|
|
 كرسي جانبي خارج المقهى.. مساحة لحوار مفتوح
|
اليوم جمعة، والبلد تبدو (رايقة) وليس ورائي من هم أو مشغولية، القليل من المهام سـ (أختف) رجلي من هنا
لأقضيها وأعود.. لهذا الكرسي.. الذي وضعته في طرف البرندة الخارجية للقهوة..
أعتقد أن الفترة التي قضيتها (زبونا) ملتزما في القهوة كافية رغم قلتها ليسمح لي (المعلم) بجلسة طويلة
من هذا الكرسي القريب من المخرج لأتطلع إلى هذا الشارع وأنتظر من يمر به من المعارف لتبادل التحية والأخبار.. ولا بأس من ونسة.. وقد (بشرت) المعلم بأنني سأطلب عددا من أكواب الشاي والقهوة، وربما الليمون لمن يطيب له الجلوس هنا..
اليوم كما قلت لكم جمعة.. وقد أشرق نهاره ببعض الدفئ وقليل من الهواء الشتوي المتوسط البرودة..
لا تسألوني عن مكان المقهى، يكفي أنه يطلع على (شارع سوداني) يسلكه الكثير من المارة بجانب الدكاكين بمختلف أنواع بضائعها، وقليل من المقاهي.. لا شك أن هذه أفضلها –في نظري على الأقل- كما يتضح ذلك من أعداد زبائنها وروادها.. (هل يصح إطلاق لفظ (مقهى) المذكر، مع التعامل مع المقهى كمؤنث؟)..
أكاد أعرف جميع زبائن هذا المقهى، وإن كنت لم أتحدث إلا مع القليل منهم، واكتفي أحيانا بإلقاء التحية على البعض.. مع أني أتطلع للحديث إلى كثير من الرواد.. وربما تكون هذه الجلسة الطويلة هي الفرصة المناسبة..
تتواصل الجلسة
|
|
 
|
|
|
|
|
|
|
 Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
| Quote: أكاد أعرف جميع زبائن هذا المقهى، وإن كنت لم أتحدث إلا مع القليل منهم، واكتفي أحيانا بإلقاء التحية على البعض.. مع أني أتطلع للحديث إلى كثير من الرواد.. وربما تكون هذه الجلسة الطويلة هي الفرصة المناسبة.. |
كيفك يا عبدالله عقيد .. يقول جبران خليل جبران "إذا اكتفيت أنت بما تعرفه فأين أضع أنا ما لا تعرفه أنت" ..
تحياتي
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: سجيمان)
|
أخي سجيمان
أشكرك على الإطراء
ويا ريت تجيب الكرسي الجنبك دا وتقعد جنبنا هنا
محمد عبد الجليل سيشرف على إعداد قهوته بنفسه ويعود
(أرجو ذلك)..
أما أنت فسأطلب لك كباية ليمون أولا ثم شاي منعنع
لأنو عايز املاك نقة في موضوع أديب دا..
في فترة معينة من حياتي أقتنعت أنني (أديب) استنادا على ما
أكتبه من (أدب) نثرا وشعرا، من حيث تكامل عناصره وما يتلقاه بيه
(الناس) من ترحيب واستمتاع و (تذكية)..
بس يا سيجيمان اتضح لي إنو ليس كافيا أن تنتج إبداعا
بل يجب أن تلم بـ (البنيوية، والهدمية، والوجودية، والعدمية، والسريالية،
والسحر الأسود، ونظريات كافكا، وداروين، وتيمور لنك، وعلي بك الكبير، وتقرأ
لماركيز، وشافيز، وديكويلار، وماما تريزا..)
لست أديبا إن اكتفيت بابن المقفع والجاحظ وابن رشيق، وترجمات شكسبير وديكنز
وأمثالهم ممن يقرأ لهم كل (أمي)..
لا يكفي أن تتشبع بالمتنبي وشوقي وأبي نواس لتكتب شعرا، ولا حتى تي إس إليوت
وعمر الخيام،وطاغور..
لابد أن تلم بكافة جوانب أدب الحداثة، وما بعد الحداثة
وأن تستبطن كل النظريات الأدبية والنقدية وتثبت أنك اطلعت على كل تخريفات
المحدثين.. وتشظياتهم وتجلياتهم
فاستجمعت كل قواي ورميت كل ما قرأته من قبل خلف ظهري وانطلقت لهثا لتحصيل
هذه (اللوازم) الجديدة.. والتي أعياني استيعابها.. بصراحة
الوقت الذي قضيته في قراءة (المرشد) لعبد الله الطيب، و(أدب الكاتب) لابن قتيبة
و(البيان والتبيين، والبخلاء، والحيوان، ورسالة التربيع والتدوير للجاحظ)
و(العقد الفريد) لابن عبد ربه، والأغاني، والمقامات.. وكل هذه الفتافت..
كان سيفيدني كثيرا لو صرفته لقراءة واحد أو اثنين من أدباء ما بعد الحداثة
ولا ما أصابني هذا الإحساس بالغربة بين أهل التعاطي الأدبي والإبداعي..
النقاد الذين يحشرون أسماء كل المراحيم ذوي الأسماء الرنانة بين ثنايا كتاباتهم..
زي ما قالت أختنا (بيان) في موقع آخر.
أخافونا وألجموا ألسنتنا..
بس لا نسنا أن العيب (فينا)..
الأدب بالنسبة لي عايز ليهو (قوة عين)
دي نظريتي..
وزي ما قاعد تقول (داير ليهو لِياقة بكسر اللام و (لَياقة) بفتحها)
هسي انا اليومين ديل بربي في الحاجات دي
ولما احس اني في الفورمة
أوعى واحد يجي يقيف قدامي
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
خلال حديثي السابق مع سجيمان
لاحظت أنه يتلفت يمنة ويسرة ويجيبني بهمهمات
مختصرة وأحيانا يقول لي (صاااح) في محاولة
للمخارجة من هذه النقة.. الاستعراضية..
ولكنه عاد للانتباه حينما وصل الحديث إلى (قوة عين)
الأدباء والمبدعين.. وأحسست أنه يريد أن يدلي
بدلوه في الحديث..
لا أدري هل يتفق معي أم يخالفني
ولكني وحرصا على اقتناص الفرصة أبديت بعض علمات الإلحاح
على مواصلة الحديث.. وكنت أتطلع لحضور عبد الجليل حتى لا تفوته
هذه (الانتفاشة الذاتية) التي قد لا تتكرر مرة أخرى.. وأظنه
استطاب الجلوس قرب (التنكة) ومحاولة تجاذب الحديث مع القهوجي
وأتوقع أنه لم يلحظ دخول سجيمان.. وربما يعود إلى مقعده الخاص
بجوار (ناس الرياض) ..
أها يا سجيمان ياخي موضوع قوة العين دا
يمكن إحساس الأدباء (الصغار) بالخجل وخوفهم من الإحراج عند محاولتهم
عرض منتوجهم الأدبي في بدايات تجربتهم.. هذا الإحساس يزول أحيانا
إما (لقوة عين) الأديب وربما قوة شخصيته (من منظور إيجابي)
أو لوجود من يشجعه ويرعاه على الدوام
أو لجهله في حال كونه (أديبا فاشلا) وصفاقته وإصراره على فرض نفسه
على الآخرين..
قديما قالوا "من يوالي الطرق يُفتح له" وهناك أيضا (عجز) لأحد أبيات
إليا أبو ماضي (أظن) في هذا المعنى..
المهم أن من يواصل عرض نفسه سيجد من يستجيب له ومن يستمتع بما عنده
كما أن طول المران والممارسة تكسب المرء خبرة وكل ابن آدم يتطور وينمو
بل كل شيء.. إلا إذا..
إرادة الفشل
النجاح يحتاج لإرادة.. فهل يحتاج الفشل لإرادة.. يعني شنو إرادة!!
داك منو الجايينا داك؟..
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
ود عقيد
والله ماشاء الله اتاريكـ لابد فوق رائ
فكرتكـ خطيره عدييييييييييل و بوستكـ ده ممكن يستمر سنين و تناقش فيهو
كل مايحدث في المنبر .. لانكـ بتعرف تنتقد بشكل جميل و دون تطرف و استثارة
للعداوات
Quote: فاستجمعت كل قواي ورميت كل ما قرأته من قبل خلف ظهري وانطلقت لهثا لتحصيل
هذه (اللوازم) الجديدة.. والتي أعياني استيعابها.. بصراحة
الوقت الذي قضيته في قراءة (المرشد) لعبد الله الطيب، و(أدب الكاتب) لابن قتيبة
و(البيان والتبيين، والبخلاء، والحيوان، ورسالة التربيع والتدوير للجاحظ)
و(العقد الفريد) لابن عبد ربه، والأغاني، والمقامات.. وكل هذه الفتافت..
كان سيفيدني كثيرا لو صرفته لقراءة واحد أو اثنين من أدباء ما بعد الحداثة
ولا ما أصابني هذا الإحساس بالغربة بين أهل التعاطي الأدبي والإبداعي.. |
سأظل متابع لهذا العمل الجيد و المفيد
شكرا عقيد
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: خدر)
|
مولانا خدر (ابو لقاء)
الفنان الشفيف المبدع
ذو الإحساس المرهف
لك الشكر (على اللفتة)
الجماعو مرو بي عندي بي هنا لكن ما في زول اتلفت..
دي عايزة زول فنان.
أوعى تكون مستعجل..
أقعد دقيقة ياخ.. انا قبل شوية بنضم براي تصدق!
لا ما في زول فكر لي.. ولو لاحظت زول بعمل فيها بغني..(مادام طار جنا الوزين)..
والله يا طارق الغنية دي عجبتني بلحيل
انا من عشاق النعام ادم من زمان
قلت لي الفكرة خطيرة؟
ما أخطر من (قناة خدر نت)
والله ياخي حقو تجيبا راجعا
انا بالمناسبة كنت متابعا قبل ما أدخل المنبر
وهي من البوستات الما قدرت أعمل فيها مداخلة بعد ما دخلت المنبر
لأنو حاسي إنها شغل ناس كبار والواحد لمن يدخل جديد بحس انو اصغر زول.
بعدين بالمناسبة..
ماشي ولا شنو؟
يا زول كتر خيرك.. ما تنقطع
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
ورنيش ورنش ورنش
ورنش
Quote: (البنيوية، والهدمية، والوجودية، والعدمية، والسريالية،
والسحر الأسود، ونظريات كافكا، وداروين، وتيمور لنك، وعلي بك الكبير، وتقرأ
لماركيز، وشافيز، وديكويلار، وماما تريزا..) |
أستاذنا عبد الله
نسيت ماكدونالدز وهارديز
لازم تقراهن كويس
مع جاك دريدا
وتقرن الموية في اخر فريدة
سمح ؟
---
الحبشي
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: Mohamed E. Seliaman)
|
محمد آل سليمان
الحبشي
لك التحية
انت جيت بي وين ومتين؟
جريت كرسيك وقعدت بي غادي للناس
يعلم الله ما شفتك إلا هسي..!؟
حبابك عشرة بلا كشرة
قلت لي جاك دريدا..
ياخي جاك دا انا وهو كنا كِدا (ولصق بين أصبعيه)
ما بنتفرق الخرطوم دي حمناها حتة حتة
وكان معانا عمك كارل .. كارل منو هو؟!
لا ما ماركس.. ماركس دا ما حضرناه
أوية.. ومعنا عمك جان بول سارتر بتاع الوجودية
الوجودية دي زاتا اكتشفناها في قعدة مريسة
وهو لطشا مننا وطلع بيها في الكفر
بس حكاية الموية دي.. الحواشة كلها سقيناها امبارح
تاني نفتح فيها الموية، الخدار دا بيطرَش (من الطرش)
شرِبت حاجة؟
لا خلاص.. الليمون المرة الجاية
ما عندو شعير الزول دا
انتو في الشرقية عندكم شعير
تسلم
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
سرحت ولا شنو؟
أظنك ماشي..
نان يا كافي البلا ما يجي زول تاني..
اقوم امشي على الجماعة ديك اشوف اخبارم
المتنبي
إلا ليت شعري هل أقول قصيدة .. فلا أشتكي فيها ولا أتعتب
مونولوج
الناس المتعودين على المونولوج نفسهم بينقطع سريع في الديالوج
هلا يسمو الإنسان فوق جراح التفرق والاختلاف.. أم أنا واهم!؟
... ولكن أفكاري إلى الوهم أقرب
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
نجاح المساعيد تزرزر سيف الدسوقي
في قناة أبو ظبي
وفي برنامج شعري تقدمه الشاعرة نجاح المساعيد
تسضيف الشاعر السوداني الكبير سيف الدين الدسوقي
نجاح زرزرت سيف الدسوقي بسبب مقطع في قصيدته (رسائل)
مافي حتى رسالة واحدة
بيها أتصبر شوية
والمقطع يقول:
بعت للتجار مواهبي
بعتها بأبخس تمن
قالت ليهو إنت كنت في السعودية لمن كتبت القصيدة دي
فهل فعلا بعت أشعارك لـ (تجار) سعوديين.. ؟
ومن هم هؤلاء الشعراء التجار؟
سيف حاول بقدر الإمكان الهروب من الإجابة
ولكن الشاعر أصرت على (الموضوع)
وسندت حديثها بأن (النَفَس) السوداني واضح
في قصائد الكثير من الشعراء السعوديين
أشاهد الآن الحلقة
ورطة الشاعر الكبير سيف الدسوقي
سببها لنفسه بنفسه
وقد جاء الإعلام العربي ليطارده
محققا في صحة هذه العبارة
برنامج نجاح المساعيد
أشهر برنامج (شعري) تلفزيوني في الخليج
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
للوهلة الأولى فقد استدرجني هذا المقهى إلى عالم جميل، لذلك قررت البقاء هنا بحثاً عن فرح يميت القلب ويروع الهم وهروباً من الحصار الذي يطوقني ويستمرئ لغوايتنا بكل الاتجاهات.
عزيزي عبد الله:
"الحلم" هو نقطة صغيرة في فراغ الواقع ... ولكن تلك النقطة طاقة ينفذ منها الفنان الى الرحابة المطلقة التي لا يحدها حد أو فضاء ... دعنا نحلم معاً ... واصـــــــل ....
الحلاوي
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
أخي الحلاوي
مرحبا بك
ومرحبا بهذا البوست الذي استدرجك
جر الكرسي الجنبك دا واقعد
بس ما تكون زي الجماعة الفاتو ديل
خلينا نتونس ياخي الدنيا ملحوقة والشبك الفي القهوة دي
اصلها ما بتقيف.. الركن دا هادي شوية..
"الحلم" هو نقطة صغيرة في فراغ الواقع ...
ولكن تلك النقطة طاقة ينفذ منها الفنان الى الرحابة المطلقة التي لا يحدها حد أو فضاء
التعبير دا عجبني بلحيل..
تتخيل أنا من الناس البمارسو حلم اليقظة بكثافة شديدة
بيقولو الناس البيكثروا من أحلام اليقظة بيحاولو يطبقوا مثالية
الحلم على الواقع.. لذلك بتصيبم الكثير من الصدمات وخيبات الأمل
وكتين يكتشفوا إنو الواقع بعيد جدا عن مثالية الحلم.
وبرضو بيقولوا التأمل وممارسة الحلم بتساعد على اتساع مقدرات الذهن
وإكسابه مزيد من المران على التحليل الدقيق.. وبتنمي قدرات التخيل
خاصة للأدباء.. والفنانين.. ودا المعنى الإحتواه تعبيرك الجميل الفوق دا
هل يستطيع الخيال، والحلم أن يغير الواقع؟!
يتخيل لي كِدا..
محبتي لكل الحلوين الحلاوين
ولك التقدير
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
الأخ / الشفيف ود عقيد
تحياتي لك وليتني كنت أتقن فن الشعر والأدب .. لكنت تواصلت معكم وعقدكم الفريد
أكثر .. ولكن عزائي في إنني متابع جيد .. لكم ولكل المرهفين والمبدعين في هذا
الموقع الجميل ..
.. بدواخلنا بعض الذكريات .. ورائحة من جنون قديم .. ومائدة وبقايا غناء .. لم يترك لنا الزمن .. غير صمت الوجوم .. ونافذتاً يحتويها الغبار .. يؤانسها قمر شاحب وبعض النجوم ..ولم يبقى لنا خيار .. سوى .......
أن تنغذونا بجمالكم أيها المبدعون ..
فزيدونا إبداعاً .. نزدكم إنصاتاً .. وجددوا دواخلنا .. حتى تتجدد أرواحنا .
ولكم جميعاً مني كل الحب ..
خالد الأرباب
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: Khalid Saeed)
|
الارباب سعيد
انا منايا لي
خالد الارباب
حبابك عشرة، وكيف اخبارك ولعل الأهل كلهم بخير
افتقدناك يا راجل
زياراتك بقت محدودة لعل الداعي خير
"بدواخلنا بعض الذكريات .. ورائحة من جنون قديم .. ومائدة وبقايا غناء .. لم يترك لنا الزمن .. غير صمت الوجوم .. ونافذتاً يحتويها الغبار .. يؤانسها قمر شاحب وبعض النجوم .."
الله عليك يا راجل.. وكيف تقول (ليتني كنت أتقن.. )
هو في إبداع اكتر من كِدا!
تسلم يا ابن عمي
وتشكر للزيارة.. وياريت تجر كرسيك وتاخد راحتك
وطلع ما عندك من المخبوء خلينا نشوف..
ولا تتدلل.. فلديك الكثير من الإبداع
ولك المحبة
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
يبدو أن رواد هذا المقهى من مدمني السهر. أو أن المقهى لا يفتح أبوابه إلا ليلاً ... ربما ..
دخلت في بواكير الصباح فوجدت المقهى خالياً إلا من بعض السابلة يتناثرون هنا أوهناك ...
وباعتبار أن هذا المقهى هو بهجة اجتماعية ومنتدى فكري مفتوح للجميع، فإنني أخشى عليكم من تعقب السلطات ... نهاراً..
إذن . . . فلنتسامر في الأمســيات!!!!
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: ALHALAWI)
|
ود عقيد يا اخوي
انا في بلدا... دخول النت بدعة...وكل بدعة ضلال وكل ضلال في النار.... لما امشي النت ما بقول ماشي النت... بشيل ابريقي واقولهم ماشي الخلا....دحين اعزرني ان جيتك متوخر...وان اتوخرت عليك في الجايات... نضمك نضم زولن عينو بقت قوية... وتاس ماركيز والبنيوية... برضهم عيونهم قوية.... اكتب يا ود عقيد يا اديب....وما يغشك رهاب عتمور الفلهمة....
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
من اللذين أدهشوني في هذا المكان مجموعة من الفلاسفة (الغبش) أنت أحدهم
وأستاذي منصور وأخي نزار حسين .. ولأنكم (غبش) استطعت الوصول إليكم بسرعة
وجسارة.. وسأظل أغبط نفسي على اكتساب معرفة هؤلاء الثلاث..
تعبير (الفيلسوف الأغبش) أطلقه على شخصيات أحس أنها تمتلك
الكثير من الفهم والثقافة والقدرة على التعبير مع الكثير جدا من التواضع.
هناك فلاسفة آخرون هنا لم أستطع أن اطرق أبوابهم.. أو طرقتها برفق
لأنهم يزيلون قليلا من (غبشتهم) باعتداد إيجابي.. وإن كان يشعر البعض
من أمثالي أن الطريق (إليهم) ليس ميسرا للجميع.
لو سألني أحد عن سر وصفي (لك) بالفيلسوف لأحلته إلى اقتباساتك
العميقة والمتطابقة مع الحال دائما..
أليس ذلك كافيا؟
أما (الغبشة) فلن يسألني عنها أحد
يا أخي عبدالله .. قد ينطبق الأمر على الأخ نزار حسين وأسفي أني لم ألتقيه بعد .. أما شخصي ومنصور .. والله لو عارفنا تقنع مننا كلو كلو .. فالغبشة وراثية أباً عن جد .. ولا حظ لنا من المعرفة إلا القدر الذي أتاحته تجارب حياتية مريرة لكلينا.. منصور محظوظ أتخارج من بدري شوية وهاجر شمالاً .. وأتيحت له فرصة كبيرة في تحقيق أمانيه القديمة .. بالفضاء الذي يتيح ترتيب المعارف والتجارب التي تراكمت تحت هجير بلدناوقد وجده .. وأبدع وأمتع دون أن يؤثر ترطيب المغتربين في الغرب على لغته ومعانيه وما ظل يعتبره هوالحياة ذاتها .. من أم قفلة .. للمسادير .. بالنسبة لي فحظي في حسن الاصغاء لكل كلام جميل .. أربت على شياطين التوتر والتشويش لتهمد فاسمع الكلام .. كأنه صوت حبيبة طال بنا العهد .. وفجأة جاء .. و(أنامن أحوج الناس على برد الشتاء .. لحبيب .. يجعل العمر عميقاً ودقيقاً فجأة كالطفل جاء) ..
وأبقى عافية يا ود عقيد .. وتقبل تحايا جعفر العوض (زميلي قريبك)
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
الحلاوي
الحريف مو هاوي
خليك لي الجلسة ناوي
القهوة (زيرا) قناوي
ودايما لي صاحبو راوي
يا زول اقعد وسو العندك.. الجماعة اصلهم ما بيجو
في وكت واحد.. بعضهم يجي في الليل وبعضهم الفجر
وواحدين بي النهار..
أما موضوع السلطات دا.. فما تشيل هم.. انحنا ناس واصلين يازول
واسطتنا قوية.. وحفلتنا لي الضهرية
شايف اهو الارباب جانا وان شاء الله يقعد معانا
وحتى لو ما لقيت زول اسكت انضم
قول الفي راسك.. (دي اسمها الهضربة)
يعني لمن تتكلم براك بتقدر تقول العايزو بدون ما تعمل
حساب لي حاجة.. زي الزول العيان وبيهضرب ما في زول بلومو
لو قال حاجة كِدا ولا كِدا..
خلاص يا زول ببنتظرك في المسا
بس المسا دا زاتو مشكلة
لأنو انتو مساكم متين.. هسي في ناس في نيوزيلدنا
ناس سعد الدين، واطاتم يادوب امست..
وفي ناس في أمريكا عندهم هسي الوكت نص الليل
ونحن في الشرق الأوسط الكبير واطاتنا (أصبحت)
والجماعة في السودان واطاتم منيلة بستين نيلة..
ربك يهون غايتو
في رجاك
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
أمير الحرف الأنيق والعبارة المتألقة
العريس عبد الحميد البرنس
لك التحية
| Quote: تسجيل حضور ومتابعة دقيقة ومحبة. |
لك الشكر يا حبيب على المرور وتسجيل الحضور
ولك المحبة بقدر ما تسع المحبة
أما المتابعة الدقيقة
فأرجو (طمع) أن تصل درجة المشاركة
إن سمح الوقت.. فهذا الركن القصي سيزداد بهاءً ولا شك
بجلوسك فيه قليلا تؤانس رواده وتسامرهم وتنفحهم بزهرة
من بستانك الوارف..
خالص الود
مع أمل عودتك
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
صديقي محمد عبد الجليل
لك التحية
[B]"ولا حظ لنا من المعرفة إلا القدر الذي أتاحته تجارب حياتية مريرة لكلينا.."[/B]
يا راجل سيب التواضع، ما شاء الله، حظكما من المعرفة وافر بدليل ما تكتبه
أقلامكما، وتجارب الحياة والأسفار وحسن الإصغاء هي خير السبل لاكتساب الحظ الوفير
من المعرفة، إضافة إلى سعة الاطلاع التي ينم عنها الحرف المكتوب كما قلت لك.
بالمناسبة صاحبك منصور أتاريهو عملها ونزل السودان ونحن مش عارفين!!
له منا التحية، ونتمنى له إقامة طيبة بين الأهل والأحباب..
أنا ما عارف هل حضر العيد هناك ولّا مشى بعد العيد..
والله لو سمعتبيهو أيامي الهناك كنت شديت الرحال إليه أينما كان وقضيت
معاه جزء من الإجازة.
ولك التقدير كله..
وخالص تحياتي لقريبي جعفر العوض
وأرجو أن يتحفنا باتصال
ولك الشكر
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
الرائع ود عقيد .. في زمن قل فيه الرائعون
الإنسان جميل بدواخله .. فقط يحتاج إلى لحظة توحد .. يحتاج إلى إتساق بين
الأفكار والأفعال ..حتى يصل مرحلة التصالح مع الذات ..
وهذه اللحظة لايحركها سوى إبداعكم أيها النفر الكريم ..
(وقد قال صلى الله عليه وسلم كل ميسر لما خلق له ) فقد يسر الله لكم الإبداع ..
فسيروا فيما يسر الله لكم .. وقد يسر الله لنا الإنصات طرباً لكم .. فزيدونا ..
فيا أيها المبدع (طارق أبوعبيدة .. ود الكلالكة المبدع الذي أسعدني الزمان بصحبته
حينما كانت الرياض تنعم به .. وخدر الذي ذاد شجني .. وجعلني
أهرب من نفسي عندما إستمعت إلى جنى الوزين ) .. بإنتظار كل ماتطرب به نفسك ..
أرسله لنا .. وحتماً سيطربنا ..
المبدع ( سجيمان ) كلما أقرأ لك أهي نفسى الى لحظات جميلة مليانه بالقفشات ..
وبعد أن أقراء لك أهتف نهاية العالم ليست خلف النافذة ..
السيد/ محمد عبد الجليل .. كل يوم بكتشف إنني كنت أجلس بالقرب منك كثيراً ولكن
لم أكن أعرفك جيداً إلا من خلال هذا المنبر الجميل .. فالشكر لصاحب البيت الكبير
السيد/ بكري أبوبكر ) فك الله أيها المبدع ..
جميع الأخوة المبدعين لكم الود ولكم الحب ..
ولسه ليكم باقية كلمة ..
كلمة جوه الجوف دفينه ..
كلمة فيها حبة ..
من طيبة ومحبة
حبه لي إنسان رايع ..
قلمه للإبداع مدينة ..
ولسه برضوا الكلمة باقية ..
ذكره جوه الجوف دفينه ..
وأحجز لي كرسى قدام..ياود عمي ..
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: نادية عثمان)
|
ست الناس
الشايلة الكاس
فنجان (قهوة) بي شمالو.. يكفي الدنيا بي حالو
بنديك فنجان قهوة بس بالأول وريني
انتي صاحباتك ديل ما بيجن بي حتتنا دي لي شنو؟
ما ترا بيتكلمن مع سجيمان وصديق الموج
الاتنين عجايز وشينين.. اشمعنا يعني!!
غايتو .. قِسـم؟!
خلاس يا زولة اشربي قهوتك دي وقولي لينا قصيدة
خلي القعدة تحلى وتنعنش..
وشكرا على الزيارة اللطيفة
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
Quote: كثيراً ما تطرقت لكون هذا المنبر يضم نخبة كبيرة من مثقفي ومتعلمي بلادي ، وأنهم متقدمون تكنولوجياً، وأنهم مرتاحون ( نسبيا ً) مالياً وزمنياً للحد الذي يتيح لهم الجلوس والقراءة والتداخل . يصح بكل المقاييس أن نقول أنهم برلمان لمتعلمي السودان .
لكنك عندما تتصفح المكتوب تسأل نفسك لماذا كل هذا التنابذ والتشاحن و فيم ؟؟؟
- أسماء كبيرة في تخصصاتها تفرح وأنت ترى أسماءها تزين المنتدى وتدبج البوستات ادخل واقرأ وقل لي بربك ماذا أضاف لك البوست ؟؟
- بعض يمتلك ناصية الكلم والعبارة ، يوظفها في فاحش الكلمة وبذئ القول .
- استقطاب حاد وتهم جاهزة واغتيال معنوي للشخصية لكل من اختلف معك في رأي أو حتى في تفصيلة من التفاصيل .
- بعض أدمن المرور والتصفح ولو من مقاعد الزوار وكثير قنع من الغنيمة بالإنصراف لما يراه أهم .
أسائل نفسي هل نحن أصلاً هكذا فسلط الله علينا بذنوبنا من لم يخافه ولم يرحمنا وشتتنا هكذا ؟؟ أم أن هذا التشتت هو الذي أورثنا كل هذا التناحر ؟؟؟
وأسائل نفسي كذلك كيف سينصلح حال السودان إذا كانت اختلافات مثقفيه الحادة هي في المواضيع التي نراها في الصفحة الأولى للمنبر .
ود عقيد
تحياتي واحترامي وسلامي
و
ما تطول الغيبة |
الصبر جبر ( كما تردد دائماً أمي الحاجة صفية بت التلب متعها الله الصحة والعافية )
مداخلة سابقة لي معك أخي ود عقيد في بوستك الأنيق ( كنت عايز أقول شنو----- )
وهي مداخلة لم تمهلها ( الأرشفة ) فذهبت مع بوستك الأنيق مأسوفاً على شبابهما الغض .
حجزت مكاني باكراً وتفاديت نظرات ( الجرسون ) بالشاى الذي أدمنه فكلماا تسوقه خطاه العجلي ناحيتي يجدني أتلذذ برشفة وعيني ترمقه ليجهز طلباً جديداً .
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عاطف عمر)
|
أووو حبيبنا عاطف عمر
لك التحية والتقدير
ح أرد عليك قبال الجماعة الفوق ديل
لأنو حقيقة متحسر على مداخلتك الجميلة التي لم أستطع
الرد عليها في البوست المؤرشف..
ولم أجد حتى فرصة لأعتذر لك.. فلك العتبى..
حجزت مكاني باكراً وتفاديت نظرات ( الجرسون )
بالشاى الذي أدمنه فكلماا تسوقه خطاه العجلي ناحيتي
يجدني أتلذذ برشفة وعيني ترمقه ليجهز طلباً جديداً .
يا عاطف ياخي ما كان تستعجل تشرب الشاي
الليمون ماشي عليك.. خلاس يا زول خلي الشاي يبرد في خشمك
وبعدين تشرب الليمون..
أظنك تدمن الشاي مثلي.. انت عارف هسي انا بتاع القهوة
دا لمن اجي احاسبو قدر ما يقول لي عدد الكبابي الشربتهن بصدقو
لأنو بكتح ساااااااااااكت..
جر كرسيك يا زول .. يا حليل زمن الكتِح كتِح والقعاد بنابر مو كراسي!!
والشراب بي العبار والنضِم كبار كبار، ومافي زول جايب خبار..
هلا هلا.. زمن..
هسع البيقرا الكلام دا يقول اكنا أولاد كاس..!!
انت عارف مداخلتك النقلتها دي.. أدتني إحساس بأنو انا عندي
نزعة بتاعة فضفضة.. ورجعت لي ورا.. اتذكرت البوست بتاع (نحن كِدة)
والبوست الأخير بتاع (انا كنت عايز اقول شنو..؟)
الحكاية دي باقيلك فيها فايدة يا عاطف..؟
يعني الناس البيقرو لينا ديل بيستفيدو منها بتفرق ليهم؟!
كدي اشرب شاهيك دا.. ونواصل
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
Quote: أظنك تدمن الشاي مثلي.. انت عارف هسي انا بتاع القهوة
دا لمن اجي احاسبو قدر ما يقول لي عدد الكبابي الشربتهن بصدقو
لأنو بكتح ساااااااااااكت..
جر كرسيك يا زول .. يا حليل زمن الكتِح كتِح والقعاد بنابر مو كراسي!!
والشراب بي العبار والنضِم كبار كبار، ومافي زول جايب خبار..
هلا هلا.. زمن..
هسع البيقرا الكلام دا يقول اكنا أولاد كاس..!! |
والله كلام يا غالي
ذكرني كلامك بطرفة
قصة إدماني للشاى مكان تندر إخواتي وقريباتي
رزقني الله تعالى بزوجة تجيد أشياء كثيرة من ضمنها الشاى . أستمتع كثيراً به .
كنا ( يوم خميس ) نحضر سوياً فيلماً . نستغل الفواصل الإعلانية وأعلن ( يلا نمشي المطبخ نعمل شاى ونجى نواصل ) ذهبنا المرة الأولى ، وذهبنا المرة الثانية بحماس منها أقل من المرة الأولى ، وعند المرة الثالثة أعلنت تمردها ( يا أخي ما ممكن الليل كلو إنت تشرب في الشاى )
فأجبتها بدون تردد
( يا بت الناس ما تحمدي ربنا رزقك برجل ( --- ) قاعد ليك ( يوم الخميس ) في البيت ،وبيشرب في الشاى كمان ، الرجال ( الصحي صحي ) يوم الخميس دا بيشربوا أشياء تانية خالص ، الشاى دا ولا بيجي بجنبهم )
لك التحية
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
ود العقيد تحياتي
والله قهوتكم جميله وقعدتكم ظريفه
بس الواحد خايف يدمن عليها
زي ما أخونا سجيمان أدمنها
وياريت كل الناس تدمنها وتبقي القعده لامه
والناس تتفاكر فيها في كل المواضيع البتهم الوطن
وعندي سؤال ما في محلو لكن جاء في خاطري كدي
انتو أمريكا دايره من السودان شنو .
البترول واليورانيوم ... ولا ,,,,, الإســــــــــــــلام
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: ابو وشاح)
|
ود عقيد سلام
انت من نضمكـ ده اظنكـ من اهلي
..
بت اُمحمد ( امي ) حكت لي زمان عن الشاعر الشنابي
قالت عنو شعر كتير نستني ليهو الغربة ام قدود دي
عليكـ الله لو حافظ ليهو ادينا
وماتنسي ود الفراش
اعزمهم في قهوتكـ دي
والله الناس ديل ماساهلين
ودالفراش قال
الليلة الصعيد عم البلد نسامو
ذكرني البريد ليمو و بشيقني كلامو
ده البُريب علي القلعات بشوف حوامو
هارد قلبي بي ليمو و فرية اكمامو
ودعتكـ صاحب الوداعة
ومتابع معاكـ
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: خدر)
|
مولانا خدر
عودة سلامة
وحبابك عشرة
هاك الحتة دي من ود الفراش
وسأعود إليك بإذن الله:
عَتــُودْ الدْقَدقْ المِنْ قَامْ نَشِيط
عصــاقيلاً تَخَلِّي الكُـــــُور يعيِّط
تقُولـبْ إيديك تقول مكنة مِخَيِّـّــط
بلا سِــت ريدي ما أظِنــَّك تَبَيّتْ
وعبرك أرحب بزائري الكريم
الأستاذ عصمت العالم
إلى حين عودة وافرة
بإذن الله
ولكما خالص التقدير
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عصمت العالم)
|
الأخ الأستاذ عصمت العالم
لك التحية
اشتقنا لاسترسال قلمك الذي ينساب
انسيابا في الوصف حيث يتجلى في هذه الأحوال ويتألق
لا سيما رحلتكم في بادية الكبابيش برفقة
منصور ويحيا..
| Quote: ساعاود المرور...ربما امكث...بينكم... |
هذا الوعد.. يجعلني أطمع في تتبع سيل من ذلك
المداد الوصّاف.. وآمل أن يتحقق هذا الأمل
والقهوة في انتظارك
لك الشكر ولك المودة
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: ابو وشاح)
|
ابو وشاح
لك التحية
ولك الشكر على المرور والمؤانسة
وأرجو أن يطيب لك الجلوس مع الشاي المنعنع
والليمون البارد..
Quote: وعندي سؤال ما في محلو لكن جاء في خاطري كدي
انتو أمريكا دايره من السودان شنو .
البترول واليورانيوم ... ولا ,,,,, الإســــــــــــــلام |
سؤالك أظنو في محلو.. لأنو دا محل ونسة ومافي مانع
نتناول فيهو الحديث من جاي ومن جاي..
بالنسبة للسؤال، فالإجابة عليه حسب ما يهتم به الشخص المجيب
فالمهتمون بالبترول واليورانيوم يعتبرون أن أمريكا
دايرة من السودان هذه الثروات..
والمهتمون بالإسلام يعتبرونها تسعى لإضعاف دور الإسلام رسم ملامح هوية
السودان وبالتالي هوية أفريقيا (المجاورة)..
والمهتمون بكلا الأمرين، أو ببعض من هذا وبعض من هذا
يعتبرونها تسعى لنيل الأول والنيل من الثاني..
طبعا في ناس بيعتبرو أمريكا مجرد واسطة طيبة النوايا
تسعى لعمل الخير من أجل الخير
السؤال المهم، أنا وانت مع ياتُن؟
ولك الشكر مجددا
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
Quote: كراسة الغياب
منصور المفتاح
يحي عبد الكريم
أساسي
بدر الدين شنا
نزار حسين
حسن البشاري
البدوي يوسف
تروتسكي
عادل فضل المولى
عثمان فضل الله
بخاري بشير
نشأت عبد الكريم
|
الرائع عبدالله عقيد
حاضر انا منذ ان انتحيت بكرسيك خارج المقهى، لكني خشيت ان اقطع عليك هذا الاسترسال الممتع في الحديث وانت تحاور هذا تارة وتشدو مع ذاك تارة اخرى.
لكن ذلك اعاد الي ، وانا ارتشف كوبا من رفيقتي الدائمة القهوة، جلسات في الهواء الطلق في كرسي جانبي خارج المقهى كانت تضم الاخوين البدوي يوسف وعادل فضل المولى.
واضم صوتي الى الاخ خدر واظنه "من عندنا" وليت احدهم يسمعنا شيئا من كلام ود الفراش
Quote: ودالفراش قال
الليلة الصعيد عم البلد نسامو
ذكرني البريد ليمو و بشيقني كلامو
ده البُريب علي القلعات بشوف حوامو
هارد قلبي بي ليمو و فرية اكمامو |
اما حكايتي مع القهوة فهي مثل حكاية صاحبك عاطف عمر لدرجة ان المدام اقترحت ذات مرة ان نفتتح بوفيه في المنزل لمقابلة طلباتي.
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: حسن البشاري)
|
حرف سكران
تلقانى فى الأفراح
باسمة وحياتى وهج
تلقاني لا باكية
لاصارة وشى زهج
تلقانى يا محبوب
فرحانة شان حبيت
قلبي الحنون مملوك
لى حبي واحة وبيت
تلقانى راسمة العين
مكحولة حب وعسل
الزول بريدو شديد
لى قلبى دمو وصل
تلقانى فى الشريان
حايمة ومعاى البوح
اهمسلو فى الرئتين
واشهق هناك فى الروح
تلقاني مجنونة
بكتب حرف سكران
شارب نبيذ الريد
مليان نغم وحنان
بين الفرح والخوف
شتان وكم شتان !!!
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: نادية عثمان)
|
حرِف تريان:
شيليني يا غيمة
وديني لي الوديان
خليني أشدو نشيد
صافي وحروفو حُنان
ينضح محنّة وريد
وبي شوق سنين رويان
يا غيمة يا نسمة
ضميني ليك ضمّة
خليني أنجمّ
أنسا الهموم جنبِك
ورويحتي تتلمّ
اديني كلمة ريد
ما بتغلِبِك كلمة
أو بس حرِف تريان
اسقيهو ريد وحنان
علشان يكون قنديل
يهديني في الضلمة
ويا ريت تكون
كلمة.
وإن عدتي.. عدنا.. يا نادية
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: حسن البشاري)
|
أخي العالم حسن البشاري
لك التحايا والود
قضيت يوم (سمح) مع شيخ العرب البدوي يوسف
وأصدقاءنا أولاد الرأي العام بكل حلاوتهم
وقبلها زرت اخي عادل فضل المولى
ووجدتهم في زحمة ناس وشغل واستعداد
وتعرفت على زول جديد جميل اسمو محمد عبد القادر
كما تشرفت بالتعرف على الجميلين (أحمد وشيماء)
اولاد البدوي يوسف وزرتهم في البيت..
وخلال تلك الجلسات كان يدور اسم (العالِم)
وخاصة خلال ونسة البدوي ومحمد عبد القادر
وخرجت منهم بمشاعر جميلة من المحبة والخوة
أتمنى أن تتدوم ويدوم التواصل.. وأن تكتمل
بلقائك قريبا بإذن الله.
لو جيت بي جاي ماشي علي البلد الحرام
قول لينا عوك عشان نلاقيك..
وقبلها واصل زيارتنا في المقهى وادعو لنا صديقيك
ولا حا نسحب منهم الباسوورد ..
البدوي أخبرني حينها أن الأخوين (راكوبة، وود رملية)
موجودان بالسودان.. لكني قضيت في الخرطوم يومين وشوية يوم تالت
عشان كِدا ما شفت بقية الشباب.
شاكر لك هذه الزيارة الكريمة
ولك المودة والتقدير
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
Quote: حرِف تريان:
شيليني يا غيمة
وديني لي الوديان
خليني أشدو نشيد
صافي وحروفو حُنان
ينضح محنّة وريد
وبي شوق سنين رويان
يا غيمة يا نسمة
ضميني ليك ضمّة
خليني أنجمّ
أنسا الهموم جنبِك
ورويحتي تتلمّ
اديني كلمة ريد
ما بتغلِبِك كلمة
أو بس حرِف تريان
اسقيهو ريد وحنان
علشان يكون قنديل
يهديني في الضلمة
ويا ريت تكون
كلمة.
وإن عدتي.. عدنا.. يا نادية |
حرف نازف
انا حرفى زول مجروح
نازف وباكى وحيد
محتاج لضمة حب
ولهمسة اعلان ريد
حرفى التعيس ندمان
مأزوم وقع زى صيد
شان قال كليمة حق
بقى حرفى ديمة طريد
سارح وتائه جد
حرفا لقيط وشريد
سجنوهو ماهماه
ختو النقط فى القيد
حرفى المناضل ثار
مابخاف هتاف ووعيد
لو جابو ملك الموت
انا حرفى مارعديد
حرفى العشوق ولهان
بيشبه صباح العيد
لابخاف سلاح لا دم
لابخاف عيون الغيد
انا حرفى ديمة ولوف
مرهف مثالى شديد
بس حاشا مابيخاف
من ضابط اصلو عقيد !!!!
(وجه منتظرك فى البوست دااااااااااك وعارف انك عارفو )!!
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: نادية عثمان)
|
حرِف ولهان
ليه يا حرف ولهان
مهموم ومتألِّم؟
شايفك قِبيل نديان
لي روحي بتعلّم
نورك يضوّي أمان
ما خلّى شي مضلِّم
ما كنت بتسلِّم
وبي هواك متكلِّّم
شايل المحبة سلاح
بتنادي للأفراح
ناسي القديم الراح
ليه جيتني متظلِّم
يا حرف يا ولهان
أرمي السلاح.. سلِّم
هاك وردة من بستان
وارف ندي ورويان
والوردة نادية كمان
وعبيرا يشفي جراح
ويجدد الأفراح
يا ملهم الأرواح
يا حرف يا ولهان
ما تجيني متظلِّم
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
Quote: حرِف ولهان
ليه يا حرف ولهان
مهموم ومتألِّم؟
شايفك قِبيل نديان
لي روحي بتعلّم
نورك يضوّي أمان
ما خلّى شي مضلِّم
ما كنت بتسلِّم
وبي هواك متكلِّّم
شايل المحبة سلاح
بتنادي للأفراح
ناسي القديم الراح
ليه جيتني متظلِّم
يا حرف يا ولهان
أرمي السلاح.. سلِّم
هاك وردة من بستان
وارف ندي ورويان
والوردة نادية كمان
وعبيرا يشفي جراح
ويجدد الأفراح
يا ملهم الأرواح
يا حرف يا ولهان
ما تجيني متظلِّم |
حرف غريد
حرفى الولوف وبشوش
زول بعشق الالحان
ماسور جمال الروح
وبيقدّر الانسان
لاعمرو حقّر زول
لا جاب قبيح قولان
حرفا بيشع بالنور
وبالحب دوام تريان
لكنو نغمة نشاز
مالاقى ليهو مكان
ساحة حرب وخصام
وخيول بدون فرسان
تعبان شديد حرفى
مهموم وجد حزنان
ورغم الظلم والجور
مافارق الحبان
جاك الحرف بدموع
عارف حداك حنان
ضمو وكمان داويه
من قسوة الخلان !!!!
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: نادية عثمان)
|
حرف مجنون
واقف علي رمشك
مستني جنب القيف
خايف خطاه تتوه
والقلبِ فيهو وجيف
في وحدة يتأمّل
سامع وراهو حفيف
جاييهو من همسات
ساحرة ونغيما ظريف
تغريهو بي جنّات
مخبوءة في الوجنات
في ظلِّ هادي وريف
قال ليها هوي يا عيون
أنا حرْفِ هادي حنون
بحرك عميق مسكون
عايز حرِف مجنون
أو حرْف سيدو حريف
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
الأخ ودعقيد .. والله بوستك ده فعلاً دايرلو قعده ..
يامنصور أخدلك هزه فوق أما قريناً نزه ..
الزول مشى السودان بعد العيد .. وتلقاهو هسع برا الضحك والتصوير ما عندو شغله .. وما تخاف مافي شيء بفوتك .. لأنو منصور ما بنسى ولا بفوت .. بجيب الحاجات صرة في خيت وينزلن في المنبر ده ..
وكان لقى طريقة في انترنت وشاف قهوتك دي وحاتك قول ياكن الساهرتو للصباح .. فهو يثابر بصرامة على حاجاتو ..
قرأت أحد ردودك أظنو على الاخ سجيمان .. وما ذكرته من متطلبات دخول عالم الأدب .. وضحكت زيييييين.
واحد قبل كدي وصاني أجيبلو شرح صحيح مسلم للإمام النووي .. وحاتك لقيتو شيء يجيب عشرة لخمتاشر كيلو وقمت ضربتلو وسعلتو إن كان موجود في السودان برسلو قروش وقد كان .. لكين كنت محتار في الإمام النووي ده كتب الكلام الكتير ده كيف؟ ..
اقرأ أي حاجة .. وأكتب ما ترى ولا ترمي بوراك ولا شيء .. فما يملك أسباب البقاء مما نكتب سيبقى ..
وإن كان الشيء بالشيء يذكر .. لقيت كتاب إسمو إغتيال العقل .. وعجبني بلحيل لكين لاحظت أنو لغتو (هي لغة الحداثة البعنوها ذاته) عشان كدي أضطررت لقراءته اربعة خمسة مرات والآن أفعل .. يعني الحداثة دي نخليها لمنو يا عقيد .. مش انت ذكرت قول الفرنجة المأثور Nothing stand still ومنصور مشى من أم قفلة ومرق في بلدا (طيرو أعجم .. وما عندو إنفلونز الطيور) ..
كان أحد أقاربنا من البلد شيوعياً (من منازلهم) والكتب عندو مردومة ردم .. كل أنواع الكتب وقبل أن استرسل من منازلهم هذه لأنه لم يكون عضواً لأنو كان بيقول (مش عاوز حد يديهو أوامر .. وسوي كدي وما تسوي كدي) .. وكان يشتري كل أنواع الكتب العلمية الأدبية الفلسفية .. وقد لاحظت أنه يجيب كتب ماركس وإنجلز ولينين وماو وروجيه غارودي ولا يقرأ فيها أبداً فقط يركز على الروايات ومكسيم جوركي وغيره من الأدباء .. الذي يكتبون رويات تجيب خبر الصراع الطبقي والنضال بشكل أو آخر .. وسألته ليه هو لا يقرأ النظرية الماركسية بطريقة مرتبة .. قال لي يا أخوي إنت لو عاوز تقرأ أقرأ أنا بقرأ الداير أقراهو .. مش على كيفي .. انا بحب الأدب .. ما بحب النظريات المعقدة دي "توفى هذا الإنسان الذي لولا ما يوفره من دخل عمل يده في الزراعة .. لما مرقنا ختوه من أم قفلة وما جاورها" .. يا اخي والله ونستكن حلوه لكين أنا مشغول وتاني بجيكن.
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: Mohamed Abdelgaleel)
|
لك السلام وعليك السلام يا (مجنون)..
هكذا يحلو لمنصور أن يبتدرك الحوار.. مستحليا هذا اللقب المدل على حالة
ساقتني إلى اتهامك بالـ (فلسفة).. إذا فقصتك معانا بايظة يا محمد عبد الجليل.
ربما دفعني لاستذكار هذا اللقب ذلك السطر الخطير الذي وضعته أنت
في مقدمة حديثك.. "يامنصور أخدلك هزه فوق أمات قريناً نزّ.." ولعلك أردتها أم
وكلو ماشي.. لكنه تعبير عن طرب، ودعوة لمنصور ليطرب.. وقد أطربتني
هذه الدعوة..
بالمناسبة دي انا مغرود في كتاب (اغتيال العقل) إذا كان ياهو الكتاب
بتاع (برهان غليون).. وبعد تكمل القرية دي.. وإذا كان موجود هنا
دلني عليهو.. بس أفضل (الملح)..
بالمناسبة دي، انا بقرا الكتاب لمن أكون (متسلفو، شاحدو) لكين لمن اشتريهو
بتكاسل منو.. واقعد أأجل فيهو لمن اشوفو بقا قديم.. وما يحلى لي إلا إذا شفتو
عند زول.. ((دا برضو ما عذر مُش؟)).
طيب نشوف لينا (مكنة) تانية..
غايتو يا محمد أنا بتحدى أي زول قرّاي وبيستوعب بي سرعة يقرا كتاب واحد
بس ويقدر يخلصو بطريقة متواصلة، وهو كتاب اسمو ((المثل السائر في أدب الكاتب والشاعر))
مجلد واحد بس، لكين أظنو الزول الكاتبو دا كان من مثقفاتية القرن الثالث الهجري..
أنا قريتو في الثانوي لكين لا هسي اسمو بيضرسني..
القراية هسي طبعا خليناها، مع المشغولية والإنترنت والتلفزيون والكشتينة..
تاني نقرا بي وين، ودا حالو الأولاد مافيشين..
بس الواحد لمن يلقاليهو كتيبا سميح كدي بينجبر عليهو..
منتظرنك
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
الاخ العزيز عبدالله
ُامات بضم الألف .. وليس أم .. ولكنها جمع أم فصحتها (أمهات) قرينا نز .. لكين طبعاً لو فصحتها بتبقى ما عندها أي طعم زي كل التنطع والتطنز في غير محله .. الطيب صالح عندما سؤل عن أن رواياته قد جاءت موغلة في المحلية قال: يا أخي لكين الزين ما ممكن يتكلم فصحى .. وفي الرواية ينبغي أن يلبس كل شخص ثوبه وإلا لفسدت الحبكة كلها .
أيوه بتاع برهان غليون ومتوفر عندي بعد القرية دي بديك ياهو تب .. ولنستسنح
الفرصة لتبادل الكتب والمثل السائر ...
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: Mohamed Abdelgaleel)
|
الأخ محمد عبد الجليل
لك التحية
وأشكرك على التعقيب
حديثنا عن (أمات، وأمهات) يقودني للحديث عن مشروع أخطط له في ذهني
هذه الأيام وهو تناول موضوع (كتابة وقراءة العامية) فالكثير من القراء
تبرمج على أن ما يكتب كله (فصيح) لذلك تجده يحاول قراءة العامية المكتوبة
كأنها (فصحى) فيخطئ قراءتها ولا يستطيع فهمها، وهذا هو الإشكال الأساي
لكل من يشكون عدم قدرتهم على فهم الشعر الشعبي (الدوبيت) أو غيره
عندما يقرأونه، في حين أنهم يستمتعون له عند السماع.
كما أننا نُغفل عملية (التشكيل) عند كتابتنا للعامية، والتشكيل هنا
أمر مهم، فكثرة قراءتنا للفصحى واعتيادنا عليها جعلنا لا نحتاج للتشكيل
إلا إذا كان المكتوب (نصا) قرآن أو حديث أو شعر..
أما العامية فتحتاج للتشكيل لتقريب الكلمة المكتوبة إلى الكلمة المنطوقة.
فمثل (أمات) لو شكلناها تصبح (أُمّات) وهنا سينتبه القارئ ويعرف أن المقصود
بها (أمهات) أما بدون تشكيل فسيقرأها (أَمات) بفتح الهمزة.. حسب الاعتياد
ثم يضطر للعودة إلى قراءتها ثانية..
مثل آخر، في بوست الأستاذة عائشة المبارك عن (المنديل ودلالاته الرومانسية)
أردت أن أورد جانب من أغنية سيد خليفة، (يا منديل)، ولكني ترددت لسبب واحد
هو أن كتابتها ستكون بعيدة تماما عن معناها المنطوق به.. فهو يقول
رسل لي هدية لطيفة
خلت قلبي يحن ويميل
حرير ابيض مشغول بقطيفة
رسمة قلب وسهم نبيل
إنت جميل والجابك لي ملاك وجميل
يا منديل..
ولو شكلناها ستصبح هكذا
رسّل ليَّ هدية لطيفة
خلَّت قلبي يَحِن ويميل
حرير أبيض مشغول بقطيفة
رسْمة(ت) قلْبِ وسهْمِ نبيل
......
لاحظ رسمه ة ت .. و قلبِ وسهمِ المجرورتا الآخر..
أرجو أن أرى طرحا في هذا الجانب
لك خالص المودة
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
الاخ العزيز
ود عقيد
تحياتي
كل ما اهم بالدخول اليك، اخشى ان اقطع تسلسل الحديث والونسة الشيقة مرة وانت تجاري باحرفك الانيقة احرف نادية الندية، ومرة وانت تناوش الاخ محمد عبد الجليل او يناوشك هو حول العامية وافساد الفصحى في غير موضعها لجمال العامية.
قرأت ردك ، وسعدت انك استمتعت بصحبة الاخوين العزيزين البدوي يوسف ومحمد عبد القادر، واهل الرأي العام وفي مقدمتهم الرائع بخاري بشير ونشأت الامام وعثمان فضل الله والعروس .. وفي السوداني الاخ عادل فضل المولى. وصدقني وددت ان اكون في معيتكم في تلك الجلسات العامرة
بالاحباب. وكم اود ان التقيك وربما تسنح لنا فرصة للتنسيق وزيارة السودان في وقت متزامن، او حين يأذن الله لنا بزيارة البلد الحرام مرة اخرى كما اذن في رمضان الفائت.
لك مودتي
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: حسن البشاري)
|
الأخ حسن البشاري
لك التحية
وشكرا على هذه المتابعة التي تسعدني حقا، ولا نستغنى عن دخولك
حلبة النقاش وأخذ حقك في الحديث فالمقهى كله ينتظر حديث رجل
مثلك ومجال الحوار مفتوح بالطبع.. كلمة من هِنا وكلمة من هِنا
ولعل دخولك يستدرج أحبابك المستعصمين بالبعد عنّا بدوي وعادل.
لكين عادل تاني ما أظنو يفضى لينا بعد ما درشو عمك عروة بي
رئاسة قسم الأخبار في السوداني حسب ما سمعت..
أما البدوي ورغم استطاعته استخلاص وقت للمنبر إلا أنه يأبى
أن يتحفنا بنظرة..
سننتظرك ولا تطيل الغيبة..
ولك المودة
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
Quote: رسل لي هدية لطيفة
خلت قلبي يحن ويميل
حرير ابيض مشغول بقطيفة
رسمة قلب وسهم نبيل
إنت جميل والجابك لي ملاك وجميل
يا منديل.. |
| Quote: فجزى الكاهلية الحب عني ما جزتني عن جرأتي وإتصالي |
سلام عليكن إيها المقتهين وخاصة المالاقينا:
أخي عبدالله ..
ده الزارعينو تحت القيف
شوفو ياأحمد مزرقن كيف
اللابس حرير ليلى وجليدو نضيف
جاتك أمانة يا الدكتور بتطعنو كيف؟
هسع يا عبدالله غنوة سيد خليفة دي .. وخفقان موج زولة العباسي ديل بدورن ليهن تشكيل؟
ديل عاوزات حس وبس ..
زميلنافي القضارف الثانويةأسامة قزقاز الله يطراهو بالخير .. كان مشاغباً من الطراز
الإستثنائي .. وكنا في حصة الأدب وقصيدة المحجوب (الفردوس المفقود):
نزلت شطك بعدالبين ولهانا فذقت فيه من التبريح ألوانا
فلا اللسان لسان العُرب نعرفه ولا الزمان كما كنا ولا كان
وبدا مولانا الأستاذ علي الأزرق يشرح القصيدة ولاحظنا أنه تجاوز شرح الشطرة التي تقول:
والعقد جال على النهدين ظمآنا
ولم يذكر شيئاً في شرحها إما لوضوح المعنى أو إتقاء حسية لا تناسب أن يقول بها
مولانا أمام مراهقين مهزارين
فرفع أسامه إصبعه متطلعاً بعينين (خبيثتين) وسأل الأستاذ: يا أستاذ اشرح لينا:
العقد جال على النهدين ظمآنا .. وكان مولانا الأزرق يضيق بأسامة ويعرف عن كثب
أنه من أصحاب البنود الخفية الهادفة إلى إخراج الحصص التي لا تروقه أو لا يحب من الأساتذة الذين يدرسونها إلى غير ما وضعت له .. فرد عليه: ده ما بشرحو ده بحسو يا ..
وهذه المقدمة يا عبدالله ياأخوي عشان ما أدخل معاكن في التشكيل بتاع العامية .. وقديماً قال شيخنا التجاني:
ولقيت من عنت الزيود مشاكلاً وبكيت من عمرو ومن إعرابه
وربما يفلح المسعى لتشكيل العامية للبنادره الذين لا تشكل بالنسبة لهم الـ mother tongue لكين بتجيك مشكلة شرح المعاني وبتجينا تاني شغلة الإمام النووي وارتفاع سعر الوزن .. وتاني بجيكن.
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
عزيزي الأستاذ عبد الله عقيد
كتاباتك، يا سيدي، مترعة بحميمية لا تملك إلا أن
تجالس من بالمقهى ممتعاً النفس بمتابعة ما يجري في
هذا المقهى الفريد ببساطته التي تكاد تترجم إلى لوحة مشاهدة وملموسة
ما قاله صاحب غضبة الهبباي -عليه رحمة الله :
"إمرأة كباشية
بحمار مقروح وحطب..
ماتت في الشارع، نصف الشارع، في "العباسية"
لك ودي وكثير احترامي
الزاكي
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: الزاكى عبد الحميد)
|
الأخ الزاكي عبد الحميد
لك التحية
ومرحبا بك في هذا الجانب من القهوة
ونرجو أن يطيب لك الجلوس والمؤانسة
ولك الشكر على الإطراء.
وحيا الله ذكرى الراحل المقيم المبدع صلاح احمد ابراهيم
وقد نبه ذكرك لـ (الكباشية) في ذهني خاطرة
تلك (الكاهلية) التي تغنى لها توفيق صالح جبريل (أعتقد)
بقوله:
وفتاة لقيتها ثَم تجني ثمر السنط في إنفراد الغزال
تمنح الغصن أسفلي قدميها ويداها في صدر آخر عالي
ويظل النهدين في خفقان الموج والكشح مفرط في الهزال
شاقني صوتها المديد تنادي والعصافير ذاهب الآمال
أي أنس أتاحه ذلك اليوم وأي الجواء فيه صفا لي
فجزى الكاهلية الحب عني ما جزتني عن جرأتي وإتصالي
وجزاك التقدير عني ما جزيتني بهذه الذكريات
ولك الشكر والتقدير
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
العزيز عبد الله عقيد
هذا سرد بديع شدني فاسترسلت حتى قرأت كل ما جادت به يداك هنا
وتمنيت أنأ أكون إحدى الزائرات كي أحظى بـ (ونسة) تتقطر منهاالعذوبة والرقة مثلما رأيتك تفعل مع زائريك
المشكلة يا أخي انو أنا ما عارفة لو في مكان للسيدات والآنسات؟ لأنو المقاهي دي دائماً بتكون رجالية شديد ...
في انتظار المزيد
ودي
أميرة
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: Amira Ahmed)
|
أختي العزيزة أميرة
لك التحية
زمان عمنا الشاعر الداسوقي عندما زاره جمع من الفتيات
في المستشفى، كتب ليهن ورقة وقال ليهن أدّنها كمساري الترماي
قال ليهو فيها:
دور سِتّة جابلو حواري
لابسات قرمصيص
ما اتقنعن بدواري
لو زوقك يتِم
قدمت ليك أعذاري
أُخُد الزائرات مجاني
يا كمساري..
هسي إنتي جابك لينا دور 2:25 ظهرا (بتوقيت أمريكا)
ولو لينا مراد ندي الكمساري جايزة
ونديك إنتي زهرة ياسمين
ونحجز ليك كل يوم زهرة خاصة وإنو (النوروز) قرّّب
بس تعيدي الزيارة وتورينا ما عندك من حكي..
على الأقل تزاملي أختنا نادية عثمان التي قطعت
عنا حروفها ورحلت بها إلى مكان آخر..
وربما يصحى المزيد من الورد بقدوم النوروز
أو كما قال البحتري:
"وقد نبه النوروز في غسق الدجى
أوائل ورد كُنّ بالأمس نوّما"
حيا الله البحتري وأوائل الورد والنوروز
وحياك يا أميرة
ولك التقدير
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
Quote: ده الزارعينو تحت القيف
شوفو ياأحمد مزرقن كيف
اللابس حرير ليلى وجليدو نضيف
جاتك أمانة يا الدكتور بتطعنو كيف؟ |
الأخ محمد عبد الجليل
لك التحية
كدي أول حاجة هاك جدعة للكلام الفوق دا:
ده الزارعنو في النترة ومِقابلو خريف
شوف اطرافو يا احمد مِندّية كيف
عليكَ أمانة يا دكتورو تبقى ظريف
ما بيحمل هبِشة الحُقنة جلدو رهيف
نمرة اتنين يا محمد تشكر للتنبيه، فقد اختلط علي شاعر
قصيدة (الكاهلية) وأظنك متأكد من أنه العباسي..
أما حكاية تشكيل العامية، ففيها عنت بالفعل، وإن كان ثمة علاج
فهو بلفت نظر (البنادرة) وتنبيههم فقط إلى أن يحاولو قراءة العامية
بالعامية.. أي أن يتلبس الواحد منهم شخصيته العادية وكأنه يستمع
أو يتبادل حديثا عاديا مع شخص آخر، أو بمعنى أخر، يخرج نفسه من الإطار
التقليدي لعلاقته مع الكلمة المكتوبة والتي اعتاد على أنها (فصحى)
((يتخيل لي كلامي دا ذاتو داير ليهو شرِح))..
المنبر دا ح يساهم كتير في تعويد القارئ على تغيير طريقة قراءته
ولبس نظارة للعامية وأخرى للفصحى.. ولا رأيك شنو.. (رأيكم) عشان
نشرك معانا الباقين برضو..
وفي الانتظار
لك التقدير
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: Mohamed Abdelgaleel)
|
يا محمد ياخوي
نحن ما عايزين ننشبك مع اولاد البندر ديل، ولا عندنا معاهم مشكلة
بس هم بقو يضايقونا في (لغوتنا) دي، بقو يكابسو في الدوبيت
ويكوسو لي الأمثال الشعبية بتاعتنا ويحشرو ليهم كلمة كلمتين
من الاتعلموهن في الحدائق والرحلات من جنس (البيعرف الكنتوش منو،
والمشلعيب معناها شنو؟)
أها.. قلنا نشكّل ليهم ونخليهم يفهمونا ما دام جونا بي كرعيهم
واقول لك قولة.. نحن بنشكر في نفسنا ساكت.. اولاد الريف برضهم
ماسكاهم المرضة دي، وعندهم اي حاجة مكتوبة معناها تتقري بالطريقة
المعتادة.. ويتخيل ليهم إنو كلام اهلهم البيقولو فيهو دا شيتا
ما بنكتب لا بنقري ولا بيستحق حتى..؟ يمكن عقدة احساس بالدونية
ولّا شنو؟
يديك العافية
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: خدر)
|
مولانا خدر
Quote: يا الكارة شعركـ بالوطــه
كيتاَ علي تمشي و تطا |
دي زي ما قال ليك البشاري (لاحقا)
من النوع الما معروف ليها سيد
زي كتير من أغانينا الشعبية الجميلة
ويتغنى بها كل فنان.. زي ماك عارف.
بس يبدو إنك كايس ليها تمامة
وانا براي ماني عارف تمامتا والله
يمكن يجينا زول عارف باقيها
لكين صاحبك ود الياس فتحينا لينا
باب جميل وممكن نسرح فيهو شوية
وإن شاء الله تخلص إنت من (الشِبك) ديك
وتجينا هنا تتوهط في كرسيك وتخلينا
نحكي ..
يديك العافية
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
الاخ العزيز ود عقيد
وبعد ان اتجه ، نحو فناني العرضة والدلوكة
والطمبور و"الشتم" بابكر ود السافل وود الحوري
وآخرين كثر يعرفهم "اولاد جعل" من شندي وضواحيها
الى الشمال مرورا بكبوشية وجبل ام علي والمحمية
والعالياب والزيداب والدامر وعطبرة وبربر
والعبيدية والباوقة وماجاورها غربا وحتى
الرباطاب .. اقول ان الحديث بدأ يحلو اكثر ..
وحاتم الياس يوجه دفته نحو الباوقة وبربر ..
وخدر يأتي بتراثيات سمعناها كما سمعنا غيرها
دون ان نعرف قائلها .. ولعلها مناسبة لكي
نتخذ ركنا في هذا المقهى نتسامر فيه حول
اغنيات ترد الروح مثل
قامو زيارة لي كدباس ياناس اتعبوني خلاس
و
متين يالله نتهنى يكون في نقزو مسكنا
بالمناسبة يا اخ حاتم الياس، الست حاتم الياس
من ناس الباوقة وتسكن الدكة. اذا كنت من اعني
فانت صديق عزيز جمعتنا الدراسة الجامعية
والرابطة وكنت انت في بداية مشوارك الجامعي ..
وانا في نهاية سني الدراسة وقتها.
ارجو الافادة.
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: حاتم الياس)
|
عن اذنكم يا جماعة
ود الياس دا عايزلو معاي صقرية
قلت لي (بتعرف تصرف؟) أمانة ما بصرف صرِف
هاك دي.. مداخلة في بوست قيسان القلتو ليك..
لامن اجيك راجع..
Re: نفحـة من نخــيل الباوقــة - طمبور الراحل ود الحُــوري..
Quote: أخي العزيز قيسان
اشكرك كثيرا على إهدائنا هذا الجمال والإبداع
فقد استمتعنا بلونية الحوري المتفردة وتحسرنا
مع الكثيرين على موته المفاجئ..
لقد انتشر فن الحوري وتعدى منطقته (شمال عطبرة)
ووصل إلينا في ضواحي كبوشية شرقا وغربا
وفتح مجالا لنوع لم يكن معروفا في الغناء في
هذه المنطقة وهو كما قلت غناء الدلوكة المصحوب
بالعزف على الربابة.
كنت وما زلت أطرب لرميات الحوري
اتقلب جاي الجرح ناي
اتقلب جاي الجمر حي
داير ادُق طمبوري النقي
ما بيونسني الليل شوي
داير اوصفا سمحة الزي
الولوفة تحن علي
قلبي في كرعين الحدي
وانت نايم وانا جمري حي
دوما تمعتنا أخي قيسان بهذه الروائع
فلك الشكر مجددا ولك التحية |
أها شنو ليك.. يا حاتم؟
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: حسن البشاري)
|
قال الراوي يا ديلا
جميلا وقايمة قنديلة
مسرّحا ومارقا في السيرة
وشايلا الكاس علي غيرا
ومتين يا الله
نتمنى.. يكون في نقزو مسكنّا
قال الراوي يا نحنا
اصلو الحب ازى ومِحنا
متين الزول يصارِحنا
قبل الموت يريحنا
ومتين يا الله .. نتمنى
يكون في نقزو مسكنّا
أها يا حسن البشاري .. شنو ليك؟
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عصمت العالم)
|
ود عقيد أوفيت...وأنا غرضى قضيتو(بدايات تعلمنا السباحةونحن بعد فى صبانا الباكر كان أكثر مايسعدنا بعد ماطلقنا الطين..هو ان (نحدد) العمق فى الماكن العميقه وتطلع شايل طين فى ايدك دلالة على أثبات أنك وصلت الى عمق النهر ولامسته)
أعماقك ياود عقيد بعيده وللقوص فيها متعه وجمال...وغرضى كان (الدرر)
ليتك تعيد لنا ود الحورى أويعيده لنا قيسان
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: حاتم الياس)
|
الأخ حاتم الياس
لك التحية
أهديك ما كتبه الأخ قيسان في افتتاحية ذلك البوست
عن ود الحوري..
Quote: يا قلب مالك تقول وَحْ
ويا وجع في سيدك نبَحْ
يا الدِفيفِيق الما وضح ..
لا إتغملْ لا شكوك سِبح ..
طيرو فوق العرجون نبح ..
***
ياحليل البلد يا حليل جميع سُكانا
يا حليل ام نخيل والقَدلة في حيشانا
يا حليل النِمَر يا حليل فريقنا برانا
يا حليل ام مساير الأنجبت رُمانا
**
عبد الكريم الحوري ..أو ود الحُوري .. فنان شعبي عرفته في فترة الثمانينات يجوب مناطق مديرية نهر النيل منطلقاً من الباوقة..
موزعاً فنه الجميل والمصحوب بالطمبور على غير العادة ..على غير العادة لأن اغلب هذه المناطق لم تجيد هذه الآلة في تراثها الشعبي وانما برع فيها اهل الشمال الآخرين ..وهذا رأي اسنده بالإشارة الى أغاني الفنانين بابكر ود السافل وأحمد عمر الرباطابي التي كانت بالشَتم والدلوكة فقط.. وهما من اشهر فناني تلك المناطق.
ود الحوري ربما لأنه منصوري..ولهذا أجاد عزف هذه الآلة ، فالمناصير ايضاً اهل لها
وهم من المساهمين في ما يعرف بأغنية الطمبور..كيف لا ومنهم الفنان عيسى بروي كله ..فبالإضافة الى الطمبور اعتمد الحوري على آلة "الطبلة" لضبط الإيقاع مبدلاً ما كان سائدا من "شَتَم" و"دلوكة" كأدوات موسيقي شعبية في تلك المناطق.
***
ود الحوري يقول في واحدة من أجمل "رمياته":
يا كريم تديني الصبُر
والثبات في كل الأمُر
النفِس غشّاشة و تضُر
المكتوب من الله يمُر
جنبها إبليس حافر مقُر
شركو لي وكت الموت يضُر
يا الرسول من طباتو كُر
الليلة حلوة وباكر المُـر..
***
كان يطربنا كثيراً عندما يغني:
سبعين.. سبعة يوم عينيّ ما شافن جمالك..
ست فنوني ..ست الجمال هاجراني مالك ..
في الكون جميع ماشوف مثالِك
في وشيك بدراً ليلو حالِك
سِت فنوني..
سِت الحِسان دهرِك صفالِك
محمودة بين الناس خصالِك ..
ست جنوني ..
الحوري قام يوصف جمالِك
توب العفاف جابو وكسالِك ..
ست فنوني ..
شاعر أم زهور غنّا وهدالِك
فوق طريقكن قام ماشي سالك
ست جنوني..
ست البنُوت ..هالكاني مالك..
***
عبد الكريم الحوري والذي تغني كثيراً للجمال..خطفه الموت وهو في قمة عطائه الإبداعي "منتصف الثمانينات"..فبكاه معجبوه بحسرة في تلك الديار..غني الراحل كثيراً للباوقة "أم نخيل":
ياخي الليلة كيف السفر
أم نخيل يا بلد الغزل
وقفتا فوق البحر
والفراق قاسي علي ختر
البنطون قام بيْ وإنحدر
والدموع نازلات كذا المطر
الحمام الزازا وقدل
الرِهيف العـــام وأنفذر
لا فوق وديسو إنبهل
دا الأذانا وزاد السهر
الصغير من قومة الجهل
غير هواهُو أنا ما اشتغلْ
الحوري فوقكن شَعر
يا اللهيجكن زي العسل
الليلة كيف السفر ..
لي ام نخيل بلد الغزل
***
برغم رحيله إلا أن أغانيه ظلت محفوظة في ذاكرة معجبيه..بما فيها أغانيه التي يهجو فيها "الممرضات"..( اللائي لم يهتمن كما يجب بعزيزه الذي كان بالمستشفى.. "حسب ما سمعت")..وقد اسهب في هجائهن بشكل غريب ولافت ..(الممرضات عادمات الذوق والصِفات ..والله ديل ..)..
وكذلك للحوري أغنية يتقن عزفها بلحن جميل لكنها تشنف وتهجو إحداهِن بشكل أكثر غرابة إذ يقول:
إنتي شينة وكُلِك عصب ..
بس في شان نضمك كعب ..
الحوري في وصفك ماكضب
من الرجال ناقصة الشنب
بس علي شان نضمِك كعب..
**
ود الحوري..ما زالت اغانيه بكل جمالها وطعمها الخاص يرددها البعض من الفنانين الشعبيين..كما تبعه على نفس الطريقة آخرون "طريقة الطمبور مع إيقاع الدلوكة اوالعرضة"..ولا زالوا ..منهم عبد الواحد محمد البشير "الباوقة" ..وعبد المنعم فضل المولى "المحمية" و عبد الرحيم الدامر..وغيرهم ..
***
من صغير تبيت جِنيْ ..
حالي عُشرة وراضي والديْ ..
ما بيقولو ود جيران أفيْ
إتقلبْ جاي الجرح نيْ
إتلقبْ جاي الجمر حيْ
داير أدق طمبوري النِقيْ..
ما بيونسني الليل شوي
داير اوصفا سمحة الزي ..
يا الولوف.. أنا حِن علي
قلبي في كرعين الحِدي
إنتا نايم وانا جمري حي
***
كانت لإذاعة عطبرة بعض التسجيلات مع هذا الفنان الشعبي..فالإذاعات الإقليمية من واجبها تجاه هؤلاء المبدعين منحهم منبراً - رغم محدوديته- لنشر إبداعاتهم..والوقوف على تلك الالوان من فن الغناء الشعبي ..
عليه فلتكن هذه الوقفة مع الراحل الحوري ومليون رحمة ونور تنزل عليه..بقدر ما قدم من فن شعبي جميل .."فقد كان يخلق فيني حالة من الطرب لا زالت تتلبسني كلما سمعت أغانيه..وتعيدني الى تفاصيل لا زلت اشتهيها" ..
لامتين يا كريم بالعود
لي ناس سيدة والمريود
لامتين
قوم يا حوري جيب تلحين
فوق البسمة بسامتين
لو كان ما القدر لاكين
نفوت باوقتنا نسكن وين
أو حنما يقول:
المستشفى يوم زارو
كل زول نسى أشغالو
الله يا زينة ..
سهام عينيكي ماذينا
وكذلك:
يا حبان لو شفتو حالي
أصلو النوم من عينِي أبالِي
**
ألف تحية لطمبوره المسكون بالحنين..
وتحية لكل الفنانين الشعبيين..
كما هي تحية لإنسان تلك الديار..
***
يا القلوباب أرفعوا الكف ..
ويا الفريعاب ارفعوا الكف..
أقروا ياسين وكتِروا التف ..
الكويريق الما خلف
واليعوم تالاك إنزقف
حالي يا ست الريد وقف
ليه ربطِك معاي مرق بف
***
* هذا الموضوع كتبته اعتمادا على ذاكرة كما انها مراجعة لايام خوالي احن اليها كثيراً ..
مع خالص التحايا |
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
الرائع الاديب الاستاذ عبد الله عقيد....
اصل الموضوع .المزاج والكيف...وسلطانهما...وقيود الاستسلام..لواقع الكييف
ولعلك تدرك ان الطيبين من اهلنا يقول الواحد راسه واقعه.ومفقوه..من عدم شرب الشاى او القهوه او من سفة الساعوط...وهذا تعود على شكل ادمان..مع الفارق بين ادمان المخدرات خاصة التى تؤخذ من خلال الحقن فى الوريد..لان الجسد يحتاج كل يوم لكمية اكبر .زوهى تسرى فى الدم...واذا تعدى وقت اخذ الجرعه .زيبدا الانفراط فى التحمل ...ويبدا الانهيار.او من خلال الانف وهذا هو الشم.وهو الهيرويين وهنالك مخدرات تصنع كيماويا وهى اشد فتكا وضررا وتسلطا وهذا ما اصاب انماط كثيره من البشر ..وقد قيل ان الزعيم الصينى.ماو تسى تونج.كان فى بداياته مدمنا على الافيون وادمان الافيون كان ظاهره منتشره قبل الثوره الصينيه.وقد حرمته وجعلت عقابه الاعدام...ونرجع لموضوع ماوتسى تونج..عندما اراد الاقلاع عن استعمال الافيون..حبس فى داخل سفينه فى النهر...وربط بسلاسل.وكان عندما تاتيه النوبه يضرب راسه بجدار السفينه.حتى يسقط مغشيا عليه.حتى اعتاد على قهر نوبات الادمان..والله اعلم فى هذه الحكايه.لكنها تشير الى سلطان الكيف. والاحتياج للجرعه وزهى تتفاعل داخل انزيمات الدم فى جسد الانسان وتسبب كل تلك المعاناه عند فقدانها او تعذر تعاطيها.وقريفة القهوه والسيجاره..وشحتافة الروح والصداع فى حالة تفويت ميقات الشاى او ايا من انواع الكيف..
وناتى لموضوع النبيذ..ونسب الكحول تتفاوت فيه وهى ضئيله..اذا قورنت بالانواع الاخرى من الخمور..وهو يستعمل خصيصا مع الاكل.خاصة النبيذ الاحمر تستطيع ان تاكل البحر بما فيه..ولكنه غدار ان اكثرت فيه...والخواجات يحبون شرب النبيذ نادرا ما يشربون الخمور الناشفه..يحبون الابيار..( وهذه جمع.بيره) واتذكر فى السودان هنالك انواع بلديه ..مثل ..كونوى مورو..وهذا من السمسم..والابيض ضميرك..وهذا من بقايا العيش النضيفه مع خميره البيره ..وقرنجال...وزنجبيل.وتخمر لثلاثة ايام..ويصفى بعضهم يضيفن له السكر والاخرين يستعملونه كما هو.ثم هنالك الموص . والمديده النشا...مع الكسره الخميره.واضافة خميرة البيره...وهنالك العسليه..والمريسه..والبقنيه...وهذه درجات ..وكل تلك من الذره.والفاتريتا..وحتى للعارفين بامور التقطير ان عرقى العيش كاناقل فى نسبة الكحول وبارد..ويختلف عن الانواع التى تخمر من التمور والبلح والموز واليوسف افندى والجوافه.وقصب السكر والقريب فروت..وهذا يسمى السيكو سيكو.وهو اخطر الانواع..وهنالك بنج خيل..ويتم خلط بنج الخيل مع العرقى المصفى.وهنالك من يستعملون
فى السعوديه مثلا...انواع من الكلونيا .مع البيبسى كولا وحبوب الاسبرين..والبيره الشعير الخاليه من الكحول..و حبوب الاسبرين..والسكر..ودواء الكحه البنلين..مع تترا سايكلين..
وهنالك الكثير .المثير الخطر...
وبالطبع كل هذه تقع تحت المحظور والعقوبه بحد الجلد....
العزيز عبد اله عقيد..
يعنى انت قصدت تخلى مدخل حديثى الاول..يبدا..بالمكيفات المحظوره...!! ولا يهمك...
كل ذلك يقع زمنها من واقع مدارك الواقع المحلى للبيئه والممارسات الشعبيه..وتراث الواقع..
واستميح الاجلاء المشاركينوالمشاهدين ورواد المقهى العامر.. العذر فى البدايات..ولكنها ازمة الكييف كما ذكر ود عقيد الفنان..
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عصمت العالم)
|
أخي عصمت العالم
لك التحية والتقدير
قرأت مداخلتك القيّمة أكثر من مرة وأنا أحدث نفسي بمجاراتها
والرد عليها بما تستحقه..
ولكني (أجارك الله) منذ يومين أحس بانقفال نفِس (نفسي مقفولة)
مما يجري في المنبر.. ودي حالة (مؤقتة) الحمد لله سرعان ما تزول
بزوال المؤثر.. وإن كان المؤثر هذه المرة قوي
هناك أناس يمارسون عمليات اغتيال معنوية رهيبة لكل من يحسون
أنه سيأتي بشيء يعجب (القراء) ممن لا يتفقون معهم في الرؤى والمرجعية
الفكرية والسياسية.
هجوم شنيع ومتعمد، وأحيانا خبيث.. بل في معظمه بسبب (طمس) معالم
ما يتناوله هذا الشخص (المختلف معه)..
هذه الأمور تحفزك للرد عليها أو السكوت والابتعاد
وفي حالة الابتعاد تجد نفسك بعيد من كل شيء وغير قادر على تناول أي شيء
فكرت بالفعل في ترك هذا البوست.. لأنه بعيد عن هذه الدوشة التي تحدث
والانغماس فيها أو الابتعاد تماما
ولكن بالطبع هذا قرار لست من المحبذين له
سنصبر حتى تنجلي
ونعود بإذن الله بنفس مفتوحة
أخشى أن أكون تسببت في قفل نفسك أيضا
ولكن.. أحسن نفضفض (ولا شنو؟)
دم بخير وعافية
وحا نعود إن شاء الله
ولك الود
| |
|
|
|
|
|
|
|
|
 Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
والله ده مولد و فاتنا!
ياخي انا بدور ونسة الناس الكبار هههههه.
ود عقيد الما هين
هسه انا كلام المسادير و الجبنة ده كلو وقع لي عللا اسامي الفلاسفة دي
ضرستني شوية..امكن عشان علاقتي بيهم لا تتعدى تاريخ سنة اولى ثانوي و
بعض الاقوال المتفرقة هنا و هناك.. تاني ما لاقوني الا في البنبر ده
( ما عارف كان لي خير ولا شر)
بي مناسبة برنامج نجاح (قناة ابوظبي) عندنا هنا تسجيل لي حلقتها مع
التجاني حاج موسى..امانة ما خلاها تآاااامن و الغريبة بي سماحتها دي
اديبنا ده ما غلط في كلمة و هي تشيييل و تقول ليهو (صح لسانك).. و انا
اقول ليها لسانو براهو! لسانو و احساسو و زيدان و مصطفي و ترباس زاتم!
طبعا الشباب يشيلوا و يعيدو في الحلقة ما عارف عاجباهم البنية ولا عاجبهم
استاذنا التجاني.. انا غايتو لمن شفتها بي امانة كدة.. كت واقف قعدت!
امكن اكون زعلت انو الدنيا دي فيها جنس السماحة دي كلها ونحن لينا الله
سااااي.. المدهش انو شاعرنا زي الشغال بيها و ما شغال بيها في نفس الوقت..
حيرها ليك في حنانا! بس هي كمان ماشاء الله مضيفة رائعة و متمكنة جدا.
اها يا ابومشعل الحنك ده كلو انا داير اعرف الناس الاشتروا مواهب استاذنا
الدسوقي ده ديل منو لانو هم ما اشتروا.. ديل اجروا بس و العقد حقهم خلص بنفاذ
الغرض (مش كانو عايزين يحنكواو يشتهروا و كده)..
انت يا ود عقيد سيد القهوة ده من ربنا جابني بي جاي ما سمعت و لا شفتوا خت ليهو
شريط..حادي زي ولا شنو (دا الحالة)
غايتو كان ذكرتني بجيب معاي شريط (رابط) سمح و بكلم الشباب يشغلوا لينا لو ما
عندك انت او سيد القهوة مانع..
Quote: خلاص يا زول ببنتظرك في المسا
بس المسا دا زاتو مشكلة
لأنو انتو مساكم متين.. هسي في ناس في نيوزيلدنا
ناس سعد الدين، واطاتم يادوب امست..
وفي ناس في أمريكا عندهم هسي الوكت نص الليل
ونحن في الشرق الأوسط الكبير واطاتنا (أصبحت)
والجماعة في السودان واطاتم منيلة بستين نيلة.. |
اها نحن هسه اصبحت عندنا الجمعة و انتو يادااب في الخميس نص
الليل (استعجلوا حبة ياخ!)..
انا كملت شاهيني و ماشي اقضى اغراضي هوي!
ودعتكم الكريم.
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: saadeldin abdelrahman)
|
سعد الدين
حبابك
أول انت كنت غاتس وين لمن يفوتك المولد دا كلو؟
جلسات بي ليمونا وشاهيها وقهوتا بس زي ما قلت
ناقصا الطرب، الصوتي، رغم اننا كتبنا في الطرب
وما خلينا شي، من ود شوراني لحدي نقزو
الله من نقزو وشباب نقزو
بس يا ابو السعود في حاجة واحدة
بختلف معاك فيها وما حا افوتا.. وهي إني شايفك متكيف
من التجاني حاج موسى
انا بيني وبينك .. والراجل طبعا شخصية عامة
بس بفارق ليهو الدرِب لو لاقاناي
وشايف الناس مدّياهو اكتر من حقو كتييير
زول بيكتب شعر بصيت وضعيف جدا وما فيهو أي
حاجة مميزة.. بس حظ عندو حظ كارب.
دا رايي طبعا
مافي زول يجي يقول لي بتاع وهناي
الزول دا ما عندو حاجة..
منتظرنك يا ابو السعود
ولك التحية
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عبد الله عقيد)
|
حرِف تائه
يا قلبي يا ولهان
في الريد مشيت مشوار
ما شلت هم للموج
سابح مع التيار
والريد دا بحرو عميق
لي نهايتو ما في قرار
في الجوف درر لكين
محفوفه بالأخطار
فيهو الهموم والخوف
وخزاين الأسرار
فيهو الهَنا المنشود
وسعادة واستقرار
بس فيهو عدم النوم
وصعوبة الأسفار
يا قلبي يا ولهان
ما تنسى ما تنسى
حرفك كتبتو دموع
مجروحة تتأسّى
بس حرفك التائه
ما بيبقا ليك مرسى
| |
|
|
|
|
|
|
|
|
|
Re: كرسي جانبي خارج المقهى.. مساحة لحوار مفتوح (Re: عصمت العالم)
|
Quote: هذه مجاراه لوله ذلك القلب المترع بصبايا الشوق...
والمسكون بجموح رياح الاشتياق..الاعصار. |
ابو العالِم
يمسيك بالخير
ويسعد مساك وصباحك
سعدت بمجاراتك وقد أخرجتني من جو كئيب
وأعادت إلي قلبي بعض الضوء الذي يطرد النعاس والخفوت
وتباطؤ النبض..
الأمل..
اخونا محمد عبد الجليل اتكلم قبل كم
يوم عن موضوع الأمل دا
والله ياخي الأمل حاجة كويسة
بس يا ربي هل الوهم إذا كان (إيجابي) يعني
الزول يوهم نفسو بي حدوث شيء إيجابي في الغد
هل يعتبر دا أمل، والفرِق شنو؟
أمل..
أمنية، خيال، وهم، توقع، استشراف، بشارات
بكرة..
كلو مرتبط بي بكرة..
بكرة مرتبط بي الليلة
والليلة قطع شك .. زي أمس
فقدان الأمل
خيبة الأمل
اكتئاب
قنوط
حزن
دي حاجات كعبة ياخ
ابدا ما كويسة
لازم يكون في أمل
خلينا نعيش الأمل
الله يفتح عليك يا عصمت يا عالِم
ومسيك بالخير
| |
|
|
|
|
|
|
| |
عبد الله عقيد
Mohamed Abdelgaleel
سجيمان
خدر
Mohamed E. Seliaman
Shams eldin Alsanosi
Khalid Saeed
عبد الحميد البرنس
عاطف عمر
عصمت العالم
حسن البشاري
هشام آدم
الزاكى عبد الحميد
حاتم الياس
saadeldin abdelrahman
فيس بوك
تويتر
انستقرام
يوتيوب
بنتيريست