معروف أن المراة هي التي تـتـكرفس وتحرد وتـتـغـطى بالبطانية وتـقبل على الحيطة ليش مانحرد نحن المرة دي 00 هن أحسن منـنا وللا أحسن منـنا تعالوا ياجماعة نديهن فرصة اسبوع واحد بالبورد عملن ليهن أووووووووضة لوحدهن ماخليتوهن واحدين منكم كل يوم يجوا داخلين واحدين بتاوقوا بالشبابيك والمصيبة واحدين لقوهم قاعدين تحت السراير النسوان ديل ياجماعة أدوهن حرية شوية خلوهن يقولن الونسة العاوزات يقولنها من يوم دخلن على البورد وكل واحدة لابسا توبها بالليل والنهار خلوهن يتحاومن سااااااااااكت زي ماعايزات ويقطعن في العاوزات يقطعن فيهو ويتنفسن شوية ويعبرن بحرية ماعاوزين أي واحد يتحاوم خلال الأسبوع دا انا من ناحيتي حا اشتري لي سبحة كبيرة واقول يا لطيف لكن في واحدين منكم الا يكتفوهم انا عارف بعضكم حاتكون مشكلتو كبيرة كل واحد حايجي شايل صحنو ويقول عاوز ليهو كمونية من شيري وصاحبكم الموصلي حايجي شايل عود وتخمشو ليك بت الجزيرة في الشباك قال شنو قال 00 بـيفـتـش لحمزة سليمان ويا أخوي المنطط عينيك 00 ماتجي كل خمس دقائق تقول عاوز تشوف الباندوث 00 تماضر بتجيب ليك الشمارات اقعد ساااااااااااكت لكن اساسي دا البكـتـفوا لينا منو ؟؟؟؟ اها نحن حانجي بعد الأسبوع دا ونقيّم الموقف اما لقينا البورد دا اتـقـلب كلو عدة وملايات واما وقفنا ونحن حفاة الأقدام لنصفق لإبداعهن المتفرد والمميز وإما وإما وإما وإما أها 00 انشاء الله إما وإما وإما الأخيرة دي عرفـتـوها دي طبعاً الشكلة بين النسوان والتي يمكن أن تحدث في أي لحظة صدقوني أتـكيف جداً عندما أجد نسوان اتـنـين متشاكلات فالمشكلة تبدا بالتلاسن ثم البراطيش وبعدها تـنـتـقل للعض وتظعيط الشعر والأظرف أنو ولا واحدة مابتخربش وش التانية مهما كان حجم المشكلة واياكم اياكم عندما تجدونا مشكلة بين امرأتين ان تتدخلوا فيها فالحجاز كما تعلمون مصيره العكاز ولكن هنا العكاز ارحم قال سبحة قال
07-28-2003, 07:31 AM
tmbis tmbis
تاريخ التسجيل: 10-19-2002
مجموع المشاركات: 24862
والله يا ابوحراز ..كتلتني عديل كده بالضحك خلاص مش كتبت بوستك ده ...ما نشوفك بتتحاوم هنا من حسع دي ..وخلي شيري ترد وتحنك ليك الناس ديل انا غايتو ما بقدر امش والله من هنا ..شوف ليك زول يمش غيري
07-28-2003, 08:31 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
تمبس والله حيرتونا ماعرفت اقرا الرد بتاعك وللا اعاين في الصورة دي انا عارف في ناس مدمنين للبورد دا ومن الصعب يتخلوا عنه هنا فعلاً الواحد بيتنفس بعمق واحياناً يعطس بلا مناسبة لكن لماذا لانجرب الأسبوع دا ونشوف النسوان ديل حايعملن شنو بالله مرة مشينا لينا بكاء لحد ما اتخلعت البكسي كلو نسوان الا أنا والسواق والمشكلة شنو في اتنين عجايز ديل ركبوهم قدام وانا قعدت ليك مع الباقي وراء غايتو ونسة عجيبة جداً قطعتي بصلي يايمة وانتظرت ليك الراجل اها مديت ليهو قدومي وقلت ليه كان ما اشتريت لينا الفضية حا امشي ناس ابوي وحاجات تانية كتيرة مافي داعي ليها
07-28-2003, 08:25 AM
ود عقاب ود عقاب
تاريخ التسجيل: 03-10-2003
مجموع المشاركات: 869
ودعقاب قال سبحة قال تعرف اليومين ديل جانا شيخ من السودان سبحتو مالية الحقيبة كلها الليل كلو المصيبة دا مابينوم يتمتم سااااااااكت ماعارفو بيقول في شنو طبعاً دا متخصص زواج وطلاق يعني لو عاوز تتزوج واحدة وراسها قوي بيحاول يلينو ليك شوية وكان طلقت واحدة وابت ترجع برضو عندو ليها علاج أظرف شيء انو البياض حقو صندوق سجاير بس
صدقت و الله يا ابو حراز و باعتبارى من الفئة التانية الشفقت عليها من البوردابيات{سيدات البورد}و العنونت بيها البوست حقك فانا اعلن نيابة عن كل نون النسوة فى البورد انو التبلم و التقنع بالتياب مرق روحنا بالذات فى الصيف ده لاكين نسوى شنو حتى لامن جينا ندخل صالون بت الاحفاد اولاد عمنا ما ريحونا اها محتاجين لى شى؟؟؟: انتهيتو ولا لسة؟؟؟ شيرى خالتك ام الجندرية بتكورك ليك يا تماضر مدير المسرح قاعد يشد فى شعرو خلاص الستارة قربت تترفع يلا شهلى
و كل شوية يابو حراز يا اخوى يرسلو لينا واحد يلخمنا
وحتى بوست شيرى حق دهن الكركار كملوهو الله غالب
07-28-2003, 08:43 AM
james james
تاريخ التسجيل: 06-21-2002
مجموع المشاركات: 2726
جيمس اها وانت حاتشتغل سكرتير وللا شنو عندي قريبي والله الغنماية تاكل عشاهو المصيبة دا محظوظ جداً بيشتغل في مدرسة اساس من المديرة لحد المراسلة كلهن نسوان الا زولي دا بس طبعاً في اجازتي الماضية سجلت ليهو زيارة في المدرسة غايتو لاتعليق جمال مدرسات ماشفتو قبل كدا وصاحبك دا قعد معاي وقعد يتكلم لي عن شبكة المياه عندنا انو فيها مشكلة ولازم نكلم المغتربين عشان يحلوها قلت ليهو الشبكة التـقـدد عينيك 00 دا وقت شبكة مياه دا
تعرفي يالنا في ناس زي القرادة الواحد لو لصق فيك كان يحلك الحل بله عندنا واحد بت خالتو بتكرهو شديد لكن كل يوم لازم يزورهم في البيت تقول ليهو كرطع الشاي دا وتاكي الباب وراك يشرب ليك الشاي جغمة جغمة وبعد كدا يقعد للونسة دمو تقيييييييييييييييييييييييل المهم ماصدقت اتقدم ليها اول واحد واتزوجتو المشكلة كان انصاري سنة من النوع البلبس الجلابية تحت الركبة اها الراجل ساق مرتو ومشى بيها البيت طبعاً ديل مرات لاعندهم شهر عسل ولايحزنون الواحد يكون ماشي مع مرتو ومالي الشنطة كلها كتب المهم بعد ما استقر بالبيت صاحبنا الدمو تقيل جاهم يزورهم دق الباب طلع عليه انصار السنة قام قال ليهو 00 خير عندك شنو قال ليهو جايي اسلم على بت خالتي صاحبك انصار السنة ضحك لحدت ماقرب يقع قال ليهو تاني مافي حاجة اسمها بت خالتي عاوز تجينا اما في الديوان وللا المسجد قال بت خالتي قال
07-28-2003, 09:24 AM
Mandingoo Mandingoo
تاريخ التسجيل: 09-28-2002
مجموع المشاركات: 2316
يا ابحراز اقتراحي انو يعملوا ثلاث أوض: أوضة للنساء فقط، وأوضة للعزابة فقط، وبين الأوضتين أوضة للعائلات فقط، فكده تضمن العزابة ما يتاوقوا لأوضة العزابيات، ولا العزابيات يتاوقوا لأوضة العزابه لكن المشكلة يا أبو حراز في العوائل ذاتهم، يقوموا يتاوقوا لأوضة البنات، فتحصل مشكلتين، مشكلة البنات ومشكلة حريمهم، طيب الحل شنو؟ في اوضة العوائل نخلي الرجال في جهة العزابه ونخلي نسوانهم في جهة اوضة البنات، رأيك شنو يا ابحراز أما حكاية عدم خربشة الوش دي ، فلأنو لو واحدة خربشت التانية أكيد التانية حتخربشها، والمره تكتلها ولا تشوه وشها، بس انت يا ابحراز البوديك تتفرج على شكلة النسوان شنو؟ فيها قطيع هدوم واللا شنو؟ أعمل حسابك من خربيش وشك في وسط شكلة نسوان، عشان هن حيعوضن خربيش بعض فيك وتحضرني هنا كلمات حساس محمد حساس (الدكتور محمد عبد الله الريح) في استراحة السبت في جريدة الصحافة في أوائل الثمانينات: جني وجن الأولاد البعاينو للبنات البعاينو للأولاد وجني وجن البنات البعاينو للأولاد البعاينو للبنات
07-28-2003, 10:52 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
العزيز الرهيف أبو حراز عاد نقول ليك شنو.. الذوق كملتو وخجلتنا والله انا قلعت توبي بصراحة من ساعة ما الحر بقي كده.. لكن برضو لابسين الهدوم الطويلو والمقفلة وشايفينكم حايمين بالشورتات والعراريق.. انحنا ما دايرين حوش برانا لكن ما دايرين كتمة نفس.. وبراك شايف كل يوم عصفورة بتطير من البورد.. عموما انا وبالرغم من الزعلات القاعدة تحصل لي والغلاسة من "بعض" البورداب قاعدة اشكي لبكري والادارة واواصل لأنو اساسا انا ما دخلت اعالج المرضى النفسانيين ولا احل عقد السنين عند ذلك "البعض".. وأهو الدليل حاجاتك الظريفة دي بتخلي الواحد يصدق حسن توقاعته دمت ايها العزيز
07-28-2003, 04:19 PM
Elmosley Elmosley
تاريخ التسجيل: 03-14-2002
مجموع المشاركات: 34683
ابوحسين اعرف ان الحياة تصبح بلا طعم ان كانت نساء بلا رجال او رجال بلا نساء المرأة تعطيك الأمل وتضخ في داخلك المزيد من الحياة كم جميلة هي حياتنا حيث البراءة بلا حدود والجمال بلا حدود جمال النفس والوجه والطبيعة والعادات في هذا البورد 00 تشعر بأن هناك الفة خاصة وتشعر بأن الذين تتحاور معهم هم منك ولك صدقاً هم اصدقاء بلا حدود صدقني تربيت في بيئة بها جد صعب للغاية واذا رآك وأنت تجلس في المكان المخصص للنساء فإنك حتماً سترى القيامة في طريقها اليك ويوم ان مات حملناه بسرعة للمقابر الله يرحمه 00 فلم ينتظر الموبايل والأنترنت ولم يدري ان أهل العوض سيلتقون بناس يااااااااااااي وهاااااااااااااي
رجاء هذا الحوش الكبير الذي جمعنا ليس حوشاً كبيراً في مساحته فحسب بل كبير في قلبه وحبه وآماله اصبحنا جميعاً اسرة واحدة واصبحنا نعزف على اوتار بعضنا أجمل سمفونيات الإخاء والصداقة قال لي ذات مرة أحد قراء البورد هل انتم تتعارفون من السودان ؟؟ قلت له كثيرون منا لم يلتقوا ببعضهم حتى الآن ولكن التقت انفاسنا وافكارنا ورحيقنا وفوق هذا وذاك التقت ايادينا من على البعد من اجل سودان كبير لك التحية وانتي تدخلين على بوستاتي وترفعين من معنوياتي المحطمة بالغربة واتمنى ان امنح البسمة لكل من يقرأ لي حرفاً
الموصلي قال بلبصة قال انا عارف الكلام دا عشان كدا دائماً بكون مسؤول عن عشاء الفنانين فهنا يمكن ان تصاد عشرة عصافير بحجر واحد اول شيء بتلصق مع العازفين والفنان وهنا الأنظار كلها تكون متجهة ليهم وتاني شيء بتعشى معاهم لكن انا مجنون 00 عاوزني اقيف مع ناس العرضة قال باسطة قال
07-29-2003, 09:56 AM
ود العجمى ود العجمى
تاريخ التسجيل: 09-21-2002
مجموع المشاركات: 1595
الله يحفظك يا اخوى والله كلما النفس يتكتم والروح تزيد حرقتها اجى لبوست من بوستاتك دى رويحتى تفرهد وصدرى يتملى نسام تعرف يا ابوحراز انا قبل كدا قلت ليك احبك وهسى اكررها ليك يا راقى احبك جدا واعرف انى تورطت جدا
بالمناسبة انا ما بت - هى ما كلمت ما قالوا السفير طلع بت اها دا حيكون موقفو شنو خلال الاسبوع النسائى البوردابى المقترح دا؟
تعرف مرة قلت لزوجتى احبك قال لى يازول خلى المياعة - اها فكرت اقولها لبت الجيران لكن الحمد لله الله انعم على بيك يا حبيبى
أبو حراز..إنت من ناس أب حراز..شرق والله غرب..... ... وبعدين شنو الحكاية إنتا عايز تدافع لي بنات الشيخ عن قضيتن والله شنو...كلامك دا ما فيهو إدانة ضمنية ليهن... الوصاية من الرجال... الوصي الأب والوصي الإبن والوصي الإبن الذي لم يبلغ سن الحلم.. والوصي الجار.. والوصي لمجرد الذكورة وإن كان أبله... ألا ترى انه فيهن المهندسة والدكتورة والصحفية..والباحثة والمعلمة... المهم يا سيدي حسن نية منك ما بطال لهن
07-30-2003, 07:39 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
ود العجمي لك التحية ولك كل الحب والتقدير طبعا من حقك ان تحب وان تقولها 00 طبعاً نحن الرجال مع بعض سنمرح ونسرح زي ماعايزين لكن اياك ان تقولها لبنت الجيران 00 واشكرك على رفع معنوياتي ولم اكن اتوقع ان بوستاتي تساعد في فك الدبرسة بهذه الطريقة
سودانوبس انا لامن هذي ولا تلك ولكن ابوحراز لها وقع خاص في نفسي واتمنى ان ازورها فهي تحمل لي الكثير من الذكريات ايام كنا نغرف اللبن من الحلة بالكوز والجضوم تعرف الجابها شنو 00 اياهو لبن اب حراز دا 00 كانت الدلخليه بها ماتشتهي الأنفس وكانت تعوضنا الكثير من الحرمان العاطفي حيث تفتقر الكلية آنذاك للجنس اللطيف فكنا نعوض هذا الحرمان بشرب اللبن 00 أنا كنت آآآآكل اقل شيء ثلاثة عيشات في الوجبة الواحدة 0
07-30-2003, 08:58 AM
haneena haneena
تاريخ التسجيل: 05-27-2003
مجموع المشاركات: 2002
اشكرك ياحنينه على المشاركة وبالفعل نحتاج لهذا الأسبوع لمزيد من الخصوصية لنعرف كيف يتم تفكيرنا في ظل غياب الرجل او في ظل غياب المرأة أعرف ان ذلك لن يتم ولكنها مجرد مزحة خفيفة لإضفاء نكهة علىالبورد فنحن نشكل زهرة البورد ان جاز التعبير وأنتن الرحيق الذي تستمد منه هذه الزهرة روعتها ورونقها وعطرها والقها
08-02-2003, 03:18 PM
almohndis almohndis
تاريخ التسجيل: 05-05-2002
مجموع المشاركات: 2663
المهندس لك التحية والمعذرة على الرد المتأخر فقد كنت مشغولاً جداً بظروف عملية والف حمداً لله على سلامتك المهم شفناك اشكرك بحرارة على المشاركة واتمنى ان نخصص اسبوعا لآنسات البورد ولكن اعتقد ان هذا لن يتم بسهولة لأن البورد وقتها يصبح بلا طعم وبلا نكهة
بعيداً عن السياسة ياجماعة عندي بوست بعنوان البورد مهاترات ودروايش وكدايس لم أجده وقد تنبأت فيه عن فيضان القاش لكن كلام القصير مابيتسمع 00 الا يعني نقول فيضان عديل 00 انا قلت ليكم والقاش يوشك ان يلتف حول خصر كسلا ويقبلها 00 لكن العوير دا رغم حبي له فقد ابتلعها
08-06-2003, 05:20 PM
Raja Raja
تاريخ التسجيل: 05-19-2002
مجموع المشاركات: 16054
أبو حراز العزيز حمد الله على سلامة رجوعك.. يالله تعال نبدأ المشروع الناديت ليهو، ومن السبت الجاي علينا ده يكون اسبوع البنات، ونشوف البيحصل شنو، شايفة شيري رجعت، وانا بحمس ناس هوزي والمشن السودان وطبها هالة تماضر وهالة قوتة واستاذتنا اشراقة وزولة والسفير/ة وحنونة حامشي بي دربي ده افتشهم
رجاء لك التحية وانتي تعطرين بوستي البسيط بكلماتك الرقيقة طبعاً الجماعة بهزروا كتير معاي وقالوا لي الأسبوع دا فاشل فاشل لأنو معظم بنات البورد في اجازة بالسودان ولكن ما الاحظه هذا التواصل الكبير منهن ففي كل يوم نشتم انفاس السودان ورحيقه وعبقه وعطره عبر اقلامهن وبالتالي يمكن ان ينجح الأسبوع لك التحية والتقدير ولكل المشاركين السفير دا طلع بت وللا شنو تعرفي في اجتماع بورداب جدة واحد برضو كان بيكتب باسم بت القى الراجل قاعد وسط الرجال في الإجتماع قلت ليهو انت معانا وللا معاهن قام قال : في البورد معاهن 00 وفي الإجتماعات معاكم
هوبليس تعرف انا في الحفلات زول مسكين جداً وعندي عقدة كبيرة جداً لأني لمن كنت صغير كنت بحب الحفلات خالص وكان في واحد مجنون طوالي بيكتل أي حفلة اها دا متخصص في شخصي الضعيف بس مايشوفني جيت الحفلة يقوم يسكني لحد البيت اها من يومها بكون لابد بعيد في الحفلة قال تنظير قال
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابوحراز
tmbis
lana mahdi
james
Mandingoo
ABUHUSSEIN
Raja
Elmosley
ود العجمى
haneena
almohndis
فيس بوك
تويتر
انستقرام
يوتيوب
بنتيريست