قصيده جديده لهاشم صديق (عيد معليش)

Quote: حنغيِّر ايه يا «صابر» بيه لو دينار او حتى جنيه؟! ورونا قِرش بي كم مليم ومتين حنفارق أكل النيم واسيادنا طناش يا عيد معليش حايمين في الحله وشوشنا غباش دموعنا ترقرق وبكره طشاش

Quote: يا عيد معليش سبحان الله. ناس يا عيد بِتْضَحي خروف وناس عدمانه كفاها الشوف وناس تعبانه تفتش تيس وناس يا عيد بِتْضَحي «رئيس». .... ناس ما عندها غير سكين الحال مسكين فضيان الجيب وخروف في الغيب وكيس حلمان بي دستة عيش ... يا عيد معليش الناس الرؤسا الناس الوزرا الناس الخُلفا أي معالي. حاشية والي الناس المارقه الناس الخاشه ولاد السُلطه شمار البوسطه الناس الحاشّه قاشره وغاشّه. جناب الأُمرا. كبار الخطبا. ملوك السف وحتى العُوَرا الكانو الرف قرود الشاشه. الجَهَلا الباعو عشان العيش ديل يا عيد الصف الأول ونحنا تملي الصف الطيش .... يا عيد معليش سبحان الله ناس مزرورة تَمِش شقيش؟! لا كعكة طريّه أو حتى حلاوه قويه في كيس. لا خروف مربوط لا ربّه تجوط لا ضلعه وشيّه لا كبده بشطه هشّه ونيّه لا راس بقرون مجدوع في خيش لا كراع.. لا «باع» لا عتوت.. لا تيس. يا عيد معليش ده قدَرْنا مسطر وناس تتفنجر للشعب العربي تسدد خنجر وتضحي رئيس يا عيد معليش مسيخه اللمّه تهاني شِرود «زهايمر» ضَمّه. كلامنا مقطّع مركوبنا مكَعكَع فرحنا مرقّع الجيب مشروط شربانه العمه. والناس بِتْصُر والونسه تجُر لحكاية العُمله .... حنغيِّر ايه يا «صابر» بيه لو دينار او حتى جنيه؟! ورونا قِرش بي كم مليم ومتين حنفارق أكل النيم واسيادنا طناش يا عيد معليش حايمين في الحله وشوشنا غباش دموعنا ترقرق وبكره طشاش وناس يا عيد خروفهم جاي «بكامري» «الهاى» يضحك وهاش ملوّن صوفو تقول بس سيدو كمان نقّاش. برسيم نعناع وقرونو ضراع حنكوش ومسمسم تقول حيغني بنغمة باااع .... سبحان الله ناس يا عيد بتضحي خروف وناس عدمانه كفاها الشوف وناس تعبانه تفتش تيس وناس يا عيد بتضحي رئيس

Quote: شكرا لهاشم صديق الرجل المبدأ