دعواتكم لزميلنا المفكر د.الباقر العفيف بالشفاء العاجل
|
|
 والله المغتربين السودانيين البيجوا السودان اجازات ويرجعوا حيرونا ..!!
|
أول ما يطلعوا من البلد .. يكتبوا كلام كدة غريب وقصص عجيبة .. والله مرات كدة بقرا ليهم بحس كاني عايش في سودان تاني غير السودان البيكتبوا عنو دا !! ..
بوستات عناوينا من شاكلة (أنطباعات عائد من السودان) و (مشاهداتي في أولى اجازاتي في السودان) و (كنت في بلاد العنقاء ) و (نفدت بجلدي من الخرطوم) ومش عارف إيه .. مرات كدة فيها مبالغات غريبة وتحس إنو الكاتب بيستعر من بلدو وتاني ما بيرجع ليها كان نطط .. !!
يا جماعة ... ارحمونا شوية .. أأأأي عارفين البلد دي ما فيها سستم وما ماشة عديل وفيها باعوض قدر الضبان ،وشوارع الزلط كلها حفر وبتكسر مساعدات عرباتكم والموية وسـخـانة وبتضر أغشية جدران معدتكم ..!! والمعيشة غالية وسعر كيلو الطمطم بي 10 دولار والتعليم في الواطة والمستشفيات الكهرباء فيها بتقطع في نص العملية .. دا كلو عارفنو ومعايشنو ..!!
أنحنا عاجـبانا كدة وعايشين فيها كدة بي سجما ورمادا دا ..!!
بعدين إنتو لودايرين تأجزوا .. القاهرة واسمرا وسويسرا وجذر المالديف مالا ؟!!
عيبوها لي ؟!!!!
|
|
 
|
|
|
|
|
|
|
 Re: والله المغتربين السودانيين البيجوا السودان اجازات ويرجعوا حيرونا . (Re: nazar hussien)
|
كيفك جلال ..
Quote: ياخوي لو عندك رأي في بوست ولا موضوع بوست أمشي كبو فيهو بالواضح
ودي قصص وحكاوي ليس إلا والسودان في النهاية ياهو بلدنا وماعندنا فيهو كلام
...............
هات من الآخر ياخوي |
أوضح من كدة أكتب كيف يعني ..!!
كلامي دا من الأخر .. وبالمناسبة أنا ما قاصد بوست محدد ولا حتى منبر محدد .. المواقع السودانية كتيييييييرة وما في موقع بيخلو من كتابات زي دي ..
صدقني لو انت كاتب بوست من النوعية دي فوالله ما شفتو وما قريتو لأنو اساسا نوع البوستات دي ما فيها شي جديد بالنسبة لي شخصيا ..
بس مرات الشي الجديد لنج بيكون عبارة عن مبالغات وتهويلات زي المغترب الكتب قال شوف عينو البعوضة قدر أبو الزنان وصوتا زي صوت الهيليكوبتر !!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: ناذر محمد الخليفة)
|
ناذر ...سلامات وكل سنة وانت طيب ..
Quote: يا جماعة ... ارحمونا شوية .. أأأأي عارفين البلد دي ما فيها سستم وما ماشة عديل وفيها باعوض قدر الضبان ،وشوارع الزلط كلها حفر وبتكسر مساعدات عرباتكم والموية وسـخـانة وبتضر أغشية جدران معدتكم ..!! والمعيشة غالية وسعر كيلو الطمطم بي 10 دولار والتعليم في الواطة والمستشفيات الكهرباء فيها بتقطع في نص العملية .. دا كلو عارفنو ومعايشنو ..!!
أنحنا عاجـبانا كدة وعايشين فيها كدة بي سجما ورمادا دا ..!! |
كلامك ده زاتو هسه ماياهو انطباعات زول مامغترب !!!
الفرق بينك وبين المغترب انه هو قطع معايشة الانطباعات دي وانت مازلت معايشها ..
فما دام الانطباعات دي واقع فماالمانع الكتابة عنها ؟
وهل الكتابة عنها تعني انهم يستعرون من وطنهم ؟ !!
هو انتقاد لحال البلد وماآلت اليه في ظل من يقولون ان البلد بخير ومتقدمة ووووو
يعني هم يتطلعون لسودان افضل من خلال هذه الانطباعات ...
قطع شك محرشك غريبة ...
تحياتي ،،
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: فايزودالقاضي)
|
جلال جبريل ..
| Quote: لاترسل الاتهامات ساكت يا ناذر |
يا خي انا كتبت :
| Quote: وتحس إنو الكاتب بيستعر من بلدو وتاني ما بيرجع ليها كان نطط |
يعني دا أحساس مش اتهام ..!!
طوالي هولتها وضخمتها ؟!!
هسي الفرق شنو بين تهويلك الأحساس لي إتهام وتهويل الزول الكتب البعوضة قدر أبو الزنان !!
عرفت المشكلة وين ؟! المشكلة في كلمة تهويل دي !!
| Quote: قصص حقيقية وحاصلة .... |
طيب ما انا فوق كتبت أأي انحنا عارفينها حاصلة .. بس مرات التهويل فيها بيكون مبالغ فيهو !!
بالمناسبة الرابط الجبتو دا أول مرة أشوفوا وبالمناسبة ما حا أدخلو للأسباب أعلاه !!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: فايزودالقاضي)
|
ناذر ود الخليفه ..أريت حالك طيب مع ما سقته وقرأته ..
لكن بعد كلامك ده عن الجماعة البشنفوا ديل ..!!
إن شاء الله ما يلاقوك المرة الجاية ..
والبلاقيك إلا يعمل ساتر ..!!
والله كلامك فى محله ، شنيف السودان وشيل حالو ده
أنا ما معاهو تب .. ضُمه ضُمه ..
بس لكن الى متى .؟ وناس الحيكومه كما قالها أحمد المهدي زمان
ضاربين طناش وما فاضيين من اللغفي والحاله ماشه لى وراء
والتقيل وراء ( ده الجيب ) زمان الجيوب التقيله كانت عند ناس
أبو العلا وعثمان صالح وأولاد البربري .. والخ
والجماعة قبل الإغتراب ماكان شافو الدنيا بره كيف ..!!
ورجعوا وقارنوا.. ، كمان الحكايه يا ناذر جابت ليها زواج
من بنات بره شيء من المغرب وشيء من الفلبين ..ومن مروتانيا
وبلاد الخواجات بالكوم ، وعيالنا بقو هيئة أمم ، ..!!
غايتو ربك يصلح الحال ..
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: ناذر محمد الخليفة)
|
سلامات يا ناذر
| Quote: يا جماعة ... ارحمونا شوية .. أأأأي عارفين البلد دي ما فيها سستم وما ماشة عديل وفيها باعوض قدر الضبان ،وشوارع الزلط كلها حفر وبتكسر مساعدات عرباتكم والموية وسـخـانة وبتضر أغشية جدران معدتكم ..!! والمعيشة غالية وسعر كيلو الطمطم بي 10 دولار والتعليم في الواطة والمستشفيات الكهرباء فيها بتقطع في نص العملية .. دا كلو عارفنو ومعايشنو ..!! |
عليك الله تانى فضل شنو!!!
يا ناذر ياخ انتو اتعودتو على الوضع نحن بنجى
ولسع فى راسنا السودان القديم والاخلاق العالية.
يلا تعال شوف التعامل بى العقلية القديمة دى بخليك
تكون سازج شديد واى زول بغشك ابتداء من سائق الامجاد
لحد الشحادين فى السوق.
الشى المحيرنى بعرفوك مغترب كيف!!!
انا مثلا اسمر يعنى ما سودانى ابيض عشان تقول لونى فاتح
وظاهرة على علامات الراحة!!!!وكمان بلبس جلابية وطاقية لكن
بالرغم من كدة الناس بتتعامل معاى على انى مغترب.
بعرفو كيف الله اعلم.
والله يا ناذر ما بنقدر نخليها وبنتحمل الباعوضة
والضبان ومرض الاطفال عشان نقضى يومين حلوين مع
الاهل... ياخ الواحد بكون مرتاح جدا فى السودان
ولمان يضحك بتحس الضحكة جاية من جوه شديد.
يا اخى زى ما قالت الطيرة بتاعت الابتدائى ديك
لا شئ يعدل الوطن.
كل الود
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: Fawzi Babiker)
|
Quote: ديل طعلوا برة وشافوا بلاد نطيفة
نظافة فى البئية والصحة والشوارع المخططة
الناس دى مجبورة تجى السودان علشان اهلها الموجوديين فى السودان لو بقدروا يطلعوهم ما كان مافى زول جاء فى بلد حكومتها كيزان حرامية فاسدين بشتنوا البلد ودمروها
عدم تخطيط عدم عقل ديل ياخى حيرونا زاتوا اى نوع البشر هولاء
وبلد تفتقد لى ادنى متطلبات الانسان علشان يعيش شوف دا لو زول ما مجبور بجى بلد زى دى |
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: مازن فيصل هلال)
|
سلام فوزي ..
| Quote: الشى المحيرنى بعرفوك مغترب كيف!!! |
من الشكوى الكتيرة ..!!
المغترب طوااالي في حالة شكوى .. الشوارع مافيها نور .. المستشفى مويتو قاطعة .. الكهرباء قاطعة ليها سبعة ساعات !! الموية ريحتا متغيرة ! بتاع العربية القدامي قطع الأشارة .. العسكري بتاع المرور نهرزني !! الموظف في وزارة المالية ما اتعامل معاي كويس !!! محل ما أنا مغترب الموية في المواسير بنكهة ريحة الورد ، محل ما أنا ساكن العيش بنشتريهو من الأجزخانة .. !!
وكدة ..!!
لأنو العايشين هنا الحاجات دي بقت عادي عندهم وما بيشتكوا ..!!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: بشير جبريل علي)
|
عشان كده يا ناذر الناس بتعارض الدكتاتورية
لأن المعيشة مع دكتاتور وكمية دكتاتوريين بالكوم زي الكيزان ديل ولمدة 23 سنة
بالضرورة ح تخلق طبقة من الشعب، لا شعوريا كده ببقى سلوكهم اقرب الى حكامهم
يعني بخلقوا دكتاتوريين صغيرين (لا دستوريين) زيك كده يا ناذر
انت "حر" تفتح البوست دا وتنتقد المنتقدين وترجى الراجيك بس من العالم المعنيين بالامر دا وبالمناسبة هم 8 مليون
اها يا اخوانا الدكتاتور الجديد ناذر بقول ليكم ما تبالغوا، فانصاعوا للأمر والا
تخيلوا معاي ناذر دا بقدره قادر بقى دستوري
اقلاها بكتبكم تعهد وانتو جايين وفي المطار، وتقروا بأنكم ابلغتم رسميا بأن البلد حالتها صعبة ومكركبة ومعفنة
وقبلتم بذلك، و قررت الدخول الى البلاد، وهذا التعهد يلزم صاحبة ان لا "ينقنق" بعد مغادرة البلاد بتاتا، وما تحكي
لصحبك زاتو
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
حبيبنا ناذر كل عام وانت بالف خير وصحة وعافية اولا ..
اما عن موضوع البوست فانت عارف وانا عارف بس احسن الواحد يبكي بس ويقش دموعو بالدس لانو لو عايز اكتب عن المعاناة الفي الإجازة والإجاة القبلها والإجازات التالية حا احتاج لي بوستات وبوستات ,,, بس ما تحسبني مع الجماعة لانو انا نقدي بيكون بناء وواقعي وليس فيه مبالغات او تهويل ، ولك ودي وتقديري ..
تحياتي : ياسر العيلفون
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: بشير جبريل علي)
|
يا ناذر الخليفة أنتو مشكلتكم اتعوتو علي عدم المبالاة وأكل حقوقكم كبشر ومواطنين عشان كدة الحكاية عندكم عادية
إحنا فعلا كنا في السودان لكن المرقنا منه الحاجات دي زاتها وما معقولة نجي بعد خمستاشر سنه نلقاها زي ما هي
ولمن تمشي تطلع رقم وطني يقولوا ليك لازم شهادة ميلاد تمشي لبتاعين شهادات الميلاد يقولوا ليك ما بندطلعا ليك لو ما عندك شهادة رقم وطني دة معناه شنو غير السبهلليه وعدم التنسيق
لمن تكون ماشي المطار وبتاع الأمجاد يقول ليك ما بيدخلونا المطار وتجي تلقي التبرير من بتاعين المطار انو ناس الأمجاد بيحتلو في المطار طيب يكون الحل تمنع ولا توقف ليك عسكري خشم باب المطار
اي زول محمل من جوة يتغرم مش الناس تصل لغاية المطار وتعتل شنطا مسافة ثلاث كيلو هسي دي ما فلسفة فارغة وعبط واستهتار بالناس
يا ناذر لية يكون في بعوض من اصلو البعوض دة عاوز F16 عشان يبيدوة ما حبة جمكسين وشوية ضمير من ناس المعتمدية يجففوا المنابع وأماكن التوالد
يا ناذر لية الكهربا تقطع سبع او ست ساعات وكمان تقطع في المستشفي في نص العملية والعيان بطنو مفتوحة ان كان بعد سد مروي الكهربا بتقطع وقبلها بتقطع مغرقين امري ومشردين اهلها ما دام الحال من قبل ومن بعد واحد
يا ناذر الموضوع احيانا ما بيكون موضوع إمكانيات بس لكن بتكون مشكله عدم الإحساس بالمسئولية يعني شارع يتعمل كويس بس ما فية وسائل سلامة كافية وكل يوم والتاني حادث لغاية ناس الحله يثوروا ويعملوا مظاهرات اها الزول الخطط والتاني النفذ والثالث الاستلم المشروع دة ما في واحد فيهم انتبه ولا كلهم بيكونوا انتبهوا لكن بيعملو فيها رايحبن عشان عارفين ما في واحد حا بجي يسالهم ليه قصرتو
ودة كله كوم واستغفال ناس الحكومة وأكل أموالك بالباطل دة كوم براة تصدق في المغتربين بيجبروك تطلع حاجة كدة اسمها بطاقة مغترب بكم الف كدة ولمن تسال الفائدة منها شنو يقولو ليك بتسجل فيها الايصالات اها الحكاية دي حرقتني وابيت ادفع عارف لمن اتعكست معاي أنا مصر ما اطلعها وموظف المغتربين حالف الا اطلعها مشيت للبنات بتاعين مكاتب الخدمات وسألت واحدة أنا عاوز تأشيرة من غير ما اطلع بطاقة مغترب وقاولتها تقريبا بنفس سعر البطاقة وقلت أحسن تاخدهم البت دي من ياخدهم كرار التهامي يتجدع بيهم في الفنادق ولا يكب بيهم بنزين
والله يا ناذر لو كنت بحكي ليك كل يوم البيحصل معاي في الشارع ولا مكاتب الحكومة كان طردتني وقلت لي تاني ما تجي بي هنا لأني عارف كنت حا اجننك
وأقول ليك حاجة والله لو ما سوبا حلوة ما كنا عتبنا السودان دة
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: الزبير صالح الزبير)
|
يا ناذر
سلام
يا خي الحيرة في شنو الواحد لو المغترب كتب شئ حقيقي ما فيها شئ ، بس المهم الواحد يكون صادق فيما ينقله للآخرين ، يعني عشان بيكره الحكومة ما يقعد يكذب ويكيل الاتهام ويجد من خلفه من يصفق له ويؤيده دون معرفة الحقيقة ، ولا يخفى عليك حبنا للسودان يخلينا نقول الحاجات الحاصلة ممنيين النفس أن تكون بلادنا مثل تلك البلاد التي أتينا منها ، من حيث مستوى التعامل ومستوى النظافة العامة ، فأما مستوى المعيشة لا نستطيع الحكم فيها لأنها تفضيل من الله سبحانه وتعالى ( وفضلنا بعضكم على بعض في الرزق ) .
والمغتربون يختلفون حين حضورهم منهم من يود العيش مترفاً والتصرف كما يعيش في بلاد الغربة ، ومنهم من لا يشعرك بأنه أصلا مغترب وفي النهاية رغم إختلافهم إلا أنهم أبناء الوطن الذين أتوا لزيارة أهاليهم ومعارفهم ولا يمكن أن نقول لأحد ( أنت البلد لو ما عاجبك أمشى كولالمبور أو المالديف ) .
يا ناذر
شاءت الظروف أن أحضر مرتين خلال هذا العام ( شهري يوليو وسبتمبر) وكعادتي أقضي إجازتي بكل بساطة وسط الأهل آكلا الفول ومدافراً في المواصلات ورافعاً الفاتحات وزائراً المستشفيات ، ورغم إختلاف الحياة هنا في الغربة وهناك في السودان إلا أنني كلما شاهدت منظراً مؤلماً أو موقفاً محزناً أو تعاملاً سيئاً أتمنى أن نكون الأفضل ، وبالمناسبة في بوست لأحد الزملاء بعنوان ما معناه ( الكلاكلات تتحول لكوش وقاذورات) نقلت ما شاهدته من جيف لكـلبيـن ميتين في شارع محمد نجيب الموقع الأول على الرصيف الفاصل بإتجاه الجنوب من المغترب وقبل أن تصل كلية الخرطوم التقنية والموقع الثاني في نفس الرصيف وقبل أن تصل نهاية الصحافة شرق .
فبالله هل نسكت عن تلك المناظر القبيحة والمضرة بسمعة البلد والمضرة ببيئة البلد ؟؟
ولكم تحياتي
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: ولياب)
|
عضو/ة تداخل/ت معى فى بوست معلقا وبالحرف الواحد:
ﻧﺎﺱ ﺍﻡ ﺑﺪﺓ ﺩﻳﻞ ﻭﻣﻨﺎﻃﻖ ﺍﺧﺮﻯ ﻓﻰ
ﺍﻟﺴﻮﺩﺍﻥ ﺷﺒﻴﻬﺎ ﻟﻬﺎ ﻟﻮ ﻣﺎ ﺭﺑﻨﺎ ﻭﺍﻟﺸﻤﺲ ﻛﺎﻥ ﺍﻧﻘﺮﺿﻮﺍ ﺯﻣﺎﺍﺍﺍﺍﻥ ﻟﻜﻦ ﺍﻟﻠﻪ ﺭﺣﻴﻢ ﺑﻌﺒﺎﺩﺓ.
انتهى
يعنى فى داعى للاحباط دة.
اكيد ناذر يقصد مثل تلك التعليقات والانطباعات.
السودان دة ما أظن يتقدم فى المستقبل القريب ينقصنا شئ يسمى "حب الوطن" والوطن ما لازم يكون جنة الله فى الارض لكى نتماهى فى حبه. الوطن قد يكون صحراء قاحلة "تذكرت فى تلك اللحظة السنوسى بدر عضو المنبر نتمنى عودته" او قد يكون ارض جدباء او جبال او او. ما يهم هو الانتماء الصادق وحب الوطن. ولو توفير هذان الركنان ياتى العمل الصادق لرفعة الوطن.
ياخى انظروا لاقرب جيران لنا "المصريين" فرغم شظف العيش لغالبيتهم والفقر المدقع وهجرتهم -قبل ان يعرف السودانيين الهجرة- الا ان حب الاوطان يتملكهم ولا يستطيع كائن من كان ان يسب او يسئ الى 'مصر' فى وجود مصرى حتى ولو خارج مصر ولو حدث هذا فكانما اعتديت على شخصه.
فقط قليل من حب الوطن وبعض انتماء.
الحكومات تذهب وتتبدل ولو بعد خمسين عام، وتبقى الاوطان.
:-|
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: بشير جبريل علي)
|
الفنان ناذر الخليفة :
أأأأي عارفين البلد دي ما فيها سستم
وما ماشة عديل
وفيها باعوض قدر الضبان
وشوارع الزلط كلها حفر وبتكسر مساعدات عرباتكم
والموية وسـخـانة وبتضر أغشية جدران معدتكم ..!!
والمعيشة غالية وسعر كيلو الطمطم بي 10 دولار
والتعليم في الواطة
والمستشفيات الكهرباء فيها بتقطع في نص العملية .. دا كلو عارفنو ومعايشنو ..!!
--------------------------------------------------------------------------------
ياشباب ناذر عنده إنتقادات عايز يوجهها
و أهو قالها اعلاه
فأعطوه حقه في النقد
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أبو ساندرا)
|
ما قريت كل المداخلات .. بس الواضح ان معظم الناس ساخطة علي نازر !
لانهم كرههو بي بوستاهم العجيبه كروهنا معاهوووو..
حقيقة البوست مهم جدا وكلام نازر عداهو العيب .. ما ياهوو السودان بتاع ذمان
- نفس الخيران البحفروها قبل الخريف بـ 13 يوم .. ومن سنة 70
ونفس زحمة المواصلات
- نفس السلفه البدونا ليها للعلاج .. في المراكز الصحية
- نفس الشوارع ومحفرة
- نفس سرسرة الموية .. وحركات الكهربا ...
- نفس صينة الاكل المدورة و الفيها صحن صحنين والعيش داير مايدور ..
:
:
:
:
حقيقة الناس العايشه بره السودان لاعايشين رفاهية ولا حاجه ما خدين شلوت في راسهم
عنطظة في الفاضي ساكت ..
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
سلام محمد مختار ..
Quote: ناذر ود الخليفه ..أريت حالك طيب مع ما سقته وقرأته ..
لكن بعد كلامك ده عن الجماعة البشنفوا ديل ..!!
إن شاء الله ما يلاقوك المرة الجاية ..
والبلاقيك إلا يعمل ساتر ..!!
|
يا خي هو شناف ساي ..!!
طيب قول شنفوا ومعاهم حق انحن ذنبنا شنو يشبكونا (بلدكم سوت وبلدكم تركت) ..!!
او زي ما قال تاج السر الواحد يشوف حاجة ما ياها يمط شلوفتو ويقول ليك (والله السودانيين ديل بلا بلا بلا بلا ...)
انحنا غايتو في الخرطوم دي عمدنا حاجات بنعتز بيها وأمكن ناس من المغتربين بيشوفوها تخلف .. عندك مثلا لمن نجي نعز ضيفنا بنوديهو قندهار .. حتة بلدية جدا تقعد في عنقريب تضرب الذ وأطعم شية وانت مستمتع بي موسيقى الضبان والسخانة والغبار الحواليك ..
جا الليل بنمشي سكينة في الصحافة .. نقعد في الشارع في البنابر نضرب الكوارع بي اليد اليمين واليد الشمال ننفض بيها نمل أبريش الماشي صفوف في كرعينا ..!!
ما عندنا قهاوي ..!! نعمل شنو عاد ..!! نمشي العمارات لي اميرة نشرب منها شاي باللقيمات في شارع الله دا وسط الغبار ويجي واحد سكران يطرش جمبك وأنت تواصل شاييك مستمتع ومتكيف ..!
بعض المغتربين الحاجات دي ما بتنفع معاهم وليهم حق ..!!
انتو حرين .. ما تشنفوها لينا وبتنفع معانا نحن الحارسين البلد دي ..!!
تسلم ..
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
سلام نزار ..
Quote: يمين يا ناذر قدر ما اجزت في بلاد الله الواسعة دي
ما قدرت استمتع كما استمتع بإجازتي في السودان |
القصة قصة تعايش مع الواقع ..
ما مابين التطور والتقدم لو لقيناهو .. لكن أهو دا واقعنا والبلاد الفيها المغتربين سابقننا بي مية سنة على الأقل نسوي شنو ؟! بعدين ما في داعي الشناف دا يقولوهو لينا قدامنا .. ما تتصور كمية الأحباط والقرف البنشعر بيها لمن زول يقول كدة ..
يا خي اهندييك الحكومة امشوا عليها دوغري ووروها انتو عايشين كيف والسودانيي ديل عايشين كيف ..!!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
عادل علي ..
Quote: ام تريد القول أن هذا الوضع المذري هو واقع السودان...والداير يجي ويقطّع أي معاناة في مصارينه (ويخرس) والما داير ماااا يجي؟
داير تقول شنو؟ |
داير أقول الشنافة واللفافة ما في داعي ليها لأنو تعتبر نوع من الأستفزاز .. ما في داعي تكون حايم مع مغترب في السودان وهو يعلق على كل حاجة وكل دقيقتين يقول ليك (إنتو عايشين كيف مع الوضع دا) ..!! أها زي دا نقول ليو شنو ؟!
نموت يعني ؟!! ما ياهو دا الوضع المن زمان وقبل ما يطلع خلاهو ..!! قسمة ربنا .. نكفر ؟ نرتد ؟ نطفش ..
نطلع مظاهرات ؟!!
قبل ما تقول ايوة بقول ليك المظاهرات دي ما طالعينها لحدي ما الباقين كلهم يرجعوا ونطلع سوا ..!!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
شكرا يا علي الخير ..
| Quote: كلامك كله صاح المغتربين مزودنها شوية .. وفى نوع كده مكترنها خالص لمن بى هناك بوست فى الصميم.. |
المزودينها ديل مرات ببالغوا ولو صدقوا .. ببالغوا في طريقة سردهم وكأنو الزول القدامم دا لسع في طور رجل الكهف الأول وما شاف شي من الحضارة أصلو ..
يقول ليك (عندنا في بلدنا الواحد كان ما أكل حبتين برقوق مع الفطور دورتو الدموية ما بتكتمل) ..!!
بالله برقوق بالغين ؟!
هو البرقوق دا شنو ؟ يبقى شنو لي ود ابرق ؟! يقرب شنو لي الطيرة الاسمها الغرنوق ..!!
طيب قول كلامو صاح .. نحن دورتنا الدموية دي اكتملت كيفن بدون الطيرقوق دا ؟!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: ناذر محمد الخليفة)
|
غايتو تقعد ترد على الـ 5 مليون مغترب صلاة العيد بتفوتك  .
| Quote: أأأأي عارفين البلد دي ما فيها سستم وما ماشة عديل وفيها باعوض قدر الضبان ،وشوارع الزلط كلها حفر وبتكسر مساعدات عرباتكم والموية وسـخـانة وبتضر أغشية جدران معدتكم ..!! والمعيشة غالية وسعر كيلو الطمطم بي 10 دولار والتعليم في الواطة والمستشفيات الكهرباء فيها بتقطع في نص العملية .. دا كلو عارفنو ومعايشنو ..!! |
إنت زول حاقد ساكت ومعارض تعمل على تشويه صورة البلد.
الحاجات دي كلها أنا ما شفت فيها حاجة. خليك موضوعي شوية.
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
أحمد ..
Quote: يعني بخلقوا دكتاتوريين صغيرين (لا دستوريين) زيك كده يا ناذر
|
كيف الكلام دا يعني ؟!!
Quote: انت "حر" تفتح البوست دا وتنتقد المنتقدين وترجى الراجيك بس من العالم المعنيين بالامر دا وبالمناسبة هم 8 مليون
اها يا اخوانا الدكتاتور الجديد ناذر بقول ليكم ما تبالغوا، فانصاعوا للأمر والا
|
لاحظوا يا شباب أحمد الكتب الكلام دا هو نفسو القبل شوية خاى حافظ يبلع كلامو بعد ما طلب منو يحذف مداخلتو ..!!
حافظ دا صغير ولا كبير ولا انت وصي عليو ؟! ليه تدي نفسك حق تفرض على الناس تكتب شنو وما تكتب شنو ؟!
مهما كان تبريرك .. لكن أنت هنا مارست دكتاتورية لا دستورية على حافظ .. مش دا ياهو كلامك ؟!
أنا ما طلبت من زول ما يكتب .. دا منبر نقاش وتداول أفكار .. انا طلبت عدم التضخيم والتهويل البيعملوها بعض من كتاب المشاهدات والانطباعات هنا ولمن يرجعوا السودان يملونا شناف ..!!
Quote: تخيلوا معاي ناذر دا بقدره قادر بقى دستوري
|
أها قول تخيلنا ...
Quote: اقلاها بكتبكم تعهد وانتو جايين وفي المطار، وتقروا بأنكم ابلغتم رسميا بأن البلد حالتها صعبة ومكركبة ومعفنة
وقبلتم بذلك، و قررت الدخول الى البلاد، وهذا التعهد يلزم صاحبة ان لا "ينقنق" بعد مغادرة البلاد بتاتا، وما تحكي
لصحبك زاتو |
كلنا بننقنق وعارفين حالة البلد .. بس الشناف ما دايرنو .. مش أكتبكم تعهد وبس .. كمان أعمل ليهو دمغة اسمها (دمغة فاقد شنافي) على وزن فاقد ضريبي .. لأنو اكيد المغترب دا بيكون وهو راكب مع بتاع الركشة او الأمجاد فكا ليهو شنافتين تلاتة في الطريق وفاكر روحو على حل من التعهد الكتبو ..!!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
ياسر العيلفون كيفك .. ...
| Quote: اما عن موضوع البوست فانت عارف وانا عارف بس احسن الواحد يبكي بس ويقش دموعو بالدس |
الدس دي زااتا الدايرنها في حالة الأنتقاد داخل السودان ..
لانو شي مستفز تكون حايم مع مغترب وهو شابكك .. دا بتاكلوهو كيف ؟ دا بتشربوهو كيف ؟ بتطلعوا شنو في الحمام لو أنتو بتاكلو جنس الحاجة دي ؟!!
لمن الزول يرجع برة السودان بعد دا ياخد راحتو ويشبك صاحلو هناك .. السودانيين ديل .. والبلد ديك .. وام جقاجق البياكلوها بي كسرة بايتة ..!!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
صحبي عمر عبد الخالق ..
Quote: مرة جيت من دبي والصباح مشيت للحلاق
بعد ماعمل اللازم قالي : اسمع اعمليك تنضيف بشرة "علي الطلاق" يقولو هسع دي جاي من دبي |
ههههههههههااااااااي دي قوية ومعاهو حق ..!!
| Quote: غباشتنادي اصلو ما بتروح |
متذكر لمن قابلتك في شارع النيل بالليل أول مرة مع الشباب ومتفرشخ في النجيلة ..! أنا زااتي بعد ما شفتك وسلمت عليك قلت في روحي هسي عمر دا جاي من دبي ولا جاي من الدبة ههههههه !!
مشكور على التلات مداخلات أم أصل ونسختين دي دي ..!!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: ناذر محمد الخليفة)
|
ابو النيز اسمع دي
واحد صاحبي عايز يمقلبني وانافي الطريق للسودان. وداني لحلاق لبناني
الراجل مقعدني تلات ساعات يملس ويحكحك ويجلخ
انا قلت الليلة حا ادفع 50 ريال سعودي(الريال=1520 ج)
يازول لعت ليك ورقة ابو مائتين وسلمتها ليه صاحبك قبضها ودخلها في جيبتو
طبعا عرفت الحكحيك داك بي حقو وطلعت على أمل أن يكون الراجل دا ظبط لي الأمور تمام وخلاني شبه عريس.
سافرت للسودان وأنا متكيف يقوم بعد يومين يلاقيني ليك صاحبي وآخر مرة شفتو كان سنة 96
وقد فاجأني سائلا:
ويييين ياود الشيخ ؟ قاعد في خرتومنا دي ولا حايم في الأقاليم؟"
تقول لي دبي
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
سلام الزبير ..
Quote: يا ناذر الخليفة أنتو مشكلتكم اتعوتو علي عدم المبالاة وأكل حقوقكم كبشر ومواطنين عشان كدة الحكاية عندكم عادية
إحنا فعلا كنا في السودان لكن المرقنا منه الحاجات دي زاتها وما معقولة نجي بعد خمستاشر سنه نلقاها زي ما هي |
والله بيني وبينك جلدنا بقى تخين لكن نعمل شنو .. دي ظروف بلد ووضع سياسي واقتصادي قائم ..!!
Quote: ولمن تمشي تطلع رقم وطني يقولوا ليك لازم شهادة ميلاد تمشي لبتاعين شهادات الميلاد يقولوا ليك ما بندطلعا ليك لو ما عندك شهادة رقم وطني دة معناه شنو غير السبهلليه وعدم التنسيق
لمن تكون ماشي المطار وبتاع الأمجاد يقول ليك ما بيدخلونا المطار وتجي تلقي التبرير من بتاعين المطار انو ناس الأمجاد بيحتلو في المطار طيب يكون الحل تمنع ولا توقف ليك عسكري خشم باب المطار
اي زول محمل من جوة يتغرم مش الناس تصل لغاية المطار وتعتل شنطا مسافة ثلاث كيلو هسي دي ما فلسفة فارغة وعبط واستهتار بالناس
يا ناذر لية يكون في بعوض من اصلو البعوض دة عاوز F16 عشان يبيدوة ما حبة جمكسين وشوية ضمير من ناس المعتمدية يجففوا المنابع وأماكن التوالد
يا ناذر لية الكهربا تقطع سبع او ست ساعات وكمان تقطع في المستشفي في نص العملية والعيان بطنو مفتوحة ان كان بعد سد مروي الكهربا بتقطع وقبلها بتقطع مغرقين امري ومشردين اهلها ما دام الحال من قبل ومن بعد واحد
|
ودا المقصود بي البلد ما فيها لا سيستم لا تنظيم ..
والحال دا من سنين طويلة مما الله خلق السودان دا .. البيخلي المغتربين يتوقعوا انو حا يتغير مجرد ما هم رجعوا شنو عشان يملونا شناف لمن يكونوا جوة السودان ومبالغات وتهويل لمن يرجعوا ؟ ..
أنحن المواطنين الكحيانين والمتحملين الوضع العايشين فيهو دا .. ذنبنا شنو كمان نتحمل على العلينا إنتقادات مغترب بدل ما يوجها للحكومة يوجها للمواطنين ويقول ليهم إنتو عايشين كيف وميتين كيف ؟!
Quote: يا ناذر الموضوع احيانا ما بيكون موضوع إمكانيات بس لكن بتكون مشكله عدم الإحساس بالمسئولية يعني شارع يتعمل كويس بس ما فية وسائل سلامة كافية وكل يوم والتاني حادث لغاية ناس الحله يثوروا ويعملوا مظاهرات اها الزول الخطط والتاني النفذ والثالث الاستلم المشروع دة ما في واحد فيهم انتبه ولا كلهم بيكونوا انتبهوا لكن بيعملو فيها رايحبن عشان عارفين ما في واحد حا بجي يسالهم ليه قصرتو
|
تعرف يا الزبير الشارع القدامنا دا رصفوهو من اول وجديد وبقى عالي ونضيف واسود زي الأدوهو ورنيش والناس فرحت .. تخيل الحصل شنو بعد داك ؟
البيت الجمبنا مويتو انعدمت .. عملوا بلاغ جو ناس الموية اكتشفوا انو واحدة من الحفارات العملت الظلت قطعت الخرطوش .. جابوا عمال حفروا الظلط وصلحوا الماسورة وملوا الحفرة الحفروها اسفلت وهسي الحتة دي بقا فيها كُرضُمة ..!!
بعد اسبوع جو ناس الصرف الصحي عندهم معالجات في فتحات الصرف اللي هي في نص الزلط .. حاليا فاتحين تلاتة بلاعات بعد ما حفرو جمبات الظلط ومسورين الفتحات دي بي حجار ..
ما حجار عاكسة .. حجار عادية .. يعني إنت لو جيت طاير بالليل ما حا تعرفا دي حفرة الا بعد ما تقع فيها ..!!
Quote: تصدق في المغتربين بيجبروك تطلع حاجة كدة اسمها بطاقة مغترب بكم الف كدة ولمن تسال الفائدة منها شنو يقولو ليك بتسجل فيها الايصالات اها الحكاية دي حرقتني وابيت ادفع عارف لمن اتعكست معاي أنا مصر ما اطلعها وموظف المغتربين حالف الا اطلعها مشيت للبنات بتاعين مكاتب الخدمات وسألت واحدة أنا عاوز تأشيرة من غير ما اطلع بطاقة مغترب وقاولتها تقريبا بنفس سعر البطاقة وقلت أحسن تاخدهم البت دي من ياخدهم كرار التهامي يتجدع بيهم في الفنادق ولا يكب بيهم بنزين
|
دي ما لا عاملة زي بطاقة حصر اللاجئين هههههه
زمان قلنا الشكية لغير الله مزلة .. تدفع بس أو تبكي بس ..!!
| Quote: وأقول ليك حاجة والله لو ما سوبا حلوة ما كنا عتبنا السودان دة |
هههههههههههه عشان فيها الشيخ مش ؟!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
!!!!
Quote: العندو نقد لي موضوع بوست يمشي يقولو في البوست
ما بيفتح بوست جديد!!
|
يا إبن ىدم حاول أفهم .. كم مرة قلت ليك أنا ما قصدي بوست محدد .. إنت ليه شاعر إني قاصدك ومهول ومكبر الموضوع بالطريقة دي ؟
بعدين يا خي ما تمارس وصاية على الناس يكتبوا كيف .. الناس حرة ترد على البوست ولا تفتح بوست جديد ..!!
هو فتح البوستات بي قروش ؟ قول بي قروش حد طلب منك تدفع حاجة ؟!!
خليك كوول وطبيعي وما تتشنج ..!!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: أحمد ابن عوف)
|
عبد الله كع ..
Quote: ما قريت كل المداخلات .. بس الواضح ان معظم الناس ساخطة علي نازر !
لانهم كرههو بي بوستاهم العجيبه كروهنا معاهوووو..
حقيقة البوست مهم جدا وكلام نازر عداهو العيب .. ما ياهوو السودان بتاع ذمان
- نفس الخيران البحفروها قبل الخريف بـ 13 يوم .. ومن سنة 70
ونفس زحمة المواصلات
- نفس السلفه البدونا ليها للعلاج .. في المراكز الصحية
- نفس الشوارع ومحفرة
- نفس سرسرة الموية .. وحركات الكهربا ...
- نفس صينة الاكل المدورة و الفيها صحن صحنين والعيش داير مايدور .. |
مش كدة بالله ؟!!
Quote: حقيقة الناس العايشه بره السودان لاعايشين رفاهية ولا حاجه ما خدين شلوت في راسهم
عنطظة في الفاضي ساكت .. |
دي غايتو ما متأكد منها .. لكن الأكيدة لمن أعمل رفرش للصفحة دي حا ألقى كم واحد أداك شلوت كععععععع في نص راسك هههههه
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: جلال جبريل)
|
Quote: ولمن تمشي تطلع رقم وطني يقولوا ليك لازم شهادة ميلاد تمشي لبتاعين شهادات الميلاد
يقولوا ليك ما بندطلعا ليك لو ما عندك شهادة رقم وطني دة معناه شنو غير السبهلليه
وعدم التنسيق
لمن تكون ماشي المطار وبتاع الأمجاد يقول ليك ما بيدخلونا المطار وتجي تلقي التبرير
من بتاعين المطار انو ناس الأمجاد بيحتلو في المطار طيب يكون الحل تمنع ولا توقف ليك
عسكري خشم باب المطار
اي زول محمل من جوة يتغرم مش الناس تصل لغاية المطار وتعتل شنطا مسافة ثلاث كيلو
هسي دي ما فلسفة فارغة وعبط واستهتار بالناس
يا ناذر لية يكون في بعوض من اصلو البعوض دة عاوز F16 عشان يبيدوة ما حبة جمكسين
وشوية ضمير من ناس المعتمدية يجففوا المنابع وأماكن التوالد
يا ناذر لية الكهربا تقطع سبع او ست ساعات وكمان تقطع في المستشفي في نص العملية
والعيان بطنو مفتوحة ان كان بعد سد مروي الكهربا بتقطع وقبلها بتقطع مغرقين
امري ومشردين اهلها ما دام الحال من قبل ومن بعد واحد
|
يا الزبير
كل سنة وإنت طيب...
ناذر عايزكم بدل ما تجوا تكتبوا الخواطر دي
فالبلد بلدكم...بدل ما تشنفوها وترموها ليه
في الارض...وإنتو أصلا خليتوها كده...ساعدوه
بالحل...
إنت هسي هنا صادفتك مشكلة الرقم الوطني
في شكل (الجدادة واللا البيضة) أسعي لحل المشكلة دي وأكتلا في حتتا
بي رشوة بي حجوة أم ضبيبينة بي غتاتة بي مشكلة عشان ما تخلي
للمغترب البعدك خاطرة يكتبا ...
لو كل زول فينا صادفتو مشكلة وحلاها بي ايدو وشديدو
كان ما سمعنا لينا بي عنقاء حايمة...في المنبر دا
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: الزبير صالح الزبير)
|
ناذر إزيك..
كلامك صاح مليون في المية !! أنا ما عارف (المغتربين) ديل زعلانين ليه؟؟
الزول ده كلامو واضح ، قال ليكم ما تهولوا المواضيع، ما قال ليكم ما تكتبوا إنطباعاتكم
عن السودان، فيها شنو دي؟؟
معروف إنو الزول البيكتب انطباعاتو بيكون مشى بلد لأول مرة ، وجاء يقول لينا عنها
بدون ما يجي زول يتفلسف ويقول ليك طيب السودان ده ما كأنو بلد غريب علي بالحاصل فيهو ده
وده ردنا عليهو إنو الحصل شنو يعني خلال السنين الفاتت دي وما كان مُتَوقَع!! في الكهرباء
والموية والشوارع والاسعار .....للآخر ، ما ياها ماشة (كل إجازة) من سيئ إلى أسوأ
و كل المغتربين ديل بيمشوا اجازات وعارفين الحاصل ده كلللللو...!! الجديد الجبتو لينا شنو وما عارفينو؟؟
يعني مفروض ده يكون شئ متوقع للمغترب أوالقاعد جوه السودان ، ودي ما محتاجة لذكاء عشان نعرف
الحركة التصاعدية لحال البلد..
ده حال بلدنا الما خافي علينا ، كان رضينا أو أبينا .. لفينا وشفا كتير من البلاد
وما لقينا أحسن من السودان ، مش من النواحي البيتكلموا عنها الناس ، لأنو مافي مجال للمقارنة
ولأننا ما عندنا حاجة عشان نقارن بيها (خلاف سودانيتنا) الما ممكن تتغير لو كان حاكمنا ابليس مش الكيزان..
ياخ في مغتربين (لغاية الآن) فاكينها في نفسهم وعايشين دور مغتربي العصر الذهبي للإغتراب كما يجب !! ياخ معقولة بس؟؟
شخصياً وبحكم العمل بسافر كتير وبشوف دنياوات جديدة ، لكن ما حركت فيني ساكن ، وما برتاح نفسياً لو ما مشيت السودان
تلاتة مرات في السنة، السودان غير ( بي جنو ودايرينو)..
وبعدين – أيها المغترب - لو ما دخلّت نفسك ( ترس ) في الحركة الحاصلة ورشحت مع العالم الراشحة هناك دي
وقعدت تتفرج عشان تجي تحكي (تجربتك) فأحسن ليك تقضي إجازتك في بلد تانية، لأنك ما استمتعت بالمعاناة
والبرامج والناس والحياة الحقيقية..
مرات يا ناذر والله بحس إنو (بعض) المغتربين (مهجومين) بقصة سفر وطيارة واغتراب وبلد ما بتشبه السودان
وحياة ساهلة وعربية وبنطلون وفتيل ريحة، والدولار وصل كم !! ياخ دي أوهام تجارية مُضِرة..
في نماذج من المغتربين تحيّر..
بالله يا ناذر خليهم يقولوا الدايرينو، وخلينا نشوف السودان من خلالهم يمكن نعرف حاجة جديدة..
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: Salah Abdulla)
|
Quote: ناذر إزيك..
كلامك صاح مليون في المية !! أنا ما عارف (المغتربين) ديل زعلانين ليه؟؟
الزول ده كلامو واضح ، قال ليكم ما تهولوا المواضيع، ما قال ليكم ما تكتبوا إنطباعاتكم
عن السودان، فيها شنو دي؟؟
معروف إنو الزول البيكتب انطباعاتو بيكون مشى بلد لأول مرة ، وجاء يقول لينا عنها
بدون ما يجي زول يتفلسف ويقول ليك طيب السودان ده ما كأنو بلد غريب علي بالحاصل فيهو ده
وده ردنا عليهو إنو الحصل شنو يعني خلال السنين الفاتت دي وما كان مُتَوقَع!! في الكهرباء
والموية والشوارع والاسعار .....للآخر ، ما ياها ماشة (كل إجازة) من سيئ إلى أسوأ
و كل المغتربين ديل بيمشوا اجازات وعارفين الحاصل ده كلللللو...!! الجديد الجبتو لينا شنو وما عارفينو؟؟
يعني مفروض ده يكون شئ متوقع للمغترب أوالقاعد جوه السودان ، ودي ما محتاجة لذكاء عشان نعرف
الحركة التصاعدية لحال البلد..
ده حال بلدنا الما خافي علينا ، كان رضينا أو أبينا .. لفينا وشفا كتير من البلاد
وما لقينا أحسن من السودان ، مش من النواحي البيتكلموا عنها الناس ، لأنو مافي مجال للمقارنة
ولأننا ما عندنا حاجة عشان نقارن بيها (خلاف سودانيتنا) الما ممكن تتغير لو كان حاكمنا ابليس مش الكيزان..
ياخ في مغتربين (لغاية الآن) فاكينها في نفسهم وعايشين دور مغتربي العصر الذهبي للإغتراب كما يجب !! ياخ معقولة بس؟؟
هجوم رهيب
بالمناسبة يا ابو النيز انتو بتتكلموا عن 10 مليون سوداني مغترب
دي "استصحبوها" في الهجمات المرتدة
بعدين دي انطباعاتك الشخصية طبعا يا ابو النيز
"يادستوري نازل في الخرتوم كلاكلة"
ممكن يجي دستوري نازل" سوق الناقة ذاته" يفند لبك بعوضتك القدر الضبانة دي
شخصياً وبحكم العمل بسافر كتير وبشوف دنياوات جديدة ، لكن ما حركت فيني ساكن ، وما برتاح نفسياً لو ما مشيت السودان
تلاتة مرات في السنة، السودان غير ( بي جنو ودايرينو)..
وبعدين – أيها المغترب - لو ما دخلّت نفسك ( ترس ) في الحركة الحاصلة ورشحت مع العالم الراشحة هناك دي
وقعدت تتفرج عشان تجي تحكي (تجربتك) فأحسن ليك تقضي إجازتك في بلد تانية، لأنك ما استمتعت بالمعاناة
والبرامج والناس والحياة الحقيقية..
مرات يا ناذر والله بحس إنو (بعض) المغتربين (مهجومين) بقصة سفر وطيارة واغتراب وبلد ما بتشبه السودان
وحياة ساهلة وعربية وبنطلون وفتيل ريحة، والدولار وصل كم !! ياخ دي أوهام تجارية مُضِرة..
في نماذج من المغتربين تحيّر..
بالله يا ناذر خليهم يقولوا الدايرينو، وخلينا نشوف السودان من خلالهم يمكن نعرف حاجة جديدة.. |
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: MOHAMMED ELSHEIKH)
|
Quote: ناذر إزيك..
كلامك صاح مليون في المية !! أنا ما عارف (المغتربين) ديل زعلانين ليه؟؟
الزول ده كلامو واضح ، قال ليكم ما تهولوا المواضيع، ما قال ليكم ما تكتبوا إنطباعاتكم
عن السودان، فيها شنو دي؟؟
معروف إنو الزول البيكتب انطباعاتو بيكون مشى بلد لأول مرة ، وجاء يقول لينا عنها
بدون ما يجي زول يتفلسف ويقول ليك طيب السودان ده ما كأنو بلد غريب علي بالحاصل فيهو ده
وده ردنا عليهو إنو الحصل شنو يعني خلال السنين الفاتت دي وما كان مُتَوقَع!! في الكهرباء
والموية والشوارع والاسعار .....للآخر ، ما ياها ماشة (كل إجازة) من سيئ إلى أسوأ
و كل المغتربين ديل بيمشوا اجازات وعارفين الحاصل ده كلللللو...!! الجديد الجبتو لينا شنو وما عارفينو؟؟
يعني مفروض ده يكون شئ متوقع للمغترب أوالقاعد جوه السودان ، ودي ما محتاجة لذكاء عشان نعرف
الحركة التصاعدية لحال البلد..
ده حال بلدنا الما خافي علينا ، كان رضينا أو أبينا .. لفينا وشفا كتير من البلاد
وما لقينا أحسن من السودان ، مش من النواحي البيتكلموا عنها الناس ، لأنو مافي مجال للمقارنة
ولأننا ما عندنا حاجة عشان نقارن بيها (خلاف سودانيتنا) الما ممكن تتغير لو كان حاكمنا ابليس مش الكيزان..
ياخ في مغتربين (لغاية الآن) فاكينها في نفسهم وعايشين دور مغتربي العصر الذهبي للإغتراب كما يجب !! ياخ معقولة بس؟؟
شخصياً وبحكم العمل بسافر كتير وبشوف دنياوات جديدة ، لكن ما حركت فيني ساكن ، وما برتاح نفسياً لو ما مشيت السودان
تلاتة مرات في السنة، السودان غير ( بي جنو ودايرينو)..
وبعدين – أيها المغترب - لو ما دخلّت نفسك ( ترس ) في الحركة الحاصلة ورشحت مع العالم الراشحة هناك دي
وقعدت تتفرج عشان تجي تحكي (تجربتك) فأحسن ليك تقضي إجازتك في بلد تانية، لأنك ما استمتعت بالمعاناة
والبرامج والناس والحياة الحقيقية..
مرات يا ناذر والله بحس إنو (بعض) المغتربين (مهجومين) بقصة سفر وطيارة واغتراب وبلد ما بتشبه السودان
وحياة ساهلة وعربية وبنطلون وفتيل ريحة، والدولار وصل كم !! ياخ دي أوهام تجارية مُضِرة..
في نماذج من المغتربين تحيّر..
بالله يا ناذر خليهم يقولوا الدايرينو، وخلينا نشوف السودان من خلالهم يمكن نعرف حاجة جديدة.. |
كلام في السلك ياصلاح عبدالله ؛
السودان ده لو بقي جهنم عايزنو كده ؛وقرضمة فارغة ما دايرنها بالله
والماعاجــــــــبو يشرب من اي حفرة تلاقيهو.
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: بشير أحمد)
|
Quote: يا جماعة ... ارحمونا شوية .. أأأأي عارفين البلد دي ما فيها سستم وما ماشة عديل وفيها باعوض قدر الضبان ،وشوارع الزلط كلها حفر وبتكسر مساعدات عرباتكم والموية وسـخـانة وبتضر أغشية جدران معدتكم ..!! والمعيشة غالية وسعر كيلو الطمطم بي 10 دولار والتعليم في الواطة والمستشفيات الكهرباء فيها بتقطع في نص العملية .. دا كلو عارفنو ومعايشنو ..!!
|
>>>>>>>>>>>>>>>
عزيزي ناذر محمد خليفة
تحية طيبة وبعد,
اولا انا عاوزة اشيد بيك لأنك فعلا بتحب بلدنا السودان ومستحمل الكلام القلته ده كله وما بتشتكي..
وكما عاوزة هنا اردد ليك كلام اخونا جلال جبريل :" السودان يا هو في النهاية بلدنا وما عندنا فيهو كلام""
لكن نحن المغتربين والمهاجرين والمغتربات والمهاجرات ما بتشتكي انو البلد ما فيها سيستم وما ماشة عديل.. وما بنشتكي من الغلاء عشان المغتربين اساسا عندهم القروش الكفاية .. وما بنشتكي من السخانة عشان نحن في امريكا عندنا سخانة هنا في الصيف اسخن من السودان بعشرين مرة..
لكن بنشتكي من حاجة واحدة بس.. بنشتكي من الرشاوي في مكاتب الحكومة.. يعني ما ممكن تقضي ليك حاجة في السودان بدون ما تدفع رشوة.. وحتى لو بتعرف واسطة لازم تدقع رشوة.. وانا ما عارفة موظفين الحكومة ديل مشغلينهم لشنو؟؟ مش عشان خدمة الشعب ولا عشان الشعب يكون في خدمتهم..!! انا قاعدة في بلد , وعلى الرغم من جرائمها الكثيرة والمسيخة, لكن موظفين الدولة يخجلوك في التعامل ويقضوا ليك الغرض الجاي عشانه في لمح البصر وبابتسامات مش زي موظفين السودان تلقى الواحد مكشر وشه ويحاول يخت ليك الف عقبة امامك عشان يعجزك واول ما تقول ليه حقك محفوظ .. تلقاه سريع عمل ليك الواجب... عرفت با ناذر نحن بنتنرفز ليه لمن نجي السودان اجازات؟؟؟ انا نفسي تزورنا هنا في امريكا عشان تشوف موظفين الدولة بيعاملوا الناس كيف ؟؟
والله يديك العافية
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: Dr.Elsadig Abdalla)
|
| Quote: لكن بنشتكي من حاجة واحدة بس.. بنشتكي من الرشاوي في مكاتب الحكومة.. |
الأخت أميرة السيد ،، السلام عليكم..
خليني أقول قولي في المقتبس بتاعك ده، وناذر يجي يرد عليك بي طريقتو..
السبب في الرشاوي دي نحن ما غيرنا!!!
نحن البندي موظفي الحكومة الفرصة في إنهم يرتشوا، طالما بنرضخ ليهم ونرشوهم
لو أي واحد فينا رفض النوع ده من التعامل وأصرّ ياخد حقو بالقانون ما في موظف ح يجرؤ يطلب رشوة
يا خي الرشوة دي بالاخلاق الواحدة دي ما مقبولة، خليك من الدين البيدخلنا بسببها في زمرة الملعونين..
مبلغ الرشوة البيطلبوه بيكون تـافه جداً، لكن بيخلق خلل كبير جداً ويرسخ النوع ده من السلوك المرفوض والسيئ
نحن الممكن (نحد) منها ونحجّمها ، المهم إنو الواحد يصر على موقفو وما يتراجع عنو مهما كانت النتائج
وصدقيني في الآخر المرتشي ده هو الحيرضخ ويمشّي موضوعك غصباً عنو ..
بالمناسبة المرتشين ديل عينهم قوية جداً، وخوافين جداً ..
أنا عندي تجربتين ، واحدة في سواكن، ودي كلفتني تأخير يومين في ميناء سواكن ومعاي زوجتي وبتي كان عمرها سنة واحدة..
والتانية كانت في جهاز المغتربين، وكادت أن تكلف أحد كبار الموظفين أسنانه الأمامية، وفي التجربتين أخدت حقي كاملاً غير منقوص..
ما ترخي ليهم وشوفي النتيجة..
| |
|
|
|
|
|
|
|
|
 Re: والله المغتربين السودانيين البيجوا السودان اجازات ويرجعوا حيرونا . (Re: Salah Abdulla)
|
Quote:
ناذر عايزكم بدل ما تجوا تكتبوا الخواطر دي
فالبلد بلدكم...بدل ما تشنفوها وترموها ليه
في الارض...وإنتو أصلا خليتوها كده...ساعدوه
بالحل...
إنت هسي هنا صادفتك مشكلة الرقم الوطني
في شكل (الجدادة واللا البيضة) أسعي لحل المشكلة دي وأكتلا في حتتا
بي رشوة بي حجوة أم ضبيبينة بي غتاتة بي مشكلة عشان ما تخلي
للمغترب البعدك خاطرة يكتبا ...
لو كل زول فينا صادفتو مشكلة وحلاها بي ايدو وشديدو
كان ما سمعنا لينا بي عنقاء حايمة...في المنبر دا |
نزار الرائع
تعرف أنا من اصل الخرطوم بكون مع ناذر دة لغاية ما ارجع يوميا وليل نهار
ما أظن حصل اشتكيت لية ( غايتو ما بتذكر أبدا ) وما إحنا الرمينا البلد وشنفناها لكن كل واحد بيجي يحكي الشافو يمكن بيستعمل كلمات حادة او كبيرة في تعبيراتو ولكنه ما أديب او صحفي عشان يختار ألفاظه ولكن في النهاية هل ما قاله صحيح ولا ما صحيح
الموضوع ما معارضة للحكومة او غيرها او من فراغ الموضوع موضوع معايشة لمشاكل وبعضها ما محتاجة لإمكانيات او مادة محتاجة لإحساس فقط لا غير
المشكله يا نزار لو حاولت تأخذ حقك بالقانون عاوز ليك سته شهور إجازة كل سنه
دمت بألف خير
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: الزبير صالح الزبير)
|
| Quote: المشكله يا نزار لو حاولت تأخذ حقك بالقانون عاوز ليك سته شهور إجازة كل سنه |
حبيبنا الزبير
كل سنة وإنت طيب
القانون شنو يا الزبير...هو في قانون؟
شيل حقك رجالة...وحكمة...وفي أغلب الأحيان بي حنك خفيف...
ما محتاج تمشي تشتكي زول لي قانون طالما انت صاحب حق
ولأنو القانون زاتو منوم...وأغلب مشاكل الناس هنا لا تستدعي
أن تذهب معها ناحية القانون ...
فأنا سنويا بكون في السودان أقلاها مرتين...يعني تفتكر
ما لاقتني مشاكل الرقم الوطني والجواز الاخضر مافي الا
يصدقوا ليك الوزير...والشهادة الا يديك ليها المنسق
والمنسق الا يلقاك مؤدي الخدمة...والخدمة إلا يعفيك
منها الجليل الرحيم...
كل سنة بتلاقيني مشاكل زي دي...وآخرها نسينا كرت السفر
ولاوونا زييين.....ومع ذلك سافرنا...ياخ المتعة كلها
في الملاواة دي....يلاقيك زول مركب وش ######...ويرفع ليك
ضغطك وتحلف تقول الدنيا دي إنتهت عندو....ومع ذلك نفس
الزول ممكن تلبسو وش غزال...ويقول ليك ...معليش يا اخينا
ياخ كان تقول من الاول...
لازم تعرفو كجرتهم ...الناس ديل زينا واحد
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: nazar hussien)
|
نزار حسين
الساعة كم بتوقيتكم
هو فعلا بتقابلك مشاكل زي الحكيتها دي وبنحلها بطريقة او اخري لكن السؤال يا نزار لية دة مازال بيحصل في السودان زمان نقول كنا منغلقين والاتصالات بين المجتمعات المختلفة غير ميسرة الحقوق والواحبات غير معروفه لكن هسي كل المسئولين بسهوله ممكن يحتكوا بخبرات أجنبية ويعدلوا المايله ان أرادو
ولكن المشكله انو البلد ما عندها وجيع
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: الزبير صالح الزبير)
|
Quote: كلامك صاح مليون في المية !! أنا ما عارف (المغتربين) ديل زعلانين ليه؟؟
الزول ده كلامو واضح ، قال ليكم ما تهولوا المواضيع، ما قال ليكم ما تكتبوا إنطباعاتكم
عن السودان، فيها شنو دي؟؟
|
,,,,,,,,,,,
عزيزي صلاح عبد الله
نحن ما زعلانين ولا حاجة .. مع اني ما مغتربة لكن مهاجرة.. وهاجرت في موسم الهجرة إلى الشمال..
بس بدون ما نهول الأمور عاوزة احكي ليك قصة بسيطة مرت بي قبل سنة ونصف في اجازتي في السودان..
اولا وقبل ما اتحرك من البيت قاصدة مكتب حكومي لاستخراج شهادة ميلاد ( بدل فاقد) حذرتني عمتي قائلة:" اوعك توريهم انك عائشة برة " وقلت ليها وليه شنو ما يعرفوا؟؟ وردت :ط عشان كان عرفوا حيدفعوك كثير.. فقلت ليها :" انا بدفع الرسوم القانونية بس"" فقالت :ط انا ما بتكلم عن الرسوم ولكن بتكلم عن الرشوة عشان تطلعي الشهادة.. طبعا استغربت من كلامها وقلت في نفسي انها ربما مهولة الأمور شويتين..
وذهبت اولا لمكتب الاحصاء وقاباتي امام الباب حارس وقال لي : ان الشهادات بطلعوها من وزارة الداخلية .. وذهبت لوزارة الداخلية .. فقال لي الحارس ان الشهادات بطلعوها من مصلحة الاحصاء.. وذهبت لمصلحة الاحصاء مرة اخرى وقابلت احد الموظفين وقال لي : بدل ما تبهدلي نفسك في الصفوف وتجري ورا ملء الارانيك وما بتعرفي المكت بالبطلع الشهادات وين خلي واحد من الأخوان القاعدين تحت الشجرة ديك يساعدك وتديهو الفي النصيب.. فقلت ليهو :" الفي النصيب ده شنو؟؟ فقال يعني حق الشاي .. حق قفة الملاح.. حق المواصلات.. فقلت ليهو يعني رشوة ؟ فقال:" استغفر الله .. رشوة شنو يا بنتي .. دي بنسميها تسهيلات.. وبعدين الرشوة بدفعوها لموظفين حكومة .. والقاعدين تحت الشجرة ديك ما موظفين حكومة .. ديل سماسرة على باب الله.. وذهبت لاحدهم وسألته :" انا عاوزة اطلع شهادة ميلاد بدل فاقد.. انت حتطلعوا لي بكم.. فقال لي مبلغ خرافي .. فقلت ليه : ليه الرسوم غالية كده.. فقال: يا بنتي دي ما كلها رسوم.. دي فيها تسهيلات للموظف الحيصدق على الاورنيك وبعد داك للموظف الحياجع الأورنيك وبعد داك لرئيس المكتب الحيستخرج الشهادة.. وقلت ليه " يعني ديل كلهم خياخدوا رشاوي عشان شهادة واحدة بس؟؟ فقال بعبارة واضحة ومفهومة:" نحن هنافي السودان اذا اي موظف ما اخذ رشوة ما ممكن يشتغل ...فسألته :: وهل لكلام ده بينطبق على كل المصالح لحكومية .. فقال نعم..
يعني يا صلاح جميع موظفي الحكومة السودانية بياخدوا رشاوي .. وهذه شهادة واحد سمسار قاعد في السودان وعلرف كل ما يجري في المكاتب السودانية..
أها عندنا حق نزعل ولا ما نزعل...وكده في ذمتك خلينا نسالأك انت:" هل انت بتقدر تقضي ليك حاجة في المكاتب الحكومية بدون واسطة وبدون تدفع رشاوي؟؟.. اها غير كده والله السودان سمح بأهله وناسه الطيبين السمحين .. إلا موظفين الحكومة ما سمحين وما طيبين..( وجه مكشر)
والله يديك العافية
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: اميرة السيد)
|
العزيز ناذر... تحياتي... آذن لي أن أشركك للأهمية وجهة نظر لي سابقة قلت بها من قبل ببوست بهذا المنبر (تجد اللنك أدناه) حول تصوري لأحقية ثلاثة شهود في الحديث عن "المشهد" بذات القدر من الأحقية لا بل والأهمية (هم كل الشهود المحتملين) لدى هذا المقام، وهمو وفق لغتي الخاصة ومصطلحاتي، كالتالي:
1-الشاهد الحاضر المشهد أي العايش المشهد من أمثال نذار (المقيم في الأساس في السودان بشكل دائم كل الوقت) المشهد المعني به الحالة المشهودة وهو السودان "طبعآ" لدى هذا الحكي.
2-الشاهد "العائد" إلى المشهد بعد الغياب ... زي الناس الذين تحدثت عنهم نذار.
3-الشاهد "الغائب" الغايب كلو كلو "لم يعد أبدآ بعد"... برضو من حقو يتحدث (زيي كدا) ومئات الآلاف... لأننا نتحدث من منطلقين: شهادة الشهود (الشاهدين أعلاه) وهما الناس بكل وسائل إتصالهم وتواصلهم ثم الذاكرة الأصيلة إضافة إلى ما هو أهم وهو الهم والواجب الوطني و الأسري والعملي والسياسي والأدبي والأخلاقي (ومن ضمنه المصلحة المادية والمعنوية في التغيير السياسي وحلم العودة في أجواء سياسية وإقتصادية وإجتماعية مواتية).
كما أن هناك شاهد رابع بدوره مهم وهو "الآخر" غير السوداني... برضو من حقو يشهد (الناس الآخرين والإعلام العالمي) بل ومرات يستطيع أن يوقع عقوبات (الأمم المتحدة ) على المشهد الجغرافي (السودان) بما به من ناس وكائنات وأشياء. (لأن المشهد الواحد "السودان هذه المرة يستطيع أن يسقط ذاته سلبآ أو إيجابآ على المشاهد الأخرى = بقية مجتمعات العالم "الإرهاب مثالآ").... سو يا مان القصة ما نحن بس كمان كسودانيين في عكة بيننا بل أكبر!. ولك أن تتصور الليبيين زمان والسوريين الآن يطلبون نجدة "تدخل" حلف الناتو بوصفه شاهد أصيل على المأساة!.
خلاصة:
عندي كلنا نستطيع أن نشهد بلا مزايدة وبلا أفضلية وبنفس القدر والأهمية وفي المقامات والمناسبات المختلفة عاملين كل الممكن من طرق تفكيرنا وبحسب مصالحنا الذاتية التي نشعرها في الحقيقة أو/و الخيال وبحسب آيدولوجياتنا المختلفة وأعمارنا وأقدارنا كما بحسب تجربتنا الجمالية والنفسية.
هنا رابط البوست المعني ( مع التركيز على ص 2):
زيارتي الأخيرة للسودان (هل تغير الشاهد أم تغير المشهد)؟!
وفي الختام أتمنى يكون في مداخلتي الصغيرة هذي ما يفيد حواركم هنا.
تحياتي
محمد جمال
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: محمد جمال الدين)
|
سلام ولياب وشكرا للمداخلة الدسمة ..
Quote: فبالله هل نسكت عن تلك المناظر القبيحة والمضرة بسمعة البلد والمضرة ببيئة البلد ؟؟
|
لا طبعا .. ما تسكت وأنحن الجو البلد برضو ما ساكتين لكن بس كل المطلوب أنو الناس المغتربين ما يحاولوا يقارنو وضع السودان بالأوضاع بتاعت البلدان الجاية منها واهم حاجة تعرف وين توجه سهام النقد ...
سهام النقد دايما موجه للمواطن المسكين وكأنو السبب في الوصل ليو حال البلد ..!!
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: محمد جمال الدين)
|
مشكور يا دكتور أمبدة ...
Quote: يعنى فى داعى للاحباط دة.
اكيد ناذر يقصد مثل تلك التعليقات والانطباعات.
السودان دة ما أظن يتقدم فى المستقبل القريب ينقصنا شئ يسمى "حب الوطن" والوطن ما لازم يكون جنة الله فى الارض لكى نتماهى فى حبه. الوطن قد يكون صحراء قاحلة "تذكرت فى تلك اللحظة السنوسى بدر عضو المنبر نتمنى عودته" او قد يكون ارض جدباء او جبال او او. ما يهم هو الانتماء الصادق وحب الوطن. ولو توفير هذان الركنان ياتى العمل الصادق لرفعة الوطن.
ياخى انظروا لاقرب جيران لنا "المصريين" فرغم شظف العيش لغالبيتهم والفقر المدقع وهجرتهم -قبل ان يعرف السودانيين الهجرة- الا ان حب الاوطان يتملكهم ولا يستطيع كائن من كان ان يسب او يسئ الى 'مصر' فى وجود مصرى حتى ولو خارج مصر ولو حدث هذا فكانما اعتديت على شخصه.
فقط قليل من حب الوطن وبعض انتماء.
الحكومات تذهب وتتبدل ولو بعد خمسين عام، وتبقى الاوطان |
| |
|
|
|
|
|
|
|
|
|
Re: والله المغتربين السودانيين البيجوا السودان اجازات ويرجعوا حيرونا . (Re: محمد جمال الدين)
|
هههههههههه يا عثمان موسى ..
Quote: عاين . عندنا صديق بعد زمن رجع السودان من كلفورنيا ومعاو بتو عمرها 7 سنة .
نزل مطار الخرطوم الصباح بدري ومن المطار علي شندي سريع .
في ينطون شندي . يازول البنطون كان مليان لواري وناس وقش وشوالات شطة وحمير والدنيا هايصة . زول كلفورنا بتو خافت وقالتلو . بابي بابي أنتو الليلة عندكم يوم القيامة ؟
|
دي حالتا قيامة بنطون صغيرة كدة (فورق زامبل) أمال لو جات سوق اللفة أو موقف جاكسون تقول شنو ...!
| |
|
|
|
|
|
|
| |
ناذر محمد الخليفة
جلال جبريل
Adil Ali
nazar hussien
saif massad ali
حيدر حسن ميرغني
وضاحة
هشام المجمر
فايزودالقاضي
محمد مختار جعفر
بشير جبريل علي
أحمد ابن عوف
ياسر السر
عمر عبد الخالق سعيد
الزبير صالح الزبير
ولياب
ombadda
Osman Musa
Kostawi
أبو ساندرا
عبدالله كع
Hafiz Bashir
بشير أحمد
إسماعيل التاج
Dr.Elsadig Abdalla
MOHAMMED ELSHEIKH
احمد التجانى احمد
محمد جمال الدين
فيس بوك
تويتر
انستقرام
يوتيوب
بنتيريست