وثيقة عن الواثق صباح الخير

وثيقة عن الواثق صباح الخير
تشكر سودانيزاونلاين الاستاذ خالد الحاج-ابا و الاستاذ جمال عبد الرحمن-هولفل لمساعدتى فى اعادة كتابة هذه الوثيقة والتى قمت بنسخها من مجلة كتابات سودانية من pdf file الى text و التى تنفرد سودانيزاولاين بنشرها فى الشبكة العالمية من مجلة كتابات سودانية عن ود الشعبية الواثق صباح الخير الذى اعدمه جلاد السفاح نميرى سى السمعة و عديم المعرفة و الجاهل بدينه المدعو المكاشفى طه الكباشى فى ما كان يسمى بمحاكم العدالة الناجزة بكرى ابوبكر امين موقع سودانيزاونلاين وثيقـــة علي المــك في أزمنة الرعب … هل سنواصل الغناء؟ أجل .. وسنغنى أغانى الرعب. هكذا قال يرتولد بريخت .. وهكذا ولدت الفكرة .. أن نصوغ عملاً سينمائياً .. حول ذلك الزمان .. مبوتقاً في سيرة الواثق وعدت أنا الي لندن وبقى هو في "مدينة التراب" وكانت رسائله والتى كانت تأتينى كل حين وآخر وعلي مدى عام، هى الركيزة التى تجسدت حولها الرواية السينمائية الواثق صباح الخير.. لم يكتمل المشروع بعد … ثم غاب علي… أهكذا حال الدنيا ..؟ حسين شريف القاهرة 25/2/1993 الوصول الي ديار المشنوق المصلوب .. هذا شأن العمران ودأبه في مدن السودان، بيوت البوليس والسجانة كانت تلفظها المدن إلي أطرافها البعيدة، تظن أن العمران لن يبلغ تلك المجاهل النائيات. وبعد عهد ليس بطويل تحيط بها البيوت من كل جانب ويتغير تبعاً لذلك موضع القلب من المدينة وكذلك سائر الأعضاء. وهذا ايضاً حال الأحياء الشعبية. و"شعبية" بحري بعضها اختفت الآن معالمها القديمه شيئاً، قل: درست فحين انشئت أول مرة كانت كماً مهملاً علي أطراف بحري بيوت من "بلوكات" الأسمنت، ممسكا بعضها برقاب بعض، شكل واحد هيئة واحدة، ليس هناك ما يميز بيتاً عن آخر، المهم إلا إذا غرس أهله في حوشه الضيق شجرة نيم أو بان، أوشيئاً من نبات سريع النمو نسميه (العوير) لا ادرى لماذا ولا نسأل. أسقف البيوت دونما استثناء من "الزنك". وأهل البيوت من الحرفيين والعمال والصناع – علي العموم: المساكين .. ومن بعد أن انتفخت أوداج المدينة علي مر السنين، صارت بيوت الشعبية قريباً من مكان القلب، فطمع فيها أصحاب القصور وأصحاب الفلوس فجاءوها من كل صوب من الخرطوم ومن الفاشر وبورتسودان ثم من ودراوه وشرق النيل ومن بحري نفسها جاءوا . ضاع إذن طابعها المميز فصارت وكأنها لا ترى، أحاطت بها العمائر السامقات والبيوت الأنيقة وهوائيات التلفزيون الملون .. وتأكلت. هناك كوشة في طرف ميدان الكرة غربه تُفضى الكوشة إلي زقاق بالشعبية به بيت حسن ابوعنجة وعلي طرف الميدان الجنوبى بيت الواثق صباح الخير كلاهما ينظر إلي صاحبه جدار البيت من الطوب يختلف من نمط بيوت الشعبية .. قال عبدالمنعم صباح الخير: هذه ليست الشعبية أنها تعويضات شمبات كان القوم من اهل شمبات نفس النظرية تنزع الحكومة ارضهم وتوزعها للموسرين بحجة التخطيط وجمال المدن وهلم جرا .. وتعوضهم ثم تنزع وتعوض .. حلقه مفرغه. نقدم لكم عبد الكريم محمد خير وزوجته فاطمة صباح الخير. جلسنا في البرندة التى تفتح صدرها للهواء الجنوبى العذب، ذلك الذى يلثم الوجوه آن الصيف.. سقفها جريد، جدرانها الطين السميك .. تحمى من الشمس حجرة نوم، تختلس العين منها طرفاً دولاب وسرير كبير، وبعض ارض من الرمل مرشوشه رطيبه. عبدالكريم محمد خير يعمل بناء عمره ثلاثون سنة زوج فاطمة صباح الخير أخت الواثق، تكبر الواثق بعام او يزيد قليلاً - طريدة الواثق .. تزوجا في مارس عام 1984. والخلاصة طفل يحبو، يقع ويقيف .. عبدالكريم من أهالى الشعبية أيضاً .. يروى: كنت أعرف الواثق من بعيد، انا أكبر منو، لكن أخوه عبدالمنعم الكبير ودفعتى في المدرسة بعد ما عرفت الأسرة. وخطبت فاطمة أخته عرفتو اكثر .. إنسان كويس .. ودود .. بعد زواجي بي زى شهر كده جا في البيت عدد من بوليس ام درمان .. الدنيا صباح كانت.. أنا نايم .. قالوا قوم قوم قوم يا الواثق .. قوم يللا معانا .. عريس جديد أنا وأمشى معاهم؟ يا ناس أنا ما الواثق .. أنا نسيبه .. مافيش فايدة قوم أمشي معانا. عرفت أن الجماعة ديل قاصدين الواثق عديل.. شالوني معاهم للقسم الأوسط أم درمان . وكان معاى 9 أنفار سألونى ماشفت الجماعه ديل في حياتى . الشاهد قعدنا في الحراسة من دقش الرحمن لحدى الساعة 9 مساء أو بعدها شوية .. غايتو جناب القاضي جا في حوالى المعاد ده. وسال أنتو بتعرفوا الواثق؟ قلنا لا . قال للبوليس (فِكُوهْم) .. البوليس تحس إنو قاصدو قاصدو عايز يقبض عليه بأى ثمن. يوم تاني بعد زواج الواثق، كنا برضو الصباح بنفطر في البيت، الواثق وأنا.. جه واحد دق الباب ... انت منو؟ سألنا قبل ما نفتح قال: أنا ما عندى اسم .. قلنا ليه لما تعرف إسمك نفتح ليك رجعنا نأكل .. قلبي أكلنى .. بعد دقائق طلع الواثق شاف زول قاعد بعيد جنب عمود الكهرباء .. لابس ملكى .. لما الراجل شاف الواثق طلع مسدس.. رفعوا في ايدو .. زى العايز يورينا هو منو .. وبعدين دساهو في جيبو ومشى .. وكتير البوليس ضدنا.. نقدم عبدالمنعم صباح الخير.. الواثق كتلوه علي 22 سنة بس .. دخل المدرسة وقرأ فيها لحد سنة تالته ابتدائي، طلع اشتغل مراسله في مصلحة الوابورات الوالد نفسه شغال في المصلحة دي .. طلع من هناك اتجند في الجيش في مدرسة المشاة في كررى، اشتغل سنتين عمل مشكلة مع واحد عسكرى رفتوه .. طلع من الجيش ابتدأ يشتغل أعمال حرة، البوليس ما خلاهو يرتاح ولا يشتغل كل مرة داخلين علينا البيت عايزنو في تهمة .. حداشر أو اتناشر تهمة يرموه في الحراسة تطلع براءة مافيش حاجة.. كانوا دائما لما يجو في البيت ينطوا الحيطه طوالى, يصحونى من النوم .. يسألوا عنه أقول ليهم ما في يوم أنا راقد نايم جوا بلورى كومر Commer كبير. طلعت ليهم أختى قالت ليهم وكانوا ابتدوا ينطوا الحيطة وقفتهم قالت ليهم: الواثق مافي قالوا طيب في منو؟ قالت ليهم في أخوى عبدالمنعم قالوا ليها ناديه جات صحتني من النوم قالت في عساكر عايزنك .. سمعونى أقول ليها أنا ما ماشي ليهم جوا طوالى داخلين ببنادقهم الاتوماتيكية (قوم،قوم،قوم) (الضابط بره عايزك) مشيت معاهم الدنيا ليل شديد في الشارع نزل الضابط من الكومر ووقفونى قدام العربية وولعوا فوقى النور الشديد .. العساكر البره قالوا: لا لا ده ما الواثق.. يوم تانى في الصباح كنت ماشي ومعاى واحد صاحبى في بحرى .. الصدفة جابتنا المحكمة وده شئ طبيعي، تعرف لانو المحكمة والبوليس، وبوليس الحركة كلهم تقريباً جوه السوق. خلق كتيره جداً جداً .. فجأة ظهر قدامنا واحد من ناس المباحث زي الشيطان طوالى قال لي: الضابط عايزك ! عايزنى أنا ؟ استغربت جداً.. مشيت معاه دخلنا علي الضابط سأل :الواثق وين؟ قلت : لا أعرف بعد كده الضابط شال برنيطته وفات دون أى كلمة زياد، خلاني ليك مع عساكر المباحث، ديل ابتدوا يتكلموا معاى لازم توريا محل الواثق – ضروري جداً – ده علي منو؟ أنت عارف إلخ.. أصريت قلت ليهم: أنا ما عارف محله لما زهجوا منى واحد لازم كبير قال : دخلوه الحراسة، ضيفوا لي بلاغ سرقة مسجل العربية والراديو. دخلونى طوالى أغرب حاجة في الحراسة لقيت واحد اتذكرت أنى شفته الصباح في ميدان الكورة جنب البيت.. وكنت شكيت فيه وسألته في نفس الوقت :يازول أنت بتعمل شنو هنا؟ قال لي: والله أنا منظر واحد شغال معاه عشان نمشي الشغل .. مشيت خليتو ، لما لقيته في الحراسة إستغربت جداً جداً .. ولما لاحظ قال لي: بعد ما أنت سألتنى ومشيت جوا عساكر وسألونى: يازول الواثق وين؟ قلت ليهم : والله ما سمعت بالأسم دا قبل كده، وأنا منتظر زميلى عشان نمشي الشغل سوا. طبعا ما صدقوا ساقونى معاهم، ولما جيت الحراسة قال واحد كبير منهم ضيفوه لي سرقه مسجل العربية !! وستطرد عبدالمنعم تانى يوم ونحن لسه في الحراسة ساقو الراجل ذاتو لحراسة بحرى، وفي اليوم الخامس طلعونا سوا ساقونا لفسحة مركز بحري وقفونا في الفسحه أنا والشاب ذاتو ومعانا ناس تانى . وقفونا طابور وقالوا: امشوا مشينا زي خمسة أمتار، بعد شوية جابوا قصاص الأثر.. ابتدأ يمشي ويجي ويعاين بعدين رفع رأسه وقال ( الزول هنا مافى) أطلقوا سراحنا طوالى .. الواثق دى أخوى الصغير يعني أنت عارف .. صلتى بيه حميمه ... كنا بنلعب كورة سوا، زمالة الرياضة شئ جميل وشئ عظيم، مرة كان عندنا مهرجان رياضي في ميدان (الجهاد)في الشعبية، بعد نهاية المهرجان كنا قاعدين نرتاح ونتونس .. ظهر تاكسي، وراه طوالى عربيه ثان وقفوا جنبنا، نزل منهم ناس شايلين مسدسات قالوا : كلكم قوموا فوق .. يلا قوموا فوق ... منا فوق عاينو فينا كده أخذوا الواثق معاهم وكما اتنينزملا تانين واحد اسمه محمد والثانى ميسرة .. عاينوا لي بحزم وقالوا ممكن تجنب لهم غيار في مركز بحرى.. الجماعة طبعاً كانوا بي لبس الكورة.. ميسرة بس ما كان لاعب ولابس عادي.. العربية طلعت طويل ... رحت البيت شلت غيار للواثق ولصاحبنا محمد .. مالقيتهم في مركز بحري وطيب؟ قالوا نقلوهم نقطه كوبر .. بالسرعة دي؟ في نقطه بوليس كوبر أول حاجة تضرب عينيك الحراسة، يازول أول ما دخلت كده اشوف ليك محمد رابطين ايدينو بالكلباش مع حديد الباب طوالى جسمه كلو جارى دم .. سالت بسرعه: الواثق وين؟ قالوا ودوه نقطه كوكو .. بالسرعة دي؟ دخلت لقيت واحد لابس جلابيه بضرب الواثق بالعكاز ويقول ليهو أنت قايل نفسك وين؟ دى حلة كوكو، يضرب يضرب والواثق ثابت وفي شوية عساكر بوليس لابسي رسمي واقفين يتفرجوا ... لحظة زي البرق الواثق قبض من أبو جلابية العكاز، ودور فيهم كلهم ضرب رحمه رابح الأم ويكتفوا لحدي ما يهدأ ويقول ليه عشان ما تكشف حالنا مع الجيران زمان ما عندنا عناقريب كفايه يجي يلقاني راقده في الواطه .. لما يشوفني كده طوالى يبكى(عمري ما متأكده منو) قالت سوداء نبيلة السواد، طويله وجسدها يبدو قوياً، ولا توحي بالبدانه شلوخها مطارق، ليست شلوخاً عميقه ولكنها تستوقف العين قبل الخدين جاءت في ثوب بسيط أبيض زهيد الثمن.. لا أظن أنها تجاوزت الخمسين ... جميله. قال: الواثق كان أبوى وأخوى وأمى (اجهشت ببكاء حار جداً إستمر دقائق) بعد أن تماسكت قالت كل تصرفاته معاى من صغير احد ما كبر والله ما غلط علي بكلمه .. اشتغل في البابورات ما قصر، اشتغل في الجيش ما قصر .. قليل كتير كله للبيت ولي أخوانه لما كان في المدرسة يقش لي البيت، ويغسل العده ويساعدني وكمان يدق لي الشطه والبهارات ويختها في العلب .. هو فرق واخوانه فرق، ارسلو أي مكان يمشي ولو طلع يتعشي مع اصحابوه ما بنساني يجي شايل لي عشاي بكره الخمره .. أبوه بشرب كتير.. كان يشرب ويعمل مشاكل في البيت .. الواثق كان يزعل جداً من الحكاية دي .. طوالي يمسكو .. ويتنازل عن عنقريبه وينوم في الواطه .. كل حكايه دي سمعناها عند الناس بس .. لما مرقوه من السجن وعملنا ليه كرامه قال إلا يعرس .. كان خاطب، اتحنن وسار تاني يوم طوالى .. السبت كان دخلته، قال يا أمي الأحد عرس أختي، أختو فاطمة دي كانت مخطوبة قلت ليه يا ولدي أخرو شويه اصر علي رايو .. وتم عرس فاطمه كمان الواثق في امانه الله اتزوج، وسافر ، بعد ما سافر وجا عندو أخت مخطوبة ناداها قال ليها عرسك متين قالت : لسه قال تعرفي يا أمى أنا عايز أجهز لأخواتي كلهن عشان بالي يكون فاضي... صباح الخير دراج العمر 70 سنة يعمل في النقل النهري باشبحار.. الميلاد: الصبابي بالخرطوم بحري.. التعليم الخلوة.. صفته أسود سواده بعض نبيل قصير القامة نوعا خفيف الحركة .. صحة جيده فيما تبدو ذلك الصباح قال: الولد ده الله يرحمه ويحسن اليه مما قام ما غلط علي، البلقاها كلها بناولها أمه ما بشرب سجاير ولا خمرة ولا سعوط .. لما يلقاني شارب وعامل دوشه يكتفني ويخلني في الأوضه عشان الجيران ما يسمعوا شئ .. أنا بشرب من المغصه محمول عندي في ضهري ده 6 بنات غير الماتو ما هيتي كلها مايه كام وعشرين.. وشغال في البابورات دي من سنة 42ّّ تصور وما اتقدمت في الشغل، تعرف الناس الكانوا بعوسوا لي الكسره في البابور حسي دي يقوا ريسين( من ريس الوابور) والحد حسي ماهيتو تحصل 400 أو 500 جنيه أنا ما زادت حاجه من 42 بس من بحار لي باشبحار ما بعرف اشتكي ولا اكتب طلب، مستني رب العالمين .. الخمره البشربها دي قروشه ما منى – من الأخوان يجي ماري واحد بالشارع من الجماعه المرتاحين البعرفهم اقوم اشتموا وأنا شبعان ( يعني سكران جداً) بكره يجي يناولني ويقول يا صباح الخير لو اديتك هسع بتشتمنى تاني؟ أقول ليه: لا .. اقبض منه أمشي الحله طوالى ويجي تاني اشتمه نعرف أنا زهجت من شغل البابورات ده أحسن يدوني حقوقي أعمل لي دكان أربي أولادي .. عندي الأعصاب، يودوني المصحه 15 يوم شهر شهر ونص وارجع الشغل تاني .. وتزيد علي لما اتذكر الولد الكتلوه ده قبال ده كان في الحراسة في المديريه رسل قال داير ضمانه., مشيت اضمنه القاضي سال ده ولدك؟ ورددها 3 مرات وقال: تحلف القسم .. اقسمت علي المصحف وبعد ده كله رفض ضمانتي قمت قلت ليه انت العملك قاضي منه؟ لأنك بليد والعملك قاضي أبلد منك ... عشان القانون ما بيخليك تحلفني علي الولد خاله، عشان الجنا بحلف عليه خاله أخو أمه، ويقول ده ود أختى، برضه ما نفع الكلام مولانا اباه ما قبل الضمانه ( لاحظ الشبه بين رأى صباح الخير في القاضي ورأي ابنه عبدالمنعم في وكيل العريف) البوليس كان ورا الواثق طوالي أهم حاجه إنه كانه يكره كعامله البوليس للمواطنين في الحراسة ويقول ليهم خلوني أنا بدخل ليكم المتهمين بالذوق. وما بيسمعوا كلامه والحال في حاله ضرب ونهر وزجر إلخ .. قبال ده ودوه للقاضي وجابو اوراق القضية القاضي سأل البوليس ون المعروضات المسروقه؟ ماعندهم معروضات القاضي أمر: أمشي يا واثق خلاص مافي حاجه لكن الجماعه وراهو. تعرف الطوارئ بتاعتم دي أنا ما سلمت منها .. قبضوني شارب مبسوط جلدوني,, ودي الحكايه ,, مره بالليل بشرب براي قدام البيت أيام الطوارئ ديك... شرابي كمل ... الليل سرح والرأس إتملا اتهيأ لي أنو طيارة الصباح جات .. ودي بتمر فوق راسي كل دقش واصحى بيها أن كنت نايم واشوفها ... أتارى الساعه كانت اتنين بس .. قمت مشيت بيت الدينكا .. صحيت مديرة البيت شايل الفاضي في ايدي ما كضبت عبت لي قزازتي لي عيبنه طلعت اقدل في الشارع قزازتي في إيدي بس في السكه لاقوني اتنين من الجيش شايلين سلاحهم .. واحد قال بالحرف: تعال يا عمو المسأله باظت، ما قاومت ابداً، عندي قلق شديد يجيني طوالي وزهج انا محمول يا زول الجماعه ساقوني ودوني علي المركز الجماعه في مركز بحري بعرفوني إعتزرو لي وقالوا: تعرف يا عم صباح الخير لو القبضوك ديل كانوا بوليس كنا اطلقنا سراحك لكن الجيش ده صعب نار اللحظه ديك يا دوب النباه في جامع السيد علي علي ابتدأ ينبه قالوا تمشي الدكتور للكشف مشيت.. زولك مما شافني بدون كشف قال سكران، جابوني الحراسة .. استلموا القروش المعاى فضل لي بس ريالين .. دخلتي الحراسه قفلو الباب نطوا فوقى المحتجزين، واحد يخنق وواحد يدافر وواحد يلكز .. كله ده عايزين القروش العندي .. ما لقوا حاجة فكونى بعد شوية شبكونى (يا أبو الواثق ما عندك سفه؟) قلت ليهم لما انتو عارفيني أبو الواثق عايزين تضربوني ليه.. إعتزروا إعتزار شديد. القاضى سألني قلت ليهو أنا ما شربان لكن شايل دا اشربوا لأنى أبو بنات ومحمول .. ولازم أشرب ... القاضي حكم قال: عشان سنك حكمنا عليك بــ40 جلده و10 جنيه غرامه يعني يا صاحبي سخره وخم تراب الزازه بــ10 جنيه والغرامة 10 جنية غاظونى العساكر يدفقوا في العرقى في الأرض ويقولوا (والله عرقى شديد يا أبو الواثق) وما تنسي 40 جلدة .. أها ده ما بيجيب المغصة. وحكاية ثانية فيها قاضي كمان ده كان أيام الدنيا سمحه قبل البسموها الشريعه دي الدنيا نهار حار رسلت البت تجيب بن من الدكان، تعرف رأسي كان فار وعايز قهوة .. البت إتاخرت، طلعت حفيان بلباسي ودارع القميص في كتفي ومشيت أفتش ليها .. الرماضه حرقتنى شديد جات عربية اشرت ليها وقفت كان سايقها قاضى ساكن قدام في الحلة وابوه صاحبى والله وبعدين؟ يازول اتوكلت ونسيت البن والقهوة وأي حاجة ، يا زول ركبت حفيان ، ولبست العراقى جوه عربية مولانا، كان زول ظريف خلاص، سألني بي أدب (علي وين؟) قلت ليه... أمشي الله بفتح عليك، طوالى علي بيت كيدان الحبشية يا زول عندها كلوميت ومرايس تدوش الرأس .. والله مولانا ما سالني وكان ممكن يوديني السجن، نزلني وفات ... الحبضية لما فات صرخت وقالت: ويجيبك القاضي كمان اللحظة الأخيرة في "الشعبية" ترويها رحمة رابح (أم الواثق) يوم في الصباح ..بدري دق الباب دق زي وقت الفطور كده .. قلت ده منو؟ قال عايز الداسق (بالدال والسين)، قلت (وقد شعرت باللعبة):الرسلك منو؟ قال: حسن أبو عنجه قلت ليهو : ما ممكن خسن مقطوع ايد وكراع وراقد مستشفي. الراجل قام مشى .. طوالي مشيت للواثق ومعاه عبدالكريم وقلت ليهم: دا واحد يسأل منك ورديت عليه واظنه بوليس .. الواثق ضحك وقال: عرفته بوليس كيف؟ ولكنه طلع يشوف مالقى زول ... أتاريه إختفى عند المكوجي وعبدالكريم لما طلع اكتشف الحكاية والراجل لما شعر مشي وغاب في الشارع واحده من بنات الجيران جايه علينا لقت الواثق بتحضر عشان يمرق قالت للواثق أوعى تمرق أنا لاقيت زول بتلفت بطريقه مريبه ويمكن يقبضك‍ قال ليها الواثق:أنا ما عندي مشكله مع زول وعلاً طلعة الواثق البوليس ظهر تقول من تحت الواطه، ومشى علي الواثق ، الواثق حاول يرجع البيت، البوليس كورك ليه: أقيف أقيف .. لما سمعوا الكلام فاطمه بتي وصاحبتها جروا الواثق جوه البيت .. وهتفت للعسكري: الواثق اهو لو عايزو خشي ليه العسكري فات الواثق طلع تاني وقال لي: يمه الليله أنا عايز كسره بي ملاح أم رقيقه ... عشان أنا وأخواني نأكل ... عملت الملاح اليوم داك والكسرة .. لكن لا نحنا اكلنا ولا هو اكل ... البوليس جه تاني كيف؟ كنت أغسل العدة . بايت لي ثوب في المويه ما عارف كان حاصل لي شنو .. دخلت علي الواثق لقا ودعمته في البيت قال ليه: قوم اكوى لي جلابية أطلع بيها . سمعنا في اللحظات ديك عربية الجيران دورت بسرعة وطلعت بسرعه .. زي الشايله ليها خير .. دقائق بعد كده الباب دق قمت علي الباب قلت - الزول دمنو؟ - ما يفتح لي زول ما يعرفه . أخير تقول إسمك - انا البوليس فتحت الباب الواثق كان قاعد بي بنطلون وفنله .. البوليس دخل براحه ماشي علي الواثق، الواثق كمان ماشفه، مشي طوالى رأس بيت الجيران رفعت رأسي لقيت روسين البيوت الجنبنا كلها بوليس .. جات فاطمة بتي جارية لي اخوها وقالت إتخارج البوليس طوق البيت ... ما كان في فرصه .. طلع ليهم ... ضابط بوليس قبضو بعنف من اكتافه. الواثق نهره قال ليه: أنا ما بمشي معاك بالنف بالحسنه بمشي .. الضابط فكاه .. الشارع كله الميدان الكبير ده كله اتهيأ لينا مليان بوليس وكان عدد كبير منهم عشرات بعضهم شايلين مسدسات وفيهم الشايل بندق .. وسلاح كتير ... عربات كتيره والمحل اتملا ناس ... طلعوا المسدسات في وشه .. قال مهما كان ما بطلع إلا أغير هدومى، أنا ارتكبت جريمه ..؟ طلب الجلابية ديك ، فاطمة ناولته ليه بالحيطه .. أخته الصغيرة بدت تبكي بكاء شديد واحد ضابط قال ارفعوها في العربية ، الواثق نهره وقال بشده: أي واحد يهبش واحده من أخواتي ما حيحصل معاه طيب ... بعدين ركب في البوكس ورا وقال بعد ما ركب يا ضباط .. يا عساكر .. أنتو يا شعب أن بقيت حى في الدنيا دي بنتلاقى .. وأن مت خلاص). بعد ما ساقوه البوليس رجع البيت تاني فتش في كل ركن فيه وحفروا الأرض واحد فيهم دخل ايده في زير المويه وقال إنو في سلاح جوه الزير‍ دخلوا الأوضه شالوا تلفزيون وجهاز ستريو .. فتطمة بتي حصلتهم ومعاها فواتير الشراء خجلوا رجعوا التلفزيون والاستريو .. لسه الجمهور مالى الساحة خلق كتيركتير كتير ابتدأ البوليس يفرق فيهم بعنف، أعتقل بعضهم ولكن فكوهم طوالى .. هددوهم وقالوا: لو لقينا فيكم واحد في اي زمن جنب البيت ده ما حنسيبوا. شالوا الواثق مركز بحري، ناس بحري قالوا مافي جريمة تحاكموا هنا ودوه أم درمان القسم الأوسط في المحكمة عرضوت قضية السوق الحر ما اتعرف عليه مشتري المسروقات، لكن أتعرف علي جماعه تانين وحاكموهم. 2/1 كلمة من فاطمه صباح الخير أنا كنت بودي ليه الأكل في كل مرة يتسجن فيها وكان دايما يقول لي ويوصيني يافاطمة أوعى تتشاكلي في البيت مهما كان‍ الطريق إلي النهاية: رواية عبالكريم محمد خير ختوه محبوس في القسم الأوسط أم درمان 2 يوم، قدم بعدها للمحكمة .. طلب محامي .. المحامي أيام الطوارئ السودا ما بتكلم ممنوع بس ينصح المتهم والمتهم هو البتكلم .. جابوا الشهود سته عساكر من بحري، والقضية في أم درمان تصور‍ لكن كانوا مجهزين، حلفوا اسم الله بالزور، بعرف واحد اسمه صالح حسين وواحد تاني اسمه عليش .. بدون مستندات .. قالوا كان بضربنا .. نفس بوليس بحري الجبان ده ضربوا بالرصاص في العشش وكان نايم.. المكاشفي ما اداهو فرصه يدافع عن نفسه، كلما يطلب كلمه يتجاهلو ويدي الفرصه للعساكر، وفي الآخر قال ليهو: بكره نديك فرصه تدافع عن نفسك .. بعدين رفع الجلسه ورجع بعد دقائق وفاجأة بالحكم القاسي بعد الحيثيات إياها.. بعدها نطق بالحكم الواثق قال ليه: شكراً .. رحنا انتظرنا في كوبر وجبنا محامي يعمل استرحام عند عمر محمد الطيب .. النميري الله لا رحمه كان مسافر قابلنا الواثق في مكتب السجن سلمنا عليه، كان يضحك ويقول: القاضي ده مجنون أنا لم اقتل أحد .. قلنا ليه: إن شاء الله ما تحصل عوجه .. وبدينا نطارد الاسترحام مشينا نفتش عمر الطيب‍ مشينا القصر، قالوا اللواء في القيادة العامة، فضلنا نفتش عليه من هنا يقولوا هنا .. وهنا وهنا لحد الساعة 2 صباح (أتذكر طائرة الصباح وسكره صباح الخير‍) .. قلنا نبدأ تاني يوم فجر .. كان يوم الجمعه ... مشينا السجن .. الواثق رفض يقابلنا قعدنا في الشارع .. الشمس طلعت فينا وكبرت.. ده يوم إعدامه .. أعدموه ونحنا بره سمعنا الخبر ... بكينا شديد ... جوا الناس قال: هوى الزول ده مات راجل قلنا: كيف؟ قالوا: لما ودوه المشنقه الشاويش أمر العسكري عشان يعلق الحبل الواثق قال ليه: تعال علقوا بي نفسك عشان تخلي للظلم ده الدنيا كلها شيعه الوف من الناس .. وبكوه ... وقليلون من التقوا به واقل من عرفه

10-10-2003, 05:25 AM

مارد

تاريخ التسجيل: 04-24-2002
مجموع المشاركات: 0

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: الراحل على المك)
الوحش يقتل ثائرا * والأرض تنبت ألف ثائر ياكبرياء الجرح لو *متنا لحاربت المقابر

10-10-2003, 05:42 AM

Agab Alfaya

Agab Alfaya
تاريخ التسجيل: 02-11-2003
مجموع المشاركات: 5015

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: الراحل على المك)
اذكر عندما قرات هذه الوثيقة لاول مرة في غير هذا المكان نزلت دمعة من عيني تاثرا بالطريقةالتي صور بهاعلي المك ماساة الواثق صباح الخير طبعا من المهم ان نذكر ان الواثق ليس ثائرا وانما من ضحايا ما كان يسمي محاكم الطواري فقد حكم عليه بالاعدام مع الصلب بناء علي سوابقه ولم تثبت التهمة التي كان يحاكم بها،معلوم ادانة انسان علي خلفية السوابق محرم في جميع القوانين السماوية والارضية وتتعارض مع ابسط قواعد العدالة وقد استطاع علي المك بفضل حسه الفني وعاطفته الانسانية ان يصور هذه الماساة تصويرا ياخذ بمجامع القلوب رحم الله الواثق ورحم الله اديبنا الكبير الراحل المقيم (عدل بواسطة Agab Alfaya on 10-10-2003, 08:23 AM)

10-10-2003, 05:53 AM

مارد

تاريخ التسجيل: 04-24-2002
مجموع المشاركات: 0

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: Agab Alfaya)
الثائر هو الواصف وليس الموصوف رحم الله على المك .. ورحم الله الواثق الذى ظلم فى حياته وفى مماته

10-10-2003, 05:57 AM

doma

doma
تاريخ التسجيل: 02-04-2002
مجموع المشاركات: 15970

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: Agab Alfaya)
الواثق صباخ الخير احد ضحايا المجتمع السوداني حيث الفوارق الطبقيه التي لا ترحم .

10-10-2003, 06:04 AM

bayan

bayan
تاريخ التسجيل: 06-13-2003
مجموع المشاركات: 15417

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: Agab Alfaya)
الاخ الفيا اسمح لى ان اختلف معك على المك هنا اراد ان يدين المجتمع ويجد المبررات للص مشهور ابيه السكير و محمول ب 6 اخوات وامه مغلوب على امرها و قد احضر فقط جانب واحد هو جانب الاسرة انت رجل قانون اكيد مرت عليك حيثيات الحكم لقد اتهم بقتله لرجل وبوليس وفقع عين آخر فى محاولة هربه وكذلك سرقة الاسواق الحرة ونسبة لسوابقه العديد اذ كان يسرق سكان الصافية ويعطى الاموال للفقراء ولو ان مقصده كان نبيل الا انه تعدى على القانون وروع بالامنين فى الافادات العائلية هذه تعاطفنا مع هذه الاسرة المسكينة التى ابتليت برب اسرة سكير و ابن لص لو رجعت للافادة زوج اخته الذى تعذب دون ذنب جناه فقط لانه ناسب هذه الاسرة ولكنه رجل نبيل وقف مع زوجته وتحمل تبعات انضمامه لاسرة مثل هذه اكثر ما احزننى كلام امه لانى ام تعاطفت معها اما كلام والده الذى اتى به على المك ليجد تبريرات لان يكون ابن مثل هذا الرجل مجرما اضحكنى كثيرا خاصة قصة القاضى الذى اوت معه لبيت الحبش على المك فقط سجل افادات دون ابداء رأى فى الموضوع تركها مفتوحة و الواثق ربنا يغفر له قد تطهر من ذنوبه ودفع ثمنها كاملا و لكنه قطعا ليس ثائرا ولا بطلا بل لص عادى ربنا يرحمه ويتقبله

10-10-2003, 07:09 AM

doma

doma
تاريخ التسجيل: 02-04-2002
مجموع المشاركات: 15970

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: bayan)
الاخت بيان احكامك تنفع بس للملائكه يااخي الشراب داكان شئ عادي في سودان ما قبل الشريعه ومن كان منكم بغيرخطئه فليرمه بحجر الحكايه وما فيها حكم القوي علي الضعيف (عدل بواسطة doma on 10-10-2003, 07:18 AM)

10-10-2003, 08:01 AM

Agab Alfaya

Agab Alfaya
تاريخ التسجيل: 02-11-2003
مجموع المشاركات: 5015

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: الراحل على المك)

Quote: انت رجل قانون
اكيد مرت عليك حيثيات الحكم
لقد اتهم
بقتله لرجل وبوليس وفقع عين آخر فى محاولة هربه
وكذلك سرقة الاسواق الحرة
ونسبة لسوابقه العديد اذ كان يسرق

العزيزة بيان
الاتهام شي والادانة شي اخر
كونك متهم بجريمة ما لا يعني انك ارتكبت هذه الجريمة
الا اذا ثبت بالادلة القانونية الثابتة بالطرق الصارمة التي يشترطها القانون وتوفرت كل الضمانات القانونية لمحاكمة عادلة

ما اتذكره ان الجريمة التي كان يحاكم بها الواثق هي السرقة
ولم تثبت هذه الجريمة المعينة بالادلة القانونية المعروقة للقاضي
فحكم عليه بناء علي السوابق
هذا بالاضافة الي ان عقوبة الاعدام مع الصلب عقوبة خاصة بجريمة الحرابة- النهب المسلح- ولم تتحقق شروط جريمة الحرابة في حالة الواثق
ولك ودي

10-10-2003, 12:14 PM

hala guta

تاريخ التسجيل: 04-13-2003
مجموع المشاركات: 1569

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: الراحل على المك)
**

10-10-2003, 01:18 PM

DKEEN

DKEEN
تاريخ التسجيل: 11-30-2002
مجموع المشاركات: 6772

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: الراحل على المك)
شكرا ايها الراحل

10-10-2003, 07:34 PM

سجيمان

سجيمان
تاريخ التسجيل: 10-03-2002
مجموع المشاركات: 14875

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: DKEEN)
اولا العمل عمل مقدر من بكري وخالد وجمال.....الوثيقة كقيمة تاريخة تعتبر ممتازة...وكقيمة ادبية.....ولكن النواحي القانونية يستحسن التحفظ عليها..وخاصة هي صادرة.... عن اهل الواثق صباح الخير....مع غياب...... الاطراف الاخرى....وكنت اعتقد ان البروفسر على المك" رحمة الله" لو كمل جمليه .وسجل ..روايات الشرطة والقضاء...... لكانت الوثيقة اكثر موضعية..............

10-10-2003, 08:03 PM

Agab Alfaya

Agab Alfaya
تاريخ التسجيل: 02-11-2003
مجموع المشاركات: 5015

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: سجيمان)
العزيز سيجيمان عندما كتب علي المك ما كتب عن الواثق لم يكن همه تقصي النواحي القانونية في الماساة انه ذهب الي هذه الاسرة المكلومة باحساس الانسان الفنان الذي يريد ان يصور الماساة من جانبها الادبي والانساني بعيدا عن الجانب القانوني،واعتقدانه قد نجح في ذلك،عندما جعلنا نشعر بان الاسرة كلها وليس الواثق، ضحية لهذا المجتمع وكاننا كلنا مسوولون عن هذه التراجيديا اذا ركزنا علي الجانب القانوني وحده رغم اهميته ،سيغيب عننا الهدف النبيل الذي جعل علي المك يخط هذه الوثيقة

10-10-2003, 08:34 PM

doma

doma
تاريخ التسجيل: 02-04-2002
مجموع المشاركات: 15970

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: Agab Alfaya)
شكرا عجب الفيا هكذا فهمنا القضيه ولسنا بصدد ان نحاكمه مره اخري من ابراجنا العاجيه

10-10-2003, 09:40 PM

سجيمان

سجيمان
تاريخ التسجيل: 10-03-2002
مجموع المشاركات: 14875

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: Agab Alfaya)
عجب الفيا...نعم الوثيقة يمكن لاي شخص ان ينظر اليها من الزاوية التي يراها..... الاديب ينظر لها من زاوية تختلف عن زاوية المؤرخ..... القانوني ايضا..... قد تكون الوثيقة كتبت من منظور سياسي.... لمحاكمة حقبة سياسية معينة...ولكنني اعتبرها قد اتت مبتورة ذلك من منظور شامل....مع الاخذ في الاعتبار كل العوامل التي ذكرت والتي لم اذكر...... ولكن كوثيقة تاريخية...وبعيدا عن العاطفة..اغتقد انه ينقصها الكثير.... لكي تكتمل وتعتبر وثيقة تاريخية........تشهد على حقبة زمنية معينة مر بها المجتمع السوداني........ انا شخصيا غير ملم بكل اطراف القضية....... ولكنني كانسان تجدني اتعاطف مع الواثق واسرته... بناءا على السرد الذي جاء في الوثيقة.......ولكن لكي لا اظلم حقبه باكملها انا في حوجة...الي كل اركان... القضية والالمام بكل جوانبها......اما من الناحية الادبية لا اعتقد ينقصها شي على حسب معرفتي المتواضعة

10-10-2003, 09:59 PM

ترهاقا

ترهاقا
تاريخ التسجيل: 07-04-2003
مجموع المشاركات: 8873

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: سجيمان)
عزيزى سجيمان السرقة هى السرقة حتى ولو كانت لإغاثة المظلومين ، والمسروق هنا مظلوم أيضا فليس هنالك تبرير فى أن المرحوم الواثق بطل ولكن الحكم بالسوابق غير مقبول ولو إرتكب هذا الواثق أى جريمة قتل او فقأ عين كما ذكرت الاخت بيان فهذا مرفوض جملة وتفصيلا

10-10-2003, 08:11 PM

aba

aba
تاريخ التسجيل: 03-06-2002
مجموع المشاركات: 1993

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: سجيمان)
الأعزاء بيان سجيمان إن تجريد أي عمل من حيثياته التأريخية يقلل من شأنه ويجرده من ظروفه الموضوعية ، صدرت هذه الوثيقة في حقبة زمنية كان صوت الجلاد فيها عاليا ومسموعا وكان صوت الضحية مكبوت وخافت ، كلنا نذكر تلك الحقبة السوداء كيف أن المذياع كان يشنع ببسطاء الناس ناشرا أسماءهم وضاما لهم في زمرة المجرمين وما كان جرمهم إلا أنهم يمارسون عادات كانت عادية جدا ومقبولة حتي نزل الوحي علي سيدنا النميري ، رحم الله عليّ فهو هنا كان يمثل صوت من لا صوت له وصرخة في وادي الصمت ورحم الله الواثق فقد كان يمثل الثورة ضد الظلم وإن أخطأت أدواته

10-10-2003, 08:05 PM

عشة بت فاطنة

عشة بت فاطنة
تاريخ التسجيل: 01-06-2003
مجموع المشاركات: 4572

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: الراحل على المك)
يا الله فعلا ايام كانت تمتلئ بالرعب ايام الفوضى ، وسرقة الحياة / وما ابرع هذا القلم الذي يذكرنا حتى لاننسى هذه الفظاع

10-10-2003, 09:28 PM

yasiko

yasiko
تاريخ التسجيل: 02-04-2002
مجموع المشاركات: 2906

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: عشة بت فاطنة)

Quote: اذا ركزنا علي الجانب القانوني وحده رغم اهميته ،سيغيب عننا الهدف النبيل الذي جعل علي المك يخط هذه الوثيقة

شكراً يا عجب
والشكر لبكري ومساعديه ايضاً
والرحمة لهذا الانسان على المك
والرحمة للواثق الذي خلق منه
المجتمع ما أدى الى هذه النهاية
التي تكشف النظام البوليسي وضوابطه الإجرائية وقانون الاجراءات الجنائية وما وصل اليه مستوىالقاضي في الدولة الإسلامية وقتئذٍ التي حرمت المتهمين من حقوقهم الدستورية ومن ثم اجراءت التقاضي بغض النظر عن كونهم مجرمين او لا

10-10-2003, 09:39 PM

KANDAKE

KANDAKE
تاريخ التسجيل: 03-02-2003
مجموع المشاركات: 192

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: عشة بت فاطنة)
Almek did a fantastic job by bringing the humane face of alwathig, be he a criminal or a hero. whoever was tried during those dark days got an UNFAIR trial. The unfairness was gross and monumental. alwathiq was tried according to his reputation not according to the evidence. There is a difference between mounting stories against someone and turning those stories into evidence. that is why it is so hard to prove a "hud" crime. But no, not for those callous scandal of judges. We will never know whether he did what he did or not. According to some laws Mandela was a criminal and a killer who deserved to rot in jail. and without any law to support the charges, Mahmoud M. Taha was an apostate whose life could be wasted.

10-10-2003, 10:57 PM

سجيمان

سجيمان
تاريخ التسجيل: 10-03-2002
مجموع المشاركات: 14875

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: KANDAKE)
بكري.... عليك الله ما تتم جميلك...وتنزل لنا صورة من الوثيقة الاصلية....لو امكن......او ممكن تورينا مصدرها....ومن وين انت اتحصلت عليها........ لكي يطمئن قلبي...وقلوب اخرين

10-11-2003, 12:38 PM

سجيمان

سجيمان
تاريخ التسجيل: 10-03-2002
مجموع المشاركات: 14875

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: سجيمان)
ليس هكذا يا بكري......مرة اخري بجانب تعاطفي مع اهل الواثق......ولكن ليس ثائرا......او بطلا او شهيدا.....لم يقتل الواثق لانه كان يناضل ضد حكم ووضع سياسي جائر..انا لا استطيع ان اقلل من شأن محمود محمد طه....بمقارنته مع الواثق..... لا استطيع ان اقارن.... بابكر النور وعبدالخالق والشفيع احمد الشيخ بمقارنته مع الواثق..... ان البطولة والموت من اجل قضايا مبدئة يختلف عنه من الموت من اجل مسجلات وتلفزيونات...مع قتل رجال شرطة مهمتهم حماية املاك الناس.... حتى لو كانو هم لصوص ايضا اعتمادا على ما ذكرته الدكتورة بيان...لو كانت هذه هي بطولة يا بكري..... اذن هي الفوضة... والقوي ياكل الضعيف....خصامنا لوضع سياسي ليس مبررا على ان نسوق المبررات للسرقة والنهب واغتصاب حقوق الاخرين.....

10-11-2003, 07:16 AM

NEWSUDANI

تاريخ التسجيل: 10-10-2002
مجموع المشاركات: 2027

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: وثيقة عن الواثق صباح الخير (Re: الراحل على المك)
أخــي بكري رغم خلافي في تسمية الضحية الواثق ثائرا فلقـد عايشته وعرفته فهو كان من المترددين على منطقة سكننا،كان مشاغبا على قدر فهمه... الموضوع فجيعة المرحوم علي المك وكلنا في قسوة الحكم على أنسان أى كان جريمته صلب وقطع من خلاف ألخ .كيف لأنسان برهافة حس البروف أن يستوعب هذه القساوة الاأنسانية ؟؟؟ فكل من عرف أبو كارمن يعرف أبن أمدرمان الذي مهما أختلف لا يؤذي خصمه ومهما علا منصبه لا يتكبر فهو المعلم والأديب والفنان المتواضع.كنت ألتقيه مرارا أمام دار النشر بجانب داخلية البنات وحينها كنت في كلية الهندسة وهو صديق للأسرة ذات مرة قابلته في طريقي من شارع الجامعة الى شارع الجمهورية وبعد عــدة ساعات قابلته من شارع الجمهورية عائدا لشارع الجامعة فأشار لي ..وقفت ونزلت من العربية فسلم بطيبته وبسمته قائلا "شنو أنت لاعــب مع داخلية البنات حقي حقك ولاشنو" فلم أتمالك نفسي من الضحك وقلت ليه" يابروف أنتوا شايلنها تتو في فرسان في الميدان " وكان بجانبه أثنان من مقدمي البرنامج رحم الله علي المك و رحم الله الفريق أبراهيم أحمد الذي سعى لعودتي الى السودان الحبيب بعــد غياب 14 عاما ولكن الموت غيبه هو أيضا فياترى كبف يكون السودان من غير البروف والفريق ودكتور عوض دكام وكمال سينا لعنــة الله على المشروع الحضاري فهو نحس أن يموت هؤلاء العظماء في زمنــه الردى

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]