انا عارف العنوان ده بيجيب لي هوا مع الناس ديل .. جنهم وجن برلوم دي .. لكن قدر ما قلبتها جاي وجاي .. لقيت الناس نجرو العناوين كلها .. وما خلو حبه عنيوين حايم .. طبعا انا عايز ارحب بكل الدفعه بضربة معلم .. يعني اي واحد من الدفعه دي يجي داخل هنا ليهو مني كل الحب ومليون مرحب بيهو لانو في كتيرين بيكونوا ( محمبكين ) وواحدين بيكونوا لسه بيتضارو وواحدين ملاوزين .. وفي واحدين هارشين عديل كده وفي واحدين عينهم حمراء وقلاعين عديل كده .. في واحدين حساسين .. حساسين خالص كان جيت داخل وما سلمت عليهو يشيل حسك .. لكن ضحكني حاتم صالح قبيل ..منزل ليهو بوست وما صبر عليهو .. والمسالة طوالي دخلت فيها حكاية البرلمة قام رفع حاجاتو براهو وكتب الكلام ده
Quote: فووووق حسع لو كان كاتب البوست دا جكسوية دا ما كان حالو
طبعا ضحكني ضحك السنين منافس جديد لGoogle ... المهم.. البوست ده بنحاول ومعاي اي زول / ة ( والتاء ) الاخيرة بعد الباك اسلاش دي يا جماعة علشان خالتكم الجندرية ما تنسوا القصة دي .. لانها حساسه شوية وما عايزه تبطل لحدي الآن حركات البرالمه دي مع انها في البورد ده اقدم من بكري زاتو ..اها قلنا ح نركز علي طريقة التعامل مع الايقونات .. الموجودة في البورد وعملية إدراج الصور والحاجات الزي دي .. طبعا في كتار من ( البرالمه ) خبرتهم عالية وعارفين القصة دي .. فياريت نشتغل كلنا مع بعض . وإذا كان في اي سؤال يتكبه هنا طوالي واي واحد يجي يعبر عن شعورو طوالي والحالة واحده .. لانو انا مرات عندي زوغات قاعد اعرفه انا براي .. اتفقنا يابرالمه ؟؟
12-08-2004, 08:21 AM
AlRa7mabi AlRa7mabi
تاريخ التسجيل: 08-15-2002
مجموع المشاركات: 1343
من الناحية دي ، أنا أكبر برلوم.. يا الجندرية الكيشة دي نجضتو احسن مني هههههههههه هسه شفت الضحكة أموت واعرف بعملوها كيف ههههههههه واللا الغمزة البتعملها رجوية وفي محلها بالضبط
تعرف البعد الكتير عن البورد خلاني فعلا زول جديد ما فاهم حاجة أبدا
تحياتي
رحمابي
12-08-2004, 08:44 AM
tmbis tmbis
تاريخ التسجيل: 10-19-2002
مجموع المشاركات: 24862
يعني نعمل شنو يا tmbis الواحد قبل ما يضغط زر post topic تلقى الموضوع ما فيش تقوم تفتش تلقي في أخر الصفحة وبعدين رفع البوست دا هين المشكلة نحن دايرين أداة سرية لتنزيل البوست وبخاصة البوستات أياها
يعني لو خشيت لقيت ليك موضوع بتاع شكلة أو شعر غير مفهوم تقوم تطفشوا للصفحة الخامسة وبالعدم يعملو أداة في شكل مسمار عشان ما يتحرك من مكانو
12-08-2004, 09:35 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
عمران حسن صالح .. صيدنا الجديد لي بورداب الرياض .. ياخ انت برلوم مجيه .. جاي بي اكوادك .. يعني انت وحاتم صالح الواحد كان سمي ليكم ( مربوطه ) تسقطوها ليهو .. وابدا لينا شنو ؟؟؟ انت زاتك شوت الحاجات العندك دي ,,, ما قلنا البوست ده للجميع ..برالمه وسناير..
12-08-2004, 11:51 PM
tmbis tmbis
تاريخ التسجيل: 10-19-2002
مجموع المشاركات: 24862
حاتم صالح .. يعني جيت بي نفسك ؟؟ انت اكتشاف خطير جدا والله .. وكلامك كلو حكم ..
Quote: وبعدين رفع البوست دا هين المشكلة نحن دايرين أداة سرية لتنزيل البوست وبخاصة البوستات أياها يعني لو خشيت لقيت ليك موضوع بتاع شكلة أو شعر غير مفهوم تقوم تطفشوا للصفحة الخامسة وبالعدم يعملو أداة في شكل مسمار عشان ما يتحرك من مكانو
غايتو ما تتحسس من اول كده .. بس اللياقة دائما خليها عالية .. والبوست البتنزلو كان لحق فتح منك اديهو لكزه صغيره وجيبو فوق اصلو ما تتحسس .. والبوستات البتجيب ليك نرفزه ما تدخله والعايزه تغطس تغطيس اكتب ليها Down وكان نزلت تكون بالغته..
براالمه بس والله لي سنه ادخل اشوف مواضيعكم الشيقه وللاسف ماكنت قادره ارد والحمدلله من لقيت باب التسجيل اتفتح جيت جاريه اسجل
اها يا تمبس قلت لي برالمه...والله احساس عجيب..تلاقي الموضوع حلللللللو وخلاص دايره ارد..من اخت يدي في الكيبورد الكلام يروح.. بقيت اكتب الكلام في ورقه واجي اكتبو ..تلاقي يدي ارتعشت ..ولو اتسهلت وخلاص دايره اكتب تلاقيني ما لاقيه الموضوع مشي وين
والعجب لمن الاقي موضوع جديد لنج..واقول كويس حارد اول واحده اها اكتب واجي ارسل الاقي الناس اتلمت وكتبت زمااااااان..اجي اقرا كلامم الاقي سممممح لمن اخجل من كلماتي انا واسحبها اها شفت الاحساس دا عجيب كيف
12-09-2004, 01:44 AM
tmbis tmbis
تاريخ التسجيل: 10-19-2002
مجموع المشاركات: 24862
حلفــاوية .. سلامات يابرلومه .. تعرفي زمان كان عندي صاحبي .. ( خجول جدا ) جنو وجن يرقص ليهو في حفلة يا يقومو الاستاذ في الفصل .. قال لي انا اكبر مشكلة بتواجهني لما اكون في حفلة واجي شاقي قدام الناس قال لي بحس انهم كلهم بيعاينو لي .. قال لي ما عارف الفنانين ديل بيغنوا كيف؟؟انت حسع ذكرتيني الزول ده .. طبعا اصلو الايام الاولي كده في البورد ده والبورد زي ما شايفه مشكل .. فلاسفه ونقاد وفنانين .. وعصبجية وحاجات كتيرة ..انت ما تجهجهي نفسك ساكت المكان البتشوفي انك بتتعاملي معاهو من غير برلمه طوالي ريحي فيهو والمكان البيجيب ليك الملاوزات داك ويعمل ليك الرجفه دي انسيهو وشوية شوية القصة بتسلك معاك ..
Quote: اقرا كلامم الاقي سممممح لمن اخجل من كلماتي انا واسحبها
غايتو دي حاصلة ما براك .. لكن كان تدسيها.. كده بتبقي فعلا برلومه
12-08-2004, 08:25 PM
Raja Raja
تاريخ التسجيل: 05-19-2002
مجموع المشاركات: 16054
رجــاء .. اونكل دي خطيرة جدا.. انا اونكل من سنيتن حسع بقو يقولو لي جدووووو يارجاء ياخ انا قلت حسع اجي اللقاكم البوست ده عملتو فيهو كم حركة .. تخلوهو زي ما هو .. حسع ده انا بعتبرو Overtime لانو يوم الخميس والجمعه انا بزووووغ نوم شديد ..
يا سلاااااااااااااام انا بحب بوستات الارشادات ...... وعاوز بس تعيوننا فى مسالة لون الخط والبنط - زى بتاع سجيمان المزلوع داك - وكمان مسالة الصور دى مهمة لانى مصور العاصمة دى وعندى البوم للخرطوم جديد لنج وفيهو حلوة للناس الماشافت العاصمة قريب من ابو ادم لغاية ام ادوم
12-09-2004, 01:47 PM
tmbis tmbis
تاريخ التسجيل: 10-19-2002
مجموع المشاركات: 24862
محمد حامد .. جهز صورك بس .. مسالة الخطوط دي اعتبره منتهية .. بس خطوط سجيمان دي لافحه من بره وبرضو محلولة في اكواد معينة لتغيير الخطوط والحجم ان شاء الله بنشرحه كلها بالتفصيل .. خليك معانا بس
12-09-2004, 02:55 PM
tmbis tmbis
تاريخ التسجيل: 10-19-2002
مجموع المشاركات: 24862
سوسن .. اهلا وسهلا ان شاء الهل انت كويسه ؟؟ ومبروك شديد البرلمه .. الخارطه دي ياسوسن ما بقروها .. شفتي كل الضحك وعلامات الاستفهام دي بس تنسخي من هنا وتلزقي هنا .. اسهل من السهولة زاتو يعني بدل علامة الاستفهام حتعملي علامات وبدل الضحكه ضحكات ..
12-09-2004, 01:55 PM
tmbis tmbis
تاريخ التسجيل: 10-19-2002
مجموع المشاركات: 24862
وووولي .. شايفك شبه متملص من البوست ده .. انا غايتو خلي لي صف الايقونات الفوق وبي اليمين .. انت تعال اعمل الحاجات القلتها دي .. وتكون انت شغال في اتجاه وانا في اتجاه ونخلص البوست ده قبال الجرد السنوي وقبال ما يمشي الريف .. والا رايك شنو ؟؟؟
12-11-2004, 01:36 AM
waleedi399 waleedi399
تاريخ التسجيل: 08-20-2003
مجموع المشاركات: 2767
Quote: انت تعال اعمل الحاجات القلتها دي .. وتكون انت شغال في اتجاه وانا في اتجاه ونخلص البوست ده قبال الجرد السنوي وقبال ما يمشي الريف ..والا رايك شنو ؟؟؟
موافق طبعاً يا حبوب
12-09-2004, 01:39 PM
tmbis tmbis
تاريخ التسجيل: 10-19-2002
مجموع المشاركات: 24862
عامر .. منور .. .. طبعا البوست ده والله أول شي انا عاملو علشان الفكرة بتاعتك .. لقيتك كاتب ليك كلام في مكان كده قدر ما فتشت ليهو شان اجيبو هنا ما لقيتو .. مافي مشكلة .. نقله نقلتين .. وكلو بيكون علي السليم ..
12-09-2004, 03:03 PM
Hatim Salih Hatim Salih
تاريخ التسجيل: 11-26-2004
مجموع المشاركات: 706
حــاتم سلامات .. وكيفك مع البوستات البتغتص لسه متحس ؟؟
البرنامج جميل .. وفيهو نقلات كويسه .. نزلتو طبعا بس فيهو مشكلة صغيرة انو بنزل معاهو ملفات Pop ممكن معالجته ان كان ولا بد .. بنرجع ليهو بعد شرح كيفية إدراج الروابط الصغيرة والاشكال المختلفة.. شووكرن ليك شديد..
12-09-2004, 04:34 PM
إسماعيل التاج إسماعيل التاج
تاريخ التسجيل: 11-26-2004
مجموع المشاركات: 2514
Quote: وإذا كان في اي سؤال يتكبه هنا طوالي واي واحد يجي يعبر عن شعورو طوالي والحالة واحده .. لانو انا مرات عندي زوغات قاعد اعرفه انا براي ..
قدرما فتشت لي لـ (icon) بتاع زوغات مجاناً ما وجدتو. يا ريت ترسل لي لِنك (رابط) لأي موقع ممكن أعمل منو تنزيل مجاني لأي أيقونة زوغات. بس في برنامج كدي سمعت إنو زوغاتو ما تمام، إسمو (تمبوزوغ)، دا ما ينفع معاي لأنو زوغاتو مكشوفة.
ثانياً: كيف أقدر أعمل تهكير للصور. يعني لو في صورة كلها وجاهة وشياكة زي صورتك دي: كيف أقدر (أهكرها)؟ بالطبع الهدف هو محاربة التهكير، لأنو ما يقدر على الهكر إلاَّ الهكر الأقوى منو. وعاوز أكون جاهز.
تحياتي
إسـمـعـيـل
12-11-2004, 03:51 AM
ودالعباسية ودالعباسية
تاريخ التسجيل: 10-28-2002
مجموع المشاركات: 2442
خوضه .. كبيرنا الذي علمنا المزك .. طبعا بحضورك .. شكل البوست بيكون اجمل .. والواحد لما ينزل ليهو معلومة أو يحاول يتجدع يكون عامل حسابو ومفتح عيونو إذا زمنك كويس جادعنا ياخواض .. وما تبخل علينا .. الباقي بنتمو غلاط ساكت ..
برلومك تمبس
12-11-2004, 11:20 PM
tmbis tmbis
تاريخ التسجيل: 10-19-2002
مجموع المشاركات: 24862
عبـــس اهلين يامنتشي انت الايامات دي تأمر بس .. كل اوامرك علي العين والراس امس لقيت لي اغنية لي عماد احمد الطيب خطيرة جدا سالتي نفسي في سري ياربي عماد ده هلالابي والا شنو ؟؟ يازول البوست ده ان شاء الله بعديهو الا تقول ما عايز .. بس الله يقدرني بسرعة كده وانجزو ليكم .. عشت يامنقه
12-12-2004, 00:04 AM
abas abas
تاريخ التسجيل: 07-26-2002
مجموع المشاركات: 6255
ياجمال طلتك ووجودك بيننا .. منطق .. ووعي وانسانية عالية .. بس ما قلت لي رايك شنو في الزوغه بتاعت اليومين الفاتت دي .. اصلو انا عامل زي ود الموية .. مع اني ما عارفو ود الموية ده شنو .. يعني ما بتمسكت ليك بسهولة كده وبي اخوي واخوك
Quote: قدرما فتشت لي لـ (icon) بتاع زوغات مجاناً ما وجدتو. يا ريت ترسل لي لِنك (رابط) لأي موقع ممكن أعمل منو تنزيل مجاني لأي أيقونة زوغات. بس في برنامج كدي سمعت إنو زوغاتو ما تمام، إسمو (تمبوزوغ)، دا ما ينفع معاي لأنو زوغاتو مكشوفة.
انت قايل يامولانا الصورة دي خاتيها لي شنووو؟؟ ما دي اكبر ايقونة زوغان في الدنيا اذا فكرت تعمل الحركة دي .. اعمل دبل كلك بس علي الصورة اليمينك دي وامسك ليك في اي حاجه قوية جمبك لانوكان لحقت زغته تاني ما بتتلقي بسهولة ههههههههههه..
اها رايك شنو في التهكيرة دي .. من دون تعديلات طبعا..
12-11-2004, 08:05 AM
ملكة سبأ ملكة سبأ
تاريخ التسجيل: 06-18-2003
مجموع المشاركات: 3855
•لتغيير لون الخط .. نقوم بالنقر علي الرابط الخاص بالخطوط علي الناحية اليمني ( 1 ) ، ثم نقوم بعملية نسخ ( Copy ) للون المحدد أو المراد استعماله ، نقوم بعملية ( Paste ) داخل الصفحة المراد الكتابة بها . يمكن تغيير لون الخط المراد استعماله فقط بتغيير رمزه بمسمي اللون .. مثلا : Yellow blue .. وكل أسماء الألوان المتعارف عليها .. ويمكن اختيار الأسماء من خانة Coloured Text موضحة بالرسم (2) بصورة أوضح وأسرع نقوم بحصر النص أو الجملة المراد تحويلها بين الأقواس مثلا اردنا تحويل نص إلي اللون الأحمر .. (3) •نظلل الكود الخاص باللون الأحمر.. من اللوحة المرفقة علي الناحية اليمني •ننسخ الكود ( copy ) وندرج الكود في مكان الرد بالصفحة ونقوم بعملية ( paste ) ثم نقوم مرة أخري بعملية تظليل للكتابة المحصورة بين الأقواس Red Text يمكننا الكتابة مباشرة أو يكون النص معد جاهز علي صفحة خارجية فقط نقوم بعلمية نسخ ( copy ) للنص .. نختار الخيار Preview لمعاينة العمل قبل الإرسال .. •إذا أردنا للنص أن يكون أكثر قوة ما علينا إلا تظليل النص من جديد بين الأقواس ونختار الخيار Bold (4) من اعلي مكان في صفحة الرد .. ويمكن ايضا الضغط علي ايقونة Italic (5) ويعطيك شكل الميلان للنص ومن ايقونة Underline (6) لوضع خط تحت الجملة المطلوبة .. ( ملاحظة ان هذه الإجراءات لابد وان يسبقها تظليل للمساحة المطلوبة كما نفعل مع الكتابة في صفحة الـ word العادية.. إذا يمكن ان نجعل النص مختلف اللون ، واكثر قوة ، ومائل ، وتحته خط فقط بالتظليل واختيار الامر المطلوب.
ملحوظة : نفس الايقونات Bold ، Underline ، Italic موجودة في صف الايقونات في اللوحة وتكررت في اعلي البوست لسرعة الاجراء من ضغطه واحده بعد التظليل.
12-12-2004, 04:01 AM
waleedi399 waleedi399
تاريخ التسجيل: 08-20-2003
مجموع المشاركات: 2767
ادوك بخره يارحمابي ؟؟؟ غايتو راوية دي كان ما قطعت عيشنا اصلو ما ترتاح .. حالتو الواحد عايز يمسكك من كيبوردك البتكتب بيهو وكل يوم يخليك تزازي بي هنا .. طيييب ياراوية
12-15-2004, 01:25 PM
Raja Raja
تاريخ التسجيل: 05-19-2002
مجموع المشاركات: 16054
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
tmbis
AlRa7mabi
توما
Rawia
Hatim Salih
عمران حسن صالح
Raja
محمد حامد جمعه
waleedi399
إسماعيل التاج
ودالعباسية
abas
ملكة سبأ
بلدى يا حبوب
اساسي
فيس بوك
تويتر
انستقرام
يوتيوب
بنتيريست