كمال ترباس يهاجم عبد الوهاب وردي : ( لو الود دا مايسترو الله يسترو !! ) (بوست رصد خجات 2011) .!

Quote: انا ( سميرة سعيد ) ما عاجبااني تقول لي( سميرة دنيا ) ؟؟ سميرة دنيا ما عندها وفاء لاي زول ويكفي انها ما كانت وفية لعثمان حسين الهرم الفني الكبير وانا وقفتها من ترديد اغنياتي وقلت اراقب حفلاتها عشان اتاكد.. لقيت ما عندها حفلات!!

(عدل بواسطة أيمن دياب on 01-03-2011, 01:44 PM)

Quote: ميرغني ابو شنب شجرابي والرشيد علي عمر يحاصرون كمال ترباس في حوار خطير مشيت اشـرب موية رجعت لقيت الهـلال اتغلب اربعة جلسنا نحن ميرغنى ابوشنب وعبد المنعم شجرابى والرشيد على عمر لنحاور المطرب اللامع وصاحب التطريب المهول كمال ترباس من خلال الافطار الذى دعانا اليه القطب الزاكى التيجانى محمد ابراهيم لازالة سوء الفهم ما بين المطرب الكبير والزميل الرشيد على عمر والذى حاول دعاة الفرقة والشتات ان يصطادوا فيه بما يعتمل فى صدورهم المريضة .. والفكرة قادها الرياضى المعروف بشير جابر الذى قام بدور حمامة السلام بمساعدة الهرم الاجتماعى الكبير السيد بابكر حامد ود الجبل ... جالسنا ترباس واستمتعنا معه بحضوره الدافق ونكتته الحاضره ولسانه الحلو ..قدمنا له مائدة عامرة بالاسئلة الرياضية والفنية والاجتماعية .. ووجدناه حاضرا بلماحيته المعهوده واجاباته الذكية ... وكلما رد على سؤال يجد الاخر فى انتظاره .. وطاف معنا فى رحلته الاخيرة مع الهلال الى تونس وحكى عن الطرائف وارسل دعاباته المميزة ... وكمال ترباس هو احد المهمومين بالفن السودانى واكثر المطربين انفعالا باغنية الحقيبة وهو ما دعاه الى تبنى مشروع ال100اغنية حقيبة والتى سيقوم بتسجيلها من خلال شركته الفنيه الجديدة ترباس للانتاج الفنى ... * شفناك سافرت مع ناس الهلال انت علاقتك شنو بالكورة؟ انا ما عندي علاقة بالكورة وعمري مادخلت دار الرياضة الا في حفل نادي المريخ، ولمن سافرت مع الهلال دعاني صديقي وصاحبي جمل الشيل بابكر ودالجبل وبرغم مشغولياتي ابيت اعتذر اكراما لخاطر الهلال وودالجبل!! وبعدين اقول ليكم حاجة أنا علاقتي بالكورة تعبانة ومالعبت دافوري * رايك شنو في الكورة؟ انا زمان بسمع الحكم اتسبب في الهزيمة وكنت بفتكرها شماعة لكن لمن شفت العملو الحكم المغربي في الهلال عرفت ان المسالة حقيقية! وانا زعلت شديد لمن طرد اللاعب لانو مرقتو هزت الفريق كلو ؟وانا ما بعرف اللاعبين كلهم لكن هيثم كان كويس وحارس المرمي كان كويس وبعدين يا اخوانا لازم تعرفوا انو ما ممكن مدرب تونسي يغلب بلدو !!!! * يا ترباس في علاقة بين الفن والكورة؟ كيف مافي ، الكورة فن والهام ولحظة ذكاء مثل الفن نحن نخلق اللحن ونباصيهو للفنان ويشوت في اضان الجمهور * انتو في تونس كنتو قاعدين مع اللاعبين؟ اللاعبين نقعد معاهم ليه انحنا بندرب حراس مرمي ولا بتاعين لياقة ؟ انحنا ما شفنا اللاعبين الا في التمرين الختامي وفي يوم الكورة وبعدين انا قلت ليكم مابعرف غير هيثم مصطفي شعورك كان شنو والناس المعاك؟ الحقيقة الناس دخلت في صدمة والحصل انا بفتكر قدر وانا لسع ماصدق ، اتخيلوا انا خليت الهلال منتصر بقون ، مشيت اشرب مويه جيت ليقتو مغلوب خمسة * الناس حالهم كان كيف؟ الناس ليهم حق يموتوا في الكورة الاعصاب بايظة واحمد الله انا لست مريضا بالكرة * تاني بتسافر لو قدموا ليك دعوة؟ ما حا اسافر ابدا مع اي فريق خارج السودان!! صحتي ما بتتحمل حاجات زي دي * في اي نشاط فني عملتو هناك؟ غنينا للتلفزيون التونسي ولاول مرة في حياتي اصحي الساعة خمسة صباحا عشان اسجل للتلفزيون انا قلت بصحوني بدري كده انا داير اغني للتلفزيون ولا اركب التونسية?? عملنا حفلة قبل المباراة للجالية والدبلوماسية * انت بتشجع منو؟ يا اخوانا انا قومي مع انو متوكل احمد البشير متزوج شقيقتي * الرحلة عموما كانت كيف؟ كانت رحلة جميلة والناس حلوين لكن ظروف بتعدي وماتهتموا للاقوان كان عندك راي في الحان صلاح ادريس وحسع عايز تغني ليهو؟ ما بنكر كان عندي راي في الحان صلاح ادريس بس ماكلها اعتقد (يا راقي احساسك) جميلة وبعدين الاغنية بتاعت عبدالقادر سالم (دندن) وبرضو (منو القاليك تفارق النيل) والاغنية الاداني ليها ناقشتو فيها وتم تعديل الاغنية في وجود حمد الريح وعملنا ليها ورشة?!! وانا عندي اربعة اعمال جديدة للحلنقي * يعني حيكون عندك اعمال من الملحن علي احمد؟ علي احمد دا منو ؟ انا كان شرطي الاساسي اكتب صلاح ادريس ما علي احمد * كان عندك خلاف مع صلاح ادريس؟ نعم كان في خلاف لكن الحقيقة كان في خلافه معاي مؤدب جدا حتي تم الصلح بيننا وانا سعيد ان اغني لصلاح ادريس والحلنقي!! وصلاح دا زول كويس بس الحواليهو هم المشكلة !!! * ودالجبل وعد نجوم الهلال بالحوافز؟ بابكر ودالجبل حلف لو فاز الهلال حيغرق لعيبتو حوافز!! وبرغم انو كان يقيم في فندق ابونواس جاء وتفقد الناس ! * علاقتك كيف بجمال الوالي؟ جمال الوالي مؤدب وذكي واخو اخوان وصديقي شديد وانا سعيد لانه اختارني لسهرة قناة النيل الازرق * انت غنيت لرجل الاعمال الشاعر اشرف سيد احمد رايك فيه شنو؟ الكاردينال اشرف سيد احمد رجل فنان ورجل اعمال ممتاز بس هوما بعرف يلقي الشعر مع انو شعره ممتاز * ما قاعد تغني في الاذاعة ليه؟ اخر مرة في الاذاعة صرفوا لي 16 الف في سهرة وقلت هذا للوزير سبدرات وانا مامشيت الاذاعة 20 سنة ولم اسجل ليهم طوال الفترة ديك واخر اغنية سجلتها كانت ( مابنمشي لناس مابجونا) وناس الاذاعة مع احترامنا ليهم ما بقيمونا ومابقيمو المبدعين والاذاعات الاخري بتقيم الناس وانحنا راضين من ناس اذاعة مانجو لانها احترمتنا وبتعاملنا كويس * قابلتو في تونس فنان تونسي؟ سمعنا واحد كان بغني قبلنا في الاستديو وزول صوته كويس واحسن من البنبحو عندنا في ليالي العاصمة !!!! * لقيتو عازفين وين؟ كان معانا عازفين ساقهم معاه حمد الريح وقدروا يقدموا شغل كويس معاي ومع حمد * مشاريعك الجاية شنو؟ عندي مشروع مائة اغنية حقيبة سأبدا فيه وساقوم بالتسجيل وكمان عايز اعمل شريط للبرعي الله يرحمه... وانا عندي شركة ترباس للانتاج الفني وانتجت شريط ( قوس قزح) وهو في الاسواق حاليا * عندك رحلات خارجية؟ مسافر لدبي والقاهرة في شهر مايو وبعدين ماشي لندن وهولندا مع الصديق نورالدين الطيب * اعمالك الجديدة شنو؟ عندي اربعة الحان جديدة للدكتور علي الكوباني اصل الحلوين .. ما بقدر ..قوس قزح ..حلوة الجمرة .. وكمان احب ان اعلن بان كوباني اعطي اعمال جديدة لحسين شندي وهو طبعا فنان ممتاز اثق في اي عمل يقوم به * رسالة توجهها لمن؟ لاخوي الفنان الكبير عبدالعزيز المبارك واتمني ان يأتي الي النادي ويتعاون مع الاخرين لانه فنان ما ساهل لكنه انطوي.. وودالمبارك فنان عندو قبول والقبول اهم حاجة عند الفنان.. وفي فنانين ما عندهم قبول برغم انو صوتهم كويس لكن ما قدرو استمروا * صاحبك القلع كيف؟ القلع قدم لاتحاد الفنانين حذروه من اي احتكاك مع كمال ترباس!!!! والله ياجماعة القلع اخوي وحبيبي لكنو مرات ما( بخت الكورة واطه) !!! * وصاحبك ايمن دقلة؟ ايمن فنان من طراز جيد وعنده اعمال جديدة للحلنقي واعطيته عملا جديدا وهو انسان نبيل بقيف مع الاخوان واكثر زول بقيف مع العازفين * رسالة لخليل اسماعيل؟ اتمني له الشفاء العاجل ويرجع لمعجبيه ومحبيه وياريت الناس كلهم وعلي مستوي الدولة يقيفو معاهو في محنته * تتمني شنو يا ترباس؟ اتمني جلسة فنية مع العطبراوي وعايزكم يا شجرابي وابوشنب تكونو معاي?? وشايف زيدان عنده قافلة انا حاكون اول زول فيها * في مطرب جديد لفت نظرك؟ ممكن في لافتات الشوارع لكن واحد يلفت نظري الا يكورك لي وانا ماشي!! * فرفور اتأثر بيك في الأول؟ نعم ، فرفور تأثر بي في مراحله الاولي ولكن بعد داك عمل شخصيته المستقلة لكن لازم يحدد ويخلي الكورة لانو الكورة والغناء ما بمشوا مع بعض يعني ماممكن تكون جاري بالعصر وتجي تغنى بالليل?? حقو ما يكون معاك عازفين يكون معاك عربية اسعاف!! * منو من الاخوان وقف معاك؟ اخوي وصديقي السر يوسف الكريل جمل الشيل وعشا البايتات واخو الاخوان واتمني ليه دوام الصحة والعافية . * انت راضي من خالد نحل؟ خالد نحل بيغني كويس * ممكن تديهو خلافتك؟ يا اخوانا الناصية مازي تاني ناصية !!! * تقول شنو لصاحبك الزاكي التيجاني محمد ابراهيم؟ اولا اشكرو علي الاستضافة وازالة سوء الفهم بيني وبين اخوي وصديقي وود امي الرشيد علي عمر واسال الله يزيل البينو وبين الحكيم طه علي البشير وترجع المياه لمجاريها ونشوفو في عربية الحكيم زي( اللستك الاسبير ) !!!! * احكي لنا عن طرائف القلع؟ مشينا عرس عند عبدالمجيد منصور وقال عبدالمجيد اي زول ما هلالابي ما يغني قام طه علي البشير قلع عبايته اداها للقلع وغني القلع (بحر الهلال بالعني جب) ولمن استلم حقو رجع العباية وقال انا رجعت مريخابي ..!! * رأيك شنو في الاصوات النسائية؟ ندي القلعة عندها غناء خاص وعندها كمان القبول والتلفزيون اداها دفعة وهي منضبطة في شغلها * طيب سميرة دنيا كيف؟ انا ( سميرة سعيد ) ما عا########ي تقول لي( سميرة دنيا ) ؟؟ سميرة دنيا ما عندها وفاء لاي زول ويكفي انها ما كانت وفية لعثمان حسين الهرم الفني الكبير وانا وقفتها من ترديد اغنياتي وقلت اراقب حفلاتها عشان اتاكد.. لقيت ما عندها حفلات!! * تقول شنو في النهاية؟ اشكر الاساتذة ميرغني ابوشنب وعبدالمنعم شجرابي والرشيد علي عمر علي الحوار الجميل وانا فخور ان يحاورني ثلاثة من افضل الصحافيين الرياضيين وليهم مكانتهم وقدرهم