عصيان عصيان حتي نسقط الكيزان
إلى شباب ثورة العصيان المدني: الحرية لا تقبل المساومة!
منبر التجانى الطيب للحوار بواشنطن يقيم ندوة بعنوان الازمة السودانية و افاق التغيير يتحدث فيها على الكنين
العصيان المدني...... تجميع فيديوهات للتوثيق ومزيد من النشر
19 ديسمبر .. إني أرى شعباً يثور !!
منتديات سودانيزاونلاين    تحديث الصفحة    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 12-07-2016, 02:27 PM الصفحة الرئيسية

مدخل أرشيف العام (2001م)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

1995 عاد لمتين؟؟ لوحة مسرحية تأليف تماضر شيخ الدين

06-18-2002, 10:24 AM

Tumadir
<aTumadir
تاريخ التسجيل: 05-23-2002
مجموع المشاركات: 14699

للتواصل معنا

FaceBook
تويتر Twitter
YouTube

كيف احذف مداخلة من بوستى
1995 عاد لمتين؟؟ لوحة مسرحية تأليف تماضر شيخ الدين

    مهداة الى الشقيق هشام شيخ الدين ...يا زول... وهو يقرأ هذا العمل لاول مرة بسبب الفرقة والذى املتهاعلينا ظروف الوطن الجريح وجميع اعضاء المنتدى
    والملهم الاكبرالشعب السودانى فى نضالوالخرافى ضد القهر والكبت والظلم

    اسمى عواطف ...
    ساكنة الثورة...
    عندى تلاتة وبمشى المكتب

    ابلتق فيهم قدر الفى

    استر الحال
    واغطى العورة


    مرة طماطم ومرة قميص
    مرة بطاطس ومرة رغيف

    قدر ما نسدها هى بتتقدة


    غايتو رضينا بنمشى المكتب

    قالو اتلفلفوا اتلفلفنا
    بى توب بملاية اتكلفتنا
    قالوا انطموا انطمينا
    البص بى عشرة
    البص بى عشرة
    الفحمة الواحدة بقت بى خمسة
    وفى الدكان الفول بالدستة
    العيش مافى
    سكر مافى
    الزيت مافى
    بنزين مافى
    تراب وعجاجة وحتى المطرة السنة دى مافى
    وغايتو رضينا بنمشى المكتب

    ؟وشن المكتب
    ورق مردوم وفارو قصادو
    رئيسك كوز
    ونايبو حرامى
    غفيرنا جنوبى زى السوط بشوش وبسلم
    سيد المطعم سمين ومدوعل ومشلخ سلم
    امين المخزن تاجر يبيع قى السوق الشعبى وشنبو مبرم
    مراسلة شيوعى ومابتكلم
    وصنة شديدة
    شعب مأطر ودوره مقسم صنة شديدة حكاية تهمم
    وبرضو رضينا بنمشى المكتب

    لما تمغرب
    بنفتح تلفزيون امدرمان اقصد تلفزيون الثورة
    يجوك ناس كدة لابسين اخضر
    زعلانين منك
    يهرجوا فيك ويضربوا الرورى
    ورورورورورك
    الله اكبر بحمدالله فتحنا جوبا بحمدالله دخلنا الكرمك
    سودان باميرى طمبرة ماهية مافى سودان ياميرى

    لابجيبوا سيرة الاستعباد
    لابجيبو سيرة الاستبداد
    لاقالوا يوم فلان كتلوه
    يتموا اولادو وسحلوه
    (محاكية)
    والانتاج والعلاج
    عينك للبشتنة والعولاق وشابكننا انتاج وعلاج
    خالتى خديجة كجك تتغطى وتقنت ليه وتديو ضهرا
    -كضب السواد


    والكهربا تقطع
    وتسمع جاااااااااااااااك فى جوف الحارة
    -هى مالكم نعل ماطيبة؟
    -الشافعة سهاد وقعت من فوق قصت ضهرا
    -ضربتا كهربا؟
    -هى بسم الله الكهربا قاطعة تكوس فى الشمعة
    ماشة تكابس للكبريتة
    الكرسى رماهاا الطين زلقا
    مامعروف كان كسرت ايدا واظنها ماتت
    -هى قولن بسم الله هى ماتشوفن تكسى حسن
    -حسن ياتو؟ حسن ودباشا؟
    دة التكسيو واقف يومين عدمان القطرة؟
    ماشايفاو قاااعد فى الضللة يفاقق ساى فى الكورة وفى الأسعار وكلام النشرة؟
    -هى ترى قامت
    -انخلعت ساى
    ماديرين لمة
    -الليد طيبة بجيبوا بصير

    وهم طبعا عارقين الخيبة الجاية
    قروش التكس والبنج المافى واشعة اكس
    وقايمة مافى
    -انخلعن ساى
    وبالحال دة ماشين ساااااااى
    وبرضو رضينا بنمشى المكتب

    يوم فى المكتب وزى العادة ولما تسخن وتبقى جهنم
    بنمشى نقنب تحت الشجرة
    فى كنيبة كدى وكرسى مكسر وحجر وبلاطة
    بنقعد نتونس
    جنب ست الشاى
    نتكلم يعنى عن حالتنا وحال الدنيا
    كنت انا ومحمد وسلوى وابراهيم ومعاناالسيد
    السيد دة ما بنعرفو كويس بجى لى سلوى
    سلوى مليسة واظنو هو كيسا
    ابراهيم دة اغبش وساخر
    محمد طيب وزى متحمس

    ويعنى كلام اتجدع
    -لى شهرين ماضقت اللحمة
    -نحن سنة بناكل قراصة
    -نحن سخينة
    -ونحن على الدكوة ترسينا
    -وعاد لمتين؟
    دى انا القلت عاد لمتين
    وقامت كبرت عاد لمتين
    محمد فام يتنفض كلو
    صحى لمتين؟ الجوع كافر الشعب جبان
    لازم نتحرك
    ابراهيم حاول يثنيه ومحمد يزيد لازم نتحرك
    اما السيد ماقال حاجة لكن واضح ما كان راضى
    وسلوى معاهو تتمحرك وتضحك
    غايتو كلامنا اتدهده مات
    جاتنا تلاتة مشينا نكابس للثورات
    الثورة نص الثورة ظلط عاد الثورات ماكترت
    ركبت البص فى شمس الضهر البتعرفوها
    الحر البغلى العرق الجارى
    ناس تتآكل من آلاما وصمتها قاتل عندها كتمة
    غايتو ازدحمت بنات افكارى
    جانى كلامو محمد تانى وجضة فاطنة وناس حلتنا
    غفيرنا جنوبى وزى السوط بشوش وبسلم
    وكرش الزول الماسك المخزن

    وصلت البيت شفعى يتخاتفو فى اللقمة
    الجيران يتشاحدوا فى الكسرة
    اللمات خنقاهن عبرة
    الماسورة العادمة القطرة
    خليناك يا رش السهلة
    وخليناك يا زمن المهلة
    من المغرب نقفل بابنا خلينا زيارت اصحابنا
    غايتو رضينا مشينا ننوم
    ونحمدو رب القدرة علينا بعد البينا بنمشى ننوم

    جونا اتنين الساعة اتنين
    رجال الليل رجال الغفلة
    دفرو الباب وكسرو الطبلة
    -حتمشى معانا
    -هى ماشين وين؟
    -حتمشى معانا
    -واولادى الراقدين نايمين
    _حتمشى معانا
    _واخوانى الما شغالين
    _حتمشى معانا
    -وناس امى البيتم من طين
    حتمشى معانا حتمشى معانا يجابدوا يناتلو حتمشى معان... حتمشى معانا
    لقيت روحى جوة الزنزانة
    والله يجيركم من الصمت الفى الزنزانة ومن الوحشة الفى الزنزانة

    شهرين لازول بسأل لاعارفة الحال دة آخرو متين

    وبعد شهرين بدا التحقيق
    جونى اتنين ساقونى لمكتب ضابط
    معاه اتنين ساقونى لمكتب تانى
    فتحوا الدفتر وزى الاسد الضابط ينتر
    -عندى معلومات هنا انك بتحرضى ناس المكتب
    -انا؟
    -بتعرفى ابراهيم ومحمد؟
    -آى ديل بالضبط زملاى فى المكتب
    -فى يوم اغبر تحت الشجرة مش انتى القلتى عاد لمتين؟
    -آى قلت..... بس
    -خلاص دى التهمة الجاهزة .... دا التحريض الضد الدولة
    -عارفة انتى عملتى شنو؟ وعارفة جرحتى شعور منو؟
    -انا جرحت شعور؟ شعور منو؟
    -سيد وسلوى
    _نعم؟
    -لأنو سيد دة موظف فى ال.... اقصد سلوى موظفة فىال...
    ومامهم تعرفى
    عشان نتأكد دايرين نعرف اسمك عنوانك وضعك؟

    -اسمى عواطف ساكنة الثورة عندى تلاتة....و.....

    -تلاتة؟ ابوهم وين؟
    -عندى تلاتة ابوهم ميت وبرضو جرحت شعور ناس سيد؟
    ابوهم ميت عذبو سجان بربرى زيك
    مات والناس صبحانة تعيد
    وبرضو جرحت شعور ناس سيد؟
    شفت بريق حدقات اطفالو؟
    هى البتهدد عرش السيد
    هى البتأسس لى يوم بكرة
    وللمستقبل تبنى تشيد
    شفت الوعى الدافر وجايى
    شفت النبت القايم وجيد
    دة البجهجه ناس السيد
    وليكم يوم يا ناس السيد
    ليكم يوم ياناس السيد.



    اتقدمت للسودانيين فى اكتر من عشرة ولايات امريكية واتسجلت للتلفزيون العربى فى امريكا.
    ان شا الله تعجبكم بس.

    _
    -

    (عدل بواسطة Tumadir on 06-18-2002, 10:46 AM)

                   |Articles |News |مقالات |بيانات

06-18-2002, 10:58 AM

BitAlhana
<aBitAlhana
تاريخ التسجيل: 02-14-2002
مجموع المشاركات: 1078

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: 1995 عاد لمتين؟؟ لوحة مسرحية تأليف تماضر شيخ الدين (Re: Tumadir)

    حلوة حلات ستها يابت عمي
    والله بديت اقراها على عجل لقيت روحي لازم اتمها لي النهاية
    واقع حقيقي ومعاش كل يوم ...
    بس الله يدي الصبر
                   |Articles |News |مقالات |بيانات

06-18-2002, 11:11 AM

Tumadir
<aTumadir
تاريخ التسجيل: 05-23-2002
مجموع المشاركات: 14699

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: 1995 عاد لمتين؟؟ لوحة مسرحية تأليف تماضر شيخ الدين (Re: BitAlhana)

    اريتو رايك راى الهنا يا بتنا
    شكرن جزيلن
                   |Articles |News |مقالات |بيانات

06-18-2002, 11:23 AM

GamarBoBa

تاريخ التسجيل: 03-07-2002
مجموع المشاركات: 4985

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: 1995 عاد لمتين؟؟ لوحة مسرحية تأليف تماضر شيخ الدين (Re: Tumadir)




    اللمات خنقاهن عبرة
    الماسورة العادمة القطرة
    خليناك يا رش السهلة
    وخليناك يا زمن المهلة

    استاذة تماضر...
    لك التحية.

    كتابة جميلة ومفردات سودانية معبرة ودافئة كحضن الوطن ..

    لك التحية ومزيدا من الابداع.
                   |Articles |News |مقالات |بيانات

06-18-2002, 11:15 AM

kofi


للتواصل معنا

FaceBook
تويتر Twitter
YouTube

كيف احذف مداخلة من بوستى
ابداع (Re: Tumadir)

    واللة ابداع
    وتصوير امين ولغة مباشرة ان شاءاللة ناس معانا هنا يخجلوا
                   |Articles |News |مقالات |بيانات

06-18-2002, 01:24 PM

almaskoon
<aalmaskoon
تاريخ التسجيل: 04-22-2002
مجموع المشاركات: 179

للتواصل معنا

FaceBook
تويتر Twitter
YouTube

كيف احذف مداخلة من بوستى
وربنا يكضب الشينة (Re: Tumadir)

    كلام برااااحه ولغه لزيزه اجبرتنى اقراها تانى وتانى. والمشكله جرح الاحاسيس دا زاتو قلة و الناس دىارواحم كدايس واتمكنو وربنا يكضب الشينة
                   |Articles |News |مقالات |بيانات

06-18-2002, 01:45 PM

nadus2000
<anadus2000
تاريخ التسجيل: 02-04-2002
مجموع المشاركات: 4756

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: وربنا يكضب الشينة (Re: almaskoon)

    تسلمي أيتها المبدعة
                   |Articles |News |مقالات |بيانات

06-18-2002, 01:45 PM

waleed500
<awaleed500
تاريخ التسجيل: 02-13-2002
مجموع المشاركات: 6653

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: وربنا يكضب الشينة (Re: almaskoon)

    تحياتى تماضر
    عواطف دى زوجها وين؟؟؟؟؟؟؟
    شايفها داخله السوق برها وبتربى فى اولادها لحالها

    العيش مافى
    سكر مافى
    الزيت مافى
    بنزين مافى

    الكلام ده يا قديم خالص يا ما فى زمن الانقاذ؟؟؟؟؟؟؟؟؟
                   |Articles |News |مقالات |بيانات

06-18-2002, 01:58 PM

almaskoon
<aalmaskoon
تاريخ التسجيل: 04-22-2002
مجموع المشاركات: 179

للتواصل معنا

FaceBook
تويتر Twitter
YouTube

كيف احذف مداخلة من بوستى
to waleeeeeeed (Re: Tumadir)

    يا الوليد- ("ابوهم وين؟
    -عندى تلاتة ابوهم ميت وبرضو جرحت شعور ناس سيد؟
    ابوهم ميت عذبو سجان بربرى زيك
    (مات والناس صبحانة تعيد"


    انت بتقرا سطر و تفط سطر ولا شنو يا السيد
                   |Articles |News |مقالات |بيانات

06-18-2002, 10:07 PM

Tumadir
<aTumadir
تاريخ التسجيل: 05-23-2002
مجموع المشاركات: 14699

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: to waleeeeeeed (Re: almaskoon)

    ماتخاف انا اخويا مقلاع الحجج بالمناسبة دى يا هشام ليه فتحت لى؟
                   |Articles |News |مقالات |بيانات

06-18-2002, 10:34 PM

Abu Suzan


للتواصل معنا

FaceBook
تويتر Twitter
YouTube

كيف احذف مداخلة من بوستى
Re: to waleeeeeeed (Re: Tumadir)

    I like the way you write and the funny way you tackle serious issues. I found myself reading this post time after time until the onion I put on the pan burnt.
    Thanx sis
                   |Articles |News |مقالات |بيانات

06-18-2002, 10:44 PM

Tumadir
<aTumadir
تاريخ التسجيل: 05-23-2002
مجموع المشاركات: 14699

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: to waleeeeeeed (Re: Abu Suzan)

    وبتطبخ برضو؟
    امال ليه بقولو عليك كدة؟
    بهظر معاك ساكت

    لكن شكرن الله ما ضراك
                   |Articles |News |مقالات |بيانات

06-18-2002, 11:05 PM

Abu Suzan


للتواصل معنا

FaceBook
تويتر Twitter
YouTube

كيف احذف مداخلة من بوستى
Re: to waleeeeeeed (Re: Tumadir)

    oh my....what do they say? and who are they?
                   |Articles |News |مقالات |بيانات

06-18-2002, 10:43 PM

BousH
<aBousH
تاريخ التسجيل: 04-19-2002
مجموع المشاركات: 1877

للتواصل معنا

FaceBook
تويتر Twitter
YouTube

كيف احذف مداخلة من بوستى
؟ (Re: Tumadir)

    الاخت تماضر
    لكي التحية
    ابـــــداع
    الله يديكي العافية

    اخوي وليد حقو تطلع من البرج العاجي بتاعك ده

    ولكم التحية
                   |Articles |News |مقالات |بيانات

06-18-2002, 10:50 PM

waleed500
<awaleed500
تاريخ التسجيل: 02-13-2002
مجموع المشاركات: 6653

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ؟ (Re: BousH)

    بوش الفول وليس الرئيس
    اى برج يا عزيزى هو سوال للاستاذه تماضر ليس للاخ المستكين او لك
    ومن حقها ان تجيب او لاتجيب لان الاجابه موجوده ومعروفه لى
                   |Articles |News |مقالات |بيانات

06-18-2002, 11:11 PM

BousH
<aBousH
تاريخ التسجيل: 04-19-2002
مجموع المشاركات: 1877

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ؟ (Re: waleed500)

    اهليييييين وليد انت صاحي
    تحية ود وسلامي لكل اهل البلد

    بوش الفول ده فيهو شطة لووووووول

    الكلام ده يا قديم خالص يا ما فى زمن الانقاذ؟؟؟؟؟؟؟؟؟
    الفوق ده كلامك صاح؟؟ ولا انا غلطان

    انقاذ ليهو 13 سنة عايز أعرف منو القديم؟ يعني تقصد في معناة اكتر من كده قبل 13 سنة واحنا ما عارفين ولا كيف
    كل اصناف العذاب للشعب السوداني في زمن الانقاذ!؟ هذه حقيقة تاريخة
    ولو تغالط التاريخ ده شئ تاني
    وبقصد بالبرج العاجي يا عزيزي انت عايش في وادي وعامة الشعب في واد آخر وده ح يختك في خانة مسئولي النظام (مخصصات، عربات، بدلات، منح،ربما اشياء أخري ) ولو ما كده انقل لنا المعناة الحقيقية في الشارع وليس حياة الفلل والقصور

    ولك التحية
                   |Articles |News |مقالات |بيانات

06-18-2002, 11:26 PM

Yaho_Zato
<aYaho_Zato
تاريخ التسجيل: 02-04-2002
مجموع المشاركات: 1124

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ؟ (Re: BousH)

    nice piece ......lazeeza 3adeel kida
                   |Articles |News |مقالات |بيانات

06-18-2002, 11:41 PM

shak

تاريخ التسجيل: 02-12-2002
مجموع المشاركات: 0

للتواصل معنا

FaceBook
تويتر Twitter
YouTube

كيف احذف مداخلة من بوستى
سلام عليك يا تماضر (Re: Tumadir)

    صاح خلاص خلينا رش السهلة
    احيلك يا تماضر لقصيدة محجوب شريف
    ست البنات لى حدهن انت ستهن لى حدهن
    شاك
                   |Articles |News |مقالات |بيانات

06-19-2002, 01:17 AM

Tumadir
<aTumadir
تاريخ التسجيل: 05-23-2002
مجموع المشاركات: 14699

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: سلام عليك يا تماضر (Re: shak)

    حتى هن ما هينات
    شوكرن
    و قصى كمان
                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>

· دخول · ابحث · ملفك ·

اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia
فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de