الصديق الحبيب..سماعين وراق..من المعجبين بـ(عافية حسن)..و أنا برضك..و معاي منعم خير اللـه..و اخونا محمد عثمان(ده و الله يا سماعين في اداء العافية عندو قواميس من الأراء..كن سمعتها عافية في ذات نفسها.. تواصل ليلها بنهارها غنا..!)..
في معرض ابتهاج سماعين بعافية..و اٍزبهلاله الأنيق..عرض (تعريض) بشخصنا الزلنطحي الضعيف..و قال عافية بتغني من الحلنقي و لفوق..(طبعا ده مقاس من عندياتو..و ليهو كامل الحق..فالرجل كان مبتهج و الإبتهاج من مذهبات الوقار..شفت كيف ياسماعين).. سبب التعريض .. اخونا الحبيب عبد المنعم خير الله (زول كازقيل غرينيق الفاوة)..قام اتضرع و قال لي سماعين (اخونا كبر.. عندو كريرسات قديمة..و تب مافي عوجة..) من باب دعمه غيرالمحدود و غير المشروط لعافية و تجربتها (حتى لو بكلام الأخوان..و هو طبعا حقو..ما في شك..)..فما كان من سماعين و الإ يقول تعريضو ..
استاذنا الحلنقي تب ما فيهو كلام..و شكل وجداننا (مع رهط كريم) ووجدان الكثيرين و الكثيرات..و الرجل الكلمة عنده لا تشيخ..ولا يصيبها داء الإنقطاع..لكن..! زي ما الناس بتنشد الأخذ بيد ناشئة الغناء و الفن (و ده ما تقليل من الشأن).. حقو برضو تاخد بيد ناشئة المتكلمين شعرا (و ديل قطع شك في منزلة ادني من الشعراء العديل ديلك)..
المهم ، يا سماعين يا صديق ، ماني قدر الحلنقي.. لكن في نجدة منعم خير الله .. هاك ديل.. و نسمع منك و من الأصدقاء و الصديقات..
كبر..
04-23-2007, 10:06 AM
Kabar Kabar
تاريخ التسجيل: 11-26-2002
مجموع المشاركات: 18547
من قلب الغـُنية.. بتمرق غـُنية.. بالشوق تريانا و تتحقق مـُنية.. بالحب فرحانة لما تشيل الخطوة.. فوق الخطوة.. و تقوم تغشانا تدق الباب.. تصحي الضحكة الفي جـوانا و تطلع وردة.. بالجد فرحانة تضوي النجمة.. في الليل .. نشـوانا و كل الحلة تغـني معانا و فيك .. يا غالي.. تدوب ولهانا لو تبقى معانا.. و ننسى أسانا الفرحة تنور تاني.. و تسيب احزانا.. سمحة اللحظة حلوة اللحظة.. يوم تطرانا
محمد النور كبر
04-23-2007, 10:08 AM
Kabar Kabar
تاريخ التسجيل: 11-26-2002
مجموع المشاركات: 18547
ليه.. بتكسر فيني.. الفرحة و تمشــي تروح تخلي وراك.. قليب مجروح شرابو الدمعة.. بحر مفتوح
خليك امين.. أمين في الـريد محل ما تكون.. محل ما تسوح لو تعرف الريد.. يا حبيب الروح فيهو النشوة.. فيهو الفرحة بتشفي جروح و فيهو اللحظة.. عبيرا يفوح سر الضحكة سحر مفتوح و حنين.. الريدة تب ما بروح خليك أمين أمين في الريد محل ما تكون .. محل ما تسوح و حق الريدة.. تب .. ما بروح
محمد النور كبر
04-23-2007, 10:10 AM
Kabar Kabar
تاريخ التسجيل: 11-26-2002
مجموع المشاركات: 18547
الله يا كبر الله عليك عموما انا فى الادب والشعر ما على قدر كده لكن انسان تؤثر فيه الكلمات المنظومة شعرا ولقصيدة القوية عندى وذات التاثير العميق فى النفس معيارها هندى بالاحساس الداخلى عنما اقراها ويا شاب ناشئة ايه يا عم ؟! فيك الخير التواضع سمح لكن ما لمن قدر ده وعموما اتحفتنا بهذه الكلمات الجميلة التى لا تفترق عندى عن كلمات اسحق الحلنقى اهاشم صديق ......وهلمجرا وواصل يا حبيب ابداعك, وبنجيك صادين لىكلامك وكلام سماعين باك
04-25-2007, 06:17 AM
tmbis tmbis
تاريخ التسجيل: 10-19-2002
مجموع المشاركات: 24862
كبــــر .. حبابك يا صاحبي .. ما ده الكلام القلنــاهو زمان أول ما بدت تغني عافية دي قلنا ليهم البلد مليانة ناس بتكتب كلام سمح .. وفي الملحناتية ـ وفي الميكنيكية البوزعوهــا زي ما جابه الخواجة في النوتــه .. وعافية بتجيه الفنشن كويس يا كبر عبد المنعم ووراق طلعو منك الكلام السمح ده .. عافية كان عايزه تمشي لي قدام .. اهو الكلام البمشيها لي قدام وبشبه احساسه وممكن تغنيهو بي سهولة .. بي جمب كلام ابونا الحلنقي .. سمحــة اللحظة + خليك أمين غايتو الاتنين ديل ياكبر مفصلات عليها والله .. وقدره تب كدي نشوفه بتقبل التحدي السمح ده ..؟
04-25-2007, 06:46 AM
Kabar Kabar
تاريخ التسجيل: 11-26-2002
مجموع المشاركات: 18547
الكترابه البوست دا يا كبر وقع على عيني الآن (دي عين شنو).. مش ذكرتك قصة شيخ العرب أبو سن مع البوث ديو، وفقاً للرواية المذكورة.. . . يا حبيب .. خليني أجيب لي فنجان قهوة لأن الحديث معك يحتاج إلى دماغ موزون وبما أنني لست من يوزن الدماغ دون الشاي أو القهوة، فسأكتفي بالثانية إلى حين دعوة.. أها تحياتي عبرك للحبيب ود خير الله..
04-25-2007, 07:01 AM
Kabar Kabar
تاريخ التسجيل: 11-26-2002
مجموع المشاركات: 18547
و كويس انك جيت بهنا..و شهادتك براها بالدنيا.. لأنك زول فنان بحق و حقيقة.. المهم قد تكون فكرة غريبة.. لكن كل البيسمعوا عافية..و بيقدروا تجربتها .. الدعوة مفتوحة ليهم عشان يقولوا رأيهم في كلامي..و لو شافوهو بشبها زي ما انت بتقول..يبقى حلال عليها تب.. أها قصرت معاكم..!
و ياريت عافية..و استاذنا المبدع سماعين عبد الجبار..و يا سر ابكر.. على اطلاع بمثل هذه الونسات..
كتر خيرك..و ما تنقطع يا صديق..
كبر
04-25-2007, 07:15 AM
Kabar Kabar
تاريخ التسجيل: 11-26-2002
مجموع المشاركات: 18547
جاك الكلام يا كبر وأكيد حتكون كبير قدرو (كبير دي ما معتز كبير بتاع الهلال الزمان داك).. أخوك ليس بناقد ولكنه يتذوق الشعر أو قول فاكي المكنة دي في نفسي.. تصدق يا كبر مرة من المرات وأخوك في الإجازة ما بين إمتحان الشهادة السودانية ودخولي الجامعة قريت أكثر من 44 ديوان شعر (حتة واحدة كده).. أنا ما عارف ليه هل دا حب للشعر أم أخوك خايف من ناس الجامعة الكلامهم كبار كبار وقال أحسن يتزود وخير الزاد هنا الشعر وبعض مفرداته.. على كل يا صديق الزمن الجميل (والله مرات لا جميل لا حاجة عليك الله زمن الجماعة أياهم ديل يمكن يكون جميل).. خلينا ندردش معاك في بعض كلماتك وقبل ما أدخل في معمعة المفردة أو التسكع في محراب كلماتك خليني أديك خبر قاسم إسماعيل.. هذا الرجل يتواجد الآن في قرية نائية يحيط بها عدد كبير من الجبال جنوب المملكة العربية السعودية وأعتقد أنه صار متوحش (والله لو جابو أبو الإستئناس ذاتو في المنطقة ديك يتوحش ويستوحش).. المهم هو بخير وعافية وله عدد من أبناء وأكيد إسم الصادق واحد منهم تيمناً بأبو أم سلمة الإمام.. نجي للحكي الجميل والمفردة الأنيقة.. أعجبت أيما إعجاب بإنتقائك للمفردات الرويانة وتريانه وأعجبني إيقاع قصيدتك "سمحة اللحظة) وجرسها الموسيقي.. واللحظة دي براها محتاج ليها لكلام كثير (اللهم لا تجعلنا من الملحوظين.. اللحظة إياها مش لحظة حبيبنا كبر)..
Quote: سمحة اللحظـة.. حلوة اللحظة.. يوم تطرانا
من قلب الغـُنية.. بتمرق غـُنية.. بالشوق تريانا و تتحقق مـُنية.. بالحب فرحانة لما تشيل الخطوة.. فوق الخطوة.. و تقوم تغشانا تدق الباب.. تصحي الضحكة الفي جـوانا و تطلع وردة.. بالجد فرحانة تضوي النجمة.. في الليل .. نشـوانا و كل الحلة تغـني معانا و فيك .. يا غالي.. تدوب ولهانا لو تبقى معانا.. و ننسى أسانا الفرحة تنور تاني.. و تسيب احزانا.. سمحة اللحظة حلوة اللحظة.. يوم تطرانا
بجيك راجع.. بعد كوب من الشاي (المرة دي شاي ما جبنة.. ما تقوم تقراها جبنك وتربط لي الدويم بالجبنة.. أنا قاصد قهوة قهوة يا زول)..
04-25-2007, 08:42 AM
bayan bayan
تاريخ التسجيل: 06-13-2003
مجموع المشاركات: 15417
ويا كبر >زى ما بقولوا در الشعر در) ما تقيف وبعدين لو فرجت والتوزيع مشى تمام ما تنسى نصيبنا ما انا نفضت الغبار عنك وقدمتك للجمهور (يعنى قاعد اتمر فيك) ويا محمد عثمان اها عافية حسن قصرنا معاها وبندى برضو اختنا الفنانة حرم ولا راييك شنو يا حبيبنا تمبس ويا تمبس مسالةتوزيع القصائد ده نخليها ليك لانو حسك الفنى كبير جدا وبتعرف تقدر منو يستاهل شنو
تخريمة: يا كبر منو القال ليك انو انا بحب عافية حسن هوى يا زول اخير ليك تنقرع , بعدين شوف منو العامل لينا ازعاج كل يوم عافية حسن....عافية حسن انحنا سمعنا وشوفنا وقطعنا فى حنانا لكن شوف وراق العمل ليها بوست واخرون كلما نجى نقعد عافية عافية
04-27-2007, 02:00 AM
Kabar Kabar
تاريخ التسجيل: 11-26-2002
مجموع المشاركات: 18547
ذكرتني قصة الشعر في الزمن القديم.. لمن واحد جا قال داير يكتب شعر..و المعلم قال ليه .. امشي احفظ ألف بيت و تعالني بعد سنة..و لمن جاهو حافظ .. قال ليهو أمشي انساها.. المهم يا صديقي.. وكتين قريت الأربعة و اربعين دياون شعر و زيادة.. القاعد ليها شنو.. ما تكتب..ولا تحت تحت..؟ تحياتي لقاسم..وربنا يخلي ليهو الوليدات و امهم.. يا اخوي.ز شغلك ده .. ما ظنيتو فنجان .. الشي بقى بير قهوة عديل كده..! نسمع منك تاني و تالت.. لو لقيت ليك فرقة.. لكين اخطى لينا المقارنة..لأنها بتجيب كلام كتير.. و دمت كبر
كبر
04-27-2007, 02:03 AM
Kabar Kabar
تاريخ التسجيل: 11-26-2002
مجموع المشاركات: 18547
زمان الواحد كان قايل الحياة نضيفة شوية (يعني لعب ما فيهو خشونة).. عشان كده الواحد فينا كان مفتكر يسمح الدنيا بالكلام و الخربشات الخجولة..لكن اهو..الواحد كل ما يجيب ليهو شريط جديد و يسمعوا.. يقول لروحو..و انا مالي الناقصني شنو..ممكن جدا اقول زي ما الناس بتقول..و مرات كده الواحد يقول هل غادر الشعراء..و مرات يكتفي بمبدأ (نفس الشعور).. يعني تكتفي بأنو الناس يعبروا عنك و خلاص.. كتر خيرك و نشوفك تاني..
كبر
04-27-2007, 02:08 AM
Kabar Kabar
تاريخ التسجيل: 11-26-2002
مجموع المشاركات: 18547
شكرا للأصدقاء ..تمبس..و سماعين..و بيان..و انت برضك.. ياخي حرم..و الله كان في بالي..و كنت متمني أسمعها تاني و تالت كمان..
بالنسبة لنفضة الغبار عني.. دي.. في ناس سبقوك عليها..ياخي ذكرتني زمن جميل (و يا سماعين الزمن الجميل احساسي داخلي ولا يتأثر بالظواهر مثل زمن العسكراتاريا و غيرها من الآفات التي تغشى اهل السودان.. بما فيها الملاريا)..و كان صديقنا طارق سيد احمد (الله يطراهو بالخير) ..مفتكر بعض خربشاتي مفصلة على استاذنا الهادي حامد..و كل يوم و التاني .. يقول لي ياخي أرح للأستاذ في جبل أولياء(و جبل أولياء يكفيها قدمت لينا قامة زي الهادي حامد..و بعد زمن جابت لينا عافية كمان)..و ما تنسيى شيل معاك حاجة حاجتين عشان الأستاذ يختار منهم..و أنا اتزاوغ..و اتزاوغ.. لغاية ما الأستاذ الهادي غنى (المدينة)..و بقت لي حجاب..و قلت لطارق.. ياخي بعد ما سمعت (المدينة).. تب مافي طريقة..و طارق مصر..لغاية ما سمعنا أغنية نادرة من اغنيات الهادي .. اسمها(السراب)..و دي واحدة من الإنقلابات الكبيرة في مسارات الأغنية السودانية.. لأنها حالة تأمل في الدنيا .. ما يفهمها الإ الزول الكتب القصيدة..و الأستاذ الهادي..و الذي اتى بلحن يشهبها تماما.. بالإضافة لطارق.. هناك اختنا الأستاذة ليلى محمد على..و كنا نتقاسم دواوين محمد أبودومة (أنهار الظمأ)..و عالم عباس (تحديدا .. ديوان منك المعاني و منا النشيد)..و كذلك السمع النادر..و هي زولة بتعرف كثيرا عن المجموعات و الجماعات الموسيقية و الغنائية (أيام بدعة مهرجان الخرطوم للموسيقى..و أتمنى أن تكون هذه البدعة مستمرة)..فكانت تصر على أن بعض الخربشات خاصتي .. مفصلة ..على استاذنا مصطفى سيد احمد ..لكن ..و الحمد لله ما استجبت لمثل تلك الإدعاءات الصارخة (ياخي مصطفى سيد احمد عديل كده؟..وين لناس في قامة .. ابوذر غفاري..و يحي..و شمو..و قاسم أبوزيد..و هاشم صديق؟).. و غير ..هؤلاء الأصدقاء و الصديقات.. كلما الواحد يسمع ليهو فنان يعجبوا.. يجي يقول ليك .. ياخي ما تدي الفنان ده نص..و لكن لأننا ناس ضهاري ساكت.. دايما الواحد بتدسدس..و يرجع لي ورا.. مع ان الضهاري .. جابت ناس خالدين.. و كفانا ود القرشي ..و عمنا حميدة أبو عشر (صاحب وداعا روضتي الغناء)..و غيرهم من الذين كتبوا لحظتهم .. فصارت تأريخ وجداني لأمة بحالها..
لا أكذب عليك.. يا منعم.. مرات كتيرة.. بفكر ارسل خربشات لأخونا تمبس..و يقول رأيو فيها.. و يشوف منو البتناسب معاها.. لحنا و اداءا.. لأنو تمبس ده تيرموميتر خطير..و ما بتخم بأخوي و اخوك كده.. لكن الله غالب..و المعايش جبارة..كل ما الجماعة يشوفوك بتقلب في كريرساتك.. طوالي تجيهم ليك الكاروشة..و تبدا المراسيل اياها..(ما عارف ليه دايما لبن العيال بيكمل كل ما امسك لي كراس و اقعد اقرا فيهو بأستمخاخ؟) محمد عثمان.. يكون مر بهذا البوست..و برضك نسمع منو.. كتر خيرك يا حبيب ..و نشوفك
كبر
04-28-2007, 05:05 AM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
عبدالمنعم خيرالله
tmbis
إسماعيل وراق
bayan
فيس بوك
تويتر
انستقرام
يوتيوب
بنتيريست