|
دعواتكم لزميلنا المفكر د.الباقر العفيف بالشفاء العاجل
|
|
 Re: مذكرات حنكوشة.......1 (Re: zola123)
|
مذكرات بدايتها تبشر بتناول عميق وبأسلوب متميز..وبسخرية موظفة تماما لخدمة القضايا وعمق تناولها وهذا ما لمسناه منذ زمن طويل فى أسلوب الزولة 123..ونتمنى من خلال تناولها فى حلقاتها التى وعدت بها ان نتمكن من استجلاء عالم الحناكيش ...
تحياتى
ودعزة
| |
 
|
|
|
|
|
|
|
|
Re: مذكرات حنكوشة.......1 (Re: wadazza)
|
اخيرا يا الزوله 23 بعد المائة
طال انتظارنا لهذه المزكرات كثيرا ولكن اخيرا اوفيتي بالوعد
ونحن في انتظار الحلقات القادمة
خارج الاطار: انتي الصور حقت بورداب الامارات كانت مشفرة ولا شنو ؟
يعميني ويطرشني انا غايتو
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
ود عازة شكرا على الاطراء ويا ريت نكون عند حسن الظن
معتز شكرا ليك الكسل تقول شنو
صور اللقاء ضاعت في فترة توقف البورد ولم استطيع اعادة تحميلها عشان برضو مركز تحميل الصور واقف
لمن يرجع اوعدكم اتابعها
تحياتي
| |
|
|
|
|
|
|
|
|
|
Re: مذكرات حنكوشة.......1 (Re: نصار)
|
لك التحية
الزولة 123
الحنكشة خايلة فيك
وياريت تاخدو كورس في الزولنة
والزولنة هي ان تكوني زولة بحق وحقيق عارفة لكل المصطلحات الزولانية
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
عمنا قرجة كيف الحال
تحياتي وسلاماتي الحارة
تصدق بيخيل لي كل شي؟
كنتا راجية تعليق زي ده من قبيل
عشان
عارفة مافي موضوع بيستقيم من غير نقد,وانحنا ازوال وزولات حناكيش ام شفوت شاء الأعادي أم أبوا لوول ( أعادي دي هزار) 
وكنت متوقعة طبعا ان يتم الربط بين حنكوشة وبين شخصي الضعيف
حنكوشة دي شريحة كبيرة من المجتمع السوداني
شئنا ام ابيناا
وبدل من ان نكيل اليها السهام ونتفنن في التريقة عليها
فلنحاول ان نفهمها ونستوعب الظروف المحيطة بها التي بنت حنكشتها تلك
اجزم ان الكثير من السودان متشوقون لسماع المزيد..متهكمين يمكن لاكن املي ان يكونو منصتين بتمعن في النهاية
عشان يعرفوا حنكوشة دي بتاعة حركات ودلوعة ومستهبلة ولا هي بالجد بريءة ومسكينة وما عارفة شي عن بلدها
للموضوع تكملة وأرحب بكل التعليقات
في ناس قالوا لي اضع الاجزاء جميعها في بوست واحد عشان ما يتشتت, رأيكم شنو؟
زولة123 أجدع زولة 
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
الحنكشه عندك يا زوله
والله انا بي فصاحتك عرفتك عايزه تطرحي قضيه و كدا
اؤيد الاقتارح الاتقدم ليك و بعدها اطرحي وجهه نظرك
في موضوع الضحايا ديل
و بيني الفرق بين الحناكيش بالغصب و المتحنكشين بالغصب برضو مع اختلاف الغصبين حيث الحنكوش مغصوب و المتحنكش غاصب علينا حنكشتو فارضه يعني
ولا ما دا الموضوع
انا يمكن اكون طشيت الود عامل فيها ناقش و كدا
لكن جد الموضوع دا مهم من حيث الحكم على الاشخاص و تصنيفم
بعدين بحكي ليك شكله حصلت في الشات تدور حول الموضوع دا
تحياتي
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
هنكوشه .. والله الموضوع جميل واهو انشاء الله نتابع معاك لاهمية الموضوع وانشاء الله نصل لخلاصه يستفيد منها اصحاب الاهتمام ونصل لبعض المعالجات دمتي عزيزتي الدكتوره
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
زولة يا غالية
والله ما دايرة اشكرك علشان ما يقولو علشان صحبتها لكن جد القصة جمييييييييييييييييييييلة جدا تحمل جواها معاني ما ساهل يلقطها اي زول لا اذا عايش حنكوش وزول تاني ما حنكوش وتسلمي انك بذكائك لقطتيها ربنا يخليك ولقدام ومنتظريييييييييييييييين الجاي بشوق
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
ايهاب وليم ظبية بت القبايل
حبي وتقديري
مافي زول فضل ما بقى يناديني حنكوشة هزلا وجدا
وناس قالوا انتي ما فاهمة حاجة عن الحناكيش
وناس انبصتوا وطالبوا بالمزيد بنفس الاسلوب
والله يعينا على ارضاء جميع الاذواق
لاكن برضو حافضل زولة123
اختنا سودانية مالك علينا؟
وكتر خيرك على اللينك الما بريء
سمعينا صوتك وشاركينا رأيك بدل من الوصلات
انتي اكتبي بس بوست منفصل وليك علي واللهي اجمع كل الناس ونمشي ندللك بيهناك انتي كمان لوول اها تاني تامري بيشي؟
عندنا كم سودانية في البورد احنا
أساسي الاساسي
اول شي حمدالله على السلامة
وشكرا على التعليق
بس النقطة دي ناقشتها مع بعض الاخوان وحاولت ان اصل معهم لاتفاق
انني اتحدث عن شريحة معينة, كبيرة ومهمة, ما افتكر انو كتير بتحكي ليكم هم عايشين كيف وبتصرفوا كدة ليه لمن يمشوا السودان
نصيحتي الصبر ثم الصبر يا جماعة لسة دي تاني حلقة وما كنتا دايرة طوالي اشتغل نكت وضحك لى مواقف ومفارقات الحناكيش لمن يمشو السودان
وخلونا ما نقعد نختلف على عنوان الموضوع وتعريف الحنكوش من دون الالتفات للموضوع
ولو وجدتوا فعلا انها مذكرات عادية ليوم عادي لابنة مغتربين برضو ما بطال المشكلة وين؟؟
ما في من شيء يجبركم على متابعة موضوع مستائين منه للدرجة دي
بس برضو حكاية انو ديل ما حناكيش ضحكتني يا اساسي لوول
ودي نقطة ايجابة على الاقل لمن نرجع السودان سيتوقف شخص عن انتقادنا
يعني معنى الكلام طلعتا انا ما فاهمة حاجة ولا بعرف شي عن الحناكيش ولا عن حياتهم مثلك عشان انتا عاشرتهم كويس في الجامعة؟؟
طيب قول لي منو بيعرفهم تاني اكتر مني لووول
بس انتا ما تعصب وتقول الناس التانيين هم البيعصبوا ودواك عندي لووول
بس برة البورد والفيزيتا حقتي غالية خلي بالك
الحلقة الثالثة قريبا
نصار شكرا على الحوار والنقد المثمر في البالتوك
وللأخوة هناك وفي البورد كل التحايا
ومع حنكوشة 3 قريبا جدا باذن الله
زولة123
| |
|
|
|
|
|
|
|
|
 Re: مذكرات حنكوشة.......1 (Re: zola123)
|
انت عارفة يازولة 123
احسن ميزة في الحناكيش انهم ما شغالين بالناس
زي الاجيال السابقة لهم
ناس في حالهم شديد
وبريئييييييييييييييييييييييين شديييييييد
تركيزهم كتير على الاكاديميات
واكتر حاجة انا بتكيف للحنكوش او الحنكوشة اللابسة نضارة قعر كباية
وتكون قصيرونة يعني مارقة من الواطة يالا يالا
والفنيلة او القميص واصلة الركب
بعد ده كلو
تكون لابسة حجاب
وكمان
محفظة معلقة في الرقبة زي بتاعت حبوبتي
لكن طلعت تاني لزوم الحنكشة
وتكون
عاضة الماوث في خشما
ارجوك عمو
دي بتتعبني
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
حنكوشة3
الغداء أكبر فرصة الزول يشوف فيه العيلة مجتمعة
بابا ما عندو وقت, يجي البيت ينوم عشان يرجع الشغل تاني
خالد سارح في عالم تاني مع اصحابه
مافي غيري انا وماما والصغار, لاكن ديل الواحدة تتونس معاهم في شنو
قالوا انا حنكوشة, امال ناس حمودي وهبة ديل يبقوا شنوا....
ماما تاني ما تعملي لينا البتاعات دي ما باحبها
يا بتي ابوكي طالب الملاح ده ليه يومين
احنا ذنبنا شنو, اكلوها براكم
أبوك دايرك بعدين
حاضر
النمشي نشوف ناس منكوش حسي بيكون اونلاين
- ايوة دقيقة أقفل الاوضة
- المايك ما عارفة ماله ما شغال الليلة
منكوش:
- عاملة كيف مع المزاكرة؟
- ماشي الحال انا ما بيتخاف علي
- انا مستني جيتك بفارغ الصبر
- لاكن انا ما عارفة لحد حسي حاجي السودان ولا لأ
- كيف الكلام ده؟ السودان بلدك وما عندك خيارات
يرن الموبايل وما زلت مستغرقة في الحديث مع منكوش عبر اسلاك الانترنت
منى:
- مبالغة لاكن ساعتين على النت؟
- مالك يا منى قاعدة بتونس مع منكوش
- حسي عليك الله ده اسم زول يتونسوا معاهو؟ وكمان من السودان
- المشكلة وين؟
- انتي حتفضلي طول عمرك كدة غبية, الناس بيفتشوا ناس امريكا ولا كندا وانتي غرقانة مع بتاع السودان ده؟
- معليش الكلام ده لي بعدين انا ما مستعجلة على العرس, بعدين منكوش ده شاب مهذب ونادر القى زيو
- والله هو من ناحية نادر فعلا نادر هاها خليه ينفعك
ما مشكلة حافضل أكلمه, ليه الناس كل تفكيرها بقى مادي بالصورة دي
بعدين حسي زمان لمن ما كانت في انترنت كان حتلاقي ناس امريكا وكندا ديل وين؟
أنا صحيح مرات بيني وبين نفسي باخجل من قصة الحب عبر الاسلاك دي
لاكن الحب الحقيقي وين, ده ما ذنبي عيشتنا المقفولة دي.
قالوا عنو مراهقة , نعم ممكن يكون كدة , لاكنو موجود.. مش أرحم من زول اطلع معاه وانزل وبعد ده يديني اسمو شنو.... شنو.....منى مرة قالتها الكلمة دي لاكن نسيتا, ياخي ناس السودان ديل عندهم تعابير غريبة.
- حنكوشة تعالي
- أيوة يا بابا
- طبعا عارفة انا عمري ما غصبتا عليك حاجة ولا حرمتك من شي
- أكيد يا بابا الله يخليك لينا
- وانا عارفك من ما دخلتي المدرسة من المتفوقين
- بابا في شنو
- طبعا لحد الآن انتي منتظرة موضوع الجامعة ده وانا مستني مناقشته لبعد الامتحانات
انتي يا بتي واعية وعارفة كويس كل الظروف المحيطة بينا وأعتقد لو ناقشتك حسي ما حيأثر عليك
- بابا انتا عايز ترسلني اقرى في السودان. صح؟
- ايوة يا بتي , انا عارف انك طول عمرك بعيدة عنو ويمكن دي غلطتي لاكن انتي عارفة الظروف
طبعا انا بابحث ليك عن الاحسن, لاكن ما حاكون متطمن عليك انا وامك لو رسلناكي تقري بره زي خالد, وانا كمان ما بقدرأضمن ليك حكاية الجامعة هنا.
عشان أنا بت وهو ولد؟
أبدا ما تختي الموضوع كدة, بعدين كونك بت بيفرض علينا حرص أكبر ورعاية ما تفهمي المواضيع بالعكس.
أنا فاهمة يا بابا , لاكن لو كان السودان كويس الطلعك منه انتا وماما شنو وجيتوا تعيشوا في الخليج؟
يا بتي طلعنا عشان نوفر ليكم حياة أحسن وما تفتكري انا حاجدعك لو رسلتك السودان. عارفة أوضتك دي حانقلها زي ما هي هناك, ما حتتعبي في أي شي , حا جيب ليكي عربية عشان ما تشيلي هم المواصلات, الكمبيوتر حتشيليه معاكي, التكييف, الموبايل و....و....و... ما تشيلي أي هم
- عرفتا المطلوب, المجموع.........
يا ربي ما عملتا لينا طريقة لي نسبة فوق ال 100% ليه ؟
ليه مكتوب علينا الشقاء أكتر من غيرنا , انا راضية بالسودان لاكن هو ما راضي بينا ليه, وبيعاملنا زي الابن العاق. أنا أتعب السنة كلها ولو جبتا تحت ال 90 % تتحرم على كليات , وواحدة زيي يمكن أقل ذكاء ميزتها بس انها سودانية من أبناء السودان البارين اللسة في الداخل تخش الكلية الدايراها؟؟؟
منطق ظالم وبلد قاسي قساوة الحجر.حتى الوالد ما بيقسى على أولاده ويفرق بينهم بالصورة دي... ده البلد المرسليني ليه و يقولوا لي بلدك؟؟
ده الوطن البيقولوا لي امشي اترمي في حضنه وهو ضامم ذراعيه....؟؟؟
آآآآآه يا زمن . وبعد ده يقولوا ما عندنا هم غير القراية
.......................
.......................
يتبع
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
حنكوشة4
-ألف مبروك
-الله يبارك فيكي
- أها وبيقيتو على شنو انشاء الله
- والله ياختي ما المتوقعنو ليها , حنكوشة طول عمرها ما بتنزل من 99
- ما هي الثانوية كدة دايما فيها مفاجآت
-شنو يعني الحصل عشان تفتحي بيت البكا ده
-منى أرجوكي .......ما عارفة ليه حاسة بالفشل والهزيمة
-بابا ما حيفرح , وماما ما حتشوفني بالبالطو الابيض خلاص؟
معقولة يا حنكوشة انتي العمرك ما صعب عليكي شي
انتي العمرك كله البتطلبيه تلقيه قدامك ؟
-لاكن فايدة البكا شنو,حترجع ليكي الكم نمرة ديل
-منى انتى ما حاسة بالعلي
-طبعا , انا من زمان عارفة دايرة شنو وحاسباها على قدر قدراتي
آسفة ما قصدي شي يا حنكوشة, بس انتي عارفة انها لعبة وكل سنة شكل
قشي الدموع دي واستعيذي بالله, انتي بنفسك قلتي لي الطب ده اصلو ما كان رغبتك
وكنتي بس دايرة ترضي ناس ابوك وامك
ما أول ولا آخر حنكوشة.....حاولي انظري للموضوع بمنظور آخر
-منظور اسود سواد حظي
-يا بت سواد شنو بس ما عارفة الراجيكي ....عالم تاني وحياة مختلفة
انا متأكدة انك حتحبي السودان ومتشوقة ليه.
شهر يمر على مناحتي والتجهيزات على قدم وساق للسفر
مشاوير السوق المكوكية لشراء ما غمق واسود لونه من ملابس التقول حداد
يا بت ده ما بينفع في السودان, والبنطلونات دي تنسيها من هنا ورايح
حسي البنطلون ده مالو, كان لبستي مع بلوزة طويلة مش استر من اسكيرت يطير مع الهوا وانا طالعة سلم ولا مواصلات؟
يا بت انتي ما حتصلحي الكون اسمعي الكلام
شانيل حقتي مافي, شوفي ريحة خفيفة , جزم واطية ومن دون كعب سودا برضو ولا بنية, ميك اب مافي..............
ماما دي متأكدة من الحاجات دي كيف, معقولة البنات هناك كدة؟ بكرة اشوف بنفسي
-حنكوشة والله انتي حتكوني نكتة في السودان
-داير شنو يا خالد ما وقت هظار خليني ارتب حاجاتي
- عايني بس ما تنزلي في المحطة الغلط, لمن الطيارة تقيف تماما والناس ينزلو
- يا مامااااااا شوفي خالد ده عليك الله
- البيت ما حيكون ليه طعم من دونك
-أول مرة تقول لي كلام زي ده
-عارف , زي ما انتي أول مرة حتسيبينا
........ترقرقت دموعي وانا اتمتم : أذاهبة انا ام عائدة للوطن
وطن بلا احباب ايظل وطن؟
بل حضن امي هو وطن الاوطان
...........................................
...........................................
يتبع
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
حنكوشة 5
الساعة 4 عصرا , والجو لا يبدوا عصرا
سحابة بنية تحف أرض المطار عندما وطئته قدماي لأول مرة
ازدحام غير عادي يملأ طرقاته وأطنان من الأمتعة مكدسة بين الوكاب.
أطفال يبكون هنا, واحدهم ينهر زوجته لتسرع الخطى هناك.
- جايبة معاكي أجهزة كهربائية؟؟
- أيوة : اللاب توب, السي دي بلاير, كاميرة الفيديو , الفي سي آر , الديجيتال كاميرا, لو قصدك معاهم الأدواد الشخصية , جايبة المكواة , السيشوار و...و.....و...
-...................بس ؟
أنا ما عارفة الضابط ده مرقك كيف ’ اكيد أشفق على سذاجتك
- ليه أنا عملتا شنو؟
- ولا حاجة يا حنكوشة, امسكي الشنط ديل أفتش على ناس عمك.....قلتي لي حيكون لابس شنو؟
- أفتكر جلابية وعمة
-....................يا ربي الرحمة !! في كم زول في المطار لابس كدة ؟؟! أعرفه ليكي كيف
مرت ساعة ونحن نقلب في الوجوه ثم جلسنا بعدها فاقدتي الأمل
اقترب رجل يحمل ملامح هادئة يسأل: حنكوشة محمد ابراهيم؟
-أيوة أنا ....
طبعا كان أول لقاء لي بعمي , الاخ الاصغر لوالدي, لاكنه بدا اليوم كأنه أكبر منه بسنوات عدة
ذهبنا الى حيث تقف سيارته وما زلت أفكر كيف ستكون بقية الوجوه. توجهنا أولا لايصال منى الى داخليتها ثم ذهبت أنا وعمي الى منزلهم
الطريق لم يكن بالقصير, لاكن استمتعت به, بالرغم من كون معظمه مغطى بتلك السحابة البنية اللعينة.
شيئا فشيئا ظهرت معالم المدينة, بالفعل تختلف عن كل ما رأيته
الهوا ريحته غير, والناس شكلهم غير و ....ز
-سلمي على سعاد وسارة بنات عمك يا حنكوشة, ده أحمد الصغير
امتلأ المنزل مساءا بالمستقبلين, حضروا للسلام ورؤية ابنة محمد ابراهيم
- ما شاء الله بقيتي عروسة, آخر مرة شفتك كنتا شايلاكي على يديني ديل.
- لاكن يا حنكوشة تفاح الخليج والمكيفات ما فتحن لونك شوية ...( تضحك بسماجة)ء)
-والله بس محمد الخالق الناطق.
-كيف ناس امك وأخوانك , ومالها سيدة ما جات معاكي؟ خلاص كبرت على السودان( دي مالها ومال امي حسي)
مضىذالك اليوم المرهق بصعوبة ولم أتحمل بعدها مزيدا من الونسة والحكايات....سألت عن غرفتي فأشار عمي لتلك الأولى...
في البداية لم ألحظ كوني الوحيدة من أفراد المنزل التي ستحظى بغرفة لمفردها, لآكنى لمحت نظرة غريبة في أعين سعاد وسارة. ألقيت بنفسي على السرير وخلدت الى النوم بسرعة.
يصحوا الناس هنا في حوالي الخامسة... الدنيا لسة ظلام لاكن البيت مليان حركة
استمتعت بالشاي في ذالك الصباح مع مجموعة من الجيران, قطعه صوت عمي مناديا
لاستعد للحاق بمكتب التسجيل.
- ايوة اسمها حنكوشة محمد ابراهيم .... السن 18 سنة.....
- هي وييييينا حنكوشة دي, ما تجي تسجل بي نفسها( قالتها تلك المرأة كأنها تحمل لي حقدا لا اعلم سببه)ء)
سمعتها وانا خلف الباب فدخلت : صباح الخير يا خالة
- خالة في ..... , انا ما خالة
- عفوا يا ااستاذة ( خالة دي بعدين عرفتا معناها )ء)
المرأة دي ما شاايفاني زي الأطرش في الزفة وجاية تزيد ارتباكي, مكان مكتب التسجيل من الرستنج روم ما عارفاه......
لسة تاااااني مشوار للكشف الطبي و.... و... و.. يا الله !! كان المفروض اصل أبدر من كدة عشان أخلص كل الاجراءات دي
منى غطست وين؟؟ محتاجاها بشدة هذه الأيام
ضغت أرقام هاتف منى مسرعة : انتي وينك, ما شفتي الحصل اليوم؟
- هاها.. أها كيفك يا حنكوشة انطباعاتك؟ أكيد لسة مخلوعة من ساعة وصولك
- مخلوعة بس؟ انا راسي بتلف وما عارفة الحاصل شنو
- والله قلبي معاكي, بس عارفة عندي مليون حاجة كان لازم اعملها برضو
أها بكرة كيف؟
- انا الطريق مشيتو مع عمو 5 مرات , خلص حفظته ما في خوف علي
عفوا الأوتوبيس البيودي.... بيقيف وين؟ مش موقف ال.... من هنا برضو؟
لو سمحتي يا عمة( كدة اضمن) الباص الوقف ده بيودي وين؟
الناس ديل بيعاينوا لي مبتسمين وبيمشوا تاني ليه؟ أنا اسئلتي دي غربية للدرجة دي؟
أنا ما أركب الباص ده, أنا متذكرة السكة كويس
أنسب مقعد في الأول وبجانب النافذة, عشان انزل طوالي. جلست ممسكة بحقيبتي جيدا ومتذكرة الوصايا العشر بتاعة سعاد لرحلة آمنة في المواصلات.
الولد الكمساري بيعمل أصوات غريبة , لاكن فهمتا من حركة الركاب انه عايز التذكرة
لاكن يا حنكوشة ما نسيتي تشتري تذاكر قبل ما تطلعي, ولا هم بيدفعوا ليه وبس
- ..... يا أخت ورانا غيرك
- داير كم wait
مافي عندي الا اوراق تبدو بقيمة كبيرة مددتها على استحياء
ولم أشعر في حياتي بحرج كما شعرت اليوم عندما التفت جميع الركاب لتلك الحنكوشة التي لا تعرف عد النقود, انقذني من الموقف شاب مهندم دفع لذلك الصبي غريب الأطوار والأصوات. جلست بعدها والخجل يملأني أنظر من خلال النافذة....
.....مضى الوقت والمشاهد ليست كتلك التي رأيتها في رحلاتي مع عمو وسعاد
- وقف هنا stop
قصدي أقيف هنا .... نزلت مسرعة وانا اتمتم
ضعتي في المواصلات يا حنكوشة
......................................
......................................
يتبع
(عدل بواسطة zola123 on 12-27-2002, 10:43 AM)
| |
|
|
|
|
|
|
|
|
|
Re: مذكرات حنكوشة.......1 (Re: zola123)
|
ويلكم ان براداديس
حمدالله على السلامه يا حنكوشه وهلا بيك البلد نورت اذا احتجت اي مساعده ما تترددي نحنا اخواتك السبقناك في الحنكشه والدرش التمام
يا بتي امانه ما راجياك مصايب نصيحتي ليك:
اوعي تنسي الكريم بتاع الشمس عشان ما تبقي زرقه اصلو الشمس هنا عجيبه وبعدين لازم تختي ماسك بالليل عشان وشك يحتفظ بنضارتو وما تنسي تطلبي من الكمساري باقي.. باقي القروش البسموها.....ز بسموها يا خ ما عارفه الكوينز المدوره دي هنا بقولوليها شنو؟؟
وخليكي ت نجيضه شيلي معاك مق خاص عشان ما تشربي من الكوز العام ولو قدرتي تشيلي مطاره اقصد زمزميه يكون احسن طبعا وبالمناسبه كان عايزه مكان فيهو شرايط جنيفر لوبيز او برتني سبيررس ماعندك مشكله
اهلا اهلا بيك في نادي الحنكشه وما تشيلي اي هم يا فرده
| |
|
|
|
|
|
|
| |
zola123
wadazza
motaz
نصار
garjah
ايهاب
willeim andrea
فيس بوك
تويتر
انستقرام
يوتيوب
بنتيريست