يعتريك فضاء الغربة.. تعتر ليك دمعة.. او قل دمعتين.. تتلفت يمن شمال..تجبد فردة الذكرى/الحنين..عشان تستر اطرافك من زيف الجليد ..و القلب اسى الأطراف عتوا.. في دروب المدنية.زاخر الليل.. تخلق فضاك..غنيوة..اهزوجة..و تتعجب لحال الدهشة فيك.. وكتين يكون النغم معادل لبقاء الروح..والحلم الشفيف..تسهر..وكتين تسافر بيك اطياف الناس..عيون الناس..وشهيق المحنة الدفاق..و تختزل جواك معنى المكان.. كاقوى ما قال بيهو فيريليو (جمالية الإختفاء).زومن بعض تختفى.. تدسى من بهرج المدينة الزايف.. لمبات شارع واحد.ز تعادل رتاين القرى و الفرقان..و برضك طعم الضو مسيخ.. مسكون بالإشعاع و آفات اخر الزمن اللعينة..
على جدار الليل تتكي ..و تحنس شبق الكلمة .. لو كان تمرق خصوبة..و تلد ليك حرفين.. في مقام البهجة.. يكونا ليك عنوان.. لكن هو المبدأ يا سجيلي..الحنين ما بنكتب.. ما بنكتب..
في نواحي القلب.. تحضر صورة:
تهريك زوامل التعب العريجة..و تموت بي حال الشوق فيك.. الوجوه.. التياب (الوانهم الشترا زي ما قال انور كنج عن راقصين المردوم ذات يوم.. لكنو برضو دخلوا مرافي النبض فيه و عجبوهو بطريقة أو باخرى.. أو ستات الشاي لمن استحضرتهن هالة الكارب ..في وش مصطفى مدثر..لمن قال ليها .. كيف يعني الأستاذة فاطنة احمد ابراهيم تقعد تتفرغ لمبارات ستات الشاي.. فقالت ليهو كلام عن تيابهن اليمونية و الصفراء و الحرجلية..و الوان الوهج الدافق)..التياب.. هاجة في لونها البرزخي.. بتحكي عن سيرة الفرح ..و التعبير عن الذات..ليه ناسنا بحبوا الألوان الزاهية؟..و ليه هم دايما بيكسروا خاطر ايدولوجيا اللون و بيجهجوها في ذات نفسها؟
في فضاءتهم البعيدة.. برضك ليهم القدرة يخلقوا تصاوير تعبيرهم ..و حب الحياة ..و الجمال..
في حضرة البن:
تشرب نبضك رشفة رشفة..تتدشى..و تتحمدل..و تسأل الرب يديمها نعمة..و فجأة تعتريك حال الإنسان النادرة..نحن كده و انتو كيف؟.. بنغنى جماعة..بنزرع جماعة..بنحصد جماعة..وبنشرب البن جماعة.. عبقرية المكان.. بتخلق فرح الروح..من هنا كان التم تم..و من هنا كان سر الطبول..و كان معنى الإنسان.. حليل الحاجات بتمشى في بلد.. كل حاجة فيها بتمشى..و تتقبر في مقابر النسيان العامرة.. دايما بتتسفزك البدايات .. بنات الديم (بندر الخرتوم) بيغننا نفس الغنا الكانت بتغنيها عماتنا و خالاتنا..لكن هناك ببقى حق الناس التانين ..و تعبنا بيروح شمار في مرقة..لكن عزانا.. ان بنخلق الفرح لذاتنا..و مش مهم.. يفرحوا الناس الهناك ببواقي فرحنا.. عليك اللعنة يا زول هوي..و كتين تتذكر بدايات الحاجات..وتكون غنية اللخضر لوني زرعي ..جات من هنا..و بعد داك يجي زيدان ابراهيم..و يجي و يجي .ز لغاية منال الأزهري.. و تشيل شوقك المفضوح و تسأل.. سمعتوا اغاني البن؟.. يسكتوا الناس في الدارة..يقوم واحد يقول ليك.. دي كانت في بيوت احرار..!!..يا زول خاف الله سيدك..
من الأرض جينا..و ليها بنرجع تاني.. معنى ارهق دهاقنة الفلسفة و اعياهم بالحجة.. لكن بناتنا هناك.. في عز دارة البن بييقعدن فوق الأرض..فندك.. فندكين.. مدق..مدقين..فنجال فنجالين..و شرشرق..و يبدأ الريتم المجنون.. يفترشن.. بروش الحنين..و دي براها سيرة تانية.. تحكي ليك.. كيفن لمن تصفو ذات الإنسان..و تقرر.. تكتب معنى الوجود فيها.. البروش.. هناك ليها تفانينها..و معانيها.. برش الصلاة..برش الرقاد..برش الحنة..و برش الجماعة ..شقة كبيرة ممتدة قدر خاطر فنان شاطح..
يبقى قول حاجة.. اخيرة.. لمن تغني حكامات البن.. يظهر عامل السن..بتغيب الفتوات (لأنهن مشغولات بغنى المردوم و الكرنك و النقارة)..و تستعجب في ذاتك.. لفكرة دوركهايم عن مبدأ تقسيم العمل.. هنا الناس براها بتقسم الحاجات..و بتعرف حدود الإمكان..و تكتب سيرة الحياة بصدق غريب.. بالجد غريب..
كبر
12-24-2007, 03:43 AM
Kabar Kabar
تاريخ التسجيل: 11-26-2002
مجموع المشاركات: 18547
جلسات الفرح و الرقص في جنوب كردفان/جبال النوبة.. دوما ما تتخذ موقعها في فضاء مفتوح (حصل حسيتو بالخنقة في الصالات و الصيوانات) يشكل مضاد للمغلق..و بالتالي معنى الحرية ..كفكرة تلقائية و شفافة..
الريتم: ايقاع قريب من او مزيج من الكرنك و التم تم و الكمبلا.. و الأدوات المستخدمة.. فنادك جبنة.. مدقات.. فناجين..
و هناك اعتماد كبير على الصوتي (vocal/acustic )..مع ملاحظة تدرج التناسق..و مسألة القرار و الجواب كما يقول اخوانا ناس المزيكا..ثم الكورالية العالية.. مع ملاحظة .. غياب الصوت الرجالي تماما.. لأن في اغاني البن لا وجود لهم (ما يجي واحد يجيب لي سيرة بيوت احرار ولا غيرو.. لأنو دي اصول اغاني البن كده).. ايضا ملاحظة انو اغاني البن في جنوب كردفان دوما ما تؤديها ناس متقدمات في السن (يعني على الأقل متزوجات)..
هذه الجلسة .. من انزلها في اليوتوب (و التحية له اينما ما كان و كيف ما كان).. اضاف انها لقبيلة كدقلي..و قد تكون فكرته صحيحة.. لكن ملامح الناس بتشبه كتير اهلنا الشوابنة..
التحية لهذه الكوكبة الجملية..و للأخ سيد الفرح الذي يتوشح القرمصيص..و التحية لناس قناة النيل الأزرق.. لأنهم دايما بيحسسونا بانو الحاجة ماشة على خير..
12-24-2007, 03:59 AM
Kabar Kabar
تاريخ التسجيل: 11-26-2002
مجموع المشاركات: 18547
أغاني البن وحنين ما "ما" هذه المفردة ورغم رقراقها إلا انها تحكي الكثير عن اشراقات تلك الأزمنة والأمكنةالتي تضيء ذكراها حاضرنا ملء المكان... وكما تسرقنا من صقيع الشوق والشجن واشياء اخري إلى دفء الزمن الجميل.
اونكو..دندنق.. عيد سعيد و بخيت.. فنيا منهم يا صديق.. بواقى الدمع و الجمال.. عساك طيب..
الى تماضر شيخ الدين.. كل سنة و انتي طيبة.. و العيد الجاي ربنا يحقق ليك بعض الأمنيات.. استمعت للعمل ده..و خطرت في بالي تماضر الفنانة..فلازال يا صديقة بقية من الوقت تتسع للإرسال و الفخر كمان..
الى الجندرية.. كل سنة و انتي طيبة.. سر الحنين في بلدنا.. لعنة ابدية..و برضك حبابك.. نوشفك في سبر الدلنج يوما ما..لمن ايقاع النقارة يحلف بجمالو ما يعانق الإ ايقاع كرنك صخاب..
الى نور تاور..
كل سنة و انتي طيبة.. الليلة يا جميلي.. بامانة ما تنسى.. في البدء كانت كادقلي..و برضو في الختام.. ربنا يديك العافية..
الى اشراقة مصطفى.. خلي بالك من البروش.. فهي مضفورة بحنين نادر.. بالجد نادر يا اشراقة..و ليك منا برش لطهور واصل.. كل سنة و انتى طيبة..
الى تراجي مصطفى.. كل سنة و انتي طيبة.. ختى الرحمن في قلبك يا زولة.. و زول فيهو عرق من الشلوخ دي.. ما ظني بيعرف يحقد على الناس.. لأنو الحقد دم فاسد امهاتنا لمن يتشلخن دفننو في الأرض..و مرقن لمجابهة الحياة بفرح .. كل سنة و انتي طيبة..
الى ابكر ادم.. امانة في رقبتك.. كن ما شربت البن هناك في معيتهن..
الى كل الأصدقاء و الصديقات.. كل سنة و انتو طيبين .. تامين ..زايدين..و فرحانين..
كبر
12-24-2007, 11:15 AM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
Quote: يعتريك فضاء الغربة.. تعتر ليك دمعة.. او قل دمعتين.. تتلفت يمن شمال..تجبد فردة الذكرى/الحنين..عشان تستر اطرافك من زيف الجليد ..و القلب اسى الأطراف عتوا..
ياصديقى ياكبر.. هانت اذن بخير!!
Quote: الى اشراقة مصطفى.. خلي بالك من البروش.. فهي مضفورة بحنين نادر.. بالجد نادر يا اشراقة..و ليك منا برش لطهور واصل.. كل سنة و انتى طيبة..
اينما نكون يعترينا هذا الفضاء.. داخلنا.. فضاء الغربة ماعاد يرتبط بالمكان ولا لون الجليد وماعاد ساكوبيس الحنين يغطى ما انكشف من لعنات.. الحنين هو اللعنة.. فى ليلة الميلاد والمسيح يدير خده الأيسر لتصفعنا الحقيقة.. لكم اسرتنى سيرة حنينك الما هذه.. ولكم اسرتنى حد البكاء سيرة البن.. السيرة التى تحكى حكاية فطومة البقارية، يتلاصف لون طلح الشوق على ساقيها وضفائرها تلمع بشجن ما.. شجن كتبت سيرته على برش كانت قد غزلت اشواقه يوم عرس البنية..
صديقي الحنين كبر... كل عام وانت بخير وان شاء الله القابلة جامع عند أهلك...وتعزمنا لجو جميل زي غنى البن ده...انا بدوري عازمك جونا البورسوداني البحري...أصلو الايام دي قايم علي الحنين سداري... ونفسي أهرب الى الامام باتجاه عمل من أجل البلد (Home Town )...الله غالب يا أخوي
كن بخير
أنور
12-25-2007, 09:14 AM
الجندرية الجندرية
تاريخ التسجيل: 10-02-2002
مجموع المشاركات: 9450
ازيك يا كبر وكل سنة وانت طيب ومطامير حنينك عامرة تصدق اني ما قدرت اسمع جلسة اغاني البن النزلتها دي الجهاز التلفان دا قال اني بستخدم نسخة قديمة من ( Adobe Flash Player) هو شنو الما قديم النحن ماسكين فيهو؟ القدم يا يابا اليلحقك حبان قساي الزينين كدي النشوف اولادي لمن يصحو يصلحوه لي وبرجع تاني
طبعاً في نقة بتساهل العودة حتى وان لم اظفر بسماع الجلسة سلام واشواق ومحبة لكل الناس الهنا
12-26-2007, 01:05 AM
AnwarKing AnwarKing
تاريخ التسجيل: 02-04-2003
مجموع المشاركات: 11481
تصدق يا كبر اني اول مرة اسمع الايقاع دا ، واشوف الطقس البديع بتاع اغاني البن او اسمع بيه حتى ؟
مرة زمان في بوستي عن الحكامات ( هل يصلح الرقص ما افسد العسكر ) قلت انو واحدة من اكبر مشاكلنا هي جهلنا ببعض وانغلاقنا وتعالينا الفي الفارغ . وعلى فكرة انت كان وعدتني بالعودة للحديث عن الحكامات في البوست داك وشغلتك الدنيا. لفت انتباهي التغني للاخدر اللونو زرعي ، العبارة دي تحديداً متكررة في اغاني بنات الوسط. وبصراحة الاخدر يستاااااااااااهل.
كلامك عن تقسيم العمل ، كلام حنين مش ؟ طبعاً في كل الثقافات مافي زول بشيلو ليه سوط ويقولو ليه انت حتشتغل هنا ، لكن وانت سيد العارفين انه نمط الانتاج ومنظومة القيم البنتجها وشغل التنشئة والتنميط البشتغل بإحكام شديد في ثقافاتنا دي بخلي كل زول وزولة عارف / ة موقعو/ ها وين ، ودا بتمظهر في الطقوس برضو. يعني في الوسط ، الفتوات محظور عليهن يحضرن طقس دق الريحة مثلاً ، ولوقت ما بعيد قعدات الجبنة بتاعت الضحي دي برضو كان خاصة بالنساء المتزوجات وكبيرات السن نسبياً الفرق هنا انو نساء الوسط ما عندهن الايقاع والغناء المصاحب للطقس دا والجلسة كمان في مكان مقفول في البيت يعني وابرح فساح هو الراكوبة وفي تحت ضل الضحى ، ودي عندهاعلاقة بدور النساء الفي المنطقة دي وثقافتها منحصر غالباً بالعمل داخل المنزل ولا اخفيك بغري ولا حسادتي قل لنساء كردفان وما هو متاح ليهن من قدر لا باس به من الحرية الظاهرة هسي في الغناء والرقص المصاحب والجلسة الفي خدار الله . الكلام دا داير مننا كلنا نقول بسم الله ونقعد في واطة الله دي ونلاحظ ونفكك ونتحاور.
شكراً ليك كتير يا كبر. *****
انور كنغ
سلام واشواق والله وكل سنة وانت طيب يعلم الله الظهور اون لاين دا بقى لي متل شهوات العيان للعافية دعواتك لاختك ربنا يدّحر افاتها وما يفقدوك بشينة يا انور.
(عدل بواسطة الجندرية on 12-26-2007, 08:03 AM) (عدل بواسطة الجندرية on 12-26-2007, 04:47 PM)
12-26-2007, 09:57 AM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
شكرا لكل الأصدقاء و الصديقات الذين عبر/عبرن من هنا..
شجرتان و معنى:
تحدثنا الأنثروبولوجيا الثقافية عن أن بعض المجتمعات لها اشجارها الخاصة التي تضفى حولها قدسية و معنى..و مثل تلك المجتمعات لها تفسيراتها الخاصة حول صيرورة تلك العلاقة (علاقة الإنسان بالشجرة)..و بالتالي اضفاء معنى ثقافي ووجودى على تلك العلاقة.. اذن هناك.. الشجرة موجودة ..و قريبة منهم ..و لكن كيف لنا أن نفسر حالة اخرى ..يعني في حالة ألأ تكون الشجرة فعلا موجودة في حياة الناس (مرزوعة مثلا)..و لكنها تشكل ظاهرة كبيرة في حياتهم..و يتعاملون معها و يخلقون علاقة اسطورية بها؟
في منطقة جنوب كردفان ..لا نزرع شجيرات البن و الشاي..و لكن لا تخلو حياتنا من البن و الشاي.. يعني كل انسان هناك يشرب الشاي او البن ..و لو لمرة واحدة في حياته .ز مثلمنا و مثل بقية البشر في هذا الكون..
و اذا كانت اقصى تجليات الكرم في المجتمعات القديمة هي تقديم المعروض (كالخمر مثلا).. فان مجتمعاتنا يكون معروضها الرئيسي هو الشاي أو البن.. في منقطة المسيرية.. يمكن أن يجئ الضيوف..و يقوم صاحب الدار بالذبح اكراما لهم..و لكن قد تكون جريرة أن لم يقدم له الشاي (فيقولون فلان ما اكرمنا..و يعنون غياب الشاي في حضرة الكرم)..
ليس بالضرورة وجودة شجرة الشاي أو البن ..وجود فعليا حتى نضفى عليها قيمة ثقافية أو معنى وجود..و لكن الظاهر أن طريقة شراب البن و الشاي ، و هي ما يهمنا هنا ، هي ثيمة ثقافية ..عبرها يعبر انسان المنطقة عن كثير من مكنوناته الذاتية ، يخلق ترميزات عاليه لها معانيها و تقاليدها الخصاة في بناء تلك المعاني..
من ملاحظاتي عن مجالس شراب البن و الشاي.. تمييز بعض الثيمات الثقافية الراسخة..و منها ثيميتين اساسيتين نتعرض لهما هنا..و هما ثيمة التسامح..و ثيمة الجماعية.. لإدراك قيمة التسامح.. نتسائل : كيف لنا أن نفهم مجتمع تسيطر عليه منظومة التقسيم الجنساني للمعاني و الرموز..siginfican sexual segrigation .. و في نفس الوقت توجد فيه بعض من مظاهر التسامح و التخلي عن قيم الهيمنة و لو لحظة؟
لتوضيح ذلك.. نلاحظ أن مجتمعات المنطقة .. فيها حدود وضحة تفسر دور كل فرد في المجتمع..خصوصا حالة تميز العلاقة القطبية رجل/امراة (ذكر /انثى).. يعني هناك تقسيمات العمل واضحة جدا..و منها تقسيمات ادوار القيمة و معانيها.. فهناك لكل فرد دوره المرسوم ..و مثل تلك الأدوار يضفى عليها المجتمع نوع من القدسية الضمنية مما يححفظ صيرورتها و استمراريتها..و في حقل ثقافي مثل ذلك كيف لنا أن نتبين و نفهم التسامح؟
قيمة التسامح تظهر في حالة الوجود المشترك .. في جلسة البن أو الشاي مثلا..نلاحظ وجود الرجال و النساء معا..و نلاحظ اكثر من ذلك.. السماح للمرأة أن تعبر عن ذاتها بوضوح.. حتى لو كان عن طريق الغناء.. فاٍذا وضعنا في الإعتبار مسألة التقاليد الصارمة حول مبدأ التمييز.. فاٍن الوجود في جلسات البن أو الشاي يعد بابا من ابواب التسامح التي تحتاج كثيرا من الدراسة و التقصى..
القيمة الأخرى هي قيمة الجماعية.. من الملاحظة المباشرة.. أن الجماعية في مجتمعات جنوب كردفان.. قيمة طاغية و ظاهرة .. يعني في مجال الزراعة..و الحصاد.. الناس تعمل وفقا لفلسلفة النفير..و كذلك في ظاهرة الفزع (رد المال المسروق)..و غيرها من الظواهر التي تظهر فيها الجماعية.. في جانب الغناء و الرقص (و هي ايضا مظاهر من مظاهر التسامح التي تعكس وعي اجتماعي متقدم جدا)..تظهر الجماعية كقيمة اجتماعية و فلسفية.. يمارسها الناس..و يورثونها للأجيال عبر تعاطي و تراضى منظم و مضبوط..و كل ذلك امتثالا لمنظومة عبرها انسان المنطقة يعبر عن ذاته و عن رؤيته للكون..
كبر
12-26-2007, 02:09 PM
Kabar Kabar
تاريخ التسجيل: 11-26-2002
مجموع المشاركات: 18547
حينما كتبت بداية سيرة هذا الحنين الما.. كنت اتسائل في نفسي.. عن قيمة المحمول العاطفي للثقافة.. يعني الناس اجتهدت و قدمت لينا تفاسير كثيرة و جليلة عن قيمة الثقافة كمختبر لتصنيع قواعد السلوك و قيمها..و لكن يصعب الإجتهاد في مسألة تفسير العاطفة و الإنفعال.. يعني يا صديقة.. كيف لينا أن نفهم.. حالة فرد مثلي .. في وسط حقل .. يمجد الإستهلاك..و التفاصيل و الفرديه.. و يعتريه حنين ما .. للجماعية ..و قيمتها؟
اجمل ما في هذا العمل تلقائيته المفرطة..و اخذ يشكل عندي ثيمات عديدة.. احاول أن اعالجها كل على حدة..و تدهشني جدا قدرتنا على الترميز .. الذي نحياه كتفاصيل يومي راهن..و تنعقدت ألسنتنا حيرة حينما نحاول أن نكتبه و نفهمه..
البروش يا اشراقة.. هي عبارة عن crafts .. بفهم ناس الأنثروبولوجيا الثقافية.. لكن المحزن أننا لا نتعامل معها كحقل للدراسة..و يمكننا جدا.. أن نهدر وقتا عظيما في فهم شكل علبة الببسي (و هي برضك عندى كرافتز)..لونها .. تحوراتها الجمالية..و لكن نغض الطرف عن ما هو اجمل منها.. هل هو اليأس؟.. هل هو التأفف؟.. ام هل هي الغفلة؟ ما علينا..
طريقة ضفارة (صناعة) البروش.. طريقة تشى عن قدرة الإصرار و الصبر الجميل.. و هناك امهاتنا لهن تقاليدهن الخاصة في التقسيم و التصينف (تماما كما قال به عمنا افلاطون منذ الآف السنين)..و البرش الواحد يتكون من عدة طراقايات (مفردها طرقاية..و هي صف معين..و تجمع لتكون الصورة التي نراها)..و الطرقاية الواحدة تدخل في صناعتها الآف السعفات (مفردها سعفاية)..و الشجرة التي تستخدم في ذلك.. هي نوع من اشجار الدوم ..و تسمى الدندور..
الطرقاية يمكن أن تكون رباعية.. سداسية.. أو ثمانية..و حسب لغة امي فهي (ام اربعة..ام ستة..و ام طماني (ثمانية))..و البنيات من بدري بتعلمن الضفارة.. شفتي الجمال ده كيف؟.. يعني مافي انتظار.. البنت منذ سن معين تتعلم ما تفعل..ولا تتنظر حتى مرحلة متقدمة في العمر..و عيب يا اشراقة تكون البت ما بتعرف تضفر ليها طرقاية..
نفس تقسيم الطرقاية.. يكون تقسيم البرش.. يعني برش رباعي.. سداسي..و ثماني..و هنا يأتي دور اللون.. فهن يستخدمن نوع من الألوان المائية (اسمها المحلية التفتة و الصفار)..ففي البرش الرباعي.. تكون اربعة طرقايات بلون واحد.. مثلا يغلب عليها الأصفر..و في السداسي ..و هكذا..
و هناك استخدمات عديدة للبروش..و معاني تلك الإستخدمات ذات بعد قيمي اجتماعي.. يعني برش الصلاة.. معروف لزول خلاص بلغ مرحلة النضج ..و بقى زول الله (صلاة و تعبد و نسك و خشوع)..و برش الحنة (مع انو الحنة دي جديدة او حديثة في مجتمعاتنا)..و برش النوم.. و هو يعادل المرتبة العادية بتاعة ناس البندر..
الغريبة هناك تقسيمات اخرى.. يعني أن يسمى البرش (قلب الوالدة..و يغلب عليه اللون الأبيض).. أو (قلب الضرة..و يغلب عليه اللون الأسود..و انا ما عارف ليه الحقد دايما مربوط باللون الأسود؟)..او قلب الحبيب (و هنا تكثر الألوان النضاحة بالحياة و حبها)..
اكبر انواع البروش (و هو الظاهر في هذا الفيديو).. يسمى الشُقة..و يصل طوله ستة امتار..في تلاتة امتار عرضا (شفتي جمال اللوحة دي كيف؟)..و يستخدم في المناسبة كالعرس.. الختان.. الخ..
هناك نوع نادر من البروش ..و يسمى بالدرة (بكسر الدال..و اظنها الدرة بضمها)..و يحتاج مهارة فائقة..و قليلات هن اللائي يجيدن صناعته..و شكله اشبه بالهبابة .. يعني شفتي الهبابة العادية دي.. بس اتخيلي شكلها اكبر شوية.. و اجمل مافي الأمر .. طريقة التلوين.. لأنها تشى عن عبقرية عجيبة .. خصوصا ترتيب الألوان و تدرجها المنضبط..يعني يا اشراقة لمن عبد الله بولا ..قال لينا بقصة انو صناعة المراكيب و البروش هي فن تشكيلي .. تب ما غلطان..و لغاية هسع مستغرب ليه ناس كلية الفنون التشكيلية ما عندهم قسم لدراسة البروش..!
12-26-2007, 02:15 PM
Kabar Kabar
تاريخ التسجيل: 11-26-2002
مجموع المشاركات: 18547
ربنا يشوفنا بورسودان يا حبيب..و اكتر سواكن.. لأنو عندنا معاها حنين خاص..لأنو جدي (والد حبوبتي لأمي) مدفون فيها.. يعني لو رجعت لتأريخ تور شين.. ح تسمع بأنو قام حبس شيوخ المسيرية (و كانو تمانية)..و فرض عليهم ناظر غصبا عنهم.. اها جدي ده واحد من اولئك الشيوخ..
حبويتي الله يرحمها.. كانت بتغني اهزوجة حنينة جدا..و بتحكي لينا كيف النصارى.. جابوا مزيكا القرب ..و هي تعزف نغما شجيا (يا غريب بلدك وين)..طبعا تأريخيا قد تكون هناك مغالطة..و لكن يبدو أن جدي هذا بقى في السجن الى أن جاء الحكم الثنائي.. ما علينا..
لمن اتذكرت كلامك عن راقصي المردوم.. تذكرت اشياء اخرى ايضا.. تتخيل يا انور.. استهوتني فكرة البروفة..و التدريبات ..و قد يتسائل البعض منا.. الناس دي وكت بترقص بانضباط و دقة كده.. متين و كيف بيلقوا وكت عشان يعمل بروفاتهم؟
عارف يا انور.. اتذكرت تفاصيل غريبة.. يعني لمن كنا بنسرح (بالغنم و الضان و البقر).. تلقانا الوكت كلوا بنلعب المردوم في الخلا..يعني تكون براك في خلا الله الواسع داك..و بتحاول تتعلم كيف تضبط ايقاعك..اها الجماعية بتجي.. لمن نكون نتلاقى اتنين أو تلاتة..و لمن نكون اربعة.. واحد بيكون حكم.. عشان يقول ليك الريتم بتاعك فارق في الحتة الفلانية..
كل الليالي هي احتفال بنهاية يوم تم انجازو في الحياة يا انور.. يعني بعد العشاء طوالي.. تلقى الشاب اتلم..و اتجمع في دارة بعيدة شوية من الفريق (شفت جمالية الخلط دي كيف يا انور؟.. عالم بتخلط منذ الصغر)..البنات يصطفن..و يبدن الصفقة ..ثم الغناء..و يصير الرقص..
و مثلما الوليدات.. البنيات برضك بسون بروفاتهن الخاصة.. يعني الواحدة تلقاها سارحة و بتغني..او واردة للموية و بتغني..
المدهش طريقة توزيع الأدوار.. يعني البنات لمن يقيفن ما بيقيفن عشوائيا..و انما صفهن بيكون على اساس الإمكانيات الصوتية.. و تدرجها.. تينور..سبرانو..و هكذا..
الآولاد برضك.. يعني في اول الروق بيكون الدليل (الدلالي/القائد)..وهو الحريف (زي كابتن فريق الكورة)..و هو الذي يبدأ الإشارات ..و تغيير الريتم ..و تقديم تصانيف مختلفة.. ايضا في مؤخرة الروق (التقلاية..و التقلاية صامولة توضع في مؤخرة عود الحربة و تمنع التشقق و التهتك)..لآزم يكون في واحد حريف..لا يقل شأنا عن القائد..و ده مهمتو يغطي الفروقات .. يعني لو في واحد اشتر جاب ليهو رزم مفارق.. بيكون دور التقلاية في أن يضبط ذلك..
طريقة اللبس .. ايضا ليها معانيها..يعني نادر ما تلقى ليك زول لابس ليهو جلابية و بيعلب (يرقص) مردوم.. لازم تكون لابس ليك عراقي قصير (طبعا عمليا القصر ده بيساعد في تقديم اقصى التجليات)..ولازم الواحد يكون شايل ليهو عصاية..و سكين في ضراعو.. طبعا واحدة من مظاهر التغير و التحور الثقافي ظهور البنطلون..و الغولف تي شيرت مؤخرا في طريقة لبس راقصي المردوم..
الطريقة التي تؤدى بها رقصة المردوم فيها مظاهر تانية جديرة بالإشارة.. يعني يا انور اتخيل ليك عشرين شاب كل واحد شايل ليهو عصاية.. ديل يتنظموا كيف؟
البنات بييقفن صف طويل..و الأولاد بيرقصوا في شكل قوس..كل واحد بيكون شايل العصاية بيدو اليمين..و الوضع ده بخلي العصى كلها في اتجاه وسط الدائرة (لاحظ وضع البنات بيكون خارج تلك الدائرة)..و هنا بجي وعي السلامة ..safety rules ..
في زمنا كانت البنات تتزين بالسكسك (الخرز)..و التربلول (عطر خلاسي فصيح يحتاج زمانا لنتكب عنه)..و بيكونن ممشطات المشاط الكردفان بكل تفانينه و تنويعاته..بعدين البنات في رقصة المردوم ما بليبسن تياب نهائي.. شفت الجمال ده كيف؟
و يبقى السؤال الأساسي .. هي الثقافة دي شنو لو ما عاينا لتفاصيل زي دي؟
كبر
12-26-2007, 02:16 PM
Kabar Kabar
تاريخ التسجيل: 11-26-2002
مجموع المشاركات: 18547
عارفة يا صديقة.. المجابدة..و الإنشغال.. مرات بتخلي الزول يظن انو في مؤامرة من نوع ما.. تجاه الحديث..و الكلام في امر الثقافات.. المهم ما علينا.. الحكامات ثيمة تشغلني كثيرا..و سأكتب عنها.. لكن ما عدت اؤمن بالفردية يا صديقة..
حينما تأملت هذا الفيديو.. خطرت في بالي اشياء كثيرة.. مثلا جدلية الثقافات الفرعية..و الثقافة الرئيسية..و أليات الهيمنة.. مثلا.. كنت اتأمل حال الغناء بصورة عامة في السودان.. يعني هناك تمجيد للمدامة العنبي.. مع انو الناس البتشرب مدامة في مجتمع السودان هم أقلية.. لكن البتشرب البن و الشاي هم اغلبية..و مع ذلك ينعكس الحال..و الناس تتغني بغنا الأقلية..و تنصاع لمفاهيمها و ايدولوجيتها المسيطرة..و ده باب من ابواب الهيمنة و عدم الإعتراف بالآخر..
تستهويني البدايات يا صديقة.. يعني فكرة التمتم..و السيرة.. و غيرها من انواع الإيقاع.. دايما بتجي من بره الخرتوم..لكن بعد داك بيتم سرقتها ..و تحويرها..و محاولة فرضها بصورة مشوهة.. منطقة جنوب كردفان غنية جدا بتنوع ايقاعاتها..و كون ناس المزيكا و منظراتيتها يتجاهلوا الحتة.. دي بتكون عوجة كبيرة خلاص..
اغنيات البن اول مرة اشاهدها في منطقة الفرشاية..و ذكري للفرشاية مقصود.. فهي عاصمة من عواصم الحوازمة.. و مركز من مراكز تجمعهم.. و الإشارة هنا.. أن اغاني البن هي حقل مباح للكل .زغض النظر عن ادعاءاته الإثنية.. يعني كضاب البجي يقول ليك ده ارث نوبة أو ارث بقارة ..و دي واحدة من جماليات التواصل الثقافي الحميم..
فكرة التقسيمات .. مهمة جدا..و جديرة بالملاحظة.. يعني نساء جلسات البن.. لا يرقصن في دارة المردوم أو الكرنك..و بنفس القدر.. شابات المردوم او الكرنك.. ما بيقعدن ليك في جلسات البن..و هكذا..
كبر
12-26-2007, 02:19 PM
Kabar Kabar
تاريخ التسجيل: 11-26-2002
مجموع المشاركات: 18547
في الخاطر بقايا من مجرات الفرح العتية.. فرح لله و رسولو يا صديقي.. عارف يا ابراهيم.. مرات الواحد لمن ينجرف في بحر الحكي بيحس بخطورة و حزن ما.. خطورة على تفاصيل ممكن جدا تندثر ..و تغيب في غياهب النسيان..و حزن .. على جمال عشناه و فرحنا به..و ما قادرين نوفيهو حقو..
في خاطري مدينة يا ابراهيم..مش لأنها شهدت عهد صباي و شبابي.. و لكنها .. ليها تفاصيلها الماقدرت مدينة في الدنيا تمحوها عني..
مرة قلت عنها.. اسبارها قصائد لا تنتهي..و كنت اعنى ذلك.. فمهرجاناتها التلقائية.. لم يصادفني مثلها.. و هي مدينة الطبول..و الطبول بستمد ضجيجها من ريتم البن و غيره من الإيقاعات المبدعة وفقا لطرقها الخاصة..
في اخر الليل.. تتوحد الإيقاعات و تنسجم.. كرنك.. نقارة.. مردوم..نوبة ذكر.. الخ..و من بين تلك الإيقاعات يسجل البن سيرته الخصوصية..
كبر
01-08-2008, 07:23 AM
ابراهيم عثمان آدم ابراهيم عثمان آدم
تاريخ التسجيل: 09-29-2006
مجموع المشاركات: 47
كيف تنتهي يا كبر؟ مع الحنين المتدفق في كلامك دة وايقاعات فندك الجبنة حين الطرق بالمدق وتجانسه مع حركة تلك السلسلة المصنوعة من فيش البيبسي حينها تستمع وتستمتع إلي الى موسيقي لها بنائها الهارموني وخصائصها اللحنية والايقاعية المميزة وهذه هي بداية الرحلة عبورا بالبكري والتني إلي عالم حنين وتصور روعة المشهد هي قصائد وفن تشكيلي وفلكلور وحنين ما.. يهرجل كيفما اتفق في وجدان المهاجر وحنين ما.. إلي تلك المدن التي تسكننا ونشتاقها الآن كثيراً
Quote: الى تراجي مصطفى.. كل سنة و انتي طيبة.. ختى الرحمن في قلبك يا زولة.. و زول فيهو عرق من الشلوخ دي.. ما ظني بيعرف يحقد على الناس.. لأنو الحقد دم فاسد امهاتنا لمن يتشلخن دفننو في الأرض..و مرقن لمجابهة الحياة بفرح .. كل سنة و انتي طيبة..
الاخ كبر كل عام وانت واسرتك بخير والحقد على منو ومن شنو؟؟؟ده كلام كبار يا كبر.
انا زعلانه منك مش من مجرد تهم وكلامات نسوان زي ما بتحاول تصورها. اولا انت الوحيد و الوحيد هنا من ادعى انه انا وبشاشا بالذات عملاء للآمن!!
اها يا اخوي الوصيه في الزمه الزوله العيانه بتاعت الدوت اورج دي ما مستواك. وانا خليني امشي اسأل عنها ناس امريكا وشوف البيوت الخربتها. عشان دي ما اشكال يتصل بيها كبر بتاع المحايدين و الزول الدخل دورة اتحاد نعتبرها بمقايسنا السياسه تدل على وعي سياسي مبكر والتزام بقضايا الشعب بغض النظر عن اتفاقنا او اختلافنا...لكن يظل التقييم لتجربتك وتحملك للمسؤلية التنظيميه باكر.
فانتبه لنفسك,فانت لا تشبه هذه العالم الوسخانه.
عارف يا كبر من كم يوم لي صديق في مدينه كنديه اتصل بي مهنئا للعيد يمكن من ثلاثه سنوات لم اسمع صوته ونبهني لمداخلتك هذه وقال لي لازم ترد على كبر وجاء النقاش في انه البيناتكم شنو؟؟!! وحكيت له طبعا من وجهة نظري,وعارف زدت له كمان قلت له اديك مثال...ابنوس ده اختلفت معاه للطيش...لكن قلت له عارف بحترمه ليه؟؟؟؟لانه عمره لايمكن ينزل مستوى الاتصال ببتاعت الدوت اورج دي اما الاشكال الاتصلت بيها فهي في نظري قمة الانحطاط الاخلاقي..لذا قلت له اظل احترم ابنوس اكثر منهم.
لكن رغم كلماتي له دخلت لك وقررت ان اقبل معايدتك واحيك بمثلها وقررت ان اجزل لك النصح وفي (العام هنا) و العام مكلف وانت ادرى به فالثمن سيكون على احسن الفروض ثلاثه بوستات متلتله في الدوت اورج للعن سنسفيل ابو اهلي ولكني لا اهتم لهذه الحشرة القذرةو الباقي انت قلت سمعته براك في التسجيل. وعارف و الله لو ما غيرت تلفونها كنت حاسجل ليها الافظع لانه لا تستحق الا هذا. ولانك لا تعلم ماذا تقول لي عندما تتصل.....ولا تعلم ماذا ترك صبيتها من بذائات في جهاز تسجيلي...بس انا لا بعرف انقل التكنلوجيا ولا انشرها ولكن بعض بورداب مدينيتي عزمتهم واستمعوا لوساختها ومنهم الاخ صلاح واسبه وزوجته.
هذه المرأة فالتعلم بأن الكلبه اشرف منها.
كذلك هذه التحيه فيها آثر لجاركم العزيز الرجل المفترى عليه منصور المفتاح فهو كثيرا ما يحدثني بالخير عنك ويطلب ان نبدأ صفحه جديده وكذلك جاركم سابقا هاشم نوريت. وانا اعلم انك رجل طيب ولكنك سليط اللسان او النوع الذي يقال عنه رجل لسانه متبري منه.
عارف الايام دا امي معانا في صنعاء وقاعدة تشفي في طبق اها كلامك عن شغل البروش خلاني اقعد جنبها واسأل
طلع الطبق بقسمو لبداية وطوف وحلة ثم حلة اخرى وطوف وهكذا الا ان ينتهي والبداية تكون في الغالب موحدة اللون. الحلة بكون شغل الزخرفة واضح شديد تحد الحلة بطوف غالباً يكون موحد اللون وعلى غير لون البداية ، ثم حلة اخرى يتم فيها تبادل وضع الزخارف وتفصل الحلة بطوف تاني . ياخ دا شغل بديع بشكل ما اجمل منه الا كتابتك عن البروش دي. شكراً تاني ومتلت
12-30-2007, 08:19 PM
Kabar Kabar
تاريخ التسجيل: 11-26-2002
مجموع المشاركات: 18547
فيما يخص الغربة.. فتلك قصة.. حينما حزمت شنيطتي ووريقاتي ..و انا مارق.. كنت بقول لأصدقائي و صديقاتي اريد أن امارس خصلة الإختيار ..و لو مرة واحدة في حياتي..و كنت اقول لهم أريد أن اختار قهري.. !! ايوه يا انور.. لمن كنا في السودان برضك كنا بنحس بالغربة..و لمن نرجع الفرقان .. برضك بنحس بالغربة.. و شكلها الغربة هي لعنتنا الأبدية في هذا الوجود..و هذا حديث بالجد حزين..
ذكرت زول ضي يا انور..و صديقنا و اخونا فضل الله خاطر من ناس قبيل..و ناس قبيل يا انور عندنا.. كل الجميلين الفاتوا..و خلوا لينا معالم تضئ معنى الحياة فينا.. نفس المدينة.. الفى حوافيها بيمارسن عماتنا ديل سيرة البن الحميمة.. في طرفها كنا نتلقى العلم في مدرسة كادقلي الثانوية (تلو حجر الطير).. و كادقلي يا صديقي فيها ملامح الناس واحدة..حنينهم .. و سؤالات الهوية و الوجود..و كان فضل الله خاطر ..و الأخرين.. تدهشه مثل تلك التفاصيل.. طبعا استغرب حينما رأي مدينة تسورها الجبال..لأن في دار بابنوسة..و المجلد و الميرم..لا جبال يا صديقي..و هناك لو دايرين يداوا بيها زول الإ كان يسافر.. مدرستنا كانت في شرق المدينة..و كنت اذكرهم اصدقائنا من بابنوسة.. عند الفجر..و هم يتأملون هالات الضباب..و قباب الجبال و المآذن ..و هي تتسلل خلسة من غمامات الضباب.. ياخي كلنا وقتها كنا حسينا بأننا ممكن نكتب شعر..و تظل تلك المناظر في خاطر المدينة كادقلي..و في خواطرنا نحن الذين اضنانا حنين السفر اللعين.. و لمن جينا الجامعة.. كنا نستغرب لإزبهلال الناس بشجيرات هي تركة المستعمر..و كان فضل الله خاطر بلهجته النقية .. يسمى شارع النشاط دوداب..و المين روود بجلالة قدره يا انور.. يسميه دريب (فاكر غنا صلاح مصطفى عن الدريب الماشي بحداك؟)..و شارع الجامعة مرحال غليض..شفت كيف جنس الغربة..؟ و في تلك اللحظة ممكن جدا يكون الدوداب و المرحال..و غيرها من مفردات .. هي مجرد رطين في ذاك الصرح العجيب.. التحية لفضل الله خاطر ..و التحية ليك..و لكل شباب كوريا و كوريا الأخرى ايضا ..
كبر
12-30-2007, 08:22 PM
Kabar Kabar
تاريخ التسجيل: 11-26-2002
مجموع المشاركات: 18547
صديقتي الجندرية..حبابك التحية للوالدة العزيزة..و اقريها السلام نيابة عنا..
عارفة يا الجندرية..سيرة الشفاية دي سيرة جملية خلاس..و الأجمل.. الحاجة لمن تكون بتشفي بيكون في خاطرها صاحباتها.. لأنو بتكون هي حريصة على الأجمل.. عشان في عيون هناك اول ما تلمح ليك الطبق.. بيكون في خاطرها شكل الأطواف.ز العديل من اللعوج..و تدرج اللون..يعني نهائي ما بتلقى ليك واحدة ممكن تلخبط اللون أو الطوف.. لأنو ده خارج عن الذائقة..و الذائقة هي بنية نقد ليها اسسها و قواعدها الصارمة.. شفتي الناس ديل فنانين كيف؟
طبعا اجمل الطباق الملونة بتجي من نيالا..و بنات نيالا.. بيعرفن يضفرن البروش..و يشفن الطباقا..اما حتة التلوين..فدي فيها معاني كتيرة..و دايما بربط بين تلوين البروش و الطباقا..و شكل اللبس البنسميهو كدنكة (اللبس الأفريقي الملون)..و كلها تفاصيل غنية تشي بخصلة فرح عارم بالحياة.. لكن ليها صناعة البروش ضفارة..و صناعة الطباقا شفاية..؟..ده سؤال داير حفر كتير.. ايضا.. بنسمى صناعة طوق البخس (مفردها بخسة) شفاية..يعني لمن واحدة من عندنا تقول للتانية فلانة ديك بتشفي.. اول سؤال بيكون .زطبق ولا بخسة..لكين لمن تقول فلانة بتضفر.. فهذا يعني انها بتصنع في برش..
اغلب اغاني الحكامات بيتم تألفيها و هن في زمن الضفارة.. اما صناعة السفينة (لبدة من القش تفرش على ظهر التور..وعلى ظهر الجمل تسمى حوية..وعلى ظهور الخيل تسمى سرج)فتسمى نسعة.. يعني يقول ليك فلان بينسع ليهو في سفينة..و هي صنعة رجالية بحتة..و قليل من النساء تفعلها.. و صناعة الحبل .. تسمى فتل الحبل.. يعني فلان بيفتل ليهو حبل..و الحبل ذاتو ليهو تسميات عديدة.. شريط..قران ..عين..شكال..قيد..سلبة..و كل منها ليهو استخدامات مختلفة عن التاني.. لكن تعجبني جدا فكرة الترميز في القران (هل قلت بضم القاف؟)..فهو الحبل الذي يستخدم في ربط البقرة وكت حليبها..و هو تقييد بصورة معينة..لاحظي لازم تكون بقرة انثى..و في نفس الوقت .. بيسموا عقد الزواج بعقد القران .. شفتي الترميز العالي ده كيف بيشتغل؟ الغريبة لمن يستخدموا حبل للثور (الذكر) بيكون اسمو زمام..يعني زميت التور..و قرنت البقرة ..و هكذا..
بقى اخيرا نقول حاجة عن وعي الريسايكل ..RECYCLING ..و هي الحيلة التي تفتقت عن خطاب الوعي البيئي في الغرب الحضاري..فهم لا يرمون الأشياء (كراتين اللبن.. قنينات المشروبات.. الخ)..و انما تجمع و يعاد تصنيعها..و ذلك حفظا للمصادر التي اصبحت نادرة بفعل الإستهلاك غير الرشيد.. ذكرت الحتة دي..و انا بتأمل مشغولات البن عندنا.. الشرقرق (الشغال)..غالبا ما يصنع من علب قديمة..او صفيح قديم..و الكشاكيش .. التي توضع حول خصر الفندك (تماما اشبه بحبل الرحط)..تصنع من غطايات زجاجات الببسي (لمن كان الأمر بالزجاج المعبأ)..و هي تخلق ما يسمى بالـ PERCUSSIONS ..بحسب لغة ناس المزيكا..يعني شفتي العبقرية دي كيف؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
ابراهيم عثمان آدم
Ishraga Mustafa
AnwarKing
الجندرية
التحية موصولة للأخ تراث وتعود الايام
Tragie Mustafa
فيس بوك
تويتر
انستقرام
يوتيوب
بنتيريست