دعواتكم لزميلنا المفكر د.الباقر العفيف بالشفاء العاجل
|
|
 سلام حبوبة:احتفالية خاصة بيوم الأم
|
صادف يوم الاحد ..الحادي عشر من ايار يوم الأم في كندا..فكان هذا التداعي والذي اسميته حنين في مقام حبوبتي ام سماح
ام عسكرية بنت نصر السكران ولد ماهل ابوامبيكي..عاشت في الفترة
(1892- اذار2003)
..لقب ابوها بالسكران ..لشجاعته..حيثوا ان المسيرية قوم لايتعاطون الخمر..وكانت هذه المرأة تذبح الذبائح للضيفان..وتدفع الطلبة(بضم الطاء واللام معاوهي ضريبة)ولها علم بتأريخ المنطقةالشفاهي.وتعرف المضارب والانساب..وتحفظ وصف السير لي استاك..وذلك حينما زار السودان عام1923 كماتقول اهالي المنطقة بذلك..
أسمعني زين ياولدي..النار عدو ..وما فيها رجالة..والموية عدو..السكين عدو..والندقية عدو
كيف الكلام ده يا حبوبة؟
النار ما فيها رجالة..والموية غدارة..البحر بياكل عوامو..والسكين بكماء..البندقية بكماء..
أتلفت انا في السهل العريض..أدمن الدهشة من صمت الطبيعة..ذلك الصمت الحنون..وتغني هي بنغم حبيس..يرسم ملامح النـم العميق..في زمان رحيم كان يسمح للناس بالغناء ومعاقرة النغم الشفيف..
تقول هي ..دون ان تلتفت لي..الرجالةدناقر مو كبر عناقر
الرجالة تركة والعتيلة ماها دوامه..
اقول انا..والعتيلة دي شنو يا حبوبة؟
العتيلة متل الدين..ات تشيل الدين من زول عشان تقضي غرضك..لكن سيد الدين سيدك..ومن هلبد ترجع ليهو حقو..ومافي زول بيستدين الرجالة..
اقول انا..وشنو الدناقر وكبرة العناقر؟
تقول هي بصبر نافد..ات مالك كلامك كتير يا ولدي
اقول انا..بس داير أعرف..
تقول بحكمة..تعرف زين..كتير من الرجال في الدنيا دي ماعندهم مثقال ذرة تلمهم على الرجال..قاعدين تيوس وتيران ساكت..يولدوا العوين وما عندهم رأي تب..لكن الرجال الحق..ناس رأي وكرم ومروه وسترة..افتح عينك زين يا محمد ياولدي..في الدنيا دي البشيل حق الغير ماهو راجل..والبيسرق عروض الغير تب ما راجل..يبقى مكنوس ساكت..يوم يلموا الناس في المجلس..ما تبدا الكلام..اسمع زين..افهم صمرة (ثـمرة) الحديث..اعرف مضارب الكلام ..حتى بعداك اتكلم..عشان بعدين ماتندم..خلي بالك ياوليدي اللسان جبادة البلا..كلمة تمرق من خشمك..وتبقى تبعة وتجيب اللوم..واللوم البجيك من الكلام أخير منو السكوت..
ثـم تصمت ..أصمت لصمتها..نجوب الوادي..وتعلمني أسماء الشجر..العرد ، القضيم ، النبق، الهجليج ، الصهب، الصباغ ، العرديب ،الزان ، التبلدي ، الليون ،السلجم، القفل(الترتر)، البشم ،الجميز، الحميض ،أبليلة،التك ، السنط ،الدروت، الصنوبر ، الكرسان ،الغبيش، الكتر، العفين ....
وتعلمني أسماء الطيور..الحبارى ، القطاة، العـك ، ام كروان، ديك الهول، العقاب ، الحدية ، جقاوة طير العوين ولاحربة ولا سكين ، السـمبر ،الرهو ،الغراب، أب منقور الأدريع..والحدادي..الزرزور..الهدهد (فكي بلا دواية)،الغرنوق ، أبندلك ،كريمة السبابة ، الفرة الفرارة ، جداد الوادي ،و الحلف..
وتعلمني اسماء الحيوانات..الـمرفعين ، النمر ،الدود/الأسد ، الصبرة ، الدربان( الظربان)، الزراف ، الغزلان ، قوردي (السنجاب)، العبلانج ،الـمنقو، التقل،القطة النمرية، البعشوم، أبو القدح طويل العمر، ابونضلاف ، الحلوف..
وتعلمني اسماء الزواحف والثعابين..الور أب عاجة ، الورل حماري، الورل برتوله، دابي الخيل، الدابي البورل، الدابي الكركرو الأزرق ، الدابي اب درق(الكوبرا)، الدبيبة ام رجيلات ،الدبيبة ام شديقات( ام مديشينة)، الدبيبة النوامة..والأصلة..
لها خبرة نادرة تمارسها في تطبيب ملدوغي العقرب والثعبان ..وتـمارس التوليد وختان البنات ودق الشلوفة وهو نوع من الوشم..
يمتد السهل ..عريض .. تعلمني الاعشاب وفوائدها..ثـم تحذرني ان اقدر لرجلي موطئها قبل الخطو..
فجأة تتوقف امام شجرة صهب ضخمة..تدور حولها..تتأملها ببصيرة ودراية..وادور انا من خلفها لكي اتعلم خبرة التأمل..ثم تسألني ..وين الكبريتة؟
دايرة النار لشنو يا حبوبة؟
وتقول هي..هوي يا تليفان ..خليني من حديثك الماسخ البلا فايدة وانطيني الكبريتة..ثـم تجمع العشب الجاف..وتصنع منه ضفيرة ..وتشعل فيه النار..تقول..بعد ان ادركت ان حب الاستطلاع كاد ان يلحقني بالكديس..وبعد ان هذه ضفيرة العشب امامي..دي اسمها الكنيته..ارفع راسك عاين فوق..داك وكر النحلة..نعلب النار..ونسوي دخان القش ..النحلة ما بتدور الدخان..اول ما تحس بالدخان..بتطير بعيد..ومرات بتغمر ويمكن تموت..
حاشية "من الذي علم حبوبتي خواص الاختناق؟"
تفتح هي ممرات صغيرة حتى تتمكن من السيطرة على النار وخوفا من ان تعم الوادي..الم تقل هي ان النار عدو..
تتسلق شجرة الصهب الباسقة..وتخرج العسل والشمع..أندهش انا من صبر النحل وذوقه الهندسي الفنان..فالنحل مهندس بطبعه..أحاول ان اتذوق العسل..تنتهرني هي بعبارة تلجمني عن ذلك
اقول لها..داير اضوق العسل يا حبوبة..
تقول هي..هوي يا سيجيمان هوي..تاكل العسل..تشوف الموت اللحمر..
اقول لها..ليه اصلو العسل فوق السم؟
تقول هي..اسمعني زين..في الفلاة حاجتين ما تاكلهن..العسل واللحم..ديل بيجبوا العطش..والعطش بجيب الموت..جدك حماد دود الشاكلة كتلو العطش..الدنيا كانت صيف..والمفازة عريضة..مرق سبع ليالي ما رجع..النقارة ضربوها ضرب الخراب..فرينا رجال وعوين..دورنا الوديان والقيزان..تب مالقينا ليهو اتر..بعد تلات اسابيع الرعاوية جابوا الخبر..لقوهو ميت ..راقد على القبلة تحت شجرة عرديب..ناس واحدين قالوا كتلو الجان..واحدين قالواامكن مات في دواس..مشينا انا جدك فضل اللـه قباض ..جسينا الجته..لا شق ولا طق..لاطعنة حربة ولا اتر عضة دابي..قال لي ابوي قباض ..ده العطش يا ام سماح..مقبولة الطقوع بت علي الجيك..ام المرحوم..ابت تصدق..قالت للناس..ولدي شارب الدهن ما بيموت من العطش..
وانا ارتب بروش العسل(خلايا النحل)..وشراب الدهن بيسوي شنو ياحبوبة؟
دون ان تلتفت قالت..بيعتق الجسم وبيشيل المرض..المرة النفسا..اول ما تلدي لازم تأكل جناها الفرصة(الزبدة)وتسقيهو السمن..والناس الكبار بيشربوا زيت السمسم الولد...
أعدت انا خواطري..رجعت بذاكرتي للصباحات التي تصحو فيهاحبوبتي ام سماح..واول ما تفعله تشرب ..على الريق..كباية سمن او زيت سمسم نقي..وفنجان من عسل النحل الصافي..وهيم من السمسم الطازج..
ثـم نعود لي وقد جمعت حاجتها من الحطاب..وتحدثني..زمان زمن الدنكوج (معسكر الصيد)..بنـمرق لصيد الزراف والفيل..وبعدين لمن تبقى زول عرس..ما تعزل عروسك من بكان الحفلة..اعزل عروسك من البنات الفازعات للحطب..
استغرب انا واسألها..لي شنو؟
تقول هي بحكمة صبورة..الناس في البوش بتلبس الهدوم السمحات..والبنات في الحفلة بتجيهن جيهة كبيرة خلاص..والعيوب ما بيظهرن..لكن في جيب الحطب والخلا..مافي داعي للهدوم الزينات..وهناك بتظهر البت السمحة جد من الشينه..لكن في الاول والاخر ..لشنه مو في الخلقة ..الشنه الجد شناة الاخلاق..ووصيتي ليك ماتعرس البت ام ساقا رقيق..دي بتكتلك قبالها..عرس البت ام ساقا مـلان..والسمح ياولدي بيعجب اللـه..
وتمتد الرحلات ومشاوير المعرفة..ولا تحتاج هي لمن يذكرها كيف ان تكون الحياة..تصنع هي تفاصيلها بفرح جامح وتورثها للاخرين..
وحينما تفرقت بنا الدروب والسبل..لم اتمكن من الاستمتاع بخبرتها النادرة..
حدثتها ..وقد جاؤا بها من مضارب البادية الى المدينة..لتكلمني بالتلفون..وبالرغم من عمرها المديد كانت حاضرة البديهة..
سألتني..ات ياولدي دارك وين؟
قلت لها..في كندا يا حبوبة
قالت..ودي دار الانجليز ولا الطليان؟
قلت..كـو..دي دار خلق تانين
قالت..فيها الخيل؟
قلت..ايوه
قالت..فيها البقر؟
قلت..ايوه
قالت..فيها الجاموس؟
قلت..ايوه..وفيها الغزلان كمان
قالت..خير ياولدي الدارالفيها الخيل فيها الخير..مكانك قاعد فرقة..وفرقتك مافي زول بيسدها..شد حيلك واتحرى كلام اهلك..اهلك ياولدي ناس سياد بقر..سياد حارة..سياد رأي وناس سترة..السترة ياولدي والفضيحة متباريات..استر نفسك في الغربة البطالة..وماتباري قول الفسالة..وما تجيب السمعه الهجاله..حدثوني قالوا عندك بنية..الله يخليها ليك..اسمع وصيتي زين..ماتغيب الشمس بره من بيتك..امرق بدري ..وتعال صاد من بدري..ولمن تقوم الفجرية..املا عيونك من الشمس..ضي الشمس ..ياولدي..بيفيد الجسم وبيزيد العمر..خلي بالك من عروسك وبنيتك..انا كفاي ياولدي..حضرت كلام ابوي فرح ود تكتوك..سفر البيوت وكلام الخيوت..انا عافية منك ..كن داير تشرب..اشرب اللبن ..ما تشرب النار
فاقول لها..النار عدو
فتقول هي..النار عدو ..والخوف عدو..شد حيلك
ثم هي في عبرة دافئة تهتز لها موجات الأثير وتنثرها عبر الكون..
ثـم تكفكفها..وتقول لي..خلي بالك واسع..الضيق مو راي رجال..
ثـم تصمت
تصمت
ت...ص..م..ت
فاقول بعد برهة حميمة..سلام حبوبة..ســــلآآآآآم
ودمتم
كبر
|
|
 
|
|
|
|
|
|
|
|
Re: سلام حبوبة:احتفالية خاصة بيوم الأم (Re: Kabar)
|
سلام يا كبر يا حنين .. كالعاده بوستاتك بتشدنى مهما كنت مزحومه او على عجله من امرى ..
وانا برضو بقول معااك سلااااااااااااام يا حبوبا وكل حبوباتنا
التحيه لك اخى كبر والتحيه لى حبوباتنا ..ولكم جميعا هذه الابيات المتواضعه فى الحبوبه الحنينه
حبوبا .. حبوبا ..
لولايا.. لولايا..
كلام يونسنا ..
قمريه قوقايه..
حجاك يدغدغنا..
حنيه وآلايه..
لهيجك السكر ..
الحان ودوبايا ..
دميعتك الجاريه ..
فى الرايحه والجايا ..
تجبر الخاطر ..
زى غيمه مطرايا ..
حضنك الدافى ..
شجيره ضلايا ...
لقيمه تسندنا ..
فى بطينه صاصايا ..
جقيمه فى جوفنا ..
تزيل عطيشتنا ..
وتروى حرايا ..
رويحتك الحلوه ..
تناجى جوايا ..
هديمك البارد ..
يغطى بردايا ..
مسيحه من ايدك ..
تزيل لمرضايا ..
بسيمتك السمحه ..
تضوى عتمايا ..
كلامك الصادق ..
يا يمه يا ضنايا ..
عطفك الزايد ..
بحسو فى حشايا ..
دخريك فى الدنيا ..
ابريق ومصلايا ..
سبيحه من سكسك ..
ودعواتك الغاليا ..
حبوبا.. حبوبا ..
لولايا.. لولايا ..
ربى يخليكى ..
وتشوفى لهنايا ..
اسماء صديق الطيب الجنيد
مسقط عمان
12/4/2002
| |
|
|
|
|
|
|
| |
Kabar
doma
فيس بوك
تويتر
انستقرام
يوتيوب
بنتيريست