|
|
 فكــــيتا فيـــــكم !!!!!!!!!!!!
|
سبعة ونص صباحا ولسه ما نمت !!!
كانت ليلة أولها مرايس ونصها فطايس وآخرها عتق من الهواجس ...
والحاجة الغريبة إنو الرماد ما جا حشر نفسو كالعادة ...
فلا خميتو ولا بالمرة خماني !!!
فسألت عنو عشان يعرف إني سألت عنو ... ومستحيل أنسى العشرة ...
لو من رماد أو من الذي كاله من قبل ... ذلك المدعو حمّاد ...
ثم سكيت حلم غريب عن النومة دي ...
والأحلام غدّارة ... دايما بتجي ونحن نايمين ...
فما عارف ... هل هي عبارة عن ترفيه للنايم ... أو صدفة يتبعها أذى ...
ولا ما لاقيه محل تقبل عليو !!!
ودايما بنرضى بالحلم في حدود المعقول ...
ومن المعقول جدا أن تمتطي جدادة ...
أو تدخل بيت غابريال غارسيا في أقل من خمسة دقايق لتشاهد مومساته الكئيبات ...
ثم تقف عند حدود البيرو بدون أي موضوع ...
والحاجة اللزيزة بتنسف أي بيروقراطية ...
لكن بتجي بدون ما ترفع شعارات ديمقراطية وتفرض نفسها عليك ...
ما فارق معاها لو نومك وزن الريشة أو من الوزن التقيل ...
ممكن تتعبك وتقلق راحتك وممكن تريحك ...
خصوصا لو جات في شكل أنثى غير واضحة الملامح ودي بتدخل من باب الشحتفة لا غير !!!
يعني كأنك بتعيد في لحظة حميمة بالحركة البطيئة بعد كم ساعة (لأنو المُخرج كان نايم) !!!
زي الطاشم في بيت عرس ... يضحك وما عارف الميت ... والميت هو العريس في الحقيقة !!!
ميت من الضحك قدام الناس ومما يعرف إنو الموضوع فيهو شيل قفة ياخد ليهو صنه طوييييلة ... الناس تعتقد انو بالو في ليلة الدخلة وهو بالو في الف ليلة وليلة من القفف ... ويقوم واحد من الأجاويد يجي يلحقو بى ابشر يا عريس ... يستعيد توازنه قليلا ثم يرفع يده مبتسماً ويديها لفة ... وتاني ... وتالت ... ورابع ... لحدي ما يتعب ويمشي شهر العسل التلاتة يوم داك (طبعا دا الشهر الوحيد الما بتم تلاتين يوم بعد فبراير مباشرة ... يعني ممكن يكون شهر كبيس نمبر تو برااااحة) واخونا الكاشف رقد فطيس ...
نرجع لمحور حديثنا ...
يعني مرا وخلاص بكل بساطة ...
كلامنا ما بهمها وكلاما ماشي علينا كراعنا في رقبتنا وطبعا دي ماكسيمام شتحه في شكل شطحه...
والخلاص الوحيد من القصة البايخه دي أظبط المنبه في عز المعمعة ...
وبعد السهر دا كلو فيها منبه !!!
وبعد يرن ... في تاني كم منبه برن في راسك لا مجال لذكرها الآن ...
وصباح اليوم زي صباح امبارح
وانت تلف كان تلقى مســـــــارح
تطحن فيك الدنيا وســــــــــــارح
لا هماك صباح اليوم ولا امبارح
ولم تعير وتديها سوط .. ما تسأل ماشه وين (دي مفروض تكون لم تديها سوط وتعير) والبلقاها اصلا عايرة دا زول غير محظوظ بتاتاً ... لأنو لو ما اديتها سوط ما بتعير وما ممكن تعير براها الا تكون مجنترة أو ضرب من الجنون الما عندي ليهو تفسير ... أو لو ما اديتا سوط ما بتعير لغيرك
ولو عارت براها يعني ما حقتك (فما تدخل نفسك في عائرات الغير لأنو دا موضوع فيهو نوع من الخصوصية ... ودا نتاج طبيعي للنفس البشرية الباحثة عن الشمشرة بكل نهم ولو قلناها نعم بتدي الناس فرصة فيك ... ولو قلنا لا !!! يسحنو ليهم كمية شمار جديدة تذروها الرياح الى قلب ميت ... ثم أي واحد يألف بطريقتو وتبقى بعد داك بطلا غير متوج في ألسنة ناس فارغة يفتشو بدون وجه حق ... عن حـــــاجة ما بتهمهم كتير ...
تفاءلت خيــــراً في الســــــتلايت ... افتكرتو يشغل ناس كتير عن ناس تانية ... يقلل جلسـات الاسـتماع التي تعتمد (الوِس وس) لغة رســمية في جمـيع المعاملات الغير محببة... لقيتم شايلين الستلايت وحايمين في الشوارع ... وكل واحد على راسو طبق ودواخلو ريسيفر ... البت عامله فيها نانسي عجرم والود عامل فيها جاك بلانس ... مكسر في بت محلية المنشأ وبتحاول تستورد لوك جديد مستحيل يركب عليها وعايزة تركبو بأي طريقة ... والشمس ستقول كلمتها سرا ويُفضح أمرها في وشها ... وفي النهاية عبارة عن مسخ آدمي لافي ساكت ...
وتكون ما ليها في الطيب نصيب ... ولأنو الطيب زاااتو ما شغّال بيها ... وهي زااتا طمّمت للطيب بطنو ... فلا اكلو حبايب ولا اتحاسبو فجّار ... والطيب الحنكوش ... الذي دخل تووش ... وناوي على شاكوش ... وانا لو منو ... أسردب . ثم لا شماتة بالجد ...
وما أقسى يا ولدي أن تهوى إمرأة ديكور ...
دي الناس البتذكرك بالحرب الباردة ... والأفكار الشاردة ... وموية منزوعة الدسم .. لو شربتها أو ما شربتها واحد ...
وفي واحد بلاقيني يوميا في الصينية بنفس العربية البيضا ... نفس الوكت بالزبط ... ونفس الشافع الراكب ورا بس مرة باليمين ومرة بالشمال ومرة بالشمين ... فعرفت إنو شافع ملقلق ومواعيدي مزبوطة ... والفرق الوحيد إنو هو بلف شمال وأنا بمشي دوغري ... ويا ريت أمشي دوغري ...
بس لو مشيت دوغري على طول بحتار العدو فيني لكن بتأخر عن الشغل ... فلازم ألف لفتين شمال وواحدة يمين ... يعني شمال في يمين في شمال وحاصل الضرب يقعدك في كرسي وطاولة وشاشة وكباية شاي . ثم تمر عليك نفس الأشكال اليومية الما راكبة عربية لكنها مضروبة بنفس البوهية والهدوم المعتادة والمليت منها ومن الممكن جدا أن يلفوك في أي لحظة كما يفعل السفهاء منّا كأبناء بمبه في كثير من الأوقات لضمان استمراريتهم في الحياة والبحث عن لقمة عيش غير كريمة ... لذا ضُربت عليهم الذلة والمسكنة وباءوا بغضب. ثم لا شماتة بالجد ...
وجاري الذي لم يفهم حواري عن مباراة المريخ (مع اني هلالابي وهو بشجع اللعبة الحلوة زي ما ناس كتيرة بتقول كدا ... وطبعا بقولو ساي لكن ما عندهم فيها شغله) بح صوتي وهو يناقش في أمور تدريبية خارج الخطة وما ليها علاقة بميدان كرة قدم ... في حين هو من الشوط الأول دقس ويفتح عويناتو قليلا كلما زاد صوت المذيع بمجرد بداية هجمة وقايلنا ما شايفين أو بستهبل علينا ... فكان تاعب نفسو ساي وبعيد عن الموضوع ... ثم لا شماتة بالجد ...
|
|
 
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: سلمى الشيخ سلامة)
|
Quote: في واحد بلاقيني يوميا في الصينية بنفس العربية البيضا ... نفس الوكت بالزبط ... ونفس الشافع الراكب ورا بس مرة باليمين ومرة بالشمال ومرة بالشمين ... فعرفت إنو شافع ملقلق ومواعيدي مزبوطة ... والفرق الوحيد إنو هو بلف شمال وأنا بمشي دوغري ... ويا ريت أمشي دوغري ...
بس لو مشيت دوغري على طول بحتار العدو فيني لكن بتأخر عن الشغل ... فلازم ألف لفتين شمال وواحدة يمين ... يعني شمال في يمين في شمال وحاصل الضرب يقعدك في كرسي وطاولة وشاشة وكباية شاي . ثم تمر عليك نفس الأشكال اليومية الما راكبة عربية لكنها مضروبة بنفس البوهية والهدوم المعتادة والمليت منها |
داير الجد وللا ودّ عمو ؟؟؟ ..
.. اللهم لا شماتة .
طيب , هسه نسحر القرد على شنو ؟؟ .
يا محمد ياخ مشتاقك .
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: Khalid Saeed)
|
Quote:
تعرف
كتابة ممتعة جدا
بتطلعك من العادى المالوف لعالم لذيذ
الله عليك يا محمد ابوعاقلة
|
الله عليك انتي يا انسانة ...
أسألك سؤال بدون احراج ...
يدك دي ما وجعتك !!!
كانك وضعتي يدك على الجرح
فاندمل ...
خلاص نزليها لو ما فيها حاجة
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: محمد أبوعاقلة الطريفي)
|
Quote:
وناس في الدنيا .. في راسه طبقين ..
طبق في النار .. وطبق في الطين ..
لا الفنار داير ينجض ..
ولا الفطين .. داير يطين ..
بالجد لاشامته ..
تحياتي .. ياطريفي ..
حلقت بنا في عالم آخر .. لك كل الود والأماني العذبة ..
الأرباب
|
وتبقى حكايتو بين أمرين !!!!!
وان لم تكن طينة ... فبعجينة
فخ ثم لخ ...
والذين يزرعون سنينهم دأبا ... يحصدون حَبّا ... يدققونها في طاحونة ليست ببعيدة عن القلب ... ويشروها على قفا من يشيل ... يلخون بعدها أحاسيسهم عمدا وتتوكجن في الروح باسم (حلو مر الحُب) لصيام أعجف وشحتفة شمطاء تريد بنا سوءا وكلنا سوءات وللناس ألسن ... هذا فيما يخص العجينة !!!
ومن باب الطينة (واحسن ليك ما تدخل بالباب دا) ترتحة مدردحة ... وراكوبة مشتحة ... وبني آدم ذو مصلحة ... لا يريد أن تقرطعها براك فكان نديما حتى الوحل ...
وشوف ليك زول يجرك ...
وهل حدثوك ذات مساء خريفي عن التي لخّت خُمرتها قدامو وعمل نايم كأنو ما شمّ أي حاجة ...
بمقدورك أن تغض الطرف وتعمل ميت ولكن ليس بوسعك أن تقفل نخريك وتعمل فيها عندك زكمة بداعي زغبير فيهو طير ...
وتيري يا همامة .... وركّي
وين ما تركي .... ركّي
وخَمجَت باقي النية بحبة حسرة ... وقامت
وشمتو شمة !!!
جرّت توب السترة ونامت
خلف الرمّة ...
الريحة الفاتت حد الذمة ...
الزول الطفشت منو وراحت حبة همة ...
الطين للطين ...
والهم النايم اقرب منك ... لخيتو عجين
يدوس ويعوس في الحرف المرخي ...
والطاجن ماجن ...
بيضتين ودواجن .............. وكاك
لخ ... وبعدين
لخ ... وبعدين
لخ
إلخ ...........
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: محمد أبوعاقلة الطريفي)
|
العزيز العاقل ود أبو عاقلة ،
مودتي وتحياتي ،
وينك يا شاب .. والله ليك وحشة ،
افتقدناك وكتاباتك الظريفة الخفيفة
التي تزيح عنا هموم الغربة وتخلينا
نخم الرماد قبل يومو ..
إظهر وبان .. وواصل أيها المبدع .
معزتي لك ولكل آل الدوحة (بورداب وغيرهم) .
( ليمو )
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: محمد أبوعاقلة الطريفي)
|
عارف يا محمد بمناسبة اغنية انت سايق فينى ظنك دى
ايام وفاة والدتنا عليها كل الرحمة
عندى صديق اتصل وقال جاى للعزاء
اها بوصف ليهو فى البيت
قمت سالتو قلت ليهو انت سايق ؟
وما سكت طوالى دخلت ليهو
ـ انت سايق فينى ظنك ؟
قعد يضحك قال لى يا بت الشيخ انا جاى اعزيك نسيتى ؟
تسلم
وحات سيدى كتابتك ترد الروح
ما تطول الغيبة
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: ALGARADABI)
|
Quote: هل حدثوكك ذات مساء خريفي عن التي لخّت خُمرتها قدامو وعمل نايم كأنو ما شمّ أي حاجة ...
بمقدورك أن تغض الطرف وتعمل ميت ولكن ليس بوسعك أن تقفل نخريك وتعمل فيها عندك زكمة بداعي زغبير فيهو طير ... |
الطريفي ..
زولك مامنــو .. من حلمـــو ...
زولك النايم ..
حلمو حايم .. يضحك مرات .. ومرات يقهي ساكت ..
شاف العالم بحقيقتوا ..
العسل مكتوب على علبه .. صنع من أجود أنواع الضبان ..
شاف الضبان واقف طابور ..
والنحل مسجون في الخور ..
والورده وقعت في البير ..
والهون ضرب الحلمان ..
وعمي علي الكان فنان ..
باع البيت وباع الدكان ..
وأمونه .. مشت الطاحونه ..
طحنة روحـه .. الكانت مسكونه ..
طاق طاق طاقية .. ياخوانا وين الماهيــة ..
طاق طاق طاقية .. ياخوانا الحالة دراميـة ..
الماهية .. كراس وشراب وربطة ملوخيه ..
وياخوانا وين الماهية ..
مسكينة الزوجه أم التيمان ..
تخت الخمره لي زول حيران ..
زولاً مناخيره مليانه أحزان ..
مسدودات بالشايفه بيحصل في الأحلام ..
زولك مانايم .. لاكين فتران ..
حلمو بفتر مليون ميل يملاها أحزان ..
حلموا عجيب ..
وراه الحاصل بالمظبوط .. رغمن إنه كان مبسوط بي حاله وفاكر نفسه زول مزبوط في زمن مزبوط ..
أقولك ليك حاجة ..
بالجد لاشماتـــــه ..
دم بخير خير يازول يانيل .
أخوك/ الأرباب
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: Khalid Saeed)
|
Quote: . العزيز العاقل ود أبو عاقلة ،
.
. مودتي وتحياتي ،
.
. وينك يا شاب .. والله ليك وحشة ،
. افتقدناك وكتاباتك الظريفة الخفيفة
. التي تزيح عنا هموم الغربة وتخلينا
. نخم الرماد قبل يومو ..
. إظهر وبان .. وواصل أيها المبدع .
.
. معزتي لك ولكل آل الدوحة (بورداب وغيرهم) .
. ( ليمو ) |
اديني سبب واحد يخليك تستعجل على خم رمادك ...
آي ويل قيف يو ساوذاند وآي تو كيف تخم رمادك ...
بدون سايد ايفيكت ...
وقبل نخش في الموضوع
اذا كانت مداخلتك اللزيزة دي من السعودية ...
فاحتمال الاصابة يتضاعف كلما ابتعدت عن المناطق المأهولة بالسكان
عشان اكون صريح معاك على اقل تقدير
فقبل أي حاجة كفارة وسلامتك وربنا يرد غربتك
(دعوتي دي ما قاعد اقولا إلا لمغتربي السعودية فقط بدون تحفظ)
وما تضيع عليك أي فرصة خم رماد ...
لانو ممكن تكون مرة واحدة في السنة إذا استبعدنا بت ابليس من الموضوع ...
ومن الوارد جدا ولا مرة ...
فهل من الممكن أن تاكل نارك لحين اشعار آخر يا فردة ...
ما تنسى صاحبك وليد
خمليهو معاك (لو لقيت طريقة ) ما عاوز اقول ليك متشائم جدا عشان ما احبط حبة المعنويات التي بطرفكم
وتنتينكم .... سلامات وما تشوفو شر
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: محمد أبوعاقلة الطريفي)
|
Quote: 0.
0. عارف يا محمد بمناسبة اغنية انت سايق فينى ظنك دى
0. ايام وفاة والدتنا عليها كل الرحمة
0. عندى صديق اتصل وقال جاى للعزاء
0. اها بوصف ليهو فى البيت
0. قمت سالتو قلت ليهو انت سايق ؟
0. وما سكت طوالى دخلت ليهو
0. ـ انت سايق فينى ظنك ؟
0. قعد يضحك قال لى يا بت الشيخ انا جاى اعزيك نسيتى ؟
0. تسلم
0. وحات سيدى كتابتك ترد الروح
0. ما تطول الغيبة
سلمي الشيخ |
طبعا اتخيلت شكلك وانتي ماسكة التلفون باليد الشمال
ويدك اليمين في اضانك اليمين وكان في ازعاج ومدنقرة
سارحه في كم حته من ضمنهم سالف الذكر من ظنون
أي حاجة عندها زمن بتطلع فيهو ... وليها عيون
في أي وكت ...
في عز أوجاعنا ونص أفراحنا ...
في العيد الناس بتذكرو راحل عن دنياهم ...
وفي الراحل لسه يا دووب يومين يحتاجو لفاصل ... حتة بتاعة نسيان مؤقت بتشبه الهروب في حاجات كتيرة ...
بس اجمل حاجة بتحصل ... الحاجات الما بتكون متوقعة ...
خصوصا والطرف التاني بكون خاتي ردة فعل معينة مرتبة سلفاً في حتة جواهو
لذا يا بت الشيخ ... إنتي جواك قاعد في الصقيعة ... والشتا على الأبواب
تحيات كتيرة
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: محمد أبوعاقلة الطريفي)
|
Quote: يا الطال غيابك
طال سنة وزيادة
والله وحشتنا كتابتك الحلوة
والابتسامة الحلوة
عودا حميدا مستطاب |
أيها الموج الازرق الانيق ...
قال لصاحبه أعكس الكورة دي ...
(طبعا بالنسبة ليهو مفروض تكون الكورة ديك ... لكن الشفقة بتعمل اكتر من كدا)
وكانو الاتنين جاريين في خط واحد
والباك اللفت كان جاري معاهم ...
والاستوبر راكب راسو
والسيرباك سواق في كومر ...
فعكسها بلا إستحياء ...
قابلها بلا إستحياء برضو ...
ودبل كيك . الحارس بي جاي والكــــورة بي جاي ...
(صحيح إنو الاتنين بي جاي لكن لبست في الكيس )
دا كلام بتاع شو ومأسس ... اليدين والراس ليهم ضلع في الموضوع
وساح الاحمر علي أطراف روسيا البيضاء !!!
وكان شفت الدنيا اتملت pink (خفت اكتبا ليك بنك تقراها بنك)
بنك الثروة الحيوانية (وتعال هنا نحن ليه ما عندنا بنك للثورة البشرية) كلها ادارات غير معتنية بالأمر ... ولا معنية ...
اكيد خايفين يقفلو ليهم من يوم يطلبو التصريح ...
ولأنو الثروة في يد ناس معينة ... ودي فيها إنّه
والثورة ديك لسه بدري عليها ... ودي برضو فيها إنّه أيضا
وبما إنو كل الثروات والثورات مجوبكة فاحسن لينا بت حارتنا وبنريدا ...
البت الصيدا ...
البت في إيدا مقال وجريدة ...
وقالو بتدرس في جامعة بليدة ...
باقي سمستر ولسه بعيدة
وهل تتوقع إنها تنجح ؟
والجامعة بليدة !!!
ثم راجياها خدمة وطنية بدراهم معدودات ... والفي راسا يطير
وبقيت يا فردة زي المشتهي الحنيطير !!!
وما هو الحنيطير يا هذا ؟
قول لي قبل اطير ...
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: محمد أبوعاقلة الطريفي)
|
الأرباب آآآآآآ خوي
وافرض عمنا كان بالجد واحد تعبان...
وكان فتران !!!
الشفع ديل جايين من وين ؟
جايين بالدين ...
جايين بالهرشة وحمرة عين ...
خمرة مين اللخت روحا بلا ايدين
ومرقت تدخل في نخرة واحد تعبان
لو هلكان ... مفروض في تلك اللحظة ينطط
يكشح باقي القدرة الفيهو حنان ...
يمسح خد الحلوة بأي طريقة ...
زي الفرشة الناشفة تفتش عن يد فنان
ويشخبت زي ما عايزة الراجية يشخبت ... بى كل الألوان ...
وان بقي بالجد واحد عيّان ...
يقدم ليها العذر الواضح ...
يا مرا ليلتك كوبيا واعملي Undo
عاوزين في كل شهر تتـ ........ وتلدو
الفي الجيب يا دووووبو مكفي
من العين ركّبنا المخفي ...
وبرضو الناس بتشيل الحال
بتلاقيك في عيونا سؤال ...
إنت الشّفّع ديل جايين من وين ؟
وماهيتك كم ؟
وبتدفع ليهم في المدرسة كم ؟
والعشا بشنو !!!
وهل تتوقع فيهم خيراً ...
اها اكتر من كدا في شنو !!!
جيبو مسخن وزهجان كيف !!!
واقنع ليك المرا براااااااحه
بدل ليها المرتبة واحه
ومخها بدا يستوعب
انو كلام الحب للراجل راحة
وفعل الأمر الواجب ولازم ... فيهو سراحا
سكتت ومدت يدها تاني ... وراياً آخر
يا أبو محمود ...
أعصر ليك كرعيك ...
لو بالامكان يا أم محمود
سمعاً وطاعة ...
وكان عارف إنو المسألة بتجر لى شيتا تاني
بس الاحسن وكان بتمني يظبط حالو ... من أول وتاني ...
والحاجات الفي البال خلاها تجي بالترتيب ...
بشويش ... بشويش الشفقة شنو !!!
أبومحمود اتعشى ودبّل ونام
واعذارك يا ود الارباب برضو وجيهة
إحباطك أوفر دوز ... للروح والويندوز
وفكها حبة
| |
|
|
|
|
|
|
|
|
|
Re: فكــــيتا فيـــــكم !!!!!!!!!!!! (Re: محمد أبوعاقلة الطريفي)
|
وين انا من ردة الفعل الشايل درقة وغامد سيفو&
وساكت
ساكت ساكت
والحسرة تشيل مني وتكشح
طشتين والساعة اتنين
وعرق الغربة تقشو براك
الناس مشغولة
والاعذار الباهتة فرضنا
بتكون مقبولة
ومهما نكب الزوغة
بنلقى الاشواق بتعتر لينا في نص الشارع
لو بى كرعيك
او ماسك ابنص
والكرعين في الغربة لساتك ومطاط مستورد
بتلف فينا
حليل لمن كنت بلفها وانا قاعد اعزّل في اصحاب الوجعة
الفاتو اتنين وراجعين سبعة
تحسبهم شوية وهم كتاااااار
ياخ الريق يا عواليق
نشفتو وانا بمسح بالاسطبة بلاوي العام الماضي
والفورمات الذي مات
لكني بحاول اخفف من تقريط البرمة
وافكها حبة
فراغات تسمح بمرور الباقي من حاجات لزيييييييزة
ثم تشفط
ما تخليك شرفان
تباري شوفك وتقعد تتلفت
لا تلقى البتشتاق ليهو منتظرك
ولا المشتاق مشلهت جاري في ضهرك
ولو قلت ليك بتباااااالغ ... صدقني
طبعا انفصلت عن جميع موجاتي العاملة
الشغالة والعاملة نايمة
قالو لي لوك الصبر
لقيتو ما بتلاك
قرشتو
بشتن علي لثة الدنيا وطعم العمر
في نفس الوكت ما قدرت اصهين
واحد صاحبي قال لي قلبك حار
وقفت في كلامو كتير
عشان كدا اي واحدة بتدخلو بتمشي تصيف في حتة تانية
وااااااخ لو بتعرف يعني شنو حتة تانية
ولو بعرف احنط كان المشكلة اتحلت
لكنهم استغلو الديمقراطية في انهم اتحاومو ساااااي
تدخل بدون سؤال وتطلع بدون اجابة مقنعة
فقلت يا ود ما مشكلة
في ناس كتيرة باسم الحرية بتدخل نفسها في حتة ضيقة
وفي ناس في حتة ضيقة بتنادي للحرية
والحرية في يد ناس ما عارفين هي شنو ...
والمفارقات الزي دي بتعمل لي انتكاريا في البستم
وبتزيد عندي انزيمات ما كان في ليها داعي
لكن لم ارجع لى (اعدو لهم ما استطعتم
بلقى معاي حق في الانا بعمل فيو
في واحد غتيت لاقيتو قبل خمسة يوم في القاهرة
نصحني نصيحة سخيفة
قال لي عليك بالنشادر عشان المحنة تطلع سودا
قلت له وما المحنة
قال لي لو كسرت كرونا معانا هنا كنت عرفتها ومشيت معانا في جنازتا
قايلني اشتغلت بكلامو
وهرشتو ليك هرشة ... ما واحدة ... هرشتين
عشان ليوم الدين الدين ما تطلع من راسو
و جبت ليو محلبية وكترت فيها كمان
عشان اوريو اني افقر منو لكن ساكتين ساي
وما يطلع في راسي تاني مرة
هو من النوع الراسو ناشف وما بتعظ ...
لكن اصبر لي ... بأدبو ليك
تتذكر لم اتلاقينا مرة
ما عارف في خيالك وفي شعورك كم مرة
المهم بالنسبة لي كانت مميزة
ممكن تكون مرة واحدة لكن سمينة
وفي ناس بتتلاقى كتير ويكون كل واحد عندو قد قفه براهو
يتساقطون صرعى ...
تفتكر مفروض يكون عندنا كم اضان قفة مرخية
بتكون كتير لكن مستنية قرصة مننا
وانا قرصتي حاااااااارة
يا زول لو مشيت دخلت في موضوع القفف دا سعف السودان كلو ما بكفيني
فاحسن اسكت !!!
| |
|
|
|
|
|
|
| |
محمد أبوعاقلة الطريفي
سلمى الشيخ سلامة
Emad Abdulla
Khalid Saeed
abdulhalim altilib
ALGARADABI
فيس بوك
تويتر
انستقرام
يوتيوب
بنتيريست