|
|
 عاجلان : من عطا المنان .. الى سجـيمان !!
|
مرسوم ملكي رقم ( 1000) :
********************
بذلك امرنا نحن الملك الخامس والثلاثين بعد المئة بمايلي :
أولا :
********
تشكيل محكمة ملكية عاجلة تحت رعاية جلالتنا لمحاكمة المدعو
ســجيمان بن خدوم بت ام عزين بت عثيمين ود ضهبان .
ثانيا :
******
محتوى الشكوى مايلي :
* واقع في خلق الله لفت نظر ما خليت زول حتى البوس الكبير ذاتو.
* طاشم منذ عام 1983 ولحدي اليوم ماك عارف الحاصل حولك شنو.
* عندك ولد ولدتو وبس . لكنك ماعرفت تسكتو من ازعاج الجيران
لا ليل لا نهار .
* شايل حس المسيكينة ام الخير امام خلق الله كلهاحدها حدود
بلاد الواق واق وماجاورها .
* وصل بيك الحد حتى الزول بتاع طاحونة الحكومة مشيت اتطاولت
عليهو دون مراعاة لحالةالطوارئ المعلنة في البلد ولا مشاعر
الجنجويد ولا حتى احباب الله في الأرض أخواننا المجاهدين حماة
الدين .
* عندك صورة ضاحك فيها ومبسوط على الاخر مع جماعة طورا بورا
ومتوهط هناك وجالس يمينك أيمن الظواهري وابو مصعب الزرقاوي
والمدعو اسامة بن لادن يصب ليك في الشاي كمان .
**************************
وهذا قليل من كتير لا داعي لذكره هنا.. لانو هناك عدد من المفاجآت
سنواجهك بها داخل قاعة المحكمة ان شاء الله .
ثالثا:
*******
بما انك يا المدعو سجيمان بن خدوم بت ام عزين بت عثيمين
ود ضهبان .. قد ارتكبت عددا مركبا من جرائم مشهودة .. وعلى عينك يا تاجر .. ودون استئذان من جلالتنا المعظم .. فاننا قررنا القبض عليك الان وفورا ودن اي تأخير .. على ان تأتي الينا والحال كمايلي :
********
لابس من غير هدوم ..
شايل معاك الاتي :
***************
الابريق الكبير ..
السبحة ..
التبروقة..
مرتبة من شعر أو برش مش مهم ..
شجرة نيم لزوم السواك ..
رتينة تاريخية عشان الضو بالنهار.. لانو بالليل عندنا عمود بضوي براه من غير كهربا..
طوبة من كماين الجريف غرب لزوم الدعك أثناء الحمام .
***************
صدر تحت توقيع جلالتنا المعظم بقصر الجناب العالي وذلك بتاريخه
المعلن بكرة .
ديباجة ختامية :
***************
نحن في انتظاركم دام فضلكم.
ينفذ فورا وتستنفر كافة اجهزة الدولة الأمنية والبوليسية
والاعلامية والملكية وحتى الشوارعية لزوم الاحتياطي الواجب .
الأمضاء :
********
الملك المفدى : خضر عطاالمنان
ملك مراقبة سلوك أي زول يعاكس او يسب او يشتم اي زول ..
أي زول حتى الزول لو ماهو في كلوكلو .
***********************************************8
|
|
 
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
هذا والحاقا بمرسومنا السابق قررنا:
أولا :
*****
تشكيل هيئة المحكمة من الأتية أسماؤهم :
1ـ زعيط
2ـ معيط
3ـ قرد الطلح
4ـ كديس الخلا
5ـ فأر القماير
6ـ وأخيرا وليس أخرا : ود أب زهانة .
***********************************
ثانيا:
*****
أما حراسة المحكمة داخل وخارج القاعة فتتكون من الاتية أسماؤهم :
1ـ أب سيخة
2ـ أب عكاز
3ـ أب كراع
4ـ أسد الله البضرع
5ـ ضربو رما
وذلك لتأمين منطقة المحكمة وماجاورها من اي هجوم محتمل من أنصار
السيد سجيمان الذين روعو العالم منذ يوم 11/9/2000م .
ثالثا:
****
لكل المتضررين الحق في تسليم شكاواهم الى ادارةالمحكمة
بعد انتهاء المداولات والتشاور بين اعضائها واصدار القرار
النهائي بحق المدعو سجيمان .
رابعا :
*****
لا يملك المتهم المذكور أي حق في الاستئناف عقب صدور الاحكام
التي تتناسب وما قام به من جرم مشهود .. وذلك استنادا الى المادة
الخامسة بعد المئة من قانون معاقبة المجرمين الخطرين والمهددين
لأمن المجتمع الدولي .
هذا وبالله التوفيق .
التوقيع :
جلالته المعظم
قصر الجناب العالي .
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: ود الشيخ)
|
ود الشيخ
يمكن ياهو ذاتو .. بس مش المتنبي !!
عموما بما انك انت ياعزيزي اول الحضور لهذه المحكمة حتى قبل
المتهم ذاتو فقد قرر جلالته المعظم ( طويل العمر ) ان تأخذ
الكرسي الامامي .. يعني الكرسي القدام القاضي ذاتو .
كرم عربي اصيل يا ود الشيخ !!!!! .
لك المحبة.
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
اخى الحبيب : خضر
والله العظيم سجيمان دى اتلؤم عديل كان عمل الاتهامات دى طبعا كلامى دى ماشكك فى نزهتكم التى اثئق بها اكثر من نفسى لكن لزوم التعقيب بس .....
اسمع يالحبيب اديت ود الشيخ الكرسى الاول عشان كان اول المشاركين
اهه ياخضر ان ثانى المشاركين وقبل المتهم كمان ياترى حتتدينى شنو
حبى وتقديرى
السمؤل
| |
|
|
|
|
|
|
|
|
 Re: عاجلان : من عطا المنان .. الى سجـيمان !! (Re: خضر عطا المنان)
|
خرج الشعب يدافع عن البطل سجيمان
وكان صياح الجمهور سجيمان يا رمدان نحنا معاك في الميدان
وكانت جموع الشراتي تحاول صد المدافعين عن سجيمان
ولما اطل الملك من شباك القصر وراء هذه الجموع التي لا قبل له بها
وهي تصيح نحنا الطلبه سلاحنا الطوب ما بقلبنا طيش حنتوب
نحنا فداك يا سجومي
قلوبنا معاك يا سجومي
بالروح بالدم نفديك يا سجومي
واصل واصل في فضح السلطه يا سجومي
والله اكبر والعزة لسجيمان
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
سجيمان ياخوى
هو القاضى ده ذااااااااتو هسه الله يمرقو ، انا راجع من أمريكا لقيت صورتو فى مطار واشنطن وقعت من جماعة كده شكلهم زى ناس طالبان ديك ، وهسه سمعنا انو الصورة وقعت فى يد ناس ابو مصعب الحمرانى وسمعنا أنهم ناويين يقطعوا راس الصورة .. لكن هسه المشكلة البتواجه القاضى ناس الإف بى آى قالوا سمعوا بالصورة اللقيتها فى مطارهم دى وهسه فى طريقهم لى كوبنهاجن .. الله يستر مااشوفو معاك فى غوانتانامو
ـــــــــــــــــــــــــــــــــــــــــ
[email protected]
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: لؤى)
|
لؤي :
يا خوي شايفك ماك داير تجيبا البر تب !!!!
يعني كلما أحاول انسى ناس طالبان القاك ورايا ورايا !!
انت المصلطك علي منو ؟؟؟؟؟ قول واعترف .
غايتو انا مابعرف يا لؤي الصورة لو جاتا اي عوجة والله
يوم القيامة ذاتو أجيبو ليكن ماشي بى كرعينو !!!!!!!!! .
بعدين كيف ناس الـ FBI جايين الدنمارك وهي الصورة انت اللقيتا
في مطارم .. وهي حسه معاك انت في السويد؟؟؟؟؟؟ .
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
السيد رئيس المحكمه
| Quote: وأخيرا وليس أخرا : ود أب زهانة |
ود أب زهانة ده من ذمان مجننى ...مشكلتو شنو؟؟؟؟؟؟
قالوا بياكل فى المطاعم الفاخره
و بيكون لابس بدله و كرفته ...
و باليل بنوم فى الجامع عشان ما عندو بيت
و بقولو عليه اقرع و نذهى
اتمنى من حضرة المحكمه تحكى لينا شويه عنه و لو امكن فى بوست منفصل
اما عن سجيمان ده فهو مدان مدان ,,,اما عن مرافعته البكمتب فيها ليهو يومين دى ..خليها يبلا و يشرب مويتا
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: Elnasri Amin)
|
النصري :
نعم انا معاك رئيس المحكمة شخصيا:
طيب عشان ود أب زهانة دا مجننك .. مقلق منامك .. مساهر بيك
الليالي .. ويسوي في القلتو دا كلو .. قرر جلالتنا تعليق
جرس كنيسة مقاس كبير فوق راس ود اب زهانة .. ونطلقو يجيك
جاري جري عشان جنك ذاتو يطير مرة واحدة وتعيش مبسوط ومرتاح
بقية عمرك ان شاء الله .. لا اب زهانة .. وأب أي حاجة من النوع دا .
رأيك شنو ؟؟؟؟؟؟؟؟؟؟؟؟؟؟ .
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
Quote: * واقع في خلق الله لفت نظر ما خليت زول حتى البوس الكبير ذاتو.
* طاشم منذ عام 1983 ولحدي اليوم ماك عارف الحاصل حولك شنو.
* عندك ولد ولدتو وبس . لكنك ماعرفت تسكتو من ازعاج الجيران
لا ليل لا نهار .
* شايل حس المسيكينة ام الخير امام خلق الله كلهاحدها حدود
بلاد الواق واق وماجاورها .
* وصل بيك الحد حتى الزول بتاع طاحونة الحكومة مشيت اتطاولت
عليهو دون مراعاة لحالةالطوارئ المعلنة في البلد ولا مشاعر
الجنجويد ولا حتى احباب الله في الأرض أخواننا المجاهدين حماة
الدين .
* عندك صورة ضاحك فيها ومبسوط على الاخر مع جماعة طورا بورا
ومتوهط هناك وجالس يمينك أيمن الظواهري وابو مصعب الزرقاوي
والمدعو اسامة بن لادن يصب ليك في الشاي كمان .
|
مولاي عطا المنان
اولا.... انا عبدك الفقير والروحو طالعة سجيمان.....انا بصراحة االبوس الكبير احترمو واوقرو..واقدرو.. حق تقدير.... لكن هو مطنشني... انا حبيت بكري وحبيت صلعتو....لدرجة اني حلقت لي ناس البيت كلهم صلعة تيمنا بصلعة بكري.... وحتى انا وام العيال... صلعنا......ويمكنكم الرجوع الي البوستات الفيها صورة بكري وهو مصلع ومكوع...وانا اشكر فيهو....كما وانني قمت بكتابة قصيدة صلعاء فيهو مطلعاها.....
غنماية.. يا غنماية
الله لي من ديل
السكنو.... الحلفاية
الله لي من ديل
اما.... بخصوص البوس...... اصبح شعاري من اصحا من النوم واخد كباية الشاي قدامي..... شعاري
ماهو..... الفافنوس
ماهو الغليد البوس
واصبح نشيد الصباح...في البيت.... نقيف صف...كلنا ونربع ايدينا ونقعد ننشد....انا واسرتي الكريمة....
حاشاهو ما بلف... ولابيكتح
الشوفتو تخلي القلوب تنتح
مافي راجلن في المنبر
.......يتفلهم و يشتح
احي يا عادل... اب ماوسن يسوي التح
اها...عليكن الرسول وان شاء الله ربنا يكسركم واحد واحد يا محكمة انا قصرت مع الزول دا....؟
*اما انني طاشم من سنة1983..... لقد جانبكم الصواب....مع احترامي لكم.... انا يا سادة طاشم من سنة 1977......يعني قبل قوانين سبتمبر....والمادة اربعة من قانون العقوبات...منطوقها.... لا يعاقب ولا يحاسب من وجد طاشما قبل تاريخ اصدار القانون....حتى ولو كانت الطشمة من النوع طويل الاجل....
*انا اعترف واقر بان ابننا... من ناحية مزعج....فهو مزعج....ودي حكمة ربنا نسوي عليها كيفن؟.....ونحمد الله ان لم يكن انتاية مزعجة......
اطلب راحة من المحكمة....واواصل
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: سجيمان)
|
المتهم سجيمان :
أولا: كيف تقول ( عبدك الفقير الروحو طالعة ) .. وانت تسوي
في العمايل دي كلها ؟؟؟؟؟؟ .
ثانيا: يعني الغزل بى صلعة البوس بكري وصل بيك حد تقول شعر
كمان ؟؟؟؟؟ .. وقدام ام الخير وامام المحكمة الموقرة كمان ؟؟
يعني ما بتختشي ؟؟؟؟ .
ثالثا: كيف أيها المتهم الخطير سجيمان تتطاول على المحكمة
الموقرة .. وتقول لينا ( ربنا يكسركم واحد واحد ) ؟؟؟
أها دي كمان تهمة جديدة قررنا نضيفا للملف الاسود بتاعك ان شاء الله !!.
رابعا : دي الظاهر انها فعلا طشمة مزمنة شديد .. دا طبعا باعترافك
بى عضمة لسانك .. ودي براها عقوبتها مضاعفة ( بالتقادم !!!! ) .
خامسا: الحمد لله دي اول مرة تعترف فيها بواحدة من سلسلة جرائم
مشهودة عملتها ( ولدي فعلا مزعج !!!! ).
بعدين هنا حكاية ( حكمة ربنا ) دي ... خليها بعيد .. لانو حكمتو
ما قالت ليكم عرسو .. و أولدو .. وأزعجو الجيران كمان ؟؟؟ .
سادسا: راحة شنو الكلو مرة قاعد تطلبها دي ... وساويها سبب ؟؟؟؟ .
والمرتاح ليها شنو وانت الجرائم دي كلها فوق راسك دا ؟؟؟؟؟؟ .
الجلسة تتواصل
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
جلالة الملك المعظم الخامس والثلاثين بعد المئه
بلغنا نحن كبير الاستخباراتية فى مملكتكم الدائمة ياْذن اللة اْن السيدة الفاضلة اْم الخير ترجو المثول بين يديكم وحينما ساْلناها عن سبب هذا اللقاء ردت قائلة باْنها تطلب من سيادتكم اْنزال اْقسى العقوبة على السيد سجيمان
فهو ياسيدى الملك المعظم وابنه الذى طلع ليه فى كل حاجه قد روعوا البلد وغلبوا اْم الخير غلبة شديدة خلاس.
مولاى الملك ترجو السيدة الفاضلة اْم الخير من جلالتكم حبس السيد سجيمان مدى الحياة وارسال أبنه الى الدفاع الشعبى.
وعاش الملك
يحيا الملك
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: nour tawir)
|
من جلالته المعظم
الى كبير الاستخباراتية بمملكتي الدائمة باذن الله :
قلت كدا برضو .. أم الخير أتاري المسيكينة ممكونة وصابرة..
مغلوبة شديدة .. الزول دا مورم ليها فشاشا.. لاوي ليها
مصرانة .. ساويلا المابينسوا ذاتو .. ممغوسة لامن مفعوصة.
تقولي لي القاعدة يانور ؟؟؟؟؟؟؟؟ .
عشان كدا انتي يا نور من دربك دا وطوالي لى ام الخير .. طمنيها
كتير .. وكل الدايرواهو راح يحصل باذن الله .. بس لكن بعد
ما نفش غلنا فيهو.. ونسويلو زي جماعة أبو غريب.. نفتت ليك كيانو ..
نقصقص ليك ريشو ورا وقدام .. نمعط شعيراتو الخمسةالباقية دي .
أها تاني دايرا شنو ام الخير دي ؟؟؟؟؟.
جلالته .
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
جلالة الملك المعظم / لك منا كل الشكر والتقدير على ثقتكم فى خادمكم المطيع لتوليه بى تلك المهام الصعبة والترقية التى صدرت منكم بتاريخها المشهود بها آملا ان اكون على قدر تلك المسؤلية وان اكون طوال عمرى فى خدمة سيادتكم حتى لو ادى ذلك للمجاسفة بحياتى
مرفق بعض البيانات :
الى جلالة الملك المعظم / بعد توكلى بمهام تفتيش المتهم المدعو سيجمان حذرا ان يكون حاملا عيارات انفجارية من النوع الثقيل تم تفتيش المتهم بدقة كاملة فى التفتيش المبدئ اتضح انه لايحمل اى شى من ذلك القبيل وكان ذلك اثناء التفتيش اليدوى التقليدى .... ونسبة الى حرصى الشديد فى خدمة جلالتكم لقد لجاءت الى التفتيش الحديث حاملا معى احدث الآلآت التى صنعت لذلك الغرض وبعد وضعه فى الجهاز الآلى تاكدى لى بانه كان يحمل بعض الاسحلة النارية بالاضافة الى بعض المتفجرات التقليدية ( المنتوف ) ....... واتضح من خلال الجهاز الآلى انه وضع تلك الاسلحة والمنتوف فى مكان لايخطر على ذهن بشر
ونسبة الى هذا اوكد لسيادتكم الحرص الشديد على هذا المدعو سيجمان
خادكم المطيع
السمؤل
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: samwal ebrahiem)
|
يا جلالة الملك المعظم
احي فخامة جلالتكم وليس لي ادني شك من عدالتكم التي ادت الي تقدم ورفاهية مملكتك العريضة ذات الشان العظيم,
مراقعتي بشان ام الخير التي يبرها شقيقي سجيمان ويحسن اليها الا انها كلفوت ملفوت هو جاي من الخلا هي جاية من البيوت . لاتديهو مقوت ولا تخلي كلمة منو تعدي تفوت, اخي البار انصف في حقها,كما ان طشمت شقيقي سجيمان كانت بثمن زهيد من ايام البيرة ام قزاز ,وهي طشمة خفيفة غير مزعجة , يا جلالة الملك طالبا منكم النظر في مرافعتي هذه
خادم جنابك وذ الزميكان شقيق سجيمان
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
الملا عمر ود الملا عمر إبن أبي الملا التاسع عشر وجورج السابع عشر والعيد الخامس عشر لثورة الإنقاذ الوطني – إن شاء الله يكون آخر عيد – من مواليد حلة البير دكتواره في القانون من جامعة ما بخاف ولا بتر ، عضو هيئة المحلفين والحالفين بالطلاق والكذب ، عضو المحكمة الدستورية العليا بحلة أب كريق في اللج سدد وحبس الفجج ، محامي الدفاع عن السيد سجيمان ووكيله الشرعي في هذه القضية والراعي الرسمي لمشاكله كافة.
بداية لقد أدعي جلالتكم على موكلي السيد الدكتور سجيمان في منفاه الإختياري بأنه إرتكب العديد من الجنح وسوف أحاول بعد إذن عدالة المحكمة أن أفند التهم الموجهة إلى موكلي:
أولاً فيما يتعلق بإتهام جلالتكم لموكلي أنه واقع في خلق الله لفت نظر ولم يترك زول حتى البوس الكبير ذاتو.
أقول مستعيناً بالله أن موكلي من المتأثرين بأغنية قبلي جاي وقبلي جاي وأن الشعب كله أصبح يتلفت براهو وفي كل الإتجاهات بسبب أو بدون سبب لذلك فإن عملية لفت النظر التي يمارسها موكلي لا معني لها لأنه لو لفت نظر الناس أو لم يلفت نظرهم هم براهم بتلفتو زيهم وزي أى مروحة تربيزة في عز الصيف أو مشاهد لمباراة تنس طاولة بين إثنين من اللاعبين الصينيين.
شكراً جلالتكم ولتسمحوا لي برفع الجلسة والتوقف لتناول الفطور وهو عبارة عن صحن بوش كارب غرقان في زيت السمسم لي شوشتو وقد كلفنا مبلغ مقدر من المال ويشرفنا ويسعدنا دعوة جلالتكم لمشاركتنا طعام الإفطار والعاقبة عندكم في المسرات - يعني تكل وتدفع - والكشف عند سجيمان ولنا الحق في رفض المبالغ التي نرى أنها أقل من إمكانيات أصحابها ومقدراتهم ويكفينا أن تدفعوا ربع العشر من دخلكم السنوي. شكراً
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: almulaomar)
|
سيدي القاضي الفاضي جلالة الملك
أهو رجعنا من الفطور لمواصلة مرافعتنا عن المتهم سجيمان ، فتقولون أطال الله عمر جلالتكم أن موكلي هذا ............ الوديع - بعدد النقط - طشم منذ العام 1983 ولم تفك منه حتى تاريخه ، ويبدو أن في الأمر بد ولابد مما ليس منه بد ، فإذا كانت الطشمة قد إستغرقت كل تلك الحقبة من حياتنا فهذا يرجع لأمرين لا ثالث لهما أما الأول فهو أن المادة التي ستخدمها سجيمان أثناء طشمة كانت مادة قوية وفتاكة وهذا ليس بذنبه بل هو ذنب أولئك النسوة اللائي صنعن تلك المادة ويشاركهن في الذنب هيئة المواصفات والمقاييس التي منحت شهادة الأيزو والما عايزو لهذه المادة ولا أبرئ فريق حماية المستهلك وحماية الحياة الفطرية وإنمائها ، أما السبب الآخر - وأقول آخر لأن كل ما لا ثالث له فهو آخر - يجازيك يا أب حراز كرهتنا الكلام ، فهو أن موكلي مكنته خفيفه ولا يحتمل مثل هذه المادة التي تسبب الطشمي مما جعله طاشم قربة ربع قرن من الزمان لا يدري ولا يدري أنه لا يدري. لهذه الأسباب مجتمعه تنتفي هذه التهمة عن موكلي ويكون باقي لينا كم تهمه كده نشوف الحا يحصل فيها شنو.
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: almulaomar)
|
ياخوي انت قلت منو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ .
الملا منو؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ .
أنا الليلة طرشتا عديل كدي : تاني قول لي اسمك لو سمحت !!!.
الملا عمر ؟؟؟؟؟؟ لا اله الا الله .. أشهدأن محمدا رسول الله ..
استغفرتك يا مالك روحي .. وأشهد الا اله الا انت .. وحدك لاشريك
لك .. لبيك اللهم لبيك .. لبيك لا شريك لك .
دا جلالتو يرجف من اللسمو بن لادن الماشافو كلو كلو.. يقوم يطلعولو الملا عمر ذاتو؟؟.
براي سويتا في نفسي !!! لكن : (( دا كمان اثبات جديد لنج على عضوية قشيران في تنظيم القاعدة المقلق بى بوش في منامو!!)).
اصبر آ قشيران بجي الخريف واللواري بتقيف !!!.
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
Quote: رابعا : دي الظاهر انها فعلا طشمة مزمنة شديد .. دا طبعا باعترافك
بى عضمة لسانك .. ودي براها عقوبتها مضاعفة ( بالتقادم !!!! ) .
|
وانا اقول .... ليه لساني ده مالو كده دايما في حاله ... ..... تراهو مافيهو عضمه.... كدي امشي اشوف لي عضمه واجيك راجع .... وبعدين ياناس ده لاني انا مابرضي ... في سجيمان ده اي كلام ..... اها يا دكتور وبما اني قربته من تخصصك ياربي اجيب عضمة شنو علشان اجيب ليك حقك وحقي الضايع طول السنين ما متقول لي تي بوووووووووووووووووووووون
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: سجيمان)
|
دا شنو آ قشيران ؟؟؟؟؟
تعال هنا بلا ست الشاي بلا كلام فارغ ..
هي دي محكمة وسوق ام دفسو ؟؟.
المحكمة دي جاطت لانك خلقت لينا ازمة هنا :
كل أجهزة الاعلام من بلاد ما زول سمع بيها جو هنا عشانك ..
تقوم تقول لينا تحرد ؟؟؟؟؟؟
عندك 50 ساعة يا تحضر ياكمان !!!!!!!!!!؟؟؟؟؟؟؟*****%%%%%.
النشوف .
جلالته .
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
| Quote: والقاضي زي ست الشاي كل مرة يتلفت تونس مع زول..... |
يامولانا
ما قلنا ليك المتهم ملسن و ما بنقدر....
حاكمو و خلصنا
تخريمه عندى نكته:
بدا القاضى الحكم فى قضيه ضد احد الرباطاب "حكمت المحكمه على المتهم بالاعدام شنقا حتى الموت" ثم التفت على المتهم و قال "فاهم الكلام ده؟"
رد المتهم "فاهم ياحضرة القاضى,عامل راسك ده زى راس العتود"
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
صاحب العظمة السايق العظمة جلالة الملك خضر عطا المنان قاضي المحكمة والحاكم بأمره ، أولاً أراك تركت الحمار ممثلاً في إتهام جلالتكم لموكلي الدكتور سجيمان وتشعبطت بالبردعة ممثلة في حضرتنا ، وأحسب أن نهجك الأمبريالي هذا لا ينطلي على أحد فكل عربة مفخخة تنفجر في العراق يقولون أن جماعة الزرقاوي تقف وراءها وكأن الزرقاوي هذا قوس قزح بجميع ألوانه هذا إذا لم يكن في الأساس أسطورة من أساطير المارينز ، يضاً كل إنفجار أو إندحار هنا وهناك يقولون أن القاعدة تقف وراءه ولا أعرف إذا القاعدة دي وقفت حا تعلم فيهم شنو ؟ ما علينا فكوني ملا يعني إنضوائي تحت لواء القاعدة وكان على جلالتتكم أن يحسن الظن بي وينسبني إلى ملا الأمدرماني بدلاً عن الملا الأفغاني. ولأنك الملك المتوج بإرادتنا أو بغيرها تنازلت عن حقي الخاص في هذه القضية (قضية الملمة ونسبتها) وطبعاً الحق العام غرق لأنك أنت الخصم والحكم.
أما التهمة الممثلة في أن المدعو سجيمان عندو ولد ولدو وبس – فهنا يجب أن تتوقف يا صاحب الجلالة زيك وزي أى شيخ يمتطي حماراً أو بغلاً في أى مطب صناعي – يعني شنو ولدتو وبس يعني عاوزو يلدو ويعرس ليهو في نفس اليوم ولا يلدو ويلعب بيهو كورة – ما علينا إن الملوك عندهم حق الفيتو. أما كونه غير قادر على إسكات إبنه المغلوب على أمره وما يسببه من إزعاج للجيران وبعيداً عن الأسباب والمسببات التي أدت إلى بكاء سجيمان الصغير وبإستمرار فإن الخطأ على الجيران لا على إبن سجيمان المسكين ، فيمكن لكل من أراد أن يكون في مأمن وبعيد عن الإزعاج أن يسكن في حي راقي لأن سجيمان يسكن في حي شعبي جداً والحي شعبي شعبي وكفى.
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: Dr. Moiz Bakhiet)
|
لا بقي هنا لازم ناخدلنا صنة ونشوف القادم السمح دا منو !!!!! .
عموما :
(( من جلالتو المجلجل
الى سعادتو المبجل
ود عمنا عمر بخيت :
غايتو لو ما كان الواحد غرقان في شوقو ليك .. كان عندنا
وايد كلام عن قشيران دا !!!! .
بس لو تسمح يا سعادتو أنا داير اشكيلك الزول دا :
هو بصراحة مستغل الحصانة الممنوحة ليهو دي استغلال بشع
للغاية .. ويبرطع ساكت زي ماعايز .. وقايل دولتى العظمى
دي ما فيها قانون !!!!!.
جلالته.
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
جاء في إتهامك الرابع الموجه إلى موكلنا معالي الدكتور سجيمان ما يلي:
شايل حس المسيكينة ام الخير امام خلق الله كلهاحدها حدود بلاد الواق واق وماجاورها .
--
هنا سيدي يجب أن تتعظ وتتعلم من المثل القائل " سيد الحق راضي شن دخل القاضي" أو المثل الثاني " الفاضي يعمل قاضي" فهل شكت لك أم الخير ، يا أخي ما هي مبسوطة ومغتربة مع بعلها الدكتور سجيمان وعقد زواجها مع معالي الدكتور سجيمان غير محدد المدة وقد مضي على وجودها في الخدمة أكثر من ربع قرن من الزمان ، ولا ما عجبك الحال وعاوز تخرب البيوت.
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
يا مولانا انا شايف المحاكمه دى ماشه غلط كل اليوم ,,و المتهم جند خيرة المحامين و كمان دخل واسطات ....بالاضافه انو عندو شعبيه كبيره ...و انا خايف يحصل شغب شعبى فى حالة ادانته
انا فى رائ (بعد موافقة سعادتكم) تخش فى موضوع تسويه.
شوف المناسب شنو..و انا يكفينى كل حقوق النشر الادبيه و بطلع منها
و دمتم
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: Elnasri Amin)
|
النصري :
المحكمة ما ماشية غلط أبدا .. دا انت الماشي غلط يعني عكس
السير !!!!!!!..
دي في حد ذاتها جريمة في مملكتنا المحترمة دي !!!!.
بعدين انت تقول تسوية !!!!!
تسوية مع منو ؟؟؟؟؟؟؟؟.
أوعك يكون قشيران دا ؟؟؟؟؟.
أنت آ زول ما نصيح وللا شنو..؟؟؟ أظنو يا خوي النصري عمنا
ود أبو زهانة جاك بى غادي فعلا ؟؟؟؟!!!!!!.
جلالته.
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
انور كينغ..... غشانا.... جايب لنا فتح خشم بورد...وبورد قديم وخرابة كمان...وقال داير يربط لسانو معانا...... رضينا.... حسي جا نطا...... قال اسم البت ما عاجبو.... نحن ما عندنا مانع نلحقا في عقاب اليوم دا ونسميها سحر.... اها قصرنا؟.....وبعدين حسي هي مسيكينة تبكي ليل نهار..... وبدت تكتب في معلقة
أقذاً بالعين ام بالعين عوارُُ
ام ذرفت بعد ان غشاكي بوبارُ
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
جاء في الإتهام الخامس الموجه إلى موكلنا يا صاحب الجلالة والركشة والحمارة والباتا والكدارة
وصل بيك الحد حتى الزول بتاع طاحونة الحكومة مشيت اتطاولت عليهو دون مراعاة لحالةالطوارئ المعلنة في البلد ولا مشاعر الجنجويد ولا حتى احباب الله في الأرض أخواننا المجاهدين حماة الدين .
وبعد إذن عدالتكم وعدالة المحكمة أقول مستعيناً بالله ، أن موكلي الدكتور سيجيمان لم يكن يعلم يقينا أن هذا الشخص يعمل في طاحونة الحكومة لأسباب يأتي في مقدمتها أن نهج سيادته رأسمالي وهو يؤمن بأن بقرة الحكومة أقل لبناً من بقرة المواطن أو البقرات الثلاث ، والسبب الثاني أن موكلي تشابه عليه البقر ولم يكن يعلم علم اليقين أن بتاع الطاحونة هذا من جماعة الحكومة حيث أن جماعة الحكومة من رأس الدولة الى أخمص قدميهما تفتقت أذهانهم وعراريقهم وعرفوا الصبغة لنفض الشيب من شعور رؤوسهم وشعور وأحاسيس الشعب كافة كما تعدوا ذلك الى الشعر الغنائي. إضافة إلى أنهم – أى ناس الحكومة – يلبسون سفاري
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: almulaomar)
|
الملا عمر :
ياخوي انت اول شي مسعول من الخير : انت وين قاعد ؟؟؟؟؟؟؟.
انت مافي لا في جبال طورا بورا .. ولا قلعة جانقي .. ولا وديان
هيرات .. ولا حتى في بالي ذاتا !!!!!! .
الطائرات .. والقاذفات .. وراجمات الصوريخ.. وراجمات الدبابات والاقمار الاصطناعية الاميركيةدي كلها ابت ماتجيب لينا خبرك !!!!!!.
أظهر لينا شوية عايزين نشوفك بس !!!!!!!. مش من ورا الستار خالعنا
كل ما قلنا قشيران دا كتال كتلة ومجرم محترف !!!!.
بعدين كيف ما قادر يفرق بين البقرات ديل وشعبي كلو عارف هناك :
بقرة حسين خوجلي .. بقرة العشش .. بقرة البشير .. بقرة أم على ..
بقرة المنشية ........ الخ . والفرق واضح زي الشمش زي ماشايف.
جلالته .
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
عأأأأأأأأأأأأأأأأأأأأأأأأجل :
بعد اكتشاف مخابراتنا المستيقظة ليل نهار من أجل حماية مملكتنا
الموقرة لمؤامرة خطيرة يقودها المدعو ( الملا عمر ) لتهريب
المتهم الأكثر خطورة ( سجيمان ) .. فان جلالتنا قرر :
استئناف المحاكمة الان وفورا .. وعلى الجميع الحضور
في الزمان والمكان اللذين حددهما جلالته المعظم ( دا سر !!!) .
جلالة الملك المفدى .
القصر الملكي .
فجر اليوم الاثنين الموافق للعشرين من شهر سبتمبر / أيلول .
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
لوووووووووووووول النشيطان الظريفان سجيمان وود عمى عطا المنان ..
انت عارف ياخدر يا خوى .. جدنا عطا المنان ده لو عارف القافيه بتجيب اسمو مع سجيمان .. كان سمى نفسو عطا البارى ولا عطا السيد .. بس المهم يبعد من ابو الدنان ده .. لوووووووووووووووول سجيمان ..
لكن طبعا ضحكت كده كمية من الضحك لما شكيت انو الجيران يكونو سمعونى .. بس بركه الدنيا بقت نص النهار عندنا ..
1ـ زعيط
2ـ معيط
3ـ قرد الطلح
4ـ كديس الخلا
5ـ فأر القماير
6ـ وأخيرا وليس أخرا : ود أب زهانة .
عارف اتذكرت نكتة ظريفه بى كلامك الفوق ده
ود اب زهانه دى ذكرتنى موقف طريف جدا
مره جينا فى اجازه من القضارف لى قريتنا الحنينه الجنيد ..
كانت معانا حبوبتى الله يرحما .. عندها برش بتضفر فيه بالسعف طبعا .. الحاجات دى بعرفوها ناس البدرى السمح وابو جهينه وسجيمان ده وانت اكيد ود عمى عطا المنان ..
المهم حبوبتنا دى جاتنا زياره طبعا .. رسلت اختى الصغيره لى بيتها قالت ليها تمشى تلقى خالتك هناك قولى ليها حبوبه قالت ليك ادينى باقى السعف الفى البيت .. اسمو (الحنقوق )
اختى استغربت فى اسم ( حنقوق ) ومشت البيت وصلت هناك نست ليك الكلمه دى خالص ..
اتورطت بعدما وصلت .. لقت ناس خالتى ما شاء الله قاعدين كلهم .. طوالى دخلت شمال .. يا خالتى قالت ليك حبوبه ادينا خشم الحلوف ..
خالتى وقعت من الضحك .. قالت ليها سجمى ؟ اجيبو من وين ده يا بت ؟
قالت ليها لا لا ما خشم الحلوف ..لكن اظنو تور الله الانطح...
والله هذا ما حصل .. يعنى شوف زى الجيل ده ينسا تراث بحجم النخيل ..
والتحيه ليكم من تانى يا العشا .. ولى متهمك سى جى
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: soma)
|
))**انت عارف ياخدر يا خوى .. جدنا عطا المنان ده لو عارف القافيه بتجيب اسمو مع سجيمان .. كان سمى نفسو عطا البارى ولا عطا السيد .. بس المهم يبعد من ابو الدنان ده **)) .
*****************************************
فراشتنا الجملية ( سوما) :
حلوة ابو الدنان دي !!!!!.
انتي عارفة بالطريقة دي حتخليني أفكر بصورة جادة في حكاية
تغيير اسم والدي المرحوم ( عطا المنان ) طبعا باثر رجعي !!!!!!.
لكن المصيبة اليقنع لي ( قشيران ) دا منو بأنو يساعدني في المهمة
دي .. بس يسرع بالحضور الى المحكمة لانو الالاف منتظرين محاكمة القرن
دي !!!!!!!!.
بعدين كلما استوقفني اسمك يا سوما اقوم فجأة اتلبش واتلبس بحالة
تراثية عجيبة من مسميات لا يعرفها الكثيرون من (جيل الشيكولاطا) المدلل دا .... عشان كدا كل يوم تضيفي الينا من بيت الكلاوي حاجة جديدة من تراث ومفردات تكاد ان تضيع من بين اضابير الزمن العجيب .
وهنا المهم ياسوما انتي عارفة مجرد مشاركتك في هذا البوست والتعريج على محاكمة ( قشيران ) دا حتمدد من عمرو لانو بكل بساطة
اكراما لك يا فراشتنا الجميلة سنمدد له بدلا من ان تكون عاجلة وفورا
ستكون مفتوحة ربما الى ماشاء الله !!!!!!!!.
قشيران دا محظوظ نسوي شنو ؟؟؟.
جلالته المعظم .
القصر الملكي .
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: خضر عطا المنان)
|
جلالة الملك المتوج على عرش اللياقا الخرطومية والكاليشو البورتسوداني تقول - طال عمر وزاد وجدك بالقدر الذي يصبح معه نوم عينيك قليل - في تهمتك الأخيرة في حق موكلنا الدكتور سجيمان أيده الله بنصر من عنده:
عندك صورة ضاحك فيها ومبسوط على الاخر مع جماعة طورا بورا
ومتوهط هناك وجالس يمينك أيمن الظواهري وابو مصعب الزرقاوي
والمدعو اسامة بن لادن يصب ليك في الشاي كمان
أولم تسمع سيدي أن أغنية الدكتور سجيمان المفضلة "حبيبي أبسم لي وأنا أبسم ليك" وأيضاً "أغنية أعاين فيهو وأضحك" و"وراء البسمات" وأخيراً "إبتسامة الزول بتنبع من ضميرو" فلا غرابة في أن يضحك في تورا بورا أو تيرانا ، أما حالة كونه يتوسط الظواهري والزرقاوي فإتينا بدليلك الدامغ إن كنت من الصادقين ، وأرجو قبل كل شئ أن ترسونا على بر فهل الزرقاوي هذا موجود في العراق أم في أفغانستان أم في السودان أم هو من أساطير الأولين أم هو عفريت من الجن.
شكراً جلالة الملك
| |
|
|
|
|
|
|
|
|
|
Re: عاجلان : من عطا المنان .. الى سجـيمان !! (Re: almulaomar)
|
الملا عمر :
يعني ( قشيران ) دا ما لقالو ناس يضحك معاهم الا الناس ديل ؟؟؟؟!!.
المهم يا الملا لازم تعرف انو الزرقاوي دا موجود ومحشور في راس
زول زعيم اكبر عصابة ارهابية في الكون دا اسمو ( الود جوجو
بشبوش ) !!!!!! عرفتو ؟؟؟؟؟؟؟؟.
يلا سوق صاحبك الضاحك دا وجيب فسرع للمحكمة قبل نرسل ليهو
توما كوهك العابر للقارات دا !!!!!!!!!.
جلالته المعظم.
القصر الملكي المفخم .
| |
|
|
|
|
|
|
| |
خضر عطا المنان
samwal ebrahiem
abas
سجيمان
لؤى
nour tawir
saif massad ali
almulaomar
willeim andrea
محمد الامين احمد
Dr. Moiz Bakhiet
فيس بوك
تويتر
انستقرام
يوتيوب
بنتيريست