|
|
 عاجل جدا من الخرطوم : عبد العزيز خالد في أجرأ حواربعد حريته!!!
|
في خبطة اعلاميةاخرى وعبر اتصال هاتفي مطول ..المقاتل عبد العزيز خالد:
*هذه هي حقيقة اعتقالي وهؤلاء هم من يقفون خلفها !!!!
*هكذا يمكنني أن اواصل نضالي من الداخل!!!
*أهل الحلفاية سجلوا أبلغ رسالة لمن يود أن يفهمها!!!
*التحالف باق ما بقي النضال حيا فينا !!!
* لا أريد أن أشخصن الصراع مع أفراد ( يعني التيسيريين وهذه من عندي انا!! ) .
* مهما قيل عن مسألة العفو الرئاسي فنحن من انتصرنا !!! ؟؟ كيف ؟؟؟
* لكل مرحلة نضالية أسلحتها وظروفها !!!!
* لن نوقف النضال حتى تحقيق ما بدأنا هذاالنضال من أجله سلما كان
ام مواصلة له حتى النهاية .
* أما عن قضايا السلام ومستقبله في السودان فأناأقول ........!!!
* وهذا هو رأيي في الحوار الصحفي المطول الذي أجريته أنت معي من داخل
معتقلي بالخرطوم!!!!!!!
الخ .......الخ .......... الخ
**************************
سادتي / سيداتي سأوافيكم بكل هذه التفاصيل ان شاء الله لازالة ذلكم
اللبس واللغط اللذين صاحبا مسألة الافراج عن هذا المقاتل ..
اذن. دعونا نسمع معا ومنه شخصيا..
كونوا معنا ,,,,
للجميع تحياتي وعظيم تقديري .
خضرعطا المنان
|
|
 
|
|
|
|
|
|
|
|
Re: عاجل جدا من الخرطوم : عبد العزيز خالد في أجرأ حواربعد حريته!!! (Re: Bashasha)
|
أحبتي الأكارم :
الان الى تفاصيل الحوار الهاتفي الذي أجريته هذا المساء ( الاثنين 20/12/2004م )
مع ريئس المكتب التنفيذي للتحالف الوطني السوداني /قوات التحالف العميد عبد العزيز خالدمن داخل منزله بالحلفاية :
يا مرحبا سعادتك معاك خضر عطا المنان من الدنمارك
(( أهلا بيك يااستاذ وانا في الحقيقة بشكرك كتير على وقفتك المشرفة ..
وبشكر كل الناس الاهتمو بالقضية دي .. عليك الله بلغهم كلهم تحياتي
..والف شكر ليك ياخي كتير .. وطبعا الواحد لازم كمان يشكر الأخوة
في منظمة حقوق الانسان السودانية هنا في الخرطوم على ما بذلوه من مجهود
كبير ومقدر )) .
كيفك وكيف الصحة الآن ؟؟
(( والله الأمور تمام والصحة الحمدلله كويسة )).
طيب أسمح لي بسؤال مباشر لانو زي ماعارف سعادتك ناس كتيرة متابعة قضيتك دي
وأثير حولها الكتير .. يقول البعض ( اذلال عبدالعزيز خالد في الخرطوم !!!) ..
ردك شنو على كلام زي دا ؟؟
(( اذلال يعني كيف ؟؟؟))
يعني انك قبلت مسالة العفو بشروط ربما لا تليق كما قال البعض أي أنها شروط
تتسم بالاذلال ؟؟
(( لا أبدا .. لا اذلال ولا حاجة ..بعدين انا شايف الحكاية عكسية تماما .. لانو
الغرض أساسا كان من البداية مش اذلال او كدا .. كانت محاولة من النظام لضرب
الحركةالسياسية في السودان برمتها والتوجهات الجديدة .. ولكن جات النتجة عكس
ماكان يشتهي النظام .. وأنا أفتكر انها عملت حركة جماهيرية واسعة وحيوية )) .
عفوا ياسعادتو .. الجماهير الانت بتتكلم عنها دي ما زالت منقسمة : هناك من يقول
بأن النظام انتصر واستطاع في النهاية أ ن يفرض شروطو هو وبالتالي يحد من قدرتك
على اي فعل مؤثر .. وآخرون يقولوا العكس ؟؟.
(( الحقيقة هنا عندنا الصورة بتشاف بطريقة مختلفة جدا .. لانو أصلا من سنة 2000
من اتفاقية مشاكوس تم وقف العدائيات بين النظام والمعارضة ..يعني مافي اي معارك
جارية لا في الشرق ولا جنوب النيل الازرق بالمعنى المعروف للمعارك .. بالتالي دا كان
أمر متقف عليه بين التجمع الوطني والنظام .. طبعا في عام 1997 بدا يكون مسموع صوت البندقية.. وكان هناك فعلا تعاطف كبير جدا مع الامر دا .. لكن بعد مشاكوس زي ماقلت
ليك الوضع بدأ يتغير وبقى هناك فرق كبير جدا بين الحالتين .. والشي الحاصل الليلة دا ماحق بندقية لانو التوجه العام بقي سياسي والكل ساعي في هذا الاتجاه من قبل الطرفين سواء النظام او التجمع الوطني وهناك حوار بينهما جاري الآن .))
يتبع ..........( 2)
مع تحياتي للجميع
خضرعطاالمنان
| |
|
|
|
|
|
|
|
|
|
Re: عاجل جدا من الخرطوم : عبد العزيز خالد في أجرأ حواربعد حريته!!! (Re: خضر عطا المنان)
|
Quote: (( الحقيقة هنا عندنا الصورة بتشاف بطريقة مختلفة جدا .. لانو أصلا من سنة 2000
من اتفاقية مشاكوس تم وقف العدائيات بين النظام والمعارضة ..يعني مافي اي معارك
جارية لا في الشرق ولا جنوب النيل الازرق بالمعنى المعروف للمعارك .. بالتالي دا كان
أمر متقف عليه بين التجمع الوطني والنظام .. طبعا في عام 1997 بدا يكون مسموع صوت البندقية.. وكان هناك فعلا تعاطف كبير جدا مع الامر دا .. لكن بعد مشاكوس زي ماقلت
ليك الوضع بدأ يتغير وبقى هناك فرق كبير جدا بين الحالتين .. والشي الحاصل الليلة دا ماحق بندقية لانو التوجه العام بقي سياسي والكل ساعي في هذا الاتجاه من قبل الطرفين سواء النظام او التجمع الوطني وهناك حوار بينهما جاري الآن .)) |
اولا يا استاذ خضر اتفاقية ما شاكوس كانت سنة 2002
ثانيا انتا ما حتبطل كضبك ده ياخ ما خلاص القضية بقت واضحة والبشير بقى صديق حميم للعميد يعني مشير وعميد وحكاية نرفع غصن وننزل بنقدية دي ما بتمشي علينا هو لمن رفع بندقة عمل شنو يعني (سنة 97 وصل كسلا) والنظام كما هو معروف لينا ما بجيب ليو حاجة ضد ما يشتهي هو يعني الحاجة البيجيبها بشتهيها وبجيبها. نواصل اذا واصلت
| |
|
|
|
|
|
|
|
|
|
Re: عاجل جدا من الخرطوم : عبد العزيز خالد في أجرأ حواربعد حريته!!! (Re: خالد)
|
اعتذار:
عفوا لتأخري في اكمال الحوار لظروف خارجة عن ارادتي حيث عاملي الوقت والعمل..
وهاأنا أعود الآن لأواصل :
******************************
ويستمر العميد عبد العزيز :
(( الأن الجو الطاغي كما هو واضح هو الجنوح نحو العمل السياسي .. وبالمناسبة دا كشف لينا حقيقة أنو الشعب مع هذا المنحى .. وأنو التأييد الشعبي أشد ضغطا على النظام
وأكثر فاعلية من حمل السلاح .. لانو الجماهير دائماسلاحها أقوى ..وأنها تشكل دعما قويا
لاي برنامج سياسي واضح من طرف المعارضة .. ودا يمكن عكستو ـ لوأنت شفت صور ناس الحلفاية وهم يعبروا عن أنفسهم وفرحتهم لما أنا جيت الحلفاية ـ كانت رسالة صريحة
وواضحة انو الشعب مع الحل السياسي وانو الشعب يعرف معنى الحرب وتداعياتها وما تخلفه)).
سؤال : بالمناسبة كيف كان وقع نشري للحوار العلمتو أنا معاك على نفسك ؟؟ وهل كان زي ماقال البعض انو سبب سحب ( الموبايل ) منك والتشديدات الجات بعد نشره وأنت
في المعتقل ؟؟ سؤالي دا سعادتك لانو بعد نشرو مباشرة لقيت بعض المشاكل أو الاتهامات
بأني انا يعني اضريت بيك وكدا . وان كان الأغلبية أشادت به باعتبار انو الناس لاول مرة
تسمع الحاصل على لسانك شخصيا في وقت كثرت فيه الشائعات واللغط !!!!!.
(( كلام صحيح الأخير دا .. لانك مشكور وصلت صوتي بالفعل للخارج وأنا ما قلت الا الحقيقة
عشان كدا شكري ليك مكرر.. أما عن سحب (لموبايل) وتغيير مكان اعتقالي الحصل بعد الحوار يبدو انو كان أصلا مبيت من جانبهم )) .
سؤال : طيب لو رجعت ليك لقصة تيسير وجماعتو والخلافات الحصلت وأدت الى انقسام تنظيم التحالف .. بل انو هناك أصوات زي نعت التنظيم وانو خلاص انتهى .. خاصة وأنو مؤسسو اللهو أنت أصبحت الان تحت قبضة النظام في الخرطوم .. ما قولك حول ذلك ؟؟.
(( والله بغض النظر عن تيسير واللا جماعتو .. فأنا برأيي ـ بعيدا عن شخصنة المسألة..
المهم هو الجزئية الثانية من سؤالك : هل فعلا قبضة الجماعة ديل ( أعني النظام)ليها تأثير علي أي فعل معارض ؟؟ ..
ياخي السودان كلو تحت القبضة حاليا مش انا كفردأوالتحالف كتنظيم أو فصيل من فصائل المعارضة .. ودا الجانب المهم في الموضوع .. التحالف تنظيم معارض زي ما الملايين
من الشعب معارضين .. والان ما المانع انو نجي ونناضل مع شعبنا من الداخل ؟؟ وهل كان
طول السنوات الماضية الشعب متوقف عن النضال ؟؟ أبدا .. وبعدين مافي اشرف من انك تجي تناضل مع شعبك من الداخل طالما هناك ظروف اقتضت ذلك .. وطبعا دا لا يعني انو نضالنا من الخارج كان غير ذلك ولكن هناك مستجدات لازم الناس تاخدها في الحسبان .. لانو نحن
لما حملنا السلاح ليس من اجل حمل السلاح وبس وانماتلك مرحلة فرضتها علينا ظروف معلومة
لكل متابع .والشي العايز ااكدو هنا هو انو النضال ببقى مستمر والاهداف نفسها معروفة
.. وأنو اعتقال فرد لا يعني توقف النضال أبدا .. كل المناضلين عبر التاريخ كانوا معتقلين .. يعني نحنا قعدنا لينا كم شهور مثلا تساوي شنو بالنسبة لواحد مثل مانديلا ظل معتقل قرابة 30 سنة .. ودي بالعكس الواحد يفتخر بيها مش يتقاعس )) .
سؤال : لكن خليني اكون معاك أكثر وضوحا : يعني كيف تقول أنك حتناضل وأنت تحت رقابة
وأعين النظام ؟؟ بمعنى انو ماهي الوسيلة للنضال وانت في هذا الوضع ؟؟.
نواصل سادتي .......( 3 )
خضرعطاالمنان
| |
|
|
|
|
|
|
|
|
|
Re: عاجل جدا من الخرطوم : عبد العزيز خالد في أجرأ حواربعد حريته!!! (Re: خضر عطا المنان)
|
سؤال : لكن خليني اكون معاك أكثر وضوحا : يعني كيف تقول أنك حتناضل وأنت تحت رقابة
وأعين النظام ؟؟ بمعنى انو ماهي الوسيلة للنضال وانت في هذا الوضع ؟؟.
(( معروف انو النضال مش ثابت على وسيلة واحدة .. للنضال أشكال متعددة وأسأليب كتيرة ..وأنما يعتمد على القدرة والابتداع والابتكار دا من ناحية ..
ومن ناحية أخرى انو المساحة المتاحة للحرية دي ما كانت منحة من النظام أبدا
والا كان منحها من زمان ..لكن دي مساحة منتزعة منو انتزاع .. واذا كان الان هناك
جزء من هذه المساحة معاشة حاليا قيبقى لازم النضال يستمر عشان بدل ما تكون جزء
من مساحة تكون مساحة كاملة .. ودا مابتم الا باسقاط النظام.. وبالتأكيد الوسائل
بتتغير .. طرقها وتكتيكها ....الخ .. عشان كدا نحن يجب أن نستغل المساحة المتاحة
دي ونسعى بالتالي لتوسيعها الى آخر مدى حتى ننتزع الباقي .. ودا الحاصل الليلة بالفعل .. العمل السري موجود والعمل الشعبي موجود .. أما حريات بالمعنى المعروف فأكيد مافي هذه االحريات في السودان الان )) .
كيف تنظر لمساعي السلام الجارية حالياعموما بين مختلف جماعات المعارضة والنظام؟؟
(( نحن الآن أمام مشوار انتظار حتى آخر شهر ديسمبر دا والتوقيع على سلام في نيفاشا
وطبعا اذا ماتم فأهم شي فيهو هو توفير الحريات .. واذا كان ما تم الغاء قانون الطوارئ واطلاق سراح المعتقلين السياسيين وحرية الرأي ......الخ فبتبقى دي مسؤوليتنا انو لازم نواصل النضال عشان تحقيق الأشياء دي كلها ..
بعدين أصلا كل ما جرى بالنسبة لي ـ وأنا هنا لا أشخصن الموضوع ـ ولكن أقول كان القصد الأكبر من النظام هو الحيلولة دون مد الحركة الكفاحية ووقطع الطريق عليها من المد الشعبي .. ودي بالذات النظام فشل فيها تماما .. بمعنى انو لو ممكن للتاريخ يعيد نفسو
للورا شوية يمكن كان النظام يقول رجعوه لابوظبي ومن هناك ما تجيبو .. او كان ممكن يقولو فكو من مطار ابوظبي .. فأنا أعتقدأنو النظام برتكب أخطاء فادحة بنفسو ..
واذا كان نحن أصلا بنيأس من مجرد اعتقال فرد او ما شابه او دا ممكن يقلل من مد الحركة
النضالية يبقى الحركة دي لا عندها برنامج ولا عندها قدرة على تغيير تكتيكها .. وبالتالي بتكون دي اشكالية حقيقية !!!!. وانا مامعتقل من الليلة ولا من امس أنا لي فترة في أسمرا .. في أبوظبي .. قبل الخرطوم .. وتنظيم التحالف كان مستمر في خطو النضالي خاصة داخل السودان .. لانو التنظيم البعتمد على فرد دا تنظيم فاشل . وأنا
جد بفتخر انو عمل التنظيم الليلة متصدين ليهو شباب سواء داخل السودان او خارجه.
وأؤكد لك بأن ابلغ رسالة والاكثروضوحا للنظام كانت اللقاء الجماهيري الحاشد والضخم
الجرى بعد اطلاق سراحي هنا في الحلفاية )) .
سؤال : الواقع عندي سؤال مهم جدا : انت بتفتكر منو بصراحة كدا كان وراء كل ماجرى ليك برمتو .. أقصد قصة اعتقالك منذ لحظة مغادرتك مطار القاهرة عصر الخميس 23/9/2004 وحتى وصولك الخرطوم معتقلا ثم اطلاق سراحك موخرا ؟؟؟.
(( طبعا دي قصة طويلة .. لكن الأهم فيها هو انو دا كلو كان شغل بتاع اجهزة أمنية .. ودا نفسو جزء من الصراع بيننا وبين النظام : سياسي واقتصادي واجتماعي .. ودا الجزء الأمني منو .. وبأعتقادي انو اي نظام لما يحول صراع سياسي مع خصومو الى صراع أمني بحت .. يبقى دي هزيمة شعبية واضحة لهذا النظام .. بمعنى سيطرة العقلية الأمنية هي التي كان تحرك النظام في الخرطوم : شل حركة شخصيات معارضة له .. فرض حالة طوارئ .....الخ .. وفجأة تتحول المسألة لحركة داخل المجتمع تنتج دعم شعبي وتفاعل جماهيري واسع .. قطعا دي شي كبير .. وأتجسد بالكامل ـ باعتقادي ـ في ماجرى هنا
من قبل أهلنا في الحلفاية كمثال حي لما أقوله .. خاصة كانت هناك شعارات جدا مهمة
وليهاأبعاد واضحة تم رفعها في التجمع دا زائدا اللافتات المنتشرة الليلة في كل مكان .. طبعا كان تجمع الحلفاية كبير وضخم : يعني الناس جات على ظهور الخيول ومشاة وسيارات وكارو والدلاليك والنحاس .. عشان كدا نحن نعتقد انو الحلفاية منطقة محررة تماما يعني .. وبالمناسبة لعلمك أنو هناك بعض صحف النظام نشرت صور للمناسبة دي )).
سؤال : طيب رأيك شنو في انو أنا كنت دائما اقول انو وراء ما جرى ـ أعني قضية
اعتقالك ـ مصالح اقتصادية لفئة نافذة من أهل النظام .. فضلا عن الصراع الأمني الأنا قلتو دا .. حتى انني عبرت عن ذلك صراحة في مقالي بصحيفة القدس العربي اللندنية
يوم 3/12/2004م بعنوان : ( مافيا المصالح والمنافع هي التي انتصرت !!!) الى اي حدهذاالكلام صحيح ؟؟
نتابع .......( 4 )
خضرعطاالمنان
| |
|
|
|
|
|
|
|
|
|
Re: عاجل جدا من الخرطوم : عبد العزيز خالد في أجرأ حواربعد حريته!!! (Re: خضر عطا المنان)
|
عاجل جدا أخى خضر عطا المنان
عبد العزيز خالد الذى أعرفه تماما صديقا وزميلا
ويننا أشياء كثيرة مشتركة
( إنه شخص لا يفكر أى من كان مجرد تفكير فى انتقاص منه ـ وكلمة إذلال كبيرة جدا كان يجب ألا
ترد ، خصوصا وأن هنالك دولة تمكنت من مواطن ربما كان الحق فى جانبه ـ المسألة ليست مسألة
عداء شخصى أو إستعراض قوة وغلبة ـ المسألة مسألة أن هذا مواطن ـ له واجب على الدولة فى
حمايته والمحافظة على كرامته ـ وإن كان هنالك جرم أو جريمة فينفذ فيه حكم القانون ـ
فهل إن الدولة قد إستأسدت عليه يعنى أن هذه الدولة بهذا تخيف كل من تسول له نفسه
ـ لاحظ كل من تسول له نفسه ـ بالله شوف التعبير القبيح ـ
إننا أخى خضر ندفع من جيوبنا ومن دمنا أموالا ورواتب ومخصصات لمن يتحكم فينا وليس من
يحكمنا بالعدل والإحسان ـ كما قال أخى صلاح أحمد إبراهيم ـ فى أن الحاكم من يحكمنا وليس من
يتحكم فيناـ
يا أبا خالد لقد توضح الجبن جليا ـ وليس هنالك ما يدعو للتبرير لما قد حدث ـ وإنه إن كنت
فعلا مذنب لما تركك الأوغاد لحظة وتنعم السفهاء عليك بالعفو ـ
سؤال هام جدا العفو عن ماذا ـ كان يجب أن يكون العفو على إدانة بجريمة قد أرتكبت ومن ثم
يصدر الحكم القضائى ثم بعد صدور الحكم يكون العفو ـ
لا يزال السؤال قائما أخى خضر العفو عن أى عقوبة صدرت !؟؟!؟؟!
صديق ضرار
| |
|
|
|
|
|
|
| |
خضر عطا المنان
Elmosley
Bashasha
خالد
ست البنات
على عمر على
nazar hussien
فيس بوك
تويتر
انستقرام
يوتيوب
بنتيريست