|
دعواتكم لزميلنا المفكر د.الباقر العفيف بالشفاء العاجل
|
|
 Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: نصار)
|
طرحت الحلم الجديد مع الحلم السابق لمفسر احلامي الامام الهلاويسي قدس الله سره و الذي ما خاب تفسير له قال لك ما يلي
بادي محمد الطيب دلالة على موت احدهم ووجود الكورس المصري يقود الى ان المتوفي حسني مبارك بالذات دا هايبر لنك من الحلم الاول
موضوع الغني والطبلة دي دلالة على انك حتتزوج سوزان مبارك بعد تتم العدة (شايل طبلة )
بالله ما تنسانا من البياض بعد ما تعرس ام جمال دي داير شقة في القاهرة جنب شقة هند صبري الطلعت تونسية شقيقة
| |
 
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: حسبو عكاشة)
|
غايتو دي تفسيرها يا ناذر إنو ستتم وحدة السودان ومصر وسيبدأ ذلك على المستوى الشعبي ( عشان بادي محمد الطيب فنان شعبي و الطبله شعبيه والكورس كذلك)
لكن ستواجه البدايات عقبات وعقد يجب حلها (لأن الفنان بادي شعره به عقد)
أما موقفك من هذه الوحده يا ابو النيذ ((ستطبل)) لها (لشيء في نفس يعقوب) وليس واضحا في الحلم إذا كنت ستطبل عن رضاً أو مجبراً
أما هذه الوحدة من الجانب المصري فهي لا تجد حماسا من المسؤولين المهمين بل فقط من ثلة من مسئولي الصف الثاتي في الحزب الحاكم (الكورس)
عموما منتظرين تمامة الحلم ده دايرين نعرف هل المناسبه دي كانت عرس والله في التلفزيون والله مشيتو تعملو كاسيت في مصر ساكت
* ده تفسير (دعائي) للناس لوعجبهم بعد داك حايكون تفسير الحلم الواحد بي 20 جنيه (نتمنى الباشمهندس ما يخش بي جاي) 
| |
|
|
|
|
|
|
|
|
 Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: ناذر محمد الخليفة)
|
طبعا من المرة الفاتت بطلت نومة المغارب ..!!
أمبارح رجعت البيت بالليل زي الساعة إتناشر .. جيت من برة متعشي ورقدت نمت من غير ما أحضر أي حاجة في التلفزيون ..!
مسرح الحلم المرة دي شارع زلط في حتى كدة في الخرطوم .. الفنان المرحوم بادي محمد الطيب ظهر بيغني بي كل هيبة وجلال أغنية في الفؤاد ترعاه العناية .. وأنا شغال معاهو بالطبلة وعلى يميني قاعد بعام بتاع حفلات معروف في الخرطوم ساكت ساااااي بيكشف للحاصل بس !!وجمبي طوالي في كورس بتاع شيالين مصريين كلهم بعرفم .. الكورس بقيادة الممثل المصري محمد سعد (اللنبي) وباقي الكورس مصريين (نقاشين وسباكين) كانو شغالين معاي في الشركة ..!
الملاحظة الأولى الحتة البنغني فيها دي ما فيها جمهور .. والمصريين الشيالين حافظين الأغنية دي تماما .. بادي غنى : (نحن للقومية النبيلة ما بندور عصبية القبيلة ، علمونا جدودنا وقبيلا قالوا نفدي الوطن العزيييييييز) !! قمت أنا إنتشيت وصرخت (أُو) ودي هي الصرخة البيصرخا بادي لمن ينتشي في الغنا وتجيهو حالة الجذب ديك ..!
بادي حمر لي شديييد وجا جمبي قال لي (أو) دي ما بتقولا إنت .. بقولا أنا .. والمصريين مسخنييين مجتهدين في الكورس ..!! بادي دخل في بيت تاني وصوت الساوند عالي جدا (مرفعين ضبلان وهازل شق بطن الأسد المنازل النبقى حزمة كفانا المهازل نبقى درقة وطني العزيز) .. قمت أنا جاتني الحالى سبعطاشر وما مسكت روحي قمت صرخت بي طريقة بادي المعروفة (أوووك) !! بادي تاني حمر لي وجا علي .. قال لي دي أخر مرة أسمعك تكورك .. المرة الجاية بكسر ليك طبلتك دي في راسك !! قلت ليهو طيب إنت قول (أُو) دي عشان أنا ما أقولا !! قال لي أنا بعرف أقولا وين ومتين إنت بس خليك مع الطبلة ...!!
وأخوكم في الحلم مجضم الطبلة دي جضيم السنين .. بادي واصل في غناهو والمصريين بيشيلوا معاهو ويرقصو .. بعد شوية كدة أنا إندمجت مع الطبلة وحركة المصريين في الرقص وغيرت إيقاع الغنية لي عشرة بلدي .. المصريين إنبسطو للطيش وطوالي عملوا دايرة وقام اللنبي طلع في تربيزة وقعد يرقص زي رقيصو الشفناهو في الفلم بتاعو داك !! وأنا بالرغم من تغيير الإيقاع شغال (أو) (عووووووك) ومتكيف جدا انو المصريين ما منعوني ..
بعد شوية عمنا بادي جا علي زعلان جدا وقف التعليمة الحاصلة دي ! وقال لي ما تشتغل معاي بالطبلة دي لأنك خربت الإيقاع إشتغل لي بالبنقز بس ... أنا أبيت دقيت جرس والمصريين برضو دقوا جرس معاي . قالوا كمان هم ما بيشيلوا مع بادي إلا بالطبلة .. بادي زعل جدا إختفى من قدامي كدة وظهر تاني شايل البنقز أم تلاتة عيون داك وشال مني الطبلة ورفعم مع بعض .. قال لي إختار يا الطبلة يا البنقز ؟ المصريين بقيادة اللنبي شابكني ليك : إختار الطبلة يا عم ؟ أهو نحن مبسوطين معاك ومش ما نعينك تقول (أُو) زي ما حضرتو بيمنعك !! عمنا بادي هرشني وقال لي إختار سريع .. وأنا قلت أحسن ما أخسر عمنا بادي (إحتمال اشتغل معاهو بي عدادات تقيلة في باقي الأحلام الجاية) قمت طوالي شلت البنقز ..
المصريين زعلو جدا .. واللنبي إتوتر وعمنا بادي فرح شديد وقال هو ماشي وأنا لا زم أجهز حالي للحفلة الجاية .. عمنا كانت عربيتو قدامو بوكسي أب زيك موديل 78 ولا كم ما عارف .. دور البوكسي وشتت خلاني مدور شمطة مع المصريين وأنا بحاول أبرر ليهم ليه أنا اخترت البونقذ ما الطبلة وهم جايطين ....
صحبي اللنبي زعلان جدا وقال هم راجعين مصر وتاني ما دايرين كلام معاي تاني وهم حا يرجعوا السودان إلا لمن يعرفوا أني رجعت للطبلة تاني وخليت البنقذ !!
حكمة ربنا فجأة كدة يجي بص فخم جدا في نص الزلط يقيف مكتوب فيهو الخرطوم - القاهرة !! المصريين تلبوا جو البص وأناوالبعام البيباري الحفلات داك تلبنا وراهم بحاول أقنع فيهم وهم راسم ناشف !! بعد شوية جا كمساري البص .. الكمساري واحد جارنا في الحلة عندو ركشة سايقا ما عارف ركشتو وداها وين والجابو البص شنو !! ..
في حاجة مهمة .. البص كبير وواسع ومقاعدو فاضية ما فيها زول .. ورغم كدة أنحنا كلنا كنا واقفين شماعة !! الكمساري سألني قال لي إنت ماشي القاهرة . قلت ليهو لا لا .. نزلني في أبو حمامة أنا وصحبي دا !! صحبي دا عاين لي قال لي ويييييييييييين أنزل معاك ؟!أنا اشي القاهرة مع المصريين ديل .. قلت ليهو إنت جنيت ولا شنو ؟ البيوديك القاهرة شنو ؟ قام اللنبي عاين لي بي زعل وقال لي أنا بوديهو معايا إنت أطلع منها خالص ..!!
البص وقفني ليك في محطة أبو حمامة ..! نزلت شعرت بالجوع .. أبو حمامة فيها محل بتاع طعمية رهيب خلاص (دي بالجد ما في الحلم) .. مشيت لي بتاع الطعمية قولت ليهو أديني سندوتشي !! بتاع الطعمية قال لي إنت من زمن الطعمية ؟ أنا بدري خليتا وهسي عندي حاجة تانية تجربا ؟! طبعا كنت جعان قلت ليهو أديني منها ..!!
صحبي دا قبل كدة وجاب لي كُشري ..! قلت ليهو دا شنو دا ؟ قال لي دا ألذ كشري حا تاكلو في حياتك كدي جربو .. شلت المعلقة أول لقمة أبت تنبلع وقفت لي في حلقي ..!! قلت ليهو أديني موية أنا خنقت .. قال لي لا لا موية ما في اكل كدة بس (يعني بلع ناشف) ! اللقمة التانية كانت حارة عدييل شعرت بيها وهي نازلة إنها جرحت لي حلقي ..! قعدت اكورك : عليك الله أديني جغمة موية .. وبتاع الطعمـ .... قصدي بتاع الكشري قال لي موية مااااااا في .. أكل كدة بس ..! قلت ليهو خلاص ما داير أكل .. قال لي ما علي كيفك .. جا جمبي شال المعلقة وبقى يأكل فيني بالرجالة وأنا شاعر الكشري دا ما داير ينزل من زوري !!وهو يأكل فيني لحدي ما الصحن فضى وأنا شعرت حلقي إتجرح وبقى ناااشف ..
بعد شوية شعرت إني خنقت وطوالي قمت من النوم مخلوع !!
إتلفت كدة لقيت ما في لا كشري لا بطيخ !! حمدت الله وقمت من السرير عشان أشرب موية .. لمن بديت اشرب موية شعرت بي جفاف في الحلق الموية زي الما دايرا تنبلع رغم إني صحيت من النوم ومن الحلم ..!!
ووالله العظيم لي هسي شاعر بي حلقي ما طبيعي وما ببلع أكل و شراب بي سهولة !!
أفتونا يا جماعة ؟! الحاصل شنو ؟!!
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: ناذر محمد الخليفة)
|
شفت يا ناذر تمامة الحلم كلها يتأكد ما ذهبنا إليه في موضوع وحدة السودان ومصر، شوف معاي النقاط التاليه:-
1- المقطع الإنت إنتشيت فيهو و (طبلت) ليهو البيقول ((نحن للقومية النبيلة ما بندور عصبية القبيلة)) دي دعوه صريحه للوحده و نبذ التخندق داخل الوطن الصغير سودان كان أو مصر
2- البص الفخم المكتوب فيه الخرطوم القاهره تأكيد للتواصل الحا يتم بدون فيزا وغيرو
بس كما قلنا سابقا أن هذه الوحده ستمر بعقبات على المستوى التنفيذي (دللنا على ذلك بالشعر المعقد للفنان بادي) ويؤكد ذلك أن البص برغم أنه فخم وواسع وفاضي إنتو كنتو واقفين فيهو شماعه ده دليل علي إستمرارية الحال في المطارات بين البلدين على حالتي الشد والجذب في قضية حلايب
أما الكشري الذي حل محل الطعميه فهو إشارة على محاولة فرض المصريين ثقافتهم علينا وحتى ولو بالقوة (بلع ناشف من غير مويه)
نسيت أن أقول أن البعام صاحبك داك الرفض ينزل معاك في ابو حمامه يشير لإنجراف كثير من بعامي السودان نحو الثقافة المصرية وسيبيعوا السودان متى ما سنحت لهم الفرصه
(لسه ما حاناخد منك قروش عشان إنت زميل دراسه من أرض غاندي)
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: كمال حسن)
|
كمال حسن ..
Quote: غايتو دي تفسيرها يا ناذر إنو ستتم وحدة السودان ومصر وسيبدأ ذلك على المستوى الشعبي ( عشان بادي محمد الطيب فنان شعبي و الطبله شعبيه والكورس كذلك)
لكن ستواجه البدايات عقبات وعقد يجب حلها (لأن الفنان بادي شعره به عقد) |
وحدة بين البنقز والطبلة دي ما ظنيتا هههههه عمنا بادي دا ما موافق على الحتة دي ..!
وبالمناسبة عقد شعر بادي الله يرحمو كانت واضحة جلية في الحلم ...
Quote: أما موقفك من هذه الوحده يا ابو النيذ ((ستطبل)) لها (لشيء في نفس يعقوب) وليس واضحا في الحلم إذا كنت ستطبل عن رضاً أو مجبراً
أما هذه الوحدة من الجانب المصري فهي لا تجد حماسا من المسؤولين المهمين بل فقط من ثلة من مسئولي الصف الثاتي في الحزب الحاكم (الكورس)
|
والله يا كمال غايتو ما قصرت في التفسير ..
كدي النشوف راي كييكي شنو !!
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: ناذر محمد الخليفة)
|
ح يحصل استفتاء للوحدة مع مصر ...........
الدعاية الاعلامية شغالة تش (بادي) يروج لخيار عدم الوحدة (الشيالين المصريين) يروجون لخيار الوحدة ...
ناذر قلبه مع السودان (ماداير بادي يزعل) وعقله مع مصر (ماداير الشيالين يزعلوا) ........
نتيجة الاستفتاء سقوط خيار الوحدة (المصريين زعلوا وركبوا البص شتتوا) ...
ناذر في اول زيارة له لمصر بعد النتيجة وجد معاملة المصريين اتغيرت (الكبشري الحار بالغصب) ....
ناذر بحاول يقنع فيهم انو شخصياً صوت لخيار الوحدة (اديني موية) ....
ما اقتنعوا قطعوهو معاهو عشرة صفر (ابو يدوهو الموية) .....
انا لقيتي نفسي في جار ناس ناذر الفكه الركشة وركب البص مع المصريين وشتت ........
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: كمال حسن)
|
كمال حسن ..
Quote: شفت يا ناذر تمامة الحلم كلها يتأكد ما ذهبنا إليه في موضوع وحدة السودان ومصر، شوف معاي النقاط التاليه:-
1- المقطع الإنت إنتشيت فيهو و (طبلت) ليهو البيقول ((نحن للقومية النبيلة ما بندور عصبية القبيلة)) دي دعوه صريحه للوحده و نبذ التخندق داخل الوطن الصغير سودان كان أو مصر
2- البص الفخم المكتوب فيه الخرطوم القاهره تأكيد للتواصل الحا يتم بدون فيزا وغيرو
بس كما قلنا سابقا أن هذه الوحده ستمر بعقبات على المستوى التنفيذي (دللنا على ذلك بالشعر المعقد للفنان بادي) ويؤكد ذلك أن البص برغم أنه فخم وواسع وفاضي إنتو كنتو واقفين فيهو شماعه ده دليل علي إستمرارية الحال في المطارات بين البلدين على حالتي الشد والجذب في قضية حلايب
أما الكشري الذي حل محل الطعميه فهو إشارة على محاولة فرض المصريين ثقافتهم علينا وحتى ولو بالقوة (بلع ناشف من غير مويه)
نسيت أن أقول أن البعام صاحبك داك الرفض ينزل معاك في ابو حمامه يشير لإنجراف كثير من بعامي السودان نحو الثقافة المصرية وسيبيعوا السودان متى ما سنحت لهم الفرصه
(لسه ما حاناخد منك قروش عشان إنت زميل دراسه من أرض غاندي) |
يا خي والله إنت زول معلم عديييل كدة ..
أنا شخصيا اقتنعت بالتفسير بتاعك دا لحين ظهزر تفسيرات جديدة ..
| Quote: (لسه ما حاناخد منك قروش عشان إنت زميل دراسه من أرض غاندي) |
لا لا ياخ أخد أي حاجة إنشالله راس مالا هههههههه
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: ناذر محمد الخليفة)
|
عمر ..
Quote: ح يحصل استفتاء للوحدة مع مصر ...........
|
عمنا بادي الله يديهو العافية في قبرو أظنو كان قاصد كدة لن رفع الطبلة والبنقذ وخيرني بيناتم ..
Quote: الدعاية الاعلامية شغالة تش (بادي) يروج لخيار عدم الوحدة (الشيالين المصريين) يروجون لخيار الوحدة ...
ناذر قلبه مع السودان (ماداير بادي يزعل) وعقله مع مصر (ماداير الشيالين يزعلوا) ........
نتيجة الاستفتاء سقوط خيار الوحدة (المصريين زعلوا وركبوا البص شتتوا) ...
ناذر في اول زيارة له لمصر بعد النتيجة وجد معاملة المصريين اتغيرت (الكبشري الحار بالغصب) ....
ناذر بحاول يقنع فيهم انو شخصياً صوت لخيار الوحدة (اديني موية) ....
ما اقتنعوا قطعوهو معاهو عشرة صفر (ابو يدوهو الموية) .....
انا لقيتي نفسي في جار ناس ناذر الفكه الركشة وركب البص مع المصريين وشتت ..... |
عمر عثمان ضمينا تفسيرك المريح دا لي تفسير كمال حسن داك لحدي ما نصل لي حاجة تانية ..!!
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: manal eltahir)
|
الأخ / ناذر محمد الخليفة
تحية طيبة
الحقيقة وقفت في حلمك ده طويل، والحقيقة هو حلم عجيب، ويمكن ده ما حلم دي رؤية للواقع، وتحليل عميق جدا.. تعال نشوف حلمك ده بقول شنو ؟؟
المكان: شارع زلط، يعني مسفلت وجاهز، والشارع بيعني الشارع العام، يعني الجمهور..
بادي محمد الطيب + اغنية (في الفؤاد ترعاه العنايا..بادي متوفي (الله يرحمه) عودته بالأغنية دي، تعني عودة الروح القومية للشارع العام السياسي السوداني..
ناذر الخليفة + الطبلة + الكورس المصري= ناذر يمثل المثقفين السودانيين ، الطبلة (الايقاع المصري ، الواحدة ونص) + الكورس المصري، ده معناهو انو النخبة المثقفة السودانية متأثرة بالنموذج المصري للثقافة، او الثقافة ذات البعد الواحد، بالكتير واحد ونص..
البنقز = عكس الطبلة، به ثلاث عيون مختلفة، ده بيعني تعدد ثقافات..
البعام = الاحزاب التقليدية بما فيها المؤتمر الوطني..
رؤيتك دي كلها علي بعضها بتقول:
هناك روح قومية جديدة وسط الشعب السوداني تتمثل في نبذ القبلية واسباب التفرقة والتوحد علي قلب رجل واحد، والقبول بسودان واحد متعدد الثقافات ( ما عبر عنه بادي لمن شال منك الطبلة واداك البنقز) والشعب مقبل علي خطوة يترقبها الكل، والحكومة والمعارضة (البعام) ما عارفين الخطوة الحيقوم بيها الشعب شنو؟؟ وده في عبار انو الشارع فاضي ما في جمهوري..ده موقف الشارع العام..
المثقفين السودانيين بير قصوا عشرة بلدي علي انغام سودانية، وده عبر عنو ناذر بقولة (يااااااه) وفي نفس الوكت عاوزين يكونوا سودانيين يعني مذبذبين، ما عندهم طعم ولا هوية..وهم في الموقف ده منقسمين، وعبر عن الانقسام ده، موقف ناذر لمن البص اتحرك للقاهرة، بي انو نزل، وفي مواحد تاني سوداني مشي للقاهرة.. يعني ناس دايرين واحدة مع مصر والتنين عاوزين يبقوا سودانيين وبس..
المهم في الرؤية دي كلها .. الموقف الغامض للشغب السوداني، وده المقلق الحكومة والمعارضة.. ودي يا ناذر اخد ليها وجبة تاني مخصوص عشان تشوف لينا الحصل شنو ؟؟
مودتي
| |
|
|
|
|
|
|
|
|
 Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: جمال المنصوري)
|
Quote: صحبي دا قبل كدة وجاب لي كُشري ..! قلت ليهو دا شنو دا ؟ قال لي دا ألذ كشري حا تاكلو في حياتك كدي جربو .. شلت المعلقة أول لقمة أبت تنبلع وقفت لي في حلقي ..!! قلت ليهو أديني موية أنا خنقت .. قال لي لا لا موية ما في اكل كدة بس (يعني بلع ناشف) ! اللقمة التانية كانت حارة عدييل شعرت بيها وهي نازلة إنها جرحت لي حلقي ..! قعدت اكورك : عليك الله أديني جغمة موية .. وبتاع الطعمـ .... قصدي بتاع الكشري قال لي موية مااااااا في .. أكل كدة بس ..! قلت ليهو خلاص ما داير أكل .. قال لي ما علي كيفك .. جا جمبي شال المعلقة وبقى يأكل فيني بالرجالة وأنا شاعر الكشري دا ما داير ينزل من زوري !!وهو يأكل فيني لحدي ما الصحن فضى وأنا شعرت حلقي إتجرح وبقى ناااشف ..
|
نسأل الله السلامة
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: فيصل نوبي)
|
هي يا ناذر ما عذبتنا ،،، يا خوي انا ما قلت ليك تاني ما تنوم المغارب ،،، وبعدين أحلامك دي دايماً مقرونه بالمصريين وبأسوأ أمه اخرجت للناس ،، ياخ مرة واحده كده احلم ليك بأماراتي ولا جزائري ،، ياخ إن شاء الله موريتاني ،،، بس ما تحلم لي ما الوزيرة الناها وتقوم تقول لي كتبت فيها شعر وما ادراك ما شعر لأنو زول بصدقك مااااااااااااافي .... ياخ برضو بتمنى ليك أحلام سعيده حتى ولو أحلام مستغانمي ....لووووول
ياخوي نحن ما قلنا ليك ما تنقطع وما تعمل الدرب ساساقه ..... ومالك مجافي الناس ؟؟؟؟
تحياتي : ياسر العيلفون
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: ياسر السر)
|
يا ناذر جننت الأحلام جن ، وفي النهاية أقول ليك رؤياك دي تأويلها صعب شديد بحسب كتاب النوم جافاني للألوسي ، شفت يا عمك أول حاجه دي كوابيس في شكل حلم عشان كده ما تنوم بعد العشا مباشرة خاصة إذا كنت ضارب بوش تقيل وإياك والجداد بعد الرابعة عصراً وأبعد عن الإستيم وغني له "ستيم تفاح .. تررم رم رمرم رمرم" ولا تقربوا السمك كان نيلي أو بحري "نفر" بادي أبو شلوخ وبادي محمد الطيب وبادينباول ديل كلهم إتلحسوا ودق الطبلة في الحلم كما جاء في صفحة 23 من كتاب الألوسي أعلاه طبعة شارع بيتنا فيه قولان الأول أن هناك تدهور مريع في الإقتصاد وأن أسعار الثلج ذات شتاء سوف تكسر حاجز البوليس في المظاهرات أمام السفارة الأمريكية ، إنت تعال الأمريكان ديل ما عندهم تمثيل دبلوماسي مع السودان المخليهم خاتين ليهم سفاره ومقفلين حواليها الشارع شنو .
والقول التاني أن نجوم الليل سوف تٌري في عز الضُهُر وبدون كف أو أم دلدوم حتى للفة الرأس. وإذا وقعت المخدة عن يمينك فلا تحشر رأسك تحتها بل ردد وأنت مرفوع الرأس حتى لو كنت في سابع نومه "لنا الصدر دون العالمين أو القبر" ولأن القبر قدام والوزين بي صديرو عام أخير ليك تمشي كبابجي العربي بالدقي شارع الملك فيصل خاصة وأنك زول ناقش أم الدنيا وما عندك مشكلة للسفر إليها وأكيد حا تدعي لي وإنت بتلهط وتدعو على وإنت بتسدد فاتورة اللهطي.
===
وبعد النقّه دي كلها أقول ليك وما نحن بتأويل الأحلام بناقشين خاصة وأنك لم تدفع بياض يعني عاوز تأخذ التفسير ملح وهو أمر غير مقبول في عالم الأحلام عشان كده أقول ليك أطرد الأحلام يا جميل وأصحى
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: almulaomar)
|
منال الطاهر ..
| Quote: المويه الابو يدوك ليها دي هي النيل زاتوووووو...اها يعني المصريين تاني جغمه ما ح يدوكم ليها ...بس تسفوا الكشري ده حااااااف...الا هل بلغت اللهم فاشهد... |
غايتو دي مصيبة .. غايتو الحكومة دي لو دايرة تخت أستراتيجية مستقبلية لي قدام حقو بس تشغلني عندها في القصر الجمهوري ويجهزوا لي سرير دبل نااعم بي مرتبة ومخدة ريش نعام ويجهزوا لي كل وسائل جلب الأحلام الأنا دايرا (بس ما يقولوا لي دا ما عندنا ودا ما مسموح بيو !! البقولو يجيبوهو لي حتى ولو من باب فقه الضرورة) وتاني يوم أقوم الصباح وأحكي ليهم وهم يخططوا السياسات بناء على أحلامي !!
كان ما بلدنا حصلت اليابان بعد ستة سبعة سنة كدة ..
دا يقوم لي جرجير !!!
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: almulaomar)
|
جمال المنصوري ..
Quote: الحقيقة وقفت في حلمك ده طويل، والحقيقة هو حلم عجيب، ويمكن ده ما حلم دي رؤية للواقع، وتحليل عميق جدا.. تعال نشوف حلمك ده بقول شنو ؟؟
المكان: شارع زلط، يعني مسفلت وجاهز، والشارع بيعني الشارع العام، يعني الجمهور..
بادي محمد الطيب + اغنية (في الفؤاد ترعاه العنايا..بادي متوفي (الله يرحمه) عودته بالأغنية دي، تعني عودة الروح القومية للشارع العام السياسي السوداني..
ناذر الخليفة + الطبلة + الكورس المصري= ناذر يمثل المثقفين السودانيين ، الطبلة (الايقاع المصري ، الواحدة ونص) + الكورس المصري، ده معناهو انو النخبة المثقفة السودانية متأثرة بالنموذج المصري للثقافة، او الثقافة ذات البعد الواحد، بالكتير واحد ونص..
البنقز = عكس الطبلة، به ثلاث عيون مختلفة، ده بيعني تعدد ثقافات..
البعام = الاحزاب التقليدية بما فيها المؤتمر الوطني..
|
يا خي والله مشكور على التفسير السوير ديلوكس لي حلمي دا ..
غايتو ربنا يكضب الشينة ..!!
Quote: رؤيتك دي كلها علي بعضها بتقول:
هناك روح قومية جديدة وسط الشعب السوداني تتمثل في نبذ القبلية واسباب التفرقة والتوحد علي قلب رجل واحد، والقبول بسودان واحد متعدد الثقافات ( ما عبر عنه بادي لمن شال منك الطبلة واداك البنقز) والشعب مقبل علي خطوة يترقبها الكل، والحكومة والمعارضة (البعام) ما عارفين الخطوة الحيقوم بيها الشعب شنو؟؟ وده في عبار انو الشارع فاضي ما في جمهوري..ده موقف الشارع العام..
المثقفين السودانيين بير قصوا عشرة بلدي علي انغام سودانية، وده عبر عنو ناذر بقولة (يااااااه) وفي نفس الوكت عاوزين يكونوا سودانيين يعني مذبذبين، ما عندهم طعم ولا هوية..وهم في الموقف ده منقسمين، وعبر عن الانقسام ده، موقف ناذر لمن البص اتحرك للقاهرة، بي انو نزل، وفي مواحد تاني سوداني مشي للقاهرة.. يعني ناس دايرين واحدة مع مصر والتنين عاوزين يبقوا سودانيين وبس |
يعني ممكن نقول حلمي المرة دي رسالة موجهة للمثقفين دا لو ما حلم مثقفين زي ما قلت ..!!
Quote: المهم في الرؤية دي كلها .. الموقف الغامض للشغب السوداني، وده المقلق الحكومة والمعارضة.. ودي يا ناذر اخد ليها وجبة تاني مخصوص عشان تشوف لينا الحصل شنو ؟؟
|
فعلا موقف الشعب غامض ومقلق للجهتين . أكان حكومة كان معارضة ..
مشكور كتير يا جمال ..
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: almulaomar)
|
ياسر العيلفون
| Quote: هي يا ناذر ما عذبتنا ،،، يا خوي انا ما قلت ليك تاني ما تنوم المغارب ،،، |
تعرف الشغلة ما شغلة مغارب القصة في حكاية نوم العصر دي ..
مشيت قوقل كتبت نوم العصر .. يا خي أنا لمن إتخلعت !!
كمية من الأحاديث والروايات البتحذر من نوم بعد العصر .. قالوا بيجيب الجن ولقيت حديث في واحدة من المواقع مصنف كحديث صحيح وفي موقع تاني قالوا حديث ضعفوا ناصر الدين الألباني وملخص الحديث بمعنى من نام بعد العصر لا يلومن إلا نفسه !!
هسي الحل شنو ؟!! أنا ما داير ألومن نفسي براي !! وكمان نومة بعد العصر دي ما بقدر أخليها بحكم ظرف العمل !!
ألومن نفسي ساااي كدة وأنوم ولا أستعمل عقاقير ومنشطات !!!
| |
|
|
|
|
|
|
|
|
|
Re: حلم تاني بحاجة لتفسير عاجل : الفنان بادي محمد الطيب وأنا شغال معاهو بالطبلة والكورس مصري ! (Re: almulaomar)
|
الملا عمر ..
Quote: يا ناذر جننت الأحلام جن ، وفي النهاية أقول ليك رؤياك دي تأويلها صعب شديد بحسب كتاب النوم جافاني للألوسي ، شفت يا عمك أول حاجه دي كوابيس في شكل حلم عشان كده ما تنوم بعد العشا مباشرة خاصة إذا كنت ضارب بوش تقيل وإياك والجداد بعد الرابعة عصراً وأبعد عن الإستيم وغني له "ستيم تفاح .. تررم رم رمرم رمرم" ولا تقربوا السمك كان نيلي أو بحري "نفر" بادي أبو شلوخ وبادي محمد الطيب وبادينباول ديل كلهم إتلحسوا ودق الطبلة في الحلم كما جاء في صفحة 23 من كتاب الألوسي أعلاه طبعة شارع بيتنا فيه قولان الأول أن هناك تدهور مريع في الإقتصاد وأن أسعار الثلج ذات شتاء سوف تكسر حاجز البوليس في المظاهرات أمام السفارة الأمريكية ، إنت تعال الأمريكان ديل ما عندهم تمثيل دبلوماسي مع السودان المخليهم خاتين ليهم سفاره ومقفلين حواليها الشارع شنو .
والقول التاني أن نجوم الليل سوف تٌري في عز الضُهُر وبدون كف أو أم دلدوم حتى للفة الرأس. وإذا وقعت المخدة عن يمينك فلا تحشر رأسك تحتها بل ردد وأنت مرفوع الرأس حتى لو كنت في سابع نومه "لنا الصدر دون العالمين أو القبر" ولأن القبر قدام والوزين بي صديرو عام أخير ليك تمشي كبابجي العربي بالدقي شارع الملك فيصل خاصة وأنك زول ناقش أم الدنيا وما عندك مشكلة للسفر إليها وأكيد حا تدعي لي وإنت بتلهط وتدعو على وإنت بتسدد فاتورة اللهطي.
|
ههههههه يا جمال المنصوري والباقين كدي تعالوا فسروا لي كلام الملا عمر دا باقي لي تفسير حلمي أصعب منو ههههه
الملا عمر يا خي صنقوري دا لو بيفهم معاني كلامك الكبار كبار دا كان قدر يفسر أحلامي دي ..
والأمريكان ديل وشارعم دا خليهم لي أمكن يجوني في حلمة تانية ..
| Quote: وبعد النقّه دي كلها أقول ليك وما نحن بتأويل الأحلام بناقشين خاصة وأنك لم تدفع بياض يعني عاوز تأخذ التفسير ملح وهو أمر غير مقبول في عالم الأحلام عشان كده أقول ليك أطرد الأحلام يا جميل وأصحى |
يا خي بعد دا كلو حالتك ما ناقش ..!!
البياض بيجيك أديني رقم تلفونك برسلو ليك رصيد ههههه
| |
|
|
|
|
|
|
| |
ناذر محمد الخليفة
baha eassa
Fadl Karrar
nazar hussien
حسبو عكاشة
نصار
محمد إبراهيم علي
محمد عبدالرحمن محمد
كمال حسن
محمد المرتضى حامد
Yassir Tayfour
Sidgi mattar
omer osman
فيصل نوبي
ياسر السر
almulaomar
محمد الجيلى
محمد عكاشة
فيس بوك
تويتر
انستقرام
يوتيوب
بنتيريست