|
|
 رسـالة .. بسم الشعب السوداني
|
من إنسان ..
عنوان لرسالة ..
إلى أهلي ووطني السودان
بعد الغيبة ..
جيت ما لقيتك يا سودان ..
لقيت لي فحمة ..
كتبت علي باب الديوان ..
حضرت ولم أجد الإنسان ..
لقيت ضبّان
لقيت الشارع ما هو الشارع
والضبان حاكما الديدان
أو شيشان
والشيشة دخانها بيطلع
ريحتو أظنها زي بُن .. بان
بان ؟
بان وإندس خجول حزنان
جريت على سكة حرية
اتذكرت المدرسة .. والأستاذ
والطبشيرة الأبيض لونها ..
وكنب الخشب المضروب ..
بوهيه بلون أخضر فاتح
وست علاّنة ..
حلات التوب الظاهر من تحتو الفستان
وأستاذي فلان
حصة تاريخ محتاج أقراو
عايز أتذكر هذا المهدي
واسماعيل الأزهري كان ..
ويا عبّود أو حتى نميري
وناس الصادق
وحكم الدولة الاستيطان
وأبدا أقارن
هسه الناس اللابسه مبرقع
قصدي شرانق الديدان
تحت ضل شجرة اتلمت تقرا
وتحت المجرى
فوق الورقة
تحت عنوان الراي العام
صحافة بتفسد عقل الشفّع
(أوصي هنا بأن تكتب الصحف بالحبر الأبيض
لأن الأسود يشبهها كثيراً وبالتالي يجعل الكلمات
تتداخل علينا وذلك حرصاً على بصيرتنا)
ناس الدار .. إبن البلاّل
مليان بي هناي فكوهو وطار
وداك ود خوجلي هذا الـ... يخس
يحيا الحردلّو فيما قال
وكوم الشعرا الفاضي كلامو
قالو اتلمو في قعدة أنس
وست العرقي بتهتف بينهم
الليلة التسعيرة اختلفت
النُص بي قلمك يا شاعر
بالحمّى أريتك تنطمّا
أمّا القاضي تجيهو فريدة ..
معاها أب صلعة الأمريكي
جواب مختوم بي ختم الدولة
بيهو اتباع الشعب الدوني
فيو توقيع معروف ومميز
باسم الشعب السوداني
وناس عمّوري وعم عثمان
لبسو التيبان .. ماشين الحفلة
يراقصو أب صلعة الأمريكي
مغادر بكرة وجايي إلي هذا البلد السودان
وإنتهت الفحمة ..
وبي فتفات من جنب الباب
أنا برضو مغادر .. تب ما راجع
يلا وداعاً يا سودان
وأسمع عنك سيل فوران
عبير خيري
|
|
 
|
|
|
|
|
|
|
|
Re: رسـالة .. بسم الشعب السوداني (Re: عبير خيرى)
|
الرائعة عبير
احرفك تنزف بفجيعة الوطن دما لا يشبه الدم الرخيص، انه دم الغلابه الذين لم يكونوه الا بشق الاحتمالات كلها...
Quote: (أوصي هنا بأن تكتب الصحف بالحبر الأبيض
لأن الأسود يشبهها كثيراً وبالتالي يجعل الكلمات
تتداخل علينا وذلك حرصاً على بصيرتنا) |
وما لقيتك يا سودان..
| |
|
|
|
|
|
|
|
|
|
Re: رسـالة .. بسم الشعب السوداني (Re: اشرف السر)
|
الحبيبة عبير
عندما رجع الوالد مع وفد "تفلحون"كان أن سألته:كيف وجدت السودان؟؟
فقال لي :لم أجد السودان!
التحية لك يا عبير و أنت تقبضين على الجمر ..
كان من دواعي سروري رؤية صورتك في بوست ملاسي
وخالص محبتي
| |
|
|
|
|
|
|
|
|
|
Re: رسـالة .. بسم الشعب السوداني (Re: lana mahdi)
|
Quote: الحبيبة عبير
عندما رجع الوالد مع وفد "تفلحون"كان أن سألته:كيف وجدت السودان؟؟
فقال لي :لم أجد السودان!
التحية لك يا عبير و أنت تقبضين على الجمر ..
كان من دواعي سروري رؤية صورتك في بوست ملاسي
وخالص محبتي |
لنا الحبيبة
فجيعتي فيه كبيرة وأنا أرى الركائز أكلتها "الأرضة"
والسوس سكن العضم
تحياتي وكل سنة وإنتي طيبة
| |
|
|
|
|
|
|
|
|
|
Re: رسـالة .. بسم الشعب السوداني (Re: عبير خيرى)
|
Quote: والشيشة دخانها بيطلع
ريحتو أظنها زي بُن .. بان |
الأخت عبير
تحياتى
عندى قصة طريفة عن الشيشة التى أصبت ظاهرة تسنحق الدراسة
فى الفترة الأخيرة....
فى أجازتى الأخيرة...لقيت أخوانى الصغار كل واحد عندو شيشة
وفى Parkingخاص بالعدة...الشغالة أثناء التنظيف كسرت شيشة الأخ الأصغر
و جاءت أختى تبكى وقالت لازم أقول انى أنا الكسرت الشيشة..
لأنو أسامة لو عرف الموضوع حا يشلت البت ويطردا من البيت...وستكون
هى الضحية لحين العثور على شغالة أخرى....
ظنت أختى _ وبعض الظن اثم-أن أخى لن يجرؤ على سؤالى عن هذا الموضوع
ولم يكن ظنها فى محله...حيث تعرضت لتحقيق رهيب... كيف ومتى ولماذا..
و كاد أن يكتبنى تعهد بالا أهوب ناحية الParking
و لم يهدأ له بال الا بعد ان وعدته بمعسل فاخر من دبى....لكن يسمو
| |
|
|
|
|
|
|
|
|
|
Re: رسـالة .. بسم الشعب السوداني (Re: ALGARADABI)
|
الأستاذة الرائعة عبير خيري
وانا أتابع في الفحمة السوداء سواد حالنا التي تحكي حال ما آل إليه الوطن طافت بخاطري أبيات الراحل المبدع عمر الطيب الدوش في قصيدته المعبرة وطن فأسمحي لي بأن أنقلها هنا فقد وجدت في أبياتك بعض ما فيها ..
حأسأل عن بلد رايح
وافتِّش عن بلد سايح
واسأل عن امانينا
الِّي ما بتدِّينا
صوت صايِح
وأسأل وين مخابينا
إذا جانا الزمن...
لا فِح
واسأل عن بلد مجروح
وعارف الجارحو ليه جارِح
وابكى على بلد ممدوح
وعارف المادحو
ما مادِح
واحْلم بي حلم مسروق
لا هو الليَلهْ
لا امْبارِح
أعلِّق في جناح سَفَري
خطابات لي زمن فجْري
وادْخُل من درِب سرِّي
لِكُلِّ مضاجع الأحزان
واضفِّر من شجر بلدي
بروقاً مارْقَهْ من صدري
حأسأل عن بلد غاطٍ
لحدِّ الليلهْ في الوجْعَهْ
أَنُط فوق سرْجي واتْحزَّم
أقوم من وقْعَةْ
لي وقعًهْ
أخُتْ ايدي البتوجِعْني
على السأم البِراجِعْني
واسأل..
يا وطن يا بيتنا
ليه شوقك مواجِهْني
ليه حُبّك مُجهْجِهني
وليه تاريخ زمن خسران
موكّر لسَّه في شجني؟
حأكْتب لي شجر مقطوع
مسادير
يمْكِن يتْحرك
خطابات لي طِفِل مجْدوع
يقُوم
يجرى
يَقَع
يبْرُك
رسالَهْ لكلِّ قُمْريّه
إذا دم الشقا اتوزّع
على كل البيوت
ما تْرِك
واسأل..
عن وطن رايِح
وادّيكم خبر جارح:
بأنّو جميع جُموع الناس
حيفْضَلوا لا كُراع
لا راس
ونشترى في الدكاكين يوم
مسابِح من دموع الناس
مساحيق من هموم الناس
زَهَج
يتْعَبّا في الأكياس
ونعْلن في المزاد علناً
وترْغي الجوقَهْ والأجراس:
"!نبيع الطِفلَهْ والكرّاس"
واصْرَخ
! ياوطن! يا بيتنا
ليه ما تبقى لينا الساس
قَدُر ما تجري فيك
أفكار...
يزيدوا الحَبْس والحُرّاس
قَدُر ما تجري فيكْ الخيل
تَدُوس الهيبَهْ
والإحساس
واسأل
يا وطن رايح
اذا كل القبور دَخَلت
بيوت الناس
بلا اسئذان
بلا صلوات
بلا أكفان
جريمَهْ اسائل الدّفَان؟
حريمَهْ طَلَب تَمَن قبري
من البايع في أيِّ مكان؟
واقولكَ يا وطن
رايح
واقولك يا وطن
آمر
سلام النّفْسِ ما كافر
ولا كافر
ولا كافر
| |
|
|
|
|
|
|
| |
عبير خيرى
اشرف السر
lana mahdi
ALGARADABI
فيس بوك
تويتر
انستقرام
يوتيوب
بنتيريست