|
دعواتكم لزميلنا المفكر د.الباقر العفيف بالشفاء العاجل
|
|
 Re: .. أخترت شوفتك كل يوم .. (Re: ajaj)
|
| Quote: انا كل يوم بتغدا في مطعم الهلتون وقت البريك ممكن تشوفني هناك |
بت .. عجــاج:
بعدين الكلام دهـ كان دخل الحوش .. بتثيتو ليهو؟؟
..
.
مع عزومة الغداء .. ( الصفحة الأولى من جواز السفر مهمة جدا بالنسبة لي )
نحن خلاص الشوق علمنا .. بقينا ناس امسك لي وأقطع ليك .. 
| |
 
|
|
|
|
|
|
|
 Re: .. أخترت شوفتك كل يوم .. (Re: tmbis)
|
لكني ما لاقي الفـــرح
لا في البعــاد ..
لا
في اللقا..
ما .. من هواك
أنا اصلي عاد خلقوني من طين الشقــا
..
وطــــــــــن
كلمــا بعدنــا عنك تجاذبنا الشوق
شكرا عبد الرحيم البركــل .. كلما ارتحلت اشواقي سيرا على الاقدام ..
.
.
شكرا لك .. في مواسم الشوق
( يا بـــلد )..
| |
|
|
|
|
|
|
|
|
 Re: .. أخترت شوفتك كل يوم .. (Re: tmbis)
|
لاكين يا تمبس كيف الشوفة والبحر متمدد بينا وبينها
حالف لا ينشف لا يزح لا يتزحزح لا يتكرفس ولا يتكبرت (وش مكرمش).
ما بلقى لي عندك سباتة زايدة ؟؟ مغروووض فيها؟؟
شرووم
| |
|
|
|
|
|
|
|
|
|
Re: .. أخترت شوفتك كل يوم .. (Re: شرووم)
|
شرووووم ..
Quote: لاكين يا تمبس كيف الشوفة والبحر متمدد بينا وبينها
حالف لا ينشف لا يزح لا يتزحزح لا يتكرفس ولا يتكبرت |
..
يا صاحبي دا زاتو البحر.. النشف ريقنــا.. ورجعنــا منو عطاشى..
لكن هانت .. كان عوم بنقطعوا .. بس شد الضراع يا تربال..
| Quote: ما بلقى لي عندك سباتة زايدة ؟؟ مغروووض فيها |
سباته الهينة دي ؟؟
الراكوبة بنجيبه ليك بي حباله
| |
|
|
|
|
|
|
|
|
|
Re: .. أخترت شوفتك كل يوم .. (Re: tmbis)
|
Quote: Quote: الجملتين ديل ماعرفت اكتب بعدم شنو
..
تمي الباقي شوف يا نجـــود . الحالة عامة |
غيابك قتل فى الاحساس باجمال وادار السعاده من امامى .. وزرع بأعماقى الالم القاتل .. لم اكن اعرف اننى سأتعذب كل هذا العذاب فانا بدونك تائهه .. يسكننى التعب وينهشنى الالم وحيده ابحث عن مرفاك البعيد .. فالرحلة طويله وسط ردهات العمر وانى احتاجك بشده حتى توقف هذا العذاب القاتل .. حتى احس بوجودى احس بزقزقه البهجة تغمرنى وسرور الفرح يظللنى .. اريدك الغيمة السعيدة التى تهبط على حياتى فتحيلها الى عالم من الفرح ..
| |
|
|
|
|
|
|
|
|
 Re: .. أخترت شوفتك كل يوم .. (Re: نجود حسن عبد الرحمن)
|
نجــــود ..
| Quote: لم اكن اعرف اننى سأتعذب كل هذا العذاب فانا بدونك تائهه .. |
شوقــا جيتي ..
وشوقــا تحملين عذاباتك راحلة ..
علــه يسمع ويعود..
وليتنا نطفي جزوته الممتدهـ فينا .. ما أن عرفنا له طريق
ولعلهــا تدري ما فعلتــه بي هي الأخرى..
( غربــة )
| |
|
|
|
|
|
|
|
|
|
Re: .. أخترت شوفتك كل يوم .. (Re: Tabaldina)
|
علاء تمبس
Quote: لكني ما لاقي الفـــرح
لا في البعــاد ..
لا
في اللقا..
ما .. من هواك
أنا اصلي عاد خلقوني من طين الشقــا |
سلامتك لعلوا ما شاكوش تايواني
يا اخوي كده ارخي ربطة الكرفتة واخد لك نفس طويل...وابتسم
حكمة اليوم
متعة الحب بين البعد واللقاء
| |
|
|
|
|
|
|
|
|
 Re: .. أخترت شوفتك كل يوم .. (Re: حمد فتح الرحمن)
|
د. حمد فتح الرحمن..
ثم أين اشجار الفاكهة .. ( والموالح ) ؟؟
| Quote: الفيديو ما وقع لي في الجرح عديل يا حبه |
تحذير رسمي:
الفيديو . لمثل حالاتكم المتأخرة .. يسمح فقط للمشاهدة النهارية بعد الساعة اتنين ونص
لاتغامر بالمشاهدة ليلاً ..
إن فعلت ..
فألزم تجاهـ .. ما يفضى إلى الماسورة..
أنا قلت العندي غايتو..
| |
|
|
|
|
|
|
|
|
 Re: this is first class (Re: Soumeta)
|
dear brother
i do not know what to say the song is fantastic the photos made me cry
remember the little village on the river Nile bank where i was born ad had the best time of my life
keep the good work as gifted people like will make this place a lovely oasis
dr mustafa Mahmoud
| |
|
|
|
|
|
|
|
|
 Re: this is first class (Re: Mustafa Mahmoud)
|
د. مصطفى محمود..
| Quote: i do not know what to say the song is fantastic the photos made me cry |
..
رد الله غربتك ..
حتى بعد دراستي الثانوية .. كنت عندما أعبر ( كبري أمدرمان ) صوب الخرطوم.. احس بغربة دخيله .. ووحشة تلازمني كلما ابتعدت خطواتي .. وتركت أمدرمان خلفي ..
تعود روحي .. عند العودة ..
ما كنت اعرف ... للغربة طريق
اتذكر..
أول تجربة للسفر نهاية الثمانينات وأنا أودع أحد أخواني .. بكيت بحرقة وكنت اظن أن العالم سينتهي هنــا
ما عاد من ودعت .. ولم التقيه حتى الآن .. بيننا نبرات الصوت تحملها رسل التقنية.. وبعض الاسى وحنين إلى ادق التفاصيل..
في مطار الخرطوم..
لازمتني غيبوبة أخرى .. لم أفق منها حتى الآن .. وما زلت اذكر كلمات .. ( امي ) وانا اعبر الخط الفاصل بيني وبينهم.. لحقت بي .. عند البوابة الزجاجية طبعت قبلتها على ( قلبي ) مودعـه
وقالت في ثبــات لحظي مصطنع:
( كان شفتك والا ما لقيتني .. عافية وراضية عنك )..
| |
|
|
|
|
|
|
|
|
|
Re:only god knows (Re: Muna Khugali)
|
dear muna
is it love for the village or the Nile banks or what???
i think only god knows
as i do miss the whole Sudan which has been hijacked by these murders for the last 16
years
god bless us all
mustafa
| |
|
|
|
|
|
|
|
|
|
تاني نحن الاتنين (Re: Muna Khugali)
|
منى خوجلي .. ازيك
| Quote: تـاني انتوالاتنـين? |
يانا نحن زاتنا .. وياها نفس الحاجات .. بس بنفرق بي أنو معتصم بيكون شغال وردية النهار وأنا بستلم منو وردية الليل لحدي الساعة ستة صباحا..
احيانا بتكون المسالة عادية لكن اكتشفت أنو الحالة دي لماتبدا بي واحد بتنتشر عالميا..
يعني بمعنى تاني .. ممكن نحتمل لي آخر درجات الأحتمال .. لكن لحظة الانفجار بتعم كل الحبايب القراب فيهم والبعاد ..
وبعدين في رأي الخاص أنو ( اعبر ) ناس أو اكترهم تعبير عن حدة الشوق ( يانا ) نحن السودانين المغلوب على امرنا ديل .. مهما بعدنا في الارض الواسعة .. بتضيق بينا الوسيعة في اقرب ملف للشوق .. وبنرحل بي روحنا وبنكون قاعدين مكان ما قاعدين عبارة عن .. ( ناس .. ساكت )
..
لو بايدي كل يوم .. أسمعك شايقية.. لكن بس الخوف مما يترتب علي السمع..في غربة زي دي ..
| |
|
|
|
|
|
|
|
|
|
Re: .. أخترت شوفتك كل يوم .. (Re: Muna Khugali)
|
| Quote: أوعـوا تكـونوا بتشتاقـوا لنفس الزول? |
تخيلي يا منى ياهو زاتو ..
نفس الملامح والشبه ..
وبي اسمو كتبنا ورطنا ..
وفي حضرة جلاله يطيب الجلوس ..
إنه الشوق ..
يفعل بنا هكذا ..
وكوم ذكريات وتفاصيل صغيرة ..
عشناها ..
وتعايشنا معها ..
لذلك هي باقية في دواخلنا ..
إنه ( الوطن ) ..
كوني بخير ..
| |
|
|
|
|
|
|
|
|
|
Re: .. أخترت شوفتك كل يوم .. (Re: مهاجر)
|
تمبس
الحاصل شنو يا فردة!!!!!
يا اخوانا دي عين والله,,,
الاولاد ديل كانوا كويسين, دي عين ما ذكرت الله
كدي النمشي اجيب بخور تيمان واجيك,
اسمع,, ما تكون دي حمى ليلة فصل !! 
| |
|
|
|
|
|
|
|
|
|
Re: .. أخترت شوفتك كل يوم .. (Re: Rasha Hatim)
|
Quote: الاولاد ديل كانوا كويسين, دي عين ما ذكرت الله
كدي النمشي اجيب بخور تيمان واجيك, |
رشـــا..
وين الحي بيك يا فردهـ
عايني تفاصيل الاولاد ديل كالاتي:
- انا القدامك دا .. ما عندي مشكلة حمتي خفيفة .. يعني ( قرض ) بيخارجني.
- تاني واحد في الاولاد .. يعني حبة بخور تيمان فيهو البتاعه الحمراء البتطرشق ديك ( عين العروس ) على كم حبة من اللبان على شرط ما يكون لبان ( ضكر ) ده برضو بضمنو ليك
- أما تالت الاولاد .. ده ( وضعو بقى خطير ) بالذات اليومين الفاتو ديل ونحن حسع مبركين ليهو فكي .. من بتاعين الهلتون .. لكن ما بيضر كان لقيتي ليهو شوووية بتاعت بخور ( ظار )
لانو بي صراحة .. ( مدستر ) شووق وتاعبنا معاهو كل يوم العصريات نجري نخمو خم نجيبو من المطار
الكلام ليك يا نمرة تلاتة ما تعمل فيها متطارش
| |
|
|
|
|
|
|
|
|
 Re: .. أخترت شوفتك كل يوم .. (Re: Muna Khugali)
|
العزيزة منى خوجلي ..
التحية للخــال التربال .. ولكل الترابلــة.. والجروف والحيضــان..
عندي كمية من الخيــلان ..
اكبرهم تربال مستقر في البلد إذا غاب عن حواشتو وبعد من الجنينة مسافة يصل الحلة .. يصاب بحمى الرجعه من جديــد..
حتى في الاوقات القليلة البقضيها في البيت لا يشغل نفسو إلا بأدوات الجرف يجهــزهـ وينضفه ويعيد صيانته لا تفارقه الطورية ولا القفه ( وحمار ) يسابق الريح..
أجمل لحظات العمر .. قضيته هنــاك .. قومت الفجرية ، نزول البحر صيد القمري والسمك ..
لما يستوي الموز .. نتابع السبيطة ( المستوية ) بالريحة .. أشجار الباباي لما تشيل الثمار تنفدع وتنكسر .. ( طعومية ) موية الدميرة المخموجه بي طينه..
ياخي دي حاجات ما بتتلقي في الدنيا دي كلهـــــا ..إلا هنــاك بس
| |
|
|
|
|
|
|
|
|
|
Re: .. أخترت شوفتك كل يوم .. (Re: ajaj)
|
| Quote: عاد يا اخوي بكيتني كيف وانا السودان لي خمس سنوات منو خلي البلد |
يا بت عمنــا عجــاج ..
أول حاجة ربنا يرد غربتك ويتوب عليك من دي الحالة ..
وتاني حاجة . دعوتك مقبولة تب
وقولي آمين معانا
| |
|
|
|
|
|
|
|
|
|
Re: .. أخترت شوفتك كل يوم .. (Re: tmbis)
|
سمي العزيز
تشكر علي الفيديو رغم إني كجتنت المخلوق دا من ما شفتو يوم يغني لكيزان و هو زاتو عارف إنه بعمل في حاجة كعبة لذا كان منفعل و مر تبك شديد
اها جاينا متين الحق الهوبلي بتاع اليومين ديل شايف إشارة ألمانيا خدرة
و الأيام الجاية دي أخوك عريس يا تهجل قبل المدام تجي يا تديها صنة
| |
|
|
|
|
|
|
|
|
 Re: .. أخترت شوفتك كل يوم .. (Re: نصار)
|
يا سمي العزيز جدا
اهلا بالعودة يا صاحب ..
| Quote: رغم إني كجتنت المخلوق دا من ما شفتو يوم يغني لكيزان |
تعرف يا ابوعلاء .. دهـ نفس انطباع زولة صاحبتنا مع انها سنجكاوية .. لكن برضو قالت لي نفس الكلام دهـ
وإذا ملاحظ في كمية بتاعت ( دبابيس ) في الحفلة دي حضور .. لكن طبعا عادي جدا ممكن تعفص وتتجاوز .. المسالة اصبحت ما مجرد غناء في ليالي زي دي .. في اشياء كتيرة اكبرمن كدهـ.
| Quote: اها جاينا متين الحق الهوبلي بتاع اليومين ديل شايف إشارة ألمانيا خدرة |
تعرف يا عريس في تغيير في الخطة .. ومبدئيا الف مبروك .. ليك وللمدام وأعمل حساب أنك تديها صنة لحدي ما الخطة تظهر خطوطه العريضة
| |
|
|
|
|
|
|
|
|
|
Re: .. أخترت شوفتك كل يوم .. (Re: tmbis)
|
| Quote: .. أخترت شوفتك كل يوم .. |
تمبس يخاطب اللحمة بعد حرم منها لأكثر من خمسة سنوات ونيف هي مدة الغربة عزّابي
والله نيف دي عاجباني عجب وما صدقت لقيت فرصة ادخلها في جملة مفيدة
تخريمة :
إدّعينا وقلنا تاني ما حنشتاق في عمرنا ..
وقبل ما تمر ليلة واحدة بي حرارة الشوق غمرنا ..
كم لهينا وقلنا إمكن ندفن الحب في سهرنا ..
الحياة صعبت علينا وبي أثر فقدك ااااااااااااااااااه شعرنا ..
شفت كيف حبك حياتنا..
| |
|
|
|
|
|
|
|
|
|
Re: .. أخترت شوفتك كل يوم .. (Re: عمر الفاروق)
|
| Quote: والله دي عاجباني عجب وما صدقت لقيت فرصة ادخلها في جملة مفيدة |
بلاي ياعمـــر .. قوم نيف كدا والا كدا..
..
تتخيل ياعمر كنت بفتش لي اي حاجة لي محمد الأمين .. يابحذا لو قلنا ما ممكن تسافر.. ومقطع محدد..
لكن ح استعين بالمشهد بتاعك دهـ ..
..
بعدين تصدق أنو لمن كنت صغير .. كنت ( نباتي ) لحدي قريب المتوسطة..
ولمن جيت هنــا مع حمى الشوق لي لحمة مــلاح الرجلــة وعدم وجود البدائل المناسبة ندمت أني كنت نباتي..
| |
|
|
|
|
|
|
|
|
|
Re: .. أخترت شوفتك كل يوم .. (Re: طارق عبد اللطيف نقد)
|
العزيز ابو الطــا .. ود نقــد..
..
لا زلنا نحلم بطقوس الرجعــة .. على انغام التعددية .. وبكل الالحـان والنغمات
كيتـه.. وازا . مديح ..طار .....
يقيني ستسعنا الامكنة هنــاك ..
بعد أن ضاقت بنــاحتى احلامنــا هنــا..
على أمل ان نرسل كل امانينا من هنــاك ..
ومبروك تاني البنية ( اللــون)
| |
|
|
|
|
|
|
|
|
|
Re: .. أخترت شوفتك كل يوم .. (Re: نهال كرار)
|
تمبس..
( حين يسمع أهالي " قعر الحجر " هدير المياه يعرفون أن خور " كلبي " قد أعلن حضوره ، قد يأتي مبكرا وقد يتأخر لذا دائما ما تتمايز به فصول الخريف إن السحابات التي تبكي علي تلك الجبال قد تتمانع أحيانا وقد تهرب ، خور " كلبي " ينتزع الأرض التي يمر فيها فيقسم الجزء الغربي من المدينة ، يقسم بين حي " الملكية " وحي " الرديف " ويتعذر تماما أن تصل من حي " البانجديد " إلي حي " الموظفين " ومن حي" السوق "إلي حي " الملكية " يطوق خور " كلبي " الجزء الغربي من المدينة منسربا عبر سهول)...
....
فعلا يا تمبس..
ما بلدا نفارقها..
وانت كدا طواااااالى..
تحرك فينا المتوهج المدفون بفعل عوامل الغربة؟!
| |
|
|
|
|
|
|
|
|
|
Re: .. أخترت شوفتك كل يوم .. (Re: nour tawir)
|
نهــال كرار ..
يامليــون سلام .. وأنت تشاركينا متعة الامكنة..
استاذة نور ..
النص المرفق .. تداخل ما بين أزمان هنا وهناك.. وذكرى عزيزة على نفسي .. تداخل ما بين ماضى تركته خلفي وذكرى لصديق دراسة حميم عزيز إلى قلبي اتمنى ان التقيه في زحمة هذه الغربة بالرغم من قناعتي الكاملة عن استحالة تحقيق هذه الامنية..
صديقي هذا كان يخبرني عن الكثير عن الامكنة وشوقه لهــا حتى وهو داخل الوطن وابتعادهـ بمسافات قصيرة وبالامكان ملامسة كل تفاصيله .. يحدثني عن الامكنة وعن خريف الامكنة وكل ما صوره يحى فضل الله بخيال وقلم بـــارع ..
ذكرى ايضا عشتها هنا بعد أن عادني هذا النص الذي احتفظ به من سنين..
عند رجوعي إلى هذه الذكريات اذكر نفسي .. دي ما بلد نحن نفارقه..
وتظل نحمل بداخنــا هذا الاحساس المتوهج .. كلما امتدت غربتنا وكلما ارتحلنا من ميناء إلى مطار ..
لكن حتما سنعود..
رد الله غربتك .. وغربتنا
| |
|
|
|
|
|
|
|
|
|
Re: .. أخترت شوفتك كل يوم .. (Re: نهال كرار)
|
شـبال مني لكـل واحـد فيـكم ...
وأنـا يامصطـفي ماشية البلـد..
اتمسح بطـينها.... وأحـوم في زراعتها... وأللقط الدفيق وأقطـع الشمار..
وأنزل كـرعيني في النيل أفرح سـاقيني بمويتو....وأركـب المركـب...
وأجـي راجـعة لبيت طين ارتاح واشرب القهـوه فيه...
وفي المغربية ....اقعـد اتونس مـع أهلي وأضـحك لامن الله يغفـر لي...
نسـمع الغـنا وفي الحـوش الكـبير نرقص ونـدي الشـبال...
وبعـداك فـوق عنقريبا مـاهل.... أرقـد تحت القمـرة والنجـوم.... يونسـوني واونسهم...
أنـا ماشية الشمالية
| |
|
|
|
|
|
|
|
|
|
Re: .. أخترت شوفتك كل يوم .. (Re: Muna Khugali)
|
منى خوجلي..
صديقي محمد الشيخ .. كلما نبتدر نقاش يحتمل تفاصيلنا الدقيقة والذكريات .. يصل بي لمحصلة نهائية أننا شعب .. ( ارشيفي ).. بمعني اننا بنقدس ادق تفاصيلنــا.. وما ممكن نتخلى عن اي دلالة صغيرة بترجعنــا لي ازمان جميلة .. ( حفنة تراب ، صفقة شجرة ، خصلة شعر ، مرق عنقريب مكسور ..إلخ )
لكن
ذاكرة الكاميرا اصعب احتمالــه خاصة عندمــا نعقد المقارنة بين وجودنــا اللحظي وما وثقناهـ هناك في لحظات جميلة ..
احتفظ بالعديد من الصور في الذاكرهـ .. والعديد من القصاصات تحت المخــدهـ ولا احتمل فكرة أن تبعد عني هذه الاشياء .. لانها دائما تعيد ترتيبي وتخفف من حرارة الفقد..
شبالك وصل هنــا يامنى ..
فقط تبقت بعض التفاصيل .. كوني علي الوعد بيها..
| |
|
|
|
|
|
|
|
|
|
Re: .. أخترت شوفتك كل يوم .. (Re: tmbis)
|
Quote: د. مصطفى محمود..
Quote: i do not know what to say the song is fantastic the photos made me cry
..
رد الله غربتك ..
حتى بعد دراستي الثانوية .. كنت عندما أعبر ( كبري أمدرمان ) صوب الخرطوم.. احس بغربة دخيله .. ووحشة تلازمني كلما ابتعدت خطواتي .. وتركت أمدرمان خلفي ..
تعود روحي .. عند العودة ..
ما كنت اعرف ... للغربة طريق
اتذكر..
أول تجربة للسفر نهاية الثمانينات وأنا أودع أحد أخواني .. بكيت بحرقة وكنت اظن أن العالم سينتهي هنــا
ما عاد من ودعت .. ولم التقيه حتى الآن .. بيننا نبرات الصوت تحملها رسل التقنية.. وبعض الاسى وحنين إلى ادق التفاصيل..
في مطار الخرطوم..
لازمتني غيبوبة أخرى .. لم أفق منها حتى الآن .. وما زلت اذكر كلمات .. ( امي ) وانا اعبر الخط الفاصل بيني وبينهم.. لحقت بي .. عند البوابة الزجاجية طبعت قبلتها على ( قلبي ) مودعـه
وقالت في ثبــات لحظي مصطنع:
( كان شفتك والا ما لقيتني .. عافية وراضية عنك ).. |
تمبس .. لم أعرف شوفتك (بكسر التاء أم بفتحها) يعني لو الأخيرة .. كتر خيرك وبارك الله فيك فقد ساعدتني بوضع صورتي في (الركن اليماني الأعلى) وساعدت نفسك بأنو تشوفني كل يوم ولا تحتاج شوفتي تسرقه ولا حاجة ..
تعرف يا تمبس ..الاعزاء الذين نفارقهم ولا نلتقيهم مرة ثانية .. يفرقنا السفر أو الموت .. تظل هذه اللحظة في القلب نقشا على حجر .. النظرة الأخيرة مثل السطر الذي يبقى بلا نقطة في نهايته .. عبارة لم تكتمل .. وما أقسى الثبات الذي نصطنعه لنقول وداعاً لمن نحب.. على أمل أن نلتقي وربما لن
| |
|
|
|
|
|
|
|
|
|
Re: .. أخترت شوفتك كل يوم .. (Re: Mohamed Abdelgaleel)
|
الأخ العزيز / تامبا ...
أنت جيت الرياض ولا لسع بي هناك ... عندي ليك حاجات تجنن ... وبعدين ياخي وينو غنا الرشيد ...
Quote: في مطار الخرطوم..
لازمتني غيبوبة أخرى .. لم أفق منها حتى الآن .. وما زلت اذكر كلمات .. ( امي ) وانا اعبر الخط الفاصل بيني وبينهم.. لحقت بي .. عند البوابة الزجاجية طبعت قبلتها على ( قلبي ) مودعـه
وقالت في ثبــات لحظي مصطنع:
( كان شفتك والا ما لقيتني .. عافية وراضية عنك ).. |
ملعون أبو الغربه التي تفرقنا عن أصدق من نحب ... تخيل يا تامبا الوالده كانت معانا هنا وسافرت قبل شهرين وحسع الشوق ليها قاتلني ... أعانك الله أخي وأتمنى أن تلتقيها وتختضنك يا علاء وهي تجرتقك بالعديل والزين .. وتصر أن تكون أول من تضع لك الحنه كما فعلت والدتي .. كان موقفاً يا تامبا لم أجد له رداً سوى الدموع ....
عايزك ضروري ... سمح ...
| |
|
|
|
|
|
|
|
|
|
Re: .. أخترت شوفتك كل يوم .. (Re: إدريس محمد إبراهيم)
|
استاذنا إدريس محمد إبراهيم
الراسم بالكلمات..
تحياتي
..
انا موزع بين هنــا وهناك .. ذهاب واياب ..
بالنسبة لي أعمال الرشيد والواثق قيد التنفيذ .. فقط اعاني مشكلة في مساحة الزمن والجلوس امام الكمبيوتر ..
| Quote: تخيل يا تامبا الوالده كانت معانا هنا وسافرت قبل شهرين وحسع الشوق ليها قاتلني |
ياخي نحن من السعيدين جدا باشواقنا دي .. وانت سعيد اكتر انك على الاقل بليت شوقك قبال فترة بسيطة .. اتمنى ان تعود يااستاذ مصحوبة بكل السلامة وما احوجنــا لمثل هذه اللحظات..
اشكرك من كل قلبي لامانيك السعيدة لي .. ودعواتك الصادقة
ويبقى بينا الوعد أن التقيك في اقرب فرصة
الف شكر ياستاذ..
| |
|
|
|
|
|
|
|
|
|
Re: .. أخترت شوفتك كل يوم .. (Re: Mohamed Abdelgaleel)
|
العزيز محمد عبد الجليل ..
وبالمناسبة .. ( كدا عليك واحد ).. لانو توقعاتي في مكان تاني اثبتها عمليا والدليل لو تسرق النظر يمينك .. وده مكسب كبير جدا.
| Quote: تعرف يا تمبس ..الاعزاء الذين نفارقهم ولا نلتقيهم مرة ثانية .. يفرقنا السفر أو الموت .. تظل هذه اللحظة في القلب نقشا على حجر |
| Quote: النظرة الأخيرة مثل السطر الذي يبقى بلا نقطة في نهايته .. عبارة لم تكتمل .. وما أقسى الثبات الذي نصطنعه لنقول وداعاً لمن نحب.. على أمل أن نلتقي وربما لن |
نعم با بوحميد
النظرة الاخيرة كأنما فتحنا صفحة بيضاء ووضعنا عليها نقطة حالكة السواد تظل تحتل المساحة الخالية وننظرهـ من كل الزوايــا..
احيانا:
استغرب كثير في اصحاب بعض الديانات الأخرى عندما يلقون نظرتهم الأخيرة مودعين موتاهم دون غطاء واستغرب اكثر كيف يحتملون هذا الفقد وهذا الوداع؟؟ أعود وأجد لهم العذر في كل ثانية يتاملون فيها ما كان بينهم يضج بكامل تفاصيله وهذا السكون الذي يرونـه.
تظل الفكرة قائمة ، لتجربة شخصية مع صديقة طفولة ومهد .. وبالرغم من سنين عمري تكاد تعد باصابع اليد الواحدهـ إلا أن تداعيات الفكرة والسيناريو ما زال يحتل مساحة كبيرة في الذاكرهـ ووخزة لحظية تنعش الذاكرة اعاني منها حتى الآن مجرد ذكر الاسم أو حتى قراءة الأحرف الأولى منه..
| |
|
|
|
|
|
|
|
|
|
Re: .. أخترت شوفتك كل يوم .. (Re: tmbis)
|
| Quote: استغرب كثير في اصحاب بعض الديانات الأخرى عندما يلقون نظرتهم الأخيرة مودعين موتاهم دون غطاء واستغرب اكثر كيف يحتملون هذا الفقد وهذا الوداع؟؟ أعود وأجد لهم العذر في كل ثانية يتاملون فيها ما كان بينهم يضج بكامل تفاصيله وهذا السكون الذي يرونـه. |
تعرف يا تمبس ارى الأمر سيان لو بغطاء أو بدون .. أن تفارق عزيزاً إلى الأبد .. أن تراه لآخر مرة .. خاصة عندما تكون قد واعدته لتلتقوا وتتحدثوا في أمور الحياة .. ولم تكن تفكر بالموت .. فيذهب وهنالك كلمة معلقة .. تظل تحشرج فيك طوال عمرك حتى تقابله يوم الحشر وتكمل معاهو أو يفزعك هولك ذلك اليوم .. المبدعون يعبرون فينفسوا قليلاً .. نزار قباني عندما فقد إبنه الذي كان يدرس الطب في بريطانيا (السنة الثالثة) .. أحزنه كثيرا وكتب عنه كثيرا .. ومن ضمن ما كتب قال له : (أن أختك قد وضعت إبناء وسمته عليك .. كأنها لفرط شوقها إليك حملت بك) أحسن ما عرفته في مثل هذه الأمور العاطفية الشائكة .. أن الاعزاء يموتون .. تموت أجسادهم ولكن هنالك شيء مهم منهم يبقى فينا ومعزتنا وحبنا لهم يظل فينا .. وكل إلهاماتهم لنا تظل فينا تدفعنا تحفزنا وتاءات كثر ..
| Quote: تظل الفكرة قائمة ، لتجربة شخصية مع صديقة طفولة ومهد .. وبالرغم من سنين عمري تكاد تعد باصابع اليد الواحدهـ إلا أن تداعيات الفكرة والسيناريو ما زال يحتل مساحة كبيرة في الذاكرهـ ووخزة لحظية تنعش الذاكرة اعاني منها حتى الآن مجرد ذكر الاسم أو حتى قراءة الأحرف الأولى منه.. |
أما هذه فذكرتي بعمنا البشير الذي قال أن التي يفكر بها لم يراها أبداً .. ترقد هكذا في عقله وقلبة .. ذكاءاً وشكلاً .. وظل ينتظرها حتى إذا ما بلغ الـ سبعين .. جاءت .. ليس حلماً.. بل بالشكل والمضمون اللذان في قلبه وعقله .. لقد جاءت متأخرة جداً يا تمبس .. إنتا سعيد .. فهي مازالت تلهب الخيال .. بإندهاش الأربع سنين .. (تجربة وزاد).
الأخت منى خوجلي .. ذكرت لها أني أجهل تقنيات إنزال الصور .. فأرسلتهالي بالمسنجر .. فقلت لها والله تمبس لو عرف بفتكر أني تجاوزته للإستعانة بالخبرات الأجنبية .. ويمكن يزعل مني .. عشان كده قلت أحسن أوريك قبل ما تعرف .. والأدهى والأمر أني متين ما أجي أنزل صور بناتي وأولادي حا أضرب ليك .. مش لجهلي بإستخدام المعلومات التي زودتني بها .. ولكن لبلاهة تعتريني متى ما دنوت من الـ New Techs
| |
|
|
|
|
|
|
|
|
|
Re: .. أخترت شوفتك كل يوم .. (Re: tmbis)
|
يا تمبس كيفنك
غايتو اغنية ود البركل دي اتقطعتة فيها
والله خليتني ارقص براي في البيت وانطط
غايتو من شدة بطني ما فارت ان بقيت لاقيتك بعضيك في نص راسك
| |
|
|
|
|
|
|
|
|
 Re: .. أخترت شوفتك كل يوم .. (Re: طارق جبريل)
|
يا طــارق جبريل ..
أخبارك شنو؟
| Quote: والله خليتني ارقص براي في البيت وانطط |
طيب دهـ المطلوب زاتو ... والحمد لله وقفت على النطيط بس
تعرف:
مرة بحضر لي في حفلة بتاعت قرايبنا هنــا..كانت في كمية بتاعت زغاريد والاغنية محفزة شوية ( سيرلانكا ) وكدا.. بعدين في زول في النص قام ( اتجرد) من المخيط وبقى طويل جدا ثم ( كنكش )قلت ليهم مشكلتو شنو؟ قال والله كان ما اتجلد من هنــا ما بطلع يا يفرتق الحفلة دي.. المهم في النهاية لمو فيهو بي ( الوصلة ) بتاعت المايك حتين استغفر وطلع
فما تقوم مع النطيط دا تجيب ليك خيارات تانية..
| Quote: غايتو من شدة بطني ما فارت ان بقيت لاقيتك بعضيك في نص راسك |
غايتو كان عضيت أنــا برضو بعضي ودي فرصة زاتو نلقى لينا فيك عضــه والواحد يجرب ( الطقم الجديد )
| |
|
|
|
|
|
|
|
|
|
تمبس (Re: tmbis)
|
الاخ تمبس
دوما تاتي بالروائع
زقاق تحت تحت مشتاقين
| |
|
|
|
|
|
|
|
|
|
Re: تمبس (Re: ALMURADABI)
|
الاخ تمبس
تذكرت مرة كنت استمع الى عماد احمد الطيب و هو يغنى:
يا جارة يا جارة
لا طلة من السور لا تغرفى زيارة
فقالت احدى القريبات "لا حولة و لا قوة الا بالله, طيب ما تمشى تخطبها يا ولدى بدل دة"
فضحكت عندما سمعت الاغنية...
و على قول قريبتى
بدل ما تسرق شوفتها
امشى عديييييييل كدة اخطبها
تحياتى
غادة
| |
|
|
|
|
|
|
|
|
|
Re: تمبس (Re: غادة عبدالعزيز خالد)
|
مصـطـفي وياشـباب ماتبكـوا...أنا برضـو عـايزة أمشي أسـه دي البـلـد..
أقـعد وأقيـل وسط الزراعة زي الزولةالمبسـوطة القـاعـدة دي...
واحـلالي بالزراعة والطـين والنيل!
| |
|
|
|
|
|
|
|
|
|
Re: تمبس (Re: Muna Khugali)
|
أختي / منى ....
وقت صاحب البوست فتحوا واختفى خلينا نمسك الجوّ وكمان نتجرأ ونرد على الناس .. وما عليكم الراجل ده فرده شديد ...
Quote: مصـطـفي وياشـباب ماتبكـوا...أنا برضـو عـايزة أمشي أسـه دي البـلـد..
أقـعد وأقيـل وسط الزراعة زي الزولةالمبسـوطة القـاعـدة دي...
واحـلالي بالزراعة والطـين والنيل! |
في آخر زياره لي للبلد أذكر إني سافرت بسيارة خاصة .. وتخيلوا الروعه .. إي مكان يعبجك تقيف وتقيّل فيهو كمان ...
ياالله عندما وصلنا القريه وجدنا أنفسنا في غابة من النخيل مثل هذه الصوره ويمتد الطريق وسط المراعي الخضراء وتلوح على الأفق من تحمل عشا البهايم ومن ينظف بالمنجل الحشائش من الزراعه .. وبعض الماشيه ترعى هنا وهناك ذلك وسط جداول الماء الرقراقة ... قلت لابن عمي والله يا عثمان لو أحد سكان الخليج وجد نفسه هنا فجأة لأقسم بالله أنه قد مات ومنّ الله عليه بدخول الجنه ...
وعند العوده رجعت بالباص .. وبمجرد ركوبي لفت نظري وجود الماني وألمانيه شباب في منتهى الجمال .. كان ذلك في الصباح الباكر وجلسنا ندردش .. الرجل أستاذ لغة ألمانية بجامعة الخرطوم وهي تعمل بأحد الشركات الألمانية الاستثماريه بالخرطوم .. استغلا إجازة لمدة أسبوع ومسحوا المنطقة حتى تخوم حلفا .. أقسمت لي تلك الفتاه إنها تقريباً قد زارت معظم أقطار الدنيا ولم تر في حياتها بهاء وسخاء في المناظر الطبيعية الرائعة كما وجدته في هذه الرحله .. كانت تكلمنى وهي تهتز من الانفعال حاملة كاميرا الفيديو خاصتها ... ما أجملك أيها الوطن الرائع .. وما أبهي مناظرك ...وطيبة أهلك .. فقط لو أبعد الله عنا شبح السلطان المتسلط .. وعملنا جميعاً لنرتقي بهذا الوطن إلي حيثما يستحق من الر فعة والسؤدد والرقيّ...
مع خالص تحياتي وتقديري ؛؛؛
| |
|
|
|
|
|
|
|
|
|
Re: تمبس (Re: إدريس محمد إبراهيم)
|
| Quote: وقت صاحب البوست فتحوا واختفى خلينا نمسك الجوّ وكمان نتجرأ ونرد على الناس . |
يا استاذ ادريس ..
ياخ ألف مراحب بيك وبي منى خوجلي ود. مصطفي
البوست ده حقكم اصلو مافي عوجــه ..
ويسعدني أنو تعبوهو لي بي شحنات الشوق المفرغه دي ..
يا منى..
كتري لينا من الخدره وصور الجروف دي الله يخدره ليك دربك
| |
|
|
|
|
|
|
|
|
|
Re: تمبس (Re: غادة عبدالعزيز خالد)
|
الأخت غــــــاده عبد العزيز
سلامات..
Quote: فقالت احدى القريبات "لا حولة و لا قوة الا بالله, طيب ما تمشى تخطبها يا ولدى بدل دة"
|
| Quote: امشى عديييييييل كدة اخطبها |
يعني المسالة ساهلة كدا؟
طيب إذا كانت بعيدة شوية .. والمسالة اكتر من خطوبة .. أحتمال عرس الزين عديل
بتمشي معانا والا رايك شنو ؟
| |
|
|
|
|
|
|
|
|
|
Re: .. أخترت شوفتك كل يوم .. (Re: Adil Osman)
|
| Quote: وانا كم اشتهى شوفة مزارع الموز فى حلفاية الملوك |
عادل عثمان يادولي ..
مشتاقين والله..
..
تعرف شجر الموز دا عندي معاهو قصة عجيبــة..
كلما امشي الجنينة البلد كنت شغال كاشف ( الغــام ) لما الموز يستوي في السبيطة في الشجرة الأم بتكون ريحتو فواحـه جدا .. كنت بدخل في الممرات الزي الفي الصورة دي وبرفع ( النخــره ) فوق خالص.. ولما القط لي إي اشارة ريحة بدخل جــوه الشجر بلقى الموز المستوي ( مشقوق ) وبقوم باجراء اللازم وبنتهي ليك من اي حاجة فيها ريحة
لكن كنت كلما ارجع الخرطوم .. بعمل تجديد لي كل الملابس الكنت بتستعمله ..لانو موية الموز عامله زي الختــم .. وما بتطلع من الملابس بسهولة..
بلاي الحلفايا فيها موز ياعـــادل؟؟
| |
|
|
|
|
|
|
|
|
|
Re: .. أخترت شوفتك كل يوم .. (Re: الجندرية)
|
| Quote: أنا يا تنبس كل ما ابراك، بنقع شوق! |
يا سمســـم..
نفتح ليك طاقة الشوق الخفيف خالص .. محلات تقيل أعملي ما مشتاقة
..
أماني
Quote: يا علاء تجي نعمل عصابة
ولا اجدع رباطية ونسرق شوفة العايزنو |
انا ما عندي اي مــانع .. كدي نبتدي بي جيرانا القراب
| |
|
|
|
|
|
|
|
|
|
Re: .. أخترت شوفتك كل يوم .. (Re: Shams eldin Alsanosi)
|
يا تمبس
اشهد ان ده اجمل تصميم لرقصة الشايقية شهدو تاريخ التصميم للفنون الشعبيةالسودانية
واشهد انه دى اجمل راقصة لرقصة الشايقية على المسرح..
أحى حضورها المكثف..وتفاعلها الساخن مع بقية الراقصين ومع الحمهور ومع الفنان..واكثر طبعا مع الايقاع..
توازن تام وانسجام ..ما بعدو..
الامضاء:
"خبير أجنبى"
| |
|
|
|
|
|
|
|
|
|
Re: .. أخترت شوفتك كل يوم .. (Re: Tumadir)
|
Quote: واشهد انه دى اجمل راقصة لرقصة الشايقية على المسرح..
أحى حضورها المكثف..وتفاعلها الساخن مع بقية الراقصين ومع الحمهور ومع الفنان..واكثر طبعا مع الايقاع..
توازن تام وانسجام ..ما بعدو.. |
يا تماضـــر:
تعرفي هبشتي مكان حساس جــدا كنت منتظر ومتوقع أنو يعلق عليهو اي حد .. ملاحظتك فعلا ملاحظة خبير اجنبي..
بتظهر في العمل الراقصة .. ( جوليــا) إذا ما خانتني الذاكرة .. بتذكر نفس رشــاقت الخطوات وإجادة العمل ..
وبالمناسبة ( جوليا) من بقية افضل فرقة فنون شعبية مرت على تاريخ الفنون الشعبية .. زمن سلوى كسلا ، ( وبنات مناديلو منى وناهد ) بالاضافة لي جميلة وداعــة + وشطــة.
كانت بتلعب ( جوليا ) دور ( الجوكر ) لإجادته كل رقصات مختلف القبائل بمهنية عاليه جدا ورشاقة وانسجــام.. اختفت جوليا من فترة طويلة .. واطنها عادت من جديد .. اتمنى ان تكون هي نفس الجوليا .. واتمنى انها تكون بكل خير..
| |
|
|
|
|
|
|
|
|
|
Re: .. أخترت شوفتك كل يوم .. (Re: Shams eldin Alsanosi)
|
| Quote: كده ما مرااق روح ... |
يانوبـــي...
ما ده المجننا زاتو .. بعدين الموت مع الجماعــه قالو عرس ..
غايتو مابنسمع ونشحتف روحنــا برانا
..
شمس الدين العزيز
..
والله انت تستاهل كل خير ..
نص يحى فضل الله دهـ .. معاي ليهو سنين طويلة جدا وعزيز جدا علي وسبق اني نزلتو هنــا في البورد قبل سنين .. وقبل فترة كان في احتفال في الرياض هنــا . عملت تسجيل لي الكمبلا من اداء ابناء جبال النوبة وكنت سعيد بيهو جدا ومتلهف متين اصل البيت علشان احضرو بي مزاج .. واجي انزلو هنا في البورد
لما وصلت لقيت في مشكلة كانت في ضبط الكاميرا وللاسف الشديد التسجيل طلع من غير صــوت.
دعواتي ليك ترجع وتشوفه هناك في المكان الطبيعي ليها بي لونه ونكهته الطبيعية..
شكرا يا شمس الدين.. وتسعدني متابعتك
| |
|
|
|
|
|
|
|
|
|
Re: .. أخترت شوفتك كل يوم .. (Re: tmbis)
|
العزيز تمبس كيفنك
| Quote: غايتو كان عضيت أنــا برضو بعضي ودي فرصة زاتو نلقى لينا فيك عضــه والواحد يجرب ( الطقم الجديد ) |
دي اتجليت فيها عديل
لكن انت كان عارف العلي كان عذرتني
اخوك مصنقر هنا في المغرب وحاتل ليهو سنين
وكمان تقوم تنزل لينا اغنية شايقية
وكمان لي ود البركل وانا من البركل
أها بعد دا كلو ما عايزني اعضيك في نص عنقرتك
| |
|
|
|
|
|
|
|
|
|
Re: .. أخترت شوفتك كل يوم .. (Re: طارق جبريل)
|
| Quote: تمبس لكن الجقلبه ما عندك |
ياحســــام .
والله دي حالته اخف جقلبــه لاقتني ..
في نوع جقلبه كدا الواحد بيموت بيها براهــو .. وما بيطلعه برهـ
وبيني بينك:
مرات الواحد بيحتاج ليها على الاقل بيقيس بيها نفسياتو وصلت وين
وهو حي والا لســه .. نحن طبعا من حزب حافظ على حاجاتك وما تغيره بالساهل
حتى ولو تجقلب
| |
|
|
|
|
|
|
|
|
|
Re: .. أخترت شوفتك كل يوم .. (Re: طارق جبريل)
|
اللطيف طــارق جبريل
| Quote: دي اتجليت فيها عديل |
يعني عضت المرة الفاتت نفعت مش كــدا
Quote: لكن انت كان عارف العلي كان عذرتني
اخوك مصنقر هنا في المغرب وحاتل ليهو سنين |
يازول ولا يهمك .. كلنافي الهم غربــة..
وحات خوتك كان بمراضي كل يوم اجدع ليك اغنية لي ودالبركل طالما بتدخلك الفورمــة ..
واخوك ( عنقرتو ) سدادهـ..
| |
|
|
|
|
|
|
|
|
 Re: .. أخترت شوفتك كل يوم .. (Re: tmbis)
|
الأخ العزيز / تامبا ...
| Quote: بالنسبة لي أعمال الرشيد والواثق قيد التنفيذ .. فقط اعاني مشكلة في مساحة الزمن والجلوس امام الكمبيوتر .. |
الرجاء مراجعة بوست الأخت / ناديه عثمان .. يوميات إمرأة عاشقة .. حيث هناك طلب عاجل لهذا الأمر .. وطبعاً ناديه طلباتها أوامر ... مش ؟
| |
|
|
|
|
|
|
|
|
|
Re: .. أخترت شوفتك كل يوم .. (Re: Tumadir)
|
تماضر ..
فعلا هي جوليا.. الرشيقة النضيرة .. رغم قساوة الزمن
احد الاصدقاء .. اخد مني كمية من ملفات الفيديو .. وكان من ضمنها الملف المرفق .. تعرف عليها ( والد صديقنا ) من خلال حركتها في المسرح وقال ليهو بالحرف الواحد دي جوليا من افضل من مروا بفرقة الفنون الشعبية من راقصات ..
جوليا بالسهل ان نميزها حتى من خلال خطواته على الأرض دون أن ترقص .. ونستطيع ان نتحسس روحها المرحة فعند حضورها في مكان . تضيف بلمساتهاوانفاسها كل الجمال والحميمية..
| |
|
|
|
|
|
|
|
|
|
Re: .. أخترت شوفتك كل يوم .. (Re: tmbis)
|
الأخ العزيز علاء و جميع المتداخلين
اول شئ بالغتو في الإبداع ده .. بالغتو عديل كده ..
شكرا ليك يا علاء علي الإهداء و معليش علي التأخير .. بس دابي شفتو
الله يودينا للبلد و للشماليه الحبيبه
بجيكم تاني .... خلو البوست الجميل ده فوووق
| |
|
|
|
|
|
|
|
|
|
Re: .. أخترت شوفتك كل يوم .. (Re: محمد الامين احمد)
|
يا محمد الأمين
عندنــا شروط طارحنها .. ومستعدين نشيل ليها سلاح عديل كــده
شفت الـ الحركة بتاعت ( /هــا ) دي
عايزين ينظرو لينا في أمرهــا.. لانها عامله لينا خلل من بدري جدا وساكتين عليها..
حتين بعداك .. بنرجع للمفاوضات السلمية .. وننظر بعين الأعتبار للتهديدات المستمرة دي..
وكلامي دهـ واضح لي أي واحد/ هـ
| |
|
|
|
|
|
|
| |
tmbis
ajaj
saadeldin abdelrahman
شرووم
ملكة سبأ
PLAYER
حمد فتح الرحمن
Soumeta
Mustafa Mahmoud
معتصم دفع الله
Muna Khugali
مهاجر
Rasha Hatim
نصار
عمر الفاروق
طارق عبد اللطيف نقد
nour tawir
Mohamed Abdelgaleel
إدريس محمد إبراهيم
طارق جبريل
ALMURADABI
غادة عبدالعزيز خالد
الجندرية
Adil Osman
فيصل نوبي
Shams eldin Alsanosi
Tumadir
mohamed elshiekh
حسام يوسف
Sakotaweya
محمد الامين احمد
فيس بوك
تويتر
انستقرام
يوتيوب
بنتيريست