الذي يكون معه رأس عمدتنا بجلالة قدره يانعاً حان قطافه.
وصاحب الشكل الدميم هو حتى في أساطير الأولين يمثل الشر ووسيم الطلعه سواء حاسب أم لم يحاسب الحساب مدفوع لأنه يمثل عادة جانب الخير والمفارقة أنه لا الشين ولا السمح لهما يد في شكلهم ولن تجدي هنا حكاية ليس لي فيه يا فتاتي يد أو هذا ما جناه على أبي وما جنيت على أحد.
| |
|
|
|
|
|
|
|
|
|
Re: الشينة تمتنع (Re: almulaomar)
|
الملا صديق الوجع والبعوض
أعميل لرفع ضغطي انت؟؟
تكرر هذا الحديث الكريه بأن السمح سمح لو لسه صاحي من النوم والشين شين لو استحمى كلو يوم
نتير يعني واللا نشوي سنو؟؟؟
بعدين ياخي ما شفتهم كيف في التلفزيون بنوموا 25 ساعة في اليوم وبصحوا مظبطين وعوجة ما جاتهم نفس الملامح والخصل وجرة الكحل؟؟
الواحدة يا كافي البلا تغرق في البحر وينتشلوها وتموت والروج لا يتزحزح قيد أنملة
عموماً،، ورغم أن الانسان على رأيك لا علاقة له بكونه سمحا واللا شينا،، لكن سيبقى الشين منكوراً في القصص والروايات،،، والمسلسلات والأفلام حتى كما ذكرت
ولو أنه الفن العربي تطور شوية في السنوات الأخيرة فاصبحنا نرى وجوهاً ليست بذات الوسامة التي كانت تشترطها السينما لبطل الفيلم قديما
لكني اظن أنه مع التقدم العلمي والتكنلوجي في مجال الخداع البصري وفن المكياج والتخفي،، اصبح من الصعوبة بمكان فرز الجميلة من الشينة
وهناك مقولة يرددونها دوما ًأصحاب الصالونات الفرنسية التي اشتهرت بالأناقة وصنع الجمال فيقولون
لا توجد امرأة قبيحة وامرأة جميلة
هناك امرآة تعرف كيف تظهر جمالها وأخرى لا تعرف كيف تهتم بنفسها
والغريبة قدر ما جلبطنا الديانا كلام الخواجات ده ما بقى لينا
لكن الله كريم
بدي الجنة ما بدي الشينة حبة شعر وسماحة؟؟؟
| |
|
|
|
|
|
|
|
|
|
Re: الشينة تمتنع (Re: بت قضيم)
|
الأخت بت قضيم
حاأسيب الموضوع كلو وأكنكش في الفقرة دي
هناك مقولة يرددونها دوما ًأصحاب الصالونات الفرنسية التي اشتهرت بالأناقة وصنع الجمال فيقولون
لا توجد امرأة قبيحة وامرأة جميلة
هناك امرآة تعرف كيف تظهر جمالها وأخرى لا تعرف كيف تهتم بنفسها
وأقول مستعيناً بالله كذب الخواجات وأصحاب الصالونات سواء كانت صالونات تجميل أو عربات على شاكلة ليلى علوي والرينجروفر ، وبالله عليك في نوع شناه كده ما برفعو ليها الضو زي ما بتقول الحبوبة صفية عليها رحمة الله ، صحيح الأناقة ووضع المكياج المناسب شئ قد يخفي بعضاً من الشناة الظاهرة لكين حا تقولي شنو لي واحده هبله وشيلوها طبله قالو ليها ده المكياج وهاك يا جلبطه ومسيح والوش تشوفو تقول جبة درويش ، وهناك برضو نسوان على الطبيعة من بوادي السودان المختلفة ما شافن ديانا ولا بعرفن هيد أندشولدرز يا دوب على الودك لكين يقلبن اللوري في الدقداق من سماحتن.
صحيح يا بت قضيم يا أختى الله بدي الجنة ، لكين الله جلت قدرته خلق النار زي ما خلق الجنة ولو أدى الشينة شوية سماحة وحبة شعر نقيس الجمال بي شنو إلا بالياردة أو المتر المربع ، والشاعر قال والضد يظهر حسنه الضد. ولولا ظلام الليل ما طلع الفجر وحاجات زي كده يعني.
| |
|
|
|
|
|
|
|
|
|
Re: الشينة تمتنع (Re: almulaomar)
|
الملا عمر
يسمونها الشناة المرة،، شناة تشيل العافية وتصنقر بدالها،،، وده كلام حبوبتي انا،، بس كلو فولة وليها كيال،، تصور برضو بلقوا البعجب بيهم؟؟
وبمناسبة المكياج،، اتفق معك،، فمن ضمن ضمن عيوب الفتاة السودانية،، عدم إجادتها لهذا الفن الذي من المفترض به إظهار جانب جمالي طبيعي
يعني ما لخبطك لخبطك (على رأيك) فلا تعلم هل هذه فتاة أم بلياتشو بهزر معاك
ثم أنهن لما يرين تلك المكياجات في التلفزيون،، لا يدركن أن هذا المكياج الذي تضعه هذه النجمة سواء كانت نجمة مسلسل واللا فيلم واللا عرض ازياء واللا حتى نجمة حنة التاج،،، وضعوه لها بناء على تكوين وجهها وزواياه ولون بشرتها ووضع الكاميرا و و و و
يعني دراسة كاملة ولو اني اظنها دراسة فاضية ساي
الملا عمر
(ساي) دي يعني شنو بالضبط؟؟؟
في حفلة أخيرة ،،وجدتهن جميعا تقريباُ ، يضعن أحمر الشفاة ذو اللون الداكن الأقرب للسواد
يعني الواحدة عندها تلاليش عديل وتقوم تركب ليها فيهم اكستنشن إضافي،، توصيلة يعني لزوم الثقة وكثافة الشعور
ليه؟؟؟
ما تعرف
البعض يرسم رسوما غريبة في وجهه كلها شعارات لفرق عبدة ا لشيطان والهبز وما إلى ذلك،،، فلما تسأل المراهقة العويرة دي عن ماهية هذه الرسومات،، تجاوبك بلكنة مكسورة ،، ده تاتو موضة
فتندهش
تاتو يا بت اللذين واحنا عندنا الحنة تراث من دهور قديمة مضت؟؟؟
واحدة فيهم عاملة ليها أحمر شفاه فضي،، وانا من الأساس لا ادري كيف يسمى (أحمر شفاه) ويعملوه فضي
على ألوان بشرتنا حاجة فعلاً يليق عليها كلام حبوبتك إذ تقول (شناة يرفعوا ليها الضو) دي يرفعوا ليها شموس عديل كده
أما النسوان ذات الجمال الهادئ الذي ذكرت،، البقلبوا اللوري في الدقداق،، وانت تعال،، اللوري ده متحيل؟؟
لوري هو واللا دباب؟؟
جمال تلك النسوة ينبع من إحساسهن بالثقة
النظافة،،، وال(جيهة) السودانية أو لنسمها بلغة المثقفاتية (النمو في بيئة صافية لا شوائب ودواخل فيها) وانا عارفة انو كلمة دواخل دي دخلت غلط ذي حمودة بتاع الجامعة
أما ما جاء في حديثك أن الشينات خلقن لإظهار جمال الجميلات،، فما ليك حق والله
يعني هسه لو ما سلمى الحايك أنا ما كنت جيت؟؟؟
قادر الله يا الشينة
| |
|
|
|
|
|
|
|
|
|
Re: الشينة تمتنع (Re: بت قضيم)
|
عزيزتي بت قضيم
بوستاتك الرائعة العجيبة
موضوعك لذيذ والله
بس باقي ليك في واحدة حايمسها الكلام ده
يعني في شينة مقتنعة بكده
مافي مابتصدق على قولك حتى المرايا
حتقول ليها غشوك انتي برضو
فعشان كده احنا كلنا بوستك ده مابنمتنع عنه
اسمعي رايك شنو في بطلات المسلسلات المكسيكية؟؟؟
تحياتي
| |
|
|
|
|
|
|
|
|
|
Re: الشينة تمتنع (Re: Hozy)
|
بالمناسبة يا بت قضيم ما كل ابطال القصص شينات
في زول كدة قلب الهوبة وعمل ليه بطلة شينة شنا مرة..في سلسلة فانتازيا
بتاعة د.احمد خالد توفيق..لا وايه اسمها عبير..اخير ندى بتاعة اساسي..
بس عندي سؤال ليه اي بت حلوة شديد بتكون مصاحبة ليها واحدة شييينة.
النوع البتشوفو تقول ..كر من الدوم المر..
بعدين البت ام حبوب بقولو عليها تربيزة لحام...ما عارف نجارة دي نجرتيها من وين...لأنو اللحام بترك اثار وندوب على التربيزة وهي لا تزول بزوال المؤثر...
بس سؤال اخير انتو بطلات وابطال المسلسلات اللاتينية ديل بجيبوهم من وين؟؟والافلام الهندية برضو معاهم...
| |
|
|
|
|
|
|
|
|
|
Re: الشينة تمتنع (Re: جدو)
|
عبير ما شينة مش عبير الصحفية؟؟؟
ما شينة ما شينة بس هي جادة وبتلبس نضارات وجنها بناطلين وشلاقة
انا شفتها ما تغالط
كر من الدوم المر
دي قلبت فيها الهوبة
يا اخوانا الليلة كميات ضحك في البورد ده ضحكتها
النسوان بقولوا عليهم (الاتنين ديل يعني) (كف العين) ،، وقد يكون تبادل مصالح،، الشينة تتملى بجمال الحلوة،، والحلوة بعمق الشينة
وهنا سؤال جديد
لماذا في الأغلب توصم الفتاة الجميلة بالسطحية والتفاهة وصغر التفكير؟؟؟
والعكس صحيح
والبت ام حبوب بقولوا ليها ترابيزة النجار لأنها بتدقدق بالمسامير وبتترك برضو آثار ندوب وحفر
ترابيزة حداد يمكن مطورة شوية
أما بطلات المسلسلات اللاتينية فاعتقد بجيبوهم من الحتة الما جينا منا احنا
مؤكد
والهنود ما بعجبوني
شعرهم زاتو ما عندنا ليه موية تغسلوا
شفت القناعة دي
| |
|
|
|
|
|
|
|
|
|
Re: الشينة تمتنع (Re: بت قضيم)
|
شخصيتهم باهتة وثقافتهم متدنية
بس عليك يا هوزي
ده سؤال؟؟؟
بمرضوا يا هوزي
عديل كده بمرضوا
أنا كلو كوم،،، وألوانهم كوم
وإذ في هذه السانحة تخطرني أغنية سمجة (عذراً لصاحبها) تقول
لون المنجة،، يا الشايل المنجة
فلا تفهمين،، الزول ده بتغزل في البت واللا بحب المنجة
تشبه الأغنية لو كان قاصد المنجة المجردة،،قصيدة حلمنتيشية ما ليها اي دخل بموضوعنا ده ،، بس الكلام بجيب الكلام،، قصيدة بعنوان (الاستيكة) سمعتيها؟؟
وعودة لموضوع البنات المكسيكيات الجميلات حد الإحساس بعدم جدوى ناس سعد قشرة جميعهم بكريماتهم،،، هن جميلات جمال قوي،، يعني تحسي الواحدة فيها جمال مميز وعنفوان فرس،، يعني ما عويرة،،، بهن شئ مميز ربما رائحة السمار الجميلة التي تنتطلق منهن
والقوة والطباع الشرسة في نعومة
انا ما عارفة بقول في شنو بالضبط لكن الكلام في هذا الموضوع ما كويس
بجيب لينا المرض قلنا ليك
يا هوزي حقوا تقعدي ساي،، كأنو في زول بقعد ما ساي
| |
|
|
|
|
|
|
|
|
|
Re: الشينة تمتنع (Re: doma)
|
سلام مربع
تماضر
انا غايتو اخاف عليك يا جميله من شناتي دي
وهترشتي اذ ثبت علميا ان للشناة علاقة طرديه مع الهترشه
يعني كلما زادت درجات هترشتك
كلما انحرفت اكثر للاتجاه الاخر
من البنوت السمحات
واصبحت غاب قوسين او ادني من الشناة
وهذا يعني ان خطوط الحظ عندك تتخاصم وامكانية حصولك
على (عريس) مرتاح
فالحلوات دائما بكملن هن
وبعد داك للنصف حلوات
وبعداك للكريميات
اذا مرات كثيرة وفي حالات الشناة الخاصة جدا
لا تنفع كريمات ولا ايادي حراجي التجميل
حتى ميكانيكا الطائرات والالكترونيات يقف عاجزا
في عمل شيء
وهذا الامر يوديك واقصدني انا شخصيا
الى كنبات الاحتياط والبيوت المحميه
اي انك اصبحت شوية شوية بايركس
وربنا يحفظنا من الفعل البايركسي
وبما انني احبك (مررررره) على قولة اهل الحجاز
فتجديني انقز لا عن حبيبة البي بت قضيم
وازهم عليها انو نوقف هترشتنا شوية شوية
سلمت ياطيبه
| |
|
|
|
|
|
|
|
|
|
Re: الشينة تمتنع (Re: shiry)
|
ازيك يا بت قضيم
الليلة غايتو ضحكتيني ضحك و كمان قلبتي على المواجع
بس فعلا الحاجة الماتفهميها
انو اذا اتكلمت في السياسة و لا الادب و اجدت او كتبت في المواضيع دي طوالي الفكرة بتكون انو لانك شينة لازم تكوني بتفهمي
يعني على اساس بتغطي على شناتها
اما طبعا الجميلات ما بحتاجوا اساسا موضوع يعني هم بس يقعدوا
و المواضيع براها بتجي
و بعيد عنك كدا انا ابدا ما بحب الصور
علشان الواحد ما تجيهو نفسيات ساي
و الله يا بت امي يا بت قضيم
الحال صعب
يعني تتكلمي و تكوني جميلة يقولوا دا شنو ما تسكت
و تسكتي و انت شينة يقولوا شناة خلقة و اخلاق
يعني كرهونا التبش
بس برضو شينين و عاجبننا
و رأيكم شنو نعمل رابطة الشينات
و بعد شوية نقلبها اتحاد و هكذا
و نصدر مجلات ما فيها غير صور الشينات
و زاوية كيف تزيدي من شناتك
و ركن الشناة العالمية
و مسابقة ملكة شناة العالم
و شوية شوية نعمل لينا قناة تلفزيونية فضائية
و كل المذيعات شينات
و كمان بيقدموا اخبار الحرب
و تبقى عليهم ميتة و خراب ديار و شناة
شفت كيف
اها و ننزل مسلسلات مدبلجة و البطلة شينة و برضو بيعرسها البطل و السمحة الشريرة
اها بعد دا شفت ليك غيظ اكتر من كدا
و بعدين يعني حكاية الاسم
كان قالوا ليك اسمك منو اوع تقولي عزة و لا اسراء و لا سهى اذا كنت شينة
و لا الا كانوا لك بالمرصاد
غايتو يا بت قضيم الليلة خليتيني افش خلقي تمام
اها انا ماشة و لينا موعد
في طاولة الشناة المستديرة
سلام
| |
|
|
|
|
|
|
|
|
|
Re: الشينة تمتنع (Re: salam)
|
العزيزه الذيذه بتقضيم
و كل الشينين والشينات والسمحين والسمحات
اسمحو لي اقول ليكم الكلام الانتو مقتنعين انو ما صاح
بالجد الجاذبيه هي العامل الاهم في الموضوع
و بالفعل الجمال دا شي نسبي تماما
و بتدخل فيهو حاجات كتيره غير الدواخل كمان
والناس اذواق ومزاجات
و اي زول لو اتعودتا عليهو بتشوفو سمح
والمحظوظ البتجتمع فيهو كل الجماليات
لكن الكمال لله
و ربنا برضو عادل اكيد الحكايه بتتوزن بي طريقه ما
و حتى الجمال ممكن الزل لو اتعود عليهو يكون ليهو عادي و قد يرى الجمال في نغيضه
البيض عايزين سمر و السمر عايزين بيض
الشعرو ناعم عايز يجعدو والشعرو مجعد عايز ينعمو
يعني مافي قواعد مطلقا
عشنا في الهند شنوات الدراسه
و الهنديات مشهورات بالجمال ولكن اسالو اي زول كان هناك انو مع كميه الجمال دي عامل الانجزاب كان شبه معدوم
و ذلك يوكد ان جاذبيه الشخصيه هى الاهم
كلو زول يحمد ربنا على ما اعطاه
يديك العافيه يا بت قضيم
| |
|
|
|
|
|
|
|
|
|
Re: الشينة تمتنع (Re: doma)
|
دومه السمحة
كلما أقرأ اسمك اتذكر شارع الدومة في امدرمان والذي حكوا عنه حكايات عجب
كيف أنهم بنوا شارعوا الظلط (هم ببنوا شارع الظلط واللا بسفلتوه) المهم بنوا شارع الظلط وتركوا الدومة في النص،،، لأنهم يقولون أنهم لما حالوا قطعها،، النار قامت ذي القايدها شيطان،، واتهموها بأنها مسكونة فتركوها خوفا على الأنفس والأموال
ليس لدي فكرة لو كانت الدومة هذه ما زالت موجودة،، تخيلي نسيت اسأل عنها؟؟؟
المهم يا الدومة السمحة وما شينة
أنا اظن فيك السماحة،،، لأنه البت الشينة يستحيل تسمى نفسها اسما شينا،، باعتبار أن الدومة راسها مقودس وما سمحة وبتلصق قشها في السنون
البت الشينة في الأغلب يصدمك شكلها مع وقع اسمها
فتجدي سماهير ووش لا يختلف كثيرا عن القفا
حاجة كده تزعل بالجد
وشفتي الحالة دي؟؟؟ حتى الأسم الجميل نستخسره فيها لا شعورياً
بس ما تسأليني اسمي منو،،، بتجيك رجفة
| |
|
|
|
|
|
|
|
|
 Re: الشينة تمتنع (Re: بت قضيم)
|
..
.
احم احم..لي الاحراج ده بقي..
غايتو الحمدلله على كل شي
..
.
وحديث الشنا يطول..الموضوع ده مهم في المجتمع لانو بمثل 99.1%لذلك لازم نجد ليهو حل؟؟؟؟؟؟؟؟؟؟؟؟
سلام للكل..
كيفك يا بت قضيم؟؟الكلام ده عوجه لكن الحمدلله برضو..
انا بس مقتنعه بموضوع اي انسان الله ما اداهو جمال كافي بكون اديب شاعر كاتب اي شي.يعني فيهو ميزه جميله جدا.
و بعدين الله يا جماعه ما بدي كل شي و اي شي لحكمه مش بقولو البت الجميله بتكون محدوده الذكاء و لا انتو برضو بتفضلوها محدوده الذكاااااء...؟؟؟!؟
مشكله الرجال..البت السمحه
مالم الشينات ممكن اكونو احسن ناس..؟ولا كيف
الحاجه التانيه انو الجاذبيه برضو مهمه على راي الاخ ايهاب و الجمال اقساام يا جماعه...
يعني ممكن تكون بت عاديه لكن تحس انو فيها حاجه مختلفه...
..
.
ونوادر الشنا كتيره لنا عوده
تحياتي
| |
|
|
|
|
|
|
|
|
|
Re: الشينة تمتنع (Re: solara)
|
سولارا الحبيبة
انتظر نوادرك بفارغ الصبر
وكلامك لا غبار عليه ابدا
انا بالجد مقتنعة بيه،، لكن البقنع الديك منو؟؟
وخلينا جد شوية بدون النظرة السطحية لهذا الأمر
فعلاً الله لا يحرم الانسان من كل شئ كما لا يعطيه كل شئ
وربما للفتاة الشينة الفرصة الأكبر للتركيز في دواخلها وبناؤها ودعمها بالثقافة،،فالمحافظة على الجمال هم أكبر من هم التفكير في كيف تكوني جميلة
ثم انه المرأة بالذات لا يكفي جمالها بدون شئ اساسي فيها غير الروح طبعاً،،، وهو نظافتها وعفتها ،، ودي اهم من الجمال ومقاييس الجسد
لكني برضو اتساءل،،، لماذا تضهد المرأة الشينة في الأدب؟؟
وتسلمي ولا تحرجي
قطع شك معاي ما في اي احراج
وبركة الطلعتي شوية من مووود الزهج
اضحكي يا بت وانسى الدنيا ما مستاهلة
| |
|
|
|
|
|
|
|
|
|
Re: الشينة تمتنع (Re: بت قضيم)
|
شرشور
وهنا تلفتي النظر لنقطة مهمة
غير السطحية والتفاهة التي في الأغلب يوصمون بها البت السمحة،، توصف أيضا بالبومية إذ يقولون (سمحة والله سماحة شديدة لكن قاضمة طوالي التقول البومة) واناغايتو ما عندي مانع اكون بومة ،، على الأقل البومة ما حوصة،،،وانا معاك،، حقو يعني نتسد شوية عسى نكون سمحات وبومات
يا اخواني ردودي اتعنقلت كلها غلط والبوست بقى عامل ذي لحم الراس كل كلامي محوص فمن شابه عيونه ما ظلم
ارد على دومة في رد إيهاب؟؟؟
بالغ الحول معاي والله
| |
|
|
|
|
|
|
|
|
|
Re: الشينة تمتنع (Re: بت قضيم)
|
الاخت بت قضيم
حقيقة جوز الهند هو احسن كريم للشعر بعد الزيت كان الاول الان كريم باراشوت حاجة ممتازة جدا وذو فائدة عظمي
وصلح شعري شوية بعد كان ذاهب الي الخفة العجيبة اصبح الان مليان مية المية
ولو ما لقيتي في الصيدلية تلقي في البلد في دكاكين الهنود
اما الشناة انا ما بكتب فيها لانوا اتمغست منها في الهند لما امشي مع بعض الزميلات لكن كانت روحهم خفيفة
| |
|
|
|
|
|
|
|
|
|
Re: الشينة تمتنع (Re: مهاجر)
|
مهاجر
نطمئنكم اننا قمنا باللازم
ورائحة البارشوت تملأ نخاشيمي فتحيلني لحلم جميل امرر فيه اصابعى على شعري فتطلع سليمة دون أن ابحث عن اظافري المفقودة جراء حرب الداحس والغبراء
مرة وانا صغيرة ،، في المواصلات،، بتاع الحافلة كورك فيني صحاني مفزوعة إذ انني كنت في الطبقة الثالثة عشر من حلم السماء
هو في الحقيقة الكمساري الكورك فيني،، واتنرفز وقال
يا بت ما ترفعي راسك ده جلبطتي القزاز كله كركار لسه ماسحينو الليلة الصباح
وكنت صغيرة وعويرة،، فحبس حلقي دموع لو نزلت لغسلت له حافلته بكل ركابها كمان
ومن يومها وانا ابحث عن هذا الكريم الذي لا يجلبط قزاز الحافلات
لان الداكس بجلبط
والياردلي بجلبط
وبريل كريم يزيد شعرنا جفافا،، لانه عملوه للناس الشعرها دهني
وكل الزيوت بطبيعة الحال من زيت سمسم لجوز هند لغيره
لنجرب البارشوت عسى الله يفتح على الشعر بالطيران كما طار شعر سميرة سعيد في غنية عويرة كده ما متذكراها كويس
ونشكر المعلم علي حسن سلوكه
اعني نشكرك كثيرا احنا والجيران واخواتي والعايلة الكريمة وناس صيدلية النهدي على النصيحة الغالية
| |
|
|
|
|
|
|
|
|
|
Re: الشينة تمتنع (Re: بت قضيم)
|
العزيزة بت قضيم
انشاء بنفعك الكريم ما الزيت ما تكوني مشيتي جبتي زيت جوز الهند
كريم بعلبة صغيرة ومفيد للصداع ايضا لانوا طبيعي وجوز الهند دا فيهوا اسرار كثيرة جدا وكنا ساكنين مع طبيب اعشاب وكل بيتوا شجر جوز هند
اها عندنا اخونا بحب يعاكسوا اي مرض يقولوا ليهوا عندي كذا وعندي كذا الا ويطلع ليهوا حبة مصنعة معظمها من جوز الهند
وانصحك اياض باكله واذا لقيتي الموية بتاعتوا برضو اجقميها
برضو نصيحة هندية اوعاكي تغسلي شعرك بالموية العادية وغسليهوا بموية الشراب ودي برضو مجربة عند الهنود لانها لا تحتوي علي املاح كثيرة واملاح البلد خليها ساي
ولكي خالص تحياتي
| |
|
|
|
|
|
|
|
|
|
Re: الشينة تمتنع (Re: بت قضيم)
|
العزيزة بت قضيم
انشاء بنفعك الكريم ما الزيت ما تكوني مشيتي جبتي زيت جوز الهند
كريم بعلبة صغيرة ومفيد للصداع ايضا لانوا طبيعي وجوز الهند دا فيهوا اسرار كثيرة جدا وكنا ساكنين مع طبيب اعشاب وكل بيتوا شجر جوز هند
اها عندنا اخونا بحب يعاكسوا اي مرض يقولوا ليهوا عندي كذا وعندي كذا الا ويطلع ليهوا حبة مصنعة معظمها من جوز الهند
وانصحك اياض باكله واذا لقيتي الموية بتاعتوا برضو اجقميها
برضو نصيحة هندية اوعاكي تغسلي شعرك بالموية العادية وغسليهوا بموية الشراب ودي برضو مجربة عند الهنود لانها لا تحتوي علي املاح كثيرة واملاح البلد خليها ساي
ولكي خالص تحياتي
| |
|
|
|
|
|
|
|
|
|
Re: الشينة تمتنع (Re: مهاجر)
|
مهاجر
لا ياهو الكريم زاتو بارشوت مش جوز الهند
بعدين والله البنات يسمعوا بموية جوز الهند دي بيصيبوا شجرة جوز الهند بالإنقراض ذي الصندل
ووالله لو قالوا ليهم عصير (الكول) زاتو بطول الشعر بشربوه
حالة (سعبة) شديد
اسمع بتعرف الكول؟؟؟
| |
|
|
|
|
|
|
|
|
|
Re: الشينة تمتنع (Re: بت قضيم)
|
سلام يا سلام
ولوووووووووووول عليك
لووووووووول عليك دي،،، بعد فترة ستتحول لتصبح سودانية بحتة شبيهة ب (وووووووووووووووب عليك) موتيني من الضحك،،أو ربما أن الخواجات سرقوا منا الووووب فجعلوها رمزا للضحك النتي،،، يعني في احتمال بيل قيتز يكون جعلي مشلخ تي ،، أو أن الجعلي من أصل خواجاتي أو من أين جاء بحرف التي،،واللا هو منوالبتشلخ تي؟؟
كيفني شديد موضوع رابطة الشينات لدرجة بعيدة
وفكرت أن نعمل شعارنا التلوشة
ولا ادري كيف ولما وعلى أي اساس سمى الزول السوداني كلمة (الشفاه) الناعمة الرقيقة بكلمة دشنة كما التلوشة
أو الشلوفة في أحسن حال،، وجمعها شلاليف
والنخرين
والأضنين
والجضوم
والأصابعين ،، اصابعين لعشرة اصابع ما يفوتك النظرة الاقتصادية
والكرعين ،، التي احساسك بالكلمة نفسه يستحيل يديك حاجة جميلة
والضراع،،، شخصيا احسه شئ خاص بالبقر ،، ضراع
والتفة
وفي رواية أخرى يقولون الزعموط،، ثم أحياناً يقولون الضقلمة،، فيدعون عليك،، الله يضقلمك إن شاء الله ،، لما الله ريحهم وضقلم كل السودان خلقة بدون الحاجة لهذه الدعوات الشينات
يعني الصورة العامة كلها تشير لانسان شين،،بالله نجيب ليهم سماحة من وين؟؟؟
ثم إذا ما جاء الوصف في جمال القد قالوا (غامتوا كالبانة) وربما اختلاف وجهات نظر،، لكن البانة دي غير الزول الطويل وعوير ما بتشبه
أو وصفوها بالموزة،، أها يا السمحة الموزة،،، وربما لذلك علاقة بأن الموز كان غذاء الفلاسفة،،، ولو اني لا اظن أن أم زرع البلة (وده اسم) لها علاقة ما بأفلاطون
ثم يقولون (من بعيد جات تمشي المها) ووحياة الله كرعين المها ديل مكعوجات
و(البلوم)في فرعه غنا،،، مالو عصور الجنة؟؟؟ واللا الكنار إن شاء الله هدهد
غايتو بنشوف الموضوع ده
ورجوعاً لرابطة الشينات
فأنا لا مانع لدي البتة
لنضع تصور للفكرة وشروط
كمان ما اي شينة تجي تتلصق فينا،، يا تكون شينة وفقا لشروط الشناة خاصتنا،، يا ما ما نقبل اي شينة كده ساي
وبرضو ساي دخلت لي في الكلام
يا اخوانا حقيقي ساي دي مالها معاي
| |
|
|
|
|
|
|
|
|
|
Re: الشينة تمتنع (Re: بت قضيم)
|
سلام مربع
بت قضيم حبيبة البي
طالما انك فتحت لنا (طاقة) تطل منها رابطة لشينات فدعوني انزغم منها توووش .. اذ تظل كلمة انزغم هذه عجيبة نوعا ما وذات اتجاه يدعو للريبه .. فالمفردة السودانيه لها خاصيه دشنه نوعا ما .. ربما لان طبيعتنا الصحرواية لها كثير من الدلالات . سجمي انا مالي الليلة قلبتها لغة عربية التقول كت بحضر في نشرة الاحوال الجويه .. يغيظني ذاك الوزير المفلهم الذي ما ان يقعد ليك في مقعد الا وملء خشمه كله (انظري معي بت قضيم الى كلمة خشم ) لنحلق حتى نوثق لها .. فنحن نريد ان نثبت ان الشناة اصلاة جاءتنا لان دشاتنا هي السبب فيها فكيف نتخلص من الشناة .. ذاك الوزير لديه (عواره) خاصه جدا في التعامل مع المايكرفون .. يجعلك تقولي اجي اجي يابنات امي الوزير دا مالو بتكلم نحوي كدا . كأنه يخاطب الامم المتحده . مع انه من المفترض انه يخاطب عامة الشعب فيجب ان ينزل شويه كده (انشاء الله النزله اللي يختوا ليها طشت) . لاحولة ولا قوة الا بالله .. توي اكتشفت انني دعاية .. هذا اثبات اخر اننا نعشق هذه الدشانه حتى في مفردات دعواتنا الماحقات الساحقات التي ان استجاب لنا الله اظنها تودي في داهية عديل كده ..
ياخواتي الكلب البنطط قدامي مازهجني وجاب لي اخلاقي هنا دا . وحتى لا تتهموني بالجنون .. اذ ان بيل غيتس فكر وصنع لنا في الوينورد كلبا يغمض عويناتي وينطط كلما حاولت ان تكتب كلمه .. زح كده يزحك المرض .. وهذه للكلب الذي وضعه بيل غيتس في وين ويردي ..
فحتي معايير الجمال زمان كانت بالنسبه لبني جنسنا تلك المطارق .. فالمطرقه كفانا الله شرها .. هي للرزع والضرب .. وهي تستخدم في وجنات ونحن امعانا في الدشانه نقول عليها مطارق في جضومها .. حتى ننفي عن هذه الانثي كل المحسنات البديعيه .. واذ احسوا ان كل هذا الخراب في تلك الجضوم .. لا تكفي فكان لابد ان يجلئن الى خراب اكثر ليحسنوا به صورة تلك الدشانه وتطلع في صورتها النهائية حاجة كده لا توصف ..
فيدقوا الشلوفه .. وهذه الكلمه قد وثقت لها بت قضيم . فالانثي تسعي لان تجعل شفايفها كرزا يشابه المغيب ..او فراوليه او حتى في اسوأ الظروف تمريه اي رطبيه اذا كانت البيئة عربيه مية الميه .. ونحن من زينا .. لابد ان نخالف تجمع نساء العالم قاطبه .. ونلاحق تلك (الشلوفه) وندقها دقا مبرحا حتى يتغير لونها الطبيعي الى الاخدر ..
ياخرااابي على ذاك اللون .. ومع ذلك اعجب بالناتج من ذلك الفعل كثيرا من الشعراء وقالوا فيه مالم يقله جميل بثينه في وصف بثينه ..
ثم (اتفنوا) في نص الدرب يشركون للمطارق والشلاليف المدقوقه
ثم لاحقا تفنن شعرائنا ... ووصفوها بالوابور جاز
الوابور جاز خلي اللي يشتغل الشغل بالجاز
انظرو عيون المها بين الرصافه والجسر .. وتعالوا شوف هنا
الوابور جاز ... البتولا ما خمجانه ما بتلعب في الرمله .. فالتي تعلب في الرمله هي الخمجانه وقد تكون سادتي تلك الخمجانه حلوه (موت) وقد تكون شينه .. اذ ان الشينه بطبعها لا ترمي نفسها في مهالك .. فتعرف انه طالما انها شينه فيجب ان تكون سمحة الدواخل .. على الاقل نظيفه وما خمجانه .. يعني ماعارف الكلام كلو كلو قدر ماوديتوا اعشان القي بيهو عذر مالقيت .. يعني كيف بت كبيره كده .. مهما كانت شنو البوديها تتفن في الرمله وتتخمج فيها .. الا تكون عويره عديل كده .. انشاء الله العوارة التقوم ليك في كراعك ..
ويجب ان نوثق لكلمه (عويره ) ايضا
| |
|
|
|
|
|
|
|
|
|
Re: الشينة تمتنع (Re: بت قضيم)
|
و الله يا بت قضيم يا اختي
السودانين ديل بالغوا عديل كدا
يعني انا مرات ازهج ليك من صاحبتي و هي ما سودانية و اقوم اكورك فيها و اكوركو انت عارفة الزهجة بتطلع كلام رهيب
و البت المسكينة تقعد تعاين لي و انا بعد افش خلقي الاقيها ما فاهمة اي حاجة
و العجب كان قمت و نهرتها ليك و لا قلت ليها زي جنس الكلام دا ناس الاضنين و الكرعين
البت طوالي بيجيها انفصام
و تقعد تقول لي انا زعلتك يعني
و ما تقدري تفهميها
دا عن موضوع الكلام الحنين بتاعنا
اها نجي لموضوع الرابطة دي
انا مصرة نعمل رابطة الشينات
و العضوية مجانا
و من ترى انها مطابقة للموصفات
الموجودة سابقا في بوست بت قضيم تتقدم بطلبها
و غايتو بنفكر نعمل للجنيات ديل فرع من رابطتنا
بس و زي ما انت عارفة هسع يجوك مادين شلاليفهم انهم ما شينين
و اننا بس الشينات
اها برضو تحى الشناة
تعيش
تعيش
تعيش
سلام
| |
|
|
|
|
|
|
|
|
|
Re: الشينة تمتنع (Re: بت قضيم)
|
ايهاب
جزاك الله كل الخير
وأنا اتفق معاك تماما لو جينا للجد شوية،، نقطتي التي اشرت إليها،،، هي لماذا تضهد الشينة في المحافل الأدبية والشعرية والتلفزيونية كمان،، ياخي حتى الصحافية بقت سمحة أو ربما اشترطوا لوضع صورتها في الجريدة أن تكون سمحة وجمالها فريد
عقدونا
صوروا الجمال كشئ اساسي لأن تكوت شخصاً مميزا شهيرا
لو لقيت ليك شينة بطلة درجة أولى،، برضو حتلقاها محصورة في أدوار معينة لا تخرج منها
إما كوميديا،،أو بوليسي،،، او كاسوري بتاع ناس جاكي شان داك
رومانسية لا
من هذا المنطلق (ثقافة كثيفة صح) من هذا المنطلق انطلق بوستي ،،لكني مقتنعة بالمثل السوداني الذي يقول
سماحة جمل الطين،،، والذي يقال للشخص الجميل بلا روح ،، سريعا ما يذوى ويذوب
بس ما تشوف ردي لي سلام ،، ستصاب بالمنخولية،،، جنس تناقض ياخي،، المشكلة برضو السماحة سمحة يا ايهاب
| |
|
|
|
|
|
|
|
|
|
Re: الشينة تمتنع (Re: Ahlalawad)
|
سلام بت قضيم
كلامك حلو زيك ولا على راي البعض
الشينات كتابات او موهوبات
والله ناسنا عجيبين دائما يضعون المبرر
ولا يريدون مواحهة الحقائق عينك عينك
والمفروض الجمال هو مصدر الابداع
على العموم اعملوا الرابطة وتوكلوا على الله
بس ما تنبثق منها لجنة لانوا الانبثاق
لا نهاية له فى السودان اول ما انبثقت...؟
والشنة مربوطة ببعض الاشياء الفسيولوجية والتربوية
كالادعية مثلا كما ذكرت ولكن اجلبطو بى كريماتكم
| |
|
|
|
|
|
|
|
|
|
Re: الشينة تمتنع (Re: قرنفل)
|
قرنفل
والذي هو جزء أساسي من دهن الكركار
وقد قالوا أن القرنفل لو بلوه ،، ومسحوا الراس بمويته،، لنعم الشعر وطال واستطال
وقالوا انهم لو وضعوا القرنفل في الضرس الوجعان،، لقتل الوجع في أم عينه وتوقف
وقد سألت طبيب فافتي وقال أن للقرنفل خصائص تخديرية
ولا ادري ما علاقة الخدران بالشعر وتنعيمه إلا إذا افترضنا أن الشعر ده زول شكال وبتاع جن ومنكش قاصد يتنكش،،، فنضع موية القرنفل فيه فيتكيف ويتخدر ويركب فيل وينهمد فنظن نحن أنه بقى ناعم حلاته يشبه اليسيا
البت الشينة كلامها سمح؟؟ الحمد لله انا مسيخة
ولا تقلق من الانبثاق،، فماذا تعتقد ينبثق من الشينة ؟؟؟ شلوفة يعني واللا شنة زيادة؟؟؟
لا اظن في الانبثاقية،،، هذه خاصية تخص حكومات السودان على مر التاريخ مالناش دعوه بيها
فقط افكر أن نعمل هامش حريات ،، نهمش الحلوات ونعظم الشينات
سأطرح هذه الفكرة في المائدة المدوقسة المرة الجاية
| |
|
|
|
|
|
|
|
|
|
Re: الشينة تمتنع (Re: Tabaldina)
|
تحية تبلدية
تبلدينا الكركار تم شرح طريقة صنعه في إحد بوستات شيري (برعاية دهن الكركار) نحيلك له
والتي قامت بصنع تلك التوليفة العجيبة من الدهن الناعم الذي فعلاً بيصلح الشعر،،، اعتقد فيها نوع من العبقرية الجمالية
والله بالجد
لكنا للأسف لا نلتفت لنا ونعظم الداكس،، مع انه لا شبهنا ولا يمكن يكون دهن خاص بمثل تففنا،، إلا فيما ندر
دق الشلوفة والشليخ ،، وفي بعض المناطق الأخرى دق الجبهة،،
وبعض القبائل الأفريقية وتشويه الرقبة بلبس تلك الحلقات الحديدة الكبيرة التي تؤذي نمو الرقبة وتطيلها مع تهشيش عظامها
والذي يلبس طبق مستدير كامل في شفاهه ،، الخ الخ الخ
كل هذه مقاييس جمال تختلف من مكان لآخر فلا شئ يسمى الجمال المطلق
انامثلاً ما بتعجبني عارضات الأزياء والنحافة ا لشديدة قريبة المظهر بالمرض
وفي أغلب أقاليم السودان يحبون المرأة ال(مليانة) السمينة يعني
بل أن الواحدة فينا إذا ما ذهبت الإجازة باعتبار انها مغتربة يعني لسألوها (مالك ما شحمتي) وفي الفترة الأخيرة في السودان انتشرت أدوية فتح الشهية بصورة غريبة ك(مسيجور) لو لم يخني الاسم يعني
الجمال مرتبط بالمنطقة والمحيط والبيئة ،، ولولا انفتاحنا على الدول الأخرى والفضائيات،، لما فكرت يوماً صاحبة البشرة السوداء في ضرب البوهيات غريبة اللون التي تفعل في عيونها وشفاهها وجضومها،، ولبقينا في ذاتنا نشبهنا ليس كما نحن الآن لا قدرنا نكون نحن زمان لا قادرين نكون نحن الآن
اختلف معاك في نقطة واحدة ألا وهي المشاط
الحاجة دي جميلة بشكل مدهش،، وما احلى السمراء الممشطة أو الست الكبيرة ام مساير،، منتهى الاحترام والحشمة
والغريبة هو مش لايق علي البيض،، كيتا في شعرهم الطويل وجميل
واللا يعني برانا الما بليق علينا الشقرا
| |
|
|
|
|
|
|
|
|
|
Re: الشينة تمتنع (Re: Ahlalawad)
|
أهل العوض قالوا الكلمة الطيبة صدقة
ما تتصدق ياخ
الحقيقة ما عندي ليك رد
يعني صعب اتماسخ عليك وانت بتطعن في الصميم
لانه فعلا في السودان أول ما يلفت النظر اللون
حتى الجمال نوعا ما مرتبط بالبيضة،، فلو كانت واحدة بملامح بشعة ولون أبيض فتعتبر أخف شوية
مع أن الشعر في الغالبية تغزل في السمراء
ما سمعت
اسمر لونه لادن جسمه ،، تزدهر الورود فر بسمو
ولو انه مرات مقارنة الشعر ده بالواقع الحاصل ،، تحس كأنه نوع من الترضية
وبمناسبة الشعر وانت بتحب الشعر القديم وعتيق ،، مع مناسبة التوجه الحضاري برضو وقدورة ،،هاك دي
زاهي فرعك نما وسما
تشبهي الضو في السما
الخدود نارا مضرمة
في حشاي واضعة مفرمة
بي هلاكنا إنت مغرمة
طرفك الساهي كم رمى
سمحة قامتك على التما
فاهك البسمة خاتما
للبدور خدك إنتمى
في العيون شلخك إحتمى
وقفت بانة النقا
ديسا طاويها فالقها
النظر راح يسارقا
صد قال فوقا خالقا
الحرير ماله خانقا
والحجل يمشي زانقا
جلست أشوف تأملا
وقفت ضجت الملا
صاح شاديها واتملى
متنا ما سمعنا ململة
شوف وريدا وسوالفا
شوف صديرا المزالفا
شوف ضميرا الموالفا
من كفيلا المخالفا
معليش انا ما حافظاها كويس وما كتبتها بالترتيب،، لكن بالله ده ما كلام يزعل شديد
وتقول لي توجه حضاري؟؟؟
بعدين ياخي الخواجية زاتو ما بتعرف تتحنن
قال خواجات قال
| |
|
|
|
|
|
|
|
|
|
Re: الشينة تمتنع (Re: بت قضيم)
|
لا
رشدي اأباظه ؟؟!! ما برضي
هاني شاكر ممكن
مع أنو خاتيها لي ملكة لحدي الآن
حقارة خلاص
ياخ دي شينة شنا ...مبالغة ..شنا يوزعوا منها
شفتي ليك زولة شينة يسموها ملكة ،،، أنا كان كل أملي أرفع روحه المعنوية في الحفله يعني يبقي عليها أتنين شنا وكمان عدم قويم للرقيص ...؟؟!! ما قدرتني يا بت قضيم
وما قيمتني ...
من منظور شينوي كده رائك شنو في حركته البايخه دي ؟؟!! أنا أستاهل كده ؟؟؟؟
| |
|
|
|
|
|
|
|
|
|
Re: الشينة تمتنع (Re: tmbis)
|
انا عندى فرقة رقص اسمها عرائس النيل
لما قدمنى البروفيسور الاخير ، وهو بدرس كورس عن السودان
قال انه السودان فيه مشكلة معقدة ، تعود جذورها لمسائل عرقية ودينية واقتصادية وسياسية
مسألة معقدة ، ما فى زول لقى ليها حل ، لكن يبدو انه تماضر ، لقت ليها حل
انا مادايرة اضخم الانا بتاعتى ، هنا
لكن دايرة اقول انه نحن فرقة فنية لكن عندنا رسالة سياسية وكل ما نتكلم ، بنقول انه السودان فيه قبايل كتيرة
ومختلفة فى اللسان والاعتقاد، لكنها متفقة فى انها "جميلة" الجمال الانسانى البظهر فى الممارسة الابداعية ، من رقص وغنا وموسيقى
ونحن كل ما نعرض رقصة او قبيلة ، بنتكلم عن منابتها العرقية ،
وحقيقة ، الانسان كائن جميل
والسودان شعب جميل ، بس ما عارف نفسو
وما بعرف بعضو
والغريبة انه متشابه وقايل نفسو مختلف
حتى الايقاعات ، فى الشمال بتحريف بسيط هى ايقاعات الجنوب، والشرق والغرب ، والعادات ممطوطة عبر النيل والصحراء ، بتلقاها هنا وهناك
نحن لو اعترفنا " بالجمال" بنكون احسن شعب ، وحنبنى احسن بلد
مع احترامى للفكاهة فى البوست دة ، لكن خلونى اقدكم شوية بالجدية ، لكن احسن حتة الزول يقول فيها كلام زى دة
اها
موتوا بغيظكم
برضو جميلين
وانا بحبكم
| |
|
|
|
|
|
|
|
|
 Re: الشينة تمتنع (Re: بدرالدين شنا)
|
سلام يا ستو
أحلي بوست و أحلي ناس
بلا مجاملة و لا نطلع كدابين
هي ما سمعتي سيف الجامعة
و مين أحلي من حبيبتي مين
اها كل الحبيبات
حلوات
و كل الزوجات شينات
حسب روووواية الرجل السودددددددداني
انا جارية
| |
|
|
|
|
|
|
|
|
|
Re: الشينة تمتنع (Re: sudania2000)
|
سودانيه
انت تقعدي انت..ولو ما شالك بوردينا..تشيلك عيوننا
يقومن جاريات ..ناس بت قضيم ديل
عن اذنك يا بت قضيم..عندي اغنيه..فتحت ليها بوست..لكن بارت بوران شديد..عايز اهديها لي سودانيه..مع التحيه..بمناسبة عيد الفطر  المبارك..!!!!!.مش هو قرب!!!؟؟
| |
|
|
|
|
|
|
|
|
|
Re: الشينة تمتنع (Re: بت قضيم)
|
الأخـت بـت قـضـيـم ســــــلااااااااااااام
بوسـتك كلو شنا يعني حاجة سمحة ما فيهو لكن المشاركين كتيرين و دا دليل
على إنو الشنا ليها معجبين و معجبات و رابطة معجبين كمان .
لكن برضو تظل حقيقة الشنا شنا و إن إستعملت ليها كل مواد و أدوات السماحة
من كريمات و مراهم و زيوت طبية و زيوت بلدية و مواد عشبية و شعبية و حتى مشعة
و الشينات جاريات ورا السماحة حتى و إن ضحن بي صحتهم و حتى لو تسبب ذلك في
في فشل كلوي أو سرطان أو لو تسبب في وضعهن في خانة الوش هندية و اليد عباسية
ما سمعتي بي نكتة السوداني اللي عايش مع أم العيال و هو مقتنع لحدي ما ظهرت
الفضائيات و الفيوتشر و الإل بي سي اللي كانت الطامة الكبري لي أم العيال
لأنو المسكينة كانت كل يوم تقوم من الصباح و وشها وسخان و معفن و المسكينة
ما عارفة السبب لم يوم الراجل كان راقد و بتفرج في التلفزيون و جاتها صحية
لقت الراجل بتف ليها في وشها المسكينة كل يوم تنوم قبل الراجل و هو إساهر
مع اللبنانيات و كل ما تظهر واحدة من اللبنانيات الشرط ديك إعاين لي المسكينة
النايمة جنبو دي و إعاين تاني في التلفزيون إشوف الفرق إقوم إتف ليها في وشها.
ســـــــــــــلاااااااااااااام
| |
|
|
|
|
|
|
|
|
|
Re: الشينة تمتنع (Re: ABUHUSSEIN)
|
لوووووول يا ابوحسين
ظنيته امبارح مع ملكة جمال لبنان بتكون غرقت
يا اخوانا سماحة تمرض
ومن السكر ما جاب سكري
الناس دي بتمشي في شنو؟؟
ياها الأرض الأحنا بنمشي فيها؟؟
سبحانك اللهم لك الحمد والشكر
ابو حسين
يا خي لما النظرة التشاؤمية حول الأيد عباسية والوش هندية،، والله الهنود ديل اساسا شينين وما يغركم بنات التلفزيون ديل جمال جمل الطين
ثم انه السودانية المرأة الوحيدة التي استطاعت تطبيق فكرة التعايش السلمي بين البيضة والسودا
United color of Biniton
وإن شاء الله نكون كتبنا بنتون صح ما يبقى شناة وجهالة كمان
بالله شفت ليك وحدة قدرت تطبق موضة الكاورهات غير السودانية؟؟؟
كاروهات دي زي الشطرنج ما كارو كارو وجب التوضيح لعدم اللبس
ثم بالنسبة لأمراض الديانا،،، فحبوبة تقول (ما في قهوة كتلت ليها زول) وذلك لما منعها الدكتور (السجمان كما قالت) من شراب القهوة شان الصحة وال(دغت) فما بال الديانا الما بشربوها وبتجلبط بس؟؟؟
دايرين مالكم تخربوا على شركة الديانا
والغريبة الديانا دي ما عندها اي اسم غير ديانا،،، يعني ما بكتبوا في العلبة دي صنع اي مصنع اتربى من خير السودانية
ويقال ان بها تقليد كثير
فتفتح الواحدة منهن العلبة وامممشششششششش
تشمها،، وتقول جراء خبرة السنين،،، بري ما اصليه،،، اديني علبة تانية،، وتشم المحل كله لامن تلقى حلمها الريحة الأصلية
وطبعا ما خاتية النخرة كان انبرشت زيادة،،، فقد قال كمال ابن ترباس في مطلع عمامته
ما من النخرة من العليها
ثم سيبقى للشينة الفضل الأعظم في اظهار جانب جمال الجميلات
لهن كل الشكر الله يخليهن اينما حلن
والله يخلي ليهن شعبيتهم وصافيتم كمان
(هسادة) ده
| |
|
|
|
|
|
|
|
|
|
Re: الشينة تمتنع (Re: بت قضيم)
|
قالت تماضر
Quote: نحن لو اعترفنا " بالجمال" بنكون احسن شعب ، وحنبنى احسن بلد
|
مية على عشرة،،، اتفق معاك تماما،،، وكما قلت سابقا انا مقتنعة البقنع الديك منو؟؟؟
ويا ريت لو الواحد يقدر يشوف فرقة الرقص خاصتك
بالجد الواحد كيف ممكن يشوف الحاجات دي ويجمع ابداعات السودان الموزعة في شتى مناطق العالم في شكل توثيق يطلع عليه كل سوداني هج وسافر من البلد وهج وسافر جوا البلد؟؟؟
يا خسارة،، عاملين ذي لحم الراس،،، وكل واحد منغلق في نفس الدائرة ما قادر يمد راسه ليناظر العالم التانية عاملة شنو بالضبط
وهاك اهي دي،، ام الجدية زاتها
شان تآمنو بس
وعودة لقاموس الشناة والتوثيق
دعينا نفسر هذه الطلاسم للحناكيش،، وبعدين انا في حاجات زاتي ما عارفاها واعتقد المشكلة مشكلة سنون،،، اعني فاصل زمن بين الشارع وبين الغربة
ده شنو هسة ده الجملة دي؟؟
شلاضيم===تعني الجضوم السمنت ونفست بعد ضعفة فتتهدل فيما يشبه الشلضوم
كدارين=== تقال للبقر أو الماشية في العموم،، ويمكن أن تصف به البنية ال(داجة) وداجة دي بتمشي ذي فيل يعني أو كما يقولون (أم قيردون الحاجة الكل صباحا داجة) مع ان ام قيردون هذه من المفترض يكون طائر لكنه شين ودشن وبحب الوساخة كمان،،، المهم انه ولكي تتدج الفتاة لا بد لها ان يكون عندها كدارين
ويصفون مشي الجميلة بمشي الضباط فيقولون،، هئ هئ،، دي الرايقة وجات تعوم بسديرها دي الرايقة،،، الحلوة جات تمشي دي الرايقة ذي مش الضباط عليك الله
وهئ هئ
يعني كدارين وضباط تديك إحساس انها مدفعية،،، ودي حاجة ما هينة جراء الظروف الحربية العالمية
دراريش===دي ما معانا،، غلبتني
أما مفاريك== فهي عكس الكدارين،، ولو ان الكدر مقصود به القدم والمفراكة مقصود بها الساق،، واحياناً يصدف أن تكون البت ام كدر عندها مفاريك فيشاهدها الثقيل عديم الحس في الشارع فيقول
كرعينك ديل واللا كرعين عنقريب؟؟
مع انه العنقريب عنده اربعة كرعين كما قال الحبشي يوما
والعنقريب دي زاتها تحتاج لتفسير للسان الغير ناطق بالسودانية الشعبية البحتة،،، وهي تعني يا جماعة ،، سرير سموووول سايز،،، وعنده تخلف كراعي إذ ان الساق مفراكة والكدر كدارة
ذي البت الشينة هي اخدت جمال مش ما اخدت ،، لكنه في غير الموضع المناسب
حول برررررررررضو
بجي للباقي يا تماضر بالله كراسع دي نكتيها من وين
؟؟؟
| |
|
|
|
|
|
|
|
|
|
Re: الشينة تمتنع (Re: بت قضيم)
|
بت قضيم
ما بتخسري صدقي كريم طبيعي مافيهوا اي اضافات تتعبك
عندي بت اختي بقت كل ما اجيها تشكر فيني انوا شعرها تحسن وطير ليهاالكاروشة ديك وحالها اتعدل شوية
اما المدعو الكول اكلته مرة واحدة بعد اصرار ولن افعلها مرة اخري ابدا
ياخي مين يقدر يستحمل الرائحة النفاثة والقوية دي ولو مشيتي جبتي اقوي عود ما تطيروا منك
دا غير الطعم خليها ساي دي حاجات سودانية عجيبة لكن قالوا مفيد لحاجات كثيرة جدا
| |
|
|
|
|
|
|
|
|
|
Re: الشينة تمتنع (Re: مهاجر)
|
نشوف يا مهاجر
والليلة الله قال بي قولك لو الشعر ده ما خلى الحوص وطال لي تحت
وبالنسبة للكول،، قال لي صديقي الفاضل (ما الفاضل سعيد بس) قال لي لما سألته عن الكول
هو عبارة عن نبات لا يقربه الحيوانات،،، ما بياكلو يعني غير الانسان
موجود في مناطق معينة
يقطف ويخمر ولا اذكر بالضبط لكن اظنه قال تضاف إليه بعض المكونات التي تساعد على تخميره
ثم يدفن في الأرض فترة زمنية محددة فيكتسب هذه الرائحة القوية النفاذة
وهو كما ذكرت علاج مفيد لأمراض البطن
وازيد من عندي أنه احسن علاج على الأطلاق لمرض اليرقان حسب ما يجئ في رواية حبوبتي إذ تقول (الكول شايل لليرغان مقلاع) بضم الميم بالطبع
والمقلاع ده اظنه عكاز شن عرفني
| |
|
|
|
|
|
|
|
|
|
Re: الشينة تمتنع (Re: بت قضيم)
|
دافي
خلاص،،، ناخد منك كورس جري مجانا بما انك اكتسبت خبرة مستطيلة في الجري من الكشات
وشكرااااااااان للإهداء
بالإنابة
وكل سنة وانت طيب يا ابوي
القابلة على امانيك وشناتك تزح إن شاء الله
بس ما سمعنا الغنية،، واللا هي بي كود سري؟؟
| |
|
|
|
|
|
|
|
|
|
Re: الشينة تمتنع (Re: بت قضيم)
|
سودانية
فعلت خيرا بسحب الصورة
إذ يقولون
عين الفتاة تقد الواطة
هاك الدرل ده
اظن عين الفتاة الشينة تقد الواطة اكتر
اما عين الود الشين،،، فهي تقد الاوزون زاتها خليها الواطة الهينة دي
قال تجري بت قضيم قال
أما ما جاء في ملاحظتك،،فانا اشهد انها ملاحظة سليمة مية في المية
مراحل الارتباط إن صح التعبير كلها تكون فيها البت حلوة
ابتداء من المكان الاتلاقوا فيه وبدت الشرارة
بت جيران مثلا واللا زميلة جامعة واللا محل يومداك حيث قالوا في الأغنية (يا هناي برجاك في محل يومداك) واللي هو غالباً المحل الاتقابلوا فيه وشدت نظره بنظراتها البريئة الساذجة كنجلاء فتحي في انف وثلاثة عيون
وتمر تلك المرحلة وهي تتاقل وهو يتكبكب،،(ونعيد الكرة من اول،،، اعاين ليك تقبلي انت تعايني لي اقبل انا) حتى تصبح حبيبة وتكون قمة في الجمال والصبا،، ثم الخطوبة فتصبح قمة الانسانية والجمال برضو و و و و،، وتزيد حرارة الحب جذوة،،، حتى العقد ثم الزواج ووقتها قولي كده يا الشرارة امسكي في موكيت الصالون وفوووووو تحرقهم الاتنين سوا
فنردد حينها حكمتك التي قلتيها وفليتي جريتي ( المرة شينة والحبيبة حلوة) اتقطعتي فيها
وشكرا لوصف بوست الشناة بالجمال
بس دي تجي كيف بالله؟
| |
|
|
|
|
|
|
|
|
|
Re: الشينة تمتنع (Re: بت قضيم)
|
بت قضيم يا عسسسسسسسسسسسسسسسسل
دافيء الصافي
اشكرك و كل سنة و انت طيب هو قرب
بس بعيد
حبة
تسلم
عاد حلاتكن بدليل الشباب الاتكسر و اها قعد
البوست لذيذ و يفك دبرسة الويك اند في زحل السجم
انت يا بت ما قريبة اجيك طايرة و يك اند
الرجل السوداني غير محب للزوجة اطلاقا
بس الزميلات
الجارات
الحبيبات
اخر ظرافة
هنا الصورة مقلوبة تب
الرجل حنين بس النسوان يجيرك الله
اخر حكوي هنا
و لا بري
شينة
انا جرييت
| |
|
|
|
|
|
|
|
|
|
Re: الشينة تمتنع (Re: sudania2000)
|
الشباب اتكسروا يا سودانية لظروف ليس لنا علاقة بها
انظر الصورة صفحة سبعة بي غادي
في الكتب يقولوا ليك كلام كتيييييييير بعدين يقول ليك في النهاية
انظر الصورة صفحة 7
طيب قايلين من البداية كلام ليه ما الصورة مرات كتيرة بتغني عن الشرح
غلبة ساي وحبر ضايع
تسسسسسسسسسسلمي يا سودانية انت العسل
وانا ماعارفاك وين انتي في الدنيا لكن مؤكد في المكان الما فيه انا
لاني في مكان بزيد للواحد تلوشة بزواية انفراجية
لكن تعال لي نفك الكرب شوية
والله يا ريت ياخي نتقابل كلنا ونقضي ايام ونسة وضحك وشناة وسماحتك
تسلمي يا عسسسسسسسسسسسل
| |
|
|
|
|
|
|
|
|
|
Re: الشينة تمتنع (Re: بت قضيم)
|
يا ساتر
ده كله كلام
؟؟؟
دي ما وصيلة للأستيكة دي وصيلة لمصنع اقلام رصاص كاملة
تمبس
انت حلفاوي؟؟؟
يبدو لي حروف التأنيث عندك واقعة
ياخي الحركة بتاعت قويم البنات دي خلوها اعتقد
البت هسه لو عروس بتقوم ترقص براها ده لو ما قامت ووزعت العشا براها
انت ليك كم من السودان؟؟؟
والله يا تمبس البنات بقوا عيونهن قوية كلهن شينات على سمحات
بعدين عليك الله هسه رشدي اباظة واللا هاني شاكر ؟؟؟
واللا (شنة يا الدهيش) عندك عقدة؟؟؟
ما شفت المرحوم رشدي بس،،، لما كان يضرب ليك الشرير تاااااح كده الشعر زاتو بعمل (سنة يا الدهيش) كدي انت بس غير رأيك وشوف
اخير ليك رشدي من هاني
هو شوف الأسامي
رشدي وهاني
مع اشكال سواقين الدفارات دي يا تمبس ما بتجي
صدقني ما بتجي
اسمع
العطبراوي كيف؟؟؟
| |
|
|
|
|
|
|
|
|
|
Re: الشينة تمتنع (Re: بت قضيم)
|
شيري
الخشم هينة
كعب القدوم
وانزغمي ليك في (فجة) تانية
فجة دي كيف معاك؟؟
احيلك لمشاركة التوثيق خاصة تماضر لتفسير تلك الطلاسم
اتكلمت كتير انا ريق البورد جف مني
ده ما اسمو زاتو وجع الوش بالله؟؟
| |
|
|
|
|
|
|
|
|
|
Re: الشينة تمتنع (Re: بت قضيم)
|
اختى العتيقة بت قوقو والاخوة والاخوات
لاوز لى العنوان لكن الفضول كتلنى قلت يمكن تكون فى وصفة
تعينى فى التغلب على الشنة لكن فجاءة اتذكر كلام حبوبتى مرمى الله ما بترفع احباط يا ناس اسوى شنو خلاص تعبت من حكاية الجمال جمال الروح سيبونا فى حالنا
وفى واحدة كانت بتقول (ماتفهمونى غلط ما لى انا
لو شافنك السمحات يقولن قر وكان شافنك الشينات يقولن جر)
غايتو الله يدى الصبر
قيل لاعرابى عالم بالنساء! صف لنا شر النساء
قال شرهن النحيفة الجسم القليلة اللحم الطويلة السقم المخياض
الممراض الصفراء المشئومة العسراء السليطة الدفراء السريعة الوثبة كان لسانها حربة تضحك من غير عجب وتقول الكذب وتعو على زوجها بالحرب انف فى السماء واست فى الماء وقال آخراياك وكل امرأة مذكرة منكرة حديدة العرقوب بادية الظنبوب(وده كمان وين )منتفخة الوريد كلامها وعيد وصوتها شديد تدفن الحسنات وتفشى السيئاتتعين الزمان على بعلها ولا تعين بعلها على الزمان ان دخل خرجت وان خرج دخلت وان ضحك بكت وان بكى ضحكت وان طلقها كانت حرفتة وان امسكها كانت مصيبته سعفاء ورهاء كثيرة الدعاءقليلة الارعاء تاكل لما وتوسع ذما صخوب غضوب بذيئةدنيئة ليس تطفأ نارها ولا يهدأ إعصارها ضيقة الباع مهتوكة القناع صبيها مهزول وبيتها مزبول اذا حدثت تشير بالاصابع وتبكى فى المجامع بادية من حجابها نباحة على بابها تبكى وهى ظالمة وتشهد وهى غائبة قد د’لى لسانها بالزور وسال دمعها بالفجور.
الحمد لله اخير ناس نحن السمح سمح كان قام من النوم والشين شين كان مسحوه كل يوم يعنى لا باراشوت ولا طيارة نافع والحمد لله
| |
|
|
|
|
|
|
|
|
|
Re: الشينة تمتنع (Re: بت قضيم)
|
والله يا عديلة قدر ما جبتها بي جاي بي جاي ما قدرت افهما كلها
فهمت الضعيفة التي تخوض في كلام الناس الشاحبة المتمارضة الجنها تقفلها في وش الناس وتعسرها عليهم سليطة اللسان الدفراء ،، الدفراء دي يعني دفار؟؟؟
بعدين ورهاء دي قريبة من البامية المرهة؟؟؟
وأها من عندي والله ما مزعلاك
الشوم البوم الرفلة العفشة العفنة المبشتنة المدلقنة المعضمة العولاق المجهجه المبهدلة المبدلة المبرطقة الغبيانة التلفانة السهتانة الهفتانة المرضانة المهردمة المفلهمة المشرتمةالمدرمة النقناقة القوالة القطاعة النحس العورا
واللا اقول ليك،، العيون دي ما معانا
يا ساتر لا خلقة لا اخلاق يا كافي البلا وحايد المحن
عارفة والله ،، نحن لغة تمشى على شعب
قاموس ملئ والغريبة انا لسه بستفتح صباحية
عديلة المتوهجة
الاسم دي اخترتيه كيف؟؟
فاتني ان ارحب بك والغريبة الواحد يقرا اسمك يقول حنكشة السنين ،، بس يظهر عليك مدردقة وبت ركشات كما نحن ولله الفضل
ونقول أنا حنكوشة حاختم البوست واقول
ميرسي يا هناية
| |
|
|
|
|
|
|
|
|
|
Re: الشينة تمتنع (Re: بت قضيم)
|
Salam men Zohal,
ya bit takoni hena wa una ma urfa,
kan keda gak balaaaaaaaaaaaaa
wa Allah maak
الصورة رجعت عشان زول كدة ما يصدق اني خفت
و دي صورة بنية فصلتها الجامعةوخيرت بين دخولها اوان تخلع الحجاب
و اختارت الحجاب
و تركت الجامعة
و لاعجابي بشخصها اخترتها شعاري
بس
انا ممتنعة بشدة
لوووووووووول
| |
|
|
|
|
|
|
|
|
|
Re: الشينة تمتنع (Re: sudania2000)
|
بالله يا سودانية دي ما انت؟؟؟
والله انا ارجح ان دي انت
غلاط يعني
قالوا واحد غالاط شديد،، درجة أولى،،، جاه ضيف خبط ليه الباب سأله الغالاط من جوه:مين بره؟؟؟
الضيف رد قال ليه ده انا
الراجل الغالاط قال ليه هأ،، حرم ده ما انت
بس انا بشبكك تاني،، والله دي شكلها انتي ، واغالطك في ام عينك
بعدين انتي ما تكابري،،، البت شديدة استغلي الفرصة بكرة انا بخت صورة لي سلمى الحايك نشوف زول تاني يقدر يعاين لي
| |
|
|
|
|
|
|
|
|
|
Re: الشينة تمتنع (Re: بت قضيم)
|
أهل العوض
سمعت الشهقة التي تقول ( سمحة بلا لباس ولو لبّسا يفوتا بنات الناس؟؟؟) مجرد تساؤل
انت زعموا دي جاية منها زعيم وزعامة وسلطة؟؟؟
بعدين أنا ما بصحى الصباح القى روحي سمحت،، سمحت واللا جابوا لي يا قول بدر الدين
انا بصحى الصباح بلقى الملاية انتحرت من ريحة الودك
وضحك الشعر منتشيا ومنتفشا بهذا النصر العظيم
وهذا تميز عظيم،، إذ أن لا احد يستطيع أن يكون شيطان علبه في ليلة وضحاها وساعتها السابعة صباحا
وأختاني
بتاباه
| |
|
|
|
|
|
|
| |
بت قضيم
Tumadir
garjah
الجندرية
قرشـــو
اساسي
shiry
مهاجر
HAMZA SULIMAN
almohndis
بدرالدين شنا
جدو
doma
ايهاب
tmbis
Dafi
ABUHUSSEIN
فيس بوك
تويتر
انستقرام
يوتيوب
بنتيريست