حبيبنا طاهر القلب و السريرة رأيتك دوماً في جميع صولاتك و جولاتك تسوح في البورد رافعاً راية رأب الصدع ، بقيت ذخراً يا حبيب. محمد حامد جمعة قلم لا يشق له غبار ، أستمتع كثيراً بالقراءة للقليل من كتاب الأعمدة و الصحفيين السودانيين على سبيل المثال لا الحصر ، جعفر عباس ، البوني ، عثمان ميرغني ، عبد الله عبيد ، خالد المبارك ، و محمد حامد جمعة.
محمد حامد جمعة : كلامك سمح بي الحيل والله لمن بتتكلم عن حلتكم دي جاني احساس انك قاعد تتكلم عن حلتنا الثورة الحارة 14 .. عليك الله ورينا حفلتكم دي كانت وين بي الضبط واووووووووووووعك تدخل لينا كلام بي الانجليزي وانبشقت واضمحلت وحينئذ وهلمجر يعني بس بي الدارجي الفصيييييييييح .. اعجبني فيك اخ محمد امتصاصك لي جوطة الناس دي .. ونقلت الملعب نقلة جمييييلة زي باصات هيثم مصطفي من الغرب للشرق.. اخونا علاء لا اسكت الله لك حسا والبركة في حفلة محمد حامد الخلتك تجي مارق .. اظنك يا اخوي كنت بتاع لساتك وبتاع قعدات ؟؟؟ولا شنو ؟؟؟ سمك...
12-15-2004, 01:15 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
شكرا ليكم كلكم بالمناسبة انا لاحظت حاجة ان بيئة الاحياء السودانية تتشابه فى كثير من التفاصيل والمشاهد يعنى هسة لو مشيت الكلاكة والعزوزاب هى نفس الملامح والشبه فى الثورات وامبده ورفاعة .. اشكركم على الاحتفاء دا .....وبجى قريب ونكمل .....الحكاية
12-15-2004, 01:20 AM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
الحبيب جداً عمر الفاروق في المكتب يقولوا شغال و في البيت نايم شنو يا زول؟ والله يا عمر كلام محمد حامد جد دخلني في حالة تخيلت نفسي في حلتنا ، رجل يتمتع بموهبة رهيبة في الكتابة و تسلسل الأحداث والوصف تقول شايقي "هسي يجوني ضباط الإيقاع" عشان شايقي دي و تبقى جلابة و جنجويد ، و يمكن يطلعوني برضو ضابط أمن بس بالله يا شباب الرتبة من لواء و لفوق.
12-15-2004, 01:38 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
محمد حامد جمعة عـ...............د أ..........ن وحفتلكم دي جبتو ليها التصريح من وين مع حالة الطوارئ الممتدة دي. وكمان لا أعرف الفحشاء إلا بوصفها ولا تمكر الصهباء بي حين أشرب
Quote: ماشفته وما جربته
طيب مالك يا محمد حامد جمعة بتفتي الواحد لو ما جرب الحاجة ما يتكلم ساكت خطيرة دي منك يا ملطفاتي الأجواء يا النسيم الرايق يا بتاع حي رائق
الأخ/ علاء الدين يوسف علي محمد
Quote: بس بالله يا شباب الرتبة من لواء و لفوق
الناس مقمات أديناك شماراتي بس ما تقول تهميش ولا تكويش
عبدالرازق عيسى الطالب
12-15-2004, 01:41 AM
المسافر المسافر
تاريخ التسجيل: 06-10-2002
مجموع المشاركات: 5061
باللغة العامية ليلة اياها ديك بتاعة ما بنسى ليلة كنا تايهين في سمر ولا ليلة السبت عشان اللغة العامية فيها ليالي كتيرة
لكن أنا بتعجبني لغة الحبوبات، تتخيل لحدي دلوكتي ما عارفات انه الحفلة بيكون فيها رقيص، وإنه الناس بتندق فوق فاضي، شر بال شبال، مع انو بعض الناس من يسمعو اسم الحفلة تبدأ سنيناتن يتراكضن ويتمنى الواحد انو لو اعترف من أول مرة قبل ما تكتر عليه الحفلات..
حبيبنا علاء الدين .. معقولة الناس دي لسة ما عرفت انك ضابط ؟؟؟؟؟؟؟؟؟؟؟؟؟؟؟؟؟؟ يا اخوي انا اديتك الضبوطية وكمان مشير بس اعمل حسابك كدي ركبت مع البشير في سرج واحد ...اصلو انتو الشوايقة يا الطورية يا العسكرية
12-15-2004, 02:00 AM
المكاشفي الخضر الطاهر المكاشفي الخضر الطاهر
تاريخ التسجيل: 08-08-2004
مجموع المشاركات: 5644
الناس مقمات أديناك شماراتي بس ما تقول تهميش ولا تكويش
عبدالرازق عيسى الطالب
يا زول أنا شايقي شمارات شنو؟؟؟ نحن الشمارات دي بيجيبوها لينا رقيقنا رايك شنو؟؟ بعدين نحن ما شرط رتب عسكرية مدنية ساي بنمشي الأمور و نسيس الزيك ديل و لكم في علي عثمان طه أسوة حسنة. مش قلتو كوز إنت و الشاويش فرقع
12-15-2004, 03:48 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
ليه أصلو حفلتكم دي نهارية ولا شنو أخو العريس علاء الدين يوسف علي محمد يا زول أنا شايقي والقال ليك تمساح الدميرة منو في زول غالطك والله من غير تقول أنحن عرفناك بس حكاية
Quote: نحن الشمارات دي بيجيبوها لينا رقيقنا رايك شنو؟؟
الكلام ده قبل ولا بعد الخليفة عبدالله التعايشي. بالله ردك خلي ينزل بارد علينا يا سنجك
Quote: بعدين نحن ما شرط رتب عسكرية
طيب شيل التانية ديك الطورية
Quote: و نسيس الزيك ديل و لكم في علي عثمان طه أسوة حسنة.
إنت شكلك زعلت وإستنجدت بس من شابه ما ظلم
12-15-2004, 02:20 AM
المسافر المسافر
تاريخ التسجيل: 06-10-2002
مجموع المشاركات: 5061
طيب جينا ....... اها قلت ليكم العريس كان (فووووووووق ) بعدين مع زحمة الناس والغبار ودخان السجائر الحكاية بقت ازى مسلسلات نجدة انزور بتاعة ناس الباشق والماسق ديك ...... طبعا تجه وحسن قرض - ما عندو علاقة بقرض بتاع البورد - وتيتو علاء الدين كانو شايلين العريس والعريس مبسووووووووووووووط ... البدلة اتجوبكت ... ومرة مرة كده يتخلع من (هز ) الناس لايدو والعروسة ...ماشاء الله .... عينى باردة ... سمحة ...وقاعدة تتابع فى عريسها ولمن (يجفل ) تحس بوشها انقبض ....... اها شيل خت رجعوا العريس لعروستو ...طبعا النقل دا وانا فى طرف الصيوان طالع فى كرسى وماسك فى شباب قدامى .. اما الفنان دا دى حكاية براها ..... زول اقتصادى .. يعنى بس كل الفرقة هو وبتاع الاورغ .. وبتاع الساوند ... وكان فنان (سوبر ماركت ) يعنى بيغنى لاى زول سمعنا حاجة لمحمد ميرغنى .. مشى قدام شوية طلع حاجة للكاشف رجع تانى (خمش ) ما تيسر من فرفور ومحمود عبد العزيز ..وكمان بالغ شوية ادانا طلة على ندى القلعة - ما تكلمو سجيمان - وهاجر كباشى وبت العز ...ويا (الدكاترة يا الستة ) البى ريدتكم هلكتا ......انتو يا جماعة (الدكاترة ديل منو ) ومالهم ... ؟؟؟ .. اما ساحة الرقيص دى خلوها ساى .. زحمة ومستفة (تف ) طبعا فى اجيال كدا صاعدة فى السودان خاصة من الشباب بتاعين البناطلين (الجى فايص ) ديل ..الله لا وراكم رقيصهم .. يعنى لو ما زول حريف رقيص وخشيت فى نصهم ممكن تجى تطالع ..وعينك مقدودة وتلاتة اربعة من سنونك ..شدت الرحال الى الارض .. طيب نرجع للعريس .. طبعا انا لاحظت ان (صحبى ) دا مبسوط اكتر من اللازم يعنى تسلم عليه بس يضحك .. ويهزك وتاااااااااااخ يضرب كتفك .. عرفتو ليك !!! لانو قبال العرس ويوم العرس كان زول (الدائرة كتم ) يعنى لا بتعرفو زعلان ولا فرحان ..قطيم ..كلامو بس كلمة وغطايتها . لكن فى اليوم داك كان بتكلم كتير ......كتير بصورة ملحوظة .. اها شقيت ليك الصفوف بعد ما نزلت من الكرسى الوقع بى وفوق جماعة كدا شباب جونا من (العاشرة ) يا زووووووووول .. زعلو وشبكونى ليك قاصدنا .. وانت وانا ومن حقنا .. قربو يجيبو عود يبقو هاشم ميرغنى .. بس حلانى منهم انو العريس جا وقاد وساطة (احسن من ناس الايقاد ) ولمى الموضوع .. يا شباب باركوها كلنا هنا عشان نفرح .. قالها وابتسامة عريضة وفرح حقيقى يتقطر من ملامح وجهه فردها عليه الشباب الغاضبون بقبلة فى راسه وفى راسى ..... يا جماعة نحن شعب طيب ..والله العظيم وجااااااااى بعد شوية
12-15-2004, 03:26 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
ومضيت مع العريس وكان الفنان قد اخذ (هاف تايم ) حتى يطلى حنجرته ببعض الماء البارد والقراح ليواصل ليلته البهيجة وليلة السامعين الليلاء وليلة العريس التاريخية ، المهم قادنى العريس من يدى .. وكنت اشعث اغبر لاننى كما بينت ووريتكم فى الحلقة الاولى كنت جاى من الشغل بعد ما روحى طلعت فى المواصلات وطلوع الكوبرى والخروج منه الذى صار عقوبة يومية لمن اراد الخروج من امدرمان او العودة اليها .. جلست فى كرسى بجوار العريس وعروسه ......فضيحة فقد شعرت بالحرج ..تلقى الناس هسة - وانا بحدث نفسى - الزول المقطع دا منو .. وكنت ارتدى شبط تطل منه اصابعى والتى جعلها الشتاء (غبشاء ) ..تحتاج الى رطلين من اى زيت ومادة خام اخرى ملينة حتى تعود وتبقى (منطقية ) وعندها قبول للراى العام فى الحفلة .. طبعا اترك لكم تصور مستوى الاناقة والعطور والكريمات والفازلينات و(الفاير اند لفلى ) التى سكبت حتى تاتى الناس (متمرة ) وسمحة .......... المهم توكلت على الله الحى الذى لا يموت وقويت قلبى وجلست .. يا زول سيبك ..الناس مش بالهدوم .. هسة فى زول شاف بعض المثقافتية الواحد تلقاهو لابس بنطلون جينز من زمن حامد بريمة كان قون المريخ لغاية ما جا شيكوزى النيجيرى دا وتلقى فى النطلون اربعة خمسة رقع ..وسبعة تلفونات وقلبين مرسوم فوقهم قلب (مقدود ) مرة بسهم ومرة بسيف بتاع قرصان والشعر .. خلو ساكت .. لو فتشت يمكن تلقى جواهو عزت الدورى والمؤتمر الدستورى - هسة الناس تهيج وتعيط فينا - وبعد دا تلقى المثقافتى دا محبوب وعندو جمهورو وشعرو ودستة كدا بتاعة بنوت بيموتن فى الحداثة حقتو . اها يا زول قعدت ..صادفت ليك موجة بتاعة ناس عاوزة تبارك ..العريس يسلم .. والعروس .. وانا ...العريس يسلم والعروس وانا .. وكدا كم فوج جا ومشى ..لكن البلد دى يا جماعة ما شاء الله بناتها بكل ادب واحترام صيد والله .. ما عارف سودانى ممكن يعرس خواجية ويخلى ديل كيف ! .. المهم بعد شوية صحبى العريس ..دنقر معاى .. وشيل خت دقينا لينا ونسة .. واخدنا راحتنا .. وعماد تجة جا علينا وبعد شوية ناس اللستك جو كلهم .. يا سلااااااااااااااام ..البلد فيها خوة سمحة ..بدون اختيار كان فينا المحسى والفلاتى والشايقى والهبانى والدينكاوى والقبطى ..اها اتذكرت معانا كمان مولى الحبشى .. وكانمت حفلة وكانت ليلة ادركت فيها (استيم ) صديقنا العريس لم يكن شيئا محرما ولا اى حاجة (جاى ولا جاى ) لكنه كان فقط ..........هذا الحب
شنو يا ابوحميد ما قلنا تحكي بدون تجميل.. فنان شنو البيطرق حلقو بي موية باردة ؟؟؟معقولة بس!!! ياخوي انت خليها ظريفة وقول يطرق حلقو بي كريستال بلح ... غياتو ياابوحميد خميتنا في نهاية الحفلة دي ساي مفروض تورينا الهجيج والنبق والقرد وهاهاها فوق فوق فوق جب جب جب ورورورووووووووووووووك ارح ارح ارح ارح .. وبعدين يا اخوي شكلك النوع البعد الحفلة خلصت جرا ليهو كرسي ومشي قعد مع الجكس عشان الحنك وكده ... ملحوظة .. بناتنا في الحفلات سمحات ولكن لا ادري لماذا يتخاوفن من هطول الامطار خلال الاعراس ؟؟؟
12-15-2004, 04:57 AM
Mahmoud Mustafa Mahmoud Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
أنا بصراحة معجب جداً بالاستايل والتكنيك والقدرة على السرد ... وكمان معجب بطولة البال والروح الرياضية الجميلة بتاعة محمد حامد جمعة...الذي لم أعرف أي شئ عنه إلا هنا في البورد...يعني لا بعرف إنه كاتب ولا صحفي ولا أمنجي ولا أي حاجة.. .. عشان كدي خلوني أقولها وكلي ثقة... : فليبق هذا الرجل بهذه الروح وهذه المقدرات هنا وهناك في سوداننا الجميل... حتى لو كان في الموساد زاتو ... مش عميد ولا لواء أمن...يقبض شلة اللستك زاتها... ويورط تجة والعريس.. وعمر محمود خالد ذلك الجميل ... بالمناسبة يا أستاذ محمد... ما عندك لينا (أبديت) إن شاء الله على سبيل الشمارات بتاعة اللستك عن هذا اللغز المحير؟؟ شكراً لك على هذا الجمال على أي حال..
12-15-2004, 05:33 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
اولا اسمح لي ان ارحب بك في دارنا العامرة دار بكري واسف للترحيب المتأخر بسبب المشغوليات
طبعن لما جيت وشفت اسمك قلت خلاص حصل إنقلاب عسكري في البورد والاسلاميين اخترقوا المؤسسة العسكرية في البورد واجهضوا الديمقراطية الكان متفق عليها بين البورداب ولكن للأسف وجدت العكس دعاة الديمقراطية ودعاة الحرية سابقا يتبنون اليوم مصادرة الحريات وتكميم الافواه واقصاء الآخرين وعدم احترام رآي الاخرين ويطالبون بإقصاءك ويريدون لنا أن نسمع فقط لمن يقول ان الانقاذ كلها فاسدة وأن اي صحفي في داخل السودان رجل أمن وأن كل من ينادى بحل مشاكل السودان بالتفاوض خائن وهلم جرا من اكاذيب واباطيل معارضي الكرتون . رغم انك كوز لكن بالجد انتا ظريف لأنك (كوز كنافة) وانا بحب الكنافة لدرجة العيافة اسمحلي اقول لك استمتعت كثيرا بمواضيعك ومداخلاتك وقوة الحجة عندك وذكائك في التعامل مع المرضى السياسين ومقارعتك للآخرين بالمنطق رغم اختلافي السياسي معك فهنيئا للبورد بك وهنيئا لك بالبورد وهنيئا للقراء بكما جميعا.
12-15-2004, 06:29 AM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
يا عبد الرازق شوف التعايشي قعد كم و شوف الشوايقة كم و إنت تعرف كفة مين الراجحة ، بعدين دة كان زمان و جبر الواقع بيقول شنو يا طيب. أما الشايقي كان فلح للعسكرية و كان سقط للطورية دي طلعت من الزيك ديل الحاقدين على ناس القصر العالي. بعدين مسألة ساس يسوس سياسة فهو بن عثمان طه دة ، ما إستنجاد دي الواقعة و يتحملة راسكم غصباً عنكم و كرهاً أو طواعية فأين أنتم منها ذاهبون والله كل ما أقرأ كلام الزيك دة أتذكر بوست الحبيب أساسي لما قال حق للإنقاذ أن تبقى. قال التعايشي قال حليلو
12-15-2004, 06:39 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
سلاااااااامات للجميع يا جماعة بالجد (عقدتونا ) .. لكن نعدكم ما دام عندنا مساحة فى المنبر دا ان نكون مثل (اللبن ) بياضا وصفاء ونقاء والا (نغلط على زول ) وان نسوق الحجة بالحساب الولد والكلمة الحسنة .. خلى اليقول ما يقول طبع البشر تتكلم طبع الحليم زواد من الصبر يتعلم والكلام البنقلو هنا من شلتنا وناس (تجة ) وتيتو ديل فى اى حلة واى منطقة سودانية وبس نحن نقلنا الصورة ..الواحدة .. فى الشعبى او المقصورة
12-15-2004, 07:35 AM
Agab Agab
تاريخ التسجيل: 10-03-2002
مجموع المشاركات: 1185
يا محمد حامد ضحكت شديد وانا أتخيل حفلة أخوي بعد أسبوعين في أمـبدة وزي ما قلت الاحياء الشعبية كلها واحد خصوصا في أمدر. أحــيي طول بالـــك زول غيرك كان إستقال من الجهاز وخلي البورد
واصل ونحن مع اللعبة الحلوة لغاية ما يلصقوا لنا رتبة
كل الود ودالعجب
12-15-2004, 08:29 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
علاء الدين كيفك يا زول .....تمام طبعا امس شلة (اللستك ) وريتهم انى شهرتهم وانهم بقو ناس نجوم وكدا بعد ما كانو (عوالقين ) زى ما بيقول فردتنا وعضو المكتب -اللستك - اويلو ..خميت ليك البوستات وكانت عندهم ملاحظة طريفة انو مافى جكسوية (علقت ) دا طبعا كلام (ايهاب ) زول بكااااااااااااى .. جنو بس ونسة عن البنات واللذى منه .. طبعا هو بيستثمر لطشة وجاهة كدا عندو بعدين ملامحو بريئة خالص .. اها ايهاب دا قصة غير انو بكاى دا المرجع حقنا والمفتى بتاع السفر والعمرة والهجرة بعرف اى سفارة فى الخرطوم وين وبتشتغل كيف ولو عاوز تسافر وتتخارج لاى بلد انشاء الله اسرائيل بديك وصفات وبخرات توصلك ..بس حظو مع دا كعب لانو محل ما يقدم ورقو يمرقو ..سفر يمكن عشرة سبعة ناس من اصحابنا وهو قاعد هنا .. . خريج فلسفة لكن عليك امان الله - ودا برضو كلامو - ما ناقش فيها حاجة بس درسها كدا بنظرية (مشى حالك ) والغريبة (ايهاب ) دا مع انو نفسو يسافر بره لكن والله الزول دا حنين خلاص يعنى فى محل شغلو لمن تجى عطلة واجازة العيد قالو بيطلع من المكتب من الصباح فى اخر يوم للشغل عشان ما يقعد لاخر الناس وانت عارف (الموادعة ) بتاعتنا ديك فى محلات الشغل .....اها يا جماعة كل سنة وانتو طيبين .. العفو والعافية .. خاصة من الناس الماشية تعيد بره الخرطوم .....طوالى ايهاب دا يفكها ليك (بكية ) ! زول حنون ياخ دا لو فى زول من ناس الحلة مسافر بره الا (ندسو ) ياخ الناس كلها (تتجرس ) .. قبال كم شهر كدا عندى اخوى سافر بره ومشينا معاهو المطار كنا شلة كبيرة لمن ناس المطار ذاتهم استغربوا فى زول (شمارة ) من ناس الطيران المدنى سال ..ديل منو .. كنا حوالى خمسة وعشرين ويمكن تلاتين كم امجاد وكم بوكس كاشف واتوسين -طبعا بتاعة الفرد - الزول لمن سال مافى زول اشتغل بيهو لكن حظو الكعب رماهو ليك فى ميسرة شبيكة دا رباطابى ماسخ مسااااااااااااخة عاين ليهو كدا وقال ......ما عرفتنا .. نحن وفد شعبى ماشى نيفاشا ....... اها يا جماعة الاجراءات خلصت .....ومع السلامة وربنا يحفظك ..وخلى بالك من نفسك .....لحظة صعبة انا شخصيا (اكلتها ) زى الحنظل ..اها ايهاب شوية كدا فك ليك (مجارى الدمع ) وسال سيل الدمع هطال ......ياخ كل الناس الواقفة جنبنا تاثرت .. ايهاب دا زول حنون ...... صدقونى ........ لم ار فى حياتى شخصا شفيفا مثل هذا الانسان ..ناح يومها وقطع نياط قلوبنا وبلل بدمعه اشواقنا وتحيات الوداع والزاد الطين بله جماعة كده برضهم مودعين ليهم زول وكان معظم حضورهم من نساوين (حاجات ) مسكن ليك ايهاب وقلدنو ليك .........وهاك يا بكاء ...... ومذ ذاك اليوم قررنا فى اللستك وبقرار صدر بالاجماع ان ايهاب لا يودع ولا يعلم بسفر شخص ..عارفين حتى فى بيتهم وهم من ناس مدنى ..لو ابوهو ماشى مدنى القريبة دى .. ما بيكلموهو ........ طبعا صاحبنا اخر مشى هناك وقف حلتهم جنب (حنتوب ) على رجل واحدة لمن قالو عندهم شيخ فى الحلة عمرهم ما شافو ليهو دمعه اليوم داك بكى وانتحب .. صحيح الجزيرة ارض المحنة
12-15-2004, 11:32 PM
abazar ali khalifa abazar ali khalifa
تاريخ التسجيل: 02-15-2004
مجموع المشاركات: 96
اخر حفله حضرتها في السودان قبل ما اودع و اهاجر قبل خمسه سنين كانت في الثوره الحاره الثانيه،العروس كانت بنت عمي و نفس المنظر الذي حكيت عنه انت الان و لكن في ذلك الوقت لم تكن بدعة القرد قد ظهرت. لم يكن العريس حاضرا ذلك الزفاف (العروس طرد يعني) ساحة الرقيص ممتلئه عن اخرها و كان مثار السجاير و الغبار فوق رؤسهم ليل تهاوي كواكبه ، البنات الشباب في الكراسي القدام و النساء في اخر الصفوف،و الناس ترقص فرادي و جماعات ، اناس كل همهم العشاء و اخرين همهم نظره او لو اسعدهم الحظ كلمه تتبعها ابتسامه ورقم موبايل ، ام العروس كان همها ان تكفي ضيوفها اكلا و شرباو من غاب من الناس كي تلومها ،اخوان العروس همهم ان تنتهي الحفله علي خير و الا ياخد اولاد الحاره الاولي بثأرهم و يفرتقو الحفله(او ان يسرق احدهم الاستيم المصبن تحت اللستك في اخر الشارع). انا كان همي سعاد كان همي ان اتزود منها بنظرة قبل ان اسافر (سعاد شاكوشي المقيم و جرح حياتي و بالمناسبه سعاد ليس اسمها الحقيقي) كانت ترتدي فستان بلون البنفسج وشعرها ينسدل حينا و حينا يطير فيطير معه عقلي ترتمي الطرحة علي كتفها، تضع ساق علي ساق و تمسك بيدها منديل ورقي(حسدت المنديل عديييل كده علي هذه المكانه) تعدل وضع النظاره بيدها اليمين(متين سعاد دي غيرت نضارتها؟؟)و عيونها تقول لي: ما نسيناك جاي تعمل ايه معانا بعدما بدلتنا حاولت ان اقول لها (بعيوني ايضا) انا ما بدلتكم و لكنه الفلس،منعني الزحام. وقفت علي المسرح بجانب الفنان و طفقت ارقبها(حلوة طفقت دي ..صاح؟) كانت تجلس في الصف الامامي بجانب بنت عمتي ،كنت اريد ان اختزن كل ملمح فيها كل جزء في كياني و عقلي اردت ان اتشبع بصورتها فانا لا اعلم متي ساراها مرة اخري فجاءة صدح المغني يقول: البنسلين يا تمرجي و نادو الحكيم يا تمرجي قامت سعاد ترقص النبق(و رقصة النبق هذه سابقة لرقصة القرد و الركشه) ،الشعر يرقص ،و اليدان ترقص و الكفل يرقص(الكفل ده شنو؟؟) و الجسم يرقص و الفستان البنفسج يرقص، عندها لم تحتمل ركبتي الوقوف فجلست،قلبي بقي يقول دق دق لمن خفت احرق بلوتين(البلوتين في العربيه يقع شمال البوري و تاني زقاق من المكنه) وجدت نفسي اغني وحدي: مرضان باكي فاقد و فيكي علاج طبيبي قالو ترك سكونك يا دار وين حبيبي(و اهو كلو بنسلين و مرض و الدكاتره السته و سسترات تقول الحفله في مستشفي الخرطوم التعليمي) انتهت الاغنية و رجعت سعاد الي مقعدها،لكني لم استطع الوقوف مرة اخري(تاكدت عندها بان البلوتين قد حرق) تلك كانت اخر مرة اري سعاد، لذلك كلما اسمع الان البنسلين يا تمرجي ،اتزكر سعاد و ...... الاخ محمد جمعه لا يهمني ان تكون كوزا او امنجيا يكفيني فقط ان اقراء ما يريحني و عندما قرات حفلتك هذه اصابني المرض الكعب(مرض الجرسه و الكبكبه و الحبكانه) الله يجازيك.
12-15-2004, 11:03 PM
Agab Agab
تاريخ التسجيل: 10-03-2002
مجموع المشاركات: 1185
الأخ عجب الليلة براك درعتها فى رقبتك وان شاء الله تبقى قدرها بس ورينا العوان بالواضح واليوم والتاريخ حتى تاريخ وصول اول صينية بس اليوم داك تكون واقف فينا كويس لانو الصحن لازم يكون ملان شديد لانو اخوي محمد جمعة دا حايكون جعان شديد صحن ضلع ليهو وصحن ضلع لى براي وعلاء الدين دا ياكل سلطة الروب براهو
بمناسبة الرقيص يا جماعة والحفلات عارفين فى ظاهرة بوظت الحفلات خاصة فى النوادى ومع السيرة يعنى قصة عروسنا ورد البحر قطع جرايد النخل .......الله يرحمها ...دقست واتلحست .. هسة تلقى (مزك ) مصرى ولا خليجى سورى - طبعا انا امى عديل فى الغنا العربى - وتلقى فى بخار ودخان كدا طالع مع اضواء كتيرة .........قال شنو قال سيرة كدا بتاعة عولمة ....... برستيج ........ ياخ حتى ناس (الاستيم ) الزمااااااااان ديك بقو مافى ....... الشكل زاتو ( الكسر ) بقى بس (طق جنك ) ياخ انا لى خمسة ستة سنة ما حضرت لى حفلة دور فيها (كسر ) يكيف الزول .. تلقى الناس ملمومة .. الشتيمة ..يا سخيف ..يا متخلف .. يا مستنير ........ (ظلامى دى لسه ما جابوها ) وبعد شوية يمشو كل زول يرافق زولو - زولتو طبعا - ......زمان ايام ناس سيف دقشة والكضمى .. والدوقى .. تسمع النقاش فى نص ساحة الرقيص بعد شوية تسمع طااااااااااخ و(لب ) بونية مصحوبة بكرسى حديد مكلوج وتسمع (واااااااااااااى ) طبعا ديل رجال الخطوط ....النساوين ..... وتلقى الشباب خشت ..بس الزول الجنبك طوالى ..تجيبو ارضى ..بونية او شنكل وبعد شوية الجماعة يملصو البدل والقمصان ....... ناس زمان يعنى لغاية اول التسعينيات كانت ناس (جامدة ) الجيل الجديد دا ناس كدا ما عاينت كويس ما تفرز البنت من الولد ...
12-15-2004, 11:53 PM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
إنتو حفلتكم دي بالنهار ولا بالليل ما وريتنا وشلة اللستك دي ما قلت ليهم الناس ديل أتهموك ولا خفت يصدقو ووزير العريس كان منو ونزيلة العريس بالمصحف ولا الطبق الملان دهب والضريرة حلوها بموية ولا محلبية ولا سرتية ولا كلونيا والجرتك كان حرير هندي ولا كشميري ولون الجرتك كان شنو وهلال الدهب العلا الجبين دهب فالصو ولا عيار والسيف الشايلو العريس بسوي التح تخريمة يا محمد حامد جمعة بدون ألقاب تعرف في واحد عرس في الشتاء وكان رجلينو مشققات البنيات جابن الحنة ومسحن المحلبية في الرجلين المسألة دخلت الشقوق وزولك ممحوك وممحن بس صابر قدام أخوات (ميرم تاجه) إلين جو شلة لستكو ببشرو زولك نفط الحنة في الحاضرين من شدة الوجعة وهمة البشارة مخلوطة بحرارة الوجعة والناس فاكرة إنفعال حلاوة الترحاب وخلصت الحفلة بعد العشاء والرقيص والناس فرو مشو بيوتهم نامو إلين الصباح والصباح رباح.. أنا جيتك مصحصح بس أحكي عبدالرازق عيسى الطالب
12-15-2004, 11:38 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
والله يا محمد بوستاً مرق الباشمهندسة بنت الحسين دة ما هين تب مريم إزيك وين أخبار التجارة الإلكترونية حقت السودان الإتفقنا تدينا ليها
المكاشفي يا حبيب والله متمني أكون في السودان فعلاً و أحضر حفلة مع محمد و شلتو على الأقل أتذكر أيام الإشلاق الكنت ساكن فيهو و رحلنا منو و أنا برة البلد حتى ما سمعتهم وهم بيغنوا يوم في يوم غريب فيهو الشمس لمت غروبة و سافرت لناس بيتنا و تبدلو الجيران و بالتأكيد "شلة العمود" بدل اللستك
12-16-2004, 00:17 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
وزيدنا سماح دي جديدة يا بت الحسين لكن مقبولة شديد تشجيع الكورة دي بس كورتنا ولا كورة برة؟ أنا غايتو بشجع القمة في بلدنا بس ، زمان كنت بلعب و كنت لعيب زي أخواني لكن كسروا رجلي في المتوسطة و منها بقيت متفرج بس "خوف وعقدة"
أستاذنا محمد حامد أسمح لكن واصل ما تقيف كلامك سمح ، رجعنا البلد ، و الشوق للبلد بي حالة الشوق للتراب و أهلي.
12-16-2004, 03:16 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
اها جينا طبعا يا اخوانا الزول بيشتغل شوية ويهبش جاى جاى بعدين يجى راجع للبورت يلقط ليهو كم حاجة كدا يستفيد ويعمر دماغو شوية من صفحة الراى وشوية من المنبر ومرة مرة كدا من الاخبار وكدا وترجع تانى لشغلك وتكر عائدا للبورت ، طبعا مرات الزول بيفكر يعمل (ساين اوت ) لكن بالجد الزول بقى يتوتر وخايف اعملها اجى راجع القى هذا الرقم لا يمكن الوصول اليه حاليا .....بمناسبة (لا يمكن الوصول اليه حاليا ) ..والموبايل ...اليومين دى فى الخرطوم (البقت سمحة عديل ) فى موضة بتاعة سرقة موبيايلات ..يعنى لو سهيت بس راكب عربية ولا ماشى (كدراوية ) زينا ناس (خ 11) ديل تلقى موبايلاك قد اختفى ..والقصص مختلفة لكن القصة الاساسية بتكون كدا ...تجى ماشى ومتجدع فى نص الشارع وعينك شوية مع العربات (يمنة ويسرة ) تحفك ويمكن فى كسر من الثانية تخليك على خطى (الشهيد ) بمعناه لدى طرفى النضال فى السودان وبمعناه عند الشيوعيين والاسلاميين ..اها مرات برضو بتكون ماشى ولو بقيت من الناس العينهم (زايغة ) وطويلة و(طماعين ) وخفاف بتقعد تقهى فى البنات وسماحتهن وكترتهن ومرات برضو بتكون ماشى وراسك (كابس ) لو كنت من الناس (المجرورة وتجر ) خاصة لو حسابك فى (دكان حاج صديق ) وصل كذا الف جنيه والزول (نقتو ) كترت وشال حالك ومعاه ناس تانية ودكاكين (مخزون استراتيجى ) برضو قصرت معاهم وما سددت (حقهم ) فى الحالة دى بتكون سرحان عبد البصير زاتو وراسك يشيل ويخت فى طريقة توصلك بيتكم عن طريق ممرات (امنة ) بدون ما يشوفك واحد منهم ويلم فيك وتبقى فضيحة وتقعد للتمتمة وفبركة المبررات عشان (تمرق تولا ) طبعا( جيبا ) حالتو معاك (شلش ) ..اها فى نص كل تلك الزوابع او اى واحدة تختار تلقى فى زول (تووووووش ) خش فيك بصدمة (صدارى ) تقوم مخلوع ونبدا ..معليش ..سورى .. يقوم هو طوالى (يمسك ليك صراخات ) وااااااااع ...وانت ..يا شنو ما عارف ..والناس تتلمة فجاة يجيك زول قيافة وفايت الناس ظرافة يتدخل ويعمل ليك فيها سمبويا ..حصل خير .. ومعليش مع الايام ظروف بتعدى وقالو البعيش الدنيا يا ما تشوفو وان الكريم لكالربيع ومكنة بتاعة وساطة (تشيل ) فيك رغم انك المصدوم ولا الباكى ولا الشاكى انا .. طبعا يا شباب يا (مفتحين ) فىاللحظة بتكون امة محمد اتلمت حولكم الماشة مستشفى الولادة تقيف والعمود فى يدها وكيس الحلاوة (الجنون مالهم ) وبتاع الورنيش يخلى الكشكشة يجيك فاتح خشمو وفى واحد مشرور يلقاها فرصة بعد ما كان( واقف براك والهم عصف ) بزهرة شبابو وريدتو والغيظ ملاه لمن عاوز يقول ..طق .. ودا كوم والجماعة البيعملو فيها مباحثية ( وحكومة والناس مظلومة ) ديل الواحد بيجى عامل ليك فيها الجنرال سعد الدين الشاذلى بتاع العبور فى اكتوبر العظيم ..دقيقة اسمعو الحاصل ..اتكلم براحة وما ترفع ايدك ..اها هنا الضحية الهو انت يا صاحب (الموبايل ) بتكون اصلا لاحق ليك شغلة ودخلت فى حادث سير متعمد اصلا قصادك وتحاول تلم الموضوع والبركة طبعا فى سمبويا - اسم الزول دا كره الصحافيين الكتابة فى السودان لانو يوم بالواو ويوم بالالف ويوم بالواو - ولمن المسالة تنجلى ويختفى الحشد الكريم من حولك تتذكر انك عندك موبايل وعاوز تعمل مكالمة وتدق صدرك ثم جيبك القدام والخلفى والاجناب ......... يا ابو مرووووووووووووة ...... موبايلى ... وتصيح يجيك صوت زول شاف الحاصل كلو ..فطسوك يا معلم قبيل اجرى اقفل الشريحة والله يعوضك ومعنى الكلام انو وقت الرماح كانت نواهل منك وبيض الهند تلمع فى وجهك فان الجماعة الخفاف والظراف بتاعين الكرب والنشل كانوا قد زارو جيوبك .... وشالو الموبايل وتجرى انت لاقرب كشك تلفونات .. وتضرب نمرتك ..وتجيك نيكول تنورى بتاعة الموبيالات ..هذا الرقم لا يمكن الوصول اليه حاليا .. تنتش
12-16-2004, 04:35 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
وعليك بمثلهاكما قلت وبنقطها وضبانتا يا محمد حامد جمعة أنحن منتظرينك مسألة قطع الرهط والصبحية و الجمعة الفاتت دي كنتو وين في سماية ولا طهور ولا ميتم راجينك مفكرتك الرائعة يا رائع وشلة اللستك أخبارهم شنو أسردبس بأمانة عشان شايلين ليك كوم نقد فني للبناء والمكون كبير ولك ودي وتقديري عبدالرازق عيسى الطالب
12-17-2004, 10:37 PM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
امس ذهبنا لمناسبة احد الاصدقاء قبل صلاة الجمعه وركبنا الحافلة وفى نيتنا كذلك (منافع ) بين الزيارة وصلاة الجمعه كان فى زول صاحبنا عاوز (موبايل ) وطبعا حاولت اقنع شلتنا انو نمشى نشترى من محل فى شارع كترينا بجيب موبايلات ممتازة وجميلة (اخر رسائل ) اها لمى ليك فينا زول كان (بتصنت على كلامنا ) من مقعده جنبنا فى الحافلة وقال كترينا شنو .. امشو البرج .. ودا لمعلومية الناس برج البركة بالخرطوم الجنب فندق اراك الزمان ، طبعا انا استاءت جدا من انو زول يخش تووووووش ويدينا تعليق بدون ما نطلب منو لكن لزمت الصمت خاصة بعد ان بدأ الشاب الجالس بجوارنا فى مرافعة اقناع عالية .. شوفو ناس المحلات ديل بيركبوكم ساى .. قلت له (يركبونا شنو ) قال يدوك موبايل (مضروب ) بطارية جيعانة وسماعة ملوذة بس يكون المنظر من بره سمح لكن تعالو معاى عندى فرد ناس مفتحة واولاد نار منقد يدوك اى موبايل .....ثم اردف بقسم ..ودينى وايمانى لو عاوز اى نوع موبايل يجيك على ضمانتى .. هسة شوف ونبش جيوبه واخرج نحو ثلاثة موبايلات جديدة من مختلف الانواع و(الماركات ) والاجيال.. هسة دى كلها (جديدة نر ) طبعا (نر) مفردة تفيد عنده ان هذه الجولات جديدة وحديثة وغير مستعملة ، وكنا ثلاثة لكن سيول الاقناع المندفعة تجاهنا من الشاب -عرف نفسه باسم مخلص - لم تترك لنا خيارا سوى الذهاب الى موقع البرج حيث سوق كبير وغريب لتجارة الهواتف الجوالة ..كان سوقا عامرا ومكتظا بمنطقة البرج بالفعل مع جوار حميم مع تجار العملة واللذين لا يزالون يهمسون دولار ..ين .. استرلينى ..فيما والى الامام وبشارع الجمهورية وما جاوره سوق نيفاشا جاااااااااااى راجع
12-18-2004, 02:28 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
ابو رزقة (سوق نيفاشا ) دا احسن مكان ممكن تتسوق فيهو بالخرطوم (العاصمة ) وتشترى ارقى القمصان واجمل الازياء والطف العطور وطبعا فيهو مع الشتاء ملابس (سقط ) اصلية يعنى الزول البيكون ماشى اوربا ولا امريكا ومصادف موسم برد وثلج ..يمشى نيفاشا (السوق ) يشترى ليهو (كوت ) خرتشوف ما لبسو حاجات ثمينة وحلوة . طيب نمشى سوق الموبايلات اها يا جماعة (الخير ) مشينا نزلنا البرج نحن (الفرسان التلاتة ) ومعانا صاحبنا (فضولى ) او تاجر الموبايلات المتجول (مخلص ) والذى قادنا بخفة ورشاقة عبر بعض الشوارع فما يلى (فندق اراك ) الواقف كدا معلم بس يعنى ما فيهو حركة الا شوية دكاكين كبيرة فتحت اسفله فى الطابق الارضى خاصة محل (البرغر ) بتاع مكسيم جوركى ولا شنو حاجة كدا كان زمان بيعلمو ليها دعايات فى التلفزيون قبال ما تكبس علينا الحاجات الجديدة والاكلات الغريبة دى يعنى فى زول شابكنا (مرتدلا ) ( مرتدلا ) اخوكم طمع (يضوق ) مشو جابوها لقيتها ليك حاجة كدا زى (رقعة العجلة ) حميرا فاتحة وطعمها لى هسة لمن اتذكرو جسمى بيكس ...ولا البيتزا........... هوت دوت ..مشروم ..معلوم ..ملخوم ........ الشى دا كان زمان مافى بس كان تحت فندق اراك فى محل فيهو سندويتشات (بيرغر ) مش كدا ! المهم وصلنا بالسلامة ... يا عالم .. دنيا كده من التجارة المتحركة ..التجار فى معظمهم شباب بين 20) ) و(30 ) سنة ومعظمهم يا خريج يا لسه طالب جامعى يعنى سوق فى راى عام وعناصر (مستنيرة ) والزبائن شباب برضو وفيهو بنات بيجو مرة مرة كدا يشوفو الجديد فى عوالم الجوالات والسوق بقى مشهور ومعروف وفيهو حركة نشطة او زى ما بيقولو الشغل فيهو (بيعشى ) ..البضاعة ما بتكون مفروشة بس بتكون مخفية جوه الجيوب ولمن تعمل معاينة (سريع تشوف الحاصل ) دا (2100) نوكيا ( 3100) (6100) (8850) وكوم من الارقام طبعا الاسماء مختلفة طبقا للصنف والنوع و(الموضة ) .....عاشقة ...... ويا حبيب ما تضرب لى التلاتين عشرة تانى مرة لانو بعتو وركبت عاشقة .......... وكاظم الساهر ..اصالة وقائمة تطول من اسماء المشاهير . ..المهم وقفنا وبقينا (نفاوض ) طبعا علمنا من مرافقنا ان الشغل هنا يتم على درجات ..الشغل يعنى (الصفقة ) فاما ان تاتى بمبلغ (قروش فلت ) وتحدد الجهاز التى تود شراؤه واما ان تحضر جوالا وتضيف (تدفع فرق ) واما يدفع لك وهذه غالبا لا تحدث الا اذا كنت زول (مقرم ) وود سوق اما اذا كنت (افندينا ) او زول (مغروض ) فى موبايل لخطيبتو او مرتو فشيل شيلتك ... تدفع بس . طبعا بدينا المفاوضات وشيل خت قربنا نلم لينا فى موبايل (ظريف ) بسعر معقول يتوازى مع مقدرات صاحبنا (الطالب ) المالية وفى الوقت ذاته نثبت لاولاد الخرطوم ديل ان (اولاد امدرمان ) مقطعنها ولسه عين نجيضة وكدا وما (بتخمو ساى ) ..بالله يا جماعة بس عاوزين نطلع القروش سمعنا ليك زول باعلى صوتو (كبست ) ..نلقى المحل الكان فيهو قريب خمسين شاب ....... فوووووووووو ... كلهم اى زول مسك شارع (جاااااااااااارى ) فتوجسنا خيفة ...فى شنو ...الجماعة التجار الشباب شبكونا ليك ( اجرو ) ..........نجرى ... ليه قالو ليك ناس البلدية ...والنظام العام ............ طبعا انا واصحابى كنا عاوزين (نقيف ) ونتفاهم ونضع النقط فوق الحروف لكن سرعة جرى الناس ونظام (سعيد عويطة ) البيطلعهم من السوق خلانا نحن برضو ...نفتح ... ونطلق سيقاننا للريح .( .الزول ) برضو يحصل على قدر من (الرياضة ) ويحرق كم شحمه وكم سعرة حرارية ... بعدين الموبايل ملحوق ...شنو يعنى لو الزول دا ما جبنا ليهو موبايل .. ما عادى ياخ ... وجرينا لمن مرقنا فى نيفاشا .. السوق .................................مش الطاولة
12-18-2004, 05:35 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
الشعوب لا تندمج إلا مع تراثها وأكلاتها الشعبية والفندقية (كلام مقتبس بالأخضر والأحمر) بمناسبة الجرية دي هاك الدفرة دي واحد سوداني متشنطط أبهه كمال في جمال وقشرة طيري الجلابية كسراتها كان مية أظن والعمة أكبر من حقت قفلنا داك والزول كان شفتو تقول أبو عاج بدون أوراق ثبوتية لا إقامة لا زيارة ولا حتى عمرة تاريخ صلاحيتها ممدد الكلام ده في مكة وشارع إبراهيم الخليل المودي للحرم المكي ملان لي عينو fall ما تزعل من المصطلح العنجليزي وزولك وقع في مربط تفتيش جوازات (كشة) قام العسكري جاي لجهتو زولك فك رجيلينو للهو زي جريتك دي والناس لامن شافو الجرية دي قامو فكو وراهو وزولك يتلفت يشوف الناس كان وقفو إلا وراهو أمم متحدة جارية هنود وبنغالا وباكستان وشرق آسيا وجنوبها وتشاديين ونيجريين يا زول زولك مع كبر العمر ما قدر يسبق قامو قبضوهم ليك ودخولهم باص الكشة ما زي الكومر حقنا داك ده فيهو إنسانية مكيف وكده المهم العسكري قام سألوا ليك إنت يا زول ما مقيم؟ رد وقال ليهو بصوت اليأس المطاردو من جوه بلدو لامن لحقو لبره!! آآآآآآآآآآي قام واحد هندي سمع الرد عرف أنو ما هو المعني بالكلام ده كله قام قال للعسكري سديك (صديق يعني) سديك أنا ما في عمرة العسكري قاله ليهو طيب مالك جاري قام بتاع شرق آسيا ولا جنوبها قال ليهو سديك (سوداني جري) حليل ناس زمان الرسخوا القيم حتى في أذهان القوميات الغير ناطقة باللغة العربية عن قيم مجتمعنا السوداني. حتوتة إنتهت المحبوكة بس قاطعين مالكم شبكة الجوال عن نيالا أتحسسنا إمبارح وما أتجسسنا لقينا الشبكة شوية عطلانة وبعد فترة جانا الرد بيقولوا لينا الدواعي أسباب أمنية الله لا يحرمنا التواصل ويسبقنا بنعمة الأمن في بلادنا والحمد لله الذي سخر لنا هذا وشوية جوالات للأحباب والأصدقاء بالداخل والخارج ولك ودي عبدالرازق عيسى الطالب
12-18-2004, 10:27 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
النصوص لسع ما نزلت أرض الوقع الناس مترقبة وعايزين يكضبو الشينة والسياسة دي محروق أبوها الناس من زمان كرهتها أصلها شغلت العواطلية الزينا كده بالمناسبة في واحد قال لي ما في مهنة أسمها سياسي وفي مهنة أسمها مهندس.. دكتور .. نجار.. ممرض لكن سياسي دي شغلة المحتالين العواطلية وكمان الإنتهازيين والبقدر بحرق أخو داك هو السياسي الناجح السياسة في بلاد خلق الله ثمرتها هي رفاهية المواطن وحقتنا الما مضبوطة دي نصب وإحتيال ومحسوبية وقرار فرادي والبحاسب منو ما معروف؟؟ وكنا في حفلة ليلة واصل عبدالرازق عيسى الطالب
العزيز ابو حميد : بالرغم من انو انا جاي من الاجازة قريييب لكن لكن وصفك لي السوق العربي منطقة اراك تحديدا خلاني اشتاق تااااااني اجي السودان ..بتزكر اني كنت مواعد صديق حميم لي عشان ماشين عرس في جبرة وكانت نقطة الالتقاء البرج ولمن صاحبي ده وصل وقلنا نمشي قال لي دقيقة بس اسة بجي واخد ليهو 10 دقايق واذا بقدرة قادر تحوول ال3310 الي موبايل ااااخر قشرة رقمو كم ما عارف .. اسماء الموبايلات زكرني بي نكتة الحنكوشة الرباطابية القالو سرحااااااااااانة كده قام جا راجل اداها لكزة كده وقال ليها يابت سرحانة كده مالك عاشقة؟؟؟قالت ليهو لأ 3310
راجينك والفرح الكبير شوق انتظار عندك نقيف ..واصل
12-19-2004, 00:51 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
طبعا امس كان (السبت ) والسبت اخضر وطبعا بداية اسبوع وزحمة شديدة ولو شالتك نومة (حتقتنع ) من بطء المواصلات ومسلسل (ما راجعين ) وطبعا اذا كان فى (طلبة ) واقفين جبنك خلاص (حقك راح ) وللاسباب دى عادة بيكون المكتب (اللستك ) فى الليلة دى غير مكتمل النصاب وصحيح ان ما كامل العضوية (موظفين ) لكنهم برضو (بيدقشو ) فى السوق شى سمسمرة وشى تجارة على خفيف كدا ، المهم جيت انا امس من تمانية ونص كدا وقفت لقيت (عماد تجة ) السياسة (رابطة فى راسو ) وشابك ليك الجماعة نيفاشا .. وابوجا .. ومنى اركوى ونقد والترابى والعجوز والبحر .. كمية مرافاعات تحير لمن ما تعرف تجه دا لون السياسى شنو طبعا هو خريج صحافة واعلام اشتغل فترة كدا فى جريدة مستقلة لكن طبعا (ما كانت ) مستقلة وصحبى كان بيكتب ويحاور ناس كدا ما عجبو رئيس التحرير قام (دك ) المواد وطنش منها وما نشرها قال شنو ضد سياسة التحرير - فى الصحيفة مش بتاعة الاستاذ حمدى - قام عماد دا عمل شكلة ناس صحافيون (بلا حدود ) قربو يطلعو فيها بيان من اليوم داك (عمدة ) بقى بس يجيب الجريدة ويشوف مقالات كمال الجزولى والطيب زين العابدين ويشترى الكابتن يقرا مزمل ابو القاسم ويقول ليك خلاص ..الباقيين ديل ..الله معاهم ..مافى كتاب ولا صحافيين فى البلد دى . عماد تجه طبعا عندو اراء سياسية خليط كدا يعنى عندو التزام دينى صارم وبيحب تشدد انصار السنة فى اداء العبادات وفى نفس الوقت الزول دا بيحب الصوفية يعنى يوم الخميس العصر تلقاه طوالى لبس جلابية خضراء ومشى (حمد النيل ) حضر الليليات وخش فى حلقات الذكر ويجى راجع يصلى العشا او الصبح فى زواية انصار سنة جنب بيتهم ، ولو سمع انو الترابى (قبال ما يخش السينما ) عندو ندوة ومحاضرة لازم يمشى بدرى ويقعد قدام و(يسجل ) الندوة ما يخلى فيها مقاطعة تكبير او تهليل ، شفتو الزول منفتح على الجميع كيف واكثر من كدا جنو وجن حفلات عقد الجلاد وانو يسمع شعر للقدال (القاء من القدال نفسو )وعندو تسجيلات للقدال سجلها من سهرة مع حسين خوجلى فى ايام لها ايقاع ...وعماد دا شغال بمبدا من كل بستان زهرة وطوالى يقول (ما عندى قشة مرة مع زول ) وبقرا اى حاجة وبقيم الكويس بختو فى راسى والكعب .. التراش طوالى ! اها بعد المقدمة الوافية عن عماد ..نرجع للستك ..لقيت ليك عماد واقف مع منو ..عوض شعلة ...لا حولا ..قلتها فى نفسى سرا ثم كررتها جهرا قبل ان اصل (عوض شعلة ) شخصية تموووووووووووت فى السياسة ودائما ياتى بقصص وحكايا وتفاصيل لمشاهدها السودانية الله وحده يعلم المصادر التى ياتى منها بهذه الاحاديث .. الترابى - الحديث لشعلة - خطر ..يا زول البشير لو فك الزول دا بيركب التونسية الشيوعيين ديل من كعة نميرى بقو حمام ميت ..جون قرنق اووووووووب ..معلم وهكذا فان لكل تنظيم وقائد سياسى ببلادنا مقاما وتحليلا عند (عوض شعلة ) والغريب وهذه معلومة قد لا يصدقها احد ان عوض شعلة يحب جورج بوش لدرجة ان صالون منزله يحتوى على عدد من الصور الكبيرة التى قد لا تتواجد على حوائط جدران قائد حملته الانتخابية الاخيرة .......... جاااااااااااااااااى بعد شوية ..
12-19-2004, 01:46 AM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
وأنحن فايتين بوستك ده وين يمين بنحسب ليك من وقت تخش البورد إن شاء الله قال ليك زائر خليك لامن تسجل عضو كمان بس جيب معاك ناس تجه وشوية فول وتسالي من الحاجة وما تنسي كباية الشاي لك الود ما تتأخر
Quote: مان تو مان
يمين نفسك حاسبو ليك بس أوعك من دافوري ناس عبدالعزيز ونهار عبدالرازق عيسى الطالب
العزيز محمد حامد جمعة : نختلف ونتفق معك وذي ماقال العجب نحن بنشجع اللعبة الحلوة ومتعة الكتابة ان يكتب الكاتب بالعربية السهلة او ما يسمونها لغة الصحافة كما يكتب بالعامية والمنبر يتحمل كل مستويات الكتابة، اكتب كما تشاء وكما تريد فكتاباتك جميلة ولاتهتم بالمدعين والادعياء والمتفذلكين، ومن يقرأ للطيب صالح يعرف كيف يستمتع بعامية أهل السودان الفصيحة
12-19-2004, 02:49 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
يا علاء الدين ......... بالجد تعال صادى البلد شم نفسك وصلح روحك وارجع ..........والكلام مكرر للجميع ..الله يقطع طارى الغربة ياخ ..فرتكت مكتبنا كنا عشرة ويمكن خمساتشر هسة بقينا اقل من سبعة ونستعين بقوات صديقة من اولاد التاسعة ومرة تصدقو عندنا ناس تجى من العرضة وودنوباوى ... المهم لقيت ليكم عوض شعلة وعماد مشتبكين ونقاشهم كتير خلاص ..سلمت عليهم ... يا شباب السلام عليكم ..يا استاذ كيفك ..تمام و(حق الله بق الله ) جلست _بالتشديد – وين باقى الناس دى واردفت قائلا وين ( ايهاب ) ما شايفو بضرب ليهو قافل موبايلو وهنا يتدخل عماد ( ياخ بتبالغ ... انت ما عارف ) قلت ليهو بقلق فى شنو انشاء الله مافى عوجة .. ثم عرفت لاحقا ان (عمك فضل السيد ) خال ايهاب قد اتى من بورسودان مريضا وانهم قد ذهبوا به للمستشفى التى احتجز بها لحين التعافى .. .. طوالى (زفتها ) ليك مع عماد ..ووقع بيننا نقاش خرجت منه انا الخاسر بالطبع لاننى اخش (الحلة ) لمن تلم شروقها وتغادر ودائما على هذه الحال ، وبالتالى لا يتبق لى من وسيلة تواصل سوى ان استعمل هاتفى للاتصال على الاحباب والمعارف ثم استسفرت عن اسباب اغلاق ايهاب لهاتفه فابلغنى عماد باسى ( الزول سخن وما عاوز يقصر مع خالو قام فطس الموبايل ) اى باعه .. .. وعلمت ان (تجه ) سعى لان يتصرف وانه عرض (كمبيوتر ) نص عمر كدا للبيع يمتلكه لكنه (ركب ماسورة ) اى ان شخصا ما استلمه ولم يدفع له وادخله فى دوامة الكعب (الدائر ) امش وتعال والله شوية والشيك (دقة فى العراضة ) وغيرها من لغة اولئك الذين ياكلون اموال الناس بالباطل والتسويف .. وبعدين يا عماد ........ يتدخل عوض شعلة شوفو انا عندى قروش امانة من اخو مرتى ممكن اديكم ليها تدو منها ايهاب دى جزء وتشترو ليهو موبايل تانى لكن بس تجتهدو سريع وترجعوها لان مرتى (مرعبة ) وممكن لو قروش اخوها دى راحت تعمل معاى شكلة لرب السما .. وكان عرضا كريما لكنه محفوف بالمخاطر فالدنيا عقاب شهر وعقاب ميزانية يعنى حنصرف يوم (25 ) ويمكن المرتب زاتو يجى عندو انيميا وملحوس تقوم القروش بتاعة الزول (تقصر ) لكننا قبلنا لان ساحة الخيارات امامة لم تكن تسمح بالتردد والانتظار واستلمنا المبلغ بعد ان تعهد معى (تجه ) بالذهاب صباحا للشخص الذى استلم الكمبيوتر وطبعا اوصيناه ان يصطحب معه (ناجى الحلبى ) باعتباره رجل شرطة (فرد ) لكن مركب مكنة لواء ......وبالفعل نجح الحلبى فى الحصول على مبلغ صفقة عماد ونال شعلة امانته واستعاد ايهاب جواله ..شفتو التكافل الما عاوز ليهو صناديق ومجالس ادارة . طبعا يا جماعة العمل الاعلامى والصحفى يستهلك وياكل كل زمنك ولا يترك لك حيزا الا فيما ندر للتواصل مع الاخرين واحيانا تاخرك وغيابك المتواصل يدخلك فى مواقف محرجة ولا زلت اذكر اننى وقد كنت محرر سهرة دخلت الى الحلة حوالى الحادية عشر مساء ولاحظت وانا ادخل الى اول شارع (بيتنا ) ان هناك جمهرة وان هناك صراخ وعويل للنساء ........ركبتى ساحت .. يا لطيف ... يا لطيف .. وعندما اقتربت وجدت ان (البكا ) فى منزل جارنا ...زاهر العوض ... تقدمت ..الفاتحة .. الفاتحة .. ووجدت ناصر و صادق ابو زقدة يذهبون ويجيئون ويخرجون ادوات الحفر من منزل شيخ ابراهيم وياسر فرينى يوقف عربته البوكس عشان يمشو المقابر .. وكنت اتساءل عمن هو الشخص الذى توفى ..طبعا سؤال زى دا بيكون (اشتر ) لو قلتو لزول من طرف ..يطلع قريب المتوفى .. وما ممكن اسال حسين فى ظرف زى دا وكل الشباب البعرفهم مشو المقابر .. وطبعا ممكن اشق الناس دى وادخل بيتنا .......شينة وعيب .. فتوكلت على الله وصرت اشطب كل شخص من (بيت ناس زاهر ) يمر امامى ..دا اخوهم الصغير ..حاتم ... دا اخوهم نزار .. المرة الكبيرة الماسكينها النساوين ديك الحاجة امهم .. ديك اختهم الدكتورة .. ودا زاهر قدامى ... طيب باقى ابوهم واخوهم (حموده ) ..اه ..قلت فى نفسى بيكون الزول المات دا عمك (العوض ) زاتو ...هو زول كبير وصحة طوالى معتلة .. وما نشوفو خالص .. واستجبت لهذا التحليل حتى اعد الناس الجثمان واخذناه للمقابر وصلينا عليه صلاة الجنازة وكانت الليل قد انتصف واذكر واننا فى كل الطريق الى المقابر كنا كلما وجدنا (شلة ) طوالى يقيمو معانا ..الفاتحة ويمشو معانا .. اها بعد صلاة الجنازة لقيت ابو زقدة واقف جنبى كان متاثر ... بيبكى .. هداته وقد كان حاج العوض شخصية عليها افضال على اسر كثيرة بالحى كان والد للجميع ... ثم وجدتها سانحة لاساله اسمع انت وين حموده العوض .. ما شايفو وما لقيتو عشان اشيل معاه الفاتحة ..... نظر الى مذعورا .......ثم اشار ...للجثمان المسجى ........ لطمة عنيفة شعرت بها على وجهى ....... شنو ..........قلتها مذعورا وبصوت عال .......التفت بسببه نحوى بعض الاشخاص ....... الزول دا ما خليتو الصباح قاعد وسلمت عليهو واتونس معاى ومشيت منو ..مالو ..وعلمت لاحقا ان نوبة (ازمة ) قد داهمنه وتوفى بسببها بعد ان نقل على عجل الى المستشفى ......... رحمه الله واحسن اليه . معليش يا اخوانا قبناها ليكم غم مش كدا
12-19-2004, 03:20 AM
المسافر المسافر
تاريخ التسجيل: 06-10-2002
مجموع المشاركات: 5061
Quote: كمية مرافاعات تحير لمن ما تعرف تجه دا لون السياسى شنو طبعا
البقر كان جفلن أقرعو الواقفات مثل من بادية بقارة جنوب دارفور وزمان قالوا الناس في رهيد البردي تاريخ هاك الدفرة دي ومن رهيد البردي لوحة ولك ودي عبدالرازق عيسى الطالب
12-19-2004, 11:54 PM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
سلاااااااااااام عليكم اها الليلة وامتداد لحديث الامس هاكم الونسة دى والليلة كانت عن (الوضع السياسى الراهن ) طبعا يا حليل الندوات وطق الحنك عبر الماكرفونات والملاحظ انو الندوات السياسية بقت (ببح ) مافى ..ومافى سبب غير انو الاحزاب السودانية بس فالحة (تقدنا ) فى القنوات الفضائية والزعيم قام والزعيم مشى والزعيم (خش ) والزعيم مرق لا مكاتب سياسية شغالة ولا امانات عامة متحركة كلو نايم ولو سالت اى زول منهم يقول حرية مافى ؟؟؟؟؟؟؟؟ رغم انو الواحد منهم يصرح ويتحدث مرات من (قاعة الشارقة ) ويقول الرئيس البشير دا كعب وفلان سوا وفلان ترك ودا يا جماعة ترك نقاش تصورات العمل السياسى للحافلات والمركبات العامة و(اللساتك ) والزول لمن يكون براه بيستحمى ! وامس اخوكم ركب حافلة صغيرة سايقها واحد عمك عجوز بنظام (تاتيه ) يعنى المشى خطوة خطوة و(السايقة واصلة ) اها فى واحد باين عليه خرمان (نقاش سياسى ) تلفت جاى جاى وشافنى ماسك كمية من (الجرائد ) كل شوية وانا بقرا احس ليك بعيونو جارية على السطور معاى اخليهو ليك لمن يشخ (خط ستة ) بتاع الخبر والمقال المكتوب اروح طوالى فووووووووو قالب الصفحة ( ضر بس ) احس ليك باحباط الدنيا نزل عليه اقوم احن عليه افتح ليهو صفحتو الكان (قافل عليها ) ويتم خبرو ......يرتاح ...ثم يتلفت ويمسح الحافلة (12 ) راكب بنظره ثم يخرج كيس (تمباك ) ويمط ثم يضربه على سطح بنطاله من ناحية الركبة ( بت بت ) ثم يدردم (سفة ) يمررها بطريقة مقززة نحو انفه فاحس بوهجا يضى من عينيه قبل ان يمسك باحد يديه شفته السفلى ويمطها حتى يضع سفته فى مقامها الصحيح ومرقدها الاخير .. ثم يخرج راسه من الشباك ذا الزجاج المترجرج ويبصق ويرمى بعض (القش ) الذى يتواجد فى بعض انواع ود عمارى ثم يسترخى ويكون هناك بعض الركاب الذين قد غضبوا سرا من كل هذه العملية لكنهم يصمتون على مضض خاصة الفتاة التى تجلس فى منتصف المركبة وقد رايت كل علامات وبيانات الشجب والاستنكار ولعل مقت (الجكس ) لهذه النبتة والكيف (الشين ) المقزز برايهن ما جعل الاولاد يتعارفون على لفظة (المكالمة ) اذا ارادوا الحصول على (سفة ) قال احدهم اسمع موبايلك لو فيهو رصيد ياخ عاوز مكالمة ! ثم وبعد ان استرخى صاحبنا و(مخمخ ) وكانت الاصوات من الركاب ترتفع منتقدة بطء قيادة (سايق الفيات ) ولماضة الكمسارى الذى اوقع عدد من المشاجرات يحق بها ان يحصل على لفت نظر من (الامم المتحدة ) سالنى اسمع المفاوضات فيها جديد ..قلت وانا اقلب الصحف امامى ..مافى جديد .. وهنا تدخل احدهم من المقاعد الخلفية ..ياتا فيهم ..كل يوم جماعة زعلانيين وعاوزين منبر وكل يوم زول يعمل فيها سيدا ويقول تعالو فاوضونى ........وكانت البداية ........كلمة هنا ..كلمتين هناك عشرة من عمك السواق وكلها يا جماعة تصدقو سابة وساخطة على الحكومة ودبل كمان على المعارضة .... بالله فكونا البلد دى يا تبقى فيها قرن ومسئول وحاكم يا تطلع بها تعمل لينا فيها ابو الوطنية يعنى هسة عندك مبارك الفاضل دا زمان كان فى الجزيرة - يقصد القناة - بيقول الحكومة دى شنو شنو وجا راجع خشاها واشتغل فيها امبارح مرق تانى شبكنا الحكومة دى شينة ومعفنة ولازم تمشى ولا ناس دارفور ديل كانوا فى الحكومة ومعروفين هسة مرقو بره شبكونا العرب بيطهرونا وبيقتلونا ولازم تعملو ليهم داك وتمنعو عنهم داك وكلهم الحكومة والمعارضة يلخبطو الدنيا ويجو يتصالحو ونجر نحنا هوا . الله يلعنهم قالها سائق الحافلة .. ناس باعت بلدها وسمعت اهلها عشان يجيبو امريكا والجن الاحمر عشان يبقو حكام على الطلاق البلد دى من ما ماتو ناس ازهرى مافى خيرا جاها من حكومة ولا معارضة .. لكن باقى الحكومات الحزبية الوراهم ما اشتغلت حاجة الا النضمى وشيل الحال ..ويتدخل راكب اخر ..لكن الحرية والديمقراطية كويسة يا جماعة يعنى بتاخد راحتك ويفاجا بهياج جماعى ........... جااااااااااااى راجع
12-20-2004, 00:15 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
Quote: ولعل مقت (الجكس ) لهذه النبتة والكيف (الشين )
زمن ردئ زمن تعيش وشين أنا خايف الجكس نفسو يقيف طابور الوطنية صف حريم وصف رجال لا إختلاط لا نظام عام. والجكس نفسو يقوم يمطر ويعطر ويمد الكيس مصحوب بالإبتسامة ومع السلامة. زمن إنقلب فيهو الحال زمن لحم الضأن تنهشه الكلاب لله درك واصل واصل عبدالرازق عيسى الطالب
12-20-2004, 03:50 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
اها جينا ........ معليش يا ناس بس طبعا زى ما اوضحنا سابقا اننا ايد هنا وايد هناك وربنا يسهل . طبعا زى ما قلنا سابقا وفى (الحلقة الماضية ) ان الحافلة الصغيرة التى تمشى الهوينا قد تحولت لمنبر صغير يضج بالاحتجاجات حين جاء ذكر السيدة الديمقراطية والحرية ..........لا حولا .......بالجد الظاهر بالطريقة دى الانتخابات الجاية الا الاحزاب ترشح عنها ناس فاروق جبره وهيثم مصطفى عشان تلقى ليها زول يديها صوت او (سوط ) ..المهم معظم الاحتجاجات خاصة من الركاب الذين تدل ملامحهم انهم فوق الاربعين وانت (ماشى ) كانوا ضد عودة الاحزاب ...فى واحد كدا قافلة معاه وزهجان حسم ليك النقاش ........ياخ كرهتونا سياسة فى سياسة من الصباح تفتح التلفزيون تلقى سياسة تصحى تلقى سياسة تحلم تلقى سياسة .......الحكاية شنى ..ياخ نحن بس عاوزين اولادنا تقرى وتعيش بامان وما مهم زاتو الحكومة شنو ..انشاء الله اسرائيل ..... لا حولا ..قالها السائق وهو يتبادل الشتائم مع سائق عربة ملاكى حاول التخطى بجلافة .....شفع طير اتعلمو السواقة دى وين ما عارف ليتدخل صاحبنا الغاضب ......زى دا خش فيهو خفج ليهو عربيتو ! والغريب وانه فى وسط هذا النقاش كان هناك طالبين (طالب وطالبة ) يجلسان فى كورنر الحافلة (جناح شمال ) ساكتين وبتابعو النقاش بملل ظاهر ثم انخرطا فى حديث عميق وبصوت هامس لم ينجح احد فى التقاط كلمة منه ، ونحن فى وسط هذا الخضم المتلاطم من المناقشات مررنا باستاد المريخ - كنا فى شارع العرضة - ليقول احدهم .....بالله شفت المريخاب ديل جضمو الاستاد دا كيف ..وبصورة تلقائية اتجهت كل انظار الركاب نحو الاستاد الذى ينبئك عن محتوى جميل من المبانى ليرد اخر متهكما ويبدو انه هلالابى (انتو ابنو ونحن بس نرشكم ) لتنفتح مرة اخرى المناقشات وهذه المرة عن الرياضة و(التسجيلات ) ويقسم احدهم ان ابن اخت بنت عم والدة خالته - المهم وصفة طويلة - كان سجمان فى القراية وطوالى ماسك (التيرس ) هسة الناس تخش وتمرق تبارك ليهم على فلاح ولدهم لانه سجل فى احد نادييى القمة بمبلغ (كم مليون ) كاش ... جنيه ينطح جنيه ......امو وزعت الحلاوة وماشية (القبة ) تجيب ليهو (زوارة ) عشان العين وجارتهم (النجاهة ) ولا اخوانو ديل قال ليك بقو فى الحلة (لا يمكن الوصول اليهم ) ... اها والحديث للراكب ... قال ليك (الولد ) زاتو ركب مكنة والى ..وبقى بس يوم صورة فى الجريدة ويوم ناس مجلس الادارة (عازمنهم ) وشنو ما عارف لمن بقى مقطوع من (الاهل ) ما بيمشى يشيل فاتحة ولا يواجب زول فسالته قاطعا عليه سرده الشامت والمفتخر بقريبه فى الوقت زاته ( انت نصحتو بشنو ) فالتفت نحو واستدار بصورة عنيفة لطم بسببها ودون قصد و (بكوعه ) الشخص الذى بجواره ..وقال .. الله سورى ...ثم خاطبنى قائلا ......نصيحة شنو يا اخونا انا الود دا بقيت ما قادر اكلمو لكن يوم لميت فيهو بس قلتا ليهو (امسك قروشك وشوف ليك مشروع اقشطها فيهو يبقى ليك نقاطة ) والعب كورتك قدر قروشهم ...ومضى ليقول ( نصحتو كمان قلت ليهو يا زول راس مالك كسرة فى ركبتك ولا يغلبوكم يوم هلال مريخ ..تمشى الشارع زيك زى مية زول العب منك ......ثم اضاف ....هسة عارفين __________ وسمى لاعب قومى كبير لطالما هتفت له الصحافة والجمهور والرشيد بدوى عبيد (قوووووووووووووووووووووووون ) هذا اللاعب هسة سايق ركشة والمغالطنى هسة يمشى معاى لفة شقلبان تلقاه واقف سائق ركشة ولابس سفنجة اضانها مقطوعة ..لانو عمل فيها بحب الشعار ووفى لمن شطبوه التكتح ما عندو !
12-20-2004, 05:02 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
يا حماددآآآآآآآآآآآآآ شايلين ليك فرحنا زي عيونا ليهو غيمة
Quote: ايد هنا وايد هناك وربنا يسهل
وأيد لأيد تجدع بعيد بدوي بلدياتنا اسمو عبيد زي أسم مذيع الكورة ده وصل الخرطوم في ضيافة أخوه العسكري الساكن في القشلاق طلعوا أم درمان زيارة للحبان يا واهب كل زول بكبرينا القديم داك ولامن قسمو المسافة والكوبري إتهز. عبيد إتململ والسكات طال والأيد إنطبعت في الخد من بعد التفكير قام سأل أخوهو وبكلمات وإليك هذا الحوار: عبيد: إنت البحر ده حق منو محمد: حق الناس كلها عبيد: أها يا محمد إنت البحر ده حفرا ياتو محمد: يا عبيد ولضمي البحر ده حفرا الله عبيد: الله لما حفر البحر ده ترابا ده كبه يين؟ محمد: رده مضجر يا محمد أخوي.. ما شتتا عندك في الصحرا دي! عبيد: هيع الله أبو ضراع. إنتهي الحوار وكلاً سرح في باقي زمنو دون مقاطعات ولا ملاسنات لأنو الناس كانوا في الحافلة منهكة بعد يوم عمل طويل. ووصلوا لأول قريب ليهم في حي الأمراء وكان الشاي رمز الحفاوة والترحاب والسؤال عن الدار والأهل.. وبدأت الكلام بالسيسي زي دخولكم لكبري الفتيحاب.
بسم الله الرحمن الرحيم الحكومة كمان بغالطوها؟ واصل واصل باين الكلام ماشي لجوه أم درمان الناس زمان أتغالطو قالوا أم درمان دي مدينة مصنوعة ولا موهوبة وقالوا الطابية المقابلة النيل دي بعد مية سنة من مرور كل عوامل التعرية عليها ليه ما زالت صامده..! وناس أم درمان ليه مهمشين ناس الخرطوم ولامه كل أنواع الفنون وناس تجه وشلة اللستك والرياضة والكورة والإذاعة. وناس الخرطوم مهمشين بحري في الوزارات؟ وناس بحري ليه مهمشين التانين في الصناعة والزراعة والاقتصاد. الكلام ماشي لجوه يا واهب كل شيء.. والركشة لما إشتد ساعدها إنقلبت لأمجاد وعيال صغار بيلعبو في نص الشارع بالتيكو.. وناس الكارو شايلين الرغيف وبنادو بيقولو بنصلح العناقريب. زمن عجيب..! دفرة يا ناس ما نجي نلقاهو بكرة البوست ده مدفون تحت المية وبلاش تهميش عبدالرازق عيسى الطالب
12-20-2004, 11:12 PM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
في حفلة ليلة وشلة اللستك تجه الزعيم أم درمان السيسي، كبري أم درمان القديم وكبري مكة. خلوة البرعي وهامش كوريب. الرجاف وتوتيل وجبل مرة وكرري وجبل دود وجبل موية السنجك (أسم رقصة من بادية جنوب دار فور يا علاء)ما عايزين الكتاحة الكاتم (رقصة البادية في الأفراح) الشبال رقصة من الشمال الشوبش (قيم سودانية) أركز .. أبشر.. أيدك فوق والفرح والكره متباريات الخرطوم ملتقي النيلين الناس حلمانة بالديباج والحلي والحلل. ومشينا بعيد شايلين العيد في قلوبنا وفي دروبنا. التجاني حاج موسى.. ومحمد سعيد العباسي .. وبدر الدين حسني فرسان في الميدان.. ووجه النهار.. والمقرن ملتقي النيلين وفي عز الليل يا هاجر والدمعة في الرملة بتحكي شوق الصيف لو شئت نجتني من الخيل نهدةٌ ** ترى خلفها الحو الجياد تواليا وفي حفلة ليلة
أم دافوق وأم درمان وأم ضو بان بوادر رؤاها لوحة غشاوة حلم جميل في الوجدان
في رهيدي البردي تاريخ والرهد أبو دكنة.. ومن رهيد البردي لوحة حراز والبيت المسكون وجوج ومأجوج وإبن مشيب المرجوج. ولك ودي عبدالرازق عيسى الطالب
12-20-2004, 11:28 PM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
جنجويد شنو يا زول أنا سوداني أنا ما قلنا خلاص ما في داعي لإثارة النعرة العنصرية المنتنة دي والما ليها نهاية دي. كلمة حروفها مشوشة لهذه الذاكرة الخربة.
قل معي لا عاش من يفصلنا أنا عنصري إذن أنا ملعون قالها الشيطان خلقته من طين وأنا من مارج من نار تكبر وشالتو العزة بالإثم طرد من رحمة ربو توعد وكان له الوعد.. إنت عايزنا نطرد من البورد ده ولا شنو شرك عجيب ده يا محمد أنا بعيد عن جغرافية المكان أنا في قلب الحدث والوجدان أنا أحلق في مساحات الوطن الرحبة الضيقة شنو الله يبعدها مننا ويرفع البلاء وينزل الشفاء في الصدور ويفقهو قولي. ولك ودي تاني مرة
عبدالرازق عيسى الطالب
12-21-2004, 00:55 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
أمس الجو كان (معقول شوية ) يعنى البرد كان (نص كم ) والظاهر السنة دى الشتا في الخرطوم ويمكن (السودان ) حيكون عادى والظاهر حينستر مع الناس فى (راس السنة ) .......راس السنة ..والدنيا راس سنة .. متذكرين ناس (الجو الرطب ) .........والدنيا راس سنة ومافى طريقة الا __________ خلوها مستورة .. اها امس كان النقاش حول برنامج راس السنة و(الترويسة ) طبعا (ود الامين ) وقاصدين به (الفنان ) عندو حفلة فى نادى الضباط وقالو عقد الجلاد طبعا باقى الفنانين (الفكة ) ناس ساطور وفرفور ومحمود ومشهود ديل بوستراتهم ما تديك الدرب ، وكان اقتراح ايهاب واويلو اننا (نكتل ) حفلة فى نادى التنس لكن (مولى ) وتجه كانا من انصار اننا نحتفل حفل (خاص ) كتامى صلاة ميت وشخصيا وقفت فى وسط الاراء ملتزما بالصمت رغم ضجة المكان حبورا بمقدم وليد صديق من مهجره فى اجازة وصفها بالطويلة ...وليد صديق هذا حكاية من الامتاع والمؤانسة فالرجل عرف ومنذ زمالتنا له باكرا بالمدرسة الابتدائية وحتى الثانوي العالي – أيام الأبيض والبني – عرف بأنه اكبر (مستهبل ) ونصبناه (خبيرا وطنيا ) فى فتاوى وصياغة تبريرات الاعتذار إلى جانب انه مرجع ثقة في كيفية (التمارض ) قبل حصص (الاسبلنغ ) ولسعات الأستاذ (ALLFINE ) أو المقبول والذي أطلقنا عليه ذاك اللقب لإكثاره من استخدام تلك المفردة وكان ذلك الأستاذ من اللذين يؤمنون بان العصا لمن عصى ويا ما شفنا وذقنا تحت يديه أهوالا من العذاب إلى حد انك حين تمر بجوار المدرسة كنت تسمع وبلا خفاء .....بب بب ... صوت صادر عن الجلد بخرطوش موية اسود .....ثم يأتيك الصارخ .......وااااااااااااااااا........... وكان من دفعتنا زميل جبااااااااااااااااااااااااااان ما ان يرفعه جعفر حريقة وعادل النص وديل ناس خط مية غرب وكتيبة (الشد ) فما ان يرفع ذلك الزميل لنيل حصته حتى يولول وينوح و(يكرش ) ظهره و.... وهو ينادى باسم امه ..حاجة شريفة .. وبالطبع فان هناك صنف اخر من التلاميذ عتاة قساة ومناضلين صبورين ياما جلد وهبتو بالخرطوش الاسود ولم نسمع لهم صيحة الم او احتجاج .. وبالعودة لزميلنا العائد فى اجازته (وليد صديق ) فقد كان والحق يقال وعلى ضالة جرمه وحجمه زول مصيبة .. يمارس كل موبقات التلمذة حيث يهرش بعض زملائه ويجبرهم على دفع اتاوة اسبوعية نظير مخارجتهم من مقاتل (اولاد جبون ) وهؤلاء قصة وحكاية وشمارة مثل الحرافيش .. وكذلك كان وليد هذا لا يجارى ولا يتلحق فى ادعاء الدخول فى غيبوبة فما ان يسقط اول (سوط ) عليه الا ويكون قد انتفض وقد نثر بصاقا من فمه وبيض عينيه واخرج لسانه متدليا وجسمه مثل (الكفر ) ينتفض هنا وهنا وطبعا فان كل الحكاية وهمة وتمثيل الذى يشارك فيه بعض الكمبارس و(الفرد ) بدور الصراخ ..امك ..كتلو ...ونقفز عبر (الكنب ) الى حيث يرقد وليد على حافة الموت ويكون الاستاذ قد ملاه الرعب والقلق ..مالو والود دا مالو .. فيصيح صائح منا ..مالو كتلتو ..وااااااااااع ويذرف الصائح كمية دموع ناس الشعر والغنا بتاع حرق الجوف ما لاقينها ........ دقائق ..........وبرجع
12-21-2004, 01:53 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
كنا في حفلة ليلة الزعيم وشلة اللستك والحفل جوقانه النادي الضباط وضباط الصف وعوائلهم ده محل برقصو المستجدين في الطرف الآخر من المساحة المخصصة الملكية هناك في مساحة مهمشة نصفها مليان بباقي شعاع الكشافة والنصف الآخر مظلم وكنا وكنة وكنهها. وكانت حفلات إبداع موسيقي ومهرجانات الفرح في ليالي المآتم. تعانق متباريات عالم يجيك بالعيد بخيت وسعيد والشيخ أبو القريش تضويك بسماتو والشيخ القوني السنوسي ضوالبيت الناس تترحم لي رحو (الله يرحمه) والبركة تهل لمرامندي وأم روك جفاوة نحت ذاكرة منهوكة بالخراب طوال ناس البال حكايات رائعة قصص طرائف نوادر أغرب من الخيال حلم مفزع جاك راكب حمار نومو قربة ملانة لبن نازة عسل بخسة بروابة نسيه عصير إلين المغربية وقتين النقارة تدق تلاقي الساير .. عطية.. والمقيم حيمات
والدخاخين المتلتلة راشد الولاد.. وأم در عظيمة مدينة لها أبعاد. لا فول ولا بوش عصائد دخن بلبن ساكت. لا سكر ولا عجاج لا لبن الجداد نبق ولالوب والبلوم الصغار وغنو يا أطفال..! فوق عبدالرازق عيسى الطالب
12-21-2004, 02:49 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
الأخ/ محمد حامد جمعة لك التقدير قلنا كده ندخل سيسي أول تخريمة: إنت الزول الخايب عندنا في البادية بقولو ليهو شنو عشان ما نقوم نزيد الطين بله: لأسباب ذاتية: وقوة الدفع الرباعي لكيفية سد ثقوب العقل المركزي الجماعي ضد أهل الهامش (بإتجهاته الأربعة) نأمل أن نوفق في ذلك. شوف جنس الخيابة دي: وهاك الدفرة دي مدخل أول: قلنا يمكن في هذا الإطار: أن الإنتماء والإرتباط حتى في الكثير من مؤسسات العمل الإسلامي المفترض أن تكون راشدة في الموضوع، كان للتنظيم والأشخاص، بدل الإنتماء للفكرة القيم.. أصبح الإنتماء للذات بدل الفكرة.. وأصبح المعيار الذات، والعصمة للذات بدل الفكرة.. وأصبح يُعرف الحق بالرجال الذين يجري عليهم الخطأ والصواب، وتوقف في حياة المسلمين. أعرف الحق تعرفه أهله (رجاله).. وكأن الصنمية عادت للحياة لكن بأشكال متطورة.. ومكبسلة بشفرات الـ IBM و الـ DEL وحتى تلك المخترقة للحدود السياسية للدولة البوليسية. وكأن غياب القيم الحقيقية على الواقع في ممارسة الشعيرة كاد أن يوقع في التصنيم الخرافي.. وبذلك إنقلبت الوسائل أهدافاً وفشت فكرة التقوقع وإنكمش مفهوم الأخوة الشاملة. وفسدت ذات البين. وأصبح حالنا مع القيم الإسلامية: أقرأ تفرح.. كمن كان في بوست http://كنا فى حفلة ليلة جرب تحزن.. وحتى لو كانت حبة علقم معترضة ما بين الحنجرة والبلعوم تستفرغ؟ فكيف ونحن غرقي نتطلع لإنقاذ (الآخر)؟.. وحتى ولو تشبثنا جميعنا بذيل تمساح؟ ولعل من الأمور اللافتة أو الإصابات الكبيرة التي لحقت بالدعوة والعمل الإسلامي في مسيرته المعاصرة، وهي إنفصاله عن الأمة والمجتمع، ومحاولته تشكيل أجسام اخاصة يسهل رصدها ومحاصرتها وإتهامها وإفسادها حتى من داخلها. إضافة إلى أن مثل هذا الأمر، لم يتحقق بما هدف إليه. بمعني أنه إنما فكر فيه لإقامة نماذج تثير الإقتداء وتكتل الجهود وتجمع الطاقات لتحقيق أهداف أكبر، ومحاولة إيجاد البيئة والمناخ المناسب للنمو الإسلامي. والتدريب على المعاني الإسلامية وتجسيدها في حياة الناس، بمعنى إعطاء صورة عملية مغرية بالإتباع.. لكن المشكلة أنه في كثير من الأحيان حمل الكثير من الممارسات السلبية والعصبيات المأفونة والمعفونة والحزبية.. ولك مثال قريب في إنشقاق المؤتمرجية إلى شعبي ووطني. ومحاولة التنكيل بقيادات الطرف الآخر.. في تدافع الخلق للأعمار.. ولا يمكن الإنكار أن الدعوة والعمل الإسلامي قد حققا بعض النجاح في هذا المجال، إلا أن ذلك ـ في رأي البسيط يا أخي محمد حامد جمعة ـ لم يتحقق نتيجة لعمل مؤسسي جماعي، وإنما كان لعطاء بعض الأفراد المتميزين في مسيرة العمل العام.. باسم الوطنية وحب الوطن وحق المواطنة من باب الخيانة والأمانة.. أما ما وراء ذلك فقد كان كثير من جوانب الأداء محبطاً. إضافة إلى ما تولد عن ذلك من شيوع نزعات التعفن والإنغلاق والإعجاب بالذات، والتمجيد للأشخاص ونفي (الآخر) محل الدعوة، المسلم وغير المسلم.. وكأن التعارف صار جهوياً. لقد إنقلبت الوسائل في تشكيل الجماعات وإقامة المؤسسات لتحقيق كسب أكبر للقضية الإسلامية ـ إلى أهداف بحد ذاتها، وأصبحت حمايتها والدفاع عنها أسماً وشكلاً هو الهدف، دون النظر أو التقويم لعطائها أو جدواها ـ إن صح التعبير ـ أو إعادة معايرتها بالهدف الذي أقيمت من أجله، وأضحت الأسوار الحزبية الملتهبة سبيلاً لحماية الضعف والعجز وتأمين المصالح، وأصبحت المؤسسات في خدمة الأشخاص وليس الأشخاص في خدمة أهداف المؤسسات.. وبدأت التصورات العجيبة، نتيجة للغياب عن المجتمع وعدم الشعور بمعاناته وأمراضه ومشكلاته.. فالرفض والإدانة والجلد والحكم الغيابي هو الخطاب الرسمي والشعبي أو الثقافة الواعية والمضمحلة. وهو الحل. وبؤر التنفس والقوت اليومي، دون التفكير بالأسباب المنشئة لهذه الأمراض والمشكلات وكيفية تقديم العلاج.. برغم زيارات المجاملة وكلمة الترحاب.. والمسافة قريبة يا إنسان ما بين الذكرى والنسيان في ذاكرة خربة.. ومع شديد الأسف فقد أرتكز في ذلك على إنتقاء بعض الآيات والأحاديث وقطعها عن سياقها وأسباب نزولها وورودها لتأمين الشمروعية، دون النظر لسياقها وموقعها من مسيرة السيرة العملية وفقه تنزيلها، وعلاقة ذلك التكليف الوارد فيها بالإستطاعة التي عليها الناس.. فأصبح الخطاب عنتاً موحشاً مستغرباً ومفتتاً، وجاء التطبيق مشوهاً، ويمكن القول: بأنه أصبح منفراً وطارداً بدل أن يكون مغرياً وجاذباً، ومؤذناً بإمتداد أعداء الإسلام الأصليين والمحسوبين على الإسلام وتقدمهم لإحتلال مواقع مؤثرة في مجتمع الجيفة، وساعدهم في ذلك سوء التصور وسوء الأداء على حدٍ سواء. وبرغم أن هناك منكم دكاترة كبار لم يستطيعوا أن يقيموا الواقع ولو بجملة مفيدة. إذن أن أقف عن الإبحار معك هذا اليوم وأترك لك سفينة الإنقاذ لتدير دفتها وما زلنا http://كنا فى حفلة ليلة وحق لك أن تفخر بهذا وأنت في أرض المليون ميل فرح بتخطي حاجز الألفية الأولى.. برغم قساوة التيار.. والإجماع السكوتي.. لنلتقي على ذرى هذه السفوح المطمئنة عبر الأثير وداعاً ولك ودي ولتجه وشلة اللستك.. عبدالرازق عيسى الطالب
12-21-2004, 05:34 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
ابو رزقة ..........ياخ دى مداخلة دسمة القدمتها حقو تفصل ليها بوست منفصل .. لان كلامك فتح معابر كتيرة دى كنت اود بثها عبر هذا المنبر لكن كما ترى وتعرف هنا يعتبرون احاديث الاسلاميين (خارج القسمة ) لكن لا باس من الاخذ والرد عسى ولعل .. طيب نواصل مع وليد صديق ..دا زى ما قلنا خبير وطنى فى تقديم ارشادات (دك الحصص ) وبذل المبررات للغياب مع تحاشى (الجلد ) والتشهير فى طابور الصباح ..يا حليلو ..متذكرين يا جماعة ولا اذكركم .. صفا انتباه ..ونشيد العلم طبعا كان الواحد فيها يعمل زى ناس مصطفى النقر والفريق القومى نخت يدنا على قلوبنا و(نحن جند الله جند الوطن ) طبعا النشيد القومى دا فيهو غلط فى الرواية بتاعة اغلب السودانيين لانهم يقولو ( يا بنى السودان هذا رمزكم يحمل العب ويحمى ارضكم ) والصحيح (فاحملوا العبء واحموا ارضكم ) لكن ما ظنيت جنس السودانيين الهسة ديل بيحمو ليهم (مخمس ) بتاع واطة ..المهم سيبكم من ساس يسوس دى العدمتنا (النصاح ) وبفضلها بقينا عند ناس بره امة من السفاحين والمغتصبين والمضطهدين رغم انو دا كلو ما حاصل هسة (اويلو ) صاحبنا وعضو منبرنا فى اللستك من ما قمنا قام فى الحلة لا فى يوم حسينا انو غريب ونمشى بيتهم فى فرح وكره ونلاقى (حاجة ميرى ) وابوه الصول (علاء الدين ) دا اسمو واخوهو ملوال وجيمس دوت (سميناه كاربينو لانو لمن يكون صارى تقول كاربينو كوانيين بتاع الحركة المات فى بحر الغزال دا تومو ) اها ولغاية الليل دى (اويلو ) بيخش بيوتنا واخونا وصاحبنا ما فارزنه مننا ولو فى بكا بيجى (يشيل الفاتحة ) ما يطلع لينا زول بتاع فتاوى ينظر لينا فى (فاتحة الزول ) ويطلع لينا خديج ولا باطلة المهم نقول النية زاملة سيدا ..وبعد دا يجوك فى الفضائيات يشبكونا السودانيين بيضهدوا الجنوبيين وما عارف شنو .. ياخ سيبكم ..المهم وليد صديق زى ما قلنا كان تفاحة المدرسة سميناه وليد (تعريفة ) لانو كان مفتح وملحلح وبيعرف يجيب القرش من مافى ..طلع لاهلو بتاعين الجزيرة (يسمعون رنة قرش فى المريخ ) ناهيك من الموردة والخرطوم تلاتة اها وليد دا مثلا كان جيبو مليانة (لبان سندباد ) ويبيع فيها ولو عاوز (كتاب ) بيجبو ليك بس شنو تمرق الشنقر ..الكنجالات ..(الفلة ) والقنزب زى ما بيقول (مولى ) الحبشى ومولى دا كمان .........خلوها ساكت كان لمن يعزمنا حفلة عند اهلو فى ديم الخرطوم نقوم من (دغيشن بدرى ) نسوى السفرى اول شى تشد ليك بنطلون (شرط ) وقميص زى السم وتشوف ليك جزمة ايطالية - لا مؤاخذة - بالمناسبة انتو ليه الناس تقول لا مؤاخذة للجزمة يعنى عشان بتطا الواطة .. ولا الفهم شنو يعنى عشان (برطوش ) ولا التخريج الاجتماعى للفكرة شنو ، المهم لمن نمشى حفلة (حبش ) فى الديم كنا بنحرص انو (نقشر ) ونكون ميه ميه لانو ماشيين بلد (المفتحين ) دياااااااااااااامة وعارفينهم طبعا ناس بتاعين (بروفات ) واوهام وطلاميس فى اللبس والحركات وجنهم جن (الراستات ) وبيحبو ناس بوب مارلى لمن فى كلام كدا انا ما شفته لكن سمعتا قالو ليك لمن بوب مارلى مات فى ناس فى الديم فرشت ودقت صيوان ! جااااااااااااى راجع ........باذن الله
12-21-2004, 06:06 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
الأخ/ محمد حامد جمعة رجيناك بالعيسرة ونشوفك بكرة أنا عزمت ليك أنور كنك عشان يجي يزورك ويبارك ليك وكمان بالمرة يرفع ليك بوستك إنت عارف كل يوم الواحد بيجي بلاقيهو مدفون جنس دفن بس ما عليك بنفتشو بالفتاشة وأيد هنا وأيد هناك وودعناك الله ليوم باكر. تخريمة: "بفلوا سلودير جين لاست لاستا" If you Know your history من كلمات الفنان بوب مارلي في مأتمو في ديم التعايشة أظن كان أسبوع ولا حاجة كده. جاموس الخلا ده باين عليهو (تور شين)
بوب مارلي غني ليهو الأغنية دي دا واحد بقاري ساكن حي الأمراء قال كده:
عبدالرازق عيسى الطالب
12-21-2004, 06:10 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
الأستاذ دون شك محمد حامد جمعة لك التحية و نحن نشم فيك ريحة البلد و في كتاباتك الجميلة. الحبيب عبد الرازق معليش الغيبة كانت في إعصار في جهة تانية توقعت تجي و تقول لي يا عنصري ، والله وحشتنا. بدأت تتكشف لنا ملامح أديب مستتر آخر في البورد من خلال حكاويك الجميلة و بالذات اللي باللهجة البقارية الحلوة، بالله كتر منها. ياخي البوست دة لازم يتأرشف.
12-21-2004, 08:40 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
الأخوة/ سعادتو وعلاء أنور كنج قلنا وقتين الحبايب زادو نور قلنا نرجع ليكم تاني.. وليكم التحية والتقدير بلبلة طين في كتاحة جاية وإنكشف المستور بعد زوال الغيمة وإنبلج الصباح.. نتيجة لأسباب ذاتية ـ وهي الأهم، وفي مقدمتها العجز عن تقدير الإستطاعة وتحديد التكليف في هذه المرحلة ودراسة الجدوى وقراءة القيم الإسلامية بأدوات وأبجدية خاطئة ـ وأسباب خارجية ـ يأتي في مقدمتها أزلية الصراع بين الحق والباطل. أو سنة الصراع وعدوان الباطل على الحق. وإستمرار المدافعة والضرب بالكلمات، والتنكيل بالتلغيز إضافة إلى التسلسل من خلال الأخطاء النحوية وجوانب الضعف في عملية البناء الفكري.. واللجوء إلى العمل السري والدفن في جبانة الإسم الحركي.. والنزول إلى السراديب جبناً من باب (الخاف ربي عيالو والغياب المعلن عن الساحة.. وفق الإرادة المنحطة. الأمر الذي كرس الإنفصال عن جسم الأمة وفق مقتضيات الأمن وعن خطابها وعدم تقديم نماذج للإقتداء لها، وساهم بوجود تصورات شديدة الغموض والذاتية والخصوصية.. عنترية المرامي. بعيدة عن أجواء الحوار والمناقشة والمناصحة. وأفرز قيادات لم تأت ثمرة للنضج الإداري والخيار الطبيعي والشوري والمشروع المؤهل لذلك. باسم السرية والحماية للعمل. فقادت العمل إلى مجازفات وإندفعات غير محسوبة أدت إلى محاصرة الدعوة،.. بقهقهات القسمة ÷هههههها. بمعني تحسبو لعب (وألمي حامي ما لعب قعونج) وإنتهت إلى أقدار من التشرذم والبعثرة. وإقامة الحواجز وتشكيل الأجسام الخاصة ضمن العمل نفسه.. وظننا أننا أحسنا صنعا وكان المسوغ دائماً شراسة الهجمة الخارجية ومكائد العدو.. مسمار جحا في شماعة المؤامرة الخارجية. دون أن تدري تلك القيادات أنها بذلك تحكم على نفسها أنها غير مؤهلة لسوية المرحلة. وأنها دون سوية التعامل مع المرحلة أيضاً.. فتنادت إلى النزال. دون وعي للمعايرة على المقدرة والإستطاعة.. وإنزال نص إن تنصروا الله ينصركم.. وصورة صدام حسين لا زالت ماثلة لنا.. في العقل والوعي..
فقط هنا نستطيع أن نقول أن وصول علاء من معركته الكلامية
Quote: إعصار في جهة تانية .
ومحاولات أنور كنج لإثناءك كلها باءت بالفشل.. بس وحشتنا والله.
Quote: توقعت تجي و تقول لي يا عنصري ، والله وحشتنا
ورجعت ليك في اللحظة الأخيرة.. بس خايف ناس معتز يجو تاني ويقولوا لينا المقام عجبك.! وكلها تجليات أو هذه الإصابات والأزمات أفرزت خطاباً متأزماً أو فكر أزمة أدٌّعٍىَ له التعميم. فأدى فيما بعد إلى أزمة الفكر أو أزمة الخطاب الإسلامي للأمة السودانية. ذلك أنه أصبح في معظمه خطاباً ذاتياً منفصلاً عن الواقع. أو خطاب طائفة منفصلة عن الأمة مفتونة بذاتها ومعجبة بفكرها. مأزومة ترمي الكلام على عواهنه.. وفي تقديري بعد هذه المرحلة الطويلة. أو المسيرة الطويلة من أدبيات الخطاب المنبري (أركاني) وممارسات العمل. أصبح ـ كما أسلفنا ـ لا بد من وقفة للمراجعة وتحديد الموقع الإجتماعي والفاعل بدقة في ضوء الإمكانات. أو بالتعبير الشرعي الإستطاعات المتاحة أو الظروف المحيطة. وتحديد الموقع من مسيرة السيرة العملية.. وهذه المراجعة لا تعني الرجوع والنكول أو النكوص وإنما تعني الإجتهاد والتجديد والتصويب للمسيرة. حيث لا بد من أن تنعكس هذه المراجعة على أدبيات العمل الإسلامي أو الخطاب الإسلامي بشكل أخص. ولا نرى مندوحة أمام العملين للإسلام من العودة إلى المجتمع والإنخراط في مؤسساته.. ومحاولة إستيعابه تماماً. وتحديد دوائر الخير ووضع الخطط المناسبة للتوسع فيها والإمتداد بفعل الخير. وتقديم نماذج في مواقع المجتمع المدني نفسها متميزة تثير الإقتداء بالأمانة والإتقان والتعامل مع الوقت. والشعور بمسئولية العمل والإنتماء إليه. والإشفاق على الناس وإلحاق الرحمة بهم. وتجسيد الأصول النفسية للقيم الإسلامية. من مثل الأخوة والإحسان والعدل والتعاون. والعفو والرحمة. والإيثار والإحتساب. والعمل على التطلع بالإختصاص والإبداع. وإستبدال الحوار بالمواجهة. والدعوة بالحكمة والموعظة الحسنة. والمجادلة بالتي هي أحسن. والدعوة إلى كلمة سواء حتى مع الكافرين خارج حدود الوطن. وإقناع الآخرين بأن ذلك كله ثمرة للتدين وفروضه على الإنسان. بدلاً من الفوضى العارمة التي إنتابتنا. إن فطرة الإنسان بشكل عام ودوائر الخير في المجتمع هي المجال والموقع الحقيقي والرصيد الحقيقي لدعوة المسلم.. بدلاً من المعارك الجانبية التي لا تقدم ولا تؤخر.. ولا تساعد على بناء الأوطان. أو المكون الأساس لخطابه للعالمين وللأمة. إضافة إلى أن ذلك يوصله إلى شرائح أخرى خارج نطاق جسمه الخاص. مما يؤكد مقولة أن بوصلة الفشل دائماً ترمي إلى إتجاهها الصحيح.. وذلك ما وددنا الإشارة إليه.. لنؤكد للعالم أجمع أن مشكلة السودان لم تكن يوماً أبنائه.. عازين نقول فوق بس ما عندها طعم ولا لون ولا رائحة قلنا خلي ندي شوية من باقي السيسي الفضل. ونواصل غداً
تخريمة: سوادانيز إيرويز. دي كبيرة خلاص، أضحك تضحك الدنيا لك. اللهم أجعل أيامنا كلها معارك من أجل بناء الوطن. وتمسك بقوة الكلام حتى ولو دعتك قدرتك على ظلم الناس فتذكر قدرة الله عليك. ولك ودي
عبدالرازق عيسى الطالب
12-21-2004, 10:28 PM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
والتكايا والحواري وشلة اللستك الفنان بوب ماري في بيت العمدة عبدالكريم (جنين) يونس دين وقوز دنقو وديم القنا والعز في الترحال وسافر ففي الأسفار فوائد عبر مسافات الوطن وجدان وبين وشوشة الكلمات وقلنا شن جاب الشامي لليمني. وإنتو قلتو بين ليبيا والعراق والشام واليمن وثبة إلى الأمام فوق هامة الزمن كالأسود لا تهن فلا عهداً أبقيتي..! ولا ماءاً أنقيتي وكنا في حفلة ليلة وشلة اللستك تجه الزعيم الفارات هناك خلف الصيوان بيغازلوا في الحسان ينعتون الفحول بأشنع الألقاب.. وقذارة الأوساخ.. والفحل فتوة الحارة شايل سيفو البسوي التح والبشارة جاتك يا خال البنات.. والعصيدة النية راجعة للنار.. شوبس الأحباب (أنور كنك وعلاء إتصالحو) ما تقوم تفتح ليك بوست ويكون خط دخول للملاقفة. خلينا في بيت الأشباح ده. ولك مودتي
عبدالرازق عيسى الطالب
12-21-2004, 11:27 PM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
الحبايب جد محمد حامد عبد الرازق بوستكم دة أصبح كشجرة التبلدي على أطراف ساحة المعركة "معركتي" أعود إليها في حالة "كر لا فر" أستظل بها من شمس المعركة و أبلل الريق ثم ألتهم ما فيها من أوراق خضراء "جوعاً" و أعود لأجدها قد أورقت من جديد و أصد لأعود و هكذا دواليك. الله يخليكم لينا
12-22-2004, 01:15 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
بسم الله والصلاة والسلام على رسول الله حبايبنا واحبابنا ......سلاااااااااااام كتير ...سلام بتاع انتو ... دبايوا ..مسكغنقا .. كيف اصبحتو ..عافية .. والتحية الاخيرة لطالما سمعتها عند اهلنا فى غرب فى (دار الهبانية ) فى الصباح وفى الحلة (ام قطاطى ) تسمعها وفق التوقيت اصبحتو ...يجرونها حتى تستريح فياتى الرد على ذات التون والنغمة عااااااااااااااافية ثم ان جاء المساء قالو اغربتو ........فردوا عااااااااااااااافية طيبين .. واها كنت عاوز اخش واواصل لكن بس شايف انو فى مداخلة بتاعة (حادث حركة ) وقع لينا فى نص (صنقور ) الكوبرى بتاع الفتيحاب – نقول الانقاذ يقوم زول يغمر لينا – اها طبعا ركبنا امجاد وكنت عاوز اقعد فى (كرسى الشهيد ) ودا لمعلومية القراء الكرسى والمقعد الذى يجاور السائق ونال هذه التسمية لان الجالس فيه ان وقع حادث سيكون اول العابرين والشهداء فى الحادث ، وطبعا ومع ازمة المواصلات الامدرمانية وجدها السائقون و(الجوكية ) سانحة لرفع السعر فمن كان يصل الى الثورات بالف وخمسمائة جنيه صار لزاما عليه ان يدفع الفا اخرى (بدل مشقة ) للمركبة وسائقها وقس على بقية الخطوط ، المهم ركبنا بعد معركة خفيفة تاهل فيها لادوار الجلوس خمسة اربعة شبان وفتاة مليحة تطوع احد مرافقيها بالدخول فى المعترك وتوفير مقعدا لها وكنت قد هممت بالحصول على مقعد الشهيد لو لا ان احد المعممين من (اعمامنا ) قد استبدل معاى مجلسه الخلفى لانه (عيان ) ولا يريد ان يجلس مكرفس فى منتصف (الامجاد ) فعدت من مقعدى (الرئاسى ) الى المدرجات الشعبية لاجد نفسى محشورا بين الفتاة وواحد اخونا فيما يجلس خلفنا ثلاثة اخرون تطوعو بصدمنا بركبهم مع كل (فرملة ) و(قرصة ) من العربة اثناء سيرها على الطريق والذى مع (التعديلات الجديدة ) يبدا بشارع يؤدى لجامعة النيلين ثم ينعطف جنوبا ليستقبل الكوبرى الفخم وكانت (امجادنا ) على غير العادة (صانة ) اللهم من ثرثرة السائق والذى يبدو انه كان راجل (بتاع ونسة ) وشمارات افتتح مداخلات عديدة لم يعلق عليها احد الا (عمنا ) الراكب بجواره والذى كان (قاعد على الهبشة ) فشنف اذاننا بكميات من الانتقادات للجيل الحالى (الخايب ) و(المايع ) وسرد لنا كرها ورغم انوفنا سيل وكميات من القصص والحكايا التى كان هو بطلها زماااااااااااااان وانه كان فتوة وزول (شفت ) لا تقوم حفلة ومناسبة فى حى من احياء امدرمان القديمة ان لم يتم اخطاره والا فان الحفلة (تتفرتق ) عديييييييييييل . وكنا نتابع (ليالى الحلمية ) تلك بصمت وشخصيا سرحت فى عدة مشغوليات براسى فيما تمسكت وامسكت حزمة من (الصحف اليومية ) التى ننالها بحكم عملنا نسخا اكراميا من الزملاء الزميلات ..كنت امسك بصحفى واتحصن بالصمت واتباع تارة نقاش سائق ومن يجاوره ببرود وربما لا مبالاة حينما لفت نظرى ان العربة (الامجاد ) كانت مهللة وتمضى نحو الكوبرى بعد ان تجاوزت مدخله بسرعة كبيرة فتوجست خيفة لان حوادث الطرق على الكبارى والجسور صارت كثيرة ..ولكم طاحت مركبات وحافلات وقفزت من الكوبرى –خاصة شمبات – ودقت راس ، فسالت السائق (يا ابو الشباب ما تستعجل ممكن تمشى براحة لان الطريق زحمة وثلاثة مسارات ) يعنى لو العربية دى فلتت من يدك تبقى مشكلة فاجاب السائق وهو يديها (نمرة جديدة ) ما تلاوذ يا زول خليك ثابت معاك معلم ..قطم بس يا مان ..فسكت وقد ايقنت اننى اليوم ساتعشى فى المستشفى جلكوز ونقل دم ان لم امضى لاحمد شرفى ..فيتدخل الراكب الثرثار (ما تخاف العمر واحد يا بنى ) ومع هذه الجملة كانت الامجاد قد بلغت ذروة الاشتعال فى سرعة الهياج وكذا الحال عربتين امامنا فاصطدمتا (كرااااااااااااااااااااش ) ووييييييييييييييييق الفرامل وتسمع كرو ..كرو .. وتلخبط السير على الكوبرى فى المسار الناقل من الخرطوم الى ام درمان وفجاة وجدت اننا فى مركبتنا قد دخلنا مرمى النيران لان فرامل الامجاد (جلت ) وكنا نندفع بسرعة ..كلنا نحن معشر الركاب صرنا (سواقين ) اقدامنا تبحث عن اى كرضمة تحتنا لندوس عليها فرامل وايدينا كنكشت فى المقاعد والبنت التى بجوارى اطلقت صرخة حااااااااااااااادة كلفتنى لاحقا مرهم لاذنى لانها كادت ان تشق (طبلة اضانى ) اما عمنا فى كرسى الشهيد فقد القى بالعمامة علينا فى الخلف وشبك ليك السواق ..الفرامل جلت ..اسمع فضيها ..شيل يمين ..شيل شمال .. لا عشق .. ثم وحين لم يجدى ذلك واقتربت العربة من تل عربات اخرى (متصادمة ) امامنا واوشكت لحظة الانفجار عمك فكاها ليك (جعرة ) ودووووووووووووووول ضربنا ليك عربين قدامنا ..كراش زجاج سقط علينا وورقة جانا طاير من وين ما عارف ..ثم هدوء .. جلسنا فى الامجاد (مخلوعين ) طبعا لحظتها حصلت (روسيات ) الدقش المقعد القدامه الدق فى الباب ..واخدنا ليك خمسة دقايق ما فينا راجل قادر يفهم الحاصل شنو بس جونا ليك الركاب من العربات التانية فى الكوبرى ..سلامة يا جماعة ..بسيطة .. حصل خير .. سلامة وكرامة .. وكنت اول النازلين من مقعد الركاب الخلفيين ..نزلت وقايل نفسى شايل الجرائد ..وانا المسكين شايل شنطة (البنت ) القاعدة جنبى .. لمو ليك فوقى الناس .. قعدو الولد دا تحت .. فى زول قال ادوهو كف ..التوصية دى بالذات كانت منفذة فورا ........صر ..طااااااااااخ .. يا جماعة انا كويس مالكم .. وامة محمد اتلمت ...لكن عارفين عمنا (الفتوة ) لو ما مسكوه قد من الكوبرى طوالى (النيل ) بس ربكم لطف .......جااااااااااااااااى راجع ..انشاء الله
12-22-2004, 02:39 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
سلامات والجاتك في مالك سامحتك. الكلكه.. مكة العزاها الله. وتونس الخضراء.. والكلكه هنتنا دي..
الساير عطيه.. المقيم حيمات.. والدخان البتلتل راشد الولاد.. ومافي دخان من غير نار يا ولاد.. السائق وديتو الفحص.. ولا قلتو ولد صغير خلو.. (بلابل ا لدوح ناحت على الأغصان) بلبل دلال العنقرة .. وبلبل تمبسكو.. وبلبل أبو جازو ناس بتقول طاشمة وناس قالت لا جاي ولا جاي.. وقالت بين قوسين.. وقد تكون المشكلة كل المشكلة في فهم مواصفات الخطاب القرآني محل العطاء والإقتداء. والتعامل معه بقدر كبير من البساطة والسذاجة والتعميم أو العامية. وإن شئت فقل عمى الألوان المخلوط بالأحمر والبمبي.. ذلك أن مواصفات الخطاب تنوعت وتعددت بحسب الأغراض وبحسب محل الخطاب وموضوعه.. والقرآن عربي الخطاب وإنساني الرسالة كما هو معلوم.. إنتفاءاً للمصطلحات الجديدة (إسلاموعروبه) حكاية شيخ حلتنا ومفتي شلة اللستك القال بين كن فيكون عند الله لا يوجد بينهما مسافات فشبكها.. والشبكنا يحلنا. وإنطبعت (كنفيكون).. والبلاغة بأبسط مدلولاتها عند العرب مطابقة الكلام لمقتضى الحال. فإذا لم ندرك الحال أو محل الخطاب أو طبيعة المخاطب .. ومشكلاته.. وتاريخه.. وعقيدته... فكيف يأتي الخطاب موافقاً لمقتضى الحال؟! والحكمة في أبسط مدلولاتها أيضاً وضع الأمور في مواضعها ووزن القضايا بموازينها.. ولا غرو في ذلك.. ولا عجب..! فأين تصبح الحكمة إذا إفتقدت المعايير والموازين وأختلت النسب ولم تدرك مواضع التنزيل أو محل الخطاب؟! وذلك أن من المعلوم لكل متبصر. سواء إذا استقرى خطاب الأنبياء لأقوامهم بحسب معاناتهم. أو نقول: خطاب النبوة التاريخي. أو خطاب النبوة الخاتم الذي هو في الحقيقة جماع خطاب النبوة التاريخي وثمرته وخلاصته وأصوله. ونجد أن مواصفات الخطاب تنوعت بحسب هدفه وموضعه أو محله. إن صح التعبير.
Quote: كرسى الشهيد
وده سويتو متين ده؟. ثقافة عامة دي.. وده شكلو واحد من خطاب المعركة والتعبئة العامة والتحريض على المواجهة. وأهمية الثبات وثواب الإستشهاد. وغير ذلك من مكونات خطاب المعركة. سواء توجه هذا الخطاب إلى الذات أو إلى إنهاك (الآخر). والفت في عضده.. وإلقاء الرعب في قلبه والمساهمة بهزيمته النفسية. من مثل قوله تعالى: [قاتلوا الذين يلونكم من الكفار وليجدو فيكم غلظة]. (التوبة: 123) [يا أيها النبي حرض المؤمنين على القتال] (الأنفال: 65) [قاتلوا الذين لا يؤمنون بالله ولا باليوم الآخر ولا يحرمون ما حرم الله]. (التوبة: 29). هذا الخطاب يختلف عن الخطاب على مستوى العقيدة وبيان تفنيد الكفر وفساد الإعتقاد. الذي يأخذ بعداً آخر. وقد تكون مواصفات أخرى وأدوات وأدلة وبراهين وحجج عقلية متعددة. من مثل قوله تعالى: [لقد كفر الذين قالوا إن الله ثالث ثلاثة]. (المائدة: 73) وقوله: [لقد كفر الذين قالوا إن الله هو المسيح ابن مريم]. (المائدة: 72). أما الخطاب على مستوى الدعوة فمواصفاته وطبيعته وأدواته تختلف تماماً. لقوله تعالى: [قل يا أهل الكتاب تعالوا إلى كلمة سواء بيننا وبينكم إلا نعبد إلا الله].. (آل عمران: 64). فكلمة [سواء] تعني فيما تعني: المساواة وعدم التميز. والبدء المشترك في البحث عن الحقيقة.. أما مجال العلاقات على مستوى الدولة والفرد فالخطاب له مواصفاته النوعية أيضاً سنأتيها لاحقاً وده باقي السيسي الفضل زي دخلتكم للكوبري.. والتصادم الفكري.. مندوحة أزلية الصراع.. ولذلك خلقناكم.. والحكمة مدافعة.. ومدافرة بين العربات.. بالله عليك يا محمد حامد جمعة لامن قمتو منعتوا الركشات دي ما تقطع الكبري ما كان بالمرة تصنفو معاها أمجاد دي.. عشان الناس ما دمها يمشي هدر.. كبري الإنقاذ.. شئنا ولا أبينا.. ولكن العاهات المشوهة لا تقدر بالإنجاز.. لأنها تعتبر إنقاص.. والكلام ده في ذمة الناس.. جايك تاني... والجيزة حسنات جبونقا إتفاق.. وبرجع ليك تاني أنا إذا بقي في العمر بقية..
ولك ودي
عبدالرازق عيسى الطالب
12-22-2004, 03:06 AM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
أساتذتنا الكرام محمد حامد عبد الرازق أجيكم ماني زاير بل مقيم بإذن واحد أحد لم أعتزل المنبر الذي كنت أعتليه قبل مجيئي يا عبد الرازق لكن صمت عن الكلام لإثنين فقط أعف عن ذكر إسميهما هنا ، صوماً أبدياً. أكرر لم أعتزل و سأعود لمن يقبل المنطق فقط المنطق لا غير
12-22-2004, 03:55 AM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
يا شباب ......مساء الخير كلام كدا خارج نص والحفلة والبوست ، يا اخوانا الحاصل شنو فى المنبر كمية الشكل والردح الممارسة هنا دى لشنو وعشان منو وضد منو ، مافى زول بيكسب هنا غير النهيار الكامل لمسلمات تعايشنا كلنا مع بعض مش جوه البورد لكن حتى داخل نفوسنا وفى وطنا لو ما احتملنا بعض عبر الاوراق والحروف واثير مساحات النشر الالكترونى كيف نتحمل بعض فى مواجهات التعدد والانفتاح القادم ؟؟؟؟؟؟؟؟؟؟؟ يا جماعة (عشان خاطرنا ) روقو المنقة ، طيب انا خلونى ..ظلامى ومتخلف ومصاص دماء وعافية وكل العبر السودا فينى - زى ما بيدعى البعض - انتو يا السمحين وحلوين وفاهمين مالكم ، طيب دا كلو خليناه ..يا جماعة عشان خاطر بكرى الزول البقى سبب وفكرة لكل الجمع الكريم دا ، طيب ديل كلهم (انسوها ) عشان خاطر البلد والسودان المافيهو هسة جوه ورغم ظروفو الشينة والسمحة كل هذا التناحر والانتحار . طيب قبال ديل كلهم (عليكم الله ) براحة يا جماعة .. تسامحوا (من شان الله ) يا جماعة زى ما يقول اخونا الشوام
12-22-2004, 08:55 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
الحبايب الحلوين طبعاً رشحنا البوست للأرشفة. شنو يا رزقة "إسم دلع" بهناك تفصلنا و بي هنا ترحب بينا!!!!! لكن أحترم فيك وضوحك و قناعاتك الواضحة لي زي عين الشمس. حبيبنا محمد حامد فاتني كتييييييييييييير من كلامك السمح خليني أقرأ شوية شوية.
12-22-2004, 10:21 AM
محمد حامد جمعه محمد حامد جمعه
تاريخ التسجيل: 11-26-2004
مجموع المشاركات: 6807
راجينك من الصباح.. دفرة صباحية.. وفتح عينك يا علاء الدين
Quote: تفصلنا
ما فصلناك.. بس خفنا يكون رأي الأغلبية ويد الله مع الجماعة.. في الديمقراطية وفقه النص وتنزيلو لأرض الواقع لمعني (وامرهم شورى بينهم)..
شوف يا علاء.. شفت يا علاء الدين في واحد كان قاصد يحج بيت الله ويقوم بالركن المستطاع ويحج.. لكن في أسباب خلتو يرجع من نص الطريق ولا منعو زول ولا حبسو حابس بس لمن وصل هو ورفقاتو (أصحاب السفر).. خرج واحد من ناس الحله وشايل ليهو جداده ميتة ورماها في الكوشة جات بنية وشالتا وجرت.. قام الراجل المسكين جرى وراها لامن نفسو قام.. وقتين لحقا قال ليها: أتأكلين الجيفة الفطيسة وهي حرام..؟ قالت: البنت أحلت لنا الميته منذ شهر.. قال ليها: يا بنت من من الأنبياء نزل بعد محمد؟. قالت البنت: مات أبي قبل شهر من الزمان. ولم يكن لنا عائل. نقتاد أنا وأخي على الميته. فتعجب الرجل من فقهها.. وقال.. لرفيقو.. أجعل لنامن المال ما يعيدنا إلى البلد. وأدى الباقي لهذه اليتيمة وأخوها.. وزولك رجع كمن ولدته أمه بالنية بس.. ويا محمد حامد جمعة.. واحد من شلة اللستك وصاحب تجه.. جوه زحمة الضجيج كان بيحكي موسم الهجرة إلى الشمال.. وعايز مناطحة فكرية.. وشال سيفو البسوي التح.. يا خال البنات.. وفاتح البوستات.. ألحق بتك.. وما تبقي زي حكاية النسيب مع حماتو لامن قام مقدما لحلتهم.. بعد ما ودعت بتها بدمعات سخنات.. وزولك شال عصايتو البتوكأ عليها والبهش بيها غنمو قال يمكن لي فيها مآرب أخرى.. وفي نص الدرب الرقيق.. الما بدخل الموية لاقو ليهم أسد البخاف منو أنور كنك..! وبحمية الحماة المحتمية تحت بند قوامة الرجل. صرخت وقالت واسداه.. بس بالبقاري.. أو بالأصح قالت (الباحش).!! أو باحش هذا يا هذا.. والحمو كان أبيض ! وشايل سلاح أبيض.. جرجر حبال سروالو وربط وفك وربط وفك وفك وأستعد وأتشنطط واقف ريال (عفواً للهجة الخليجية بس لترسيخ معاني التنوع إبداع) وكلو كان دخان كوزي ساكت . والكلام ده كلو قدام نسيبتو غباشة عيون وبخشمو الملان قال: أو أسدهذا يا هذه.. يا هو الواصلك وياكا الكاتلني ولا الكاتلك.. حماتو المسكينة أنطلي عليها المشهد.. وخافت على البنية أن تصبح أرملة. وقالت ليهو: الكاتلك بري يا يمه (سجم خشمك) (ودي برضو ما حقتنا بس تنوع ثقافي) أبرى لينا الدرب البجيب الريح.. كده خلينا نسدو ونستريح.. وزولك بكل همة بكى وجع السنين.. وبعد المسافات الفرقت الأحباب ولامن عرف السبب ولؤم الحماة حلف يمين طلاق حماتو ما ترجع الحلة. وبنى أم دنقدنقتي (بيت البرش عند البقارة) في الثراب. ونجى من شماتة الحكامات والعقاب... المرقت الأطرش من الحلة.. لي يوم الليلة ما رجع. شفت كيف يا علاء...! ولو كل كلب عوي بعمي الألوان.. سجامة بالأحمر ولا البمبي كان ناس تجه غنو بتمن الحجار.. ولكان المثقال بدرهم.. وكان الفراش ليوم باكر في ديم التعايشة زحف بالسيسي لأمدرمان..
أنا قاعد متربع جوه في بيت الأشباح ده.. شفت يا أخوي محمد حامد جمعة ملمة الديمقراطية سمحة كيف.. فوقها الصالح والطالح.. فوقها السجم والكالح.. وفيها العز والرز.. وفيها النقارة البتقول دز. وفيها السنجك البقول طز. وفوقها الورل الما بفز. الناس شايله حراب.. وكوكاب..
والكلمة الطيبة مرقت الدبيب من جحرها قاعد ليوم باكر..
........................ عبدالرازق عيسى الطالب
12-23-2004, 02:17 AM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد حامد جمعه
علاء الدين يوسف علي محمد
المكاشفي الخضر الطاهر
A.Razek Althalib
المسافر
Mahmoud Mustafa Mahmoud
Agab
abazar ali khalifa
ساحة الرقيص ممتلئه عن اخرها
مريم بنت الحسين
nahar osman nahar
فيس بوك
تويتر
انستقرام
يوتيوب
بنتيريست