|
|
 وإن طال السفر ..محمد عبد الماجد الصحفي الهلالي مبااااااالغة
|
مشينا الحفلة·· لقينا ليك الأعمى شايل المكسر·
* الناس من كترتها كل اربعة بتشوفهم زول واحد·
* النفرين·· مرات تشوفهم·· ومرات يبقوا ليك رهاب·· رهاب··
* الحفلة ما كانت حفلة نصاح·
* اقول ليكم شنو انا؟
* فاصل لي كرنقو·
* وفاصل لي مهند الطاهر
* يا جماعة كلكم بترقصوا·· بس بالنظام·
* تقوم من كرسيك·· تبشر·· تلقى ليك زول قعد فيه·
* طوالي تقومه·
* لكن بطريقة ظريفة·· قول ليه انت ما باركت للعريس·
* يبارك ليه وين مع الخلق دي!!
* هو المسكين يقوم عشان يبارك·
* انت بطريقة ظريفة تقعد في كرسيك·
* خمس سنين بالطريقة دي·
* الكرسي نقوم منه للمجاملة فقط ونرجع ليه تاني·
* مرة بنفوتهم بي 18نقطة·
* 18نقطة دي بتكون الفرق بين اول الدوري الانجليزي والفريق النازل للدرجة الثانية·
* نحن هنا عملناها بين الاول والثاني·
* الممتاز دا اي حاجة فيه طبقناها·
* مرة اتساوينا في النقاط·
* خليناهم بتكلموا ويصرحوا·
* ساعة الجد·· شلنا كأسنا وقفلنا القزاز·
* ومرة خليناهم يفوتونا التعادل كان بشيلهم·
* جاء البلدوزر وقت كان مع الزعيم عملوا معاه ضربة جزاء·
* وجاء طمبل حسم المباراة وشال الكورة من يد شيكوزي·
* هو شال الكورة·· ونحن شلنا الكأس·
* الوقت داك اهداف هيثم طمبل كان عندها قيمة وطعم مازي هدفو الجابو اول امس·
* هدف نسخة بالكربون من هدف السعودي·
* اهداف كاذبة·
* زي الموز الكاذب·
* افط ليكم حتات·
* وادخل ليكم في الموسم الماضي·
* الدورة الاولى خليناهم يتقدموا الهلال بسبع نقاط·
* الهلال شاف الحكاية كدا·· قام طوالي استعمل الخطة ب·
* الخطة ب·· يعني الهلال جمد نشاطه·
* شغلوا ليك الناس بالتجميد·
* كمال شداد يعمل مؤتمر وصلاح ادريس يعمل مؤتمر ثاني·
* ناس المريخ صدقوا·
* اصلو ناس المريخ ديل طوالي بصدقوا الكلام·
* عليكم الله شفتوا ليكم فريق بجمد نشاطه وبمشي يعسكر في تركيا·
* دي تجميد شنو؟
* معاكم الكاميرا الخفية·
* حي العرب
* الموردة
*وحاجات كدا ما مفهومة·
* الدورة الثانية الهلال خلف المريخ خلفه بسبع نقاط·
*زي كل سنة·
* وصافة لي جنى الجنى·
* نغشكم يعني·
* الموسم دا السيناريو اختلف شوية·
* الموردة من الدورة الاولى شالت نقاطها·
* اها من داك·· الهلال حلف ما يخسر نقطة·
* تعادل بس·
* حرشوا حي العرب·· ما نفع·
* حرشوا اهلي مدني·· ما نفع·
* حرشوا الامل ·· ما نفع·
* الامل دا بالذات اقيف لي عندو·
* اعلام المريخ دا كله بقى مواليد مدينة عطبرة·
* حديثهم كله بقي بالحديد والنار·
* مساوي حسم الموضوع دا وبقينا على المريخ·
* الحكاية اتعلقت في رقبتكم·
* الناس الكانوا بحرشوا في الامل وقت مباراة القمة قربت·
* كبوا الجرسة·
* البرمجة الضاغطة
* السفر··
* السفر دا انتوا عرفتو من متين؟
* جنس جرسة
* قالوا عاوزين تحكيم اجنبي·
* تحكيم اجنبي في الوقت دا يجيبوا ليكم من وين؟
* المهم مباراة الصفاقسي اعطتهم احساس بالامل·
* قالوا الفريق البدخل باكثر من فرصة بفقد·
* الكلام دا ما تقوله للهلال·
* الهلال دا بقى فريق ما عربي·· راجع تحليلات طاهر ابو زيد·
* تجيب فيه قون بي هنا·
* تكره عيشتك·· ناس عمر بخيت بشيلوا الكورة ويلعبوها من النص·
* زي الما حصلت حاجة·
* التعادل ما بفوت ليه خمس دقائق·
* عاجل ومستعجل وضروري·
* فريق ست سنوات ما غلبتو عاوزين تغلبوه في 48ساعة·
* هي الكورة دي غيروها·
* انتوا تعالوا هنا ما قلتوا الفضيات دي حاجة كويسة·
* عندو ليكم اقتراح·· ما تضايقوا منه·
* تشيلوا فضية يوم السبت مع فضية يوم الخميس وتودوها لي صائغ رضى وقلبه كبير·
* الصائغ دا اتكلموا معاه ببدل ليكم الفضيتين ديل بي ذهبية·
* ان شاء الله ذهبية قوي·
* ما فيها حاجة·· بتحصل في ارقى العائلات·
* بصراحة كدا فضيتين في اسبوع يعملن نفسيات·
* يا حليلكم يا طمبل·· فارقت الذهب·
* بقت من فضية لي فضية·
* شفتوا ولدكم علاء الدين يوسف دا فرحان كيف بالذهب·
* ناس عمر بخيت الموضوع دا عادي عندهم لكن فييرا بصراحة كدا الموضوع جديد عليه·
* قالوا ليك علاء الدين يوسف الى الآن لابس ذهبيتو·
* فرحان شديد·
* عمر الفضة ما بتبقى ذهب·
* معليش·· سرحت شوية·
* ارجع ليكم لى الحفلة·
* اوعوا تكونوا نسيتوها·
* الكلام دا كله جانبي ساكت·· الاصل في العمود دا الحفلة·
* الفنان دخل ليكم في الرمية الاولى:
صبرك لحظة واحدة
اذنك لحظة واحدة
يا ضابط السجن
اذود بي نظرة وارجع انسجن·
* الاغنية شغالة والناس تعلق بالحد كدا كأسين يطيروا منكم في اسبوع واحد·
* لو عندكم حارس ما بتطيروا··
* شوفوا يا مريخاب والله >صبركم< دا بحسدوكم عليه·
* الوصافة دي بتستحملوها كيف؟
* الفنان دخل في المقطع الثاني:
خمس سنين طويلة
دي خمس سنين طويلة
مرت ليلة·· ليلة
ودمع الشوق هميلة
وراء الدمعة الهميلة
* الناس فهمت حاجة·
* في داعي هسع للكلام دا·· ما كانت الحفلة دي رايقة·
* الناس كلها دخلت الدارة·
* زول قاعد في كرسيه مافي·
* البلد كلها جوه·
* الرد كاسل دا لو كان فيه مظلة طائرة·· كان طارت من الفرح·
* هو الطيران طعمو شنو؟ لو ما طار في وقت زي دا·
* الفنان اتجدع دخل ليك في المقطع الاخير··
* في ناس قالوا فط ليه مقطع
طيب ونفسو طيبة
حنين وكله طيبة
فرحان بي شبابه
ما كامل وحسنو هيبة
والانظار تهابو
دي لين من صغير
زي الزهرة دابو
حبيب اللور اصابو
يصفح كتابو
ما تسمح لي اشوفو
يا ضابط السجن
والا الطبع غالب والحرمان عُلم
* ساعة قال >ما تسمح لي اشوفو<·· الناس كلها قالوا تشوفوا لكن ما بتشيلو··
* اصلو اتضح انكم ناس شوف ساكت·
* شوف بس·
* الكأس شالوه ناس هيثم مصطفى·
*في جماعة كدا جنهم بفرتكوا الحفلات·
* اهل العريس قعدوا معاهم وقالوا ليهم اقعدوا ساكت·· بنديكم فضيات·
* انتوا الفضيات دي براكم ما فرحتوا بيها·
* وقت عاجباكم كدا·· كل سنة بنديكم ليها·
* وللمعلومية كمان عندكم فضيات تاني في كأس السودان·
* ملحوظة: الفضيات دي ساعدوها بالطابق الثاني·
هوامش
* المعز محجوب الظاهر عليه قرر يشيل حافز تسجيله من الرد كاسل·
* مسك ليك في العرضات والشباك تقول حقت ابوه·
* فرحان جنس فرح·
* حالتو دي ما دفعوا ليه قروشه·
* طمبل الدفعتوا ليه مليار عمل شنو؟
* ومجاهد·
* والبلدوزر·
* برضو لن يصرف لك غير الفضية·
* ست سنوات والمريخ لم يحقق انتصارا على الهلال·
* يعني كلية الطب قافلة·
* كلية الطب دي عاوزين نطبقها في التوالي السادس·
* من هسع عاوزين نبدأ للقب السادس·
* ناس صالح عبد الله وافيانو كلموهم وافتحوا ليهم اضنينهم·
* كرنقو دا الحضري خرب طبعه·
* القون بقى يرجع ليه ورا ويصوب·
* بهاء الدين دا ذنبو شنو؟
* هدفك دا ما هدف نصاح·
* هدف ما بتشاف·· بتسمع بيه ساكت·
* الهدف دا بقولوا عليه هدف سمع ساكت·
* ما في زول شافو
* في الاعادة ما واضح·
* الهداف السري حسن اسحق كرنقو·
* الناس الكانوا قاعدين خلف المرمى كلموهم يعملوا ليهم كرامة·
* قسموا ليكم >بليلة<·
* مهند الطاهر دا خلوه·
* انا عارف قصدو الهوبة ما قصدو الهدف·
* عجبتو النجيلة ساكت قال بتقلب فيها هوبة·
* طبعا مهند دا ما بتقلب ليه هوبة ساكت·· لازم قبل الهوبة يجيب ليه هدف·
* بعد صاروخ ريتشارد ومهند وكرنقو وصواريخ قودوين·· اقترح ان يلتحق بهاء الدين بدورة تدريبية مع مجموعة فدائية مقاتلة·
* شوف ليك طريقة قبل مباراة كأس السودان·
* في البرد دا الجابرك على حراسة المرمى شنو؟
* قلق عندو فكرة ما بطالة في حراسة المرمى·
* جربوه يمكن يكون احسن·
* على الاقل ترتاحو منه في نص الملعب·
* خبر عاجل: الهلال هزم الاهلي بـ>الارهاب< وهزم المريخ بـ>الكباب<·
|
|
 
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: gamal)
|
يا ود الفاروق ،، شوف خالد عزالدين فى جريدة الكابتن بقول شنو
بعد ان كان اسهل قرار لوزراء المالية في عهد مايو هو تخفيض الجنيه السودان ي في مقابل الدولار اتذكر ان احد الاقتصاديين قال مقولة جميلة وهو ينتقد هذه السياسة فذكر ان المريض لو استعمل الدواء اكثر من مرة ولم
يشفي فإن الطبيب يستبدل له الدواء.. وعليه فإن هذا الاقتصادي طالب وزير المالية في ذلك الوقت ان يستبدل دواء الجنيه السوداني المريض ولا يستمر في سياسة تخفيضه!
وهناك فلسفة معروفة في الحياة تنادي بعكس الاشياء اذا لم تستمر معك .. وهو امر معروف ايضا في العاب الورق بعكس الجرّه!
ومن هذه النظرية فإنني اقدم نصيحة لابناء عمومتنا في المريخ ان يبدلوا الدواء وينسو حكاية تخفيض الجنيه دي ويعكسو الجرّه ..! طالما ان السياسة الرياضية لديهم وخلال خمس سنوات لم تؤتِ اُكلها فمن غير المقبول ان تستمر نفس السياسة!
اول عكسة تكون في الطابق الثاني .. بدل ما تبنو الطابق الثاني فوق حاولوا اعملو طابق ارضي (اندر قراوند) خصوصا وان ارض المريخ مساعدة علي ذلك!
طابقين كده تحت الواطه .. اي هزيمة الجماعة طوالي علي الارضي!
الموسم الجاي العبو بدون محترفين اجانب ولا مجنسين .. كلو يرجع اهلو .. ايداهو يسوق ايفوسا علي نيجيريا واليجا يعكس اتجاهو مع ابالو كلو واحد في طيارة ! وباولينو تذكرتو مفتوحة عايز يمشي البرازيل يمشي عايز يرجع اوربا الله معاهو!
ما في تسجيل مشاطيب من الهلال .. محمد آدم من هسه يطلع من غرفة التسجيلات وطمبل ومجاهد وعلاء الدين بابكر ديل يتوزعو علي اندية صديقة!
وحكاية الفسخ والطبخ دي ما معانا .. بدل عمر بخيت تسجلو بخيت التاج! وبدل فسخ عقد المعز تفسخوا عقد بهاء الدين!
فسخاني وبحب الفاكهة !! العنب العنب العنب .. احمر.. واصفر !!
التسجيلات بالدين او شيكات او اتوس وما يكون جديد .. فقيري عدلان يا بعيد!!
الحوافز ذاتها تكون نهاية الموسم .. الكاش ده اصلو ما يظهر من اول يوم في الموسم الجديد لحدي المباراة النهائية .. نشوف الكاس في الدولاب تشوفوا الكاش في الجيب .. ده الشرط الاساسي .. واوعه تشطبوا لاعب تدوهو حافز .. اللاعب المشطوب تدهو طوب! في زول شطب لاعب اداهو! ما دي الطريقة البتضيع الاقوان من ايداهو !!
لاعب المريخ مرات كده بقول اخير اضيع الاقوان واطلع بحافز شطب احتمال يكون اكبر من حافز البطولة!
ومافي سفر بالطيارة .. السفر كلو بالبر .. بورتسودان زي مدني وجده زي امبده .. بحر وبر بس .. الميناء البري ده مالو عيبو لي!
ونثريات سفر مافي .. ما كفاية السفر ذاتو ..
وكفاية لف ودوائر .. الغاء دائرة الكرة .. الغاء غرفة التسجيلات .. الغاء منصب رئيس القطاع الرياضي .. الغاء منصب مدير دائرة الكرة .. الغاء منصب مساعد المدرب .. مساعد مدرب! ما عايزين مدرب ذاتو .! ما جبتو خمسين مدرب النتيجة شنو؟ الموسم ده لاعبين بدون مدرب!
ومافي لجنة تسجيلات .. لجنة تسجيلات لي شنو؟ لا عندنا قروش بالشوال ولا عندنا لاعب عايزين ندسو ..
والاحتفالات بداية الموسم .. اوعه من الاحتفالات والتصريحات .. ونحن قادمون من اجل اعادة البسمة لجماهير المريخ واسألوني عن هز شباك الهلال ورفضت الاهلي المصري من اجل عيون المريخ ولن اوقع للهلال ولو وزنوني ذهبا !! ذهبا ! لا فضة!!
اعكسها طوالي يا والي لا اقطاب ولا نهضة ولا مجلس استشاري!
والغوا مكتب الارشيف بتاعكم ده .. ما عايزين حكاية افتحو ملف اقفلوا ملف .. عايزين ملف واحد يكون مفتوح طوالي .. وريهم العين الحمراء يا والي!
وما في مجاملة للاتحاد العام والقصة تبدأ بي مشكلة مع شداد ومعتصم جعفر يرجع قروش علاء الدين يوسف وعايزين يعملو احتفالات ولا علاقات مع الاتحاد الافريقي يعملوها في استاد الهلال ! ومباريات المريخ ما تنقلها النيل الازرق اصلها (نحس) النقل التلفزيوني كلو من قناة الشروق وقناة الشروق ذاتها ما تنقل الا الشعار الدهبي ده يتعمل فضي ! فضي وبحب الفضة .. الدهب الدهب الدهب!
و104 دي عملت لينا فلقة .. المريخ مغلوب وناقلين عودة البعثة علي الهواء .. ده الكلام البجيب الهوا .. فريق ما جاب كاس .. الضجة في شنو يا ناس؟
وزول يصفق للرئيس وهو داخل مافي وزول يودعو وهو طالع مافي .. وفروا الصفقة دي للدوري الممتاز .. وكترت الوداع دي ياها ذاتها الخلتكم تودعوا البطولات!
وانت ذاتك يا جمال ما تكتر الطله .. الحوارات التلفزيونية دي كمان قللها شوية .. والمناسبات الاجتماعية خليها مرة مرتين في الموسم .. والوزراء الكتار في اي كورة ديل ما جاك منهم خير! بدل صاحبك داك جيب الجيلي عبد الخير!
وصديق علي صالح .. ايوه صديق ده بالذات يرجع الامارات .. وابراهومة الفرحان ده اول زول طالع يلبس الميدالية الفضية قايل روحو كابتن ولا شنو .. ودحية .. ياخي كمال دحية من دخل الاستاد ما طلع منو ولا دخل فيهو كاس! ومصطفي توفيق .. خلي يمشي يمكن نشوف توفيق .. واوعه تقول لي نرجع ابوجريشة ولا نتفاوض مع جمال ابوعنجة ولا نجيب جمال الكيماوي .. القصة دي جربناها كتير ! اعكس طوالي يا والي..
والنفرات والعربات والرقم وصل مليون طوبة دي تاني ما في .. وبرشلونه والانتر وكاظم الساهر وسهر الجداد ده ما عايزنو .. الممتاز ما بجي كده والله لو الكاس ماشي عليكم وسمع برشلونه دي يرجع..
خلي الامور بسيطة وجرب العكسة دي .. لكن كان ما نجحت والهلال تاني شال الممتاز السادس .. انا آسف مضطر اقول ليك .. الحل في الحل!!
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: Ashraf el-Halabi)
|
عمر الفاروق ...,
سلام بعظمة الهلال العشق الابدي..
ادري انك سهواً لم تشر الى ان هذا المقال منقول حرفيا من صحيفة قوون (اقول هذا لاعطاء كل ذي حق حقه)
كما احب ان اؤكد ان محمد عبد الماجد الصحفي الشاب ومنذ ان ولج بقدمه بساااط صاحبة الجلالة اثبت
للجميع انه ملك الكلمة السلسلة بلا منازع..مفردة انيقة ..خفيفة ومرحة..وعميقة.
اها يا ود عبد الماجد اديناك حقك ومعاهو حبة بكش كماااان ..
اظهر وبان عليك الامااااان..
تحياتي يا عمر
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: عمر الفاروق)
|
كل الحضور المستمتعين ..
تحياتي لكم ومشكورين على الإضافات وخصوصاً ما يكتبه الصحفي "اللئيم" والحامض خالد عز الدين ..
| Quote: ادري انك سهواً لم تشر الى ان هذا المقال منقول حرفيا من صحيفة قوون (اقول هذا لاعطاء كل ذي حق حقه) |
للحقيقة لم أسهو في توضيح أن النقل من صحيفة قوون على إعتبار أن معظم المتابعين الرياضيين خصوصاً يعرفون أن عمود (وإن طال السفر) يكتب في صحيفة قوونعلماً بأنني قد أشرت للصحفي ولإسم العمود ..
فالتحية للصحفي خفيف الظل محمد عبد الماجد ولكم ..
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: عمر الفاروق)
|
Quote: للحقيقة لم أسهو في توضيح أن النقل من صحيفة قوون على إعتبار أن معظم المتابعين الرياضيين خصوصاً يعرفون أن عمود (وإن طال السفر) يكتب في صحيفة قوونعلماً بأنني قد أشرت للصحفي ولإسم العمود ..
|
يا حبيبنا عمر..
تحياتي..
حقيقة انا نبهتك ..للمستقل ليس الا ..لان ليس كل من يطالع سودانيز يقرأ الصحف الرياضية..وبعدين
الشغلانة فيها حقوق نشر وحقوق ادبية وملكية فكرية..الخ..
وناس قوون الهلالاب ديل ما قصروا معانا فما عايزين نقصر معاهم.
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: عمر الفاروق)
|
Quote:
* الهلال دا بقى فريق ما عربي.. راجع تحليلات طاهر ابو زيد
* تجيب فيه قون بي هنا
* تكره عيشتك.. ناس عمر بخيت بشيلوا الكورة ويلعبوها من النص
* زي الما حصلت حاجة
* التعادل ما بفوت ليه خمس دقائق
* عاجل ومستعجل وضروري |
الطريقة التي فاز بها الهلال على المريخ يا عمر الفاروق أبلغ أثرا على
"أولاد عمنا"... لأنها قــد تجعلهم ينكمشون كلما تقدموا علينا  ، وربما
آثروا السلامة والتعادل السلبي... يعني تاني طمبل يضيع الفرص بتوجيهات
من مازدا
_____________________
يعني ممكن بعد ما يجيبو القون الأول؛ يطلعو طمبل والعجب وينزلو بدلهم
محمد كمال وإيهاب زغبير 
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: Ahmed Alrayah)
|
أخونا أبو حميد :
Quote: حقيقة انا نبهتك ..للمستقل ليس الا ..لان ليس كل من يطالع سودانيز يقرأ الصحف الرياضية..وبعدين
الشغلانة فيها حقوق نشر وحقوق ادبية وملكية فكرية..الخ.. |
فعلاً ويجب إعطاء كل ذي حق حقه ..عوووووووووولم يا حبوب ..
Quote: التي فاز بها الهلال على المريخ يا عمر الفاروق أبلغ أثرا على
"أولاد عمنا"... لأنها قــد تجعلهم ينكمشون كلما تقدموا علينا ، وربما
آثروا السلامة والتعادل السلبي... يعني تاني طمبل يضيع الفرص بتوجيهات
من مازدا |
تعرف يا ود الريح والله العظيم وانا بحضر في الكورة والهلال كان لسة ما دخل في جو المباراة والمعلق يقول الركنية الرابعة للمريخ ولاا ركنية للهلال طوالي قلت يا رب المريخ يجيب قون (أول مرة أتمنى أمنية زي دي) لأني ومن خلال اخر ثلاثة مباريات قمة وخصوصاً في الممتاز كان المريخ يتقدم على الهلال فيدرك الهلال التعادل في أسرع فرصة وتنتظم هجماته ويكفي أنه فاز على المريخ 2-1 وهو منقوص لاعب والمريخ البادئ..
كليتشي بقت عندو عادة سقيلة جداً زي سقالة الهلالاب ..الزول ده قونو في المريخ بقا أضمن من قونو في الأمل عطبرة والغريبة دايماً يكون تعادلي!!
دي المرة التالتة كليتشي يعملا بي الطريقة دي ..
غايتو جنس سقالة ..
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: عمر الفاروق)
|
| Quote: تعرف يا ود الريح والله العظيم وانا بحضر في الكورة والهلال كان لسة ما دخل في جو المباراة |
وضعت يدك على الجرح يا عمر الفاروق
مشكلة المريخ إنو بيدخل أرض الملعب... والهلال بيدخل جو المباراة، عشان كده
رؤية قائد الكونكورد ريكار-2 كانت أكثر شمولا من رؤية قائد المازدا محمد عبد الله
_______________________
إنت صحي يا عمر المريخ بيفاوض فوزي المرضي؟
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: عمر الفاروق)
|
| Quote: إنت صحي يا عمر المريخ بيفاوض فوزي المرضي؟ |
يا ود الريح :
المريخ يفاوض عمر بخيت ..
المريخ يفاوض المعز..
المريخ يفاوض حمودة ..
المريخ يفاوض مهند الطاهر..
المريخ يفاوض ريتشارد..
المريخ يفاوض قودوين ..
المريخ سجل علاء الدين قمار..
المريخ سجل مجاهد ..
محمد ادم في غرفة تسجيل المريخ ..
المريخ يغري خالد جوليت ..
دحين ديل ما تمّو حداشر لاعب ؟؟؟؟
إذا جمهور وإدارة المريخ عاجبنهم اللاعبين ديل مش أحسن ليهم يشجعوا الهلال وخلاص ؟ بدل اللفة الطويلة دي ؟
انا خايف المريخ يفاوض الفرقة الموسيقية بتاعت الهلال ويفاوض الهلال في بناء الطابق الثاني في العرضة شمال ..
تخريمة :
المريخ يدخل كطرف أصيل لضم أحمد الريح للمساطب الجنوبية ..
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: عمر الفاروق)
|
| Quote: المريخ يدخل كطرف أصيل لضم أحمد الريح للمساطب الجنوبية |
الا دى يافاوق,,,
خلوها المريخ يفاوض الشعار,,,يعنى شعار الهلال
قلت لى احسن يبقو هلالاب,,,لكن عجبنى كلام صلاح ادريس
قال بجلس فى اى مكان ما دام هو رئيس الهلال...
والله انا اسى قلبى على مشجعينهم المساكين والصحفين الطرش,,,
ياخى ما دام انت صحفى قول البقلة فى اللبريق
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: عمر الفاروق)
|
| Quote: إذا جمهور وإدارة المريخ عاجبنهم اللاعبين ديل مش أحسن ليهم يشجعوا الهلال وخلاص ؟ |
إذا جمهور وإدارة المريخ عاجبنهم اللاعبين ديل والمنشآت، مش أحسن ليهم يشجعوا الهلال ومعمل
أبحاث البناء والطرق؟
(كده حيقتنعو يا عمر)
________________
| Quote: المريخ يدخل كطرف أصيل لضم أحمد الريح للمساطب الجنوبية |
هذا الحديث سابق لأوانه
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: عمر الفاروق)
|
| Quote: حقو اليومين ديل أعمل ليكم فيها عمر بخيت وما أشارك في بوستات الاحتفال بالممتاز |
فالتذهب غير مأسوف عليك ..
الهلال غنيّ بجماهيره يا أحمد ..
نعم من حقك كمشجع محترف أن تبحث عن الوضع الأفضل ولكن ..
عموماً يا أبو حميد انت الخسران في النهاية والهلال به أبقوتة وكمال عباس والقرضابي وغيرهم ..
تخريمة :
لماذا لم تكتب بوستاً بفرحة الإنتصار ..
يبدو أن الأيام ستكشف لنا الكثير والمثير
| |
|
|
|
|
|
|
|
|
|
Re: وإن طال السفر ..محمد عبد الماجد الصحفي الهلالي مبااااااالغة (Re: عمر الفاروق)
|
| Quote: عموماً يا أبو حميد انت الخسران في النهاية والهلال به أبقوتة وكمال عباس والقرضابي وغيرهم |
يا حليلك يا عمر... ديل ذاتهم أولادنا
____________________
ناس المريخ ديل "حنكهم ضارب" يا عمر...
* عمر بخيت احتفل بهدوء قالو ولدنا
* مهند الطاهر طلع في العراضة؛ وبرضو قالو ولدنا
عشان كده ما بعيد يفاوضو فوزي المرضي لأنو احتفل بهدوء صاخب!!
_______________________
قال ليك بعد الكورة جمال الوالي لقى العجب بيحتفل بالميدالية الفضية زعلان...
قام فاوضو
| |
|
|
|
|
|
|
| |
عمر الفاروق
humida
ملكة سبأ
omar altom
gamal
كمال مبارك
mohmed khalail
abuguta
فيس بوك
تويتر
انستقرام
يوتيوب
بنتيريست