انا ادين لهذا المحمود....علي علاته..التي لا تهمني كثيرا...ببعض وجداني..والكثيييييييييييير من اللحظات الجميله.. موضوعي اليوم ..معني به في المقام الاول..الاساتذه المعانا هنا في البورد...بقيادة المتخصص في نحت الجمال..الموصلي...وحمزه سليمان ...المدهش في كل شئ..وكل ذي حس بينكم احبتي ..وهم كثر يعودني الزمن لنهاية الثمانينات ...كانت الدنيا غضه ...تموج بكل الاطياف الفنيه والسياسيه...جمال الحبشي ..كان عازف جيتار ...تحتار في مهارته ...لا يفهم كثير من العربي...لكن كان له حس موسيقي مدهش ..معظم الفنانين كانو يحبذونه ..لانه وصله جاهزه ..وركيزه جاهزه تستند عليها اذا اصاب حفلتك الخمول..كان من اعز اصدقائي.....يلعب الحب يا ام سماح ..كامله ..من طقطق للسلام عليكم ..دون ان يفقه من كلماتها شيئا ...وهو الوحيد الما ضروري تعمل ليهو بروفه..احضرت له مره شريط لعقد الجلاد ..فقال لي ..ده شوغول عالامي...يقصد شغل عالمي..لكن لو عايز تسمع غونا سوداني ساح ..اسماع محمود عبد العزيز...انا قلت ..الحبشي ده جن ولا شنو!!!!!؟ محمود عبد العزيز ده ممثل!!!!!ونسيت الامر...ثم كان يوم...وانا في اتجاهي للمدرسه..اذا بصوت كأنه الكروان... الريح مشت بي غير ما تشتهي نفسي.. واصبحت زي شجرا..سابو الخريف منسي ما بين صفق موحود لا فيه .ضل لا عود الناس تصابح العيد .وانا بالحزن موعود يااااااااااااااا للهول..طوالي دخلت محل الشرايط...ومن غير ما اسأل ده منو حتي..كنت شاكي في انو عمار السنوسي...قلت ليهو ..اديني الشريط الشغال ده...وكان اول عهدي بمحمود..... من يومها ..ولهذا الرجل ما له .في صياغة احاسيسي..وحتي اعطائي بعض السكن حال الاجهاد لكن...ولدهشتي ..كان في ناس بقولو لي ...انت بتسمع الزول الهناق ده كيف؟؟؟ فيا عزيزي الموصلي..هل الحس الفني موضع لختلاف عميق للدرجه دي..؟؟؟؟ يعني ..يستحيل تلقي زول يقول علي الزهره ..انها شينه...في نفس الوكت .اانا مستغرب ..ان يبلغ فساد المزاج باحدهم ان لا يحب هذا المحمود..المسأله بالنسبه لي عايزه ..شوية فذلكه اكاديميه..وطرح موضوعي ...المشكله وين؟ بعدين هل افتتاني بهذا الرجل...لانو جد فنان زي ما انا بقول ...ولا حاجه زي تعلق ابوي بالكابلي ..وجدي بالجاغريو...وكده يعني؟؟ مسأله اساسها ..ارتباطو..بي ذكريات جميله ..واشياء ..لا تشتري علي حد قول امل دنقل.. افتح الباب الان .لنقاش ..موضوعي ..كما تعودت منكم
05-04-2002, 11:04 AM
Elmosley
Elmosley
تاريخ التسجيل: 03-14-2002
مجموع المشاركات: 34683
عزيزي داف اولا اهنئك علي موضوعك الجميل عن محمود عبد العزيز الذى اعتبره واحد من المغنيين الخطيرين في تاريخنا المعاصر وله قدره علي تنويع كل الالحان التي يغنيها مما جعل الكثيرين يقلدونه وهذا دليل نجاح باهر ولكن الي متي يستمر هذا النجاح هذا يتوقف علي النصح الذي اسديته له في التسعينيات عندما شكلت ورشه موسيقيه لتخرج عملا اذا تواصل فيه سيكون من الخالدين وقلت ان جماهيرك التي تهتف لك الان وانت بلا انتاج فني سوف تاخذ بعض الحذر من عملك الجديد فلا تخف بل واصل التجديد ولكنه لم يسمع الا صوت المعجبين وهذا لعمري خطا كبيرا خصوصا انقياده تجاريا لسوق الكاست واخاف عليه من مصير من رجوا بلادنا في زمن ما ولكنهم الان نسيا منسيا خير له ان يختار طزيق الخالدين بدا بالخليل مرورابالكاشف ووردي انتاهاء بمصطفي وعركي ومن هم في الطريق
05-04-2002, 08:33 PM
Dafi
Dafi
تاريخ التسجيل: 04-23-2002
مجموع المشاركات: 460
شكرا استاذنا الكبير ..يوسف الموصلي من حقي ان اناطح النجوم فرحا..فها انذا ...دون ان استغرق في النوم لاحلم...اقف وجها لوجه ..مناقشا هامه فنيه ...زيك بالنسبه لما ذكرته عن انقياد محمود التجاري...الواضح ان الرجل ضحيه ..وليس جاني....حكي لي صديق انه ذات مره ذهب اليه في بيته ببحري المزاد ...وده بيت امه بالمناسبه...فوجد البيت متهالكا ...وكان محمود جالس بالرداء..ابو تلاته الف داك ...وحوله مجموعة شباب ..بطانه تباريه محل ما يمشي....سااااااااي بس...وتكلم معه صديقي انه عايزه في حفله زواج بمدني...قال ...والعهده علي صديقي ..وجدته طيبا لابعد حد ...وكان علي استعداد .ان يجاملني ..لكن مدير اعماله المترف حد النخاع رفض!!!!! الرجل ..لا يملك عربه ولا بيت ويرتدي من الملابس ابسطها واضح انو ضحيه منتفعين تستغل طيبته لتسيره كيف شاء المشكله انو ..اصحاب الرأي السديد الزيكم...اما هجروا البلد...او استغرقتهم هموم الدنيافي السودان الرجل كما يبدو لي عزيزي الموصلي ..قابل للتوجيه...فمن يأخذ بيده!!؟ بالمناسبه...هل تعلم ..انه من هذا الكم الهائل من اشرطته..ما زال شريطي ...خلي بالك ...وسكت الرباب ..الوحيدين الما زالو يطبعوا ..ويباعوا.. ما ينفع الناس ..يبقي...اما الزبد فيذهب جفاء شكرا مره اخري
05-04-2002, 10:49 PM
Elmosley
Elmosley
تاريخ التسجيل: 03-14-2002
مجموع المشاركات: 34683
عزيزى دافع انني شديد الاهتمام بامر محمود ولدي اعتقادا جازما بانه لم يخرج كنوزه الصوتيه بعد والذهب ياصديقي هو عباره عن كتله ان لم يجد صائغا عموما الاخبار التي سقتها جد محزنه ونتمني له ان يفكر جادا في ان يلتحق بنادي الخالدين ولكن الثمن المؤقت لذلك الالتحاق ربما يكون غاليا
ذات فرح، وكان الزمان نهاية العام 86، كنت وبعض الأحباب نشارك أخانا الفنان جمال حسن سعيد، إمبراطور البسمة، كنا نشاركه حفلا أقامته له شقيقته الكبرى فى امتداد ناصر بمناسبة زواجه، وقد تواجد العديد من المغنيين فى تلك الأمسية لمشاركة جمال، وكانو جميعهم من شباب المغنيين الغير معروفين وقتها
فضلت أنا ومعى تلك الصحبة أن ننتبذ ركنا قصيا، ونحن من يأسرنا الطرب الحقيقى والغناء النبيل، ونحن من يمسك بتلابيب أرواحنا أناس مثل أبو عركى ومحمد الأمين وعلى السقيد، وقبلهم الأفذاذ الكبار جميعهم عثمان حسين والتاج مصطفى وحسن عطية، لم يتسرب ذلك الغناء فى ذلك الحفل الى احاسيسنا، وكان يدخل من الأذن اليمنى ليخرج من اليسرى
وبعد جولات طوال من الغناء الخاوى، جاءنا صوت شدنا فجأة ودون سابق إشعار، وتركنا ما بين أيدينا وانشدهنا مع ذلك الصوت السماوى الغريب، وايضا ودون تخطيط وجدنا أنفسنا منجرفين ذخابا الى حيث الحفل، ونحن مشدوهين نستمع
قول النصيحة ورينى مالك بالهجر
الله، من هذا الفتى الماسى الذى خلق فينا كل هذه النشوة، وومن أين أتى؟؟ سألنا وأتانا الجواب وقالو اسمه محمود عبد العزيز، وقلنا لمن معنا، تربصو بهذا الشادى، فوالله انه المطرب الحقيقى، وستجدونه يوما يناطح هامات الإبداع ويحلق مع النجوم
وقد كان، وصدق حسنا، ومن يومها أصبح هذا المغرد
محمودا وعزيزا، ولأقصى نهايات الحب
05-05-2002, 07:53 AM
brakat
brakat
تاريخ التسجيل: 02-04-2002
مجموع المشاركات: 247
اخي دافع تحياتي الحارة اولا اهنئك على طرحك الرائع ده والله فعلا محمود قامة فنية وانا واحد من اشد المعجبين لهذا الفنان الرائع اكيد واجهت نفس الناس البيقولوا ليك يا خي انت بتسمع للزول ده كيف لكن برضو بنسمع ليهو مع انه ما بنعرف كتير في الفن لكن بارتاح ليهو بعد كده الواحد يستشهد بشهادة الاستاذ الموصلي الهامة الموسيقية الرائعة
بس نتمني من محمود ان يلتفت الى فنه بعض الشي ليتحفنا ويشنف اذننا بصوته الرائع اتمني له كل توفيق في حياته
ـــ أسير الغرام يا قلبي ظلموك الحبايب سقوك الآلام يا قلبي
05-05-2002, 01:32 PM
Elmosley
Elmosley
تاريخ التسجيل: 03-14-2002
مجموع المشاركات: 34683
الاحباب اب امنه بركات اسير الغرام اننا جميعا نعلم انه مسكون بالابداع ولكن او تذكرون حيدر بورتسودان انه موهبه فذه كان يمكن للسودان ان يحظى بقامة موسيقية كبيرة لولا الميل للكسب المؤقت انني كلما اتذكر حيدر اخاف علي محمود ويابركات هل لك علاقه بمبارك حسن بركات
الأخ الموصلي وجميع الإخوة لكم التحايا والحب أخي الموصلي هناك مغني ذكرني له حديثكم عن محمود عبد العزيز وحيدر بورتسودان ، وهو من أبناء الديم وقد سمعت بأنك قد تبنيته في بداياته الفنية وإن أول غناء له كان في زواجك أنت أخي الموصلي وأنك تمت له بصلة قرابة ، هو عماد الكاشف أولا : هل هذا صحيح ؟ ثانيا : إذا كان ذلك صحيحا لماذا لم ترعه إلى النهاية
05-05-2002, 04:36 PM
Elmosley
Elmosley
تاريخ التسجيل: 03-14-2002
مجموع المشاركات: 34683
اخي ديامي كيف اخبارك طولنا ماشفناك في بوستات المزيكه المهم عماد الكاشف انا عمو وابه ابن عمتي لزم كما ان والدته قريبتي من كل الجهات وهو شاب في غاية الطموح والتهذيب ومشروعه الفني تاثر بهجرته ومساعدتي الفنية له تاثرت بهجرتي لكنه في البال وربنا يجمع
05-05-2002, 04:58 PM
brakat
brakat
تاريخ التسجيل: 02-04-2002
مجموع المشاركات: 247
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة