منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 18-12-2017, 12:15 PM الصفحة الرئيسية

مكتبة محمد النور كبر(Kabar)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

و تاني سنار ، ياعبد الباقي حامد الجزولي ، تسم الدغيس..

29-04-2008, 05:18 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


و تاني سنار ، ياعبد الباقي حامد الجزولي ، تسم الدغيس..




    ناصية للمدعو ، الكائن ، الشوق..:






    و كان السؤال: شنو الإختلاف بين وجوه الحبيبات المداين..و المداين الحبيبات؟..يرجع فاضي السؤال (لمن عرف عاطف خيرى سر اللعبة..و هدانا نقاوة المفردة) فنان.. يغني..و تاني يغني..
    في الوكت داك ما كان الحزن مهمش.. بل كان حاضر ملون..و الفرح هو الكان بالجد مهمش..
    و المشاوير.. بدايات الدقة في نبض جتيار..كنت بتزرع فيهو.. تأريخ الهمسة الحضور..و باقي الحكاوي الممدود في وشوشنا المكدودة..و برضو كان بتخيل لي.. كنا بنعرف كيف نفرح فرح خصوصي..و نقول ضحكتنا في وش السكوت الجافي..
    ياسلام..سنار مدينة..
    مستحيل انساك يا حنينه..






    " target="_blank">http://object width="425" height="355">





    اها وكتين الفرح.. حلف ما يكون.. قلنا نسويهو برانا.. برضك التخيل زاد الحنين..و سر الوجود..

    و بجيك تاني اتم باقى الخواطر/الناس..
    خالد بله.. نصر الله عطا.. غالب محمد عثمان..حامد شطه..امتثال الشيخ ..اقبال الياس.. انتصار احمد ادم..مشاعر سعيد..تهاني (يحي+هاشم)..سامية جامع..ايمان(احمد+منصور).. اماني تاج السر احسان....ندى(الأقرع+عمر)..جلال شايب..ابوعنجه..شمعون..ومضة..عبد العظيم..محمد عمر البلال..انس..فرح العريبي..احمد ضي النور..اسامة مختار..محمد هاشم..نعمات(هاشم+بابكر)..اميرة(خضر+أزهري)..حنان (فداسي)..اشراقة(بشير+ادم)..الإمتثالات (خليل+الرشيد)..منى صالح..لبنى (عثمان+موسى)..نادية..منال(حسن+يسن)..ميرغني (الشايقي)..محمد حسن هلال..حامد الطيب..عبد السلام بحيري..اماني عجيمي..امنة..فوزية..الطيب النور..ناهد حامد..مها مصطفى..الهنا بابكر..بدر الدين الطاهر..على سند..ابراهيم عثمان بريمة.. انتصار باهي..بدر الدين الطاهر..سوسن( الإمام+عبد الرازق)..شادية مصطفى.. امل ابراهيم..رُضُا ميرغني..معلا..عبد المعطي..محمد عبد الكريم..سهام محجوب.. عصام احمد عوض..عمر ابوبكر.. عثمان الدغيس..
    حاجة كان اسمها دفعتنا في الكلية..

    كتر خير سارة النور.. عارف شهد و شروق متكيفين منها.. لأنو اول مرة يشوفو فنانة سودانية ممكن تغني ..و هي بتتبسم..و ده عندهم اسمو..قوة الحضور التواصل..اما انا..فبرضو متكيف منها لحد النزيف.. او كما قال..




    كبر


    (عدل بواسطة Kabar on 29-04-2008, 05:27 PM)

                   |Articles |News |مقالات |بيانات

29-04-2008, 05:31 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)
                   |Articles |News |مقالات |بيانات

29-04-2008, 05:51 PM

عثمان دغيس

تاريخ التسجيل: 14-01-2008
مجموع المشاركات: 1696

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)

    يا كبر
    دحين ما نسيت محمد النور كبر !!!!!!!!!!!!!!!!

    وويييييييين ناجيالحردلو ..؟؟
    وقلت لي إشراقة آدم سويتها دفعتنا ؟؟؟
    يعني عشان كانت بتتونس معاكم ومع ناس عبد الباقي وحاجة فيك ؟؟
    بالمناسبة حاجة فيك دي زااااااااااااااته ما دفعتنا وكده ؟؟؟!!!

    ياخي مالك علينا ياخي ؟؟
    كافين خيرنا شرنا...

    أحييك على الذاكرة اللايوقة ...!

    بس برضو هناك بعض الأسماء سقطت سهواً

    وين إبراهيم محمد الحاج ..
    وين البصري الفكي
    وين عمر محمد الأمين
    وين أبوذر الحنكوش
    وين سهير عثمان سعيد
    وين هالة عثمان
    ندى عابدون
    هاجرمحمد خير
    نادية عب الرحمن عابدون
    مها مصطفى أحمد



    بالمناسبة أعزيكم ونفسي في الفقيدة المرحومة الزميلة سوسن عبد الرازق ..















    يااااااااااااااااااااه
    أيام لها إيقاع ..
    وأي إيقاع .!؟!؟!؟
    إيقاع مردود جنس ردم ..!
                   |Articles |News |مقالات |بيانات

29-04-2008, 09:17 PM

محمد على طه الملك
<aمحمد على طه الملك
تاريخ التسجيل: 14-03-2007
مجموع المشاركات: 8591

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: عثمان دغيس)

    التداعيات مع زمان الغربة الموغل في شمطة الحيل ..
    بتخدر نفوسنا وتفرهده ..
    متابع .
                   |Articles |News |مقالات |بيانات

30-04-2008, 02:15 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)




    التحية لروح الصديقة و الزميلة سوسن عبد الرازق..و هذه مناسبة لنذكرها و نذكر ايامنا..و هذا البوست سيكون مناسبة للإحتفاء بها.. و زميل اخر اخر تهمني كثيرا اخباره..و هو اخونا مرتضى محمد الصادق..


    كتر خيرك يا صديقي عثمان..الذاكرة شغالين معاها معافرة يا اخوي.. تسعة سنين غربة في بلدا طيرها عجمي..ودبورتين..و حاجات تانية حامياني..


    الحاجة المتذكرها كويس يا عثمان.. انو الكشف (من مكتب القبول) كان فيهو 106 طالب و طالبة..و كان في اول الكشف اسم الصديقة و الزميلة الهنا بابكر ..و قطع شك " حاجة فيك كانت الشخصية رقم 107.. اتمنى أن تتذكروا معاي بقية الناس..

    شكرا لإضافة اسماء للأصدقاء و الصديقات..

    تصدق ابراهيم محمد الحاج ده متذكر اول واحد..و اسمو كان قبال خالد بله.. لكن الشفقة..

    المهم.. لهم جميعا التحية..فهم لازالوا في الذاكرة..و قلب الحنين و الشوق..

    و هنا كوكبة تانية..


    ايمان الخواض..رحاب برير.. مليك ..عبد الله مرجي.. عثمان محمد النعيم الجعلي..ثريا هارون دلدوم..احمد الزين.. سليمان ابره..مرتضى محمد الصادق..مبارك دوسه..اشراقه ابو طه..هويدا احمد.. جميلة الأمين .. محمد حسن فقيري..نضال عثمان السيد..ياسر فضل السيد..


    احبكم جميعا يا اصدقائي و صديقاتي..و اهلنا قالوا الجواب نصف المشاهدة..


    كبر


    [email protected]

    (عدل بواسطة Kabar on 30-04-2008, 03:22 PM)

                   |Articles |News |مقالات |بيانات

30-04-2008, 02:21 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)

    Quote: التداعيات مع زمان الغربة الموغل في شمطة الحيل ..
    بتخدر نفوسنا وتفرهده ..
    متابع .




    صديقي و استاذي محمد على طه الملك..حبابك

    كتر خيرك على العبور من هنا..و نتمنى تلقى ذاتك معانا..

    ساكتب بعض الحكاوي هنا..و تصدق يا صديقي.. كل زول او زولة من الناس ديل كانت ليهو خصوصية..

    من ناحية عامة.. كانت هي اول دفعة تدرس القانون الجنائي باللغة العربية..و اذكر انها ايضا اول دفعة يتم فيها تدريس كتاب الدكتور عبد الله النعيم عن القانون الجنائي في السودان..و كان وقتها المرجع السوداني الأول.ز الذي جاء من صلب التجربة القانونية السودانية..


    هي فرصة طيبة أن يلتقى الجميع هنا..


    و نشوفك تاني..


    كبر

                   |Articles |News |مقالات |بيانات

30-04-2008, 02:28 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    تقليد في شان المحبة:






    هنا في كندا تقليد ..يمكن أن نسميه " لم الشمل"..
    Reunion
    فيه يلتقى الناس الذين تفرقت بهم السبل.. سواءا كانوا افراد اسرة مفرزعة في وش الدنيا.. او زملاء دراسة..


    اذكر ان الصديق عبد الباقي الجزولي .. كانت له نفس الفكرة في ايامي الأخيرة في السودان..و كان مهموم بمحاولة لملمة ما تبقى من الأصدقاء و الصديقات (خصوصا المتواجدون و المتواجدات في الخرطوم.. محل الريس بنوم ..و الطيارة بتقوم..")..

    و لعبد الباقى حاجة تانية مهمة جدا..و اذكر انه في الأيام الأخيرة في الجامعة.. فجأنا بدفتر ازرق.. و كتب فيه اسماء البعض منا..و مع كل اسم لمحة (يعني تقول مشروع سيرة ذاتية ) عن حياة احدنا..و هي رؤية تحليلية.. تنبي بمقدرة عبد الباقي على تحليل الشخصيات..و معرفة حقيقية بالناس..طرائق تفكيرهم.. افراحهم .. احزانهم..

    و ما نكتبه هنا.. سيكون وجه اخر من تلك الفكرة..و ذلك بعد خمسة عشر عاما على تخرجنا..التحية له ..و لهم..و لنا جميعا..

    كبر

    [email protected]

                   |Articles |News |مقالات |بيانات

30-04-2008, 02:52 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    اول حضرة:







    في نهايات 1987.. دخلنا الجامعة..و كانت بها ما بها من الأحداث الملتهبة وقتها..اول حادثة استقبلتنا بها الجامعة.. كانت هي حادثة حاج ماجد السوار..و التي كان يروج لها الإتجاه الإسلامي..و يسميها حادثة (عميد كلية القانون) و كان وقتها استاذنا الفقيه العلامة.. دكتور على سليمان فضل الله..و نحن .. كطلاب في الكلية.. لا ننظر لها بأنها حادثة عميد الكلية.. لأنه لم يفعل شئ سوى حرصه على الكلية و طلابها..و منذ اللحظة الأولي .. كنا نرى أن موقفه موقف صحيح.. و أي تربوي في مكانه.. كان سيقف نفس الموقف..و سامح الله.. اخوانا و اخواتنا ناس الإتجاه الإسلامي في ذلك الحين.. لأن الحماس كان زايد شوية..و عملوا من الحبة قبة..

    الحادثة كانت متعلقة بمسألة مهمة جدا..و هي شكل من اشكال وجوه ممارسة حرية التعبير..و النشاط السياسي الطلابي..فلقد كانت في مدخل الكلية حديقتين (نجائل قانون الخارجية)..و كانت من عادة الأخوة في التنظيمات السياسية.. أن يقيموا فيها بعض المناشط (معارض كتاب +ندوات) التي عادة ما تكون مصحوبة بمكبرات صوت..و جمهرة كبيرة من الخلق..

    و للحقيقة و التأريخ.. لم يكن اعتراض دكتور على سليمان.. مبدئيا على ممارسة حقوق الطلاب..و حق التعبير تحديدا..و كيف يفعل ذلك..و هو استاذ القانون الدستوري..و احد ناشطي حقوق الإنسان في السودان ..و كان قد فرغ من اعداد ورقة مهمة عن الوعي بحقوق الإنسان الأساسية و الحريات العامة.زو تم نشرها فعلا.. شخص بمثل هذا الرصيد الضخم من ثقافة حقوق الإنسان و العمل على نشرها في السودان.. بالتأكيد.. لن يولغ في جهل الممارسة و الإعتراض على منع الناس من ممارسة حقها في التعبير..

    اعتراض دكتور على سليمان ..وقتها كان مسبب بأسباب وجيهة .. فاحد النجايل المعنية كانت خلف القاعات 3 (قاعة ثالثة قانون)..و 4 (قاعة رابعة قانون)..و الأخرى كانت خلف مكتبة الكلية.. و كان سبب اعتراضه أن استخدام مكبرات الصوت غير المرشد.. يزعج طلاب الكلية و اساتذتها (في وقت المحاضرات تحديدا)..و رواد المكتبة..

    و حدثت مناكفة بينه و بين بعض من عضوية الإتجاه الإسلامي..و كان اول المتصدين له هو الطالب حاج ماجد محمد السوار (بكلية الإقتصاد وقتها)..ثم روج الإخوة في الإتجاه الإسلامي.. أن عميد القانون حاول أن يقلع القانون بيده..و في الجانب الآخر.. كانت هناك ترميزية عالية في الحادثة..و هي اضفاء بطولة جوفاء على تصرف حاج ماجد..و ارسال رسالة للطلاب مفادها.. أن حقوق الطلاب ..خصوصا نشاطهم.. يمكن أن يواجهوا فيه اعلى سلطة في الجامعة (لاحظ عميد القانون بحكم منصبه هو مستشار الجامعة القانوني..و كان يأتي تعينه بقرار سياسي)..

    و قد قالوا في عميد القانون الكثير.. انه شيوعي.. علماني.. الخ..وكل ذلك لا يهم..و لكن ما يهم.. أنه قد رسخ في تلاميذه خطورة حقوق الإنسان في السودان..و ضرورة حمايتها و الدفاع عنها مهما كلف الأمر..التحية له اينما كان ..و كيف ما كان..

    كان الدكتور على سليمان فضل الله..اول من درست على يديه هذه الدفعة ..مبادئ القانون الدستوري..



    كبر
                   |Articles |News |مقالات |بيانات

30-04-2008, 02:55 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    اطول سنة برليم:




    حادثة اخرى.. كانت هذه الدفعة.. في ذاك الزمان.. قد مكثت اطول فترة ممكنة في السنة الأولي (14شهرا).زو اظنها اول مرة تحدث في تأريخ الجامعة و الكلية.. و كان ذلك بسبب سيول 1988 الشهيرة..و التي ضربت بالعاصمة المثلثة في ذاك الزمان..

    اذكر احد اعمامي..و هو رجل امي و عسكري (عساكر زمان مش عساكر هسع)..قد سمع الأخوان في الأسرة ينادوني بالبرلوم.. فأستفر..و عرف معنى المفهوم.. فأخذ يناديني بالبرلوم.. حتى بعد أن تدربت و نلت رخصة المحاماة..و مرة قلته له : يا عم حماد .. ياخي الشغلانة دي أنا اتجاوزتها زمان.. ضحك و قال لي: انت قايلنا عساكر وهم ولا شنو يا ود اخوي.. جامعة الخرطوم (و كان يسميها الجامعة.. لأنو لا يعرف غيرها)..كن ما شقيناها ..سمعنا بيها..و يوم واحد ما سمعنا زول قعد في فصل واحد اكتر من سنة (طبعا ما كان عندو فكرة عن التربيتة)..و هو يقصد تلك السنة الأولي..


    كبر

                   |Articles |News |مقالات |بيانات

30-04-2008, 03:00 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    كترة خلقها:





    من ناحية عدد.. كأنت تلك الدفعة.. ذات عدد كبير..و هو اول مرة يحدث في تأريخ الكلية..فمثلما ذكرت كان العدد 106 (حسب قائمة مكتب القبول)..اضافة لبعض المتخلفين من الدفعة السابقة..و كان العدد الكلي 123..لاحظ في ذلك الوقت كان عدد طلاب /طالبات كلية القانون (بما في ذلك طلاب الدرسات العليا) كان 412 طالب و طالبة..و اذكر أن احد الزميلات من كلية الحقوق بجامعة القاهرة فرع الخرطوم (جامعة النيلين للناس الجداد شوية)..كانت تتريق على عددنا ..و تقول : ياخي نحن مدرج واحد في الفرع فيها اكتر من العدد ده ..!!

    و تلك هي الظاهرة التي وثق لها احد شعراء جماعة الجو الرطب (التي انشقت لاحقا لقسمين:هيلاهوب + جو رطب)..و الذي قال:

    يا فرعنا..و يا فرعنا..
    فيك كم سنوات رضعنا.. الإ برضنا ما شبعنا..
    المدرج اصلو شامل..
    فيهو مرضع..و فيهو حامل..و فيهو كوتة من الأرامل..


    كبر



                   |Articles |News |مقالات |بيانات

30-04-2008, 03:02 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    اول جمعية قانون ..حضرناها:





    حينما دخلنا الجامعة.. كانت في جمعية طلاب القانون (بمثابة اتحاد طلاب الكلية) قائمة تجمع احزاب ..و كان في رئاسة الجمعية صديقنا و زميلنا حسين عبد الحليم ( في لحظة خروجي من السودان..و في الباخرة..بعد تحركها بقليل.. كنت ادخن و أنا مشحون باللحظة/الإنفعال..و كان يقف قربي شخص و هو يدخن.. فسألني قائلا: ياخي أنا شفتك في حتة .. لكن ما عارف وين؟..و نظرت اليه..الراجل كان وافر البنية الجسمانية.زو شكلو مروق خالص.. فقلت.. ربما في الجامعة..و كان هو اخونا حسين عبد الحليم..)..و في تلك الدورة.. كان اخونا عبد القادر عبد الله (قدورة).. قد نزل في قائمة باسمه .. كمستقل.. في تلك الدورة .. كان اسبوع القانون الخامس (و هو نشاط و تظاهرة ثقافية.. كانت تقام كل سنتين)..


    كبر

                   |Articles |News |مقالات |بيانات

30-04-2008, 03:07 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    استقبال مقلب:





    اذكر اول من استقبلنا..و نحن في ردهات الكلية (تحديدا قدام مكتب مسجل الكلية..وقتها كان الأستاذ على صبير) مجموعة من الطالبات.. اذكر منهن اماني عبد المجيد..و اماني الفكي..و رحبن بنا في الكلية..و كانن ظريفات للغاية..و ذلك الإستقبال.. جعلني اكتب خاطرة (حينما يكون القانون انسان)..اشيد فيها بحفاوة الترحيب ..و علقتها في موقع صحف الكلية (كان في مدخل الكلية مباشرة..و كانت الكافتيريا هناك في ذاك الزمان)..بعد يومين.. التقاني بعض الزملاء..تحديدا الأصدقاء قدورة و جمال على التوم..و قال لي قدورة: نحن سعيدين انو في برالمة ممكن يكتبوا ..و يعلقوا حاجاتهم في الكلية..و ده جوهر الفكرة..و الدايرين نقولوا ليك .. اكتب اي حاجة في رأسك..و ما تخاف.. لأنو ده حقك كجزء من حق التعبير..

    لاحقا اكتشفت أن الصديقات اماني عبد المجيد و اماني الفكي.. هما في تنظيم الإتجاه الإسلامي في الكلية .. طبعا زعلت في روحي.. ياخي يستقبلوني كيزان.. !!.. التحية لهن اينما كانن..و كيفا كانن..فالزمالة عشرة ما بتهون على الناس البعزوها..و الشباب حماس .. اشبه بالطريق لإتجاه واحد..

    على ذكر الإستقبال.. اذكر ان اقام لنا اتحاد الجامعة (كوسو) برئاسة اخونا صلاح الزين.. حفل استقبال الطلاب الجدد (كل برالمة/برلومات الجامعة) في دار الإتحاد..و الطريفة أن الطالب الذي القي كلمة الطلاب الجدد .. هو اخونا و صديقنا ميرغني عبد الرحيم (ميرغني الشايقي)..و هذه ميزة تحسب لهذه الدفعة و اهلها.. التحية لميرغني اينما كان و كيفما كان..


    كبر


                   |Articles |News |مقالات |بيانات

30-04-2008, 03:09 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    حضور المحايدين: من هنا بدينا الحياد:





    طبعا الدنيا كانت ديموقراطية في ذلك الحين..و كان مدخل هؤلاء الشباب (قدورة و جمال).. هو باب على تجربة كبيرة في حياتي..و ربما حياة زملائي و زميلاتي من الدفعة.. حيث تم تأسيس.. حركة الطلاب المحايدين في الكلية..و على ذلك الأساس.. كانت الدورة التالية هي اول دورة لقائمتهم و فوزها في جمعية الطلاب..و كان في رئاسة الجمعية.. صديقنا قدورة..و نائبه صديقنا محمد هاشم عبد الغني (كان التقليد وقتها أن يكون نائب الرئيس من السنة الأولى تحديدا.. ليه؟ لا اعلم)..و سكرتيرها الثقافي صديقنا جمال على التوم (كنت سكرتير الظل .. للسكرتارية الثقافية..و هذا موضوع طويل.. كتبت عنه في مذكراتي كطالب محايد..طبعا لسع ما نشرت)..و السكرتير المالي الصديقة أماني موسى..و بقية العقد الفريد (فريد لأنو أول جمعية محايدين)..التحية لهم أينما كانوا و كيفما كانوا..


    كبر

                   |Articles |News |مقالات |بيانات

30-04-2008, 03:13 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    ثم ، بداية الإنقلاب:




    على اساس هذه الدفعة.. تم تغيير الخارطة السياسية في كلية القانون..و حدث الإنقلابي لصالح حركة الطلاب المحايدين(و هو الإنقلاب الذي دشن سنوات الحياد الذهبية في الجامعة فيما بعد).. صحيح كان هناك اصدقاء و صديقات من الدفعات السابقة ..و لكن الكترة هي التي اغرت رواد المحايدين في الكلية بالتركيز الشديد عليها..و هي الدفعة التي وقعت على رؤوس بناتها و اولادها كثيرا من الأمور الجسام..و هي التي كانت رمح المقاطعة الشهيرة فيما بعد.. اضافة الى مزاج مدهش و عجيب..يقوم على نسيج العلاقات المدهش بين افرادها..و انا اشهد.. أن عدد الطلاب و الطالبات المنظمين فيها في احزاب كان قليل للغاية..

    كان حضور الدفعة ظاهر في كل دورات المحايدين في جمعية طلاب القانون..فكان في اول دورة (دورة قدورة).. كان صديقنا محمد هاشم عبد الغني (نائب الرئيس)..و في الدورة الثانية (دورة امين مصطفى)..عبد المعطي ابراهيم سالم (سكرتير عام).. ندى عبد الرحمن الأقرع (سكرتير اكاديمي)..محمد النور كبر (سكرتير ثقافي)..و في الدروة الثالثة (دورة هلال).. محمد حسن هلال (رئيسا)..محمد الطيب عبد الكريم (سكرتير مالي)..و في الدروة الرابعة (دورة حامد الطيب).ز حامد الطيب رئيسا..اضافة لذلك.. فقد كان الكثيرون و الكثيرات من بناتها و اولادها..اعضاء تنفيذين في الروابط الإقليمية بالجامعة..و على اكتافهم قامت فكرة تجمع الجمعيات و الروابط الأكاديمية و الأقليمية في الجامعة..و منها انتشرت فكرة ضرورة أن يسطر المحايدون على الروابط الإقليمية..و هذا حديث ذو شجون.. تناولناه في المذكرات المشار اليها..


    كبر


                   |Articles |News |مقالات |بيانات

30-04-2008, 03:21 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    و للخلط.. ايضا شئون:




    من الظواهر الإجتماعية لهذه الدفعة.. بعض من اولادها بدأ يخلط السنيرات (بنات ثالثة غالبا) من الأسابيع الأولى..طبعا في ذاك الحين.. كان بعض السناير نازلين في الجماعة تدليس شديد..و بيشجعوهم.. يا برالمة بسنونكم كمان..و بتخلطوا في السنيرات..!.. عجب..!!
    لكن العجب كان الجماعة مغشوشين شوية.. لأن المعادلة الإجتماعية في ذلك الحين.. أن يخلط السنير برلومة..و أن تخلط السنيرة برلوما..

    و حتى لا يظن البعض بنا الظنون.. فالخلط في الجامعة في هداك الحين ..كان يعني الونسة بين الأولاد و البنات.. يعني مجرد تقعد تتكلم ليك مع واحدة.. فأنت لا محالة خالط (و مخلوط كمان)..و كان الخلط انواع..خلط اتجاهي (طرفه احد الأخوان/الأخوات ناس الإتجاه الأسلامي)..خلط سلفي (ديل اخوانا/اخواتنا ناس انصار السنة)..و خلط ديموقراطي (زملائنا/زميلاتنا.. ناس الجبهة الديموقراطية)..خلط اتحادي (اشقائنا/شقيقاتنا الإتحادين).. خلط انصاري (احبابنا/حبيباتنا ناس حزب الأمة و الأنصار/يات)..خلط اقليمي (اخوانا/اخواتنا ناس الأقاليم).. خلط عاصمي (اخوانا/اخواتنا..ناس العاصمة)..خلط فاخر (دي لازم التالت يكون فيهو ليمون بيزنس الفاخر)..خلط قزازي (ده لازم يكون في بيت القزاز.. و هو كافتيريا النشاط في هداك الحين)..

    ايام مرورنا في الدراسة على سابقة خضر الديموقراطي.. قام صديقنا محمد هاشم سمى احد خلاطي هذه الدفعة بالخلاط الديموقراطي..و الراجل كان ما مقصر تب.. لأنو مظهريا كان واقع خلط شديد في البنات.. القدامو..الوراهو..المعاهو في الدفعة.. لكن هل كانت الفكرة خلط وبس؟..ده موضوع تاني..


    كبر

                   |Articles |News |مقالات |بيانات

01-05-2008, 02:08 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    حلة حمد وخوجلي:





    كان هذا الأسم.. نطلقه سرا (في ونسات البركس و كده).. على الصديقات سوسن عبد الرازق..و شادية مصطفى.. و هما كانتا من بنات بحرى.. سوسن تحديدا من الصبابي..
    و كان ثنائي جميل.. جمال روح و طيبة اخلاق..

    سوسن بصوتها الهادئ لحد البهجة و السرور.. متأملة دوما في افق بعيد.. و انجما غارقة في سنائها الوضاح..نحيلة (طبعا الوكت داك كل الدفعة كانت تتميز بالنحافة.. عدا نفرين فقط)..و فيها خضرة دقاقة..تتحدث و كانها تخاف أن يأخذ النسيم بقايا البوح منها..

    اما شادية.. فكانت دوما تجعلك بأنها تفكر في مؤامرة ما.. كأنقلاب سياسي مثلا..و حينما تتحدث اليها تجعلك تعتقد أنك اكثر انسان مهم في هذا الوجود الفاني..و هي شديدة الحرص على أن تقنعك بأن ما تقوله (مهما كان) بأنه حديث خطير الشأن.. تسرق الضحكة..يعني زولة بخيلة بضحكتها..و لكن لها ابتسامتها المميزة جدا..
    اخر عهدي بالسودان.. كنت اقابلها في محكمة الخرطوم الجزئية..و كانت تعمل مع استاذنا ساطع الحاج..
    التحية لها و له..

    اعزى نفسي يا شادية..و اعزيك في سوسن عبد الرازق..و خذي وردة عني و ضعيها في قبرها..
    تحية لجمال نادر.. لا يدوم كثيرا في زحمة القبح الفاتية..


    كبر



                   |Articles |News |مقالات |بيانات

02-05-2008, 05:19 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)



    عفوا..
    الدفعة دي شكلها اتلحست..

    التحية لهم و لهن ..
    و اتوقف هنا..لإعتبارات عجيبة جدا..ما مقتنع بيها .. لكنها قواعد الذوق و الإتيكيت تحتمها..

    اول هذه الإعتبارات.. أن اولئك الأصدقاء و الصديقات ما عادوا طلبة و طالبات..و منهم العرس..و منهم الخاطب..و منهم المخطوب..و منهم من اشتعل الرأس فيه شيبا (زينا كده)..و منهم الكاتلهم الشمار يعرفوا (كبر ده عرس منو..و متين بقى يدخن كمان..- طبعا لمن كنت في الجامعة..ما قاعد ادخن نهائي)..و هكذا..

    ثاني الإعتبارات.. اكتشفت اني قاعد اهرطق هرطقة دايشة ساكت..لأني فجأة تذكرت أن الذين/اللائي اتحدث عنهم هنا .. هم مش ناس عاديين..زيهم و زي الدكاترة و المهندسين و البياطرة..و الزراعيين و ناس التربية..و الجيش و البوليس و العساكر و خريجي الآداب و الأسكولات (اسكول اوف ماث + اسكول اوف بيزنس)..و مساعدي حلة الرئيس ذاتو(الرئيس مش عندو مساعد صاجات..و مساعد حلة كمان؟)..

    ..الناس ديل يا سادتي فيهم القاضي/القاضية..وكيل/ة النيابة..المحامي/ة..و الطائفة الأخيرة دي شوية ممكن نباصر فيها و نكتب عنها..لأنو المحاميين في السودان مفتوحين شوية..و عندهم براح للأخذ و العطاء (مش في واحد محامي كتب غنية البلابل: رجعنالك رجوع القمرة لوطن القماري..و مش برضك بقى وزير عدل و نائب عام كمان؟..و تيب..!)..

    القضائية و النيابة ..قفلات اجتماعية معتبرات..يعني لو الواحد قام انداح هنا و قال فلانة و فلان كان بيخلط و بيجكس..و بتونس مع فلان و فلانة.. بكرة دي صحيفة الدار تشيل حالو..و لو قلنا فلان ولا فلانة .. كان/ت بيشتغل مع ياتو جهة سياسية.. بكرة تقوم تجيهو ولا تجيها.. ام دلدوم صالح عام طايرة..و نكون نحن السبب..

    الأسابيع الفاتتة دي.. كنت عامل فيها بتاع حساسية..و شابك الخلق (قلة حساسية..و فعلتك تركتك).. لكن الحيكومة بتاعتنا.. مرت من هنا..و اول حاجة قالتها لي: ما قلت عامل فيها ابو العريف بتاع الحساسية.. دي فاتت عليك كيف؟..طبعا قطعتها في حناني ذاتو..لأن الجمل تب ما بيشوف عوجة رقبتو..لكن برضك.. الثورة تراجع ولا تتراجع ..ولا نامت اعين الجبناء (طبعا الأخيرة دي مخصوص عشان الحيكومة بتاعتنا)..و ما ادس عليكم يا شباب.. الحيكومة ادتنا ضبة كربون كاربة.. لأن السؤال كان..مش عن التداعي الذكرياتي..لكن كان عن :هل الكسرة (و كسير التلج الجادي ده) في شان سارة النور..ولا في شان سنار؟..طبعا الحيكومة ليها مصنفات كده مشخطة (زي شخيط سودانيز اونلاين لبعض المفردات)..تب ما بتجامل فيها ولا في سيرتها..و منها سنار في ذات نفسها..و في قول اخر.. سارة النور ذاتها..
    I was grounded not to listen to her for ever!

    ياخي الحيكومات..دي..تسرق البهجة من عينيك..
    اها يا ناس دفعتي اعفو لي.. لو حبيتكم كده في السهلة..



    كبر

                   |Articles |News |مقالات |بيانات

02-05-2008, 05:21 PM

Kabar
<aKabar
تاريخ التسجيل: 26-11-2002
مجموع المشاركات: 15486

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)
                   |Articles |News |مقالات |بيانات

03-05-2008, 11:55 AM

منوت
<aمنوت
تاريخ التسجيل: 18-03-2002
مجموع المشاركات: 2637

للتواصل معنا

FaceBook
تويتر Twitter
YouTube


Re: و تاني سنار ، ياعبد الباقي حامد الجزولي ، تسم الدغيس.. (Re: Kabar)

    هذا كلامٌ لذيذٌ كما العُنكوليب ،
    واصل السرد الجميل يا كبر ،
    فالنوستالجيا " أحياناً " حياةٌ تتجدد !
                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de