شيبة-مراكب نوح محملة بالعبيد-اهداء ليك ولكل الرائعيين-بصوت مصطفي

حفل دعم الجالية السودانية بمنطقة واشنطن الكبري بالفنان عمر احساس
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 22-09-2018, 04:08 AM الصفحة الرئيسية

مكتبة الفنان الراحل مصطفى سيد احمد
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
19-04-2003, 06:43 AM

rani
<arani
تاريخ التسجيل: 06-06-2002
مجموع المشاركات: 4633

للتواصل معنا

FaceBook
تويتر Twitter
YouTube


شيبة-مراكب نوح محملة بالعبيد-اهداء ليك ولكل الرائعيين-بصوت مصطفي







    سيناريو اليابسه

    الهدهد

    مخدوش الفضاء طويل الحزن

    مفتول الحنين

    مُصاب بالديانات والشرود

    نوح يبلغ من الطول

    مسافة يشتهى الغرقان شهيق

    لونو زى سرك تكلمبو الصديق

    أمو تتوحم على طين البحر

    قبال تقابل والدو صدفه على الطريق

    عمرو سته شهور حلم

    إنو الأرض مسجونه فى مويه

    وكل الناس مراكبيه

    اليابسه فِركه

    مدخوره لي يوم فيهو ساير، النيل

    قطّاع رحط كل الجزاير، والبنات البفتحو الباب للمطر

    وانا جدولك

    شارف على بعض الجناين الصاحيه فيك

    والغباش في دمى منك

    لو كسر ضلعين عزرتو

    لكن

    نهر كل العصافير البتلعب في الوريد ،وفنّاكى

    جواى زى حجر، والبينا ما فات الدواير

    الليل

    خمار القمره

    مجدوع في الفراغ

    والرقصه للبت فينا

    فوق كل المسامير الندقها في البساط

    والرياح حّكامه بى دلوكه مرّقت الشياطين منها

    إتجنن فقي الحله

    دقيناهو بى نفس السياط

    كل المجرات

    النيازك والشهب

    ودع

    راميهو الله علي السماء

    والدنيا زار

    ويا هُدهد هن

    مرت مراكب نوح محمّله بالبخور

    مين اللى شال

    من طاقة الطين البعيد

    قنديل حبيبتى

    وطّيب الجرح المثير

    مين السرق من بابها مفتاحو الملون والصرير

    منهوبه قبرة الفواكه فيكى

    قولى معايا يا شرف القبايل جَّر

    الشاف تباريح الطلح في النار

    شافنى مرقت من عندك ضرير

    أنا ليه

    تجينى الموية حفاينه

    وأدنقر ألبسها فى شبط أخضر

    أبيت مبلول أصلح فى رباط

    أنا ليه

    شبابيك البيوت الواجمه

    والناس البُساط

    وليه بيرجانى النخل فى السكه

    يفتح قلبى خمّاره

    وخلاوى

    وبيت بُكا

    تعبت من المساسقه والهتاف

    يا غيمة أتبنى جبهة القمره

    السهر والحمى طول الليل تهضرب

    ويا هُدهد لقيت أمك

    ترشرش فى السعف من عينها

    تجبر خاطرها المكسور عليك

    ينكسر خاطر السعف فى إيدها

    يا هدهد قيام

    من السماء الأول قيام

    من السما السابع قيام

    وأنزل مسافة تهبشك غنوة

    وأناولك كاس

    ومرّت مراكب نوح محّله بالملوك

    ركعت على الموج الجنود

    من كل جندى تفوح ضحيه

    ودم مشتت فى الأبد

    دسيت جبهتى من السجود

    بكى فى مخاض الخوف ولد

    إشتبهوا فينى وراء الجبل

    شافونى دسيت الهدهد بالزبد

    صفا

    انتباه

    وقعت من الهدهد بلد

    نهبوها واتقسموا الحدود

    ومرت مراكب نوح محمله بالطيور

    واقف مع نوح الغراب

    ينضم ويأشر فى إتجاه

    باقى الطيور يتوسوسوا

    إلإ الحمام يتوضأ مارق للصلاه

    القانقرد فى حزنو يغزل شاله صوف

    الطواويس شاره قمصانها المزركشه فى الضحى

    الزرازير بى عراريقها المغبشة جات علي

    أرجينى يا صالحه

    ومشيت فى الموج

    يا النبى نوح أصل سالم

    يا النبى نوح اصل ...

    حجر الدغش في المويه يقلع ضفرى

    يادم

    دا ما وكت الرسم واللون

    وجات المغارب

    حننّت إيدها ومشت

    سبحانك الأديتنا من حزنك فوانيس

    الغراب يا نوح طفش

    واليابسه وين؟ يا الله ما يبس سوى حلقى

    المجرح بالدعاء

    طير يا حمام

    الحمام يا نوح يجامل فى السماء

    وبياع مناديل خضراء فى كل العصور

    أنا ما خلقتك يا ظنون

    شان تبيتى الليل معاى

    وتجرى من فوقى الغُطا

    ما تشّري فى حبلى الوساوس

    المعانى الداكنه

    الليل والشتاء

    الهدهد تميمة المةت معّلق فى

    بيوت الناس نعش

    من خرافاتن تعال

    من دياناتن تعال

    نفّض نعاسك

    من كل بيت من كل حجوه حكوها عنك

    في الليالى البارده والأطفال نيام

    مين يشترينى من الملوك

    الخايده فى الدم القديم

    مين النبى القادم

    من مكه

    او من دكه

    فى شارع حميم

    مين اليوصف للنحل ريق الحبيبه

    وحبة القمح التقوم فوق محفضة حبوبه

    في الزمن اللئيم

    مزيداً من الطين يا إله

    أبني خوفى عليك ومنك

    أبنى آخر بيت حرام

    ومرت مراكب نوح محمله بالحجيح

    وين ولدك

    تركتوا على الجبل

    وين بلدك

    ضربتها فى مثل

    وين نحن

    مرقت على عجل

    يا نوح تخلينا

    زيتونك مخلل بالشمس

    نار الله والرجل الغربيه

    نحن البلاد الشاكيه جرحها للصديد

    جاتنا القوافل بالضجيج

    جرّتنا من حلبة رقيص

    ورّتناك كيف صلبوا المسيح

    كيف كتلوا الحسين

    وبكينا اكتر منها

    ساقتنا فى الآخر عبيد

    مين يشترينى من الملوك الخايده

    فى الدم القديم

    مين اليوصف بيتنا لى هدهد يتيم

    يا هدهدى المهدود

    مين هدهدك نمت

    كل الطيور غنت

    منك يجينى سكوت

    مين الهداك للناس

    أو هدّ فيك الموت

    يا أوسم الجايين ، انا قلبىحِله حنين

    والشوف فتحنى بيوت

    يا صالحه

    لا جنبك لا فت منك فوت

    دايماً معّلق بين

    بين الحياة والموت

    أدخل ضلام الناس

    نورك يجينىا خيوط

    وقبال أقع فى الضو

    جواك سندنى خفوت

    أنا برضى حِلة شوق

    لكنى فى التابوت

    ومرت مراكب نوح محمله بالعبيد

    الجنه زى هدهد معلّق فى الكتاب

    ونحن العبيد

    باب الحياه السِّرى

    حرير فى فكرة الدوده الموجّعه

    بالنسيج

    صيوان عزاء نوح المكفن بالوعود

    هدهد يرك فو قدفه المركب يدندن

    الريح سكن خيمة حريمو الأربعه

    النيل رجع فى اللوحه

    للوادى القديم

    البحار مكتوفة الأيدى

    الشموس فاقت

    ونوح يعاين فى مفاتن اليابسه

    تغسل فى حصى ومتبرجه

    سبحانك الأديتنا

    من ملكك سلاطين وإختفيت

    هاك أنبياءك سالمين

    وأنزل مسافة توجعك غابة

    رقيصنا الحى

    طبولنا

    وليك

    شبال من اليابسه الممشطه

    بالملح

    وهُدهد

                   |Articles |News |مقالات |بيانات

20-04-2003, 08:13 PM

Abdalla Gaafar

تاريخ التسجيل: 10-02-2003
مجموع المشاركات: 1462

للتواصل معنا

FaceBook
تويتر Twitter
YouTube


Re: شيبة-مراكب نوح محملة بالعبيد-اهداء ليك ولكل الرائعيين-بصوت مصطفي (Re: rani)

    rani
    لك الشكر

    وانت تهبنا كل هذا الجمال
    الحرف واللحن والمعني ولذة التذوق

    مليون تيحية يازول ياجميل
    عبدالله جعفر
                   |Articles |News |مقالات |بيانات

20-04-2003, 10:30 PM

sheba
<asheba
تاريخ التسجيل: 15-12-2002
مجموع المشاركات: 1874

للتواصل معنا

FaceBook
تويتر Twitter
YouTube


Re: شيبة-مراكب نوح محملة بالعبيد-اهداء ليك ولكل الرائعيين-بصوت مصطفي (Re: rani)

    العزيز رانى


    لك عاطر التحايا

    وشكرا على الاهداء

    وتسلم

    خالد شيبا
                   |Articles |News |مقالات |بيانات

27-04-2003, 02:06 AM

rani
<arani
تاريخ التسجيل: 06-06-2002
مجموع المشاركات: 4633

للتواصل معنا

FaceBook
تويتر Twitter
YouTube


Re: شيبة-مراكب نوح محملة بالعبيد-اهداء ليك ولكل الرائعيين-بصوت مصطفي (Re: sheba)

    *
                   |Articles |News |مقالات |بيانات

20-05-2003, 09:38 PM

rani
<arani
تاريخ التسجيل: 06-06-2002
مجموع المشاركات: 4633

للتواصل معنا

FaceBook
تويتر Twitter
YouTube


Re: شيبة-مراكب نوح محملة بالعبيد-اهداء ليك ولكل الرائعيين-بصوت مصطفي (Re: rani)

    **
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de