طبعاً لاشماته 00 العنده موبايل من حقه لكن هل كل من هب ودب يحتاج للموبايل ؟؟ أنا شخصياً استفدت من الموبايل حيث يوفر لي مصاريف اسرتي لمدة اربعة شهور في العام هذا بخلاف أن اتصالاتي كلها للسودان تتم عبر مايدره لي الموبايل طبعا لا استخدم راتبي حتى في شراء شريحة جديدة وانما يتم كل ذلك بجهودي الشخصية ولولا الموبايل لما استطعت تحقيق ذلك ولدي الكثير من الأقارب الموبايل عندهم فشخرة ووجاهة أكثر من اللازم بل حتى المصاريف التي نرسلها لهم للأكل والكراسات يشترون بها اسكراتشات وكثير من الأسر السودانية أصبح الموبايل يشكل عبئاً إضافياً عليهم اذا ماعرفنا أن هناك ضرائب وكهرباء ورسوم دراسية و { قفة ملاح } شنو يعني واحد في الابتدائي ومعاه موبايل ؟؟ وشنو يعني طالب جامعي او طالبة جامعية وظروف بيتهم حدث ولاحرج ويصر على شراء موبايل ؟؟ وأكثر مايؤلمني تلقى الواحد سرواله مقدود ويعمل ليك مس كول يعني مش كان مفروض يشوف ليهو ترزي في الأول !!! هسي كلمة { الواحد } دي الزول لو ماخايف يعمل بعديها اسلاش {/} ويخت ليها { ة } !! ياجماعة هل يعقل أسرة فقيرة من ثلاث ابناء وبنت لديهم اربعة موبايلات ؟؟ والمشكلة مافي الأربعة موبايلات المشكلة ان البيت مافيه { أدبخانة } !!! يعني ياويلك لو الطبيعة قالت كلمتها بان تذهب للمكان اياه تشيل ابريقك المعتوه ويمشي واحد قدامك لبيت الجيران والجيران تقول عارفنك ستأتي لتقضي حاجتك عندهم ينتظروك قاعدين جمب الباب ولازم تسلم عليهم في الأول ياجماعة دي حالة دي الفشخرة لزومها شنو ؟؟؟ قال { مس كول } قال !!!!
06-03-2006, 05:24 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
طبعاً مشينا مناسبة بكاء أنا وست النفر قطعنا مسافة 170 كلم ووصلنا مكان العزاء في كل هذه المدة ماطلبت مني الموبايل عشان تتصل أول ماجات داخلة بيت العزاء قالت عاوزة الموبايل 00 شيء عجيب والله وتووووووووش دخلت على النسوان بعديها ماعارف الحاصل شنو والحمد لله جات مكالمة من السعودية وانقذت الموقف حيث ارسلوا لي الموبايل مع أحد الملاقيف وهذا النوع من الرجال الذي يتلصق على النسوان في مثل هذه المناسبات مرة بدواعي احضار الشاي ومرة بدواعي احضار القهوة ومرة عشان غداء ناس أم ضريوة !!!
بالمناسبة ياجماعة أم ضريوة دي وين في السودان اولاً أنا معجب جدا باسمها وثانياً أعجبتني أن بها حفظة كثيرون جداً للقرآن لهذا دخلت في قلبي وأحببتها وأتمنى ان أزورها !!!
بصراحة انا محتار جدا فى المسألة دى وخاصة انه البعض بل الكثيرين يمتلكون أكثر من موبايل؟؟ هل اصبح الناس فجأة هواة حديث لهذه الدرجة ؟؟؟ أم ان القصة زى ما اتفضلت فشخرة فى الفاضى ونفخة كذابة (زى ما بقولوا ابناء النيل) ؟؟؟
تعال اوريك هنا واحد ليه سنين ما شغال وعندو جوالين احدهما بكاميرا ؟؟؟
06-03-2006, 05:32 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
أخي قرشو قال كاميرا قال يعني بالله تفرق معاه لو اشترى جوال عادي
قبل ايام برضو عندنا واحد طالع في نخلة يمكن ارتفاعها عشرة أمتار فجأة جاهو زميله قال ليهو جالك اتصال من السودان عمك بالله نزل من النخلة مخلوع في الآخر وجد ابنه في الابتدائي متصل وكمان شنو قال عاوز يشتري ليهو موبايل { سلفاكير } !!!
06-03-2006, 05:36 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
ياجماعة أنا ماعندي مشكلة الناس تستمتع زي ماعاوزة ولكن ليس على حساب الآباء الفقراء ليس على حساب الكسرة والملاح والقيم والمباديء حاينط واحد ويقول الجيل بتاعهم مازي جيلنا جيلنا منتهي الصلاحية ولكن على الأقل كان جيل مليء بالقيم والمفاهيم الجميلة انا مثلاً لم تتاح لي الفرصة للعب بالملاهي لأنها كانت شبه محرمة ولكن الحمد لله الآن بقروشي كلما امشي السودان تلقاني معلق في العاب المقرن
06-03-2006, 11:42 PM
ابوحراز ابوحراز
تاريخ التسجيل: 06-27-2002
مجموع المشاركات: 5536
وصلتني الرسالة التالية من الأخت مناهل من الامارات شكرا لك وعلى المشاركة القيمة وشكرا على اهتمامك سأنشر رسالتك كما وصلتني
الأخ الغالي أبو حراز طبعاً أثرني موضوعك جداً لانو بجد أنا استغربت للموضوع ده ...أنا مقيمة في دبي ومشيت الإجازة قبل ستة شهور ما تتخيل اندهشت كيف لمن لقيت كل المستويات شايلة الموبايل ... لا .... ولا اللذيذ في الموضوع انو كل واحد بيشرح في ظروفه وانه الحالة صعبة وهو شايل موبايل من أرقى الموديلات بجد انا كنت في حالة اندهاش لاني لقيت كل الاعمار شايلة يعني طالب الثانوي ... وحتى طالب الابتدائي شايل موبايل (قلته ليهم يا حليل زمان كان الواحد فينا ساندوتش الفطور في تلتله ...) لا ولا المثير في الموضوع انه لو ركبته المواصلات تلقي السواق عنده موبايل ... الكمساري عنده موبايل وكل واحد من الركاب شايل موبايل .. أنا ما بحسد الناس دي عشان شايلين موبايلات لكن بقول المهم ثم الاهم ولا شنو .....
طيب حتقول شنو في واحد 35% من شعبو في معسكرات النازحين واللجؤ يطعمهم الاجنبي بقوت قد تبرع بقيمته اطفال المدارس بامريكا و اروبا يشتري يخت بملايين الدولارات ويعمل قمم فاشلة بنسبة200% بتكلفة تصل120مليون دولار...................
هسع يا ابوحراز إنت لو زول النصيحة تتكلم في الناس البشتروا موبايلات بحر مالهم ( مع اني ما متفق معاهم على عدم ترتيب الاولويات)
واللا الناس الببددوا اموال الدولة والغلابة في حاجات ما عندها معنى ؟؟
لو زعلت كمان ...... واصل في طعن ضل الفيل.... بس اقنعني انك ما شايف الفيل...!!
ياهو كلامنا البنقصده لو ما الفشخرة دي ماكان ناسنا اكلوا تبرعات اطفال المدارس في أمريكا ايهما أولى أن تشتري موبايل أم تتبرع بحق الموبايل للبسطاء والمعدمين من الناس وبدل ما أطفالنا ونساءنا ياكلوا من الخبز الأمريكي ليش مانرمي جوالاتنا في ملاية واحدة وكوم واحد ونبيعها عشان هؤلاء المحرومين انا انتقد اي ظاهرة في بلدي أراها سيئة ولو كنت تقرا لي لعرفت ذلك لايهمني حكومة ولاغيره فقط يهمني البسطاء من الناس ويهمني أن يقف وطني على قدميه قال فيل قال !!! هو في فيل بحثت عنه في إجازتي الماضية بحديقة الحيوانات قالوا مااااااات !!!
حقيقة قد تطرقت لحيازة الموبايل لكافة الناس بل للطبقة الدنيا منهم و كان من الإمكان التطرق لهدا الموضوع دون تجريح لمشاعر الآخرين بغض النظر عن صفاتهم أو شكلهم الخارجي و الموبايل يا عزيزي اصبح وسيلة للتواصل لكل الطبقات و حتى ست الشاي عندها موبايل لكي تدير عملها و انت اكيد لو عايز شاي بدل ما تطلع في السخانة دي فقط اتصل و اجيك الشاي لحدي عندك. فبالتالي هي استفادت ايضا من الموبايل و يوفر ليها مصاريف لأولادها. زي ما انت استفدت ايضا. و هي ايضا لو لا الموبايل ما كان باعت شايا.
عفواَ اخي ابوحراز ماد`ا تقصد بد`لك؟ هل يعني الواحدة سروالها مقدود و لا شنو و انشاءالله انا اكون فاهمة غلط و إلا...!
هل تعلم انو السروالو مقدود دة ممكن يكون حفار ابيار او اي مهنة تانية و في النهاية يؤدي عملوا و ممكن يوم انت تتصل بيهوا في الموبايل عشان يجى ينضف ليكم السايفون من ..... و في النهاية انت احتجت لي ابو سروال مقدود دة.
يعني مش كان تشوف ليك عنوان احسن من كدة.
يعني ممكن كان تتناول الموضوع بطريقة افضل مك كدة و بل بعنوان اجمل بكتير لكن ما في داعى لإسأة و تجريح مشاعر الآخرين بالطريقة دي و نحن السودانيين ما بنرضى واحد يقروا بي قدامنا فم بالك لما انت تحقر الناس وسط كل هؤلاء الناس قال تعالى (و لا يسخر قوم من قوم عسى ان يكونوا خيراَ منهم الخ....) صدق الله العظيم.
اولاَ: و يجب ألا نستقل البورد دة للمهاترات و سفاسف الأمور التي لا تسمن و لا تغني من جوع.
ثانياَ: يجب ألا نشر غسيلنا (السودانيون) في الحبل كدة و لكل من هب و دب يقرا و يسخر منناو انت تعلم مصدر سخرية الخليجيون بالجنس السوداني فإدا ما احترمنا بعضنا و تكاتفنا فلن يحترمنا الآخرون.
ثالثاً انا بطلع على كثير من المواقع لكن ما حصل شفتة زى المهاترات و المشاحنات دى.
و آخيرا و ليس آخرا اتمنى أن تكون فهمتنى صاح وان اخطأت فلنفسي و ان اصبت فعليها و الله من وراء القصد. و الله المستعان...
Quote: حقيقة قد تطرقت لحيازة الموبايل لكافة الناس بل للطبقة الدنيا منهم و كان من الإمكان التطرق لهدا الموضوع دون تجريح لمشاعر الآخرين بغض النظر عن صفاتهم أو شكلهم الخارجي و الموبايل يا عزيزي اصبح وسيلة للتواصل لكل الطبقات و حتى ست الشاي
أنا هنا انتقد ظاهرة وحديثي ليس موجهاً للشريحة المقتدرة أنا اريد أن اتحدث من زاوية معينة فلا يهمني شكل الإنسان ولونه وطريقة لبسه بل يهمني أن يوجه هذا الانسان امكانياته البسيطة للشيء المهم وبعد ذلك ليشتري ما يشاء 00 أما اولئك المقتدرين فليشتروا من الموبايلات ماطاب لهم مثنى وثلاث ورباع 00 انا انتقد الذين لايملكون قوت يومهم ويتطلعون لأشياء ليست ذات أهمية تذكر
ومادام ست الشاي تعمل بعرق جبينها وهذا الموبايل يساعد في زيادة دخلها اذن لماذا لاتستخدم الموبايل وهنا يبدو رجعت أنت لحديثي فاذا كان الموبايل يساعد في زيادة دخل الأسر الفقيرة فأهلاً به وهذا ماقصدناه ورمينا اليه اما اذا كان استعمال الموبايل يشكل عبئاً اضافيا على الأسر الفقيرة فليذهب الى الجحيم 0 ويبدو يا أخي أنه قد تشابه عليك البقر فأنا أخذت الموضوع من زاوية وأنت أخذته من زاوية أخرى 00 وأكررها لك مرة أخرى اذا كان الموبايل مصدر دخل حلال ويساعد الأسرة في تربية ابنائها ورفع مستواهم المعيشي فأتمنى في هذه الحالة أن يكون لكل فرد في بلادي موبايل أما اذا كان لزوم الفشخرة والقشور والكلام الفاضي فماذا نريد منه يكفينا ما بنا 0 وذكرت لك أنني استفدت من هذا الموبايل كثيرا في أعمال خاصة ساعدتني في توفير مصاريف اسرتي لكن الشريحة الكبيرة من البسطاء والفقراء السودانيين لايضيف لهم الموبايل الا الأعباء المالية التي يجب أن توظف في الدراسة والعلاج والدواء 0 ما أود أن اصل اليه أن يكون حامل هذا الموبايل قادر على شراء البطارية وشحن الموبايل ببطاقات الاتصال وغير ذلك لا أن يطلب من والده هذا الشيء 00 والأجمل من كل ذلك أن يكون هذا الموبايل نعمة على الأسرة يزيد من دخلها كلما { رن } !!!
Quote: هل تعلم انو السروالو مقدود دة ممكن يكون حفار ابيار او اي مهنة تانية و في النهاية يؤدي عملوا و ممكن يوم انت تتصل بيهوا في الموبايل عشان يجى ينضف ليكم السايفون من ..... و في النهاية انت احتجت لي ابو سروال مقدود دة.
طبعاً أول شيء اطمئنك اننا ماعندنا سايفون بل الواحد يشيل ابريقه ويمشي وحتى حيطة { الادبخانة } قصيرة جدا ولو زرتنا وقعدت فيها ممكن كل الناس تجي تسلم عليك 00 لكن يمكن زدنا الحيطة من دخل الموبايل وخليناها مستورة شوية ولما قلنا سرواله مقدود هذا يعني أنه لايهتم بالأولويات 00 لم تفهم المغزى جيداً من اختيار العنوان والمقصود أنه يجب الاهتمام بالأولويات 00 يعني في رايك ايهما أحسن هل اذا كنت امتلك مائة الف جنيه مثلاً هل الصحيح أن اشتري بها سروال أم اشتري بيها موبايل ؟؟؟
Quote: اولاَ: و يجب ألا نستقل البورد دة للمهاترات و سفاسف الأمور التي لا تسمن و لا تغني من جوع.
ثانياَ: يجب ألا نشر غسيلنا (السودانيون) في الحبل كدة و لكل من هب و دب يقرا و يسخر منناو انت تعلم مصدر سخرية الخليجيون بالجنس السوداني فإدا ما احترمنا بعضنا و تكاتفنا فلن يحترمنا الآخرون.
ثالثاً انا بطلع على كثير من المواقع لكن ما حصل شفتة زى المهاترات و المشاحنات دى.
هذا رايك وانت حر فيما تقول والذي تراه انت سفاسف أنا اراه ظاهرة يجب أن تعالج وأن يتم استئصالها حتى لايعوج المجتمع 00 معنى ذلك أنني لن استطيع أن اكتب موضوعي الذي أعد اليه وهو ظاهرة كثرة السودانيات بالسجون السعودية وهي من الظواهر التي اعتبرها دخيلة علينا ويجب أن تعالج 00 كما يبدو أنك لم تسمع بقصة المراة السودانية التي كاتنت تشحذ في باب شريف بجدة وصفعتها على وجهها حيث اتضح لي أنها غير سودانية وانما تستغل طيبتنا وبراءاتنا العويرة أحيانا في سكب دموعنا ودر عواطفنا حتى هذه الطيبة الزائدة من اللازم تعتبر ظاهرة سيئة ولابد من التطرق اليها ومعالجتها ولايعني التطرق اليها أننا ننشر في غسيلنا على الملأ 00 وأين هذه المهاترات التي تتحدث عنها 00 ابوحراز أكبر من هذه الأمور وهي ليست من اختصاصنا !!!!
وهل انتقاد الظواهر السلبية يعتبر نشر غسيل 00 وهل انتقادنا اليها يحد من تكاتفنا واحترامنا لبعضنا 00 واذا كنت تطلع على الكثير من المواقع فنحن نفخر كثيرا بموقع سودانيز أو ن لاين لأن واحدة فقط من ايجابياته المليون أسمحت لك بأن تقول رأيك بحرية وصراحة وانا اتقبل رأيك بكل رحابة صدر وأحترمه
06-04-2006, 08:30 AM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
حقيقة انا لا انتقد تناولك للموضوع بل اشد من ازرك لكن فقط كما اسلفت لك كان تعمل عنوان افضل من العملتوا و على العموم هو موضوع شيق و انا استمعت بيهوا و فعلاً الموبايل قاصمة ظهر لبعض الأسر لكن زي ما قلت انوا فشخرة و بوبار لكن دة حال السودانيين اعمى و مسكوا العكاز.
Quote: هذا رايك وانت حر فيما تقول والذي تراه انت سفاسف أنا اراه ظاهرة يجب أن تعالج وأن يتم استئصالها حتى لايعوج المجتمع 00 معنى ذلك أنني لن استطيع أن اكتب موضوعي الذي أعد اليه وهو ظاهرة كثرة السودانيات بالسجون السعودية وهي من الظواهر التي اعتبرها دخيلة علينا ويجب أن تعالج 00 كما يبدو أنك لم تسمع بقصة المراة السودانية التي كاتنت تشحذ في باب شريف بجدة وصفعتها على وجهها حيث اتضح لي أنها غير سودانيةQUOTE]
و لاتنسى انوا هنالك شريحة من السودانيون غزت الخليج في الفترة الأخيرة و أسأءوا لتاريخ اسلافنا المغتربين و بالتالي نتج عن د`لك عدم رغبة في توظيف الأيدي العاملة السودانية. كما اعجبني تصرفك بأنك صفعت تلك التي تدعي انها سودانية و مثل هؤلاء هنا في الإمارات كثر بل حتى على سوق الدعارة و العياز بالله لكن القانون هنا صعب جداً كما يقولون للبنت مطلق الحرية مع من تمشي أو .... إلا إد`ا ما استنجدت و طلبت النجدة لكن لو كان عملته كدة هنا بتكون الصباح في السودان. اليك القصة دي:
سوداني مشى سكر في أماعجمان و جا الشارقة و طبعا فيها شريعة قبضوا الدورية ملطط اصبح الصباح لقى نفسوا في السودان.. سألوا الحاصل شنو يازول.. قال ليهم شيخ يسكر و التاني يسفر.
Quote: وأين هذه المهاترات التي تتحدث عنها 00 ابوحراز أكبر من هذه الأمور وهي ليست من اختصاصنا !!!!
انا هنا كلامي موجهوا للجميع و لم اقصدك يا ابوحراز. و من ردود الأخوان ليك عرفتك انسان فعال في البورد دة
وشكرا,,,
هيثم القوز
06-04-2006, 09:47 AM
محمد الامين احمد محمد الامين احمد
تاريخ التسجيل: 08-28-2004
مجموع المشاركات: 5124
Haytham Abdulaziz لك التحية على تقبلك لقلمي الساخر ولك التحية على المشاركة وعلى رأيك ياخوي انت من ياتو قوز ؟؟ عندي خالي معلم نقلوه حتة اسمها قوز محمد نور بعد ستة شهور ودوه قوز السلام جات الاجازة قالوا ليهو منقول قوز الرفة بعد 3 شهور ناداه مدير التعليم في الحصاحيصا وقال ليهو نقلناك قوز بانقا قام قال ليهم ياجماعة انتو مفتكرني أنا { زد واي } ؟؟؟
طبعاً قريتنا من قرى اهل العوض قرية بسيطة جداً ومليئة بالجمال يوم جات واحدة لإدارة التعليم في مدني تصور معلمةجميلة جداً ومن عائلة غنية جداً وكانت جات عاوزة اجازة عشان تسافر رحلة لإسبانيا مدير التعليم من شافها قال ليها والله القلوب لبعضها هسي دي كنا بنتكلم في سيرتك قالت ليهو في شنو ؟؟ قال ليها نقلناك ودربيعة !!!! قالت ليهو والله مادام الحكاية جابت ليها ودربيعة التدريس دا زاتو خليناهو قال ودربيعة قال !!!
06-08-2006, 05:17 PM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
انا من القوز و هو حي شهير في الخرطوم و لو بتسمع بلاعب المريخ السابق عاطف القوز. يعني وراء ابوحمامة و الحلة الجديدة. اها ما تنسى انو الكابلي غنى لينا و قال شالوا السيدة و خلوا حرم يا ناس القوز علينا ظلم. و كمان اغنية الحقيبة المشهورة في القوز ما نسينا و في القوز ليس نجهل
اها قريبك دة ما كان يجيبوا لينا هسع كان بقى لاعب كورة و لا شاعر او فنان حقيبة.
مع فائق ودي و تقديري.
اخوك/ هيثم القوز
06-23-2006, 11:56 PM
ابوحراز ابوحراز
تاريخ التسجيل: 06-27-2002
مجموع المشاركات: 5536
أولاً لم ار ردك هذا الا اليوم آآآآآآسف لتأخير الرد عليك واشكرك على الاهتمام أكاد أجزم يا أخي بان المدن لها دور كبير في تنمية الموهبة فهناك مواهب مدفونة وميتة ومقبورة بالقرى ولو وجدت حظها فإنها كان ستنطلق وتنمو وتسمو لكنهم لم يتركوا قراهم وظلوا يسيرون على نفس الدرب الذي يسير عليه جدودهم المنقرضين خالي هذا لديه هوايات كثيرة جداً في الرسم والشعر والخط العربي وأكثر هواية عنده أكرهها جداً أنه كثير التعارف يعني لو وجد اي انسان لابد أن يتعرف عليه ويعرفه من اين وابوه مين وجده مين وأمه مين أذكر مرة وقفت معه بجوار كافتيريا بالقضارف وشربت انا وكان هو كعادته يتعرف على أحدهم المهم بعد أن أتى قلت له اذهب للكافتيريا لتشرب عصير فمكث أكثر من ساعة وأنا في انتظاره وعندما حضر قال لي : الزول دا قريبك شديد يقصد بتاع الكافتيريا المهم في الآخر بتاع الكافتيريا رجع لينا قروشنا على مضض هذا الخال المخضرم الآن حمل كل الهوايات الى مثواها الآخير وبدأ يبيع في البصل بعد دراسة بخت الرضا ودبلومات وكورسات وتدريس استمر لمدة 35 عاماً فلو كان في القوز بتاعتكم كان اقل شيء كل اسبوع نزوره بجركانة سمن
06-25-2006, 04:11 AM
Haytham Abdulaziz Haytham Abdulaziz
تاريخ التسجيل: 05-28-2006
مجموع المشاركات: 2899
لا عليك يا صديقي إنها مشاغل الحياة التي دعتك ان لا تنتبه لمروري بل يكفي إعتذارك الرقيق الممزوج بالود و التقدير (لقد خلقنا الإنسان في كبد) و من معنى هذه الآية إنها معاناة شديدة حتى يكدح الإنسان لتوفير لقمة العيش لإهله و هانذا اكدح و أحلق من خارج سرب وطننا الحبيب و عسى و لعل أن يلتم شملنا عما قريب في أرض الحبيب،
بـلادي و إن جارت عليا عزيزةُ .... و أهلي وإن ضنوا عليا كــــرام
و بالرغم من ان البيت هذا لا ينطبق علي لكن فقط أردت التمسك بحبل الصبر و المدارة خجلاَ من المستقبل المظلم،،،،
كل الحب،،،،
هيثم القوز،،،
06-04-2006, 09:23 AM
Tragie Mustafa Tragie Mustafa
تاريخ التسجيل: 03-29-2005
مجموع المشاركات: 49964
الأستاذة المخضرمة تراجي يعني بعد الفصاحة دي كلها وطووووووووول اللسان طلعتي ماعندك موبايل والأدهى والأمر إنك في كندا ما في بوركينا فاسو !!! تعرفي فعلاً نوعك دا بينظروا ليهو الناس هناك في السودان انه متخلف والله لو شفتي مناسبات العزاء في السودان تضحكي لامن تموتي الواحدة شايلة شنطة يد مش كان مفروض تدس جوال السجم والرماد دا فيها ؟؟ أول ماتصل ناس البكاء عليك أمان الله تشيله في يدها غايتو عالم محتاجة لعيادات نفسية والله انا ماتشوفي فصاحتي دي مابعرف اي شيء عن أنواع الموبايلات وموديلاتها حتى التاريخ والساعة بعملوها كيف ماعارف ومن يوم اشتريته فيهو نغمة واحدة الجماعة سموه الموبايل المعاق بعدين ياويلك لو جيت من بلد الاغتراب ومعاك جوال { الطوبة } الحلة كلها تضحك عليك والغريب لمن تجي تشيل الفاتحة طوالي تسمع نور العين شغالة في جيبك
06-03-2006, 06:33 AM
Al-Shaygi Al-Shaygi
تاريخ التسجيل: 11-16-2002
مجموع المشاركات: 7904
والله موضوعك ده مش هبش اللحم الحي .. ده فاته غادي للعضام والمخ..
شوف موضوع الفشخرة الفارغة حقتنا دي ما وليدة عصر الموبايل فقط.
زمان لامن قرينا في بلاد أولاد بمبه كان كثير من الطلبة تنطبق عليهم حكاية صاحبك أبو سروال مقدود، أي والله السروال مقدود وما عنده جاكت صوف للشتاء البارد الما زي حق السودان البجي الصباح وطلعت الشمس تسخن. وبعد ده كله يمشوا البار يشتروا كم قزازة لقضاء السهرة ووالله حق العشاء يكون ما في وبعد الشربة والمزاج يقوموا على المطبخ وهاك يا باقي البصل واحدة قشرة والثانية معطونة ومنتنة ويلموا باقي الرغيف الناشف وكان في باقي علبة صلصة ناشفة وروحها طالعة حكوها وهاك يا حلة السخينة والشي بتبقى بلغ ساكت بدون مضغ عشان العجاج والتراب الممزوج بالرغيف الناشف والذي منه ما يضرس الجماعة وكمان لزوم ظلت أكبر كمية في أقصر وقت لقلة الكمية وكثرة الأيادي المتناحرة على حبيبة السخينة.
والغريب أنه في مثل مصري على وزن السروال المقدود والفشخرة: عريان الط.... يحب التهميز ويقول باب الخمارة منين؟؟؟؟. أعتقد أن هذا المثل ينطبق على الكثيرين شعبنا الكوكب!!!!
جني والله ماعارف أنا الجماعة ديل زهجان منهم كيف هسي لو باعوا موبايل واحد مش حايحفر الشغلانية دي ؟؟ بعدين خلاف ذلك أخذت هذه الموبايلات جزءاً كبيرا من وقت الناس وأشغلتهم عن أداء أعمالهم الأساسية والمشكلة زادت من كذبنا قبل فترة في السودان واحدة ابوها متصل عليها قال ليها وين يا بتي وكانت واقفة معاي قالت ليهو انا في المستشفى قال ليها انا قاعد وزرت الزول المريض وقال لي بنتك مازارتني
06-04-2006, 04:21 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
أخي الشايقي والله ياليت نسيب الفشخرة الفاضية والتي اودت بالكثير من السودانيين الى الحضيض شوف أغلب المغتربين في السعودية فاشلين ويكاد 90% منهم ماعندهم بيوت في السودان وتأتي الفشخرة على رأس هذه الأسباب في هذا الفشل المريع 0 السوداني هنا لازم يستأجر بيت كبير تقول حايظل هنا للأبد ولازم ثلاثة حمامات وملايات من الهند والعجب ست النفر لمن تكون عاوزة ترجع السودان حدث ولا حرج تخم الدنيا كلها لانضع حساب لأي ظروف يمكن قد تحدث والموت هنا بالنسبة للرجل بالذات مرات عطسة بس تجيب أجلك لأنو كل واحد ضغط وسكري وهلمحجرا علينا أن نعيش واقعنا وأن نترك الفشخرة طبعاً أنا على رأس هؤلاء والله عندما اود السفر أخم الدنيا كلها معاي وأمشي الاجازة وأأتي لأبدأ من الصفر الى متى تظل هذه الفشخرة معشعشة في عقولنا ؟؟
06-04-2006, 00:04 AM
Ahmed Daoud Ahmed Daoud
تاريخ التسجيل: 01-30-2004
مجموع المشاركات: 755
لك الحق في ما ذكرته ..مشكلتنا يا أخي ترتيب اولويات في السودان لا تستطيع ان تخطط لشئ وتنفذ ما تريد وحسب جدول معين لابد من التقاطعات والمفاجآت وبروز غير المتوقع من اوجه الصرف ..والموبايل رغم فوائده الكثيرة فهو "مصيبة" وحلت علي دماغنا فهو يأكل الفلوس في كلام في كلام يمكن ان يكون مليان وكثيره فارغ ومهدر للوقت..والكاسب الوحيد الشركات التي صدعتنا بوسائل الدعاية التي ملأت الشوارع والكباري وكأننا كملنا كل شي وقبلنا علي " النضمي"
06-04-2006, 02:12 AM
مهيرة مهيرة
تاريخ التسجيل: 04-28-2002
مجموع المشاركات: 1122
المشروع العيش ناس السودان وقرى حمدى جامعة الخرطوم بالمجان!!!
يعنى على قول مارى انطوانيت:
اذا ما عندهم رغيف ليه ما ياكلوا كيك!
حقيقة كلامك يا اب حراز: من أسوا عادات السودانيين من تيسهم لى متيوسهم الفشخرة فى الفاضى، عليك الله مؤسسة الرئاسة محتاجة لى يخت ملكى؟؟ ولا لى قطر عجيب البودى ما يجيب؟!! عارف اكتر شى غايظنى السودانيات المغتربات يقولن ليك: والله ولدى (او بتى) فى الجامعة فى السودان ضربت تلفون وقالت لى ابوها: يابابا رسل لى موبايل الدمعة آخر موديل سريع جدا!! زى دى طبعا انا لا بحترمها ولا بحترم اللى خلفوها، وبحترم ست الشاى البتستخدم الموبايل من أجل زيادة دخلها البعيشوا منه اولادها. السودانيين دائماباقى عليهم الجديد شديد، هم قايلين الموبايل دة اخترعوه للونسة والفشخرة، أهله الاخترعوه زاتهم ما بتونسوا بيه!!
مهيرة الامكانات الموجودة بالسودان قادرة على شراء كل شيء والخامات والموارد الموجودة في بلادنا لو تم توظيفها جيدا لما بقي جائع واحد بلد مليئة بالخضرة والجمال ومليئة بالأمطار ومليئة بالأنهار ومليئة بالخصوبة مليئة بالعقول النيّرة وحينما تلامس شفاه الخريف خدود أرضها تكون الخضرة على مد البصر وحينما تقف في أي مكان لتزرع فيه نخلة فازرعها وأتركها سرعان ماتجدها قد نمت وربت وترعرعت وآآتت أكلها لكن السودان رغم كل ذلك للأسف فهو مليء بالفساد الإداري أنظمة وقوانين غير موحدة كل شخص يمثل حكومة قائمة بذاتها انهيار تام في الخدمة المدنية وبروقراطية إجراءات لاحدود لها لما لايكون لنا وعاءً واحداً تصب فيه كل موارد الدولة ؟؟ رسوم كثيرة بلا ايصالات وأحياناً تاخذ الايصال الأصلي ويتم محاسبة الحكومة بصورة الايصال من قبل المندوب مخالفات كثيرة في الطرق وكل عسكري يحمل ايصال مالي 15 لما لاتسجل المخالفة كتابة فقط حتى لايتم فتح ثغرات لضعاف النفوس ؟؟ الخدمة المدنية تحتاج لصياغة حتى لاتصاب بالترهل وتدخل لغرفة العناية المركزة ونظريات الحكم المحلي نظريات قديمة ومهترئة وهي لاتصلح في بلد كالسودان غالبية المشاريع بلا تخطيط ولاتضع الجوانب الفنية والمستقبلية لهذه المشاريع حتى ان هناك الآن بعض الجوانب والآثار النفسية والاجتماعية التي واجهت المسئولين بعد تنفيذ سد مروي حتى هذه كان يجب أن توضع في الدراسات لأنها لاتقل أهمية عن الجوانب الفنية للمشروع السودان بلد كبير في عطائه 00 كبير في موارده ومساحته وسماحته ولو تم توظيف كل هذه الأمور فإنني أكاد أجزم بأنه لن يكون هناك فقراء ولن يكون هناك جوعى ولن يكون هناك مرضى ولن يكون هناك مشردون 0 المسئول الكبير عندنا لايحاسب بل ممنوع الاقتراب من 00 يدخل الحكومة ولاحبة كرش ماعنده وبعد شهرين تجد كرشه قد ترهلت 00 والعجب الرقبة تلقى فيها عشرة طيات 00 وأكثر مايغيظني تكون هناك قطعة ارض في المخطط يقولون هذه ستكون سوق أو مركز صحي في المستقبل فجأة تصحو من النوم وتلقى الجماعة بيحفروا فيها ولما تسأل بكل بساطة تلقاهم أدوها لواحد مسئول 00 ولو تحدثت في هذه الجوانب فإنني لن أتوقف 00 حتى وزير السياحة مرات يستضيف السياح في بيته ويضبح ليهم !!!! عليك الله دا كلام دا 00 والله لو ترك لي أمر السياحة في وطني فسوف تنمو كل القرى والمدن من دخل السياحة ولن نحتاج الى بترول السائح الأجنبي يدخل للسودان بثلاثة آلاف دولار ويخرج بخمسة آلاف دولار كلما يمر على قرية يضبحوا ليهو غنماية اللبن كلما يدخل مطعم ياكل مجان كلما يمر على سوق التحف يملوا ليه الكيس نعلات وتماسيح ونمور وكرعين ديوك ونحن السودانيين الكمساري يشب ليك في حلقك كان مادفعت قروش المواصلات وزولنا دا لامن يجي يدفع يقولوا له ساااااااااااااااااااااااااااااااانكيو !!! والله سانكيو دي بالعربي كتابتها ظريفة جداً قال سانكيو قال !!! بالله عليكم الله خلونا من الكرم العوير دا عشان السياحة تحقق أهدافها
06-04-2006, 05:03 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
انا بنت النيل التخطيط ينقص كل بيت سوداني والطامة الكبرى أن التخطيط ينقص بلدنا بصورة عامة بعدين هنا مثلاً في السعودية كل شيء بحساب ومقادير وكل شيء يتم بعد دراسة وتمحيص أها انت تقوم تخطط لكل هذه الأشياء خاصة عند السفر وتعمل ميزانيتك على ضوء هذا التخطيط أول ماتصل السودان تفشل كل هذه الخطط فجأة تلقى الحيطة إنفزرت وكأنها كانت في انتظارك حتى حضورك طوالي تلقى أختك تجيك بالليل وتقول ليك بكرة عاوزة أطهر أولادي يجيك عمك شايل كيسه معاه ويقول ليك والله حق الملاح ماعندنا تلقى عربية فجأة واقفة يقولوا ليك ماشين ودربيعة تركب معاهم تدفع حق البوكسي وتدفع لكل الركاب الكشف بتاع المرحوم دا طبعاً بخلاف ظاهرة حفلات التخريج التي بدأت تأخذ طقوساً معينة تأكل الأخضر واليابس في البيت وفي النهاية يتسلل اليك اليأس وتصبح زول طرطور ماشي وراء الناس وماعارف انت بتعمل في شنو والله معليش لكن نحن محتاجين اعادة صياغة في أمور كثيرة جداً علي بالطلاق عندنا سماية عملناها فطور 00 الناس قعدت للفطور والغداء والعشاء وانا أكلت كسرة بي موية ساااااااااي ودسيت راس العجل قلت آكله في الليل أول شيء لقيناها بدون لسان 00 الجزار تاريهو قطع اللسان وشالو البيت تاني شيء جونا { مداح } بالليل أكلوا الراس كلو وخلونا نتلفت اها النوعية دي بالله يخططوا معاها كيف قال تخطيط قال !!!
06-04-2006, 04:59 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
الأخ أحمد داود اعرف ست شاي في مدني دخلها اليومي 40 الف جنيه وهي تستخدم الموبايل مع زبائنها الذين لايستطيعون ترك دكاكينهم ومعاها صبية أخرى تقوم بتوزيع الشاي على هذه المحلات اربعين الف معناها اكثر من مليون جنيه وهذا الدخل لايتوفر حتى لأستاذ جامعي وإن الله { كافاها } شر ناس الضرائب والمحلية ودعم الحجاج والدفاع الشعبي والله ما ساءلة حتى في مدير جامعة بعدين تصدق ست الشاي دي نفسها مشغلة معاها راجل شنبو قدر الكتلة دي بس بيهب ليها النار وبغسل الكبابي بتديه عشرة آلاف في اليوم وعليك أمان الله مبسوط ورايق وحامد وشاكر برضو في واحدة بجوارها بتعمل قراصة القراصة برضو قاعد يعملها عمك أب شنب دا تديك صحنك وانت تمشي عليهو وشغال عواسة بمزاج قال ست شاي قال والله حاولت استثمر في الموضوع دا يعني حاولت كم واحدة كدا عشان انا أوفر ليها { العدة } والموقع وتديني ربع الدخل يعني لو طلع بس 400 الف مش أحسن مما يكون عندك بيت مستأجر ؟؟
06-04-2006, 05:01 AM
james james
تاريخ التسجيل: 06-21-2002
مجموع المشاركات: 2726
آآهه يا اخي ابو حراز ختيت ايدك في الجرح.... اعيش في المانيا وسط بروفسرات وعلماء كلمتهم ذي ناس الحيكومة واكتر مرات والبلد قايمة بشغلهم والله وما طالبني حليفة اغلبهم شايل موبايل تلاتين حشرة وماشابه تسألهم يقولو ليك بقضي شغلتنا ولا لا....تخش محلات الموبايلات تلقي عديل كدة التقسمات بتاع البسنز والعادي وهناك في السودان كلهم شايلين بتاع البسنز وما فوق ...دا يعلمو بهو شنو ما عارفة واغلبهم المميزات الفيهو ما عارفينها.... وشوف قوة العين دي تجي انت من السفر مثلا ويجيك واحد شحط طول بعرض بارتفاع لابس نضيف وما شغال وشايل موبايل ويطلب منك تملاهو ليو لي شنو عشان يقضيهو ونسة مع الجكس او sms فاضي ذي انت الشجرة الرايمة ضلها في بيتنا ومن مساؤه انو عاداتنا بقت تموت ذي في العيد مثلا المباركة بقت بالمس كول اوsms
بت عجاج
06-07-2006, 00:40 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
بت عجاج شكراً لك كثيراً على هذه الصورة الجميلة التي عكستيها لنا من ألمانيا هؤلاء يعرفون كيف يستخدمونه وأكاد أجزم أن 90% منهم لم يشتروا الجوال الا لغرض انجاز أعمالهم وكمان تطرقتي لنقطة مهمة جداً وهي أن الجوال قد بدأ يساعد في اندثار بعض العادات يعني زمان الزيارات كانت تتم باستمرار خاصة للمرضى وغيرهم الآن رغم الوقت الكبير الذي نعديه في الفارغة والمقدودة الا أن الكثيرون منا آثروا الاتصال فقط دون الذهاب للإطمئنان على هذا المريض وأقولها لك بصراحة هنا الواحد ياخد معاه جوال ويكون مبسوط جداً منه اول ماتمشي بيهو السودان يضحكوا عليك كمان شنو ود أختي قال لي ياخال لو كنت في مناسبة عامة وموبايلك { رن } ماتطلعه قدام الناس إما تخليه على الصامت وإما تطلع بعيد عشان ترد على الزول ودا لسه عمره 6 سنوات أظن لو دخل في طور المراهقة مايخلينا ندخل أي حته
06-04-2006, 06:47 AM
Hisham Ibrahim Hisham Ibrahim
تاريخ التسجيل: 02-19-2006
مجموع المشاركات: 3540
موضوع الموبايل ماعندي فيهو حاجه (تعليق) لأنو الجميع كتب وعلق!
أما بخصوص أم ضريوة فهي كانت قرية صغيرة، تقع بالضبط حوالي 13 كيلو متر من المحطة الوسطى بحري وبتكون يمينك وانت ماشي على الجيلي مقابلة الكدرو وزمان كانت قرية يسكنها أهلها، أمااليوم فهي محاصرة من المدينة - الدروشاب والكدرو والنافعاب والمشروع ما بعيد منها! وزمان كانت قرية ما فيها غير بيوت الطين! وأما اليوم فتم تخطيطها وتوزيعها وتوفرت فيها كل الخدمات من مركز صحي وعيادات وأسواق للماشية والخضار وكل عوامل المدينة الصغيرة، وبقت لها مواصلات خاصة من بحري وطبعا دا ما تقول من الحكومة! دا من مجهودات أبنائها فقط! واليوم هي في حلة جميلة غير ما كان في الماضي ويسكنها كثير من أهل الخرطوم وكثير من أهل الأقاليم فيها (وحدة وطنية) واراضيها طارت السماء (اسعارها) وما تبيعه السفارات في الخارج ينسب لحلفاية الملوك التي هي بلد إدريس جماع وعون الشريف قاسم وعوض دكام ولا ينسبونه لأم ضريوة مع العلم أنها جوار لأم ضريوة أو أبعد! (عاوزين يبيعوا أراضيهم). وفي ناس عندهم فيها أراضي وحصلت قيمتها الملايين! ولو عاوز تمشي تشوفها أركب من موقف بحري وطبعا بعد الكدرو على يمينك العربية بتلف وبعد ممكن 1 كلم، بتكون في أم ضريوة. املي أن يلاقي هذا ما تريده وأعلم أنها ليست قرية نافع ولا يحزنون! بل هي قرية غلابة وبسطاء من أهلنا الغبش أعانهم الله في وعلى حياتهم!!
هشام ابراهيم
06-07-2006, 00:42 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
أخي هشام ابراهيم لك التحية من أعماقي ولكل أهل أم ضريوة وشكراً كثيرا على هذه الصورة الجميلة الرائعة عن هذه القرية الوديعة لقد شوقتني لزيارتها وأوعدك باذن الله بانني سأذهب اليها في اجازتي فهي قد الهمتني الكثير من العشق دون أن أراها
06-05-2006, 02:55 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
جيمس عاوز تلحقنا جدودنا 00 جدودنا كانوا على الفطرة الواحد منهم ما بيلبس سروال نهائي طبعاً عادي الكلام دا عندهم بالنهار وبالليل ماعارف بيكونوا كيف ؟؟ المهم يوم جانا مادح بعد الساعة 11 بالليل وجدودنا وأعمامنا ديل الواحد من بعد صلاة العشاء بياخد الحاجة الفيها النصيب وبيشرب كورة اللبن وهاك يانومة تاني والله مايصحى الا صلاة الصبح أها ابوي قال لي تمشي تصحي جدودك ديل وأعمامك تقول ليهم المادح سليمان معانا في البيت والمادح سليمان دا رجل ظريف جداً من قرية اسمها { الرضي } غرب المناقل أها لقيتهم ليك كلهم ممسحين والواحد ماتفرز كراعه من كراع العنقريب صحيتهم واحد واحد وكل واحد فيهم بس لفح توبه وجو قعدوا في واطاة الله دي للمادح المادح فجأة قطع المديح لمن عاين ولقاهم كلهم { 12 } بدون سراويل قام قال لأبوي يازول هووووووووي انتو جايبني أمدح وللا جايبني { أطهّر } قال مصر المؤمنة قال !!!
واحد منهم جانا الحج والله كرهنا حياتنا وقربنا نخلي ليهو الصفا والمروة ونرجع طوالي ينصل منه الإحرام التحت بس كلفوني كل ما ينصل اربطو ليهو من جديد شوف ليك فشخرة مرات يزعل لمن اربط ليهو الإحرام صاحبك قايل الحكاية فاكة ساكت زي هناك وأخيراً دخل حمامات النسوان ومالقيناه الا بعد 21 يوم وبرضو جانا بدون سروال !!!
06-06-2006, 11:42 PM
ابوحراز ابوحراز
تاريخ التسجيل: 06-27-2002
مجموع المشاركات: 5536
وصلتني هذه الرسالة من أخ فاضل من جدة أحب أن أنشرها لكم للفائدة
الأخ أبو حراز التحية لك ولضيوفك وبخصوص الموبايل كنا في مكة قبل كم سنة والجوال الوكت داك جديد والإنغاذ حديد أها قام جانا زول عمك كبير في السن وربنا يشفيه لو بقى حي لي هسي عندو شوية سلك عريان قمنا سألناهو من السودان يا عم السودان وناس السودان كيف؟؟؟ قال تعرفوا يا جماعة والله في السودان الناس بقوا مجموعتين :- ناس يتكلموا بالجوال وناس يتكلموا ساكت.....
المهم يا أبو حراز كان الناس الوكت داك حسب وصف عمنا داك
بس الليلة ما عارف كيف وخوفي من يبطلوا الكلام ذاتو والحير ة تكتلم
خالد عثمان محمود جدة
06-04-2006, 06:30 AM
JAD JAD
تاريخ التسجيل: 02-05-2002
مجموع المشاركات: 4768
جاد كمان عاوز أقول ليك حاجة غريبة جداً أنا أي زول سرواله مقدود ماقاعد أصاحبه نهائي !!! دي طبعاً وصية من جدنا قال لينا زول سرواله مقدود ماتصاحبوه والغريب هو سروال ماعنده نهائي ولما نسأله يقول أخير عديل الزول يكون مالابس من الزول يكون سرواله مقدود بالله شوف الحكمة الصينية الجميلة دي
06-04-2006, 08:36 AM
almulaomar almulaomar
تاريخ التسجيل: 07-08-2002
مجموع المشاركات: 6485
ظريفنا أب حراز يا أخي ما للدرجة دي نص البلد قدر ظروفك ونص النص الفضل أهل عوض والربع فنجاطات وحراميه وانت حارقك الموبايل ولا المس كول ، وما سمعت بي شاعر الدوبيت الكبير حين قال: الليييييييييييـيييييييييييييييل (ودي لازم تجرها صباحي بلا حظر تجول بلا هم) أكان كتر الرصيد الزول بكلم زولو وإن قل الرصيد البركة في مس كولو شن قل الرصيد البركة في مس كولو البركة في مس كولو وإن قل الرصيد البركة في مس كولو
أبشر بالخير يا أب حراز يا أخوي
06-07-2006, 00:50 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
الله يجازيك ياملا ياعمر حلو الدوبيت بتاع الموبايل وحلوة نكتة الامام طبعاً زمان أئمة المساجد اول ماتقيف في الصف يقولوا ليك أتموا الصف الأول فالأول حاذوا بين المناكب والأقدام سدوا { الفرج } حتى لايدخل الشيطان بينكم الآن زادوا ليها نغمة جديدة سكروا الجوالات !!! قبل كم يوم الإمام كان زعلان جداً لأن واحد من المصليين قبل بداية الصلاة يمكن جواله { رن } عشرة مرات أها الامام قال ليهم ياجماعة ماتشغلوا الناس عن صلاتهم ولازم تقفلوا جوالاتكم أو تتركوها في المنازل أها أول من الإمام قال الله أكبر كان الموبايل بتاع الامام قد يرن !!!
06-04-2006, 09:54 AM
محمد الامين احمد محمد الامين احمد
تاريخ التسجيل: 08-28-2004
مجموع المشاركات: 5124
أشكركم بحرارة على هذه المساهمات القيمة وقد خففتم الكثير من احزاننا خاصة وأن الراتب يأتي من هنا ويخرج من هنا وكثيراً عندما يلمس الانسان جيبه ويجده خاوياً يصاب بالكثير من الحزن والألم لما لا وقد كان مديرنا بالمرحلة الابتدائية لايضحك الا نهاية الشهر وكنا نستفيد من هذه الخاصية ولانمازحه الا في ذلك اليوم وبعد ذلك ننتظر الشهر التالي على مضض
اشكر بحرارة ايضاً كل الأخوة الذين عرفني بهم هذا البوست المتواضع كل اولئك الذين اتصلوا سواء من أعضاء سودانيز أو القراء غير الأعضاء كلماتكم أثلجت صدري وأصواتكم الندية تركت في أعماقي الكثير من الضوء لكم التحية ولكل المشاركين انتظر ياجيمس حارد ليك هسي قال مقدود قال انت بس شاطر في السراويل من يوم ما عرست تاني ماقامت ليك قايمة !!!
06-05-2006, 03:51 AM
james james
تاريخ التسجيل: 06-21-2002
مجموع المشاركات: 2726
أخي محمد الأمين شكراً على المس كول قبل فترة واحد اتصل على شخصي وقال لي انت اتصلت علي قبل شوية فقلت ليه والله ما اتصلت جايز انت ضربت الرقم خطأ كمان قال شنو : قال لي والله وصلتني منك باقة زهور وحبيت أشكرك عليها قلت ليهو انت راجل مش قال آآآآه قلت ليه يا أخي أنا مجنون ارسل ليك باقة زهور !!! شوف بالله باقة الزهور الغبيانة دي كيف ضلت طريقها ؟؟؟ !!
06-06-2006, 00:33 AM
almulaomar almulaomar
تاريخ التسجيل: 07-08-2002
مجموع المشاركات: 6485
أخي أب حراز قالوا الله يكفينا شر القواله أن إماماًً إعتلى المنبر وهو يخطب في الناس فإذا بأحد أصدقائه يعمل ليهو مسكول ، فنظر الإمام إلى هاتفه النقال ثم عبس وبسر ونظر إلى المصلين وقال "أيها الناس أبو رنه ما بيدخل الجنه"
06-06-2006, 03:53 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 27685
الحبيب الغالي تفاحة البورد المتوهجة دوماً سلامي وتحياتي لك ولست النفر الخلتك تتطلع الدرر دي تعرف قصة الموبايل الكلو زول شايلو ما نافعة إلا مع ناس شركات الاتصالات والوكلاء بتاع الموبايلات تتخيل قبل فترة رسلت تلفون لواحد وهو في نظري حديث جداً بالمقارنة مع الأجهزة الشايلنها معنا هنا تعرف رسالة لي رسالة قال لي ياخي ما لقيت غير الموديل القديم دا ياخي دا ستات الشاي غيرنوا ترسلوا لي انا وفي نهاية الرسالة بقول شكراً عليك الله عينة دا تقول ليهو شنو والله موبايلي الشايلو أقدم من الرسلتو ليهو تعرف دي ذكرتني الزول البقول ليك رسلو فيزا وتحاول بقدر المستطاع اقناعه انو مجال الشغل محدد والفرص ضيقة جداً والوظائف محدودة ومن مثل هذا الحديث يقول ليك بس انت رسل لي وتاني يحلها الف حلال بس أنا البحلني منك شنو ياشقي الحال ويجي ويتفأجا الواحد ويصطدم بالواقع إلا بعد مشاهدته يعني لو قلت ليهو انا شايل تلفون صفقة ياخي انت من زمن الصفقة جاءت موديلات جديدة وعجيبة وما يصدقك كلو كلو دا تعمل ليهو شنو بالله
عليك الله تاني ما تجيب لي تاني سيرة البحر (انت عارفو)
06-10-2006, 04:57 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
أخي ابراهيم علي قال ست النفر خلتك تطلع درر قال !!! دا كان زمان يامان ايام الخطوبة والله هسي { تبشه } مانقدر نطلعها ساعتين حرد وساعتين زعل وساعتين مد بوز ومثلها ساعتين كرفسة ساي بلا شغلة يعني مرات ماتصدق تلقى ليك ساعتين فيهم أريحية شوية اها في الساعتين دي تستغل الظروف وتقضي على اليابس والأخضر لكن ياويلك لو في هاتين الساعتين سمعت ليها صوت بكاء على بالطلاق تلفح توبها وتخليك تتلفت !!! وريالتك سايله وماعليك الا تلحقها وتمشي تشيل الفاتحة على المرحوم لكن أنا في لحظات زي دي أول زول يقابلني من اهل البكاء بقلده وببكي معاه !!! طبعاً اكيد مش عشان المرحوم عشان الاجازة المهببة دي وكل يوم يضيع منها يوم !!!! والغريب المغتربين ونسوانهم كل شيء مايحلو ليهم الا لمن الاجازة تكون في الرمق الأخير الجرسة يمين وشمال وكل يوم تكثر جرعات الكلام المعسول عشان كدا أتمنى أن نجعل حياتنا مليئة بالحب مليئة بالأمل والضوء والرحيق وأن نعيش يومنا بكل تفاصيله وأن نزرع الابتسامة في من نحب نزرعها على خديها وشفتيها نزرعها على قلبها الرقيق لتتحول فصيلة دمها الى فصيلة من الثقة والعشق
06-09-2006, 11:38 PM
ابوحراز ابوحراز
تاريخ التسجيل: 06-27-2002
مجموع المشاركات: 5536
أخي حيدر شكرا للمشاركة القيمة جداً طبعاً الغرابة ليس في إنو الواحد يكون معاه موبايل وليس هذا قصدي الغرابة في ان الواحد ماعنده حق قفة الملاح ويتبوبر ويتفشخر
abdalla BABIKER لك التحية على المشاركة طبعاً لم أدخل الى هذا البوست منذ فترة واعتبرت أن مدة صلاحيته انتهت شكرا على الكلام الجميل والساخر وياهو دا المثل { السوداني لمن يفتح بجيب لأهله بلية } يعني أنا كنت مستغرب في السعوديين الواحد ما{ يدق } الجرس ويتصل عليك وهو جوار الباب مباشرة أها جماعتنا ديل عملوها داخل البص وهزموا السعوديين 8 / صفر والله اليومين ديل ناس السودان قادين أضنينا بموبايل جديد اسمه سوداني كل واحد يقول ليك رسل مائة الف عشان اشتري موبايل سوداني الغريب انو واحد من أصدقائي قال خطيبته خيرته بين احضار الموبايل أو اعطائه كارت أحمر والراجل ظروفه صعبة جداً وميت موت في الشافعة دي هسي قبل يومين أرسلت ليهو موبايل سامسونغ مستعمل هم يحبوا ونحن نرسل الموبايلات قال خطيبة قال
06-19-2006, 11:54 PM
ابوحراز ابوحراز
تاريخ التسجيل: 06-27-2002
مجموع المشاركات: 5536
كثير من الرسائل تصلني حول موضوع الموبايل ومنها مايطلب اصحابه عدم نشره لأنها على شكل نكات خاصة وأستأذن في نشر هذه الرسالة واشكر صاحبها مقدماً على اهتمامه بالموضوع
الاخ الكريم ابو حراز
السلام عليكم ورحمة الله وبركاته
حقيقة موضوع الموبايل اثارني جدا وكلامك كلو صحيح مية بالمية ومشكلتنا بقت انو الشعب السوداني شعب تفاخري وفي الفاضي
هي مسألة نفسية مافي شك لانو دائما الماعندو بيعمل فيها عندو من باب خداع الذات لكن في النهاية العرجة لمراحة ، انا بعرف واحد
كان مؤجر بيت ب500 الف وعندو عفش اتخن مغترب ما عندو وعندو سيارة ومدخل اولادو في مدارس خاصة وهو موظف دولة في الجمارك
يعني لو راتبه 5 مليون ما يقضيهو ويحب الفشخرة بكل معانيها ولكن في النهاية اودت به للسجن وهذا حال كل واحد عايز يتبوبر
اتمني من الله صلاح الحال والغريب يا ابو حراز الناس العندها والقادره تشتري والله ما شايلين جوالات ولاسايقين عربات والامثله كثيرة
ده معناه شنو عليك الله ؟ الرجاء الرد ياابوحراز
اخوك
محمد صلاح
جدة ياليتنا أخي محمد نترك هذه الفشخرة ونتجه لما هو أهم نحن مازلنا تنقصنا ابسط مقومات الحياة ويجب أن لانقع في الأخطاء التي سبقنا عليها الآخرون يجب أن نرسم أرضية جيدة للسودان الاقتصادي لنوفر ابسط مقومات الحياة ونترك التنظير الذي جلب لنا كل البلوى تجد منشكلة في بوركينا فاسو ولو دخلت على اي مجتمع تجدهم يبحثون في حلهه في السودان يتهزم المريخ 4 / صفر ويناقشون اخفاقات مدرب برشلونة نحن بصراحة نحتاج لوقفة مع النفس حتى يقف وطننا على قدميه
06-20-2006, 01:29 AM
willeim andrea willeim andrea
تاريخ التسجيل: 05-01-2002
مجموع المشاركات: 3813
ابوحراز الظريف... يسعد صباحك... شكلك غرقان لي شوشتك في باب شريف لازوم الاجازات واكيد في لستة الطلبات كم موبايل اخر موديل... ... شفته انا فهمتك كيف ... خلي بالك من الخريف ... ارقد عافيه ... مع تحياتي واحترامي
06-20-2006, 05:28 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
قال ظريف قال والله ياوليام أندريا أنا عندما يأتي سفري للسودان أكون قرفان آخر قرف رغم ان كل الناس المسافرين بيكونوا مبسوطين والزهجة طبعاً من الوصايا الكتيرة دي يعني عادي ايام السفر العزابة ماقاعدين يهزروا معاي لأني اي واحد ممكن اعضيهو لو اتكلم معاي كتير لكن المرة دي ناوي اقول ليهم الشنطة بتاعتي اتسرقت اصلوا الحكاية دي جربتها المرة الفاتت لكن ناس السودان صدقوا الا ناس السعودية البخليهم يصدقوا شنو اي واحد عنده معاي وصية مما سمع اشاعة الشنطة بدأ يتصل على أهله النسوان ياكافي البلاء الواحدة قبل ما تسلم عليك تعاين للشنط تحت السراير تصدق واحد حيوان مرسل معاي مجلات قديمة !!!! افتكرت الكيس فيه ملايات فتحناها في سواكن نلقاها ليك اليقظة وروز اليوسف وصباح الخير وسيدتي طوالي رميتها في البحر في محلها قال سيدتي قال !!!!
06-24-2006, 03:51 AM
almulaomar almulaomar
تاريخ التسجيل: 07-08-2002
مجموع المشاركات: 6485
أخي أب حراز من خرم السروال يا أخوي بنثبت للعالم إننا شعب في سودانا الأعظم ناس تقليد ونقل وفشخره وبوبار ، لا تعرف حياتنا الضرورات والأولويات وترتيب الأمور على علاتها ، الراجل يكون مفلس وما عندو حق التمباك تتسلط عليهو أم عيالو وشريكة حياتو وتقز كوعها وتطير عيونها وترفع حاجب وتنزل التاني وتقول ليهو قلت شنو ما عندك قروش كيف يعني دايرني أمش عرس ناس فلانه بي التوب ده يقولو علي شنو ، ده غير البجوك من دول الخليج معنكشات دهب كتير لمن مسيخ ولمن شكلو يبقى بايخ وما أنيق يعني أستغرب في واحدة تلبس 6 غويشات في اليمن وسته في الشمال وأحفظ مالك وأحفظ نفسك وكردان وكرسي جابر وكرسي نص وبعد ده كلو بتقدر تمشي كيف ، وأنا أقترح أن يتم وضع أخصائيين لكشف الذهب الأصلي من المزيف عشان كلو واحد يروق في علبو. لا وإنت شفت الجديد في البلد موبايل شنو يا أب حراز الناس الأيام دي شغالين خدامه فلبينيه وسواق تايلندي وحارس هندي وطباخه سيرلاتكية وكلو بالدولار الأمريكي الفاخر . ده الراجل تلقاهو مفلس وكلو داير منو سيد الدكان وسيد اللبن وبتاع الرغيف وحق المدارس وبعد ده يمشي يسوي ليهو دقن ويسوي ليهو عرس ولمن يكلموه يقول أحل الشرع للرجل أربعه ، أربعه في رأسك إنت واحده ما قادر عليها يعني من أصلو ما المفروض تكون متزوج يعني نوعك ده ما المفروض يعرس خالص. تخيل يا أب حراز وإنت المربياك حبوبتك تقوم تربيك واحد أندونيسية نظام Babysitter، نحن يا أب حراز ناس كوبي وبيست البنشوفو كلو في الغربة وبخاصة في دول الخليج بننقلو دون مراعاة لأى شئ ودي طبعاً علامة من علامات إنو السودان في ظل الإنقاذ أصبح قاب قوسين أو أدني من دخول منظمة أوبك ومنظمة دول مجلس التعاون الخليجي بعيداً عن موقعنا الجغرافي.
06-24-2006, 04:58 AM
ابوحراز ابوحراز
تاريخ التسجيل: 06-27-2002
مجموع المشاركات: 5536
صديقي الملا عمر انت ما سمعت بالراجل المرتو قالت ليهو { دق لي دهب } !! قام دقاها { ودقّ } سيد الدهب !! قال كردان قال !!! سأعود للرد على مداخلتك الجميلة اليوم علينا الميز الله يقطع الميز وحياة العزوبية جانا عزابي جديد والله خلانا كلنا نفكر نعمل خروج نهائي دا قال ملاح الرجلة يمكن يتعمل بدون لحمة والفاصوليا بدون لحمة والبطاطس بدون لحمة والشية برضو بدون لحمة !!!! والله ماطالبني حليفة ياجماعة معانا { كديسة } عايشة معانا اربعة سنوات هسي رحلت كلو من عدم اللحمة !!!! كنت مستمتع بهذه الكديسة خاصة بالليل حيث أنها وفية جداً معنا ولاتلمس اي شيء يخصنا لكنها لم تكن وفية إطلاقاً مع أزواجها ففي كل يوم اراها مع كديس جديد وغريب وكثيراً ما اراها تعشق الكديس صاحب الشوارب الطويلة ولا أدري الحكمة من هذا الاختيار دخل بيتنا في هذه الفترة أكثر من 120 قط من الذكور شي رمادي وشي ابيض وشي اسود وبرضو الناس يقولوا ليك هالة سرحان مزواجة
06-24-2006, 11:40 PM
ابوحراز ابوحراز
تاريخ التسجيل: 06-27-2002
مجموع المشاركات: 5536
Quote: الأيام دي شغالين خدامه فلبينيه وسواق تايلندي وحارس هندي وطباخه سيرلاتكية وكلو بالدولار الأمريكي الفاخر .
نحن أهل العوض شوية يمكن أحسن ماوصلنا المرحلة دي لأنو الأكل يادوب يكفي ناس البيت وما أظن تفضل حاجة لفلبينية أو حاجة من النوع دا لكن برضو جابن ليهن فشخرة جديدة الغسيل بقى بالايجار وعواسة الكسرة ايجار وكي الملابس برضو ايجار وغسيل العدة ايجار برضو وياريت لو بعد دا كلو الواحدة تجهز نفسها وتلقاهانفسها مفتوحة برضو البشتنه في محلها
والله هؤلاء نحن الذين نستأجر لغسيل الملابس وكيها وتنظيفها نسكن في بيوت بالايجار يعني لاتعرف دي فشخرة وللا قلة أدب ياريت لو نترك هذا البوبار ونتحول الى شعب عملي وأن لانقع في الأخطاء التي وقع فيها من سبقونا علينا أن نخطط من الآن حتى لايقع ابناؤنا فريسة للإغتراب وعذابات الحياة وهذا لن يتأتى ما لم نكن واقعيين
06-25-2006, 00:40 AM
yasiko yasiko
تاريخ التسجيل: 02-04-2002
مجموع المشاركات: 2906
Quote: انا من القوز و هو حي شهير في الخرطوم و لو بتسمع بلاعب المريخ السابق عاطف القوز. يعني وراء ابوحمامة و الحلة الجديدة. اها ما تنسى انو الكابلي غنى لينا و قال شالوا السيدة و خلوا حرم يا ناس القوز علينا ظلم. و كمان اغنية الحقيبة المشهورة في القوز ما نسينا و في القوز ليس نجهل
الأخ هيثم سلام الكابلي لم يغن لقوزكم أبداً أين السواقي التلاتة التي اصبحت عدم في قوز الخرطوم؟ هل اصبحت مسميات "المربعات" سواقي؟ لا اعتقد لك الود عجبني سجالك مع ابوحراز يا ابوحراز إنت ما سمعت بالزول القاعد في الكرسى الأمامي في الركشة وضرب تلفون لصديقه في المقعد الأخير من الرقشة وقال ليهو ما تدفع للكمساري انا دفعت ليك!!!!!!!!!!!!!!!!!! انت ما سمعت بالعولمة أمر لابد من مناقشته
06-25-2006, 11:41 PM
ابوحراز ابوحراز
تاريخ التسجيل: 06-27-2002
مجموع المشاركات: 5536
Quote: يا ابوحراز إنت ما سمعت بالزول القاعد في الكرسى الأمامي في الركشة وضرب تلفون لصديقه في المقعد الأخير من الرقشة وقال ليهو ما تدفع للكمساري انا دفعت ليك!!!!!!!!!!!!!!!!!!
سمعت بهذه النكته وذكرها أحد المتداخلين بهذا البوست يعني الواحد ماقادر يتصور كيف ستكون حال السودانيين لو أصابتهم الطفرة التي أصابت دول الخليج أعتقد أن كثيرين منهم سوف يتفشخروا أكثر من اللازم عندنا طبعاً نكته مشهورة في أهل العوض قالوا لمن الإنجليز أوشكوا يغادروا السودان حاولوا يغسلوا ما الحقوا من أذي لمزارعي الجزيرة فأغدقوا عليهم بالكثير من الأموال واحد من اقربانا مشى مدني وجيبه مليان قروش قام أخذ أجرة تاكسي من مدني للقرية طبعاً ثلاثة تكاسي مش واحد تاكسي ركب فيهو هو والتاكسي التاني خت فيهو العكاز المضبب بتاعه والتاكسي الثالث { فيهو قزازة العرقي }
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابوحراز
قرشـــو
Haytham Abdulaziz
محمد الامين احمد
Tragie Mustafa
Al-Shaygi
jini
Ahmed Daoud
مهيرة
james
ajaj
Hisham Ibrahim
JAD
almulaomar
حيدر حسن ميرغني
ebrahim_ali
willeim andrea
yasiko
فيس بوك
تويتر
انستقرام
يوتيوب
بنتيريست