دعواتكم لزميلنا المفكر د.الباقر العفيف بالشفاء العاجل
|
|
 رسالة أعتزار.....للحبيب فجراوى
|
سلام هى حتى مطلع الفجر
الى أسمى وصديق عمرى فجراوى ....أننى فى غاية التوتر, والأرتباك......أعزرنى أرجوك.. أكتب لك فى ظروف بالغة التعقيد......لا....لا ..تستعجل تعرف كما يعرف الصوفيه اليقين ...اننى لن أتخلى عنك ابدا....أبدا
مهلا أنها فعلا ظروف خارجه عن أرادتى ..وأكبر من من قدرتى على الأحتمال....تماما مثل موت أمى وانا طفل صغير أحمل أسمك.......حتى الأن تسيل دموعى فى الطريق عندما أرى....أم تحمل طفلها.....أو....تذجره......أو .... حمامه تطعم فى صغارها.......وحتى الان لا يقنعنى مطلقا.....لا المنطق.....أو...العقل ...أو العلم أن الأم ممكن تموت......استغفر الله العظيم
أنهم يطلبون منى أن يكون اسمى على الورق هو اسمى...فى المنبر الحر....والدعاوى كثيره...منها الوضوح والشفافيه....وعدم التخفى.......ممكن تصدق ان(فجراوى)...اسم تخفى؟؟؟؟الله يستر بعد شويه ما يقولوا دمك....ليس ..دمى.
سيبك منهم!! انهم هكذا دائما يودون أن يرونك كما ...يريدون ...وابدا لا تنقصهم -الحجج-...الحدث الجلل أننى وافقت ليس تخليا عنك أو جبنا ..أو خلافه ..فقط خوفا عليك واعزازا لما تحملته من أجلى .....انها استراحة المحارب ....الوسيم ..يا فجراوى
أتذكر وانا صغير ..ولم تولد أنت بعد..كنت أذهب الى (الساقيه)...ظلاما جدا فى الصباح الباكر يسمونه (الفجراوى) كنت..أحيانا .وحدى(والقواديس,والللس,والتيران) وأنا جالس على(النوريق) والمياه تندلق من دم التور وعروقى لتروى أمنا الأرض ............. كان خالى عليه رحمة الله يأخذنى....وأبنه....من أحضان الأمهات الدافى ...الى وحشة العمل (بالساقى)....لم يكن خالى قاسيا ...كان حنين القلب...طيب المشاعر والروح....ولكنه ممتثل....لقوانين الحياه....وضرورة العيش ...وقسوة الظروف التى أدخلتنا سوق العمل......ونحن عصافير... لم نتعدى الخامسه من العمر.
أذكر يوم ولادتك....حدث خلاف كاد يعصف بذلك الهدوء القروى العجيب....كانت الدنيا....سقط الشماليه الذى تعرفه, حتى الشرايين كانت (متلجه)...وأنا بين أحلام الطفوله ..وقسوة الواقع أسمع صوت حبوبتى تقول لخالى(الجنى الخرابه ده..لل..ليلى صغير...لاتحسسوا فى السقط ده يمشى يشد الفجراوى....أريته التمر ما شرب) وفجأة يعلوا صوت أمى وكانت هذه من المرات القليله جدا(هو الجنى ده أصلوا سموه...فجراوىىىىى؟؟)....فى اللحظه دى أنت جيت مارق على الدنيا....باهى وجميل....وطفل من حور الجنان....منها واتلازمنا بقيت اسمى ..وبقيت رسمك...فجراوى مرق.....فجراوى دخل ...فجراوى وقع من(الحماره)......فجراوى يا فجراوى......كنا عصفرين صغار ناكل تمر (الهبوب) ونشرب موية الجدول نمشى الخلوه ونجى فرحانين ..نشرك للطير....نبارى الحاره ما مرقت....وست الدوكه ما( ......).....نسمع حس الطمبور شعرة جلدنا (تكلب)....نمشى وراء المداحين.....ونذوب فى
من حبو من صغير بريدك يالبشير(ص)
شلتك جواى مخده طريه فى طفولتى ورعشة ذكرى للأيام ...لا ....لن أتخلى عنك أبدا...وسنذهب معا حتى النهايه معا.....أنها فقط محنه نعيشها مثل محنة غيابك عن الشفاه بعد أن-جئنا شرفنا المدينه- وتركنا الساقيه والفجراوى والعشاوى( والواطه) ومثل المحنه التى تجاوزناها عندما قدمنا طلب أنتساب لمدرسة الحياه والنضال...الحزب الشيوعى السودانى....تذكر؟ ذلك الأجتماع المهيب الذى ضم بعض عمال المنطقه الصناعيه أمدرمان...بأبرولاتهم الزرقاء ذات الرائحه المحببه لعشاق الأمل,وزيوتهم الجميله على الجوه, واياديهم الخشنه, وتلك الأحذيه التى فقدت اى علاقه لها من- هول المعركه مع الحياه-بالحذاء حسب مواصفات شركة باتا.....كان وقتها قرشى الطيب قد أجترح البطوله من زمن بعيد.....وأستشهد......وكان....دم العزيز الشفيع ...لازال طريا على التراب.....وكان قد تساما... الى العلا.....مستشهدا....ليضع العلامه الفارقه..للمستقبل..بين الحقيقه والعنف..... الوهم والتسامح....وكان قاسم أمين, وأبراهيم ذكريا,وعمك محجوب سيد احمد, ومعلمى على الماحى السخى يمشون بخطاهم المطمئنه نحو الشهاده
يا........للعظمه.......يا......للعظمه
تذكر....فى ذلك الأجتماع كان على أن أختار....اسمى الحركى......عليك الله تذكر يافجراوى الزميل العامل داك؟ رغم القسوه على الوجه....عيونه....صافيه وتنضح حنيه
نسيتوا ؟؟
اسموا السر
أدبتنا أحسنت يا....أبى
قال لى....يازميل انت راجى شنو؟ الموضوع بسيط اختار اى اسم وخلصنا.......شاف نظراتى.....ابتسم.....وأنا أتململ خايف أقولك......وأنت (تنقز) فى جواى.....تذكر؟يطلع حرف....ال ف.....الجيم يغوص فى الأعماق......ال ر ...تلاوى عشان تطلع.....ال و يحتج......تذكر ذلك الحياد الذى نكرهه معا حد العمى.....الذى مارسه معنا....حرف ال....ألالف ...وال لام.....وتبعهم حرف.....ال ى..... وحرف....الألف الفى .... النص......منو فينا القال....أنا والله أنت.؟...ياجماعه.....أدونى فرصه للأجتماع الجاى....الجماعه استغربوا.....وشافونى.....خايف ومتردد.....وأنت جواى تضحك
الدنيا مشت وعرفنا الأنترنت......ودخلنا منتدى....سودانيس اون لاين.....زاحمنا الكتاب الحقيقين..من علماء....وشعرا....وفنانين....وسجلنا لأول مره فى التايخ....وبدون تفكير كنت أنت ألاسم(فجراوى) هل كان ذلك خطأ؟؟؟؟لا ادرى ....كل المعلومات التى يطلبونها موجوده فى البروفايل) لكنهم الناس...ياتوأم روحى....ماذا نعنى أنا ,انت حتى يكلف أحد ا نفسه بالبحث......نعم.......نعم........نعم......البصاصين....وأصحاب الغرض ممكن....بس انا قلت الناس الشرفاء.........يافجراوى
دعنى كما تعودنا على الصدق والصراحه أقول يجب أن لا نطالب الناس ما لا طاقة لهم به.....وهنا أرجو بعمق الذى بيننا أن تغفر لى حماقاتى....وعدم قدرتى على التعبير الانسانى المناسب كما نريد أنا وأنت.....صدقنى لم ألطف بك....كما لطفت بى....وانا صغير......انها الحقيقه لقد تسرعت فى أحكامى- وأنا أكتب فىهذا المنبر- على بعض الناس......وفى بعض الأحيان....أسئت التصرف....وفى بعضها....أسئت لاجمل المخلوقات هنا فى المنبر الحر ...تحت أسمك( فجراوى).....وحتى الأعداء الذين نعرفهم مثل جوعنا ماكان يجب ان نخاطبهم دون الأحترام اللائق بهم....دعنا و أنت معى الأن أن نعتزر لهم جميعا....ونطلب منهم الصفح ...والعفو
العفو
لكل من تداخلنا معه/ها.. بخشونه غير مبرره, ولكل من قراءنا له/ها.....بصوره خاطئه ولم نقدر جهده/ها.....العفو......لكل من فسرنا ....حديثه/ها....بسوء....ولكل من أخطأنا فى حقه/ها....بدون قصد.
عزيزى الحبيب فجراوى من الأن فصاعدا ...سأتحمل العبء وحدى....فقط فى هذا المكان المنبر الحر( الذى سيكون...بعدك .....بوحشه زمن( الساقى) قبلك......لا......لا ....لست حزينا,,أنت تعرفنى جيدا....احزانى المدفونه فى الأعماق لم....ولن أعلنها لأحد....هذا هو الوعد الصادق بيننا
عش ..غريرا فى مسامى...وأعدك....سنلهو ....ونكمل تلك الحكايات الى نعرفها.....وسنضحك لأيام الجراح الأرتوت من ....دمنا
س....ن......ض....ح.....ك
عمر ادريس محمد
فلادلفيا
الأخ العزيز بكرى ابو بكر
ارجو شا كرا ومقدرا وضع /عمر ادريس محمد/.....مكان فجراوى
والله غالب
مع التقدير والاحترام
(عدل بواسطة فجراوى on 03-27-2005, 11:23 AM)
(عدل بواسطة فجراوى on 03-27-2005, 05:08 PM)
|
|
 
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
نحنا ما بنعرف عمر..بنعرف فجراوى
هل بالامكان الابقاء على الاسم المختار و كتابة الاسم الحقيقي كاملاً فى البروفايل؟؟
إلى الآن لا استطيع ان انادى محمد العمدة بغير سونيل..رغم انه طلق "سونيل"طلقة بائنة بينونة كبرى منذ عام و يزيد ربما او يقل ربما
وهكذا دواليك
نطالب بأن يبقى فجراوى..ومن ورائه عمر
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
وكذلك ابو ساندرا
يتعثر لسانى عندما اقول عبدالرحمن
وانا بنت النيل
وسكوتاوية
ومهدي
الخ
رغم اننى اعرفهم حقيقة
ومحمد عبدالرحمن رغم انه مشترك باسمه الحقيقي الا اننى اسميته محمد صمت-لا لصمته-ولكن لبوست شهير عن دبلوماسية الصمت كتبه باسم بهاء بكري قبل ان يشترك فعلياً فى المنبر
الشاهد ان جزءا كبيراً و كبيراً جداً من وجودنا هنا يمتد الى وجودنا الحقيقي و الفعلي فى الحياة بل و يطغى عليه احيانا لدرجة تمكن من القول هو الحياة
لذلك فليبق فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: Asim Sharief)
|
عاصم كته
لا....حولا؟؟؟
الكترابه....التكت...
انت جيت هنا كيف؟فاتنى ارحب بيك..وأقول للناس جاكم فارس ...كلمه..وموقف
وحكاوى,وبلاوى,ورحلات وعبور قارات
شى كلاكلات مصنقعات
وبربرات
وهارسبيرجرات
وملاذات وروه بت طاهرات
تعرف أنت....هنا
فجراوى حايرقد عافيه ومطمئن
مرحب بيك وشكرا كتير
كتير جدا
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
Quote: بنعرف فجراوي ... الراجل الحقاني
ما بنعرف كاسيوس ... لكن نعرف محمد علي كلاي
ما بنعرف عبدالحليم شبانة ... لكن بنعرف عبدالحليم حافظ |
وما بنعرف علي محمد سعيد.......بنعرف ادونيس
لا تحكم علي الفلاح الصغير " فجرواي "بالاعدام فليبق
"فجرواي " المنبر كما كان قبل حين من الدهر
"فجرواي "الساقية.
لعلنا نري الفجر قريبايبدد ظلمات بلادنا
مالنا ومال عمر ادريس محمد
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: omar ali)
|
العزيز
عمر على
التربال الصغير فجراوى أختفى موقتا كما أختفى الحليب من ضروع الأمهات أيضا موقتا فى زمن الجبهه الأسود
زمن
الفجاجه
واللجاجه
والزيف......زمن الكرباج وألقسوه
زمن الواطيها عالييها
سيعود ألحليب ومعه فجراوى....والجاى أجمل
شرفنى حضورك جدا
شكرا كتير
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: عمر ادريس محمد)
|
سلام يا ناس الحجير
تعرف يا عمر إدريس من أجمل الأشياء التي أذكرها في طفولتنا لما كنا نرقد قريب الموية على ضفة النيل ونكورك للناس في الضفة الأخرى من النيل ويردوا علينا وبالذات أولاد الحجير والمحفور وأتاريك انت واحد منهم يا عجوز . وكنا نكيف جدا جدا من الحركة دي والذات لما يجينا أبو التي تي . ويا بخت من كان معلمه علي الماحي السخي .
| |
|
|
|
|
|
|
|
|
 Re: رسالة أعتزار.....للحبيب فجراوى (Re: ABU QUSAI)
|
| Quote: وأتاريك انت واحد منهم يا عجوز |
العزيز
أبو قصى
ياربى؟..... غايتو كواريك ناس الغرب يسمعو ناس الشرق...دى كانت بعد الهدام التانى
وده كان بعد حفروا البحر بى( شويى)
لا...تحسب....تودرنا ساكت
لك خالص التحيه
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: عمر ادريس محمد)
|
الحبيب فجراوي
لا أملك الا ان ابتسم وانا اطالع هذه الرسالة ..
اسم فجراوي يبعث نوعا من الدفء والثقة في كل مشاركاته فهو دائما في المكان والزمان المناسب ولا يترك لنا حيزا لنفتقده.
يمكننا ان نكتب كثيرا عنه ولكن لا نود ان نرهقه اكثر مما هو مرهق ..
مرحبا
عمر ادريس محمد
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: Abo Amna)
|
الاخ/ فجراوى(سابقا)
الاخ الحالى/عمر ادريس محمد
شدنى اسلوبك السلس الذى يدخل القلب ويجعل الدم يندفع الى الذاكرة المنسية ايام الاجهادالساقية و(الاروتى) وحفر (البوقة) وايام البسمة الطافية فى انتظار نهاية(النوريق) لمعرفة ثمرة التعب بعدعدة اشهر وتعودبعدهاالعتالة للثمرات ولم (الهسد) و(التبن) و(الورتاب) وربط الجريدوسرحت كثيرا وترقرقت الدموع فى عينى واذكر نفسى بالعراقى الملون ببقع (الدفيق) وبه مزعات اعلى الكتفين والشدة البيضاء والتى تبدلت فيما بعد الى مركوب الجلدوالارجل الغبشاء التى تبتل بموية النيل والسروال الذى كان يوما لونه ابيض ولايتغير الا بعد ان يفنى وجسد لايعرف الحمام الابالنيل العظيم
صحيح النيل هبة الحياة
وتجول الذكريات بالخاطر وشبكة الصيدوالبحث عما جادت به وقت (الدغش )وتلفة من العين فى لفة (لوبية) من (الجرف )وتنطلق الى على ظهر هذا الحمار الذى ولد قبلى يمشى الهوينا لاريث ولاعجل والارجل فى اتجاةواحد وربطه اللوبيا فى حجرى وفى اليد الاخرى بستلة اللبن تصل المنزل وتعود سريعانازل ومعك هذه الربطة التى بداخلها هذا الصحن الكبير مفطى بالطبق وبداخله كمية من القراصة التى فى الغالب معهاملاحها ويكة( الفطور للوالد وجدىومن معه) وبيدك الاخرى (تيرمس)الشاى وبمجرد الوصول كل يترك مافى يدةويجتمعون وتكون عدة اطباق من اخرون تحت هذة النخلة المربوط بجوارها هذة البقرة الوالدة وبجوارها العجل المولود حديثا وبطرفها يمر الجدول الذى تغسل الايادى فية ويغسل الصحن احيانا واخرى يعود كما هو دون غسيل وتشرب بنفس الصحن ثم الشاى وجلسة ونسة صغيرة ويكورك جدى( يلا يااولاد الدنيا سخنت خلونا نخلص) عندها تكون الساعة الثامنة صباحا
يالها من ايام!!!!!!!!!!!!! اشتات زكريات
اخى لا ادرى اقول عمر ام فجراوى وباعتبارى لم اتداخل معك تحت اسم فجراوى يبقى معى عمر ولك الف تحية
وماتنسانا فى السماية
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
العزيز
عدلان
لو.....شكرا بتكفى ؟عطر بيها وجهك الجميل, وروحك الطيبه
وأخلاقك العاليه.
تعرف لو لم تكن عدلان
لتركت الأمر يمر
شديد أسفى ,اعتزارى أيضا
ولك عميق الود والتحيه والأحترام والتقدير
أكرمتنى الله يكرمك
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
Quote: ويجعل الدم يندفع الى الذاكرة المنسية ايام الاجهادالساقية و(الاروتى) وحفر (البوقة) وايام البسمة الطافية فى انتظار نهاية(النوريق) لمعرفة ثمرة التعب بعدعدة اشهر وتعودبعدهاالعتالة للثمرات ولم (الهسد) و(التبن) و(الورتاب) وربط الجريدوسرحت كثيرا وترقرقت الدموع فى عينى واذكر نفسى بالعراقى الملون ببقع (الدفيق) وبه مزعات اعلى الكتفين والشدة البيضاء والتى تبدلت فيما بعد الى مركوب الجلدوالارجل الغبشاء التى تبتل بموية النيل والسروال الذى كان يوما لونه ابيض ولايتغير الا بعد ان يفنى وجسد لايعرف الحمام الابالنيل العظيم
صحيح النيل هبة الحياة
وتجول الذكريات بالخاطر وشبكة الصيدوالبحث عما جادت به وقت (الدغش )وتلفة من العين فى لفة (لوبية) من (الجرف )وتنطلق الى على ظهر هذا الحمار الذى ولد قبلى يمشى الهوينا لاريث ولاعجل والارجل فى اتجاةواحد وربطه اللوبيا فى حجرى وفى اليد الاخرى بستلة اللبن تصل المنزل وتعود سريعانازل ومعك هذه الربطة التى بداخلها هذا الصحن الكبير مفطى بالطبق وبداخله كمية من القراصة التى فى الغالب معهاملاحها ويكة( الفطور للوالد وجدىومن معه) وبيدك الاخرى (تيرمس)الشاى وبمجرد الوصول كل يترك مافى يدةويجتمعون وتكون عدة اطباق من اخرون تحت هذة النخلة المربوط بجوارها هذة البقرة الوالدة وبجوارها العجل المولود حديثا وبطرفها يمر الجدول الذى تغسل الايادى فية ويغسل الصحن احيانا واخرى يعود كما هو دون غسيل وتشرب بنفس الصحن ثم الشاى وجلسة ونسة صغيرة ويكورك جدى( يلا يااولاد الدنيا سخنت خلونا نخلص) عندها تكون الساعة الثامنة صباحا
يالها من ايام!!!!!!!!!!!!! اشتات زكريات
|
الاخ العزيز
صلاح
كلامك المدهش ده شالنى ومره واحده ختانى تحت قعر التمر( واكتلتى يالله) فى العراقى المبقع والشده البيضاء,(والكوريى) ام فوضه فيها فطورك (تريمه مع عشاء البارح) وأنت ماش بى درب الجمل على المدرسه.....أأأأأ جماعة انتو جنس الحديث ده قعد تدسو لشنو؟؟؟؟
ياصلاح....لا تخلو الذكريات- وهى ماها ذكريات نصاح -تبقى وراء ضهرنا..!!!
وعليك الله كل ما تلقى أكتب
لك خالص المود ه والشكر الجزيل
فجراوى
| |
|
|
|
|
|
|
|
|
 Re: رسالة أعتزار.....للحبيب فجراوى (Re: فجراوى)
|
....الوسيم ..يا فجراوى
with people like you communism became Sudanese way of struggle... it became Sudanese Communism in spite of Stalin and Stalinists....
I never know you as Fajrawi.. I always know you as Omer Idreis Abu Nabta, omer Idreis that does not drink but and never belittled those who drink... Omer Idreis who lead us in prayer and know how many behind him in the rows believe in different concept of Islam that does not discriminate among people based on their gender or sexual orientation... you always respected us and never used the word Kafir…
نم قريرا يا فجراوى…….. and welcome aboard Ya Omer Idreis…
Mohamed Elgadi
Philadelphia
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
حبيبنا فجراوى
تعرف فجراوى دى عندها رونق خاص بيها يعنى تقلب الاسم يمين تلاقهو سمح
تنطقو بتعمق . تشعر بحلاوتو وطلاوتو فى ريقك . انا شخصيا بأنطقو بينى وبين نفسى بفتح الجيم ما بسكونها . وما عارف ليه
عمر ادريس اسم عادى وسيدو طبعا ما عادى وممكن يديهو من حلاوتو لكن فجراوى كأنما خلق للسايقة والانترنت . وجمالو طبعا فى انو بيجمع بين الاصالة والحداثة
اسم عجيب متناقض يركب فى كل حتة جميلة
انا معاهو وبالله يا بكرى ابوبكر مالك ومال اسوم الناس كل اسم عندو معنى عند سيدو
انا شخصيا باتكيف من اسم ود العجمى لما يقولوه لى فى امبدة وفى الهادياب ولما تقولو لى بقت وراق أو ولدها عوض ود عبدالهادى
وبأتكيف منو لما يجى زول بيسال عنى فى (الرسيبشن) وناس الهدف يتعبو لحدى ما يعرفو وبكرى العجمى دا منو .
وبرضى زيك يا فجراوى ما بأقول الشين بالاسم دا لأنو مسئوليه . فاهمك جدا يا فجراوى
من حبو من صغير بريدك يالبشير(ص)
تعرف لو ما كتبت الصاد البين القوسين دى . كنت قلت فجراوى جن ..
بالمناسبة فى زول تانى لو غير اسمو انا بأعمل مظاهرة .. الزول الاسمو الزنجى دا
اسمو انا مرتبط بيهو فى مرحلة طفولة وصبينة وسرقة كتب وكسير ادراج وشكل فى الكورة
وجلد نضيف من الاساتذة
عرفتو . اسم الزنجى زويل كاتل ضلو واسمو بيخصنى . تصور ؟؟
نرفض تعديل أو تغيير الاسماء
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
Quote: يمكننا ان نكتب كثيرا عنه ولكن لا نود ان نرهقه اكثر مما هو مرهق ..
|
العزيز
ابو امنه
كعهدى بك دائما تداوى....بأجمل الكلمات....
شكرا جزيلا
ومنك
ولك وعبرك
الى
عادل على....
ومريود
أجمل التحايا
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
الأخ العزيز
دكتور
محمد القاضى
هزانى كلامك جدا.......وأعطيتنى أكثر مما أستحق........ليس تواضعا ولكنها الحقيقه.
أن تجد نفسك وبلا أستعداد فى بلادا يأكل الحوت الرأسمالى البشع....الناس أكلا.....عليك أن تختار وبلا تردد.....المضى قدما أو....التراجع داخل ذاتك وهمومك الصغيره.....ليقتلك....البرد.....وعدم تحمل ضلوعك لضغط الذكريات.......وبؤس الحال فى وطنك
التجربه الصغيره التى ذكرتها تعنى لى ان ثقافتك بكل ما تحمل من مكونات..مالم تدافع عنها وتحاول تقديم أفضل ما فيها من ايجابيات - فى هذا المجتمع الامريكى المتعدد المفتوع على الثقافات الاخرى-.....لن تستطيع ان تكتشف مواضع ضعفها وقوتها-ثقافتك- و لن تسيطيع ان تصمد وقطعا ستتلاشى
وهذا موضوع طويل سنواصل انشاء الله حوارنا حوله
شهادتك عن انك لاتعرف من هو فجراوى رغم مداخلاتنا العديده......سبب اضافى لقرار احالته الى الوجدان مره أخرى
اشكر لك كلماتك الرقيقه
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
العزيز عمر ادريس
سلام من هنا للحجير مركز مروى
شكرا عظيما على الترحاب الحفى
ترقب بريدك المنزلى..فقد استعرته لارسل للصديق فجراوى(والتى امتدت صداقته ليوم واحدفقط ) فقط..بعض المسكنات وهى بالطبع ليست من طراز(الايبوبروفين)
تحياتى للاستاذة منى..ونبتة ونهال ومحمد ومظفر
كما تقبل تحيات الروة بت الطاهر وصديقتك الصغيرة ملاذ
حتى نلتقى
عاصم
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: Asim Sharief)
|
الحبيب فجراوي ...
إنهمر مني الدمع أنا الغريب عنك و عن
إرتباطك بهذا الفجراوي و لقد أفصحت عن
حميمية مؤثرة و سيل من المواقف و الذكريات
تربطك به .... و لا يهمك ... ستظل فجراوي
إلى أن ينبلج الفجر يا فجراوي
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
الحبيب
ضل الضحى والعشيه
ود العجمى
دخلتنى مساهمتك الرفيعه فى(معمعة)تفكير عن الجبر, والاختيار, والحريه...مرقت منها بصداع يحتاج الى حبة اسبرين استثنائيه, اودقشة قرض....والشاهد اننى كلما اوغلت فى التفكير خرجت بنتائج ليست فى صالحى او قول فادحه على المستوى الشخصى, وخسارات كنت أظن انها غير مؤثره لو ليست ذات بال مثلا انا وفجراوى كنا عايشين فى وئام وموده, نضحك ونحلم ومنسجمين نعيد فى الماضى, بمجرد خروجه الى العلن اصبحنا فى خلافات يوميه ومعاكسات لأن احدنا فرض رايه على الاخر, واصبح للاخرين ايضا دورهم...باختصار توترت علاقتنا بسبب الجبر وعدم قدرتنا معا على الاختيار بحريه....الى ان تم حسم الموضوع بالمنظر الذى تراها.....وعاين للصوره التى يرسمها المقيم الدوش هنا.....
ضل الضحى مشوار
تزح وتزح
زحيح الشمس من وكت النهار
زحيحها لى نص النهار
الونسه بالسفه الكبيره
وبالكتاتيح والغبار
الفاقه
والعمر الهظار
والزمن البروح (سنبهار)
هذه بصوره من الصور حياه عشتها فى امبده قبل الرحيل واحببتها الى درجة ان التخلى عنها الذى حدث فعلا بكل اسف اصابنى فىمقتل فى الصميم فىاعمق حته ممكن تتصورها....ولا زالت تفاصيل تلك الحياه تضغط على......تكون داير عشره رغايف يكون عندك حق خمسه, تانى يوم يكون عندك حق العشره ترسل(نهى)-الورده الحنينه المطرزه بالمشاوير- تجى تقول ليك لقيت فى الفرن خمسه بس....تكون عندك غنمايتين تحبهم حد الوله تضطر تبيع واحده عشان الحال, يمش......يدق باب الحوش تجرى متلهف يكون واحد من اصحابك تلقاهم ناس اللجان الشعبيه...دايرين يعدوك للمره المليون.وحياتك ضل ضحى يوصف فيها الدوش
الحله مابين يوم
وليله
أتشلعت!!
واحد شرد
قال للمدينه
قروشها تب ماليهاحد
واحد سرق
كل الهدوم الفى البيوت
راح باعها فى سوق الاحد
رسل جواب
قال اصلو مابنسى البلد
وكتين هدومو يملصها
وهكذا تسسلسل قاعده انك مجبور والاختيار واحد من الاحلام...شوف دى تكون داير تاكل كوارع تكون مصارينك عندها راى تانى تحب, يحكمك(عارف السياسه بتعمل ليك حساسيه) مجلس سياده يمثل كل السودان يحكموك عسكرين برتبة مشير ادوها لى روحم براهم ياخدو من عمرك32 سنه ولسه مفتوحه على الشراع...تفتش كتاب مذكرات اغبش للصحفى عبد الله رجب ماتلقاه تشترى اولاد الافاعى...ولما تقراه يهممك حد الوجع والخوف من حجم الفساد والنهب لخيرات وطنك تحت نظام يرفع شعارات اسلاميه
أه ياولد ضاقت عليك كل البلد
والدنيا ليل
سمعت زى نقر الكمان
حس زول بمش
تاوقت من تحت الكتيف
عاينتلا
والحق لله العظيم ..شاغلتها
أيوه عارف انو عيب
لكن شنو الفى الدنيا
اصبح ماهو عيب !!
المطوحه من كل زول
مطلوب قروش
وللا القعاد تحت الأسى
وضل الضحى
شفت الوكره الدخلتنى فيها ياود العجمى؟ ياود جيلا شايل الشيله براه...وخاتى الخته..وحالف يشوى الشيه فى الجمر الشهى.....ويجيب تار الماتو
والفاتو
ويختار
ويرجع الأحزان....فرح فرحين,,,,, تلاته
لك كل الود والتحايا
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
فجراوي ، أهلآ
{ يا للعظمة...يا للعظمة ....}
نعم في مقام قرشي الطيب ، الشفيع أحمد الشيخ ، قاسم أمين ، محجوب سيدأحمد ،علي الماحي السخي وعبدالمنعم رحمة ، لا نملك سوى القول يا للعظمة
الأخ بكري أبوبكر
نرجو شاكرين ومقدرين وضع / فجراوي /مكان عمر إدريس محمد والله غالب
وكدي واحد فيكم يحاول التدخل بيني وبين ساندرا
وشكرآ يا لنا مهدي
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
الاخ العزيز
محمد ابراهيم قرض
كتر خيرك كتير.....واسيتنى وخففت على والله
انا بقرا ليك باستمرار.....فى العرضه التانيه وهنا وعندى شك انو عندك نسبه فى
لا....نتنافس...... نحن نخدم امه...فيها روح كتاباتك
والفجر قادم.....انت قبل ده شفت ليك ليل ما عقبو خلاص؟
لك المعزه والتقدير
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
فجراوى
غالبتنى الله يغلب الياباك
رجعتنى للدوش الزويل العجيب دا الله يرحمو
تصور انا لحدى هسى كلما اتذكرو والونسة شى شعر وشى سياسة وشى خرمة تمباك وقصص قديمة . ابتسم واتحسر وقلبى يزح من محلو
تجى انت تجرجرنى ليهو وكمان شايل معاك ذكريات صديقك فجراوى ( الاروتى) وفجراوى السياسى وفجراوى أخو فاطنة بت ادريس ؟؟ وأخوك يا فرحة ؟؟
وتطرز كل الحاصل دا بقصيدة سعاد و حكايات بتفرض نفسها فى وسط الزحام الحاصل دا ؟
شميس المغرب الممحوق
تبين فوق وشك المحروق
تبين صفرة سنيناتك
يبين ضل الكلام مقلوب
.. .. كلام عجيب يا زول . والبيحليهو اكتر انو مكتوب فى خضرجى . ومش خضرجى ساى . خضرى سوق .. تتذكر الغبش الفى السوق الشعبى امدرمان . الما بتستطيع سياسات الدنيا يا فجراوى تهزم سخريتهم ولا شموس العالم تغير صفرة سنونهم؟
ولا عاشرت هدما زين
ولا حتيت تراب السوق
...
وتفرش فى الضحى الاعلى
تبيع سأم العمر كيمان
ولا لافتات ولا أوزان ولا اتمان
تشد تركب قفا الايام
زهج خيلك يلد تيمان
فرس شوقك دوام مسبوق
يا زول مالك علينا . تصور انا بأكتب ليك وأصابعى بترجف !!
فجراوى الله يكون فى عونكم ياخى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
يا ود العجمى
تكون راجى الزمن ده كلو عشان تلقى كده فى الكيزان تمعط منهم الأنانيه وحب الذات ,ترجع منهم السرقوه, تحاكم فيهم المجرم , ترجع البتقدر عليه لأصله الانسانى,وتنهى سيطرتم عليك
على البنيات فى الغرب
وعلى التميرات فى الشمال
والما بصلح توديه الاصلاحيه. يقوم مجلس الامن- انا قلته الامن؟ يتولى الموضوع نيابة عنك...لا اخترت الغبينه لا طريقة فشها
لكن ما هابيل ما أرعوى
وكم غوى اراد للدماء ان تسيل
صدقنى وماتتشكك أبدا انو الجاى أجمل
واضحك
أما
الدوش
ياتلاميذى العزاز
فى صيف طويل مبطوح على صدر الزمن
من ظلمة الشوق ابتدا
فى حضرة الحب اندفن
والنيل مدمع للنجوم
والصبر مفتاح الشجن
والحله مبتوره وكسيحه ومهمله
بانت بداية المهزله
بانت
سعاد
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: عمر ادريس محمد)
|
نذكرك بشي من لقاءنا مع محمد جبارة ومحجوب شريف
واليك آخر ماكتب ود جبارة
كما القلوب هدن رضن
صفن بقن على الوطن
كما اللبن
بدأ التصافي فى العلن
بشائر الفرح بدن
كما السماح لغي السلاح
بدينا صاح
كما العلاج صبح متاح
بدينا صاح
من الصباح نقوم رباح
علي الفلاح شداد نصاح
لاعلل ولاكلل
لاقهر لاغلب
لارسوم علي الكتب
لافصل بينقفل
امام طفل
فصل اساسو مكتمل
طفل حفل
ح يحتفل
في الحصص روي القصص
عن الوطن
بكل نفس ح تنغرس
محبة كاملة للدرس
ولا المعاني تلتبس
ولا الغناوي تنحبس
غناوي هادفة تلتمس
ظروف مواتية تنعكس
علي البلاد نما وغرس
علي الولاد لبس لبس
علي الشباب عرس عرس
وطن مكانو فى الرمش
نمش نباهي بي الشمس
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
اخي عمر
ما اجمل اسلوبك وما اروعه وانت تحكي عن ايام الطفولة
في تلك القرية المنطقه النائمه علي حضن النيل الحجير
تلك المنطقة التي لا تثمر سوي الاشياء الجميل
البلح-القمح ود جبارة وعمر ادريس
اما فاخلتف عن الكثيرين اذ انني لا اعرف فجراوي معرفة
جيدة بقدر ما اعرف عمر ادريس وذلك بحكم حداثة عهدي بالمنبر
اعرف عمر ادريس الانسان الشهم الذي ارتبط منذ نشاته بالنضال
ومحاوله التغيير
آآآه يا عمر لقد عدت بي ومعك ود العجمي الي زكريات ايام خلت كلما تذكرتها
انتابتني سعادة محزنة
زكريات الطفوله في الحجير الطنابير-الجداول-قبب المسوداب-والقراريص
وايام الشباب في امبدة المرتبطه بالنضال ومطاردة الامنجيه
وناس مسود وهاشم الحسوني وجلسات عمر الدوش الذي ما زال يسكننا
ولكن ها نحن قد تشتتنا
ولم يعد امامنا الا ان نحلم
الا تري معي ان احلامنا اصبحت قابله للتحقين
عزيزي عمر حتما سنلقي في البلاد التي اجبرنا علي الرحيل منها
ولكنها لم تفارفنا لانها تسكن دواخلنا
سنلتقي عندما تشرق شمس الخبز والحرية
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
العزيز
ابو يسرا
تعرف انت بالطريقه دى...حاتخلينى اشيل باقى (دلوقى) ديل وارحل....هناك
اسمع واحن...ومع الحنين اقعد(اطقع)فى النويسين .... والغنيمات والبهم...وانهى حال الوهدبه
ياريت يابو يسرا....قول معاى
الليله فى تلفزيون السودان سمعت ود جباره...فى
عفارم
عفارم
الزول ده عليك امان الله مسكون بى حب عميق للناس والتراب .... الله يقدرو عليه
ويخليه
وسلم لى عليه
مع الاعزاز
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
العزيز
احمد عبد العاطى
ألمح ملامحك فى كلامك..........
يا الهى
كم من الزمن مر.....علىاحلامنا البسيطه ديك..!؟
ماأتحققت...
تذكر؟
بس شوية عافيه....ودواء للبمرض...وتريمه كسره بدون ذله.....وقصايد تتكلم عنى وعنك......يقولها الصوتو مندى ورويان فينا ....وحليوات مايشقن وينتظرن فى الفاقه وعدم التعليم ....وامات ما تنشف ضرعاتن بالجوع...وبويتات طين تستحمل ....لما المطره تجيهن شو.....وعربات كارو عجلاتها ما تئن وهى فاضيه...واسواق عيش ماتفضى.....و...و....
تذكر؟ قدله شاب فى الحاره الرابعه امبده... بعد التمرين...مارق متريح بى ريحه...رخيصه ونفاذه بعد ما تفشل كل مأربو الاخرى...... يقعد يتكلم عن أحلامنا المشتركه....و ينظر عن أصل الدنيا...وتأثير الشيخ دفع الله على
(الفته) والكسل العام.... والجوطه تقوم....ونعرج على حراس النوايا نديهم حقهم...ونمشى كاس العالم ونجى راجعين فريق الاصدقاء....نلف العالم ونحن قاعدين
والعجب كان فى حفله بى صديق احمد والله محمد جباره.....ويصدف مرات تكون الحفله بى ابو عركى
كانت اول مره فى عمر المدينه
انو نامت وما حرينه
تحيا محبوبتى الحنينه
نتغالت فى معناها....نقول دى الثوره.....ونمشى ننوم
يا احمد المدن الغريبه علينا بقت ماقادره تحتمل الحنين
لمتين؟؟؟؟؟
شرفنى حضورك جدا
و
شكرا...ليك
فجراوى
| |
|
|
|
|
|
|
|
|
|
Re: رسالة أعتزار.....للحبيب فجراوى (Re: فجراوى)
|
الاعزاء
ابو يسرا, ود العجمى
ياناس
يادهب
محتفلين نحن الليله بعيد العمال, وفى البال ناس المنطقه الصناعيه امدرمان, وعمال المصانع وانت جاى بالحافله بى مدنى والله الجميعاب (تكحلهم.....دايما يضحكو)
تحيه خاصه ليكم وليهم
ولى ناس دقدوق
عبد المجيد الفنجرى
والناس الشقيانين كلهم
والمعزه كلها
| |
|
|
|
|
|
|
| |
lana mahdi
Mohamed Suleiman
Asim Sharief
عمر ادريس محمد
omar ali
ABU QUSAI
ابو جهينة
Abo Amna
ابو يسرا
صلاح الدين عبدالله محمد
ود العجمى
أبو ساندرا
خدر
Tumadir
فيس بوك
تويتر
انستقرام
يوتيوب
بنتيريست