دعواتكم لزميلنا المفكر د.الباقر العفيف بالشفاء العاجل
|
|
 لهم نيلهم ولىّ نيل
|
فى كل مرة، أتحايل على عشقى، كي أخالف وصية أبى العلاء، ولا أخفف الوطْ، قليلا أو كثرا، على تلك الشوارع والدروب القديمة، ثم ينبهنى الهواء حين يلامس جلد الروح، حين تقطب المدينة وجهها الأزرق الحزين
والشارع هناك، مثل "إيكاروس" كما يقول أدونيس، يطير ويحلق بجاحيه المفردين، لكنه لا يحترق بنور الشمس، بل بآهات الموجعين الممسكين بعنق الأرض
أحاول وأنا أسير قرب حبيبتى الخرطوم، أن أصدق المعرى، لكن وفى كل مرة يحرجنى تصديقى
ما أنتِ بحبيبتى التى أعرف، هل غطى الغبار قسمات نوافذك العتيقة، أم هى حصى الدموع تراكمت فوقها وعليها؟
ألا يزال "النيل" يبعث رسائل غرامه إليكِ مع أطيار الأصيل؟ أم أنه أدار وجهه وصار يمارس الركض شمالا غير عابئ بأغنياتك المطرزة بطعم الأمسيات الندية؟
نيلى أنا
هو ذاته، ذلك "الصلاحى" البهى، بكل وقاره ووسامته التى نقشت تفاصيلها بين أرجاء الفراديس، ويلوح وجه "التجانى" بتلك السمرة المشبعة بخمر الألهة الودودة
هو ذاته
ذلك الذى يلمع فى الظلام مثل حسام جوهرته النجمات دونما نظام
هو ذاته
أنيس الجروف وصفى الحروف
أسير قريبا منه، لكن يتوحد النبض مع دندنات الموجات النحيلة، أسير وكأنى أير تحت سقف المخيلة، أغوص فى تفاصيل الصورة/الوهم، والحقيقة/الحقيقة ليصدمنى واقع محبوك بخيوط الوقت القاسى وما تبقى من ذكريات وأدتها أيدى المرارة وداست عليها سنابك الغفلة
فيا ايها الصديق
سوف أستدرج الليل لينضم إلينا، فهو الوحيد القادر على غواية الحزن فينا، وهو الوحيد الذى لديه مفاتيح اسرار هذا اللهاث الذى لا ينتهى
يا ايها النيل
دعنى أرسم حزنى واشكله قمرا تنزف خاصرة العشق فيه وردا وأغنيات، دعنى أودعك ونفسى أيضا، فما عاد فى الضوء متسع للحلم ولا أمست الضفاف مناديلا رسمت الأنسام على أطرافها قلبا من الحنين والمحبة، يخترقه سهم من الوجد القديم
|
|
 
|
|
|
|
|
|
|
|
Re: لهم نيلهم ولىّ نيل (Re: أبوذر بابكر)
|
الكلام أدناه لأخونا/ السر محمدين " السر طَبَزَا " العامل في النقل النهري :
( فكأن القلوب مما استمدت منك سكرى مسحورة من شرابك ) .
الغناي , قال الكلام ده ..
شاعر زيك غشانا ياخ , و واحد تاني برضو قال لينا ( عزة في هواك ) ..
قاموا أهلنا علقوهو لينا حجبات - في الزمن العلينا ده -
قالوا حرز و حصن و آية كرسي لينا و للزمان .. تحرسنا و تحمينا .
شوف أهلنا ديل بالله طيبين كيفن و عورا ..
من ما الله خلقهم بتغشغشهم إيماناتهم | Quote: لهم نيلهم ولىّ نيل |
تاني جاي تغشنا يا شاعر بي جنس النضمي ده ؟؟
لهم نيلهم و بس . نقطة على السطر ..
نحنا ما عندنا التكتح ..
كلو حقهم , أكان عجبنا .
وحتى حجبات أهلنا ديل ( آخر دليقين ساتر عورات روحنا ) دايرين يقلعوهم مننا ..
نمشي أم فكو سااكت .. ميطي , ياهو شبهنا .
إنتو يا الشعراء الله ح يوديكم النار ..
و الحيكومة الله ح يدخلها النار ..
و الجرايد و الراديو و الأفندية المسغفين المتفلفسين , و الناس أبان بدل و عمم ساكوبيس ..
و الحراميين صغارهم و كبارهم , و الناس الساكتين ساكت و مقطعنو في حشاهم ..
و السماسرة ديل , و ناس الأحزاب السجمانين , و الرجال و الحريم و الشفع ..
كلهم الله ح يوديهم النار ..
و إنت زاتك ..
عشان بتكضبوا علينا , و صدقناكم ( هسه بقينا ما صديقين ) .. قالو العترة بتصلح المشي ..
عشان كده ما ح نصدقكم تاني ..
و لا بنصدق من هنا و لا قِدّام أي زول يجي يقول لينا النيل و البلد و نحنا و إنتو و الحيكومة و أخوي و ود عمي و و و و ..
كل النضم الفالصو داك .
ليه تغشونا ؟؟
ما تخافوا الله فينا ؟
....
إنتهى كلام السر طبظا.
نهارك سعيد يا مطر .
| |
|
|
|
|
|
|
|
|
|
Re: لهم نيلهم ولىّ نيل (Re: Emad Abdulla)
|
تعرف يا عماد
المسافة بين نضمى "عتيق" لما يقول
كلما اتأملت حسنك يا جميل
ألقى آية تضاهى آية
وبين حجوة أم ضبيبينة
زى المسافة بين "شين" الشِعِر، و"شين" الشَعَر
مع إنه ياها نفس "الدايلما" واللخبطة البتسكن جوه الروح ديك
إصرار الشعراء يا عمدة على الكضب، ما أظن عنده سبب غير الإمعان الشديد فى الريدة
الريدة فى مطلقها الكامل، ريدة البلد وريدة الحاجات السمحة وحتى ريدة العذاب
هسه عليك الله حصل سمعت ليك بى شاعر مات وهو مبتسم وسعيد
ده كله ما من الكضب، لكين من الإصرار على الكضب
التجانى من بدرى قال وسوا العليهو
حملتك الأملاك فى جنة الخلد
عشان كده تعرف، جماعتك ديل قدر ما يناتلو ويجابدو فى "نيلنا" ما بقدرو يقلعوهو من أملاك الخلد ديل، اللهم إلا هو يجى للزول طائعا مختارا، ومافى شى بجى كدى إلا تجيبه المحبة، ومافى محبة إلا يكون فى محبة سبقتها
ونحن ريدتنا ومحبتنا لى نيلنا، على الطلاق يا عمدة، سبقت جيتنا للدنيا البقت مسيخة دى
زمان كانو بقولو إنه فى نوعين من الناس أصلهم ما بكضبو
العشاق والموتى
وأنا دائما قاعد أضيف ليهم النيل، اصله ما بعرف لا الكضب ولا المجاملة
يعنى لو "حافظ إبراهيم" ذات نفسه بنى ليهو بيت فى قيفة "أب حسنان" كان صحى فى فجر يوم من ايام خريفنا والنيل فى عز زعله، ولقاها مافى، سبحان الله
تلقاهو راقد جنب الجروف ويمسح ليها فى خصلاتها الخدرا ديك، وبعد فترة بسيطة، عينك ما تشوف إلا وجحافل جيش هولاكو الموجية تجى كابسة لا تخلى أخدر ولا يابس
أها ذكرتنى
عليك الله النار دى مالا؟
عيبا لى بس
وعلى الرغم من كده، لا زلنا بنحاول نتكفا شرها
اقول ليك يا عمدة
خلى نيلك فى جواك
وأمسك سكة ريدك
امسك فيهو وعبى نداك
واملا قليبك قبال إيدك
وآخر دعواى
أحبك يا صاحبى
| |
|
|
|
|
|
|
|
|
|
Re: لهم نيلهم ولىّ نيل (Re: أبوذر بابكر)
|
ثم
ما هى إلا برهات قصار حتى ينحنى القلب خاضعا متخليا عن كل أسلحتة
ولا يعود ممسكا إلا ببعض أمنيات
لا أطيق التنكر لهذه الصبية الزرقاء المغبرة
خرطومى التى تستسقى السماء، فتجيبها آلهة المطر
إنا أعطيناكِ النيل
تستنكر غيابى
فلا أجد غير ما قاله الياس فتح الرحمن
تستنكرين غيابى
ودلوكِ من أسفل البئر يوم التذكر
ما شال غير ثيابى
أخرج الآن
أصطحب اللغة الكنز
والشوق للأغنيات التى
ستشن الحروب على سبب الحزن
يوم إيابى
الله
هنا كانت ثمة بافطة خضراء شاحبة الوجه
معلقة وهى تولى وجهها شطر الغرب
"مكتبة النهضة السودانية لمؤسسها محمد عباس أبو الريش"
هنا كنا
وهناك كان النيل يعتصم بطينه النبيل
| |
|
|
|
|
|
|
|
|
|
Re: لهم نيلهم ولىّ نيل (Re: أبوذر بابكر)
|
| Quote: شارع "فيكتوريا" يفتح فمه من أمام القصر، وهو فى المبتدأ قصر، لا يهم ساكنه، سواء كان غوردون أو هوراشيو هربرت كتشنر أو جعفر محمد النميرى، هو قصر، ثم تنتهى مسيرة "فكتوريا" عند نصب كان يشبه فى طعمه شكل علبة السردين وفى وسطه مسلة قصيرة المعنى، تمجد قتلى حروب التى غابت شمسها الآن، بما فيهم أولئك "المشلخين" أفقيا ورأسيا، ثم يقف بعدها سور السكة الحديد فى وجهك، وما عليك سوى أن تقفز من فوقه ليسرى جسدك، فى الجهات الأربع أيضا، هكذا أريد أيضا للمعنى أن يتجسد. |
| |
|
|
|
|
|
|
|
|
|
Re: لهم نيلهم ولىّ نيل (Re: أبوذر بابكر)
|
وما الذي بقي لنا يا صاحب غير أن نضم إليناطيب خداعنا لأنفسنا..
هو ما بقى
وهو ما لن ينال منه أحد..
المزيد من التفاؤل بما تخبئه الأرواح الجميلة مثلك،
بالمأمولِ في أيامٍ قادِمات.
حمداً لله على السلامة
وليك وحشة
| |
|
|
|
|
|
|
|
|
|
Re: لهم نيلهم ولىّ نيل (Re: بله محمد الفاضل)
|
بله
الشاعر المبلول فى ضوء الطيبة
نحن بقينا
وذلك اللمتد فينا شرايينا تحمل الحياة
معنىً وحقيقة
وحتما ستواصل سنابل الخصب صلاتها تحت الشمس
حتما سوف تطل بوعودها الخضراء
أو كما قال محمد المكى
إن شاء الله إنت والعقاب طيبين
| |
|
|
|
|
|
|
|
|
|
Re: لهم نيلهم ولىّ نيل (Re: Raja)
|
رجاء
عباسية البهاء
الشوق كتير وعريض والله
كيف أحوالك ووين الحى بيك
لسه فى الهلال الخصيب
أكيد حيكون بيك
زاد جمال ونضار وطيب
| |
|
|
|
|
|
|
|
|
|
Re: لهم نيلهم ولىّ نيل (Re: عبدالله داش)
|
عبد الله
الزول البستان
كيفك يا البيك نور إقليمك
كله لينا والله يا داش
المداخل صعبة وعصية
لكن آيات المحبة هدت الجبال
أو كما قالوا
سعدنا بالطلة الخدرا المعطرة
| |
|
|
|
|
|
|
|
|
|
Re: لهم نيلهم ولىّ نيل (Re: د.محمد حسن)
|
د. محمد
كيف الحال يا سمح
عساك بخير
عدنا لنلتقيكم مجددا
من أمامنا الفرح ومن خلفنا الحبور
منكم وبكم تستقيم المعانى
وتخضر الأيام
سلمت لينا يا دكتور
وكل ايامك سعادة
| |
|
|
|
|
|
|
|
|
 Re: لهم نيلهم ولىّ نيل (Re: أبوذر بابكر)
|
لا حولااااااااا..
هسي كان الواحد دعا عليكم بكون خاتي ..
أنا ما قلت ليك ما تمشي تهبش في الحتات البتسوي الوجعة ..
أها جبت لينا منو شنو ؟
موية ولا ريحة جروفه ؟
ما ياهو زي جنس الألم والنضم دا ..
أو غير نحبه ونناجيه ..
كما قال التيجاني يوسف بشير ..
أيها النيل في القلوب سلام ..
الخلد وقف على نضير شبابك ..
أنت في مسلك الدماء وفي الأنفاس ..
تجري مدوياً في إنسيابك ..
أو كما خير بينها والنيل ..
أنت يا فاتنى أم النيل زخار
بنفسي كليكما من شبيه
الناس دي زي ما قال عماد عبدالله موووش ربنا بحاسبن ويدخلهم النار ؟
أها يا مطر سلمت على نيل بلدانا وعلى شبابه ولا أصابك داء الوجعة وأقام معاك الحزن كما حملته من هنا ..
أو كما قلت أنت يا مطر في ترنيمة النهر ..
ترنيمة النهر
نحن
كلما مرت دمعة
تحت عرائش التعب
تصطك فينا
مفاصل الأماني
تؤرقنا سقيا العظام الخائفة
ونحن
كلما نام ظل
توسد قبر جسده
يستيقظ الغمام فينا
ليصعد نوم الظمأ
إلى مراقد النهر
ليهبط خرف الطين
على لهاة الأغانى
نحن
جرح الموج النائم
بين بكاء الماء
وضحك الجمر
سلام يا صاحبي ..
صلاح حتى مطلع الفجر ..
| |
|
|
|
|
|
|
|
|
|
Re: لهم نيلهم ولىّ نيل (Re: معتصم دفع الله)
|
معتصم
يا وش الجروف فى الصباحية
Quote: نحن
جرح الموج النائم
بين بكاء الماء
وضحك الجمر |
قدر ما ننسى العلينا
تانى تصحى فينا جلجلة الجراح النائمة القديمة
وتانى تترنم بأحزان النهر
بالله هسه مفروض منو يدعى على التانى
كيفك بالله
وكيف مشى الأشياء ودبيب الأيام
الناس هناك سعيدين والواطا بتحاول تلم أولادها عليها
الأزرق ما زال يمارس أفعال المحبة القديمة
والجروف تلوح للماشين وتقسم ليهم فى الندى والأمل وشوية فرحة لسه باقية
مشتهنك والله هناك ومستننك
ودرب الرجعة لسه بنادى
يا زول يا فرح
| |
|
|
|
|
|
|
|
|
|
Re: لهم نيلهم ولىّ نيل (Re: منى على الحسن)
|
أهلا يا منى
شيلى الزهور
وأهديها ليك
ختى العطر جنب الندى
الفايت عليك
منك الضوء الملون يا منى
ومننا الفرحة
نشيل منه ونسوى لوحات الصباح
نكتب أغانى الأمسيات
وزى ما قال العبادى
تشربى بى كفوفنا لما تتكفى
وهاكٍ النيل
ومعله كل بساتين الغنا
حبابك يا منى
أكيد سعيدين بيك
| |
|
|
|
|
|
|
|
|
|
Re: لهم نيلهم ولىّ نيل (Re: معتصم دفع الله)
|
أبا ذر أيها المسكون بريحة طمي الضفاف
Quote: ما أنتِ بحبيبتى التى أعرف، هل غطى الغبار قسمات نوافذك العتيقة، أم هى حصى الدموع تراكمت فوقها وعليها؟
ألا يزال "النيل" يبعث رسائل غرامه إليكِ مع أطيار الأصيل؟ أم أنه أدار وجهه وصار يمارس الركض شمالا غير عابئ بأغنياتك المطرزة بطعم الأمسيات الندية؟ |
لا يزال يا صديقي .. لا يزال
العيب في هذا الزمان الذي أحال الألوان الزاهية إلى بقع باهتة ...
و لكن النيل الأصيل لا زال يحتفظ برونقه و يجدده مع كل ( دميرة )
دمتم
| |
|
|
|
|
|
|
|
|
|
Re: لهم نيلهم ولىّ نيل (Re: ابو جهينة)
|
| Quote: ألا يزال "النيل" يبعث رسائل غرامه إليكِ مع أطيار الأصيل؟ أم أنه أدار وجهه وصار يمارس الركض شمالا غير عابئ بأغنياتك المطرزة بطعم الأمسيات الندية؟ |
تلكم الحبيبة الخرطوم ما أبدعها أيام كانت تبتسم لك في زهو وكبرياء... حتي هي اليوم مستغربة لذاتها ... ياأيها الاباذر الجميل لا تنكأ الجراح فما عادت الخرطوم وماعدنا!!! فالغرباء يحتلون المدينة والاغنياء الجدد يخربون لوحة البراءة فيها وسكنتها كل المآسي ... فهل من عودة تاني ؟؟؟ سنعود يسبقنا النشيد سنعود ياخرطومنا وكل الحفاوة تبتهج ...سنعود إليك ياخرطوم يوما تسابقنا البشارات الحوالم.
دمت بخير ياايها المبدع ابوذر.
...................................................................حجر
| |
|
|
|
|
|
|
|
|
|
Re: لهم نيلهم ولىّ نيل (Re: الرفاعي عبدالعاطي حجر)
|
الرفاعى
تحايا وترحيب وإبتهاج
هى لا تزال تمارس إبتسامها وتسكب الندى فى راحات العالمين
ربما لتدارى سوئاتنا المنحوتة فى أرواحنا
ربما لتخفف من وطأة من سكن فيها من اسى
فلهم خرطومهم ولنا خرطوم يا حجر
فبعد حين نعود
بعد حزن نعود
وسنلافيها كما هى، تنتظر القادمين عند بوابات الضوء
ومن دخلها كان آمنا
من يعشقها بات آمنا
فدم طيبا وعاشقا يا رفاعى
| |
|
|
|
|
|
|
|
|
|
Re: لهم نيلهم ولىّ نيل (Re: ابو جهينة)
|
ويا ألف أهلا بالجلال كاملا
لا يزال يا صديقى ذلك الجليل
يتبرج فى كل "عصرية" بوقاره المألوف
يداعب هذا وينادى ذاك
وما فتئ كرنفال الأطيار مشتعلا
عشقا ومودة وتقديسا لا ينتهى
أما الزمان يا جلال
فهى حاله المعتادة
يوما يبتسم فى وجه الباكين
وآخر يقطب جبين موجه أمام عرس الأرواح
ونحن بيت كل هذا
مجاذيب نتحولق حول مجامر آلهة المحبة الطينية العتيقة
نحترق ليرانا حبيبنا النيل
| |
|
|
|
|
|
|
|
|
|
Re: لهم نيلهم ولىّ نيل (Re: معتصم دفع الله)
|
يا معتصم
صلاح قمر يتأرجح
بين فضاء الإشتهاء ومجرات الدهشة
ما بين صلاح شتات وصلاح أحمد إبراهيم
هو ما يضمره الضوء حين يزمع زيارة الحديقة
هماقدران فى مجرى
تبارك ذلك المجرى
ومن عجب أن قايل البيت أعلاه
هو "صلاح" ايضا
وهو نيلنا جميعا
يبدأ مسابه من أعالى جنان الجمال
ليمر بكل أراضين العشق السرمدى الذى لا ينتهى
| |
|
|
|
|
|
|
|
|
 Re: لهم نيلهم ولىّ نيل (Re: Adil Osman)
|
أخي الحبيب أباذدر
سلام على روحك الطيبة
عندما إفتقدناك أفردت لك بوست للبحث عنك فقد خلت هذه المساحة من الرمزية الراقية ردحاً ، وها أنت تعود والعود أحمد.
| |
|
|
|
|
|
|
|
|
|
Re: لهم نيلهم ولىّ نيل (Re: Alsa7afa_30)
|
شاعر الدهشة ابا ذر عدت وعاد الربيع
متوشحاً شال من خضار وزرقة من موية النهر
حمداً لله علي سلامتك إفتقدناك كثيراً يامرهف الحِس
معذرة علي ركاكة الكلام لكن قدامي كمية من الأوراق
فجازفت لكي أعمل هذه المداخلة .
| |
|
|
|
|
|
|
|
|
|
Re: لهم نيلهم ولىّ نيل (Re: ابوبكر يوسف إبراهيم)
|
العزيز أبوبكر
تحايا ومودة وسلام
أجمل أنواع القراءة، هى تلك التى تبعث ومن خلفها محفز يبحث عن خلايا الجمال
فالجمال يفضل دائما الجلوس قريبا من قبح الأشياء
ربما لتتجلى ملامح قسامته، أو لعله يريد أن يورى الناس إسم القبح
فلنكتب ذاتنا يا أبا بكر
وليكن بعدها ما تشاء له به الكتابة، شريطة أن يكون الصدق هو المطية
وأى إنطباع يا ابا بكر يتأتى من لدن النفس تجاه أى شى
هو فى معناه البدئى نقد
ليس بالضرورة أن يجئ فى هيئة "أرستوتالية" أو افلاطونية، بل فليكن متوالدا من حيث الرؤية وما يعّن للإنسان من أشياء تتبدى أمامه
أحييك يا سيدى على علو حسك لديك، وعلو مفامك لدينا
وأقدر لك جزيلا ومليا، إهتمامك بهذه "الخربشات"
وفى كل الأحوال
تمتلك روح الناقد والله يا ابا بكر
فهنيئا لنا ولك
ودُم طيبا وسعيدا ابدا
| |
|
|
|
|
|
|
| |
أبوذر بابكر
Emad Abdulla
هند محمد
بله محمد الفاضل
Raja
د.محمد حسن
محمد علي ياسين
معتصم دفع الله
ابو جهينة
الرفاعي عبدالعاطي حجر
Adil Osman
Alsa7afa_30
هاشم أحمد خلف الله
فيس بوك
تويتر
انستقرام
يوتيوب
بنتيريست