دعواتكم لزميلنا المفكر د.الباقر العفيف بالشفاء العاجل
|
|
 عوده....من وطن القمارى
|
ازى
الحال
سلامات
انشاء الله طيبين
مدة شهر وشويه قضيناها فى السودان
الناس بخير....بس الجوع الكان كافر (الحد) رسمى
حكومه بالنهار..مافى...وبالليل فى التلفزيون..عمم وجلاليب..وكضب.. وزيف
مبالغه
الامنجيه....التحقوا جميعا بالمنبر الحر وخلوا العقاب خلا
الحركه الشعبيه فتحت مكاتبها فى الخرطوم.....صفوف ماتديك الدرب..زحمه جد..ومدافره..(يازول ماتسجل خلينا نمشى)....عليك الله يافلان سجل لى معاك لاحق لى فاتحه
المزعج جدا-لحظة المشاهده- لاتوجد ... أمراه فى الصف
الاحزاب...الامه والاتحادى والشيوعى...والبقيه موجودين والحمدلله
الصحف الجاده والصفراء رغم المعاناه.....تصدر وتقول الكثير....
دارفور بلدنا.....الاحساس بأوجاعها ضعيف وسط الناس بسبب التعتيم الشديد
احداث بورتسودان....قمعت المظاهرات بقسوه وبلا رحمه..من شركاء السلام
ياسلام
|
|
 
|
|
|
|
|
|
|
|
Re: عوده....من وطن القمارى (Re: فجراوى)
|
وجوه
محجوب شريف
راسخ زى عود الصندل..
يفوح منه الشعر
والصمود
فطومه بت فرحه
..عمرها سبعتاشر سنه ونص.....تقاوم بشده منذ ثلاثه سنوات لتحصل على الطلاق من زوج غايب
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
اماكن
السلمه جنوب الحزام الاخضر
قامت السلطات بهدم منازل السكان اغلبهم فقراء لدرجه قف تأمل..بهدف توفير مساحات جديده للهف والاستحواذ المجنون ..اقصد اعادة التخطيط
كوستى
مدينه تحاول النهوض...الحمد لله الملاريا خفيفه جدا المره دى
الحجير
عصرا (لفخت) حمارة عباس.........عباس نفسه كان الجرح بليغ على الوجه.....مجموعه كنا من الرجال.....عالجناه بى كفاره........مع استخدام حاذق للطاقيه لايقاف الدم
ثم لاشى البته
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
بورداب
حضرنا نوبه ومديح فى الاراك مركز مروى على شرف عودة الحاج ياسيكو عضو البورد من الاراضى المقدسه
ود العجمى
الروح....تلاقى الروح
معنى الجمال مشروح
ابو يسرا
.....احساس عالى وضحكه زى اللبن
اتفضل..جاى
عمر محجوب (اللورد)
بريق البسمه كان لاح لى..
ماقادر يدخل البورد يابكرى اعمل معروف وحلها
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
Quote: عالجناه بى كفاره........مع استخدام
حاذق للطاقيه لايقاف الدم |
لا تعليق ...... بل اراك لخصت القضية المؤلمة في اقصر قصة
سلامة وسلام
ساعود لك ولجلستك امام ست الشاي في ذاك الصباح الباكر في السوق
الشعبي ولملاقاة الرجل العجمي وللكهرباء المقلوعة حمرة عين من
أهلناولتلك الرحلة القصيرة
التي لومتني مع ابو يسرا والملكي والمهندس وبقية العقد الفريد
"وا لومي العتاب جابوهو كيفن اسوي كيف الشورة"
لوم ابويسرا يقع فوق الجبال
لك الود
| |
|
|
|
|
|
|
|
|
|
Re: عوده....من وطن القمارى (Re: yasiko)
|
الف حمدالله على سلامتك يا فجراوى
لكن الاختصار ده ما بنفع هنا...
اسهب....
ونحن نقهى...
تحياتى لياسيكو وحجا مبرورا..
وكل بورداب السودان "ما عدا الامنجية طبعا"
ولاسرتك ...المعزة..الخالصة
| |
|
|
|
|
|
|
|
|
 Re: عوده....من وطن القمارى (Re: Tumadir)
|
| Quote: التي لومتني مع ابو يسرا والملكي والمهندس وبقية العقد الفريد |
بس اصلها ماها مقبولة عاد
وحضرتو عثمان؟
سويتوها شيني تب !!
اصير لي يا ابويسرا
حالتنا نرفع ونخت في راسنا!!
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
ياسلام
يا ياسيكو
تذكر؟
الحفلات العفويه التى اقامها الناس للحججاج فى الطريق....
والله
مديح....شيخنا حسن محمد
والله شعر...كمال حسن محمد
انا غايتو حتلت جواى سورة الماعون كنت اسمعها يوميا فى صلاة الصبح فى خلوة الحجير بصوت مولانا عبدالله يوسف
عليك الله قول..انت افضل من يوصف
وبعد داك تعالوا ندفع جزء يسير من العلينا ..لهذه المناطق الرحبه التى هداها الاهمال
حمدا لله على السلامه
فى انتظارك
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
العزيزه
الفنانه
تماضر
ياريت لو اقدر ..احكى......ده شهر نفقته..عندك
فى جلسه بين طيات السحاب..نظمها ود العجمى,وابو يسرا, واللورد
فى منزل الشاعر العظيم محجوب شريف عطرها بالغناء الفنان المدهش محمد جباره....جات سيرتك
تماضر كيف؟
فى عزاء عمنا المرحوم عبد الله عبد الوهاب فى الثوره الحاره 11 يسأل عنك الناس
تماضر ماجايه؟
شيلى ...شيلتك
بى...حضورك رغم الغياب الناس فى انتظارك
شكرا ليك
والله يخليك
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
الأخ فجراوي
سلام، وفاقدين قلمك
بركة الرجعة
(الامنجيه....التحقوا جميعا بالمنبر الحر وخلوا العقاب خلا)
شكرا للمنبر "الحر" ف"رسوم" الاشتراك فيه أقل بكثير من رسوم
"بصلة الشهيد"، و"زاد المجاهد"، والمدارس الابتدائية....
أتمني أن تواصل الحكي
تحياتي واحترامي
إيمان
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
لقطه فىعيد الحب
السلمه جنوب التى حدثتكم عنها.البيوت مكسره .الدنيا بعد الفطور...قالت فاطمه..امشوا شوفوا عبدو عندو ملاريا
مشينا ...عبدو راقد ارضا اى والله العظيم.. ارضا ..تلاته شعب معروشات بى شوالتين قدام...وعبدو يئن من الملاريا .لما شافنا ابتسم...زحه شويه وقال اتفضلوا... اتفضلوا ياجماعه
نتفضل وين...ياحنين؟
ضحك
انت عارف الليله عيد الحب؟
حب؟
شلالات...من التناقض والألم....وعبدو يئن
والألوان...ياايمان احمد..بعضها أحمر
و
من رأى السم
لا يشقى كمن شربه
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
حوار مع اصدقاء
قال الزين ...انتو تجو من بره ماعارفين اى حاجه ودايرين تنظروا فينا..انا اعتقد بغض النظر عن مافعلته حكومة الجبهه ..فى نمو اقتصادى فى البلد.....تمشى اى دكان تلقى البيض ..فى مجهود كبير فى تنظيم الشوارع والاسواق
نمو اقتصادى! مايحسوه الناس فى حياتهم..ومعاشهم وتعليمهم وصحتهم؟؟
قال فرح كان قبلها قد زار معى منطقة السلمه جنوب (وبكى لى حال الناس )توجد مؤشرات فعليه لنمو اقتصادى نحن لا نتحدث عن التوزيع ولا كيف يدار الاقتصاد فى السودان
الزين وفرح عهدى بيهم ينظرون للصوره فى شمولها...من اين طفحت هذه النظره الجزئيه..لقضيه من اخطر القضايا...اقتصاد طفيلى من اخمص قدميه وحتى اعلى مؤسسات الاستثمار التى يتعامل معها...يديره حزب فاشى يهمه الربح والاستمرار فى السلطه على جماجم الناس
و
من رأى السم
لا يشقى كمن شربه
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
رقصت وحدى
بلا تخطيط او اتفاق مثلما تحدث كل الاشياء فى وطن القمارى
شيل الله ياحسن
اقمنا حفله عشوائيه(وداع..؟.....ربما) فى مكان رغم انف التخطيط يرفض ان يكون غير عشوائيا..... وكان الزمان (مع دخلة الشمش) اختفى الذباب.... والاطفال الجوعى .....أسف... -غير مكتملى الغذاء- يتحاومون....
.
الحضور
شياب من الجنسين
وشباب اغلبهم شابات
شاى اللبن بقى يسوه بالحلبه
شى مايخلص
واللقيمات.....
وكان
الظلام سيد الموقف
بحلول العام القادم سنغطى العاصمه القوميه كلها بخدمات الكهرباء!!!
من خطبه وزير الطاقه فى زمن عبود, ونميرى, والانقاذ....الاخير اضاف للخطبه....الله اكبر
والظلام سيد الموقف
باعتبارى المحتفى به اخفيت.....مجموعة اشرطه كنت اعتقد انها ستنال الرضى.... من الحضور...
ودورنا المسجل.......غناء عربى. مصرى,لبنانى......(جن أحمر) شى عشره بلدى.... وشى جاز مخلوط زعيق.......وشى أهات....ودلع......والكلمات ضايعه..... حكمة الله الناس منسجمين
والاولاد والبنات......يرقصوا فى امانة الله
ياناس انتو متأكدين انا المغترب؟؟؟؟؟
نسيت اقول نحن فى الكبسيبه دى......جانا انصارى سنه....سلم وقعد ..وطوالى جرا (نور طويل) فى حمام البرى
خفنا.....لكن
مولانا ابتسم
وواصلنا
قلت.. يااخونا مانشغل غناء سودانى؟ اقرب مسن لى وافق طوالى.....بس الشباب رفضوا....واحده من الشابات قالت سودانى شنو؟
(حدرته)
ليها فى الظلام.......بس
الخرطوم عاصمة الثقافه العربيه.......والبت دى وجيلها كله تركناهم للغول يفعل بهم مايشاء
وهربنا
سودانى شنو؟؟؟؟؟؟؟؟؟؟
اصريت....شغلنا
زيدان ابراهيم
فى اليله ديك
اخونك
لاهماك عذابنا
ترممممممممم....تم ترممممممم
داوى نارى
قصر الشوق
ليه كل العذاب
الناس همدت.......بكيت فى سرى......صدقونى السودان اتغير بصوره .....غريبه........مابقدر اقول اشوه جماله.....لكن المابشوف.....يلحظ حصاد الدكتاتوريه المر....فى كل شى.....كل شى
وبرضو من اخر مره انا كنت هناك.....الناس متفائله
ختييت شريط......النور الجيلانى
مدلينا
شفاها تزداد جنونا
صورتها.......عفوا.....صحبى
والوصف.....يعز.....احايينا
الام.....سليلة ...امهرا
والوالد .....من قلب ....أثينا
ترك.... الاهلينا ذات مساء
وترنح برا.....وسكينا
الشرق أتى.......والغرب أتى
الغرب أتى..........والشرق أتى
الخ...........
ورقصت وحدى
و
من رأى السم
لايشقى كمن شربه
.
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
Quote: ودورنا المسجل.......غناء عربى. مصرى,لبنانى......(جن أحمر) شى عشره بلدى.... وشى جاز مخلوط زعيق.......وشى أهات....ودلع......والكلمات ضايعه..... حكمة الله الناس منسجمين
والاولاد والبنات......يرقصوا فى امانة الله
ياناس انتو متأكدين انا المغترب؟؟؟؟؟ |
| Quote: الناس همدت.......بكيت فى سرى......صدقونى السودان اتغير بصوره .....غريبه........مابقدر اقول اشوه جماله.....لكن المابشوف.....يلحظ حصاد الدكتاتوريه المر....فى كل شى.....كل شى |
لا تقلق
انا افهمك تماما يا صديقي الفجراوي
كل من عليها فان
لقد ارتكبت خطاء فادحا بذهابك هناك
انا لازلت احتفي بحنيني وحدي .. ربما كنت خائفأ علي
الصوره في مخيلتي .. يجب ان ابقيها سليمه
فأنا احتاج لوطن اتخيله و افتقده
مثلي مثل الاخرين
لذلك لن اذهب
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
العزيز فجراوى، تحية طيبة وعوداً حميداً..
قلت لى الأراك دخلها الإنترنت.. والله حاج ياسيكو بيعمل "لوقين" من الخرتوم؟
سأحادثك قريباً
لك الحب والود ياأخى.
عدلان.
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
برقيات لفجراوي :
____________________
1- البيمشي يزور الشريف محجوب ود مريم محمود ،زي الزارنا كلنا في أوضنا ورضانا ونال رضانا ، علا طنبور محمد جبارة الفاتنا أثر في معنوياتنا
2- في طريق عودتنا من المدرسة كداري بالطريق الشاقي للسوق في بداية حي السجانة في الخرطوم كنا نمر بمدرسة عليها يافطة عتيقة كتب عليها { مدرسة المقل والحجير الأولية }
بعدها
بسنوات بسيطة
، قابلتني بت تنطط زي كورة التنس ، ونهداها كذلك ، سحرتني عيونها وقادتني إلى مدن وضفاف وفرح ،كانت عيونها كبيرة ومتسعة والأسودفيها أسود من يوم بؤس النعمان والأبيض أصفى من الحليب ، من الأبيض المتوسط ، والرشرش فركة تغطيك وتدفيك يحيط بكل هذا الجمال ، حواجب تقول هلال ، ولمن عرفت إنها من المقل ، قلت لها { المقل والعيون } العيون التي أودت بصبري حتى الحين
وبعدها
بسنوات طويلة ، هسع قبل أيام وبالتحديد يوم 8/2 الجاري أو المنتهي اليوم مريت بذات الطريق ، الطريق الشاقي سوق السجانة وعلى اليمين مدرسة المقل الحجير ، لم أرى اليافطة القديمة العتيقة ، لم أسمع صوت تلاميذ ينشدون علمي أنت رجائي ، ونحن أن أشرق صبح ،، نترك النوم ونصحو ، وجدت عمارات شاهقة واحدة في بيت الحاج محمد أحمد موسى مكان كنتينه القديم ، والتانية في أول شارع ناس مبيوع باشري ، وصف من العمائر جاور عمارة زين العابدين وقيع الله أول عمارة نهضت في المكالن قبل الطفابيع وكان ذلك في نهاية السبعينات ، وجدت في الركن الشمالي الشرقي من المدرسة يافطة ضخمة مكتوبة عليها { الجهاز القضائي} فتيقنت من حجم الظلم وكثافته وفداحة موت ألآمال
3- أبويسرا ما قصر زارنا ورضانا وشاركنا بهجتنا وأبهجنا ، له تحية صافية مثل قلبه الكبير ، ولنور عيونه ،يسرا أم جدائل وكمال العازف الماهر على الأوتار يبثها توتره الجميل الذي إن تعهده ابويسرا بالرعاية فإن الوطن موعود بفنان يعوضنا غياب مصطفى وإنحباس الصوت في حنجرة محمد ميرغني ، وإمعان زيدان في إهدار أوتاره الصوتية سهرآ وحمى
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
العزيز الحاج ياسيكو، حجاً مبروراً..
قبال أكتر من عشرين سنة، شديت حمارى لى ساقية حاج توم.. فشان أزور حبوبتى زينب بت سلطان، وساقية حاج توم مِتِل ماك عارف.. منها وعلى الكرفاب -موطن على عثمان!- فركة كعب ومن هناك شالتنى روح الصبا ولم تأبى نفسى إلا أن أزور المرحوم الطاهر البشير فى الكرفاب عند أطراف جبل أبنعوف، فكان أن عدت للمنزل -حى البشراب- فى المغربية لأجد بت عمتى العاجبة بت أبوالقاسم ود محمد طه بشير.. قربت تفرش بيت بكا وتطق الحى ووب، لإعتقادها الجازم أننى غرقت فى بحر الدميرة! فكُتب على أن ألقى تمام الصباح مع كشف بخطة تحركاتى فى كل يوم أقضيه فى الأراك إلى حين عودتى لى باسا ود المليك!
العزيز فجراوى، القدم ليهو رافع..
قالوا: المى قل.. قلنا: يبقى حِجِير!
وإلى لقاء..
بالمناسبة.. أنا عندى "نِقّى" فى البيت.. من يأنس فى نفسه الكفاءة.. فاليتفضل..
و.. وآآ مغستى.. رحل تلوت الليــل.
عدلان.
| |
|
|
|
|
|
|
|
|
|
Re: عوده....من وطن القمارى (Re: benyya)
|
قريبى فجراوى
حمدالله على السلامه وبركه الجيت طيب
كلمنى الصديق ياسيكو عن الرحله ما بين الشعبى والشمال وتمنيت
ان اكون ثالث ثلاثه يضمهم التنده
اتوقع صور حيه تروى شئ من الظمأ
Quote: ساعود لتفصيل رحلتي مع الاخ فجراوي من السوق الشعبي امدرمان
إلى الشمالية التي كنا شاهدي عيان فيها لخمس جرائم رشوة على عينك
يا تاجر في طريق الشريان |
فى الانتظار
| |
|
|
|
|
|
|
|
|
|
Re: عوده....من وطن القمارى (Re: osly2)
|
سلاااااااااااااام يا فجراوي ومنور الدار
قلت لي يادوب جاي من البلد
ريحة التمر فوق الهدوم ولون الخدار خانس لبد
بس يا أخي قضيتها كلها تدخل بي هني وتمرق بي هنوك ، لا جبت سيرة لرفقة الشباب الحلوين في الثورة والجميعاب والردمية وحي البوسته ولا شباب مركز عبد الكريم ميرغني وأكيد لاقيتهم أو على الأقل واحد من أولاد العالم . شفت الحياة دي مكوة كيف ؟؟؟ وصامدييين ؟؟؟
واصل الحكي .
قلت لي ياسيكو جاء بي فوقنا مشى الحج ما جاء غاشينا ، كويس
ياسيكو
حجا مبرور ، انت الطيارة نزلت في الحرم طوالي واللا شنو ، ما نزلت بي جدة . كتر خيرك وبارك الله فيك ، خلني لامن ألاقي مامان .
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
فجراوى ،
ياسيكو ،
أبوساندرا ،
ما أجمل رحابتكم ، وما أبلغ ايجازكم !
أهلا بك فجراوى الذى عرفته اليوم ! ( تحدث كى أراك )
أهلا بك ياسيكو اللبق !
وأهلا أبا ساندرا الشفيف !
ما أجمل هذا الحوار المروى المتقن !
وما أعظم صبر الناس ببلادى !
حاورت صديقة مرة في ما يحدث للناس فى الوطن ، فاتفقنا على :
لو مر الظلم ، والفقر ، الواقعان بأهلنا الآن على أى شعب اخر لمات عن اخره !
من غيرنا يستحمل الضنى اخوتى ????
فما أجمل الوطن بدون عصابة الأنقاذ وبؤسهم !
وفى انتظار المزيد !
ست البنات .
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
| Quote: فكان أن عدت للمنزل -حى البشراب- فى المغربية لأجد بت عمتى العاجبة بت أبوالقاسم ود محمد طه بشير.. |
الاخ عدلان
الحديث دخل الحوش
لك ودي
ابوقصي سلام
والله متلوم سافي الدقني
اخذت 5 ايام في جدة طريح الفراش
للنزلة العالمية (الآسيوية) ، وفي السودان
لولا البنسلين المائي كان لازلت راقد،
الحجة الجاية بنزل الطيارة فوق نافورة الملك فهد (أو قل نافوخه)
ست البنات سلام
وشكراً للإطراء
وفجراوي صور ما خلالو ست شاي وزولاً في المشرع وباجوراً مدور فوق
بنطون تنقاسي
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
العزيزه
بنيه
ما....نفقدك..فىحاره
شنقلى طوبايه.....تلقى دهبايه
حا يشنقل كل الظلم الحاصل وتحت الطوبه حلنقى بنيه ,ومريم, ونبته
وام كداده
وحزيمه
وزالنحى
الزومه
وقراصة التمر,والدامرقه
ابقى عشره
خالص الموده
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
العزيز
اوسلى
كيتا ليك
شفنا
اسلى.
لسه...كدار.....مافيها....خدار
..ياريت لو كنت معانا...البحر شارد وامونه بت الحاج تساسق من تحت لافوق وتلعن فى الزمن.. والناس الاحساسهم بالفقر ضعيف...وقله الحيله....الطاهر قدام الناس يوم الخميس يضبحلو سخلة(عجفاء) ويحلف بالتقطعوا انو ده خروف(بلد) الداير داير والماداير يختانا
ادنى كوم
ادنى كوميين
الدكاكين تفتح من الدغش.... والمشتريين يظهروا بعد صلاة العصر.....التنباك راقد...والشى داك(الله لا طراهو) برضو راقد....الجماعه ينزلوا الصباح..قعر التمر ويزوزوا جاى..وجاى.....ويجوا على المضيفه....يرقدوا فوق العناقريب..ذاتها ام حبالا مقطعه...وعليك امان الله ما تفهم اول والله اخر......هم زعلانين؟ فرحانين؟ مشاكلين؟ شويتين يأذن ...ود صديق لصلاة الظهر
كلهم (يقنتوا) مع بعض
وبعد شويه العصر
صديق
والله.... بس ويحيتا يقولولها الصلاه دى بقتلنا فى رقبتنا!!
استغفر يا ممسوخ
ويقوموا تانى بعد الغداء ..لا.. تحت......فاتتك قعده فوق ..قوز الرمل......وفاتك....شعر كمال حسن محمد .والقمره باقه.....
الفاتك كتير
درب الجمل
درب الترك
حس البوابير
والبقر
وكلمة.......واشريرى
واكتلتك....واكتلتى....وقتين القمارى تقوقى....والبنات ماشات على البير....فى العصير
لك الموده
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
العزيزه
ست البنات
شوفى..اسماعين ود حد الزين
شن بيقول
والله يا ريحة التراب
شديتينى للماضى البعيد
عبر الزمان
فى اللامكان
عبر البكون
جوه الى كان
مشوار غريب
حفيان
وطيت جمر اللهيب
الروح تهيم
فوق النجوم
والفانى
مطمور فى التراب
والله ياريحة التراب
لك التقدير والود
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
| Quote: عمك على عبد الحميد متحكر ويحكى ويضحك..تقول البلد ما حاكماها الجبهه |
يا فجراوى
كان فى بالى اسألك من اثنين عثمان الحاج وعلى عبد الحميد
وكدا اطمنئيت على صاحب الضحكه الممزوجة بسخرية محببه
عم على ووجب عليك ان تطمئننا على الخال عثمان
كما ارجو ان تطمئن حاج ياسيكو والشراقه من طرف باننا قد
عقدنا العزم بمدكم بكيبل من اوســـلى لعل وعسى ان نرد جميلكم
كشرق فى منحنا جذر اقحوانيه كبجبوج وما جاورها
قلت لى مقطوع الطارى دااااك متوفر وما فيه أزمه ؟
لا شك ان كمال حسن محمد قد حلق بكم فوق سحب الدهشه وتبقى
غير محظوظ اذا لم تلتق اولاد على خالد وعبود ولا النكته المتحركه
حامد التهامى
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
ياسيكو ... هكذا سمعتها في قلب السوق الشعبي فكذبت "أضاني" .... ياسيكو سمعتها مرة ثانية ، التفت مندهشاً من يعرف هذا اللقب ؟ رأيته "يتحكر" فوق بنبر أمام ست الشاي والقوة وكبايته مترعة بالقهوة الصباحية. فجراوي ... فجراوي .. يا أخي دا معقول . تناولنا القهوة سوياً ولحسن الحظ كان حجزنا في حافلة واحدة ماشي لديار الشايقية.
كان الباعة المتجولون يتحلقون الحافة والركاب ، يجلبون أشياء تحسب أن ثمنها جميعاً لا يسد رمق جائع ليوم واحد ولكن كان هذا حالهم.
لقد تغير الحال وأصبح السفر بالحافلات ولسويعات بدل اللواري والبصات التي كانت تأخذ الأيام والليالي تئن في رمال أبي ضلوع ورمال أوسلي.
بدأت الرحلة بحافلة "روزا" فيها 20 راكباً وسط زحمة الكاروهات وأمجاد والركشات تجاه شريان الشمال. عبرت شوارع جميلة مرصوفة بـ"امبدة" حتى نهايتها "في الحقيقة لم يكن لها نهاية" ، ودخل سائق الحافلة زلط الشمال "الشريان" لتبدأ عمليات القلع المسلح المقنن. كان السائق يتوقف بعد كل عشرة كليومترات عند نقطة تفتيش ويدخل يده في جيبه ويخرج حزمة قروش ويديها الكمساري لينطلق جاري ويدخل الخيمة ويأتي خالي اليدين لا قروش لا ورقة تثبت مكان دخلت القروش. بعد نقطة التفتيش التالثة تملكني حب الاستطلاع وقلت للسائق كم تدفع في كل مرة ؟ فقال لي ألفين تلاته ومرات خمسة ، ومتل النقطة الجاية إلا ادخل أنا بنفسي بدل الكمساري لأنهم طماعين؟ هل يدوكم إيصالات؟ إيصالات ايه يا ابن عمي !!! ولا تستطيع تسأل منها حتى ، فقلت له ولماذا تدفع ؟ فقال لي لكي تصل أهلك بدري لأنني إذا لم أدفع "سينزلوا" كل العفش والركاب ديل ويفتشوهن ويضيعوا يومنا. بالفعل نزل في النقطة البعدها والبعدها ولا أدري كم دفع. السؤال إلي أين يذهب هذا المال؟ وتحت أي مسمى يتم أخذه؟
كان سواقنا زينة يسير سيراً معقولاً وسط بعض الحفر التي بدأت تظهر في الطريق وأحيانا تكثر لدرجة "الدقداق" ولكن الحمد آلاف لم نر أثراً لأبي ضلوع ولا لأي كتاحة أو وحل ، ووصل بنا السواق الزينة محطة التمتام في ساعتين بالضبط.(نكتر لله الحميدي الضهر حاضر في الحِميدي) الشيء الذي لفت نظري جامعان كبيران جميلان في منتصف الخلاء ولا يوجد حولهما سكان!
وكان ثالثهما في محطة التمتام التي أصبحت تمد السيارات بالبترول من طلمبة بنزين وجاز وتمد المسافرين بالمأكولات العادية وأشهى المشروبات الغازية الباردة حيث اختفت آثار القربة الجلدية و"الكرارق والبروش" دون ناعٍ لها أو لتاريخها ،"رحمها الله بقدر ما أعطت واللهم أحسن وبارك".
قد لا تصدق عينيك عندما ترى السيارات الصالون الفاخرة تجوب طريق الشريان جيئة وذهاباً ، والشحنات الكبيرة ذات الترلات وهي محملة بالسيخ والاسمنت متجهة صوب الشمال. لم يسلم سائق الحافلة من نقطة التمتام أيضاً "فقد دفع قنزبه" مبتسماً وعاد لسيارته ليتجه نحو " الملتقى" في ضهاري قرية "قنتي" حيث لم تستغرق رحلته إليها الساعة الواحدة. سبحان الله من بضعة أيام وليالي أصبحت الرحلة مجموعة ساعات قليلة. لابد للمسافر لمروي من أن يمر بشيء من المعاناة قبل وصوله لأهله ، وهي معاناة تأخذ الساعة تماماً لقطع كيلومترات غير مرصوفة بين "قنتي" و "كورتي"(لتتم كندكتك تماماً وتأخد نصيبك على دائر المليم" ليبدأ الزلط من هناك ماراً بضهارى كل القرى بادئاً بالقريبة ، الباسا، أوسلي ، "نقزو" القرير، تنقاسي ، مروي .... في أقل من نصف ساعة كنا في بنطون الكرو..... حيث نزل الجميع لينتظر البنطون الذي أصبح يسير عدة كيلومترات ليجد مرسى في الشرق "الكرو" بعد أن أصبح ماؤه غورا.
كانت ساعة انتظار مملة ولكن جمال البحر والنخل والطبيعة أنسى الجميع ، وعلى وجه خاص الأخ فجراوي ، تعب السفر وملل انتظار البنطون.
تأوه فجراوي كثيراً لفراقه دياره وجروفه ونخيله وأخرج كمرته ولم يترك شيئاً دون تصوير " ذكرني قصيدة حميد الخواجة يصور ساكت" إلا انه هذه المرة كان خواجة أزرق.
نواصل
| |
|
|
|
|
|
|
|
|
|
Re: عوده....من وطن القمارى (Re: yasiko)
|
الله لكن....
يغنى يا فجراوى ابدا اشترى الكريمات؟؟؟
انا السودان راجعة ليه راجعة ليه...بس النشهل سارية وسيرين...دربهم مرق...ومحمد ويسرى شوفو لى ليهم خلوة...ولا تموت تخلى ولا زقلونا...ماشة اعلمهم الرماية وركوب الخيل .....والفصاحة...والبيان....
وانا اتعلم المحنة...واعلم اولاد السودان وبناتو ....مسرح...
ياحليلهم...وتحياتى العامرة لمحجوب شريف...واسرته الجميلة...والبركة فيكم فى عم عبدالله عبد الوهاب...ولكل من يسأل عنى: حفنة حب...وبحر سماح
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
البناء ....مرض
اختى.......جاها اخوها من بره...حالتها مقارنة بالوضع العام...للمنطقه(برجوازيه عديل كده) عندها راكوبه ومطبخ....ودكان معمول اوضه .....ثم لامنافع......ولا حوش ...ولا باب......
ولا كان العشم....يمه
عسكرنا......البناء قريبنا....والطلبه...ولد ست البيت..طالب ممتحن الشهاده ....وصاحبه(عابدين) وده ولد ساخر...ونكته....يفيض منه الشعور.....بالناس......وانا ...الضيف ......وبدينا
ياناس....عرق الرجال والنسوان ماساهل......فى اليوم الاول...بنينا حيطه( المستراح).......الصباح ضبحنا.........اكلنا -فضلة خيركم- وواصلنا... نص النهار حصلت شبكه........فى اننا مفروض نبنى حيط الحوش للنص....والباقى يتموا الجيران
اين الجيران؟
الاول تحمله الريح
والثانى يعانى ألام الفيضان
.فى اليوم التالت .....زرعنا شجرات.....وقلنا نقوم على باب الحوش....الساعه قربت لى تسعه... والبناء راقد...ياخينا حرك؟
البناء ..عيان
والحل
نمشى الدكتور.....ومشينا
الجمعيه الخيريه الاسلاميه
منطقة السلمه جنوب
دخلنا
ملاحظه.اولى
الدكتور( سافى)
جيب سفه
ملاحظه تانيه.....جميع المرضى نساء....واحده عروس جديده يرافقها الزوج.........
ملاحظه تالته
الناس ..فقراء.........والمكان يمكن وصفه...بجميع الاوصاف..ماعدا عياده طبيه لمعالجة البشر
جا دورنا ....دخلنا الدكتور....كشف الزول ده... عندو التهاب ودقيقتين مافى اداهه حقنتين واحده فى الوريد والتانيه فى العضل...وقال نفحص الملاريا
فحصنا.... الزول عندو ملاريا
اداهو حقنة ملاريا فى العضل
شكرا...كم؟
الفين الكشف.....الف الفحص ..اربعه ألف الدواء.(تمانيه.. بس) ملاحظه لا اهميه لها..الحد الادنى للأجور..60 الف
سؤال لبنات ونساء البورد....هل تحبى الرجل البكاى؟؟؟
الجنه ..ماجنه..جدا
معزره ..بوستات مجاوره...سقطت سهوا هنا
.دفعنا ومرقنا....زولى رقد(سلطه)
الزول ده مجنون يدينى تلاته حقن؟
ورقد فى الواطه..فعلا....ماقادر امشى
جريت
لقيت واحد بتاع كارو ينقل فى طوب لو سمحت عندى زول عيان داير اوصله البيت قريب!
جات ست الطوب مارقه
سجمى طوبى؟
طوبى لهم.....انهم....مخلوقاتك....يارب
متى.....سيأتيهم.....رجل أو أمراه منهم ليقول
انهم فقراء
وانهم جوعى
وانهم احياء
وانهم بلا وجيع
و
من رأى السم لايشقى
كمن شربه
(عدل بواسطة فجراوى on 03-03-2005, 01:23 PM)
(عدل بواسطة فجراوى on 03-03-2005, 03:09 PM)
(عدل بواسطة فجراوى on 03-03-2005, 03:11 PM)
(عدل بواسطة فجراوى on 03-03-2005, 03:18 PM)
(عدل بواسطة فجراوى on 03-03-2005, 03:21 PM)
(عدل بواسطة فجراوى on 03-03-2005, 03:25 PM)
(عدل بواسطة فجراوى on 03-03-2005, 03:27 PM)
(عدل بواسطة فجراوى on 03-03-2005, 03:28 PM)
(عدل بواسطة فجراوى on 03-03-2005, 03:30 PM)
(عدل بواسطة فجراوى on 03-03-2005, 03:33 PM)
(عدل بواسطة فجراوى on 03-03-2005, 03:34 PM)
(عدل بواسطة فجراوى on 03-03-2005, 03:51 PM)
(عدل بواسطة فجراوى on 03-03-2005, 04:00 PM)
| |
|
|
|
|
|
|
|
|
|
Re: عوده....من وطن القمارى (Re: Abdelaziz)
|
الاخ فجراوى
لك التحية وشكرا لهذه الحميمية
وللعزيز ياسيكو تهانينا بالحجة
بالله قلت الباسا يمر بيها الزلط..يا سبحان الله
حدثنى خالى ان تلاميذ مدرسة الباسا
لمن يمرن كومرين بى جمب عود السلك..يقولوا
باستنا بقت خرتوم
اقمت فى طفولتى اربعة اعوام متصلة بالباسا
ولكنى درست بمدرسة الغريبة اكيد مريت بى جمبها..فلى بها ذكريات طيبة
والعزيز ياسيكو اكيد ..تم استقباله بالكلة..اما زالت تلك الفرقة موجودة
فقد كنا نسعد حين حضورها للباسا..بالاستمتاع باهازيجها المحببة
فجراوى..اكيد شفت بيت صديقى الصدوق
مارد
واكيد يتابع لهذا البوست..ووجدت الاهل بالحجير كلهم بخير
المحبة لكل المتداخلين
ولقريبى..عدلان..والصديق سكينة
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
| Quote: كان الباعة المتجولون يتحلقون الحافة والركاب ، يجلبون أشياء تحسب أن ثمنها جميعاً لا يسد رمق جائع ليوم واحد ولكن كان هذا حالهم. |
ياسيكو
ياجميل
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
الحبيب فجراوي
سلام دعني اعود لاحقاً (بعيد عنك) لما دار بيني وبين جهاز المغتربين.
فالآن دعني أصف حال كريمي (كريمة)وريفها.
عند وصولي أعتاب مروي شرق تذكرت مقاطع القصيدة التي يتغنى بها
ود اليمني " إن سأل مني أنا حالي كيف شاهد الله أنا بسأل عليك
كريمي الخليتا مو ديك موية دُش كهربا جا السلك"
لا تصدق عينيك والطريق قد تم ردمه من مروي إلى كريمة ، "وقيل لي أن العمل بدأ في
بناء الكبري في شبا عند ساقة ود الجاز ، الذي قال عنه عمر الحسين ،محقق
مدائح حاج الماحي ، كيف يحكمنا أسوأ أنواع مشتقات البترول (الجاز)" ، لم أصدق أكثر عند رؤية شوارع كريمة الطولية والعرضية التي مُهدِت ورُدِمت استعداداً للأسفلت !!!!!
" ولكن ازعجتني الركشات رغم حلها لمشكلات مزمنة" ، وقد لا تصدق كما ذكرت آنفاً الأعداد
الهائلة من خواجات شرق آسيا (الصينيين)الذين يعملون في الكبري وخزان الحمداب وبيارة المناصير
بين أوسلي والباسا.
حقيقة الحال يبشر بالخير ولكن لازال المواطن الريفي يرزح تحت الفقر وغلاء البترول الذي جعله
يهجر الزراعة بلا عودة. كم أحزنني ضمور نخل آبائي وأجدادي الذي لم يذق الماء لمدة طويلة
واستشهد واقفاً لأن مدخلات الزراعة أصبحت أكثر من عائدها ، دعك من الطلب والضرائب والزكاة التي أصبحت مثل المصروف اليومي وغيرها.
وكم أحزنني أن أصبح آبائي وأهل قريتي "المزارعون" يشترون الخضار كل يوم من "الكارهوهات" التي تجدها محملة بخيرات الخرطوم الشوق الشعبي. هل أستطيع أن أُسمي من يشتري خضاره اليومي مزارع؟؟؟؟
حقيقة الحال "ما بيسر" ولولا غياب قطر كريمة لَلَحِق الجميع بعم عبد الرحيم.
نواصل
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
الأخ العزيز فجراوي
لك التحية وانت تتحفنا بهذه الصور الجمالية عن زيارتك للسودان واحييك على مقدرتك العالية على نقل معاناة الاهل هناك بكلمات بسيطة وبمعاني ضخمة .
أنا ايضا عائد من السودان ارض الاهل والاحباب وقضيت هناك ما يقارب الشهرين ونصف وعيدت عيد الاضحي هناااااااااااااك في الحجير مع الاهل بعد غياب دام ثلاث سنوات .
رأيت كل الذي تحدثت عنه . رأيت معاناة اهلي وقوة تحملهم.
داهمت الوالدة نوبة من نوبات الربو الحادة فذهبنا بها إلى مستشفى الزومة ، اصلو الحجير والمقل لايوجد بها مساعد طبي ،،، مستشفى الزومة مستشفى جميل ونظيف لكنه يفتقر للاطباء والكوادر المساعدة ،، فالمستشفي به طبيب واحد يعالج المرضي بالبسمة والكلمة الطيبة ورفع الروح المعنوية أكثر مما يعالجهم بالأدوية والحقن والوصفات الطبية يسكن في جزء من المستشفى ويمر على مرضاه في اليوم اكثر من عشرة مرات ويقف بنفسه على كل صغيرة وكبيرة ويشجع الممرضين معه على معاونة المرضى . لقد احببت هذا الشاب الذي جاء من منطقة الدويم ليقلل آلام اهلنا رغم ان ابناء المنقطة رفضوا الاقامة بالزومة وحتى كريمة لضعف الامكانيات وتردي العائد المادي .
كتب الدكتور وصفة للوالدة دواء كحة ومشينا الصيدلية ( صيدلية المستشفى ) ولكن الدواء لم يكن متوفراً وقال الممرض ان لديه عبوة او اثنين بالبيت سيحضرها بعد الفطور ،،، واختفي لمدة خمسة دقائق وعاد وهو يحمل العبوتين واستلم عشرة آلاف في حين ان سعرها الاصلي ثلاثة ألاف ،،، علمت فيما بعد انه ياخد الادوية من الصيدلية للبيت ليبيعها بسعر أعلى ثم يستفيد من الفرق ،،،،،، على كل اغنانا من مشقة الذهاب الى كريمة للادوية .
الكثير من الخواطر والزكريات والصور الجميلة محملة بالذاكرة تحتاج فقط لداون لووود على البورد ، وقد كان في بوستك هذا تشجيع لبعضها لتطل بعنقها .
الحاج ياسيكو :-
حجا مبرورا وسعيا مشكورا يا حاج ،،، للاسف لم نتقابل هناك ولكني قابلت الرائع اسامة معاوية في ليلة جميلة ولابد انه قد عاد ايضا من اجازته السريعة للسودان . امل ان يحتفنا برؤياهو وخواطره فهو يعرف كيف يهز بجزع القلم ليتساقط علينا الحكي رطبا جنيا.
تخريمة : ياسيكو مالك علينا عاوز تحجب علينا البورد في السعودية انزل في المطار وامشي جدة انشاء الله كداري بس الله يبارك فيك خلي ناسنا ديل في حالهم ،،، ولك تحياتي
فجراوي : ياخوي انت قريب خلاص ،، ياربي تكون منو ؟؟
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
الاخ فجراوي
صورك دايرة معاجة في ورشة الحلبي
هذه واحدة وارجو مدي بالاخريات
الاخ
شرووم
كنت اتمنى لقاءك ولكن الظروف
وما تخاف "كلمة نافوخ ما بيفهموها"
واحزنني ما جرى في مستشفى الزومة
"كل التقول عليه موساك يطلع رب الفرعنة"
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
فجراوى
البوست كنت متابعو ومستمتع بيهو . وزى ما قت لك قبال دا انا البوست البملانى شعور جميل باستمتع بقرايتو أكثر
كنت داير اكتب واعاتبك على مرقتك انت والناس الحلوين البشكلو ركيزة للوليدات العملوا ليك الحفلة . لكن هسى ما عندى طريقة الليل اليل وانا داخل من شارع الله وفى معيتى هم الاحمدين (العجمى الاب والعجمى الابن) (انتوا هناك بتسموها W العجمى ) ما علينا يا سيدى ولو ربنا طلق القدم باجيك راجع
أظنك كتبت عن جبايات الشوارع وزحمة المرور والزمن المهدر من عمر الشعب السودان فى بروقراطيةالديوان الحكومى . لكنك نسيت تكتب لنا عن ضو القمر فى سهلة فاطنة بت ادريس وعن البيوت المجيرة بالجير الابيض فى الشمال العزيز . وعن ريحة البرسيم فى المغارب وانت ماشى بى درب الجمل . وقبب المسوداب والبوستة فى ساقة السوق وخور الحسن لسع بيلعبوا فيهو الكورة ولا الشباب كلهم هجوا وتركوهو خاويا على (عراضتيه) وما كلمتنا عن حجر الحجير وصديق الدون وعلى الجوكر والتومة بت حامدوكية لسع فى قوتها ولا الزمن جار عليها . كلما عن التشق والدميرة والمركز الصحى والمدرسة هل حولوها من مكانها القديمة على درب الجمل ؟ وبيوت الاساتذة القديمة اين موقعها الان من الاعراب . وقالوا التمر بدت قفوزتو وبدل السبيطة بقوا يدوا القفاس السدس . ترى ايهما افضل للقفاز السبيطة أم السدس . الحكومة تطير يا فجراوى كلمنا عن الكائن الحى الذى يرفض الممات كلمنا عن فاطنة بت فرحة وود النفور وسوق مدنى . والناس التحت الخابرين الدنيا ومعطيات التغير الكونى المحتوم
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
فجرواى الفجراوى
سمعت بزيارتك من القمارى، و لبدت جنب بوستك ده مليان بالحسد و المتعه
عقبالنا
رسل لى تلفونك على الماسنجر باقى فى اسئله و قطيعه ما بتتقال هنا.
| |
|
|
|
|
|
|
|
|
|
Re: عوده....من وطن القمارى (Re: esam gabralla)
|
حبيبي فجراوي مابليت شوقنا الا بس اخير من اخوك ياسيكو ربنا يديكم العافية
وجدت لوم كبير من بورداب الخرتوم بسبب الجلسة الدكاكينة العملناها فى بيت محجوب شريف ووعدت الجميع باصلاح الامر حين عودة ياسيكو من البلد وللاسف رجع مريض بسبب ملاريتنا اللعينة التى ماعادت تعمل بنا شي وحقارتها فى اولاد بوش
وطنا الليك برهان غنا
نسيت بكاك الخفى يافجراوي؟؟؟ كنت اشاهد دموعك وهى تجري الى داخل الجفون ماعارف ليه كنت اراقبك وانت مندهش تتابع ود جبارة اكاد اجزم ان تلك الاغنية جعلت تتحسر على كل لحظة قضيتها خارج ذلك الوطن الذى انشده ود جبارة
ساعمل بوست عن زيارتنا للشاعر محجوب شريف لان هناك الكثير الذى يستحق ان يذكر عن تلك الليلة التي لن تتكرر قريباً
| |
|
|
|
|
|
|
|
|
|
Re: عوده....من وطن القمارى (Re: ابو يسرا)
|
اليك قصيدة حميد التى اخذ منها ود جبارة اربعة ابيات وبني عليها كم سريقة وكانت تناطح السحاب والدهشة ليست من عندي بل من استاذنا محجوب شريف
يا متخبية ...
خلف وضوحك
أمرقي داخُل ..
تلقي الغيم الطاش
إتلقط
لمّه وربَّط ..
ربَّط ونقّط
نقّط ورشّى
الغبن إتفشّى
القابض طينك
وطاب في دوحك
... ... ...
يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .
... ... ...
يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..
... ... ...
يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أي مرتكب الصاح
ونصوحك ..
... ... ...
كَجَر الصمتِ
وكت داهمني
كنت متلبِّس ...
بي غنواتاً ليك
إتكرمن
من سر بوحك
للأطفال
بالزمن الجايي
الزمن الطيِّب
زمن الخير
الجالبة فتوحك
يقفل حرباً ..
باحتة جروحك
وطوفان جدباً
محّن نوحك ..
... ... ...
كبّر طفلك
ونشّن حجرو
قام الصمتِ وكجرو ..
إنكجروا ..؟
إنعدِّيتي ..
وشبّت أزمة
... ...
بين فرقات
الضو والعتمة
شقَّ نسيم
لي عِرْق الكتمة
خالَ النخل
العاول طوّل
قال وإستشهد
بي عمَنَوَّل :-
"المنحوس ..
هجّر تربالك
والمجروس ...
يا الردم الجدول
ودكَّ أطفالك
تحت الردمة
... ... ...
وقامت طلقة ..
تجاه النسمة ..
الساكنة النخل
العالي الأسمى ..
حاض الطير الحامل ..
هجمة
طرح الغيم الشايل ..
صدمة
داخ النحل العامل ..
صُرمة
... ... ...
رجمة ورجمة
في حلقَ الليل
إنشرقت نجمة
رقد النيل هبّود
بالوجمة
نفدت شيمة
بقدرة قادر
طارت غيمة
وصارت باكر
باكر رحمة
مدّت
وندّت
وشدّت
خيل الحيل
بالبسمة
نخل الغبش
الدغش إتلمَّا
الأبنوس الجاسر
يمّة ....؟
هبَّ تبلدي
تحدي وهمّة
وبحر المالح
كبّر وسمَّا
"الأديان
في القلب
يا أمّة
والإنسان
في الدربِ
أهمَّ"
... ... ... ...
البلد إتحول
بي مسموحك
ناس بتكاتل
لأجل سفوحك
ما يسقيهن
غير فد جدول
جدول
خيرو الخاوي
نضوحك
لا أشواك
تحميك تتجوّل
لا أسلاك
تنصلبط سوحك
... ... ... ... ...
يا ممتلية
كجوفي فجيعة
وآخرك أوّل
أو معتلية
كطمي الشوق
القلب الماحل
راحل طوّل
زي دعوات
الناس الظُلَّم
لمّا عليها الغول
إنغوّل
... ... ...
حلمي مدردح
دخري فقارى
إرثو ...
ضكارة
جسارة
بصارة
بإيد كرّاسو
وبي إيد فأسو
لو لا إحساسو
بعزّة ناسو
كان تكَى راسو
زمان وإتسوّل
زولاً طبعو
يفجِّر نبعو
بدّع زرعو
وماسك الأول
... ... ...
سوَّى حضارة
وشرَّف لوحك
شرحو ..
شروحك
مسحو ..
مسوحك
يفقد عطفك
ويأبى ينوحك
غامل يوم
راح ترجعي فيهو
ومجد بنيهو يلاقي
صروحك
... ... ...
جهراً ترجعي
ياوضّاحة
يا مرفوع للقوّة
صمودك
صبر الناس
اليوت كدّاحة
لنضرة عودك
... ... ...
المارقين
الذمّة هجائر
الساكتين
فوق رأي
وبصائر
مطر الحق
بالحيل سحّاحة
ناراً بق
لليل صحّاحة
شالت وجع الحال
في أصفاحه
وتنزف شان
ما تبرى جروحك
وتعبك راحة
... ... ...
شدِّي النيل الأبيض
فرسك
وفيض الأزرق
فينا جموحك
مقداف فألك
ومرسى طموحك
الإنسان اليسمع
بالك
يعرف مالك
يفتح خِزَنو
و يستر حالك
يلفح إجنو
ويقلع نالك
يكتل حزنو
ويروي قموحك
رافع رسنو
وراتعة أمبوحك
... ... ...
تنمسيبو
هديراً طيِّب
وتصحي
خرير الفجر
صبوحك
... ... ...
عشتي آواضحة
وراء مخباكي
ويا متخبية
خلف وضوحك
عشتي أصيلة
كأرضك ونيله
ومرتع واحد
لألفِ قبيلة
... ... ...
يا ال لبنايتِك ..
من غنمايتِك
يوم ما إنطفت النار
في لدايتِك
غيَّر زيرك
ولاّ ملوحك
... ... ...
قدمك قاشر
قطع الفاشر
سمسم باكر
باهي مسوحك
... ... ...
سترة بدنك
قطنة وطنك
طينك سكنك
نبضك مكنك
عرفك فطَنك
تبري جروحك
يا الطوفانك
صدراً ماهل
وشرف العزّة
الأحمر
نوحك
من دعتاية الزمن
الكافر
ينصر دينك
وتسلم روحك
... ... ...
تسلمي واضحة
وراء مخباكي
أو متخبية
خلفِ وضوحك ؟
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
ابويسرا
لا حول الله
انا ماشفت الموز..وفوزيه وناس (البيتين)بير العمده ..(والرقراق)فى اوضه ابو الكبار
شيل يا رجل
ماشفت الغنمايات (الخليتن) فى شارع الجميعاب...وما زرت الروضه....وناس ناهد...وشيخ مدثر
والشيخ دفع الله
انا شفت شنو
ومشيت لشنو؟
الله لا كسب الخواجه....شهر بس؟
امبده ..براها..دايرالها سنين (ودنين)...عشان شوق الجن ده يتبلى
انا مشتاق...يازول
لك الموده...
وامبده
سسسسسسسسسسسسسسسسسسسسسسسلام
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
Quote: عرس
اخوى الاصغر.........لو شفتوه جميل زى كيف؟ وانا ماشى ...بفكر فيه.....اتواعدنا نتلاقى هناك....نتفاكر....ونسوى الببقى....
والماببقى
اتسلامنا...سلاما....الدمعات( دخلن) لا جوه.... والاحزان اتلاقا قبالنا......مات الوالد يرحمه الله وما ...اتلاقينا
اتقالدنا
بكينا ....بكينا
بكينا
والله زمن...سبعتاشر سنه فى السعوديه......ساق ماعرف شى....عتل...ماجابة تمنها...... أتونسنا
كفيلوا؟
والزمن الضاع فى الهواء ساكت...... والشيبات فى الراس
اتخيل اخوك عندو كفيل.؟
تسلم اخوك......للغربه........وتسلم نفسك برضو....بنياتك...وليداتك واجمل مخلوقات الله معاهم وجاى اجازه؟(خم ..وصر)
جات الفرحه ( تاتاتى) قلنا يعرس......
من وين ياخينا؟
الخير فيما يختاره الله.....
وبدينا نفتش.....بس كيف.....الزمن اتغير.....والمامكن اصبح ممكن
فتش...واسأل يازول........مشينا بلدنا ...وجينا
دخلنا....مرقنا ....وانا محتار.......وقلبى يئن بالخوف
خوفى عليه....وخوفى عليها
يعرس زول بدون مايحب؟
بدون مايعرف حتى شريكه
ده......حايحصل كيف؟والبت هى منو؟
ياعمر اختار
دايرنك تحضر عرسه
.......قالت فاطنه فلانه
مابتنفع؟
ليه
دى.. حاتكون دكتوره وانا زى ما عارفين...(..اباطى والنجم..)..من ناحية تعليم..........طيب فلانه......فلانه.........وفلانه
ده كلو كلام مانافع
ادى نفسك فرصه......والاجازه؟
وعمر
نمشى...ونجى المره الجايه
أخ
اخوى ماعرس
اتفارقنا
لو...شفتو...عينو..... فيها......حنان العالم.كله.....ولوعة ....تبكى.....الحجر الماببكى
واتفارقنا |
... يا فجراوي
خاف الله فينا ..
| |
|
|
|
|
|
|
|
|
|
Re: عوده....من وطن القمارى (Re: خدر)
|
Quote: خبرنا عما حدث و يحدث هناك و نحن غائبون
كالعاده |
وجد الجماعه الطريق الى الجنه
ومن اجل هذا قاموا باعدام كثير من البشر
حدث
هذا
باوضح ما يكون النهار
فاجأهم
ان لااحد كان غائبا
الا
هم
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
العزيز فجراوي
لقد رجعت بنا الى ازمان واوطان
امبدة الحاره 89
ابويسر الظريف
ود العجمى رفيق العمر
المظاهرات
محجوب شريف
ستات العرقي
بائعات التسالي
الكجر والكاكي
فول فؤاد
دار رابطة المقل والحجير
واشياء عالقه بالذهن
لك التحية واجازة سعيدة
وربنا يرد غربتك لتنعم من خير البلد
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
الزنجى
سلام
انت برضك شارب من نفس النبع الصافى؟
الشارعيين الفلته
مدنى, والجميعاب
حاجه نفيسه تبيع الخدار بالدين
وتدى الامل مجان
كارو طالع والتانى نازل...وعمالقه وراء الرسنات
والطيانه...منارة...الحته
مداح طالع من صوتهم اعمق ما تتخيل من صدق
يازول الشى ده مو شى
شكرا ليك
| |
|
|
|
|
|
|
|
|
|
Re: عوده....من وطن القمارى (Re: فجراوى)
|
شكرا مولانا خدر..على اللفتة البتكسر الرقبة دى!!
قبل قليل كتبت فى بوست اخر ان عمرى ضاع..وكمان بالدين حتى.فرحمة بى حتى لااموت وفى نفسى شىء من حتى..
تحياتى لك وللصديق عمر ادريس(والذى ارى لو انه خلى حكاية الحجير وناساها ديل ..فهو مشروع كاتب وفنان كبير)..والله يخليى ليه نبته ونهال..ومحمدومظفر..يا طلعوه فنان بالجد..ولا كرهوه فى الحجير وناسها..
مع حبى
عاصم كته
| |
|
|
|
|
|
|
| |
yasiko
Tumadir
ملكة سبأ
محمد اشرف
Raja
elsharief
إيمان أحمد
خدر
أبو ساندرا
benyya
osly2
ABU QUSAI
ست البنات
عبد المنعم سيد احمد
شرووم
ود العجمى
ابو يسرا
الزنجي
Asim Sharief
فيس بوك
تويتر
انستقرام
يوتيوب
بنتيريست