الزواج يطيل العمر ياعزابة البورد غايتو ماعارف 00 لكن عندي خالي لو سمع بالكلام دا اجيب عكازو ويجي يقع كسر ساكت في ناس البورد ديل رجال على نسوان عزابة على متزوجين على مطلقات ومطلقين زهجانة على فرحانة على بت النيل على بت الجزيرة أما ناس الأحفاد ونهى وتماضر وبارعة وحليمة ديل حايكوركن ويحن في حالهن وديك الجن برضو أكيد حايكورك دي ماعايزة كلام اما نفسيات داك حايلقوه مكرفس زي الجدادة 00 لكن بعيد من ديك الجن وهاك يا الملا عمر وعكسو وودعازة ويازول وقرشو ومسافر وعزيز ومسافا وماسا وصفر ديل الا يسكوهم 00 أكيد ديل ناس جري بالزقاقات اما بناديها دا غايتو شكلو كدا حا البد للضرب سااااااااااكت وماقلت ليكم ابوقرجة دا قرجتو اللي يلمها عليهو لان خالي بديهو خبتة بيها دا مراتو مكرهاهو العيشة بعد الزواج ضغط وسكري وصلعة وفلسة وجلابية مقدودة والخال دا بعد الفصاحة طلع تخه ساكت دازمان كان عتّر ليهو كوز يقول علي بالطلاق تاني ما اشرب موية يعني كان خاتي الطلاق قدام السفّة بتاعتو لكن بعد اتزوج بلع طلاقوووو وسفتووووووو المصيبة مراتو دي جنها مشاوير كلما تشوف ليها عربية بكاء راكبة فيها وماتركب الا قدام كل يوم اجي صاحبنا من الشغل يلقاها مافي مشت بكا فلان وحنة فلان يوم جا متأخر لقى ليك ناس الحلة كلهم طالعين برة ياجماعة الحاصل شنو 00 قالوا ليهو والله اللوري المشى البكا انقلب وماتوا كتير من النسوان والرجال صاحبك ولا اتكلم معاهم مشى بيتو طوالي وكانت المفاجأة لقاها ليك قاعدة تورٌق ليها في خدرة قال ليها : الله انعلك انتي مامشيتي البكاء باللوري صدقوا ياجماعة دي السفرة الوحيدة المالفحت فيها توبها ومشت للبكاء تصوروا دي بطوّل العمر وللا بتلويه من رقبتو عديييييييييل غايتو يمكن دي حالة شاذة شوية لكن بعد ماعرفت كدة قررت انو احمل العزوبية الى مثواها الأخير واتصلت على خطيبتي 00 لقيتها تنكرش ساكت زي الجدادة الساكيها ديك قلت ليها : أها : انشاء الله جاهزة قالت لي : موية ونور ومعاها ضحكة كمان هييييهييي { دي ضحكة العولمة } قلت أنا شفقان لكن ماشاء الله طاقاها شفقة عجيبة خلاص والله لمن قلت ليها الزواج حايكون قريب لأنه بطوّل العمر رمت السماعة من يدها والجماعة قالوا قعدت تنطط زي الكانجرو حق استراليا دا أها يا المتزوجين والمتزوجات والعزابة رايكم شنو في الكلام دا وهل الزواج يطيل العمر خاصة وأنني قرات في دراسة أن نسبة الوفيات عند الرجال الغير متزوجين أعلى بكثير جداً من الرجال المتزوجين 00 يا ساتر 00 المشكلة الدراسة ماهبشت النسوان الغير متزوجات افيدون يا ايها المتزوجون فإن كان يطيل العمر سأحمل حقائبي وأسافر وإن كانت الشغلانية كما هو خالي العزيز فالله عليه العوض ومنه العوض 00 حا أخليها عمرها كلو تنطط ساااااااااكت
ابوحراز
07-30-2002, 07:58 AM
banadieha banadieha
تاريخ التسجيل: 02-04-2002
مجموع المشاركات: 2235
اب حراز..ياخوي أم فيونكة سالتني منك أمس..والصباع لحسو بكري كانت في مشكلة في مساحة البورد..ودا طرفي منك..جنبتي الشمال قعدت تنتح وحنكي وشلاليفي بقن زي حقات ياسر عرفات..تسر وتريح البال
عارف يابو حراز تمتلك قدره رهيبه على تقديم موضوعك الله ما يحرمنا من طلتك دي حمدالله على السلامه يا اخوي
اما ان كان الزواج يطيل العمر نعم وتمضي ايامه ثقيله جدا لذا العمر هو العمر لكن لمسؤليات الزواج وما يحمله يمضي العمر بطيئا ويبدو اكثر طولا 0000 لكننا نتزوج ونقول سنة الحياه فعجبا من سنه نعرف ما تجره علينا ونعملها 0000 في رائي النساء الغير متزوجات ان كن يتوفين فلا اظن انه الان كان يوجد الاختراع المسمي بالبوره اما عن ارتفاع معدل وفيات العزابه فذلك انو الاجل تمه000000ههههههههههههه تحياتي
07-30-2002, 08:25 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
الأخت شجون أشكرك على اطرائك الرائع يعني العزابة بموتوا عشان العمر تم والبايرات ديل رايك فيهن شنو اتفق معك ان الإنسان عندما يكون متزوج لايشعر كم مضى من الحياة وذلك كله مع متطلبات الحياة لكن في نظري ان الزواج لو اقترن بالسعادة فعندها نشعر بلذة الزواج وايامه ابوحراز
07-30-2002, 08:16 AM
Al-Masafaa Al-Masafaa
تاريخ التسجيل: 04-25-2002
مجموع المشاركات: 1586
العمر دا حق الله يا فاكهة لكن النسوان بعد دا كلو بقصروا العمر و الزول بعد ما يتزوج و يبقي ابو عيال يقنع من الدنيا و في الجانب الأخر الزواج اكمال للدين و سترة و استقرار و زيادة مصاريف و التزامات و توابع و ما تقول لي الاختيار كلهم عجينة واحدة و الف حمدالله علي سلامتك و مبروووووووووووووووووووووووووك
07-30-2002, 08:13 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
ابوحراز يافلتة زمانك شوية شوية علينا نحن العزابة ديل فمن الضحك الجماعة المعاي في مكتب كلهم جو قراو كلامك وحتى خفنا من المدير يعمل لينا مشكلة من كثرة الضحك فمزيد من القفشات النادرة في هذا الزمان بالنسبة لموضوعك الشيق فانا الخطيبة رسلت لي جواب وقالت شوف الكلام دا عليك الله قالت الا تخلص جامعتها يعني ثلاثة سنة حتى يتم الزواج تاني رائك انتظر ولا افكها عكس الهواء ذي ما الناس بتفك عشان امكن العرس البدري بطول العمر ذي ماقلت
ابو حراز رائي في البايرات هم نتيجه طبيعيه لموت الشباب
تعددت الاسباب والموت واحد 0000 مما احدث خلل في النظام العالمي
وكل ما يجئ موضوع ارتفاع عدد البنات بالنسبه للشباب اقول ان فرعون زمان عمل خلل في الموضوع دا لما قتل كل طفل يولد وبذلك قل عدد الرجال فرعون عمل كدا والحروب لها الدور الكبير على مدى الزمن والله بعد دا كله دا ما سبب لكن هو واقع موجود 00000 بس خلى بالك ابراهيم علي سالك سوال بس ما تجاوب عليه بنعم افعل ذلك والا عليك الهرب بعيدا من اللاتي سيعلمن من كتب الموضوع 000000
لك تحياتي
07-30-2002, 09:45 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
الأخ ابراهيم انت ماسمعت سيك سيك معلق فيك والله ما حاتخليك مش كان فكيتها ود خالتي كان زيك وزي كدا زهجان من الخطيبة لدرجة قف المهم عشان الجماعة يشجعوه شوية قاموا اخوانها من السعودية رسلوا ليهو الشيلة كلها بيني وبينك وارجوك ماتكلم اي واحد طاقاها شناة مرة المهم مشيت عشان ابارك ليهو يا ابراهيم شفت ليك عريس بمشي في الشيلة حقتوا ؟؟ مش النسوان بودنها دا العبيط دا قال الا يمشي مع الشيلة قلنا ليهو ليش : قال حا اقول ليهم العرس بعد تلاتة يوم وبس وكان ماوافقوا على الثلاثة يوم حا اجيب حاجاتي راجعات طبعاً صاحبك ظاهر انو عاوز ينط المهم طبعاً تلاتة يوم شوية على تجهيز العرس وقاموا الجماعة مشوا وصاحبك العريس راكب قدام اها نادى ليك ام العروس وكان زهجان وقال ليها شوفي العرس بعد يومين بس وكان ماعايزين انا برجع بي حاجاتي ساكت قامت قالت ليهو : لو عاوز العرس حسع ماعندنا مانع سوق عروسك دي معاك والله الراجل لمن جانا راجع كان خشموا ملح ملح قام قال لي : سيك سيك معلق فيك قال برجع بالشيلة قال
ابوحراز
07-30-2002, 08:52 AM
Tumadir Tumadir
تاريخ التسجيل: 05-23-2002
مجموع المشاركات: 14699
أب حراز أخوي العود أحمد ...ومرحب بخالك اليجي يلقانا جاهزين للدواس ..بس أوع تجي تحجز...بالله عليكم مش حرام مرة واحدة تعتقل ليها راجل العمر كلو ...لازم اثنين والتالتة أحلى والا أقول ليك أربعة عشان كرعين العنقريب أربعة وترقد مرتــــــــاح .. والا قولك شنو...والله بشفق على بنات حوى وهن طالعات من المدارس وبقول ديل كلهن يلقو ليهن عرسان وين ..
اللذيذ ابوحراز عودا حميدا يأخوي شنو الحكاية كل مره تفتح لينا موضوع العرس دا وكل مره تخوفنا منو. قولي حكاية شنو نخش الحراسة دي ولا القفص دا احسن لينا وهاك النكتة دي قالوا في واحد زيك كده كل حفلة يقوم يعمل فيها صاحب العريس مره قام جا لقي الحفلة ناره في السماء صاحبك علي طول خشا الدائرة وبقي يرقص أهل الحفلة استغربوا منو وسالوه ياخي انت بتعرف منو هنا صاحبك علي طول قال ليهم أنا والعريس دا اصحاب ضحكوا الجماعة وقالوا ليه دا طهور يافردة اها مش أحسن من مرة خالك الشمشارة دي. أخوك عكسوووووو
07-30-2002, 10:35 AM
رقم صفر رقم صفر
تاريخ التسجيل: 05-06-2002
مجموع المشاركات: 3005
ابو حراز الله يديك العافيه ، يازول براحه علينا ، انا قلت ابو حراز ده حكاياتو خلصت لكن يبدو انها لاتنتهي ، اخونا بناديها زغرد ولا كحه ما عارف بس بالرأفه عليه ، انا شخصيا ما ح اتزوج لانو ما داير اكون زي خالك ، بس السؤال المجنني هن بعمل شنو للراجل ، يعني تلقي الزول شخصيتوا قويه وفارد طولوا ، ومن يتزوج ينقلب لي مسكين وكما يقول واحد صاحبي دلدول ساي ، لكن خالك ده ما حظو نحس ، يعني كان سافرت كان ارتاح مش كده ؟ بناديها وين ام فيونكا ، عليك الله خليها تكتب في البوست ده وقول ليها تجي بسرعه ، حتي لو بكرعينها المكتحات وسفنجة الداي هارد دمتم
07-30-2002, 10:48 AM
noha_g noha_g
تاريخ التسجيل: 06-14-2002
مجموع المشاركات: 2119
و الله يا أبو حراز الله يجازي محنك قلت لي خطيبة كاتلاها الشفقة؟؟؟؟؟؟؟ و الله هي ما عارفة ساكت الجاييها كان نططت كويس لكن يا خوي هو بطول العمر و الا بقسمه على اربعة الأول بنتهي منه الزوج و التاني بنتهي منه الزوج و التالت بنتهي منه الزوج و الرابع الزوج
و كدي النسالك يا اخوي وقت خطيباتكن مكرهاتنكن العيشة الجابركم عليهن شنو؟؟؟؟؟؟؟؟ طولة العمر بتستاهل و الله لكن الله يديكم صالح الأعمال و بطلوا نقة في النساوين ديل الواحد قبل يعرسها تلقى يقولها و الله إنت عمري و اول خلاص يعرسها يقول لها قصرت أجلي؟؟
07-30-2002, 11:13 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
الأخت نها قالت كان نطت كويس والله الا كان تنط بحبل الغسيل يااختي دي ماصدقت قلت ليها انا جايي قريب غايتو مرات بتحرّق روحي توديها شمال تمشي يمين وتوديها يمين تمشي شمال قبل يومين قالت لي رسل لي قروش الحلو مر { الآبري { بالله دا وقتوو هسع هديل مواعين الموية بتاعة رمضان الفات لسع مانشفن وماقلت ليك دي جنها شيوخ والله مرة قلت ليها الفكي بتاعك دا والله انا لو بلعتو كلوا مايجيب فيني خبر 00 غايتو عندي محاولات ادخلها البورد طبعاً كان فضت لي من العواسة دي كل يوم بتعوس جردل كامل والله ماعارف بتوديها وين زرتهم اربع مرات طوالي بلقاها في التكل يعني ابوي لاقى أمي جمب زريبة الفحم وانا الاقيها جوة التكل الله يطولك يارووووووووووح
ابوحراز
07-30-2002, 11:23 AM
noha_g noha_g
تاريخ التسجيل: 06-14-2002
مجموع المشاركات: 2119
و الله يا ابو حراز لكن ما عرفت سببك اتاريها زولة تكل ساااااااااااااااكت و الله دي مش تقصر العمر دي تقطع الخميرة من البيت مع الاعتذار لك يا اخوي دي بتكمل لك الدقيق في يوم واحد تقطع الخميرة و الذخيرة يا زول أخير لك تشوف لك دبارة
انا زمان قبال اعرس اصحابي المعرسين كلهم قالو يا زول مالك ومال المشاكل، انتالظاهر عليك عندك قروش محرقات روحك ساكت، والله انت كايس للمشاكل براك، غايتو مخير على كيفك....الخ
المهم انا طبعا ما صدقت الكلام وافتكرتو (كلام ساكت) ولي هسع الورطة الياها
أها عندنا واحد صديقنا الله يطراهو بالخير (صديقنا بعد العرس) كان دايما بيطمئنا(والله دي الفراملة بتاعتو ما عارف غايتو) المهم كان دايما بقول انو العرس اربعة مراحل (حسب ما اذكر) لو اي واحد عندو اضافة اليضيفها:
المرحلة الأولى وهي المرحلة الطاؤوسية: أي الواحد يكون مختال كده والود عريس جديد طبعا طالع قاشر داخل قاشر والشماتة طبعا يعجبوك ، شابكينو ليك يا عريس، اتفضل ياعريس، وين يا عريس ...الخ
المرحلة التانية: الحمارية، أي الواحد طالع شايل داخل شايل(مراسيل ساكت)
المرحلة الثالثة: المرحلة الكلبية(الأولاد يكونو كبرو شوية كده): أي الواحد ينبح اليوم يكلو، يا مرا جيبي الفطور، يا ود أقعد ساكت، يا بتت قومي سوي الشاي...الخ
المرحلة الرابعة والآخيرة(حسب علمي) ماحسب تجربتي لأني لغاية الآن في التانية، هي المرحلة القردية، أي الراجل يكون عجز وغلبو اليسوي لا قادر يكوريك ولا قادر ينبح اها يكون قاعد يتفلت ساكت وينكرش زي القرد
قال يطيل العمر قال!!! وريني بس بي وين؟؟؟؟
نجي لي موضوع انت يا أبو حراز: هسع العاجبك في جنس البهدله دي شنو؟ وزي ماقال المثل: أسمع كلام الببكيك ولا تسمع كلام البضحكك
وصدقني الكلام ده ماكلام ساكت!!!
07-30-2002, 11:47 AM
noha_g noha_g
تاريخ التسجيل: 06-14-2002
مجموع المشاركات: 2119
لكن مراحل العرس عندك تشجع الماناوي يا اخوي ما براحة على الما شافوا دنيا ديل و قلت لي بكون زي القرد اكان بقى قرد ما بخته المشكلة تبقي ليك في مرحلة القرد ديك خيال مآتة لا بهش لا بنش اها تقول شنو في دي القرد هو الا ينطط
07-30-2002, 11:34 AM
cola cola
تاريخ التسجيل: 02-04-2002
مجموع المشاركات: 1423
والله ياابوحراز انت حيرتني معاك انا حسي قولت القى عندك الخبرة الكافية في انك تنصحني نصيحة تريحني بيها ولكن ابن خالك امثالو حيكونوا كتار واظن انك اولهم بس بسبب التكل والعواسة وذي ما قلت سيك سيك معلق فيك لكن الحل شنو ياخوي الواحد ذي ما قالت نهى قبل العرس كب نقة واتصالات ومراسيل وهدايا وانتي حياتي وغيرها من كلمات الغزل والرومانسية وبعد فترة الحكاية تبرد ويصيبها الذبول وتفكر في انك ياريت لو ما خطبت حسي وتعيد تفكيرك مائة مرة هل وهل وهل لكن في النهاية بيني وبينك الواحد برضو لازم يستفيد من الناس الخبرة الموجودين هنا ونحن برضو كويسين شوية لانو الناس الجوه المعاهم خطيباتهم والله ديل الله يكون في عونهم اي في نوع من الترفية وكب النقة والكلام الدقاق ولكن المشاكل دائما طالا عليهم انا كنت شايفك مع بت عمك انا كنت شايفك مع ود خالك وانا ماشى القاعة لا انا ماشي المنتزة وهاك يابداية مشاكل لكن نحن المريحان انهن بعاد مننا لكن برضو ما بريحن بتتصل عليك ويقولن ليك اتصل على الرقم دا دا يكون بتاع صاحبتها دا اذا ما قالت ليك عائز موبايل والله انا طلبتو مني لكن رفضت قلت ليها ما عندك مشكلة انا اليوم والتاني بديك تلفون لكن اخوك مرات بصهين عديل كده
07-30-2002, 02:39 PM
ShiningStar ShiningStar
تاريخ التسجيل: 04-26-2002
مجموع المشاركات: 468
يا جماعه ازيكم و بلصلاتو عالنبي كدا يعني... واخد بالك معاي يا ابوحراز... العرس يا دا زينه سسسسساي ... الا دحين لازم تقع ليك في وحده هديه و رضيه كل ما تبتسم ليها تضحك ليك.. تفتو ليك و تفتو ليها يعني اي شي بيناتكم يبقي زي القبر و افعالو .. يعني ما تكون النوع البكوس بي الحله و تشيل حسك .. الليله ابوحراز ما جاب لحمه ما فعل و ترك الليله قال لي كدي يعني الواطه كلها تعرف البزنس حقك.. اها دا البقصر العمر.. آآآآآها.. معناة الكلام دا و ذي ما قالة حبوبتي زوزو انو الراجل زي الماعون المكشوف و داير غته و البنات غتيات دايره مواعين... و كل ماعون عندو مقاس مختلف فا الماعون لازم يلقه ليو غته طق طرق مقاسو لا اصغر ولا اكبر ... يعني زول غير الماعون و الغته يكونو عارفين الفي النص شنو مافي.. اذا كان لحمه, طحنيه,كسره بي مويه المهم انو انتو الاتنين بس العارفين اما بقيت الناس بما فيهم ام الماعون و ام الغته يكونو شايفين انو الماعون و الغته ديل سمن علي عسل ... عرفته كيف .. بعدين لو عايز تضمن انها طوالي تكون مقاسك بس.. وس وس ليها في اضانه طوالي و ما تكشر ليها ... اها دا البطول العمر ..
و قالو العروس للعريس و الجري للمتاعيس انا و عشه اختي ...اها يخواني انا ماشه اكووس ماعوني ... يخواني وووب الشال سفنجتي منو؟؟؟
بناديييها الريده الريده علي شديده... سلامة الجنبات... قالو الجنبه دي اهم شي و السندوتشي ما بعشي...
يا جماعه ادوني شفنجاتي ما تجهجهوني انا براي مجهجه.. ماتخلوني اقوم اقلبه ...
07-30-2002, 02:46 PM
banadieha banadieha
تاريخ التسجيل: 02-04-2002
مجموع المشاركات: 2235
ورررررروووووررررررروك انا مقتوله في حوش بنادييييييها.. سلامة صفحتك.. اجي يا ريده ... لكن يا حبه ما تخاف انا سفنجتي ما بتغباني.. خاته فيها دبابيس دغت بي الجنبات عشان تلمع في الضلمبه... يعني بلقاها بلقاها
وحات الما بجيب اسمو انتا ما الريييييده زااااته ....
07-30-2002, 04:05 PM
nile1 nile1
تاريخ التسجيل: 05-11-2002
مجموع المشاركات: 2749
الأخت شجون بيني وبينك البايرات كتار جدا ومش السبب قلة الرجال هناك اسباب تانية غايتو الحمد لله انا جيت ولد لكن لو جيت بت كنت حا أكون باير بورة بطالة خالص 00 بت عمي بتشبهني كدة طاقاها جنس بورة 00 لكن الله نجدها أختها ماتت اتزوجوها في محلها الأخت تماضر اشكرك على المشاركة 00 لكن الظاهر انك متأكدة انو الزواج بطوّل العمر قرجة أها انتظر الدواس 00 بالمناسبة عندي صديقي بأمريكا اسمو ابوقرجة ماعارف يكون شال قرجتو معاه لأمريكا 00 عاوز اسألك قرجتك دي مضببة وللا سادة عكسو 00 جد فقعتني بالضحك بنكتك دي كتار يا أخوي الناس البدخلو للحفلات بلا شغلة وامكن اصحابك ديل ناس طيبين شوية عندنا واحد مغترب معانا قطع الإجازة وجانا يدو مكسورة وقال كسروها ليهو في الحفلة مشى طبعاً زيارة لأهل العوض وقايل الحكاية زي الصحافة وبحري تدخل ساكت هناك صاحبك دخل الفلة ارقص مع البنات وفجأة لقى تلاتة عكاكيز فوق راسو ويديه الأخ صفر اشكرك على المشاركة واتفق معاك أن كثير من الرجال تتغير شخصياتهم بعد الزواج للأسواء والله عندنا واحد الشنب ماشاء الله لكن انهروه ليك زي الجدادة 00 طبعاً أنا مرات جبان جداً ماتشوفني كدة كنت عاوز من صاحبك دا قروش لكن حاولت معاهو كتير جدا 00 قام واحد قال لي : كلّم ليهو مرتو وفعلاً عملت كدا بعد تردد شديد كان صاحبك صحاني بكرة من النوم وقال لي : ها زول قروشك ديل نسيتن وللا شنو عاوز انصحك لازم تخوّف مرتك من زمن الخطوبة انشاء الله تمثيل ساكت 00 هازول والله لو شفتنا انا بخوفها ليك خوف شديد خالص لكن اتمنى الحكاية ماتتقلب بعد العرس نهى : قلت لي دي بتقصّر العمر وبتكمّل الدقيق 00 طيّب كلامك دا أنا حا أعمل بيهو من الآن 00 والله من زمان داير لي سبب اتخارج بيهوووو كلام ساكت كيف حالك 00 والله انت بعد الزواج طلعت كلام ساكت غايتو مرحلة القرد دي بصراحة الواحد ماعاوز يصلها لكن المشكلة في مرحلة خامسة وهي مرحلة التفزيون 0 عندي جدي كان زي التلفزيون يطلعوه المغرب فوق عنقريبو والساعة 12 يدخلوه مرة تاني والكلام دا يومي كولا : اشكرك شنو الفاكهة الشبكتونا فيها دي 0 وانت عارف الفاكهة عشان تنهضم بسرعة بتحتاج الى كولا الأخ ابراهيم : غايتو زولتي ماطلبت ليها موبايل 00 ارجوكم ماتدخلونا في المتاهات دي شنو الحكاية بعد ريحة وحنة عاوزة تجيب ليها موبايل 00 حماتي أم لساناً طويييييييل والله لو سمعت تقول لازم اجيبو ليها موبايل في الشيلة وهي مابتعرف البتكتحا ازرار التلفونات مابتعرفهن0ياخي دي مابتفرق بين ال 7 وال 8 وال 2 والله بجهجهنا ليك جهجهة بطالة مرات تضرب الكاملين يردوا علينا ناس أم روابة 0 شاينق ستار يا اختي دي من ناحية كواسة الحلة مافي حد بلحقها والله اليوم كلو تكوش ساكت تقول رايحة ليها بقرة 00 وانتي قلتي الراجل لازم يكون غتاية لمرتو والله دي الا كان يجيبوا ليها غتاية برميل 00 طبعاً أوعدك انو انا ما حا أكشّر ليها خالص لكن المشكلة هي مكشرة 24 ساعة نايل جدي ماك ومالو 00 موضوعي وين 00 ياخي جننتني لحدت مارسلتوا ليك وبكم عنوان مافضل لي الا اشيلو في قفة واجيبوا ليك هناك في ارامكو مهيد شنو الجرسة دي من هسع 00 انت الظاهر بعد الزواج زول عدة سااااااااااااكت ابوحراز
08-03-2002, 08:45 AM
nile1 nile1
تاريخ التسجيل: 05-11-2002
مجموع المشاركات: 2749
كيف مالي ومال جدك..ماهو لو كان الزواج بيطول العمر ماكان جدودي الإتنين وحبوباتي الإتنين وأمي وأبوي ماتوا..ماهو أنا قلت لو جدودك وحبوباتك حيين يبقي المسأله فيها نظر ولو كمان ربنا إفتكرهم زي مابقولوا جيراننا تبقي حكاية تطويل العمر شرك عاوزين تكملوا بيهو على الغبش...وأصلهم ماناقصين..كمان يبقي عليهم قصار أجل مرتين؟؟؟قال تمنجه حضاري قال..وبعدين ياخي إنت موضوعك وصلني بعد حراق روح بعد ماطلعنا العدد..وبصراحه دا ماياهو قلمك العرفناه ..الحكايه شنو؟؟إنت إتحكرت هنا للحكاوي ونسيت تدينا الجيد؟؟؟؟ياخي إتحرك شويه ورسل لينا كم موضوع تاني...وشابفك زي الداير تتملص مننا كدا..إلا نقول ليك رسل حتي ترسل لينا حاجه كدا فكة مشكله بس..لا...نحن عاوزين من المجود وإنت قادر عليهو
08-03-2002, 09:10 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
ياخوي حبوباتي عايشات انا مقلت ليك قبل كدة لكن حبوبتي دا راجلها الخامس القاعد معاها دا هو انا ماقلت ليك : راجلها القبل الآخر دا نط بالشباك لبعتوا بالطوبة لكن المعاها الحالي مشلول لابقدر ينط بالشباك ولا بالباب بياخد دقتوووووو ويلبد ساكت اها كان ما الزواج يطول العمر هي قاعدة لحد الآن
08-03-2002, 07:12 AM
Abomihyar Abomihyar
تاريخ التسجيل: 03-19-2002
مجموع المشاركات: 2405
ابوحراز ياخي انت الظاهر عليك حتشرق ليك زول هنا لمن يروح فيها وتعال هنا يعني الموبايل دا بقى حاجة نادرة والله في حلال في البطانة موية ما فيها ناسها شايلين ليهم موبايلات لزوم الفخفخة وهم موية يشربوها ما لاقينها ثم ثانيا الموبايل بقى من ابجديات الشيلة لازم تعرف الحتة عشان بعدين ما يقوموا يشيلو حسك والله دا مغترب شنو الشيلتو مقطعة وناقصة دا والله دا اخير منو ناس سوق ليبيا وبرضو ما جاوبتي على سؤالي ولكن اصبر علي شوية لانو عندي ليك مستجدات خطيرة وامسك الخشب بس
08-03-2002, 10:45 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
ابو حراز .. على بالطلاق ..كلامك يفطس من الضحك ..لكن المراحل و التلفزيون ما عندكم .. أها أنا غايتو قصة العرس البطول العمر دا ما سمعت بيه ..لأنى بصراحه كده ما جربته .. وما تشوف طلاقى الجادعه ليك قدام ده .. ده زى بتاع خالك أيام زمان ... وبالمناسبه يا أب حراز أخوى بعد مرات تسمع يقولو ليك دى حاله أخير منها العرس ..حسى عليكم الله كان بطول ليه عمر زول أكان بقولو كده ..؟ و مسئولين من الخير حسع الحاله دى هى زاتها شنوالاخير منها العرس دى.. غايتو أنا ما عارف لكن بعد ما أعرس حا أجى و أحكى ليك يا أخوى ..كان ما جيتك ده ياهو الخايفين منو زااااااااااااااتو..
أبو حراز الله يجازي محنك والله خليتنا نضحك زي المجانين، انا بعد ما قريت بتاعت التلفزيون أمشي واتكشب زي نار القصب، هسع الجماعة كلهم قالو الزول ده اتلحس
اها يا نهى رأيك شنو في المرحلة التلفزيونية دي بتاعت أبو حراز، هو التلفزيون ده الا يجيب مسلسلات؟
عشات تقتنع يا ابو حراز اسمع القصة دي، قالو واحد لاقى صاحبو قال يا خي وين اليومة ديك شايفك في الشارع وأشر ليك ولا اشتغلت بي؟ قام صاحبو قال لي انا؟ قال ايوه حتى كنت واقف مع المره تضحك معاها ساكتّ!! قام قال كان كدي "علي الطلاق دي ما مرتي" في زول بضحك مع مرتو، وفي الشارع كمان.
اها زي ده ضحك ما بضحكو والمعروف والثابت علميا انو الضحك بطول العمر، زي ده عمرو يطول كيف واليوم كله هو مكشر
ولا الرجل الجاء يشكي لي صاحبو قال ليه ياخي المره دي جننتني بالمراسيل كل يوم عايزه عايزه، قام قال شوف المره كان قامت من الصباح وقالت ليك أمشي أطلع الجبل داك أحسن تمشي تطلعو بدري لأنو انت ح تطلعو ح تطلعو فأحسن تطلعو والواطة بارده قبل الدنيا ما تسخن عليك. "(والمراسيل دي اسألني منها انا، انا قبل العرس كنت 100 كيلو مراسيل ساكت هسع بقيت 70 كيلو) اها زي ده اليوم كلو ماشي جاي حيلو ما بنهد بالمراسيل والخوف كاتلو، زي ده مابموت ناقص عمر؟
وعليك الله يا ابو حراز ياخ انت راجل طيب وفكه وظاهر عليك ود حلال عشان كده ما عايزين ليك الوقعة الشينة،يا خي ما تصدق كلام الجرايد وبعدين تذكر زمان في السودان مش كانو بيقول ليك ياخي سيبك(ده كلام جرايد ساكت)؟؟؟
08-03-2002, 02:05 PM
ابوحراز ابوحراز
تاريخ التسجيل: 06-27-2002
مجموع المشاركات: 5537
شوف ياكلام ساكت أنا جني وجن المراسيل وهي عارفاني كويس اني الشغلانية دي مابجيدها لأنو جدنا واحد وانا كنت عامل مشاكل كتيرة في حكاية المراسيل دي يعني يودوني أجيب سكر أجيب ليهم ليمون والمشكلة جني حلاوة لمن كنت صغير لكن بتاع الدكان طاقاه جنس مساخة طبعا بنطلق منوووو وجدي قال ليهو ماتديهن اي حاجة الا لمن يجوك بسبحتي دي يعني لو عاوز ليك كبريتة كان مالفوو ليك السبحة في رقبتك كان مت مايديك الكبريت طبعاً جدي ماشاء الله بعد العشاء بروح في خبر كان والله ياجماعة زول طيب ومسكين خالص يخت ليك السبحة في كراع العنقريب أها اي حلاوة أنا عايزها من الدكان بكسب اللحظات دي بشيل ليك السبحة براحة وبمشي لبتاع الدكان أخم لي صندوقين تلاتة وأجي أدرعها ليهو في محلها
الأخ ملهم شكلك كدا انت خايف من هسع لكن الحكاية تجارب جرّب وشوف بس عليك الله لازم تخوفها من البداية وتخلي جسمها يكش منك يعني لو نهرتها من أول مرة بتعمل ليك حساب كتير بعدين حا ول دائماً أتمارض عليها فهذا أكثر مايجيب الحنية للمرأة تجاه الرجل عندي صديق أول مايحس انها عاوزة تشاكلوا يبدى يرفس طوالي الراجل عامل فيها عندو صرعة لحدت حسع ماجاتو عديييييييل قال يرفس قال
الأخ ماستر والله دي ولا حتى فيزا وماستر كارد بتاع الدكان مسيخ كان ماجابو ليهو السبحة التكتحك مابديك ليها طبعا كل آخر شهر شكلة كبيرة لي رب السماء بين جدي وسيد الدكان جدي يقول حلاوة دي ماطلبناها ودا يقولوا انت رسلت لي السبحة لحدت في الآخر جدنا بقى يمشي براهو الدكان
الأخ مهيد قلت لي انت مازول عدة يعني تتوكل على أهلها كان مابتغسل ياخوي دا كلام ساكت والله انا خايف بعدين نلقاك غرقان في الصابون لي رقبتك والله انا ليس ضد المساعدة لكن في حاجات بتغيظ والله عندنا جارنا شغال في مجلس الوزراء يومي المغرب صاحبك القاهو ليك يدعك في هدوموا سااااااااكت المشكلة بتكيف جداً لمن يكون بغسل في ملابسو وتجي انت تتونس معاهو يقوم يقول ليك والله كدة الواحد وهو بتونس مابشعر بالغسيل الراجل دا قلت أكيد مرتو جميلة جداً عشان كدة مدلعها حبتين لكن والله لمن شفتها قربت استفرغ غايتو قلت ليها والله كان وقعت فيك انا ماعندي ليك غير جوزين بتاعات موية تشيليهن في كتفك دا وتشتغلي مع ناس برّد برّد برّد جوفك
قال مجلس الوزراء قال
08-04-2002, 07:08 AM
mulhim mulhim
تاريخ التسجيل: 04-11-2002
مجموع المشاركات: 491
أبو حراز .. على بالحلفت بيه المره الفاتت البسمع كلامك ونصايحك يقول إنك عرست لغاية حسع 10 مرات.. قلت لي عايزنى أخوفها من البدايه .. و إتمارض عليها كمان ..لكن ما قلت لى أبدأ بى ياتو واحده فيهم النهره ولا التمارض..؟
08-04-2002, 07:19 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
اعرس وين ياخي انا لسع بتفرج ساااااااكت بعدين قبل ماتتمارض لازم تبدأ بالنهرة في الأول صديقي واحد كدة عامل فيها مجنون دا بسكها ليك عديييييييييل وهو قال لي والله الشغلانية دي عامل نفسي بس يعني بقول لو قبلت عليها بس وقالت ليها أخ ممكن يقع في الواطاة لكن حلت ليهو الشغلانية وصار اخوفها واعمل ليك فيها مجنون انت جرب النهرة في الأول وكان مانفعت بعداك اتمارض والله يكون في عونك
08-04-2002, 07:33 AM
mulhim mulhim
تاريخ التسجيل: 04-11-2002
مجموع المشاركات: 491
صديقى أبوحراز .. بما أنى ما زلت فى مرحلة ..الحب و الدلع والشوق و الحاجات الكتيره التانيه ديك ..فنخلى قصة النهره و التمارض دى قدام شويه و إنت كدى أحكى لى شويه عن قعدات الصفا مع الخطيبه وتبادل عزب الكلام بعيدا عن التكل وريحة التقليه..
08-04-2002, 01:50 PM
بنت الاحفاد 2001 بنت الاحفاد 2001
تاريخ التسجيل: 04-21-2002
مجموع المشاركات: 693
بت الأحفاد قالت روووووق قال طيب انا لو روقت هي البخليها تروووووق شنو غايتو خوفتونا عدييييييل كدا اغلب المتزوجين بالبورد يقول ليك الزواج بقصّر العمر طيّب ياجماعة نسوي شنوووو نقول مانعرس تقولوا بايرين نقول نعرس تقولو العرس بجيب أجلكم أذكر في امتحان الشهادة السودانية جاء سؤال في مادة التربية الإسلامية وأغرب شيء يتم طرح اسئلة مثل هذه على طلبة غير متزوجين كان السؤال يقول اذكر 5 من مزايا الزواج طبعاً المراقب كان مصري والراجل دايماً ساكاهوووووو مرتو جوة المدرسة وكل يوم والتاني صياح المهم الجماعة كلهم اتلفتوا يمين شمال شمال يمين أخيراً واحد سأل المراقب وقال ليهو استاذ والله السؤال دا مادرسونا ليهو المراقب سأله عن السؤال الطالب قال ليهو : أذكر 5 من مزايا الزواج قام المدرس قال : قوازة ايه دي بأأأأ أوووولهم مافيهوش مزايا دي كل خراب × خراب آل زواق آل
08-06-2002, 07:13 AM
almulaomar almulaomar
تاريخ التسجيل: 07-08-2002
مجموع المشاركات: 6485
أولاً ما كان على أن أدلو بدلوي في هذا الموضوع لأنه للعزاب فقط ، وعملاً بالمثل القائل كل ممنوع مرغوب كان صديقنا ود تور مروي يبدأ قراءة الصحف والمجلات بعمود للنساء فقط. أما قصة الزواج البطول العمر ده زي قصة الزيوت الهندية ودعايات القنوات التلفزيونية التي تستهدف تغفيل المشاهد ليشتري أكسيراً سحريا يطيل شعره أو يشد وجهه، ولدي صديق رغم إيمانه بأن العطار لايصلح ما أفسده الدهر إلا أنه في ذات الوقت يؤمن بأن الغرقان يتمسك بي قشة، فصرف صديقي هذا نصف تحويشة عمره على شعر رأسه وذهبت فلوسه وبقى شعره كبوخ العصيدة. كان الأولى أن نقول الزواج المثالي أو الزواج الناجح أو الزواج الموفق هو الذي يطيل العمر مجازاً وليس حقيقة فالأعمار بيد الله والموضوع محسوم (رفعت الأقلام وجفت الصحف) أيضاً هناك على نفس الوتيرة زواج يقصر العمر ويكون بالضرورة أحد طرفي العلاقة أو كلاهما معاً السبب في هذا التقصير والذي يفوق تقصير عم الجاك الحلاق لشعر رأسنا قبل كل عيد بتوجيه من والدنا أمد الله في أيامه والذي أحسب أن له نظرة ثاقبة أثبتتها الأيام وأصبحت حلاقتنا زمان موضه أو صرعة تمارس في أرقى صالونات الحلاقة ذات النجوم الخمس ورحم الله عم الجاك. ومسألة عدم التوفيق في العلاقة الزوجية قديمة قدم العلاقة نفسها لذلك أقر الشرع الطلاق وهو أبغض الحلال إلى الله تعالى لكنه يبقى حلاً عندما تعجز جميع الحلول في رأب الصدع وتقريب وجهات النظر بين طرفي النزاع. وأطرف ما جاء في هذا المقام هجاء العربي لزوجته ودعائه عليها والولية ربما كانت منكدة عيشة الراجل ومخلياهو اليوم كلو راكب الجمل ولافي في الصحاري هرباً من جحيمها فأنشد يقول:
لقد كنت محتاجاً إلى موت زوجتي ولكت قرين السؤ باق معمر فيا ليتها صارت إلى القبر عاجلاً وعذبها فيه نكير ومنكر
08-06-2002, 07:32 AM
ALZOLZATOO ALZOLZATOO
تاريخ التسجيل: 03-14-2002
مجموع المشاركات: 4216
ابوحراز بعد التحيه اكيد انا معاك انو الزواج بطول العمر لكن عمر المراة بس هو البطول اما الرجل فتلاقيهو من بعد الزواج خلاص دخل في مرحلة الشيخوخه والمراه في مرحلة الشباب لو مامصدقني افتح الرادي الساعه 8 مساءا واسمع المراحيم بين كل عشره رجال اموات تلاقي الحاجه ام حقين او الحاجه ام تلاته حقوق عن عمر يناهز ال150 عاما هههههههههههه يكه ديناصورات يامعلم واستغفر الله العظيم حتى باقي العمر شيلو زاتو
_______________
08-06-2002, 09:14 AM
almulaomar almulaomar
تاريخ التسجيل: 07-08-2002
مجموع المشاركات: 6485
والله يا كوتش مسألة نشرة 8 مساء دي حقيقة لكين كمان ما تنسى إنو الرجال هم الجايبنو لي نفسهم يعني الراجل يتنفخ ويعمل فيها ضبان ضكر ويقول، ويشيل من عمري أنا ويديك الله يخليك – وناس أهديك عمري عشان أستريح والكلام ده ساكت يا زول ما كلو يثمنه ، وسمعت ليك إمرأة واحدة قالت في يوم من الأياام أهديك سنة من عمري ديل بالعكس بودوك الحرب ناس الجنيات يا بقارة الشدو خيلهم للمغارة وطبعاً نص الخيل ما ترجع والنص التاني يرجع فاضي.
08-06-2002, 07:39 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
الملا عمر والله صاحبك دا زهجان منها زهجة شديدة خلاص دي عملت ليهوشنو موديها طوالي القبر ذكرتني يلخي بقصة عمك الجاك الحلاق دا طبعاً هنا ماشاء الله الحلاقين الهنود أعجبوك في الحلاقة والواحد متعود احلق عندهم طوالي طبعاً عندنا نحن في السودان عم ادريس الفلاتي الحلاق طبعاً دا لازم نحلق عندو 00 شيطان ود حرام لأننا من كنا صغار بنجيهو بالقروش وبديك حلاوة وكان ماشعرك قام بتقوم جاري ليهو ليس حباً في الحلاقة طبعاً انما حباً في الحلاوة والفول والتسالي مرة ابوي شعر باللعبة دي قام حلق لي صلعة اها ماقلت ليك في اجازتي الأخيرة دي برضو عمك لقيتو ليك فات الدكان اضحك علي ساااااااكت قال لي والله ماشاء الله عملت ليك كضيمات والله حلق لي شناة حلاقة رجعت البيت عندنا واحد بسطل خلي بالك قام قال لي : ها زول ها انت حلق ليك ترزي
قال حلاوة قال
08-06-2002, 09:45 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
الزول زاتووو قلت لي نشرة الساعة 8 كل الميتين رجال الآن عرفت ليش جدي مجننا بالرادي كل ماتجي النشرة يقول لي جيبو جاي عاوز اسمع الميتين اصلاص عندو واحدة كدة مختلف معاها وطلقها وكان كل يوم عاوز اسمع خبرها أخيراً مات وهي الآن قاعدة بتبيع في الفحم
الملا عمر الظاهر تجربتك كويسة في الزواج ورينا أمثل الطرق البتخليك تكسب أم العيال مش حباً فيها عشان ماتقصّر ليك أجلك
08-06-2002, 10:34 AM
almulaomar almulaomar
تاريخ التسجيل: 07-08-2002
مجموع المشاركات: 6485
الأخ العزيز أبو حراز والله دخلتني في حته ضيقة جداً وأنا جني وجن الحتت الضيقة دي لأنها بتذكرني بي شارع العدني في سوق ام درمان حيث يختلط الكارو باللوري والبوكسي بالجكسي عفواً التكسي وأكياس اللحم بأكياس الصعوت وصوت عم خلف الله سيد القهوة بصياح عم عيسي سيد الزيت المهم يا سيدي بما أنك إنسان أعتبرك من أذكياء البورد فسوف أترك لسعادتكم إستنباط الخلطة السرية أو السحرية أيهما تختار في إستمرار علاقتي والسيدة حرمنا المصون والجوهر المكنون أم أحمد طول هذه السنون العامرة بالبنون ولله الحمد وداخلين على السنة العاشرة إيماناً منا بالأمثلة المشهورة والأقوال المأثورة والتي من بينها التسوى كريت في القرض تلقاهو في جلدها والتسوي بي إيديك يغلب أجاويدك وإن بليت يا فصيح لا تصيح والسترة والفضيحة متباريات (أى يسرن جنباً إلى جنب) والبتقع من السما تحمله الوطه وشعرة معاوية وقميص عامر وعصا موسى وعمامة المناذرة وخذ من هذه الأمثله إلى ما لا نهاية. وبعد ما كشفت ليك اللعب أتمنى أن تعزمني على عرسك وإنشاء الله يكون في أم كدادة برضو حا أجيك.
أبو حراز مساء الخير والله لكن مرت جدك دي خطيره وباين عليها ح تغرض الفحم وح تبيع غاز هههههههههههههههههههههههههه يكه ربنا يديها طولة العمر ولي جدك الرحمه والمغفره انشاء الله زاتو
______________
i will love u till death do us part
08-06-2002, 06:54 PM
ابوحراز ابوحراز
تاريخ التسجيل: 06-27-2002
مجموع المشاركات: 5537
الملا عمر العمدة زول والله بذكركم لحارات امدرمان الضيقة ذكرتوني موقف عجيب جدا ياجماعة في شيء محيرني جداً ليش اغلب شوارع ام درمان اتجاه واحد انا فعلاً يوم جيت من الشارع الفيهو الذهب والأحذية ماعارف اسمو شنو المهم لمة بتاعة سوق وزولكم فاضي وصفوا لي محل عرديب مشيت اشرب منو وكنت سائق سيارتي الخاصة وبعد ماشربت من العرديب الوقف لي في حلقي عشان الراجل خاتي ليهو فنان ابوظ مش العرديب ابوظ قارة بي حالها المهم جيت راجع وفي نفس الخط التكاسي ماشية معاي والرقشات والكومرات والحافلات وبعد شوية اشوف ليك الجماعة ديل كلهن اختفوا لا ركشة ولاقندراني ولاحافلة ولا امجاد ولاتاكسي تعاوني ياساتر الناس مشت وين معناها لفوا ليهم بي شارع تاني يازول لقيت نفسي براي أضضرع ليك في الشارع زي مايكل شوماخر اها كان اشوف ليك الراجل اللابس ابيض كلووو بتاع الحركة قام اكورك يازول انت سكران ماشي وين كدة المهم وقفت العربية ونزلت عليهو قال لي دا اتجاه واحد هسع شايف ليك عربية واحدة ماشة معاك قلت ليهو والله كانن اكتر من 100 عربية محل طفشن ماعرفتهن المهم الراجل اتفهم الموقف ورجعت من حيث اتيت قال عرديب قال
بعدين يا العمدة من طريقي بتاع امدرمان الضيق دا مشيت على اتجاه مدني ياخي والله في حاجات تحيّر عديل كدا في لوحات تحذيرية من الخرطوم لحدت مدني اللوحات دي مرسوم فيها ابقار معناها انو الطريق دا فيها ابقار يمكن تقطع فجاة المشكلة ولا بقرة ماقابلتني لحدت ماوصلت مدني تعرف القابلني شنووو ؟؟11 حمار بالله ليش ما يختوا الحمار دا في واحدة من اللوحات دي يعني فيها شنو لو وضعوا لوحة مكتوب فيها أمامك حمار حاتفرق يعني
08-07-2002, 01:51 PM
almulaomar almulaomar
تاريخ التسجيل: 07-08-2002
مجموع المشاركات: 6485
الأخ أبو حراز ما قلت لي بقيت علي شنو في الحلول التي طرحتها عليك بخصوص ناس العمرة وأب تالولة وأب قرجة وأب سبعين وأب كريك بعدين ما فرقت كتير بين الحمار والبقرة أهو كلها حيوانات أليفه وفيها منافع للناس. وبمناسبة الحيوانات دي يعني تفتكر السواقين في طريق الخرطوم مدني بهمهم من يعبر الشارع ، إطلاقاً كان زول كان بقرة كان حمار كلو واحد ، أحد الأخوة الأعزاء سخر كثيراً من طريق الخرطوم مدني وقال لي بالله شوف قال عند خط سريع قال أولا ما في أى حاجز بين المسارين ، ثايناً الشارع زي برش الصلاة لو واحد عاوز يتخطى الثاني يطلع بره البرش عفواً بره الظلط لأنو ما في رصيف أو ترتوار.
08-07-2002, 03:42 PM
ابوحراز ابوحراز
تاريخ التسجيل: 06-27-2002
مجموع المشاركات: 5537
الملا عمر ياخوي حلولك دي ما بتكل عيش هو نحن الجابنا هنا شنو ما ناس أب تالولة وأب قرجة وأب عصا وأب حنك ديل الداير ليهو ريحة والداير ليهو شيك والداير ليهو شيلة والله واحد مراتو كل سنة بتحمل وطبعاً هو ماعندو حتى حق السماية بس مما شافا ليك بدت تطرش وتستفرغ أها التلفونات جاها بلاء نرسل ليهو الريحة يقول داير حق السماية يرسلوا ليهو حق السماية يقول داير يطهر الولد عشان كدا ديل الواحد لو مشى قعد معاهم عاوز ليهو شوالات كلها مليانة قروش زمان الواحد برسلوا ليهو جواب عايزين وعايزين وعايزين والواحد مرات بعمل مطنش ولمن يرجع ويسألوه يقول والله الجوابات دي ماوصلني هسع يكلموك في إضانك عديل بالتلفونات الماخلت عد غنم وعد حمير
09-02-2002, 01:00 PM
mohsin_alsla7aby mohsin_alsla7aby
تاريخ التسجيل: 04-29-2002
مجموع المشاركات: 1166
قال استوائية قال الليلة ماخليت ليك بوست بتاع عرس مارفعتو ياجماعة برتقالة دا جن وللا شنو ؟؟ لكن عاوز الصراحة بوست العزابة دا مضحك جدا يعني انا الآن استغربت الكلام دا كتبتو كيف
قال يدبل قال اول شيء رولا على الهواء قالت عاوزة تقرأ ورزان المغربي كلما يسألوها تقول لسه صغيرة على العرس وفيفي عبدو مافي ليها طريقة وليليان بقت زي البقرة كان وزنها 100 كيلو عملت ريجيم لقت الوزن 110 وكااااااااارلا قالت ما حاتتزوج الا من الوسط الفني عشان كدة أحسن ليك البرتقالة الأنتا معاها دي فهي تحمل نكهة القاش ورحيق بساطة السودان
03-04-2003, 11:03 AM
Ahlalawad Ahlalawad
تاريخ التسجيل: 02-05-2002
مجموع المشاركات: 2832
أبو حراز .. هذا البوست كتبته بأسوبك الشيق في يوليو من العام المنصرم .. يعني قررررب يحول عليه الحول .. أها .. دايرين نعرف تقييمك لتجربة الزواج اللي انت كنت مقدم عليها في تلك الأيام ، وهل فعلا الزواج يطيل العمر ، أم يقصره أم يعمل له زراير زي ما قالت تماضر ش
ابو حراز الله يقطعك قفلتها في وشنا اهااا انا عايز اشوف الوسط البورد بتاعنا شوف لي واحدة لهلوبة في البورد ومجنونه جن كان تبرد الشر بتاعي شويه وتجيب لي من بلدنا نكهة فول الحاجات او طعم الترمـــس
03-04-2003, 02:01 PM
almohndis almohndis
تاريخ التسجيل: 05-05-2002
مجموع المشاركات: 2663
اخوي حروزه اه انا كمان لقتنى دراسة قالو الجميلات اكثر ترملا من ال........ ناس البقطوع الخميرة اخوك جرب الاثنين وهسع رجعنا بعد 9 طويل (سنين) المربع الاول زي بقولو ناس السياسية لكن بين وبينك اشتهينا الهرشه نحن فتحنا البرميل بتاع الحنضل الفى وشه طبقة عسل من فوق بالقلبه المرة دي ربك استر
03-04-2003, 02:17 PM
ebrahim_ali ebrahim_ali
تاريخ التسجيل: 02-05-2002
مجموع المشاركات: 2968
الغالي ابوحراز لك التحيات الغوالي ياتفاحة البورد لوووووووووووووووووول (بالمناسبة وين بناديها والكلمة ماركة مسجلة باسمه) حسي نحن عائزين نعرف انت كلامك دا البتقول فيهو دا صاح وفعلا مجرب ولا تبقى عليك حكاية واحد صاحبنا ضاربه ليك وجع في الركب والمفاصل واثناء هوجة الشيخ بتاع الكريمت صاحبنا مشى ليك الكريميت للكي واصبحت الان مشهورة اكثر من المناقل وتسمع في السوق الشعبي الكماسرة الكريمت تش تش تش تش المهم صاحبنا اتكوى والكي ما نفعه وقال بعد كده اي زول لازم اطبق فيهو نظرية انو يمشي الكريمت فادعي انه اصبح كويس وما عنده اي مشكلة ويوم جاءه ليك راجل ضاربه سكري وقال علاجك بس عند شيخ الكريمت فامشي عشان يتشك بالنار وتصبح بلا سكري ولا يحزنون وصاحبنا ماصدق اول حافلة للمناقل ركبها ليك وهناك اتكوي وبعد ما جاء الحالة ياها ذاتها ومكان الالم اصبح كل يوم يزيد والجرح في استمرار حتى ذهبوا به للمستشفى وما زال الجرح متقيحاً حتى الان ولما سالنا صاحبنا ياخي انت ما لك قائل للزول دا يمشى الكريمت وانت عارف عندو سكري مالك قال والله بعد دا امل في علاجي ما في واحسن حاجة اي زول القي ليهو ليك اقول ليهو الكريمت على طول قال الكريمت تش تش تش تش قال
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابوحراز
banadieha
Al-Masafaa
ebrahim_ali
Tumadir
garjah
رقم صفر
noha_g
cola
nile1
Abomihyar
mulhim
بنت الاحفاد 2001
almulaomar
ALZOLZATOO
mohsin_alsla7aby
Ahlalawad
فيس بوك
تويتر
انستقرام
يوتيوب
بنتيريست